1. katidhāpuruṣīyaśārīram

Adhikarana 1 (1-2) · Śloka 2

অথাতঃ কতিধাপুরুষীযং শারীরং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

নিদানস্থানে জ্ঞাতহেত্বাদিনা তথা বিমানে প্রতীতরসদোষাদিমানেন কর্তব্যচিকিত্সাযা অধিকরণং শরীরং জ্ঞাতব্যং ভবতি; যতোঽপ্রতিপন্নেঽশেষবিশেষতঃ শরীরে ন শরীরবিজ্ঞানাধীনা চিকিত্সা সাধ্বী ভবতি; অতঃ শরীরং কারণোত্পত্তিস্থিতিবৃদ্ধ্যাদিবিশেষৈঃ প্রতিপাদযিতুং শারীরং স্থানমুচ্যতে| অত্রাপি চাত্যন্তদুঃখোপরমমোক্ষকারণচিকিত্সোপযুক্তপুরুষভেদাদিপ্রতিপাদকতযা প্রধানত্বেন কতিধাপুরুষীযোঽধ্যাযোঽভিধীযতে||১-২||

Adhikarana 2 (3-15) · Śloka 15

কতিধা পুরুষো ধীমন্! ধাতুভেদেন ভিদ্যতে| পুরুষঃ কারণং কস্মাত্, প্রভবঃ পুরুষস্য কঃ||৩|| কিমজ্ঞো জ্ঞঃ, স নিত্যঃ কিং কিমনিত্যো নিদর্শিতঃ| প্রকৃতিঃ কা, বিকারাঃ কে, কিং লিঙ্গং পুরুষস্য চ||৪|| নিষ্ক্রিযং চ স্বতন্ত্রং চ বশিনং সর্বগং বিভুম্| বদন্ত্যাত্মানমাত্মজ্ঞাঃ ক্ষেত্রজ্ঞং সাক্ষিণং তথা||৫|| নিষ্ক্রিযস্য ক্রিযা তস্য ভগবন্! বিদ্যতে কথম্| স্বতন্ত্রশ্চেদনিষ্টাসু কথং যোনিষু জাযতে||৬|| বশী যদ্যসুখৈঃ কস্মাদ্ভাবৈরাক্রম্যতে বলাত্| সর্বাঃ সর্বগতত্বাচ্চ বেদনাঃ কিং ন বেত্তি সঃ||৭|| ন পশ্যতি বিভুঃ কস্মাচ্ছৈলকুড্যতিরস্কৃতম্| ক্ষেত্রজ্ঞঃ ক্ষেত্রমথবা কিং পূর্বমিতি সংশযঃ||৮|| জ্ঞেযং ক্ষেত্রং বিনা পূর্বং ক্ষেত্রজ্ঞো হি ন যুজ্যতে| ক্ষেত্রং চ যদি পূর্বং স্যাত্ ক্ষেত্রজ্ঞঃ স্যাদশাশ্বতঃ||৯|| সাক্ষিভূতশ্চ কস্যাযং কর্তা হ্যন্যো ন বিদ্যতে| স্যাত্ কথং চাবিকারস্য বিশেষো বেদনাকৃতঃ||১০|| অথ চার্তস্য ভগবংস্তিসৃণাং কাং চিকিত্সতি| অতীতাং বেদনাং বৈদ্যো বর্তমানাং ভবিষ্যতীম্||১১|| ভবিষ্যন্ত্যা অসম্প্রাপ্তিরতীতাযা অনাগমঃ| সাম্প্রতিক্যা অপি স্থানং নাস্ত্যর্তেঃ সংশযো হ্যতঃ||১২|| কারণং বেদনানাং কিং, কিমধিষ্ঠানমুচ্যতে| ক্ব চৈতা বেদনাঃ সর্বা নিবৃত্তিং যান্ত্যশেষতঃ||১৩|| সর্ববিত্ সর্বসন্ন্যাসী সর্বসংযোগনিঃসৃতঃ| একঃ প্রশান্তো ভূতাত্মা কৈর্লিঙ্গৈরুপলভ্যতে||১৪|| ইত্যগ্নিবেশস্য বচঃ শ্রুত্বা মতিমতাং বরঃ| সর্বং যথাবত্ প্রোবাচ প্রশান্তাত্মা পুনর্বসুঃ||১৫||

কতিধেতি কতিপ্রকারঃ| পুরুষ ইত্যনেন চাবিশেষেণ পুরুষশব্দাভিধেযোঽর্থোভিধীযতে; যতঃ ‘খাদযশ্চেতনাষষ্ঠা’ ইত্যাদিনা, তথা চতুর্বিংশতিকভেদভিন্নশ্চ কর্মপুরুষ এব শরীরী বাচ্যঃ, তথা ‘চেতনাধাতুরপ্যেকঃ স্মৃতঃ পুরুষসঞ্জ্ঞকঃ’ ইত্যনেনাত্মৈব শরীররহিতঃ পুরুষশব্দার্থত্বেন বাচ্যঃ| পুরুষধারণাদ্ধাতুঃ; তেন ধাতুভেদেনেতি পুরুষধারণার্থভেদেন| ধীমন্নিতি বিশেষণেন য এব ধীমান্ স এব পুরুষভেদাদিকমিমং বক্ষ্যমাণং সুসূক্ষ্মং বক্তুং সমর্থ ইতি দর্শযতি| পুরুষঃ কারণং কস্মাদিতি কস্মাদ্ধেতোঃ পুরুষঃ সংসারে প্রধানং স্থাযিকারণমিত্যর্থঃ| প্রভবত্যস্মাদিতি প্রভবঃ কারণম্| যোনিষ্বিতি জাতিষু| সর্বা ইতি পরপুরুষগতা অপি| ক্ষেত্রজ্ঞঃ আত্মা| ক্ষেত্রম্ অব্যক্তবর্জিতং সর্বং বক্ষ্যমাণম্| জ্ঞেযমিত্যাদি| অসতি ক্ষেত্রে ক্ষেত্রজ্ঞানাভাবান্ন ক্ষেত্রজ্ঞত্বমুপপদ্যতে ইতি ভাবঃ| সাক্ষিভূত ইতি সাক্ষিসদৃশঃ| বিশেষো বেদনাকৃত ইতি পুত্রাদিজ্ঞানরূপবেদনাজনিতো হর্ষাদিবিশেষ ইত্যর্থঃ| তিসৃণামিতি অতীতানাগতবর্তমানানাং দুঃখরূপাণাং মধ্যে কাং চিকিত্সতি| অতীতামিত্যাদৌ কিংশব্দোঽধ্যাহার্যঃ, তেন কিমতীতাং চিকিত্সতি, কিং বর্তমানাং, কিংবা ভবিষ্যতীমিতি যোজ্যম্| স্থানং নাস্তীতি ক্ষণিকত্বেন চিকিত্সাযাঃ প্রবৃত্তিযোগ্যকালাবস্থানং নাস্তি| বেদনানাং কারণমধিষ্ঠানং চ যদ্যপি দীর্ঘঞ্জীবিতীযেঽপ্যুক্তং, তথাঽপীহ প্রকরণবশাদ্বিশেষপ্রতীত্যাকাঙ্ক্ষযা চ বিশিষ্টাঃ পুনঃ প্রশ্নাঃ| প্রশ্নার্থাশ্চামী উত্তরগ্রন্থে আচার্যেণ প্রপঞ্চনীযা ইতি নেহ ব্যাকরণীযাঃ||৩-১৫||

Adhikarana 3 (16) · Śloka 16

খাদযশ্চেতনাষষ্ঠা ধাতবঃ পুরুষঃ স্মৃতঃ| চেতনাধাতুরপ্যেকঃ স্মৃতঃ পুরুষসঞ্জ্ঞকঃ||১৬||

খাদয ইত্যাদি| খাদযঃ “খং বাযুরগ্নিরাপঃ ক্ষিতিস্তথা” ইতি বক্ষ্যমাণাঃ; চেতনাষষ্ঠা ইত্যত্র চেতনাশব্দেন চেতনাধারঃ সমনস্ক আত্মা গৃহ্যতে; খাদিগ্রহণেন চেন্দ্রিযাণি খাদিমযান্যবরুদ্ধানি| অযং চ বৈশেষিকদর্শনপরিগৃহীতশ্চিকিত্সাশাস্ত্রবিষযঃ পুরুষঃ; অযমেব “পঞ্চমহাভূতশরীরিসমবাযঃ পুরুষঃ” (সু. সূ. ১) ইত্যনেন সুশ্রুতেনাপ্যুক্তঃ| স্মৃত ইতি ভাষযা পূর্বাচার্যাণামপ্যযং পুরুষশব্দবাচ্যোঽভিপ্রেতো নাস্মত্কল্পিত ইতি দর্শযতি| পুরি শরীরে শেতে ইতি ব্যুত্পত্ত্যা য আত্মা পুরুষশব্দেনোচ্যতে তমাহ- চেতনেত্যাদি| অত্র পুরুষ ইতি কর্তব্যে যত্ ‘পুরুষসঞ্জ্ঞক’ ইতি করোতি তেন ন চেতনাধাতুরূপঃ পুরুষশ্চিকিত্সাযমভিপ্রেতঃ, কিন্তু শাস্ত্রান্তরব্যবহারানুরোধাদিহাপ্যযং পুরুষশব্দেন সঞ্জ্ঞিত ইতি দর্শযতি; চিকিত্সাবিষযস্তু ষড্ধাতুক এব পুরুষঃ, অত এব তত্র সঞ্জ্ঞিতগ্রহণং ন কৃতম্| অযং চ পুরুষশব্দো গবাদাবপি ষড্ধাতুসমুদাযে যদ্যপি বর্ততে, তথাঽপি সর্বপ্রধানে নর এব বিশেষেণ বর্ততে; তেন নাতিপ্রসিদ্ধো গবাদৌ পুরুষশব্দঃ||১৬||

Adhikarana 4 (17) · Śloka 17

পুনশ্চ ধাতুভেদেন চতুর্বিংশতিকঃ স্মৃতঃ| মনো দশেন্দ্রিযাণ্যর্থাঃ প্রকৃতিশ্চাষ্টধাতুকী||১৭||

ষড্ধাতুরূপমেব পুরুষং পুনঃ সাঙ্খ্যদর্শনভেদাচ্চতুর্বিংশতিকভেদেনাহ- পুনশ্চেত্যাদি| চতুর্বিংশতিকমেব বিভজতে- মন ইত্যাদি| যদ্যপি পঞ্চবিংশতিতত্ত্বমযোঽযং পুরুষঃ সাঙ্খ্যৈরুচ্যতে, যদাহ- “মূলপ্রকৃতিরবিকৃতির্মহদাদ্যাঃ প্রকৃতিবিকৃতযঃ সপ্ত| ষোডশকস্তু বিকারো ন প্রকৃতির্ন বিকৃতিঃ পুরুষঃ” (সাং.কা.৩) ইতি, তথাঽপীহ প্রকৃতিব্যতিরিক্তং চোদাসীনং পুরুষমব্যক্তত্বসাধর্ম্যাদব্যক্তাযাং প্রকৃতাবেব প্রক্ষিপ্য অব্যক্তশব্দেনৈব গৃহ্ণাতি; তেন ‘চতুর্বিংশতিকঃ পুরুষঃ’ ইত্যবিরুদ্ধম্| উদাসীনস্য হি সূক্ষ্মস্য ভেদপ্রতিপাদনমিহানতিপ্রযোজনমিতি ন কৃতম্| দশেন্দ্রিযাণীতি পঞ্চ কর্মেন্দ্রিযাণি, পঞ্চ বুদ্ধীন্দ্রিযাণি চ| অষ্টধাতুকীতি খাদিপঞ্চকবুদ্ধ্যব্যক্তাহঙ্কাররূপা; বক্ষ্যতি হি- “খাদীনি বুদ্ধিরব্যক্তমহঙ্কারস্তথাঽষ্টমঃ” ইতি||১৭||

Adhikarana 5 (18-19) · Śloka 19

লক্ষণং মনসো জ্ঞানস্যাভাবো ভাব এব চ| সতি হ্যাত্মেন্দ্রিযার্থানাং সন্নিকর্ষে ন বর্ততে||১৮|| বৈবৃত্ত্যান্মনসো জ্ঞানং সান্নিধ্যাত্তচ্চ বর্ততে| অণুত্বমথ চৈকত্বং দ্বৌ গুণৌ মনসঃ স্মৃতৌ||১৯||

অত্র চতুর্বিংশতিকে প্রথমোদ্দিষ্টং মনো লক্ষযিতুমাহ- লক্ষণমিত্যাদি| যথা জ্ঞানস্যাভাবো জ্ঞানস্য ভাবশ্চ মনোগমকো ভবতি তদাহ- সতীত্যাদি| বৈবৃত্ত্যান্মনস ইতি ইন্দ্রিযেণাসংযোগাত্, সান্নিধ্যাদিতি ইন্দ্রিযেণ মনসঃ সম্বন্ধাত্| এবং মন্যতে- যদা যুগপদিন্দ্রিযার্থা ইন্দ্রিযৈঃ সংযুজ্যন্তে তদা ক্বচিদিন্দ্রিযার্থে জ্ঞানং ভবতি ক্বচিন্ন ভবতীতি দৃষ্টং, তেনেমৌ জ্ঞানভাবাভাবৌ জ্ঞানকারণান্তরং দর্শযতঃ; যচ্চ তত্ কারণান্তরং তন্মনঃ| তচ্চ কারণং মনোরূপং যদ্যাত্মবদ্যুগপত্ সর্বেন্দ্রিযব্যাপকং স্বীক্রিযতে কিংবা অনেকসঙ্খ্যমিন্দ্রিযবত্ স্বীক্রিযতে, তদা পুনরপি যুগপদিন্দ্রিযার্থসম্বন্ধে পঞ্চভির্জ্ঞানৈর্ভবিতব্যং বিভুনা বা মনসা, অনেকৈর্বা মনোভির্যুগপদধিষ্ঠিতত্বাদিন্দ্রিযাণাং; ন চ ভবন্তি যুগপজ্জ্ঞানানি, তস্মাদ্যুগপজ্জ্ঞানানুদযাল্লিঙ্গান্মনোঽণুরূপমেকং চ সিধ্যতীত্যাহ- অণুত্বমিত্যাদি||১৮-১৯||

Adhikarana 6 (20-21) · Śloka 21

চিন্ত্যং বিচার্যমূহ্যং চ ধ্যেযং সঙ্কল্প্যমেব চ| যত্কিঞ্চিন্মনসো জ্ঞেযং তত্ সর্বং হ্যর্থসঞ্জ্ঞকম্||২০|| ইন্দ্রিযাভিগ্রহঃ কর্ম মনসঃ স্বস্য নিগ্রহঃ| ঊহো বিচারশ্চ, ততঃ পরং বুদ্ধিঃ প্রবর্ততে||২১||

মনোগুণমভিধায মনোবিষযমাহ- চিন্ত্যমিত্যাদি| চিন্ত্যং কর্তব্যতযা অকর্তব্যতযা বা যন্মনসা চিন্ত্যতে| বিচার্যম্ উপপত্ত্যনুপপত্তিভ্যাং যদ্বিমৃশ্যতে| ঊহ্যং চ যত্ সম্ভাবনযা ঊহ্যতে ‘এবমেতদ্ভবিষ্যতি ’ ইতি| ধ্যেযং ভাবনাজ্ঞানবিষযম্| সঙ্কল্প্যং গুণবত্তযা দোষবত্তযা বাঽবধারণাবিষযম্| যত্ কিঞ্চিদিত্যনেন সুখাদ্যনুক্তবিষযাবরোধঃ| মনসো জ্ঞেযমিতি ইন্দ্রিযনিরপেক্ষমনোগ্রাহ্যম্| এতে চ মনোঽর্থাঃ শব্দাদিরূপা এব; তেন ষষ্ঠার্থকল্পনযা ন চতুর্বিংশতিসঙ্খ্যাতিরেকঃ| সুখাদযস্তু শব্দাদিব্যতিরিক্তা মনোঽর্থা বুদ্ধিভেদগ্রহণেনৈব গ্রাহ্যাঃ| মনোবিষযমভিধায মনঃ কর্মাহ- ইন্দ্রিযেত্যাদি| ইন্দ্রিযাভিগ্রহঃ ইন্দ্রিযাধিষ্ঠানং মনসঃ কর্ম, তথা স্বস্য নিগ্রহো মনসঃ কর্ম; মনো হ্যনিষ্টবিষযপ্রসৃতং মনসৈব নিযম্যতে, “মনশ্চ গুণান্তরযুক্তং সদ্বিষযান্তরান্নিযমযতি” ইত্যাহুরেকে| যদুক্তম্- “বিষযপ্রবণং চিত্তং ধৃতিভ্রংশান্ন শক্যতে| নিযন্তুমহিতাদর্থাদ্ধৃতির্হি নিযমাত্মিকা” ইতি| তেন, ধৃত্যা কারণভূতযা (মন ) আত্মানং নিযমযতীতি ন স্বাত্মনি ক্রিযাবিরোধঃ| মনঃ কর্মান্তরমাহ- ঊহো বিচারশ্চেতি|- অত্রোহ আলোচন(না)জ্ঞানং নির্বিকল্প(ক)ম্, বিচারো হেযোপাদেযতযা বিকল্পনম্| চতুর্বিধং হি বিকল্পকারণং সাঙ্খ্যা মন্যন্তে; তত্র বাহ্যমিন্দ্রিযরূপম্, আভ্যন্তরং তু মনোঽহঙ্কারো বুদ্ধিশ্চেতি ত্রিতযম্| তত্রেন্দ্রিযাণ্যালোচযন্তি নির্বিকল্পেন গৃহ্ণন্তীত্যর্থঃ, মনস্তু সঙ্কল্পযতি হেযোপাদেযতযা কল্পযতীত্যর্থঃ, অহঙ্কারোঽভিমন্যতে ‘মমেদমহমত্রাধিকৃতঃ’ ইতি মন্যত ইত্যর্থঃ, বুদ্ধিরধ্যবস্যতি ‘ত্যজাম্যেনং দোষবন্তমুপাদদাম্যেনং গুণবন্তম্’ ইত্যধ্যবসাযং করোতীত্যর্থঃ| ঊহস্তু যদ্যপি বাহ্যচক্ষুরাদিকর্ম, তথাঽপি তত্রাপি মনোঽধিষ্ঠানমস্তীতি মনঃ- কর্মতযোক্তঃ| বচনং হি “সান্তঃকরণা বুদ্ধিঃ সর্বং বিষযমবগাহতে যস্মাত্| তস্মাত্ত্রিবিধং করণং দ্বারি, দ্বারাণি শেষাণি” (সাং. কা. ৩৫) ইতি | ততঃ পরং বুদ্ধিঃ প্রবর্তত ইতি ঊহবিচারানন্তরং বুদ্ধিরধ্যবসাযং করোতীত্যর্থঃ| অহঙ্কারব্যাপারশ্চাভিমননমিহানুক্তোঽপি বুদ্ধিব্যাপারেণৈব সূচিতো জ্ঞেযঃ| বুদ্ধির্হিত্যজাম্যেনমুপাদদামীতি বাঽধ্যবসাযং কুর্বতী অহঙ্কারাভিমত এব বিষযে ভবতি; তেন বুদ্ধিব্যাপারেণৈবাহঙ্কারব্যাপারোঽপি গৃহ্যতে| বুদ্ধৌ হি সর্বকরণব্যাপারার্পণং ভবতি| যদুক্তম্- “এতে প্রদীপকল্পাঃ পরস্পরবিলক্ষণা গুণবিশেষাঃ| কৃত্স্নং পুরুষস্যার্থং প্রকাশ্য বুদ্ধৌ প্রযচ্ছন্তি ” (সাং.কা.৩৬)||২০-২১||

Adhikarana 7 (22-23) · Śloka 23

ইন্দ্রিযেণেন্দ্রিযার্থো হি সমনস্কেন গৃহ্যতে| কল্প্যতে মনসা তূর্ধ্বং গুণতো দোষতোঽথবা||২২|| জাযতে বিষযে তত্র যা বুদ্ধির্নিশ্চযাত্মিকা| ব্যবস্যতি তযা বক্তুং কর্তুং বা বুদ্ধিপূর্বকম্||২৩||

এতদেবোহবিচারপূর্বকত্বং বুদ্ধের্বিবৃণোতি- ইন্দ্রিযেণেত্যাদি| গৃহ্যতে ইতি ঊহমাত্রেণ নির্বিকল্পেন গৃহ্যতে| গুণত ইতি উপাদেযতযা| দোষত ইতি হেযতযা| বুদ্ধ্যধ্যবসাযং বিবৃণোতি- জাযত ইত্যাদি| বিষযে তত্রেতি মনসা কল্পিতে বিষযে| নিশ্চযাত্মিকেতি স্থিরস্বরূপা অধ্যবসাযরূপেত্যর্থঃ| ব্যবস্যতীতি অনুষ্ঠানং করোতি, উদ্যুক্তো ভবতীত্যর্থঃ; বুদ্ধ্যধ্যবসিতমর্থং বক্তুং কর্তুং বাঽনুতিষ্ঠতীতি যাবত্| বুদ্ধিপূর্বকমিত্যনেন যদেব বুদ্ধিপূর্বকমনুষ্ঠানং তদেবৈবংবিধং ভবতি নোন্মত্তাদ্যনুষ্ঠানমিতি দর্শযতি||২২-২৩||

Adhikarana 8 (24) · Śloka 24

একৈকাধিকযুক্তানি খাদীনামিন্দ্রিযাণি তু| পঞ্চ কর্মানুমেযানি যেভ্যো বুদ্ধিঃ প্রবর্ততে||২৪||

মনোঽভিধাযেন্দ্রিযাণ্যভিধত্তে, তত্রাপি জ্যাযস্ত্বাদ্ বুদ্ধীন্দ্রিযাণি, প্রাগাহ- একৈকেত্যাদি| খাদীনাং মধ্যে একৈকেনাধিকেন ভূতেন যুক্তানীন্দ্রিযাণি পঞ্চ চক্ষুরাদীনি; একৈকাধিকপদেন পঞ্চাপি পাঞ্চভৌতিকানি, পরং চক্ষুষি তেজোঽধিকমিত্যাদ্যুক্তং সূচযতি| কর্মানুমেযানীতি কার্যানুমেযানি; কার্যং চক্ষুর্বুদ্ধ্যাদি| যেভ্যো বুদ্ধিঃ প্রবর্তত ইতি যানি বুদ্ধীন্দ্রিযাণি, তানীমানি পঞ্চেতি দর্শযতি| যদ্যপি চ সাঙ্খ্যে আহঙ্কারিকাণীন্দ্রিযাণি, যদুক্তং- “সাত্ত্বিক একাদশকঃ প্রবর্ততে বৈকৃতাদহঙ্কারাত্” (সাং.কা.২৫) ইতি, তথাঽপি মতভেদাদ্ভৌতিকত্বমিন্দ্রিযাণাং জ্ঞেযং; কিংবা, ঔপচারিকমেতদ্ভৌতিকত্বমিন্দ্রিযাণাং জ্ঞেযম্; উপচারবীজং চ যদ্গুণভূযিষ্ঠং যদিন্দ্রিযং গৃহ্ণাতি, তত্তদ্ভূযিষ্ঠমিত্যুচ্যতে; চক্ষুস্তেজো গৃহ্ণাতি, তেন তৈজসমুচ্যত ইত্যাদি জ্ঞেযম্||২৪||

Adhikarana 9 (25-26) · Śloka 26

হস্তৌ পাদৌ গুদোপস্থং বাগিন্দ্রিযমথাপি চ| কর্মেন্দ্রিযাণি পঞ্চৈব পাদৌ গমনকর্মণি||২৫|| পাযূপস্থং বিসর্গার্থং হস্তৌ গ্রহণধারণে| জিহ্বা বাগিন্দ্রিযং বাক্ চ সত্যা জ্যোতিস্তমোঽনৃতা||২৬||

অথ কর্মেন্দ্রিযাণ্যাহ- হস্তাবিত্যাদি| হস্তাবেকং পাদৌ চৈকমিন্দ্রিযমেকরূপকর্মকর্তৃতযা| গুদোপস্থং চৈকৈকম্| বাচ উপাদানহানার্থং ভেদমাহ- বাক্ চেত্যাদি| জ্যোতিরিব জ্যোতিঃ, ধর্মকর্তৃত্বেনোভযলোকপ্রকাশকারিত্বাত্ ; এতদ্বিপর্যযেণ তমঃ অনৃতা||২৫-২৬||

Adhikarana 10 (27) · Śloka 27

মহাভূতানি খং বাযুরগ্নিরাপঃ ক্ষিতিস্তথা| শব্দঃ স্পর্শশ্চ রূপং চ রসো গন্ধশ্চ তদ্গুণাঃ||২৭||

সম্প্রত্যুদ্দেশক্রমানুরোধাদর্থেঽভিধাতব্যেঽর্থানাং প্রকৃতিগ্রহণগৃহীতপঞ্চভূতগুণতযা পরাধীনত্বাদষ্টধাতুপ্রকৃতিগৃহীতানি ভূতান্যেব তাবদাহ- মহাভূতানীত্যাদি| শব্দাদযো যথাসঙ্খ্যং খাদীনাং নৈসর্গিকা গুণা জ্ঞেযাঃ| যস্তু গুণোত্কর্ষোঽভিধাতব্যঃ স হি অনুপ্রবিষ্টভূতসম্বন্ধাদেব | তেন পৃথিব্যাং চতুর্ভূতপ্রবেশাত্ পঞ্চগুণত্বম্, এবং জলাদাবপি চতুর্গুণত্বাদি জ্ঞেযম্||২৭||

Adhikarana 11 (28) · Śloka 28

তেষামেকগুণঃ পূর্বো গুণবৃদ্ধিঃ পরে পরে| পূর্বঃ পূর্বগুণশ্চৈব ক্রমশো গুণিষু স্মৃতঃ||২৮||

নৈসর্গিকং গুণমভিধায ভূতান্তরপ্রবেশকৃতং গুণমাহ- তেষামিত্যাদি| একগুণঃ পূর্ব ইতি পূর্বো ধাতুঃ খরূপঃ শব্দৈকগুণঃ| পুংলিঙ্গতা চ খাদীনাং ধাতুরূপতাবুদ্ধিস্থীকৃতত্বাত্ ; উক্তং হি- “খাদযশ্চেতনাষষ্ঠা ধাতবঃ” ইতি| যথা যথা চ পরত্বং তথা তথা চ গুণবৃদ্ধির্যথাসঙ্খ্যম্| ননু, এতাবতাঽপ্যেকগুণত্বদ্বিগুণত্বাদি ন নিযমেন জ্ঞাযতে কো গুণঃ ক্ব ভূতে ইত্যাহ- পূর্ব ইত্যাদি|- গুণিষু খাদিষু ধাতুষু পূর্বো গুণঃ ক্রমেণ যথাসঙ্খ্যং বর্ততে; ন কেবলং পূর্বঃ কিন্তু পূর্বস্যাপি যো গুণঃ, স চ পূর্বগুণ উত্তরে ভূতে বর্ততে| তেন খে পূর্বে পূর্বঃ শব্দ(ব্দো)গুণো বর্ততে; বাযৌ তু স্পর্শঃ ক্রমপ্রাপ্তঃ পূর্বো ভবতি, পূর্বগুণশ্চ শব্দ ইতি দ্বিগুণত্বম্; এবমগ্ন্যাদৌ চ জ্ঞেযম্| গন্ধস্তূত্তরগুণান্তরাভাবান্ন পূর্বো ভবতি, তথাঽপি ‘গন্ধশ্চ তদ্গুণাঃ’ ইতি গ্রন্থে তদ্গুণা ইতিপদাপেক্ষযা গন্ধস্য পূর্বত্বং কল্পনীযং; কিংবা, পূর্ব ইতি ছত্রিণো গচ্ছন্তীতিন্যাযেনোক্তং, তেনাপূর্বোঽপি গন্ধঃ ক্রমাগতঃ পৃথিব্যাং জ্ঞেযঃ||২৮||

Adhikarana 12 (29-30) · Śloka 30

খরদ্রবচলোষ্ণত্বং ভূজলানিলতেজসাম্| আকাশস্যাপ্রতীঘাতো দৃষ্টং লিঙ্গং যথাক্রমম্||২৯|| লক্ষণং সর্বমেবৈতত্ স্পর্শনেন্দ্রিযগোচরম্| স্পর্শনেন্দ্রিযবিজ্ঞেযঃ স্পর্শো হি সবিপর্যযঃ||৩০||

ভূতানামসাধারণং লক্ষণমাহ- খরেত্যাদি| অপ্রতীঘাতঃ অপ্রতিহননমস্পর্শত্বমিতি যাবত্; স্পর্শবদ্ধি গতিবিঘাতকং ভবতি নাকাশঃ, অস্পর্শবত্ত্বাত্| সর্বমেবৈতদিতি খরত্বাদি| স্পর্শনেন্দ্রিযগোচরমিতি স্পর্শনেন্দ্রিযজ্ঞেযম্| কথমেতত্ সর্বং স্পর্শনেন্দ্রিযজ্ঞেযমিত্যাহ- স্পর্শনেত্যাদি| সবিপর্যয ইতি স্পর্শাভাব ইত্যর্থঃ| যদিন্দ্রিযং যদ্গৃহ্ণাতি, তত্তস্যাভাবমপি গৃহ্ণাতি; তেন, আকাশস্যাস্পর্শত্বমপি স্পর্শনেন্দ্রিযগ্রাহ্যমিতি যুক্তম্| দ্রবত্বং চলত্বং চ সাঙ্খ্যমতে স্পর্শনগ্রাহ্যত্বাত্ স্থূলভূতবাতধর্মঃ স্পর্শ এব; যদ্ধি স্পর্শনেন গৃহ্যতে, তত্ সর্বং মহাভূতবাতপরিণাম এব| এতানি চ খাদীনি সূক্ষ্মাণি তন্মাত্ররূপাণি জ্ঞেযানি, স্থূলভূতানি তু খাদীনি বিকারতযা তত্রোক্তানি| প্রকৃতিবর্গে সূক্ষ্মরূপাস্তন্মাত্রা উক্তাঃ| বচনং হি- “তন্মাত্রাণ্যবিশেষাস্তেভ্যো ভূতানি পঞ্চ পঞ্চভ্যঃ| এতে স্মৃতা বিশেষাঃ শান্তা ঘোরাশ্চ মূঢাশ্চ” (সাং.কা.৩৮) ইতি; তেনেহাপি খাদীনি তন্মাত্রশব্দোক্তানি সূক্ষ্মাণি বোদ্ধব্যানি||২৯-৩০||

Adhikarana 13 (31) · Śloka 31

গুণাঃ শরীরে গুণিনাং নির্দিষ্টাশ্চিহ্নমেব চ|৩১|

ভূতানাং সূক্ষ্মাণাং শরীরস্থানাং লিঙ্গান্তরাণ্যাহ- গুণা ইত্যাদি| গুণাঃ শব্দাদযঃ| গুণিনামিতি সূক্ষ্মরূপভূতানাম্| এবচগ্রহণাত্ শব্দাদযশ্চ ব্যক্তাঃ সূক্ষ্মাণাং শরীরস্থানাং ভূতানাং লক্ষণং ভবন্তীতি বাক্যার্থঃ|৩১|

Adhikarana 14 (31) · Śloka 31

অর্থাঃ শব্দাদযো জ্ঞেযা গোচরা বিষযা গুণাঃ||৩১||

অর্থানাহ- অর্থা ইত্যাদি| অর্থশব্দেন তু যে শব্দাদযোঽভিধীযন্তে তে স্থূলখাদিরূপা এব জ্ঞেযাঃ; যেনাকাশপরিণাম এব শব্দঃ, বাতপরিণামঃ স্পর্শ ইত্যাদি দর্শনম্| শব্দাদিগ্রহণেনাত্রাকাশাদিগ্রহণং যত্, তদাকাশাদিপরিণামা এব শব্দাদয ইতি যুক্তমেব| এতেন যচ্ছ্রোত্রগ্রাহ্যং তত্ সর্বমাকাশং শব্দশ্চ, যত্ স্পর্শেন গৃহ্যতে তত্ সর্বং বাযুঃ স্পর্শশ্চেত্যাদি জ্ঞেযম্||৩১||

Adhikarana 15 (32-34) · Śloka 34

যা যদিন্দ্রিযমাশ্রিত্য জন্তোর্বুদ্ধিঃ প্রবর্ততে| যাতি সা তেন নির্দেশং মনসা চ মনোভবা||৩২|| ভেদাত্ কার্যেন্দ্রিযার্থানাং বহ্ব্যো বৈ বুদ্ধযঃ স্মৃতাঃ| আত্মেন্দ্রিযমনোর্থানামেকৈকা সন্নিকর্ষজা||৩৩|| অঙ্গুল্যঙ্গুষ্ঠতলজস্তন্ত্রীবীণানখোদ্ভবঃ| দৃষ্টঃ শব্দো যথা বুদ্ধির্দৃষ্টা সংযোগজা তথা||৩৪||

সম্প্রতি প্রকৃতিগণপ্রবিষ্টাযা বুদ্ধেরুপদর্শনার্থং তস্যা বুদ্ধের্বৃত্তিভেদাত্ জ্ঞানবিশেষরূপাণ্যাহ- যেত্যাদি| যদিন্দ্রিযমাশ্রিত্যেতি যদিন্দ্রিযপ্রণালিকামাশ্রিত্য মহচ্ছব্দাখ্যস্য বুদ্ধিতত্ত্বস্য বৃত্তিবিশেষরূপাণি জ্ঞানানীন্দ্রিযপ্রণালিকযা ভবন্তি, তদিন্দ্রিযজন্যত্বেনৈব তানি ব্যপদিশ্যন্তে- চক্ষুর্বুদ্ধিঃ, শ্রোত্রবুদ্ধিরিত্যাদিব্যপদেশেন | মনোভবা চ বুদ্ধিশ্চিন্ত্যাদিবিষযা মনসা নির্দিশ্যতে; মনোবুদ্ধিরিতি ব্যপদিশ্যত ইত্যর্থঃ| ইন্দ্রিযমনোভেদেন ষট্ত্বং বুদ্ধীনাং প্রতিপাদ্য বুদ্ধিবহুত্বং প্রাহ- ভেদাদিত্যাদি| কার্যস্য ইন্দ্রিযার্থস্য চ ভেদাত্ তত্সম্বন্ধেন ভিদ্যমানা বহ্ব্যো বুদ্ধযো ভবন্তি; কার্যং সুখদুঃখভেদাঃ; সুখদুঃখপ্রপঞ্চেন হি তক্তার্যেণ কারণং জ্ঞানমপি বহু ভবতি| ইদানীং সর্ববাহ্যজ্ঞানসাধনমাহ- আত্মেত্যাদি| আত্মা অব্যক্তম্| একৈকেতি প্রত্যেকম্| বুদ্ধেরনেকাত্মাদিমেলকজন্যত্বে দৃষ্টান্তমাহ - অঙ্গুলীত্যাদি| অনেন দৃষ্টান্তেন শব্দদ্বযমাহ; অঙ্গুল্যঙ্গুষ্ঠতলজশব্দ একঃ, অযং চাঙ্গুষ্ঠযন্ত্রিতমধ্যমাঙ্গুল্যাঃ করতলসংযোগাজ্জাযমানতলশব্দ উচ্যতে; তন্ত্রীবীণানখোদ্ভবশ্চ বীণাশব্দ একঃ; অন্যে ত্বেকমেবাঙ্গুল্যাদিজং বীণাশব্দং বর্ণযন্তি| এতেন, যথা শব্দোঽঙ্গুলাদ্যন্যতমবৈকল্যেঽপি ন ভবতি, তথা বুদ্ধিরপ্যাত্মাদীনামন্যতমবৈকল্যেঽপি ন ভবতীতি দর্শযতি||৩২-৩৪||

Adhikarana 16 (35) · Śloka 35

বুদ্ধীন্দ্রিযমনোর্থানাং বিদ্যাদ্যোগধরং পরম্| চতুর্বিংশতিকো হ্যেষ রাশিঃ পুরুষসঞ্জ্ঞকঃ||৩৫||

অত্র চ বুদ্ধিবৃত্তীনাং জ্ঞানানাং কথনেনৈবাহঙ্কারোঽপি সূচিত এব; যতোঽহঙ্কারোপজীবিতৈবাত্মাদিসংবলিতেযং বুদ্ধিঃ ‘অহং পশ্যামি’ ইত্যাদিরূপা ভবতি; তেন বুদ্ধেরহঙ্কারস্য চোক্তত্বাদবশিষ্টমব্যকং কার্যদ্বারা ব্রূতে- বুদ্ধীত্যাদি| পরমিতি অব্যক্তম্| বুদ্ধ্যাদীনাং যোগং মেলকং ধরতীতি যোগধরম্; অব্যক্তং হি প্রকৃতিরূপং পুরুষার্থপ্রবৃত্তং বুদ্ধ্যাদিমেলকং ভোগসম্পাদকং সৃজতি| এবং ব্যুত্পাদিতং চতুর্বিংশতিকমুপসংহরতি- চতুর্বিংশতিক ইত্যাদি| যদি বা কর্মেন্দ্রিযাণ্যভিধায মহাভূতানীত্যাদিনা অর্থা এবাশ্রযভূতখাদিকথনেনোচ্যন্তে, যা যদিন্দ্রিযমাশ্রিত্যেত্যাদিনা তু স্ফুটোপলভ্যমানা বুদ্ধিবৃত্তিভেদা উচ্যন্তে, বুদ্ধ্যহঙ্কারতন্মাত্রাণ্যব্যক্তানি তু সূক্ষ্মাণি নোক্তানি, তানি সর্বাণ্যেব বুদ্ধীন্দ্রিযমনোর্থানামিত্যাদিগ্রন্থে পরশব্দেনোচ্যন্তে, তেন যোগধরং পরমিত্যনেন মূলপ্রকৃতিস্তথা প্রকৃতিবিকৃতযশ্চ মহদাদযঃ সপ্তোচ্যন্তে; এবং চতুর্বিংশতিকো রাশির্ভবতি| পরত্বং চ বিকারাপেক্ষযা প্রকৃতীনামুপপন্নমেব||৩৫||

Adhikarana 17 (36) · Śloka 36

রজস্তমোভ্যাং যুক্তস্য সংযোগোঽযমনন্তবান্| তাভ্যাং নিরাকৃতাভ্যাং তু সত্ত্ববৃদ্ধ্যা নিবর্ততে||৩৬||

সম্প্রত্যেবংরূপপুরুষস্য সকারণং সংসরণং মোক্ষহেতুং চাহ- রজ ইত্যাদি| সংযোগোঽযমিতি চতুর্বিংশতিরাশিরূপো মেলকঃ| তাভ্যামিতি রজস্তমোভ্যাম্| সত্ত্ববৃদ্ধ্যা কারণভূতযা রজস্তমোনিবৃত্ত্যা পুরুষরূপঃ সংযোগো নিবর্ততে মোক্ষো ভবতীত্যর্থঃ| সত্ত্বং বৃদ্ধং বিশুদ্ধজ্ঞানজননাদ্ রজস্তমসী সংসারকারণে বিজিত্য প্রকৃতিপুরুষবিবেকজ্ঞানান্মোক্ষমাবহতি||৩৬||

Adhikarana 18 (37-38) · Śloka 38

অত্র কর্ম ফলং চাত্র জ্ঞানং চাত্র প্রতিষ্ঠিতম্| অত্র মোহঃ সুখং দুঃখং জীবিতং মরণং স্বতা||৩৭|| এবং যো বেদ তত্ত্বেন স বেদ প্রলযোদযৌ| পারম্পর্যং চিকিত্সাং চ জ্ঞাতব্যং যচ্চ কিঞ্চন||৩৮||

পুনশ্চতুর্বিংশতিকে পুরুষে কর্মফলাদি দর্শযন্ দোষহীনে পুরুষে কর্মফলাদ্যভাবমর্থোদ্দর্শযতি- অত্রেত্যাদি| ফলমত্রেতি যথোক্তসমুদাযপুরুষে| কর্মেতি অদৃষ্টম্| ফলমিতি অদৃষ্টফলম্| স্বতা মমতা| জ্ঞানং চ যদ্যপি চতুর্বিংশতিতত্ত্বাতিরিক্তস্যোদাসীনস্যৈব, তথাঽপি তচ্চেতনযা প্রকৃতিরপি চেতনামাপদ্য চেতনৈব ভবতীতি যুক্তম্ ‘অত্র জ্ঞানম্’ ইতি| বচনং হি- “তস্মাত্তত্সংযোগাদচেতনং চেতনাবদিব লিঙ্গম্ ” (সাং. কা. ২০) ইতি| প্রলযোদযাবিতি জীবিতমরণে| পারম্পর্যমিতি শরীরপরম্পরাম্| চিকিত্সাং চেতি নৈষ্ঠিকী আত্যন্তিকদুঃখচিকিত্সা মোক্ষসাধনা জ্ঞাতব্যা| যচ্চ কিঞ্চনেত্যনেনানুক্তমপি কৃত্স্নং জ্ঞেযমবরুণদ্ধি||৩৭-৩৮||

Adhikarana 19 (39-42) · Śloka 42

ভাস্তমঃ সত্যমনৃতং বেদাঃ কর্ম শুভাশুভম্| ন স্যুঃ কর্তা চ বোদ্ধা চ পুরুষো ন ভবেদ্যদি||৩৯|| নাশ্রযো ন সুখং নার্তির্ন গতির্নাগতির্ন বাক্| ন বিজ্ঞানং ন শাস্ত্রাণি ন জন্ম মরণং ন চ||৪০|| ন বন্ধো ন চ মোক্ষঃ স্যাত্ পুরুষো ন ভবেদ্যদি| কারণং পুরুষস্তস্মাত্ কারণজ্ঞৈরুদাহৃতঃ||৪১|| ন চেত্ কারণমাত্মা স্যাদ্ভাদযঃ স্যুরহেতুকাঃ| ন চৈষু সম্ভবেজ্ জ্ঞানং ন চ তৈঃ স্যাত্ প্রযোজনম্||৪২||

পুরুষঃ কারণং কস্মাদিতি প্রশ্নস্যোত্তরং- ভাস্তম ইত্যাদি| ভাঃ প্রতিভা| তমঃ মোহঃ| পুরুষ ইহ প্রকরণে আত্মাঽভিপ্রেতঃ| আশ্রযঃ শরীরম্| গতিশ্চ প্রযোজনানুসন্ধানাদ্ভবতি , এবমাগতিরপি| কারণং পুরুষস্তস্মাদিতি ভাস্তমঃসত্যাদৌ কারণং পুরুষ ইত্যর্থঃ| এতদেব ভাআদিকারণত্বমাত্মন আহ- ন চেদিত্যাদি| এবং মন্যতে- ভাস্তমসী ধর্মাধর্মজন্যে, ধর্মাধর্মৌ চাসত্যাত্মনি নিরাশ্রযৌ ন ভবিতুমর্হতঃ; তথা সত্যং ধর্মজনকতযা উপাদেযম্, অনৃতং চাধর্মজনকতযাঽনুপাদেযম্, এতচ্চাত্মনি স্থিরেঽসতি ধর্মাধর্মজনকত্বং নাস্তি, ততশ্চ সত্যাসত্যভেদোঽপ্যকিঞ্চিত্করত্বান্নাস্তি; এবং শুভাশুভকর্মণ্যপি বাচ্যং; তথা কর্তা চ কারণপ্রতিসন্ধাতা ন ভবতি, প্রতিসন্ধাতুরাত্মনোঽভাবাদিত্যর্থঃ; তথা বোদ্ধা চ পূর্বাপরাবস্থাপ্রতিসন্ধাতৈব ভবতি; শরীরং চাত্মনো ভোগাযতনং নাত্মানং বিনা ভবতি; এবং সুখাদাবপ্যাত্মনঃ কারণত্বমুন্নেযম্; বিজ্ঞানং শাস্ত্রার্থজ্ঞানং, শাস্ত্রাণি প্রতিসন্ধাত্রাঽঽত্মনৈব কৃতানি| ন চৈষু সম্ভবেজ্জ্ঞানমিতি আত্মানং জ্ঞাতারং বিনা ন ভাদিষু জ্ঞানং সম্ভবেত্, জ্ঞাতুরাত্মনোঽভাবাদিত্যর্থঃ| ন চ তৈঃ স্যাত্ প্রযোজনমিতি ভাদীনামাত্মার্থত্বেনাসত্যাত্মনি ভাদ্যুত্পত্তেঃ প্রযোজনং ন স্যাত্, প্রযোজনাভাবাচ্চোত্পাদো ন স্যাত্; সর্বেষামেব হি ভাবানামাত্মস্থৌ ধর্মাধর্মৌ পুরুষভোগার্থমুত্পাদকৌ, অসতি ভোক্তরি ভোজ্যেনাপি ন ভবিতব্যং কারণাভাবাত্||৩৯-৪২||

Adhikarana 20 (43-44) · Śloka 44

কৃতং মৃদ্দণ্ডচক্রৈশ্চ কুম্ভকারাদৃতে ঘটম্| কৃতং মৃত্তৃণকাষ্ঠৈশ্চ গৃহকারাদ্বিনা গৃহম্||৪৩|| যো বদেত্ স বদেদ্দেহং সম্ভূয করণৈঃ কৃতম্| বিনা কর্তারমজ্ঞানাদ্যুক্ত্যাগমবহিষ্কৃতঃ||৪৪||

আত্মানং বিনা শরীরানুত্পাদে দৃষ্টান্তদ্বযং প্রমেযগৌরবাদাহ- কৃতং মৃদ্দণ্ডেত্যাদি| সম্ভূয করণৈঃ কৃতমিত্যাত্মনিরপেক্ষৈর্ভূতৈঃ কৃতমিত্যর্থঃ| যুক্ত্যা অনুমানরূপযা আগমেন চ রহিতো যুক্ত্যাগমবহিষ্কৃতঃ; প্রত্যক্ষং চাত্র নোক্তং, তস্যাত্মানং প্রতি প্রাযোঽযোগ্যত্বাত্||৪৩-৪৪||

Adhikarana 21 (45) · Śloka 45

কারণং পুরুষঃ সর্বৈঃ প্রমাণৈরুপলভ্যতে| যেভ্যঃ প্রমেযং সর্বেভ্য আগমেভ্যঃ প্রমীযতে||৪৫||

সর্বৈঃ প্রমাণৈরিতি প্রত্যক্ষাদিভিঃ| যেভ্য ইতি করণ এবাপাদানবিবক্ষযা পঞ্চমী| আগমযন্তি বোধযন্তীতি আগমাঃ প্রমাণান্যেব; অন্যে ত্বাগমপ্রমাণাভ্যাং শাস্ত্রাণ্যেব ব্রুবতে||৪৫||

Adhikarana 22 (46-47) · Śloka 47

ন তে তত্সদৃশাস্ত্বন্যে পারম্পর্যসমুত্থিতাঃ| সারূপ্যাদ্যে ত এবেতি নির্দিশ্যন্তে নবা নবাঃ||৪৬|| ভাবাস্তেষাং সমুদযো নিরীশঃ সত্ত্বসঞ্জ্ঞকঃ| কর্তা ভোক্তা ন স পুমানিতি কেচিদ্ব্যবস্থিতাঃ||৪৭||

নিরাত্মবাদিমতমুত্থাপযতি- ন তে ইত্যাদি| অস্মিঞ্ শরীরে তে ক এব পৃথিবীজলাদযো ভাবাঃ, যে ত এবেতি ব্যপদিশ্যন্তে; তে ন ভবন্তি পূর্বানুভূতা নানুভবন্তীত্যর্থঃ| যদি তে ন ভবন্তি, কথং তর্হি ‘তে’ ইত্যভিজ্ঞানমিত্যাহ- তত্সদৃশাস্ত্বন্যে পূর্বসদৃশা ইত্যর্থঃ| পারম্পর্যসমুত্থিতা ইতি সদৃশসন্তানব্যবস্থিতাঃ| সারূপ্যাদিতি সদৃশরূপত্বাত্| তেষাং সমুদয ইতি ক্ষণভঙ্গিনাং মেলক ইত্যর্থঃ| নিরীশ ইতি স্থায্যাত্মরহিতঃ| সত্ত্বসঞ্জ্ঞক ইতি প্রাণিসঞ্জ্ঞকঃ| কেচিদিতি বৌদ্ধাঃ| বৌদ্ধা হি নিরাত্মকং ক্ষণিকজ্ঞানাদিসমুদাযমাত্রং শরীরমিচ্ছন্তি; প্রতিসন্ধানং চ ক্ষণিকানামপি জ্ঞানাদীনাং কার্যকারণভাবাদেকফলসন্ততাবিচ্ছন্তি||৪৬-৪৭||

Adhikarana 23 (48) · Śloka 48

তেষামন্যৈঃ কৃতস্যান্যে ভাবা ভাবৈর্নবাঃ ফলম্| ভুঞ্জতে সদৃশাঃ প্রাপ্তং যৈরাত্মা নোপদিশ্যতে||৪৮||

এতদ্দূষযতি- তেষামিত্যাদি| তেষাং জ্ঞানসন্তানবাদিনাম্, অন্যেন কৃতস্যৌদনপাকাদেঃ ফলমন্নাদি অন্যে ভুঞ্জত ইতি প্রাপ্নোতি| এতচ্চাসঙ্গতং, যতঃ ফলং ভোক্ষ্যামীতি কৃত্বা ভাবিফলপ্রত্যাশযা প্রবৃত্তির্যুক্তা, ন ত্বন্যস্য ভোগ্যতাং ফলস্য পশ্যন্ কশ্চিত্ প্রবর্ততে; যোঽপি সূপকারাদিঃ পরার্থং প্রবর্ততে, সোঽপি পরার্থেন স্বার্থং সাধযিতুকাম এবেতি ভাবঃ||৪৮||

Adhikarana 24 (49) · Śloka 49

করণান্যান্যতা দৃষ্টা কর্তুঃ কর্তা স এব তু| কর্তা হি করণৈর্যুক্তঃ কারণং সর্বকর্মণাম্||৪৯||

পরমতং দূষযিত্বা স্বমতমাহ- করণেত্যাদি| করণস্য শরীরস্য পরিণামিনোঽন্যান্যতা দৃষ্টা| কর্তা চাত্মা, স এব ন বিনাশীত্যর্থঃ| অত্রৈব দৃষ্টান্তমাহ- কর্তা হীত্যাদি| যথাঽনেকশিল্পবিত্ কর্তা করণৈর্বাংশীসন্দংশযন্ত্রাদিভিঃ কাষ্ঠপাটনলৌহঘটনাদি করোতি, তথাঽঽত্মাঽপীত্যর্থঃ||৪৯||

Adhikarana 25 (50-51) · Śloka 51

নিমেষকালাদ্ভাবানাং কালঃ শীঘ্রতরোঽত্যযে| ভগ্নানাং ন পুনর্ভাবঃ কৃতং নান্যমুপৈতি চ||৫০|| মতং তত্ত্ববিদামেতদ্যস্মাত্তস্মাত্ স কারণম্| ক্রিযোপভোগে ভূতানাং নিত্যঃ পুরুষসঞ্জ্ঞকঃ||৫১||

অথাযমাত্মসদ্ভাবঃ স্থিরোঽস্তু, শরীরারম্ভকাণাং ভূতানাং কা বা গতিরিত্যাহ- নিমেষেত্যাদি| ভাবানামিতি শরীরাদিভাবানাম্| অত্যয ইতি বিনাশে; শরীরস্য স্বাগ্নিপচ্যমানস্য নিমেষকালাদপি শীঘ্রং বিনাশো ভবতীত্যর্থঃ| অমীষাং চ ভাবানাং ভগ্নানাং ন পুনর্ভাবঃ পুনরাগমনং নাস্তীত্যর্থঃ| তেন, যেন শরীরেণ যত্ কৃতং তচ্ছরীরং তত্ফলং ন প্রাপ্নোতীত্যুক্তং ভবতি| অথ মা ভবত্বেবং ততঃ কিমিত্যাহ- কৃতমিত্যাদি|- কৃতং কর্ম যাগাদি ন ফলরূপতযাঽন্যমুপৈতি, এবং সতি দেবদত্তকৃতেন শুভকর্মণা যজ্ঞদত্তাদযোঽপি সুখভাজঃ স্যুঃ; তস্মাত্ ক্ষণভঙ্গিশরীরাদতিরিক্তঃ কর্মকর্তা তত্ফলভোক্তা চাস্তীতি ভাবঃ| ক্রিযোপভোগ ইতি ক্রিযাযাং তত্ফলভোগে চ| ভূতানামিতি প্রাণিনাম্||৫০-৫১||

Adhikarana 26 (52) · Śloka 52

অহঙ্কারঃ ফলং কর্ম দেহান্তরগতিঃ স্মৃতিঃ| বিদ্যতে সতি ভূতানাং কারণে দেহমন্তরা||৫২||

আত্মসদ্ভাবে হেত্বন্তরমাহ- অহঙ্কার ইত্যাদি| এতেঽহঙ্কারদযঃ স্থির এব পরমাত্মনি ভবন্তি, পূর্বাপরকালাবস্থাযিবস্তুধর্মত্বাদিতি ভাবঃ| দেহমন্তরেতি দেহং বিনা; দেহাতিরিক্তে কারণে সত্যহঙ্কারো ভবতীত্যর্থঃ||৫২||

Adhikarana 27 (53) · Śloka 53

প্রভবো ন হ্যনাদিত্বাদ্বিদ্যতে পরমাত্মনঃ| পুরুষো রাশিসঞ্জ্ঞস্তু মোহেচ্ছাদ্বেষকর্মজঃ||৫৩||

‘প্রভবঃ পুরুষস্য কঃ’ ইত্যস্যোত্তরং- প্রভব ইত্যাদি| প্রভবঃ কারণম্| রাশিসঞ্জ্ঞ ইতি ষড্ধাতুসমুদাযরূপশ্চতুর্বিংশতিরাশিরূপো বা| মোহেচ্ছাদ্বেষজনিতকর্মজো মোহেচ্ছাদ্বেষকর্মজঃ| মোহাদ্ধি ভাবেষু ইচ্ছা দ্বেষশ্চ ভবতি, ততঃ প্রবৃত্তিঃ, প্রবৃত্তের্ধর্মাধর্মৌ, তৌ চ শরীরং জনযতো ভোগার্থম্||৫৩||

Adhikarana 28 (54-55) · Śloka 55

আত্মা জ্ঞঃ করণৈর্যোগাজ্ জ্ঞানং ত্বস্য প্রবর্ততে| করণানামবৈমল্যাদযোগাদ্বা ন বর্ততে||৫৪|| পশ্যতোঽপি যথাঽঽদর্শে সঙ্ক্লিষ্টে নাস্তি দর্শনম্| তত্ত্বং জলে বা কলুষে চেতস্যুপহতে তথা||৫৫||

‘কিমজ্ঞো জ্ঞঃ’ ইত্যস্যোত্তরম্- আত্মেত্যাদি| করণানীহ মনোবুদ্ধীন্দ্রিযাণি| ন বর্ততে জ্ঞানমিতি যোজনা| ননু যদ্যযমাত্মা জ্ঞঃ , তত্ কিমিত্যস্য সর্বদা জ্ঞানং ন ভবতীত্যাহ- পশ্যতোঽপীত্যাদি| পশ্যতোঽপীতি চক্ষুষ্মতোঽপীত্যর্থঃ| তত্ত্বমিতি দর্শনবিশেষণম্| তেন, ম্লানে দর্পণে জলে বা দর্শনং ভবদপ্যযথার্থগ্রাহিতযা ন তত্ত্বরূপং ভবতীত্যর্থঃ| চেতসীত্যুপলক্ষণং, তেন চক্ষুরাদাবপ্যুপহত ইতি জ্ঞেযম্||৫৪-৫৫||

Adhikarana 29 (56-57) · Śloka 57

করণানি মনো বুদ্ধির্বুদ্ধিকর্মেন্দ্রিযাণি চ| কর্তুঃ সংযোগজং কর্ম বেদনা বুদ্ধিরেব চ||৫৬|| নৈকঃ প্রবর্ততে কর্তুং ভূতাত্মা নাশ্নুতে ফলম্| সংযোগাদ্বর্ততে সর্বং তমৃতে নাস্তি কিঞ্চন||৫৭||

করণপ্রস্তাবাজ্ জ্ঞানে কর্মণি বেদনাযাং চ যাবত্ করণমাত্মনস্তদাহ- করণানীত্যাদি| সংযোগজমিতি কর্মণা বেদনযা বুদ্ধ্যা চ যোজ্যম্| নাশ্নুতে ফলমেক ইতি যোজ্যম্| এক ইতি নিষ্করণঃ| সংযোগাদ্বর্তত ইতি করণসমুদাযাদুত্পদ্যতে | তমৃত ইতি সংযোগং বিনা||৫৬-৫৭||

Adhikarana 30 (58) · Śloka 58

ন হ্যেকো বর্ততে ভাবো বর্ততে নাপ্যহেতুকঃ| শীঘ্রগত্বাত্স্বভাবাত্ত্বভাবো ন ব্যতিবর্ততে||৫৮||

অত্রৈব সামগ্রীজন্যত্বে সর্বকার্যাণামুপপত্তিমাহ- ন হ্যেক ইত্যাদি| একো ভাবঃ কারণরূপঃ সহকারিকারণান্তররহিতো ন কার্যকরণে বর্তত ইত্যর্থঃ; এবং তাবদেকং কারণং কার্যে ন বর্ততে, কার্যং চ হেতুং বিনা ন ভবতীত্যাহ- বর্ততে নাপ্যহেতুক ইতি; হেতুং বিনা ভাব উত্পত্তিধর্মা ন বর্ততে ন ভবতীত্যর্থঃ| তেন করণযুক্তাত্মজন্যং কার্যং ন কেবলাদাত্মনো হেতুরূপাদ্ভবতীত্যুক্তং ভবতি| অথ হেতুং বিনা চেদ্ভাবো ন ভবতি, তত্ কিমভাবেঽপি শারীরাণাং ভাবানাং হেত্বপেক্ষা ন বেত্যাহ- শীঘ্রগত্বাদিত্যাদি| শীঘ্রগত্বাত্ স্বভাবাল্লক্ষিতোঽভাবো ন স্বভাবং ব্যতিবর্ততে শীঘ্রগত্বস্বভাবং ন ত্যজতীত্যর্থঃ| তেন, অহেতুক এবাভাবো ভবতি, ভাবস্তু সহেতুকঃ| উক্তং হি “উত্পত্তিহেতুর্ভাবনাং ন নিরোধেঽস্তি কারণম্” (সূ.অ.১৬) ইতি| কিংবা, শীঘ্রগত্বাদস্থিরত্বাদভাবো নাবস্থান্তরমাত্মনাশং প্রতি গচ্ছতীতি গ্রন্থার্থঃ||৫৮||

Adhikarana 31 (59) · Śloka 59

অনাদিঃ পুরুষো নিত্যো বিপরীতস্তু হেতুজঃ| সদকারণবন্নিত্যং দৃষ্টং হেতুজমন্যথা||৫৯||

‘স নিত্যঃ কিমনিত্যঃ’ ইত্যস্যোত্তরম্- অনাদিরিত্যাদি| অনাদিশ্চ পুরুষোঽব্যক্তরূপ আত্মশব্দাভিধেযঃ| বিপরীত ইতি আদিমান্ রাশিরূপঃ পুরুষ ইত্যর্থঃ| অত্রৈবানাদের্নিত্যত্বে শাস্ত্রান্তরসম্মতিমপ্যাহ- সদিত্যাদি| সদিতি ত্রিবিধসমযে প্রমাণগম্যভাবরূপম্ | এতেন, প্রাগভাবস্যাকারণবতোঽপ্যভাবরূপতযাঽনিত্যত্বং ন ব্যভিচারকম্| হেতুজমন্যথেতি অত্রাপি ভাবরূপমিতি যোজনীযম্| তেন, হেতুজন্যস্যাপি প্রধ্বংসস্যাবিনাশিত্বং পরিহৃতং ভবতি||৫৯||

Adhikarana 32 (60-62) · Śloka 62

তদেব ভাবাদগ্রাহ্যং নিত্যত্ব ন কুতশ্চন| ভাবাজ্জ্ঞেযং তদব্যক্তমচিন্ত্যং ব্যক্তমন্যথা||৬০|| অব্যক্তমাত্মা ক্ষেত্রজ্ঞঃ শাশ্বতো বিভুরব্যযঃ| তস্মাদ্যদন্যত্তদ্ব্যক্তং, বক্ষ্যতে চাপরং দ্বযম্||৬১|| ব্যক্তমৈন্দ্রিযকং চৈব গৃহ্যতে তদ্যদিন্দ্রিযৈঃ| অতোঽন্যত্ পুনরব্যক্তং লিঙ্গগ্রাহ্যমতীন্দ্রিযম্||৬২||

কিং তন্নিত্যত্বমিত্যাহ- তদেবেত্যাদি| ভাবাদুত্পত্তিধর্মকাত্| তন্নিত্যত্বং ন কুতোঽপি ভাবাদ্ভবতি, নিত্যং হি ন কুতোঽপি ভবতি| ততশ্চাত্মা ভাবং প্রতি নিরপেক্ষত্বাত্ সর্বেভ্যো ভাবেভ্যোঽপ্যগ্রে নিত্যং সদেব| তচ্চৈবম্ভূতং নিত্যমব্যক্তং জ্ঞেযম্| অচিন্ত্যমিত্যব্যক্তবিশেষণম্| অব্যক্তং চ মূলপ্রকৃতিঃ| ব্যক্তমন্যথেতি প্রকৃতেরন্যতমকার্যং মহদাদিকমনিত্যম্; আকাশমপি বিকাররূপতযাঽনিত্যমেব; উদাসীনপুরুষস্তু নিত্য এবাব্যক্তশব্দেনৈব লক্ষিত ইত্যুক্তমেব| অব্যক্তধর্মান্তরব্যাপকান্ পর্যাযানাহ- অব্যক্তমিত্যাদি| পুনঃ প্রকারান্তরেণ ব্যক্তাব্যক্তার্থমাহ - বক্ষ্যত ইত্যাদি| অপরং দ্বযমিতি প্রকারান্তরকৃতং ব্যক্তাব্যক্তদ্বযম্| লিঙ্গগ্রাহ্যমিতি অনুমানগ্রহ্যম্| অতীন্দ্রিযমিত্যনেন চেন্দ্রিযগ্রহণাযোগ্যং যত্ কেনাপি শব্দাদিলিঙ্গেন গৃহ্যতে ন তদব্যক্তং, কিন্তু যন্নিত্যানুমেযং মনোঽহঙ্কারাদি তদেবাব্যক্তম্||৬০-৬২||

Adhikarana 33 (63-64) · Śloka 64

খাদীনি বুদ্ধিরব্যক্তমহঙ্কারস্তথাঽষ্টমঃ| ভূতপ্রকৃতিরুদ্দিষ্টা বিকারাশ্চৈব ষোডশ||৬৩|| বুদ্ধীন্দ্রিযাণি পঞ্চৈব পঞ্চ কর্মেন্দ্রিযাণি চ| সমনস্কাশ্চ পঞ্চার্থা বিকারা ইতি সঞ্জ্ঞিতাঃ||৬৪||

‘প্রকৃতিঃ কা বিকারাঃ কে’ ইত্যস্যোত্তরং- খাদীনীত্যাদি| খাদীনি সূক্ষ্মভূতখাদীনি তন্মাত্রশব্দাভিধেযানি| বুদ্ধিঃ মহচ্ছব্দাভিধেযা| অব্যক্তং মূলপ্রকৃতিঃ| অহঙ্কারঃ বুদ্ধিবিকারঃ; স চ ত্রিবিধঃ- ভূতাদিঃ, তৈজসঃ, বৈকারিকশ্চ| ভূতানাং স্থাবরজঙ্গমানাং প্রকৃতির্ভূতপ্রকৃতিঃ| অত্র চাব্যক্তং প্রকৃতিরেব পরং, বুদ্ধ্যাদযস্তু স্বকারণবিকৃতিরূপা অপি স্বকার্যাপেক্ষযা প্রকৃতিরূপা ইহ প্রকৃতিত্বেনোক্তাঃ| যদুক্তং- “মূলপ্রকৃতিরবিকৃতির্মহদাদ্যাঃ প্রকৃতিবিকৃতযঃ সপ্ত” (সাং.কা.৩) ইতি| বিকারা নাহ- বিকারা ইত্যাদি| এবশব্দো ভিন্নক্রমেঽবধারণে, তেন বিকারা এব ষোডশ পরং ন প্রকৃতযঃ| বুদ্ধেরিন্দ্রিযাণি বুদ্ধীন্দ্রিযাণি| পঞ্চার্থা ইতি স্থূলা আকাশাদযঃ শব্দাদিরূপাঃ; গুণগুণিনোর্হি পরমার্থতো ভেদো নাস্ত্যেবাস্মিন্ দর্শনে||৬৩-৬৪||

Adhikarana 34 (65) · Śloka 65

ইতি ক্ষেত্রং সমুদ্দিষ্টং সর্বমব্যক্তবর্জিতম্| অব্যক্তমস্য ক্ষেত্রস্য ক্ষেত্রজ্ঞমৃষযো বিদুঃ||৬৫||

এনমেব প্রকৃতিবিকারসমূহং ক্ষেত্রক্ষেত্রজ্ঞভেদেন বিভজতে- ইতীত্যাদি| অব্যক্তবর্জিতমিতি প্রকৃত্যুদাসীনবর্জিতং, প্রকৃতেশ্চোদাসীনপুরুষচৈতন্যেন চৈতন্যমস্ত্যেব||৬৫||

Adhikarana 35 (66) · Śloka 67

জাযতে বুদ্ধিরব্যক্তাদ্বুদ্ধ্যাঽহমিতি মন্যতে| পরং খাদীন্যহঙ্কারাদুত্পদ্যন্তে যথাক্রমম্||৬৬|| ততঃ সম্পূর্ণসর্বাঙ্গো জাতোঽভ্যুদিত উচ্যতে|৬৭|

সম্প্রতি মহাপ্রলযান্তরং যথাঽঽদিসর্গে বুদ্ধ্যাদ্যুত্পাদো ভবতি তদাহ- জাযত ইত্যাদি| বুদ্ধ্যাঽহমিতি মন্যত ইতি বুদ্ধের্জাতেনাহঙ্কারেণাহমিতি মন্যত ইত্যর্থঃ| খাদীনীতি খাদীনি সূক্ষ্মাণি তন্মাত্ররূপাণি, তথৈকাদশেন্দ্রিযাণি| বচনং হি “প্রকৃতের্মহাংস্ততোঽহঙ্কারস্তস্মাদ্গণশ্চ ষোডশকঃ” (সাং.কা.২২) ইতি| যথাক্রমমিতি যস্মাদহঙ্কারাদুত্পদ্যতে তেন ক্রমেণ; তত্র বৈকৃতাত্ সাত্ত্বিকাদহঙ্কারাত্তৈজসসহাযাদেকাদশেন্দ্রিযাণি ভবন্তি, ভূতাদেস্ত্বহঙ্কারাত্তামসাত্তৈজসসহাযাত্ পঞ্চতন্মাত্রাণি| যদুক্তং- “সাত্বিক একাদশকঃ প্রবর্ততে বৈকৃতাদহঙ্কারাত্| ভূতাদেস্তন্মাত্রঃ স তামসস্তৈজসাদুভযম্” (সাং.কা.২৫) ইতি| তত ইতি আহঙ্কারিককার্যানন্তরং তন্মাত্রেভ্য উত্পন্নস্থূলভূতসম্বন্ধাত্| সম্পূর্ণসর্বাঙ্গো জাত ইতি আদিসর্গো(র্গে) জাতঃ||৬৬||

Adhikarana 36 (67-69) · Śloka 69

পুরুষঃ প্রলযে চেষ্টৈঃ পুনর্ভাবৈর্বিযুজ্যতে||৬৭|| অব্যক্তাদ্ব্যক্ততাং যাতি ব্যক্তাদব্যক্ততাং পুনঃ| রজস্তমোভ্যামাবিষ্টশ্চক্রবত্ পরিবর্ততে||৬৮|| যেষাং দ্বন্দ্বে পরা সক্তিরহঙ্কারপরাশ্চ যে| উদযপ্রলযৌ তেষাং ন তেষাং যে ত্বতোঽন্যথা||৬৯||

এবমাদিসর্গে প্রকৃতের্মহদাদিসর্গং দর্শযিত্বা মহাপ্রলযে প্রকৃতাবব্যক্তরূপাযাং বুদ্ধ্যাদীনাং লযমাহ- পুরুষ ইত্যাদি| ইষ্টৈর্ভাবৈরিতি পুরুষোপভোগার্থমিষ্টৈর্বুদ্ধ্যাদিভিঃ| অন্যে তু এবম্ভূতসঙ্গং জন্মনি , বুদ্ধ্যাদিবিযোগং চ মরণে ব্রুবতে| তন্ন, জন্মমরণযোর্বুদ্ধ্যাদীনাং বিদ্যমানত্বাত্| উক্তং হি- “অতীন্দ্রিযৈস্তৈরতিসূক্ষ্মরূপৈরাত্মা কদাচিন্ন বিমুক্তপূর্বঃ| নৈবেন্দ্রিযৈর্নৈব মনোমতিভ্যাং ন চাপ্যহঙ্কারবিকারদোষৈঃ” (শা. অ. ২) ইতি| তথাঽন্যত্রাপ্যুক্তং- “পূর্বোত্পন্নমসক্তং নিযতং মহদাদিসূক্ষ্মপর্যন্তম্| সংসরতি নিরুপভোগং ভাবৈরধিবাসিতং লিঙ্গম্” (সাং. কা. ৪০) ইতি| তস্মান্মহাপ্রলয এব প্রকৃতৌ লযঃ, তথাঽঽদিসর্গ এব প্রকৃতের্মহদাদিসৃষ্টিরিতি| এতদেব প্রপঞ্চং লযং চ প্রকৃতেরাহ- অব্যক্তাদিত্যাদি| অব্যক্তাদিতি প্রকৃতেঃ, ব্যক্ততামিতি মহদাদিমহাভূতপর্যন্তপ্রপঞ্চরূপতাং যাতি| ব্যক্তাদিতি মহাভূতপ্রপঞ্চাদ্যবস্থাতঃ পুনরব্যক্তরূপতাং যাতি গচ্ছতি; মহাপ্রলযে হি মহাভূতানি তন্মাত্রেষু লযং যান্তি, তন্মাত্রাণি তথেন্দ্রিযাণি চাহঙ্কারে লযং যান্তি, অহঙ্কারো বুদ্ধৌ, বুদ্ধিশ্চ প্রকৃতাবিতি লযক্রমঃ| অযং চ লযক্রমো মোক্ষেঽপি ভবতি| পরং তু তত্র তং পুরুষং প্রতি পুনঃ সর্গং নারভতে প্রকৃতিঃ| অযং সংসারঃ কুতো ভবতীত্যাহ- রজ ইত্যাদি| আবিষ্টো যুক্তঃ| চক্রবত্ পরিবর্তত ইতি পুনঃ পুনর্লযসর্গাভ্যাং যুজ্যতে| দ্বন্দ্ব ইতি রজস্তমোরূপে মিথুনে| অহঙ্কারপরা ইতি অহঙ্কারান্মমেদমিত্যাদিমিথ্যাজ্ঞানপরাঃ| উদযপ্রলযৌ জন্মমরণে, কিংবা লযসর্গৌ| অতোঽন্যথেতি যে রাগদ্বেষবিমুক্তা নিরহঙ্কারাশ্চ তেষাং নোদযপ্রলযৌ ভবতঃ||৬৭-৬৯||

Adhikarana 37 (70-74) · Śloka 74

প্রাণাপানৌ নিমেষাদ্যা জীবনং মনসো গতিঃ| ইন্দ্রিযান্তরসঞ্চারঃ প্রেরণং ধারণং চ যত্||৭০|| দেশান্তরগতিঃ স্বপ্নে পঞ্চত্বগ্রহণং তথা| দৃষ্টস্য দক্ষিণেনাক্ষ্ণা সব্যেনাবগমস্তথা||৭১|| ইচ্ছা দ্বেষঃ সুখং দুঃখং প্রযত্নশ্চেতনা ধৃতিঃ| বুদ্ধিঃ স্মৃতিরহঙ্কারো লিঙ্গানি পরমাত্মনঃ||৭২|| যস্মাত্ সমুপলভ্যন্তে লিঙ্গান্যেতানি জীবতঃ| ন মৃতস্যাত্মলিঙ্গানি তস্মাদাহুর্মহর্ষযঃ||৭৩|| শরীরং হি গতে তস্মিঞ্ শূন্যাগারমচেতনম্| পঞ্চভূতাবশেষত্বাত্ পঞ্চত্বং গতমুচ্যতে||৭৪||

‘কিং লিঙ্গং পুরুষস্য চ’ ইত্যস্যোত্তরং- প্রাণাপানাবিত্যাদি| প্রাণাপানৌ উচ্ছ্বাসনিঃশ্বাসৌ| নিমেষাদ্যা ইতি আদ্যশব্দগ্রহণেন উন্মেষাদ্যাঃ প্রেক্ষণবিশেষা গৃহ্যন্তে| মনসো গতিরিতি মনসা পাটলিপুত্রগমনাদিরূপা| ইন্দ্রিযান্তরসঞ্চারোঽপি মনস এব, যথা চক্ষুঃ পরিত্যজ্য মনঃ স্পর্শনমধিতিষ্ঠতীত্যাদি| প্রেরণং চ তথা ধারণং চ মনস এবেতি জ্ঞেযম্| দেশান্তরগতিঃ স্বপ্নে ইতি ছেদঃ| পঞ্চত্বগ্রহণং মরণজ্ঞানম্| সব্যেনাবগম ইতি সব্যেনাক্ষ্ণা স এবাযং দক্ষিণাক্ষিদৃষ্টো ঘট ইত্যবগম ইত্যর্থঃ| চেতনা জ্ঞানমাত্রম্| বুদ্ধিস্তু ঊহাপোহজ্ঞানম্| অথ কথমেতান্যাত্মানং গমযন্তীত্যাহ- যস্মাদিত্যাদি| জীবত ইতি পঞ্চভূতাতিরিক্তাত্মসংযুক্তস্য | পঞ্চত্বং তু যদ্যপি জীবতো ন ভবতি কিন্তু মৃতস্যৈব, তথাঽপি পঞ্চত্বং মৃতশরীরে দৃশ্যমানং বিপর্যযাত্ পঞ্চত্বাভাবাজ্জীবচ্ছরীরলিঙ্গং ভবতীতি জ্ঞেযম্| অত্রৈবোদাহৃতাশ্চ প্রাণাপানাদযো ন ভূতমাত্রে ভবন্তি, নিরাত্মকেষ্বিষ্টকামৃতশরীরাদিষ্বদর্শনাত্| ন চ মন এব ভূতাতিরিক্তমাত্মা ভবিতুমর্হতি, যতস্তস্যাপি করণরূপস্য প্রেরণাদ্যাত্মনা কর্ত্রা কর্তব্যম্| নাপীন্দ্রিযাণ্যাত্মত্বেন স্বীকর্তুং পার্যন্তে, যতস্তথা সতি ইন্দ্রিযান্তরোপলব্ধমর্থং নেন্দ্রিযাণি যজ্ঞদত্তোপলব্ধমর্থং দেবদত্ত ইব প্রতিসন্ধাতুং সমর্থানি ভবেযুঃ; অস্তি চেন্দ্রিযান্তরোপলব্ধার্থপ্রতিসন্ধানং, যথা- সুরভিচন্দনং স্পৃশামীত্যত্র| তস্মান্মন-ইন্দ্রিয-ভূতাতিরিক্ত আত্মা তিষ্ঠতীতি জ্ঞেযম্| অত্র যদ্যপি বুদ্ধিশব্দেন চেতনাধৃতিস্মৃত্যহঙ্কারাঃ প্রাপ্যন্ত এব বুদ্ধিপ্রকারত্বেন, তথাঽপি পৃথক্পৃথগর্থগমকত্বেন পুনঃ পৃথগুপাত্তাঃ| তথাহি- চেতনা গুণত্বেন অচেতনখাদিভূতাতিরিক্তধর্মেণাত্মানং গমযতি, ধৃতিস্তু নিযমাত্মিকা নিযন্তারমাত্মানং গমযতি, বুদ্ধিস্তু ঊহাপোহযোরেকং কারণং গমযত্যাত্মানং, স্মৃতিস্তু পূর্বানুভূতার্থস্মর্তারং স্থাযিনমাত্মানং গমযতীত্যাদ্যনুসরণীযম্| আত্মাধিষ্ঠানাভাবে শরীরে প্রাণাদ্যভাবমাহ- শরীরমিত্যাদি| শূন্যাগারমিব শূন্যাগারং যথা অধিষ্ঠাতৃশূন্যম্, এবং মৃতশরীরমপি| ষড্ধাতুকং শরীরং, তত্র ষষ্ঠে আত্মনি গতে পঞ্চভূতাত্মকং শরীরং ভবতি, তেন পঞ্চত্বং গতমুচ্যতে|||৭০-৭৪||

Adhikarana 38 (75-76) · Śloka 76

অচেতনং ক্রিযাবচ্চ মনশ্চেতযিতা পরঃ| যুক্তস্য মনসা তস্য নির্দিশ্যন্তে বিভোঃ ক্রিযাঃ||৭৫|| চেতনাবান্ যতশ্চাত্মা ততঃ কর্তা নিরুচ্যতে| অচেতনত্বাচ্চ মনঃ ক্রিযাবদপি নোচ্যতে||৭৬||

‘নিষ্ক্রিযস্য ক্রিযা তস্য কথম্’ ইত্যস্যোত্তরম্- অচেতনমিত্যাদি| চেতযিতা পর ইতি পর আত্মা চেতযিতা পরং ন তু সাক্ষাত্ ক্রিযাবান্| ননু, যদ্যেবং কথং তস্য ক্রিযেত্যাহ- যুক্তস্যেত্যাদি| আত্মাধিষ্ঠিতস্যৈব মনসঃ ক্রিযা উপচারাদাত্মনঃ ক্রিযেত্যুচ্যত ইত্যর্থঃ| এতদেবোপপাদযতি- চেতনাবানিত্যাদি| চেতনেন হ্যাত্মনাঽধিষ্ঠিতং মনঃ ক্রিযাসু প্রবর্ততে, চেতনানধিষ্ঠিতং তু মনঃ ক্রিযাসু ন প্রবর্ততে; তেন যত্কৃতা সা ক্রিযা স এব ক্রিযাবানিতি ব্যপদেষ্টুং যুজ্যতে, নত্বচেতনং মনঃ; তত্ পরাধীনক্রিযত্বেন পরমার্থতঃ ক্রিযাবদপি কর্তৃত্বেন নোচ্যত ইতি বাক্যার্থঃ; নোচ্যতে ইতি ‘কর্তৃ’ ইতি শেষঃ||৭৫-৭৬||

Adhikarana 39 (77) · Śloka 77

যথাস্বেনাত্মনাঽঽত্মানং সর্বঃ সর্বাসু যোনিষু| প্রাণৈস্তন্ত্রযতে প্রাণী নহ্যন্যোঽস্ত্যস্য তন্ত্রকঃ||৭৭||

সম্প্রতি স্বতন্ত্রত্বেঽপ্যনিষ্টযোনিগমনমাক্ষিপ্তং সমাদধাতি- যথাস্বেনেত্যাদি| সর্বাসু নরগোহস্তিকীটাদিযোনিষু| প্রাণৈস্তন্ত্রযতে প্রাণৈর্যোজযতি, আত্মনৈবাযং ধর্মাধর্মসহাযেনাত্মানং সর্বযোনিষু নযতি, ন পরপ্রেরিতো যাতি; যতো নান্যঃ পুরুষোঽস্য প্রেরকোঽস্তি ঈশ্বরাভাবাত্; কিংবা সত্যপি ঈশ্বরে তস্যাপি কর্মপরাধীনত্বাত্| ইদমেব চাস্যানিষ্টযোনিগমনে স্বাতন্ত্র্যং যদ্ অনিষ্টযোনিগমনহেত্বধর্মকরণে স্বাতন্ত্র্যম্, অধর্মকরণারব্ধস্বকর্মণৈবাযমনিচ্ছন্নপি নীযত ইত্যনিষ্টযোনিগমনং ভবতি; স্বাতন্ত্র্যং চ যথোক্তং ভবতি||৭৭||

Adhikarana 40 (78) · Śloka 78

বশী তত্ কুরুতে কর্ম যত্ কৃত্বা ফলমশ্নুতে| বশী চেতঃ সমাধত্তে বশী সর্বং নিরস্যতি||৭৮||

‘বশী যদ্যসুখৈঃ কস্মাদ্ভাবৈরাক্রম্যতে’ ইত্যস্যোত্তরং- বশীত্যাদি| বশী স্বেচ্ছাধীনপ্রবৃত্তিঃ (ইষ্টেঽনিষ্টে বাঽঽত্মা ,); তেন, বশী সন্নযং তানি কর্মাণি করোতি শুভান্যশুভানি বা আপাতফলরাগাত্, যানি কৃত্বা তত্কর্মপ্রভাবাচ্ছুভেনাশুভেন বা ফলেন যোগমাপ্নোতি| এতেন কর্তব্যে কর্মণ্যস্য বশিত্বং, কৃতকর্মফলং ত্বস্যানিচ্ছতোঽপি ভবতি; তেন তত্প্রতি নাস্য বশিত্বম্| অন্যদপি বশিত্বফলমাহ- বশী চেতঃ সমাধত্ত ইতি| অনিষ্টেঽর্থে বশী সন্নযং মনো নিবর্তযতি; যদি হ্যযং বশী ন স্যাত্, ন মনো নিবর্তযিতুং শক্নুযাত্| অপরমপি বশিত্বগমকং কর্মাহ- বশী সর্বং নিরস্যতীতি| বশী সন্নযং মোক্ষার্থং প্রবৃত্তঃ সর্বারম্ভং শুভাশুভফলং ত্যজতীত্যর্থঃ| ইহ স্বতন্ত্রঃ পরাত্মনা ঈশ্বরাদিনা প্রেরিতপ্রবৃত্তিরুচ্যতে; বশী তু স্বযমপি প্রবর্তমান ইচ্ছাবশাত্ প্রবর্ততে, ন প্রেরিতপ্রবৃত্তিরূপত্বেনেপ্সিতেঽনীপ্সিতে চ বর্ততে ইতি স্বাতন্ত্র্যবশিত্বযোর্ভেদঃ||৭৮||

Adhikarana 41 (79) · Śloka 79

দেহী সর্বগতোঽপ্যাত্মা স্বে স্বে সংস্পর্শনেন্দ্রিযে| সর্বাঃ সর্বাশ্রযস্থাস্তু নাত্মাঽতো বেত্তি বেদনাঃ||৭৯||

‘সর্বাঃ সর্বগতত্বাচ্চ বেদনাঃ কিং ন বেত্তি সঃ’ ইত্যস্যোত্তরমাহ- দেহীত্যাদি| সর্বগত ইতি সর্বগতোঽপি সন্, সংস্পর্শনেন্দ্রিয ইতি সংস্পর্শনযুক্তে শরীরে, বেদনাঃ সুখদুঃখরূপা বেত্তি, সর্বাশ্রযস্থাস্তু ন বেত্তীতি যোজনা| যস্মাত্ সর্বগতোঽপ্যাত্মা স্বকীয এব স্পর্শনবতি শরীরে পরং বেদনা বেত্তি, তেন সর্বাশ্রযস্থাঃ সর্ববেদনা ন বেত্তীতি বাক্যার্থঃ| সর্বাশ্রযস্থা ইতি সর্বপরশরীরগতাঃ | পরশরীরে চাত্মা খকর্মোপার্জিতেন্দ্রিযাভাবাদ্বিদ্যমানোঽপি নোপলভতে সুখদুঃখে| স্বে স্বে শরীর ইতি বক্তব্যে যত্ ‘সংস্পর্শনেন্দ্রিযে’ ইতি করোতি, তেন স্বশরীরেঽপি যত্র কেশনখাদৌ স্পর্শনেন্দ্রিযং নাস্তি তত্র নাত্মা কিঞ্চিদুপলভত ইতি দর্শযতি||৭৯||

Adhikarana 42 (80-81) · Śloka 81

বিভুত্বমত এবাস্য যস্মাত্ সর্বগতো মহান্| মনসশ্চ সমাধানাত্ পশ্যত্যাত্মা তিরস্কৃতম্||৮০|| নিত্যানুবন্ধং মনসা দেহকর্মানুপাতিনা| সর্বযোনিগতং বিদ্যাদেকযোনাবপি স্থিতম্||৮১||

‘ন পশ্যতি বিভুঃ কস্মাত্’ ইত্যাদিপ্রশ্নস্যোত্তরং বক্তুং প্রবৃত্তো বিভুত্বসাধকার্থগুণহেতুপ্রাপ্ত্যা বিভুত্বমেব তাবদাত্মনঃ সাধযতি- বিভুত্বমিত্যাদি| বিভুত্বং সর্বগতপরিমাণযোগিত্বম্| অত এবেতি উক্তসর্বগতত্বাত্| এতদেব স্পষ্টার্থং সাক্ষাদ্ব্রূতে- যস্মাদিত্যাদি| সর্বগতত্বং সর্বতোঽপ্যুপলভ্যমানত্বেন সর্বগতাকাশাদিপরিমাণস্যপ্যস্তি, তেন তদ্ব্যবচ্ছেদার্থং ‘মহান্’ ইতি পদং; তেন সর্বত্রোপলভ্যমানং মহাপরিমাণযোগিদ্রব্যং বিভুরুচ্যত ইতি ফলতি| বিভুত্বং ব্যুত্পাদ্য কুড্যাদিতিরোহিতজ্ঞানং নৈকান্তেন ভবতীতি দর্শযন্নাহ- মনস ইত্যাদি| সমাধানং সমাধিঃ| অনেন, যোগিনঃ সমাধিবলাত্তিরোহিতমপি পশ্যন্তীতি দর্শযতি| যে তু তিরোহিতং ন পশ্যন্তি তত্রাপ্যুপপত্তিমাহ- নিত্যেত্যাদি| সর্বযোনিগতমপ্যাত্মানং মনসাঽনুবন্ধগতমেকযোনাববস্থিতং বিদ্যাদিতি যোজ্যম্| দেহনির্বর্তকেন কর্মণা অনুপাত আত্মনি সম্বন্ধো যস্য, তেন মনসা দেহকর্মানুপাতিনা| এতেন, যদ্যপ্যাত্মা কুড্যাদিভিরতিরোহিতস্তথাঽপি যদস্যোপলব্ধিসাধনং মনস্তস্যৈকস্মিন্নেব শরীরে ব্যবস্থিতস্য ব্যবধানান্ন পশ্যত্যযং তিরস্কৃতমিত্যুক্তং ভবতি||৮০-৮১||

Adhikarana 43 (82) · Śloka 82

আদির্নাস্ত্যাত্মনঃ ক্ষেত্রপারম্পর্যমনাদিকম্| অতস্তযোরনাদিত্বাত্ কিং পূর্বমিতি নোচ্যতে||৮২||

‘ক্ষেত্রজ্ঞঃ ক্ষেত্রমথবা’ ইত্যাদিপ্রশ্নস্যোত্তরম্- আদিরিত্যাদি| ক্ষেত্রপারম্পর্যমিতি ক্ষেত্রস্যাব্যক্তবর্জিতস্য মহদাদিত্রযোবিংশতিকস্য পরম্পরাসন্ততেরনাদিত্বেনৈব ক্ষেত্রক্ষেত্রজ্ঞযোরিদং প্রথমমিতি ব্যপদেশো নৈব ভবতীত্যর্থঃ| ননু যদি ক্ষেত্রপরম্পরাঽপ্যনাদিস্তদা তস্যাত্মবদুচ্ছেদো ন প্রাপ্নোতি, যদনাদি তন্নিত্যং ভবতি, যথা- আত্মেতি দৃষ্টং? ব্রূমঃ- অনাদিত্বেঽপি যত্ স্বরূপেনৈবানাদি তন্নোচ্ছিদ্যতে, যথা- আত্মা; যত্তু উচ্ছিত্তিধর্মকং বুদ্ধ্যাদি, তদুচ্ছিদ্যত এব; সন্তানস্তু পরমার্থতঃ সন্তানিভ্যোঽতিরিক্তো নাস্ত্যেব, যদনাদিঃ স্যাত্; তেন, সন্তানস্যানাদিত্বং ভাক্তমেব| কিঞ্চৈবম্ভূতস্য বুদ্ধ্যাদিসন্তানস্যোচ্ছেদে মোক্ষপ্রতিপাদক আগম এব প্রমাণত্বেন জ্ঞেযঃ||৮২||

Adhikarana 44 (83) · Śloka 83

জ্ঞঃ সাক্ষীত্যুচ্যতে নাজ্ঞঃ সাক্ষী ত্বাত্মা যতঃ স্মৃতঃ| সর্বে ভাবা হি সর্বেষাং ভূতানামাত্মসাক্ষিকাঃ||৮৩||

‘সাক্ষিভূতশ্চ কস্যাযম্’ ইত্যস্যোত্তরং- জ্ঞ ইত্যাদি| জ্ঞো জ্ঞানবান্ সাক্ষীতি লোকে কথ্যতে, নত্বজ্ঞঃ পাষাণাদিঃ| তেন, জ্ঞত্বেনাসত্যপ্যন্যস্মিন্ কর্তরি সাক্ষীত্যুচ্যতে ইতি বাক্যার্থঃ| সর্বেষামিতি খাদিভূতানাম্| সর্বে ভাবা ইতি সর্বে ভূতধর্মা দর্শনযোগ্যাঃ| আত্মসাক্ষিকা ইতি আত্মোপলভ্যমানাঃ||৮৩||

Adhikarana 45 (84-85) · Śloka 85

নৈকঃ কদাচিদ্ভূতাত্মা লক্ষণৈরুপলভ্যতে| বিশেষোঽনুপলভ্যস্য তস্য নৈকস্য বিদ্যতে||৮৪|| সংযোগপুরুষস্যেষ্টো বিশেষো বেদনাকৃতঃ| বেদনা যত্র নিযতা বিশেষস্তত্র তত্কৃতঃ||৮৫||

‘স্যাত্ কথং চাবিকারস্য’ ইত্যাদিপ্রশ্নস্যোত্তরং- নৈক ইত্যাদি| অবিকারস্য পরমাত্মনো বেদনাকৃতো বিশেষো নাস্ত্যেব , যত্র তু বেদনাকৃতো বিশেষঃ স রাশিরূপঃ পরমাত্মব্যতিরিক্ত এবেতি বাক্যার্থঃ| ভূতানামধিষ্ঠাতা আত্মা ভূতাত্মা, অযং ভূতাত্মা একো ভূতব্যতিরিক্তো ন লক্ষণৈঃ প্রাণাপানাদিভিরুক্তৈরুপলভ্যতে| কুতো নোপলভ্যত ইত্যাহ- বিশেষ ইত্যাদি| একস্য ভূতরহিতস্য; যদাত্মনো বিশেষো বেদনাদির্নোপলভ্যত এব, তেনানুপলব্ধিরেবাত্র প্রমাণমিত্যর্থঃ| সংযোগপুরুষঃ চতুর্বিংশতিকঃ| নন্বেবমপি চতুর্বিংশত্যন্তর্নিবিষ্টস্য ভূতাত্মনোঽপি বেদনাকৃতবিশেষেণ ভবিতব্যং, যতঃ সমুদাযধর্মঃ সমুদাযিনামেব ভবতি, যথা- মাষরাশের্গুরুত্বং প্রত্যেকং মাষাণামেব গৌরবেণ ভবতীত্যাহ- বেদনেত্যাদি| বেদনা সুখদুঃখরূপা| যত্র বুদ্ধ্যাদিসমূহে নিযতা ব্যবস্থিতা বেদনা, তত্রৈব তত্কৃতো দৈন্যহর্ষাদিবিশেষোঽপি নিযতঃ; তত্রৈব বুদ্ধ্যাদিরাশৌ বর্ততে নাত্মনীতি ভাবঃ| বুদ্ধ্যাদিগতেন গুণত্রযপরিণামরূপেণ সুখদুঃখাদিনা অসুখদুঃখ এবাত্মা তত্সম্বন্ধাত্ সুখদুঃখাদিমান্ ভবতি||৮৪-৮৫||

Adhikarana 46 (86-94) · Śloka 94

চিকিত্সতি ভিষক্ সর্বাস্ত্রিকালা বেদনা ইতি| যযা যুক্ত্যা বদন্ত্যেকে সা যুক্তিরুপধার্যতাম্||৮৬|| পুনস্তচ্ছিরসঃ শূলং জ্বরঃ স পুনরাগতঃ| পুনঃ স কাসো বলবাংশ্ছর্দিঃ সা পুনরাগতা||৮৭|| এভিঃ প্রসিদ্ধবচনৈরতীতাগমনং মতম্| কালশ্চাযমতীতানামর্তীনাং পুনরাগতঃ||৮৮|| তমর্তিকালমুদ্দিশ্য ভেষজং যত্ প্রযুজ্যতে| অতীতানাং প্রশমনং বেদনানাং তদুচ্যতে||৮৯|| আপস্তাঃ পুনরাগুর্মা যাভিঃ শস্যং পুরা হতম্| যথা প্রক্রিযতে সেতুঃ প্রতিকর্ম তথাঽঽশ্রযে||৯০|| পূর্বরূপং বিকারাণাং দৃষ্ট্বা প্রাদুর্ভবিষ্যতাম্| যা ক্রিযা ক্রিযতে সা চ বেদনাং হন্ত্যনাগতাম্||৯১|| পারম্পর্যানবন্ধস্তু দুঃখানাং বিনিবর্ততে| সুখহেতূপচারেণ সুখং চাপি প্রবর্ততে||৯২|| ন সমা যান্তি বৈষম্যং বিষমাঃ সমতাং ন চ| হেতুভিঃ সদৃশা নিত্যং জাযন্তে দেহধাতবঃ||৯৩|| যুক্তিমেতাং পুরস্কৃত্য ত্রিকালাং বেদনাং ভিষক্| হন্তীত্যুক্তং চিকিত্সা তু নৈষ্ঠিকী যা বিনোপধাম্||৯৪||

‘অথবাঽঽর্তস্য’ ইত্যাদিপ্রশ্নস্যোত্তরমাহ- চিকিত্সতীত্যাদি| অতীতবেদনাচিকিত্সা ন মুখ্যা, কিন্তু লোকপ্রসিদ্ধোপচারেণোচ্যত ইতি বাক্যার্থঃ| প্রসিদ্ধবচনৈরিতি লোকপ্রসিদ্ধবচনৈঃ| প্রতিকর্ম চিকিত্সা| আশ্রয ইতি শরীরে| পূর্বরূপমিত্যাদিনা অনাগতবেদনাচিকিত্সাং সমর্থযতি| পূর্বরূপং যদ্যপি ভবিষ্যতামেব ভবতি রোগাণাং, তথাঽপি ভবিষ্যতামিতি পদেন ভূতেঽপি ব্যাধৌ যানি রূপাণি ভবন্তি তানি নিরাকরোতি| উক্তং হি- “প্রাক্সন্তাপাত্, অপি চৈনং সন্তাপার্তমনুবধ্নন্তি” (নি. অ. ১) ইত্যনেন রোগাবস্থাযামপি পূর্বরূপসদ্ভাবঃ| এবমতীতানাগতবেদনাচিকিত্সা ব্যুত্পাদিতা| বর্তমানচিকিত্সামপি দর্শযন্ পারমার্থিকং মতমাহ- পারম্পর্যেত্যাদি| পারম্পর্যানুবন্ধঃ সন্তানন্যাযেনানুবন্ধঃ| দুঃখানামিতি রোগাণাম্| সুখহেতূপচারেণেতি আরোগ্যহেতুচিকিত্সাসেবযা| সুখমিতি আরোগ্যম্| এবং মন্যতে- যদা চিকিত্সা সুখহেতুঃ সেব্যতে তদা দুঃখহেতুসেবাভাবাদ্দুঃখং নোত্পদ্যতে, উত্পন্নং চ দুঃখং রোগরূপং ক্ষণভঙ্গিত্বেন স্বযমেব নশ্যতি, সুখহেতুসান্নিধ্যাত্ সুখমারোগ্যমুত্পদ্যতে; তেন চিকিত্সযা অনাগতং দুঃখং হেতুপ্রতিবন্ধান্নিরুধ্যতে, সুখং চ জন্যতে ইতি সিদ্ধান্তঃ | এতদেবাহ- ন সমা ইত্যাদি| সমাশ্চ বিষমাশ্চ ক্ষণভঙ্গিত্বস্বভাবান্ন বৈষম্যাবস্থাং সাম্যাবস্থাং বা যান্তীত্যর্থঃ| হেতুভিঃ সদৃশা ইতি সমহেতোঃ সমাঃ, তথা বিষমহেতোশ্চ বিষমাঃ| এতচ্চিকিত্সাপ্রাভৃতীযেঽধ্যাযে প্রপঞ্চিতমেব| চিকিত্সাপ্রস্তাবেন সকলদুঃখহারিণীং চিকিত্সাং মোক্ষফলামাহ- চিকিত্সা ত্বিত্যাদি| নিষ্ঠা অত্যন্তদুঃখমোক্ষো মোক্ষরূপঃ, তদর্থং ভূতা নৈষ্ঠিকী| বিনোপধামিতি তৃষ্ণাং বিনা, তৃষ্ণাশূন্যা প্রবৃত্তির্মোক্ষফলা ভবতীত্যর্থঃ||৮৬-৯৪||

Adhikarana 47 (95-97) · Śloka 97

উপধা হি পরো হেতুর্দুঃখদুঃখাশ্রযপ্রদঃ| ত্যাগঃ সর্বোপধানাং চ সর্বদুঃখব্যপোহকঃ||৯৫|| কোষকারো যথা হ্যংশূনুপাদত্তে বধপ্রদান্ | উপাদত্তে তথাঽর্থেভ্যস্তৃষ্ণামজ্ঞঃ সদাঽঽতুরঃ||৯৬|| যস্ত্বগ্নিকল্পানর্থাঞ্ জ্ঞো জ্ঞাত্বা তেভ্যো নিবর্ততে| অনারম্ভাদসংযোগাত্তং দুঃখং নোপতিষ্ঠতে||৯৭||

পরো হেতুরিতি মূলকারণম্| দুঃখরূপেণৈব দুঃখাশ্রযঃ শরীরম্| ভোগতৃষ্ণযা হি প্রবর্তমানো ধর্মাধর্মান্ দুঃখশরীরোত্পাদকানুপাদত্তে, সর্বোপধাত্যাগাত্তু ন রাগদ্বেষাভ্যাং ক্বচিত্ প্রবর্ততে, অপ্রবর্তমানশ্চ ন ধর্মাধর্মানুপাদত্তে, এবমনাগতধর্মাধর্মোপরমঃ, উপাত্তধর্মাধর্মযোস্তু রাগদ্বেষশূন্যস্যোপভোগাদেব ক্ষযঃ ; তেন সর্বথা কর্মক্ষযাদ্দুঃখশরীরাভাব ইতি ভাবঃ| অত্রৈব তৃষ্ণাযা দুঃখকারণত্বে দৃষ্টান্তমাহ- কোষকার ইত্যাদি| কোষকারঃ স্বনামপ্রসিদ্ধঃ কীটঃ| সদাঽঽতুর ইতি সদা সংসারদুঃখগৃহীতঃ| অনারম্ভাদিতি রাগদ্বেষপূর্বকারম্ভবিরহাত্| অসংযোগাদিতি আরম্ভশূন্যত্বেন ধর্মাধর্মোচ্ছেদকৃতাচ্ছরীরাসংযোগাত্; শরীরাভাবে চ নিরাশ্রযমকারণকং দুঃখং ন ভবতীতি ভাবঃ||৯৫-৯৭||

Adhikarana 48 (98) · Śloka 98

ধীধৃতিস্মৃতিবিভ্রংশঃ সম্প্রাপ্তিঃ কালকর্মণাম্| অসাত্ম্যার্থাগমশ্চেতি জ্ঞাতব্যা দুঃখহেতবঃ||৯৮||

‘কারণং বেদনানাং কিম্’ ইত্যস্যোত্তরমাহ- ধীধৃতীত্যাদি| অযং চার্থঃ প্রকরণাগতত্বাদুচ্যমানো ন পুনরুক্ততামাবহতি| ধীধৃতিস্মৃতযঃ প্রজ্ঞাভেদাঃ| এতে চ শিষ্যব্যুত্পত্ত্যর্থং প্রজ্ঞাভেদত্বেনান্যথা ব্যুত্পাদ্য ইহোচ্যন্তে| সম্প্রাপ্তিঃ কালকর্মণামিতি কালস্য সম্প্রাপ্তিস্তথা কর্মণশ্চ সম্প্রাপ্তিঃ| কর্মসম্প্রাপ্তিঃ পচ্যমানকর্মযোগঃ| কালসম্প্রাপ্তিগ্রহণেন চেহ যে কালব্যক্তাস্তে গৃহ্যন্তে, নাবশ্যং কালজন্যাঃ; যতঃ স্বাভাবিকানপি কালজন্যান্ তথা তৃতীযকাদীনপ্যাসাত্ম্যেন্দ্রিযার্থাদিজন্যান্ কালজত্বেনৈবেহাভিধাস্যতি| কর্মজাস্তু প্রজ্ঞাপরাধজন্যা এবেহ কর্মজন্যত্বেন বিশেষেণ শিষ্যব্যুত্পত্ত্যর্থং পৃথগুচ্যন্তে, কালব্যঞ্চ্যত্বেন চ কর্মজা ইহ কালসম্প্রাপ্তিজন্যেষ্ববরোদ্ধব্যাঃ| প্রজ্ঞাপরাধাবরোধশ্চ যথা কর্মজানাং, তথা প্রথমাধ্যায এবোক্তম্| কিঞ্চাচার্যেণোন্মাদনিদানে স্বযমেবোক্তং যত্- “প্রজ্ঞাপরাধাত্ সম্ভূতে ব্যাধৌ কর্মজ আত্মনঃ” (নি. ৭) ইত্যাদি, তথা জনপদোদ্ধ্বংসনীযে চ বিমানে পুনরুক্তং- “বায্বাদীনাং যদ্বৈগুণ্যমুত্পদ্যতে তস্য মূলমধর্মঃ, তন্মূলং বাঽসত্কর্ম পূর্বকৃতং, তযোর্যোনিঃ প্রজ্ঞাপরাধ এব” (বি. ৩) ইতি| তস্মাদিহ সম্প্রাপ্তিঃ কালকর্মণামিত্যনেন ন কালজন্যা গদা উচ্যন্তে, কিং তু কালব্যঞ্জ্যাঃ||৯৮||

Adhikarana 49 (99) · Śloka 99

বিষমাভিনিবেশো যো নিত্যানিত্যে হিতাহিতে| জ্ঞেযঃ স বুদ্ধিবিভ্রংশঃ সমং বুদ্ধির্হি পশ্যতি||৯৯||

ধীবিভ্রংশং বিবৃণোতি- বিষমেত্যাদি| বিষমাভিনিবেশঃ অযথাভূতত্বেনাধ্যবসানং নিত্যেঽনিত্যমিতি, এবং হিতেঽহিতমহিতে বা হিতমিতি যা বুদ্ধিঃ স বুদ্ধিভ্রংশঃ| অথ কথমযং বুদ্ধিবিভ্রংশশব্দেনোচ্যত ইত্যাহ- সমং বুদ্ধির্হি পশ্যতি; উচিতা বুদ্ধিঃ সমং যথাভূতং যস্মাত্ পশ্যতি, তস্মাদসমদর্শনং বুদ্ধিবিভ্রংশ উচিত এবেত্যর্থঃ||৯৯||

Adhikarana 50 (100) · Śloka 100

বিষযপ্রবণং সত্ত্বং ধৃতিভ্রংশান্ন শক্যতে| নিযন্তুমহিতাদর্থাদ্ধৃতির্হি নিযমাত্মিকা||১০০||

ধৃতিভ্রংশমাহ- বিষযেত্যাদি| বিষযপ্রবণং বিষযেষু প্রসজ্জত্| নিযন্তুমিতি ব্যাবর্তযিতুম্| ধৃতির্হি নিযমাত্মিকেতি যস্মাদ্ ধৃতিরকার্যপ্রসক্তং মনো নিবর্তযতি স্বরূপেণ, তস্মান্মনোনিযমং কর্তুমশক্তা ধৃতিঃ স্বকর্মভ্রষ্টা ভবতীত্যর্থঃ||১০০||

Adhikarana 51 (101) · Śloka 101

তত্ত্বজ্ঞানে স্মৃতির্যস্য রজোমোহাবৃতাত্মনঃ| ভ্রশ্যতে স স্মৃতিভ্রংশঃ স্মর্তব্যং হি স্মৃতৌ স্থিতম্||১০১||

স্মৃতিভ্রংশং বিবেচযতি- তত্ত্বেত্যাদি| তত্ত্বজ্ঞানে স্মৃতির্যস্য ভ্রশ্যত ইতি যোজনা| স্মর্তব্যং হি স্মৃতৌ স্থিতমিতি স্মর্তব্যত্বেন সম্মতস্যার্থস্য স্মরণং প্রশস্তস্মৃতিধর্মঃ| তত্র চ তত্ত্বজ্ঞানস্য শিষ্টানাং স্মর্তব্যত্বেন সম্মতস্য যদস্মরণং, তত্ স্মৃত্যপরাধাদ্ভবতীত্যর্থঃ||১০১||

Adhikarana 52 (102-108) · Śloka 108

ধীধৃতিস্মৃতিবিভ্রষ্টঃ কর্ম যত্ কুরুতেঽশুভম্| প্রজ্ঞাপরাধং তং বিদ্যাত্ সর্বদোষপ্রকোপণম্||১০২|| উদীরণং গতিমতামুদীর্ণানাং চ নিগ্রহঃ| সেবনং সাহসানাং চ নারীণাং চাতিসেবনম্||১০৩|| কর্মকালাতিপাতশ্চ মিথ্যারম্ভশ্চ কর্মণাম্| বিনযাচারলোপশ্চ পূজ্যানাং চাভিধর্ষণম্||১০৪|| জ্ঞাতানাং স্বযমর্থানামহিতানাং নিষেবণম্| পরমৌন্মাদিকানাং চ প্রত্যযানাং নিষেবণম্||১০৫|| অকালাদেশসঞ্চারৌ মৈত্রী সঙ্ক্লিষ্টকর্মভিঃ| ইন্দ্রিযোপক্রমোক্তস্য সদ্বৃত্তস্য চ বর্জনম্||১০৬|| ঈর্ষ্যামানভযক্রোধলোভমোহমদভ্রমাঃ| তজ্জং বা কর্ম যত্ ক্লিষ্টং ক্লিষ্টং যদ্দেহকর্ম চ||১০৭|| যচ্চান্যদীদৃশং কর্ম রজোমোহসমুত্থিতম্| প্রজ্ঞাপরাধং তং শিষ্টা ব্রুবতে ব্যাধিকারণম্ ||১০৮||

এবং বুদ্ধ্যাদিভ্রংশত্রযরূপপ্রজ্ঞাপরাধজন্যং কর্ম প্রজ্ঞাপরাধত্বেন দর্শযন্নাহ- ধীত্যাদি| সর্বদোষশব্দেন বাতাদযো রজস্তমসী চ গৃহ্যন্তে| কর্মকালাতিপাতঃ চিকিত্সাকালাতিবর্তনম্| মিথ্যারম্ভ ইতি অযোগাতিযোগমিথ্যাযোগরূপঃ| বিনযাচারলোপেনৈব প্রাপ্তমপি যত্ পুনঃ পূজ্যানামভিধর্ষণাদ্যভিধীযতে, তদ্বিশেষেণ প্রকোপকত্বখ্যাপনার্থমুদাহরণার্থং চ| সঙ্ক্লিষ্টকর্মভিরিতি পতিতৈঃ| ক্লিষ্টমিতি নিন্দিতম্||১০২-১০৮||

Adhikarana 53 (109) · Śloka 109

বুদ্ধ্যা বিষমবিজ্ঞানং বিষমং চ প্রবর্তনম্| প্রজ্ঞাপরাধং জানীযান্মনসো গোচরং হি তত্||১০৯||

সঙ্ক্ষেপেণ প্রজ্ঞাপরাধলক্ষণমাহ- বুদ্ধ্যেত্যাদি| বিষমমিতি অনুচিতং, বিষমবিজ্ঞানং স্বরূপত এব প্রজ্ঞাপরাধঃ| বিষমপ্রবর্তনং চ প্রজ্ঞাপরাধকার্যত্বেন প্রজ্ঞাপরাধশব্দেনোচ্যতে| মনসো গোচরং হি তদিতি তদ্বিষমপ্রবর্তনং বিষমজ্ঞানং চ মনঃকার্যপ্রজ্ঞাবিষযত্বেন মনসো গোচরমিত্যর্থঃ| বিষমপ্রবর্তনং চ মনোগোচরজন্যত্বেনোপচারাদুক্তং, বিসদৃশমনোবিষযজ্ঞানাদ্বিষমবাগ্দেহপ্রবৃত্তিরপি ভবতি||১০৯||

Adhikarana 54 (110-112) · Śloka 112

নির্দিষ্টা কালসম্প্রাপ্তির্ব্যাধীনাং ব্যাধিসঙ্গ্রহে| চযপ্রকোপপ্রশমাঃ পিত্তাদীনাং যথা পুরা||১১০|| মিথ্যাতিহীনলিঙ্গাশ্চ বর্ষান্তা রোগহেতবঃ| জীর্ণভুক্তপ্রজীর্ণান্নকালাকালস্থিতিশ্চ যা||১১১|| পূর্বমধ্যাপরাহ্ণাশ্চ রাত্র্যা যামাস্ত্রযশ্চ যে| এষু কালেষু নিযতা যে রোগাস্তে চ কালজাঃ||১১২||

ব্যাধীনাং কালসম্প্রাপ্তিমাহ- নির্দিষ্টেত্যাদি| ব্যাধিসঙ্গ্রহ ইতি কিযন্তঃশিরসীযে “চযপ্রকোপপ্রশমাঃ পিত্তাদীনাং যথাক্রমম্| ভবন্ত্যেকৈকশঃ ষট্সু কালেষ্বভ্রগমাদিষু” (সূ. ১৭) ইত্যনেন তথা হ্যুদাহরণেন চ| তেন, কালসম্প্রাপ্তির্ব্যাধীনাং যথা- চযপ্রকোপপ্রশমাঃ পিত্তাদীনাং পুরা নির্দিষ্টা ইতি যোজ্যম্| উদাহরণান্তরমাহ- মিথ্যেত্যাদি| জীর্ণেত্যাদৌ জীর্ণাদ্যবস্থাত্রযবিশিষ্টস্যান্নস্য কালঃ, তথাঽন্নস্যাকালোঽজীর্ণাদ্যবস্থালক্ষিতঃ| প্রজীর্ণং বিদগ্ধম্| রাত্রের্যামাস্ত্রযশ্চ য ইতি ত্রযো ভাগাঃ পূর্বরাত্রমধ্যরাত্রাপররাত্ররূপাঃ, ন তু যামঃ প্রহর ইতি জ্ঞেযম্| অন্যত্রাপি চ ভাগত্রযে যামবিভাগং কৃত্বা অভিধানশাস্ত্রে ত্রিযামা নিশাঽভিধীযতে| তেষু কালেষ্বিতি জীর্ণান্নকালাদিষু; জীর্ণে অপরাহ্ণে রাত্রিশেষে চ বাতিকা গদাঃ, ভুক্তমাত্রে পূর্বাহ্ণে পূর্বরাত্রে চ কফজা গদাঃ, প্রজীর্ণে মধ্যাহ্নে মধ্যরাত্রে চ পিত্তজা নিযতা রোগাঃ| অন্নাকালে চাজীর্ণলক্ষণে ভোজনাত্ ত্রযোঽপি দোষা ভবন্তীতি জ্ঞেযম্| কিংবা, ‘জীর্ণভুক্তপ্রজীর্ণান্নকালা’ ইতি চ্ছেদঃ, তেন জীর্ণাদ্যবস্থাযুক্তান্নকালাঃ পূর্ববদেব জ্ঞেযাঃ; তথা ‘কালস্থিতিশ্চ যা’ ইতি যোজনা; কালস্থিতিশব্দেন বাল্যাদিবযস্ত্রৈবিধ্যমুচ্যতে| তত্র বাল্যে শ্লৈষ্মিকাঃ, যৌবনে পৈত্তিকাঃ, বার্ধক্যে বাতিকা গদা বর্ধন্ত ইতি জ্ঞেযম্||১১০-১১২||

Adhikarana 55 (113) · Śloka 113

অন্যেদ্যুষ্কো দ্ব্যহগ্রাহী তৃতীযকচতুর্থকৌ| স্বে স্বে কালে প্রবর্তন্তে কালে হ্যেষাং বলাগমঃ||১১৩||

বিষমজ্বরানপি কালবিশেষপ্রবর্তমানমাত্রত্বেন কালজে দর্শযন্নাহ- অন্যেদ্যুষ্ক ইত্যাদি| দ্ব্যহগ্রাহী চতুর্থকবিপর্যযঃ| বক্ষ্যতি হি- “বিষমজ্বর এবান্যশ্চতুর্থকবিপর্যযঃ| মধ্যে অহনী জ্বরযত্যাদাবন্তে চ মুঞ্চতি” (চি. ৩) ইতি| কথং স্বকীয এব কালে প্রবর্ততন্ত ইত্যাহ- কালে হ্যেষাং বলাগম ইতি| উক্ত এব কালে যস্মাদ্ বলবন্তো ভবন্তি, তস্মাত্তত্রৈব সঞ্জাতবলাঃ সন্তো ব্যজ্যন্ত ইত্যর্থঃ||১১৩||

Adhikarana 56 (114) · Śloka 114

এতে চান্যে চ যে কেচিত্ কালজা বিবিধা গদাঃ| অনাগতে চিকিত্স্যাস্তে বলকালৌ বিজানতা||১১৪||

এতেষাং চিকিত্সাক্রমমাহ- এতে চেত্যাদি| অন্যে চেত্যনেনান্যানপি কালবিশেষপ্রাপ্তিপ্রাদুর্ভাবিনঃ| শোথকুষ্ঠাদীন্ সূচযতি||১১৪||

Adhikarana 57 (115) · Śloka 115

কালস্য পরিণামেন জরামৃত্যুনিমিত্তজাঃ| রোগাঃ স্বাভাবিকা দৃষ্টাঃ স্বভাবো নিষ্প্রতিক্রিযঃ||১১৫||

স্বাভাবিকানপি কালপরিণামব্যজ্যমানতযা ইহ কালজেঽবরোধযিতুমাহ- কালস্যেত্যাদি| জরামৃত্যুরূপান্নিমিত্তাজ্জাতা জরামৃত্যুনিমিত্তজাঃ, মৃত্যুশব্দেনেহ যুগানুরূপাযুঃপর্যবসানভবকালমৃত্যুর্গ্রাহ্যঃ ; কিংবা জরামৃত্য্বোর্যন্নিমিত্তং তস্মাজ্জাতা জরামৃত্যুনিমিত্তজাঃ, জরামৃত্যুনিমিত্তং চ প্রাণিনাং সাধারণদেহনিবর্তকভূতস্বভাবোঽদৃষ্টং চ| অথ স্বাভাবিকানাং কা চিকিত্সেত্যাহ- স্বভাব ইত্যাদি| নিষ্প্রতিক্রিয ইতি সাধারণচিকিত্সযা রসাযনবর্জ্যযা ন প্রতিক্রিযতে, রসাযনেন তু প্রতিক্রিযত এব; তেন, “অস্য প্রযোগাচ্চ্যবনঃ সুবৃদ্ধোঽভূত্ পুনর্যুবা” (চি. ১ পা. ১) ইত্যাদিরসাযনপ্রযোগেণ সমং ন বিরোধঃ; কিংবা, স্বাভাবিকা জরাদযো রসাযনজনিতপ্রকর্ষাদুত্তরকালং পুনরবশ্যং ভবন্তীতি নিষ্প্রতিক্রিযত্বেনোক্তাঃ||১১৫||

Adhikarana 58 (116) · Śloka 116

নির্দিষ্টং দৈবশব্দেন কর্ম যত্ পৌর্বদেহিকম্| হেতুস্তদপি কালেন রোগাণামুপলভ্যতে||১১৬||

সম্প্রতি কর্মসম্প্রাপ্তিকৃতমপি গদং কালবিশেষব্যজ্যমানতযা দর্শযন্নাহ- নির্দিষ্টমিত্যাদি| কালেনেতি পচ্যমানতালক্ষিতেন কালেন (যুক্তং সত্) কর্ম কারণং ভবতীত্যর্থঃ||১১৬||

Adhikarana 59 (117) · Śloka 117

ন হি কর্ম মহত্ কিঞ্চিত্ ফলং যস্য ন ভুজ্যতে| ক্রিযাঘ্নাঃ কর্মজা রোগাঃ প্রশমং যান্তি তত্ক্ষযাত্||১১৭||

কর্মণঃ ফলসম্বন্ধিনিযমমাহ- ন হীত্যাদি| মহদিতি বিশেষণেন কিঞ্চিদমহত্ কর্ম প্রাযশ্চিত্তবাধনীযফলং ন দদাত্যপি ফলমিতি দর্শযতি| কর্মজানামচিকিত্স্যত্বমাহ- ক্রিযাঘ্না ইত্যাদি| তত্ক্ষযাদিতি কর্মক্ষযাত্; কর্মক্ষযশ্চ কর্মফলোপভোগাদেব পরং ভবতি||১১৭||

Adhikarana 60 (118-126) · Śloka 127

অত্যুগ্রশব্দশ্রবণাচ্ছ্রবণাত্ সর্বশো ন চ| শব্দানাং চাতিহীনানাং ভবন্তি শ্রবণাজ্জডাঃ||১১৮|| পরুষোদ্ভীষণাশস্তাপ্রিযব্যসনসূচকৈঃ| শব্দৈঃ শ্রবণসংযোগো মিথ্যাসংযোগ উচ্যতে||১১৯|| অসংস্পর্শোঽতিসংস্পর্শো হীনসংস্পর্শ এব চ| স্পৃশ্যানাং সঙ্গ্রহেণোক্তঃ স্পর্শনেন্দ্রিযবাধকঃ||১২০|| যো ভূতবিষবাতানামকালেনাগতশ্চ যঃ| স্নেহশীতোষ্ণসংস্পর্শো মিথ্যাযোগ স উচ্যতে||১২১|| রূপাণাং ভাস্বতাং দৃষ্টির্বিনশ্যত্যতিদর্শনাত্| দর্শনাচ্চাতিসূক্ষ্মাণাং সর্বশশ্চাপ্যদর্শনাত্||১২২|| দ্বিষ্টভৈরববীভত্সদূরাতিশ্লিষ্টদর্শনাত্ | তামসানাং চ রূপাণাং মিথ্যাসংযোগ উচ্যতে||১২৩|| অত্যাদানমনাদানমোকসাত্ম্যাদিভিশ্চ যত্| রসানাং বিষমাদানমল্পাদানং চ দূষণম্||১২৪|| অতিমৃদ্বতিতীক্ষ্ণানাং গন্ধানামুপসেবনম্| অসেবনং সর্বশশ্চ ঘ্রাণেন্দ্রিযবিনাশনম্||১২৫|| পূতিভূতবিষদ্বিষ্টা গন্ধা যে চাপ্যনার্তবাঃ| তৈর্গন্ধৈর্ঘ্রাণসংযোগো মিথ্যাযোগঃ স উচ্যতে||১২৬|| ইত্যসাত্ম্যার্থসংযোগস্ত্রিবিধো দোষকোপনঃ|১২৭|

ক্রমাগতমসাত্ম্যেন্দ্রিযার্থসংযোগং বিবৃণোতি- অত্যুগ্রেত্যাদি| সর্বশো ন চেতি সর্বথোগ্রশব্দাশ্রবণাত্ | স্পৃশ্যানামিতি স্পৃশ্যত্বেনোক্তানাং শাস্ত্রেঽভ্যঙ্গোত্সাদনাদীনাম্| ভূতাঃ সবিষিক্রিমিপি শাচাদযঃ| যো ভূতবিষবাতাদীনাং সংস্পর্শঃ, তথাঽকালেনাগতঃ স্নেহশীতোষ্ণসংস্পর্শশ্চেতি যোজনা| তত্রাকালে স্নেহসংস্পর্শো যথা- অজীর্ণে কফবৃদ্ধিকালে অভ্যঙ্গস্পর্শঃ, এবং শীতে শীতস্পর্শঃ, উষ্ণে চোষ্ণস্পর্শোঽকালেনাগতো জ্ঞেযঃ| সর্বশশ্চাপ্যদর্শনাদিতি ভাস্বতাং সূক্ষ্মাণাং চ সর্বথাঽদর্শনাত্| অতিশ্লিষ্টমিতি নেত্রপ্রত্যাসন্নম্| তামসানাং চ রূপাণাং দর্শনাদ্বিনশ্যতি দৃষ্টিরিতি সম্বন্ধঃ| মিথ্যাযোগঃ স ইতি দ্বিষ্টভৈরবাদিদর্শনরূপঃ| অতিসূক্ষ্মদর্শনং চ মিথ্যাযোগ এব জ্ঞেযঃ| ওকসাত্ম্যাদিভিরিতি বিষমাদানমিতি সম্বন্ধঃ| ওকসাত্ম্যাদিবৈষম্যেণ চ রাশিদোষবর্জং প্রকৃত্যাদিসপ্তদোষা গ্রহীতব্যাঃ| ত্রিবিধ ইতি অযোগাতিযোগমিথ্যাযোগরূপঃ||১১৮-১২৬||

Adhikarana 61 (127) · Śloka 127

অসাত্ম্যমিতি তদ্বিদ্যাদ্যন্ন যাতি সহাত্মতাম্||১২৭||

অসাত্ম্যার্থং দর্শযতি- অসাত্ম্যমিত্যাদি| সহেতি মিলিতং শরীরেণ| আত্মতাম্ অবিকৃতরূপতাং ন যাতি; এতেন, যদুপযুক্তং প্রাকৃতরূপোপধাতকং ভবতি, তদসাত্ম্যমিতি||১২৭||

Adhikarana 62 (128) · Śloka 128

মিথ্যাতিহীনযোগেভ্যো যো ব্যাধিরুপজাযতে| শব্দাদীনাং স বিজ্ঞেযো ব্যাধিরৈন্দ্রিযকো বুধৈঃ||১২৮||

ইত্থমসাত্ম্যার্থজস্য ব্যাধেরিন্দ্রিযদ্বারভূতত্বেনৈন্দ্রিযকত্বং দর্শযন্নাহ- মিথ্যেত্যাদি| হীনযোগেনেহাযোগো গ্রাহ্যঃ| ঐন্দ্রিযক ইতি ইন্দ্রিযদ্বারভূতঃ||১২৮||

Adhikarana 63 (129) · Śloka 129

বেদনানামশান্তানামিত্যেতে হেতবঃ স্মৃতাঃ| সুখহেতুঃ সমস্ত্বেকঃ সমযোগঃ সুদুর্লভঃ||১২৯||

দুঃখরূপবেদনাহেতুং প্রপঞ্চোক্তমুপসংহরতি- বেদনানামিত্যাদি| অশান্তানামিতি দুঃখানাম্| অথ সুখরূপবেদনাহেতুঃ ক ইত্যাহ- সুখেত্যাদি| সমযোগ ইতি কালবুদ্ধীন্দ্রিযার্থানাং সম্যগ্যোগঃ| সুদুর্লভ ইতি কালাদিসম্যগ্যোগস্য অযোগাদিবিরহত্বেন সুদুর্লভত্বাত্| প্রাযো হি কালাদীনাং মধ্যে অন্যতরেণাপ্যযোগাদিনা পুরুষঃ সম্বধ্যতে; তেন চ নিত্যাতুরা এব পুরুষা ভবন্তি, অল্পং চ রোগমনাদৃত্য স্বস্থব্যপদেশঃ পুরুষাণাং ক্রিযত ইতি ভাবঃ||১২৯||

Adhikarana 64 (130-131) · Śloka 131

নেন্দ্রিযাণি ন চৈবার্থাঃ সুখদুঃখস্য হেতবঃ| হেতুস্তু সুখদুঃখস্য যোগো দৃষ্টশ্চতুর্বিধঃ||১৩০|| সন্তীন্দ্রিযাণি সন্ত্যর্থা যোগো ন চ ন চাস্তি রুক্| ন সুখং, কারণং তস্মাদ্যোগ এব চতুর্বধঃ||১৩১||

সম্প্রতি সম্যগ্যোগস্যোপাদেযতামযোগাদীনাং চ হেযতাং দর্শযিতুং যোগমেব চতুর্বিধং কারণত্বেন দর্শযন্নাহ- নেন্দ্রিযাণীত্যাদি| ননু কথমিন্দ্রিযার্থযোঃ সুখদুঃখকারণত্বেনোপলভ্যমানযোরপ্যকারণত্বমিত্যাহ- সন্তীত্যাদি| যোগো ন চেতি ইন্দ্রিযার্থযোঃ সম্বন্ধো ন চ| ন সুখমিতি চ্ছেদঃ| ইন্দ্রিযার্থযোর্যোগাভাবে অকারণত্বেন, সতি তু যোগে কারণত্বেন, যোগ এবান্বযব্যতিরেকাভ্যাং কারণমবধার্যত ইতি ভাবঃ| অযং চ যোগ ইন্দ্রিযার্থাবধিকৃত্য স্পষ্টত্বেনোক্তঃ; তেন, প্রজ্ঞাকালযোরপি বোদ্ধব্যঃ| এতচ্ছেন্দ্রিযমর্থং চানুপাদেযং কৃত্বা চতুর্বিধযোগস্য কারণত্বং যোগানামেব হেযোপাদেযত্বোপদর্শনার্থং কৃতম্||১৩০-১৩১||

Adhikarana 65 (132) · Śloka 132

নাত্মেন্দ্রিযং মনো বুদ্ধিং গোচরং কর্ম বা বিনা| সুখদুঃখং, যথা যচ্চ বোদ্ধব্যং তত্তথোচ্যতে||১৩২||

পরমার্থতস্ত্বাত্মেন্দ্রিযমনোবুদ্ধ্যর্থাদৃষ্টান্যেব তথাযুক্তানি সুখদুঃখকারণানীতি দর্শযন্নাহ- নাত্মেত্যাদি| গোচর ইন্দ্রিযার্থঃ| কর্ম অদৃষ্টম্| তত্র আত্মানং বিনা ন লোষ্টাদৌ সুখদুঃখে ভবতঃ| ইন্দ্রিযার্থাদীনাং চ সুখদুঃখকারণত্বং স্পষ্টমেব| কর্মাপি চ শুভং সুখকারণম্, অশুভং চ দুঃখকারণম্| যদ্যাত্মাদয এব কারণং, তর্হি কিমর্থং কালাদ্যযোগাতিযোগাদয ইহোচ্যন্ত ইত্যাহ- যথেত্যাদি| যদ্ বোদ্ধব্যং সুখদুঃখং যথা বোদ্ধব্যং কার্যবশাদ্ভবতি, তত্তথৈবোচ্যতে নান্যথা| তেন সাত্ম্যাসাত্ম্যেন্দ্রিযার্থজন্যত্বেন সুখদুঃখে ইহ প্রতীযমানে চিকিত্সাযামুপযুক্তে ভবতঃ, নাত্মাদিজন্যত্বেনেহ সুখদুঃখে অভিধীযেতে; ন হ্যাত্মাদযো দুঃখহেতুতযা প্রতিপন্না অপীহ হেযতযা প্রতিপাদ্যন্তে; কিন্ত্বসাত্ম্যেন্দ্রিযার্থযোগাদয এব দুঃখহেতবস্ত্যজ্যন্তে, সুখহেতবঃ সাত্ম্যেন্দিযার্থযোগাদযস্তূপাদীযন্ত ইতি ভাবঃ||১৩২||

Adhikarana 66 (133) · Śloka 133

স্পর্শনেন্দ্রিযসংস্পর্শঃ স্পর্শো মানস এব চ| দ্বিবিধঃ সুখদুঃখানাং বেদনানাং প্রবর্তকঃ||১৩৩||

ইদানীং সকলকারণব্যাপকং যোগং ব্যুত্পাদযিতুমৈন্দ্রিযকং মানসং চ স্পর্শং দর্শযিতুমাহ- স্পর্শনেত্যাদি| স্পর্শনেন্দ্রিযসংস্পর্শ ইত্যনেনেন্দ্রিযাণামর্থেন সম্বন্ধং স্পর্শনেন্দ্রিযকৃতং দর্শযতি; চক্ষুরাদীন্যপি স্পৃষ্টমেবার্থং জানন্তি; যদি হ্যস্পৃষ্টমেব চক্ষুঃ শ্রোত্রং ঘ্রাণং বা গৃহ্ণাতি, তদা বিদূরমপি গৃহ্ণীযাত্, ন চ গৃহ্ণাতি, তস্মাত্ স্পৃষ্ট্বৈবেন্দ্রিযাণ্যর্থং প্রতিপদ্যতে; মানসস্তু স্পর্শশ্চিন্ত্যাদিনাঽর্থেন সমং সূক্ষ্মোঽস্ত্যেব, যেন মনঃ কিশ্চিদেব চিন্তযতি, ন সর্বং; তেন যন্মনসা স্পৃশ্যতে তদেব মনো গৃহ্ণাতীতি স্থিতিঃ||১৩৩||

Adhikarana 67 (134-135) · Śloka 135

ইচ্ছাদ্বেষাত্মিকা তৃষ্ণা সুখদুঃখাত্ প্রবর্ততে| তৃষ্ণা চ সুখদুঃখানাং কারণং পুনরুচ্যতে||১৩৪|| উপাদত্তে হি সা ভাবান্ বেদনাশ্রযসঞ্জ্ঞকান্| স্পৃশ্যতে নানুপাদানে নাস্পৃষ্টো বেত্তি বেদনাঃ||১৩৫||

সুখদুঃখোত্পত্তিক্রমমাহ- ইচ্ছেত্যাদি| সুখাদিচ্ছারূপা তৃষ্ণা, দুঃখাচ্চ দ্বেষরূপা তৃষ্ণা প্রবর্ততে| ইযং চোত্পন্না তৃষ্ণা ঈপ্সিতেঽর্থে প্রবর্তযন্তী দ্বিষ্টে চ নিবর্তযন্তী প্রবৃত্তিনিবৃত্তিবিষযস্য সুখদুঃখহেতুতামপেক্ষ্য সুখদুঃখে জনযতীতি বাক্যার্থঃ| যথোক্তং তৃষ্ণাযাঃ সুখদুঃখহেতুত্বং দর্শযন্নাহ- উপাদত্তে হীত্যাদি| বেদনাশ্রযসঞ্জ্ঞকানিতি বেদনাকারণত্বেনোক্তান্ কালাদ্যযোগাদিরূপান্| অথ তৃষ্ণা চেত্ সুখদুঃখকারণং, তত্ কিমিন্দ্রিযার্থেনাপরেণ কারণেনেত্যাহ- স্পৃশ্যত ইত্যাদি| অনুপাদান ইতি অবিদ্যমানার্থরূপে স্পর্শকারণে অর্থং বিনা নার্থস্য স্পর্শো ভবতি| অথ ন ভবত্বর্থস্পর্শঃ, ততঃ কিমিত্যাহ- নাস্পৃষ্টো বেত্তি বেদনা ইতি; অর্থস্পর্শশূন্যঃ সন্ ন সুখদুঃখে অনুত্পন্নত্বাদেব বেত্তীত্যর্থঃ||১৩৪-১৩৫||

Adhikarana 68 (136) · Śloka 136

বেদনানামধিষ্ঠানং মনো দেহশ্চ সেন্দ্রিযঃ| কেশলোমনখাগ্রান্নমলদ্রবগুণৈর্বিনা||১৩৬||

‘বেদনানাং কিমধিষ্ঠানম্’ ইত্যস্যোত্তরমাহ- বেদনানামিত্যাদি| দেহঃ সেন্দ্রিয ইতি অনেন নিরিন্দ্রিযো দেহো কেশলেমাদিকো নিরস্তঃ| তদেব স্পষ্টার্থং বিবৃণোতি- কেশেত্যাদি| কিংবা, ইন্দ্রিযাণ্যপি প্রাধান্যখ্যাপনার্থং প্রথগ্ বেদনাশ্রযত্বেনেন্দ্রিযগ্রহণেনোচ্যন্তে| বেদনাযা দেহেন্দ্রিযগতত্বং তদাধারত্বেন প্রতীযমানত্বাজ্জ্ঞেযম্| দ্রবং মূত্রম্| গুণাঃ শব্দাদযঃ| শরীরগতা এতে হি কেশাদযো ন বেদনাধারা ইত্যনুভব এব প্রমাণম্| যা তু মূত্রপুরীষগতা বেদনা গ্রহণীমূত্রকৃচ্ছ্রাদৌ বক্তব্যা, সা মূত্রপুরীষাধারশরীরপ্রদেশস্যৈব বোধ্যা||১৩৬||

Adhikarana 69 (137) · Śloka 137

যোগে মোক্ষে চ সর্বাসাং বেদনানামবর্তনম্| মোক্ষে নিবৃত্তির্নিঃশেষা যোগো মোক্ষপ্রবর্তকঃ||১৩৭||

‘ক্ব চৈতা বেদনাঃ সর্বা’ ইত্যাদিপ্রশ্নস্যোত্তরং- যোগ ইত্যাদি| যোগঃ ‘অনারম্ভাত্’ ইত্যাদিগ্রন্থবক্ষ্যমাণঃ| মোক্ষ আত্যন্তিকশরীরাদ্যুচ্ছেদঃ| নিঃশেষেতি ন পুনর্ভবতি| এতেন, যোগে নিবৃত্তা বেদনা পুনর্ভবতীতি সূচযতি| মোক্ষপ্রবর্তক ইতি মোক্ষকারণম্| কিংবা, ‘যোগমোক্ষৌ নিবর্তকৌ’ ইতি পাঠঃ; তদা অস্মিন্ পক্ষে যদ্যপি যোগমোক্ষযোর্বেদনানিবর্তকত্বং ‘যোগে মোক্ষে চ’ ইত্যাদিনা শ্লোকার্ধেনোক্তং, তথাঽপি যোগমোক্ষযোরিহ কর্তৃতা বেদনানিবৃত্তিং প্রতি দৃশ্যত ইতি ন পৌনরুক্ত্যম্||১৩৭||

Adhikarana 70 (138-139) · Śloka 139

আত্মেন্দ্রিযমনোর্থানাং সন্নিকর্ষাত্ প্রবর্ততে| সুখদুঃখমনারম্ভাদাত্মস্থে মনসি স্থিরে||১৩৮|| নিবর্ততে তদুভযং বশিত্বং চোপজাযতে| সশরীরস্য যোগজ্ঞাস্তং যোগমৃষযো বিদুঃ||১৩৯||

যথা যোগো বেদনানিবর্তকো ভবতি, যশ্চ যোগস্তমাহ- আত্মেত্যাদি| অনারম্ভাদিতি বিষযোপাদানার্থং মনসাঽনারম্ভাত্ | আত্মস্থে মনসীতি বিষযে নিবৃতে কেবলাত্মজ্ঞানস্থে| স্থিরে ইতি অচলে, আত্মজ্ঞানপ্রসক্ত এবেতি যাবত্| তদুভযমিতি সুখদুঃখে| যোগে যোগধর্মান্তরপ্রাপ্তিমাহ- বশিত্বমিত্যাদি| বশিত্বং বক্ষ্যমাণমষ্টবিধমৈশ্বর্যবলম্| সশরীরস্যেতিপদেন শরীরেণ সহৈব বশিত্বং ভবতীতি দর্শযতি||১৩৮-১৩৯||

Adhikarana 71 (140-141) · Śloka 141

আবেশশ্চেতসো জ্ঞানমর্থানাং ছন্দতঃ ক্রিযা| দৃষ্টিঃ শ্রোত্রং স্মৃতিঃ কান্তিরিষ্টতশ্চাপ্যদর্শনম্||১৪০|| ইত্যষ্টবিধমাখ্যাতং যোগিনাং বলমৈশ্বরম্| শুদ্ধসত্ত্বসমাধানাত্তত্ সর্বমুপজাযতে||১৪১||

আবেশ ইত্যাদি| আবেশঃ পরপুরপ্রবেশঃ| চেতসো জ্ঞানমিতি পরচিত্তজ্ঞানম্| অর্থানাং ছন্দতঃ ক্রিযেতি অর্থানামিচ্ছাতঃ করণম্| দৃষ্টিঃ অতীন্দ্রিযদর্শনম্| শ্রোত্রম্ অতীন্দ্রিযশ্রবণম্| স্মৃতিঃ সর্বভাবতত্ত্বস্মরণম্| কান্তিঃ অমানুষী কান্তিঃ| ইষ্টতশ্চাপ্যদর্শনমিতি যদেচ্ছতি তদা দর্শনযোগ্য এব ন দৃশ্যতে, যদা চেচ্ছতি তদা দৃশ্যতে| কিংবা, আবেশশ্চেতস ইতি পরচেতসঃ প্রবেশঃ, জ্ঞানমিতি সর্বমতীতানাগতাদিজ্ঞানং, শেষং পূর্ববত্| ঐশ্বরমিতি যোগপ্রভাবাদুপপন্নৈশ্বর্যকৃতম্| শুদ্ধসত্ত্বসমাধানাদিতি নীরজস্তমস্কস্য মনস আত্মনি সম্যগাধানাত্||১৪০-১৪১||

Adhikarana 72 (142) · Śloka 142

মোক্ষো রজস্তমোঽভাবাত্ বলবত্কর্মসঙ্ক্ষযাত্| বিযোগঃ সর্বসংযোগৈরপুনর্ভব উচ্যতে||১৪২||

অথ কথং মোক্ষো ভবতি, কশ্চেত্যাহ- মোক্ষ ইত্যাদি| বলবত্কর্মসঙ্ক্ষযাদিতি অবশ্যভোক্তব্যফলস্য কর্মণঃ ক্ষযাত্| সর্বসংযোগৈরিতি সর্বৈরাত্মসম্বন্ধিভিঃ শরীরবুদ্ধ্যহঙ্কারাদিভিঃ| ন পুনঃ শরীরাদিসম্বন্ধো ভবতীত্যপুনর্ভবঃ ||১৪২||

Adhikarana 73 (143-146) · Śloka 146

সতামুপাসনং সম্যগসতাং পরিবর্জনম্| ব্রতচর্যোপবাসৌ চ নিযমাশ্চ পৃথগ্বিধাঃ||১৪৩|| ধারণং ধর্মশাস্ত্রাণাং বিজ্ঞানং বিজনে রতিঃ| বিষযেষ্বরতির্মোক্ষে ব্যবসাযঃ পরা ধৃতিঃ||১৪৪|| কর্মণামসমারম্ভঃ কৃতানাং চ পরিক্ষযঃ| নৈষ্ক্রম্যমনহঙ্কারঃ সংযোগে ভযদর্শনম্||১৪৫|| মনোবুদ্ধিসমাধানমর্থতত্ত্বপরীক্ষণম্| তত্ত্বস্মৃতেরুপস্থানাত্ সর্বমেতত্ প্রবর্ততে||১৪৬||

প্রস্তাবান্মোক্ষোপাযমাহ- সতামিত্যাদি| পরা ধৃতিরিতি অতিশযিতং মনোনিযমনম্| কর্মণামসমারম্ভ ইতি অনাগতধর্মাধর্মসাধনানামকরণম্| কৃতানাং চ পরিক্ষয ইতি জন্মান্তরৈঃ কৃতানাং কর্মণাং ফলোপভোগাত্ পরিক্ষযঃ| নৈষ্কম্যং সংসারনিষ্ক্রমণেচ্ছা| অনহঙ্কার ইতি মমেদম্, অহং ‘করোমি’ ইত্যাদিবুদ্ধিবর্জনম্| সংযোগ ইতি আত্মশরীরাদিসংযোগে| মনোবুদ্ধিসমাধানমিতি মনোবুদ্ধ্যোরাত্মনি সমাধানম্| সর্বমেতদিতি ‘কর্মণামসমারম্ভঃ’ ইত্যাদ্যুক্তম্ | তত্ত্বস্মৃতিঃ আত্মাদীনাং যথাভূতানুস্মরণং ; সা চ নাত্মা শরীরাদ্যুপকার্যঃ, শরীরাদযশ্চামী আত্মব্যতিরিক্তাঃ, ইত্যাদিস্মরণরূপস্মৃতিঃ||১৪৩-১৪৬||

Adhikarana 74 (147) · Śloka 147

স্মৃতিঃ সত্সেবনাদ্যৈশ্চ ধৃত্যন্তৈরুপজাযতে| স্মৃত্বা স্বভাবং ভাবানাং স্মরন্ দুঃখাত্ প্রমুচ্যতে||১৪৭||

অথ স্মৃতিঃ কথং দুঃখপ্রমোষে কারণমিত্যাহ- স্মৃত্বেত্যাদি| স্বভাবমিতি প্রত্যাত্মনিযতরূপম্| গুরুবচনাদ্ধি প্রথমপ্রতিপন্নমাত্মাদীনাং রূপং পরস্পরভিন্নং পরস্পরানুপকারকত্বেন ব্যবস্থিতং স্মরন্ ন ক্বচিদপি প্রবর্ততে, অপ্রবর্তমানশ্চ ন দুঃখেন প্রবৃত্তিজন্যেন যুজ্যত ইত্যর্থঃ||১৪৭||

Adhikarana 75 (148-149) · Śloka 149

বক্ষ্যন্তে কারণান্যষ্টৌ স্মৃতির্যৈরুপজাযতে| নিমিত্তরূপগ্রহণাত্ সাদৃশ্যাত্ সবিপর্যযাত্||১৪৮|| সত্ত্বানুবন্ধাদভ্যাসাজ্জ্ঞানযোগাত্ পুনঃ শ্রুতাত্| দৃষ্টশ্রুতানুভূতানাং স্মারণাত্ স্মৃতিরুচ্যতে||১৪৯||

ইদানীং স্মৃতিপ্রস্তাবাত্ স্মৃতিকারণান্যাহ- বক্ষ্যন্ত ইত্যাদি| নিমিত্তগ্রহণং কারণজ্ঞানং, কারণং হি দৃষ্ট্বা কার্যং স্মরতি| রূপগ্রহণম্ আকারগ্রহণম্ | যথা- বনে গবযং দৃষ্ট্বা গাং স্মরতি| সাদৃশ্যাদ্ যথা- পিতুঃ সদৃশং পুরুষং দৃষ্ট্বা পিতরং স্মরতি| সবিপর্যযাদিতি অত্যর্থবৈসাদৃশ্যাদপি স্মরণং ভবতি; যথা- অত্যর্থকুরূপং দৃষ্ট্বা প্রতিযোগিনমত্যর্থসুরূপং স্মরতি| সত্ত্বানুবন্ধাদিতি মনসঃ প্রণিধানাত্, স্মর্তব্যস্মরণায প্রণিহিতমনাঃ স্মর্তব্যং স্মরতি| অভ্যাসাদিতি অভ্যস্তমর্থমভ্যাসবলাদেব স্মরতি| জ্ঞানযোগাদিতি তত্ত্বজ্ঞানযোগাত্; উপজাততত্ত্বজ্ঞানো হি তদ্বলাদেব সর্বং স্মরতি| পুনঃ শ্রুতাদিতি শ্রুতোঽপ্যর্থো বিস্মৃতঃ পুনরেকদেশং শ্রুত্বা স্মর্যতে| স্মৃতিকারণমভিধায স্মৃতিরূপমাহ- দৃষ্টেত্যাদি|- দৃষ্টং প্রত্যক্ষোপলক্ষণং, শ্রুতং ত্বাগমপ্রতীতং , তেন সর্বপূর্বানুভূতাবরোধঃ| ক্বচিত্, ‘স্মরণং স্মৃতিরুচ্যতে’ ইতি পাঠঃ, তত্রাপি নার্থভেদঃ||১৪৮-১৪৯||

Adhikarana 76 (150-151) · Śloka 151

এতত্তদেকমযনং মুক্তৈর্মোক্ষস্য দর্শিতম্| তত্ত্বস্মৃতিবলং, যেন গতা ন পুনরাগতাঃ||১৫০|| অযনং পুনরাখ্যাতমেতদ্যোগস্য যোগিভিঃ| সঙ্খ্যাতধর্মৈঃ সাঙ্খ্যৈশ্চ মুক্তৈর্মোক্ষস্য চাযনম্||১৫১||

এবং স্মৃতিং সামান্যেন প্রতিপাদ্য তত্ত্বস্মৃতের্মোক্ষসাধকত্বং দর্শযন্নাহ- এতদিত্যাদি| একমযনমিতি শ্রেষ্ঠঃ পন্থাঃ| মুক্তৈরিতি জীবন্মুক্তৈরিতি জ্ঞেযং, সর্বথামুক্তানাং শরীরাভাবেনোপদর্শকত্বাভাবাত্| তত্ত্বস্মৃতিবলমিতি তত্ত্বস্মৃতিরূপং বলং; কিংবা, তত্ত্বস্মৃতির্বলং যত্র মোক্ষসাধনমার্গে তত্তত্ত্বস্মৃতিবলম্| যেনেতি যেন যথা| গতা ইতি মোক্ষং গতাঃ ন পুনরাগতা ইতি মুক্তিং যাতা ন পুনরাগচ্ছন্তি||১৫০-১৫১||

Adhikarana 77 (152-153) · Śloka 153

সর্বং কারণবদ্দুঃখমস্বং চানিত্যমেব চ| ন চাত্মকৃতকং তদ্ধি তত্র চোত্পদ্যতে স্বতা||১৫২|| যাবন্নোত্পদ্যতে সত্যা বুদ্ধির্নৈতদহং যযা| নৈতন্মমেতি বিজ্ঞায জ্ঞঃ সর্বমতিবর্ততে||১৫৩||

ইদানীং সঙ্ক্ষেপেণ সংসারহেতুমজ্ঞানং, তথা মোক্ষহেতুং চ সম্যগজ্ঞানং দর্শযন্নাহ - সর্বমিত্যাদি| সর্বং কারণবদিতি সর্বমুত্পদ্যমানং বুদ্ধ্যহঙ্কারশরীরাদি| দুঃখমিতি দুঃখহেতুরেব| অস্বমিতি সর্বং কারণবদেবাত্মব্যতিরিক্তং পরমার্থতঃ| ন চাত্মকৃতকমিতি ন চাত্মনোদাসীনেন কৃতম্| তত্রেতি কারণবতি বুদ্ধিশরীরাদৌ| স্বতেতি মমতা ‘মমেযং বুদ্ধিঃ’ ইত্যাদিরূপা| অথ কিযন্তং কালমিযং ভ্রান্ত্যা যুতোত্পদ্যতে ইত্যাহ- যাবদিত্যাদি| সত্যা বুদ্ধিঃ সম্যগজ্ঞানম্| যযা সত্যযা বুদ্ধ্যা| নৈতদ্ বুদ্ধ্যাদ্যহং, কিন্তু ভিন্ন এবাহং; তথা নৈতদ্ বুদ্ধ্যাদি মম, কিন্তু প্রকৃতেঃ প্রপঞ্চ ইতি বিজ্ঞায| জ্ঞঃ তত্ত্বসাক্ষাত্কারবান্| সর্বমতিবর্তত ইতি সর্বং বুদ্ধ্যাদি ত্যজতি||১৫২-১৫৩||

Adhikarana 78 (154) · Śloka 154

তস্মিংশ্চরমসন্ন্যাসে সমূলাঃ সর্ববেদনাঃ| সসঞ্জ্ঞাজ্ঞানবিজ্ঞানা নিবৃত্তিং যান্ত্যশেষতঃ||১৫৪||

চরমসন্ন্যাস ইতি পশ্চাদ্ভাবিসকলকর্মসন্ন্যাসে| প্রথমং হি মোক্ষোপযোগিত্বেন গুরুবচনাত্ ক্রিযাসন্ন্যাসঃ কৃত এব, পরং খানুভববিরক্তেন ন কৃতঃ; অভ্যাসাদুদ্ভূতেন জ্ঞানেন সাক্ষাদ্দৃষ্টভাবস্বভাবেন যঃ সর্বসন্ন্যাসঃ ক্রিযতে, তত্র সমূলাঃ সর্ববেদনা জ্ঞানাদযশ্চ শরীরোপরমাদেবোপরমন্তে| সমূলা ইতি সকারণাঃ, কারণং চ বুদ্ধ্যাদযঃ| সঞ্জ্ঞা আলোচনং নির্বিকল্পকং, জ্ঞানং সবিকল্পকং, বিজ্ঞানং বুদ্ধ্যবসাযঃ; কিংবা, সঞ্জ্ঞা নামোল্লেখেন জ্ঞানং, বিজ্ঞানং শাস্ত্রজ্ঞানম্| তত্ত্বজ্ঞানমপি হি মোক্ষং জনযিত্বা নিবর্তত এব, কারণাভাবাত্||১৫৪||

Adhikarana 79 (155) · Śloka 155

অতঃ পরং ব্রহ্মভূতো ভূতাত্মা নোপলভ্যতে| নিঃসৃতঃ সর্বভাবেভ্যশ্চিহ্নং যস্য ন বিদ্যতে| জ্ঞানং ব্রহ্মবিদাং চাত্র নাজ্ঞস্তজ্জ্ঞাতুমর্হতি||১৫৫||

‘সর্ববিদ্’ ইত্যাদিপ্রশ্নস্যোত্তরম্- অতঃ পরমিত্যাদি| ব্রহ্মভূত ইতি প্রকৃত্যাদিরহিতঃ| চিহ্নং যস্য ন বিদ্যতে ইত্যনেন মুক্তাত্মনঃ প্রাণাপানাদ্যাত্মলিঙ্গাভাবাদ্গমকং চিহ্নং নাস্ত্যেবেতি দর্শদ্যতি| ন ক্ষরতি অন্যথাত্বং ন গচ্ছতীত্যক্ষরম্| অবিদ্যমানং লক্ষণং যস্যেতি অলক্ষণম্| এতস্যৈব মোক্ষস্যেতরপুরুষাজ্ঞেযতাং দর্শযতি- জ্ঞানমিত্যাদি| ব্রহ্মবিদামেবাত্র মনঃ প্রত্যেতি, নাজ্ঞানামহঙ্কারাদিবাসনাগৃহীতানামিত্যর্থঃ||১৫৫||

Adhikarana 80 (156) · Śloka 156

তত্র শ্লোকঃ- প্রশ্নাঃ পুরুষমাশ্রিত্য ত্রযোবিংশতিরুত্তমাঃ| কতিধাপুরুষীযেঽস্মিন্নির্ণীতাস্তত্ত্বদর্শিনা||১৫৬||

সঙ্গ্রহো ব্যক্তঃ||১৫৬||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে শারীরস্থানে কতিধাপুরুষীযং শারীরং নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং শারীরস্থানে কতিধাপুরুষীযং শারীরং নাম প্রথমোঽধ্যাযঃ||১||