Adhikarana 1 (1-2) · Śloka 2
অথাতঃ কল্পনাসিদ্ধিং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
View original
अथातः कल्पनासिद्धिं व्याख्यास्यामः||१||
इति ह स्माह भगवानात्रेयः||२||
কল্পস্থানানন্তরং পারিশেষ্যাদেব সিদ্ধিস্থানমভিধীযতে| সিদ্ধেরভিধাযকং স্থানং সিদ্ধিস্থানম্| সিদ্ধিশব্দেন চেহ বমনাদীনাং বমনাদ্যসম্যগ্যোগজন্যানাং ব্যাপদাং ভেষজস্য সাধ্যতারূপা সিদ্ধিরুচ্যতে, এবম্ভূতসিদ্ধিকারণাভিধাযকতযা চৈতত্ সিদ্ধিস্থানমুচ্যতে; কিংবা কার্যকারণযোরভেদোপচারাত্ সিদ্ধিশব্দেনেহ সিদ্ধিকারণান্যেব বমনাদীন্যুচ্যন্তে, উক্তং হি “সম্যক্প্রযোগং চৈব কর্মণাং ব্যাপন্নানাং চ ব্যাপত্সাধনানি সিদ্ধিষূপদেক্ষ্যামঃ” (সূ.অ.৪) ইতি| ন চৈবং সিদ্ধিস্থানসঞ্জ্ঞাব্যুত্পত্ত্যা চিকিত্সাস্থানাদীনামপি সিদ্ধিস্থানসঞ্জ্ঞাপ্রসক্তিরুদ্ভাবনীযা, যত ইযং সঞ্জ্ঞাঽত্রৈব যোগরূঢ্যা বর্ততে নান্যত্র||১-২||
Adhikarana 2 (3-5) · Śloka 6
কা কল্পনা পঞ্চসু কর্মসূক্তা, ক্রমশ্চ কঃ, কিং চ কৃতাকৃতেষু|
লিড্গং তথৈবাতিকৃতেষু, সঙ্খ্যা কা, কিঙ্গুণঃ, কেষু চ কশ্চ বস্তিঃ||৩||
কিং বর্জনীযং প্রতিকর্মকালে, কৃতে কিযান্ বা পরিহারকালঃ|
প্রণীযমানশ্চ ন যাতি কেন, কেনৈতি শীঘ্রং, সুচিরাচ্চ বস্তিঃ||৪||
সাধ্যা গদাঃ স্বৈঃ শমনৈশ্চ কেচিত্ কস্মাত্ প্রযুক্তৈর্ন শমং ব্রজন্তি|
প্রচোদিতঃ শিষ্যবরেণ সম্যগিত্যগ্নিবেশেন ভিষগ্বরিষ্ঠঃ||৫||
পুনর্বসুস্তন্ত্রবিদাহ তস্মৈ সর্বপ্রজানাং হিতকাম্যযেদম্|৬|
View original
का कल्पना पञ्चसु कर्मसूक्ता, क्रमश्च कः, किं च कृताकृतेषु|
लिड्गं तथैवातिकृतेषु, सङ्ख्या का, किङ्गुणः, केषु च कश्च बस्तिः||३||
किं वर्जनीयं प्रतिकर्मकाले, कृते कियान् वा परिहारकालः|
प्रणीयमानश्च न याति केन, केनैति शीघ्रं, सुचिराच्च बस्तिः||४||
साध्या गदाः स्वैः शमनैश्च केचित् कस्मात् प्रयुक्तैर्न शमं व्रजन्ति|
प्रचोदितः शिष्यवरेण सम्यगित्यग्निवेशेन भिषग्वरिष्ठः||५||
पुनर्वसुस्तन्त्रविदाह तस्मै सर्वप्रजानां हितकाम्ययेदम्|६|
সিদ্ধিস্থানাভিধানেঽপি সকলসিদ্ধিস্থানাপেক্ষণীযপঞ্চকর্মকল্পনাদ্যভিধাযকতযা প্রাধান্যাদাদৌ কল্পনাসিদ্ধিরেবোচ্যতে| অত্র ‘কা কল্পনা’ ইত্যাদীন্ শিষ্যস্য দ্বাদশপ্রশ্নানভিনিবেশ্য তান্ যথাক্রমং ব্যাচষ্টে প্রশ্নানুগুণগুরুবুদ্ধিপ্রকাশার্থম্| যদুক্তং ভরদ্বাজেন- “অপ্রদুষ্টেন ভাবেন প্রসন্নেনান্তরাত্মনা| শিষ্যেণ সম্যক্ পৃষ্টস্য গুরোর্বুদ্ধিঃ প্রকাশতে” ইতি| অত্র ‘কা কল্পনা পঞ্চসু কর্মসূক্তা’ ইতি প্রথমঃ প্রশ্নঃ, ‘ক্রমশ্চ কঃ’ ইতি দ্বিতীযঃ, ‘কিঞ্চ কৃতাকৃতেষু লিঙ্গং তথৈবাতিকৃতেষু’ ইতি তৃতীযঃ, ‘সঙ্খ্যা কা’ ইতি চতুর্থঃ, ‘কিঙ্গুণো বস্তিঃ’ ইতি পঞ্চমঃ, ‘কেষু চ কশ্চ বস্তিঃ’ ইতি ষষ্ঠঃ, ‘কিং বর্জনীযং প্রতিকর্মকালে’ ইতি সপ্তমঃ, ‘কৃতে কিযান্ বা পরিহারকালঃ’ ইত্যষ্টমঃ, ‘প্রণীযমানশ্চ ন যাতি কেন বস্তিঃ’ ইতি নবমঃ, ‘কেনৈতি শীঘ্রং’ ইতি দশমঃ, ‘সুচিরাচ্চ কেনৈতি’ ইত্যেকাদশঃ, ‘সাধ্যাঃ’ ইত্যাদিকো দ্বাদশঃ| সাধ্যা ইত্যাদিপ্রশ্নস্য যদ্যপ্যবকাশো নাস্তি, যতো হি নাসাধ্যা গদাঃ প্রোক্তেন যথাস্বং ক্রিযমাণেন ভেষজেন প্রশাম্যন্তি, তথাঽপ্যসম্যগ্ভেষজে এব যথাস্বং ভেষজাভিধানাদযং প্রশ্নোবোদ্ধব্যঃ||৩-৫||-
Adhikarana 3 (6) · Śloka 7
ত্র্যহাবরং সপ্তদিনং পরং তু স্নিগ্ধো নরঃ স্বেদযিতব্য উক্তঃ ||৬||
নাতঃ পরং স্নেহনমাদিশন্তি সাত্ম্যীভবেত্ সপ্তদিনাত্ পরং তু|৭|
View original
त्र्यहावरं सप्तदिनं परं तु स्निग्धो नरः स्वेदयितव्य उक्तः ||६||
नातः परं स्नेहनमादिशन्ति सात्म्यीभवेत् सप्तदिनात् परं तु|७|
কল্পনাশব্দেনেহ পঞ্চকর্মাঙ্গকল্পনোচ্যতে, তেন পঞ্চকর্মাঙ্গস্নেহস্বেদপ্রযোগমেব প্রাগাহ| ত্র্যহাবরমিত্যাদি প্রথমপ্রশ্নস্যোত্তরম্| ত্র্যহাবরমিতি ত্র্যহেণ ত্র্যহং বা ব্যাপ্য ক্রিযমাণস্নেহনেন অবরং যথা ভবতীতি ত্র্যহাবরং স্নিগ্ধঃ| সপ্তদিনমিতি সপ্তদিনং ব্যাপ্য স্নিগ্ধঃ| পরমিতি স্নেহপ্রকর্ষকালাবধিনা সপ্তদিনং ব্যাপ্য স্নিগ্ধঃ| ততশ্চ কালোত্কর্ষাত্ ক্রিযমাণশোধনাঙ্গস্নেহনপক্ষে সপ্তদিনং যাবত্ স্নিগ্ধঃ, কালাপ্রকর্ষপক্ষে তু ত্র্যহং স্নিগ্ধঃ সংস্বেদযিতব্য ইত্যর্থঃ| উক্তসপ্তদিনস্নেহনকালানতিক্রমং সোপপত্তিকমাহ- নাতঃ পরমিত্যাদি| অতঃ পরমিতি সপ্তদিনাত্ পরম্| কুতো নাদিশন্তীত্যাহ- সাত্ম্যীভবেদিত্যাদি| সপ্তদিনাত্ পরেণ ক্রিযমাণস্নেহঃ সপ্তরাত্রপ্রযোগেণ সাত্ম্যীভূতত্বান্ন স্নেহনমধিকং শরীরে করোতীত্যর্থঃ; তেন যাবন্মাত্রস্নেহপ্রযোগেণ সপ্তদিনোপযুক্তেন স্নেহনং বৃতং, সা মাত্রা সাত্ম্যীভূতৈব; অধিকমাত্রা যা সাত্ম্যতাং ন গতা সা সপ্তরাত্রাত্ পরেণাপি কর্তব্যৈব; বেদ্যাস্তু সপ্তরাত্রাদস্নিগ্ধে পুরুষে কিঞ্চিদ্বিশ্রামং কৃত্বা পুনরধিকমাত্রযা স্নেহং প্রযুঞ্জতে| এতচ্চ ত্র্যহস্নেহনং সপ্তরাত্রস্নেহনং চ মৃদুক্রূরকোষ্ঠবিষযভেদেন| যদুক্তং- “মৃদুকোষ্ঠস্ত্রিরাত্রেণ স্নিহ্যত্যচ্ছোপসেবযা| স্নিহ্যতি ক্রূরকোষ্ঠস্তু সপ্তরাত্রেণ মানবঃ” (সূ.অ.১৩) ইতি| ননু যদি ক্রূরকোষ্ঠস্তু সপ্তরাত্রেণ স্নিহ্যতীতি ব্যবস্থা, তত্ কথমিহ ‘নাতঃ পরং স্নেহনমাদিশন্তি’ ইত্যনেন সপ্তরাত্রেণাপ্যস্নেহনমুচ্যতে; ব্রূমঃ- সত্যং, ক্রূরকোষ্ঠঃ সপ্তরাত্রেণৈব স্নিহ্যতি, পরং ক্রূরকোষ্ঠতামপেক্ষ্য কৃতযা স্নেহমাত্রযা স্নিহ্যতি, যদা তু হীনমাত্রা প্রযুজ্যতে, তদা সপ্তরাত্রেণাপি ন স্নিহ্যতি| যত্তু তন্ত্রান্তরে- “ত্রিষট্কনবরাত্রেণ স্নেহপানং বিধীযতে” ইত্যনেন সপ্তরাত্রাদূর্ধ্বমপি স্নেহনং বিহিতং, তদাচার্যানভিমতমেব; কিংবা, সপ্তরাত্রাদূর্ধ্বমসাত্ম্যীভূতাধিকমাত্রাপ্রযোগাভিপ্রাযেণ তদ্বর্ণনীযম্| অত্র চ সপ্তরাত্রাদূর্ধ্বং স্নেহপ্রযোগস্য নিষেধাত্, ত্র্যহাদর্বাক্ প্রযোগস্য বা নিষেধাত্, সদ্যঃ স্নেহপ্রযোগেণৈকদিনেনাপি স্নেহনমনুজানীত ইতি ব্রুবতে| মধ্যকোষ্ঠান্তরং প্রতি স্নেহনপ্রকর্ষকালো যদ্যপি নোক্তঃ, তথাঽপি মধ্যবিধযা পঞ্চদিনেন মধ্যকোষ্ঠস্য স্নেহনং জ্ঞেযম্| যত্তু কৈশ্চিত্ ‘মৃদুকোষ্ঠং প্রতি ত্র্যহাদূর্ধ্বং ন স্নেহনং কর্তব্যং সাত্ম্যীভাবাদিতি চার্থো লভ্যতে’ ইতি ব্যাখ্যাযতে, তন্ন নঃ প্রীণাতি; যতঃ সাত্ম্যীভাবঃ সপ্তদিননির্বর্ত্যতযৈবাচার্যেণোক্তঃ , তেনাত্যল্পমাত্রাপ্রযুক্তেন স্নেহেন ত্র্যহাদ্যদি ন স্নিহ্যতি মৃদুকোষ্ঠস্তদাঽধিকদিনান্যপি তত্র স্নেহঃ কর্তব্যঃ||৬||-
Adhikarana 4 (7) · Śloka 7
স্নেহোঽনিলং হন্তি মৃদূকরোতি দেহং মলানাং বিনিহন্তি সঙ্গম্||৭||
View original
स्नेहोऽनिलं हन्ति मृदूकरोति देहं मलानां विनिहन्ति सङ्गम्||७||
সংশোধনাঙ্গস্নেহফলমাহ- স্নেহোঽনিলং হন্তীত্যাদি||৭||
Adhikarana 5 (8) · Śloka 8
স্নিগ্ধস্য সূক্ষ্মেষ্বযনেষু লীনং স্বেদস্তু দোষং নযতি দ্রবত্বম্|৮|
View original
स्निग्धस्य सूक्ष्मेष्वयनेषु लीनं स्वेदस्तु दोषं नयति द्रवत्वम्|८|
স্নেহপূর্বকস্বেদফলমাহ- স্নিগ্ধস্যেত্যাদি| সূক্ষ্মেষ্বিতি সূক্ষ্মেষ্বপি|৮|
Adhikarana 6 (8) · Śloka 9
গ্রাম্যৌদকানূপরসৈঃ সমাংসৈরুত্ক্লেশনীযঃ পযসা চ বম্যঃ||৮||
রসৈস্তথা জাঙ্গলজৈঃ সযূষৈঃ স্নিগ্ধৈঃ কফাবৃদ্ধিকরৈর্বিরেচ্যঃ|৯|
View original
ग्राम्यौदकानूपरसैः समांसैरुत्क्लेशनीयः पयसा च वम्यः||८||
रसैस्तथा जाङ्गलजैः सयूषैः स्निग्धैः कफावृद्धिकरैर्विरेच्यः|९|
সম্প্রতি স্নিগ্ধস্য বামনীযস্য বমনানুগুণং বিরেচনীযস্য চ বিরেচনানুগুণং ভোজনং পৃথগাহ- গ্রাম্যৌদকেত্যাদি| রসৈস্তথেত্যাদিনা বিরেচনীযস্যাহারবিধানম্| অত্র চ উত্ক্লেশনীয ইতি যদা সম্বন্ধো ভবেত্তদা উত্ক্লেশনং পিত্তস্যৈব জ্ঞেযং; কিংবা ‘উত্ক্লেশনীযঃ’ ইতি নানুবর্তত এব, তেন কফাবৃদ্ধিকরৈ রসৈর্যূষৈশ্চ ‘ভোজনীয’ ইতি শেষঃ| এতদ্বিরেচনার্থং প্রতিভোজনং ত্র্যহং জ্ঞেযং, বমনার্থং তু প্রতিভোজনমেকাহমেব; উক্তং হি ‘স্নেহাত্ প্রস্কন্দনং জন্তুস্ত্রিরাত্রোপরতঃ পিবেত্| স্নেহবদ্দ্রবমুষ্ণং চ ত্র্যহং ভুক্ত্বা রসৌদনম্| একাহোপরতস্তদ্বদ্ভুক্ত্বা প্রচ্ছর্দনং পিবেত্” (সূ.অ.১৩) ইতি||৮||-
Adhikarana 7 (9) · Śloka 10
শ্লেষ্মোত্তরশ্ছর্দযতি হ্যদুঃখং বিরিচ্যতে মন্দকফস্তু সম্যক্||৯||
অধঃ কফেঽল্পে বমনং বিরেচযেদ্বিরেচনং বৃদ্ধকফে তথোর্ধ্বম্|১০|
View original
श्लेष्मोत्तरश्छर्दयति ह्यदुःखं विरिच्यते मन्दकफस्तु सम्यक्||९||
अधः कफेऽल्पे वमनं विरेचयेद्विरेचनं वृद्धकफे तथोर्ध्वम्|१०|
বামনীযস্য শ্লেষ্মোত্তরত্বে কর্তব্যে বিরেচনীযস্য চাল্পকফত্বে সম্পাদ্যে উপপত্তিমাহ- শ্লেষ্মোত্তর ইত্যাদি| উক্তবিপর্যযে হেতুমাহ- অধ ইত্যাদি| কফেঽল্পে সতি বমনং পীতং বমনমকৃত্বৈবাধো যাতি; বৃদ্ধে কফে তু বিরেচনং প্রযুক্তমূর্ধ্বং যাতি, বমনায সম্পদ্যত ইত্যর্থঃ||৯||-
Adhikarana 8 (10) · Śloka 11
স্নিগ্ধায দেযং বমনং যথোক্তং বান্তস্য পেযাদিরনুক্রমশ্চ||১০||
স্নিগ্ধস্য সুস্বিন্নতনোর্যথাবদ্বিরেচনং যোগ্যতমং প্রযোজ্যম্ |১১|
View original
स्निग्धाय देयं वमनं यथोक्तं वान्तस्य पेयादिरनुक्रमश्च||१०||
स्निग्धस्य सुस्विन्नतनोर्यथावद्विरेचनं योग्यतमं प्रयोज्यम् |११|
সম্প্রতি ক্রমশ্চ ক ইতি প্রশ্নস্যোত্তরমাহ- স্নিগ্ধায দেযং বমনমিতি; বমনপানদিনেঽভ্যঙ্গেন স্নিগ্ধায বমনং দেযমিত্যর্থঃ, পানজনিতস্নেহস্তু পূর্বমেবোক্তত্বান্ন পুনরভিধানমর্হতি, অন্যে তু ‘উপজাতস্নেহগুণায ’ ইতি বদন্তি| যথোক্তমিতি মদনকল্পোক্তবিধিনা দেযম্| বমনানন্তরং কর্তব্যমাহ- বান্তস্যেত্যাদি| পেযাদিঃ “পেযাং বিলেপী” ইত্যাদিনা বক্ষ্যমাণঃ| বমনক্রমমভিধায বিরেচনক্রমমাহ- স্নিগ্ধস্যেত্যাদি| সুস্বিন্নতনোরিতি সম্যক্স্বিন্নদেহস্য| অযং চ বিরেচনাঙ্গঃ স্নেহস্বেদক্রমো বমনানন্তরভাবিবিরেচনেঽপি পেযাদিক্রমোত্তরকালং কর্তব্যঃ; যদুক্তং- ‘বিলেপ্যাঃ ক্রমাগতং চৈনং পুনরেব স্নেহস্বেদাভ্যামুপপাদ্য বিরেচযেত্’ ইতি| স্নেহানন্তরং চ যত্ত্র্যহং বিরেচনার্থং প্রতিভোজনং, তদুপক্রমাভিধানানুষঙ্গপ্রতিপাদিতমেবেতি ন পুনরিহ প্রতিপাদ্যতে| যথাবদিতি কল্পস্থনোক্তবিধিনা| যোগ্যতমমিতি শরীরদোষাদ্যপেক্ষযা যদ্বিরেচনং যৌগিকং ভবতি তদ্দেযম্||১০||-
Adhikarana 9 (11) · Śloka 12
পেযাং বিলেপীমকৃতং কৃতং চ যূষং রসং ত্রির্দ্বিরথৈকশশ্চ||১১||
ক্রমেণ সেবেত বিশুদ্ধকাযঃ প্রধানমধ্যাবরশুদ্ধিশুদ্ধঃ|১২|
View original
पेयां विलेपीमकृतं कृतं च यूषं रसं त्रिर्द्विरथैकशश्च||११||
क्रमेण सेवेत विशुद्धकायः प्रधानमध्यावरशुद्धिशुद्धः|१२|
বমনবিরেচনোত্তরভাবিপেযাদিক্রমমাহ- পেযাং বিলেপীমিত্যাদি| যবাগূঃ বহুসিক্থা| বিলেপী বিরলদ্রবা| উক্তং হি- ‘সিক্থকৈ রহিতো মণ্ডঃ, পেযা সিক্থসমন্বিতা| যবাগূর্বহুসিক্থা স্যাদ্বিলেপী বিরলদ্রবা’ ইতি| অত্র অকৃতযূষঃ স্নেহলবণাদ্যসংস্কৃতঃ, কৃতযূষঃ স্নেহলবণাদিসংস্কৃতঃ; এবং রসেঽপি কৃতাকৃতব্যবস্থা| যদুক্তং সূদশাস্ত্রে ‘অস্নেহলবণং সর্বমকৃতং কটুকৈর্বিনা| বিজ্ঞেযং লবণস্নেহকটুকৈঃ সংস্কৃতং কৃতম্” ইতি| ত্রিরিতি অন্নকালত্রযং ব্যাপ্য, দ্বিরিতি অন্নকালদ্বযম্, একশ ইতি একান্নকালম্; এতচ্চ ত্রিরিত্যাদি প্রত্যেকং পেযাদিভিঃ সম্বধ্যতে| এতচ্চ ত্রিরিত্যাদি পক্ষত্রযং প্রধানশুদ্ধিশুদ্ধাদ্যপেক্ষযা যথাক্রমং জ্ঞেযম্| তেন, প্রধানশুদ্ধিশুদ্ধে প্রত্যেকং ত্রিঃ পেযাদি কর্তব্যং, তেনান্নকালত্রযে পেযা, ততঃ পরেণান্নকালত্রযে বিলেপী, ততঃ পরেণান্নকালত্রযে কৃতাকৃতযূষসহিতমন্নং , ততোঽপি চ পরেণ কৃতাকৃতরসেনান্নমন্নকালত্রযে দেযম্; এবং দ্বাদশভিরন্নকালৈর্বমনদিনসাযাহ্নাত্ প্রভৃতি সপ্তরাত্রেণ পেযাদিক্রমঃ | অযমেব ক্রম উপকল্পনীযেঽপি- “ততঃ সাযাহ্নে লোহিতশালিতণ্ডুলানাং” ইত্যাদিনা, যাবত্ “দ্বাদশে চান্নকালে” (সূ.অ.১৫) ইত্যনেনোক্তঃ | অত্র যূষরসযোস্তু যদ্যপি কালবিভাগো ন প্রতিপাদিতস্তথাঽপি যূষকালত্রযে রসকালত্রযে চ প্রথমমকৃতস্য উত্তরকালে চ কৃতস্য যূষস্য, এবং রসস্যাপি কালবিভাগঃ কথনীযঃ| এবং দ্বিঃপেযাদিক্রমস্তথা একশশ্চ পেযাদিক্রমো বর্ণনীয ইতি| এককালে তু পেযাদিক্রমে যদ্যপি কৃতাকৃতযূষরসযোঃ কালবিভাগো ন প্রাপ্যতে, তথাঽপ্যেকস্মিন্নেব কালে স্তোকসংস্কারেণ যূষরসযোস্তত্র কৃতাকৃতত্বং জ্ঞেযম্| প্রধানশুদ্ধে ভূরিদোষগমনক্ষোভাদগ্নিমান্দ্যং সম্ভবতি, তেন তত্র পেযাদিক্রমশ্চিরং ক্রিযত ইতি জ্ঞেযম্| প্রধানশুদ্ধ্যাদিলক্ষণং চাগ্রে বক্ষ্যমাণম্||১১||-
Adhikarana 10 (12) · Śloka 13
যথাঽণুরগ্নিস্তৃণগোমযাদ্যৈঃ সন্ধুক্ষ্যমাণো ভবতি ক্রমেণ||১২||
মহান্ স্থিরঃ সর্বপচস্তথৈব শুদ্ধস্য পেযাদিভিরন্তরগ্নিঃ|১৩|
View original
यथाऽणुरग्निस्तृणगोमयाद्यैः सन्धुक्ष्यमाणो भवति क्रमेण||१२||
महान् स्थिरः सर्वपचस्तथैव शुद्धस्य पेयादिभिरन्तरग्निः|१३|
পেযাদিক্রমস্য বিশোধনমন্দীকৃতাগ্নের্দীপকত্বং দৃষ্টান্তেন দর্শযন্নাহ- যথেত্যাদি||১২||-
Adhikarana 11 (13-14) · Śloka 15
জঘন্যমধ্যপ্রবরে তু বেগাশ্চত্বার ইষ্টা বমনে ষডষ্টৌ||১৩||
দশৈব তে দ্বিত্রিগুণা বিরেকে প্রস্থস্তথা দ্বিত্রিচতুর্গুণশ্চ|
পিত্তান্তমিষ্টং বমনং বিরেকাদর্ধং কফান্তং চ বিরেকমাহুঃ||১৪||
দ্বিত্রান্ সবিট্কানপনীয বেগান্মেযং বিরেকে বমনে তু পীতম্|১৫|
View original
जघन्यमध्यप्रवरे तु वेगाश्चत्वार इष्टा वमने षडष्टौ||१३||
दशैव ते द्वित्रिगुणा विरेके प्रस्थस्तथा द्वित्रिचतुर्गुणश्च|
पित्तान्तमिष्टं वमनं विरेकादर्धं कफान्तं च विरेकमाहुः||१४||
द्वित्रान् सविट्कानपनीय वेगान्मेयं विरेके वमने तु पीतम्|१५|
প্রধানশুদ্ধ্যাদিলক্ষণং প্রাহ- জঘন্যেত্যাদি| চতুর্ভির্বেগৈর্যচ্ছোধনং বমনং তজ্জঘন্যং, যত্তু ষড্ভিস্তন্মধ্যমং, যত্ত্বষ্টভিস্তত্ প্রবরম্| বিরেকে জঘন্যে দশ, মধ্যে তু বিরেচনে দ্বিগুণা দশবিংশতিরিত্যর্থঃ, প্রবরে তু বিরেচনে ত্রিগুণা দশ ত্রিংশদিত্যর্থঃ| বেগসঙ্খ্যাবিভেদেন জঘন্যাদিভেদমভিধায দোষমানভেদেনাপি বিরেচনস্য জঘন্যমধ্যপ্রবরতাং যথাক্রমমাহ- প্রস্থস্তথেত্যাদি| দ্বিগুণঃ প্রস্থো জঘন্যে বিরেচনে, ত্রিগুণশ্চ মধ্যমে, চতুর্গুণস্তু প্রবরে| অত্র চ প্রস্থশব্দেন সার্ধত্রযোদশপলান্যুচ্যন্তে; উক্তং হি তন্ত্রান্তরে “বমনে চ বিরেকে চ তথা শোণিতমোক্ষণে| সার্ধত্রযোদশপলং প্রস্থমাহুর্মনীষিণঃ” ইতি| পিত্তান্তমিষ্টং বমনং বিরেকাদর্ধমিতি বিরেকে যন্মানং জঘন্যমধ্যপ্রবরবিভাগে প্রোক্তং যথাক্রমং তথা বমনেঽপি জঘন্যমধ্যপ্রবরবিভাগে তদর্ধং জ্ঞেযং, পরং তু যত্ পিত্তান্তত্বং বমনস্য, কফান্তত্বং বিরেকস্য, তত্ ত্রিবিধশুদ্ধাবর্থাগতং জ্ঞেযম্| যদা চতুর্ভির্বেগৈঃ প্রস্থমানে দোষে গতে পিত্তান্তত্বং সম্যগ্বমনশুদ্ধিজলক্ষণমুপলভ্যতে তদা জঘন্যা শুদ্ধিঃ, যদা চ বিরেকে দশভির্বেগের্দ্বিপ্রস্থমানদোষগমনে কফান্তত্বং বিরেচনসম্যগ্যোগলক্ষণমুপলভ্যতে তদা বিরেচনস্য জঘন্যা শুদ্ধির্ভবতি; এবং মধ্যপ্রবরশুদ্ধাবপি বমনে পিত্তান্তত্বং, বিরেচনে কফান্তত্বং, সম্যগ্যোগলক্ষণং জ্ঞেযম্| বেগসঙ্খ্যাদোষমানাভিধানানন্তরং সম্যক্শুদ্ধিলৈঙ্গিকশুদ্ধেঃ পিত্তান্তত্বাদিলক্ষণপ্রতিপাদনার্থমিহাভিধানং, তেন যদুচ্যতে আন্তিকী, বৈগিকী, মানিকী, লৈঙ্গিকী চেতি চতুর্বিধা শুদ্ধিরিহোচ্যতে বমনবিরেচনযোঃ, তদস্মাকমসম্মতমেব; কিন্তু লৈঙ্গিকী চৈকা শুদ্ধিঃ| তত্র চ পিত্তান্তত্বং তথা ‘ক্রমাত্কফঃ’ ইত্যাদিগ্রন্থবক্ষ্যমাণং চ লিঙ্গং বমনে, বিরেচনে চ কফান্তত্বং তথা ‘স্রোতোবিশুদ্ধীন্দ্রিয’ ইত্যাদিগ্রন্থবক্ষ্যমাণং চ লিঙ্গং জ্ঞেযম্| তেন যদত্র আষাঢবর্মণা “সম্যগ্বিশুদ্ধিলিঙ্গং লক্ষণতোঽথ মানাচ্চ বেগাচ্চ দোষাগমনাচ্চোক্তং, কিমিদং ব্যস্তং সমস্তং বা” ইত্যাদিনাঽঽক্ষিপ্তং, তদনভ্যুপগমনিরস্তমেব| অন্যেষাং ত্বত্র পরিহারা বিস্তরভযান্ন লিখিতাঃ| জঘন্যাদিশুদ্ধিত্রৈবিধ্যং চাত্র জঘন্যমধ্যোত্কৃষ্টদোষবিষযতযা ব্যবস্থাপনীযম্| জঘন্যাদিশুদ্ধিলক্ষণেঽপি যদ্বেগেন জঘন্যাদিশুদ্ধিলক্ষণাভিধানং, তত্ প্রাযোভাবিতযা জ্ঞেযম্| দোষমানভেদেন জঘন্যাদিমানভেদঃ পারমার্থিকঃ; তেন যত্র বমনেঽষ্টাভির্বেগৈর্দ্বিপ্রস্থদোষস্রুতির্ভবতি তত্র প্রবরৈব শুদ্ধিঃ, যত্র বমনে ষড্ভিরেব বেগৈঃ সার্ধপ্রস্থদোষস্রুতির্ভবতি তত্র মধ্যৈব শুদ্ধি;, যত্র চ চতুর্ভিরপি বেগৈরেকপ্রস্থদোষস্রুতিস্তত্র জঘন্যশুদ্ধিরেব; এবং বিরেচনেষ্বপ্যুদাহার্যম্| পিত্তপ্রবৃত্তিরন্তে যস্মিন্ তত্ পিত্তান্তম্, এবং কফান্তমপি ব্যাখ্যেযম্| তেন ‘ক্রমাত্ কফঃ পিত্তমথানিলশ্চ’ ইত্যনেন যত্ সম্যগ্বমনলক্ষণং বক্তব্যং, তথা ‘প্রাপ্তিশ্চ বিট্পিত্তকফানিলানাং’ ইত্যনেন চ সম্যগ্বিরেচনলক্ষণং যদ্বক্তব্যং, তদনেন সহাবিরুদ্ধং ভবতি| তত্র চ যদনিলাগমনমন্তে বক্তব্যং তত্ পিত্তান্তস্য কফান্তস্য চ সূচকতযা জ্ঞেযং, নিঃশেষকৃতে হ্যাশযগতে পিত্তে কফে চ বাযুঃ কেবলঃ সরতি; তেন চ কেবলবাযুসরণেন পিত্তান্ততা কফান্ততা চ জ্ঞাযতে| ননু যদি ‘ক্রমাত্ কফঃ” ইত্যাদিনৈব গ্রন্থেনাযমর্থোঽভিহিতস্তত্ কথমিহ পিত্তান্তং চ বমনং, কফান্তং চ বিরেকমাহুরিতি কৃতং? বূমঃ- বেগসঙ্খ্যাদোষমানভেদপ্রতিপাদ্যমানজঘন্যাদিশুদ্ধিত্রযে পিত্তান্তত্বাদ্যনুগতিপ্রতিপাদনার্থমিহাভিধানম্; এবং তদ্বমনবিরেচনসম্যগ্যোগলক্ষণানভিধানে হি শিষ্যস্য প্রবলদোষেঽপি পুরুষেঽযোগশুদ্ধাবেব জঘন্যশুদ্ধিগতবেগমানোদযে সতি অথ পিত্তান্তত্বাদ্যনুদযে জঘন্যশুদ্ধিভ্রমঃ স্যাত্ এবম্ন্যদপ্যুদাহার্যম্| বমনে চ বিরেকে চ যথা দোষমাপনং কর্তব্যং তদাহ- দ্বিত্রানিত্যাদি| দ্বিত্রানিত্যব্যবস্থিতভাষণেন মলভাগস্যামেযতাং দর্শযতি; বমনে তু পীতমিতি বমনে পীতমৌষধং বর্জযিত্বা শেষো মেযঃ||১৩-১৪||-
Adhikarana 12 (15) · Śloka 16
ক্রমাত্ কফঃ পিত্তমথানিলশ্চ যস্যৈতি সম্যগ্বমিতঃ স ইষ্টঃ||১৫||
হৃত্পার্শ্বমূর্ধেন্দ্রিযমার্গশুদ্ধৌ তথা লঘুত্বেঽপি চ লক্ষ্যমাণে|১৬|
View original
क्रमात् कफः पित्तमथानिलश्च यस्यैति सम्यग्वमितः स इष्टः||१५||
हृत्पार्श्वमूर्धेन्द्रियमार्गशुद्धौ तथा लघुत्वेऽपि च लक्ष्यमाणे|१६|
সম্প্রতি ‘কিং চ কৃতাকৃতেষু’ ইত্যাদিপ্রশ্নস্যোত্তরং যথাক্রমমাহ- ক্রমাদিত্যাদি| ক্রমাদিত্যনেন বচনেন যথোক্তক্রমলঙ্ঘনেন কফাদ্যাগমনং ন সম্যগ্যোগলক্ষণমিতি দর্শযতি; যতঃ কফাদূর্ধ্বং গতং যদা পিত্তং ভবতি তদা তু পিত্তাগমনেঽপি সতি ন শুদ্ধিঃ, কিন্তু যদৈবামাশযাধোভাগগতং পিত্তং বমনমানযতি তদৈব শুদ্ধিঃ, তত্ পিত্তানযনং চ কফানযনানন্তরমেব ভবতি; এবং সম্যক্কৃতবিরেচনলক্ষণেঽপি ক্রমাদিতিপদস্যার্থোঽত্র ব্যাখ্যেযঃ||১৫||-
Adhikarana 13 (16) · Śloka 16
দুশ্ছর্দিতে স্ফোটককোঠকণ্ডূহৃত্খাবিশুদ্ধির্গুরুগাত্রতাং চ||১৬||
View original
दुश्छर्दिते स्फोटककोठकण्डूहृत्खाविशुद्धिर्गुरुगात्रतां च||१६||
দুশ্ছর্দিতে ইত্যাদ্যযোগকৃতবমনলক্ষণম্||১৬||
Adhikarana 14 (17) · Śloka 17
তৃণ্মোহমূর্চ্ছানিলকোপনিদ্রাবলাদিহানির্বমনেঽতি চ স্যাত্|১৭|
View original
तृण्मोहमूर्च्छानिलकोपनिद्राबलादिहानिर्वमनेऽति च स्यात्|१७|
তৃণ্মোহেত্যাদ্যতিকৃতবমনলিঙ্গম্| অত্রাদিশব্দেন বর্ণস্বরাদিগ্রহণম্| নিদ্রাহানিশ্চাত্রানিলকোপকৃতৈব|১৭|
Adhikarana 15 (17) · Śloka 18
স্রোতোবিশুদ্ধীন্দ্রিযসম্প্রসাদৌ লঘুত্বমূর্জোঽগ্নিরনামযত্বম্||১৭||
প্রাপ্তিশ্চ বিট্পিত্তকফানিলানাং সম্যগ্বিরিক্তস্য ভবেত্ ক্রমেণ|১৮|
View original
स्रोतोविशुद्धीन्द्रियसम्प्रसादौ लघुत्वमूर्जोऽग्निरनामयत्वम्||१७||
प्राप्तिश्च विट्पित्तकफानिलानां सम्यग्विरिक्तस्य भवेत् क्रमेण|१८|
স্রোতোবিশুদ্ধীত্যাদি সম্যগ্বিরেচনলক্ষণম্| ঊর্জোঽগ্নিরিতি পটুরগ্নিঃ | অনামযত্বমিতি বিরেচনজেতব্যদোষজনিতবিকারব্যপগমঃ| প্রাপ্তিশ্চেত্যাদিগ্রন্থার্থঃ স্থানান্তরে ব্যাখ্যাত এব||১৭||-
Adhikarana 16 (18) · Śloka 19
স্যাচ্ছ্লেষ্মপিত্তানিলসম্প্রকোপঃ সাদস্তথাঽগ্নের্গুরুতা প্রতিশ্যা||১৮||
তন্দ্রা তথা চ্ছর্দিররোচকশ্চ বাতানুলোম্যং ন চ দুর্বিরিক্তে|১৯|
View original
स्याच्छ्लेष्मपित्तानिलसम्प्रकोपः सादस्तथाऽग्नेर्गुरुता प्रतिश्या||१८||
तन्द्रा तथा च्छर्दिररोचकश्च वातानुलोम्यं न च दुर्विरिक्ते|१९|
স্যাদিত্যাদ্যযোগকৃতবিরেকলক্ষণম্| ন চ বাতানুলোম্যমিত্যর্থঃ ||১৮||-
Adhikarana 17 (19) · Śloka 20
কফাস্রপিত্তক্ষযজানিলোত্থাঃ সুপ্ত্যঙ্গমর্দক্লমবেপনাদ্যাঃ||১৯||
নিদ্রাবলাভাবতমঃপ্রবেশাঃ সোন্মাদহিক্কাশ্চ বিরেচিতেঽতি|২০|
View original
कफास्रपित्तक्षयजानिलोत्थाः सुप्त्यङ्गमर्दक्लमवेपनाद्याः||१९||
निद्राबलाभावतमःप्रवेशाः सोन्मादहिक्काश्च विरेचितेऽति|२०|
কফাস্রেত্যাদি বিরেকাতিযোগলক্ষণম্| ক্ষযশব্দঃ কফাদিভিঃ প্রত্যেকং সম্বধ্যতে||১৯||-
Adhikarana 18 (20-21) · Śloka 22
সংসৃষ্টভক্তং নবমেঽহ্নি সর্পিস্তং পাযযেতাপ্যনুবাসযেদ্বা||২০||
তৈলাক্তগাত্রায ততো নিরূহং দদ্যাত্র্যহান্নাতিবুভুক্ষিতায|
প্রস্যাগতে ধন্বরসেন ভোজ্যঃ সমীক্ষ্য বা দোষবলং যথার্হম্||২১||
নরস্ততো নিশ্যনুবাসনার্হো নাত্যাশিতঃ স্যাদনুবাসনীযঃ |২২|
View original
संसृष्टभक्तं नवमेऽह्नि सर्पिस्तं पाययेताप्यनुवासयेद्वा||२०||
तैलाक्तगात्राय ततो निरूहं दद्यात्र्यहान्नातिबुभुक्षिताय|
प्रस्यागते धन्वरसेन भोज्यः समीक्ष्य वा दोषबलं यथार्हम्||२१||
नरस्ततो निश्यनुवासनार्हो नात्याशितः स्यादनुवासनीयः |२२|
বমনবিরেচনকল্পনাপ্রস্তাবাগতসম্যগ্যোগাদিলক্ষণমভিধায বস্তিকল্পনামাহ- সংসৃষ্টভক্তমিত্যাদি| সপ্তভির্দিনৈঃ কৃতসংসর্জনক্রমস্যাষ্টমে ভুক্তমুপযুক্তস্য নবমেঽহ্নি সর্পিঃপানমনুবাসনং বা দেযম্; অত্র বিকল্পদ্বযে যদি বমনানন্তরং বিরেচনং কর্তব্যং তদা নবমেঽহ্নি সর্পিঃপানম্, অথ বিরেচনানন্তরং যদা বস্তির্দেযস্তদাঽনুবাসনং নবমেঽহ্নি দেযমিতি ব্যবস্থা| বমমানন্তরং নবমদিবসে সর্পিঃ পানং পূর্বং নোক্তং তেনেদানীং বিরেচনানন্তরকর্তব্যনিরূহাঙ্গানুবাসনসমানকালতযা সর্পিঃ পানমপি দর্শিতং, তেন ন নিরূহাঙ্গতা সর্পিঃপানস্য কল্পনীযা| নবমশ্চ দিবসোঽত্র শোধনদিনমারভ্যৈব জ্ঞেযঃ; উক্তং চ জতূকণ- ‘শোধনানন্তরং নবমেঽহ্নি স্নেহপানমনুবাসনং বা” ইতি, তথা সুশ্রুতেঽপ্যুক্তং- “বিরেচনাত্ সপ্তরাত্রে গতে জাতবলায চ| কৃতান্নাযানুবাস্যায সম্যগ্দেযোঽনুবাসনঃ” (সু.চি.অ.৩৭) ইতি| উত্তরবস্তিচিকিত্সিতে চ যঃ পেযাদিক্রমানন্তরং রসসংসর্জনক্রম উক্তঃ, স সর্বকর্মাবসানে প্রকৃতিভোজনগমনার্থং কর্তব্যঃ, ন বমনবিরেচনকর্মপরিসমাপ্তাবেব, তেনেহাকৃতরসসংসর্গস্যৈব নবমে দিনে সর্পিঃপানমনুবাসনং চোপপন্নম্| যত্তু ভদ্রশৌনকে- “সংসৃষ্টভক্তঃ সুমনাঃ স্নেহপীতো দৃঢানলঃ| সংশুদ্ধঃ পরতো মাসাদনুবাস্যস্ততো নরঃ” ইত্যুক্তং, তত্ প্রাগনুবাসনবিষযং রোগবিশেষবিষযং বেতি নৈতদ্বিরুদ্ধং ভবতি; বহূনি চাত্র ব্যাখ্যানানি টীকাকৃতামঙ্গিরি-সৈন্ধব-জেজ্জটেশ্বরসেনাদীনাং সন্তি; অন্যৈস্তু তদ্ব্যাখ্যানানি দোষোদ্ধারাদেব নিরস্তানি| তৈলাক্তগাত্রাযেতি বচনমভ্যঙ্গেনাপি স্নেহপ্রযোগদর্শনার্থম্| স্বেদস্ত্বত্র পঞ্চকর্মপূর্বতযা বিহিতোঽনুক্তোঽপ্যাযাত্যেব; যদুক্তং ‘তান্যুপস্থিতদোষণাং স্নেহস্বেদোপপাদনৈঃ| পঞ্চকর্মাণি কুর্বীত” (সূ.অ.২) ইতি| দদ্যাত্র্যহাদিতি অনুবাসনদিনাদূর্ধ্বং ত্র্যহাত্, তেন যথাবক্ষ্যমাণক্রমেণ একাহাদ্ দ্ব্যহাদধিকাদ্বা স্নেহাত্তদহর্বা নিরূহো দেযঃ| নাতিবুভুক্ষিতাযেত্যনেন অতিবুভুক্ষিতস্য নিরূহোঽতিযোগাযোর্ধ্বগমনায চ ভবতীতি সূচযতি| তত্র ধন্বরসেন প্রতিভোজনং বিরেচনবদগ্নিমান্দ্যাভাবাদ্বলাবহত্বাচ্চ যুক্তমেব; যদুক্তং ভোজে- “আমস্তকাদ্বিশুদ্ধস্য নিরূহেণ রসাদিকম্| কিমর্থং বিহিতং ভোজ্যং সংসর্গশ্চ বিরিক্তবত্|| বিরেকঃ পাবকং হন্তি তদধিষ্ঠানসম্প্লবাত্| ন তু বস্তিস্তথা তস্মাদ্যযোন্নযতি পাবকম্’ ইতি| নিরূহ এব দোষাগ্নিবলাপেক্ষযা রসাদিনা পেযাদিনা বা ভোজনং দর্শযন্নাহ- সমীক্ষ্য বা দোষবলং যথার্হমিতি; বলমিতি অগ্নিবলম্| নরস্তত ইত্যাদিনা নিরূঢস্যানুবাসনমাহ| নিশীত্যনেন নিরূহানন্তরং তদ্দিনে ক্রিযমাণমনুবাসনং নিশ্যেব কর্তব্যমিতি দর্শযতি, ন শীতে বসন্তে চ সদ্যোনিরূঢস্য রাত্রাবেবানুবাসনং ন দেযমিতি অন্যে তু নিশীত্যনেন তদহরেব নিরূঢায সাযমনুবাসনং দেযমিতি দর্শযতি, তেন যথাবক্ষ্যমাণবিভাগেন রাত্রৌ দিবা বা দেযমিত্যাহুঃ| অনুবাসনার্হ ইতি বচনেন যদি সামতা মন্দো বা পাবকো ভবতি তদা তদহরনুবাসনং ন দেযমিতি সূচযতি| অত এব জতূকর্ণে দ্বিতীযদিবস এবানুবাসনমুক্তং- “ততস্ত্র্যহান্নিরূহে ব্যুষিতে ভুক্তবতোঽনুবাসনম্” ইতি; হারীতেঽপি- “ব্যুষ্টং রজন্যাং প্রসমীক্ষ্য তস্মাদ্বলাবলং বাঽপ্যনুবাসনীযঃ” ইত্যুক্তম্| “সদ্যো নিরূঢোঽনুবাস্যঃ স্যাত্” ইতি বচনং নিরূহজনিতবাতক্ষোভযুক্তপুরুষবিষযম্||২০-২১||-
Adhikarana 19 (22) · Śloka 23
শীতে বসন্তে চ দিবাঽনুবাস্যো রাত্রৌ শরদ্গ্রীষ্মঘনাগমেষু||২২||
তানেব দোষান্ পরিরক্ষতা যে স্নেহস্য পানে পরিকীর্তিতাঃ প্রাক্|২৩|
View original
शीते वसन्ते च दिवाऽनुवास्यो रात्रौ शरद्ग्रीष्मघनागमेषु||२२||
तानेव दोषान् परिरक्षता ये स्नेहस्य पाने परिकीर्तिताः प्राक्|२३|
নিশীত্যনেন যন্নিশাসমীপেঽনুবাসনং বিহিতং তদেব কালভেদেন ভিন্নকালং দর্শযন্নাহ- শীতে ইত্যাদি| শীতশব্দেন শিশিরহেমন্তযোরপি গ্রহণম্| দিবেতি নিশাসমীপে দিবাভাগে, রাত্রাবপি চ দিনসমীপাযাং রাত্রৌ| দোষান্ পরিরক্ষতা দোষান্ দৃষ্ট্বা, অন্তরং চ দোষবর্জনেন পরিরক্ষতা; যে স্নেহস্য পানে পরিকীর্তিতাঃ স্নেহাধ্যাযে- “শ্লেষ্মাধিকো দিবা শীতে” (সূ.অ.১৩) ইত্যাদিনা গ্রন্থেন, য এবাকালপীতস্নেহদোষা ভবন্তি ত এব যথোক্তকালবিপর্যযকৃতানুবাসনেঽপি দোষা ভবন্তীত্যুক্তং ভবতি| স্নেহাধ্যাযে যদ্বাতপিত্তাধিকত্বাদিবিশেষেণাপি রাত্রৌ দিবা চ স্নেহপানং বিহিতং তদিহাপি সমানন্যাযত্বাদেকদেশাভিধানেনাপরৈকদেশানুমানাচ্চ জ্ঞেযম্||২২||-
Adhikarana 20 (23-24) · Śloka 24
প্রত্যাগতে চাপ্যনুবাসনীযে দিবা প্রদেযং ব্যুষিতায ভোজ্যম্||২৩||
সাযং চ ভোজ্যং পরতো দ্ব্যহে বা ত্র্যহেঽনুবাস্যোঽহনি পঞ্চমে বা |
ত্র্যহে ত্র্যহে বাঽপ্যথ পঞ্চমে বা দদ্যান্নিরূহাদনুবাসনং চ||২৪||
View original
प्रत्यागते चाप्यनुवासनीये दिवा प्रदेयं व्युषिताय भोज्यम्||२३||
सायं च भोज्यं परतो द्व्यहे वा त्र्यहेऽनुवास्योऽहनि पञ्चमे वा |
त्र्यहे त्र्यहे वाऽप्यथ पञ्चमे वा दद्यान्निरूहादनुवासनं च||२४||
প্রত্যাগতে চেত্যাদৌ অনুবাসনীযে ইতি অনুবাসনস্নেহে| ব্যুষিতাযেতি নির্বিকারং রাত্রিব্যুষিতায দিবা ভোজ্যং দেযং, তথা সাযং চ ভোজ্যং দেযম্| অনুবাসনানন্তরং পুনরনুবাসনকালমাহ- ত্র্যহে বেত্যাদি| অত্রাপি ত্র্যহপঞ্চাহব্যবস্থা পূর্ববত্; অযঞ্চানুবাসনকালো নিরূহদিন এব দাতব্যানুবাসনে পরিজ্ঞেযঃ| অন্যে তু পঠন্তি যত্- ‘পরতো দ্ব্যহে বা ত্র্যহেঽনুবাস্যোঽহনি পঞ্চমে বা’ ইতি; ব্যাখ্যানযন্তি চ- পরতো দ্ব্যহে বা ত্র্যহেঽনুবাস্যোঽহনি পঞ্চমে বেতি; অত্র তু দ্ব্যহেঽনুবাসনমতিপ্রবলবাতস্য, অনতিবৃদ্ধবাতস্য ত্র্যহে, পঞ্চমে তু প্রবৃদ্ধকফপিত্তস্যেতি ব্যবস্থা| দ্বিতীযদিনানুবাসনং হারীতেঽপ্যুক্তং; বচনং হি- “দৃষ্ট্বাঽতিবৃদ্ধং পবনস্য রূপং দিনে দিনে বস্তিমুদাহরন্তি” ইতি; সুশ্রুতেঽপ্যুক্তং- “রূক্ষস্য বহুবাতস্য স্নেহবস্তিং দিনে দিনে| দদ্যাদ্বৈদ্যস্ততোঽন্যেষামগ্ন্যাবাধভযাত্র্যহাত্” (সু.চি.অ.৩৭) ইতি| ইহাপি ‘রূক্ষনিত্যস্তু” ইত্যাদিনা, ‘বাতার্তাশ্চ দিনে দিনে” (সি.অ.৪) ইত্যন্তেন দ্ব্যহে দানং বিধাস্যতি, তেন ‘দ্ব্যহে বা ত্র্যহে বা’ ইতি পাঠঃ সাধুঃ; ‘দ্ব্যহশব্দেন চাত্র দিনদ্বযসম্বন্ধমাত্রমুচ্যতে, ন দ্ব্যহপূরণং; তেন প্রথমদিবসদত্তানুবাসনাত্ প্রভৃতি পূর্ণে তৃতীযে দিবসেঽনুবাসনং প্রাপ্নোতি’ ইতি যদুচ্যতে, তন্নিরস্তম্; এবং ত্র্যহেঽপি তৃতীযাহসম্বন্ধ এব বিবক্ষিতো জ্ঞেয ইতি||২৩-২৪||
Adhikarana 21 (25) · Śloka 25
একং তথা ত্রীন্ কফজে বিকারে পিত্তাত্মকে পঞ্চ তু সপ্ত বাঽপি|
বাতে নবৈকাদশ বা পুনর্বা বস্তীনযুগ্মান্ কুশলো বিদধ্যাত্||২৫||
View original
एकं तथा त्रीन् कफजे विकारे पित्तात्मके पञ्च तु सप्त वाऽपि|
वाते नवैकादश वा पुनर्वा बस्तीनयुग्मान् कुशलो विदध्यात्||२५||
সম্প্রতি দোষভেদেনানুবাসননিযমমাহ- একং তথা ত্রীনিত্যাদি| এতচ্চ ‘সঙ্খ্যাঃ কতি’ ইতি প্রশ্নস্যোত্তরম্; অপরং সঙ্খ্যাপ্রশ্নস্যোতরং ‘ত্রিংশন্মতাঃ কর্মসু ’ ইত্যাদিনা ভবিষ্যতি| কফপিত্তযোশ্চ যদ্যপ্যনুবাসনং ন বিহিতং, তথাঽপি বাতানুগতকফপিত্তবিষযতযৈতদ্বোদ্ধব্যম্| পুনর্বেত্যনেন বাতে নব একাদশ বা কুর্যাত্| অযুগ্মানিত্যনেন দ্বিচতুঃষডাদিসঙ্খ্যযা যুগ্মদানং নিষেধযতি, অযুগ্মদানং প্রভাবাদেবাত্রোপকারীতি মহর্ষিবচনাদ্বোধ্যং, যথা- “যুগ্মেষ্বহঃসু পুত্রকামৌ সংবসেতাম্” (শা.অ.৮) ইতি; উপপত্তিশ্চাত্রাতিপ্রসঙ্গভীত্যা ন কথিতাঽঽচার্যেণ| যত্তু- “ত্রীন্ পঞ্চ বাঽঽহুশ্চতুরোঽথ ষড্ বা” ইত্যাদিনা যুগ্মবস্তিদানং বক্ষ্যতি, তন্নিরূহাঙ্গতযা স্নেহনার্থক্রিযমাণানুবাসনবিষযযুগ্মবস্তিদানং জ্ঞেযম্, ইহ তু প্রধানতযা ক্রিযমাণানুবাসনবিষযমযুগ্মদানমিতি ন বিরোধঃ| এতেন, যদুক্তমাষাঢবর্মণা- “নিরূহকার্যকারণমযুগ্মদানমস্মিন্নোক্তং নিষিদ্ধপূর্ব চ, যোগস্যান্তে ক্রমাদেকং তথা ত্রীনিত্যাদীন্ স্নেহান্ প্রাহ” (?) ইতি, তন্নিরস্তং জ্ঞেযম্| কিঞ্চ, অযুগ্মানিত্যনেন পুনর্বেত্যনেন চ যত্রানুবৃত্ত্যাঽনুবাসনং দেযং তত্রাযুগ্মকং নিরূহান্তরিতং চ কর্তব্যমিত্যর্থঃ, তেন যথোক্তসঙ্খ্যাকান্নিরূহান্ দত্ত্বা যথোক্তসঙ্খ্যযা স্নেহো দেযঃ| বিষমসঙ্খ্যোপাদানং তু মধ্যবিধযাঽপি দ্ব্যহচতুরহাদিগ্রাহকং ভবতি , তেনোত্তরত্র বক্ষ্যমাণসঙ্খ্যানুবাসনং ন বিরোধীতি ব্রূতে| জতূকর্ণেঽপ্যুক্তং- “নিরূহে ব্যুষিতে ভুক্তবতোঽনুবাসনং পরং দ্বিতীযেঽহনি পঞ্চমে বা তথৈকাদশাহেঽপকর্ষতো দ্বিত্রিচতুরাদি(?) বাতাদিষূচ্যতে” ইতি||২৫||
Adhikarana 22 (26) · Śloka 26
নরো বিরিক্তস্তু নিরূহদানং বিবর্জযেত্ সপ্তদিনান্যবশ্যম্|
শুদ্ধো নিরূহেণ বিরেচনং চ তদ্ধ্যস্য শূন্যং বিকসেচ্ছরীরম্||২৬||
View original
नरो विरिक्तस्तु निरूहदानं विवर्जयेत् सप्तदिनान्यवश्यम्|
शुद्धो निरूहेण विरेचनं च तद्ध्यस्य शून्यं विकसेच्छरीरम्||२६||
সম্প্রতি নিরূহবিরেচনযোরন্তরেঽবশ্যপরিহর্তব্যকালমাহ- নরো বিরিক্তস্ত্বিত্যাদি| অবশ্যমিতি বচনাদেকাহসাধ্যেঽপি ব্যাধাববশ্যং সপ্তদিনচ্ছেদঃ কর্তব্য ইতি দর্শযতি| যদ্যপিবিরেচনানন্তরং নিষিদ্ধ এব নিরূহঃ পঞ্চকর্মীযাযাং সিদ্ধৌ, তথা নিরূঢস্য বিরেচনং নিষিদ্ধং, তথাঽপি তত্কালমেব স নিষেধঃ; তেন ত্রিচতুরাদিদিনেঽপি প্রসক্তিনিরাসার্থমিদং বচনম্| যত্তু বিরেচনানন্তরং নবমেঽহ্ন্যনুবাসনকালাদুত্তরকালমেব নিরূহবিধানং, তেনার্বাগ্বস্তেঃ প্রসক্তিরপি ন স্যাদিত্যুচ্যতে; তন্ন, যতোঽনুবাসনশুদ্ধ্যপেক্ষসংসর্জনক্রমস্যেযং বিধা, যদাঽবরশুদ্ধ্যা ত্র্যহেণৈব পেযাদিক্রমঃ সমাপ্যতে, তদা চতুর্থদিনেঽনুবাসনদানাত্ পঞ্চমে ষষ্ঠে বা দিনে নিরূহঃ প্রসজ্জ্যেত, অতস্তন্নিরাসার্থমেতদ্বচনম্| নিরূহানন্তরং তু সংসর্জনক্রমো নাস্ত্যেব, তেন ত্র্যহং স্নেহং দত্ত্বা বিরেচনপ্রসক্তিরস্ত্যেব| সপ্তাহাদর্বাক্ সপ্তাহং যাবচ্চ নিরূহবিরেচনবর্জনে হেতুমাহ- তদ্ধ্যস্যেত্যাদি| বিকসেদিতি হিংস্যাত্| শূন্যমিতি পূর্বশোধনশূন্যশরীরং পুনঃ শোধনাদ্ধিংস্যাদিতি ভাবঃ| যত্তু “আসপ্তাহাদ্বিরেকো বা ততশ্চাপি নিরূহণম্” ইতি তন্ত্রান্তরে প্রোক্তং, তচ্চ সংসর্গবিধযা ক্রিযমাণসংশোধনক্রমে জ্ঞেযম্| তত্রাপি চ সপ্তাহপূরণং সংসর্জনস্নেহাদীনামনুমতবিকল্পপরিহারাদ্ ব্যাখ্যেযম্||২৬||
Adhikarana 23 (27-28) · Śloka 28
বস্তির্বযঃস্থাপযিতা সুখাযুর্বলাগ্নিমেধাস্বরবর্ণকৃচ্চ|
সর্বার্থকারী শিশুবৃদ্ধযূনাং নিরত্যযঃ সর্বগদাপহশ্চ||২৭||
বিট্শ্লেষ্মপিত্তানিলমূত্রকর্ষী দার্ঢ্যাবহঃ শুক্রবলপ্রদশ্চ|
বিশ্বক্স্থিতং দোষচযং নিরস্য সর্বান্ বিকারান্ শমযেন্নিরূহঃ||২৮||
View original
बस्तिर्वयःस्थापयिता सुखायुर्बलाग्निमेधास्वरवर्णकृच्च|
सर्वार्थकारी शिशुवृद्धयूनां निरत्ययः सर्वगदापहश्च||२७||
विट्श्लेष्मपित्तानिलमूत्रकर्षी दार्ढ्यावहः शुक्रबलप्रदश्च|
विश्वक्स्थितं दोषचयं निरस्य सर्वान् विकारान् शमयेन्निरूहः||२८||
‘কিঙ্গুণো বস্তিঃ’ ইতিপ্রশ্নস্যোত্তরং বস্তির্বযঃস্থাপযিতেত্যাদি| অযং চাস্থাপনগুণঃ, অনুবাসনস্য তু দেহে নিরূহেণ’ ইত্যাদিনা গ্রন্থেন গুণান্ বক্ষ্যতি| বযঃ স্থাপযতীতি বযঃস্থাপযিতা; বযঃস্থাপনত্বং চাস্য স্রোতঃশুদ্ধিকরত্বাত্| সর্বার্থকারীতি স্থিরত্বাপকর্ষাদিবিরুদ্ধার্থস্যাপি ভেষজবিশেষযোগাত্| শিশুবৃদ্ধযূনাং নিরত্যয ইত্যনেন বমনবিরেচনাভ্যামুত্কর্ষ উচ্যতে, তে হি শিশুবৃদ্ধযোর্নিষিদ্ধে| সর্বগদাপহত্বং সংশমনেন জ্ঞেযং, সর্বান্ বিকারান্ শমযেদিত্যনেন দোষসংশোধনদ্বারা সর্বগদাপহত্বমুচ্যত ইতি ন পৌনরুক্ত্যং; কিংবা সর্বান্ বিকারানিতি সর্বাবস্থান্ বিকারানিতি বিশেষঃ||২৭-২৮||
Adhikarana 24 (29-31) · Śloka 31
দেহে নিরূহেণ বিশুদ্ধমার্গে সংস্নেহনং বর্ণবলপ্রদং চ|
ন তৈলদানাত্ পরমস্তি কিঞ্চিদ্দ্রব্যং বিশেষেণ সমীরণার্তে ||২৯||
স্নেহেন রৌক্ষ্যং লঘুতাং গুরুত্বাদৌষ্ণ্যাচ্চ শৈত্যং পবনস্য হত্বা|
তৈলং দদাত্যাশু মনঃপ্রসাদং বীর্যং বলং বর্ণমথাগ্নিপুষ্টিম্ ||৩০||
মূলে নিষিক্তো হি যথা দ্রুমঃ স্যান্নীলচ্ছদঃ কোমলপল্লবাগ্র্যঃ|
কালে মহান্ পুষ্পফলপ্রদশ্চ তথা নরঃ স্যাদনুবাসনেন||৩১||
View original
देहे निरूहेण विशुद्धमार्गे संस्नेहनं वर्णबलप्रदं च|
न तैलदानात् परमस्ति किञ्चिद्द्रव्यं विशेषेण समीरणार्ते ||२९||
स्नेहेन रौक्ष्यं लघुतां गुरुत्वादौष्ण्याच्च शैत्यं पवनस्य हत्वा|
तैलं ददात्याशु मनःप्रसादं वीर्यं बलं वर्णमथाग्निपुष्टिम् ||३०||
मूले निषिक्तो हि यथा द्रुमः स्यान्नीलच्छदः कोमलपल्लवाग्र्यः|
काले महान् पुष्पफलप्रदश्च तथा नरः स्यादनुवासनेन||३१||
দেহে ইত্যাদিনাঽনুবাসনগুণমাহ| নিরূহেণ বিশুদ্ধমার্গে ইতি বচনান্নিরূহশোধিত এব মার্গে সংসর্জদনুবাসনং যথোক্তগুণকর্তৃ ভবতীতি দর্শযতি| ন তৈলদানাদিত্যত্র তৈলশব্দেন স্নেহোপলক্ষণেন কেচিদ্ঘৃতমপি গ্রাহযন্তি, কিন্তু তৈলমেবাত্র বাতহরপ্রধানতযা ব্রূতে ইতি যুক্তং পশ্যামঃ; তথা হ্যত্র ঔষ্ণ্যাচ্ছৈত্যমিত্যুক্তম্, ঔষ্ণ্যং চ ন সর্পিষীতি; স্নেহা মজ্জবর্জিতা অনুবাসনাধিকৃতা অপ্যপ্রধানত্বান্নাত্র ঘৃতমনুমন্যতে| পরমস্তীত্যাদৌ দ্রব্যমিতি কারণং, তচ্চ কারণমনিলপ্রশমনেন জ্ঞেযম্, ‘নান্বাসনাত্ কিঞ্চিদিহাস্তি কর্ম’ ইতি কেচিত্ পঠন্তি| তৈলকৃত্যমেব সকারণং ব্যাকরোতি- স্নেহেনেত্যাদি| তৈলং চানুবাসনে পক্বমেব জ্ঞেযম্; অপক্বস্য তু ‘ন চামং প্রণযেত্ স্নেহং স হ্যভিষ্যন্দযেদ্গুদম্’ (সি.অ.৪) ইত্যনেন নিষিদ্ধত্বাত্| অত্র তৈলানিলযোর্বিপরীতগুণযোর্মেলকে দ্রব্যপ্রভাবাত্তৈলমেব বাতং হন্তি, ন বাতস্তৈলম্; অণুত্বং গুণো যদ্যপি তৈলে বাতে চাস্তি, তথাঽপীহ প্রভাবাদ্বাতসূক্ষ্মাবযবসম্বদ্ধং তৈলং স্নেহাদিনা বাতং জযতি, তেন সমানমপ্যণুত্বমিহ বিরুদ্ধার্থকার্যেবেতি| তৈলস্য যথোক্তকার্যকর্তৃত্বে দৃষ্টান্তমাহ- মূলে ইত্যাদি| মূলদৃষ্টান্তেন চানুবাসনেন সাক্ষাত্তর্পণীযস্য গুদস্য দেহমূলত্বং দর্শযতি, উক্তং হি পরাশরে- “মূলং গুদং শরীরস্য সিরাস্তত্র প্রতিষ্ঠিতাঃ| সর্বং শরীরং পুষ্ণন্তি মূর্ধানং যাবদাশ্রিতাঃ” ইতি; তথাঽনুবাসনাদপি নরো বলবীর্যাদ্যুপেতোঽপত্যবাংশ্চ স্যাদিত্যর্থঃ||২৯-৩১||
Adhikarana 25 (32-34) · Śloka 34
স্তব্ধাশ্চ যে সঙ্কুচিতাশ্চ যেঽপি যে পঙ্গবো যেঽপি চ ভগ্নরুগ্ণাঃ|
যেষাং চ শাখাসু চরন্তি বাতাঃ শস্তো বিশেষেণ হি তেষু বস্তিঃ||৩২||
আধ্মাপনে বিগ্রথিতে পুরীষে শূলে চ ভক্তানভিনন্দনে চ|
এবম্প্রকারাশ্চ ভবন্তি কুক্ষৌ যে চামযাস্তেষু চ বস্তিরিষ্টঃ||৩৩||
যাশ্চ স্ত্রিযো বাতকৃতোপসর্গা গর্ভং ন গৃহ্ণন্তি নৃভিঃ সমেতাঃ|
ক্ষীণেন্দ্রিযা যে চ নরাঃ কৃশাশ্চ বস্তিঃ প্রশস্তঃ পরমং চ তেষু||৩৪||
View original
स्तब्धाश्च ये सङ्कुचिताश्च येऽपि ये पङ्गवो येऽपि च भग्नरुग्णाः|
येषां च शाखासु चरन्ति वाताः शस्तो विशेषेण हि तेषु बस्तिः||३२||
आध्मापने विग्रथिते पुरीषे शूले च भक्तानभिनन्दने च|
एवम्प्रकाराश्च भवन्ति कुक्षौ ये चामयास्तेषु च बस्तिरिष्टः||३३||
याश्च स्त्रियो वातकृतोपसर्गा गर्भं न गृह्णन्ति नृभिः समेताः|
क्षीणेन्द्रिया ये च नराः कृशाश्च बस्तिः प्रशस्तः परमं च तेषु||३४||
সামান্যেন নিরূহানুবাসনযোর্গুণমাহ- স্তব্ধাশ্চ যে ইত্যাদি| ভগ্না ইতি ভগ্নকাযাঃ ; রুগ্ণা ইতি সন্ধিমুক্তাঃ| ভক্তানভিনন্দনে অরোচকে| বাতকৃতোপসর্গা ইতি বাতকৃতোপদ্রবাঃ| ক্ষীণেন্দ্রিযা ইতি অতিক্ষীণশুক্রাঃ| অত্র শুদ্ধবাতাদিষ্বনুবাসনং, ভক্তানভিনন্দনপ্রকারেষু চ নিরূহ ইত্যাদ্যর্থোঽনুসরণীযঃ||৩২-৩৪||
Adhikarana 26 (35) · Śloka 35
উষ্ণাভিভূতেষু বদন্তি শীতাঞ্ছীতাভিভূতেষু তথা সুখোষ্ণান্|
তত্প্রত্যনীকৌষধসম্প্রযুক্তান্ সর্বত্র বস্তীন্ প্রবিভজ্য যুঞ্জ্যাত্ ||৩৫||
View original
उष्णाभिभूतेषु वदन्ति शीताञ्छीताभिभूतेषु तथा सुखोष्णान्|
तत्प्रत्यनीकौषधसम्प्रयुक्तान् सर्वत्र बस्तीन् प्रविभज्य युञ्ज्यात् ||३५||
সম্প্রতি কেষু চ কশ্চ বস্তিরিতি প্রশ্নস্যোতরম্- উষ্ণাভিভূতেষ্বিত্যাদি| উষ্ণাভিভূতে তথা শীতাভিভূতে ইতি বক্তব্যে, যেন ‘সর্বত্র’ ইতি করোতি, তেন স্নিগ্ধরূক্ষগুরুলধ্বভিভূতেঽপি তদ্বিপরীতৌষধসম্পাদিতো বস্তির্দেয ইতি দর্শযতি||৩৫||
Adhikarana 27 (36) · Śloka 36
ন বৃংহণীযান্ বিদধীত বস্তীন্ বিশোধনীযেষু গদেষু বৈদ্যঃ|
কুষ্ঠপ্রমেহাদিষু মেদুরেষু নরেষু যে চাপি বিশোধনীযাঃ||৩৬||
View original
न बृंहणीयान् विदधीत बस्तीन् विशोधनीयेषु गदेषु वैद्यः|
कुष्ठप्रमेहादिषु मेदुरेषु नरेषु ये चापि विशोधनीयाः||३६||
নিত্যবিশোধনীযগদানাহ- কুষ্ঠপ্রমেহাদিষ্বিত্যাদি| অত্র, আদিশব্দেনারোচকতন্দ্রাশ্লীপদাদীনাং গ্রহণম্| মেদুরেষ্বিতি মেদস্বিষু||৩৬||
Adhikarana 28 (37) · Śloka 37
ক্ষীণক্ষতানাং ন বিশোধনীযান্ন শোষিণাং নো ভৃশদুর্বলানাম্|
ন মূর্চ্ছিতানাং ন বিশোধিতানাং যেষাং চ দোষেষু নিবদ্ধমাযুঃ||৩৭||
View original
क्षीणक्षतानां न विशोधनीयान्न शोषिणां नो भृशदुर्बलानाम्|
न मूर्च्छितानां न विशोधितानां येषां च दोषेषु निबद्धमायुः||३७||
ক্ষীণক্ষতানাং নেতি ক্ষীণা রাজযক্ষ্মিপ্রভৃতযো জ্ঞেযাঃ| বিশোধনীযানিতি অপকর্ষণকারকান্| যেষাং চ দোষেষু নিবদ্ধমাযুরিতি যে সংশোধনহরণমাত্রেণৈব প্রাণাঞ্জহতি||৩৭||
Adhikarana 29 (38-39) · Śloka 40
শাখাগতাঃ কোষ্ঠগতাশ্চ রোগা মর্মোর্ধ্বসর্বাবযবাঙ্গজাশ্চ|
যে সন্তি তেষাং ন হি কশ্চিদন্যো বাযোঃ পরং জন্মনি হেতুরস্তি||৩৮||
বিণ্মূত্রপিত্তাদিমলাশযানাং বিক্ষেপসঙ্ঘাতকরঃ স যস্মাত্|
তস্যাতিবৃদ্ধস্য শমায নান্যদ্বস্তিং বিনা ভেষজমস্তি কিঞ্চিত্||৩৯||
তস্মাচ্চিকিত্সার্ধমিতি ব্রুবন্তি সর্বাং চিকিত্সামপি বস্তিমেকে|৪০|
View original
शाखागताः कोष्ठगताश्च रोगा मर्मोर्ध्वसर्वावयवाङ्गजाश्च|
ये सन्ति तेषां न हि कश्चिदन्यो वायोः परं जन्मनि हेतुरस्ति||३८||
विण्मूत्रपित्तादिमलाशयानां विक्षेपसङ्घातकरः स यस्मात्|
तस्यातिवृद्धस्य शमाय नान्यद्बस्तिं विना भेषजमस्ति किञ्चित्||३९||
तस्माच्चिकित्सार्धमिति ब्रुवन्ति सर्वां चिकित्सामपि बस्तिमेके|४०|
বস্তের্বহুবিষযাং স্তুতিমাচক্ষাণঃ ‘কিঙ্গুণো বস্তিঃ’ ইতি প্রশ্নস্যৈবোত্তরং পুনরাহ- শাখাগতা ইত্যাদি| শাখাকোষ্ঠমর্মগতা ইত্যনেন ত্রিবিধশাখাদিরোগমর্গো গৃহীতঃ; মর্মজশব্দেন হি মধ্যমরোগমার্গাশ্রযিণাং সন্ধিজানামপি সাহচর্যাদ্গ্রহণম্; ইহ মর্মাস্থিস্ন্ধযো হি মধ্যমো রোগমার্গ উক্তঃ| ঊর্ধ্বসর্বশব্দেন চ ঊর্ধ্বাধস্তির্যগ্ভেদাদপ্যুক্তরোগমার্গত্রযগ্রহণম্| সর্বাবযবাঙ্গজশব্দেন চ প্রাদেশিকসর্বাঙ্গভেদাদপ্যুক্তগ্রহণম্; বাযোঃ পরমিতি বাযোঃ পরো ন কশ্চিত্ শ্রেষ্ঠ ইতি যাবত্| এতেন যদ্যপি কফপিত্তে অপি রোগকারণে ভবতঃ, তথাঽপি বাযুরেব শ্রেষ্ঠ ইত্যুচ্যতে| বাযোঃ শ্রেষ্ঠত্ব এব হেতুমাহ- বিণ্মূত্রেত্যাদি| পিত্তাদীত্যত্রাদিশব্দেন কফস্য গ্রহণং, (ন চ মলশব্দেন কফস্য গ্রহণং ,) মলশব্দেন চেতরধাতুমলানাং খমলাদীনাং চ গ্রহণম্| আশযশব্দেন মলব্যতিরিক্তপ্রসাদাখ্যানামাশযানাং ধাতূনাং চ গ্রহণম্| বিক্ষেপসঙ্ঘাতকর ইতি বিযোগমেলককরঃ; এতেন, যস্মাদ্বাযুরেব দোষমলধাতূনাং সংযোগবিভাগৌ করোতি, তেন দোষদূষ্যবিণ্মলমেলকরূপনিখিলব্যাধিকরণে বাযুরেব প্রধানং ভবতীতি ভাবঃ| কিংবা আশযশব্দঃ প্রত্যেকং বিডাদিভিঃ সম্বধ্যতে, স্থানেন চ স্থানিনো লভ্যন্তে, বিডাদিসংযোগবিভাগেনৈব চ সর্বব্যাধিকরণপরিগ্রহো ভবতি| ভবত্বেবং বাতস্য প্রাধান্যমতঃ কিমিত্যাহ- তস্যেত্যাদি| ভেষজমিতি প্রধানং ভেষজং, যদুক্তং- ‘বস্তির্বাতহরাণাম্’ (সূ.অ.২৫) ইতি| অতো বস্তাবর্ধচিকিত্সারূপতা তথা সর্বচিকিত্সারূপতা চ যুক্তৈব||৩৮-৩৯||-
Adhikarana 30 (40) · Śloka 41
নাভিপ্রদেশং কটিপার্শ্বকুক্ষিং গত্বা শকৃদ্দোষচযং বিলোড্য ||৪০||
সংস্নেহ্য কাযং সপুরীষদোষঃ সম্যক্ সুখেনৈতি চ যঃ স বস্তিঃ |৪১|
View original
नाभिप्रदेशं कटिपार्श्वकुक्षिं गत्वा शकृद्दोषचयं विलोड्य ||४०||
संस्नेह्य कायं सपुरीषदोषः सम्यक् सुखेनैति च यः स बस्तिः |४१|
তত্র বস্তেঃ কৃতাকৃতলক্ষণানি ক্রমেণাহ- নাভীত্যাদি| বিলোড্যেতি সঙ্ক্ষোভ্য| সংস্নেহ্য কাযমিতি বীর্যরূপেণ সারেণ কাযং ব্যাপ্য, উক্তং হি- “বীর্যেণ বস্তিরাদত্তে দোষানাপাদমস্তকাত্” (সু.চি.অ.৩৫) ইতি| স্নেহশব্দেন চ সারোঽভিধীযতে; যথা- “দেহঃ স্নেহপরিক্ষযাত্” (চি.অ.৮) ইতি| সম্যগিতি নিরবশেষেণ| সুখেনেতি বিকারমকৃত্বা||৪০||-
Adhikarana 31 (41) · Śloka 42
প্রসৃষ্টবিণ্মূত্রসমীরণত্বং রুচ্যগ্নিবৃদ্ধ্যাশযলাঘবানি||৪১||
রোগোপশান্তিঃ প্রকৃতিস্থতা চ বলং চ তত্ স্যাত্ সুনিরূঢলিঙ্গম্|৪২|
View original
प्रसृष्टविण्मूत्रसमीरणत्वं रुच्यग्निवृद्ध्याशयलाघवानि||४१||
रोगोपशान्तिः प्रकृतिस्थता च बलं च तत् स्यात् सुनिरूढलिङ्गम्|४२|
তাদাত্বিকবস্তিসম্যগ্যোগলক্ষণমভিধাযোত্তরকালভবমাহ- প্রসৃষ্টেত্যাদি| ‘আশযলাঘবানি’ ইত্যত্র ‘আমযলাঘবানি’ ইতি পাঠে রোগোপশান্তিরিত্যনন্তরং বাশব্দো জ্ঞেযঃ, তেন রোগোপশান্তিরিহ নিরূহসাধ্যবিকারাণামুপশান্তিঃ||৪১||-
Adhikarana 32 (42) · Śloka 43
স্যাদ্রুক্ছিরোহৃদ্গুদবস্তিলিঙ্গে শোফঃ প্রতিশ্যাযবিকর্তিকে চ||৪২||
হৃল্লাসিকা মারুতমূত্রসঙ্গঃ শ্বাসো ন সম্যক্ চ নিরূহিতে স্যুঃ|৪৩|
View original
स्याद्रुक्छिरोहृद्गुदबस्तिलिङ्गे शोफः प्रतिश्यायविकर्तिके च||४२||
हृल्लासिका मारुतमूत्रसङ्गः श्वासो न सम्यक् च निरूहिते स्युः|४३|
স্যাদিত্যাদি বস্ত্যযোগলক্ষণম্| ন সম্যঙ্নিরূহিতে ইতি অযোগেন নিরূহিতে||৪২||-
Adhikarana 33 (43) · Śloka 43
লিঙ্গং যদেবাতিবিরেচিতস্য ভবেত্তদেবাতিনিরূহিতস্য||৪৩||
View original
लिङ्गं यदेवातिविरेचितस्य भवेत्तदेवातिनिरूहितस्य||४३||
বস্ত্যতিযোগলক্ষণমতিদেশেনাহ- লিঙ্গমিত্যাদি||৪৩||
Adhikarana 34 (44) · Śloka 44
প্রত্যেত্যসক্তং সশকৃচ্চ তৈলং রক্তাদিবুদ্ধীন্দ্রিযসম্প্রসাদঃ |
স্বপ্নানুবৃত্তির্লঘুতা বলং চ সৃষ্টাশ্চ বেগাঃ স্বনুবাসিতে স্যুঃ||৪৪||
View original
प्रत्येत्यसक्तं सशकृच्च तैलं रक्तादिबुद्धीन्द्रियसम्प्रसादः |
स्वप्नानुवृत्तिर्लघुता बलं च सृष्टाश्च वेगाः स्वनुवासिते स्युः||४४||
অনুবাসনসম্যগ্যোগলক্ষণমাহ- প্রত্যেতীত্যাদি| অসক্তমিতি সঙ্গং বিনা| রক্তাদযঃ ধাতবঃ| স্বপ্নানুবৃতিঃ নিদ্রানুবৃত্তিঃ| সৃষ্টা ইতি অবদ্ধাঃ||৪৪||
Adhikarana 35 (45) · Śloka 46
অধঃশরীরোদরবাহুপৃষ্ঠপার্শ্বেষু রুগ্রূক্ষখরং চ গাত্রম্ |
গ্রহশ্চ বিণ্মূত্রসমীরণানামসম্যগেতান্যনুবাসিতস্য ||৪৫||
হৃল্লাসমোহক্লমসাদমূর্চ্ছাবিকর্তিকা চাত্যনুবাসিতস্য|৪৬|
View original
अधःशरीरोदरबाहुपृष्ठपार्श्वेषु रुग्रूक्षखरं च गात्रम् |
ग्रहश्च विण्मूत्रसमीरणानामसम्यगेतान्यनुवासितस्य ||४५||
हृल्लासमोहक्लमसादमूर्च्छाविकर्तिका चात्यनुवासितस्य|४६|
অধ ইত্যাদ্যনুবাসনাযোগলক্ষণম্| রূক্ষখরতা চাত্র শরীরস্যাস্নেহনাদেব| হৃল্লাসাদি অতিযোগলক্ষণম্||৪৫||-
Adhikarana 36 (46) · Śloka 47
যস্যেহ যামাননুবর্ততে ত্রীন্ স্নেহো নরঃ স্যাত্ স বিশুদ্ধদেহঃ||৪৬||
আশ্বাগতেঽন্যস্তু পুনর্বিধেযঃ স্নেহো ন সংস্নেহযতি হ্যতিষ্ঠন্|৪৭|
View original
यस्येह यामाननुवर्तते त्रीन् स्नेहो नरः स्यात् स विशुद्धदेहः||४६||
आश्वागतेऽन्यस्तु पुनर्विधेयः स्नेहो न संस्नेहयति ह्यतिष्ठन्|४७|
উচিতস্নেহপ্রত্যাগমনকালমাহ- যস্যেত্যাদি| যামানিতি প্রহরান্| স বিশুদ্ধদেহ ইতি স অনুবাসনপ্রযোগসম্যগ্যোগাদনুবাসনব্যাপত্তিরহিত ইত্যর্থঃ| আশ্বাগতে ইতি শীঘ্রং প্রত্যাগতে, অন্যস্তু বিধেয ইতি তদৈবান্যঃ স্নেহো দেযঃ| পুনঃ স্নেহদানোপপত্তিমাহ- স্নেহো ন সংস্নেহযতি হ্যতিষ্ঠন্নিতি||৪৬||-
Adhikarana 37 (47-48) · Śloka 49
ত্রিংশন্মতাঃ কর্ম নু বস্তযো হি কালস্ততোঽর্ধেন ততশ্চ যোগঃ||৪৭||
সান্বাসনা দ্বাদশ বৈ নিরূহাঃ প্রাক্ স্নেহ একঃ পরতশ্চ পঞ্চ|
কালে ত্রযোঽন্তে পুরতস্তথৈকঃ স্নেহা নিরূহান্তরিতাশ্চ ষট্ স্যুঃ||৪৮||
যোগে নিরূহাস্ত্রয এব দেযাঃ স্নেহাশ্চ পঞ্চৈব পরাদিমধ্যাঃ|৪৯|
View original
त्रिंशन्मताः कर्म नु बस्तयो हि कालस्ततोऽर्धेन ततश्च योगः||४७||
सान्वासना द्वादश वै निरूहाः प्राक् स्नेह एकः परतश्च पञ्च|
काले त्रयोऽन्ते पुरतस्तथैकः स्नेहा निरूहान्तरिताश्च षट् स्युः||४८||
योगे निरूहास्त्रय एव देयाः स्नेहाश्च पञ्चैव परादिमध्याः|४९|
সম্প্রতি সঙ্খ্যাপ্রশ্নস্যোত্তরবিশেষমাহ- ত্রিংশদিত্যাদি| কর্মকালযোগসঞ্জ্ঞা যথাক্রমং ত্রিংশত্ষোডশাষ্টবস্তিসমুদযেষু জ্ঞেযা| কালস্ততোঽর্ধেনেত্যত্র অর্ধশব্দো ন সমপ্রতিবচনঃ ; তেন ত্রিংশদধ ষোডশ ভবন্তি| সান্বসনা ইত্যাদিনা কর্মাদীনাং নিরূহানুবাসনবিভাগমাহ| একমনুবাসনং দত্ত্বা দীযন্ত ইতি সান্বসনাঃ, এবমনুবাসনেন প্রত্যেকং যোগাদ্ দ্বাদশ নিরূহাশ্চতুর্বিংশতির্বস্তযো ভবন্তি| প্রাগিতি আরম্মে| পরত ইতি দ্বাদশনিরূহোত্তরকালে| নিরূহান্তরিতাশ্চ ষট্ স্যুরিতি নিরূহেণান্তরী কৃতাঃ, এবং চ দ্বাদশ বস্তযঃ পূরণীযাঃ| পঞ্চৈব পরাদিমধ্যা ইতি পঞ্চ স্নেহা অন্তে মধ্যে আদৌ চ যেষাং বিভক্তাস্তে তথা; অত্র চাদৌ স্নেহদ্বযম্, অন্তে চ স্নেহদ্বযং, নিরূহত্রযমধ্যে চৈকমনুবাসনম্, এবং পঞ্চ স্নেহা ভবন্তি| যে তু নিরূহদিন এবানুবাসনং বদন্তি তন্মতে আদাবেক এব, অন্তেঽপি দিনান্তরে একঃ, এবং পঞ্চ ভবন্তি; এবং কর্মকালযোরপি নিরূহদিন এব দিনান্তরে বাঽনুবাসনং ব্যাখ্যেযম্| অত্র চৈকস্নেহান্তরিতানাং নিরূহাণাং দানে বাতক্ষোভো নাশঙ্কনীযঃ, কর্মাদিষু নিরূহা যাপনাবস্তিরূপা দীযন্তে, তে স্নিগ্ধা এবেতি কৃত্বা ন বাতক্ষোভকা ভবন্তি| এতে চ কর্মাদযো যদ্যপি শাস্ত্রপ্রদেশেষু ন ব্যবহ্রিযন্তে, তথাঽপি তদ্বিদ্যব্যবহারার্থমেবেযং কর্মাদিসঞ্জ্ঞা, যথা যমকমহাচ্ছপানাদিসঞ্জ্ঞা; তেন কর্মাদিসঞ্জ্ঞাযাঃ শাস্ত্রে ব্যবহারাদর্শনাত্ কর্মাদিপ্রতিপাদকো গ্রন্থোঽনার্ষ ইতি যদুচ্যতে, তন্নিরস্তম্| কর্মাদিসঞ্জ্ঞা চ তন্ত্রান্তরেঽপ্যস্তি| তথাহি জতূকর্ণঃ- “বস্তযস্ত্রিংশত্ ষোডশাষ্টৌ চ কর্মকলযোগাঃ; নিরূহাঃ স্নেহান্তরিতা দ্বাদশ ষট্ ত্রযঃ; একস্নেহারম্ভাঃ পঞ্চত্র্যেকান্তাঃ” ইতি; হারীতেঽপি- “ত্রিংশকং কর্ম বুধা বদন্তি” ইত্যাদ্যুক্তম্| কর্মাদীনাং প্রযোগং কেচিদ্বাতাদিষু বদন্তি||৪৭-৪৮||-
Adhikarana 38 (49) · Śloka 50
ত্রীন্ পঞ্চ বাঽঽহুশ্চতুরোঽথ ষড্বা বাতাদিকানামনুবাসনীযান্ ||৪৯||
স্নেহান্ প্রদাযাশু ভিষগ্বিদধ্যাত্ স্রোতোবিশুদ্যর্থমতো নিরূহান্|৫০|
View original
त्रीन् पञ्च वाऽऽहुश्चतुरोऽथ षड्वा वातादिकानामनुवासनीयान् ||४९||
स्नेहान् प्रदायाशु भिषग्विदध्यात् स्रोतोविशुद्यर्थमतो निरूहान्|५०|
ত্রীন্ পঞ্চেত্যাদিনা স্নেহনার্থমনুবাসনমাহ| অত্র যে ‘বাতাদিকানাং’ ইতি পঠন্তি, তেষামাদিশব্দেন পিত্তকফযোরপি গ্রহণং; বহুবচনং তু তদ্গুণসংবিজ্ঞানবহুব্রীহিণা বাতস্য গ্রহণাদ্বহুত্বসঙ্খ্যাযোগাদুপপন্নম্| যথোক্তং কুষ্ঠনিদানে- ‘বাতাদিষু প্রদুষ্টেষু” (নি.অ.৫) ইতি, তথা কিযন্তঃশিরসীযেঽপি “বাতাদীনাং রসাদীনাং” (সূ.অ.১৭) ইতি বহুত্বং নির্দিষ্টম্| অন্যে তু- ‘বাতাধিকানাং’ ইতি পঠন্তি| অত্র চতুর্ণাং ষণ্ণাং চ স্নেহানাং যুগ্মরূপাণামপি দানমবিরুদ্ধমেব, এতদনুবাসনস্য নিরূহাঙ্গতযা স্নেহনার্থং ক্রিযমাণত্বাত্; অযুগ্মদানং তু ‘বস্তীনযুগ্মান্’ ইত্যনেন স্বপ্রধানতযাঽনুবাসনস্য বিহিতমিতি ভিন্নবিষযতযা ন বিরোধঃ; যতঃ স্নেহনপ্রযোজনমনুবাসনং স্নেহে ভূত এবাযুগ্মদানেন নিবর্তনীযং; কিংবা, অযুগ্মা তন্ত্রতো ব্যাখ্যানেন সঙ্খ্যৈবোচ্যতে, তথাহি- ত্রীন্, পঞ্চ, ত্রীন্ চতুর ইতি সপ্ত, পঞ্চ চতুর ইতি নব, পঞ্চ ষডিত্যেকাদশ, ইতি পঞ্চ বিকল্পা ইহ বিধীযন্তে| তন্ত্রান্তরে স্নেহস্য যুগ্মদানমুক্তং, যথা- “রূক্ষস্য বহুবাতস্য দ্বৌ ত্রীন্ বাঽপ্যনুবাসনান্| দদ্যাত্ স্নিগ্ধতনুং জ্ঞাত্বা ততঃ পশ্চান্নিরূহযেত্” (সু.চি.অ.৩৭) ইতি| স্রোতঃশব্দেন বিবদ্ধসিরাঽভিহিতা||৪৯||-
Adhikarana 39 (50-52) · Śloka 53
বিশুদ্ধদেহস্য ততঃ ক্রমেণ স্নিগ্ধং তলস্বেদিতমুত্তমাঙ্গম্||৫০||
বিরেচযেত্ত্রির্দ্বিরথৈকশো বা বলং সমীক্ষ্য ত্রিবিধং মলানাম্|
উরঃশিরোলাঘবমিন্দ্রিযাচ্ছ্যং স্রোতোবিশুদ্ধিশ্চ ভবেদ্বিশুদ্ধে||৫১||
গলোপলেপঃ শিরসো গুরুত্বং নিষ্ঠীবনং চাপ্যথ দুর্বিরিক্তে|
শিরোক্ষিশঙ্খশ্রবণার্তিতোদাবত্যর্থশুদ্ধে তিমিরং চ পশ্যেত্||৫২||
স্যাত্তর্পণং তত্র মৃদু দ্রবং চ স্নিগ্ধস্য তীক্ষ্ণং তু পুনর্ন যোগে|৫৩|
View original
विशुद्धदेहस्य ततः क्रमेण स्निग्धं तलस्वेदितमुत्तमाङ्गम्||५०||
विरेचयेत्त्रिर्द्विरथैकशो वा बलं समीक्ष्य त्रिविधं मलानाम्|
उरःशिरोलाघवमिन्द्रियाच्छ्यं स्रोतोविशुद्धिश्च भवेद्विशुद्धे||५१||
गलोपलेपः शिरसो गुरुत्वं निष्ठीवनं चाप्यथ दुर्विरिक्ते|
शिरोक्षिशङ्खश्रवणार्तितोदावत्यर्थशुद्धे तिमिरं च पश्येत्||५२||
स्यात्तर्पणं तत्र मृदु द्रवं च स्निग्धस्य तीक्ष्णं तु पुनर्न योगे|५३|
সম্প্রতি ক্রমাগতশিরোবিরেচনস্য কল্পনামসম্যগ্যোগাযেগাতিযোগলক্ষণং চাহ- বিশুদ্ধেত্যাদি| বিশুদ্ধদেহস্যেতি এতচ্চ পঞ্চকর্মসম্পাদনীযনৃবিষযত্বং শুদ্ধিপূর্বকত্বং শিরোবিরেচনস্যেহোচ্যতে; তেন বমনাদিনাঽশুদ্ধেঽপি শিরোবিরেচনৈকসম্পদ্যি পুরুষেঽযং ক্রমোজ্ঞেযঃ| স্নিগ্ধমিতি অভ্যঙ্গশিরোবস্তিপানাদিনা| তলস্বেদিতমিতি হস্ততলস্বেদিতম্| ত্রির্দ্বিরথৈকশ ইতি তদ্দিন এব দোষাণামুত্কৃষ্টত্বাদিবলত্রৈবিধ্যমপেক্ষ্য যথাযোগ্যতযা যোজ্যম্| ইন্দ্রিযাচ্ছ্যমিতি চক্ষুরাদীনাং স্ববিষযে পাটবম্| তিমিরং চ পশ্যেদিতি তমোব্যাপ্তং সর্বং পশ্যেদিত্যর্থঃ| তস্যাতিযোগাযোগযোশ্চিকিত্সিতমনু বক্তব্যতযাঽনুষঙ্গতামাহ- স্যাত্তর্পণমিত্যাদি| মৃদু দ্রবং চেত্যনেনাতিযোগচিকিত্সিতম্| তীক্ষ্ণং তু পুনর্ন যোগে ইতি অযোগে শিরোবিরেচনস্য পুনস্তীক্ষ্ণং শিরোবিরেচনং দেযম্||৫০-৫২||-
Adhikarana 40 (53) · Śloka 53
ইত্যাতুরস্বস্থসুখঃ প্রযোগো বলাযুষোর্বৃদ্ধিকৃদামযঘ্নঃ||৫৩||
View original
इत्यातुरस्वस्थसुखः प्रयोगो बलायुषोर्वृद्धिकृदामयघ्नः||५३||
উক্তং পঞ্চকর্মপ্রযোগমুপসংহরতি- ইত্যাতুরেত্যাদি| আতুরস্বস্থসুখ ইতি বচনেন আতুরে আমযস্যাপহন্তৃতযা, স্বস্থে চ বলাযুর্বৃদ্ধিকর্তৃতযা যথোক্তপঞ্চকর্মপ্রযোগঃ সুখহেতুর্ভবতীতি জ্ঞেযম্| স্বস্থে চ পঞ্চকর্মপ্রবৃত্তিঃ “মাধবপ্রথমে মাসি” (সূ.অ.৭) ইত্যাদিনা সূত্রস্থানে প্রোক্তৈব জ্ঞেযা||৫৩||
Adhikarana 41 (54) · Śloka 54
কালস্তু বস্ত্যাদিষু যাতি যাবাংস্তাবান্ ভবেদ্দ্বিঃ পরিহারকালঃ|৫৪|
View original
कालस्तु बस्त्यादिषु याति यावांस्तावान् भवेद्द्विः परिहारकालः|५४|
‘কৃতে কিযান্ বা পরিহারকালঃ’ ইত্যস্যোত্তরমাহ- কালস্ত্বিত্যাদি| তাবান্ ভবেদ্দ্বিঃ পরিহারকাল ইতি বস্ত্যাদিপ্রযোগে যাবান্ কালো ব্যাপ্যতে, ততঃ কালাদ্দ্বিগুণং কালং যাবত্ পরিহার্যত্বেনোক্তং পরিহর্তব্যম্| অত্র আদিশব্দেন বমনবিরেচনশিরোবিরেচনানাং গ্রহণং, বস্তেস্ত্বাদৌ ব্যুত্পাদনেন প্রাধান্যং দর্শযতি|৫৪|
Adhikarana 42 (54) · Śloka 55
অত্যাসনস্থানবচাংসি যানং স্বপ্নং দিবা মৈথুনবেগরোধান্||৫৪||
শীতোপচারাতপশোকরোষাংস্ত্যজেদকালাহিতভোজনং চ|৫৫|
View original
अत्यासनस्थानवचांसि यानं स्वप्नं दिवा मैथुनवेगरोधान्||५४||
शीतोपचारातपशोकरोषांस्त्यजेदकालाहितभोजनं च|५५|
‘কিং বর্জনীযং’ ইতি প্রশ্নস্যোত্তরম্- অত্যাসনেত্যাদি| আসনম্ উপবিষ্টাবস্থানম্| স্থানম্ ঊর্ধ্বতযা স্থানম্| যানং রথাশ্বাদিনা যানম্| এত আবিষ্কৃততমা ইহোক্তাঃ; তেন ক্রোধাতিচিন্তনাদযো যেঽপ্যুপকল্পনীযাদৌ বমনাদিপ্রযোগে নিষিদ্ধাস্তেঽপি ন সেব্যা এব||৫৪||-
Adhikarana 43 (55) · Śloka 56
বদ্ধে প্রণীতে বিষমং চ নেত্রে মার্গে তথাঽর্শঃকফবিড্বিবদ্ধে ||৫৫||
ন যাতি বস্তির্ন সুখং নিরেতি দোষাবৃতোঽল্পো যদি বাঽল্পবীর্যঃ|৫৬|
View original
बद्धे प्रणीते विषमं च नेत्रे मार्गे तथाऽर्शःकफविड्विबद्धे ||५५||
न याति बस्तिर्न सुखं निरेति दोषावृतोऽल्पो यदि वाऽल्पवीर्यः|५६|
‘প্রণীযমানঃ’ ইত্যাদি প্রশ্নস্যোত্তরং বদ্ধে ইত্যাদি| নেত্রে বদ্ধে বিষমং প্রণীতে চ গুদাবযবরুদ্ধত্বান্ন যাতি| তথা ‘ন সুখং নিরেতি’ ইত্যাদিনা ‘সুচিরাচ্চ কেন’ ইতি প্রশ্নস্যোত্তরম্| ন সুখং নিরেতীতি চিরেণ দুঃখং কৃত্বা চাগচ্ছতীত্যর্থঃ| দোষাবৃত ইতি দোষেণ বলীযসাঽবরুদ্ধঃ| অল্প ইতি অল্পমানঃ| অল্পবীর্য ইতি উষ্ণলবণাদ্যভাবান্মৃদুবীর্যঃ||৫৫||-
Adhikarana 44 (56) · Śloka 57
প্রাপ্তে তু বর্চোনিলমূত্রবেগে বাতেঽতিবৃদ্ধেঽল্পবলে গুদে বা||৫৬||
অত্যুষ্ণতীক্ষ্ণশ্চ মৃদৌ চ কোষ্ঠে প্রণীতমাত্রঃ পুনরেতি বস্তিঃ|৫৭|
View original
प्राप्ते तु वर्चोनिलमूत्रवेगे वातेऽतिवृद्धेऽल्पबले गुदे वा||५६||
अत्युष्णतीक्ष्णश्च मृदौ च कोष्ठे प्रणीतमात्रः पुनरेति बस्तिः|५७|
প্রাপ্তে চেত্যনেন শীঘ্রাগমনহেতুমাহ| বাতেঽতিবৃদ্ধে স্নেহো গুদে বাতেন প্রতিহতত্বান্ন যাত্যাশযং, ততঃ শীঘ্রমাগচ্ছতি; অল্পবলে গুদে স্নেহং ধারযিতুং ন শক্নোতি পুরুষঃ, অল্পবলত্বং গুদস্য সংবরণীবলীদার্বল্যাত্||৫৬||-
Adhikarana 45 (57-58) · Śloka 59
মেদঃকফাভ্যামনিলো নিরুদ্ধঃ শূলাঙ্গসুপ্তিশ্বযথূন্ করোতি||৫৭||
স্নেহং তু যুঞ্জন্নবুধস্তু তস্মৈ সংবর্ধযত্যেব হি তান্ বিকারান্|
রোগাস্তথাঽন্যেঽপ্যবিতর্ক্যমাণাঃ পরস্পরেণাবগৃহীতমার্গাঃ||৫৮||
সন্দূষিতা ধাতুভিরেব চান্যৈঃ স্বৈর্ভেষজৈর্নোপশমং ব্রজন্তি|৫৯|
View original
मेदःकफाभ्यामनिलो निरुद्धः शूलाङ्गसुप्तिश्वयथून् करोति||५७||
स्नेहं तु युञ्जन्नबुधस्तु तस्मै संवर्धयत्येव हि तान् विकारान्|
रोगास्तथाऽन्येऽप्यवितर्क्यमाणाः परस्परेणावगृहीतमार्गाः||५८||
सन्दूषिता धातुभिरेव चान्यैः स्वैर्भेषजैर्नोपशमं व्रजन्ति|५९|
‘সাধ্যাঃ’ ইত্যাদি প্রশ্নস্যোত্তরং- মেদঃকফাভ্যামিত্যাদি| মেদসা কফেন বেতি মেদঃ কফাভ্যাম্| অত্র শূলাদীন্নিরীক্ষ্য শুদ্ধবাতভ্রান্ত্যা স্নেহং প্রযুঙ্ক্তে, নাবরণং জানাতি, অত এব ‘অবুধঃ’ ইতি কৃতম্| অন্যত্রাপ্যুক্তং- “কুপিতে মার্গসংরোধান্মেদসা বা কফেন বা| অতিবৃদ্ধেঽনিলে নাদৌ শস্তং স্নেহেন বৃংহণম্” ইতি| অবিতর্ক্যমাণা ইতি অসম্যগ্জ্ঞাযমানাঃ| অসম্যগ্জ্ঞাযমানত্ব এব হেতুমাহ- পরস্পরেণেত্যাদি| রোগশব্দেনাত্র দোষোঽভিপ্রেতঃ| পরস্পরেণ প্রতিবদ্ধমার্গা অতো দুর্গ্রহা ভবন্তি, তথা ধাতুভিশ্চ রক্তাদিভিঃ সন্দূষিতাঃ সম্মূর্চ্ছিতাঃ সন্তো দুর্জ্ঞেযা ভবন্তি, অবিজ্ঞাতাশ্চ স্বৈর্ভেষজৈর্ন প্রশমং ব্রজন্তি; স্বৈর্ভেষজৈরিতি মার্গাবরোধাদিকারণদোষধাত্বন্তরনিরপেক্ষকৈরেকদোষভেষজৈঃ; তদ্ধি তথাভূতানাং ভেষজং যৌগিকং ন ভবত্যেব, অতোঽনুপশমো যুক্ত এবঃ এবং চ দোষাণাং পরস্পরাবরোধান্ তথা ধাতুসম্মূর্চ্ছনবিশেষাংশ্চাবগম্যৈব ব্যাধৌ প্রপঞ্চোঽনুসরণীযঃ||৫৭-৫৮||-
Adhikarana 46 (59) · Śloka 60
সর্বং চ রোগপ্রশমায কর্ম হীনাতিমাত্রং বিপরীতকালম্||৫৯||
মিথ্যোপচারাচ্চ ন তং বিকারং শান্তিং নযেত্ পথ্যমপি প্রযুক্তম্|৬০|
View original
सर्वं च रोगप्रशमाय कर्म हीनातिमात्रं विपरीतकालम्||५९||
मिथ्योपचाराच्च न तं विकारं शान्तिं नयेत् पथ्यमपि प्रयुक्तम्|६०|
অথ বিজ্ঞাতেঽপি ব্যাধৌ ভিষজাঽসম্যক্প্রযোগাদিভির্বর্ধমানেঽসিদ্ধিমাহ- সর্বং চেত্যাদি| বিপরীতকালমিতি অনুচিতকালকৃতম্| মিথ্যোপচারাচ্চেতি ভেষজানাং তথাঽকরণাত্, যথা- ভেষজস্য সম্যক্পরিণামে সতি ভোক্তব্যম্| যদ্যৌগিকং ভেষজং তত্ সম্যক্ প্রযুক্তং সিধ্যতীতি সিদ্ধান্তঃ||৫৯||-
Adhikarana 47 (60) · Śloka 61
তত্র শ্লোকঃ- প্রশ্নানিমান্ দ্বাদশ পঞ্চকর্মাণ্যুদ্দিশ্য সিদ্ধাবিহ কল্পনাযাম্||৬০||
প্রজাহিতার্থং ভগবান্ মহার্থান্ সম্যগ্জগাদর্ষিবরোঽত্রিপুত্রঃ||৬১||
View original
तत्र श्लोकः- प्रश्नानिमान् द्वादश पञ्चकर्माण्युद्दिश्य सिद्धाविह कल्पनायाम्||६०||
प्रजाहितार्थं भगवान् महार्थान् सम्यग्जगादर्षिवरोऽत्रिपुत्रः||६१||
প্রশ্নানিত্যাদিনাঽধ্যাযার্থং সঙ্গৃহ্ণাতি| সঙ্গ্রহশ্চ ব্যক্তঃ||৬০||-
Adhikarana puShpikA · Śloka 1
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে কল্পনাসিদ্ধির্নাম প্রথমোঽধ্যাযঃ||১||
View original
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते सिद्धिस्थाने कल्पनासिद्धिर्नाम प्रथमोऽध्यायः||१||
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং সিদ্ধিস্থানে কল্পনাসিদ্ধির্নাম প্রথমোঽধ্যাযঃ||১||