5. nētrabastivyāpatsiddhiḥ

Adhikarana 1 (1-3) · Śloka 3

অথাতো নেত্রবস্তিব্যাপত্সিদ্ধিং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২|| অথ নেত্রাণি বস্তীংশ্চ শৃণু বর্জ্যানি কর্মসু| নেত্রস্যাজ্ঞপ্রণীতস্য ব্যাপদঃ সচিকিত্সিতাঃ||৩||

স্নেহব্যাপত্সিদ্ধ্যভিধানপ্রসঙ্গাত্ স্নেহদানসাধননলিকাদিব্যাপত্প্রতীকারার্থা নেত্রবস্তিব্যাপত্সিদ্ধিরুচ্যতে| নেত্রগতা তথা বস্তিপুটকগতা চ ব্যাপত্ তথা নেত্রাসম্যক্প্রণিধানজন্যা চ যা ব্যাপদস্তাসাং সিদ্ধিঃ; তেন নেত্রবস্তিব্যাপত্সিদ্ধিঃ দুষ্টনেত্রবস্তিপুটকযোশ্চ ব্যাপত্সিদ্ধিঃ তযোঃ সদোষত্বেন জ্ঞাত্বা পরিবর্জনম্||১-৩||

Adhikarana 2 (4-5) · Śloka 5

হ্রস্বং দীর্ঘং তনু স্থূলং জীর্ণং শিথিলবন্ধনম্| পার্শ্বচ্ছিদ্রং তথা বক্রমষ্টৌ নেত্রাণি বর্জযেত্||৪|| অপ্রাপ্ত্যতিগতিক্ষোভকর্ষণক্ষণনস্রবাঃ| গুদপীডা গতির্জিহ্মা তেষাং দোষা যথাক্রমম্||৫||

তদেবাহ- হ্রস্বমিত্যাদি| নেত্রদোষকথনে অষ্টাবিতিপদমনুক্তকর্কশত্বাদিদোষাণামত্রৈবান্তর্ভাবোপদর্শনার্থম্| কর্কশত্বস্য জীর্ণেন কর্তৃত্বসাম্যাদগ্রহণম্ | এবমন্যত্রাপি সঙ্খ্যাবচনে প্রযোজনমিহ বর্ণনীযম্| তনু কৃশম্| অপ্রাপ্ত্যাদি যথাক্রমং হ্রস্বনেত্রাদিষু জ্ঞেযম্| অতিগতিঃ দূরপ্রবেশঃ| ক্ষোভঃ গুদপ্রবিষ্টস্যেতস্ততো গমনম্| গুদপীডেতি পার্শ্বচ্ছিদ্রনির্গতেন বস্তিদ্রবেণ যোগাদ্গুদপীডা| জিহ্মেতি কুটিলা||৪-৫||

Adhikarana 3 (6-7) · Śloka 7

বিষমমাংসলচ্ছিন্নস্থূলজালিকবাতলাঃ| স্নিগ্ধঃ ক্লিন্নশ্চ তানষ্টৌ বস্তীন্ কর্মসু বর্জযেত্||৬|| গতিবৈষম্যবিস্রত্বস্রাবদৌর্গ্রাহ্যনিস্রবাঃ| ফেনিলচ্যুত্যধার্যত্বং বস্তেঃ স্যুর্বস্তিদোষতঃ||৭||

বিষমঃ বিষমসংস্থানঃ, স্থুলঃ অতিপ্রমাণঃ, জালিকঃ সূক্ষ্মানেকচ্ছিদ্রঃ, বাতলঃ বাতদুষ্টঃ, স চাত্র বিহিতস্নেহাদেঃ ফেনিলত্বাদিনা নিশ্চীযতে| স্নিগ্ধঃ অতিস্নিগ্ধঃ| ক্লিন্নঃ শীর্ণাবযবঃ| গতিবৈষম্যাদযো যথাক্রমং বিষমাদিষ্বষ্টৌ দোষাঃ| বিস্রত্বম্ আমগন্ধতা, দৌর্গ্রাহ্যং দুর্গ্রহতা, চ্যুতিঃ হস্তাদ্ভ্রংশঃ, অধার্যত্বং বস্তেরিতি ক্লিন্নত্বাদ্ধি ধারণাযোগ্যত্বং বস্তিপুটকস্য||৬-৭||

Adhikarana 4 (8) · Śloka 8

সবাতাতিদ্রুতোত্ক্ষিপ্ততির্যগুল্লুপ্তকম্পিতাঃ| অতিবাহ্যগমন্দাতিবেগদোষাঃ প্রণেতৃতঃ||৮||

সবাতেত্যাদযঃ প্রণেতৃদোষজনিতাঃ প্রণেতৃদোষা উচ্যন্তে| তত্র সবাততা অনুচ্ছ্বাস্য বদ্ধে বস্তৌ তথা নিঃশেষং চ দত্তে ভবতি| অতিদ্রুতত্বমপি প্রণযনে নির্গমনেন| উত্ক্ষিপ্তত্বম্ ঊর্ধ্বক্ষিপ্তত্বম্| তির্যগিতি তির্যক্প্রণিধানম্| উল্লুপ্তত্বমিহ পীডনদোষো যঃ পীডনবিচ্ছেদং কৃত্বা পুনঃ পীড্যতে স জ্ঞেযঃ| কম্পিতত্বং নেত্রস্য| অতীতি অতিপ্রণযনং নেত্রস্য| বাহ্যগং গুদে ন প্রবিষ্টমৌষধম্| মন্দত্বং চ পক্বাশযাপ্রাপ্তত্বম্, এতদ্ধি মন্দপীডনাদ্ভবতি| অতিবেগঃ দূরপ্রবেশাদ্ভবতি, স চাতিপীডনকৃতঃ||৮||

Adhikarana 5 (9) · Śloka 10

অনুচ্ছ্বাস্য চ বদ্ধে বা দত্তে নিঃশেষ এব বা| প্রবিশ্য কুপিতো বাযুঃ শূলতোদকরো ভবেত্||৯|| তত্রাভ্যঙ্গো গুদে স্বেদো বাতঘ্নান্যশনানি চ|১০|

এতদ্ব্যাপদাং চিকিত্সিতানি প্রত্যেকমাহ- অনুচ্ছ্বাস্যেত্যাদি| এতে চানুচ্ছ্বাসনাদযো যদ্যপি পূর্বমেব নিষিদ্ধাঃ “সুবদ্ধমুচ্ছ্বাস্য চ নির্বলীকং” (সি.অ.৩) ইত্যাদিনৈব, তথাঽপি প্রমাদাত্তথাপ্রযোগে সতি জাতব্যাপদাং চিকিত্সাভিধানার্থমস্মিন্ প্রকরণে পুনরুক্তাঃ||৯||-

Adhikarana 6 (10-11) · Śloka 11

দ্রুতং প্রণীতে নিষ্কৃষ্টে সহসোত্ক্ষিপ্ত এব বা||১০|| স্যাত্ কটীগুদজঙ্ঘার্তিবস্তিস্তম্ভোরুবেদনাঃ | ভোজনং তত্র বাতঘ্নং স্নেহাঃ স্বেদাঃ সবস্তযঃ||১১||

দ্রুতমিত্যাদি| উত্ক্ষিপ্তমপি সমানব্যাপত্তিকরতযৈকগ্রন্থেনৈব পঠ্যতে| নিষ্কৃষ্টে সহসেতি চ্ছেদঃ, উত্ক্ষেপস্ত্বসহসাঽপি ব্যাপত্তিকর এব| বস্তের্মূত্রাশযস্য স্তম্ভো বস্তিস্তম্ভঃ| সবস্তয ইতি বাতহরবস্তিযুক্তাঃ||১০-১১||

Adhikarana 7 (12) · Śloka 12

তির্যগ্বল্যাবৃতদ্বারে বদ্ধে বাঽপি ন গচ্ছতি| নেত্রে তদৃজু নিষ্কৃষ্য সংশোধ্য চ প্রবেশযেত্||১২||

তির্যক্প্রণিধানদোষেঽভিধাতব্যে নলিকামুখরোধি দ্রব্যান্তরং তত্সমানব্যাপত্তিকরত্বাদুচ্যতে| তির্যগ্বল্যাবৃতদ্বারে বদ্ধে বাঽপীতি তির্যক্প্রণিহিতে নেত্রে বল্যাবৃতদ্বারে সতি তথা বস্তিদ্রব্যগতসূত্রদ্রব্যাদিনা বিবদ্ধে নেত্রে বস্তিদ্রব্যং ন যাতি; তন্নেত্রং তির্যক্প্রণিহিতং নিষ্কৃষ্য ঋজু প্রবেশযেত্, বদ্ধদ্বারং চ সংশোধ্য প্রবেশযেদিতি যোজ্যম্||১২||

Adhikarana 8 (13-14) · Śloka 15

পীড্যমানেঽন্তরা মুক্তে গুদে প্রতিহতোঽনিলঃ| উরঃশিরোর্তিমূর্বোশ্চ সদনং জনযেদ্বলী||১৩|| বস্তিঃ স্যাত্তত্র বিল্বাদিফলশ্যামাদিমূত্রবান্| স্যাদ্দাহো দবথুঃ শোফঃ কম্পনাভিহতে গুদে||১৪|| কষাযমধুরাঃ শীতাঃ সেকাস্তত্র সবস্তযঃ|১৫|

অন্তরা মুক্তে মধ্যে বিচ্ছেদে কৃতে| গুদে প্রতিহতোঽনিল ইতি পীডনবিচ্ছেদজনিতো বাযুর্গুদাত্ প্রত্যাহতঃ| বিল্বাদি দশমূলং; শ্যামাদি শ্যামাত্রিবৃদাদিবিরেচনদ্রব্যম্||১৩-১৪||-

Adhikarana 9 (15-16) · Śloka 16

অতিমাত্রপ্রণীতেন নেত্রেণ ক্ষণনাদ্বলেঃ||১৫|| স্যাত্ সার্তি দাহনিস্তোদগুদবর্চঃপ্রবর্তনম্| তত্র সর্পিঃ পিচুঃ ক্ষীরং পিচ্ছাবস্তিশ্চ শস্যতে||১৬||

অতিমাত্রপ্রণীতেনেতি পুনঃ পুনঃ প্রণীতেন; অন্যে তু দুষ্প্রবেশনমতিমাত্রপ্রণীতমাহুঃ ; অতিপ্রণযনং যদ্যপি গ্রথিতকর্ণিকাযা উপরি ন ভবতি, তথাঽপি কর্ণিকাপীডযা গুদপীডনাদতিপ্রবেশো জ্ঞেযঃ| পিচ্ছাবস্তিঃ বক্ষ্যমাণঃ||১৫-১৬||

Adhikarana 10 (17-18) · Śloka 18

ন ভাবযতি মন্দস্তু বাহ্যস্ত্বাশু নিবর্ততে| স্নেহস্তত্র পুনঃ সম্যক্ প্রণেযঃ সিদ্ধিমিচ্ছতা||১৭|| অতিপ্রপীডিতঃ কোষ্ঠে তিষ্ঠত্যাযাতি বা গলম্| তত্র বস্তির্বিরেকশ্চ গলপীডাদি কর্ম চ||১৮||

ন ভাবযতীতি পক্বাশযং ন প্রাপ্নোতি| অতিপীডনে কোষ্ঠে বা তিষ্ঠতীতি পক্ষঃ মন্দাদতিপীডনাদ্বাতাবরণাচ্চ জ্ঞেযঃ; গলগমনং তু তীব্রাতিপীডনাদনাবরণাচ্চ ভবতি| ইযং চ ব্যাপত্ পূর্বাধ্যাযে আহারং বিনা দত্তানুবাসনবিষযতযোক্তা, ইহ তু নিরূহস্যানুবাসনস্য চাতিপীডনজন্যতযা বোধ্যত ইতি বিশেষঃ| ইহ বস্তির্বিরেকো বা কোষ্ঠস্থেঽপ্রবর্তমানে, কণ্ঠপীডনাদি তু গলগতে জ্ঞেযম্||১৭-১৮||

Adhikarana 11 (19) · Śloka 19

তত্র শ্লোকঃ- নেত্রবস্তিপ্রণেতৄণাং দোষানেতান্ সভেষজান্| বেত্তি যস্তেন মতিমান্ বস্তিকর্মাণি কারযেত্||১৯||

সঙ্গ্রহে তেনেতি যথোক্তভেষজাভিজ্ঞভিষজা||১৯||

Adhikarana puShpikA · Śloka 5

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে নেত্রবস্তিব্যাপত্সিদ্ধির্নাম পঞ্চমোঽধ্যাযঃ||৫||

ইতি শ্রীচক্রপাণিদত্তপ্রণীতাযামাযুর্বেদদীপিকাযাং চরকতাত্পর্যটীকাযাং সিদ্ধিস্থানে নেত্রবস্তিব্যাপত্সিদ্ধির্নাম পঞ্চমোঽধ্যাযঃ||৫||