3. khuḍḍikāgarbhāvakrāntiśārīram

Adhikarana 1 (1-2) · Śloka 2

অথাতঃ খুড্ডিকাং গর্ভাবক্রান্তিং শারীরং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পূর্বাধ্যাযে শুক্রশোণিতে গর্ভকারণত্বেনোক্তে, নতু কৃত্স্নং গর্ভকারণমুক্তম্, অতঃ সম্পূর্ণগর্ভকারণাভিধানার্থং খুড্ডিকাগর্ভাবক্রান্তিরুচ্যতে| খুড্ডিকামিতি অল্পাম্| গর্ভস্যাবক্রান্তিঃ মেলকঃ, উত্পত্তিরিতি যাবত্||১-২||

Adhikarana 2 (3) · Śloka 3

পুরুষস্যানুপহতরেতসঃ স্ত্রিযাশ্চাপ্রদুষ্টযোনিশোণিতগর্ভাশযাযা যদা ভবতি সংসর্গঃ ঋতুকালে, যদা চানযোস্তথাযুক্তে সংসর্গে শুক্রশোণিতসংসর্গমন্তর্গর্ভাশযগতং জীবোঽবক্রামতি সত্ত্বসম্প্রযোগাত্তদা গর্ভোঽভিনির্বতেতে, স সাত্ম্যরসোপযোগাদরোগোঽভিবর্ধতে সম্যগুপচারৈশ্চোপচর্যমাণঃ, ততঃ প্রাপ্তকালঃ সর্বেন্দ্রিযোপপন্নঃ পরিপূর্ণশরীরো বলবর্ণসত্ত্বসংহননসম্পদুপেতঃ সুখেন জাযতে সমুদযাদেষাং ভাবানাং- মাতৃজশ্চাযং গর্ভঃ পিতৃজশ্চাত্মজশ্চ সাত্ম্যজশ্চ রসজশ্চ, অস্তি চ খলু সত্ত্বমৌপপাদুকমিতি হোবাচ ভগবানাত্রেযঃ||৩||

পুরুষস্যেত্যাদি| অনুপহতরেতস ইতি পদেনৈব পুরুষস্যেতি লভ্যতে, যতঃ পুরুষস্যৈব রেতসো গর্ভজনকত্বমুক্তং; তেন পুরুষস্যেতি পদেন য এব সম্পূর্ণধাতুঃ পুরুষশব্দবাচ্যো বালব্যতিরিক্তস্তং গ্রাহযতি| স্ত্রিযাশ্চেতি পদমর্থলব্ধং সদ্ যৌবনবতীং স্ত্রিযং লম্ভযতি| সংসর্গঃ মৈথুনম্| ঋতৌ পুষ্পদর্শনে প্রশস্তঃ কালঃ ঋতুকালঃ; তেন ঋতুকালস্যাদিত্র্যহং নিষেধযতি| যতঃ “রজস্বলাভিগমনমলক্ষ্মীমুখানাং” (সূ. ২৫) ইত্যাদিনা ঋতৌ ত্র্যহং নিষিদ্ধম্| আর্তবদর্শনং চ শরদাদ্যৃতুসাধর্ম্যাদ্ ঋতুশব্দেনোচ্যতে| যথা ঋতাবুপ্তানি বীজানি প্ররোহন্তি, তথা আর্তবদর্শনাখ্যেঽপি ঋতৌ শুক্ররূপং বীজমুপ্তমিতি ঋতুসাধর্ম্যম্| ন কেবলমেবম্ভূতঃ সংসর্গ এব গর্ভকারণং, কিং তু জীবাধিষ্ঠানে সতীত্যাহ- যদেত্যাদি| তথাযুক্ত ইতি অদুষ্টরেতসঃ পুরুষস্য অদুষ্টযোন্যাদেশ্চ স্ত্রিযাঃ সংসর্গে| অযং চার্থঃ পুরুষস্যেত্যাদিনৈব লব্ধোঽপি পুনঃ শুক্রশোণিতসংসর্গমিত্যাদিগ্রন্থবক্ষ্যমাণাধিকধর্মবিধ্যর্থমনূদ্যতে, তেন ন পৌনরুক্ত্যম্| কিংবা, পুরুষস্যেত্যাদিনা পূর্বং মৈথুনাত্ প্রাগনুপহতরেতস্ত্বাদ্যুক্তং, তথাযুক্তে চেত্যনেন তু মৈথুনসমযেঽপি শুক্রযোন্যাদীনামদুষ্টিরুচ্যতে| মৈথুনকালে হি ঈর্ষ্যাদিনা শুক্রদুষ্টিঃ সম্ভাব্যতে| শুক্রশোণিতসংসর্গমিতি শুক্রশোণিতমেলকম্| অন্তরিত্যনেন গর্ভাশযবাহ্যগতং সংসর্গমকারণং গর্ভস্য নিষেধযতি| জীবশব্দেন চেতনাধাতুরাত্মা| নন্বাত্মা ব্যাপকঃ, তত্ কথমযমবক্রামতীত্যাহ- সত্ত্বেত্যাদি| সত্ত্বসম্প্রযোগাদিতি মনোগমনাদিত্যর্থঃ| তদ্ যথোক্তং- “যুক্তস্য মনসা তস্য নির্দিশ্যন্তে বিভোঃ ক্রিযাঃ” (শা.অ.১) ইতি| যদ্যপ্যাত্মা বিভুত্বাত্ সর্বগতত্বেন ন ক্বচিদপি যাতি, তথাঽপি যত্রাস্য কর্মবশান্মনো যাতি, তত্রৈব চৈতন্যোপলব্ধেরাত্মাঽপি গত ইতি ব্যপদিশ্যত ইতি ভাবঃ| অথৈবমুত্পন্নো গর্ভঃ কথমভিবর্ধতে, কথং বা জাযত ইত্যাহ- সম্যগুপচারৈরিতি; গর্ভহিতকরৈরাহারবিহারৈরিত্যর্থঃ| প্রাপ্তকাল ইতি প্রাপ্তপ্রসবকালঃ, প্রসবকালো নবমদশমমাসৌ| পরিপূর্ণশরীর ইতি সর্বাঙ্গোপচিতদেহঃ| সম্পচ্ছব্দো বলাদিভিঃ প্রত্যেকমভিসম্বধ্যতে| সমুদযাদিতি সম্যঙ্মেলকাত্| এষামিত্যনেন পুরুষস্যেত্যাদিগ্রন্থোক্তান্ রেত-আর্তব-জীব-সত্ত্ব-সাত্ম্য-রস-সম্যগুপচারান্ প্রত্যবমৃশতি| এতদেব সমুদাযপ্রভবত্বং গর্ভস্য প্রত্যেকং মাত্রাদিগর্ভকারণব্যুত্পাদনেন দর্শযন্নাহ- মাতৃজশ্চেত্যাদি| সাত্ম্যজশ্চেত্যত্র সাত্ম্যশব্দেন রসব্যতিরিক্তরূপাদি, তথা আচারশ্চ সাত্ম্যো গ্রাহ্যঃ| সাত্ম্যরসস্তু ‘রসজ’ ইত্যনেনৈব গৃহীতঃ| ঔপপাদুকমিতি আত্মনঃ শরীরান্তরসম্বন্ধোপপাদকম্| এতচ্চ ব্যাকৃতমেব পূর্বম্| অত্র যদ্যপি পুরুষস্যানুপহতরেতস ইত্যনেন পিতৈব প্রথমমুক্তঃ, তথাঽপি মাতৃপ্রধানতাং গর্ভস্য দর্শযিতুং মাতৃজশ্চাযমিতি প্রথমং কৃতং; মাতা চ গর্ভে প্রধানং কারণং, যেন আসেকাত্ প্রভৃতি প্রসবপর্যন্তং মাতুরেব গুণদোষাবনুবিদধাতি গর্ভঃ; প্রথমং তু পুরুষস্য মৈথুনে স্বাতন্ত্র্যাত্ তথা শরীরধারকপ্রধানাস্থিকারণত্বাচ্চাগ্রেঽভিধানং কৃতম্||৩||

Adhikarana 3 (4 (1)) · Śloka 4

নেতি ভরদ্বাজঃ, কিং কারণং- ন হি মাতা ন পিতা নাত্মা ন সাত্ম্যং ন পানাশনভক্ষ্যলেহ্যোপযোগা গর্ভং জনযন্তি, ন চ পরলোকাদেত্য গর্ভং সত্ত্বমবক্রামতি (১)|৪|

পূর্বপক্ষোদ্ধারেণ সিদ্ধান্তং গ্রাহযিতুং মাত্রাদিগর্ভকারণানি ভরদ্বাজমুখেনাক্ষিপতি- নেত্যাদি| নেতীত্যনেন সামান্যেনাত্রেযবচনস্যোক্তস্যাক্ষেপঃ| কিং কারণমিত্যনেন কস্মাদাত্রেযবচনমেতদ্বিরুদ্ধমিত্যত্র কারণং পৃচ্ছতো নহি মাতেত্যাদিনোক্তমাত্রাদিকারণানামকারণত্বং ভরদ্বাজঃ প্রতিজানীতে||৪ (১)||

Adhikarana 4 (4 (2)) · Śloka 4

যদি হি মাতাপিতরৌ গর্ভং জনযেতাং, ভূযস্যঃ স্ত্রিযঃ পুমাংসশ্চ ভূযাংসঃ পুত্রকামাঃ, তে সর্বে পুত্রজন্মাভিসন্ধায মৈথুনধর্মমাপদ্যমানাঃ পুত্রানেব জনযেযুর্দুহিতৄর্বা দুহিতৃকামাঃ, ন তু কাশ্চিত্ স্ত্রিযঃ কেচিদ্বা পুরুষা নিরপত্যাঃ স্যুরপত্যকামা বা পরিদেবেরন্ (২)|৪|

যদি হীত্যাদিনা মাত্রাদীনামকারণত্বে হেতুং ব্রূতে| কিংবা, মাত্রাদীনামকারণত্বং ভরদ্বাজেন প্রতিজ্ঞাতং তত্র ‘কিং কারণমিতি’ হেতুপ্রশ্নঃ, ততঃ ‘নহি মাতা’ ইত্যাদিনা হেতুকথনম্| অস্য চাযমর্থঃ- যত্- ন মাত্রাদযো গর্ভকারণত্বেন প্রত্যক্ষেণ দৃশ্যন্তে, ততো ন মাত্রাদযো গর্ভকারণম্| যদি হীত্যাদিনা তূপপত্তিবিরোধোঽপি মাত্রাদিকারণত্বেঽস্তীতি দর্শযতি; তেন ন পৌনরুক্ত্যম্| মৈথুনধর্মঃ ব্যবাযঃ| পুত্রকামাঃ পুত্রানেব জনযেযুঃ, দুহিতৃকামা দুহিতৄর্বা জনযেযুরিতি যোজনা| নতু কাশ্চিত্ স্ত্রিয ইত্যত্র মৈথুনমাপদ্যমানা এব স্ত্রিযঃ পুরুষাশ্চ পরিদেবেরন্ ন চেতি যোজনা | মাতাপিত্রধীনত্বেন গর্ভস্য যদৈবেচ্ছন্ত্যপত্যং, তদৈব মৈথুনমাপদ্যমানাঃ সাপত্যাঃ স্যুঃ; ততশ্চ সর্বাপত্যত্বেন ন কেচিত্ পরিদেবেরন্নিত্যর্থঃ||৪ (২)||

Adhikarana 5 (4 (3)) · Śloka 4

ন চাত্মাঽঽত্মানং জনযতি| যদি হ্যাত্মাঽঽত্মানং জনযেজ্জাতো বা জনযেদাত্মানমজাতো বা, তচ্চোভযথাঽপ্যযুক্তম্| ন হি জাতো জনযতি সত্ত্বাত্, ন চাজাতো জনযত্যসত্ত্বাত্, তস্মাদুভযথাঽপ্যনুপপত্তিঃ| তিষ্ঠতু তাবদেতত্| যদ্যযমাত্মাঽঽত্মানং শক্তো জনযিতুং স্যাত্, ন ত্বেনমিষ্টাস্বেব কথং যোনিষু জনযেদ্বশিনমপ্রতিহতগতিং কামরূপিণং তেজোবলজববর্ণসত্ত্বসংহননসমুদিতমজরমরুজমমরম্; এবংবিধং হ্যাত্মাঽঽত্মানমিচ্ছত্যতো বা ভূযঃ (৩)|৪|

আত্মজত্বং গর্ভস্য নিষেধযতি- ন চাত্মেত্যাদি| মনুষ্যকরিতুরগাদিরূপেণ আত্মানং জনযতীত্যর্থঃ| সত্ত্বাদিতি জন্যস্যাত্মনো বিদ্যমানত্বাত্, ন চ বিদ্যমানো জন্যত ইত্যর্থঃ| অসত্ত্বাদিতি কারণভূতস্যাত্মনোঽজাতপক্ষেঽসত্ত্বান্ন কারণত্বমুপপন্নমিত্যর্থঃ| অত্রৈব দূষাণান্তরমাহ- তিষ্ঠত্বিত্যাদি| যোনিষ্বিবি জাতিষু| অতো বা ভূয ইতি যথোক্তগুণযুক্তাদপ্যধিকং শক্রাদিপরমর্ধিতুল্যমিত্যর্থঃ||৪ (৩)||

Adhikarana 6 (4 (4)) · Śloka 4

অসাত্ম্যজশ্চাযং গর্ভঃ| যদি হি সাত্ম্যজঃস্যাত্, তর্হি সাত্ম্যসেবিনামেবৈকান্তেন প্রজা স্যাত্, অসাত্ম্যসেবিনশ্চ নিখিলেনানপত্যাঃ স্যুঃ, তচ্চোভযমুভযত্রৈব দৃশ্যতে (৪)|৪|

তচ্চোভযমিতি সপ্রজত্বমনপত্যত্বং চ| উভযত্রেতি সাত্ম্যসেবিন্যসাত্ম্যসেবিন্যপি||৪ (৪)||

Adhikarana 7 (4 (5)) · Śloka 4

অরসজশ্চাযং গর্ভঃ| যদি হি রসজঃ স্যাত্, ন কেচিত্ স্ত্রীপুরুষেষ্বনপত্যাঃ স্যুঃ, ন হি কশ্চিদস্ত্যেষাং যো রসান্নোপযুঙ্ক্তে; শ্রেষ্ঠরসোপযোগিনাং চেদ্গর্ভা জাযন্ত ইত্যভিপ্রেতমিতি, এবং সত্যাজৌরভ্রমার্গমাযূরগোক্ষীরদধিঘৃতমধুতৈলসৈন্ধবেক্ষুরসমুদ্গশালিভৃতানামেবৈকান্তেন প্রজা স্যাত্, শ্যামাকবরকোদ্দালককোরদূষককন্দমূলভক্ষাশ্চ নিখিলেনানপত্যাঃ স্যুঃ, তচ্চোভযমুভযত্র দৃশ্যতে (৫)|৪|

যো রসান্নোপযুঙ্ক্তে ইতি রসশ্চেদ্গর্ভকারণং তং চ সর্ব এব স্ত্রীপুরুষাঃ সেবন্তে, তেন সর্ব এব সাপত্যাঃ স্যুরিতি ভাবঃ| অথ রসজো গর্ভ ইত্যস্য শ্রেষ্ঠরস ইত্যর্থো বর্ণ্যতে, তত্রাপি দূষণমাহ- শ্রেষ্ঠেত্যাদি||৪ (৫)||

Adhikarana 8 (4) · Śloka 4

ন খল্বপি পরলোকাদেত্য সত্ত্বং গর্ভমবক্রামতি; যদি হ্যেনমবক্রামেত্, নাস্য কিঞ্চিত্ পৌর্বদেহিকং স্যাদবিদিতমশ্রুতমদৃষ্টং বা, স চ তচ্চ ন কিঞ্চিদপি স্মরতি (৬)||৪|| তস্মাদেতদ্ব্রূমহে- অমাতৃজশ্চাযং গর্ভোঽপিতৃজশ্চানাত্মজশ্চাসাত্ম্যজশ্চারসজশ্চ, ন চাস্তি সত্ত্বমৌপপাদুকমিতি (হোবাচ ভরদ্বাজঃ )||৪||

‘অস্তি চ সত্ত্বমৌপপাদুকম্’ ইতি যদুক্তং, তদ্দূষযতি- ন খল্বপীত্যাদি| পৌর্বদেহিকমিতি পূর্বদেহানুভূতম্| অবিদিতমদৃষ্টং বেতি ইহ জন্মন্যপি পূর্বদেহানুভূতং নাবিদিতমদৃষ্টং বা স্যাত্; বিদিতং প্রত্যক্ষব্যতিরিক্তপ্রমাণোপলব্ধং, দৃষ্টং তু প্রত্যক্ষোপলব্ধম্, এতদ্বিপর্যযাদবিদিতমদৃষ্টং চ বিজ্ঞেযম্| ন চ কিঞ্চিদপি স্মরতীতি নচ পূর্বজন্মানুভূতং স্মরতীত্যর্থঃ| এবং মন্যতে- যন্মনঃ পৌর্বদেহিকমনুভবতি তচ্চেহ জন্মন্যপ্যনুবর্ততে, তথা যত্ তেন জন্মান্তরেঽনুভূতং তদিহ জন্মন্যপি তথৈব স্মরতু; যথা- দেবদত্তো বাল্যানুভূতং যৌবনে স্মরতি, ন চাযং তথা স্মরতি; তেন ন পূর্বাপরজন্মন্যেকং সত্ত্বমিতি| তস্মাদিত্যাদিনা দূষণদূষিতমর্থং পুনর্নিগমনেন দর্শযতি||৪||

Adhikarana 9 (5) · Śloka 5

নেতি ভগবানাত্রেযঃ, সর্বেভ্য এভ্যো ভাবেভ্যঃ সমুদিতেভ্যো গর্ভোঽভিনির্বর্ততে||৫||

ভরদ্বাজমতমাত্রেযবচসা দূষযতি- নেতীত্যাদি| সমুদিতেভ্য ইতি বচনাত্ প্রত্যেকং মাত্রাদীনামিতরকারণনিরপেক্ষাণাং গর্ভকারণত্বং নিষেধযতি| তেন, মাত্রাদিগর্ভকারণসান্নিধ্যেঽপি গর্ভকারণান্তরজীবাবক্রমাদ্যভাবাদ্ গর্ভানুত্পাদো যুক্ত এব| ন চ সামগ্রীজন্যে কার্যে একদেশস্যাজনকত্বেনাকারণত্বম্| এবং সতি তন্তূনামপি পটকারণানাং কারণান্তরাসান্নিধ্যে পটাজনকত্বেনাকারণত্বং স্যাদিতি ভাবঃ| ইদমেব গর্ভস্য মাত্রাদিজন্যত্বং যত্- মাত্রাদিব্যতিরেকেণানুত্পদ্যমানত্বম্||৫||

Adhikarana 10 (6) · Śloka 6

মাতৃজশ্চাযং গর্ভঃ| ন হি মাতুর্বিনা গর্ভোত্পত্তিঃ স্যাত্, ন চ জন্ম জরাযুজানাম্| যানি খল্বস্য গর্ভস্য মাতৃজানি, যানি চাস্য মাতৃতঃ সম্ভবতঃ সম্ভবন্তি, তান্যনুব্যাখ্যাস্যামঃ; তদ্যথা- ত্বক্চ লোহিতং চ মাংসং চ মেদশ্চ নাভিশ্চ হৃদযং চ ক্লোম চ যকৃচ্চ প্লীহা চ বৃক্কৌ চ বস্তিশ্চ পুরীষাধানং চামাশযশ্চ পক্বাশযশ্চোত্তরগুদং চাধরগুদং চ ক্ষুদ্রান্ত্রং চ স্থূলান্ত্রং চ বাপা চ বপাবহনং চেতি (মাতৃজানি)||৬||

এবংবিধমেব মাতুস্তাবত্ কারণত্বমাহ- মাতৃজশ্চাযং গর্ভ ইত্যাদিনা| গর্ভোত্পত্তৌ মাতুঃ কারণত্বং দর্শযিত্বা জরাযুজজন্মনি কারণত্বমাহ- ন চ জন্মেত্যাদি| জরাযুঃ অমরা, যেন বেষ্টিতা মনুষ্যাদযঃ প্রজাযন্তে; জরাযুণা বেষ্টিতা জাযন্তে ইতি জরাযুজামনুষ্যাদযঃ সংস্বেদজানাং মশকাদীনামুদ্ভিজ্জাদীনাং ভেকাদীনাং চ মাতরং বিনাঽপি জন্ম ভবতি| অণ্ডজানামপি যদ্যপি মাতা কারণং ভবত্যেব জন্মনি, তথাঽপি জরাযুজস্য মানুষস্যেহ প্রকরণেঽভিপ্রেতত্বেনাণ্ডজান্ বিহায জরাযুজানামিতি কৃতম্| কিংবা, জরাযুজস্যাভিব্যক্তিরূপে জন্মনি যাবদভিব্যক্তি যথা মাতা কারণং ভবতি, ন তথাঽণ্ডজে; তত্র কূর্মাদাবণ্ডোত্পত্তিমাত্র এব মাতা কারণং, ন জন্মন্যভিব্যক্তিরূপে| যত্তু ‘পিতুর্বিনা ন জরাযুজানাং জন্ম’ ইতি বক্ষ্যতি, তজ্জরাযুজোত্পাদে পিতুরবশ্যাপেক্ষণীযত্বোপদর্শনার্থম্; অণ্ডজাস্তু মত্স্যাদযঃ পিতরং বিনাঽপি ঋতুবিশেষপ্রাপ্ত্যৈব ভবন্তীতি ভাবঃ| মাতৃজানীত্যস্য বিবরণং- যান্যস্য মাতৃতঃ সম্ভবতঃ সম্ভবন্তীতি সম্ভবতো গর্ভস্য যানি মাতৃত ইতি মাতুরাগতাচ্ছোণিতাত্ সম্ভবন্ত্যুত্পদ্যন্তে, তানি মাতৃজানি ত্বগাদীন্যনুব্যাখ্যাস্যাম ইতি যোজনা| এবমন্যত্রাপি যানি ত্বিত্যাদিগ্রন্থো ব্যাখ্যেযঃ| মাতৃজত্বং চ ত্বগাদীনামাগমগম্যগেব| পুরীষাধানং পক্বাশযঃ| উত্তরগুদাধরগুদৌ গুদোত্তরাধরভাগৌ| বপাবহনং ‘তৈলবর্তিকা’ ইতি কথ্যতে ||৬||

Adhikarana 11 (7) · Śloka 7

পিতৃজশ্চাযং গর্ভঃ| নহি পিতুরৃতে গর্ভোত্পত্তিঃ স্যাত্, ন চ জন্ম জরাযুজানাম্| যানি খল্বস্য গর্ভস্য পিতৃজানি, যানি চাস্য পিতৃতঃ সম্ভবতঃ সম্ভবন্তি, তান্যনুব্যাখ্যাস্যামঃ; তদ্যথা- কেশশ্মশ্রুনখলোমদন্তাস্থিসিরাস্নাযুধমন্যঃ শুক্রং চেতি (পিতৃজানি)||৭||

শুক্রমিতি বিচ্ছিদ্যপাঠেন শুক্রস্য সর্বধাতুসারস্যোপাদেযতাং দর্শযতি||৭||

Adhikarana 12 (8) · Śloka 8

আত্মজশ্চাযং গর্ভঃ| গর্ভাত্মা হ্যন্তরাত্মা যঃ, তং ‘জীব’ ইত্যাচক্ষতে শাশ্বতমরুজমজরমমরমক্ষযমভেদ্যমচ্ছেদ্যমলোড্যং বিশ্বরূপং বিশ্বকর্মাণমব্যক্তমনাদিমনিধনমক্ষরমপি| স গর্ভাশযমনুপ্রবিশ্য শুক্রশোণিতাভ্যাং সংযোগমেত্য গর্ভত্বেন জনযত্যাত্মনাঽঽত্মানম্, আত্মসঞ্জ্ঞা হি গর্ভে| তস্য পুনরাত্মনো জন্মানাদিত্বান্নোপপদ্যতে, তস্মান্ন জাত এবাযমজাতং গর্ভং জনযতি, অজাতো হ্যযমজাতং গর্ভং জনযতি; স চৈব গর্ভঃ কালান্তরেণ বালযুবস্থবিরভাবান্ প্রাপ্নোতি, স যস্যাং যস্যামবস্থাযাং বর্ততে তস্যাং তস্যাং জাতো ভবতি, যা ত্বস্য পুরস্কৃতাতস্যাং জনিষ্যমাণশ্চ, তস্মাত্ স এব জাতশ্চাজাতশ্চ যুগপদ্ভবতি; যস্মিংশ্চৈতদুভযং সম্ভবতি জাতত্বং জনিষ্যমাণত্বং চ স জাতো জন্যতে, স চৈবানাগতেষ্ববস্থান্তরেষ্বজাতো জন্যযত্যাত্মনাঽঽত্মানম্| সতো হ্যবস্থান্তরগমনমাত্রমেব হি জন্ম চোচ্যতে তত্র তত্র বযসি তস্যাং তস্যামবস্থাযাং; যথা- সতামেব শুক্রশোণিতজীবানাং প্রাক্ সংযোগাদ্গর্ভত্বং ন ভবতি, তচ্চ সংযোগাদ্ভবতি; যথা- সতস্তস্যৈব পুরুষস্য প্রাগপত্যাত্ পিতৃত্বং ন ভবতি, তচ্চাপত্যাদ্ভবতি; তথা সতস্তস্যৈব গর্ভস্য তস্যাং তস্যামবস্থাযাং জাতত্বমজাতত্বং চোচ্যতে||৮||

আত্মজ ইত্যাদিনা আত্মজত্বং ব্যুত্পাদযতি| অন্তরাত্মোচ্যত ইত্যনেন গর্ভকারণভূতমাত্মানং ষড্ধাতুসমুদাযবর্ত্যাত্মশব্দাভিধেযাদ্ ব্যাবর্তযতি| আচক্ষত ইতি আগমেষু শাশ্বতাদিশব্দৈর্ব্রুবতে বৃদ্ধাঃ| অলোড্যমিতি অক্ষোভ্যম্| গর্ভত্বেন জনযত্যাত্মানমিতি গর্ভস্বরূপো যঃ ষড্ধাতুক আত্মা তং জনযতীত্যর্থঃ| গর্ভস্যাত্মশব্দাভিধেযতামাহ- আত্মসঞ্জ্ঞা হি গর্ভে ইতি| তস্যেত্যনেন পরমাত্মানং প্রত্যবমৃশতি| যস্মাদস্যানাদিত্বাজ্জন্ম নোপপদ্যতে তস্মাজ্জাত এবাযমজাতং গর্ভং জনযতীতি পক্ষোঽন, ইতি যোজ্যম্| অথ জাতঃ স ন চেজ্জনযতি কথং তর্হি জনযতীত্যহ- অজাতো হ্যযমিতি; নিত্যো হ্যযমিত্যর্থঃ| তেন নিত্যত্বেনাকাশবন্ন জাতঃ সন্নন্তরাত্মা গর্ভস্বরূপমাত্মানং জনযতি| অতশ্চান্তরাত্মরূপতযা নিত্যবিদ্যমানত্বেনাজাতঃ সন্ গর্ভরূপাবস্থাযাং জাত উচ্যতে| এবমজাতত্বং জাতত্বং চাত্মনি দ্বযমপি ব্যপদিশ্যতে| এতদেবাত্মনি জাতত্বমজাতত্বং চ দর্শযিতুং দৃষ্টান্তার্থং গর্ভ এব জাতত্বমজাতত্বং চ দর্শযতি- স চৈবেত্যাদি| পুরস্কৃতেতি অগ্রে ভবিষ্যন্তী| যথা- বালস্য বৃদ্ধত্বাবস্থাঽজাতা জন্যত ইতি চ, তথা অজাতো জনযত্যাত্মনাঽঽত্মনমিতি চ শব্দপ্রযোগসমর্থনমাত্রমেতদ্ বিবক্ষাভেদাদ্বোদ্ধব্যম্| অনেন চাত্মন্যবস্থাভেদকৃতজাতত্বসমর্থনেন ‘জাতো বাজনযেত্, অজাতো বা’ ইত্যাদিগ্রন্থকৃতপূর্বপক্ষঃ শব্দপ্রযোগসমর্থনতযা পরিহৃতঃ| পরমার্থতস্তু নিত্যত্বেনাজাত এবাত্মা আত্মনোঽজাতাবস্থাং গর্ভাদিরূপাং জনযতি| তেন, নাসতঃ কারণত্বং সতো বা জন্যত্বমিতি পক্ষঃ স্থিত এব| সতো হীত্যাদিনা সত্কার্যপক্ষং সাঙ্খ্যমতং দর্শযতি| কিংবা বযোভেদেন যদেবাবস্থান্তরগমনং তদেব জন্মেতি দর্শযতি| তস্যাং তস্যামবস্থাযামিতি চ্ছেদঃ| পিতৃত্বমিতি পিতৃত্বেন ব্যপদেশ ইত্যর্থঃ||৮||

Adhikarana 13 (9) · Śloka 9

ন খলু গর্ভস্য ন চ মাতুর্ন পিতুর্ন চাত্মনঃ সর্বভাবেষু যথেষ্টকারিত্বমস্তি; তে কিঞ্চিত্ স্ববশাত্ কুর্বন্তি, কিঞ্চিত্ কর্মবশাত্, ক্বচিচ্চৈষাং করণশক্তির্ভবতি, ক্বচিন্ন ভবতি| যত্র সত্ত্বাদিকরণসম্পত্তত্র যথাবলমেব যথেষ্টকারিত্বম্, অতোঽন্যথা বিপর্যযঃ| ন চ করণদোষাদকরণমাত্মাসম্ভবতি গর্ভজননে, দৃষ্টং চেষ্টা যোনিরৈশ্বর্যং মোক্ষশ্চাত্মবিদ্ভিরাত্মাযত্তম্| নহ্যন্যঃ সুখদুঃখযোঃ কর্তা| ন চান্যতো গর্ভো জাযতে জাযমানঃ, নাঙ্কুরোত্পত্তিরবীজাত্||৯||

যদুক্তং- যদ্যাত্মা আত্মানং জনযতি তদা বশিত্বাদিগুণযুক্তং জনযেদিতি, তত্রোত্তরমাহ- ন খল্বিত্যাদি| গর্ভস্য সর্বভাবেষু ন মাত্রাদীনাং যথেষ্টকারিত্বমিতি যোজ্যম্| অত্র চ যদ্যপ্যাত্মৈব প্রকৃতঃ, তথাঽপি তুল্যসমাধানত্বেন মাতাপিতরাবপ্যুপাত্তৌ| যথা আত্মনঃ সর্বভাবেষু যথেষ্টকারিত্বেনেষ্টযোনিগমনাদিপ্রসক্তিঃ সমাধীযতে, তথা মাতাপিত্রোরপি যথেষ্টকারিত্বেন পুত্রানেব জনযেযুরিত্যাদিপূর্বপক্ষঃ পরিহৃতো ভবতি| অথ কুত এবাত্মাদীনাং যথেষ্টকারিত্বং ক্বচিন্ন ভবতীত্যাহ- কিঞ্চিদিত্যাদি| কিঞ্চিদিতি ন সর্বম্| তত্র মাতাপিতরৌ স্ববশৌ মৈথুনং গর্ভকারণং সাত্ম্যরসসেবাদিকং চাচরতঃ, গর্ভস্য জীবাধিষ্ঠানাদৌ তু কর্মাধীনে পরবশৌ; তথা, আত্মাঽপি গর্ভস্য চৈতন্যে তথা ধর্মাধর্মহেতুক্রিযানুষ্ঠানে স্ববশঃ, কর্মজন্যে ইষ্টানিষ্টযোন্যাদিগমনে তু ধর্মাধর্মপরাধীন এব; তেন কর্মাধীনে বিষযে ন মাত্রাদীনাং যথেষ্টকারিত্বম্| যথেষ্টকারিত্বমপি মাত্রাদীনাং ক্বচিদ্দর্শযন্নাহ- ক্বচিচ্চৈষামিত্যাদি| করণমুপকরণং সাধনোপায ইতি যাবত্| সত্ত্বং মনঃ, আদি প্রধানং যেষাং তানি সত্ত্বাদীনি মন-ইন্দ্রিযশুক্রশোণিতাদীনি| যথাবলমিতি যথাকর্ম; বলশব্দেনেহাদৃষ্টমুচ্যতে | এতেন, যত্র মাত্রাদীনাং পুত্রেচ্ছাযামিষ্টযোনিগমনাদিকরণশক্তির্ভবতি , কর্ম চানুগুণং ভবতি, তত্রেপ্সিতপুত্রাদিষ্বিষ্টযোনিগমনাদি কার্যং ভবতি; যথা- যদি তত্র বিশুদ্ধভূরিশুক্রঃ পুরুষো ভবতি, স্ত্রী চ বিশুদ্ধযোন্যাশ্রযত্বাদিগুণযুক্তা, পুত্রজনকং চ কর্মং তযোর্বলবত্, তদা পুত্রজন্মাভিসন্ধায মৈথুনমাপদ্যমানৌ ঈপ্সিতং পুত্রং জনযতঃ; তথা আত্মাঽপি বিশুদ্ধসত্ত্বাদিগুণযুক্তঃ শুভকর্মবান্ তত্কালে ইষ্টাং যোনিমনুধ্যাযতি, তদাঽভীষ্টযোনিগমনং সম্পাদযত্যাত্মন ইত্যাদি যথেষ্টকারিত্বোদাহরণং জ্ঞেযম্| অতোঽন্যথা ইতি সত্ত্বাদিকরণাশক্তৌ বিগুণে চ দৈবে| বিপর্যয ইতি ন যথেষ্টকারিত্বম্| কিংবা, ক্বচিচ্চ মৈথুনাদাবেষাং পিত্রাদীনাং স্ববশত্বং, তত্ কিমিতি জীবোপক্রমাদাবপি ন স্ববশত্বমেষাং ভবতীত্যাহ- ক্বচিচ্চৈষামিত্যাদি| ক্বচিদেব কার্যে যস্মাত্ কিঞ্চিত্ করণং মাত্রাদীনাং শক্তং ন সর্বত্র, তেন সর্বেষ্বেব গর্ভস্য ভাবেষু ন স্ববশত্বমিতি ভাবঃ| যত্রাপি চৈতে মাত্রাদযঃ স্ববশাঃ সন্তঃ কুর্বন্তি, তত্রাপি স্বীযস্বীযকরণযুক্তা এব কুর্বন্তীত্যাহ- যত্র সত্ত্বেত্যাদি| যথাবলমিতি যথাশক্তি| অনেন চ মাত্রাদযো গর্ভস্য যেষু বিশেষেষু শক্তাঃ, তেষু সত্ত্বাদিকরণসম্পত্তৌ যথেষ্টকারিণো ভবন্তি, ন ত্বশক্যে বিষযে উপহতকরণা বা যথেষ্টকারিণো ভবন্তীতি দর্শযতি| অতোঽন্যথা বিপর্যয ইত্যস্য চার্থোঽগ্রে ব্যাকৃতঃ| ননু সত্ত্বাদিকরণদোষাচ্চেদযমাত্মা গর্ভং ন জনযতি তথাবিধং, হন্ত তর্হ্যকারণমেবাযমাত্মা, কারণং হি যদ্ভবতি তত্ করোত্যেব কার্যমিত্যাহ- ন চেত্যাদি| করণদোষাদকুর্বন্ গর্ভং কদাচিদাত্মান গর্ভজননে কারণং ভবতীতি ন, অপিতু ভবত্যেব কারণম্; এবং মন্যতে- মৃদাদ্যভাবাত্ ঘটমকুর্বন্নপি কুম্ভকারঃ কারণমেব ঘটস্য ভবতি, ঘটজননশক্তিযুক্তত্বাত্; তথা আত্মাঽপি করণদোষাদকুর্বন্নপি তথাবিধং গর্ভং, তজ্জননশক্তত্বেন ভূযোদৃষ্টত্বাত্ কারণমেব ভবতি| তথেষ্টযোনিগমনে প্রসক্তিরপি প্রোদ্ভাবিতা আত্মনঃ কারণত্বেন সা ক্বচিদ্ভবতীত্যপি দর্শযন্নাহ- দৃষ্টং চেত্যাদি| আত্মাধীনা যোনিঃ পুরুষং প্রতি ইষ্টা যোনিঃ; তথা ঐশ্বর্যাদযশ্চাত্মাধীনা দৃষ্টাঃ, যথোক্তং কতিধাপুরুষীযে- “আবেশশ্চেতসো জ্ঞানং” (শা. ১) ইত্যাদিনা| আত্মনঃ কারণত্বে হেত্বন্তরমাহ- ন হ্যন্য ইত্যাদি|- হি যস্মাদাত্মনোঽন্যঃ সুখদুঃখযোঃ কর্তা নাস্তি, কিং ত্বাত্মৈব সুখদুঃখসাধনেন্দ্রিযকর্মশরীরাদিকর্তা; তেন আত্মা কারণং গর্ভস্য সুখদুঃখাদ্যাধারস্যেতি ভাবঃ| অথ ভূতান্যেব কস্মাত্ সংযোগবশাচ্চেতনামাসাদ্য সুখাদিকারণানি ন ভবন্তীত্যাহ- ন চান্যত ইত্যাদি| অন্যত ইতি বিজাতীযাত্| জাযমান ইতি উত্পদ্য মানঃ| সদৃশমেব কারণাত্ কার্যমুত্পদ্যতে; যেন ন শণস্যাঙ্কুরোত্পত্তির্নারিকেলবীজাদ্ভবতি; অবীজাদিতি কার্যত্বেনাভিমতাঙ্কুরস্যাবীজাত্| এতেন, গর্ভস্য যচ্চৈতন্যং তদচেতনেভ্যো ভূতেভ্যো ন ভবতি, কিন্তু চেতনাধাতোরাত্মন এবেতি দর্শযতি||৯||

Adhikarana 14 (10) · Śloka 10

যানি তু খল্বস্য গর্ভস্যাত্মজানি, যানি চাস্যাত্মতঃ সম্ভবতঃ সম্ভবন্তি, তান্যনুব্যাখ্যাস্যামঃ তদ্যথা- তাসু তাসু যোনিষূত্পত্তিরাযুরাত্মজ্ঞানং মন ইন্দ্রিযাণি প্রাণাপানৌ প্রেরণং ধারণমাকৃতিস্বরবর্ণবিশেষাঃ সুখদুঃখে ইচ্ছাদ্বেষৌ চেতনা ধৃতির্বুদ্ধিঃ স্মৃতিরহঙ্কারঃ প্রযত্নশ্চেতি (আত্মজানি)||১০||

এবমাত্মজত্বং গর্ভস্য ব্যুত্পাদ্যাত্মজান্ বিশেষানাহ- যানীত্যাদি| প্রেরণং ধারণং চেন্দ্রিযাণামেব| অত্র চ তত্তদ্দেবাদিপশ্বাদিযোনিগমনাদৌ ধর্মাধর্মজন্যে ধর্মাধর্মস্যাপি জনকত্বেনাত্মৈব মূলকারণমুচ্যতে; আত্মজ্ঞানপ্রাণাপানপ্রেরণাদৌ তু মনঃকরণ আত্মৈবাব্যবধানেন কারণম্||১০||

Adhikarana 15 (11) · Śloka 11

সাত্ম্যজশ্চাযং গর্ভঃ| নহ্যসাত্ম্যসেবিত্বমন্তরেণ স্ত্রীপুরুষযোর্বন্ধ্যত্বমস্তি, গর্ভেষু বাঽপ্যনিষ্টো ভাবঃ| যাবত্ খল্বসাত্ম্যসেবিনাং স্ত্রীপুরুষাণাং ত্রযো দোষাঃ প্রকুপিতাঃ শরীরমুপসর্পন্তো ন শুক্রশোণিতগর্ভাশযোপঘাতাযোপপদ্যন্তে, তাবত্ সমর্থা গর্ভজননায ভবন্তি| সাত্ম্যসেবিনাং পুনঃ স্ত্রীপুরুষাণামনুপহতশুক্রশোণিতগর্ভাশযানামৃতকালে সন্নিপতিতানাং জীবস্যানবক্রমণাদ্গর্ভা ন প্রাদুর্ভবন্তি| নহি কেবলং সাত্ম্যজ এবাযং গর্ভঃ, সমুদযোঽত্র কারণমুচ্যতে| যানি খল্বস্য গর্ভস্য সাত্ম্যজানি, যানি চাস্য সাত্ম্যতঃ সম্ভবতঃ সম্ভবন্তি, তান্যনুব্যাখ্যাস্যামঃ; তদ্যথা- আরোগ্যমনালস্যমলোলুপত্বমিন্দ্রিযপ্রসাদঃ স্বরবর্ণবীজসম্পত্ প্রহর্ষভূযস্ত্বং চেতি (সাত্ম্যজানি)||১১||

সাত্ম্যজশ্চেত্যাদিনা সাত্ম্যজত্বং ব্যুত্পাদযতি, অসাত্ম্যসেবাং চ গর্ভোপঘাতিনীং দর্শযন্ সাত্ম্যসেবাযা গর্ভং প্রতি কারণত্বং দ্রঢযতি| অসাত্ম্যসেবিনামপি প্রজাভবনোপপত্তিং দর্শযন্ ‘অসাত্ম্যসেবিনশ্চ নিখিলেনাপত্যাঃ স্যুঃ’ ইতি পূর্বপক্ষং পরিহরতি| সাত্ম্যসেবিনাং পুনরিত্যাদিনা তু গ্রন্থেন ‘সাত্ম্যসেবিনামেকান্তেন প্রজা স্যাত্’ ইতি যদুক্তং তত্ পরিহরতি| সন্নিপতিতানামিতি ব্যবাযমাপন্নানাম্| অত্র স্বরবর্ণৌ সাত্ম্যজত্বেন তথা আত্মজত্বেন চোক্তৌ, তেন দ্বাবপ্যত্র কারণমিতি জ্ঞেযম্||১১||

Adhikarana 16 (12) · Śloka 12

রসজশ্চাযং গর্ভঃ| ন হি রসাদৃতে মাতুঃ প্রাণযাত্রাঽপি স্যাত্, কিং পুনর্গর্ভজন্ম| ন চৈবাসম্যগুপযুজ্যমানা রসা গর্ভমভিনির্বর্তযন্তি, ন চ কেবলং সম্যগুপযোগাদেব রসানাং গর্ভাভিনির্বৃত্তির্ভবতি, সমুদাযোঽপ্যত্র কারণমুচ্যতে| যানি তু খল্বস্য গর্ভস্য রসজানি, যানি চাস্য রসতঃ সম্ভবতঃ সম্ভবন্তি, তান্যনুব্যাখ্যাস্যামঃ; তদ্যথা- শরীরস্যাভিনির্বৃত্তিরভিবৃদ্ধিঃ প্রাণানুবন্ধস্তৃপ্তিঃ পুষ্টিরুত্সাহশ্চেতি (রসজানি)||১২||

প্রাণযাত্রাঽপি স্যাদিতি গর্ভধারণকারণভূতাযা মাতুরপি প্রাণস্থিতিরিত্যর্থঃ| ন চৈবাসম্যগুপযুজ্যমানা ইত্যাদিনা অসাত্ম্যরসোপযোগস্য গর্ভোপঘাতিত্বং দর্শযতি| অসাত্ম্যরসোপযোগিনাং প্রজাভবনং যত্, তদসাত্ম্যসেবিপ্রজাভবনন্যাযতুল্যমিতি নেহ পুনর্দর্শিতম্| সমুদাযোঽপ্যত্র কারণমিত্যনেন তু অসম্যগ্রসসেবিনাং চাপত্যভবনে কারণং ধর্মাদি দর্শযতি| অভিনির্বৃত্তিঃ অঙ্গপ্রত্যঙ্গব্যক্ততা| প্রাণানুবন্ধ ইতি বলানুবন্ধঃ পুষ্টিঃ উপচযঃ| বৃদ্ধিস্তু দৈর্ঘ্যেণ বৃদ্ধিঃ| উত্সাহঃ বলম্| ইতি শব্দঃ প্রকারে; তেনৈবম্প্রকারাণ্যন্যান্যপি বর্ণাদীনি রসজানীতি দর্শযতি| এবং পূর্বত্রাপি ইতিশব্দো ব্যাখ্যেযঃ| যদা ত্বিতিশব্দঃ পরিসমাপ্ত্যর্থস্তদাঽপ্যাবিষ্কৃতানাং রসজানাং পরিসমাপ্তির্জ্ঞেযা; তেন অনাবিষ্কৃতা বর্ণাদযোঽপি রজসা লভ্যন্তে||১২||

Adhikarana 17 (13) · Śloka 13

অস্তি খলু সত্ত্বমৌপপাদুকং; যজ্জীবং স্পৃক্শরীরেণাভিসম্বধ্নাতি, যস্মিন্নপগমনপুরস্কৃতে শীলমস্য ব্যাবর্ততে, ভক্তির্বিপর্যস্যতে, সর্বেন্দ্রিযাণ্যুপতপ্যন্তে, বলং হীযতে, ব্যাধয আপ্যায্যন্তে, যস্মাদ্ধীনঃ প্রাণাঞ্জহাতি, যদিন্দ্রিযাণামভিগ্রাহকং চ ‘মন’ ইত্যভিধীযতে; তত্ত্রিবিধমাখ্যাযতে- শুদ্ধং, রাজসং, তামসমিতি| যেনাস্য খলু মনো ভূযিষ্ঠং, তেন দ্বিতীযাযামাজাতৌ সম্প্রযোগো ভবতি; যদা তু তেনৈব শুদ্ধেন সংযুজ্যতে, তদা জাতেরতিক্রান্তাযা অপি স্মরতি| স্মার্তং হি জ্ঞানমাত্মনস্তস্যৈব মনসোঽনুবন্ধাদনুবর্ততে, যস্যানুবৃত্তিং পুরস্কৃত্য পুরুষো ‘জাতিস্মর’ ইত্যুচ্যতে| যানি খল্বস্য গর্ভস্য সত্ত্বজানি, যান্যস্য সত্ত্বতঃ সম্ভবতঃ সম্ভবন্তি, তান্যনুব্যাখ্যাস্যামঃ; তদ্যথা- ভক্তিঃ শীলং শৌচং দ্বেষঃ স্মৃতির্মোহস্ত্যাগো মাত্সর্যং শৌর্যং ভযং ক্রোধস্তন্দ্রোত্সাহস্তৈক্ষ্ণ্যং মার্দবং গাম্ভীর্যমনবস্থিতত্বমিত্যেবমাদযশ্চান্যে, তে সত্ত্ববিকারা যানুত্তরকালং সত্ত্বভেদমধিকৃত্যোপদেক্ষ্যামঃ| নানাবিধানি খলু সত্ত্বানি, তানি সর্বাণ্যেকপুরুষে ভবন্তি, ন চ ভবন্ত্যেককালম্, একং তু প্রাযোবৃত্ত্যাঽঽহ ||১৩||

অস্তীত্যাদিনা মনস ঔপপাদুকত্বমাক্ষিপ্তং সমাদধাতি| অপিশব্দোঽবধারণে| অত্র চ ‘যজ্জীবং স্পৃক্শরীরেণাভিসম্বধ্নাতি’ ইত্যাদিনা মনসোঽসাধারণধর্মকথনমেবৌপপাদুকসাধনং ভবতি, মনোব্যতিরেকেণৈতদুচ্যমানধর্মাণামসিদ্ধেঃ| নিত্যমাত্মানং স্পৃশতীতি স্পৃক্, শরীরমাতিবাহিকশরীরং; তেন স্পৃক্শরীরেণ কারণভূতেন জীবমাত্মরূপমভিসম্বধ্নাতি ভোগাযতনশরীরেণেত্যর্থঃ| আতিবাহিকশরীরসদ্ভাবশ্চ “ভূতৈশ্চতুর্ভিঃ সহিতঃ সুসূক্ষ্মৈর্মনোজবো দেহমুপৈতি দেহাত্” (শা. ২) ইত্যনেন প্রতিপাদিতঃ|কিংবা, জীবম্ আত্মানং, স্পৃক্শরীরেণেতি স্পর্শবতা শরীরেণ, যন্মনোঽভিসম্বধ্নাতি তদুপপাদুকমস্তীতি যোজনা| এবং মন্যতে- যদি মনোঽত্রাত্মনঃ শরীরসম্বন্ধেন স্বীক্রিযতে তদা ব্যাপকত্বাদাত্মনঃ সর্বত্রৈবোপলব্ধ্যা ভবিতব্যং, ন চ ভবতি; তস্মাদ্যত্রৈব স্পর্শবতি শরীরে মনঃ প্রতিবদ্ধং ভবতি তত্রৈবাযং সুখাদ্যুপলভতে| স্পৃগিতিবিশেষণেন শরীরস্য মূত্রনখকেশাদৌ মনোগমনাভাবাদাত্মনোঽনুপলব্ধিং দর্শযতি| অপগমনপুরস্কৃতে ইতি দেহান্তরগমনাভিমুখে| ভক্তিঃ ইচ্ছা| যস্মাদ্ধীন ইতি মনসা ত্যক্তঃ| যেনেতি যথাভূতেন সাত্ত্বিকেন রাজসেন তামসেন বা মনসা ভূযিষ্ঠমিত্যভিপ্রাযঃ| দ্বিতীযাযামাজাতাবিতি দ্বিতীযজন্মনি; পূর্বজন্মনি যাদৃশং মনস্তাদৃশমেব জন্মান্তরে প্রাযো ভবতীত্যর্থঃ| কেচিত্তু, ‘তেন ন দ্বিতীযাযাং’ ইত্যাদি পঠন্তি| তত্রাপি প্রাযো দ্বিতীযে জন্মনি তুল্যেন মনসা যোগো ন ভবতি, কদাচিত্তু ভবতীত্যর্থঃ| যদুক্তং ‘নাস্য কিঞ্চিত্ পৌর্বদেহিকমবিদিতং স্যাত্’ ইতি, তত্ পৌর্বদেহিকং জ্ঞানং ক্বচিদ্ভবতীতি দর্শযন্নাহ- যদা ত্বিত্যাদি| শুদ্ধেনেতি বিশুদ্ধসত্ত্বগুণেন| তস্যৈবেতি বক্ষ্যমাণেন যস্যেত্যনেন সম্বধ্যতে| যোনিযন্ত্রপীডাযাং হি উদ্ভূতেন তমসা বিপ্লুতং মনো নাতিক্রান্তজন্মগতং স্মরতি; যস্তূদ্ভূতসত্ত্বস্তমসা নাভিভূযতে, স স্মরত্যেবাতিক্রান্তজন্মানুভূতমিতি ভাবঃ| পুরস্কৃত্যেতি কারণত্বেনাবধার্য| অযং চ মনোধর্মসমূহ ইন্দ্রিযোপক্রমণীযোক্তোঽপি পুনরিহ প্রকরণবশাদুচ্যমানো ন পুনরুক্তদোষমাবহতি| যদ্যপি সত্ত্বস্য গর্ভজনকত্বং সাক্ষান্নোক্তং, তথাঽপি সত্ত্বস্য যদুপপাদুকত্বং গর্ভং প্রতি তেনৈব সত্ত্বস্য গর্ভজনকত্বং প্রতিজ্ঞাতং মন্তব্যম্| তেন ‘যানি খল্বস্য গর্ভস্য সত্ত্বজানি’ ইত্যাদিনা গর্ভে সত্ত্বজভাবকথনমুপপন্নমেব| গর্ভকারণস্যাপি চ সত্ত্বস্যোপপাদুকভাষযা কারণত্বং যদুক্তং তদ্দেহাদ্দেহান্তরগমনরূপমনোধর্মস্য গর্ভকারণত্বাতিরিক্তস্য প্রতিপাদনার্থম্| নানাবিধানীতি নানাবিধসাত্ত্বিকরাজসতামংসবৃত্তিভিন্নানি| তান্যেকপুরুষে ভবন্তীত্যনেনৈক এব পুরুষঃ কদাচিদ্ধর্মক্রিযাযাং সাত্ত্বিকো ভবতি, কদাচিত্ কামচিন্তাযাং রাজসঃ, কদাচিন্মোহে তমোময ইতি দর্শযতি| ন ভবন্ত্যেককালমিতি একদৈব সাত্ত্বিকাদযো ধর্মা ন ভবন্তি, কিন্তু পর্যাযেণ ভবন্তি| ননু যদ্যেকপুরুষ এব সর্বে সাত্ত্বিকাদযো ভবন্তি, তত্ কথম্ ‘অযং সাত্ত্বিকঃ’ ইত্যাদিব্যপদেশো ভবতীত্যাহ- একং ত্বিত্যাদি| প্রাযোবৃত্ত্যেতি ভূযিষ্ঠা যস্য সাত্ত্বিকবৃত্তযো ভবন্তি স সাত্ত্বিকঃ, যস্য ভূযিষ্ঠং রাজস্যো বৃত্তযো ভবন্তি স রাজস উচ্যতে ইত্যাদি| এতদেব পূর্বমুক্তং- “যদ্গুণং চাভীক্ষ্ণং পুরুষমনুবর্ততে সত্ত্বং, তত্সত্ত্বমেবোপদিশন্তি বাহুল্যানুশযাত্” (সূ. ৮) ইতি||১৩||

Adhikarana 18 (14) · Śloka 14

এবমযং নানাবিধানামেষাং গর্ভকরাণাং ভাবানাং সমুদাযাদভিনির্বর্ততে গর্ভঃ; যথা- কূটাগারং নানাদ্রব্যসমুদাযাত্, যথা বা- রথো নানারথাঙ্গসমুদাযাত্; তস্মাদেতদবোচাম- মাতৃজশ্চাযং গর্ভঃ, পিতৃজশ্চ, আত্মজশ্চ, সাত্ম্যজশ্চ, রসজশ্চ, অস্তি চ সত্ত্বমৌপপাদুকমিতি (হোবাচ ভগবানাত্রেযঃ)||১৪||

এবং মাত্রাদিকারণব্যুত্পাদনেন গর্ভস্য সমুদাযপ্রভবতাং ব্যুত্পাদিতাং দৃষ্টান্তেন দ্রঢযন্নাহ- এবমযমিত্যাদি| কূটাগারং বর্তুলাকারং গৃহং জেন্তাকস্বেদপ্রতিপাদিতম্; অন্যে তু বস্ত্রাদিকৃতং সঞ্চারিগৃহং কূটাগারমাহুঃ| অত্র চ প্রকরণে যদ্যপি মাত্রাদীনাং সর্বেষাং সমুদিতানামেব গর্ভং প্রতি কারণত্বং, তথাঽপি মাতাপিত্রাত্মসত্ত্বানি বিহায সাত্ম্যরসযোরেব কারণত্বব্যুত্পাদনে যত্ ‘সমুদাযোঽপ্যত্র কারণম্’ ইত্যুক্তং তত্রৈবং মন্যতে- অত্র যথা মাত্রাদযশ্চত্বারোঽবশ্যং গর্ভং প্রতি কারণভূতা ন তথা সাত্ম্যং রসো বা; যেন শুক্রশোণিতসত্ত্বাত্মসংসর্গাদেব গর্ভো ভবতি, নাবশ্যং গর্ভমেলকে সাত্ম্যরসযোরপেক্ষা; গর্ভমেলকোত্তরকালং সাত্ম্যরসাভ্যাং গর্ভস্য হি পুষ্ট্যাদযো জন্যন্তে, তেন সাত্ম্যে রসে চাবশ্যং সমুদাযাপেক্ষাং দর্শযতা তত্রৈব ‘সমুদাযোঽপ্যত্র কারণম্’ ইত্যুক্তং, মাত্রাদযস্তু পরস্পরসমুদাযমপেক্ষমাণা অপি নাবশ্যং সাত্ম্যরসসমুদাযমাদিগর্ভমেলকেঽপেক্ষন্ত ইতি কৃত্বা পুনস্তত্র সমুদাযাপেক্ষিত্বং নোক্তম্| সমুদাযাদেষাং ভাবানামিত্যনেন গ্রন্থেন যত্ পরস্পরসমুদাযাপেক্ষিত্বং মাত্রাদীনাং চতুর্ণাং, তদুক্তমেব| যদপি গর্ভং প্রত্যবিশেষেণ সাত্ম্যরসযোরপি কারণত্বং, ‘সাত্ম্যজশ্চাযং, রসজশ্চাযং’ ইত্যনেনোক্তং, তদ্গর্ভমেলকোত্তরকালং কারণত্বেন, তথা মাতাপিত্রোরপি বিশুদ্ধশুক্রশোণিতোত্পাদহেতুতযা পারম্পর্যেণ কারণত্বাদিতি জ্ঞেযম্||১৪||

Adhikarana 19 (15) · Śloka 15

ভরদ্বাজ উবাচ- যদ্যযমেষাং নানাবিধানাং গর্ভকরাণাং ভাবানাং সমুদাযাদভিনির্বর্ততে গর্ভঃ কথমযং সন্ধীযতে, যদি চাপি সন্ধীযতে কস্মাত্ সমুদাযপ্রভবঃ সন্ গর্ভো মনুষ্যবিগ্রহেণ জাযতে, মনুষ্যশ্চ মনুষ্যপ্রভব উচ্যতে; তত্র চেদিষ্টমেতদ্যস্মান্মনুষ্যো মনুষ্যপ্রভবস্তস্মাদেব মনুষ্যবিগ্রহেণ জাযতে, যথা- গৌর্গোপ্রভবঃ, যথা- চাশ্বোঽশ্বপ্রভব ইতি; এবং সতি যদুক্তমগ্রে সমুদযাত্মক ইতি তদযুক্তম্| যদি চ মনুষ্যো মনুষ্যপ্রভবঃ, কস্মাজ্জডান্ধকুব্জমূকবামনমিম্মিনব্যঙ্গোন্মত্তকুষ্ঠিকিলাসিভ্যো জাতাঃ পিতৃসদৃশরূপা ন ভবন্তি| অথাত্রাপি বুদ্ধিরেবং স্যাত্- স্বেনৈবাযমাত্মা চক্ষুষা রূপাণি বেত্তি, শ্রোত্রেণ শব্দান্, ঘ্রাণেন গন্ধান্, রসনেন রসান্, স্পর্শনেন স্পর্শান্, বুদ্ধ্যা বোদ্ধব্যমিত্যনেন হেতুনা ন জডাদিভ্যো জাতাঃ পিতৃসদৃশা ভবন্তি| অত্রাপি প্রতিজ্ঞাহানিদোষঃ স্যাত্, এবমুক্তে হ্যাত্মা সত্স্বিন্দ্রিযেষু জ্ঞঃ স্যাদসত্স্বজ্ঞঃ; যত্র চৈতদুভযং সম্ভবতি জ্ঞত্বমজ্ঞত্বং চ, সবিকারশ্চাত্মা | যদি চ দর্শনাদিভিরাত্মা বিষযান্ বেত্তি, নিরিন্দ্রিযো দর্শনাদিবিরহাদজ্ঞঃ স্যাত্, অজ্ঞত্বাদকারণম্, অকারণত্বাচ্চ নাত্মেতি বাগ্বস্তুমাত্রমেতদ্বচনমনর্থং স্যাদিতি (হোবাচ ভরদ্বাজঃ)||১৫||

পুনর্ভরদ্বাজঃ পৃচ্ছতি- যদ্যযমিত্যাদি| কথং সন্ধীযত ইতি কযা পরিপাঠ্যা মিলতীত্যর্থঃ| মনুষ্যবিগ্রহেণ জাযত ইতি মনুষ্যজাতৌ কস্মান্মনুষ্যবিগ্রহেণৈব জাযত ইত্যর্থঃ| সমুদাযাত্মক ইতি যদুক্তং তদযুক্তমিতি অত্র মাত্রাদ্যতিরিক্তজাতেঃ কারণত্বকথনেন তথা জাতেরেব মনুষ্যাদিরূপাযা বলবত্কারণত্বেন যথোক্তমাত্রাদিসমুদাযপ্রভবত্বং ন যুক্তমিতি ভাবঃ| দূষণান্তরমাহ- যদি চেত্যাদি| জডো জডবুদ্ধিঃ, মিন্মিনঃ সানুনাসিকাব্যক্তস্বরঃ| পিতৃসদৃশরূপা ইত্যত্র পিতৃশব্দেন মাতাপিতরৌ গ্রাহ্যৌ| কারণসদৃশরূপত্বেন চেন্মনুষ্যা ভবন্তি তদা জডাদিরূপকারণজাতা অপি কারণসদৃশত্বেন জডাদিরূপাঃ স্যুরিতি ভাবঃ| অত্র জডাদিবহূদাহরণকরণং পক্ষস্য বহূদাহরণসিদ্ধত্বেন দৃঢত্বপ্রতিপাদনার্থম্| কৃতপূর্বপক্ষে সমাধানমাশঙ্কতে- অথাত্রেত্যাদি| স্বেনৈবেতি আত্মকর্মোপার্জিতেনৈব| তেন, ইন্দ্রিযাণি যস্মাদাত্মজান্যুক্তানি ন তু মাতাপিতৃরূপমনুষ্যজন্যানি, ততশ্চ পিত্রোরিন্দ্রিযং প্রত্যকারণত্বেন ন তদিন্দ্রিযসদৃশানীন্দ্রিযাণ্যস্য ভবন্তীতি ভাবঃ| স্বেনৈবেতি শ্রোত্রাদিভিরভিসম্বধ্যতে| জডাদিভির্জাতা ইত্যত্র আদিশব্দঃ প্রকারবাচী, তেন কুব্জকুষ্ট্যাদীনাং গ্রহণম্| কুব্জত্বকুষ্ঠাদ্যাধারভূতং হি শরীরং নাত্মজং, কিন্তু মাতাপিতৃজমেব; ততশ্চ কুব্জাদিজাতস্য কুব্জত্বাদিপ্রসঙ্গেনৈবাপকৃতত্বং তদবস্থমেব| আশঙ্কিতং সমাধানং দূষযতি- অত্রাপীত্যাদি| প্রতিজ্ঞাদোষঃ স্যাদিতি “অত্মা জ্ঞঃ” (শা. ১) ইত্যাদিনা আত্মনো জ্ঞত্বপ্রতিজ্ঞাযাঃ, তথা “নির্বিকারঃ পরস্ত্বাত্মা” (সূ. ১) ইত্যাদিনা কৃতাযা নির্বিকারত্বপ্রতিজ্ঞাযা দোষঃ স্যাদিতি ভাবঃ| অসত্স্বজ্ঞ ইত্যনেন কদাচিদজ্ঞত্বাত্ প্রতিজ্ঞাতং জ্ঞত্বং ব্যাহতম্, ইন্দ্রিযাধীনত্বেন জ্ঞত্বমাত্মনঃ পরাধীনং সন্ন বাস্তবং স্যাদিতি ভাবঃ| যত্রেত্যাদিনা সবিকারত্বং সাধযতি| জ্ঞত্বপরিত্যাগেনাজ্ঞত্বে প্রকৃতেরন্যথাভূতত্বেন বিকারো ভবতীতি ভাবঃ| সবিকার ইতি ‘বিকারবান্’ ইত্যর্থো মতুব্লোপাজ্জ্ঞেযঃ| আত্মন ইন্দ্রিযাধীনত্বেন জ্ঞত্বে দূষণান্তরমাহ- যদি চেত্যাদি| অজ্ঞত্বাদকারণমিতি অজ্ঞত্বাত্ জ্ঞানপূর্বকশরীরপ্রেরণাদৌ ন কারণং স্যাদিত্যর্থঃ| অকারণত্বাচ্চ নাত্মেতি শরীরপ্রেরণাদৌ বুদ্ধিনিষ্পাদ্যেঽকারণত্বাদচেতনপঞ্চভূতাতিরিক্তশ্চেতনাভিধ আত্মশব্দবাচ্য ইত্যর্থঃ| বাগ্বস্তুমাত্রমিতি অর্থরহিতশব্দমাত্রমেতদ্- যদুচ্যতে- আত্মা স্বেন চক্ষুষা রূপং পশ্যতীত্যাদি||১৫||

Adhikarana 20 (16) · Śloka 16

আত্রেয উবাচ- পুরস্তাদেতত্ প্রতিজ্ঞাতং- সত্ত্বং জীবং স্পৃক্শরীরেণাভিসম্বধ্নাতীতি| যস্মাত্তু সমুদাযপ্রভবঃ সন্ স গর্ভো মনুষ্যবিগ্রহেণ জাযতে, মনুষ্যো মনুষ্যপ্রভব ইত্যুচ্যতে, তদ্বক্ষ্যামঃ- ভূতানাং চতুর্বিধা যোনির্ভবতি- জরায্বণ্ডস্বেদোদ্ভিদঃ| তাসাং খলু চতসৃণামপি যোনীনামেকৈকা যোনিরপরিসঙ্খ্যেযভেদা ভবতি, ভূতানামাকৃতিবিশেষাপরিসঙ্খ্যেযত্বাত্| তত্র জরাযুজানামণ্ডজানাং চ প্রাণিনামেতে গর্ভকরা ভাবা যাং যাং যোনিমাপদ্যন্তে, তস্যাং তস্যাং যোনৌ তথাতথারূপা ভবন্তি; যথা- কনকরজততাম্রত্রপুসীসকান্যাসিচ্যমানানি তেষু তেষু মধূচ্ছিষ্টবিগ্রহেষু, তানি যদা মনুষ্যবিম্বমাপদ্যন্তে তদা মনুষ্যবিগ্রহেণ জাযন্তে, তস্মাত্ সমুদাযপ্রভাবঃ সন্ গর্ভো মনুষ্যবিগ্রহেণ জাযতে; মনুষ্যশ্চ মনুষ্যপ্রভব উচ্যতে, তদ্যোনিত্বাত্||১৬||

আত্রেযঃ সমাদধাতি- পুরস্তাদিত্যাদি|- এতচ্চ ‘কথমযং সন্ধীযতে’ ইত্যস্যোত্তরম্| সত্ত্বং শুক্রার্তবসন্ধানকারণমিত্যর্থঃ| ভূতানামিতি প্রাণিনাম্| যোনিঃ জাতিঃ, যদাঽপি যোনিশব্দঃ কারণবচনস্তদাঽপি জরাযুজাদিরূপযোনিজাতা অপি জরাযুজাদয এবোচ্যন্তে, কার্যে কারণোপচারাত্| আকৃতিঃ সংস্থানং, তস্যা বিশেষাঃ পরস্পরবিসদৃশাকৃতয এব নর-করি-তুরগাদি-রূপাঃ| সম্ভবে যোনিভেদং দর্শযিত্বা যথা যোন্যনুকারো ভবতি তদাহ- তত্রেত্যাদি| গর্ভকারা ভাবাঃ শুক্রাদযঃ| মধূচ্ছিষ্টবিগ্রহেষ্বিতি সিক্থকেন মৃত্তিকাযাং নির্মিতসঞ্চকরূপবিগ্রহেষু| মনুষ্যবিম্বমিতি মনুষ্যাকারং সিক্থককৃতং সঞ্চকম্| কনকাদিবহুদ্রব্যোদাহরণং যথা কনকাদীনাং বহূনামপি মনুষ্যসঞ্চকসিক্থকস্থানাং মনুষ্যাকৃতিজনকত্বং, তথা শুক্রাদীনামপি বহূনাং মনুষ্যযোনিপতিতানাং মনুষ্যবিগ্রহকর্তৃত্বমিতি সাধর্ম্যোদাহরণার্থম্| সমুদাযাত্মকঃ সন্নিতি যদ্যপি সমুদাযজন্যস্তথাঽপি যোনিরূপকারণমহিম্না স্বযোনিসদৃশ এব ভবতি নান্যযোনিসদৃশঃ; ন চ কারণধর্মঃ পর্যনুযোগমর্হতি| তেন, শুক্রাদিসমুদাযোঽপি কারণং ভবতি, মাতাপিতরৌ বিশেষেণ গর্ভস্য সজাতীযত্বে কারণং ভবত ইতি ন কাচিত্ ক্ষতিঃ| তদ্যোনিত্বাদিতি বিশেষেণ মনুষ্যস্য কারণত্বাত্||১৬||

Adhikarana 21 (17) · Śloka 17

যচ্চোক্তং- যদি চ মনুষ্যো মনুষ্যপ্রভবঃ, কস্মান্ন জডাদিভ্যো জাতাঃ পিতৃসদৃশরূপা ভবন্তীতি; তত্রোচ্যতে- যস্য যস্য হ্যঙ্গাবযবস্য বীজে বীজ ভাগ উপতপ্তো ভবতি, তস্য তস্যাঙ্গাবযবস্য বিকৃতিরুপজাযতে, নোপজাযতে চানুপতাপাত্; তস্মাদুভযোপপত্তিরপ্যত্র| সর্বস্য চাত্মজানীন্দ্রিযাণি, তেষাং ভাবাভাবহেতুর্দৈবং; তস্মান্নৈকান্ততো জডাদিভ্যো জাতাঃ পিতৃসদৃশরূপা ভবন্তি||১৭||

বীজ ইতি শুক্রশোণিতে| বীজস্যাঙ্গপ্রত্যঙ্গনির্বর্তকো ভাগো বীজভাগঃ| উভযোপপত্তিরপ্যত্রেতি পিতৃসদৃশরূপা ভবন্তি ন ভবন্তি চেত্যর্থঃ| আত্মজানীতি আত্মপ্রতিবদ্ধকর্মজানি| ভাবাভাবহেতুর্দৈবমিতি ইন্দ্রিযভাবে ইন্দ্রিযজনকং শুভম্, ইন্দ্রিযাভাবে চাশুভং দৈবং হেতুরিত্যর্থঃ| উপসংহরতি- তস্মাদিত্যাদি| এবং মন্যতে- মনুষ্যবীজং হি প্রত্যঙ্গবীজভাগসমুদাযাত্মকং স্বসদৃশপ্রত্যঙ্গসমুদাযরূপপুরুষজনকম্, ইন্দ্রিযাণি চ ভোগসাধনানি আত্মপ্রতিবদ্ধকর্মাধীনানি; তেন পিতা যদি কুষ্ঠ্যপি ভবতি, বীজং চাদুষ্টং ভবতি কুষ্ঠাধারত্বগাদিজনকং, ততো নিষ্কুষ্ঠান্যেব ত্বগাদীন্যনুপতপ্তত্বগাদিবীজাত্ সদৃশানি জাযন্তে; যদা ত্বতিবৃদ্ধকুষ্ঠতযা পিত্রোর্বীজমপি কুষ্ঠজনকদোষেণ দুষ্টং ভবতি, তদা দুষ্টত্বগাদিবীজভাগাত্ কুষ্ঠদুষ্টৈব ত্বগ্ জাযতে| যদুক্তং- “দম্পত্যোঃ কুষ্ঠবাহুল্যাদ্দুষ্টশোণিতশুক্রযোঃ| যদপত্যং তযোর্জাতং জ্ঞেযং তদপি কুষ্ঠিতম্” (সু. নি. ৫) ইতি| এবং কুষ্ঠিনোঽপি যদি হেতুবলাদ্ বীজে কুষ্ঠজনকো দোষো ভবতি, তদা কুষ্ঠিনোঽপি কুষ্ঠবদপত্যং ভবতি| অন্ধত্বাদাবিন্দ্রিযোপঘাতরূপে দুর্দৈবমেব কারণং; তচ্চান্ধাপত্যেঽপ্যবশ্যমস্তি; তেন যদাঽন্ধেঽপত্যে দৃষ্ট্যুপঘাতকমশুভং ভবতি, তদা কাকতালীযন্যাযাদন্ধজাতোঽপ্যন্ধো দৃশ্যতে| এবং কুব্জাদৌ জডাদৌ চ ব্যাখ্যেযম্||১৭||

Adhikarana 22 (18) · Śloka 18

ন চাত্মা সত্স্বিন্দ্রিযেষু জ্ঞঃ, অসত্সু বা ভবত্যজ্ঞঃ; ন হ্যসত্ত্বঃ কদাচিদাত্মা, সত্ত্ববিশেষাচ্চোপলভ্যতে জ্ঞানবিশেষ ইতি||১৮||

যা চাজ্ঞত্বপ্রসক্তিরাত্মন্যুক্তা, তত্রাহ- ন চেত্যাদি| ইন্দ্রিযভাবে তথেন্দ্রিযাভাবেঽপি নিত্যং জ্ঞানবানেবাত্মা ইতি প্রতিজ্ঞার্থঃ | ন হ্যসত্ত্বঃ কদাচিদিত্যত্র হিশব্দো হেতৌ; তেন যস্মাত্ সর্বদা সমনস্ক এবাত্মা, তেন বাহ্যেন্দ্রিযাভাবেঽপ্যন্তঃকরণমনোযোগান্নিত্যমাত্মা মনঃকরণকো জ্ঞানবানেবাযমিত্যর্থঃ| যত্ত্বেতদ্বাহ্যবিষযগতং জ্ঞানং, তত্ সত্ত্বস্যেন্দ্রিযাধিষ্ঠানবিশেষাদ্ভবতি; তেন, ইন্দ্রিযভাবে ইন্দ্রিযজন্যং বিশিষ্টং জ্ঞানং ভবতি; যত্তু কেবলমনোজন্যমাত্মজ্ঞানং, তদ্ ভবত্যেব সর্বদা; তস্মাদ্যন্নিত্যভাবি মনোসন্নিধিমাত্রজন্যমাত্মজ্ঞানং, তত্ সদৈবাস্তি||১৮||

Adhikarana 23 (19) · Śloka 20

ভবন্তি চাত্র- ন কর্তুরিন্দ্রিযাভাবাত্ কার্যজ্ঞানং প্রবর্ততে| যা ক্রিযা বর্ততে ভাবৈঃ সা বিনা তৈর্ন বর্ততে||১৯|| জানন্নপি মৃদোঽভাবাত্ কুম্ভকৃন্ন প্রবর্ততে|২০|

ন চাস্য জ্ঞানজননশক্তিঃ পরাহতা ভবতীত্যাশযেনাহ- নেত্যাদি| যত্বৈতদৈন্দ্রিযকং বিষযোপভোগবত্তদ্ভবতি কদাচিত্, কদাচিচ্চেন্দ্রিযাভাবান্ন ভবতীত্যধ্যাত্মবিদো মন্যন্তে; কিঞ্চ বাহ্যজ্ঞানেঽপি জ্ঞানজননশক্ত এবাযমাত্মা, পরং করণাভাবাত্ কদাচিন্ন প্রবর্ততে| কার্যজ্ঞানমিতি কার্যপ্রবৃত্তিজনকবাহ্যবিষযজ্ঞানং; তেন নির্বিষযং জ্ঞানমাত্মন ইন্দ্রিযাভাবে ভবতীতি সূচযতি | ভাবৈরিত্যত্র ‘যৈঃ’ ইতি শেষঃ| বর্ততে উত্পদ্যতে| অত্রৈব দৃষ্টান্তমাহ- জানন্নপীত্যাদি| জানন্নপীতি ঘটং কর্তুং জানন্নপীত্যর্থঃ| মৃদো মৃত্তিকাযা অভাবাত্||১৯||-

Adhikarana 24 (20-21) · Śloka 22

শ্রূযতাং চেদমধ্যাত্মমাত্মজ্ঞানবলং মহত্||২০|| ইন্দ্রিযাণি চ সঙ্ক্ষিপ্য মনঃ সঙ্ক্ষিপ্য চঞ্চলম্| প্রবিশ্যাধ্যাত্মমাত্মজ্ঞঃ স্বে জ্ঞানে পর্যবস্থিতঃ||২১|| সর্বত্রাবহিতজ্ঞানঃ সর্বভাবান্ পরীক্ষতে|২২|

আত্মনো জ্ঞত্বে সাধনান্তরমাহ- শ্রূযতামিত্যাদি| আত্মানমধি অধ্যাত্মম্| আত্মনো জ্ঞানস্য বলমাত্মজ্ঞানবলম্| সঙ্ক্ষিপ্যেতি বিষযেভ্যো ব্যাবর্ত্য| মনঃ সঙ্ক্ষিপ্যেতি মনোঽপ্যাত্মব্যতিরিক্তবিষযান্নিগৃহ্য| চঞ্চলমিতি স্বভাবতঃ| স্বে জ্ঞানে ইতি আত্মজ্ঞানে| সর্বভাবান্ পরীক্ষত ইতি বিনাঽপীন্দ্রিযৈঃ সমাধিবলাদেব যস্মাত্ সর্বজ্ঞো ভবতি, তস্মাজ্জ্ঞস্বভাব এব নিরিন্দ্রিযোঽপ্যাত্মা||২০-২১||-

Adhikarana 25 (22-24) · Śloka 24

গৃহ্ণীষ্ব চে(বে)দমপরং ভরদ্বাজ বিনির্ণযম্||২২|| নিবৃত্তেন্দ্রিযবাক্চেষ্টঃ সুপ্তঃ স্বপ্নগতো যদা| বিষযান্ সুখদুঃখে চ বেত্তি নাজ্ঞোঽপ্যতঃ স্মৃতঃ||২৩|| নাত্মজ্ঞানাদৃতে চৈকং জ্ঞানং কিঞ্চিত্ প্রবর্ততে| ন হ্যেকো বর্ততে ভাবো বর্ততে নাপ্যহেতুকঃ||২৪||

অপরমপি লৌকিকং নিরিন্দ্রিযস্য জ্ঞানসদ্ভাবোদাহরণমাহ- গৃহ্ণীষ্বেত্যাদি| স্বপ্নগত ইতি স্বপ্নদর্শনাবস্থাং প্রাপ্তঃ| আত্মজ্ঞানবিষযজ্ঞানযোর্বিশেষমাহ- নাত্মেত্যাদি| আত্মজ্ঞানান্নিত্যাদ্বিনা, কিঞ্চিজ্জ্ঞানং বিষযজম্, একম্ সহাযং, ন প্রবর্ততে ইন্দ্রিযাদিকরণরূপসহাযং বিনা নোত্পদ্যতে| আত্মজ্ঞানং চ নিত্যমেব সাঙ্খ্যেঽপ্যুক্তং - “চিচ্ছক্তিরপরিণামিনী” ইত্যাদিনা “আত্মনঃ” ইত্যন্তেন| অত্রোপপত্তিমাহ- ন হ্যেকো বর্ততে ভাব ইতি| ভাবঃ উত্পত্তিধর্মা, একঃ সন্ কারণরহিতঃ সন্, ন বর্ততে নোত্পদ্যতে| তথা ভাবঃ কারণজন্যত্বে সত্যপি অহেতুক ইতি অকর্তৃকো ন বর্ততে নোত্পদ্যতে, কিন্তু কর্তৃকুম্ভকারাধিষ্ঠিতান্যেব মৃচ্চক্রাদীনি প্রবর্তন্তে; তস্মাদ্বিষযজ্ঞানান্যপি ইন্দ্রিযমনোর্থৈস্তথা কর্ত্রা চাত্মনা জন্যন্ত ইতি ভাবঃ||২২-২৪||

Adhikarana 26 (25) · Śloka 25

তস্মাজ্জ্ঞঃ প্রকৃতিশ্চাত্মা দ্রষ্টা কারণমেব চ| সর্বমেতদ্ভরদ্বাজ নির্ণীতং জহি সংশযম্||২৫||

উপসংহরতি- তস্মাদিত্যাদি| অত্র চাত্মনো জ্ঞত্বাজ্ঞত্বপ্রসক্ত্যাঽঽপাদিতং সবিকারত্বমাত্মনো নিত্যজ্ঞানসাধনেনৈব পরিহৃতমিতি কৃত্বা ন পৃথক্ পরিহৃতম্| ভরদ্বাজশব্দেনেহ নাত্রেযগুরুরুচ্যতে, কিন্তু অন্য এব ভরদ্বাজগোত্রঃ কশ্চিত্; তেন, তস্য সংশযচ্ছেদনমাত্রেযেণোপপন্নমেব||২৫||

Adhikarana 27 (26-27) · Śloka 27

তত্র শ্লোকৌ- হেতুর্গর্ভস্য নির্বৃত্তৌ বৃদ্ধৌ জন্মনি চৈব যঃ| পুনর্বসুমতির্যা চ ভরদ্বাজমতিশ্চ যা||২৬|| প্রতিজ্ঞাপ্রতিষেধশ্চ বিশদশ্চাত্মনির্ণযঃ| গর্ভাবক্রান্তিমুদ্দিশ্য খুড্ডীকাং তত্প্রকাশিতম্||২৭||

সঙ্গ্রহে হেতুশব্দো গর্ভাদিষু জন্মান্তেষু সম্বধ্যতে| প্রতিজ্ঞাপ্রতিষেধো ভরদ্বাজকৃতো জ্ঞেযঃ| তত্সাধনং চ যদাত্রেযস্য তত্ ‘বিশদশ্চাত্মনির্ণযঃ’ ইত্যনেনোক্তম্| তদিতি সামান্যেন মাত্রাদিপ্রত্যবমর্শান্নপুংসকম্||২৬-২৭||

Adhikarana puShpikA · Śloka 3

ইত্যগ্নিবেশকৃতে তন্ত্রে চরকপ্রতিসংস্কৃতে শারীরস্থানে খুড্ডীকাগর্ভাবক্রান্তিশারীরং নাম তৃতীযোঽধ্যাযঃ||৩||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং শারীরস্থানে খুড্ডীকাগর্ভাবক্রান্তিশারীরং নাম তৃতীযোঽধ্যাযঃ||৩||