5. puruṣavicayaśārīram

Adhikarana 1 (1-2) · Śloka 2

অথাতঃ পুরুষবিচযং শারীরং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পূর্বাধ্যাযেঽভিহিতং “যাবন্তো হি লোকে ভাবাস্তাবন্তঃ পুরুষে” (শা.অ.৪) ইতি, তচ্চ ন প্রপঞ্চিতং বহুবাচ্যত্বাত্; অতঃ প্রপঞ্চাভিধানার্থং পুরুষবিচযং ব্রূতে| পুরুষস্য বিচযনং লোকসামান্যেন গণনং পুরুষবিচযঃ, তমধিকৃত্য কৃতোঽধ্যাযঃ পুরুষবিচযঃ||১-২||

Adhikarana 2 (3-4) · Śloka 4

‘পুরুষোঽযং লোকসম্মিতঃ’ ইত্যুবাচ ভগবান্ পুনর্বসুরাত্রেযঃ| যাবন্তো হি লোকে (মূর্তিমন্তো ) ভাববিশেষাস্তাবন্তঃ পুরুষে, যাবন্তঃ পুরুষে তাবন্তো লোকে; ইত্যেবংবাদিনং ভগবন্তমাত্রেযমগ্নিবেশ উবাচ- নৈতাবতা বাক্যেনোক্তং বাক্যার্থমবগাহামহে, ভগবতা বুদ্ধ্যা ভূযস্তরমতোঽনুব্যাখ্যাযমানং শুশ্রূষামহ ইতি||৩|| তমুবাচ ভগবানাত্রেযঃ- অপরিসঙ্খ্যেযা লোকাবযববিশেষাঃ, পুরুষাবযববিশেষা অপ্যপরিসঙ্খ্যেযাঃ; তেষাং যথাস্থূলং কতিচিদ্ভাবান্ সামান্যমভিপ্রেত্যোদাহরিষ্যামঃ, তানেকমনা নিবোধ সম্যগুপবর্ণ্যমানানগ্নিবেশ!| ষড্ধাতবঃ সমুদিতাঃ ‘পুরুষ’ ইতি শব্দং লভন্তে; তদ্যথা- পৃথিব্যাপস্তেজো বাযুরাকাশং ব্রহ্ম চাব্যক্তমিতি, এত এব চ ষড্ধাতবঃ সমুদিতাঃ ‘পুরুষ’ ইতি শব্দং লভন্তে||৪||

সম্মিতঃ তুল্যঃ| লোকসম্মিতত্বমেব বিভজতে- যাবন্তো হীত্যাদি| ভগবতা বুদ্ধ্যাঽনুব্যাখ্যাযমানমিতি যোজনা| লোকস্য তরুতৃণপশ্বাদিরূপা অবযবাঃ, তথা পুরুষস্য চ স্নাযুকণ্ডরাধমন্যাদিরূপা অবযবা অপরিসঙ্খ্যেযাঃ; তেন, কার্ত্স্ন্যাভিধানমশক্যম্; অতো যে যে লোকপুরুষযোঃ স্থূলা অবযবাঃ, তে তে সামান্যপ্রতিপাদনার্থমুচ্যন্ত ইতি বাক্যার্থঃ| ব্রহ্মণো বিবরণম্- অব্যক্তমিতি||৩-৪||

Adhikarana 3 (5) · Śloka 5

তস্য পুরুষস্য পৃথিবী মূর্তিঃ, আপঃ ক্লেদঃ, তেজোঽভিসন্তাপঃ, বাযুঃ প্রাণঃ, বিযত্ সুষিরাণি, ব্রহ্ম অন্তরাত্মা| যথা খলু ব্রাহ্মী বিভূতির্লোকে তথা পুরুষেঽপ্যান্তরাত্মিকী বিভূতিঃ, ব্রহ্মণো বিভূতির্লোকে প্রজাপতিরন্তরাত্মনো বিভূতিঃ পুরুষে সত্ত্বং, যস্ত্বিন্দ্রো লোকে স পুরুষেঽহঙ্কারঃ, আদিত্যস্ত্বাদানং, রুদ্রো রোষঃ, সোমঃ প্রসাদঃ, বসবঃ সুখম্, অশ্বিনৌ কান্তিঃ, মরুদুত্সাহঃ, বিশ্বেদেবাঃ সর্বেন্দ্রিযাণি সর্বেন্দ্রিযার্থাশ্চ, তমো মোহঃ, জ্যোতির্জ্ঞানং, যথা লোকস্য সর্গাদিস্তথা পুরুষস্য গর্ভাধানং, যথা কৃতযুগমেবং বাল্যং, যথা ত্রেতা তথা যৌবনং, যথা দ্বাপরস্তথা স্থাবির্যং, যথা কলিরেবমাতুর্যং, যথা যুগান্তস্তথা মরণমিতি| এবমেতেনানুমানেনানুক্তানামপি লোকপুরুষযোরবযববিশেষাণামগ্নিবেশ! সামান্যং বিদ্যাদিতি||৫||

তস্যেত্যাদিনা পুরুষে ষড্ধাতূন্ দর্শযতি| মূর্তিঃ কাঠিন্যম্| লোকে ষড্ধাতবো ব্যক্তা এবেতি ন পুনর্বিবেচিতাঃ| ব্রাহ্মীতি আত্মবিশেষস্য জগত্স্রষ্টুর্বিভূতিঃ| প্রজাপতিঃ দক্ষনামা| আদানং গ্রহণম্; আদিত্যোঽপ্যাদদাতীত্যাদানসাম্যমাদিত্যস্য| ইহ চ মনঃপ্রভৃতিষু প্রাজাপত্যাদিরূপতা আগমসিদ্ধৈব জ্ঞেযা| সর্বেন্দিযার্থা বিশ্বেদেবা এব| সর্গাদিরিতি প্রলযানন্তরঃ কালঃ| অনুক্তানামিত্যনেন মতিঃ বৃহস্পতিঃ, কামঃ গন্ধর্বঃ, ইত্যাদি সামান্যমূহ্যম্||৫||

Adhikarana 4 (6-7) · Śloka 7

এবংবাদিনং ভগবন্তমাত্রেযমগ্নিবেশ উবাচ- এবমেতত্ সর্বমনপবাদং যথোক্তং ভগবতা লোকপুরুষযোঃ সামান্যম্| কিন্ন্বস্য সামান্যোপদেশস্য প্রযোজনমিতি||৬|| ভগবানুবাচ- শৃণ্বগ্নিবেশ! সর্বলোকমাত্মন্যাত্মানং চ সর্বলোকে সমমনুপশ্যতঃ সত্যা বুদ্ধিঃ সমুত্পদ্যতে| সর্বলোকং হ্যাত্মনি পশ্যতো ভবত্যাত্মৈব সুখদুঃখযোঃ কর্তা নান্য ইতি| কর্মাত্মকত্বাচ্চ হেত্বাদিভির্যুক্তঃ সর্বলোকোঽহমিতি বিদিত্বা জ্ঞানং পূর্বমুত্থাপ্যতেঽপবর্গাযেতি| তত্র সংযোগাপেক্ষীলোকশব্দঃ| ষড্ধাতুসমুদাযো হি সামান্যতঃ সর্বলোকঃ||৭||

অনপবাদমিতি অবাধ্যমানম্| কিন্ন্বস্য প্রযোজনমিতি আযুর্বেদে কিমপ্যেতত্ সাম্যকথনে প্রযোজনমিত্যর্থঃ| সত্যা বুদ্ধিরুত্পদ্যতে ইতি অস্য যোজনাযাং ‘কিঞ্চাস্যাঃ প্রযোজনম্’ ইতি শেষো জ্ঞেযঃ| যথা চ লোকপুরুষসাম্যং সত্যবুদ্ধিজনকং ভবতি তদাহ- সর্বলোকং হীত্যাদি| আত্মনি পশ্যত ইতি আত্মনোঽভেদেন পশ্যতঃ| আত্মশব্দেন ষড্ধাতুসমুদাযাত্মকঃ পুরুষ ইহোচ্যতে; তেন, যত্কিঞ্চিল্লোকগতং সুখদুঃখজনকং, তদাত্মরূপমেব; তেন বাহ্যলোককৃতমপি আত্মকৃতমেব বৈষযিকং নিত্যদুঃখানুসক্তং হেযং সুখং, তথা নিসর্গহেযং দুঃখং চ পশ্যন্ রাগদ্বেষনির্মুক্তঃ সন্ সত্যজ্ঞানবান্ ভবতীতি ভাবঃ| অথ সত্যজ্ঞানস্যাপি কিং প্রযোজনমিত্যাহ- কর্মেত্যাদি| লোকপুরুষসাম্যজ্ঞানেঽপি সত্যজ্ঞানস্যাপবর্গানুষ্ঠানং প্রযোজনমিতি বাক্যার্থঃ| অত্র কর্মাত্মকত্বাদিতি কর্মাধীনত্বাত্| হেত্বাদযোঽগ্রে বক্ষ্যমাণাঃ | কর্মপরবশঃ সন্ হেত্বাদিভির্যুক্তোঽযমাত্মা প্রবর্ততে, তত্ কর্ম তত্ত্বজ্ঞানাত্ প্রবৃত্ত্যুপরমে সতি কারণাভাবান্নোপপদ্যতে; উত্পন্নং চ কর্ম অরক্তস্য তত্ত্বজ্ঞানেন, অদৃষ্টস্য চোপভোগাত্, আত্যন্তিককর্মক্ষযাদাত্যন্তিককর্মফলাভাবরূপো মোক্ষো ভবতীতি ভাবঃ| সংযোগাপেক্ষীতি ষড্ধাতুমেলকে পুরুষরূপে বর্ততে ইত্যর্থঃ| লোকশব্দেনেহ প্রকরণে লোকত ইতি কৃত্বা পুরুষ এবোচ্যতে, ন জগদ্রূপো লোকঃ| যতঃ, হেত্বাদযো যেঽত্র কর্মপরবশত্বেন লোকে বক্তব্যাঃ, তে পুরুষ এব সম্ভবন্তি| সর্বশব্দেন সর্বপ্রাণিনো গ্রাহযতি||৬-৭||

Adhikarana 5 (8) · Śloka 8

তস্য হেতুঃ, উত্পত্তিঃ, বৃদ্ধিঃ, উপপ্লবঃ, বিযোগশ্চ| তত্র হেতুরুত্পত্তিকারণং, উত্পত্তির্জন্ম, বৃদ্ধিরাপ্যাযনম্, উপপ্লবো দুঃখাগমঃ, ষড্ধাতুবিভাগো বিযোগঃ সজীবাপগমঃ স প্রাণনিরোধঃ স ভঙ্গঃ স লোকস্বভাবঃ| তস্য মূলং সর্বোপপ্লবানাং চ প্রবৃত্তিঃ, নিবৃত্তিরুপরমঃ| প্রবৃত্তির্দুঃখং, নিবৃত্তিঃ সুখমিতি যজ্জ্ঞানমুত্পদ্যতে তত্ সত্যম্| তস্য হেতুঃ সর্বলোকসামান্যজ্ঞানম্| এতত্প্রযোজনং সামান্যোপদেশস্যেতি||৮||

হেত্বাদিপঞ্চকং নির্দিশ্য বিভজতে- তস্য হেতুরিত্যাদি| তস্য মূলমিতি তস্য জীবাপগমস্য কারণম্| সর্বোপপ্লবানাং চেতি সর্বদুঃখানাম্| প্রবৃত্তিঃ রাগদ্বেষমূলা প্রবৃত্তিঃ| নিবৃত্তিরিতি অপ্রবৃত্তিঃ| উপরমশব্দস্তু তস্যেত্যনেন তথা সর্বোপপ্লবানাং চেত্যনেন চ সম্বধ্যতে| তেন দুঃখানাং মরণস্য চোপরমো নিবৃত্তিকৃত এব; নিবৃত্তিজন্যত্বেন চ কার্যকারণযোরভেদোপচারাদুপরমোঽপি নিবৃত্তিশব্দস্য সামানাধিকরণ্যেনোচ্যতে| প্রবৃত্তির্দুঃখমিতি চ তথা নিবৃত্তিঃ সুখমিতি চ কার্যকারণযোরভেদোপচারাদ্বোদ্ধব্যম্| সত্যজ্ঞানস্বরূপমাহ - ইতি যজ্জ্ঞানমিত্যাদি| ইতীতি পূর্বপ্রত্যবমর্শকম্| এতস্মিন্ সত্যজ্ঞানে লোকপুরুষসামান্যজ্ঞানস্য হেতুত্বং দর্শযন্নাহ- তস্যেত্যাদি||৮||

Adhikarana 6 (9-10) · Śloka 10

অথাগ্নিবেশ উবাচ- কিম্মূলা ভগবন্! প্রবৃত্তিঃ, নিবৃত্তৌ চ ক উপায ইতি||৯|| ভগবানুবাচ- মোহেচ্ছাদ্বেষকর্মমূলা প্রবৃত্তিঃ| তজ্জা হ্যহঙ্কারসঙ্গসংশযাভিসম্প্লবাভ্যবপাতবিপ্রত্যযাবিশেষানুপাযাস্তরুণমিব দ্রুমমতিবিপুলশাখাস্তরবোঽভিভূয পুরুষমবতত্যৈবোত্তিষ্ঠন্তে; যৈরভিভূতো ন সত্তামতিবর্ততে| তত্রৈবঞ্জাতিরূপবিত্তবৃত্তবুদ্ধিশীলবিদ্যাভিজনবযোবীর্যপ্রভাবসম্পন্নোঽহমিত্যহঙ্কারঃ, যন্মনোবাক্কাযকর্ম নাপবর্গায স সঙ্গঃ, কর্মফলমোক্ষপুরুষপ্রেত্যভাবাদযঃ সন্তি বা নেতি সংশযঃ, সর্বাবস্থাস্বনন্যোঽহমহং স্রষ্টা স্বভাবসংসিদ্ধোঽহমহং শরীরেন্দ্রিযবুদ্ধিস্মৃতিবিশেষরাশিরিতি গ্রহণমভিসম্প্লবঃ, মম মাতৃপিতৃভ্রাতৃদারাপত্যবন্ধুমিত্রভৃত্যগণো গণস্য চাহমিত্যভ্যবপাতঃ, কার্যাকার্যহিতাহিতশুভাশুভেষু বিপরীতাভিনিবেশো বিপ্রত্যযঃ, জ্ঞাজ্ঞযোঃ প্রকৃতিবিকারযোঃ প্রবৃত্তিনিবৃত্ত্যোশ্চ সামান্যদর্শনমবিশেষঃ, প্রোক্ষণানশনাগ্নিহোত্রত্রিষবণাভ্যুক্ষণাবাহনযাজনযজনযাচনসলিলহুতাশনপ্রবেশাদযঃ সমারম্ভাঃ প্রোচ্যন্তে হ্যনুপাযাঃ| এবমযমধীধৃতিস্মৃতিরহঙ্কারাভিনিবিষ্টঃ সক্তঃ সসংশযোঽভিসম্প্লুতবুদ্ধিরভ্যবপতিতোঽন্যথাদৃষ্টিরবিশেষগ্রাহী বিমার্গগতির্নিবাসবৃক্ষঃ সত্ত্বশরীরদোষমূলানাং সর্বদুঃখানাং ভবতি| এবমহঙ্কারাদিভির্দোষৈর্ভ্রাম্যমাণো নাতিবর্ততে প্রবৃত্তিং, সা চ মূলমঘস্য||১০||

প্রবৃত্তেঃ সংসাররূপাযাঃ, তথা নিবৃত্তের্মোক্ষরূপাযাঃ কারণমুপাযং চ পৃচ্ছতি- কিম্মূলেত্যাদি| মোহেত্যাদ্যুত্তরম্| মোহেচ্ছাদ্বেষকর্মমূলেতি মোহান্মিথ্যাজ্ঞানরূপাদিচ্ছাদ্বেষৌ, তযোশ্চ ধর্মাধর্মরূপং কর্ম, তচ্চ মূলং সংসারস্যেত্যর্থঃ| কথমেতে মোহাদযঃ সংসারকারণমিত্যাহ- তজ্জা হীত্যাদি| অত্র চাহঙ্কারাদৌ যথাযোগ্যতযা মোহাদীনাং কারণত্বং জ্ঞেযম্| অহঙ্কারাদযশ্চাষ্টাবগ্রে বক্ষ্যমাণা জ্ঞেযাঃ| অবতত্যেতি ব্যাপ্য| ন সত্তামতিবর্ততে ইতি ন সংসারে স্থিতিমতিবর্ততে| অত্রাদ্যুক্তমহঙ্কারং বিবৃণোতি- তত্রৈবমিত্যাদি| জাত্যাদিভিঃ প্রভাবান্তৈঃ সম্পন্ন উত্কৃষ্টোঽহমিতি জ্ঞানমহঙ্কারঃ| যদিত্যাদি সঙ্গবিবরণম্| কর্মফলাদযঃ সন্তি ন বেতি যজ্জ্ঞানং, তত্ সংশযঃ| অভিসম্প্লবমাহ- সর্বেত্যাদি| আত্মনোঽভিমত অনাত্মন্যভিসম্প্লবোঽভিসম্প্লবঃ; আত্মনোঽনাত্মগোচরতযা আত্মবুদ্ধিরিত্যর্থঃ| সর্বাবস্থাস্বিতি সর্বাসু শরীরাবস্থাসু ষড্ধাতুসমুদাযরূপ এবানন্য ইতি যজ্জ্ঞানং তদিহ জ্ঞেযং; পরমাত্মনস্তু সর্বাবস্থাস্বনন্যত্বমিতি যজ্জ্ঞানং, তত্ সম্যগ্জ্ঞানমেব| এবমহং স্রষ্টাঽহং স্বভাবসংসিদ্ধ ইত্যত্রাপি শরীর এবাহঙ্কারবিষযো জ্ঞেযঃ| অহং শরীরেন্দ্রিযবুদ্ধিবিশেষরাশিরিত্যত্র শরীরাদিষ্বচেতনেষ্বহঙ্কারাস্পদত্বেন চেতনত্বাভিমানো বিরুদ্ধ ইতি জ্ঞেযম্| মমেত্যাদিনা অভ্যবপাতমাহ; অভ্যবপাতঃ পরমার্থতোঽনাত্মীযে মমতা| কার্যেত্যাদিনা বিপ্রত্যযং ব্রূতে| বিপরীতাভিনিবেশো বিপর্যযেণ জ্ঞানং; যথা- কার্যে অকার্যম্, অকার্যে কার্যমিত্যাদি| জ্ঞাজ্ঞযোরিত্যাদিনাঽবিশেষমাহ| অবিশেষো বিশেষাপ্রতীতিঃ, বিপ্রত্যযস্তু বিশেষাণাং বিপর্যযেণ গ্রহণমিতি ভেদঃ| প্রোক্ষণেত্যাদিনা অনুপাযমাহ| অনুপাযা ইতি অন্যোপাযাঃ সন্তোঽপি পরমপুরুষার্থে মোক্ষে অনুপাযাঃ| ত্রিষবণং ত্রিসন্ধ্যস্নানম্| সম্প্রত্যহঙ্কারাদীনাং ধীধৃতিস্মৃতিবিভ্রংশমূলত্বেনাধীধৃতিস্মৃত্যভিধানপূর্বকং সংসাররূপপ্রবৃত্তিনিত্যানুবন্ধশারীরমানসদুঃখকারণত্বং ব্যুত্পাদিতানামহঙ্কারাদীনাং সঙ্ক্ষিপ্যাহ- এবমিত্যাদিনা| নিবাসবৃক্ষ ইব নিবাসবৃক্ষঃ; তেন যথা নিবাসবৃক্ষঃ পক্ষিণাং নিত্যমাশ্রযো ভবতি, এবমহঙ্কারাদিযুক্তোঽপি রোগস্য নিবাসো ভবতীতি দর্শযতি| ভ্রাম্যমাণ ইতি পুনঃ পুনরপি শরীরান্তরাণি নীযমানঃ| নাতিবর্ততে প্রবৃত্তিমিতি সংসারং ন পরিত্যজতি| এবং মোহেচ্ছাজন্যকর্মমূলতাং প্রবৃত্তের্দর্শযিত্বা, প্রবৃত্তেরপি কর্মকারণতামাহ- সা চ মূলমঘস্যেতি| প্রবৃত্তিরপি ধর্মাধর্মরূপস্যাঘস্য মূলম্; ইহ চ ধর্মাধর্মাববিশেষেণ সংসারদুঃখকারণতযা অঘশব্দেনোক্তৌ||৯-১০||

Adhikarana 7 (11-12) · Śloka 12

নিবৃত্তিরপবর্গঃ; তত্ পরং প্রশান্তং তত্তদক্ষরং তদ্ব্রহ্ম স মোক্ষঃ||১১|| তত্র মুমুক্ষূণামুদযনানি ব্যাখ্যাস্যামঃ| তত্র লোকদোষদর্শিনো মুমুক্ষোরাদিত এবাচার্যাভিগমনং, তস্যোপদেশানুষ্ঠানম্, অগ্নেরেবোপচর্যা, ধর্মশাস্ত্রানুগমনং, তদার্থাববোধঃ, তেনাবষ্টম্ভঃ, তত্র যথোক্তাঃ ক্রিযাঃ, সতামুপাসনম্, অসতাং পরিবর্জনম্, অসঙ্গতির্দুর্জনেন, সত্যং সর্বভূতহিতমপরুষমনতিকালে পরীক্ষ্য বচনং, সর্বপ্রাণিষু চাত্মনীবাবেক্ষা, সর্বাসামস্মরণমসঙ্কল্পনমপ্রার্থনমনভিভাষণং চ স্ত্রীণাং, সর্বপরিগ্রহত্যাগঃ, কৌপীনং প্রচ্ছাদনার্থং, ধাতুরাগনিবসনং, কন্থাসীবনহেতোঃ সূচীপিপ্পলকং, শৌচাধানতোর্জলকুণ্ডিকা, দণ্ডধারণং, ভৈক্ষচর্যার্থং পাত্রং, প্রাণধারণার্থমেককালমগ্রাম্যো যথোপপন্নোঽভ্যবহারঃ, শ্রমাপনযনার্থং শীর্ণশুষ্কপর্ণতৃণাস্তরণোপধানং, ধ্যানহেতোঃ কাযনিবন্ধনং, বনেষ্বনিকেতবাসঃ, তন্দ্রানিন্দ্রালস্যাদিকর্মবর্জনং, ইন্দ্রিযার্থেষ্বনুরাগোপতাপনিগ্রহঃ, সুপ্তস্থিতগতপ্রেক্ষিতা হারবিহারপ্রত্যঙ্গচেষ্টাদিকেষ্বারম্ভেষু স্মৃতিপূর্বিকা প্রবৃত্তিঃ, সত্কারস্তুতিগর্হাবমানক্ষমত্বং, ক্ষুত্পিপাসাযাসশ্রমশীতোষ্ণবাতবর্ষাসুখদুঃখসংস্পর্শসহত্বং, শোকদৈন্যমানোদ্বেগমদলোভরাগের্ষ্যাভযক্রোধাদিভিরসঞ্চলনম্, অহঙ্কারাদিষূপসর্গসঞ্জ্ঞা, লোকপুরুষযোঃ সর্গাদিসামান্যাবেক্ষণং, কার্যকালাত্যযভযং, যোগারম্ভে সততমনির্বেদঃ, সত্ত্বোত্সাহঃ, অপবর্গায ধীধৃতিস্মৃতিবলাধানং; নিযমনমিন্দ্রিযাণাং চেতসি, চেতস আত্মনি, আত্মনশ্চ; ধাতুভেদেন শরীরাবযবসঙ্খ্যানমভীক্ষ্ণং, সর্বং কারণবদ্দুঃখমস্বমনিত্যমিত্যভ্যুপগমঃ, সর্বপ্রবৃত্তিষ্বঘসঞ্জ্ঞা , সর্বসন্ন্যাসে সুখমিত্যভিনিবেশঃ; এষ মার্গোঽপবর্গায, অতোঽন্যথা বধ্যতে; ইত্যুদযনানি ব্যাখ্যাতানি||১২||

সম্প্রতি নিবৃত্তাবুপাযং বক্তুং নিবৃত্তিমেব তাবদুপাদেযতাপ্রতিপাদকপর্যাযৈরাহ- নিবৃত্তিরিত্যাদি| ‘উত্’ ইত্যব্যযং মোক্ষ ইত্যর্থে; উদযনানি হি মোক্ষোপাযা ইত্যর্থঃ| লোকদোষদর্শিন ইতি হেতুগর্ভং বিশেষণং; তেন নিত্যং দুঃখাক্রান্তলোকদর্শনাদ্বিরক্তস্য সত ইতি দর্শযতি| আচার্য ইহ মোক্ষশাস্ত্রোপদেষ্টা| তেনাবষ্টম্ভ ইতি শাত্রাববোধেন ধৈর্যং করণীযং, মনাগপি তত্র কথন্তা ন কর্তব্যেত্যর্থঃ| যথোক্তাঃ ক্রিযাঃ ‘কর্তব্যাঃ’ ইতি শেষঃ| আত্মনীবাবেক্ষেতি যথা আত্মন্যনপকার্যতাবুদ্ধিস্তথা সর্বপ্রাণিষু কর্তব্যা| অসঙ্কল্পনমিতি অভাবনম্| কৌপীনং প্রচ্ছাদনার্থমিতি কটিবেষ্টনার্থং; কিংবা কৌপীনার্থং প্রচ্ছাদনার্থং চ| সূচীপিপ্পলকং সূচীস্থাপনপাত্রম্| ভৈক্ষচর্যার্থং পাত্রং ভিক্ষাপাত্রমিত্যর্থঃ| প্রাণযাত্রার্থমিত্যনেন যাবন্মাত্রেণাহারেণ প্রাণযাত্রা ভবতি তাবন্মাত্র আহারঃ কর্তব্যঃ, ন তু রাগাদিতি দর্শযতি| এবং শ্রমাপনযনার্থমিত্যাদাবপি তাবন্মাত্রপ্রযোজনতা ব্যাখ্যেযা| কাযনিবন্ধনং যোগপট্টম্| অনিকেতবাস ইতি অগৃহবাসঃ, এতেন বনেঽপি ন গৃহং কৃত্বা স্থাতব্যমিতি দর্শযতি| ইন্দ্রিযার্থেষু শব্দাদিষু অনুরাগস্য তথোপতাপস্য চ দ্বেষরূপস্য নিগ্রহঃ কর্তব্যঃ| স্মৃতিপূর্বিকা প্রবৃত্তিরিতি কোঽহং, কিমর্থং রাগত্যাগাদিকমারভ্যতে, ইত্যাদি সর্বদা স্মর্তব্যমিত্যর্থঃ| সত্কারঃ পূজা, সত্কারে স্তুতৌ চ সত্যামহৃষ্টত্বং, তথা গর্হাযামবমানে চ নির্দ্বেষত্বং সত্কারাদিক্ষমিত্বং জ্ঞেযম্| ক্ষুধাদিষু চানুদ্বেগঃ ক্ষুধাদিসহত্বম্| অসংবসনম্ অসংবাসঃ| অহঙ্কারাদযোঽষ্টাবিহৈবোক্তাঃ| উপসর্গসঞ্জ্ঞেতি অনর্থহেতুত্বভাবনা| লোকপুরুষযোঃ সর্গাদিসামান্যাবেক্ষণামিতি যথা ইহৈব লোকপুরুষযোরাদিসর্গতঃ প্রভৃতি সামান্যমুক্তং, তথাঽবেক্ষণমিত্যর্থঃ| কার্যকালাত্যযভযমিতি মোক্ষানুগুণকর্তব্যস্য কালাতিপাতভযং করণীযম্| নিযমনমিন্দ্রিযাণাং চেতসীতি ইন্দ্রিযাণি বাহ্মবিষযনিবৃত্তানি মনস্যেব নিযতানি কর্তব্যানি; চেতসশ্চিন্ত্যাদিবিষযেভ্যো ব্যাবৃত্তস্য পরমাত্মন্যাত্মজ্ঞানার্থং নিযমনং কর্তব্যম্; আত্মনশ্চাত্মনি নিযমনমিতি যোজনা| তেন, আত্মাঽপীন্দ্রিযাদিবিষযেভ্যো ব্যাবর্ত্যাত্মনি নিযন্তব্যঃ| ধাতুভেদেন শরীরাবযবসঙ্খ্যানমিতি শরীরস্য রসমলস্নায্বাদিরূপতযা জ্ঞানম্| শরীরং হি রসমলস্নায্বাদিরূপতযা ভাব্যমানং বৈরাগ্যহেতুর্ভবতি; যথা- “মজ্জাঽস্থ্না রজসা প্লীহ্না যকৃতা শকৃতাঽপি চ| পূর্ণাঃ স্নাযুসিরাভিশ্চ স্ত্রিযশ্চর্মপ্রসেবিকাঃ” ইত্যাদিকা বৈরাগ্যভাবনা| কারণবদিত্যনেন নিত্যাত্মব্যতিরিক্তং সর্বমনিত্যং দর্শযতি| দুঃখমিতি দুঃখহেতুঃ| অস্বমিতি আত্মব্যতিরিক্তমনাত্মীযং চ| সর্বসন্ন্যাসে সর্বপ্রবৃত্ত্যুপরমে||১১-১২||

Adhikarana 8 (13-15) · Śloka 15

ভবন্তি চাত্র- এতৈরবিমলং সত্ত্বং শুদ্ধ্যুপাযৈর্বিশুধ্যতি| মৃজ্যমান ইবাদর্শস্তৈলচেলকচাদিভিঃ||১৩|| গ্রহাম্বুদরজোধূমনীহারৈরসমাবৃতম্| যথাঽর্কমণ্ডলং ভাতি ভাতি সত্ত্বং তথাঽমলম্||১৪|| জ্বলত্যাত্মনি সংরুদ্ধং তত্ সত্ত্বং সংবৃতাযনে| শুদ্ধঃ স্থিরঃ প্রসন্নার্চির্দীপো দীপাশযে যথা||১৫||

অবিমলমিতি ক্রিযাবিশেষণম্| গ্রহঃ রাহুঃ| সত্ত্বস্য পঞ্চৈবেন্দ্রিযাণি জ্ঞানাবরকাণি ভবন্তীতি কৃত্বা সূর্যস্যাপি পঞ্চৈব গ্রহাদযশ্চাবরকা উক্তাঃ| জ্বলতীতি কেবলাত্মজ্ঞানজনকত্বেন প্রকাশতে| আত্মনি সংরুদ্ধমিতি ইন্দ্রিযেভ্যো ব্যাবৃত্যাত্মনিযতম্| সংবৃতাযন ইতি আত্মপক্ষেঽপি সংবৃতেন্দ্রিযরূপচ্ছিদ্রে আত্মনীতি জ্ঞেযম্| দীপাশযঃ দীপধারিকা, গৃহং বা||১৩-১৫||

Adhikarana 9 (16-19) · Śloka 19

শুদ্ধসত্ত্বস্য যা শুদ্ধা সত্যা বুদ্ধিঃ প্রবর্ততে| যযা ভিনত্ত্যতিবলং মহামোহমযং তমঃ||১৬|| সর্বভাবস্বভাবজ্ঞো যযা ভবতি নিঃস্পৃহঃ| যোগং যযা সাধযতে সাঙ্খ্যঃ সম্পদ্যতে যযা||১৭|| যযা নোপৈত্যহঙ্কারং নোপাস্তে কারণং যযা| যযা নালম্বতে কিঞ্চিত্ সর্বং সন্ন্যস্যতে যযা||১৮|| যাতি ব্রহ্ম যযা নিত্যমজরং শান্তমব্যযম্ | বিদ্যা সিদ্ধির্মতির্মেধা প্রজ্ঞা জ্ঞানং চ সা মতা||১৯||

শুদ্ধসত্ত্বমভিধায তজ্জন্যাং মোক্ষসাধনত্বেনাত্যর্থোপাদেযাং সত্যাং বুদ্ধিং বিবিধৈরুপযুক্তৈঃ স্বরূপৈরাহ- শুদ্ধেত্যাদি| মহামোহঃ অনাদিমিথ্যাজ্ঞানম্| নিঃস্পৃহ ইতি উপাদিত্সাজিহাসাশূন্যঃ| যোগমিতি বিষযব্যাবৃত্তস্য মনস আত্মন্যেব পরং যোগম্| সঙ্খ্যা তত্ত্বজ্ঞানং, তযা বর্তত ইতি সাঙ্খ্যঃ| নোপাস্তে কারণমিতি ন সুখদুঃখকারণং সেবতে| নালম্বতে কিঞ্চিদিতি ক্বচিদপ্যাস্থানং ন করোতি| সন্ন্যস্যত ইতি সর্বত্রোদাসীনো ভবতি| ব্রহ্মেতি মোক্ষম্| বিদ্যাসিদ্ধ্যাদযশ্চ যদ্যপি জ্ঞানবিশেষেঽপি প্রসিদ্ধাঃ, তথাঽপীহ প্রকরণাত্ তত্ত্বজ্ঞানপরা এব জ্ঞেযাঃ||১৬-১৯||

Adhikarana 10 (20) · Śloka 20

লোকে বিততমাত্মানং লোকং চাত্মনি পশ্যতঃ| পরাবরদৃশঃ শান্তির্জ্ঞানমূলা ন নশ্যতি||২০||

লোকে বিততমাত্মানমিতি লোকরূপমাত্মানং, তথা লোকং চাত্মনি শরিরাত্মমেলকরূপে পশ্যতঃ, ‘ব্যবস্থিতং’ ইতি শেষঃ| পরাবরদৃশ ইতি পরম্ আত্মানম্, অবরাণি আত্মব্যতিরিক্তানি প্রবৃত্যাদীনি, যঃ পশ্যতি তস্য পরাবরদৃশঃ| জ্ঞানমূলেত্যনেন মোহমূলামস্থিরাং শান্তিং নিরস্যতি||২০||

Adhikarana 11 (21) · Śloka 21

পশ্যতঃ সর্বভাবান্ হি সর্বাবস্থাসু সর্বদা| ব্রহ্মভূতস্য সংযোগো ন শুদ্ধস্যোপপদ্যতে||২১||

অথ জীবন্মুক্তস্য কিমিতি সুখদুঃখহেতুধর্মাধর্মসংযোগো ন ভবতীত্যাহ- পশ্যত ইত্যাদি| পশ্যতি ইতি পশ্যত এব পরং, ন তু রজ্যতো নাপি দ্বিষত ইত্যর্থঃ| ব্রহ্মভূতস্যেতি ব্রহ্মসদৃশস্য জীবন্মুক্তস্যেতি ব্যাখ্যেযং; সর্বথা মুক্তে হি জ্ঞানমপি নাস্তি, তেন পশ্যত ইতি ন স্যাত্| সংযোগ ইতি ধর্মাধর্মসম্বন্ধঃ||২১||

Adhikarana 12 (22) · Śloka 22

নাত্মনঃ করণাভাবাল্লিঙ্গমপ্যুপলভ্যতে| স সর্বকরণাযোগান্মুক্ত ইত্যভিধীযতে||২২||

অথ মুক্তাত্মনঃ কিং লক্ষণমিত্যাহ- নেত্যাদি| আত্মন ইতি মুক্তাত্মনঃ| করণাভাবাদিতি মনঃপ্রভৃতিকরণাভাবাত্| উক্তং হি- “করণানি মনোবুদ্ধির্বুদ্ধিকর্মেন্দ্রিযাণি চ” (শা.অ.১) ইতি, মনঃপ্রভৃত্যভাবাচ্চ শরীরাভাবোঽপ্যর্থলব্ধ এব; সর্বাভাবাচ্চাত্মনি কিমপি লক্ষণং নাস্তি, স্বরূপেণ চাত্মাঽতীন্দ্রিয এব; তেন আত্মা উপলব্ধিযোগ্যতাভাবান্নোপলভ্যতে, তল্লিঙ্গান্যপ্যভাবাদেব নোপলভ্যন্ত ইতি ভাবঃ||২২||

Adhikarana 13 (23-24) · Śloka 24

বিপাপং বিরজঃ শান্তং পরমক্ষরমব্যযম্| অমৃতং ব্রহ্ম নির্বাণং পর্যাযৈঃ শান্তিরুচ্যতে||২৩|| এতত্তত্ সৌম্য! বিজ্ঞানং যজ্জ্ঞাত্বা মুক্তসংশযাঃ| মুনযঃ প্রশমং জগ্মুর্বীতমোহরজঃস্পৃহাঃ||২৪||

বিপাপমিত্যাদিনা মোক্ষস্বরূপপ্রকাশকান্ পর্যাযানাহ| যজ্জ্ঞাত্বেতি জ্ঞানং প্রাপ্যেত্যর্থঃ; কিংবা, স্বপ্রকাশকত্বাজ্জ্ঞানস্য জ্ঞানমপি জ্ঞেযং ভবতীতি বোদ্ধব্যম্||২৩-২৪||

Adhikarana 14 (25-26) · Śloka 26

তত্র শ্লোকৌ- সপ্রযোজনমুদ্দিষ্টং লোকস্য পুরুষস্য চ| সামান্যং মূলমুত্পত্তৌ নিবৃত্তৌ মার্গ এব চ||২৫|| শুদ্ধসত্ত্বসমাধানং সত্যা বুদ্ধিশ্চ নৈষ্ঠিকী| বিচযে পুরুষস্যোক্তা নিষ্ঠা চ পরমর্ষিণা||২৬||

সঙ্গ্রহে শুদ্ধসত্ত্বসমাধানমিত্যনেন ‘এতৈরবিমলং’ ইত্যাদিনা ‘দীপাশযে যথা’ ইত্যন্তেন গ্রন্থেনোক্তার্থঃ সঙ্গৃহীতঃ| ‘শুদ্ধসত্ত্বস্য’ ইত্যাদিনা সত্যা বুদ্ধিরুক্তা| নৈষ্ঠিকীতি সত্যাবুদ্ধেরেব বিশেষণং; নৈষ্ঠিকী মোক্ষসাধিকা; নিষ্ঠা মোক্ষঃ||২৫-২৬||

Adhikarana puShpikA · Śloka 5

ইত্যগ্নিবেশকৃতে তন্ত্রে চরকপ্রতিসংস্কৃতে শারীরস্থানে পুরুষবিচযশারীরং নাম পঞ্চমোঽধ্যাযঃ||৫||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং শারীরস্থানে পুরুষবিচযশারীরং নাম পঞ্চমোঽধ্যাযঃ||৫||