Adhikarana 1 (1-3) · Śloka 3
ಅಥಾತೋ ನೇತ್ರಬಸ್ತಿವ್ಯಾಪತ್ಸಿದ್ಧಿಂ ವ್ಯಾಖ್ಯಾಸ್ಯಾಮಃ||೧||
ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||
ಅಥ ನೇತ್ರಾಣಿ ಬಸ್ತೀಂಶ್ಚ ಶೃಣು ವರ್ಜ್ಯಾನಿ ಕರ್ಮಸು|
ನೇತ್ರಸ್ಯಾಜ್ಞಪ್ರಣೀತಸ್ಯ ವ್ಯಾಪದಃ ಸಚಿಕಿತ್ಸಿತಾಃ||೩||
View original
अथातो नेत्रबस्तिव्यापत्सिद्धिं व्याख्यास्यामः||१||
इति ह स्माह भगवानात्रेयः||२||
अथ नेत्राणि बस्तींश्च शृणु वर्ज्यानि कर्मसु|
नेत्रस्याज्ञप्रणीतस्य व्यापदः सचिकित्सिताः||३||
ಸ್ನೇಹವ್ಯಾಪತ್ಸಿದ್ಧ್ಯಭಿಧಾನಪ್ರಸಙ್ಗಾತ್ ಸ್ನೇಹದಾನಸಾಧನನಲಿಕಾದಿವ್ಯಾಪತ್ಪ್ರತೀಕಾರಾರ್ಥಾ ನೇತ್ರಬಸ್ತಿವ್ಯಾಪತ್ಸಿದ್ಧಿರುಚ್ಯತೇ| ನೇತ್ರಗತಾ ತಥಾ ಬಸ್ತಿಪುಟಕಗತಾ ಚ ವ್ಯಾಪತ್ ತಥಾ ನೇತ್ರಾಸಮ್ಯಕ್ಪ್ರಣಿಧಾನಜನ್ಯಾ ಚ ಯಾ ವ್ಯಾಪದಸ್ತಾಸಾಂ ಸಿದ್ಧಿಃ; ತೇನ ನೇತ್ರಬಸ್ತಿವ್ಯಾಪತ್ಸಿದ್ಧಿಃ ದುಷ್ಟನೇತ್ರಬಸ್ತಿಪುಟಕಯೋಶ್ಚ ವ್ಯಾಪತ್ಸಿದ್ಧಿಃ ತಯೋಃ ಸದೋಷತ್ವೇನ ಜ್ಞಾತ್ವಾ ಪರಿವರ್ಜನಮ್||೧-೩||
Adhikarana 2 (4-5) · Śloka 5
ಹ್ರಸ್ವಂ ದೀರ್ಘಂ ತನು ಸ್ಥೂಲಂ ಜೀರ್ಣಂ ಶಿಥಿಲಬನ್ಧನಮ್|
ಪಾರ್ಶ್ವಚ್ಛಿದ್ರಂ ತಥಾ ವಕ್ರಮಷ್ಟೌ ನೇತ್ರಾಣಿ ವರ್ಜಯೇತ್||೪||
ಅಪ್ರಾಪ್ತ್ಯತಿಗತಿಕ್ಷೋಭಕರ್ಷಣಕ್ಷಣನಸ್ರವಾಃ|
ಗುದಪೀಡಾ ಗತಿರ್ಜಿಹ್ಮಾ ತೇಷಾಂ ದೋಷಾ ಯಥಾಕ್ರಮಮ್||೫||
View original
ह्रस्वं दीर्घं तनु स्थूलं जीर्णं शिथिलबन्धनम्|
पार्श्वच्छिद्रं तथा वक्रमष्टौ नेत्राणि वर्जयेत्||४||
अप्राप्त्यतिगतिक्षोभकर्षणक्षणनस्रवाः|
गुदपीडा गतिर्जिह्मा तेषां दोषा यथाक्रमम्||५||
ತದೇವಾಹ- ಹ್ರಸ್ವಮಿತ್ಯಾದಿ| ನೇತ್ರದೋಷಕಥನೇ ಅಷ್ಟಾವಿತಿಪದಮನುಕ್ತಕರ್ಕಶತ್ವಾದಿದೋಷಾಣಾಮತ್ರೈವಾನ್ತರ್ಭಾವೋಪದರ್ಶನಾರ್ಥಮ್| ಕರ್ಕಶತ್ವಸ್ಯ ಜೀರ್ಣೇನ ಕರ್ತೃತ್ವಸಾಮ್ಯಾದಗ್ರಹಣಮ್ | ಏವಮನ್ಯತ್ರಾಪಿ ಸಙ್ಖ್ಯಾವಚನೇ ಪ್ರಯೋಜನಮಿಹ ವರ್ಣನೀಯಮ್| ತನು ಕೃಶಮ್| ಅಪ್ರಾಪ್ತ್ಯಾದಿ ಯಥಾಕ್ರಮಂ ಹ್ರಸ್ವನೇತ್ರಾದಿಷು ಜ್ಞೇಯಮ್| ಅತಿಗತಿಃ ದೂರಪ್ರವೇಶಃ| ಕ್ಷೋಭಃ ಗುದಪ್ರವಿಷ್ಟಸ್ಯೇತಸ್ತತೋ ಗಮನಮ್| ಗುದಪೀಡೇತಿ ಪಾರ್ಶ್ವಚ್ಛಿದ್ರನಿರ್ಗತೇನ ಬಸ್ತಿದ್ರವೇಣ ಯೋಗಾದ್ಗುದಪೀಡಾ| ಜಿಹ್ಮೇತಿ ಕುಟಿಲಾ||೪-೫||
Adhikarana 3 (6-7) · Śloka 7
ವಿಷಮಮಾಂಸಲಚ್ಛಿನ್ನಸ್ಥೂಲಜಾಲಿಕವಾತಲಾಃ|
ಸ್ನಿಗ್ಧಃ ಕ್ಲಿನ್ನಶ್ಚ ತಾನಷ್ಟೌ ಬಸ್ತೀನ್ ಕರ್ಮಸು ವರ್ಜಯೇತ್||೬||
ಗತಿವೈಷಮ್ಯವಿಸ್ರತ್ವಸ್ರಾವದೌರ್ಗ್ರಾಹ್ಯನಿಸ್ರವಾಃ|
ಫೇನಿಲಚ್ಯುತ್ಯಧಾರ್ಯತ್ವಂ ಬಸ್ತೇಃ ಸ್ಯುರ್ಬಸ್ತಿದೋಷತಃ||೭||
View original
विषममांसलच्छिन्नस्थूलजालिकवातलाः|
स्निग्धः क्लिन्नश्च तानष्टौ बस्तीन् कर्मसु वर्जयेत्||६||
गतिवैषम्यविस्रत्वस्रावदौर्ग्राह्यनिस्रवाः|
फेनिलच्युत्यधार्यत्वं बस्तेः स्युर्बस्तिदोषतः||७||
ವಿಷಮಃ ವಿಷಮಸಂಸ್ಥಾನಃ, ಸ್ಥುಲಃ ಅತಿಪ್ರಮಾಣಃ, ಜಾಲಿಕಃ ಸೂಕ್ಷ್ಮಾನೇಕಚ್ಛಿದ್ರಃ, ವಾತಲಃ ವಾತದುಷ್ಟಃ, ಸ ಚಾತ್ರ ವಿಹಿತಸ್ನೇಹಾದೇಃ ಫೇನಿಲತ್ವಾದಿನಾ ನಿಶ್ಚೀಯತೇ| ಸ್ನಿಗ್ಧಃ ಅತಿಸ್ನಿಗ್ಧಃ| ಕ್ಲಿನ್ನಃ ಶೀರ್ಣಾವಯವಃ| ಗತಿವೈಷಮ್ಯಾದಯೋ ಯಥಾಕ್ರಮಂ ವಿಷಮಾದಿಷ್ವಷ್ಟೌ ದೋಷಾಃ| ವಿಸ್ರತ್ವಮ್ ಆಮಗನ್ಧತಾ, ದೌರ್ಗ್ರಾಹ್ಯಂ ದುರ್ಗ್ರಹತಾ, ಚ್ಯುತಿಃ ಹಸ್ತಾದ್ಭ್ರಂಶಃ, ಅಧಾರ್ಯತ್ವಂ ಬಸ್ತೇರಿತಿ ಕ್ಲಿನ್ನತ್ವಾದ್ಧಿ ಧಾರಣಾಯೋಗ್ಯತ್ವಂ ಬಸ್ತಿಪುಟಕಸ್ಯ||೬-೭||
Adhikarana 4 (8) · Śloka 8
ಸವಾತಾತಿದ್ರುತೋತ್ಕ್ಷಿಪ್ತತಿರ್ಯಗುಲ್ಲುಪ್ತಕಮ್ಪಿತಾಃ|
ಅತಿಬಾಹ್ಯಗಮನ್ದಾತಿವೇಗದೋಷಾಃ ಪ್ರಣೇತೃತಃ||೮||
View original
सवातातिद्रुतोत्क्षिप्ततिर्यगुल्लुप्तकम्पिताः|
अतिबाह्यगमन्दातिवेगदोषाः प्रणेतृतः||८||
ಸವಾತೇತ್ಯಾದಯಃ ಪ್ರಣೇತೃದೋಷಜನಿತಾಃ ಪ್ರಣೇತೃದೋಷಾ ಉಚ್ಯನ್ತೇ| ತತ್ರ ಸವಾತತಾ ಅನುಚ್ಛ್ವಾಸ್ಯ ಬದ್ಧೇ ಬಸ್ತೌ ತಥಾ ನಿಃಶೇಷಂ ಚ ದತ್ತೇ ಭವತಿ| ಅತಿದ್ರುತತ್ವಮಪಿ ಪ್ರಣಯನೇ ನಿರ್ಗಮನೇನ| ಉತ್ಕ್ಷಿಪ್ತತ್ವಮ್ ಊರ್ಧ್ವಕ್ಷಿಪ್ತತ್ವಮ್| ತಿರ್ಯಗಿತಿ ತಿರ್ಯಕ್ಪ್ರಣಿಧಾನಮ್| ಉಲ್ಲುಪ್ತತ್ವಮಿಹ ಪೀಡನದೋಷೋ ಯಃ ಪೀಡನವಿಚ್ಛೇದಂ ಕೃತ್ವಾ ಪುನಃ ಪೀಡ್ಯತೇ ಸ ಜ್ಞೇಯಃ| ಕಮ್ಪಿತತ್ವಂ ನೇತ್ರಸ್ಯ| ಅತೀತಿ ಅತಿಪ್ರಣಯನಂ ನೇತ್ರಸ್ಯ| ಬಾಹ್ಯಗಂ ಗುದೇ ನ ಪ್ರವಿಷ್ಟಮೌಷಧಮ್| ಮನ್ದತ್ವಂ ಚ ಪಕ್ವಾಶಯಾಪ್ರಾಪ್ತತ್ವಮ್, ಏತದ್ಧಿ ಮನ್ದಪೀಡನಾದ್ಭವತಿ| ಅತಿವೇಗಃ ದೂರಪ್ರವೇಶಾದ್ಭವತಿ, ಸ ಚಾತಿಪೀಡನಕೃತಃ||೮||
Adhikarana 5 (9) · Śloka 10
ಅನುಚ್ಛ್ವಾಸ್ಯ ಚ ಬದ್ಧೇ ವಾ ದತ್ತೇ ನಿಃಶೇಷ ಏವ ವಾ|
ಪ್ರವಿಶ್ಯ ಕುಪಿತೋ ವಾಯುಃ ಶೂಲತೋದಕರೋ ಭವೇತ್||೯||
ತತ್ರಾಭ್ಯಙ್ಗೋ ಗುದೇ ಸ್ವೇದೋ ವಾತಘ್ನಾನ್ಯಶನಾನಿ ಚ|೧೦|
View original
अनुच्छ्वास्य च बद्धे वा दत्ते निःशेष एव वा|
प्रविश्य कुपितो वायुः शूलतोदकरो भवेत्||९||
तत्राभ्यङ्गो गुदे स्वेदो वातघ्नान्यशनानि च|१०|
ಏತದ್ವ್ಯಾಪದಾಂ ಚಿಕಿತ್ಸಿತಾನಿ ಪ್ರತ್ಯೇಕಮಾಹ- ಅನುಚ್ಛ್ವಾಸ್ಯೇತ್ಯಾದಿ| ಏತೇ ಚಾನುಚ್ಛ್ವಾಸನಾದಯೋ ಯದ್ಯಪಿ ಪೂರ್ವಮೇವ ನಿಷಿದ್ಧಾಃ “ಸುಬದ್ಧಮುಚ್ಛ್ವಾಸ್ಯ ಚ ನಿರ್ವಲೀಕಂ” (ಸಿ.ಅ.೩) ಇತ್ಯಾದಿನೈವ, ತಥಾಽಪಿ ಪ್ರಮಾದಾತ್ತಥಾಪ್ರಯೋಗೇ ಸತಿ ಜಾತವ್ಯಾಪದಾಂ ಚಿಕಿತ್ಸಾಭಿಧಾನಾರ್ಥಮಸ್ಮಿನ್ ಪ್ರಕರಣೇ ಪುನರುಕ್ತಾಃ||೯||-
Adhikarana 6 (10-11) · Śloka 11
ದ್ರುತಂ ಪ್ರಣೀತೇ ನಿಷ್ಕೃಷ್ಟೇ ಸಹಸೋತ್ಕ್ಷಿಪ್ತ ಏವ ವಾ||೧೦||
ಸ್ಯಾತ್ ಕಟೀಗುದಜಙ್ಘಾರ್ತಿಬಸ್ತಿಸ್ತಮ್ಭೋರುವೇದನಾಃ |
ಭೋಜನಂ ತತ್ರ ವಾತಘ್ನಂ ಸ್ನೇಹಾಃ ಸ್ವೇದಾಃ ಸಬಸ್ತಯಃ||೧೧||
View original
द्रुतं प्रणीते निष्कृष्टे सहसोत्क्षिप्त एव वा||१०||
स्यात् कटीगुदजङ्घार्तिबस्तिस्तम्भोरुवेदनाः |
भोजनं तत्र वातघ्नं स्नेहाः स्वेदाः सबस्तयः||११||
ದ್ರುತಮಿತ್ಯಾದಿ| ಉತ್ಕ್ಷಿಪ್ತಮಪಿ ಸಮಾನವ್ಯಾಪತ್ತಿಕರತಯೈಕಗ್ರನ್ಥೇನೈವ ಪಠ್ಯತೇ| ನಿಷ್ಕೃಷ್ಟೇ ಸಹಸೇತಿ ಚ್ಛೇದಃ, ಉತ್ಕ್ಷೇಪಸ್ತ್ವಸಹಸಾಽಪಿ ವ್ಯಾಪತ್ತಿಕರ ಏವ| ಬಸ್ತೇರ್ಮೂತ್ರಾಶಯಸ್ಯ ಸ್ತಮ್ಭೋ ಬಸ್ತಿಸ್ತಮ್ಭಃ| ಸಬಸ್ತಯ ಇತಿ ವಾತಹರಬಸ್ತಿಯುಕ್ತಾಃ||೧೦-೧೧||
Adhikarana 7 (12) · Śloka 12
ತಿರ್ಯಗ್ವಲ್ಯಾವೃತದ್ವಾರೇ ಬದ್ಧೇ ವಾಽಪಿ ನ ಗಚ್ಛತಿ|
ನೇತ್ರೇ ತದೃಜು ನಿಷ್ಕೃಷ್ಯ ಸಂಶೋಧ್ಯ ಚ ಪ್ರವೇಶಯೇತ್||೧೨||
View original
तिर्यग्वल्यावृतद्वारे बद्धे वाऽपि न गच्छति|
नेत्रे तदृजु निष्कृष्य संशोध्य च प्रवेशयेत्||१२||
ತಿರ್ಯಕ್ಪ್ರಣಿಧಾನದೋಷೇಽಭಿಧಾತವ್ಯೇ ನಲಿಕಾಮುಖರೋಧಿ ದ್ರವ್ಯಾನ್ತರಂ ತತ್ಸಮಾನವ್ಯಾಪತ್ತಿಕರತ್ವಾದುಚ್ಯತೇ| ತಿರ್ಯಗ್ವಲ್ಯಾವೃತದ್ವಾರೇ ಬದ್ಧೇ ವಾಽಪೀತಿ ತಿರ್ಯಕ್ಪ್ರಣಿಹಿತೇ ನೇತ್ರೇ ವಲ್ಯಾವೃತದ್ವಾರೇ ಸತಿ ತಥಾ ಬಸ್ತಿದ್ರವ್ಯಗತಸೂತ್ರದ್ರವ್ಯಾದಿನಾ ವಿಬದ್ಧೇ ನೇತ್ರೇ ಬಸ್ತಿದ್ರವ್ಯಂ ನ ಯಾತಿ; ತನ್ನೇತ್ರಂ ತಿರ್ಯಕ್ಪ್ರಣಿಹಿತಂ ನಿಷ್ಕೃಷ್ಯ ಋಜು ಪ್ರವೇಶಯೇತ್, ಬದ್ಧದ್ವಾರಂ ಚ ಸಂಶೋಧ್ಯ ಪ್ರವೇಶಯೇದಿತಿ ಯೋಜ್ಯಮ್||೧೨||
Adhikarana 8 (13-14) · Śloka 15
ಪೀಡ್ಯಮಾನೇಽನ್ತರಾ ಮುಕ್ತೇ ಗುದೇ ಪ್ರತಿಹತೋಽನಿಲಃ|
ಉರಃಶಿರೋರ್ತಿಮೂರ್ವೋಶ್ಚ ಸದನಂ ಜನಯೇದ್ಬಲೀ||೧೩||
ಬಸ್ತಿಃ ಸ್ಯಾತ್ತತ್ರ ಬಿಲ್ವಾದಿಫಲಶ್ಯಾಮಾದಿಮೂತ್ರವಾನ್|
ಸ್ಯಾದ್ದಾಹೋ ದವಥುಃ ಶೋಫಃ ಕಮ್ಪನಾಭಿಹತೇ ಗುದೇ||೧೪||
ಕಷಾಯಮಧುರಾಃ ಶೀತಾಃ ಸೇಕಾಸ್ತತ್ರ ಸಬಸ್ತಯಃ|೧೫|
View original
पीड्यमानेऽन्तरा मुक्ते गुदे प्रतिहतोऽनिलः|
उरःशिरोर्तिमूर्वोश्च सदनं जनयेद्बली||१३||
बस्तिः स्यात्तत्र बिल्वादिफलश्यामादिमूत्रवान्|
स्याद्दाहो दवथुः शोफः कम्पनाभिहते गुदे||१४||
कषायमधुराः शीताः सेकास्तत्र सबस्तयः|१५|
ಅನ್ತರಾ ಮುಕ್ತೇ ಮಧ್ಯೇ ವಿಚ್ಛೇದೇ ಕೃತೇ| ಗುದೇ ಪ್ರತಿಹತೋಽನಿಲ ಇತಿ ಪೀಡನವಿಚ್ಛೇದಜನಿತೋ ವಾಯುರ್ಗುದಾತ್ ಪ್ರತ್ಯಾಹತಃ| ಬಿಲ್ವಾದಿ ದಶಮೂಲಂ; ಶ್ಯಾಮಾದಿ ಶ್ಯಾಮಾತ್ರಿವೃದಾದಿವಿರೇಚನದ್ರವ್ಯಮ್||೧೩-೧೪||-
Adhikarana 9 (15-16) · Śloka 16
ಅತಿಮಾತ್ರಪ್ರಣೀತೇನ ನೇತ್ರೇಣ ಕ್ಷಣನಾದ್ವಲೇಃ||೧೫||
ಸ್ಯಾತ್ ಸಾರ್ತಿ ದಾಹನಿಸ್ತೋದಗುದವರ್ಚಃಪ್ರವರ್ತನಮ್|
ತತ್ರ ಸರ್ಪಿಃ ಪಿಚುಃ ಕ್ಷೀರಂ ಪಿಚ್ಛಾಬಸ್ತಿಶ್ಚ ಶಸ್ಯತೇ||೧೬||
View original
अतिमात्रप्रणीतेन नेत्रेण क्षणनाद्वलेः||१५||
स्यात् सार्ति दाहनिस्तोदगुदवर्चःप्रवर्तनम्|
तत्र सर्पिः पिचुः क्षीरं पिच्छाबस्तिश्च शस्यते||१६||
ಅತಿಮಾತ್ರಪ್ರಣೀತೇನೇತಿ ಪುನಃ ಪುನಃ ಪ್ರಣೀತೇನ; ಅನ್ಯೇ ತು ದುಷ್ಪ್ರವೇಶನಮತಿಮಾತ್ರಪ್ರಣೀತಮಾಹುಃ ; ಅತಿಪ್ರಣಯನಂ ಯದ್ಯಪಿ ಗ್ರಥಿತಕರ್ಣಿಕಾಯಾ ಉಪರಿ ನ ಭವತಿ, ತಥಾಽಪಿ ಕರ್ಣಿಕಾಪೀಡಯಾ ಗುದಪೀಡನಾದತಿಪ್ರವೇಶೋ ಜ್ಞೇಯಃ| ಪಿಚ್ಛಾಬಸ್ತಿಃ ವಕ್ಷ್ಯಮಾಣಃ||೧೫-೧೬||
Adhikarana 10 (17-18) · Śloka 18
ನ ಭಾವಯತಿ ಮನ್ದಸ್ತು ಬಾಹ್ಯಸ್ತ್ವಾಶು ನಿವರ್ತತೇ|
ಸ್ನೇಹಸ್ತತ್ರ ಪುನಃ ಸಮ್ಯಕ್ ಪ್ರಣೇಯಃ ಸಿದ್ಧಿಮಿಚ್ಛತಾ||೧೭||
ಅತಿಪ್ರಪೀಡಿತಃ ಕೋಷ್ಠೇ ತಿಷ್ಠತ್ಯಾಯಾತಿ ವಾ ಗಲಮ್|
ತತ್ರ ಬಸ್ತಿರ್ವಿರೇಕಶ್ಚ ಗಲಪೀಡಾದಿ ಕರ್ಮ ಚ||೧೮||
View original
न भावयति मन्दस्तु बाह्यस्त्वाशु निवर्तते|
स्नेहस्तत्र पुनः सम्यक् प्रणेयः सिद्धिमिच्छता||१७||
अतिप्रपीडितः कोष्ठे तिष्ठत्यायाति वा गलम्|
तत्र बस्तिर्विरेकश्च गलपीडादि कर्म च||१८||
ನ ಭಾವಯತೀತಿ ಪಕ್ವಾಶಯಂ ನ ಪ್ರಾಪ್ನೋತಿ| ಅತಿಪೀಡನೇ ಕೋಷ್ಠೇ ವಾ ತಿಷ್ಠತೀತಿ ಪಕ್ಷಃ ಮನ್ದಾದತಿಪೀಡನಾದ್ವಾತಾವರಣಾಚ್ಚ ಜ್ಞೇಯಃ; ಗಲಗಮನಂ ತು ತೀವ್ರಾತಿಪೀಡನಾದನಾವರಣಾಚ್ಚ ಭವತಿ| ಇಯಂ ಚ ವ್ಯಾಪತ್ ಪೂರ್ವಾಧ್ಯಾಯೇ ಆಹಾರಂ ವಿನಾ ದತ್ತಾನುವಾಸನವಿಷಯತಯೋಕ್ತಾ, ಇಹ ತು ನಿರೂಹಸ್ಯಾನುವಾಸನಸ್ಯ ಚಾತಿಪೀಡನಜನ್ಯತಯಾ ಬೋಧ್ಯತ ಇತಿ ವಿಶೇಷಃ| ಇಹ ಬಸ್ತಿರ್ವಿರೇಕೋ ವಾ ಕೋಷ್ಠಸ್ಥೇಽಪ್ರವರ್ತಮಾನೇ, ಕಣ್ಠಪೀಡನಾದಿ ತು ಗಲಗತೇ ಜ್ಞೇಯಮ್||೧೭-೧೮||
Adhikarana 11 (19) · Śloka 19
ತತ್ರ ಶ್ಲೋಕಃ- ನೇತ್ರಬಸ್ತಿಪ್ರಣೇತೄಣಾಂ ದೋಷಾನೇತಾನ್ ಸಭೇಷಜಾನ್|
ವೇತ್ತಿ ಯಸ್ತೇನ ಮತಿಮಾನ್ ಬಸ್ತಿಕರ್ಮಾಣಿ ಕಾರಯೇತ್||೧೯||
View original
तत्र श्लोकः- नेत्रबस्तिप्रणेतॄणां दोषानेतान् सभेषजान्|
वेत्ति यस्तेन मतिमान् बस्तिकर्माणि कारयेत्||१९||
ಸಙ್ಗ್ರಹೇ ತೇನೇತಿ ಯಥೋಕ್ತಭೇಷಜಾಭಿಜ್ಞಭಿಷಜಾ||೧೯||
Adhikarana puShpikA · Śloka 5
ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇಽಪ್ರಾಪ್ತೇ ದೃಢಬಲಸಮ್ಪೂರಿತೇ ಸಿದ್ಧಿಸ್ಥಾನೇ ನೇತ್ರಬಸ್ತಿವ್ಯಾಪತ್ಸಿದ್ಧಿರ್ನಾಮ ಪಞ್ಚಮೋಽಧ್ಯಾಯಃ||೫||
View original
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते सिद्धिस्थाने नेत्रबस्तिव्यापत्सिद्धिर्नाम पञ्चमोऽध्यायः||५||
ಇತಿ ಶ್ರೀಚಕ್ರಪಾಣಿದತ್ತಪ್ರಣೀತಾಯಾಮಾಯುರ್ವೇದದೀಪಿಕಾಯಾಂ ಚರಕತಾತ್ಪರ್ಯಟೀಕಾಯಾಂ ಸಿದ್ಧಿಸ್ಥಾನೇ ನೇತ್ರಬಸ್ತಿವ್ಯಾಪತ್ಸಿದ್ಧಿರ್ನಾಮ ಪಞ್ಚಮೋಽಧ್ಯಾಯಃ||೫||