1. madanakalpaḥ

Adhikarana 1 (1-2) · Śloka 2

অথাতো মদনকল্পং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

চিকিত্সিতস্থানে তু তত্র তত্র বিহিতবমনবিরেচনযোঃ প্রযোগান্ বিস্তরেণাভিধাতুং চিকিত্সাধিকৃতযোগস্থানরূপকল্পস্থানমুচ্যতে| যদ্যপি চিকিত্সাযাং বস্তেরপি প্রতিপাদিতত্বাদ্বস্ত্যভিধাযকং সিদ্ধিস্থানমপি চিকিত্সাঙ্গতযাঽভিধাতব্যং, তথাঽপি পঞ্চকর্মণামৌত্সর্গিকপ্রবৃত্তৌ বমনবিরেচনপূর্বিকৈব বস্তিকর্মপ্রবৃত্তির্ভবতীতি কৃত্বা বমনবিরেচনাভিধাযকং কল্পস্থানমেব বস্ত্যভিধাযকসিদ্ধিস্থানাদগ্রেঽভিধীযতে| বমনবিরেচনানাং কল্পাস্তিষ্ঠন্ত্যস্মিন্নিতি কল্পস্থানম্| কল্পাভিধানেঽপি বিরেচনস্যৌত্সর্গিকপ্রবৃত্তৌ বমনপূর্বিকৈব প্রবৃত্তির্ভবতীতি বমনপূর্বকত্বাদ্বিরেচনস্য বমনকল্পা এবাগ্রেঽভিধাতব্যাঃ| বমনকল্পেষ্বপি বমনদ্রব্যশ্রেষ্ঠত্বান্মদনফলস্যৈবাদৌ কল্পোঽভিধীযতে; শ্রেষ্ঠত্বং চ মদনফলস্য ‘বমনদ্রব্যাণাং মদনফলানি শ্রেষ্ঠতমান্যাচক্ষতেঽনপাযিত্বাত্’ ইত্যনেনাত্রৈব বক্ষ্যতি||১-২||

Adhikarana 2 (3) · Śloka 3

অথ খলু বমনবিরেচনার্থং বমনবিরেচনদ্রব্যাণাং সুখোপভোগতমৈঃ সহান্যৈর্দ্রব্যৈর্বিবিধৈঃ কল্পনার্থং ভেদার্থং বিভাগার্থং চেত্যর্থঃ , তদ্যোগানাং চ ক্রিযাবিধেঃ সুখোপাযস্য সম্যগুপকল্পনার্থং কল্পস্থানমুপদেক্ষ্যামোঽগ্নিবেশ!||৩||

কল্পার্থং দর্শযন্নাহ- অথ খল্বিত্যাদি| অথশব্দঃ প্রাক্প্রস্তুতে| খলুশব্দঃ প্রকাশনে| বমনবিরেচনার্থমিতি বমননিমিত্তং বিরেচননিমিত্তং চ| বমনবিরেচনদ্রব্যাণামিতি মদনফলাদিত্রিবৃদাদীনাম্| অন্যৈরিতি সুরাসৌবীরকাদ্যৈঃ কোবিদারাদিপ্রকারৈশ্চ| অন্যৈরিত্যস্য বিশেষণং- সুখোপভোগতমৈরিতি| অত্র সুখাযোপভোগো যেষাং তে সুখোপভোগাঃ, ন তদাত্বসুখ উপভোগো যেষাং তে সুখোপভোগাঃ, তথাহি তদাত্বেঽসুখোপভোগানাং কোবিদারাদীনামগ্রহণং স্যাত্| কল্পনার্থমিতি পদস্য ক্রিযযা সম্বন্ধমদর্শযিত্বৈব তদ্ব্যাখ্যানপ্রত্যযনার্থং ব্যাকরোতি ভেদার্থং বিভাগার্থং চেত্যর্থ ইতি; তত্র ভেদার্থমিতি বমনবিরেচনদ্রব্যপ্রযোগভেদার্থং, তে চ প্রযোগভেদাঃ “ত্রযস্ত্রিংশদ্যোগশতং প্রণীতং ফলেষু” (সূ.অ.৪) ইত্যাদিকাঃ; বিভাগার্থমিতি অত্র ‘ফলপিপ্পলীনাং দ্বৌ ভাগৌ কোবিদারাদিকষাযেণ’, ইত্যাদিবক্ষ্যমাণদ্রব্যবিভাগার্থম্| উপোদ্ঘাতং সমাপ্য প্রকৃতমাহ- তদ্যোগানামিতি; বমনবিরেচনদ্রব্যপ্রযোগাণম্| ক্রিযাযা ইতিকর্তব্যতাযা বিধিঃ ক্রিযাবিধিঃ, স্বরসাদিরূপতযা করণানীতি যাবত্; তস্য ক্রিযাবিধের্বিশেষণং- সুখোপাযস্যেতি; সুখার্থঃ সুখো বা উপাযো যস্য স সুখোপাযঃ, তস্য সম্যগুপকল্পনার্থমিতি সম্যগুপদেশার্থম্||৩||

Adhikarana 3 (4) · Śloka 4

তত্র দোষহরণমূর্ধ্বভাগং বমনসঞ্জ্ঞকম্, অধোভাগং বিরেচনসঞ্জ্ঞকম্; উভযং বা শরীরমলবিরেচনাদ্বিরেচনসঞ্জ্ঞাং লভতে||৪||

বমনবিরেচনশব্দার্থং বিভজতে- তত্রেত্যাদি| ঊর্ধ্বং মুখেন দোষনির্হরণং ভজত ইতি ঊর্ধ্বভাগম্| অধো গুদেন দোষনির্হরণং ভজত ইতি অধোভাগম্| বমনবিরেচনযোরপি কদাচিদ্বিরেচনসঞ্জ্ঞাং ষড্বিরেচনশতাশ্রিতীযোক্তাং দর্শযন্নাহ- উভযমপীত্যাদি| ন চৈবং সতি বমনবিরেচনবন্নিরূহেঽপি বিরেচনসঞ্জ্ঞাপ্রসক্তিরুদ্ভাবনীযা , যতঃ পঙ্কজশব্দবদিযং বিরেচনসঞ্জ্ঞা বমনবিরেচনযোরেব যোগরূঢ্যা বর্ততে||৪||

Adhikarana 4 (5) · Śloka 5

তত্রোষ্ণ-তীক্ষ্ণ-সূক্ষ্ম-ব্যবাযি-বিকাশীন্যৌষধানি স্ববীর্যেণ হৃদযমুপেত্য ধমনীরনুসৃত্য স্থূলাণুস্রোতোভ্যঃ কেবলং শরীরগতং দোষসঙ্ঘাতমাগ্নেযত্বাদ্ বিষ্যন্দযন্তি, তৈক্ষ্ণ্যাদ্ বিচ্ছিন্দন্তি, স বিচ্ছিন্নঃ পরিপ্লবন্ স্নেহভাবিতে কাযে স্নেহাক্তভাজনস্থমিব ক্ষৌদ্রমসজ্জন্নণুপ্রবণভাবাদামাশযমাগম্যোদানপ্রণুন্নোঽগ্নিবায্বাত্মকত্বাদূর্ধ্বভাগপ্রভাবাদৌষধস্যোর্ধ্বমুত্ক্ষিপ্যতে, সলিলপৃথিব্যাত্মকত্বাদধোভাগপ্রভাবাচ্চৌষধস্যাধঃ প্রবর্ততে, উভযতশ্চোভযগুণত্বাত্| ইতি লক্ষণোদ্দেশঃ||৫||

সম্প্রতি দ্বযোরপি বমনবিরেচনদ্রব্যযোঃ সাধারণোষ্ণতীক্ষ্ণত্বাদিগুণযোগকৃতদোষবিষ্যন্দনাদিসাধারণকার্যদর্শনপূর্বকমগ্নিবায্বাত্মকত্বাদিবিশিষ্টধর্মযোগকৃতং বিশিষ্টং চ কার্যং বমনবিরেচনরূপং দর্শযন্নাহ- তত্রোষ্ণেত্যাদি| উষ্ণমিতি উষ্ণবীর্যম্| স্ববীর্যেণেতি স্বপ্রভাবেণ| ধমনীরনুসৃত্যেতি সকলদেহগতা ধমনীরনুসৃত্য; সকলদেহগতধমন্যনুসরণং চ বীর্যেণ জ্ঞেযং, ন সাক্ষাত্| আগ্নেযত্বাদ্বিষ্যন্দযন্তীতি বিলীনং কুর্বন্তি| বিচ্ছিন্দন্তি ছিন্নং কুর্বন্তি| পরিপ্লবন্ ইতস্ততো গচ্ছন্| অসজ্জন্নিতি ন ক্বচিদপি সঙ্গং গচ্ছন্| অণুপ্রবণভাবাদিতি অণুত্বাত্ প্রবণভাবাচ্চ; প্রবণত্বমিহ কোষ্ঠগমনোন্মুখত্বম্, অণুত্বং চ অণুমার্গসঞ্চারিত্বম্| উদানপ্রণুন্ন ইতি উদানবাযুপ্রেরিতঃ| অগ্নিবায্বাত্মকত্বাদিতি অগ্নিবাযূত্কর্ষবত্ত্বাত্| ঊর্ধ্বভাগপ্রভাবাদিতি ঊর্ধ্বভাগদোষহরত্বরূপপ্রভাবাত্| এবং সলিলপৃথিব্যাত্মকত্বমপি ব্যাখ্যেযম্| উভযতশ্চেতি ঊর্ধ্বমধশ্চ ক্ষিপ্যত ইত্যর্থঃ| উভযগুণত্বাদিতি অগ্নিবায্বাত্মকত্বাত্ সলিলপৃথিব্যাত্মকত্বাদূর্ধ্বাধোভাগপ্রভাবাচ্চেত্যর্থঃ| ইতি লক্ষণোদ্দেশ ইতি অনন্তরগ্রন্থেন বমনবিরেচনদ্রব্যস্বরূপাভিধানং কৃতমিত্যর্থঃ| অত্র চ প্রকরণে সামান্যেনৈব বমনবিরেচনদ্রব্যাণাম্ ‘আগ্নেযত্বাদ্বিষ্যন্দযন্তি’ ইত্যনেনাগ্নেযত্বং প্রতিপাদিতং; পুনশ্চ বিশেষেণ ‘অগ্নিবায্বাত্মকত্বাত্’ ইতি পদেন বমনদ্রব্যস্যাগ্ন্যাত্মকত্বং প্রতিপাদ্যতে; তেন, সামান্যে বিশেষে চ বমনদ্রব্যাণামাগ্নেযত্বপ্রতিপাদনাত্ প্রকৃষ্টমাগ্নেযত্বং ভবতি; বিরেচনদ্রব্যাণাং তু সামান্যোক্তাগ্নেযত্বসম্বন্ধাদ্ বিশেষগুণকথনপ্রস্তাবে চ সলিলপৃথিব্যাত্মকত্বাভিধানাদ্বমনদ্রব্যাপেক্ষযাঽপকৃষ্টমাগ্নেযত্বং ভবতি| তথাহি সুশ্রুতেঽপি বমনবিরেচনযোরপ্যাগ্নেযত্বমুক্তং- “সরত্ব-সৌক্ষ্ম্য-তৈক্ষ্ণ্যৌষ্ণ্য-বিকাশিত্বৈর্বিরেচনম্| বমনং চ হরেদ্দোষান্ প্রকৃত্যা গতমন্যথা” (সু.চি.অ.৩৩) ইত্যনেন| যচ্চাত্রোচ্যতে-বমনং যদ্যূর্ধ্বভাগহরত্বপ্রভাবাদূর্ধ্বযতি, তদাঽগ্নিবায্বাত্মকত্বাদিতি হেতুবর্ণনং ন যুজ্যতে; যতঃ, যত্ সোপপত্তিকং কার্যং ন ভবতি তত্ প্রভাবকৃতমিতি ব্যপদিশ্যতে; উক্তং হি- “প্রভাবোঽচিন্ত্য উচ্যতে” (সূ.অ.২৬) ইতি| তন্ন, যতঃ প্রভাবস্যৈবেহ বমনকার্যে বায্বগ্ন্যাত্মকগুণতযা বায্বগ্ন্যাত্মকত্বং হেতুরুপদৃ(দি)শ্যতে, ন তু বায্বগ্ন্যাত্মকত্বং স্বতন্ত্রো বমনহেতুঃ; তথাহি সতি যদন্যদপি বায্বগ্ন্যাত্মকমূর্ধ্বভাগদোষহরত্বপ্রভাবরহিতং, তদপি বমনকরং স্যাত্; যথা- কটুকরসে দ্রব্যে তত্ স্যাত্; তস্মাত্ প্রভাবগুণতযৈব হেতুবর্ণনম্| এবং বিরেচনদ্রব্যেঽপি পূর্বপক্ষসিদ্ধান্তাবনুসর্তব্যৌ||৫||

Adhikarana 5 (6) · Śloka 6

তত্র ফল-জীমূতকেক্ষ্বাকু-ধামার্গব-কুটজ-কৃতবেধনানাং, শ্যামা-ত্রিবৃচ্চতুরঙ্গুল-তিল্বক-মহাবৃক্ষ-সপ্তলা-শঙ্খিনী-দন্তী-দ্রবন্তীনাং চ, নানাবিধদেশকালসম্ভবাস্বাদ-রস-বীর্য-বিপাক-প্রভাবগ্রহণাদ্ দেহ-দোষ-প্রকৃতি-বযো-বলাগ্নি-ভক্তি-সাত্ম্য-রোগাবস্থাদীনাং নানাপ্রভাববত্ত্বাচ্চ , বিচিত্রগন্ধ-বর্ণ-রস-স্পর্শানামুপযোগসুখার্থমসঙ্খ্যেযসংযোগানামপি চ সতাং দ্রব্যাণাং বিকল্পমার্গোপদর্শনার্থং ষড্বিরেচনযোগশতানি ব্যাখ্যাস্যামঃ||৬||

সম্প্রতি কল্পস্থানবক্তব্যতযা ষড্বিরেচনপ্রযোগশতান্যনতিসঙ্ক্ষেপবিস্তরপ্রযোগোপদর্শনপূর্বকং প্রতিজানীতে- তত্র ফলেত্যাদিনা ষড্বিরেচনযোগশতানি ব্যাখ্যাস্যাম ইত্যন্তেন| তত্র কৃতবেধনান্তানাং বিচ্ছেদপাঠেন বমনপ্রযোগপ্রযোজ্যত্বং, শ্যামাদীনাং বিরেচনপ্রযোগপ্রযোজ্যত্বং চ দর্শযতি| অত্রৈব বমনে বিরেচনে চৈকৈকেষাং পুনর্বস্তূনাং মদনফলাদীনাং শ্যামাদীনাং চ বহবঃ প্রযোগা অভিধীযন্তে, ন পুনরেকৈকমেব দ্রব্যং বমনকারকং বিরেচনকারকং বা; স্বল্পসঙ্খ্যাপ্রযোগেণ গ্রহণসুখতা বমনবিরেচনযোগস্য ভবতি, কার্যং চ সিধ্যতীত্যাশঙ্ক্যাহ- নানাবিধেত্যাদি যাবদ্রোগাবস্থাদীনাং নানাপ্রভাববত্ত্বাচ্চেতি| অস্যার্থঃ- যস্মান্নানাবিধদেশকালসম্ভবাঃ, নানাবিধাস্বাদাঃ, নানাবিধবীর্যাঃ, নানাবিধবিপাকাঃ, নানাবিধপ্রভাবাশ্চ মদনফলাদিকা ওষধ্যঃ, তথা তত্সংস্কারকাঃ কোবিদারাদিকা ওষধ্য উপলভ্যন্তে; পুরুষাশ্চ দেহ-দোষ-প্রকৃতি-বযো-বলাগ্নি-ভক্তি-সাত্ম্য-রোগাবস্থাভিন্না নানাবিধা দৃশ্যন্তে; তেন নৈকং দ্রব্যং সর্বস্মিন্ দেহদোষাদৌ যৌগিকং, সর্বত্র কালে বা প্রাপ্যতে সর্বত্র দেশে বা; তস্মাদ্দেহদোষাদিনা ভেদবতি পুরুষে বহূন্যেব দ্রব্যাণি বহুভিশ্চ প্রযোগৈরুপকল্পিতানি যথাযোগ্যতযা যথাপ্রাপ্তি চ প্রযোক্তুং শক্যন্তে; অতো বহুনামেব মদনাদিদ্রব্যাণাং বহুপ্রকারপ্রযোগাণামুপন্যাসো যুক্ত ইতি ভাবঃ| গ্রহণাত্ উপলম্ভাত্| দেহো নানা স্থূলকৃশাদিভেদেন, ভক্তিঃ ইচ্ছা, অবস্থাশব্দেনেহ রোগাবস্থৈব গ্রাহ্যা, আদিশব্দেনেহ সত্ত্বাহারযোর্গ্রহণম্| ভূরিবিরেচনপ্রযোগোপদর্শনপ্রযোজনান্তরমপ্যাহ- বিচিত্রেত্যাদি| নানাবিধগন্ধ-বর্ণ-রসতযা প্রযোগে তত্কালমুত্তরকালং চ সুখার্থমিত্যর্থঃ| অথ কিং প্রভেদান্মদনফলাদীনাং ষট্প্রযোগশতানি ভবন্তি, যেনাধিকাঃ প্রযোগা নাভিধীযন্ত ইত্যাশঙ্ক্যাহ- অসঙ্খ্যেযেত্যাদি| বিকল্পমার্গোপদর্শনার্থমিতি অধিকপ্রযোগকল্পনাসমর্থান্ ভিষজঃ প্রতি এতত্ ষট্প্রযোগশতোপদর্শনং কর্তব্যাধিকপ্রযোগকল্পনামার্গোপদর্শকং, তেনাপরেঽপ্যত্র প্রযোগাঃ কল্পনীযাঃ; গ্রন্থে নিঃশেষপ্রযোগানভিধানং প্রযোগাণামসঙ্খ্যেযত্বেনাশক্যত্বাদেব| অনতিবিস্তরেণ ষট্প্রযোগশতাভিধানং মন্দবুদ্ধিসংব্যবহারার্থমিতি ভাবঃ| উক্তং হ্যন্যত্র- “এতাবন্তো হ্যলমল্পবুদ্ধীনাং ব্যবহারায, বুদ্ধিমতাং চ স্বালক্ষণ্যানুমানযুক্তিকুশলানামনুক্তার্থজ্ঞানায” (সূ.অ.৪) ইতি||৬||

Adhikarana 6 (7) · Śloka 7

তানি তু দ্রব্যাণি দেশ-কাল-গুণ-ভাজন-সম্পদ্বীর্যবলাধানাত্ ক্রিযাসমর্থতমানি ভবন্তি||৭||

সম্প্রতি বমনবিরেচনদ্রব্যাণাং দেশাদিসম্পত্ত্যা গুণোত্কর্ষং দর্শযন্নাহ- তানীত্যাদি| দেশাদিভিশ্চতুর্ভিঃ সম্পচ্ছব্দঃ প্রত্যেকমভিসম্বধ্যতে| ভাজনং ভেষজস্থাপনস্থানম্| বীর্যস্য বলং বীর্যাধিকত্বমেব||৭||

Adhikarana 7 (8) · Śloka 8

ত্রিবিধঃ খলু দেশঃ- জাঙ্গলঃ, আনূপঃ, সাধারণশ্চেতি| তত্র জাঙ্গলঃ পর্যাকাশভূযিষ্ঠঃ, তরুভিরপি চ কদর-খদিরাসনাশ্বকর্ণ-ধব-তিনিশ-শল্লকী-সাল-সোমবল্ক-বদরী-তিন্দুকাশ্বত্থ-বটামলকীবনগহনঃ, অনেকশমী-ককুভ-শিংশপাপ্রাযঃ, স্থিরশুষ্কপবনবলবিধূযমানপ্রনৃত্যত্তরুণবিটপঃ, প্রততমৃগতৃষ্ণিকোপগূঢতনুখরপরুষসিকতাশর্করাবহুলঃ, লাবতিত্তিরিচকোরানুচরিতভূমিভাগঃ, বাতপিত্তবহুলঃ, স্থিরকঠিনমনুষ্যপ্রাযো জ্ঞেযঃ, অথানূপো হিন্তালতমালনারিকেলকদলীবনগহনঃ, সরিত্সমুদ্রপর্যন্তপ্রাযঃ, শিশিরপবনবহুলঃ, বঞ্জুলবানীরোপশোভিততীরাভিঃ সরিদ্ভিরুপগতভূমিভাগঃ, ক্ষিতিধরনিকুঞ্জোপশোভিতঃ, মন্দপবনানুবীজিতক্ষিতিরুহগহনঃ, অনেকবনরাজীপুষ্পিতবনগহনভূমিভাগঃ, স্নিগ্ধতরুপ্রতানোপগূঢঃ, হংস-চক্রবাক-বলাকা-নন্দীমুখ-পুণ্ডরীক-কাদম্ব-মদ্গু -ভৃঙ্গরাজ-শতপত্র-মত্তকোকিলানুনাদিততরুবিটপঃ, সুকুমারপুরুষঃ, পবনকফপ্রাযো জ্ঞেযঃ; অনযোরেব দ্বযোর্দেশযোর্বীরুদ্বনস্পতিবানস্পত্যশকুনিমৃগগণযুতঃ স্থিরসুকুমারবলবর্ণসংহননোপপন্নসাধারণগুণযুক্তপুরুষঃ সাধারণো জ্ঞেযঃ||৮||

দেশাদি সম্যগ্ ব্যাকুর্বন্নাহ- তত্র ত্রিবিধ ইত্যাদি| অত্র কেচিজ্জাঙ্গলাদিদেশলক্ষণগ্রন্থং ন পঠন্তি, তত্তু জনপদোদ্ধ্বংসনীযে পঠিতমিতি কৃত্বেহানার্ষং বদন্তি| যৈস্তু জনপদোদ্ধ্বংসনীযে জাঙ্গলাদিলক্ষণং ন পঠ্যতে, তৈরত্র পঠনীয এবাযং গ্রন্থঃ||৮||

Adhikarana 8 (9) · Śloka 9

তত্র দেশে সাধারণে জাঙ্গলে বা যথাকালং শিশিরাতপপবনসলিলসেবিতে সমে শুচৌ প্রদক্ষিণোদকে শ্মশান-চৈত্য-দেবযজনাগার-সভা-শ্বভ্রারাম-বল্মীকোষরবিরহিতে কুশরোহিষাস্তীর্ণে স্নিগ্ধকৃষ্ণমধুরমৃত্তিকে সুবর্ণবর্ণমধুরমৃত্তিকে বা মৃদাবফালকৃষ্টেঽনুপহতেঽন্যৈর্বলবত্তরৈর্দ্রুমৈরৌষধানি জাতানি প্রশস্যন্তে||৯||

যথাকালমিতি যথাকালং শিশিরাদিভিঃ সেবিতে দেশে| শ্মশানাদিভিঃ প্রত্যেকং বিরহিতশব্দঃ সম্বধ্যতে| দেবযজনেনাগারশব্দঃ সম্বধ্যতে| সভা জনমেলকস্থানম্| ন ফালেন কৃষ্ট ইতি অফালকৃষ্টে||৯||

Adhikarana 9 (10) · Śloka 10

তত্র যানি কালজাতান্যুপাগতসম্পূর্ণপ্রমাণ-রসবীর্য-গন্ধানি কালাতপাগ্নিসলিলপবনজন্তুভিরনুপহতগন্ধ-বর্ণ-রস-স্পর্শ-প্রভাবাণি প্রত্যগ্রাণ্যুদীচ্যাং দিশি স্থিতানি; তেষাং শাখাপলাশমচিরপ্ররূঢং বর্ষাবসন্তযোর্গ্রাহ্যং, গ্রীষ্মে মূলানি শিশিরে বা শীর্ণপ্ররূঢপর্ণানাং, শরদি ত্বক্কন্দক্ষীরাণি, হেমন্তে সারাণি, যথর্তু পুষ্পফলমিতি; মঙ্গলাচারঃ কল্যাণবৃত্তঃ শুচিঃ শুক্লবাসাঃ সম্পূজ্য দেবতা অশ্বিনৌ গোব্রাহ্মণাংশ্চ কৃতোপবাসঃ প্রাঙ্মুখ উদঙ্মুখো বা গৃহ্ণীযাত্||১০||

তত্র যানি কালজাতানীত্যনেনৈব কালসম্পদুচ্যতে; কালজাতানীতি স্বকালভূতানি| উপাগতসম্পূর্ণেত্যাদিনা প্রত্যগ্রাণীত্যন্তেন গুণসম্পদুচ্যতে| প্রত্যগ্রাণীতি সম্পূর্ণগুণতযা নিষ্পন্নানি| তেষাং শাখাপলাশমিত্যাদিনা কালসম্পদমুক্তাং প্রপঞ্চযতি| শাখাগ্রহণেনৈব ত্বগাদীনামপি গ্রহণম্| শীর্ণপ্ররূঢপর্ণানামিতি চ্ছেদঃ| গ্রীষ্মে মূলানি শিশিরে বেতি কথনেন যান্যাগ্নেযানি তেষাং মূলানি গ্রীষ্মে, যানি সৌম্যানি তেষাং মূলানি শিশিরে, গ্রাহ্যাণীতি ব্যবস্থাং সূচযতি; উক্তং হ্যন্যত্র- “সৌম্যান্যৌষধানি সৌম্যেষ্বৃতুষ্বাদদীত, আগ্নেযান্যাগ্নেযেষু” (সু.সূ.অ.৩৬) ইতি| ভেষজগ্রহণবিধানমাহ- মঙ্গলেত্যাদি||১০||

Adhikarana 10 (11) · Śloka 11

গৃহীত্বা চানুরূপগুণবদ্ভাজনস্থান্যাগারেষূ প্রাগুদগ্দ্বারেষু নিবাতপ্রবাতৈকদেশেষু নিত্যপুষ্পোপহারবলিকর্মবত্সু, অগ্নি-সলিলোপস্বেদ-ধূম-রজো-মূষক-চতুষ্পদামনভিগমনীযানি স্ববচ্ছন্নানি শিক্যেষ্বাসজ্য স্থাপযেত্||১১||

ভাজনসম্পদমাহ- গৃহীত্বেত্যাদি| অনুরূপগুণবদ্ভাজনস্থানীতি অনুরূপগুণবত্তা চ ভাজনস্য ভেষজসমানগুণতযৈব| স্ববচ্ছন্নানীতি সম্যক্পিহিতানি||১১||

Adhikarana 11 (12) · Śloka 12

তানি চ যথাদোষং প্রযুঞ্জীত সুরা-সৌবীরক-তুষোদক-মৈরেয-মেদক-ধান্যাম্ল -ফলাম্ল-দধ্যম্লাদিভির্বাতে, মৃদ্বীকামলক -মধু-মধুক-পরূষক-ফাণিতক্ষীরাদিভিঃ পিত্তে, শ্লেষ্মণি তু মধু-মূত্র-কষাযাদিভির্ভাবিতান্যালোডিতানি চ; ইত্যুদ্দেশঃ| তং বিস্তরেণ দ্রব্য-দেহ-দোষ-সাত্ম্যাদীনি প্রবিভজ্য ব্যাখ্যাস্যামঃ||১২||

সঙ্ক্ষেপেণ মদনফলাদীনাং বাতাদিভেদেন ভাবনালোডনদ্রব্যাণ্যাহ- তানি চ যথাদোষং প্রযুঞ্জীতেত্যাদি| ধান্যাম্লং কাঞ্জিকং, ফলাম্লং দাডিমরসাদি| শ্লেষ্মণীত্যাদৌ কষাযশব্দেন শ্লেষ্মহরদ্রব্যক্বাথোঽভিপ্রেতঃ| উদ্দেশ ইতি সঙ্ক্ষেপাভিধানমিত্যর্থঃ| দ্রব্য-দেহ-দোষ-সাত্ম্যাদীনীত্যত্র আদিশব্দেন প্রকৃতিবলাদীনাং গ্রহণম্||১২||

Adhikarana 12 (13) · Śloka 13

বমনদ্রব্যাণাং মদনফলানি শ্রেষ্ঠতমান্যাচক্ষতে, অনপাযিত্বাত্| তানি বসন্তগ্রীষ্মযোরন্তরে পুষ্যাশ্বযুগ্ভ্যাং মৃগশিরসা বা গৃহ্ণীযান্মৈত্রে মুহূর্তে| যানি পক্বান্যকাণান্যহরিতানি পাণ্ডূন্যক্রিমীণ্যপূতীন্যজন্তুজগ্ধান্যহ্রস্বানি; তানি প্রমৃজ্য , কুশপুটে বদ্ধ্বা, গোমযেনালিপ্য, যবতু(বু)ষমাষশালিকুলত্থমুদ্গপলানামন্যতমে নিদধ্যাদষ্টরাত্রম্| অত ঊর্ধ্বং মৃদূভূতানি মধ্বিষ্টগন্ধান্যুদ্ধৃত্য শোষযেত্| সুশুষ্কাণাং ফলপিপ্পলীরুদ্ধরেত্ | তাসাং ঘৃতদধিমধুপললবিমৃদিতানাং পুনঃ শুষ্কাণাং নবং কলশং সুপ্রমৃষ্টবালুকমরজস্কমাকণ্ঠং পূরযিত্বা স্ববচ্ছন্নং স্বনুগুপ্তং শিক্যেষ্বাসজ্য সম্যক্ স্থাপযেত্||১৩||

বমনদ্রব্যাণামিত্যাদিনা মদনফলস্য প্রাধান্যোপদর্শনপূর্বকং প্রযোগবিধিমাহ| অনপাযিত্বাদিতি বমনদ্রব্যান্তরাপেক্ষযাঽল্পব্যাপত্তিকত্বাত্| অন্তরে ইতি মধ্যে, স চ গ্রীষ্মবসন্তযোরন্তর্বর্তিকতিপযদিনান্যেব মধ্যো জ্ঞেযঃ| অশ্বযুক্ অশ্বিনী| মৈত্রে মুহূর্ত ইতি শিবভুজগমিত্রাদীনাং মধ্যে মিত্রদেবতাকে, এবং মৈত্রে মুহূর্তে| পলানামিতি রাশীনাম্| মধুবদিষ্টগন্ধো যেষাং তানি, যানি মধ্বিষ্টগন্ধানি ভবন্তি তানি গ্রাহ্যাণীতি দর্শযতি| ফলপিপ্পলীরিতি মদনফলমধ্যগতানি পিপ্পলীসংস্থানানি বীজানি| তাসামিত্যাদি পূরণবাচকশব্দযোগাত্ করণে ষষ্ঠী| স্বনুগুপ্তমিতি কৃতরক্ষাবিধানম্||১৩||

Adhikarana 13 (14) · Śloka 14

অথ চ্ছর্দনীযমাতুরং দ্ব্যহং ত্র্যহং বা স্নেহস্বেদোপপন্নং শ্বশ্ছর্দযিতব্যমিতি গ্রাম্যানূপৌদকমাংসরস-ক্ষীর-দধি-মাষ-তিল-শাকাদিভিঃ সমুত্ক্লেশিতশ্লেষ্মাণং ব্যুষিতং জীর্ণাহারং পূর্বাহ্ণে কৃতবলিহোমমঙ্গলপ্রাযশ্চিত্তং নিরন্নমনতিস্নিগ্ধং যবাগ্বা ঘৃতমাত্রাং পীতবন্তং, তাসাং ফলপিপ্পলীনামন্তর্নখমুষ্টিং যাবদ্বা সাধু মন্যেত জর্জরীকৃত্য যষ্টিমধুকষাযেণ কোবিদার-কর্বুদার-নীপ-বিদুল-বিম্বী-শণপুষ্পী-সদাপুষ্পী-প্রত্যক্পুষ্পী-কষাযাণামন্যতমেন বা রাত্রিমুষিতং বিমৃদ্য পূতং মধুসৈন্ধবযুক্তং সুখোষ্ণং কৃত্বা পূর্ণং শরাবং মন্ত্রেণানেনাভিমন্ত্রযেত্- ‘ॐ ব্রহ্মদক্ষাশ্বিরুদ্রেন্দ্রভূচন্দ্রার্কানিলানলাঃ| ঋষযঃ সৌষধিগ্রামা ভূতসঙ্ঘাশ্চ পান্তু তে| রসাযনমিবর্ষীণাং দেবানামমৃতং যথা| সুধেবোত্তমনাগানাং ভৈষজ্যমিদমস্তু তে’| ইত্যেবমভিমন্ত্র্যোদঙ্মুখং প্রাঙ্মুখং বাঽঽতুরং পাযযেচ্ছ্লেষ্মজ্বরগুল্মপ্রতিশ্যাযার্তং বিশেষেণ পুনঃ পুনরাপিত্তাগমনাত্, তেন সাধু বমতি; হীনবেগং তু পিপ্পল্যামলক-সর্ষপ-বচাকল্কলবণোষ্ণোদকৈঃ পুনঃ পুনঃ প্রবর্তযেদাপিত্তদর্শনাত্| ইত্যেষ সর্বশ্ছর্দনযোগবিধিঃ||১৪||

দ্ব্যহং ত্র্যহং বা স্নেহস্বেদোপপন্নমিত্যনেন অভ্যঙ্গে ক্রিযমাণে স্নেহসহচরিতস্বেদোপপাদনং দ্ব্যহং ত্র্যহং বা বিধীযতে, “ত্র্যহাবরং সপ্তদিনং পরং তু স্নিগ্ধো নরঃ স্বেদযিতব্য ইষ্টঃ” (সি.অ.১) ইত্যনেন পানপ্রযুজ্যমানস্নেহস্য সপ্তরাত্রং ত্রিরাত্রং বা প্রকর্ষ উচ্যতে ইতি ন বিরোধঃ| এতচ্চাভ্যঙ্গস্বেদসহিতস্নেহস্বেদকরণং পানস্নেহান্তদিবসমারভ্য ক্রিযতে, তেন স্নেহপানবিশ্রামদিনেন সমং দ্ব্যহত্র্যহপূরণমভ্যঙ্গস্নেহসহিতস্বেদপ্রযোগস্য ভবতি| স্নেহপানাচ্চ যদ্বিশ্রামদিনম্, “একাহোপরতস্তদ্বদ্ভুক্ত্বা প্রচ্ছর্দনং পিবেত্” (সূ.অ.১৩) ইত্যনেনোক্তং, তথৈবেহাপি| কফোত্ক্লেশকারিভোজনমাহ- শ্বশ্ছর্দযিতব্যমিত্যাদিনা| শ্ব ইতি পরস্মিন্নহ্নি| ব্যুষিতমিতি রাত্রিমতিক্রান্তম্| নিরন্নমিতি পদচ্ছেদঃ| অনতিস্নিগ্ধমিত্যাদিনা বমনদিন এব ঘৃতমাত্রাযুক্তযবাগূপানপূর্বকং বমনমনতিস্নিগ্ধপুরুষবিষযং ব্রূতে| অন্যে তু পূর্বদিন এবানতিস্নিগ্ধস্য ঘৃতমাত্রাং পীতবত এব যবাগ্বাঃ পানমাহুঃ, “পেশলৈর্বিবিধৈরন্নৈর্দোষানুত্ক্লেশ্য দেহিনঃ| স্নিগ্ধস্বিন্নায বমনং দত্তং সম্যক্ প্রবর্ততে|| অথাপরেদ্যুঃ পূর্বাহ্ণে সাধারণে কালে বমনদ্রব্যকষাযকল্কচূর্ণস্নেহানামন্যতমস্য” (সু.চি.অ.৩৩) ইত্যাদি সুশ্রুতোক্তেঃ| অন্তর্নখমুষ্টিমিতি অন্তরীকৃতনখমুষ্টিপরিমাণম্| যাবদ্বা সাধু মন্যেতেত্যনেন মাত্রাযা বলদোষাদিভেদেনাস্থিরত্বমিত্যাহ| যষ্টীমধুকস্য কোবিদারাদিষু বিচ্ছেদপাঠ উত্তরপ্রযোগেষু কোবিদারাদের্যষ্টীমধুবিরহিতস্য গ্রহণার্থঃ| কোবিদারঃ স্বনামখ্যাতঃ, স শরদি পুষ্পতি; কর্বুদারস্তু কাঞ্চনারঃ, স বসন্তে পুষ্পতি; নীপঃ কদম্বঃ, বিদুলঃ বেতসঃ, শণপুষ্পী ঘণ্টারবা, সদাপুষ্পী অর্কপুষ্পিকা, প্রত্যক্পুষ্পী অপামার্গঃ| রাত্রিমুষিতং বিমৃদ্য পূতমিতি শৃতকষাযাত্ কষাযান্তরোপদর্শকং পক্ষান্তরং; কিংবা, কষাযপান এব শীতকষাযবিধানমিহোচ্যতে| পূর্ণং শরাবমিতি মঙ্গলার্থং পূর্ণকুম্ভবত্| পুনঃ পুনরিতি যাবত্ পিত্তাগমনং ন ভবতি তাবত্ পুনঃ পুনঃ কষাযং পিবেদিত্যর্থঃ| অন্যত্রাপ্যুক্তং- “পিত্তান্তমিষ্টং বমনং বিরেকাদর্ধং” (সি.অ.১) ইত্যাদি| বমনাযোগকারকহীনবেগপ্রবৃত্তিপ্রতিকারার্থমাহ- হীনবেগমিত্যাদি||১৪||

Adhikarana 14 (15) · Śloka 15

সর্বেষু তু মধুসৈন্ধবং কফবিলযনচ্ছেদার্থং বমনেষু বিদধ্যাত্| ন চোষ্ণবিরোধো মধুনশ্ছর্দনযোগযুক্তস্য, অবিপক্বপ্রত্যাগমনাদ্দোষনির্হরণাচ্চ||১৫||

যদ্যপি চ ঘ্রেযাদিবমনযোগেষু মধুসৈন্ধবযোগো ন ভবতি, তথাঽপি ‘সর্বেষু’ ইতি পদং বাহুল্যার্থম্| বমনার্থকষাযে উষ্ণে মধুপ্রক্ষেপো বিরোধিত্বান্ন যুজ্যতে, উক্তং হি- “মধূষ্ণমুষ্ণার্তমথবা” (সূ.অ.২৭) ইত্যাদি, এবমাশঙ্ক্য সমাধানমাহ ন চোষ্ণবিরোধো মধুন ইত্যাদি| অবিপক্বপ্রত্যাগমনাদিত্যনেন পচ্যমানং মধূষ্ণযুক্তং বিরুধ্যেতেতি দর্শযতি| দোষনির্হরণাচ্চেতি মধূষ্ণবিরুদ্ধমপি বমনযোগে উষ্ণে ইষ্যতে, তস্য দোষনির্হরণাদেব ন বিরোধো ভবতীতি দর্শযতি| এবং বস্তিপ্রযোগেঽপি মধুন উষ্ণাবিরোধো বর্ণনীযঃ| এতেন যষ্টীমধ্বাদিনবদ্রব্যকৃতৈর্নবভিঃ কষাযৈর্নবযোগাঃ||১৫||

Adhikarana 15 (16) · Śloka 16

ফলপিপ্পলীনাং দ্বৌ দ্বৌ ভাগৌ কোবিদারাদিকষাযেণ ত্রিঃসপ্তকৃত্বঃ স্রাবযেত্, তেন রসেন তৃতীযং ভাগং পিষ্ট্বা মাত্রাং হরীতকীভির্বিভীতকৈরামলৈর্বা তুল্যাং বর্তযেত্, তাসামেকাং দ্বে বা পূর্বোক্তানাং কষাযাণামন্যতমস্যাঞ্জলিমাত্রেণ বিমৃদ্য বলবচ্ছ্লেষ্মপ্রসেকগ্রন্থিজ্বরোদরারুচিষু পাযযেদিতি সমানং পূর্বেণ||১৬||

ফলপিপ্পলীনাং দ্বৌ ভাগাবিত্যাদৌ ফলপিপ্পলীনাং ভাগত্রযং কর্তব্যং; তত্র ভাগদ্বযং ষড্গুণেন কোবিদারাদিকষাযেণ ক্ষারপরিস্রাবণবিধিবদেকবিংশতিবারান্ পরিস্রাবণীযম্| কোবিদারাদীনাং চাষ্টানামষ্টৌ কষাযাঃ পৃথক্ পরিস্রাবণে প্রযোক্তব্যাঃ| যেন চ কষাযেণ ফলপিপ্পলীভাগদ্বযং পরিস্রাব্য হরিতক্যাদিপরিমাণা মাত্রা তৃতীযভাগফলপিপ্পলীকল্কস্য ক্রিযতে তেনৈব কষাযেণ মাত্রাযোগাঃ ; এবমষ্টৌ হরীতক্যাদিমাত্রযা নির্দিষ্টাঃ ফলপিপ্পলীযোগা ভবন্তি| মাত্রাবিকল্পশ্চ দোষবলাদিবিকল্পকৃতো জ্ঞেযঃ| সমানং পূর্বেণেতি পূর্বযোগবদিহ স্নেহস্বেদাভিমন্ত্রণাদিবিধানং কর্তব্যমিত্যর্থঃ| এবমন্যত্রাপি পূর্ববচ্ছব্দার্থো জ্ঞেযঃ||১৬||

Adhikarana 16 (17) · Śloka 17

ফলপিপ্পলীক্ষীরং, তেন বা ক্ষীরযবাগূমধোভাগে রক্তপিত্তে হৃদ্দাহে চ; তজ্জস্য বা দধ্ন উত্তরকং কফচ্ছর্দিতমকপ্রসেকেষু ; তস্য বা পযসঃ শীতস্য সন্তানিকাঞ্জলিং পিত্তে প্রকুপিতে উরঃকণ্ঠহৃদযে চ তনুকফোপদিগ্ধে, ইতি সমানং পূর্বেণ||১৭||

ফলপিপ্পল্যা ক্ষীরপাকবিধিনা সাধিতং ক্ষীরং ফলপিপ্পলীক্ষীরম্; অযমেকো যোগঃ| তেনেতি ফলপিপ্পলীসাধিতক্ষীরেণ| তজ্জস্যেতি ফলপিপ্পলীক্ষীরজাতস্য দধ্নঃ| উত্তরকমিতি সরম্| সন্তানিকা ক্ষীরোপরিস্থঃ স্ত্যানো ভাগঃ||১৭||

Adhikarana 17 (18) · Śloka 18

ফলপিপ্পলীশৃতক্ষীরান্নবনীতমুত্পন্নং ফলাদিকল্ককষাযসিদ্ধং কফাভিভূতাগ্নিং বিশুষ্যদ্দেহং চ মাত্রযা পাযযেদিতি সমানং পূর্বেণ||১৮||

ফলাদীনি ফল-জীমূতকেক্ষ্বাকু-ধামার্গব-কুটজ-কৃতবেধনানি ষট্| এতে ক্ষীরযোগচতুষ্টযেন ঘৃতযোগেন চ সমং পঞ্চ যোগা অধ্যাযসঙ্গ্রহে বক্তব্যা||১৮||

Adhikarana 18 (19) · Śloka 19

ফলপিপ্পলীনাং ফলাদিকষাযেণ ত্রিঃসপ্তকৃত্বঃ সুপরিভাবিতেন পুষ্পরজঃপ্রকাশেন চূর্ণেন সরসি সঞ্জাতং বৃহত্সরোরুহং সাযাহ্নেঽবচূর্ণযেত্, তদ্রাত্রিব্যুষিতং প্রভাতে পুনরবচূর্ণিতমুদ্ধৃত্য হরিদ্রাকৃসরক্ষীরযবাগূনামন্যতমং সৈন্ধবগুডফাণিতযুক্তমাকণ্ঠং পীতবন্তমাঘ্রাপযেত্ সুকুমারমুত্ক্লিষ্টপিত্তকফমৌষধদ্বেষিণমিতি সমানং পূর্বেণ||১৯||

ফলপিপ্পলীনাং ফলাদিকষাযেণেত্যাদিনা একং ঘ্রেযযোগমাহ| পুষ্পরজঃপ্রকাশেনেতি পুষ্পধূলিসদৃশেন| হরিদ্রাভিধানঃ কৃশরো হরিদ্রাকৃশরঃ||১৯||

Adhikarana 19 (20) · Śloka 20

ফলপিপ্পলীনাং ভল্লাতকবিধিপরিস্রুতং স্বরসং পক্ত্বা ফাণিতীভূতমাতন্তুলীভাবাল্লেহযেত্; আতপশুষ্কং বা চূর্ণীকৃতং জীমূতকাদিকষাযেণ পিত্তে কফস্থানগতে পাযযেদিতি সমানং পূর্বেণ||২০||

ভল্লাতকবিধিপরিস্রুতমিতি রসাযনোক্তভল্লাতকস্নেহগ্রহণবিধানেন পরিস্রুতঃ স্বরসো গ্রাহ্যঃ| ফাণিতযোগোঽযমেকঃ| আতপশুষ্কং বেত্যাদিনা চূর্ণযোগোঽপ্যেকঃ||২০||

Adhikarana 20 (21) · Śloka 21

ফলপিপ্পলীচূর্ণানি পূর্ববত্ ফলাদীনাং ষণ্ণামন্যতমকষাযস্রুতানি বর্তিক্রিযাঃ ফলাদিকষাযোপসর্জনাঃ পেযা ইতি সমানং পূর্বেণ||২১||

ফলপিপ্পলীচূর্ণানীত্যাদৌ ফলাদিষট্কষাযভেদেন কৃতত্বাত্ ষড্ বর্তিপ্রযোগা জ্ঞেযাঃ| বর্তিক্রিযাযাং চতুর্গুণেন ক্বাথেন পাকাদ্বর্ত্যাকারতা কর্তব্যা| অত্রাপি চ তথা লেহাদৌ চ সামান্যোক্তেন মধুপ্রক্ষেপো যুক্তঃ; তং চৈকে মধুনঃ পাকবিরোধান্নানুমন্যন্তে||২১||

Adhikarana 21 (22) · Śloka 22

ফলপিপ্পলীনামারগ্বধ -বৃক্ষক-স্বাদুকণ্টক-পাঠা-পাটলা-শার্ঙ্গেষ্টা-মূর্বা-সপ্তপর্ণ-নক্তমাল-পিচুমর্দ-পটোল-সুষবী-গুডূচী-সোমবল্ক-দ্বীপিকানাং পিপ্পলী-পিপ্পলীমূল-হস্তিপিপ্পলী-চিত্রক-শৃঙ্গবেরাণাং চান্যতমকষাযেণ সিদ্ধো লেহ ইতি সমানং পূর্বেণ||২২||

ফলপিপ্পলীনামারগ্বধেত্যাদিনা আরগ্বধাদিবিংশতিদ্রব্যক্বাথভেদেন কৃতত্বাদ্বিংশতির্লেহা জ্ঞেযাঃ| বৃক্ষকঃ কুটজঃ, স্বাদুকণ্টকঃ বিকঙ্কতঃ, শার্ঙ্গেষ্টা গুঞ্জা, সুষবী কারবেল্লকং, দ্বীপিকা হিংস্রা, ‘কণ্টকারী’ ইত্যন্যে||২২||

Adhikarana 22 (23) · Śloka 23

ফলপিপ্পলীষ্বেলা-হরেণুকা-শতপুষ্পা-কুস্তুম্বুরু-তগর-কুষ্ঠ-ত্বক্-চোরক-মরুবকাগুরু-গুগ্গুল্বেলবালুক-শ্রীবেষ্টক-পরিপেলব-মাংসী-শৈলেযক-স্থৌণেযক-সরল-পারাবতপদ্যশোকরোহিণীনাং বিংশতেরন্যতমস্য কষাযেণ সাধিতোত্কারিকা উত্কারিকাকল্পেন, মোদকা বা মোদককল্পেন, যথাদোষরোগভক্তি প্রযোজ্যা ইতি সমানং পূর্বেণ||২৩||

ফলপিপ্পলীষ্বিত্যাদিনোত্কারিকা মোদকাশ্চ প্রত্যেকং বিংশতিঃ| চোরকঃ গন্ধদ্রব্যং স্বনামখ্যাতং, পরিপেলবং কৈবর্তমুস্তকং, স্থৌণেযকঃ গ্রন্থিপর্ণকং, পারাবতপদী জ্যোতিষ্মতী, অশোকরোহিণী অশোকসদৃশপত্রা লতা, ‘কটুরোহিণী’ ইত্যন্যে| কেচিদত্র স্থৌণেযকং পরিত্যজ্যাপাকীপাদ্যা বিংশতিং পূরযন্তি, অপাকীপাদী স্বনামখ্যাতা| উত্কারিকাকল্পেনেতি সূদশাস্ত্রোক্তোত্কারিকাবিধানেন||২৩||

Adhikarana 23 (24-25) · Śloka 25

ফলপিপ্পলীস্বরসকষাযপরিভাবিতানি তিলশালিতণ্ডুলপিষ্টানি তত্কষাযোপসর্জনানি শষ্কুলীকল্পেন বা শষ্কুল্যঃ, পূপকল্পেন বা পূপাঃ ইতি সমানং পূর্বেণ||২৪|| এতেনৈব চ কল্পেন সুমুখ-সুরস-কুঠেরক-কাণ্ডীর-কালমালক-পর্ণাসক-ক্ষবক-ফণিজ্ঝক-গৃঞ্জন-কাসমর্দ-ভৃঙ্গরাজানাং পোটেক্ষুবালিকা-কালঙ্কতক-দণ্ডৈরকাণাং চান্যতমস্য কষাযেণ কারযেত্||২৫||

ফলপিপ্পলীস্বরসেনেত্যাদিনা শষ্কুল্যপূপযোঃ পৃথগেকো যোগঃ| এতেনৈব চ কল্পেনেত্যাদিনা সুমুখাদিপঞ্চদশদ্রব্যকষাযেণ পৃথক্ শষ্কুল্যপূপযোঃ করণাত্ পঞ্চদশ যোগা ভবন্তি| এবং মিলিত্বা শষ্কুলীপূপযোঃ পৃথক্ ষোডশযোগা ভবন্তি| পোটা ইক্ষুগন্ধা; দণ্ডৈরকা গুন্দ্রাখ্যগুল্মঃ, নলো বা||২৪-২৫||

Adhikarana 24 (26) · Śloka 26

তথা বদরষাডব-রাগ-লেহ-মোদকোত্কারিকা-তর্পণ-পানক-মাংসরস-যূষ-মদ্যানাং মদনফলান্যন্যতমেনোপসৃজ্য যথাদোষরোগভক্তি দদ্যাত্; তৈঃ সাধু বমতীতি||২৬||

তথা বদরষাডবেত্যাদিনা দশ যোগাঃ| বদরকৃতঃ ষাডবো বদরষাডবঃ||২৬||

Adhikarana 25 (27) · Śloka 27

মদনঃ করহাটশ্চ রাঠঃ পিণ্ডীতকঃ ফলম্| শ্বসনশ্চেতি পর্যাযৈরুচ্যতে তস্য কল্পনা||২৭||

মদনস্য ব্যবহারার্থং পর্যাযানাহ- মদনঃ করহাটশ্চেত্যাদি| তস্য কল্পনেতি য এবম্ভূতৈঃ পর্যাযৈর্ব্যাখ্যাতস্তস্যেযং কল্পনা| অস্য চ পর্যাযাভিধানং ভূরিপ্রযোগেষু বিহিতত্বেনাভ্যর্হিতত্বাজ্জ্ঞেযম্| এবমন্যত্রাপি পর্যাযাভিধানে প্রযোজনং বর্ণনীযম্||২৭||

Adhikarana 26 (28-30) · Śloka 30

তত্র শ্লোকাঃ- নব যোগাঃ কষাযেষু, মাত্রাস্বষ্টৌ , পযোঘৃতে| পঞ্চ, ফাণিতচূর্ণে দ্বৌ ঘ্রেযে, বর্তিক্রিযাসু ষট্||২৮|| বিংশতির্বিংশতির্লেহমোদকোত্কারিকাসু চ| শষ্কুলীপূপযোশ্চোক্তা যোগাঃ ষোডশ ষোডশ||২৯|| দশান্যে ষাডবাদ্যেষু ত্রযস্ত্রিংশদিদং শতম্| যোগানাং বিধিবদ্দিষ্টং ফলকল্পে মহর্ষিণা||৩০||

মদনফলযোগানাং নবাদিসঙ্খ্যোত্কর্ষনিরাসার্থং সুখস্মরণার্থং চ তান্ সঙ্গ্রহেণাহ- নব যোগা ইত্যাদি| অস্য চার্থো যথাস্থানং ব্যাহৃতঃ||২৮-৩০||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে মদনকল্পো নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং কল্পস্থানে মদনকল্পো নাম প্রথমোঽধ্যাযঃ||১||