Adhikarana 1 (1-3) · Śloka 3
অথাতো রক্তপিত্তনিদানং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
পিত্তং যথাভূতং লোহিতপিত্তমিতি সঞ্জ্ঞাং লভতে, তদ্ ব্যাখ্যাস্যামঃ||৩||
View original
अथातो रक्तपित्तनिदानं व्याख्यास्यामः||१||
इति ह स्माह भगवानात्रेयः||२||
पित्तं यथाभूतं लोहितपित्तमिति सञ्ज्ञां लभते, तद् व्याख्यास्यामः||३||
আদ্যোত্পত্তৌ জ্বরসন্তাপাদ্রক্তপিত্তোত্পত্তের্জ্বরমনু রক্তপিত্তনিদানমুচ্যতে| পিত্তং যথাভূতমিত্যাদিনা পিত্তমেবাবস্থাবশাল্লোহিতপিত্তমিত্যুচ্যত ইতি দর্শযতি, নতু রক্তং চ পিত্তং চ রক্তপিত্তমিতি||১-৩||
Adhikarana 2 (4) · Śloka 4
যদা জন্তুর্যবকোদ্দালককোরদূষপ্রাযাণ্যন্নানি ভুঙ্ক্তে, ভৃশোষ্ণতীক্ষ্ণমপি চান্যদন্নজাতং নিষ্পাবমাষকুলত্থসূপক্ষারোপসংহিতং, দধিদধিমণ্ডোদশ্বিত্কট্বরাম্লকাঞ্জিকোপসেকং বা, বারাহমাহিষাবিকমাত্স্যগব্যপিশিতং, পিণ্যাকপিণ্ডালুশুষ্কশাকোপহিতং, মূলকসর্ষপলশুনকরঞ্জশিগ্রুমধুশিগ্রু(খডযূষ ) ভূস্তৃণসুমুখসুরসকুঠেরকগণ্ডীরকালমালকপর্ণাসক্ষবকফণিজ্ঝকোপদংশং, সুরাসৌবীরতুষোদকমৈরেযমেদকমধূলকশুক্তকুবলবদরাম্লপ্রাযানুপানং বা, পিষ্টান্নোত্তরভূযিষ্ঠম্; উষ্ণাভিতপ্তো বাঽতিমাত্রমতিবেলং বাঽঽমং পযঃ পিবতি, পযসা সমশ্নাতি রৌহিণীকং , কাণকপোতং বা সর্ষপতৈলক্ষারসিদ্ধং, কুলত্থপিণ্যাকজাম্ববলকুচপক্বৈঃ শৌক্তিকৈর্বা সহ ক্ষীরং পিবত্যুষ্ণাভিতপ্তঃ ; তস্যৈবমাচরতঃ পিত্তং প্রকোপমাপদ্যতে, লোহিতং চ স্বপ্রমাণমতিবর্ততে|
তস্মিন্ প্রমাণাতিবৃত্তে পিত্তং প্রকুপিতং শরীরমনুসর্পদ্যদেব যকৃত্প্লীহপ্রভবাণাং লোহিতবহানাং চ স্রোতসাং লোহিতাভিষ্যন্দগুরূণি মুখান্যাসাদ্য প্রতিরুন্ধ্যাত্ তদেব লোহিতং দূষযতি||৪||
View original
यदा जन्तुर्यवकोद्दालककोरदूषप्रायाण्यन्नानि भुङ्क्ते, भृशोष्णतीक्ष्णमपि चान्यदन्नजातं निष्पावमाषकुलत्थसूपक्षारोपसंहितं, दधिदधिमण्डोदश्वित्कट्वराम्लकाञ्जिकोपसेकं वा, वाराहमाहिषाविकमात्स्यगव्यपिशितं, पिण्याकपिण्डालुशुष्कशाकोपहितं, मूलकसर्षपलशुनकरञ्जशिग्रुमधुशिग्रु(खडयूष ) भूस्तृणसुमुखसुरसकुठेरकगण्डीरकालमालकपर्णासक्षवकफणिज्झकोपदंशं, सुरासौवीरतुषोदकमैरेयमेदकमधूलकशुक्तकुवलबदराम्लप्रायानुपानं वा, पिष्टान्नोत्तरभूयिष्ठम्; उष्णाभितप्तो वाऽतिमात्रमतिवेलं वाऽऽमं पयः पिबति, पयसा समश्नाति रौहिणीकं , काणकपोतं वा सर्षपतैलक्षारसिद्धं, कुलत्थपिण्याकजाम्बवलकुचपक्वैः शौक्तिकैर्वा सह क्षीरं पिबत्युष्णाभितप्तः ; तस्यैवमाचरतः पित्तं प्रकोपमापद्यते, लोहितं च स्वप्रमाणमतिवर्तते|
तस्मिन् प्रमाणातिवृत्ते पित्तं प्रकुपितं शरीरमनुसर्पद्यदेव यकृत्प्लीहप्रभवाणां लोहितवहानां च स्रोतसां लोहिताभिष्यन्दगुरूणि मुखान्यासाद्य प्रतिरुन्ध्यात् तदेव लोहितं दूषयति||४||
যদা জন্তুরিত্যাদিনা নিদানমুচ্যতে| যবকঃ ব্রীহিবিশেষঃ; উদ্দালঃ বনকোদ্রবঃ; কোরদূষঃ যদ্যপ্যন্নপানে পিত্তহর উক্তস্তথাঽপ্যস্য নিষ্পাবাদিযুক্তস্য সংযোগমহিম্না রক্তপিত্তনিদানত্বং জ্ঞেযম্, এবমন্যত্রাপি রক্তপিত্তনিদানত্বেনেহোক্তক্ষীরাদৌ জ্ঞেযম্| দধিমণ্ডঃ মস্তু, উদশ্বিত্ অর্ধজলং তক্রং, কট্বরং নির্জলং, কিংবা অম্লং তক্রম্| মধুশিগ্রুঃ স্বল্পশোভাঞ্জনকঃ| খডযূষঃ রাগকর্পূর ইতি খ্যাতঃ| সুমুখাদযঃ ফণিজ্ঝকান্তাঃ পর্ণাসভেদাঃ| উপদংশমিতি মূলকাদীনি খাদযিত্বা যাবকাদ্যন্নং ভুঙ্ক্তে ইত্যর্থঃ| মধূলকঃ গোধূমবিশেষঃ| শুক্তঃ সন্ধানবিশেষঃ| পিষ্টান্নমুত্তরত্র ভোজনস্য ভূযিষ্ঠং যত্র তত্ পিষ্টান্নোত্তরভূযিষ্ঠম্| অতিবেলমিতি পুনঃ পুনঃ| রৌহিণীকং রোহিণীশাকম্| শৌক্তিকৈরিতি বদরীফলৈঃ| আমমিত্যুত্তরেণ সম্বধ্যতে| স্বপ্রমাণমতিবর্ততে প্রবর্ধত ইত্যর্থঃ| যদেবেত্যনেন এবমপি প্রকুপিতস্য পিত্তস্য য এবাংশ উক্তসম্প্রাপ্তিমান্ ভবতি স এব রক্তং দূষযতি নান্য ইতি দর্শযতি| লোহিতাভিষ্যন্দগুরূণি প্রবৃদ্ধলোহিতস্যন্দেন গুরূণি উত্সন্নানি বিবৃতানীতি যাবত্| প্রতিরুন্ধ্যাত্ ‘বৃদ্ধেন শোণিতেন’ ইতি শেষঃ; ‘প্রতিপদ্যতে’ ইতি পাঠপক্ষে তু ‘শোণিতম্’ ইতি শেষঃ, তেন শোণিতং প্রতিপদ্যত ইত্যর্থঃ| যকৃত্প্লীহপ্রভবাণামিত্যস্য বিশেষণং- লোহিতবহানামিতি| চকারোঽবধারণে| বক্ষ্যতি চ রক্তপিত্তচিকিত্সিতে- “প্লীহানং চ যকৃচ্চৈব তদধিষ্ঠায বর্ততে| স্রোতাংসি রক্তবাহীনি তন্মূলানি হি দেহিনাম্” (চি.অ.৪) ইতি||৪||
Adhikarana 3 (5) · Śloka 5
সংসর্গাল্লোহিতপ্রদূষণাল্লোহিতগন্ধবর্ণানুবিধানাচ্চ পিত্তং লোহিতপিত্তমিত্যাচক্ষতে||৫||
View original
संसर्गाल्लोहितप्रदूषणाल्लोहितगन्धवर्णानुविधानाच्च पित्तं लोहितपित्तमित्याचक्षते||५||
এবং রক্তদূষকে পিত্তে যথা রক্তপিত্তসঞ্জ্ঞা ভবতি, তদাহ- সংসর্গাদিত্যাদি| সংসর্গাত্ লোহিতসম্বন্ধাত্| লোহিতগন্ধবর্ণানুবিধানাদিতি লোহিতসদৃশগন্ধবর্ণযুক্তত্বাত্| এতেন, ‘রক্তযুক্তং পিত্তং রক্তপিত্তম্’ ইতি প্রথমা নিরুক্তিঃ, ‘রক্তে দূষ্যে পিত্তম্’ ইতি দ্বিতীযা, ‘রক্তবত্ পিত্তং রক্তপিত্তম্’ ইতি তৃতীযা দর্শ্যতে| উক্তং চ চিকিত্সিতে- “সংসর্গাদ্দূষণাত্তত্তু সামান্যাদ্গন্ধবর্ণযোঃ| রক্তস্য পিত্তমাখ্যাতং রক্তপিত্তং মনীষিভিঃ”- (চি.অ.৪) ইতি| এতদেব চ রক্তপিত্তস্য সামান্যলক্ষণং- যদ্- রক্তগন্ধবর্ণানুবিধানং; বিশেষলক্ষণং তু ঊর্ধ্বাদিভেদেন কফাদিসম্বন্ধাদেবেহ বোদ্ধব্যং; চিকিত্সিতেঽপি ‘সান্দ্রং সপাণ্ডু’ (চি.অ.৪) ইত্যাদিনা লক্ষণং বক্ষ্যতি||৫||
Adhikarana 4 (6) · Śloka 6
তস্যেমানি পূর্বরূপাণি ভবন্তি; তদ্যথা- অনন্নাভিলাষঃ, ভুক্তস্য বিদাহঃ, শুক্তাম্লগন্ধরস উদ্গারঃ, ছর্দেরভীক্ষ্ণমাগমনং, ছর্দিতস্য বীভত্সতা, স্বরভেদো, গাত্রাণাং সদনং, পরিদাহঃ, মুখাদ্ধূমাগম ইব, লোহলোহিতমত্স্যামগন্ধিত্বমিব চাস্যস্য, রক্তহরিতহারিদ্রত্বমঙ্গাবযবশকৃন্মূত্রস্বেদলালাসিঙ্ঘাণকাস্যকর্ণমলপিডকোলিকাপিডকানাম্ , অঙ্গবেদনা, লোহিতনীলপীতশ্যাবানামর্চিষ্মতাং চ রূপাণাং স্বপ্নে দর্শনমভীক্ষ্ণমিতি (লোহিতপিত্তপূর্বরূপাণি ভবন্তি)||৬||
View original
तस्येमानि पूर्वरूपाणि भवन्ति; तद्यथा- अनन्नाभिलाषः, भुक्तस्य विदाहः, शुक्ताम्लगन्धरस उद्गारः, छर्देरभीक्ष्णमागमनं, छर्दितस्य बीभत्सता, स्वरभेदो, गात्राणां सदनं, परिदाहः, मुखाद्धूमागम इव, लोहलोहितमत्स्यामगन्धित्वमिव चास्यस्य, रक्तहरितहारिद्रत्वमङ्गावयवशकृन्मूत्रस्वेदलालासिङ्घाणकास्यकर्णमलपिडकोलिकापिडकानाम् , अङ्गवेदना, लोहितनीलपीतश्यावानामर्चिष्मतां च रूपाणां स्वप्ने दर्शनमभीक्ष्णमिति (लोहितपित्तपूर्वरूपाणि भवन्ति)||६||
পূর্বরূপে ছর্দিতস্য বীভত্সতা বৈবর্ণ্যবৈগন্ধ্যাদিযোগাত্| পিডকোলিকা নেত্রমলঃ| অঙ্গবেদনা অঙ্গমর্দঃ||৬||
Adhikarana 5 (7) · Śloka 7
উপদ্রবাস্তু খলু দৌর্বল্যারোচকাবিপাকশ্বাসকাসজ্বরাতীসারশোফশোষপাণ্ডুরোগাঃ স্বরভেদশ্চ||৭||
View original
उपद्रवास्तु खलु दौर्बल्यारोचकाविपाकश्वासकासज्वरातीसारशोफशोषपाण्डुरोगाः स्वरभेदश्च||७||
ব্যাধেরসাধ্যত্বস্য ধর্মস্য খ্যাপকান্ লিঙ্গবিশেষানুপদ্রবাখ্যানাহ- উপদ্রবাস্ত্বিত্যাদি| এতেনোপদ্রবস্য লিঙ্গভূতত্বেন নিদানপঞ্চকানতিরিক্তত্বম্| রক্তপিত্তে চৈতে উপদ্রবাঃ প্রাযোভাবিত্বেন নিযতা ইত্যভিধীযন্তে; জ্বরে তূপদ্রবা নিযতা ন সন্তি, তেন তত্র নোক্তাঃ; এবং গুল্মাদাবপি প্রাযোভাবিত্বেনোপদ্রবকথনং ব্যাখ্যেযম্| স্বরভেদশ্চেতি পৃথক্পাঠেন স্বরভেদস্য প্রাযোভাবিত্বমাহ||৭||
Adhikarana 6 (8-9) · Śloka 9
মার্গৌ পুনরস্য দ্বৌ ঊর্ধ্বং, চাধশ্চ|
তদ্বহুশ্লেষ্মণি শরীরে শ্লেষ্মসংসর্গাদূর্ধ্বং প্রতিপদ্যমানং কর্ণনাসিকানেত্রাস্যেভ্যঃ প্রচ্যবতে, বহুবাতে তু শরীরে বাতসংসর্গাদধঃ প্রতিপদ্যমানং মূত্রপুরীষমার্গাভ্যাং প্রচ্যবতে, বহুশ্লেষ্মবাতে তু শরীরে শ্লেষ্মবাতসংসর্গাদ্দ্বাবপি মার্গৌ প্রতিপদ্যতে, তৌ মার্গৌ প্রতিপদ্যমানং সর্বেভ্য এব যথোক্তেভ্যঃ খেভ্যঃ প্রচ্যবতে শরীরস্য||৮||
তত্র যদূর্ধ্বভাগং তত্ সাধ্যং, বিরেচনোপক্রমণীযত্বাদ্বহ্বৌষধত্বাচ্চ; যদধোভাগং তদ্যাপ্যং, বমনোপক্রমণীযত্বাদল্পৌষধত্বাচ্চ; যদুভযভাগং তদসাধ্যং, বমনবিরেচনাযোগিত্বাদনৌষধত্বাচ্চেতি||৯||
View original
मार्गौ पुनरस्य द्वौ ऊर्ध्वं, चाधश्च|
तद्बहुश्लेष्मणि शरीरे श्लेष्मसंसर्गादूर्ध्वं प्रतिपद्यमानं कर्णनासिकानेत्रास्येभ्यः प्रच्यवते, बहुवाते तु शरीरे वातसंसर्गादधः प्रतिपद्यमानं मूत्रपुरीषमार्गाभ्यां प्रच्यवते, बहुश्लेष्मवाते तु शरीरे श्लेष्मवातसंसर्गाद्द्वावपि मार्गौ प्रतिपद्यते, तौ मार्गौ प्रतिपद्यमानं सर्वेभ्य एव यथोक्तेभ्यः खेभ्यः प्रच्यवते शरीरस्य||८||
तत्र यदूर्ध्वभागं तत् साध्यं, विरेचनोपक्रमणीयत्वाद्बह्वौषधत्वाच्च; यदधोभागं तद्याप्यं, वमनोपक्रमणीयत्वादल्पौषधत्वाच्च; यदुभयभागं तदसाध्यं, वमनविरेचनायोगित्वादनौषधत्वाच्चेति||९||
সাধ্যত্বাদিবিশেষস্য তথা কফাদিসম্বন্ধস্য চ মার্গবিশেষকৃতস্য প্রতিপাদনার্থং মার্গমাহ- মার্গাবিত্যাদি| বহুশ্লেষ্মণি শরীরে শ্লেষ্মসংসর্গাদিতি বচনেন ঊর্ধ্বগে রক্তপিত্তে শ্লেষ্মসম্বন্ধঃ কারণান্তরচিতেনাপি শ্লেষ্মণা ভবতীতি দর্শযতি| যত্তু রক্তপিত্তনিদানজন্যত্বং কফস্য, তন্নাবশ্যং ভবতি; অত এব “স্নিগ্ধোষ্ণমুষ্ণরূক্ষং চ রক্তপিত্তস্য কারণম্| অধোগস্যোত্তরং প্রাযঃ” (চি.অ.৪) ইত্যাদৌ প্রাযঃশব্দং কৃতবান্| এবং ‘বহুবাতে তু’ ইত্যত্রাপি ব্যাখ্যেযম্| খেভ্য ইতি রন্ধ্রেভ্যঃ| বিরেচনোপক্রমণীযত্বাদিতি এতচ্চ শ্লোকেন স্বযমেব ব্যাকরিষ্যতি||৮-৯||
Adhikarana 7 (10) · Śloka 10
রক্তপিত্তপ্রকোপস্তু খলু পুরা দক্ষযজ্ঞোদ্ধ্বংসে রুদ্রকোপামর্ষাগ্নিনা প্রাণিনাং পরিগতশরীরপ্রাণানামভবজ্জ্বরমনু||১০||
View original
रक्तपित्तप्रकोपस्तु खलु पुरा दक्षयज्ञोद्ध्वंसे रुद्रकोपामर्षाग्निना प्राणिनां परिगतशरीरप्राणानामभवज्ज्वरमनु||१०||
রক্তপিত্তস্যাপ্যাগ্নেযত্বপ্রতিপাদনার্থং পূর্বোত্পত্তিমাহ- রক্তেত্যাদি| কোপযুক্তঃ অমর্ষঃ, অমর্ষঃ অভিনিবেশঃ; অন্যত্রাপি চ কোপামর্ষযোর্ভেদ উক্তঃ; যথা- “অমর্ষসংরম্ভবিনগ্নভাবাঃ সন্তর্জনাভিদ্রবণৌষ্ণ্যরোষাঃ” (চি.অ.৯) ইতি||১০||
Adhikarana 8 (11) · Śloka 11
তস্যাশুকারিণো দাবাগ্নেরিবাপতিতস্যাত্যযিকস্যাশু প্রশান্ত্যৈ প্রযতিতব্যং মাত্রাং দেশং কালং চাভিসমীক্ষ্য সন্তর্পণেনাপতর্পণেন বা মৃদুমধুরশিশিরতিক্তকষাযৈরভ্যবহার্যৈঃ প্রদেহপরিষেকাবগাহসংস্পর্শনৈর্বমনাদ্যৈর্বা তত্রাবহিতেনেতি||১১||
View original
तस्याशुकारिणो दावाग्नेरिवापतितस्यात्ययिकस्याशु प्रशान्त्यै प्रयतितव्यं मात्रां देशं कालं चाभिसमीक्ष्य सन्तर्पणेनापतर्पणेन वा मृदुमधुरशिशिरतिक्तकषायैरभ्यवहार्यैः प्रदेहपरिषेकावगाहसंस्पर्शनैर्वमनाद्यैर्वा तत्रावहितेनेति||११||
সন্তর্পণেনেতি অধোগস্য, অপতর্পণেনেতি ঊর্ধ্বগস্য| সংস্পৃশ্যত ইতি সংস্পর্শনং মুক্তাদি||১১||
Adhikarana 9 (12-14) · Śloka 14
ভবন্তি চাত্র- সাধ্যং লোহিতপিত্তং তদ্যদূর্ধ্বং প্রতিপদ্যতে|
বিরেচনস্য যোগিত্বাদ্বহুত্বাদ্ভেষজস্য চ||১২||
বিরেচনং তু পিত্তস্য জযার্থে পরমৌষধম্|
যশ্চ তত্রান্বযঃ শ্লেষ্মা তস্য চানধমং স্মৃতম্||১৩||
ভবেদ্যোগাবহং তত্র মধুরং চৈব ভেষজম্|
তস্মাত্ সাধ্যং মতং রক্তং যদূর্ধ্বং প্রতিপদ্যতে||১৪||
View original
भवन्ति चात्र- साध्यं लोहितपित्तं तद्यदूर्ध्वं प्रतिपद्यते|
विरेचनस्य योगित्वाद्बहुत्वाद्भेषजस्य च||१२||
विरेचनं तु पित्तस्य जयार्थे परमौषधम्|
यश्च तत्रान्वयः श्लेष्मा तस्य चानधमं स्मृतम्||१३||
भवेद्योगावहं तत्र मधुरं चैव भेषजम्|
तस्मात् साध्यं मतं रक्तं यदूर्ध्वं प्रतिपद्यते||१४||
ঊর্ধ্বগস্য বিরেচনযোগ্যতাং বিবেচযতি- বিরেচনমিত্যাদি| ঊর্ধ্বগে রক্তপিত্তে পিত্তং প্রধানমনুবন্ধশ্চ শ্লেষ্মা, রক্তপিত্তাখ্যব্যাধির্জেতব্যঃ; তত্র পিত্তস্য জযার্থে বিরেচনং তাবত্ পরমৌষধং, “বিরেচনং পিত্তহরাণাম্” (সূ.অ.২৫) ইতি বচনাদিতি ভাবঃ, যশ্চ তত্রান্বযঃ অনুবন্ধস্বরূপঃ শ্লেষ্মা, তস্য চ জযার্থে অনধমমধমং ন ভবতি মধ্যমমিত্যর্থঃ; বচনং হি- “পিত্তং বা কফপিত্তং বা পিত্তাশযগতং হরেত্| স্রংসনং” (চি.অ.৩) ইতি| যোগাবহং চ তত্রেতি তত্রোর্ধ্বগে রক্তপিত্তে তদ্বিরেচনং যোগাবহং ভবতি, প্রতিমার্গহরণরূপত্বাদিত্যর্থঃ; অনেন চ ব্যাধিপ্রত্যনীকত্বমুচ্যতে| এবং ব্যাধিপ্রধানকারণে পিত্তে প্রধানশমক(ন)ত্বাত্, তথা মধ্যকুপিতে চ কফে মধ্যভেষজত্বাত্, প্রতিমার্গহরণরূপতযা চ ব্যাধিপ্রত্যনীকত্বাদ্ বিরেচনমূর্ধ্বগে সাধু ভেষজম্| মধুরং চৈব ভেষজমিত্যত্র এবশব্দোঽপ্যর্থঃ; তেন, তিক্তকষাযৌ তাবদ্ভেষজে ভবত এব পিত্তকফপ্রত্যনীকত্বাত্, মধুরমপি লঙ্ঘনাদিনা কফে জিতে ভেষজং ভবতীত্যর্থঃ||১২-১৪||
Adhikarana 10 (15-17) · Śloka 17
রক্তং তু যদধোভাগং তদ্যাপ্যমিতি নিশ্চিতম্|
বমনস্যাল্পযোগিত্বাদল্পত্বাদ্ভেষজস্য চ||১৫||
বমনং হি ন পিত্তস্য হরণে শ্রেষ্ঠমুচ্যতে|
যশ্চ তত্রান্বযো বাযুস্তচ্ছান্তৌ চাবরং স্মৃতম্||১৬||
তচ্চাযোগাবহং তত্র কষাযং তিক্তকানি চ|
তস্মাদ্যাপ্যং সমাখ্যাতং যদুক্তমনুলোমগম্ ||১৭||
View original
रक्तं तु यदधोभागं तद्याप्यमिति निश्चितम्|
वमनस्याल्पयोगित्वादल्पत्वाद्भेषजस्य च||१५||
वमनं हि न पित्तस्य हरणे श्रेष्ठमुच्यते|
यश्च तत्रान्वयो वायुस्तच्छान्तौ चावरं स्मृतम्||१६||
तच्चायोगावहं तत्र कषायं तिक्तकानि च|
तस्माद्याप्यं समाख्यातं यदुक्तमनुलोमगम् ||१७||
অধোগে বমনস্যাযোগিতাং বিবেচযতি- বমনং হীত্যাদি| পিত্তস্য রক্তপিত্তমূলস্য হরণে ন শ্রেষ্ঠং বমনং; বমনং হি কফানুগং পিত্তং হরতি, ন পিত্তে প্রাধান্যেন ক্রিযতে| তচ্ছান্তৌ চাবরমিতি বাতহরণে ত্বপ্রধানমেব বমনং, বাতহরণেঽযুক্তত্বাদেব বমনস্য| তচ্চাযোগাবহমিতি তদ্বমনং প্রতিমার্গহরণরূপতযা যোগাবহমপি সত্ পিত্তবাতযোরুক্তেন ন্যাযেনাযৌগিকত্বেনাযোগাবহমিত্যর্থঃ| কষাযং তিক্তকানি চ অযোগাবহানীতি যোজনা, কষাযতিক্তযোর্বাতপ্রতিকূলত্বাদিত্যর্থঃ; এবং মধুরমেকমবশিষ্টমধোগে রক্তপিত্তে ভেষজং ভবতি; তেনাল্পৌষধত্বং সিদ্ধম্| অম্ললবণকটুকানাং তু পিত্তবিরুদ্ধত্বেন রক্তপিত্তে প্রসক্তিরপি নাস্তীতি ভাবঃ||১৫-১৭||
Adhikarana 11 (18-20) · Śloka 21
রক্তপিত্তং তু যন্মার্গৌ দ্বাবপি প্রতিপদ্যতে|
অসাধ্যমিতি তজ্জ্ঞেযং পূর্বোক্তাদেব কারণাত্||১৮||
নহি সংশোধনং কিঞ্চিদস্ত্যস্য প্রতিমার্গগম্|
প্রতিমার্গং চ হরণং রক্তপিত্তে বিধীযতে||১৯||
এবমেবোপশমনং সর্বশো নাস্য বিদ্যতে|
সংসৃষ্টেষু চ দোষেষু সর্বজিচ্ছমনং মতম্ ||২০||
ইত্যুক্তং ত্রিবিধোদর্কং রক্তং মার্গবিশেষতঃ|২১|
View original
रक्तपित्तं तु यन्मार्गौ द्वावपि प्रतिपद्यते|
असाध्यमिति तज्ज्ञेयं पूर्वोक्तादेव कारणात्||१८||
नहि संशोधनं किञ्चिदस्त्यस्य प्रतिमार्गगम्|
प्रतिमार्गं च हरणं रक्तपित्ते विधीयते||१९||
एवमेवोपशमनं सर्वशो नास्य विद्यते|
संसृष्टेषु च दोषेषु सर्वजिच्छमनं मतम् ||२०||
इत्युक्तं त्रिविधोदर्कं रक्तं मार्गविशेषतः|२१|
পূর্বোক্তাদিতি বমনবিরেচনাযৌগিকত্বাদনৌষধত্বাচ্চ| বমনবিরেচনাযৌগিকত্বং ব্যুত্পাদযতি- ন হীত্যাদি| সংশোধনমিতি সামান্যবচনেন বস্তিশিরোবিরেচনযোরপি প্রতিক্ষেপং সূচযতি| যদধোভাগং বিরেচনং তদধোভাগং রক্তপিত্তং কোপযতি, যদূর্ধ্বভাগং বমনং তদূর্ধ্বভাগং রক্তপিত্তং কোপযতি; অতো নাস্ত্যুভযমার্গে রক্তপিত্তে শোধনম্| অথানুগুণমেব শোধনং কফচ্ছর্দ্যামিব বমনং রক্তপিত্তে ভবতীত্যাহ- প্রতিমার্গং চেত্যাদি| রক্তপিত্তব্যাধিমহিম্না প্রতিমার্গহরণমেব ভেষজং ভবতি নান্যদিত্যর্থঃ| অথাত্রৈবং সংশোধনং মা ভবতু ভেষজং, সংশমনং ভেষজং ভবত্বিত্যাহ- এবমেবেত্যাদি| উভযমার্গানুসারিত্বেন বাতকফানুবন্ধত্বাদ্ যথা যৌগিকং সংশোধনং নাস্তি তথোপশমনমপি যুগপদ্বাতকফশমকত্বাভাবান্নাস্তীত্যর্থঃ| সর্বশো ন বিদ্যত ইতি কিঞ্চিদপি ন বিদ্যত ইতি| এতদেবোপশমনভেষজাভাবং স্ফোটযতি- সংসৃষ্টেষ্বিত্যাদি| সংসৃষ্টেষ্বিতি সন্নিপাতেষ্বিতি বোদ্ধব্যম্| সর্বজিদিতি অনুবন্ধভূতবাতকফমূলভূতপিত্তজিত্; মধুরং হি কফকারি, তিক্তকষাযৌ তু বাতকরৌ, শেষাস্তু পিত্তকরা এবেতি ভাবঃ| কিংবা, এবমেবেতি বিনা ভেষজং নোপশমনং রক্তপিত্তস্য ভবতীতি যোজনীযম্| ত্রিবিধোদর্কমিতি ত্রিবিধাযতীযফলং, তচ্চ সাধ্যত্ব যাপ্যত্ব প্রত্যাখ্যেযত্বরূপম্||১৮-২০||-
Adhikarana 12 (21-22) · Śloka 23
এভ্যস্তু খলু হেতুভ্যঃ কিঞ্চিত্সাধ্যং ন সিধ্যতি||২১||
প্রেষ্যোপকরণাভাবাদ্দৌরাত্ম্যাদ্বৈদ্যদোষতঃ|
অকর্মতশ্চ সাধ্যত্বং কশ্চিদ্রোগোঽতিবর্ততে||২২||
তত্রাসাধ্যত্বমেকং স্যাত্ সাধ্যযাপ্যপরিক্রমাত্|২৩|
View original
एभ्यस्तु खलु हेतुभ्यः किञ्चित्साध्यं न सिध्यति||२१||
प्रेष्योपकरणाभावाद्दौरात्म्याद्वैद्यदोषतः|
अकर्मतश्च साध्यत्वं कश्चिद्रोगोऽतिवर्तते||२२||
तत्रासाध्यत्वमेकं स्यात् साध्ययाप्यपरिक्रमात्|२३|
অসাধ্যতোপোদ্ধাতেনেতরব্যাধিসাধারণান্যপ্যসাধ্যতাপত্তিকারণান্যাহ- এভ্যস্ত্বিত্যাদি| উপকরণাভাবাদিতি ভেষজাভাবাত্| দৌরাত্ম্যাদিতি আতুরস্যানাত্মবত্ত্বাত্| অকর্মত ইত্যত্র কুত্সাযাং নঞ্, অপুত্র ইতি যথা; তেন, অকর্মতঃ অসম্যক্চিকিত্সাত ইত্যর্থঃ; কিংবা অকর্মত ইতি অধর্মাদসাধ্যব্যাধিজনকাত্| কশ্চিদিতিবচনেন অচিকিত্সযা ন সর্বে তিলালকমশকাদযোঽবশ্যমসাধ্যা ভবন্তীতি দর্শযতি, তেষামচিকিত্সাযামপি সাধ্যত্বাত্| প্রেষ্যাদিদোষেণ প্রকৃতে রক্তপিত্তেঽসাধ্যত্বং দর্শযন্নাহ- তত্রেত্যাদি| তত্রেতি রক্তপিত্তে| অসাধ্যত্বমেকমিতি অসাধ্যত্বমেব পরং স্যাত্| সাধ্যযাপ্যপরিক্রমাদিতি সাধ্যযাপ্যমার্গাভ্যাং পরিক্রমাদুভযমার্গানুসারিত্বাদিত্যর্থঃ; কিংবা, সাধ্যযাপ্যযোঃ পরিক্রমঃ সাধ্যযাপ্যপরিক্রমঃ, তস্মাত্; তত্র সাধ্যপরিক্রমো যাপ্যমার্গগামিত্বম্, এবং যাপ্যস্য পরিক্রমোঽসাধ্যমার্গগামিত্বম্| অযং চ মার্গপরিক্রমঃ মার্গপরিত্যাগাদপরিত্যাগাদ্বাঽসাধ্য এব; অপরিত্যাগে তাবদুভযমার্গত্বেনৈবাসাধ্যত্বং; পরিত্যাগেঽসাধ্যত্বমুক্তং, বক্ষ্যতি হি চিকিত্সিতে- “মার্গান্মার্গং চরেদ্যদ্বা তচ্চ রক্তমসিদ্ধিমত্” (চি.অ.৪) ইতি| কিংবা, সাধ্যযাপ্যপরিক্রমাদিতি সাধ্যস্য যাপ্যত্বেন পরিক্রমাদিত্যর্থঃ||২১-২২||-
Adhikarana 13 (23-26) · Śloka 26
রক্তপিত্তস্য বিজ্ঞানমিদং তস্যোপদিশ্যতে||২৩||
যত্ কৃষ্ণমথবা নীলং যদ্বা শক্রধনুষ্প্রভম্|
রক্তপিত্তমসাধ্যং তদ্বাসসো রঞ্জনং চ যত্||২৪||
ভৃশং পূত্যতিমাত্রং চ সর্বোপদ্রববচ্চ যত্|
বলমাংসক্ষযে যচ্চ তচ্চ রক্তমসিদ্ধিমত্||২৫||
যেন চোপহতো রক্তং রক্তপিত্তেন মানবঃ|
পশ্যেদ্দৃশ্যং বিযচ্চাপি তচ্চাসাধ্যং ন সংশযঃ||২৬||
View original
रक्तपित्तस्य विज्ञानमिदं तस्योपदिश्यते||२३||
यत् कृष्णमथवा नीलं यद्वा शक्रधनुष्प्रभम्|
रक्तपित्तमसाध्यं तद्वाससो रञ्जनं च यत्||२४||
भृशं पूत्यतिमात्रं च सर्वोपद्रववच्च यत्|
बलमांसक्षये यच्च तच्च रक्तमसिद्धिमत्||२५||
येन चोपहतो रक्तं रक्तपित्तेन मानवः|
पश्येद्दृश्यं वियच्चापि तच्चासाध्यं न संशयः||२६||
ঊর্ধ্বগস্যাপি রক্তপিত্তস্য লাক্ষণিকীমসাধ্যতামাহ- রক্তপিত্তস্যেত্যাদি| এতে চ কৃষ্ণাদযো বর্ণা গম্ভীরধাতুসম্বন্ধাদ্ভবন্তি, ততশ্চাসাধ্যত্বং যুক্তমেব| বাসসো রঞ্জনং চ যদিতি প্রক্ষালিতমপি সদ্বাসো রঞ্জযতি, ন ক্ষালনেনাপৈতীতি বোদ্ধব্যম্; অন্যথা ‘সর্বমেব রক্তং বাসসো রঞ্জনং ভবতি’ ইতি বচনমনর্থকং স্যাত্| কিংবা ‘অরঞ্জনম্’ ইতি পাঠঃ; তেন, রক্তস্য বাসসো রঞ্জকস্যারঞ্জনমেব বিকৃতিঃ| ভৃশং পূতীতি ধাত্বন্তরসম্বন্ধাদতিদুর্গন্ধি| সর্বোপদ্রববদিতি উক্তদৌর্বল্যাদ্যুপদ্রবযুক্তম্| দৃশ্যং ঘটপটাদি| বিযদ্ আকাশম্| রক্তং রক্তবর্ণমিত্যর্থঃ| যদ্যপ্যাকাশমপি দৃশ্যং ভবতি মীমাংসকনযে, তথাঽপি প্রায আকাশে এবাসাধ্যরক্তপিত্তে রক্তত্বং প্রতীযত ইতি ন পুনরুক্তম্||২৩-২৬||
Adhikarana 14 (27) · Śloka 27
তত্রাসাধ্যং পরিত্যাজ্যং, যাপ্যং যত্নেন যাপযেত্|
সাধ্যং চাবহিতঃ সিদ্ধৈর্ভেষজৈঃ সাধযেদ্ভিষক্||২৭||
View original
तत्रासाध्यं परित्याज्यं, याप्यं यत्नेन यापयेत्|
साध्यं चावहितः सिद्धैर्भेषजैः साधयेद्भिषक्||२७||
যত্নেনেতি বচনাদ্যাপ্যযাপনং যত্নং বিনা ন ভবতীতি দর্শযতি||২৭||
Adhikarana 15 (28-29) · Śloka 29
তত্র শ্লোকৌ- কারণং নামনির্বৃত্তিং পূর্বরূপাণ্যুপদ্রবান্|
মার্গৌ দোষানুবন্ধং চ সাধ্যত্বং ন চ হেতুমত্||২৮||
নিদানে রক্তপিত্তস্য ব্যাজহার পুনর্বসুঃ|
বীতমোহরজোদোষলোভমানমদস্পৃহঃ||২৯||
View original
तत्र श्लोकौ- कारणं नामनिर्वृत्तिं पूर्वरूपाण्युपद्रवान्|
मार्गौ दोषानुबन्धं च साध्यत्वं न च हेतुमत्||२८||
निदाने रक्तपित्तस्य व्याजहार पुनर्वसुः|
वीतमोहरजोदोषलोभमानमदस्पृहः||२९||
কারণমিত্যাদি সঙ্গ্রহঃ| নামনির্বৃত্তিমিতি লোহিতসংসর্গাদিত্যাদিনা| ন চেতি ন চ সাধ্যত্বম্; অনেন চ যাপ্যমপি সঙ্গৃহীতম্, অসাধ্যভেদো হি যাপ্যম্| হেতুমদিতি বিরেচনস্য যৌগিকত্বাদিহেতুবর্ণনং সঙ্গৃহ্ণাতি| বীতা অপগতা মোহাদযো যস্য স তথা||২৮-২৯||
Adhikarana puShpikA · Śloka 2
ইত্যগ্নিবেশকৃতে তন্ত্রে চরকপ্রতিসংস্কৃতে নিদানস্থানে রক্তপিত্তনিদানং নাম দ্বিতীযোঽধ্যাযঃ||২||
View original
इत्यग्निवेशकृते तन्त्रे चरकप्रतिसंस्कृते निदानस्थाने रक्तपित्तनिदानं नाम द्वितीयोऽध्यायः||२||
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং নিদানস্থানে রক্তপিত্তনিদানং নাম দ্বিতীযোঽধ্যাযঃ||২||