6. śarīravicayaśārīram

Adhikarana 1 (1-3) · Śloka 3

অথাতঃ শরীরবিচযং শারীরং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২|| শরীরবিচযঃ শরীরোপকারার্থমিষ্যতে| জ্ঞাত্বা হি শরীরতত্ত্বং শরীরোপকারকরেষু ভাবেষু জ্ঞানমুত্পদ্যতে| তস্মাচ্ছরীরবিচযং প্রশংসন্তি কুশলাঃ||৩||

পুরুষবিচযং মোক্ষোপযুক্তত্বেন পুরুষোপকারকমভিধায, ব্যাক্রিযমাণচিকিত্সোপযুক্তং শরীরোপকারকং শরীরবিচযং ব্রূতে| শরীরস্য বিচযনং বিচযঃ শরীরস্য প্রবিভাগেন জ্ঞানমিত্যর্থঃ| শরীরোপকারার্থমিতি শরীরারোগ্যার্থম্| অথ কথং শরীরজ্ঞানং শরীরোপকারকমিত্যাহ- জ্ঞাত্বা হীত্যাদি| শরীরস্য রক্তাদিরূপস্য স্বভাবরূপং তত্ত্বং জ্ঞাত্বৈব ইদমস্য বৃদ্ধস্য ধাতোরসমানগুণতযা হ্রাসকত্বেনোপকারকমিতি, তথোক্তবিপর্যযাচ্চাপকারকমিতি জ্ঞানং জাযতে, নোপকার্যশরীরতত্ত্বজ্ঞানেঽসতীতি বাক্যার্থঃ||১-৩||

Adhikarana 2 (4) · Śloka 4

তত্র শরীরং নাম চেতনাধিষ্ঠানভূতং পঞ্চমহাভূতবিকারসমুদাযাত্মকং সমযোগবাহি | যদা হ্যস্মিঞ্ শরীরে ধাতবো বৈষম্যমাপদ্যন্তে তদা ক্লেশং বিনাশং বা প্রাপ্নোতি| বৈষম্যগমনং হি পুনর্ধাতূনাং বৃদ্ধিহ্রাসগমনমকার্ত্স্ন্যেন প্রকৃত্যা চ||৪||

সমুদিতস্যৈব তাবচ্ছরীরস্য স্বরূপমাহ- তত্রেত্যাদি| চেতনাশব্দেন জ্ঞানকারণমাত্মোচ্যতে, ভূতশব্দ উপমানে; তেন, চেতনাযা আত্মসম্বন্ধিন্যাঃ শরীরে এবোপলম্ভাদাত্মনঃ শরীরমধিষ্ঠানমিতি ভবতি; পরমার্থস্তু চেতনা আত্মাশ্রযা, আত্মা চ নিরাশ্রয এব; কিংবা চেতনস্যাত্মনোঽধিষ্ঠানভূতমিতি চেতনাধিষ্ঠানভূতম্| পঞ্চানাং মহাভূতানাং বিকারা রসাদযঃ শরীরারম্ভকাঃ, তেষাং সমুদাযো মেলকঃ, স আত্মা স্বরূপং যস্য তত্তথা| সমুদাযশব্দেন চ সমুদাযারম্ভকা ধাতব এবোচ্যন্তে; তেন, ন সংযোগমাত্রস্য শরীরত্বপ্রসক্তিঃ| কিংবা, সমুদাযঃ সংযোগ এবোচ্যতাং, তথাঽপি সমুদায আত্মা কারণং যস্য শরীরস্য দ্রব্যরূপস্য তত্ পঞ্চমহাভূতবিকারসমুদাযাত্মকং শরীরমেব| সমেন উচিতপ্রমাণেন ধাতূনাং মেলকেন সম্যঙ্নীরোগতযা বহতীতি সমযোগবাহি| যদা তু ধাতূনাং ন্যূনাতিরিক্তত্বেন বিষমো মেলকো ভবতি, তদা অসমযোগবাহীতি দর্শযন্নাহ- যদা হীত্যাদি| লঘুনা বৈষম্যেণ রোগমাত্রজনকেন ক্লেশং, মহতা ত্বসাধ্যরোগজনকেন বৈষম্যেণ বিনাশং মরণং প্রাপ্নোতি শরীরম্| অথ কিং তদ্বৈষম্যমিত্যাহ- বৈষম্যগমনমিত্যাদি| বৈষম্যগমনং বৈষম্যাবস্থাপ্রাপ্তিঃ, বৈষম্যমেব কাদাচিত্কমিত্যর্থঃ; যদি হি বৈষম্যমিত্যেব ব্রূযাত্, তদা সহজসিদ্ধমপি ধাতূনাং যন্ন্যূনাতিরিক্তত্বেন বৈষম্যং তদপি শিষ্যেণ গৃহ্যেত; তেন, গমনপদপ্রক্ষেপাত্ সহজং বৈষম্যং পরিত্যজ্য স্বপ্রমাণাপেক্ষযৈব কদাচিদুত্পদ্যমানং বৈষম্যং দর্শযতি| বৃদ্ধিহ্রাসগমনং চেহ ব্যস্তং সমস্তং চ বৈষম্যং জ্ঞেযম্| বৃদ্ধিহ্রাসস্যৈব বিশেষানাহ- অকার্ত্স্ন্যেন প্রকৃত্যা চেতি; অকার্ত্স্ন্যেতি একদেশেন, প্রকৃত্যেতি সকলেন স্বভাবেন| এতেন চ রসাদীনাং চাংশেন বৃদ্ধিহ্রাসৌ, তথা কার্ত্স্ন্যেন বৃদ্ধিহ্রাসাবুপগৃহীতৌ ভবতঃ| অন্যে তু, ‘অকার্ত্স্ন্যেন’ ইতিপদং ক্লেশং বিনাশং বা প্রাপ্নোতীত্যনেন সমং যোজযন্তি| তেন, যদাঽপি ধাতবো বৈষম্যমাপদ্যন্তে, তদাঽপি নাবশ্যং ক্লেশবিনাশৌ ভবতঃ, অকার্ত্স্ন্যেনেতিপদেন ক্লেশবিনাশব্যভিচারস্যাভিহিতত্বাত্; দৃষ্টং চৈতত্, যথা- বৃষ্যপ্রযোগাচ্ছুক্রবৃদ্ধৌ সত্যামপি ন ক্লেশবিনাশৌ ভবতঃ, তথা বালস্য বর্ধমানধাতোরপি গুণ এব পরং দৃশ্যতে| তচ্চ নাতিসুন্দরং, যতো বালস্য বর্ধমানধাতোরপি বযোঽনুরূপাঃ প্রাকৃতমানস্থিতা এব ধাতবো ভবন্তি, তেন ন তে প্রাকৃতমানা বৃদ্ধা উচ্যন্তে; যা তু বৃষ্যপ্রযোগজা শুক্রবৃদ্ধিঃ, সা যদি বিকারকারিকা ন ভবতি তদা তু প্রাকৃতমানান্তর্গতৈব| এতদেব ধাতূনাং প্রাকৃতমানং- যদবিকারকারিত্বম্| অঞ্জল্যাদিমানং তু অদূরান্তরেণাভিহিতমপি নিত্যপরোক্ষতযা পুনঃ স্বাভাবিকধাতুলক্ষণৈরেব জ্ঞাতব্যং; তস্মাচ্ছুক্রস্য যাবতী বৃদ্ধিরদোষা, তাবতী প্রাকৃতমানাবস্থারূপৈব| প্রাকৃতমানাতিরিক্তৌ চেহ বৃদ্ধিহ্রাসৌ বৈষম্যগমনশব্দেনোচ্যেতে, তস্মাদাদ্যৈব ব্যাখ্যা| তথা ন কেবলং বৃদ্ধিহ্রাসগমনমেব বৈষম্যগমনং, কিন্তু প্রকৃত্যা চ বৈষম্যগমনং ধাতূনাং ভবতীতি ব্যাখ্যানযন্তি; তথাহি- “প্রকৃতিস্থং যদা পিত্তং মারুতঃ শ্লেষ্মণঃ ক্ষযে” (সূ.অ.১৭) ইত্যাদৌ প্রকৃতিস্থস্যাপি দোষস্য বিকারকর্তৃত্বমুচ্যতে, বিকারকারকস্য চ দোষস্য প্রকৃতিস্থতাঽপি বৈষম্যার্থক্রিযাকারিত্বেন বৈষম্যশব্দেনোচ্যতে| তদপি নাতিসুন্দরম্| যেন, প্রদেশান্তরেষ্বপি ত্রিবিধাং গতিং প্রতিপাদ্য প্রকৃতিস্থতা ধাতূনাং নির্বিকারা এবোক্তা; যথা- “ক্ষীণা জহতি লিঙ্গং স্বং, সমাঃ স্বং কর্ম কুর্বতে| দোষাঃ প্রবৃদ্ধাঃ স্বং লিঙ্গং দর্শযন্তি যথাবলম্” (সূ.অ.১৭); তথা “বিকারো ধাতুবৈষম্যং সাম্যং প্রকৃতিরুচ্যতে| সুখসঞ্জ্ঞকমারোগ্যং বিকারো দুঃখমেব চ” (সূ.অ.৯) এবমাদিষু| যত্তু “প্রকৃতিস্থং যদা পিত্তং” ইত্যাদৌ স্বমানাবস্থিতস্যাপি পিত্তাদের্বিকারকর্তৃত্বং, তচ্ছরীরপ্রদেশান্তরনীতস্য পিত্তাদেস্তত্র তত্র প্রদেশে বৃদ্ধস্যৈব বিকারকর্তৃত্বং; স্বমানস্থিতোঽপি দোষঃ প্রদেশান্তরং নীতঃ সন্ তত্প্রদেশস্থদোষাপেক্ষযা বৃদ্ধ এব ভবতি, তেন তত্রাপি বৃদ্ধস্যৈব বিকারকর্তৃত্বং, প্রপঞ্চিতশ্চাযমর্থস্তত্রৈব গ্রন্থে| যত্রাপি স্বমানস্থিতানামেব রক্তাদীনাং বাতাদিদুষ্ট্যা বিকারকর্তৃত্বং, তত্রাপি বাতাদয এব বৃদ্ধাঃ প্রাধান্যেন বিকারকরাঃ, রক্তাদযোঽপি তত্র দুষ্টদোষসম্বন্ধাধীনস্বগুণা বৃদ্ধস্বগুণা বা ভবন্তি, ততো গুণহানিবৃদ্ধিভ্যাং বৃদ্ধিহ্রাসৌ দূষ্যেঽপি তিষ্ঠত এবেতি ন প্রকৃতিস্থস্য বিকারকারিত্বমিতি পশ্যামঃ||৪||

Adhikarana 3 (5) · Śloka 5

যৌগপদ্যেন তু বিরোধিনাং ধাতূনাং বৃদ্ধিহ্রাসৌ ভবতঃ| যদ্ধি যস্য ধাতোর্বৃদ্ধিকরং তত্ততো বিপরীতগুণস্য ধাতোঃ প্রত্যবাযকরং সম্পদ্যতে||৫||

উপযুক্তভেষজেন যথা বৃদ্ধিহ্রাসৌ ভবতস্তদাহ- যৌগপদ্যেনেত্যাদি| বিরোধিনামিতি পরস্পরবিরুদ্ধগুণানাম্| এতদেবোপপত্ত্যা সাধযন্নাহ- যদ্ধীত্যাদি| যদ্ধি ভেষজং, যথা- ক্ষীরং কফশুক্রাদিবৃদ্ধিকরং, তত্ কফশুক্রাদের্বিপরীতগুণস্য বাতাদেঃ প্রত্যবাযকরং ভবতি, হ্রাসকরং ভবতীত্যর্থঃ| বিপরীতস্যেতি কর্তব্যে যদ্বিপরীতগুণস্যেতি করোতি, তেন জাতিবৈপরীত্যাদ্গুণবৈপরীত্যমেব হ্রাসকারণং প্রাধান্যেন দর্শযতি| তেন, গোমূত্রং দ্রবত্বেন জাত্যা সমানমপি কটূষ্ণরূক্ষাদিবিপরীতগুণযোগাত্ কফস্যাপহারকমেব||৫||

Adhikarana 4 (6) · Śloka 6

তদেব তস্মাদ্ভেষজং সম্যগবচার্যমাণং যুগপন্ন্যূনাতিরিক্তানাং ধাতূনাং সাম্যকরং ভবতি, অধিকমপকর্ষতি ন্যূনমাপ্যাযযতি||৬||

উপপাদিতং যৌগপদ্যেন ধাতূনাং বৃদ্ধিহ্রাসগমনমুপসংহরন্নাহ- তদেবেত্যাদি| সম্যগুপচর্যমাণমিত্যনেন উচিতমাত্রাদিপ্রযোগং, তথা ধাতুসাম্যাবধিভেষজপ্রযোগং চ দর্শযতি; মাত্রাদিবিগুণং হি ভেষজং ন স্বোচিতাং ক্রিযাং করোতি; যথা- বৃদ্ধস্য কফস্য ক্ষীণস্য চ পিত্তস্য ক্ষযবৃদ্ধিভ্যাং সাম্যার্থং যদুপযুজ্যতে কট্বাদি তত্ সাম্যাপত্ত্যুত্তরকালমপ্যুপযুজ্যমানং পিত্তবৃদ্ধ্যা কফক্ষযেণ চ পুনর্বৈষম্যমাবহতি; তস্মাদেতদ্দোষব্যাবৃত্ত্যর্থং সম্যগুপচর্যমাণমিতি কৃতম্| ননু, পূর্বমুক্তং ভেষজেন বিরোধিনাং ধাতূনাং বৃদ্ধিহ্রাসৌ ভবতঃ, উপসংহারে তু ধাতূনাং সাম্যকর ভেষজং ভবতীত্যুচ্যতে, তত্কথং নার্থভেদ ইত্যাশঙ্ক্য বৃদ্ধিহ্রাসকরমেব ধাতুসাম্যকরং ভবতীতি দর্শযন্নাহ- অধিকমপকর্ষতি, ন্যূনমাপ্যাযযতীতি| এবম্ভূতং চ ধাতুসাম্যকরণং যত্রৈব বিরোধিনাং বৃদ্ধিহ্রাসৌ বিদ্যেতে তত্রৈব জ্ঞেযং, ন সর্বত্র| তেন যত্র বৃদ্ধিরেব পরং দোষাণাং ন ক্ষযঃ কস্যচিত্, তত্র যথা বৃদ্ধস্য দোষস্য ক্ষযাধানমুক্তং ন তথা ক্ষীণস্য বর্ধনমিতি জ্ঞেযম্||৬||

Adhikarana 5 (7) · Śloka 7

এতাবদেব হি ভৈষজ্যপ্রযোগে ফলমিষ্টং স্বস্থবৃত্তানুষ্ঠানে চ যাবদ্ধাতূনাং সাম্যং স্যাত্| স্বস্থা হ্যপি ধাতূনাং সাম্যানুগ্রহার্থমেব কুশলা রসগুণানাহারবিকারাংশ্চ পর্যাযেণেচ্ছন্ত্যুপযোক্তুং সাত্ম্যসমাজ্ঞাতান্; একপ্রকারভূযিষ্ঠাংশ্চোপযুঞ্জানাস্তদ্বিপরীতকরসমাজ্ঞাতযা চেষ্টযা সমমিচ্ছন্তি কর্তুম্||৭||

উক্তধাতুসাম্যস্যোপাদেযতাং দর্শযিতুং ভেষজপ্রযোগস্য তথা স্বস্থবৃত্তানুষ্ঠানস্য ধাতুসাম্যাতিরিক্তং ফলং নিষেধযন্নাহ- এতাবদেবেত্যাদি| এতাবদেবেত্যনেন বক্ষ্যমাণধাতুসাম্যং প্রত্যবমৃশতি| ধাতুসাম্যাত্মকো রোগপ্রশমো হি ভেষজসাধ্যো ন ধাতুসাম্যাদতিরিচ্যতে, তথা স্বস্থস্যোজস্কররসাযনেনাপি ধাতুসাম্যমেব বিশিষ্টমাধীযতে; তেন ধাতুসাম্যাদতিরিক্তমাযুর্বেদসাধ্যং নাস্তীতি ভাবঃ| উক্তং চ- “ধাতুসাম্যক্রিযা চোক্তা তন্ত্রস্যাস্য প্রযোজনম্” (সূ.অ.১) ইতি| ননু স্বস্থে ধাতুসাম্যং সিদ্ধমেব, ন চ সিদ্ধং সাধ্যতে, তত্ কথং স্বস্থবৃত্তানুষ্ঠানেঽপি ধাতুসাম্যমেব ফলমিত্যাহ- স্বস্থা হ্যপীত্যাদি| সাম্যানুগ্রহার্থমিতি সত এব সাম্যস্য পরাপরসাম্যোত্পাদেন পরিপালনার্থম্| রসা মধুরাদযঃ| গুণা গুর্বাদযঃ| আহারবিকারাঃ আদ্যখাদ্যলেহ্যপেযরূপা যবাগ্বাদযঃ| পর্যাযেণেতি উচিতেন ক্রমেণ; স চ ক্রমো যথা- মধুরমুপযুজ্য তজ্জন্যকফবৃদ্ধ্যাদিপ্রতিবন্ধার্থং কট্বাদ্যুপযোজ্যমিত্যাদিরসক্রমঃ, তথা গুরুমুপযুজ্য তত্কার্যপ্রতিবন্ধার্থং লঘূপযোগ ইত্যেবম্প্রকারো গুণানামুপযোগক্রমঃ, আহারবিকারেষ্বপি খাদ্যাদ্যুপযুজ্য তত্পাকার্যং পেযোপযোগ ইত্যাদিকঃ ক্রমঃ| গুণশব্দেন চ রসা অপি প্রাপ্যন্তে, তথাঽপি রসাঃ প্রাধান্যাত্ পৃথগুক্তাঃ| সাত্ম্যসমাজ্ঞাতানিতি রসগুণানিত্যস্য তথা আহারবিকারাংশ্চেত্যস্য বিশেষণম্| সাত্ম্যাশ্চ তে অভ্যাসেন তথা সমত্বেন চ স্বাভাবিকপথ্যত্বেনাজ্ঞাতা ইতি সাত্ম্যসমাজ্ঞাতাঃ, সমশব্দেন হ্যত্র পথ্যমুচ্যতে; কিংবা সর্বদা সাত্ম্যত্বেন সমাজ্ঞাতাঃ সাত্ম্যসমাজ্ঞাতাঃ; তেন, অসাত্ম্যানাং রসাদীনামুপযোগমেব প্রতিক্ষিপতি| অথ যত্র তাবদ্রসাদযঃ পর্যাযেণোপযুজ্যন্তে তত্র সাধু, যত্র ত্বেকপ্রকারা এব রসাদযঃ কুতশ্চিদ্ধেতোরভ্যস্যন্তে তত্র কো বিধিরিত্যাহ- একপ্রকারেত্যাদি| তত উপযুক্তৈকপ্রকাররসাদিভূযিষ্ঠাদ্ রসাদের্বিপরীতমর্থং করোতীতি তদ্বিপরীতকরী সমাজ্ঞাতা চেষ্টা, তযা চেষ্টযা সমং কর্তুমিচ্ছন্তীতি| একপ্রকারভূযিষ্ঠাদ্যুপযোগেনাধীযমানবৈষম্যং শরীরং সমং সমধাতুং কর্তুমিচ্ছন্তি| এতদুদাহরণং যথা- মধুরপ্রকারভূযিষ্ঠং য আহারপ্রকারমুপযুঙ্ক্তে তস্য মধুরসমানকফাদিবৃদ্ধিমাশঙ্ক্য কফাদিকর্মক্ষযকরী যা ব্যাযামাদিচেষ্টা তযা সাম্যমাধীযতে| কিংবা, তদ্বিপরীতকরী তথা সমত্বেন চ আজ্ঞাতা যা চেষ্টা সা তদ্বিপরীতকরসমাজ্ঞাতা, তেন ক্রিযমাণমতিযোগাদি নিষেধযতি||৭||

Adhikarana 6 (8) · Śloka 8

দেশকালাত্মগুণবিপরীতানাং হি কর্মণামাহারবিকারাণাং চ ক্রিযোপযোগঃ সম্যক্, সর্বাতিযোগসন্ধারণম্, অসন্ধারণমুদীর্ণানাং চ গতিমতাং, সাহসানাং চ বর্জনং, স্বস্থবৃত্তমেতাবদ্ধাতূনাং সাম্যানুগ্রহার্থমুপদিশ্যতে||৮||

সম্প্রতি প্রস্তাবাগতং স্বস্থবৃত্তং সমাসেনাহ- দেশেত্যাদি| দেশাদিভির্গুণশব্দঃ সম্বধ্যতে| আত্মশব্দেনেহ শরীরমুচ্যতে| দেশবিপরীতং কর্ম যথা- মরৌ স্বপ্নঃ, কালবিপরীতং কর্ম যথা- বসন্তে ব্যাযামঃ, আত্মবিপরীতং কর্ম যথা- স্থূলশরীরে ব্যাযামজাগরণাদি| এবমাহারপ্রভেদাশ্চ দেশকালাদিবিপরীতা উন্নেযাঃ| কর্মণাং ক্রিযা, আহারবিকারাণাং চোপযোগ ইতি যথাসঙ্খ্যং যোজনীযম্| সম্যগিতি ক্রিযযা উপযোগেন চ সমং জ্ঞেযম্| অতিক্রান্তো যোগমিত্যতিযোগো মিথ্যাতিযোগাযোগরূপো জ্ঞেযঃ; তেন, সর্বেষাং কালবুদ্ধীন্দ্রিযার্থমিথ্যাযোগাদীনাং বর্জনং সর্বাতিযোগসন্ধারণম্| কালমিথ্যাযোগাদেস্তু দুষ্পরিহরস্য প্রতিক্রিযৈব বর্জনম্| গতিমতামিতি পুরীষাদীনাং বহির্গমনশীলানাম্| সাহসানাম্ অযথাবলমারম্ভাদীনাম্||৮||

Adhikarana 7 (9) · Śloka 9

ধাতবঃ পুনঃ শারীরাঃ সমানগুণৈঃ সমানগুণভূযিষ্ঠৈর্বাঽপ্যাহারবিকারৈরভ্যস্যমানৈর্বৃদ্ধিং প্রাপ্নুবন্তি, হ্রাসং তু বিপরীতগুণৈর্বিপরীতগুণভূযিষ্ঠৈর্বাঽপ্যাহারৈরভ্যস্যমানৈঃ||৯||

অথ রসাদিধাতূনাং বৃদ্ধিহ্রাসাবুক্তৌ যাদৃশাভ্যামাহারাভ্যাং ক্রিযেতে তদ্দর্শযিতুমাহ- ধাতব ইত্যাদি| শারীরা ইতি পদেনাধ্যাত্মিকান্ বুদ্ধ্যাদীন্ ব্যবচ্ছিনত্তি, যতো ন বুদ্ধ্যাদযঃ সমানগুণাদ্বর্ধন্তে, অসমানগুণাদ্বা হ্রসন্তি| সমানা এব পরং গুণা যস্য তত্সমানগুণং, যথা- মাংসং মাংসস্য; সমানগুণভূযিষ্ঠং যদল্পসমানগুণং, যথা- শুক্রস্য ক্ষীরং; ক্ষীরস্যাতিদ্রবত্বাচ্ছুকেঽল্পসমানগুণম্| অভ্যস্যমানৈরিত্যনেন সকৃদুপযোগাদ্ বৃদ্ধিং হ্রাসং চ নিষেধযতি| বিপরীতা এব পরং গুণা যস্য তদ্বিপরীতগুণম্| অল্পসমানগুণং তু বিপরীতগুণভূযিষ্ঠম্||৯||

Adhikarana 8 (10) · Śloka 10

তত্রেমে শরীরধাতুগুণাঃ সঙ্খ্যাসামর্থ্যকরাঃ; তদ্যথা- গুরুলঘুশীতোষ্ণস্নিগ্ধরূক্ষমন্দতীক্ষ্ণস্থিরসরমৃদুকঠিনবিশদপিচ্ছিলশ্লক্ষ্ণখরসূক্ষ্মস্থূলসান্দ্রদ্রবাঃ| তেষু যে গুরবস্তে গুরুভিরাহারবিকারগুণৈরভ্যস্যমানৈরাপ্যায্যন্তে, লঘবশ্চ হ্রসন্তি; লঘবস্তু লঘুভিরাপ্যায্যন্তে, গুরবশ্চ হ্রসন্তি| এবমেব সর্বধাতুগুণানাং সামান্যযোগাদ্বৃদ্ধিঃ, বিপর্যযাদ্ধ্রাসঃ| তস্মান্মাংসমাপ্যায্যতে মাংসেন ভূযস্তরমন্যেভ্যঃ শরীরধাতুভ্যঃ, তথা লোহিতং লোহিতেন, মেদো মেদসা, বসা বসযা, অস্থি তরুণাস্থ্না, মজ্জা মজ্জ্ঞা, শুক্রং শুক্রেণ, গর্ভস্ত্বামগর্ভেণ||১০||

অথ কে তে শরীরধাতুগুণা যে ভেষজগুণৈঃ সমানা অসমানা বা উচ্যন্ত ইত্যাহ- তত্রেত্যাদি| শরীরধাতুগুণা ইতি বিশেষণেনাপ্রস্তুতত্বেনানভিধেযানাত্মগুণান্ বুদ্ধ্যাদীন্ নিরস্যতি| পরাদযস্তু যদ্যপি শরীরধাতুগুণা ভবন্তি, তথাঽপি তে বৃদ্ধিং হ্রাসং চ প্রত্যনতিপ্রযোজনত্বাদিহানুক্তাঃ| রসস্তু প্রধানত্বেন প্রকরণান্তরোক্ত এবেতি নেহোক্তঃ| স্পর্শস্তু শীতোষ্ণসঙ্গৃহীত এব| শব্দরূপগন্ধাস্তু পরাদিবদ্ বৃদ্ধৌ হ্রাসে চ নাতিপ্রযোজনা ইতি নোক্তাঃ| সঙ্খ্যা জ্ঞানং গণনা বা, তত্র সামর্থ্যং কুর্বন্তীতি সঙ্খ্যাসামর্থ্যকরাঃ | এতে হি গুর্বাদযো জ্ঞাতা বিংশতির্গুর্বাদযো ভবন্তীতি যজ্জ্ঞানং, সঙ্খ্যাসামর্থ্যরূপং তত্ কুর্বন্তি| পরস্পরবিপর্যযাত্মকান্ দ্বন্দ্বান্ দশগুণান্ দর্শযিত্বা তেষাং চ দ্রব্যসম্বদ্ধানাং শৃঙ্গগ্রাহিকযা কর্মাহ- তেষ্বিত্যাদি| লঘবশ্চ হ্রসন্তীতি চ্ছেদঃ| শেষশীতাদিগুণানাং বৃদ্ধিমতিদেশেনাহ- এবমিত্যাদি| সামান্যযোগাদিতি সমানৈকরূপার্থযোগাত্ | তচ্চ সামান্যং সর্বথা সমানগুণজাতিরূপং ভবতি; যথা- পোষ্যপোষকযোর্মাংসযোঃ| ক্বচিচ্চ বিজাতীযেঽপি গুণা এব পোষ্যপোষকবৃত্তযো ভবন্তি; যথা- ক্ষীরশুক্রযোঃ| তত্রাত্যর্থবৃদ্ধিকর্তৃত্বেন প্রথমং জাতিরূপমেব সামান্যং সর্বগুণসামান্যযুক্তমুদাহরতি - তস্মাদিত্যাদি| ভূযস্তরমন্যেভ্য ইত্যনেন মাংসেন সমানগুণভূযিষ্ঠতযা রক্তাদিবৃদ্ধিরতি ক্রিযতে, ভূযসী তু সর্বথা সামান্যযোগান্মাংসস্য বৃদ্ধিঃ ক্রিযত ইতি দর্শযতি| লোহিতং লোহিতেনেত্যেবমাদৌ ‘ভূযস্তরমন্যেভ্যঃ’ ইত্যনুবর্তনীযম্| গর্ভস্ত্বামগর্ভেণেত্যত্র আমগর্ভেণাণ্ডাদিরূপেণ সমুদিতানাং মাংসাদীনাং সম্যগনিষ্পন্নানাং চ বৃদ্ধিরুচ্যতে||১০||

Adhikarana 9 (11) · Śloka 11

যত্র ত্বেবংলক্ষণেন সামান্যেন সামান্যবতামাহারবিকারাণামসান্নিধ্যং স্যাত্, সন্নিহিতানাং বাঽপ্যযুক্তত্বান্নোপযোগো ঘৃণিত্বাদন্যস্মাদ্বা কারণাত্, স চ ধাতুরভিবর্ধযিতব্যঃ স্যাত্, তস্য যে সমানগুণাঃ স্যুরাহারবিকারা অসেব্যাশ্চ, তত্র সমানগুণভূযিষ্ঠানামন্যপ্রকৃতীনামপ্যাহারবিকারাণামুপযোগঃ স্যাত্| তদ্যথা- শুক্রক্ষযে ক্ষীরসর্পিষোরুপযোগো মধুরস্নিগ্ধশীতসমাখ্যাতানাং চাপরেষাং দ্রব্যাণাং, মূত্রক্ষযে পুনরিক্ষুরসবারুণীমণ্ডদ্রবমধুরাম্ললবণোপক্লেদিনাং, পুরীষক্ষযে কুল্মাষমাষকুষ্কুণ্ডাজমধ্যযবশাকধান্যাম্লানাং, বাতক্ষযে কটুকতিক্তকষাযরূক্ষলঘুশীতানাং, পিত্তক্ষযেঽম্ললবণকটুকক্ষারোষ্ণতীক্ষ্ণানাং, শ্লেষ্মক্ষযে স্নিগ্ধগুরুমধুরসান্দ্রপিচ্ছিলানাং দ্রব্যাণাম্| কর্মাপি যদ্যস্য ধাতোর্বৃদ্ধিকরং তত্তদাসেব্যম্| এবমন্যেষামপি শরীরধাতূনাং সামান্যবিপর্যযাভ্যাং বৃদ্ধিহ্রাসৌ যথাকালং কার্যৌ| ইতি সর্বধাতূনামেকৈকশোঽতিদেশতশ্চ বৃদ্ধিহ্রাসকরাণি ব্যাখ্যাতানি ভবন্তি||১১||

সম্প্রতি সমানগুণভূযিষ্ঠেন বিজাতীযেন বৃদ্ধিমাহ- যত্রেত্যাদি| এবং লক্ষণেনেতি তুল্যজাতিরূপেণ| উক্তার্থং বিবৃণোতি- ঘৃণিত্বাদিত্যাদি| অন্যস্মাদ্বা কারণাদিত্যভক্ষ্যামগর্ভশুক্রাদিভক্ষণজন্যাধর্মোত্পত্তেঃ| তত্রেত্যনেন অসন্নিহিতান্ ঘৃণযা কারণান্তরেণ চ সন্নিহিতানপ্যসেব্যান্ প্রত্যবমৃশতি| অন্যপ্রকৃতীনামিতি বিজাতীযানাম্| অত্রোদাহরণমাহ- তদ্যথেত্যাদি| শুক্রে ক্ষীণে যদি শুক্রান্তরং ন প্রাপ্যতে, প্রাপ্তং বা ঘৃণাদিবশাদনুপযোজ্যং স্যাত্, তদা সমানগুণভূযিষ্ঠানাং ক্ষীরাদীনামুপযোগঃ কর্তব্য ইত্যর্থঃ| মূত্রাদাবপি ঘৃণাদিনা সজাতীযপ্রযোগাবিষযে সমানগুণভূযিষ্ঠপ্রযোগমাহ- মূত্রেত্যাদি| কুষ্কুণ্ডং পললাদিচ্ছত্রিকা| অজমধ্যং ছাগান্তরাধিঃ| দ্রব্যাণামুপযোগ ইতি যোজনা| আহারং বৃদ্ধিকরমভিধায বিহারমপি বৃদ্ধিকরমাহ- কর্মেত্যাদি| কর্মশব্দেনেহাস্যাচিন্তাদযোঽপি গৃহ্যন্তে| কর্ম তু প্রাযঃ প্রভাবাদেব বৃদ্ধিকরং ভবতীতি কৃত্বাঽত্র সমানগুণতাপরিগ্রহো ন কৃতঃ| সাক্ষাদনুক্তানামপি ধাতূনামুক্তন্যাযানুসারেণ বৃদ্ধিহ্রাসমভিদর্শযতি- এবমিত্যাদি| যথাকালমিতি ক্রিযাকালানতিপাতেন| উক্তং প্রকরণমুপসংহরতি- ইতি সর্বেত্যাদি| একৈকশ ইত্যনেন মাংসমাপ্যায্যতে মাংসেনেত্যাদিনোক্তং গৃহ্ণাতি| অতিদেশতশ্চেত্যনেন এবমন্যেষামপি ধাতূনামিত্যাদিনোক্তং গৃহ্ণাতি||১১||

Adhikarana 10 (12) · Śloka 12

কার্ত্স্ন্যেন শরীরবৃদ্ধিকরাস্ত্বিমে ভাবা ভবন্তি; তদ্যথা- কালযোগঃ, স্বভাবসংসিদ্ধিঃ, আহারসৌষ্ঠবম্, অবিঘাতশ্চেতি||১২||

বৃদ্ধিপ্রস্তাবাত্ সর্বশরীরবৃদ্ধিকরানাহ- কার্ত্স্ন্যেনেত্যাদি| কালযোগ ইতি বৃদ্ধিকারকযৌবনাদিকালযোগঃ| যৌবনাদৌ হি সপ্তদশবত্সরাদিকাললক্ষণে কালমহিম্রৈব বৃদ্ধির্ভবতি| স্বভাবশব্দেনাদৃষ্টমুচ্যতে| তেন স্বভাবসংসিদ্ধশরীরবৃদ্ধিহেতুরদৃষ্টম্| আহারসৌষ্ঠবমিতি আহারসম্পত্| অবিঘাতশ্চেতি শরীরবৃদ্ধিবিঘাতকরাতিব্যবাযমনোভিঘাতাদিবিরহঃ||১২||

Adhikarana 11 (13) · Śloka 13

বলবৃদ্ধিকরাস্ত্বিমে ভাবা ভবন্তি| তদ্যথা- বলবত্পুরুষে দেশে জন্ম বলবত্পুরুষে কালে চ, সুখশ্চ কালযোগঃ, বীজক্ষেত্রগুণসম্পচ্চ, আহারসম্পচ্চ, শরীরসম্পচ্চ, সাত্ম্যসম্পচ্চ, সত্ত্বসম্পচ্চ, স্বভাবসংসিদ্ধিশ্চ, যৌবনং চ, কর্ম চ, সংহর্ষশ্চেতি||১৩||

বৃদ্ধিপ্রস্তাবাচ্চ বলবৃদ্ধিকরান্ ভাবানাহ- বলেত্যাদি| দেশমহিম্না বলবন্তঃ পুরুষা যস্মিন্ দেশে সৈন্ধবাদৌ স বলবত্পুরুষো দেশঃ, তত্র জাতো দেশমহিম্নৈব বলবান্ ভবতি; যথা সৈন্ধবা বলবন্তঃ পুরুষাঃ| পরিণামস্যাপি প্রশস্তস্য হেতুতামাহ- বলবত্পুরুষে কালে চেতি| কালো হেমন্তশিশিরাদিরূপঃ| হেমন্তে শিশিরে বা কালে জাযমানস্য স কালো বলং জনযতি| সুখশ্চ কালযোগ ইতি সাধারণকালযোগঃ| বীজস্য শুক্ররূপস্য, তথা ক্ষেত্রস্যার্তবগর্ভাশযরূপস্য, গুণানাং প্রশস্তধর্মাণাং সম্পত্ বীজক্ষেত্রগুণসম্পত্| অত্র বীজক্ষেত্রযোর্নির্দোষতাঽপি সম্পত্ স্যাত্, তেন নির্দোষতাতিরিক্তসারত্বাদিবীজক্ষেত্রগুণপ্রাপ্ত্যর্থং গুণগ্রহণং জ্ঞেযম্| সত্ত্বসম্পচ্চেতি সত্ত্বসম্পদাঽপি শরীরে বলং ভবতীতি জ্ঞেযম্| বচনং হি- “শরীরং হ্যপি সত্ত্বমনুবিধীযতে” (শা.অ.৪) ইতি| স্বভাবসংসিদ্ধিঃ বলজনককর্মসংসিদ্ধিঃ| কর্ম ব্যাযামাদি কর্মেত্যর্থঃ; ব্যাযামাদিকর্মাভ্যাসাদ্ধি বলং ভবতি||১৩||

Adhikarana 12 (14) · Śloka 14

আহারপরিণামকরাস্ত্বিমে ভাবা ভবন্তি| তদ্যথা- ঊষ্মা, বাযুঃ, ক্লেদঃ, স্নেহঃ, কালঃ, সমযোগশ্চেতি ||১৪||

প্রশস্তগুণাভিধানপ্রস্তাবাদাহারপরিণামস্যাপি প্রশস্তস্য হেতুতামাহ- আহারেত্যাদি| কাল ইতি পাককালো নিশাবসানাদিরূপঃ| সমযোগ ইতি আহারস্য প্রকৃত্যাদ্যষ্টাহারবিধিবিশেষাযতনসম্যগ্যোগঃ||১৪||

Adhikarana 13 (15) · Śloka 15

তত্র তু খল্বেষামূষ্মাদীনামাহারপরিণামকরাণাং ভাবানামিমে কর্মবিশেষা ভবন্তি| তদ্যথা- ঊষ্মা পচতি, বাযুরপকর্ষতি, ক্লেদঃ শৈথিল্যমাপাদযতি, স্নেহো মার্দবং জনযতি, কালঃ পর্যাপ্তিমভিনির্বর্তযতি, সমযোগস্ত্বেষাং পরিণামধাতুসাম্যকরঃ সম্পদ্যতে||১৫||

অত্র চাহারপরিণামকরেষু ঊষ্মৈব সাক্ষাত্ পাকে ব্যাপ্রিযতে, বায্বাদযস্তু তস্য পচতো ব্যাপারবিশেষেণ সহাযতাং যান্তীতি দর্শযন্নাহ- তত্রেত্যাদি| বাযুরপকর্ষতীতি ঊষ্মস্থানাদ্ বিদূরস্থিতমন্নমূষ্মসমীপং নযতি| যদুক্তম্- “অন্নমাদানকর্মা তু প্রাণঃ কোষ্ঠং প্রকর্ষতি” (চি. ১৫) ইতি| বাযুরপকর্ষতীত্যুপলক্ষণং, তেন অগ্ন্যুত্তেজনমপি সমানাখ্যস্য বাযোর্বোদ্ধব্যম্| উক্তং হি- “সমানেনাবধূতোঽগ্রিঃ ... পচতি” (চি. ১৫) ইতি| পর্যাপ্তিমিতি পাকনিষ্পত্তিং; সত্যপ্যূষ্মাদিব্যাপারে কালবশাদেব পাকো ভবতি, নোষ্মাদিব্যাপারমাত্রাদিতি ভাবঃ| সমযোগস্ত্বেষামিতি এষামাহারদ্রব্যাণাং প্রকৃত্যাদীনাং যঃ সমযোগঃ, স পরিণামকরো ধাতুসাম্যকরশ্চ ভবতি; যদা হি প্রকৃত্যাদিবিরুদ্ধ আহারো ভবতি, তদা প্রকৃত্যাদিদোষাদেব ন সম্যক্পরিণামো ভবতি| এতদূষ্মাদিব্যাপারপ্রতিপাদকং গ্রন্থান্তরং যথা- “অন্নমাদানকর্মা তু প্রাণঃ কোষ্ঠং প্রকর্ষতি| তদ্দ্রবৈর্ভিন্নসঙ্ঘাতং স্নেহেন মৃদুতাং গতম্| সমানেনাবধূতোঽগ্নিরুদর্যঃ পবনেন তু| কালে পক্বং সমং সম্যক্ পচত্যাযুর্বিবৃদ্ধযে” (চি.অ.১৫) ইতি||১৫||

Adhikarana 14 (16) · Śloka 16

পরিণমতস্ত্বাহারস্য গুণাঃ শরীরগুণভাবমাপদ্যন্তে যথাস্বমবিরুদ্ধাঃ; বিরুদ্ধাশ্চ বিহন্যুর্বিহতাশ্চ বিরোধিভিঃ শরীরম্||১৬||

অথ কযা পরিপাঠ্যা পরিণামমাপদ্যমান আহারো ধাতুসাম্যকরো ভবতীত্যাহ- পরিণমত ইত্যাদি| পরিণমত ইতি বর্তমাননির্দেশেন যো যথা যথা আহারাংশঃ পরিণমতে স তথা তথা শরীরগুণরূপতাং যাতি, ন কৃত্স্নাহারপরিণামমপেক্ষত ইতি দর্শযতি| যথাস্বমবিরুদ্ধা ইতি যে আহারগুণা যস্মিন্ শরীরগুণেঽবিরুদ্ধাস্ত এব তদ্রূপতাং যান্তি| যথা- আহারস্য কঠিনো ভাগো মাংসাস্থ্যাদিকঠিনভাগপোষকো ভবতি, দ্রবাংশস্তু শোণিতাদিরূপো ভবতীত্যাদি| বিরুদ্ধাশ্চ বিহন্যুরিতি শরীরগুণবিরুদ্ধাস্তু আহারগুণা বিহন্যুঃ হ্রাসযেযুরিত্যর্থঃ| অথ তে শরীরগুণা আহারগুণবিহতাঃ সন্তঃ কিং কুর্বন্তীত্যাহ- বিহতা ইত্যাদি| বিহতাস্তু বিরোধিভিঃ শরীরং বিহন্যুরিতি যোজনা; বিরোধিভিরিতি বিপরীতৈরাহারগুণৈঃ, বিহতা ইতি ক্ষযং নীতাঃ| কিংবা বিরোধিভিরিতি যথা দুগ্ধমত্স্যাদিবিরুদ্ধাহরৈর্বিহতাঃ শরীরগুণাঃ শরীরং হন্যুঃ; চকারাদ্ বিরুদ্ধগুণৈশ্চ ক্ষযং নীতাঃ শরীরং হন্যুরিতি দর্শযতি||১৬||

Adhikarana 15 (17) · Śloka 17

শরীরগুণাঃ পুনর্দ্বিবিধাঃ সঙ্গ্রহেণ- মলভূতাঃ, প্রসাদভূতাশ্চ| তত্র মলভূতাস্তে যে শরীরস্যাবাধকরাঃ স্যুঃ| তদ্যথা- শরীরচ্ছিদ্রেষূপদেহাঃ পৃথগ্জন্মানো বহির্মুখাঃ, পরিপক্বাশ্চ ধাতবঃ, প্রকুপিতাশ্চ বাতপিত্তশ্লেষ্মাণঃ, যে চান্যেঽপি কেচিচ্ছরীরে তিষ্ঠন্তো ভাবাঃ শরীরস্যোপঘাতাযোপপদ্যন্তে, সর্বাংস্তান্মলে সঞ্চক্ষ্মহে; ইতরাংস্তু প্রসাদে , গুর্বাদীংশ্চ দ্রবান্তান্ গুণভেদেন, রসাদীংশ্চ শুক্রান্তান্ দ্রব্যভেদেন||১৭||

অথ কতিপ্রকারাস্তে শরীরগুণা ইত্যাহ- শরীরেত্যাদি| সঙ্গ্রহেণ সঙ্ক্ষেপেণ; তেন বিস্তরেণ ধাতূপধাত্বাদিবিভাগেন বহবশ্চ ভবন্তি| ভূতশব্দঃ স্বরূপে| আবাধকরা ইতি পীডাকরা ইত্যর্থঃ| পৃথগ্জন্মান ইতি পিচোলিকাসিঙ্ঘাণকাদিভেদেন নানারূপাঃ| বহির্মুখা ইত্যনেন য এব চ্ছিদ্রমলাঃ প্রভূততযা বহির্নিঃসরণাভিমুখঃ, ত এব পীডাকর্তৃত্বেন মলাখ্যাঃ; যে তু স্রোত-উপলেপমাত্রকারকাস্তে গুণকর্তৃতযা ন মলাখ্যাঃ| পরিপক্বাশ্চ ধাতব ইতি পাকাত্ পূযতাং গতাশ্চ শোণিতাদযোঽপি মলাখ্যাঃ; কিংবা ‘অপরিপক্বা’ ইতি পাঠঃ, তদা সামা ধাতবো মলাখ্যা ইতি জ্ঞেযম্| কুপিতাশ্চেতি পদেন বাতাদযঃ সামান্যেন ক্ষীণা বৃদ্ধা বা গৃহ্যন্তে; বিকৃতিমাত্রং হি বাতাদীনাং কোপঃ| যে চান্যেঽপীত্যাদিনা বিমার্গগতান্ পীডাকারকাঞ্ শরীরধাতূন্ তথাঽজীর্ণাদীন্ গ্রাহযন্তি| মল ইতি একবচনং জাতৌ| ইতরানিতি অবিকারকরান্ স্ব(স)মানস্থিতপুরীষবাতাদীন্; পুরীষবাতাদযোঽপি শরীরাবষ্টম্ভকাঃ প্রসাদা এব, গুণকর্তৃত্বাত্| মলপ্রসাদভেদেন শরীরগতভাবানভিধায পুনর্দ্রব্যগুণভেদানাহ- গুর্বাদীংশ্চেত্যাদি| গুর্বাদযো দ্রবান্তাঃ পশ্চাদুক্তা এব| অত্র চ যে মলা উপধাতবশ্চ নোক্তাস্তে গুর্বাদিগুণাধারত্বেন গ্রাহ্যাঃ; কিংবা, ইতরাংস্তু নিরাবাধান্ মলাদীন্ প্রসাদে সঞ্চক্ষ্মহে, তথা গুর্বাদীংশ্চ (তথা রসাদীংশ্চ ) নির্বিকারান্ দ্রব্যগুণরূপান্ প্রসাদে সঞ্চক্ষ্মহে ইতি ব্যাখ্যেযম্||১৭||

Adhikarana 16 (18) · Śloka 18

তেষাং সর্বেষামেব বাতপিত্তশ্লেষ্মাণো দুষ্টা দূষযিতারো ভবন্তি, দোষস্বভাবাত্| বাতাদীনাং পুনর্ধাত্বন্তরে কালান্তরে প্রদুষ্টানাং বিবিধাশিতপীতীযেঽধ্যাযে বিজ্ঞানান্যুক্তানি| এতাবত্যেব দুষ্টদোষগতির্যাবত্ সংস্পর্শনাচ্ছরীরধাতূনাম্| প্রকৃতিভূতানাং তু খলু বাতাদীনাং ফলমারোগ্যম্| তস্মাদেষাং প্রকৃতিভাবে প্রযতিতব্যং বুদ্ধিমদ্ভিরিতি||১৮||

অথ যদেতত্ পুরীষাদীনাং মলত্বং তদ্দূষণাদ্ভবতি, তেন তেষাং দূষকহেতুমাহ- তেষামিত্যাদি| তেষামিতি পুরীষাদীনাং রসাদীনাং চ| দুষ্টা ইতি স্বহেতূপচিতাঃ, ক্ষীণাস্তু নান্যদুষ্টিং দোষাঃ কুর্বন্তীতি প্রতিপাদিতমেব| অথ ধাত্বন্তরাশ্রযিণাং বাতাদীনাং দুষ্টানাং কিং লক্ষণং, যেন তে জ্ঞাতব্যা ইত্যাহ- বাতাদীনামিত্যাদি| বিজ্ঞানানীতি লক্ষণানি; রসাদ্যাশ্রযদুষ্টবাতাদিলক্ষণং তাবদ্ধিবিধাশিতপীতীযে প্রোক্তম্| “কেশমূত্রনখাদ্যাশ্রযদুষ্টদোষলক্ষণং তু যদ(ত্ত)ত্র নোক্তং তত্ কথং জ্ঞেযমিত্যাহ- এতাবত্যেবেত্যাদি| কেশাদৌ দুষ্টানামপি বাতাদীনাং গতির্নাস্তীতি বাক্যার্থঃ| যাবত্ সংস্পর্শনাদিতি স্পর্শনেন্দ্রিযং ব্যাপ্য, তেন শরীরধাতূনাং দূষণে স্পর্শনেন্দ্রিযপর্যন্তমেব দুষ্টদোষগতির্ভবতি; তেন ন কেশাদিষু দুষ্টদোষগতিঃ| যত্তু পলিতাদিকেশে মৃতনখে বা পুষ্পং তত্ স্পর্শবচ্ছরীরসংস্থিতেনৈব দোষেণ কৃতং, ন পুনর্ভৃতনখে কেশেষ্বপি স্বমার্গচারী দোষঃ প্রচরতি” ইতি ব্রুবতে| বযং তু ব্রূমঃ- বিবিধাশিতপীতীযোক্তদুষ্ট্যা সর্বদুষ্ট্যুপসঙ্গ্রহো ভবতীতি দর্শযন্নাহ- এতাবত্যেবেত্যাদি| যাবত্ সংস্পর্শনাদিতি স্পর্শসম্বন্ধাত্; তেন, শরীরধাতূনাং যাবত্ স্পর্শনাদ্দুষ্টদোষগতির্ভবতি, সা চ সর্বা বিবিধাশিতপীতীযোক্তৈব, ন ততোঽধিকা দুষ্টির্দেহস্যাস্তি| তত্র হি “মলানাশ্রিত্য দুষ্টাস্তু ভেদশোষপ্রদূষণম্” (সূ.অ.২৮) ইতি গ্রন্থেন কৃত্স্নমলগ্রহণাত্ কেশনখৌ মলৌ গৃহীতাবেব| এতেন তু নখাগ্রকেশাগ্রস্ফুটনাদিমৃতনখাগ্রকেশাগ্রগতেন দোষেণৈব কৃতং ভবতি| অথ দুষ্টা বাতাদযো দুষ্টিলক্ষণানি কুর্বন্তি, প্রকৃতিস্থাস্তু কিং কুর্বন্তীত্যাহ- প্রকৃতিভূতানামিত্যাদি||১৮||

Adhikarana 17 (19) · Śloka 19

ভবতি চাত্র- শরীরং সর্বথা সর্বং সর্বদা বেদ যো ভিষক্| আযুর্বেদং স কার্ত্স্ন্যেন বেদ লোকসুখপ্রদম্||১৯||

সম্প্রত্যুক্তপ্রকরণজন্যশরীরজ্ঞানস্য ফলমাহ- শরীরমিত্যাদি||১৯||

Adhikarana 18 (20) · Śloka 20

এবংবাদিনং ভগবন্তমাত্রেযমগ্নিবেশ উবাচ শ্রুতমেতদ্যদুক্তং ভগবতা শরীরাধিকারে বচঃ| কিন্নু খলু গর্ভস্যাঙ্গং পূর্বমভিনির্বর্ততে কুক্ষৌ, কুতো মুখঃ কথং চান্তর্গতস্তিষ্ঠতি, কিমাহারশ্চ বর্তযতি, কথম্ভূতশ্চ নিষ্ক্রামতি, কৈশ্চাযমাহারোপচারৈর্জাতঃ সদ্যো হন্যতে, কৈরব্যাধিরভিবর্ধতে, কিঞ্চাস্য দেবাদিপ্রকোপনিমিত্তা বিকারাঃ সম্ভবন্তি আহোস্বিন্ন, কিঞ্চাস্য কালাকালমৃত্য্বোর্ভাবাভাবযোর্ভগবানধ্যবস্যতি, কিঞ্চাস্য পরমাযুঃ, কানি চাস্য পরমাযুষো নিমিত্তানীতি||২০||

শরীরবিচাযকং প্রকরণং সমাপ্য গর্ভশরীরবিচাযকং প্রকরণমারভতে- এবংবাদিনমিত্যাদি| কুক্ষাবিত্যন্তেনৈকঃ প্রশ্নঃ, কুতোমুখঃ কথং চান্তর্গতস্তিষ্ঠতীতি দ্বিতীযঃ, নিষ্ক্রামতীত্যন্তেন তৃতীযঃ, কৈশ্চাযমাহারোপচারৈর্জাতঃ সদ্যো হন্যত ইতি চতুর্থঃ, কৈরব্যাধিরভিবর্ধত ইতি পঞ্চমঃ, আহোস্বিন্নেত্যন্তঃ ষষ্ঠঃ| শেষং প্রশ্নত্রযং পূর্বপ্রশ্নদ্বযস্য ব্যবচ্ছেদকমেব, এবং নব প্রশ্নাঃ| অধ্যবস্যতীতি নিশ্চিনোতি||২০||

Adhikarana 19 (21) · Śloka 21

তমেবমুক্তবন্তমগ্নিবেশং ভগবান্ পুনর্বসুরাত্রেয উবাচ- পূর্বমুক্তমেতদ্গর্ভাবক্রান্তৌ যথাঽযমভিনির্বর্ততে কুক্ষৌ, যচ্চাস্য যদা সন্তিষ্ঠতেঽঙ্গজাতম্| বিপ্রতিবাদাস্ত্বত্র বহুবিধাঃ সূত্রকৃতামৃষীণাং সন্তি সর্বেষাং; তানপি নিবোধোচ্যমানান্- শিরঃ পূর্বমভিনির্বর্ততে কুক্ষাবিতি কুমারশিরা ভরদ্বাজঃ পশ্যতি, সর্বেন্দ্রিযাণাং তদধিষ্ঠানমিতি কৃত্বা; হৃদযমিতি কাঙ্কাযনো বাহ্লীকভিষক্, চেতনাধিষ্ঠানত্বাত্; নাভিরিতি ভদ্রকাপ্যঃ, আহারাগম ইতি কৃত্বা; পক্বাশযগুদমিতি ভদ্রশৌনকঃ, মারুতাধিষ্ঠানত্বাত্; হস্তপাদমিতি বডিশঃ, তত্করণত্বাত্ পুরুষস্য; ইন্দ্রিযাণীতি জনকো বৈদেহঃ, তান্যস্য বুদ্ধ্যধিষ্ঠানানীতি কৃত্বা; পরোক্ষত্বাদচিন্ত্যমিতি মারীচিঃ কশ্যপঃ; সর্বাঙ্গাভিনির্বৃত্তির্যুগপদিতি ধন্বন্তরিঃ; তদুপপন্নং, সর্বাঙ্গানাং তুল্যকালাভিনির্বৃত্তত্বাদ্ধৃদযপ্রভৃতীনাম্| সর্বাঙ্গানাং হ্যস্য হৃদযং মূলমধিষ্ঠানং চ কেষাঞ্চিদ্ভাবানাম্, নচ তস্মাত্ পূর্বাভিনির্বৃত্তিরেষাং; তস্মাদ্ধৃদযপ্রভৃতীনাং সর্বাঙ্গানাং তুল্যকালাভিনির্বৃত্তিঃ, সর্বে ভাবা হ্যন্যোন্যপ্রতিবদ্ধাঃ; তস্মাদ্যথাভূতদর্শনং সাধু||২১||

যথাক্রমমুত্তরাণ্যাহ- পূর্বমিত্যাদি|- পূর্বমুক্তমিতি যচ্চাস্য যদা সন্তিষ্ঠতেঽঙ্গজাতং তদপি গর্ভাবক্রান্তৌ “এবমস্য যুগপদিন্দ্রিযাণ্যঙ্গাবযবাশ্চ যৌগপদ্যেনাভিনির্বর্তন্তেঽন্যত্র তেভ্যো ভাবেভ্যো যেঽস্য জাতস্যোত্তরকালং জাযন্তে” (শা. ৪) ইত্যাদিনা গ্রন্থেনোক্তম্| যদ্যপি ‘কথমভিনির্বর্ততে কুক্ষৌ’ ইতি নেহ পৃষ্টং, তথাঽপ্যভিনির্বৃত্তিক্রমোপদর্শনেন ‘কিন্নু খলু গর্ভস্যাঙ্গং পূর্বমভিনির্বর্ততে’ ইতি প্রশ্নস্য যথোক্তোত্পাদক্রমোপদর্শনাদুত্তরত্বং ভবতীতি মত্ত্বোক্তং - উক্তমেতদ্গর্ভাবক্রান্তৌ যথাঽযমভিনির্বর্ততে কুক্ষাবিতি| উক্তামপি যুগপদঙ্গাভিনির্বৃত্তিং মতান্তরোদ্ধারেণ স্থিরীকর্তুমাহ- বিপ্রতিবাদাস্ত্বত্রেত্যাদি| পক্বাশযশ্চ গুদং চেতি পক্বাশযগুদং; কিংবা পক্বাশযসমীপস্থং গুদং পক্বাশযগুদম্ , উত্তরগুদমিত্যর্থঃ| ইন্দ্রিযাণীতি ইন্দ্রিযাধিষ্ঠানানি নযনগোলকাদীনি| তদুপপন্নমিতি ধন্বন্তরিবচনমুপপন্নম্; অত্র হেতুমাহ- সর্বাঙ্গানামিত্যাদিনা হৃদযপ্রভৃতীনামিত্যন্তেন| অত্র চ প্রতিজ্ঞাহেত্বোরেকত্বং নাশঙ্কনীযং; ধন্বন্তরিবচনমুপপন্নমিতি প্রতিজ্ঞা, তদভিহিতার্থস্য যুগপদঙ্গাভিনির্বৃত্তিরূপস্য সিদ্ধত্বাদিতি হেত্বর্থঃ প্রতিজ্ঞার্থাদ্ধিন্ন এব| যে তু ‘তুল্যকালাভিবৃদ্ধত্বাত্ ’ ইতি পঠন্তি, তেষাং হেত্বর্থো ব্যক্ত এব| যেন, উত্তরকালমপি সর্বাঙ্গানাং যুগপদ্বৃদ্ধিদর্শনং ; সমানকালবর্ধমানানাং ফলানামিব সমানকালমেব জন্মানুমীযতে, অসমানকালজাতানাং হি ন সমানকালা সমা বৃদ্ধির্ভবতি| পূর্বর্ষীণাং মতানি হৃদযপূর্বাভিনির্বৃত্তিদূষণেনৈব সমানন্যাযাদ্দূষযন্নাহ- সর্বাঙ্গানাং হ্যস্যেত্যাদি| মূলমিব মূলং, তদুপঘাতেন সর্বাঙ্গোপঘাতাত্| অধিষ্ঠানমিতি আশ্রযঃ| তত্রৌজঃপ্রভৃতীনামধিষ্ঠানং হৃদযং ভবতি; ন চ তস্মাত্ পূর্বাভিনির্বৃত্তিরিতি ন চ তথাবিধমূলত্বান্নাপ্যধিষ্ঠানত্বাচ্চ পূর্বাভিনির্বৃত্তির্ভবতি| যদি হি মূলং কারণমিতি মতং স্যাত্, তদা কার্যেভ্যোঽঙ্গেভ্যঃ প্রাক্ হৃদযং স্যাদপি; ন চেহাঙ্গানাং হৃদযং কারণং কিন্তু প্রধানং, প্রাধান্যং চ তদুপঘাতেন সর্বোপঘাতাদিতি| যশ্চাপ্যাশ্রযাশ্রযিভাবঃ, স চাপি সহোত্পন্নত্বাদেব হৃদযমাশ্রযি তদাশ্রিতৌজঃপ্রভৃতীনাং ভবতীতি ভাবঃ| তদেবং চেদ্ধৃদস্য প্রধানস্যাপি পূর্বোত্পাদো নাস্তি, তদা শিরঃপ্রভৃতীনামপি পূর্বোত্পাদো নাস্ত্যেবেতি কৃত্বোপসংহরন্নাহ- তস্মাদিত্যাদি| যুগপদভিনির্বৃত্তৌ হেত্বন্তরমাহ- সর্বভাবা হীত্যাদি| ভাবা ইতি শারীরা ভাবাঃ| অন্যোন্যপ্রতিবদ্ধা ইতি যস্মাত্ সর্বভাবাঃ পরস্পরপ্রতিবদ্ধা এব সিরাস্নায্বাদিভির্জাযন্তে, তেন সমাননিবন্ধনত্বাদ্ যুগপদেব ভবন্তি| যথাভূতদর্শনমিতি যথার্থদর্শনং, তচ্চ ধন্বন্তরিমতমেব||২১||

Adhikarana 20 (22) · Śloka 22

গর্ভস্তু খলু মাতুঃ পৃষ্ঠাভিমুখ ঊর্ধ্বশিরাঃ সঙ্কুচ্যাঙ্গান্যাস্তেঽন্তঃকুক্ষৌ ||২২||

গর্ভস্ত্বিত্যাদি দ্বিতীযপ্রশ্নস্যোত্তরম্||২২||

Adhikarana 21 (23) · Śloka 23

ব্যপগতপিপাসাবুভুক্ষস্তু খলু গর্ভঃ পরতন্ত্রবৃত্তির্মাতরমাশ্রিত্য বর্তযত্যুপস্নেহোপস্বেদাভ্যাং গর্ভাশযে সদসদ্ভূতাঙ্গাবযবঃ, তদনন্তরং হ্যস্য কশ্চিল্লোমকূপাযনৈরুপস্নেহঃ কশ্চিন্নাভিনাড্যযনৈঃ| নাভ্যাং হ্যস্য নাডী প্রসক্তা, নাড্যাং চাপরা, অপরা চাস্য মাতুঃ প্রসক্তা হৃদযে, মাতৃহৃদযং হ্যস্য তামপরামভিসম্প্লবতে সিরাভিঃ স্যন্দমানাভিঃ ; স তস্য রসো বলবর্ণকরঃ সম্পদ্যতে, স চ সর্বরসবানাহারঃ| স্ত্রিযা হ্যাপন্নগর্ভাযাস্ত্রিধা রসঃ প্রতিপদ্যতে- স্বশরীরপুষ্টযে, স্তন্যায, গর্ভবৃদ্ধযে চ| স তেনাহারেণোপষ্টব্ধঃ (পরতন্ত্রবৃত্তির্মাতরমাশ্রিত্য) বর্তযত্যন্তর্গতঃ||২৩||

ব্যপগত ইত্যাদি ‘কিমাহারশ্চ বর্তযতি’ ইতি প্রশ্নস্যোত্তরম্| পরতন্ত্রবৃত্তিরিতি মাত্রাধীনবৃত্তিঃ| এতদেব বিবৃণোতি- মাতরমিত্যাদি| উপস্নেহঃ নিস্যন্দঃ| সদসদ্ভূতাঙ্গাবযব ইতি চ্ছেদঃ| তদনন্তরমিতি অঙ্গপ্রত্যঙ্গব্যক্তৌ সত্যাম্| নাভিসংসক্তা নাডী নাভিনাডী| অযনৈরিতি মার্গৈঃ| অপরা গর্ভস্য নাভিনাডীপ্রতিবদ্ধা ‘অমরা’ ইতি লোকে খ্যাতা| অভিসম্প্লবতে ইতি ব্যাপ্নোতি| এতচ্চাপরাদিজন্ম গর্ভাদৃষ্টবশাদ্ভবতি||২৩||

Adhikarana 22 (24) · Śloka 24

স চোপস্থিতকালে জন্মনি প্রসূতিমারুতযোগাত্ পরিবৃত্ত্যাবাক্শিরা নিষ্ক্রামত্যপত্যপথেন, এষা প্রকৃতিঃ, বিকৃতিঃ পুনরতোঽন্যথা| পরং ত্বতঃ স্বতন্ত্রবৃত্তির্ভবতি||২৪||

কথম্ভূতঃ স নিষ্ক্রামতীত্যস্যোত্তরং- স চোপস্থিতকাল ইত্যাদি|- উপস্থিতকাল ইতি প্রত্যাসন্নকালে| বিকৃতিঃ পুনরতোঽন্যথেত্যনেন বিকৃত্যাচরণেনাপি নির্গমো ভবতীতি দর্শযতি| স্বতন্ত্রবৃত্তির্ভবতীতি স্বযঙ্কৃতেন স্তন্যপানাদিনা বর্ততে, ন গর্ভস্থ ইব মাতুরেবাহারেণ পরং বর্তত ইত্যর্থঃ||২৪||

Adhikarana 23 (25-26) · Śloka 26

তস্যাহারোপচারৌ জাতিসূত্রীযোপদিষ্টাববিকারকরৌ চাভিবৃদ্ধিকরৌ ভবতঃ||২৫|| তাভ্যামেব চ বিষমসেবিতাভ্যাং জাতঃ সদ্য উপহন্যতে তরুরিবাচিরব্যপরোপিতো বাতাতপাভ্যামপ্রতিষ্ঠিতমূলঃ||২৬||

কৈশ্চাযমিত্যাদিপ্রশ্নস্যোত্তরং- তস্যেত্যাদি| জাতিসূত্রীযোপদিষ্টাবিতি অনাগতাবেক্ষণেনানাগতে ভূতবত্প্রযোগাদ্বোদ্ধব্যম্| অচিরব্যপরোপিতঃ অদীর্ঘকালারোপিতঃ||২৫-২৬||

Adhikarana 24 (27) · Śloka 27

আপ্তোপদেশাদদ্ভুতরূপদর্শনাত্ সমুত্থানলিঙ্গচিকিত্সিতবিশেষাচ্চাদোষপ্রকোপানুরূপা দেবাদিপ্রকোপনিমিত্তা বিকারাঃ সমুপলভ্যন্তে||২৭||

কিঞ্চাস্যেত্যাদিপ্রশ্নস্যোত্তরম্- আপ্তোপদেশাদিত্যাদি| আপ্তোপদেশোঽত্র কুমারতন্ত্রোপদেশো ব্রহ্মাদিপ্রণীতঃ| তত্র হি কুমারাণাং দেবাদিনিমিত্তবিকারাঃ প্রতিপাদ্যন্তে; দেবাদিগ্রহণেন চ তদনুচরা অপি গৃহ্যন্তে| স্কন্দগ্রহাদযঃ সুশ্রুতোক্তা দেবাদযশ্চাষ্টৌ| যদুক্তং- “দেবাস্তথা শত্রুগণাশ্চ তেষাং গন্ধর্বযক্ষাঃ পিতরো ভুজঙ্গাঃ| তথৈব রক্ষাংসি পিশাচজাতিরেষোঽষ্টকো দেবগণো গ্রহাখ্যঃ” (সূ.উ.অ.৬০) ইতি| অনুমানমপ্যত্রাহ- অদ্ভুতেত্যাদি| ন যদ্ভবতি তদদ্ভুতম্, আশ্চর্যমিতি যাবত্; তচ্চামানুষবলজ্ঞানশোভাদি জ্ঞেযং; এতদ্ধি দোষাজন্যত্বাদ্ দেবাদিকারণং গমযতি| সমুত্থানাদিবিশেষ আগন্তূনামাগন্তুবিকারেষু স্ফুট এব| অদোষপ্রকোপানুরূপা ইতি দোষপ্রকোপজন্যরোগবিধর্মাণঃ||২৭||

Adhikarana 25 (28) · Śloka 28

কালাকালমৃত্য্বোস্তু খলু ভাবাভাবযোরিদমধ্যবসিতং নঃ- “যঃ কশ্চিন্ ম্রিযতে স কাল এব ম্রিযতে, ন হি কালচ্ছিদ্রমস্তি” ইত্যেকে ভাষন্তে| তচ্চাসম্যক্| ন হ্যচ্ছিদ্রতা সচ্ছিদ্রতা বা কালস্যোপপদ্যতে, কালস্বলক্ষণস্বভাবাত্| তত্রাহুরপরে- যো যদা ম্রিযতে স তস্য নিযতো মৃত্যুকালঃ; স সর্বভূতানাং সত্যঃ, সমক্রিযত্বাদিতি| এতদপি চান্যথাঽর্থগ্রহণম্| ন হি কশ্চিন্ন ম্রিযত ইতি সমক্রিযঃ| কালো হ্যাযুষঃ প্রমাণমধিকৃত্যোচ্যতে| যস্য চেষ্টং যো যদা ম্রিযতে স তস্য মৃত্যুকাল ইতি, তস্য সর্বে ভাবা যথাস্বং নিযতকালা ভবিষ্যন্তি; তচ্চ নোপপদ্যতে, প্রত্যক্ষং হ্যকালাহারবচনকর্মণাং ফলমনিষ্টং, বিপর্যযে চেষ্টং; প্রত্যক্ষতশ্চোপলভ্যতে খলু কালাকালব্যক্তিস্তাসু তাস্ববস্থাসু তং তমর্থমভিসমীক্ষ্য, তদ্যথা- কালোঽযমস্য ব্যাধেরাহারস্যৌষধস্য প্রতিকর্মণো বিসর্গস্য, অকালো বেতি| লোকেঽপ্যেতদ্ভবতি- কালে দেবো বর্ষত্যকালে দেবো বর্ষতি, কালে শীতমকালে শীতং, কালে তপত্যকালে তপতি, কালে পুষ্পফলমকালে চ পুষ্পফলমিতি| তস্মাদুভযমস্তি- কালে মৃত্যুরকালে চ; নৈকান্তিকমত্র| যদি হ্যকালে মৃত্যুর্ন স্যান্নিযতকালপ্রমাণমাযুঃ সর্বং স্যাত্; এবং গতে হিতাহিতজ্ঞানমকারণং স্যাত্, প্রত্যক্ষানুমানোপদেশাশ্চাপ্রমাণানি স্যুর্যে প্রমাণভূতাঃ সর্বতন্ত্রেষু, যৈরাযুষ্যাণ্যনাযুষ্যাণি চোপলভ্যন্তে| বাগ্বস্তুমাত্রমেতদ্বাদমৃষযো মন্যন্তে- নাকালে মৃত্যুরস্তীতি||২৮||

কালাকালেত্যাদৌ ইদমধ্যবসিতমিত্যনেন প্রকরণব্যবস্থাপনীযোঽযমর্থঃ ‘তস্মাদুভযমস্তি কালে মৃত্যুরকালে চ’ ইতি গ্রন্থবক্ষ্যমাণং প্রত্যবমৃশতি| একীযমতমাহ- যঃ কশ্চিদিত্যাদি| ন হি কালচ্ছিদ্রমস্তীতি কালরহিতঃ কশ্চিদবকাশোঽস্তি, যং কালশূন্যমবকাশমাসাদ্যাকালমৃত্যুঃ স্যাদিতি ভাবঃ| এতদ্দূষযতি- তচ্চেত্যাদিনা| সান্তরং যদবযবি দ্রব্যং তত্ সচ্ছিদ্রমিত্যুচ্যতে, যচ্চ নিরন্তরং তদচ্ছিদ্রম্| তেন কালস্য নিরবযবস্য সচ্ছিদ্রতাঽচ্ছিদ্রতা বা ন সম্ভবতি; তেন যদুচ্যতে- ‘কালস্যাচ্ছিদ্রত্বান্ন কালমৃত্যুরস্তি’ ইতি, তদযুক্তমিতি ভাবঃ| যত্ত্বকালমৃত্যুব্যাপকত্বেন কালস্যোপচরিতচ্ছিদ্রত্বং তদুত্তরবক্ষ্যমাণৈকীযমতদূষণেনৈব দূষিতম্ | কালস্বলক্ষণস্বভাবাদিতি কালস্বলক্ষণে সচ্ছিদ্রতাযা অচ্ছিদ্রতাযাশ্চাভাবাদিত্যর্থঃ| একীযমতান্তরমাহ- তত্রাহুরিত্যাদি| যো যদা ম্রিযতে স এব তস্য নিযতো মৃত্যুকাল ইতি কথং জ্ঞাযতে ইত্যাহ- স সর্বভূতানাং সত্যঃ সমক্রিযত্বাদিতিঃ, যস্মাত্ কালঃ সর্বভূতানামবিশেষেণ মারকতযা সমক্রিযঃ, ন রাগাত্ কিঞ্চিদ্ভূতং ন মারযতি, ন দ্বেষাদ্বা কিঞ্চিদ্ধন্তি, কিন্তু সর্বাণ্যেব নিহন্তি, তেন সর্বভূতানামযং সত্যো রাগদ্বেষশূন্য ইত্যর্থঃ| ততশ্চ রাগদ্বেষশূন্যতযা উচিতকালে এব পরং মারযতি, নানুচিত ইতি ভাবঃ| দূষযতি- এতদপীত্যাদিনা| ন হি কশ্চিন্ন ম্রিযত ইতি কৃত্বা সমক্রিযঃ কালো ভবত্যেব| যত্তু শতবর্ষাদিলক্ষণমাযুঃপ্রমাণমধিকৃত্য ভবতা সমক্রিযঃ কালোঽভিধীযতে; যদি শতবর্ষাদ্যাযুঃপ্রমাণেঽপি সমক্রিযঃ স্যাত্, তদা ন শতবর্ষাদর্বাগূর্ধ্বং বা কশ্চিন্ম্রিযেত, দৃশ্যতে চৈতত্; তস্মাদেবম্ভূতসমক্রিযত্বে কালস্য উচিতশতবর্ষাদ্যাযুঃপ্রাপ্তেরর্বাঙ্ভরণমকালমৃত্যুশব্দাভিধেযমিহাযুর্বেদে তন্নিরস্তং ভবতীতি ভাবঃ| অকালমৃত্যুপ্রতিষেধে দূষণান্তরমাহ- যস্যেত্যাদি| সর্বভাবা ইতি মৃত্যুব্যতিরিক্তা অপ্যাহারবচনাদযঃ| প্রত্যক্ষমিতি সুব্যক্তপ্রমাণে নেত্যর্থঃ| কালাকালব্যক্তিস্তাসু তাস্ববস্থাস্বিতি তাস্তা অবস্থাঃ শরীরাদেস্তং তং ব্যাধ্যাহারাদিকমর্থং বুদ্ধিস্থীকৃত্য কালাকালশব্দেনোচ্যন্ত ইত্যর্থঃ| তত্র তৃতীযদিনজ্বরযুক্তাযাং তৃতীযজ্বরিণোঽবস্থাযাং তৃতীযজ্বরং প্রতি কালোঽযমস্যেতি ব্যপদিশ্যতে, বিপর্যযে চাকাল ইতি ব্যপদেশঃ; তথা গ্লান্যাদিযুক্তাযাং শরীরাবস্থাযামাহাররূপমর্থমুদ্দিশ্য কালোঽযমাহারস্যেতি জ্ঞানং ভবতি, বিপর্যযে চাকালোঽযমিত্যুদাহরণমুন্নেযম্| বিসর্গস্যেতি ব্যাধিমোক্ষস্য| ইহ প্রকরণে কালশব্দেনোচিতঃ কালোঽভিধীযতে, অকালশব্দেনানুচিতঃ কালঃ; ন তু কালবিরহঃ| সিদ্ধান্তমুপসংহরতি- তস্মাদিত্যাদি| নৈকান্তিকমিতি কালমৃত্যুরেব পরং ভবতি, কিংবা অকালমৃত্যুরেব পরং ভবতীত্যৈকান্তিকপক্ষো নাস্তি| অকালমৃত্যোরভাবপক্ষে দূষণান্তরমাহ- যদি হীত্যাদি| হিতাহিতজ্ঞানমকালমৃত্যুপ্রতিষেধার্যং বিধীযতে, স এব চেদকালমৃত্যুর্নাস্তি তদা হিতাহিতজ্ঞানং নিষ্প্রযোজনং স্যাদিত্যর্থঃ| প্রত্যক্ষানুমানোপদেশাশ্চাপ্রমাণানি স্যুরিতি আযুর্বেদসম্বদ্ধা প্রত্যক্ষাদয আযুষ্যানাযুষ্যোপদর্শকা আযুষ্যানাযুষ্যার্থাভাবাদপ্রমাণভূতাঃ স্যুরিতি ভাবঃ| দূষিতং পক্ষং নিঃসারতযা দর্শযন্নাহ- বাগিত্যাদি||২৮||

Adhikarana 26 (29) · Śloka 29

বর্ষশতং খল্বাযুষঃ প্রমাণমস্মিন্ কালে||২৯||

‘কিঞ্চাস্য পরমাযুঃ’ ইত্যস্য প্রশ্নস্যোত্তরমাহ- বর্ষশতমিত্যাদি| অস্মিন্ কালে ইতি কলৌ||২৯||

Adhikarana 27 (30) · Śloka 30

তস্য নিমিত্তং প্রকৃতিগুণাত্মসম্পত্ সাত্ম্যোপসেবনং চেতি||৩০||

শেষপ্রশ্নস্যোত্তরং- তস্যেত্যাদি| প্রকৃতিগুণাত্মসম্পদিতি প্রকৃতিসম্পত্, গুণসম্পত্, আত্মসম্পত্| তত্র প্রকৃতিসম্পত্ সমবাতাদিপ্রকৃতিতা, সমপ্রকৃতির্হি চিরাযুর্ভবতি; গুণসম্পত্তু সারসংহননাদিভিরাযুষ্মল্লক্ষণৈর্যোগঃ, কিংবা প্রকৃতের্মাতৃপিত্রাদ্যুপকরণস্য গুণসম্পত্ সা প্রকৃতিগুণসম্পত্; আত্মনস্তু চিরাযুষ্ট্বকারকধর্মযুক্ততা সম্পত্||৩০||

Adhikarana 28 (31-34) · Śloka 34

তত্র শ্লোকাঃ- শরীরং যদ্যথা তচ্চ বর্ততে ক্লিষ্টমামযৈঃ| যথা ক্লেশং বিনাশং চ যাতি যে চাস্য ধাতবঃ||৩১|| বৃদ্ধিহ্রাসৌ যথা তেষাং ক্ষীণানামৌষধং চ যত্| দেহবৃদ্ধিকরা ভাবা বলবৃদ্ধিকরাশ্চ যে||৩২|| পরিণামকরা ভাবা যা চ তেষাং পৃথক্ ক্রিযা| মলাখ্যাঃ সম্প্রসাদাখ্যা ধাতবঃ প্রশ্ন এব চ||৩৩|| নবকো নির্ণযশ্চাস্য বিধিবত্ সম্প্রকাশিতঃ| তথ্যঃ শরীরবিচযে শারীরে পরমর্ষিণা||৩৪||

সঙ্গ্রহে যে চাস্য ধাতব ইতি যাদৃশাশ্চাস্য ধাতব ইত্যর্থঃ| এতচ্চ ‘বৈষম্যগমনং পুনর্ধাতূনাং’ ইত্যাদিগ্রন্থেন ধাতুধর্মপ্রকাশকত্বেনোক্তং জ্ঞেযম্| অন্যে তু যে চাস্য ধাতব ইত্যনেন ‘মাংসং মাংসেন বর্ধতে’ ইত্যাদি ধাতুরূপাণাং পুনর্মাংসাদীনাং সঙ্গ্রহোঽযমিতি বদন্তি| বৃদ্ধিহ্রাসৌ যথা তেষামিত্যনেন ‘ধাতবঃ পুনঃ’ ইত্যাদিগ্রন্থার্থং গৃহ্ণাতি| ক্ষীণানামৌষধং চ যদিতি মাংসমাপ্যায্যতে মাংসেনেত্যাদি সঙ্গৃহ্ণাতি| যা চ তেষাং পৃথক্ ক্রিযেত্যনেন তেষামাহারপরিণামকরাণামূষ্মপ্রভৃতীনাং পৃথক্কর্ম যদুক্তং ‘ঊষ্মা পচতি’ ইত্যাদিনা গ্রন্থেন তদ্গৃহ্যতে||৩১-৩৪||

Adhikarana puShpikA · Śloka 6

ইত্যগ্নিবেশকৃতে তন্ত্রে চরকপ্রতিসংস্কৃতে শারীরস্থানে শরীরবিচযশারীরং নাম ষষ্ঠোঽধ্যাযঃ||৬||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং শরীরবিচযশারীরং নাম ষষ্ঠোঽধ্যাযঃ||৬||