Adhikarana 1 (1-2) · Śloka 2
অথাতো মহতীং গর্ভাবক্রান্তিং শারীরং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो महतीं गर्भावक्रान्तिं शारीरं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
খুড্ডীকাগর্ভাবক্রান্তিপ্রপঞ্চত্বান্মহত্যা গর্ভাবক্রান্তেরনন্তরমভিধানম্||১-২||
Adhikarana 2 (3) · Śloka 3
যতশ্চ গর্ভঃ সম্ভবতি, যস্মিংশ্চ গর্ভসঞ্জ্ঞা, যদ্বিকারশ্চ গর্ভঃ, যযা চানুপূর্ব্যাঽভিনির্বর্ততে কুক্ষৌ, যশ্চাস্য বৃদ্ধিহেতুঃ, যতশ্চাস্যাজন্ম ভবতি, যতশ্চ জাযমানঃ কুক্ষৌ বিনাশং প্রাপ্নোতি, যতশ্চ কার্ত্স্ন্যেনাবিনশ্যন্ বিকৃতিমাপদ্যতে, তদনুব্যাখ্যাস্যামঃ||৩||
यतश्च गर्भः सम्भवति, यस्मिंश्च गर्भसञ्ज्ञा, यद्विकारश्च गर्भः, यया चानुपूर्व्याऽभिनिर्वर्तते कुक्षौ, यश्चास्य वृद्धिहेतुः, यतश्चास्याजन्म भवति, यतश्च जायमानः कुक्षौ विनाशं प्राप्नोति, यतश्च कार्त्स्न्येनाविनश्यन् विकृतिमापद्यते, तदनुव्याख्यास्यामः||३||
🔊 Audio coming soon
যত ইতি যতঃ কারণাত্| যদ্বিকার ইতি যন্ময ইত্যর্থঃ| যযাঽঽনুপূর্ব্যা যেনানুক্রমেণেত্যর্থঃ| কার্ত্স্ন্যেনাবিনশ্যন্নিতি মরণমগচ্ছন্||৩||
Adhikarana 3 (4) · Śloka 4
মাতৃতঃ পিতৃত আত্মতঃ সাত্ম্যতো রসতঃ সত্ত্বত ইত্যেতেভ্যো ভাবেভ্যঃ সমুদিতেভ্যো গর্ভঃ সম্ভবতি| তস্য যে যেঽবযবা যতো যতঃ সম্ভবতঃ সম্ভবন্তি তান্ বিভজ্য মাতৃজাদীনবযবান্ পৃথক্ পৃথগুক্তমগ্রে||৪||
मातृतः पितृत आत्मतः सात्म्यतो रसतः सत्त्वत इत्येतेभ्यो भावेभ्यः समुदितेभ्यो गर्भः सम्भवति| तस्य ये येऽवयवा यतो यतः सम्भवतः सम्भवन्ति तान् विभज्य मातृजादीनवयवान् पृथक् पृथगुक्तमग्रे||४||
🔊 Audio coming soon
যে যে ভাবা মাতৃজপিতৃজপ্রভৃতযস্ত্বগ্লোহিতাদযঃ, যতো যতো মাত্রাদেঃ সম্ভবন্তি, তান্ মাতৃজাদীনবযবান্ পৃথগ্বিভজ্য, অগ্রে পূর্বাধ্যাযে; তেনাত্র মাতৃজাদযো নোক্তা ইতি বাক্যার্থঃ ফলতি| অযং চার্থো যদ্যপি পূর্বাধ্যায এবোক্তো “মাতৃজশ্চাযং” (শা. ৩) ইত্যাদিনা, তথাঽপি প্রশ্নক্রমবিশুদ্ধ্যনুরোধাত্ পুনরিহ কৃতঃ; যেন প্রথমং কারণং, তদনু কার্যরূপো গর্ভঃ, তদনু গর্ভধর্মোঽভিধেয ইতি ক্রমেণ প্রশ্নঃ শোভতে||৪||
Adhikarana 4 (5) · Śloka 5
শুক্রশোণিতজীবসংযোগে তু খলু কুক্ষিগতে গর্ভসঞ্জ্ঞা ভবতি||৫||
शुक्रशोणितजीवसंयोगे तु खलु कुक्षिगते गर्भसञ्ज्ञा भवति||५||
🔊 Audio coming soon
যত্তু “শুক্রশোণিতসংসর্গমন্তর্গর্ভাশযগতং” ইত্যাদিনা, “গর্ভোঽভিনির্বর্ততে” (শা.অ.৩) ইত্যন্তেনোক্তং, তত্রাযমসৌ গর্ভশব্দাভিধেযোঽর্থ ইতি নাভিহিতম্, অপেক্ষতে চ; তেনেহ গর্ভসঞ্জ্ঞাভিধেযার্থব্যাকরণমপুনরুক্তমেব| কুক্ষিগতে ইতি কুক্ষ্যেকদেশগতগর্ভাশযগতে| সংযোগে ইতি সম্যগ্যোগে; তেন জীবস্যাতিবাহিকশরীরেণ যোগঃ সঙ্গৃহ্যতে, ন চাত্মনো ব্যাপকত্বেন যো যোগো গর্ভজনকঃ| এবম্ভূতশ্চ সংযোগো যদ্যপি কুক্ষাবেব ভবতি, তথাঽপি সিদ্ধমেবার্থং শিষ্যং প্রতিপাদযিতুং “কুক্ষিগতে” ইতি পদং কৃতম্||৫||
Adhikarana 5 (6) · Śloka 6
গর্ভস্তু খল্বন্তরিক্ষবায্বগ্নিতোযভূমিবিকারশ্চেতনাধিষ্ঠানভূতঃ| এবমনযা যুক্ত্যা পঞ্চমহাভূতবিকারসমুদাযাত্মকো গর্ভশ্চেতনাধিষ্ঠানভূতঃ; স হ্যস্য ষষ্ঠো ধাতুরুক্তঃ||৬||
गर्भस्तु खल्वन्तरिक्षवाय्वग्नितोयभूमिविकारश्चेतनाधिष्ठानभूतः| एवमनया युक्त्या पञ्चमहाभूतविकारसमुदायात्मको गर्भश्चेतनाधिष्ठानभूतः; स ह्यस्य षष्ठो धातुरुक्तः||६||
🔊 Audio coming soon
গর্ভস্ত্বিত্যাদি| গর্ভারম্ভকাণ্যপি ভূম্যাদীনি পরিত্যজ্যান্তরিক্ষমাদৌ কৃতং, বক্ষ্যমাণভূতগ্রহণানুরোধাত্| বক্ষ্যতি হি- ‘অন্তরিক্ষং পূর্বমন্যেভ্যো গুণেভ্য উপাদত্তে’ ইত্যাদি| চেতনাধিষ্ঠানভূত ইতি আত্মনো ভোগাযতনস্বরূপ ইত্যর্থঃ, চেতনাশব্দেন হ্যাত্মোচ্যতে; কিংবা, ভূতশব্দঃ সাদৃশ্যে; তেনাধিষ্ঠানমিবাত্মনঃ শরীরং, ন তু পরমার্থতো নিরাশ্রযস্যাত্মনো ভোগাযতনত্বব্যতিরেকেণ শরীরমাশ্রযো ভবতি| অনযা যুক্ত্যেতি অনযা ভূতবিকাররূপযা যোজনযা পঞ্চমহাভূতবিকারসমুদাযাত্মকো ভবতি, অন্যযা যুক্ত্যা কতিধাপুরুষীযোক্তশ্চতুর্বিংশতিকো ভবতি, তথা মাতৃজাদিরূপচিন্তযা মাত্রাদিসমুদাযাত্মকো ভবতীত্যর্থঃ| ন চৈতেষাং পক্ষাণাং বিরোধোঽস্তি; যতো মাতৃজাদিব্যপদেশেঽপি পঞ্চমহাভূতবিকারত্বমবিরুদ্ধমেব, যেন মাতৃজাদযোঽপ্যস্য মহাভূতবিকারা এব; উক্তং হি- “রসাত্মমাতাপিতৃসম্ভবানি ভূতানি বিদ্যাদ্দশ ষট্ চ দেহে” (শা. ২) ইতি; চতুর্বিংশতিকত্বেঽপি চ পঞ্চমহাভূতাত্মকরূপতৈব তত্র প্রপঞ্চিতা| স হীত্যাদি| অস্যেতি গর্ভস্য||৬||
Adhikarana 6 (7) · Śloka 7
যযা চানুপূর্ব্যাঽভিনির্বর্ততে কুক্ষৌ তাং ব্যাখ্যাস্যামঃ- গতে পুরাণে রজসি নবে চাবস্থিতে শুদ্ধস্নাতাং স্ত্রিযমব্যাপন্নযোনিশোণিতগর্ভাশযামৃতুমতীমাচক্ষ্মহে| তযা সহ তথাভূতযা যদা পুমানব্যাপন্নবীজো মিশ্রীভাবং গচ্ছতি, তদা তস্য হর্ষোদীরিতঃ পরঃ শরীরধাত্বাত্মা শুক্রভূতোঽঙ্গাদঙ্গাত্ সম্ভবতি| স তথা হর্ষভূতেনাত্মনোদীরিতশ্চাধিষ্ঠিতশ্চ বীজরূপো ধাতুঃ পুরুষশরীরাদভিনিষ্পত্ত্যোচিতেন পথা গর্ভাশযমনুপ্রবিশ্যার্তবেনাভিসংসর্গমেতি||৭||
यया चानुपूर्व्याऽभिनिर्वर्तते कुक्षौ तां व्याख्यास्यामः- गते पुराणे रजसि नवे चावस्थिते शुद्धस्नातां स्त्रियमव्यापन्नयोनिशोणितगर्भाशयामृतुमतीमाचक्ष्महे| तया सह तथाभूतया यदा पुमानव्यापन्नबीजो मिश्रीभावं गच्छति, तदा तस्य हर्षोदीरितः परः शरीरधात्वात्मा शुक्रभूतोऽङ्गादङ्गात् सम्भवति| स तथा हर्षभूतेनात्मनोदीरितश्चाधिष्ठितश्च बीजरूपो धातुः पुरुषशरीरादभिनिष्पत्त्योचितेन पथा गर्भाशयमनुप्रविश्यार्तवेनाभिसंसर्गमेति||७||
🔊 Audio coming soon
গত ইতি নিবৃত্তে | পুরাণ ইতি ঋতুকালাতিক্রমসঞ্চিতে| নবে চাবস্থিত ইতিবচনেন নবেঽপ্যনবস্থিতে গর্ভকারণত্বং নাস্তীতি দর্শযতি| শুদ্ধস্নাতামিত্যনেন শুদ্ধস্নাতৈব স্ত্রী গম্যা নাস্নাতা, অশুদ্ধত্বাদিতি দর্শযতি| স্ত্যাযত্যস্যাং গর্ভ ইতি স্ত্রী; অনেন বন্ধ্যাং নিরস্যতি| ঋতুমতীমিত্যত্র প্রশংসাযাং মতুপ্| তযা সহেতি তযা স্ত্রিযা| তথাভূতযেতি তাদৃগৃতুযুক্তযা| হর্ষঃ প্রীতিবিশেষঃ, তেনোদীরিতঃ প্রেরিতঃ| পর ইতি সারঃ; কিংবা পরকালোত্পন্নঃ পরঃ, শুক্রং হি সর্বধাতুভ্যঃ পরমুত্পদ্যতে | শরীরধাত্বাত্মেতি শরীরধাতুরূপঃ| শুক্রভূত ইতি শুক্ররূপ এবাঙ্গাদঙ্গাত্ সম্ভবতি ব্যজ্যতে| তেন নাঙ্গেভ্যঃ শুক্রমুত্পদ্যতে, কিন্তু শুক্ররূপতযৈব স্থিতং ব্যজ্যতে| বচনং হি- “সর্বত্রানুগতং দেহে শুক্রং” (চি. অ. ২পা. ৪) ইতি| হর্ষভূতেনেতি হর্ষমযতাং গতেন; উদীরিতশ্চাধিষ্ঠিতশ্চেত্যনেন উদীরণকালে তথা নিঃসরণকালে হর্ষমযাত্মাধিষ্ঠানং শুক্রস্য গর্ভাশযপ্রাপ্তিকারণং দর্শযতি; যদি শুক্রপ্রবৃত্তিকালে পুরুষো হর্ষরহিতঃ স্যান্ন তদা সম্যক্ শুক্রপ্রবৃত্তিঃ, তথা বেগবিঘাতান্ন গর্ভাশযপ্রাপ্তির্ভবতি| বীজরূপো ধাতুঃ শুক্রম্| অভিসংসর্গাং সম্যঙ্মূর্চ্ছনম্||৭||
Adhikarana 7 (8) · Śloka 8
তত্র পূর্বং চেতনাধাতুঃ সত্ত্বকরণো গুণগ্রহণায প্রবর্ততে; স হি হেতুঃ কারণং নিমিত্তমক্ষরং কর্তা মন্তা বেদিতা বোদ্ধা দ্রষ্টা ধাতা ব্রহ্মা বিশ্বকর্মা বিশ্বরূপঃ পুরুষঃ প্রভবোঽব্যযো নিত্যো গুণী গ্রহণং প্রধানমব্যক্তং জীবো জ্ঞঃ পুদ্গলশ্চেতনাবান্ বিভুর্ভূতাত্মা চেন্দ্রিযাত্মা চান্তরাত্মা চেতি| স গুণোপাদানকালেঽন্তরিক্ষং পূর্বতরমন্যেভ্যো গুণেভ্য উপাদত্তে, যথা- প্রলযাত্যযে সিসৃক্ষুর্ভূতান্যক্ষরভূত আত্মা সত্ত্বোপাদানঃ পূর্বতরমাকাশং সৃজতি, ততঃ ক্রমেণ ব্যক্ততরগুণান্ ধাতূন্ বায্বাদিকাংশ্চতুরঃ; তথা দেহগ্রহণেঽপি প্রবর্তমানঃ পূর্বতরমাকাশমেবোপাদত্তে, ততঃ ক্রমেণ ব্যক্ততরগুণান্ ধাতূন্ বায্বাদিকাংশ্চতুরঃ| সর্বমপি তু খল্বেতদ্গুণোপাদানমণুনা কালেন ভবতি||৮||
तत्र पूर्वं चेतनाधातुः सत्त्वकरणो गुणग्रहणाय प्रवर्तते; स हि हेतुः कारणं निमित्तमक्षरं कर्ता मन्ता वेदिता बोद्धा द्रष्टा धाता ब्रह्मा विश्वकर्मा विश्वरूपः पुरुषः प्रभवोऽव्ययो नित्यो गुणी ग्रहणं प्रधानमव्यक्तं जीवो ज्ञः पुद्गलश्चेतनावान् विभुर्भूतात्मा चेन्द्रियात्मा चान्तरात्मा चेति| स गुणोपादानकालेऽन्तरिक्षं पूर्वतरमन्येभ्यो गुणेभ्य उपादत्ते, यथा- प्रलयात्यये सिसृक्षुर्भूतान्यक्षरभूत आत्मा सत्त्वोपादानः पूर्वतरमाकाशं सृजति, ततः क्रमेण व्यक्ततरगुणान् धातून् वाय्वादिकांश्चतुरः; तथा देहग्रहणेऽपि प्रवर्तमानः पूर्वतरमाकाशमेवोपादत्ते, ततः क्रमेण व्यक्ततरगुणान् धातून् वाय्वादिकांश्चतुरः| सर्वमपि तु खल्वेतद्गुणोपादानमणुना कालेन भवति||८||
🔊 Audio coming soon
সত্ত্বং মনঃ করণং যস্য স সত্ত্বকরণঃ; আত্মা নিষ্ক্রিযত্বেন ক্রিযাবতা মনসা যত্ কার্যং করোতি, তচ্চ কার্যং মনসা ক্রিযমাণমপ্যচেতনেন চেতনাবত আত্মন এবোচ্যতে| বচনং হি- “চেতনাবান্ যতশ্চাত্মা ততঃ কর্তা নিরুচ্যতে” (শা. ১) ইতি| গুণগ্রহণাযেত্যত্র গুণশব্দেন গুণগুণিনোরভেদোপচারাদ্গুণবন্তি ভূতান্যুচ্যন্তে| কিংবা, গুণোঽপ্রধানং, প্রধানং চাত্মা, তদ্ব্যতিরিক্তানি চ ভূতানি গুণাঃ| কস্মাদাত্মা ভূতানি গৃহ্ণাত্যপ্রধানরূপাণীত্যাশঙ্কাযামাত্মনঃ প্রাধান্যখ্যাপকান্ পর্যাযানাহ- স হীত্যাদি| ন ক্ষরতীত্যক্ষরম্| গুণী ভূতরূপগুণবানিত্যর্থঃ| গৃহ্ণাতি ভূতানীতি গ্রহণম্| এতৈঃ পর্যাযৈরাত্মনোঽভিধেযস্যেতরপদার্থোপকার্যত্বেনাশ্রযত্বং প্রসিদ্ধং দর্শ্যতে| পূর্বতরং প্রথমমেব| অন্যেভ্যো গুণেভ্য ইতি বায্বাদিভ্যঃ| অত্র গর্ভে ভূতগ্রহণক্রমে দৃষ্টান্তমাহ- যথেত্যাদি| প্রলযস্য মহাপ্রলযস্য, অত্যযে ইতি আদিসর্গ ইত্যর্থঃ| সিসৃক্ষুরিতি স্রষ্টুমিচ্ছুঃ| ভূতানি আকাশাদীনি| সত্ত্বোপাদান ইতি মনঃকরণঃ| মহাপ্রলযে হি বিকারস্য প্রকৃতৌ লযাত্ প্রকৃতিপুরুষাবেব পরমব্যক্তরূপৌ তিষ্ঠতঃ, ততশ্চ সর্গারম্ভে প্রকৃতের্মহদাদিপ্রপঞ্চ উত্পদ্যতে ক্রমেণ; তত্র প্রথমমাকাশমুত্পদ্যতে, ততো বায্বাদীনি ব্যক্তানীতি সাঙ্খ্যসিদ্ধান্তঃ| আকাশস্য চ জন্যত্বং সাঙ্খ্যমতেনৈব জ্ঞেযম্| দেহগ্রহণেঽপীতি গর্ভস্বরূপগ্রহণেঽপি| উপাদত্ত ইতি শুক্রশোণিতগতমাকাশমাকাশমযতযা স্বীকরোতি| ব্যক্ততরগুণানিতি আকাশমেকগুণমপেক্ষ্য শব্দস্পর্শগুণো বাযুর্ব্যক্ততরঃ , তমপেক্ষ্য শব্দস্পর্শরূপগুণ তেজো ব্যক্ততরমিত্যাদি | অযং চ ভূতগ্রহণক্রম আগমসিদ্ধ এব, নাত্র যুক্তিস্তথাবিধা হৃদযঙ্গমাঽস্তি| এতচ্চ ভূতগ্রহণং লঘুনৈব কালেন ভবতীতি দর্শযন্নাহ- সর্বমিত্যাদি||৮||
Adhikarana 8 (9-10) · Śloka 10
স সর্বগুণবান্ গর্ভত্বমাপন্নঃ প্রথমে মাসি সম্মূর্চ্ছিতঃ সর্বধাতুকলুষীকৃতঃ খেটভূতো ভবত্যব্যক্তবিগ্রহঃ সদসদ্ভূতাঙ্গাবযবঃ||৯|| দ্বিতীযে মাসি ঘনঃ সম্পদ্যতে পিণ্ডঃ পেশ্যর্বুদং বা| তত্র ঘনঃ পুরুষঃ, পেশী স্ত্রী, অর্বুদং নপুংসকম্||১০||
स सर्वगुणवान् गर्भत्वमापन्नः प्रथमे मासि सम्मूर्च्छितः सर्वधातुकलुषीकृतः खेटभूतो भवत्यव्यक्तविग्रहः सदसद्भूताङ्गावयवः||९|| द्वितीये मासि घनः सम्पद्यते पिण्डः पेश्यर्बुदं वा| तत्र घनः पुरुषः, पेशी स्त्री, अर्बुदं नपुंसकम्||१०||
🔊 Audio coming soon
সর্বধাতুকলুষীকৃত ইতি অব্যক্তসর্বধাতুতযা কলুষীকৃতঃ| ধাতুশব্দেন চ ভূতান্যুচ্যন্তে, কিংবা রসাদিধাতুবীজানি| খেটঃ শ্লেষ্মা; তেন খেটভূত ইতি শ্লেষ্মসদৃশ ইত্যর্থঃ| অব্যক্তবিগ্রহ ইত্যস্য বিবরণং- সদসদ্ভূতাঙ্গাবযব ইতি; বিদ্যমানাবিদ্যমানাঙ্গপ্রত্যঙ্গ ইত্যর্থঃ; অঙ্গানাং চ বীজরূপতযা স্থিতত্বেন সত্ত্বম্, অব্যক্তভাবাচ্চাসত্ত্বম্ | কিংবা, সদসদ্ভূতাঙ্গাবযবো ঘনঃ সম্পদ্যতে ইতি যোজনা| ঘনঃ কঠিনঃ| পিণ্ডো গ্রন্থ্যাকারঃ| পেশী দীর্ঘা মাংসপেশ্যাকারা| অর্বুদং বর্তুলোন্নতম্||৯-১০||
Adhikarana 9 (11) · Śloka 11
তৃতীযে মাসি সর্বেন্দ্রিযাণি সর্বাঙ্গাবযবাশ্চ যৌগপদ্যেনাভিনির্বর্তন্তে||১১||
तृतीये मासि सर्वेन्द्रियाणि सर्वाङ्गावयवाश्च यौगपद्येनाभिनिर्वर्तन्ते||११||
🔊 Audio coming soon
অঙ্গানি শিরঃপ্রভৃতীনি, তদবযবাশ্চেত্যঙ্গাবযবাঃ| যৌগপদ্যেনেতি বচনেন “কুমারস্য শিরঃ পূর্বমভিনির্বর্ততে” (শা. ৬) ইত্যাদিবক্ষ্যমাণান্যেকীযমতানি নিষেধযতি| যৌগপদ্যেন হি সর্বাঙ্গনির্বৃত্তিরিতি সিদ্ধান্তঃ||১১||
Adhikarana 10 (12) · Śloka 12
তত্রাস্য কেচিদঙ্গাবযবা মাতৃজাদীনবযবান্ বিভজ্য পূর্বমুক্তা যথাবত্| মহাভূতবিকারপ্রবিভাগেন ত্বিদানীমস্য তাংশ্চৈবাঙ্গাবযবান্ কাংশ্চিত্ পর্যাযান্তরেণাপরাংশ্চানুব্যাখ্যাস্যামঃ| মাতৃজাদযোঽপ্যস্য মহাভূতবিকারা এব| তত্রাস্যাকাশাত্মকং শব্দঃ শ্রোত্রং লাঘবং সৌক্ষ্ম্যং বিবেকশ্চ, বায্বাত্মকং স্পর্শঃ স্পর্শনং রৌক্ষ্যং প্রেরণং ধাতুব্যূহনং চেষ্টাশ্চ শারীর্যঃ, অগ্ন্যাত্মকং রূপং দর্শনং প্রকাশঃ পক্তিরৌষ্ণ্যং চ, অবাত্মকং রসো রসনং শৈত্যং মার্দবং স্নেহঃ ক্লেদশ্চ, পৃথিব্যাত্মকং গন্ধো ঘ্রাণং গৌরবং স্থৈর্যং মূর্তিশ্চেতি||১২||
तत्रास्य केचिदङ्गावयवा मातृजादीनवयवान् विभज्य पूर्वमुक्ता यथावत्| महाभूतविकारप्रविभागेन त्विदानीमस्य तांश्चैवाङ्गावयवान् कांश्चित् पर्यायान्तरेणापरांश्चानुव्याख्यास्यामः| मातृजादयोऽप्यस्य महाभूतविकारा एव| तत्रास्याकाशात्मकं शब्दः श्रोत्रं लाघवं सौक्ष्म्यं विवेकश्च, वाय्वात्मकं स्पर्शः स्पर्शनं रौक्ष्यं प्रेरणं धातुव्यूहनं चेष्टाश्च शारीर्यः, अग्न्यात्मकं रूपं दर्शनं प्रकाशः पक्तिरौष्ण्यं च, अबात्मकं रसो रसनं शैत्यं मार्दवं स्नेहः क्लेदश्च, पृथिव्यात्मकं गन्धो घ्राणं गौरवं स्थैर्यं मूर्तिश्चेति||१२||
🔊 Audio coming soon
কেচিদিতি ন সর্বে| তত্র মাতৃজাদ্যঙ্গকথনেন শব্দাদযো য ইহ ভূতবিকারত্বেন বক্ষ্যন্তে তে ন সর্বে প্রোক্তাঃ, কিং তু কেচিদেব ত্বগাদযঃ| পর্যাযান্তরেণেতিবচনাদ্যে মাতৃজাদযঃ ‘ত্বক্ চ লোহিতং চ’ (শা.অ.৩) ইত্যাদিনোক্তাস্ত ইহ ন সাক্ষাদ্বক্তব্যাঃ, কিন্তু যে ত্বগ্গতা মূর্তিস্নেহমার্দবাদযস্তে ভূতজন্যত্বেনোচ্যমানাস্ত্বচোঽভিধাযকা ভবন্তি| এবং শোণিতাদিগতভূতবিকারকথনেন শোণিতাদিকথনং জ্ঞেযম্| ত্বগাদযো বক্ষ্যমাণা ইতি ভূতবিকারসমুদাযরূপা এব| ত্বগাদীনাং মাতৃজাদিরূপেণ যদভিধানং, তন্মাত্রাদ্যধীনত্বপ্রতিপত্ত্যর্থম্| পুনশ্চেহ ভূতজন্যত্বেনাভিধানমঙ্গানাং ক্ষযে বা বৃদ্ধৌ বা সত্যাং তত্কারণভূতভূতোপযোগপ্রতিষেধাভ্যাং বৃদ্ধিক্ষযজননজ্ঞানার্থম্| যদঙ্গং যদ্ভূতপ্রভবং তদঙ্গং তদ্ভূতপ্রধানেন দ্রব্যেণ বর্ধতে, ক্ষীযতে চ তদ্বিপরীতেন| লাঘবং যদ্যপি বাযৌ পঠন্তি- “রূক্ষঃ শীতো লঘুশ্চৈব” (সূ.অ.১) ইত্যাদিনা, তথাঽপি আকাশেঽতিশযিতং জ্ঞেযং, তেনেহাকাশবিকারে পঠন্তি; আকাশং হি অত্যর্থসূক্ষ্মত্বাদ্বাতাদপি লঘু| বিবেকো বিচ্ছেদঃ| ধাতুব্যূহনং ধাতুরচনা ধাতুবহনং চ| দৃশ্যতেঽনেনেতি দর্শনং চক্ষুরিন্দ্রিযম্| মূর্তিঃ কাঠিন্যম্||১২||
Adhikarana 11 (13) · Śloka 13
এবমযং লোকসম্মিতঃ পুরুষঃ| যাবন্তো হি লোকে মূর্তিমন্তো ভাববিশেষাস্তাবন্তঃ পুরুষে, যাবন্তঃ পুরুষে তাবন্তো লোকে ইতি; বুধাস্ত্বেবং দ্রষ্টুমিচ্ছন্তি||১৩||
एवमयं लोकसम्मितः पुरुषः| यावन्तो हि लोके मूर्तिमन्तो भावविशेषास्तावन्तः पुरुषे, यावन्तः पुरुषे तावन्तो लोके इति; बुधास्त्वेवं द्रष्टुमिच्छन्ति||१३||
🔊 Audio coming soon
এতদ্ভূতবিকারমযত্বং শরীরস্য লোকসাম্যেন জ্ঞাতং সন্মোক্ষস্যাপি পরমাভীষ্টস্য কারণং ভবতীতি লোকসাম্যং দর্শযন্নাহ- এবমযমিত্যাদি| এবমিতি পঞ্চভূতবিকারমযত্বেন| লোকসম্মিতি ইতি লোকতুল্যঃ| ইহ চ ভূতবিকারমযত্বং যচ্ছরীরস্যোক্তং তেন ভূতবিকারমযত্বমধিকৃত্য সাদৃশ্যমুক্তং লোকপুরুষযোঃ; যত্ত্বাধ্যাত্মিকং লোকপুরুষযোঃ সাম্যং পুরুষবিচযে বক্তব্যং, তদপীহানুক্তমপি ‘যাবন্তো হি’ ইত্যাদিবিশেষাভিধানেন সূচিতং জ্ঞেযম্| তেন, যাবন্তো ভাববিশেষা আধ্যাত্মিকা অন্তরাত্মসত্ত্বাহঙ্কারাদযো, ভৌতিকা বা মূর্তিক্লেদাদযঃ, তে পুরুষগতা লোকেনাপি সমানা ইতি জ্ঞেযম্| এতচ্চ লোকপুরুষযোঃ সাম্যং পুরুষবিচযে ব্যক্তং ভবিষ্যতি| এতচ্চ লোকপুরুষযোঃ সাম্যকথনং মুমুক্ষূণামেবোপযুক্তমিতি দর্শযন্নাহ- বুধাস্ত্বেবমিত্যাদি| বুধাঃ সম্যগ্জ্ঞানবন্তঃ, মোক্ষযুক্তা ইতি যাবত্| লোকপুরুষসাম্যকথনং চ মোক্ষার্থমেবেতি পুরুষবিচযে স্বযমেব বক্ষ্যতি||১৩||
Adhikarana 12 (14) · Śloka 14
এবমস্যেন্দ্রিযাণ্যঙ্গাবযবাশ্চ যৌগপদ্যেনাভিনির্বর্তন্তেঽন্যত্র তেভ্যো ভাবেভ্যো যেঽস্য জাতস্যোত্তরকালং জাযন্তে; তদ্যথা- দন্তা ব্যঞ্জনানি ব্যক্তীভাবস্তথাযুক্তানি চাপরাণি| এষা প্রকৃতিঃ, বিকৃতিঃ পুনরতোঽন্যথা| সন্তি খল্বস্মিন্ গর্ভে কেচিন্নিত্যা ভাবাঃ, সন্তি চানিত্যাঃ কেচিত্| তস্য য এবাঙ্গাবযবাঃ সন্তিষ্ঠন্তে, ত এব স্ত্রীলিঙ্গং পুরুষলিঙ্গং নপুংসকলিঙ্গং বা বিভ্রতি| তত্র স্ত্রীপুরুষযোর্যে বৈশেষিকা ভাবাঃ প্রধানসংশ্রযা গুণসংশ্রযাশ্চ, তেষাং যতো ভূযস্ত্বং ততোঽন্যতরভাবঃ| তদ্যথা- ক্লৈব্যং ভীরুত্বমবৈশারদ্যং মোহোঽনবস্থানমধোগুরুত্বমসহনং শৈথিল্যং মার্দবং গর্ভাশযবীজভাগস্তথাযুক্তানি চাপরাণি স্ত্রীকরাণি, অতো বিপরীতানি পুরুষকরাণি, উভযভাগাবযবা নপুংসককরাণি ভবন্তি||১৪||
एवमस्येन्द्रियाण्यङ्गावयवाश्च यौगपद्येनाभिनिर्वर्तन्तेऽन्यत्र तेभ्यो भावेभ्यो येऽस्य जातस्योत्तरकालं जायन्ते; तद्यथा- दन्ता व्यञ्जनानि व्यक्तीभावस्तथायुक्तानि चापराणि| एषा प्रकृतिः, विकृतिः पुनरतोऽन्यथा| सन्ति खल्वस्मिन् गर्भे केचिन्नित्या भावाः, सन्ति चानित्याः केचित्| तस्य य एवाङ्गावयवाः सन्तिष्ठन्ते, त एव स्त्रीलिङ्गं पुरुषलिङ्गं नपुंसकलिङ्गं वा बिभ्रति| तत्र स्त्रीपुरुषयोर्ये वैशेषिका भावाः प्रधानसंश्रया गुणसंश्रयाश्च, तेषां यतो भूयस्त्वं ततोऽन्यतरभावः| तद्यथा- क्लैब्यं भीरुत्वमवैशारद्यं मोहोऽनवस्थानमधोगुरुत्वमसहनं शैथिल्यं मार्दवं गर्भाशयबीजभागस्तथायुक्तानि चापराणि स्त्रीकराणि, अतो विपरीतानि पुरुषकराणि, उभयभागावयवा नपुंसककराणि भवन्ति||१४||
🔊 Audio coming soon
প্রকৃতাং তৃতীযমাসভবামিন্দ্রিযাদ্যঙ্গাভিনির্বৃত্তিমুপসংহরতি- এবমস্যেত্যাদি| যুগপদেব যৌগপদ্যং; যৌগপদ্যমিত্যভিধানমিন্দ্রিযাণামপি সর্বাঙ্গাভিনির্বৃত্তেঃ সমকালতোপদর্শনার্থম্| কিং দন্তাদযোঽপি তৃতীযমাসে ভবন্তীত্যাশঙ্ক্যাহ- অন্যত্রেত্যাদি| ব্যঞ্জনানি শ্মশ্রুস্তনাদীনি| ব্যক্তীভাবঃ শুক্ররজসোরাবির্ভাবঃ| তথাযুক্তানীতি জাতোত্তরকালজত্বেন দন্তাদিসদৃশানি চাঙ্গানি বুদ্ধ্যাদীনি | এষা প্রকৃতিরিতি ইন্দ্রিযাণ্যঙ্গাবযবাশ্চ যুগপদ্ভবন্তি, দন্তাদযশ্চ জাতস্যাপি চিরেণ ভবন্তীত্যেবংরূপো মনুষ্যস্বভাব ইত্যর্থঃ| অন্যথেতি কদাচিত্ সদন্ত এব জাযত ইত্যাদিকা বিকৃতির্মনুষ্যস্য| অথ কস্মাদ্দন্তাদযো গর্ভাদিজাযমানা বিকৃতিত্বেনোচ্যন্ত ইত্যাহ- সন্তীত্যাদি| খলুশব্দো হেতৌ| নিত্যা ইতি যাবচ্ছরীরভাবিনঃ করচরণাদযঃ, অনিত্যাশ্চ ন যাবচ্ছরীরভাবিনো দন্তাদযঃ| এতেন, অনিত্যস্বভাবানাং দন্তাদীনাং গর্ভাদ্যজাযমানত্বান্নিত্যত্বং বিকৃতিরিতি যুক্তমিত্যর্থঃ| অথ নিত্যানিত্যেষু মধ্যে কে স্ত্র্যাদিলিঙ্গং বিভ্রতীত্যাহ- তস্যেত্যাদি| সন্তিষ্ঠন্ত ইতি যাবচ্ছরীরং তিষ্ঠন্তি| এতেন, য এব নিত্যা উপস্থাদযস্ত এব স্ত্রীলিঙ্গতাং পুংলিঙ্গতাং বা বিভ্রতি| তত্রোপস্থরূপো নিত্যো ভাবঃ স্ত্রীলিঙ্গং, শেফশ্চ পুংলিঙ্গম্, উপস্থলিঙ্গাকারবিরহিতং চ রন্ধ্রমাত্রং নপুংসকলিঙ্গং ভবতি| কিংবা, স্ত্রিযা যল্লিঙ্গং স্তনাদি, পুরুষস্য বা শ্মশ্রুপ্রভৃতি, নপুংসকস্য বা স্ত্রীপুংসমানাকাররূপং জাতোত্তরকালভাবি, তদপি য এব নিত্যা ভাবা উরঃকপোলপ্রভৃতযস্ত এব কালবশাদ্বিভ্রতীতি বাক্যার্থঃ| উর এব হি স্তনারম্ভকবীজযুক্তং স্ত্রিযা উত্তরকালং স্তনবদ্ভবতি, এবং কপোল এব শ্মশ্রুবীজযুক্তঃ শ্মশ্রুবান্ ভবতি| ন চাবশ্যং যত্ স্তনশ্মশ্রুপ্রভৃতীনাং বীজং চেদস্তি শরীরে, তত্ কিমিতি গর্ভাত্ প্রভৃতি স্তনাদি ন জাযত ইতি; যতো বীজমহিমাঽযং- যত্ স্বকাল এব কার্যং করোতি| যথা- অবনিপতিতমপি শাল্যাদিবীজমৃতুপ্রাপ্তাবেবাঙ্কুরং জনযতি; ন চ স্বভাব উপালম্ভমর্হতি| ‘যদৈবাঙ্গাবযযবাঃ সন্তিষ্ঠন্তে, তদৈব স্ত্র্যাদিলিঙ্গং বিভ্রতি’ ইত্যাদিপাঠপক্ষে তু ব্যক্ত এবার্থঃ| অথ কুতঃ সমানে শুক্রাদৌ কারণে স্ত্র্যাদিবিশেষো ভবতীত্যাহ- বৈশেষিকা ইতি| বৈশেষিকা বিশিষ্টাঃ পরস্পরব্যাবৃত্তা ইতি যাবত্| প্রধানসংশ্রযা ইতি আত্মসংশ্রযাঃ| গুণসংশ্রযা ইতি শুক্রশোণিতগতভূতসংশ্রযাঃ; গুণশব্দেনেহ ভূতান্যুচ্যন্তে| যত ইতি সপ্তম্যাং তসিঃ; তেন যস্মিন্ বৈশেষিকে ভাবে ভূযস্ত্বং দৈববশাদ্ভবতি, ততো ভাবাদন্যতরস্য স্ত্রীরূপস্য পুংরূপস্য বা গর্ভস্যোত্পত্তির্ভবতি; যদি স্ত্রীকরা ভাবা ক্লৈব্যাদযো ভূযাংসো ভবন্তি তদা স্ত্রী জাযতে, বিপর্যযে পুমানিত্যর্থঃ| তত্র স্ত্রীকরান্ ভাবানাহ- তদ্যথেত্যাদি| অবৈশারদ্যং মোহঃ| শৈথিল্যম্ অনিবিডসংযোগতা, যথা- দৃঢশণতন্তুবিরলবাপিতপটস্য শৈথিল্যং; মার্দবং তু নিবিডসংযোগস্যাপি সহজাবযবমার্দবং, যথা- পট্টসূত্রে নিরন্তরবাপিতপটস্য মৃদুত্বম্| ক্লৈব্যাদ্যনবস্থানপর্যন্তং প্রধানসংশ্রযং, শেষং গুণসংশ্রযম্| তথাযুক্তানীত্যনেন যোনিবীজভাগাদীনি গ্রাহযতি| এতে চাধোগুরুত্বাদযো রজোধিক এব বীজে ভবন্তীতি জ্ঞেযম্| তেন, “রক্তেন কন্যামধিকেন” (শা. ২) ইতি যদুক্তং তদনেন সমং ন বিরুদ্ধং ভবতি| বিপরীতানি অক্লৈব্যাদীনীত্যর্থঃ| উভযভাগাবযবা ইতি স্ত্রীপুরুষকারকা অবযবাঃ| নপুংসককরাণীতি নপুংসকনির্দেশোঽব্যক্তগুণাভিপ্রাযেণ| তেন প্রথমং নপুংসককরাণীতি অব্যক্তগুণসন্দোহাভিপ্রাযেণ প্রযুক্তং, ততঃ কানি তানীত্যপেক্ষাযাং বিশেষপরিগ্রহাদুভযভাগাবযবা ইতি পুংলিঙ্গেন নির্দেশো জ্ঞেযঃ|||১৪||
Adhikarana 13 (15) · Śloka 15
তস্য যত্কালমেবেন্দ্রিযাণি সন্তিষ্ঠন্তে, তত্কালমেব চেতসি বেদনা নির্বন্ধং প্রাপ্নোতি; তস্মাত্তদা প্রভৃতি গর্ভঃ স্পন্দতে, প্রার্থযতে চ জন্মান্তরানুভূতং যত্ কিঞ্চিত্, তদ্দ্বৈহৃদয্যমাচক্ষতে বৃদ্ধাঃ| মাতৃজং চাস্য হৃদযং মাতৃহৃদযেনাভিসম্বদ্ধং ভবতি রসবাহিনীভিঃ সংবাহিনীভিঃ; তস্মাত্তযোস্তাভির্ভক্তিঃ সংস্পন্দতে | তচ্চৈব কারণমবেক্ষমাণা ন দ্বৈহৃদয্যস্য বিমানিতং গর্ভমিচ্ছন্তি কর্তুম্| বিমাননে হ্যস্য দৃশ্যতে বিনাশো বিকৃতির্বা| সমানযোগক্ষেমা হি তদা ভবতি গর্ভেণ কেষুচিদর্থেষু মাতা| তস্মাত্ প্রিযহিতাভ্যাং গর্ভিণীং বিশেষেণোপচরন্তি কুশলাঃ||১৫||
तस्य यत्कालमेवेन्द्रियाणि सन्तिष्ठन्ते, तत्कालमेव चेतसि वेदना निर्बन्धं प्राप्नोति; तस्मात्तदा प्रभृति गर्भः स्पन्दते, प्रार्थयते च जन्मान्तरानुभूतं यत् किञ्चित्, तद्द्वैहृदय्यमाचक्षते वृद्धाः| मातृजं चास्य हृदयं मातृहृदयेनाभिसम्बद्धं भवति रसवाहिनीभिः संवाहिनीभिः; तस्मात्तयोस्ताभिर्भक्तिः संस्पन्दते | तच्चैव कारणमवेक्षमाणा न द्वैहृदय्यस्य विमानितं गर्भमिच्छन्ति कर्तुम्| विमानने ह्यस्य दृश्यते विनाशो विकृतिर्वा| समानयोगक्षेमा हि तदा भवति गर्भेण केषुचिदर्थेषु माता| तस्मात् प्रियहिताभ्यां गर्भिणीं विशेषेणोपचरन्ति कुशलाः||१५||
🔊 Audio coming soon
সন্তিষ্ঠন্ত ইতি অভিনির্বর্তন্তে| বেদনা সুখদুঃখোপলব্ধিঃ| নির্বন্ধং প্রাপ্নোতীতি সম্বন্ধং প্রাপ্নোতি, ইন্দ্রিযোত্পাদসমকালমেব সুখদুঃখজ্ঞো ভবতীতি বাক্যার্থঃ| তস্মাদিতি সুখদুঃখসম্বন্ধাত্; সুখোত্পাদনার্থং দুঃখপরিহারার্থং চ স্পন্দতে চলতি, তথা প্রার্থযতে চ সুখহেতূন্ জন্মান্তরানুভূতানিত্যর্থঃ| তদ্গর্ভপ্রার্থনাযুক্তং মাতৃহৃদযং দ্বৈহৃদয্যমিতি বৃদ্ধা জ্ঞানবৃদ্ধা আচক্ষতে| দ্বিহৃদযস্য ভাবদ্ দ্বৈহৃদয্যং মাতৃহৃদযং গর্ভহৃদযেন সমং হৃদযদ্বযং ভবতি| ননু গর্ভহৃদযং কথং মাতৃহৃদযেন সম্বদ্ধং ভবতীত্যাহ- মাতৃজমিতি; মাতৃকারণকার্তবজম্| রসবাহিনীভিরিতি গর্ভপোষণার্থাভির্মাতৃহৃদযগর্ভনাভিপ্রতিবদ্ধাভী রসবাহিনীভিঃ| এতেন, যদ্ গর্ভঃ প্রার্থযতে, তযা প্রার্থনযা রসবাহিনীভির্হৃদযমাগতযা মাতাঽপি তত্প্রার্থনাবতী ভবতি এবং মাতৃপ্রার্থনযাঽপি গর্ভঃ প্রার্থনাবান্ ভবতি| তযোরিতি মাতৃগর্ভযোঃ| ভক্তিঃ ইচ্ছা| তাভিরিতি রসবাহিনীভিঃ| সংস্পন্দত ইতি মাতৃহৃদযাদ্গর্ভহৃদযং যাতি, গর্ভহৃদযাচ্চ মাতৃহৃদযমিত্যর্থঃ| গর্ভস্য বিনাশো বিকৃতির্বেতি মহতা ইচ্ছাবিঘাতেন বিনাশঃ, স্বল্পেন তু বিকৃতিঃ; কিংবা গর্ভেচ্ছাপূর্বিকা মাতুরিচ্ছা, তদ্বিঘাতেন বিনাশো গর্ভস্য, সা হীচ্ছা বিহতা সাক্ষাদ্গর্ভসম্বন্ধিতযা সুকুমারতরং গর্ভং বাতপ্রকোপাদ্বিনাশযতি; যা তু মাতুরিচ্ছা বিহতা, সা মাতরি বাতক্ষোভং জনযতী সমানযোগক্ষেমে গর্ভেঽপি মনাগ্বিকৃতিজননাদ্বিকৃতিং জনযতি| এতদেব দর্শযতি- সমানযোগক্ষেমা হীত্যাদি|- যোগঃ সুখহেতুযোগঃ, ক্ষেমঃ প্রত্যবাযপরিহারঃ, এতৌ যোগক্ষেমৌ মাতুর্গর্ভেণ সমানৌ ভবতঃ| কেষুচিদর্থেষ্বিতিবচনাদতুল্যযোগক্ষেমতা চ ক্বচিদ্ভবতীতি দর্শযতি| তেন, নাবশ্যং মাতুর্বিকারাঃ ক্ষুদাদযো গর্ভে বিকৃতিমাবহন্তি, গর্ভস্য বা মাতরীতি দর্শযতি| গর্ভিণী বিশেষেণেতিবচনাদগর্ভিণ্যপি স্ত্রী ঋতুকালে প্রিযহিতোপচরণীযা| যদুক্তং- “সহচর্যশ্চৈনাং প্রিযহিতাভ্যাং সততমুপচরেযুঃ” (শা. ৮) ইত্যাদি||১৫||
Adhikarana 14 (16) · Śloka 16
তস্যা গর্ভাপত্তের্দ্বৈহৃদয্যস্য চ বিজ্ঞানার্থং লিঙ্গানি সমাসেনোপদেক্ষ্যামঃ| উপচারসাধনং হ্যস্য জ্ঞানে, জ্ঞানং চ লিঙ্গতঃ, তস্মাদিষ্টো লিঙ্গোপদেশঃ| তদ্যথা- আর্তবাদর্শনমাস্যসংস্রবণমনন্নাভিলাষশ্ছর্দিররোচকোঽম্লকামতা চ বিশেষেণ শ্রদ্ধাপ্রণযনমুচ্চাবচেষু ভাবেষু গুরুগাত্রত্বং চক্ষুষোর্গ্লানিঃ স্তনযোঃ স্তন্যমোষ্ঠযোঃ স্তনমণ্ডলযোশ্চ কার্ষ্ণ্যমত্যর্থং শ্বযথুঃ পাদযোরীষল্লোমরাজ্যুদ্গমো যোন্যাশ্চাটালত্বমিতি গর্ভে পর্যাগতে রূপাণি ভবন্তি||১৬||
तस्या गर्भापत्तेर्द्वैहृदय्यस्य च विज्ञानार्थं लिङ्गानि समासेनोपदेक्ष्यामः| उपचारसाधनं ह्यस्य ज्ञाने, ज्ञानं च लिङ्गतः, तस्मादिष्टो लिङ्गोपदेशः| तद्यथा- आर्तवादर्शनमास्यसंस्रवणमनन्नाभिलाषश्छर्दिररोचकोऽम्लकामता च विशेषेण श्रद्धाप्रणयनमुच्चावचेषु भावेषु गुरुगात्रत्वं चक्षुषोर्ग्लानिः स्तनयोः स्तन्यमोष्ठयोः स्तनमण्डलयोश्च कार्ष्ण्यमत्यर्थं श्वयथुः पादयोरीषल्लोमराज्युद्गमो योन्याश्चाटालत्वमिति गर्भे पर्यागते रूपाणि भवन्ति||१६||
🔊 Audio coming soon
উপচারসাধনং যথোচিতোপচারকরণম্| অস্যেতি গৃহীতস্য গর্ভস্য তথা দ্বৈহৃদয্যস্য চ| তত্র গৃহীতগর্ভোপচারো যথা- “শঙ্কিতা চেদ্গর্ভমাপন্না ক্ষীরমনুপস্কৃতং কালে কালে পিবেত্” (শা.অ.৮) ইত্যাদি দ্বিহৃদযোপচারং চাত্রৈব বক্ষ্যতি| জ্ঞানমিতি গর্ভস্য দ্বিহৃদযস্য চ জ্ঞানম্| অম্লকামতা বিশেষেণেতি চ্ছেদঃ| শ্রদ্ধা ইচ্ছা| উচ্চাবচেষ্বিতি উচ্চনীচেষু, ভক্ষণীযত্বেন কৃতেষু চাকৃতেষু চেত্যর্থঃ| ঈষত্ পাদযোঃ শ্বযথুঃ| চাটালত্বং বিবৃতত্বম্| এতানি চ লক্ষণানি স্বরূপেণ গর্ভস্য ভবন্তি, তৃতীযমাসযুক্তানি তু দ্বৈহৃদয্যস্য চ লিঙ্গানি ভবন্তীতি জ্ঞেযম্||১৬||
Adhikarana 15 (17-18) · Śloka 18
সা যদ্যদিচ্ছেত্তত্তদস্যৈ দদ্যাদন্যত্র গর্ভোপঘাতকরেভ্যো ভাবেভ্যঃ||১৭|| গর্ভোপঘাতকরাস্ত্বিমে ভাবা ভবন্তিঃ; তদ্যথা- সর্বমতিগুরূষ্ণতীক্ষ্ণং দারুণাশ্চ চেষ্টাঃ; ইমাংশ্চান্যানুপদিশন্তি বৃদ্ধাঃ- দেবতারক্ষোঽনুচরপরিরক্ষণার্থং ন রক্তানি বাসাংসি বিভৃযান্ন মদকরাণি মদ্যান্যভ্যবহরেন্ন যানমধিরোহেন্ন মাংসমশ্নীযাত্ সর্বেন্দ্রিযপ্রতিকূলাংশ্চ ভাবান্ দূরতঃ পরিবর্জযেত্, যচ্চান্যদপি কিঞ্চিত্ স্ত্রিযো বিদ্যুঃ||১৮||
सा यद्यदिच्छेत्तत्तदस्यै दद्यादन्यत्र गर्भोपघातकरेभ्यो भावेभ्यः||१७|| गर्भोपघातकरास्त्विमे भावा भवन्तिः; तद्यथा- सर्वमतिगुरूष्णतीक्ष्णं दारुणाश्च चेष्टाः; इमांश्चान्यानुपदिशन्ति वृद्धाः- देवतारक्षोऽनुचरपरिरक्षणार्थं न रक्तानि वासांसि बिभृयान्न मदकराणि मद्यान्यभ्यवहरेन्न यानमधिरोहेन्न मांसमश्नीयात् सर्वेन्द्रियप्रतिकूलांश्च भावान् दूरतः परिवर्जयेत्, यच्चान्यदपि किञ्चित् स्त्रियो विद्युः||१८||
🔊 Audio coming soon
দারুণাশ্চেষ্টা ব্যবাযাদিকাঃ | দেবতারক্ষোঽনুচরেভ্যঃ পরিরক্ষণং দেবতারক্ষোঽনুচরপরিরক্ষণম্| যদিত্যাদি| যচ্চান্যত্ স্ত্রিযো গর্ভকালাসেব্যত্বেন বিদ্যুস্তদপি বর্জযেত্| বদন্তি হি স্ত্রিযঃ- “ন গর্ভিণী কূপমবলোকযেত্, ন নদীপারং যাযাত্” ইত্যাদি| বৃদ্ধস্ত্রীবচনমপ্যাগমমূলমেব, ইহ তু গ্রন্থবিস্তরভযান্ন দর্শিতমিতি ভাবঃ||১৭-১৮||
Adhikarana 16 (19) · Śloka 19
তীব্রাযাং তু খলু প্রার্থনাযাং কামমহিতমপ্যস্যৈ হিতেনোপহিতং দদ্যাত্ প্রার্থনাবিনযনার্থম্| প্রার্থনাসন্ধারণাদ্ধি বাযুঃ প্রকুপিতোঽন্তঃশরীরমনুচরন্ গর্ভস্যাপদ্যমানস্য বিনাশং বৈরূপ্যং বা কুর্যাত্||১৯||
तीव्रायां तु खलु प्रार्थनायां काममहितमप्यस्यै हितेनोपहितं दद्यात् प्रार्थनाविनयनार्थम्| प्रार्थनासन्धारणाद्धि वायुः प्रकुपितोऽन्तःशरीरमनुचरन् गर्भस्यापद्यमानस्य विनाशं वैरूप्यं वा कुर्यात्||१९||
🔊 Audio coming soon
প্রার্থনা ঈপ্সিতার্থযাঞ্চা, তস্যাস্তু তীব্রত্বং বলবদিচ্ছাজন্যত্বমেব| হিতোপহিতমিতি হিতেন যুক্তং, কিংবা কল্পনযা হিতম্| প্রার্থনাযা বিনযনং বিস্ফোটনং, তদর্থম্| প্রার্থনা চ প্রার্থিতলাভেনৈবাপযাতি| প্রার্থনাবিমাননে দোষমাহ- প্রার্থনেত্যাদি| প্রার্থনাযাঃ সম্যগ্ধারণং প্রার্থনাসন্ধারণম্| এতচ্চ স্তোকক্রমেণাপি প্রার্থিতাদানে সতি ভবতি, যথোক্তবিধিনা বা হিতাদানে সতি ইচ্ছা মনাক্ সমগ্রা বা খণ্ডিতা ভবতি| ইচ্ছাবিঘাতশ্চ মনঃক্ষোভকরভযাদিবদ্বাতপ্রকোপকো ভবতি| আপদ্যমানস্যেত্যনেন গর্ভস্যাতিতরুণত্বেন মনাগপি বাতক্ষোভাসহত্বং দর্শযতি| বৈরূপ্যবিনাশবিকল্পস্তু বাতপ্রকোপপ্রকর্ষাপকর্ষকৃতো জ্ঞেযঃ||১৯||
Adhikarana 17 (20) · Śloka 20
চতুর্থে মাসি স্থিরত্বমাপদ্যতে গর্ভঃ, তস্মাত্তদা গর্ভিণী গুরুগাত্রত্বমধিকমাপদ্যতে বিশেষেণ||২০||
चतुर्थे मासि स्थिरत्वमापद्यते गर्भः, तस्मात्तदा गर्भिणी गुरुगात्रत्वमधिकमापद्यते विशेषेण||२०||
🔊 Audio coming soon
তৃতীযমাসানুপূর্বীকথনপ্রস্তাবাগতং গর্ভস্য বিশেষমভিধায ক্রমাগতাং চতুর্থমাসানুপূর্বীমাহ- চতুর্থ ইত্যাদি| স্থিরত্বমিতি নিবিডত্বম্| অত এব নিবিডেন গুরুতরেণ গর্ভেণাক্রান্তা গর্ভিণী গুরুগাত্রা ভবতীতি যুক্তম্||২০||
Adhikarana 18 (21) · Śloka 21
পঞ্চমে মাসি গর্ভস্য মাংসশোণিতোপচযো ভবত্যধিকমন্যেভ্যো মাসেভ্যঃ, তস্মাত্তদা গর্ভিণী কার্শ্যমাপদ্যতে বিশেষেণ||২১||
पञ्चमे मासि गर्भस्य मांसशोणितोपचयो भवत्यधिकमन्येभ्यो मासेभ्यः, तस्मात्तदा गर्भिणी कार्श्यमापद्यते विशेषेण||२१||
🔊 Audio coming soon
অধিকমন্যেভ্য ইত্যনেন মাসান্তরেষ্বপি স্তোকক্রমেণ মাংসাদিবৃদ্ধিং দর্শযতি| যেন শারীরেণ ভাবেন গর্ভ উপচীযতে, তেন গর্ভিণী হীযত ইতি যুক্তমেব| যতো গর্ভমাংসাদিপোষণেনৈব ক্ষীণ আহাররসো ন মাতুর্মাংসাদি সম্যক্ পোষযতি||২১||
Adhikarana 19 (22) · Śloka 22
ষষ্ঠে মাসি গর্ভস্য বলবর্ণোপচযো ভবত্যধিকমন্যেভ্যো মাসেভ্যঃ, তস্মাত্তদা গর্ভিণী বলবর্ণহানিমাপদ্যতে বিশেষেণ||২২||
षष्ठे मासि गर्भस्य बलवर्णोपचयो भवत्यधिकमन्येभ्यो मासेभ्यः, तस्मात्तदा गर्भिणी बलवर्णहानिमापद्यते विशेषेण||२२||
🔊 Audio coming soon
বলবর্ণযোরুপচযো বলবর্ণোপচযঃ; কিংবা, উপচযো ধাতুপুষ্টিঃ||২২||
Adhikarana 20 (23) · Śloka 23
সপ্তমে মাসি গর্ভঃ সর্বৈর্ভাবৈরাপ্যায্যতে, তস্মাত্তদা গর্ভিণী সর্বাকারৈঃ ক্লান্ততমা ভবতি||২৩||
सप्तमे मासि गर्भः सर्वैर्भावैराप्याय्यते, तस्मात्तदा गर्भिणी सर्वाकारैः क्लान्ततमा भवति||२३||
🔊 Audio coming soon
সর্বভাবৈরিতি মাংসশোণিতাদিভিঃ| যুগপদেব সর্বৈঃ সপ্তমে গর্ভ আপ্যায্যতে, পূর্বেষু তু মাসেষু ন সর্বৈর্যুগপদিতি বিশেষঃ| সর্বাকারৈরিতি সর্বমাংসশোণিতাদিজন্যরূপৈঃ| ক্লান্ততমেতি হীনতমা||২৩||
Adhikarana 21 (24) · Śloka 24
অষ্টমে মাসি গর্ভশ্চ মাতৃতো গর্ভতশ্চ মাতা রসহারিণীভিঃ সংবাহিনীভির্মুহুর্মুহুরোজঃ পরস্পরত আদদাতে গর্ভস্যাসম্পূর্ণত্বাত্ | তস্মাত্তদা গর্ভিণীমুহুর্মহুর্মুদা যুক্তা ভবতি মুহুর্মুহুশ্চ ম্লানা, তথা গর্ভঃ; তস্মাত্তদা গর্ভস্য জন্ম ব্যাপত্তিমদ্ভবত্যোজসোঽনবস্থিতত্বাত্ | তং চৈবার্থমভিসমীক্ষ্যাষ্টমং মাসমগণ্যমিত্যাচক্ষতে কুশলাঃ||২৪||
अष्टमे मासि गर्भश्च मातृतो गर्भतश्च माता रसहारिणीभिः संवाहिनीभिर्मुहुर्मुहुरोजः परस्परत आददाते गर्भस्यासम्पूर्णत्वात् | तस्मात्तदा गर्भिणीमुहुर्महुर्मुदा युक्ता भवति मुहुर्मुहुश्च म्लाना, तथा गर्भः; तस्मात्तदा गर्भस्य जन्म व्यापत्तिमद्भवत्योजसोऽनवस्थितत्वात् | तं चैवार्थमभिसमीक्ष्याष्टमं मासमगण्यमित्याचक्षते कुशलाः||२४||
🔊 Audio coming soon
অষ্টম ইত্যাদি| রসবাহিনীভিরিতি মাতৃহৃদযে গর্ভনাড্যাং চ সম্বদ্ধাভী রসবাহিনীভিঃ| পরস্পরত ওজ আদদাতে ইতি মাতুরোজো গর্ভ আদত্তে, গর্ভস্য চৌজো মাতা আদত্তে| ওজোঽনবস্থানে হেতুমাহ- গর্ভস্যাসম্পূর্ণত্বাদিতি| যস্মাদ্গর্ভোঽসম্পূর্ণঃ, তস্মাদনিষ্পন্নাশ্রযং গর্ভৌজোঽনবস্থিতং ভবতি| মাতুরোজো গর্ভং গচ্ছতীতি যদুচ্যতে, তদ্গর্ভৌজ এব মাতৃসম্বদ্ধং সন্মাত্রোজ ইতি ব্যপদিশ্যতে; যদি তু মাতুরেব যদোজস্তদ্গর্ভং গচ্ছতীত্যর্থঃ স্যাত্, তদা গর্ভস্যাসম্পূর্ণত্বাদিতি হেতুঃ সম্পূর্ণমাতৃদেহস্থিতস্যৌজসো গমনেঽসঙ্গতঃ স্যাত্; তথা, যথা গর্ভৌজসো মাতর্যবস্থানসমযে জন্ম গর্ভমরণকরং ভবতি, তথা মাতুরোজসো গর্ভোবস্থানে সতি যদ্গর্ভজন্ম, তত্র মাতুরপি মরণং স্যাত্; ন চৈতদিষ্টং, যেনোভযথাঽপি গর্ভস্যৈবাত্র মরণমুচ্যতে ন মাতুঃ, ‘তদা গর্ভস্য জন্ম ব্যাপত্তিমদ্ভবতি’ ইতিবচনেন| জতূকর্ণেঽপ্যষ্টমে জন্ম গর্ভবিনাশাযৈব দর্শিতম্| যদুক্তং- “স্ত্রীগর্ভাবন্যোন্যস্য ওজ আদদাতেঽষ্টমে, তস্মাত্তদা প্রসূতির্গর্ভবিনাশাযৈব” ইতি| অন্যে তু বর্ণযন্তি- যত- “সত্যপি মাতুরোজসো গর্ভগমনে জন্মাদৃষ্টবশাদেব গর্ভস্যৈব মরণায ভবতি, ন মাতুঃ” ইতি| সুশ্রুতব্যাখ্যাতারস্তু- “অষ্টমমাসে নৈরৃতভাগত্বাচ্চ গর্ভস্য সত্যপ্যোজোঽনবস্থানে তুল্যে গর্ভস্যৈব নাশো ন মাতুঃ” ইতি বর্ণযন্তি| গর্ভিণী মুহুর্মুহুর্মুদা যুক্তা ভবতীতি গর্ভৌজোযোগাদ্ধর্ষযুক্তা ভবতি, ওজোবিগমনাত্তু মুহুর্মুহুর্গ্লানা ভবতীতি যোজ্যম্| তথা গর্ভ ইতি গর্ভিণীবদ্গর্ভোঽপি মুহুর্মুহুর্মুদাযুযুক্তো ভবতি, মুহুর্মুহুর্গ্লানো ভবতি| তস্মাদিতি পূর্বোক্তং গর্ভব্যাপত্তিহেতুং সাক্ষাদ্ব্রূতে| ওজসোঽনবস্থিতত্বাদিতি এতচ্চ ব্যাকৃতমেব| অষ্টমমাসস্য বিশেষান্তরমাহ- তং চৈবেত্যাদি| তং চৈবার্থমিতি গর্ভব্যাপত্তিরূপমর্থম্| অগণ্যমিতি ন গণনযা গর্ভিণ্যাং প্রতিপাদনীযম্| যদি হি গর্ভিণী গণ্যমানমষ্টমং মাসং গর্ভজন্মব্যাপত্তিকরং শৃণুযাত্ ততো ভীতা স্যাত্, তদ্ভযাচ্চ গর্ভস্য বাতক্ষোভাদ্ ব্যাপত্ স্যাদিতি ভাবঃ||২৪||
Adhikarana 22 (25) · Śloka 25
তস্মিন্নেকদিবসাতিক্রান্তেঽপি নবমং মাসমুপাদায প্রসবকালমিত্যাহুরাদশমান্মাসাত্| এতাবান্ প্রসবকালঃ, বৈকারিকমতঃ পরং কুক্ষাববস্থানং গর্ভস্য||২৫||
तस्मिन्नेकदिवसातिक्रान्तेऽपि नवमं मासमुपादाय प्रसवकालमित्याहुरादशमान्मासात्| एतावान् प्रसवकालः, वैकारिकमतः परं कुक्षाववस्थानं गर्भस्य||२५||
🔊 Audio coming soon
তস্মিন্নিতি অষ্টমে মাসি| আদশমাদিতি বচনং প্রশস্ততরপ্রসবকালাভিপ্রাযেণ| সুশ্রুতে দ্বাদশমাসপর্যন্তং সম্যক্প্রসবকালাভিধানং স্তোকদোষযোরেকাদশদ্বাদশমাসযোরল্পদোষত্বেনাদোষপক্ষ এব নিক্ষেপাদ্ বোদ্ধব্যম্||২৫||
Adhikarana 23 (26) · Śloka 26
এবমনযাঽঽনুপূর্ব্যাঽভিনির্বর্ততে কুক্ষৌ||২৬||
एवमनयाऽऽनुपूर्व्याऽभिनिर्वर्तते कुक्षौ||२६||
🔊 Audio coming soon
দত্তমুত্তরমুপসংহরতি- এবমিত্যাদি||২৬||
Adhikarana 24 (27) · Śloka 27
মাত্রাদীনাং খলু গর্ভকরাণাং ভাবানাং সম্পদস্তথা বৃত্তস্য সৌষ্ঠবান্মাতৃতশ্চৈবোপস্নেহোপস্বেদাভ্যাং কালপরিণামাত্ স্বভাবসংসিদ্ধেশ্চ কুক্ষৌ বৃদ্ধিং প্রাপ্নোতি||২৭||
मात्रादीनां खलु गर्भकराणां भावानां सम्पदस्तथा वृत्तस्य सौष्ठवान्मातृतश्चैवोपस्नेहोपस्वेदाभ्यां कालपरिणामात् स्वभावसंसिद्धेश्च कुक्षौ वृद्धिं प्राप्नोति||२७||
🔊 Audio coming soon
‘যশ্চাস্য বৃদ্ধিহেতুঃ’ ইতি প্রশ্নস্যোত্তরং- মাত্রাদীনামিত্যাদি| আদিগ্রহণাত্ পিত্রাত্মসাত্ম্যরসসত্ত্বানি “মাতৃজশ্চযং” (শা.অ.৪) ইত্যাদিগ্রন্থোক্তানি গৃহ্যন্তে| বৃত্তস্য মাতুরাচাররূপস্য সৌষ্ঠবং সুষ্ঠুত্বং বৃত্তসৌষ্ঠবম্| মাতৃত ইতি পদং বৃত্তসৌষ্ঠবেন তথা উপস্নেহোপস্বেদাভ্যাং চ সম্বধ্যতে| রসসাত্ম্যসৌষ্ঠবং তু মাত্রাদিসম্পদা লব্ধমেব| উপস্নেহো ধাতুনিষ্যন্দসম্বন্ধঃ, উপস্বেদঃ শরীরস্যোষ্মণা পরং গর্ভস্য স্বেদনম্; উপস্বেদশ্চ গর্ভবৃদ্ধিকরো ভবত্যেব, যথা- অণ্ডজানাং পক্ষতেরুপস্বেদনং বৃদ্ধিকরং দৃষ্টম্| কালপরিণামাদিতি যথা যথা কালপ্রকর্ষস্তথা তথা বর্ধতে গর্ভঃ| বৃদ্ধিহেত্বন্তরমাহ- স্বভাবসংসিদ্ধেশ্চেতি| স্বভাবেনৈব কর্মজন্যেন গর্ভো ভবতি বর্ধিষ্ণুরিত্যর্থঃ| কর্মণা হি ভোগলক্ষণশরীরনির্বর্তকেনারভ্যমাণং গর্ভশরীরং বর্ধিষ্ণুস্বভাবমেবারব্ধং, তেন বর্ধত এব||২৭||
Adhikarana 25 (28) · Śloka 28
মাত্রাদীনামেব তু খলু গর্ভকরাণাং ভাবানাং ব্যাপত্তিনিমিত্তমস্যাজন্ম ভবতি||২৮||
मात्रादीनामेव तु खलु गर्भकराणां भावानां व्यापत्तिनिमित्तमस्याजन्म भवति||२८||
🔊 Audio coming soon
‘কুতশ্চাস্যাজন্ম ভবতি’ ইত্যস্যোত্তরং- মাত্রেত্যাদি| ব্যাপত্তিনিমিত্তমিতি ব্যাপত্তিকারণকং; তত্র মাতুর্ব্যাপচ্ছোণিতগর্ভাশযাদিদুষ্টিঃ, পিতুর্ব্যাপচ্ছুক্রদুষ্টিরিত্যাদ্যনুসরণীযম্||২৮||
Adhikarana 26 (29) · Śloka 29
যে হ্যস্য কুক্ষৌ বৃদ্ধিহেতুসমাখ্যাতা ভাবাস্তেষাং বিপর্যযাদুদরে বিনাশমাপদ্যতে, অথবাঽপ্যচিরজাতঃ স্যাত্||২৯||
ये ह्यस्य कुक्षौ वृद्धिहेतुसमाख्याता भावास्तेषां विपर्ययादुदरे विनाशमापद्यते, अथवाऽप्यचिरजातः स्यात्||२९||
🔊 Audio coming soon
‘যতশ্চ জাযমানঃ’ ইত্যাদিপ্রশ্নস্যোত্তরং- যে হ্যস্যেত্যাদি| বৃদ্ধিহেতুসমাখ্যাতা ভাবাঃ “মাত্রাদীনাং তু খলু গর্ভকরাণাং ভাবানাং সম্পদঃ” ইত্যাদিগ্রন্থোক্তাঃ| অথবাঽপ্যচিরজাত ইতি যদা মাত্রাদীনাং সর্বথা দোষবত্ত্বেন বিপর্যযো ভবতি, তদা বিনাশমাপদ্যতে গর্ভঃ; যদা ত্বল্পদোষবত্তযা মনাগ্বিপর্যযো ভবতি, তদা অচিরজাতো বিপদ্যত ইতি জ্ঞেযম্ ||২৯||
Adhikarana 27 (30) · Śloka 30
যতস্তু কার্ত্স্ন্যেনাবিনশ্যন্ বিকৃতিমাপদ্যতে, তদনুব্যাখ্যাস্যামঃ- যদা স্ত্রিযা দোষপ্রকোপণোক্তান্যাসেবমানাযা দোষাঃ প্রকুপিতাঃ শরীরমুপসর্পন্তঃ শোণিতগর্ভাশযাবুপপদ্যন্তে , ন চ কার্ত্স্ন্যেন শোণিতগর্ভাশযৌ দূষযন্তি, তদেযং গর্ভং লভতে স্ত্রী; তদা তস্য গর্ভস্য মাতৃজানামবযবানামন্যতমোঽবযবো বিকৃতিমাপদ্যত একোঽথবাঽনেকে, যস্য যস্য হ্যবযবস্য বীজে বীজভাগে বা দোষাঃ প্রকোপমাপদ্যন্তে, তং তমবযবং বিকৃতিরাবিশতি| যদা হ্যস্যাঃ শোণিতে গর্ভাশযবীজভাগঃ প্রদোষমাপদ্যতে, তদা বন্ধ্যাং জনযতি; যদা পুনরস্যাঃ শোণিতে গর্ভাশযবীজভাগাবযবঃ প্রদোষমাপদ্যতে, তদা পূতিপ্রজাং জনযতি; যদা ত্বস্যাঃ শোণিতে গর্ভাশযবীজভাগাবযবঃ স্ত্রীকরাণাং চ শরীরবীজভাগানামেকদেশঃ প্রদোষমাপদ্যতে, তদা স্ত্র্যাকৃতিভূযিষ্ঠামস্ত্রিযং বার্তাং নাম জনযতি, তাং স্ত্রীব্যাপদমাচক্ষতে||৩০||
यतस्तु कार्त्स्न्येनाविनश्यन् विकृतिमापद्यते, तदनुव्याख्यास्यामः- यदा स्त्रिया दोषप्रकोपणोक्तान्यासेवमानाया दोषाः प्रकुपिताः शरीरमुपसर्पन्तः शोणितगर्भाशयावुपपद्यन्ते , न च कार्त्स्न्येन शोणितगर्भाशयौ दूषयन्ति, तदेयं गर्भं लभते स्त्री; तदा तस्य गर्भस्य मातृजानामवयवानामन्यतमोऽवयवो विकृतिमापद्यत एकोऽथवाऽनेके, यस्य यस्य ह्यवयवस्य बीजे बीजभागे वा दोषाः प्रकोपमापद्यन्ते, तं तमवयवं विकृतिराविशति| यदा ह्यस्याः शोणिते गर्भाशयबीजभागः प्रदोषमापद्यते, तदा वन्ध्यां जनयति; यदा पुनरस्याः शोणिते गर्भाशयबीजभागावयवः प्रदोषमापद्यते, तदा पूतिप्रजां जनयति; यदा त्वस्याः शोणिते गर्भाशयबीजभागावयवः स्त्रीकराणां च शरीरबीजभागानामेकदेशः प्रदोषमापद्यते, तदा स्त्र्याकृतिभूयिष्ठामस्त्रियं वार्तां नाम जनयति, तां स्त्रीव्यापदमाचक्षते||३०||
🔊 Audio coming soon
অবশিষ্টপ্রশ্নস্যোত্তরং দর্শযিতুমাহ- যতস্ত্বিত্যাদি| অত্রাবিনশ্যন্নিত্যত্র বিনাশেন বিকৃতিরভিপ্রেতা, বিকৃতাবপি বিনাশশব্দো দৃষ্টঃ; যথা- অসচ্ছীলত্বেন বিকৃতে পুরুষে ‘বিনষ্টোঽযম্’ ইতি ব্যপদেশঃ; এবং চ সত্যেকদেশেনাপি বিকৃতৌ বিনাশশব্দদর্শনে কার্ত্স্ন্যেনেতি বিশেষণং যুক্তং ভবতি| দোষপ্রকোপণেনৈব দোষপ্রকোপণসেবাযাং লব্ধাযাং পুনর্দোষপ্রকোপণোক্তান্যাসেবমানাযা ইতি পদং দোষাণাং স্বহেতুসেবযা বলবন্তং প্রকোপং দর্শযিতুং, পরহেতুসেবযাঽপি হি স্তোকমাত্রযা অনুবন্ধরূপদোষপ্রকোপো ভবতি; যথা- অম্লেন পিত্তং জন্যমানং শ্লেষ্মানুগতং জন্যতে| ‘নতু কার্ত্স্ন্যেন দূষযন্তি’ ইতি বচনেন কার্ত্স্ন্যেন দুষ্টৌ গর্ভজন্মৈব ন ভবতীতি দর্শযতি| মাতৃজানামিতি ত্বগ্লোহিতাদীনাম্| অন্যতম ইতি জাতাবেকবচনম্| তত্রৈকোঽপ্যবযবোঽন্যতমঃ, তথা অনেকেঽবযবা অন্যতমশব্দেন প্রোক্তাঃ | অত এব ‘একোঽথবাঽনেকে’ ইত্যন্যতমবিবরণমুপপন্নং ভবতি| অন্যথা ত্বন্যতমপদেনৈকস্যৈবাবযবস্য গৃহীতত্বাত্ ‘অনেকে’ ইতি বিবরণমসঙ্গতং স্যাত্| কুতঃ পুনরেকস্যানেকস্য বা বিকৃতির্ভবতীত্যাহ- যস্যেত্যাদি| বীজ ইতি কৃত্স্ন এবারম্ভকে বীজে| বীজভাগে বেত্যবযববীজস্যৈকদেশে| এতাং বিকৃতিমেব শৃঙ্গগ্রাহিকতযা বক্তুমাহ- যদেত্যাদি| শোণিত ইতি আর্তবে| গর্ভাশযজনকো বীজভাগো গর্ভাশযবীজভাগঃ; কিংবা গর্ভাশযস্য তথা বীজস্য চার্তবরূপস্য জনকো ভাগঃ| গর্ভাশযার্তবে চ মাতৃজাবযবমধ্যে পতিতে শোণিতজন্যে এব; তেন, আর্তবেতরবীজভাগস্য দুষ্টিরুপপন্না| আর্তবং চ যদ্যপি দ্বাদশবর্ষাদূর্ধ্বং ব্যজ্যতে, তথাঽপি আর্তবোত্পত্তির্গর্ভকাল এব ভবতি| যেন সতামেবার্তবদন্তশ্মশ্রুপ্রভৃতীনাং কালে ব্যক্তির্ভবতি; তেন, আর্তবারম্ভকস্যাপি বীজস্য গর্ভকালে প্রদোষ উপপন্নঃ | প্রদোষ ইত্যত্র প্রশব্দেন দুষ্টিপ্রকর্ষং প্রকৃষ্টবন্ধ্যতারূপকার্যজনকং দর্শযতি| গর্ভাশযস্য তথাঽঽর্তবস্য চোপঘাতেন স্ত্রিযা বন্ধ্যত্বং ব্যক্তমেব| গর্ভাশযবীজভাগাবযব ইত্যত্রাপি পূর্ববদ্ব্যাখ্যেযম্| অবযবশব্দেন গর্ভাশযস্যার্তবস্য চৈকদেশ ইহোচ্যতে| পূতিপ্রজামিতি ম্রিযমাণাপত্যাম্; অন্যে তু ক্লিন্নাঙ্গপ্রত্যঙ্গাং পূতিমাহুঃ| স্ত্রীকরাণাং শরীরবীজভাগানামিতি স্ত্রীত্বব্যঞ্জকস্তনোপস্থলোমরাজ্যাদিজনকবীজভাগানাম্| অস্ত্রিযমিতি অসম্পূর্ণস্ত্রীলক্ষণাম্| বার্তাং নামেতি বার্তাসঞ্জ্ঞা শাস্ত্রসমযকৃতা| স্ত্রীব্যাপদিতি স্ত্রীনিমিত্তাঽঽর্তবদোষকৃতা ব্যাপত্| এবং তাং পুরুষব্যাপদমাচক্ষতে ইত্যত্রাপি পুরুষব্যাপদ্ব্যাখ্যেযা||৩০||
Adhikarana 28 (31) · Śloka 31
এবমেব পুরুষস্য যদা বীজে বীজভাগঃ প্রদোষমাপদ্যতে, তদা বন্ধ্যং জনযতি; যদা পুনরস্য বীজে বীজভাগাবযবঃ প্রদোষমাপদ্যতে, তদা পূতিপ্রজং জনযতি; যদা ত্বস্য বীজে বীজভাগাবযবঃ পুরুষকরাণাং চ শরীরবীজভাগানামেকদেশঃ প্রদোষমাপদ্যতে, তদা পুরুষাকৃতিভূযিষ্ঠমপুরুষং তৃণপুত্রিকং নাম জনযতি; তাং পুরুষব্যাপদমাচক্ষতে||৩১||
एवमेव पुरुषस्य यदा बीजे बीजभागः प्रदोषमापद्यते, तदा वन्ध्यं जनयति; यदा पुनरस्य बीजे बीजभागावयवः प्रदोषमापद्यते, तदा पूतिप्रजं जनयति; यदा त्वस्य बीजे बीजभागावयवः पुरुषकराणां च शरीरबीजभागानामेकदेशः प्रदोषमापद्यते, तदा पुरुषाकृतिभूयिष्ठमपुरुषं तृणपुत्रिकं नाम जनयति; तां पुरुषव्यापदमाचक्षते||३१||
🔊 Audio coming soon
বীজে ইতি শুক্রে| শুক্ররূপবীজজনকো ভাগো বীজভাগঃ| তদা বন্ধ্যমিত্যনেন পুরুষবন্ধ্যং ব্রূতে, ইহাপি প্রদোষব্যাখ্যা পূতিপ্রজাব্যাখ্যা চ পূর্ববত্| অপুরুষমিতি অসমস্তপুরুষলক্ষণযুক্তম্| তৃণপুত্রিকসঞ্জ্ঞাঽপি শাস্ত্রসমযসিদ্ধৈব| বার্তাতৃণপুত্রিকযোর্ব্যবাযেচ্ছা পরং ভবতি, নতু ব্যবাযসামর্থ্যমিতি ব্রুবতে||৩১||
Adhikarana 29 (32) · Śloka 32
এতেন মাতৃজানাং পিতৃজানাং চাবযবানাং বিকৃতিব্যাখ্যানেন সাত্ম্যজানাং রসজানাং সত্ত্বজানাং চাবযবানাং বিকৃতির্ব্যাখ্যাতা ভবতি||৩২||
एतेन मातृजानां पितृजानां चावयवानां विकृतिव्याख्यानेन सात्म्यजानां रसजानां सत्त्वजानां चावयवानां विकृतिर्व्याख्याता भवति||३२||
🔊 Audio coming soon
এবং মাতাপিতৃজাবযবৈকদেশবিকৃতিবত্ সাত্ম্যরসসত্ত্বজাবযববিকৃত্যতিদেশার্থমাহ- এতেনেত্যাদি| সাত্ম্যবিভ্রমাত্তু সাত্ম্যজানামারোগ্যানালস্যাদীনামন্যতমেন হীযতে| এবং রসসত্ত্বযোরপ্যুন্নেযম্||৩২||
Adhikarana 30 (33) · Śloka 33
নির্বিকারঃ পরস্ত্বাত্মা সর্বভূতানাং নির্বিশেষঃ; সত্ত্বশরীরযোস্তু বিশেষাদ্বিশেষোপলব্ধিঃ||৩৩||
निर्विकारः परस्त्वात्मा सर्वभूतानां निर्विशेषः; सत्त्वशरीरयोस्तु विशेषाद्विशेषोपलब्धिः||३३||
🔊 Audio coming soon
আত্মজোঽপ্যযং গর্ভ উক্তঃ, তত্ কথমিহ তদ্বিকৃত্যা বিকৃতির্গর্ভস্য নোচ্যত ইত্যাহ- নির্বিকার ইত্যাদি| পর ইত্যনেন মনঃশরীরাদিসমুদাযাদাত্মানং ব্যবচ্ছিনত্তি| সর্বভূতানাং নির্বিশেষ ইতি সর্বেষু ভূতেষু বর্তমানোঽপ্যযং পরমাত্মা তুল্য এব| যস্তু তত্র সুখদুঃখাদিবিশেষ উপলভ্যতে, স শরীরবিশেষস্য তথা মনোবিশেষস্য চ সুখদুঃখাদিবিশেষকারণস্য বিশেষাদুপলভ্যতে; এতদেব ‘শরীরসত্ত্বযোস্তু’ ইত্যাদিনোক্তম্| সুখাদযস্তু ন পরমাত্মবিকারাঃ, কিন্তু বুদ্ধিধর্মা এবেতি দর্শিতমেব| যানি চাত্মজত্বেন গর্ভে “তাসু তাসু যোনিষূত্পত্তিঃ” (শা. ৩) ইত্যাদিনা গ্রন্থেন দর্শিতানি, তান্যপি পরমাত্মবিকারা ন ভবন্তি, কিন্তু সত্ত্বরজস্তমঃপ্রবলতারূপবিকারজমনোবিকারজন্যধর্মাধর্মজন্যান্যেব| তেন, সূক্ষ্মচিন্তাযামাত্মজানি যান্যুক্তানি, তান্যপি সত্ত্বজান্যেব| ততশ্চেহাত্মজাবযববিকারোঽপি সত্ত্বজাবযববিকার এব বোদ্ধব্য ইতি ভাবঃ||৩৩||
Adhikarana 31 (34) · Śloka 34
তত্র ত্রযঃ শরীরদোষা বাতপিত্তশ্লেষ্মাণঃ, তে শরীরং দূষযন্তি; দ্বৌ পুনঃ সত্ত্বদোষৌ রজস্তমশ্চ, তৌ সত্ত্বং দূষযতঃ| তাভ্যাং চ সত্ত্বশরীরাভ্যাং দুষ্টাভ্যাং বিকৃতিরুপজাযতে, নোপজাযতে চাপ্রদুষ্টাভ্যাম্||৩৪||
तत्र त्रयः शरीरदोषा वातपित्तश्लेष्माणः, ते शरीरं दूषयन्ति; द्वौ पुनः सत्त्वदोषौ रजस्तमश्च, तौ सत्त्वं दूषयतः| ताभ्यां च सत्त्वशरीराभ्यां दुष्टाभ्यां विकृतिरुपजायते, नोपजायते चाप्रदुष्टाभ्याम्||३४||
🔊 Audio coming soon
‘শরীরসত্ত্বযোস্তু’ ইত্যাদিনা শরীরমনসী দুঃখরূপবিকারেঽপি কারণমুক্তে; তত্রৈব চ যৈর্দোষৈঃ শরীরং, মনশ্চ যাভ্যাং দোষাভ্যাং যুক্তং দুঃখকারণং ভবতি, তানাহ- তত্র ত্রয ইত্যাদি| বিকৃতিরুপজাযত ইতি শারীরমানসরোগরূপা বিকৃতিরুপজাযতে||৩৪||
Adhikarana 32 (35) · Śloka 35
তত্র শরীরং যোনিবিশেষাচ্চতুর্বিধমুক্তমগ্রে||৩৫||
तत्र शरीरं योनिविशेषाच्चतुर्विधमुक्तमग्रे||३५||
🔊 Audio coming soon
সম্প্রতি, শরীরসত্ত্বযোস্তু বিশেষাদিত্যনেন দর্শিতাঞ্ শরীরসত্ত্ববিশেষানেবাহ- তত্রেত্যাদি| চতুর্বিধমিতি জরাযুজাণ্ডজোদ্ভিজ্জসংস্বেদজম্| অগ্রে ইতি খুড্ডিকাযাম্||৩৫||
Adhikarana 33 (36) · Śloka 36
ত্রিবিধং খলু সত্ত্বং- শুদ্ধং, রাজসং, তামসমিতি| তত্র শুদ্ধমদোষমাখ্যাতং কল্যাণাংশত্বাত্, রাজসং সদোষমাখ্যাতং রোষাংশত্বাত্, তামসমপি সদোষমাখ্যাতং মোহাংশত্বাত্| তেষাং তু ত্রযাণামপি সত্ত্বানামেকৈকস্য ভেদাগ্রমপরিসঙ্খ্যেযং তরতমযোগাচ্ছরীরযোনিবিশেষেভ্যশ্চান্যোন্যানুবিধানত্বাচ্চ| শরীরং হ্যপি সত্ত্বমনুবিধীযতে, সত্ত্বং চ শরীরম্| তস্মাত্ কতিচিত্সত্ত্বভেদাননূকাভিনির্দেশেন নিদর্শনার্থমনুব্যাখ্যাস্যামঃ||৩৬||
त्रिविधं खलु सत्त्वं- शुद्धं, राजसं, तामसमिति| तत्र शुद्धमदोषमाख्यातं कल्याणांशत्वात्, राजसं सदोषमाख्यातं रोषांशत्वात्, तामसमपि सदोषमाख्यातं मोहांशत्वात्| तेषां तु त्रयाणामपि सत्त्वानामेकैकस्य भेदाग्रमपरिसङ्ख्येयं तरतमयोगाच्छरीरयोनिविशेषेभ्यश्चान्योन्यानुविधानत्वाच्च| शरीरं ह्यपि सत्त्वमनुविधीयते, सत्त्वं च शरीरम्| तस्मात् कतिचित्सत्त्वभेदाननूकाभिनिर्देशेन निदर्शनार्थमनुव्याख्यास्यामः||३६||
🔊 Audio coming soon
কল্যাণাংশত্বাদিতি শুভরূপাংশত্বাত্ | মনো হি কল্যাণভাগ-রোষভাগ-মোহভাগৈস্ত্রিভাগং; তত্র রোষাংশমোহাংশৌ সদোষৌ, অধর্মহেতুতযা| ভেদাগ্রমিতি ভেদপ্রমাণম্| তরতমযোগাদিতি শুচিতর-শুচিতমমনোভেদযোগাত্| শরীরবিশেষা বাল-যুব-স্থবিরাদিবিশেষাঃ, যোনিবিশেষাস্তু মনুষ্যপশ্বাদিজাতিবিশেষাঃ; কিংবা, শরীরস্য নরপশ্বাদিজাতিকৃতা বিশেষাঃ শরীরযোনিবিশেষাঃ, তেভ্যঃ| অথ শরীরভেদাত্ কথং মনোভেদো ভবতীত্যাহ- অন্যোন্যানুবিধানাচ্চ| এতদেব বিভজতে- শরীরং হ্যপীত্যাদি| সত্ত্বানুরূপং শরীরং ভবতি, যদি শুদ্ধসত্ত্বং ভবতি তদা দেবাদিশরীরং ভবতীত্যাদি; তথা শরীরানুরূপং চ সত্ত্বং ভবতি; যথা- পশুশরীরে তামসং, মনুষ্যশরীরে রাজসং, দেবশরীরে সাত্ত্বিকমিত্যাদি জ্ঞেযম্| কিংবা, অন্যোন্যানুবিধানাদিতি সত্ত্বরজস্তমসাং পরস্পরানুবিধানাদিত্যর্থঃ| অস্মিন্ পক্ষে ‘শরীরং হ্যপি সত্ত্বমনুবিধীযতে’ ইত্যাদিনা গ্রন্থেন ব্যবহিতমপি শরীরানুবিধানং মনসো দুর্বোধত্বাদ্ ব্যাক্রিযত ইতি ব্যাখ্যেযম্| সত্ত্বভেদানিতি মনোভেদান্| অনূকাভিনির্দেশেন সাদৃশ্যনির্দেশেন||৩৬||
Adhikarana 34 (37) · Śloka 37
তদ্যথা- শুচিং সত্যাভিসন্ধং জিতাত্মানং সংবিভাগিনং জ্ঞানবিজ্ঞানবচনপ্রতিবচনসম্পন্নং স্মৃতিমন্তং কামক্রোধলোভমানমোহের্ষ্যাহর্ষামর্ষাপেতং সমং সর্বভূতেষু ব্রাহ্মং বিদ্যাত্ (১)| ইজ্যাধ্যযনব্রতহোমব্রহ্মচর্যপরমতিথিব্রতমুপশান্তমদমানরাগদ্বেষমোহলোভরোষং প্রতিভাবচনবিজ্ঞানোপধারণশক্তিসম্পন্নমার্ষং বিদ্যাত্ (২)| ঐশ্বর্যবন্তমাদেযবাক্যং যজ্বানং শূরমোজস্বিনং তেজসোপেতমক্লিষ্টকর্মাণং দীর্ঘদর্শিনং ধর্মার্থকামাভিরতমৈন্দ্রং বিদ্যাত্ (৩)| লেখাস্থবৃত্তং প্রাপ্তকারিণমসম্প্রহার্যমুত্থানবন্তং স্মৃতিমন্তমৈশ্বর্যলম্ভিনং ব্যপগতরাগের্ষ্যাদ্বেষমোহং যাম্যং বিদ্যাত্ (৪)| শূরং ধীরং শুচিমশুচিদ্বেষিণং যজ্বানমম্ভোবিহাররতিমক্লিষ্টকর্মাণং স্থানকোপপ্রসাদং বারুণং বিদ্যাত্ (৫)| স্থানমানোপভোগপরিবারসম্পন্নং ধর্মার্থকামনিত্যং শুচিং সুখবিহারং ব্যক্তকোপপ্রসাদং কৌবেরং বিদ্যাত্ (৬)| প্রিযনৃত্যগীতবাদিত্রোল্লাপকশ্লোকাখ্যাযিকেতিহাসপুরাণেষু কুশলং গন্ধমাল্যানুলেপনবসনস্ত্রীবিহারকামনিত্যমনসূযকং গান্ধর্বং বিদ্যাত্ (৭)| ইত্যেবং শুদ্ধস্য সত্ত্বস্য সপ্তবিধং ভেদাংশং বিদ্যাত্ কল্যাণাংশত্বাত্; তত্সংযোগাত্তু ব্রাহ্মমত্যন্তশুদ্ধং ব্যবস্যেত্||৩৭||
तद्यथा- शुचिं सत्याभिसन्धं जितात्मानं संविभागिनं ज्ञानविज्ञानवचनप्रतिवचनसम्पन्नं स्मृतिमन्तं कामक्रोधलोभमानमोहेर्ष्याहर्षामर्षापेतं समं सर्वभूतेषु ब्राह्मं विद्यात् (१)| इज्याध्ययनव्रतहोमब्रह्मचर्यपरमतिथिव्रतमुपशान्तमदमानरागद्वेषमोहलोभरोषं प्रतिभावचनविज्ञानोपधारणशक्तिसम्पन्नमार्षं विद्यात् (२)| ऐश्वर्यवन्तमादेयवाक्यं यज्वानं शूरमोजस्विनं तेजसोपेतमक्लिष्टकर्माणं दीर्घदर्शिनं धर्मार्थकामाभिरतमैन्द्रं विद्यात् (३)| लेखास्थवृत्तं प्राप्तकारिणमसम्प्रहार्यमुत्थानवन्तं स्मृतिमन्तमैश्वर्यलम्भिनं व्यपगतरागेर्ष्याद्वेषमोहं याम्यं विद्यात् (४)| शूरं धीरं शुचिमशुचिद्वेषिणं यज्वानमम्भोविहाररतिमक्लिष्टकर्माणं स्थानकोपप्रसादं वारुणं विद्यात् (५)| स्थानमानोपभोगपरिवारसम्पन्नं धर्मार्थकामनित्यं शुचिं सुखविहारं व्यक्तकोपप्रसादं कौबेरं विद्यात् (६)| प्रियनृत्यगीतवादित्रोल्लापकश्लोकाख्यायिकेतिहासपुराणेषु कुशलं गन्धमाल्यानुलेपनवसनस्त्रीविहारकामनित्यमनसूयकं गान्धर्वं विद्यात् (७)| इत्येवं शुद्धस्य सत्त्वस्य सप्तविधं भेदांशं विद्यात् कल्याणांशत्वात्; तत्संयोगात्तु ब्राह्ममत्यन्तशुद्धं व्यवस्येत्||३७||
🔊 Audio coming soon
সংবিভাগিনমিতি সম্যক্ফলবিভজনশীলম্| অতিথৌ যথোচিতমর্ঘ্যাদিযুক্তং ব্রতমাচরতীতি অতিথিব্রতঃ| লেখা কর্তব্যাকর্তব্যমর্যাদা, তত্র স্থিতং বৃত্তং যস্য স লেখাস্থবৃত্তঃ, তম্; অলঙ্ঘিতকর্তব্যাকর্তব্যমিত্যর্থঃ| অসম্প্রহার্যমিতি অশক্যবারণম্| ঐশ্বর্যং লভত ইতি ঐশ্বর্যলম্ভী| স্থানে উচিতে কোপঃ প্রসাদশ্চ যস্য স স্থানকোপপ্রসাদঃ| সুখবিহারমিতি সুখক্রীডনম্| উল্লাপঃ স্তোত্রম্| বিহারঃ ক্রীডা, কিংবা স্ত্রীভিঃ সমং বিহরণং স্ত্রীবিহারঃ| গান্ধর্বমিতি গান্ধর্বসত্ত্বম্| এবং ব্রাহ্মমিত্যাদাবপি জ্ঞেযম্| এবং চ ব্রাহ্মাদিভিঃ সত্ত্ববাচকৈঃ পদৈরেবংশব্দপ্রত্যবমৃষ্টৈঃ সত্ত্বস্য সপ্তবিধভেদকথনং সমানকারণাদুপপন্নং ভবতি| শুদ্ধস্যেতি সত্ত্বগুণবহুলস্য| অথ কথমেতে ব্রাহ্মাদযঃ শুদ্ধসত্ত্বস্যৈব ভেদা ইত্যাহ- কল্যাণাংশত্বাদিতি| তত্সংযোগাদিতি কল্যাণাংশসত্ত্বস্য সম্যগ্যোগাত্||৩৭||
Adhikarana 35 (38) · Śloka 38
শূরং চণ্ডমসূযকমৈশ্বর্যবন্তমৌপধিকং রৌদ্রমননুক্রোশমাত্মপূজকমাসুরং বিদ্যাত্ (১)| অমর্ষিণমনুবন্ধকোপং ছিদ্রপ্রহারিণং ক্রূরমাহারাতিমাত্ররুচিমামিষপ্রিযতমং স্বপ্নাযাসবহুলমীর্ষ্যুং রাক্ষসং বিদ্যাত্ (২)| মহাশনং স্ত্রৈণং স্ত্রীরহস্কামমশুচিং শুচিদ্বেষিণং ভীরুং ভীষযিতারং বিকৃতবিহারাহারশীলং পৈশাচং বিদ্যাত্ (৩)| ক্রুদ্ধশূরমক্রুদ্ধভীরুং তীক্ষ্ণমাযাসবহুলং সন্ত্রস্তগোচরমাহারবিহারপরং সার্পং বিদ্যাত্ (৪)| আহারকামমতিদুঃখশীলাচারোপচারমসূযকমসংবিভাগিনমতিলোলুপমকর্মশীলং প্রৈতং বিদ্যাত্ (৫)| অনুষক্তকামমজস্রমাহারবিহারপরমনবস্থিতমমর্ষণমসঞ্চযং শাকুনং বিদ্যাত্ (৬)| ইত্যেবং খলু রাজসস্য সত্ত্বস্য ষঙ্বিধং ভেদাংশং বিদ্যাত্, রোষাংশত্বাত্||৩৮||
शूरं चण्डमसूयकमैश्वर्यवन्तमौपधिकं रौद्रमननुक्रोशमात्मपूजकमासुरं विद्यात् (१)| अमर्षिणमनुबन्धकोपं छिद्रप्रहारिणं क्रूरमाहारातिमात्ररुचिमामिषप्रियतमं स्वप्नायासबहुलमीर्ष्युं राक्षसं विद्यात् (२)| महाशनं स्त्रैणं स्त्रीरहस्काममशुचिं शुचिद्वेषिणं भीरुं भीषयितारं विकृतविहाराहारशीलं पैशाचं विद्यात् (३)| क्रुद्धशूरमक्रुद्धभीरुं तीक्ष्णमायासबहुलं सन्त्रस्तगोचरमाहारविहारपरं सार्पं विद्यात् (४)| आहारकाममतिदुःखशीलाचारोपचारमसूयकमसंविभागिनमतिलोलुपमकर्मशीलं प्रैतं विद्यात् (५)| अनुषक्तकाममजस्रमाहारविहारपरमनवस्थितममर्षणमसञ्चयं शाकुनं विद्यात् (६)| इत्येवं खलु राजसस्य सत्त्वस्य षङ्विधं भेदांशं विद्यात्, रोषांशत्वात्||३८||
🔊 Audio coming soon
ঔপধিকমিতি ছদ্মপ্রচারিণম্| অননুক্রোশমিতি নির্দযম্| স্ত্রিযা সমং রহসি স্থাতুমিচ্ছতীতি স্ত্রীরহস্কামঃ| ক্রুদ্ধশূরমক্রুদ্ধভীরুমিতি ক্রোধে সতি শূরং, ক্রোধেঽসতি ভীরুম্| গোচরশব্দেন গোচরে বিষযে প্রচারো লক্ষ্যতে, তেন সন্ত্রস্তগোচরমিতি সন্ত্রস্তবিষযপ্রচারম্| পিশাচাদ্ভিন্ন এব যথোক্তাচারঃ প্রেতঃ, তেন প্রৈতমপি সত্ত্বং পৃথগুক্তম্||৩৮||
Adhikarana 36 (39) · Śloka 39
নিরাকরিষ্ণুমমেধসং জুগুপ্সিতাচারাহরং মৈথুনপরং স্বপ্নশীলং পাশবং বিদ্যাত্ (১)| ভীরুমবুধমাহারলুব্ধমনবস্থিতমনুষক্তকামক্রোধং সরণশীলং তোযকামং মাত্স্যং বিদ্যাত্ (২)| অলসং কেবলমভিনিবিষ্টমাহারে সর্ববুদ্ধ্যঙ্গহীনং বানস্পত্যং বিদ্যাত্ (৩)| ইত্যেবং তামসস্য সত্ত্বস্য ত্রিবিধং ভেদাংশং বিদ্যান্মোহাংশত্বাত্||৩৯||
निराकरिष्णुममेधसं जुगुप्सिताचाराहरं मैथुनपरं स्वप्नशीलं पाशवं विद्यात् (१)| भीरुमबुधमाहारलुब्धमनवस्थितमनुषक्तकामक्रोधं सरणशीलं तोयकामं मात्स्यं विद्यात् (२)| अलसं केवलमभिनिविष्टमाहारे सर्वबुद्ध्यङ्गहीनं वानस्पत्यं विद्यात् (३)| इत्येवं तामसस्य सत्त्वस्य त्रिविधं भेदांशं विद्यान्मोहांशत्वात्||३९||
🔊 Audio coming soon
সরণশীলমিতি গমনশীলম্| বুদ্ধ্যঙ্গানি ঊহাপোহবিচারস্মৃত্যাদীনি উক্তানি||৩৯||
Adhikarana 37 (40) · Śloka 40
ইত্যপরিসঙ্খ্যেযভেদানাং ত্রযাণামপি সত্ত্বানাং ভেদৈকদেশো ব্যাখ্যাতঃ; শুদ্ধস্য সত্ত্বস্য সপ্তবিধো ব্রহ্মর্ষিশক্রযমবরুণকুবেরগন্ধর্বসত্ত্বানুকারেণ, রাজসস্য ষড্বিধো দৈত্যপিশাচরাক্ষসসর্পপ্রেতশকুনিসত্ত্বানুকারেণ, তামসস্য ত্রিবিধঃ পশুমত্স্যবনস্পতিসত্ত্বানুকারেণ, কথং চ যথাসত্ত্বমুপচারঃ স্যাদিতি||৪০||
इत्यपरिसङ्ख्येयभेदानां त्रयाणामपि सत्त्वानां भेदैकदेशो व्याख्यातः; शुद्धस्य सत्त्वस्य सप्तविधो ब्रह्मर्षिशक्रयमवरुणकुबेरगन्धर्वसत्त्वानुकारेण, राजसस्य षड्विधो दैत्यपिशाचराक्षससर्पप्रेतशकुनिसत्त्वानुकारेण, तामसस्य त्रिविधः पशुमत्स्यवनस्पतिसत्त्वानुकारेण, कथं च यथासत्त्वमुपचारः स्यादिति||४०||
🔊 Audio coming soon
সুখস্মরণার্থং শুদ্ধাদিভেদেন বন্ধীকৃত্য সত্ত্বভেদানাহ- শুদ্ধস্যেত্যাদি| বনস্পতিসত্ত্বানুকারেণেত্যন্তো গ্রন্থো ভেদৈকদেশো ব্যাখ্যাত ইত্যনেন সংযোজনীযঃ, ক্রিযান্তরাভাবাত্| এতে চ সত্ত্বভেদাঃ প্রাযেণ ভবন্তি মনুষ্যেষ্বিতি কৃত্বা এত এবোদাহরণার্থমুক্তাঃ; এবমনুক্তা অপি বিষ্ণু-শঙ্কর-ব্যাঘ্রাদিসত্ত্বানুকারেণ সত্ত্বভেদা বোদ্ধব্যা এবেতি দর্শযতি| কথমিত্যাদি কথং নাম যথাসত্ত্বং সর্বপ্রাণিমনোভির্মনুষ্যাণামুপচারঃ স্যাদিত্যেতদর্থমুদাহরণরূপা অমী সত্ত্বভেদা ব্যাখ্যাতা ইতি বাক্যার্থঃ||৪০||
Adhikarana 38 (41) · Śloka 41
কেবলশ্চাযমুদ্দেশো যথোদ্দেশমভিনির্দিষ্টো ভবতি গর্ভাবক্রান্তিসম্প্রযুক্তঃ ; তস্য চার্থস্য বিজ্ঞানে সামর্থ্যং গর্ভকরাণাং চ ভাবানামনুসমাধিঃ, বিধাতশ্চ বিঘাতকরাণাং ভাবানামিতি||৪১||
केवलश्चायमुद्देशो यथोद्देशमभिनिर्दिष्टो भवति गर्भावक्रान्तिसम्प्रयुक्तः ; तस्य चार्थस्य विज्ञाने सामर्थ्यं गर्भकराणां च भावानामनुसमाधिः, विधातश्च विघातकराणां भावानामिति||४१||
🔊 Audio coming soon
যথাপ্রতিজ্ঞং ব্যাখ্যাতার্থমুপসংহরতি- কেবল ইত্যাদি| কেবলঃ কৃত্স্নঃ| উদ্দেশ ইতি ‘যতশ্চাযং গর্ভঃ’ ইত্যাদিগ্রন্থকৃতঃ| যথোদ্দেশমিতি উদ্দেশক্রমানতিক্রমেণ| সামর্থ্যমিতি প্রযোজনম্| অনুসমাধিঃ অনুষ্ঠানম্| বিঘাতঃ বর্জনম্| বিঘাতকরাণামিতি গর্ভবিঘাতকরাণাম্||৪১||
Adhikarana 39 (42-45) · Śloka 45
তত্র শ্লোকাঃ- নিমিত্তমাত্মা প্রকৃতির্বৃদ্ধিঃ কুক্ষৌ ক্রমেণ চ| বৃদ্ধিহেতুশ্চ গর্ভস্য পঞ্চার্থাঃ শুভসঞ্জ্ঞিতাঃ||৪২|| অজন্মনি চ যো হেতুর্বিনাশে বিকৃতাবপি| ইমাংস্ত্রীনশুভান্ ভাবানাহুর্গর্ভবিঘাতকান্||৪৩|| শুভাশুভসমাখ্যাতানষ্টৌ ভাবানিমান্ ভিষক্| সর্বথা বেদ যঃ সর্বান্ স রাজ্ঞঃ কর্তুমর্হতি||৪৪|| অবাপ্ত্যুপাযান্ গর্ভস্য স এবং জ্ঞাতুমর্হতি| যে চ গর্ভবিঘাতোক্তা ভাবাস্তাংশ্চাপ্যুদারধীঃ||৪৫||
तत्र श्लोकाः- निमित्तमात्मा प्रकृतिर्वृद्धिः कुक्षौ क्रमेण च| वृद्धिहेतुश्च गर्भस्य पञ्चार्थाः शुभसञ्ज्ञिताः||४२|| अजन्मनि च यो हेतुर्विनाशे विकृतावपि| इमांस्त्रीनशुभान् भावानाहुर्गर्भविघातकान्||४३|| शुभाशुभसमाख्यातानष्टौ भावानिमान् भिषक्| सर्वथा वेद यः सर्वान् स राज्ञः कर्तुमर्हति||४४|| अवाप्त्युपायान् गर्भस्य स एवं ज्ञातुमर्हति| ये च गर्भविघातोक्ता भावास्तांश्चाप्युदारधीः||४५||
🔊 Audio coming soon
অথৈতেষু মধ্যে কে তে গর্ভস্য শুভা যে গর্ভেঽনুষ্ঠেযাঃ, কে বা অশুভা যে বর্জনীযা ইত্যাহ- নিমিত্তমিত্যাদি| নিমিত্তমিতি ‘যতশ্চ গর্ভঃ সম্ভবতি’ ইতি গ্রন্থোদ্দিষ্টোঽর্থঃ| আত্মেতি গর্ভরূপ আত্মা ‘যস্মিংশ্চ গর্ভসঞ্জ্ঞা’ ইতি গ্রন্থোদ্দিষ্টোঽর্থঃ| প্রক্রিযতেঽস্মাদ্গর্ভ ইতি প্রকৃতিঃ ‘যদ্বিকারশ্চ গর্ভঃ’ ইতি গ্রন্থোদ্দিষ্টোঽর্থঃ| বৃদ্ধিঃ কুক্ষৌ ক্রমেণ চেতি ‘যযাঽনুপূর্ব্যা কুক্ষাবভিনির্বর্ততে গর্ভঃ’ ইতি গ্রন্থোদ্দিষ্টোঽর্থঃ| বৃদ্ধিহেতুরিতি ‘যশ্চাস্য বৃদ্ধিহেতুঃ’ ইত্যাদিনোদ্দিষ্টোঽর্থঃ| অজন্মনি চ যো হেতুরিত্যনেন ‘যতশ্চাস্যাজন্ম ভবতি’ ইত্যুদ্দিষ্টোঽর্থো গৃহ্যতে| বিনাশে চ যো হেতুরিত্যনেন ‘যতশ্চ জাযমানঃ কুক্ষৌ বিনাশং প্রাপ্নোতি’ ইত্যুক্তোঽর্থো গৃহ্যতে| বিকৃতাবপাযে হেতুরিত্যনেন ‘যতশ্চ কার্ত্স্ন্যেন’ ইত্যাদিনোক্তার্থসঙ্গ্রহঃ| গর্ভবিঘাতত্বেনোক্তা গর্ভবিঘাতোক্তাঃ||৪২-৪৫||
Adhikarana puShpikA · Śloka 4
ইত্যগ্নিবেশকৃতে তন্ত্রে চরকপ্রতিসংস্কৃতে শারীরস্থানে মহতীগর্ভাবক্রান্তিশারীরং নাম চতুর্থোঽধ্যাযঃ||৪||
इत्यग्निवेशकृते तन्त्रे चरकप्रतिसंस्कृते शारीरस्थाने महतीगर्भावक्रान्तिशारीरं नाम चतुर्थोऽध्यायः||४||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং শারীরস্থানে মহতীগর্ভাবক্রান্তিশারীরং নাম চতুর্থোঽধ্যাযঃ||৪||