Adhikarana 1 (1-3) · Śloka 3
অথাতঃ প্রমেহনিদানং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
ত্রিদোষকোপনিমিত্তা বিংশতিঃ প্রমেহা ভবন্তি বিকারাশ্চাপরেঽপরিসঙ্খ্যেযাঃ|
তত্র যথা ত্রিদোষপ্রকোপঃ প্রমেহানভিনির্বর্তযতি তথাঽনুব্যাখ্যাস্যামঃ||৩||
View original
अथातः प्रमेहनिदानं व्याख्यास्यामः||१||
इति ह स्माह भगवानात्रेयः||२||
त्रिदोषकोपनिमित्ता विंशतिः प्रमेहा भवन्ति विकाराश्चापरेऽपरिसङ्ख्येयाः|
तत्र यथा त्रिदोषप्रकोपः प्रमेहानभिनिर्वर्तयति तथाऽनुव्याख्यास्यामः||३||
দক্ষাধ্বরে গুল্মমনু প্রমেহোত্পাদাত্ প্রমেহাভিধানং; বচনং হি- “হবিঃপ্রাশান্মেহকুষ্ঠযোর্জন্ম” (নি.অ.৮) ইতি| ত্রিদোষপ্রকোপনিমিত্তা ইতি সর্বমেহেষ্বেব ত্রিদোষাঃ কারণম্, অধিকত্বাচ্চ শ্লৈষ্মিকাদিব্যপদেশ ইতি দর্শযতি| সুশ্রুতেঽপ্যুক্তং- “সর্ব এব মেহাঃ সর্বদোষজাঃ” (নি.অ.৬) ইতি| বিকারা ইতি প্রমেহলিঙ্গোপদ্রবরূপাঃ; কিংবা, অন্যেঽপি যে কেচন ত্রিদোষজাস্তে গ্রাহ্যাঃ||১-৩||
Adhikarana 2 (4) · Śloka 4
ইহ খলু নিদানদোষদূষ্যবিশেষেভ্যো বিকারবিঘাতভাবাভাবপ্রতিবিশেষা ভবন্তি|
যদা হ্যেতে ত্রযো নিদানাদিবিশেষাঃ পরস্পরং নানুবধ্নন্ত্যথবা কালপ্রকর্ষাদবলীযাংসোঽথবাঽনুবধ্নন্তি ন তদা বিকারাভিনির্বৃত্তিঃ, চিরাদ্বাঽপ্যভিনির্বর্তন্তে, তনবো বা ভবন্ত্যযথোক্তসর্বলিঙ্গা বা; বিপর্যযে বিপরীতাঃ; ইতি সর্ববিকারবিঘাতভাবাভাবপ্রতিবিশেষাভিনির্বৃত্তিহেতুর্ভবত্যুক্তঃ||৪||
View original
इह खलु निदानदोषदूष्यविशेषेभ्यो विकारविघातभावाभावप्रतिविशेषा भवन्ति|
यदा ह्येते त्रयो निदानादिविशेषाः परस्परं नानुबध्नन्त्यथवा कालप्रकर्षादबलीयांसोऽथवाऽनुबध्नन्ति न तदा विकाराभिनिर्वृत्तिः, चिराद्वाऽप्यभिनिर्वर्तन्ते, तनवो वा भवन्त्ययथोक्तसर्वलिङ्गा वा; विपर्यये विपरीताः; इति सर्वविकारविघातभावाभावप्रतिविशेषाभिनिर्वृत्तिहेतुर्भवत्युक्तः||४||
ইহেত্যাদৌ নিদানাদীনাং বিশেষাঃ পরস্পরানুবন্ধিত্বাদযোঽগ্রে বক্ষ্যমাণা জ্ঞেযাঃ| বিকারাণাং বিঘাতস্যোত্পত্তিপ্রতিবন্ধস্য ভাবো বিঘাতভাবঃ, বিকারাণাং বিঘাতস্যাভাবো বিকারজননমিতি বিকারবিঘাতভাবাভাবৌ, তযোঃ প্রতিবিশেষা বিকারবিঘাতভাবাভাবপ্রতিবিশেষাঃ| তত্র বিকারাণাং বিঘাতভাবস্য প্রতিবিশেষাঃ- বিকারাজননং, তথা চিরেণ চ জননম্, অণুবিকারজননং বা, অসর্বলিঙ্গবিকারজননং বাঽগ্রে বক্ষ্যমাণম্| বিঘাতাভাবপ্রতিবিশেষাস্তু বিকারাজননাদিবিপর্যযেণাগ্রে বক্ষ্যমাণাঃ| উক্তফক্কিকার্থং ব্যাকরোতি- যদেত্যাদি| পরস্পরং নানুবধ্নন্তি পরস্পরং প্রতিকূলা ভবন্তি, অনুবন্ধো হ্যনুকূলেঽভিপ্রেতঃ| তত্র তদেব নিদানং দোষমনুবধ্নাতি, যদ্ভূযঃসামান্যাদবিরোধেন দোষং দূষযতি| দোষস্য দূষ্যানুবন্ধিত্বং যদ্- দূষ্যং ব্যাধিকারণং সামান্যগুণত্বাদিধর্মযোগাদবিরোধেন দূষযতি| তথা দূষ্যস্য চ দোষানুবন্ধিত্বং যদ্- দোষস্য দূষণং প্রতি শিথিলত্বসমানগুণত্বাদিনাঽঽনুকূল্যেনাবস্থানম্| তথা দোষস্য চেদমেব নিদানানুবন্ধিত্বং যত্- নিদানং দোষজননং প্রতি সমানগুণত্বং, সমানগুণতযা হি দোষো নিদানস্য ব্যাধিজননং প্রত্যনুকূলো ভবতি| এতদুদাহরণানাং চ বিপর্যযেণাননুবন্ধো বোদ্ধব্যঃ| নিদানস্য চ দোষাননুবন্ধঃ সমানাসমানগুণযোগাত্ কিঞ্চিদ্দোষজননে বোদ্ধব্যঃ, সর্বথা দোষবৈপরীত্যে তথা দোষজননং প্রত্যুদাসীনত্বে চ নিদানস্য নিদানত্বমেব ন স্যাত্; জনকং হি নিদানমুচ্যতে| অথবা কালপ্রকর্ষাদিতি অনুবধ্নন্তীতি সম্বন্ধঃ; কালপ্রকর্ষাদনুবধ্নন্তীতি কালপ্রকর্ষাত্ পরস্পরং নিদানাদযোঽনুগুণা ভবন্তি যদা, তদা বিকারা চিরাদভিনির্বর্তন্ত ইতি জ্ঞেযম্| যদা পরস্পরং নানুবধ্নন্তি, ন তদা বিকারাভিনির্বৃত্তির্ভবতীতি যোজনীযম্| কালপ্রকর্ষাচ্চানুবন্ধো নিদানস্য দোষেণ তদা ভবতি, যদা হেতুর্বিচ্ছেদং কৃত্বা পুনঃ সেব্যতে; কাল এব বা চিরেণ সমানগুণতযা হেতুরূপঃ প্রাপ্যত ইত্যাদি তর্ক্যম্| অবলীযাংসোঽথবাঽনুবধ্নন্তীতি নিদানং যদাঽল্পং ভবতি তদা স্তোকদোষং করোতি, দোষশ্চ স্তোকঃ স্তোকং চ দূষ্যং দূষযতীত্যাদি জ্ঞেযম্| যদা চা(বাঽ)বলীযাংসোঽনুবধ্নন্তি, তদা তনবো বা বিকারা ভবন্তি, অযথোক্তসর্বলিঙ্গা বা ভবন্তীতি যোজ্যং; তনবঃ অল্পমাত্রাঃ, অযথোক্তসর্বলিঙ্গা ইতি যেন প্রকারেণ লিঙ্গান্যুক্তানি ন তেন প্রকারেণ সর্বাণি লিঙ্গানি ভবন্তীত্যর্থঃ| এবমেতে নিদানাদীনামননুবন্ধবিশেষকৃতা বিকারবিঘাতভাবস্য প্রতিবিশেষা উক্তাঃ| সম্প্রতি নিদানাদীনাং পরস্পরানুবন্ধবিশেষকৃতান্ বিকারাণাং বিঘাতাভাববিশেষানাহ- বিপর্যযে বিপরীতা ইতি| বিপর্যয ইতি নিদানাদীনামনুবন্ধে তথা শীঘ্রানুবন্ধে তথা বলবতাং চানুবন্ধে; বিপরীতা ইতি নির্বর্তমানা বিকারাঃ, তথা শীঘ্রং নির্বর্তমানাঃ, তথা মহান্তো যথোক্তসর্বলিঙ্গাশ্চেতি যথাসঙ্খ্যং বোদ্ধব্যম্| উপসংহরতি- ইতীত্যাদি| এতচ্চ প্রকরণং সর্ববিকারসাধারণমপি প্রমেহস্য পরস্পরানুবন্ধিভিরেব নিদানাদিভির্জন্যত্বং ভবতীতি খ্যাপযিতুং প্রমেহনিদানে কৃতম্||৪||
Adhikarana 3 (5) · Śloka 5
তত্রেমে ত্রযো নিদানাদিবিশেষাঃ শ্লেষ্মনিমিত্তানাং প্রমেহাণামাশ্বভির্নির্বৃত্তিকরা ভবন্তি; তদ্যথা- হাযনকযবকচীনকোদ্দালকনৈষধেত্কটমুকুন্দকমহাব্রীহিপ্রমোদকসুগন্ধকানাং নবানামতিবেলমতিপ্রমাণেন চোপযোগঃ, তথা সর্পিষ্মতাং নবহরেণুমাষসূপ্যানাং, গ্রাম্যানূপৌদকানাং চ মাংসানাং, শাকতিলপললপিষ্টান্নপাযসকৃশরাবিলেপীক্ষুবিকারাণাং, ক্ষীরনবমদ্যমন্দকদধিদ্রবমধুরতরুণপ্রাযাণাং চোপযোগঃ, মৃজাব্যাযামবর্জনং, স্বপ্নশযনাসনপ্রসঙ্গঃ, যশ্চ কশ্চিদ্বিধিরন্যোঽপি শ্লেষ্মমেদোমূত্রসঞ্জননঃ, স সর্বো নিদানবিশেষঃ||৫||
View original
तत्रेमे त्रयो निदानादिविशेषाः श्लेष्मनिमित्तानां प्रमेहाणामाश्वभिर्निर्वृत्तिकरा भवन्ति; तद्यथा- हायनकयवकचीनकोद्दालकनैषधेत्कटमुकुन्दकमहाव्रीहिप्रमोदकसुगन्धकानां नवानामतिवेलमतिप्रमाणेन चोपयोगः, तथा सर्पिष्मतां नवहरेणुमाषसूप्यानां, ग्राम्यानूपौदकानां च मांसानां, शाकतिलपललपिष्टान्नपायसकृशराविलेपीक्षुविकाराणां, क्षीरनवमद्यमन्दकदधिद्रवमधुरतरुणप्रायाणां चोपयोगः, मृजाव्यायामवर्जनं, स्वप्नशयनासनप्रसङ्गः, यश्च कश्चिद्विधिरन्योऽपि श्लेष्ममेदोमूत्रसञ्जननः, स सर्वो निदानविशेषः||५||
সম্প্রতি প্রকৃতে কফজাদিমেহে পরস্পরানুবন্ধিনো নিদানাদিবিশেষানাহ- তত্রেত্যাদি| ইহ কফ এবাগ্রেঽভিধীযতে, ভূরিপ্রমেহকর্তৃত্বাত্| হাযনকাদযো ধান্যবিশেষাঃ| অতিবেলমিতি পুনঃ পুনঃ| হরেণুঃ বর্তুলকলাযঃ| তিলতণ্ডুলমাষকৃতমন্নং কৃশরা| মৃজা উদ্বর্তনম্| সর্বঃ স নিদানবিশেষ ইতি এবম্ভূতমেব নিদানং প্রমেহকর্তুঃ শ্লেষ্মণঃ কারণমিত্যর্থঃ||৫||
Adhikarana 4 (6) · Śloka 6
বহুদ্রবঃ শ্লেষ্মা দোষবিশেষঃ||৬||
View original
बहुद्रवः श्लेष्मा दोषविशेषः||६||
বহুদ্রবঃ শ্লেষ্মা দোষবিশেষ ইতি বহুদ্রব এব কফো মেহজনকো নাল্পদ্রব ইতি||৬||
Adhikarana 5 (7) · Śloka 7
বহ্ববদ্ধং মেদো মাংসং শরীরজক্লেদঃ শুক্রং শোণিতং বসা মজ্জা লসীকা রসশ্চৌজঃসঙ্খ্যাত ইতি দূষ্যবিশেষাঃ||৭||
View original
बह्वबद्धं मेदो मांसं शरीरजक्लेदः शुक्रं शोणितं वसा मज्जा लसीका रसश्चौजःसङ्ख्यात इति दूष्यविशेषाः||७||
অবদ্ধমিতি অসংহতম্| অত্র তু বহুত্বমঘনত্বং চ যথাযোগ্যতযা বোদ্ধব্যম্| তেন, মেদসি মাংসে বসামজ্জ্ঞোশ্চ দ্বযমপি, শেষেষু বহুত্বম্| ওজঃসঙ্খ্যাত ইতি ওজোরূপ এব| বক্ষ্যতি হি প্রমেহচিকিত্সিতে- “মজ্জা রসৌজঃ পিশিতং চ দূষ্যাঃ” (চি.অ.৫) ইতি| ইতিশব্দো বহ্ববদ্ধমেদআদীন্ প্রত্যবমৃশতি; কিংবা ‘সঙ্খ্যাতাঃ’ ইতি পাঠঃ সুগমঃ||৭||
Adhikarana 6 (8) · Śloka 8
ত্রযাণামেষাং নিদানাদিবিশেষাণাং সন্নিপাতে ক্ষিপ্রং শ্লেষ্মা প্রকোপমাপদ্যতে, প্রাগতিভূযস্ত্বাত্; স প্রকুপিতঃ ক্ষিপ্রমেব শরীরে বিসৃপ্তিং লভতে, শরীরশৈথিল্যাত্; স বিসর্পঞ্ শরীরে মেদসৈবাদিতো মিশ্রীভাবং গচ্ছতি, মেদসশ্চৈব বহ্ববদ্ধত্বান্মেদসশ্চ গুণৈঃ সমানগুণভূযিষ্ঠত্বাত্; স মেদসা মিশ্রীভবন্ দূষযত্যেনত্, বিকৃতত্বাত্; স বিকৃতো দুষ্টেন মেদসোপহিতঃ শরীরক্লেদমাংসাভ্যাং সংসর্গং গচ্ছতি, ক্লেদমাংসযোরতিপ্রমাণাভিবৃদ্ধত্বাত্; স মাংসে মাংসপ্রদোষাত্ পূতিমাংসপিডকাঃ শরাবিকাকচ্ছপিকাদ্যাঃ সঞ্জনযতি, অপ্রকৃতিভূতত্বাত্; শরীরক্লেদং পুনর্দূষযন্ মূত্রত্বেন পরিণমযতি, মূত্রবহানাং চ স্রোতসাং বঙ্ক্ষণবস্তিপ্রভবাণাং মেদঃক্লেদোপহিতানি গুরূণি মুখান্যাসাদ্য প্রতিরুধ্যতে; ততঃ প্রমেহাংস্তেষাং স্থৈর্যমসাধ্যতাং বা জনযতি, প্রকৃতিবিকৃতিভূতত্বাত্||৮||
View original
त्रयाणामेषां निदानादिविशेषाणां सन्निपाते क्षिप्रं श्लेष्मा प्रकोपमापद्यते, प्रागतिभूयस्त्वात्; स प्रकुपितः क्षिप्रमेव शरीरे विसृप्तिं लभते, शरीरशैथिल्यात्; स विसर्पञ् शरीरे मेदसैवादितो मिश्रीभावं गच्छति, मेदसश्चैव बह्वबद्धत्वान्मेदसश्च गुणैः समानगुणभूयिष्ठत्वात्; स मेदसा मिश्रीभवन् दूषयत्येनत्, विकृतत्वात्; स विकृतो दुष्टेन मेदसोपहितः शरीरक्लेदमांसाभ्यां संसर्गं गच्छति, क्लेदमांसयोरतिप्रमाणाभिवृद्धत्वात्; स मांसे मांसप्रदोषात् पूतिमांसपिडकाः शराविकाकच्छपिकाद्याः सञ्जनयति, अप्रकृतिभूतत्वात्; शरीरक्लेदं पुनर्दूषयन् मूत्रत्वेन परिणमयति, मूत्रवहानां च स्रोतसां वङ्क्षणबस्तिप्रभवाणां मेदःक्लेदोपहितानि गुरूणि मुखान्यासाद्य प्रतिरुध्यते; ततः प्रमेहांस्तेषां स्थैर्यमसाध्यतां वा जनयति, प्रकृतिविकृतिभूतत्वात्||८||
সন্নিপাতে মেলকে| প্রকোপমাপদ্যত ইতি প্রমেহকরণাযোদ্যতো ভবতি| কুতঃ প্রমেহকরণাযোদ্যতো ভবতীত্যাহ- প্রাগতিভূযস্ত্বাত্| প্রাগিতি উত্পাদকাল এব| যস্মাত্ প্রমেহকরণং প্রত্যভিমুখো ভূযাংশ্চ কফো ভূতস্তত ইত্যর্থঃ| প্রমেহনিদানেন হি কফোঽযং প্রমেহকরণাভিমুখ এব জনিতো ভূরিশ্চ; ততো ভূরিত্বাত্ তথা প্রমেহকরণশক্তিযোগাচ্চ তথা প্রকুপ্যতীতি যুক্তম্| বিসৃপ্তিং বিসরণম্| মেদসশ্চ গুণানাং গুণৈঃ সমানগুণভূযিষ্ঠত্বাদিত্যাদি|- মেদসো গুণানাং মধুরস্নেহগৌরবাদীনাং শ্লেষ্মণো গুণৈর্গুরুশীতাদিভির্ভূরিসামান্যাদিত্যর্থঃ; সমানং হি সমানেন মিলতীতি ভাবঃ| বিকৃতত্বাদিতিবচনেন প্রকৃতেন শ্লেষ্মণা সম্বন্ধো মেদোদূষকো ন ভবতি, কিন্তর্হি বিকৃতেনৈবেতি দর্শযতি| অতিপ্রমাণবৃদ্ধত্বাদিতি অতিশযিতপ্রমাণযোগেন বৃদ্ধত্বাত্; ন গুণাতিযোগমাত্রেণ বৃদ্ধত্বমিহ, কিন্তর্হ্যবযবোপচযেনেত্যর্থঃ| পূতিমাংসবত্যঃ পিডকাঃ পূতিমাংসপিডকাঃ| অপ্রকৃতিভূতত্বাদিতি মাংসপ্রদোষেণ নানাবিধশরাবিকাদিজনকত্বশক্তিত্বাদিতীহ বোদ্ধব্যম্| তেন, অপ্রকৃতভূতত্বাদিতিবচনং হি বিশেষার্থত্বান্ন পুনরুক্তম্| আসাদ্য প্রতিরুধ্যত ইতি গত্বাঽবতিষ্ঠতে| প্রকৃতিবিকৃতিভূতত্বাদিতি প্রকৃতিভূতৈর্গুণৈঃ সর্বৈরেব বিকৃতত্বাত্; সর্ব এব যস্মাচ্ছ্লেষ্মণো গুণা বিকৃতাস্তস্মাত্ প্রকোপপ্রকর্ষাত্ স্থিরো ভবতি, অতিপ্রকর্ষাত্ত্বসাধ্য ইত্যর্থঃ| কিংবা প্রকৃতিভূতঃ শ্লেষ্মা সমানে দূষ্যে মেদোবসাদৌ, বিকৃতিভূতশ্চাসমানে শোণিতাদৌ; তেন সমানাসমানত্বাদিত্যর্থঃ| তথা চ সমানদূষ্যপ্রাপ্ত্যা বলিত্বম্, অসমানদূষ্যপ্রাপ্ত্যা চ বিরুদ্ধোপক্রমত্বং কফস্য ভবতি; ততশ্চ স্থৈর্যমসাধ্যতা বা যুক্তেতি মন্তব্যম্||৮||
Adhikarana 7 (9-11) · Śloka 11
শরীরক্লেদস্তু শ্লেষ্মমেদোমিশ্রঃ প্রবিশন্ মূত্রাশযং মূত্রত্বমাপদ্যমানঃ শ্লৈষ্মিকৈরেভির্দশভির্গুণৈরুপসৃজ্যতে বৈষম্যযুক্তৈঃ; তদ্যথা- শ্বেতশীতমূর্তপিচ্ছিলাচ্ছস্নিগ্ধগুরুমধুরসান্দ্রপ্রসাদমন্দৈঃ, তত্র যেন গুণেনৈকেনানেকেন বা ভূযস্তরমুপসৃজ্যতে তত্সমাখ্যং গৌণং নামবিশেষং প্রাপ্নোতি||৯||
তে তু খল্বিমে দশ প্রমেহা নামবিশেষেণ ভবন্তি; তদ্যথা- উদকমেহশ্চ, ইক্ষুবালিকারসমেহশ্চ, সান্দ্রমেহশ্চ, সান্দ্রপ্রসাদমেহশ্চ, শুক্লমেহশ্চ, শুক্রমেহশ্চ, শীতমেহশ্চ, সিকতামেহশ্চ, শনৈর্মেহশ্চ, আলালমেহশ্চেতি||১০||
তে দশ প্রমেহাঃ সাধ্যাঃ; সমানগুণমেদঃস্থানকত্বাত্, কফস্য প্রাধান্যাত্, সমক্রিযত্বাচ্চ||১১||
View original
शरीरक्लेदस्तु श्लेष्ममेदोमिश्रः प्रविशन् मूत्राशयं मूत्रत्वमापद्यमानः श्लैष्मिकैरेभिर्दशभिर्गुणैरुपसृज्यते वैषम्ययुक्तैः; तद्यथा- श्वेतशीतमूर्तपिच्छिलाच्छस्निग्धगुरुमधुरसान्द्रप्रसादमन्दैः, तत्र येन गुणेनैकेनानेकेन वा भूयस्तरमुपसृज्यते तत्समाख्यं गौणं नामविशेषं प्राप्नोति||९||
ते तु खल्विमे दश प्रमेहा नामविशेषेण भवन्ति; तद्यथा- उदकमेहश्च, इक्षुवालिकारसमेहश्च, सान्द्रमेहश्च, सान्द्रप्रसादमेहश्च, शुक्लमेहश्च, शुक्रमेहश्च, शीतमेहश्च, सिकतामेहश्च, शनैर्मेहश्च, आलालमेहश्चेति||१०||
ते दश प्रमेहाः साध्याः; समानगुणमेदःस्थानकत्वात्, कफस्य प्राधान्यात्, समक्रियत्वाच्च||११||
সম্প্রতি যথা কফমেহাঃ কফগুণযোগাদ্দশ ভবন্তি তথা প্রাহ- শরীরেত্যাদি| বৈষম্যমিহ বৃদ্ধিকৃতমেব বোদ্ধব্যং, ক্ষযরূপবৈষম্যস্যৈবংরূপব্যাধ্যজনকত্বাত্| বৈষম্য এব বৃদ্ধবৃদ্ধতরত্বাদিনা হানিবৃদ্ধী বোদ্ধব্যে; তেন শ্বেতাদিগুণবৃদ্ধ্যা যে শুক্রমেহাদয উক্তাঃ, তেষ্বপীতরে শ্লেষ্মগুণা হানিবৃদ্ধিরূপবৈষম্যযুক্তাঃ সন্তীত্যর্থঃ| কিংবা বৈষম্যে সতি ক্বচিদ্দ্বযোঃ ক্বচিত্ত্রযাণাং ক্বচিচ্চতুর্ণাং গুণানাং বৃদ্ধির্ভবতীতি দর্শযতি| তেন গুণসঙ্খ্যোত্কর্ষাপকর্ষাদ্ধানিবৃদ্ধী জ্ঞেযে| নচেহ শ্বেতাদিদশগুণযোগাদ্যথাসঙ্খ্যং দশ প্রমেহাঃ, কিন্তু ব্যস্তসমস্তগুণযোগাচ্চ; অত এবাহ- যেন গুণেনৈকৈকেনানেকেন বেত্যাদি| সান্দ্রপ্রসাদশব্দেনৈক এব গুণো গণনীযঃ; সান্দ্রমেহব্যপদেশস্তু সান্দ্রপ্রসাদগুণৈকদেশেনোদ্ভূতেন জ্ঞেযঃ| তত্সমাখ্যমিত্যাদৌ তত্সমাখ্যং বা গৌণং বা নামবিশেষং প্রাপ্নোতীতি যোজনীযম্| তদ্গুণস্য সমা আখ্যা যস্য তত্ তত্সমাখ্যং নাম, যথা- শীতমেহ-শুক্লমেহ-সান্দ্রমেহেষু; অত্র হি শীতাদিগুণাখ্যযৈব মেহা ব্যপদিশ্যন্তে, ইতরেষু তূদকমেহাদিষু ন শ্বেতাদিগুণসঞ্জ্ঞাতুল্যং নাম, কিং তর্হি শ্লেষ্মণো নৈকগুণযুক্তোদকাদিতুল্যত্বেন গুণযোগপ্রবৃত্তত্বাদ্গৌণমুদকমেহ ইতি; অচ্ছসিতশীতাদিকফগুণযোগাদ্গৌণমুদকমেহ ইতি নাম ভবতি| এবমন্যত্রাপ্যনুসরণীযম্| উদকাদযস্ত্বিহ কফগুণমেলকলক্ষণার্থাস্তত্তত্কফগুণযুক্তা উপাত্তাঃ সঞ্জ্ঞাকরণার্থম্||৯-১১||
Adhikarana 8 (12-23) · Śloka 23
তত্র শ্লোকাঃ শ্লেষ্মপ্রমেহবিশেষবিজ্ঞানার্থা ভবন্তি-||১২||
অচ্ছং বহু সিতং শীতং নির্গন্ধমুদকোপমম্|
শ্লেষ্মকোপান্নরো মূত্রমুদমেহী প্রমেহতি||১৩||
অত্যর্থমধুরং শীতমীষত্পিচ্ছিলমাবিলম্|
কাণ্ডেক্ষুরসমঙ্কাশং শ্লেষ্মকোপাত্ প্রমেহতি||১৪||
যস্য পর্যুষিতং মূত্রং সান্দ্রীভবতি ভাজনে|
পুরুষং কফকোপেন তমাহুঃ সান্দ্রমেহিনম্||১৫||
যস্য সংহন্যতে মূত্রং কিঞ্চিত্ কিঞ্চিত্ প্রসীদতি|
সান্দ্রপ্রসাদমেহীতি তমাহুঃ শ্লেষ্মকোপতঃ||১৬||
শুক্লং পিষ্টনিভং মূত্রমভীক্ষ্ণং যঃ প্রমেহতি|
পুরুষং কফকোপেন তমাহুঃ শুক্লমেহিনম্||১৭||
শুক্রাভং শুক্রমিশ্রং বা মুহুর্মেহতি যো নরঃ|
শুক্রমেহিনমাহুস্তং পুরুষং শ্লেষ্মকোপতঃ||১৮||
অত্যর্থমধুরং শীতং মূত্রং মেহতি যো ভৃশম্|
শীতমেহিনমাহুস্তং পুরুষং শ্লেষ্মকোপতঃ||১৯||
মূর্তান্মূত্রগতান্ দোষানণূন্মেহতি যো নরঃ|
সিকতামেহিনং বিদ্যাত্তং নরং শ্লেষ্মকোপতঃ||২০||
মন্দং মন্দমবেগং তু কৃচ্ছ্রং যো মূত্রযেচ্ছনৈঃ|
শনৈর্মেহিনমাহুস্তং পুরুষং শ্লেষ্মকোপতঃ||২১||
তন্তুবদ্ধমিবালালং পিচ্ছিলং যঃ প্রমেহতি|
আলালমেহিনং বিদ্যাত্তং নরং শ্লেষ্মকোপতঃ||২২||
ইত্যেতে দশ প্রমেহাঃ শ্লেষ্মপ্রকোপনিমিত্তা ব্যাখ্যাতা ভবন্তি||২৩||
View original
तत्र श्लोकाः श्लेष्मप्रमेहविशेषविज्ञानार्था भवन्ति-||१२||
अच्छं बहु सितं शीतं निर्गन्धमुदकोपमम्|
श्लेष्मकोपान्नरो मूत्रमुदमेही प्रमेहति||१३||
अत्यर्थमधुरं शीतमीषत्पिच्छिलमाविलम्|
काण्डेक्षुरसमङ्काशं श्लेष्मकोपात् प्रमेहति||१४||
यस्य पर्युषितं मूत्रं सान्द्रीभवति भाजने|
पुरुषं कफकोपेन तमाहुः सान्द्रमेहिनम्||१५||
यस्य संहन्यते मूत्रं किञ्चित् किञ्चित् प्रसीदति|
सान्द्रप्रसादमेहीति तमाहुः श्लेष्मकोपतः||१६||
शुक्लं पिष्टनिभं मूत्रमभीक्ष्णं यः प्रमेहति|
पुरुषं कफकोपेन तमाहुः शुक्लमेहिनम्||१७||
शुक्राभं शुक्रमिश्रं वा मुहुर्मेहति यो नरः|
शुक्रमेहिनमाहुस्तं पुरुषं श्लेष्मकोपतः||१८||
अत्यर्थमधुरं शीतं मूत्रं मेहति यो भृशम्|
शीतमेहिनमाहुस्तं पुरुषं श्लेष्मकोपतः||१९||
मूर्तान्मूत्रगतान् दोषानणून्मेहति यो नरः|
सिकतामेहिनं विद्यात्तं नरं श्लेष्मकोपतः||२०||
मन्दं मन्दमवेगं तु कृच्छ्रं यो मूत्रयेच्छनैः|
शनैर्मेहिनमाहुस्तं पुरुषं श्लेष्मकोपतः||२१||
तन्तुबद्धमिवालालं पिच्छिलं यः प्रमेहति|
आलालमेहिनं विद्यात्तं नरं श्लेष्मकोपतः||२२||
इत्येते दश प्रमेहाः श्लेष्मप्रकोपनिमित्ता व्याख्याता भवन्ति||२३||
বিশেষবিজ্ঞানার্থা ভবন্তীতি পরস্পরভিন্নলক্ষণপ্রতিপাদকা ইত্যর্থঃ| উদকোপমমিতি উদকবর্ণাদিতুল্যম্| ননু, ইক্ষুবালিকামেহে কাণ্ডেক্ষুরসসঙ্কাশমিতি কিমিত্যুচ্যতে, ইক্ষুবালিকাকাণ্ডেক্ষ্বোরর্থান্তরত্বাত্| নৈবম্, ইক্ষুবালিকারসস্য তথা কাণ্ডেক্ষুরসস্য চৈকরূপতাপ্রতিপাদনার্থমুভযোরুপাদানং; কিংবা, কাণ্ডেক্ষুরসতুল্যোঽপি তথেক্ষুবালিকারসতুল্যশ্চেক্ষুবালিকামেহো ভবতীত্যুভযোপাদানাদ্দর্শযতি | সংহন্যতে স্ত্যানীভবতি| মূর্তানিতি কঠিনান্| দোষানিতি জাতৌ বহুবচনং, যেন দোষোঽত্রৈক এব প্রভূতঃ কফঃ| তন্তুবদ্ধং তন্তুবদ্দীর্ঘমিত্যর্থঃ| লালামিবালালং, সমন্তাল্লালারূপমিত্যর্থঃ| প্রতি প্রতি মেহং চ শ্লেষ্মকোপত ইত্যাদিবচনং সুখগ্রহণার্থম্ | নচেহ বাচ্যম্- যত্- যথা শ্লেষ্মগুণা দশ প্রমেহাঞ্জনযন্তি, তথা কিমিত্যপরানপি গুণসংসর্গাদ্বিকল্পান্তরেণ ন কুর্বন্তীতি; যতো ভাবস্বভাবোঽযং- যথা দৃষ্ট এব পরং কল্প্যতে নাদৃষ্টঃ; নহি সত্যপি ভূতসংসর্গভূযস্ত্বে রসভূযস্ত্বং ভবতীতি ব্যবস্থিতমেব||১২-২৩||
Adhikarana 9 (24-26) · Śloka 26
উষ্ণাম্ললবণক্ষারকটুকাজীর্ণভোজনোপসেবিনস্তথাঽতিতীক্ষ্ণাতপাগ্নিসন্তাপশ্রম ক্রোধবিষমাহারোপসেবিনশ্চ তথাবিধশরীরস্যৈব ক্ষিপ্রং পিত্তং প্রকোপমাপদ্যতে, তত্তু প্রকুপিতং তযৈবানুপূর্ব্যা প্রমেহানিমান্ ষট্ ক্ষিপ্রতরমভিনির্বর্তযতি||২৪||
তেষামপি তু খলু পিত্তগুণবিশেষেণৈব নামবিশেষা ভবন্তি; তদ্যথা- ক্ষারমেহশ্চ, কালমেহশ্চ, নীলমেহশ্চ, লোহিতমেহশ্চ, মাঞ্জিষ্ঠমেহশ্চ, হারিদ্রমেহশ্চেতি||২৫||
তে ষড্ভিরেব ক্ষারাম্ললবণকটুকবিস্রোষ্ণৈঃ পিত্তগুণৈঃ পূর্ববদ্যুক্তা ভবন্তি||২৬||
View original
उष्णाम्ललवणक्षारकटुकाजीर्णभोजनोपसेविनस्तथाऽतितीक्ष्णातपाग्निसन्तापश्रम क्रोधविषमाहारोपसेविनश्च तथाविधशरीरस्यैव क्षिप्रं पित्तं प्रकोपमापद्यते, तत्तु प्रकुपितं तयैवानुपूर्व्या प्रमेहानिमान् षट् क्षिप्रतरमभिनिर्वर्तयति||२४||
तेषामपि तु खलु पित्तगुणविशेषेणैव नामविशेषा भवन्ति; तद्यथा- क्षारमेहश्च, कालमेहश्च, नीलमेहश्च, लोहितमेहश्च, माञ्जिष्ठमेहश्च, हारिद्रमेहश्चेति||२५||
ते षड्भिरेव क्षाराम्ललवणकटुकविस्रोष्णैः पित्तगुणैः पूर्ववद्युक्ता भवन्ति||२६||
উষ্ণেত্যাদিনা পিত্তমেহনিদানম্| ষট্ ক্ষিপ্রতরমিতি শ্লেষ্মপ্রমেহাপেক্ষযা; শ্লেষ্মণো হি ক্ষিপ্রকারি পিত্তং, তেন ক্ষিপ্রতরোত্পাদো যুক্তঃ| পূর্ববদ্যুক্তা ভবন্তীতি বৈষম্যহানিবৃদ্ধিযুক্তৈরিত্যর্থঃ ||২৪-২৬||
Adhikarana 10 (27-35) · Śloka 35
সর্ব এব তে যাপ্যাঃ সংসৃষ্টদোষমেদঃস্থানত্বাদ্বিরুদ্ধোপক্রমত্বাচ্চেতি||২৭||
তত্র শ্লোকাঃ পিত্তপ্রমেহবিশেষবিজ্ঞানার্থা ভবন্তি-||২৮||
গন্ধবর্ণরসস্পর্শৈর্যথা ক্ষারস্তথাবিধম্|
পিত্তকোপান্নরো মূত্রং ক্ষারমেহী প্রমেহতি||২৯||
মসীবর্ণমজস্রং যো মূত্রমুষ্ণং প্রমেহতি|
পিত্তস্য পরিকোপেণ তং বিদ্যাত্ কালমেহিনম্||৩০||
চাষপক্ষনিভং মূত্রমম্লং মেহতি যো নরঃ|
পিত্তস্য পরিকোপেণ তং বিদ্যান্নীলমেহিনম্||৩১||
বিস্রং লবণমুষ্ণং চ রক্তং মেহতি যো নরঃ|
পিত্তস্য পরিকোপেণ তং বিদ্যাদ্রক্তমেহিনম্||৩২||
মঞ্জিষ্ঠোদকসঙ্কাশং ভৃশং বিস্রং প্রমেহতি|
পিত্তস্য পরিকোপাত্তং বিদ্যান্মাঞ্জিষ্ঠমেহিনম্||৩৩||
হরিদ্রোদকসঙ্কাশং কটুকং যঃ প্রমেহতি|
পিত্তস্য পরিকোপাত্তং বিদ্যাদ্ধারিদ্রমেহিনম্||৩৪||
ইত্যেতে ষট্ প্রমেহাঃ পিত্তপ্রকোপনিমিত্তা ব্যাখ্যাতা ভবন্তি||৩৫||
View original
सर्व एव ते याप्याः संसृष्टदोषमेदःस्थानत्वाद्विरुद्धोपक्रमत्वाच्चेति||२७||
तत्र श्लोकाः पित्तप्रमेहविशेषविज्ञानार्था भवन्ति-||२८||
गन्धवर्णरसस्पर्शैर्यथा क्षारस्तथाविधम्|
पित्तकोपान्नरो मूत्रं क्षारमेही प्रमेहति||२९||
मसीवर्णमजस्रं यो मूत्रमुष्णं प्रमेहति|
पित्तस्य परिकोपेण तं विद्यात् कालमेहिनम्||३०||
चाषपक्षनिभं मूत्रमम्लं मेहति यो नरः|
पित्तस्य परिकोपेण तं विद्यान्नीलमेहिनम्||३१||
विस्रं लवणमुष्णं च रक्तं मेहति यो नरः|
पित्तस्य परिकोपेण तं विद्याद्रक्तमेहिनम्||३२||
मञ्जिष्ठोदकसङ्काशं भृशं विस्रं प्रमेहति|
पित्तस्य परिकोपात्तं विद्यान्माञ्जिष्ठमेहिनम्||३३||
हरिद्रोदकसङ्काशं कटुकं यः प्रमेहति|
पित्तस्य परिकोपात्तं विद्याद्धारिद्रमेहिनम्||३४||
इत्येते षट् प्रमेहाः पित्तप्रकोपनिमित्ता व्याख्याता भवन्ति||३५||
সংসৃষ্টদোষমেদঃস্থানত্বাদিতি সংসৃষ্টং সন্নিকৃষ্টং দোষস্য পিত্তস্য মেদসশ্চ স্থানং যস্মাত্; পিত্তস্য হ্যামাশযঃ স্থানং, তথা মেদসোঽপি যত্ স্থানং বপাবহনং, তদপ্যামাশযৈকদেশ এব; তেন দোষদূষ্যযোঃ স্থানপ্রত্যাসত্ত্যা দূষণং নিত্যং প্রত্যাসন্নত্বাদ্দুর্জযমিতি ভাবঃ| কিংবা সংসৃষ্টদোষং মেদোরূপং স্থানং যস্য স তথা, এষ বিরুদ্ধোপক্রমত্বে হেতুঃ| তেন, যস্মাত্ পিত্তরূপেণ দোষেণ সম্বদ্ধং মেদোরূপং স্থানং, তস্মাদ্বিরুদ্ধোপক্রমতা| যদ্ধি পিত্তস্য মধুরশীতাদি পথ্যং, তদপথ্যং মেদসঃ; যচ্চ মেদসঃ কটুকাদি পথ্যং, তদপথ্যং পিত্তস্য| চকারাদ্ব্যাধিপ্রভাবাচ্চ যাপ্যত্বমিতি দর্শযতি||২৭-৩৫||
Adhikarana 11 (36-37) · Śloka 37
কষাযকটুতিক্তরূক্ষলঘুশীতব্যবাযব্যাযামবমনবিরেচনাস্থাপন-শিরোবিরেচনাতিযোগসন্ধারণানশনাভিঘাতাতপোদ্বেগশোকশোণিতাতিষেক- জাগরণবিষমশরীরন্যাসানুপসেবমানস্য তথাবিধশরীরস্যৈব ক্ষিপ্রং বাতঃ প্রকোপমাপদ্যতে||৩৬||
স প্রকুপিতস্তথাবিধে শরীরে বিসর্পন্ যদা বসামাদায মূত্রবহানি স্রোতাংসি প্রতিপদ্যতে তদা বসামেহমভিনির্বর্তযতি; যদা পুনর্মজ্জানং মূত্রবস্তাবাকর্ষতি তদা মজ্জমেহমভিনির্বর্তযতি; যদা তু লসীকাং মূত্রাশযেঽভিবহন্মূত্রমনুবন্ধং চ্যোতযতি লসীকাতিবহুত্বাদ্বিক্ষেপণাচ্চ বাযোঃ খল্বস্যাতিমূত্রপ্রবৃত্তিসঙ্গং করোতি, তদা স মত্ত ইব গজঃ ক্ষরত্যজস্রং মূত্রমবেগং, তং হস্তিমেহিনমাচক্ষতে; ওজঃ পুনর্মধুরস্বভাবং, তদ্ যদা রৌক্ষ্যাদ্বাযুঃ কষাযত্বেনাভিসংসৃজ্য মূত্রাশযেঽভিবহতি তদা মধুমেহং করোতি||৩৭||
View original
कषायकटुतिक्तरूक्षलघुशीतव्यवायव्यायामवमनविरेचनास्थापन-शिरोविरेचनातियोगसन्धारणानशनाभिघातातपोद्वेगशोकशोणितातिषेक- जागरणविषमशरीरन्यासानुपसेवमानस्य तथाविधशरीरस्यैव क्षिप्रं वातः प्रकोपमापद्यते||३६||
स प्रकुपितस्तथाविधे शरीरे विसर्पन् यदा वसामादाय मूत्रवहानि स्रोतांसि प्रतिपद्यते तदा वसामेहमभिनिर्वर्तयति; यदा पुनर्मज्जानं मूत्रबस्तावाकर्षति तदा मज्जमेहमभिनिर्वर्तयति; यदा तु लसीकां मूत्राशयेऽभिवहन्मूत्रमनुबन्धं च्योतयति लसीकातिबहुत्वाद्विक्षेपणाच्च वायोः खल्वस्यातिमूत्रप्रवृत्तिसङ्गं करोति, तदा स मत्त इव गजः क्षरत्यजस्रं मूत्रमवेगं, तं हस्तिमेहिनमाचक्षते; ओजः पुनर्मधुरस्वभावं, तद् यदा रौक्ष्याद्वायुः कषायत्वेनाभिसंसृज्य मूत्राशयेऽभिवहति तदा मधुमेहं करोति||३७||
রূক্ষেত্যাদি বাতমেহস্য নিদানম্| মূত্রবস্তাবাকর্ষতি মূত্রবস্তৌ স্থিত আকর্ষতি, অর্থান্মূত্রবস্তিমেব নযতি| লসীকা মাংসত্বগন্তরে উদকভাগঃ| বক্ষ্যতি হি শারীরে- “যন্মাংসত্বগন্তরে উদকং, তল্লসীকাশব্দং লভতে” (শা.অ.৭) ইত্যাদি| অনুবন্ধমিতি অবিচ্ছেদেন| চ্যোতযতীতি পাতযতি| রৌক্ষ্যাদ্বাযুঃ কষাযত্বেনাভিসংসৃজ্যেতি মধুরমপ্যোজো বাযুঃ প্রভাবাত্ কষাযরসযুক্তং কৃত্বা রৌক্ষ্যান্মূত্রাশযেঽভিবহতি, মূত্রাশযং রৌক্ষ্যাচ্ছেদযিত্বা রূক্ষং চ কৃত্বা নযত্যোজঃ; স্বমহিম্না চ বাযুরোজঃ কষাযং করোতি, যতো বাতো হি বৃদ্ধঃ প্রভাবাত্ কষাযরসং করোতি||৩৬-৩৭||
Adhikarana 12 (38-46) · Śloka 46
ইমাংশ্চতুরঃ প্রমেহান্ বাতজানসাধ্যানাচক্ষতে ভিষজঃ, মহাত্যযিকত্বাদ্বিরুদ্ধোপক্রমত্বাচ্চেতি||৩৮||
তেষামপি পূর্ববদ্গুণবিশেষেণ নামবিশেষা ভবন্তি; তদ্যথা- বসামেহশ্চ, মজ্জমেহশ্চ, হস্তিমেহশ্চ, মধুমেহশ্চেতি||৩৯||
তত্র শ্লোকা বাতপ্রমেহবিশেষবিজ্ঞানার্থা ভবন্তি-||৪০||
বসামিশ্রং বসাভং বা মুহুর্মেহতি যো নরঃ|
বসামেহিনমাহুস্তমসাধ্যং বাতকোপতঃ||৪১||
মজ্জানং সহ মূত্রেণ মুহুর্মেহতি যো নরঃ|
মজ্জমেহিনমাহুস্তমসাধ্যং বাতকোপতঃ||৪২||
হস্তী মত্ত ইবাজস্রং মূত্রং ক্ষরতি যো ভৃশম্|
হস্তিমেহিনমাহুস্তমসাধ্যং বাতকোপতঃ||৪৩||
কষাযমধুরং পাণ্ডু রূক্ষং মেহতি যো নরঃ|
বাতকোপাদসাধ্যং তং প্রতীযান্মধুমেহিনম্||৪৪||
ইত্যেতে চত্বারঃ প্রমেহা বাতপ্রকোপনিমিত্তা ব্যাখ্যাতা ভবন্তি||৪৫||
এবং ত্রিদোষপ্রকোপনিমিত্তা বিংশতিঃ প্রমেহা ব্যাখ্যাতা ভবন্তি||৪৬||
View original
इमांश्चतुरः प्रमेहान् वातजानसाध्यानाचक्षते भिषजः, महात्ययिकत्वाद्विरुद्धोपक्रमत्वाच्चेति||३८||
तेषामपि पूर्ववद्गुणविशेषेण नामविशेषा भवन्ति; तद्यथा- वसामेहश्च, मज्जमेहश्च, हस्तिमेहश्च, मधुमेहश्चेति||३९||
तत्र श्लोका वातप्रमेहविशेषविज्ञानार्था भवन्ति-||४०||
वसामिश्रं वसाभं वा मुहुर्मेहति यो नरः|
वसामेहिनमाहुस्तमसाध्यं वातकोपतः||४१||
मज्जानं सह मूत्रेण मुहुर्मेहति यो नरः|
मज्जमेहिनमाहुस्तमसाध्यं वातकोपतः||४२||
हस्ती मत्त इवाजस्रं मूत्रं क्षरति यो भृशम्|
हस्तिमेहिनमाहुस्तमसाध्यं वातकोपतः||४३||
कषायमधुरं पाण्डु रूक्षं मेहति यो नरः|
वातकोपादसाध्यं तं प्रतीयान्मधुमेहिनम्||४४||
इत्येते चत्वारः प्रमेहा वातप्रकोपनिमित्ता व्याख्याता भवन्ति||४५||
एवं त्रिदोषप्रकोपनिमित्ता विंशतिः प्रमेहा व्याख्याता भवन्ति||४६||
মহাত্যযিকত্বাদিতি মজ্জপ্রভৃতিসারভূতধাতুক্ষযকরত্বাত্| বিরুদ্ধোপক্রমত্বং তু যদ্বাযোঃ স্নিগ্ধাদি পথ্যং, তন্মেদসোঽপথ্যমিত্যাদি জ্ঞেযম্||৩৮-৪৬||
Adhikarana 13 (47) · Śloka 47
ত্রযস্তু খলু দোষাঃ প্রকুপিতাঃ প্রমেহানভিনির্বর্তযিষ্যন্ত ইমানি পূর্বরূপাণি দর্শযন্তি; তদ্যথা- জটিলীভাবং কেশেষু, মাধুর্যমাস্যস্য, করপাদযোঃ সুপ্ততাদাহৌ, মুখতালুকণ্ঠশোষং, পিপাসাম্, আলস্যং, মলং কাযে, কাযচ্ছিদ্রেষূপদেহং, পরিদাহং সুপ্ততাং চাঙ্গেষু, ষট্পদপিপীলিকাভিশ্চ শরীরমূত্রাভিসরণং, মূত্রে চ মূত্রদোষান্, বিস্রং শরীরগন্ধং, নিদ্রাং, তন্দ্রাং চ সর্বকালমিতি||৪৭||
View original
त्रयस्तु खलु दोषाः प्रकुपिताः प्रमेहानभिनिर्वर्तयिष्यन्त इमानि पूर्वरूपाणि दर्शयन्ति; तद्यथा- जटिलीभावं केशेषु, माधुर्यमास्यस्य, करपादयोः सुप्ततादाहौ, मुखतालुकण्ठशोषं, पिपासाम्, आलस्यं, मलं काये, कायच्छिद्रेषूपदेहं, परिदाहं सुप्ततां चाङ्गेषु, षट्पदपिपीलिकाभिश्च शरीरमूत्राभिसरणं, मूत्रे च मूत्रदोषान्, विस्रं शरीरगन्धं, निद्रां, तन्द्रां च सर्वकालमिति||४७||
ত্রযস্ত্বিতি ত্রযোঽপীত্যর্থঃ| তেন, সর্বপ্রমেহাণামপ্যেতদেব সমানং পূর্বরূপমিতি দর্শযতি||৪৭||
Adhikarana 14 (48-49) · Śloka 49
উপদ্রবাস্তু খলু প্রমেহিণাং তৃষ্ণাতীসারজ্বরদাহদৌর্বল্যারোচকাবিপাকাঃ পূতিমাংসপিডকালজীবিদ্রধ্যাদযশ্চ তত্প্রসঙ্গাদ্ভবন্তি||৪৮||
তত্র সাধ্যান্ প্রমেহান্ সংশোধনোপশমনৈর্যথার্হমুপপাদযংশ্চিকিত্সেদিতি||৪৯||
View original
उपद्रवास्तु खलु प्रमेहिणां तृष्णातीसारज्वरदाहदौर्बल्यारोचकाविपाकाः पूतिमांसपिडकालजीविद्रध्यादयश्च तत्प्रसङ्गाद्भवन्ति||४८||
तत्र साध्यान् प्रमेहान् संशोधनोपशमनैर्यथार्हमुपपादयंश्चिकित्सेदिति||४९||
তত্প্রসঙ্গাদ্ভবন্তীতি প্রমেহাত্যনুবন্ধাদ্ভবন্তীত্যর্থঃ||৪৮-৪৯||
Adhikarana 15 (50-52) · Śloka 52
ভবন্তি চাত্র- গৃধ্নুমভ্যবহার্যেষু স্নানচঙ্ক্রমণদ্বিষম্|
প্রমেহঃ ক্ষিপ্রমভ্যেতি নীডদ্রুমমিবাণ্ডজঃ||৫০||
মন্দোত্সাহমতিস্থূলমতিস্নিগ্ধং মহাশনম্|
মৃত্যুঃ প্রমেহরূপেণ ক্ষিপ্রমাদায গচ্ছতি||৫১||
যস্ত্বাহারং শরীরস্য ধাতুসাম্যকরং নরঃ|
সেবতে বিবিধাশ্চান্যাশ্চেষ্টাঃ স সুখমশ্নুতে||৫২||
View original
भवन्ति चात्र- गृध्नुमभ्यवहार्येषु स्नानचङ्क्रमणद्विषम्|
प्रमेहः क्षिप्रमभ्येति नीडद्रुममिवाण्डजः||५०||
मन्दोत्साहमतिस्थूलमतिस्निग्धं महाशनम्|
मृत्युः प्रमेहरूपेण क्षिप्रमादाय गच्छति||५१||
यस्त्वाहारं शरीरस्य धातुसाम्यकरं नरः|
सेवते विविधाश्चान्याश्चेष्टाः स सुखमश्नुते||५२||
যাদৃশে পুরুষে প্রমেহো ভবতি প্রাযস্তমাহ- গৃধ্নুমিত্যাদি|- গৃধ্নুং লুব্ধম্| নীডদ্রুমঃ পক্ষিণাং বাসবৃক্ষঃ| মৃত্যুঃ প্রমেহরূপেণেত্যাদিবচনান্মন্দোত্সাহাদিযুক্তে প্রমেহো জাতোঽসাধ্য এব ভবতীতি দর্শযতি| বিবিধাশ্চান্যাশ্চেষ্টা ইতি ধাতুসাম্যকরা ইত্যর্থঃ||৫০-৫২||
Adhikarana 16 (53-55) · Śloka 55
তত্র শ্লোকাঃ- হেতুর্ব্যাধিবিশেষাণাং প্রমেহাণাং চ কারণম্|
দোষধাতুসমাযোগো রূপং বিবিধমেব চ||৫৩||
দশ শ্লেষ্মকৃতা যস্মাত্ প্রমেহাঃ ষট্ চ পিত্তজাঃ|
যথা চ বাযুশ্চতুরঃ প্রমেহান্ কুরুতে বলী||৫৪||
সাধ্যাসাধ্যবিশেষাশ্চ পূর্বরূপাণ্যুপদ্রবাঃ|
প্রমেহাণাং নিদানেঽস্মিন্ ক্রিযাসূত্রং চ ভাষিতম্||৫৫||
View original
तत्र श्लोकाः- हेतुर्व्याधिविशेषाणां प्रमेहाणां च कारणम्|
दोषधातुसमायोगो रूपं विविधमेव च||५३||
दश श्लेष्मकृता यस्मात् प्रमेहाः षट् च पित्तजाः|
यथा च वायुश्चतुरः प्रमेहान् कुरुते बली||५४||
साध्यासाध्यविशेषाश्च पूर्वरूपाण्युपद्रवाः|
प्रमेहाणां निदानेऽस्मिन् क्रियासूत्रं च भाषितम्||५५||
সঙ্গ্রহে ব্যাধিবিশেষাণামিত্যনেন ‘ইহ খলু’ ইত্যাদিগ্রন্থং সঙ্গৃহ্ণাতি| সাধ্যাসাধ্যবিশেষা ইত্যত্রাসাধ্যবিশেষত্বেন পিত্তজানাং যাপ্যানাং গ্রহণম্||৫৩-৫৫||
Adhikarana puShpikA · Śloka 4
ইত্যগ্নিবেশকৃতে তন্ত্রে চরকপ্রতিসংস্কৃতে নিদানস্থানে প্রমেহনিদানং নাম চতুর্থোঽধ্যাযঃ||৪||
View original
इत्यग्निवेशकृते तन्त्रे चरकप्रतिसंस्कृते निदानस्थाने प्रमेहनिदानं नाम चतुर्थोऽध्यायः||४||
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং নিদানস্থানে প্রমেহনিদানং নাম চতুর্থোঽধ্যাযঃ||৪||