Adhikarana 1 (1-2) · Śloka 2
অথাত উত্তরবস্তিসিদ্ধিং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथात उत्तरबस्तिसिद्धिं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
পারিশেষ্যাদেবোত্তরবস্তিসিদ্ধিরভিধীযতে| উত্তরাণাং শ্রেষ্ঠানাং বস্তীনাং সিদ্ধিরুত্তরবস্তিসিদ্ধিঃ||১-২||
Adhikarana 2 (3-5) · Śloka 5
অথ স্বল্বাতুরং বৈদ্যঃ সংশুদ্ধং বমনাদিভিঃ| দুর্বলং কৃশমল্পাগ্নিং মুক্তসন্ধানবন্ধনম্||৩|| নির্হৃতানিলবিণ্মূত্রকফপিত্তং কৃশাশযম্| শূন্যদেহং প্রতীকারাসহিষ্ণুং পরিপালযেত্||৪|| যথাঽণ্ডং তরুণং পূর্ণং তৈলপাত্রং যথৈব চ| গোপাল ইব দণ্ডী গাঃ সর্বস্মাদপচারতঃ||৫||
अथ स्वल्वातुरं वैद्यः संशुद्धं वमनादिभिः| दुर्बलं कृशमल्पाग्निं मुक्तसन्धानबन्धनम्||३|| निर्हृतानिलविण्मूत्रकफपित्तं कृशाशयम्| शून्यदेहं प्रतीकारासहिष्णुं परिपालयेत्||४|| यथाऽण्डं तरुणं पूर्णं तैलपात्रं यथैव च| गोपाल इव दण्डी गाः सर्वस्मादपचारतः||५||
🔊 Audio coming soon
বক্ষ্যমাণবস্তীনাং বিষযং মিথ্যোপচারজনিতব্যাধিসমূহং দর্শযিতুং সম্যগুপচারমেব তাবদাহ- অথ স্বল্বিত্যাদি| বমনাদিভিরিতি বমনবিরেচননিরূহশিরোবিরেচনৈঃ; কিন্তু নিরূহশিরোবিরেচনযোর্ন সর্বং বক্ষ্যমাণং পেযাদি সম্বধ্যতে, তেনাযং ক্রম এতযোর্ন ভবতি| মুক্তসন্ধানবন্ধনমিতি মুক্তসন্ধিবন্ধনম্| কৃশাশযমিতি দোষশূন্যামাশযম্| প্রতীকারাসহিষ্ণুমিতি উচ্চৈর্ভাষ্যাদিক্রিযাক্ষমং; কিংবা বমনাদিপ্রযোগাসহিষ্ণুম্| পরিপালযেত্ সর্বস্মাদপচারত ইতি সম্বন্ধঃ| তরুণাণ্ডাদিদৃষ্টান্তত্রযাভিধানং কস্যচিত্ কিঞ্চিত্ প্রসিদ্ধং ভবিষ্যতীত্যভিপ্রাযেণ||৩-৫||
Adhikarana 3 (6-8) · Śloka 8
অগ্নিসন্ধুক্ষণার্থং তু পূর্বং পেযাদিনা ভিষক্| রসোত্তরেণোপচরেত্ ক্রমেণ ক্রমকোবিদঃ||৬|| স্নিগ্ধাম্লস্বাদুহৃদ্যানি ততোঽম্ললবণৌ রসৌ| স্বাদুতিক্তৌ ততো ভূযঃ কষাযকটুকৌ ততঃ||৭|| অন্যোঽন্যপ্রত্যনীকানাং রসানাং স্নিগ্ধরূক্ষযোঃ| ব্যত্যাসাদুপযোগেন প্রকৃতিং গমযেদ্ভিষক্||৮||
अग्निसन्धुक्षणार्थं तु पूर्वं पेयादिना भिषक्| रसोत्तरेणोपचरेत् क्रमेण क्रमकोविदः||६|| स्निग्धाम्लस्वादुहृद्यानि ततोऽम्ललवणौ रसौ| स्वादुतिक्तौ ततो भूयः कषायकटुकौ ततः||७|| अन्योऽन्यप्रत्यनीकानां रसानां स्निग्धरूक्षयोः| व्यत्यासादुपयोगेन प्रकृतिं गमयेद्भिषक्||८||
🔊 Audio coming soon
রসোত্তরেণোপচরেদিত্যত্র রসঃ মাংসরসরূপ উত্তরে যস্মিন্ তেন পেযাদিনা রসোত্তরেণ ক্রমেণ; কিংবা বমনবিরেচনযোরন্তরে পেযাদিনা ক্রমেণোপচরেত্, নিরূহে তু রসোত্তরেণেতি ব্যবস্থা| তত্র চ নিরূহে স্তোকাগ্নিমান্দ্যাপেক্ষ্যা রসাদিরেব ক্রমো ভবতীতি প্রতিপাদিতমেব প্রাক্; কিংবা রসাভ্যাসক্রম উত্তরকালং যস্মিন্ তেন পেযাদিনা রসোত্তরেণ| রসাভ্যাসক্রমমেবাহ- স্নিগ্ধাম্লস্বাদুহৃদ্যানীত্যাদি| পেযাক্রমোত্তরকালং যদা বিরেচনাদিকর্মান্তরং ন কর্তব্যং তদা সংশোধনমূলশরীরস্য প্রকৃতিভোজনার্থং বলাপ্যাযনার্থং চাযং রসাভ্যাসক্রমো জ্ঞেযঃ; অন্যে তু পেযাদিক্রমে এব রসসংস্কারার্থং স্নিগ্ধাম্লসিদ্ধাদিক্রমং বর্ণযন্তি| অত্র চাম্লস্বাদূ প্রথমং পক্বাশযস্থিতবাতপ্রশমনাযোপযুজ্যেতে, তথাঽম্ললবণৈ তদূর্ধ্বস্থিতাগ্নিসন্ধুক্ষণার্থং, ততঃ পিত্তপ্রশমনার্থং স্বাদুতিক্তৌ, ততঃ পিত্তোর্ধ্বস্থিতকফপ্রশমনার্থং কষাযকটুকৌ, ইত্যেষ ক্রমঃ| অত্রাপি চ যৌ রসৌ প্রত্যনীকভূতৌ তাবেব মিশ্রিতাবুপযুজ্যেতে| এষাং চতুর্ণাং রসযুগ্মানামুপযোগঃ পেযাদিক্রমে এব| এবং দ্বাদশান্নকালৈঃ সর্বরসভোজনপ্রাপ্তিরুত্তমবিধযা জ্ঞেযা| অন্যোন্যেত্যাদি| অন্যোন্যপ্রত্যনীকানামিতি পরস্পরমভিভাবকানাম্| ব্যত্যাসাদুপযোজযেদিতি একং যুগ্মমুপযুজ্যাপরস্য যুগ্মস্যোপযোগঃ| প্রকৃতিং গমযেদিতি প্রকৃতিভোজনং গমযেত্| প্রকারান্তরং রসাভ্যাসে প্রাহ- স্নিগ্ধরূক্ষযোরিতি| স্নিগ্ধরসমুপযুজ্য রূক্ষো যোজ্যঃ, রূক্ষং বোপযুজ্য স্নিগ্ধ ইত্যনেন ক্রমেণ প্রকৃতিভোজনং গমযেদিত্যর্থঃ| স্নিগ্ধরূক্ষৌ চাত্রোদাহরণার্থমুপাতৌ, তেন গুরুলঘ্বাদিযুগ্মরসব্যত্যাসাভ্যাসোঽপ্যত্র বোদ্ধব্যঃ| কিংবা কষাযকটুকৌ তত ইত্যনেন যুগ্মরসাভ্যাস উপদর্শিতঃ, অন্যোন্যপ্রত্যনীকানামিত্যাদিনা তু প্রত্যেকং প্রত্যনীকানামন্যোন্যব্যত্যাসেনাভ্যাস উচ্যতে||৬-৮||
Adhikarana 4 (9) · Śloka 9
সর্বক্ষমো হ্যসংসর্গো রতিযুক্তঃ স্থিরেন্দ্রিযঃ| বলবান্ সত্ত্বসম্পন্নো বিজ্ঞেযঃ প্রকৃতিং গতঃ||৯||
सर्वक्षमो ह्यसंसर्गो रतियुक्तः स्थिरेन्द्रियः| बलवान् सत्त्वसम्पन्नो विज्ञेयः प्रकृतिं गतः||९||
🔊 Audio coming soon
পেযাদিক্রমরসাভ্যাসাভ্যামুপপাদিতস্বাস্থ্যস্য পুংসো লক্ষণমাহ- সর্বক্ষম ইত্যাদি| সর্বক্ষম ইতি সর্বরসাভ্যাসক্ষমঃ| অসংসর্গ ইতি অসক্তবেগঃ; কিংবা ‘নিরাসঙ্গ’ ইতি পাঠঃ, নিরাসঙ্গঃ প্রতিনিযতবিষযাপরাহতঃ সর্বচেষ্টাক্ষমঃ||৯||
Adhikarana 5 (10-12) · Śloka 12
এতাং প্রকৃতিমপ্রাপ্তঃ সর্ববর্জ্যানি বর্জযেত্| মহাদোষকরাণ্যষ্টাবিমানি তু বিশেষতঃ||১০|| উচ্চৈর্ভাষ্যং রথক্ষোভমবিচঙ্ক্রমণাসনে| অজীর্ণাহিতভোজ্যে চ দিবাস্বপ্নং সমৈথুনম্||১১|| তজ্জা দেহোর্ধ্বসর্বাধোমধ্যপীডামদোষজাঃ| শ্লেষ্মজাঃ ক্ষযজাশ্চৈব ব্যাধ্যঃ স্যুর্যথাক্রমম্||১২||
एतां प्रकृतिमप्राप्तः सर्ववर्ज्यानि वर्जयेत्| महादोषकराण्यष्टाविमानि तु विशेषतः||१०|| उच्चैर्भाष्यं रथक्षोभमविचङ्क्रमणासने| अजीर्णाहितभोज्ये च दिवास्वप्नं समैथुनम्||११|| तज्जा देहोर्ध्वसर्वाधोमध्यपीडामदोषजाः| श्लेष्मजाः क्षयजाश्चैव व्याध्यः स्युर्यथाक्रमम्||१२||
🔊 Audio coming soon
তজ্জা ইত্যাদি যথাক্রমং উচ্চৈর্ভাষ্যাদিজা দেহোর্ধ্বপীডাদযো জ্ঞেযাঃ| উচ্চৈর্ভাষ্যাদূর্ধ্বদেহে পীডা, রথক্ষোভাত্ সর্বদেহপীডা, অতিচঙ্ক্রমণাদধঃ পীডা, অত্যাসনাদ্দেহমধ্যপীডা, অজীর্ণভোজনেনামজাঃ, অহিতভোজনেন দোষজাঃ, দিবাস্বপ্নেন শ্লেষ্মজাঃ, মৈথুনেন ক্ষযজা ইতি||১০-১২||
Adhikarana 6 (13-14) · Śloka 14
তেষাং বিস্তরতো লিঙ্গমেকৈকস্য চ ভেষজম্| যথাবত্সম্প্রবক্ষ্যামি সিদ্ধান্ বস্তীংশ্চ যাপনান্||১৩|| তত্রোচ্চৈর্ভাষ্যাতিভাষ্যাভ্যাং শিরস্তাপশঙ্খকর্ণনিস্তোদশ্রোত্রোপরোধমুখতালুকণ্ঠশোষতৈমির্যপিপাসাজ্বরতমক- হনুগ্রহমন্যাস্তম্ভনিষ্ঠীবনোরঃপার্শ্বশূলস্বরভেদহিক্কাশ্বাসাদযঃ স্যুঃ (১)| রথক্ষোভাত্ সন্ধিপর্বশৈথিল্যহনুনাসাকর্ণশিরঃশূলতোদকুক্ষিক্ষোভাটোপান্ত্রকূজনাধ্মানহৃদযেন্দ্রিযোপরোধ- স্ফিক্পার্শ্ববঙ্ক্ষণবৃষণকটীপৃষ্ঠবেদনাসন্ধিস্কন্ধগ্রীবাদৌর্বল্যাঙ্গাভিতাপপাদশোফপ্রস্বাপহর্ষণাদযঃ (২)| অতিচঙ্কমণাত্ পাদজঙ্ঘোরুজানুবঙ্ক্ষণশ্রোণীপৃষ্ঠশূলসক্থিসাদনিস্তোদ- পিণ্ডিকোদ্বেষ্টনাঙ্গমর্দাংসাভিতাপসিরাধমনীহর্ষশ্বাসকাসাদযঃ (৩)| অত্যাসনাদ্রথক্ষোভজাঃ স্ফিক্পার্শ্ববঙ্ক্ষণবৃষণকটীপৃষ্ঠবেদনাদযঃ (৪)| অজীর্ণাধ্যশনাভ্যাং তু মুখশোষাধ্মানশূলনিস্তোদপিপাসাগাত্রসাদচ্ছর্দ্যতীসারমূর্চ্ছাজ্বরপ্রবাহণামবিষাদযঃ(৫)| বিষমাহিতাশনাভ্যামনন্নাভিলাষদৌর্বল্যবৈবর্ণ্যকণ্ডূপামাগাত্রসাদবাতাদিপ্রকোপজাশ্চ গ্রহণ্যর্শোবিকারাদযঃ (৬)| দিবাস্বপ্নাদরোচকাবিপাকাগ্নিনাশস্তৈমিত্যপাণ্ডুত্বকণ্ডূপামাদাহচ্ছর্দ্যঙ্গমর্দহৃত্স্তম্ভজাড্যতন্দ্রানিদ্রা- প্রসঙ্গগ্রন্থিজন্মদৌর্বল্যরক্তমূত্রাক্ষিতাতালুলেপাঃ (৭)| ব্যবাযাদাশুবলনাশোরুসাদশিরোবস্তিগুদমেঢ্রবঙ্ক্ষণোরুজানুজঙ্ঘাপাদশূলহৃদযস্পন্দননেত্রপীডাঙ্গশৈথিল্য- শুক্রমার্গশোণিতাগমনকাসশ্বাসশোণিতষ্ঠীবনস্বরাবসাদকটীদৌর্বল্যৈকাঙ্গসর্বাঙ্গরোগমুষ্কশ্বযথু- বাতবর্চোমূত্রসঙ্গশুক্রবিসর্গজাড্যবেপথুবাধির্যবিষাদাদযঃ স্যুঃ; অবলুপ্যত ইব গুদঃ, তাড্যত ইব মেঢ্রম্, অবসীদতীব মনো, বেপতে হৃদযং, পীড্যন্তে সন্ধযঃ, তমঃ প্রবেশ্যত ইব চ (৮)| ইত্যেবমেভিরষ্টভিরপচারৈরেতে প্রাদুর্ভবন্ত্যুপদ্রবাঃ||১৪||
तेषां विस्तरतो लिङ्गमेकैकस्य च भेषजम्| यथावत्सम्प्रवक्ष्यामि सिद्धान् बस्तींश्च यापनान्||१३|| तत्रोच्चैर्भाष्यातिभाष्याभ्यां शिरस्तापशङ्खकर्णनिस्तोदश्रोत्रोपरोधमुखतालुकण्ठशोषतैमिर्यपिपासाज्वरतमक- हनुग्रहमन्यास्तम्भनिष्ठीवनोरःपार्श्वशूलस्वरभेदहिक्काश्वासादयः स्युः (१)| रथक्षोभात् सन्धिपर्वशैथिल्यहनुनासाकर्णशिरःशूलतोदकुक्षिक्षोभाटोपान्त्रकूजनाध्मानहृदयेन्द्रियोपरोध- स्फिक्पार्श्ववङ्क्षणवृषणकटीपृष्ठवेदनासन्धिस्कन्धग्रीवादौर्बल्याङ्गाभितापपादशोफप्रस्वापहर्षणादयः (२)| अतिचङ्कमणात् पादजङ्घोरुजानुवङ्क्षणश्रोणीपृष्ठशूलसक्थिसादनिस्तोद- पिण्डिकोद्वेष्टनाङ्गमर्दांसाभितापसिराधमनीहर्षश्वासकासादयः (३)| अत्यासनाद्रथक्षोभजाः स्फिक्पार्श्ववङ्क्षणवृषणकटीपृष्ठवेदनादयः (४)| अजीर्णाध्यशनाभ्यां तु मुखशोषाध्मानशूलनिस्तोदपिपासागात्रसादच्छर्द्यतीसारमूर्च्छाज्वरप्रवाहणामविषादयः(५)| विषमाहिताशनाभ्यामनन्नाभिलाषदौर्बल्यवैवर्ण्यकण्डूपामागात्रसादवातादिप्रकोपजाश्च ग्रहण्यर्शोविकारादयः (६)| दिवास्वप्नादरोचकाविपाकाग्निनाशस्तैमित्यपाण्डुत्वकण्डूपामादाहच्छर्द्यङ्गमर्दहृत्स्तम्भजाड्यतन्द्रानिद्रा- प्रसङ्गग्रन्थिजन्मदौर्बल्यरक्तमूत्राक्षितातालुलेपाः (७)| व्यवायादाशुबलनाशोरुसादशिरोबस्तिगुदमेढ्रवङ्क्षणोरुजानुजङ्घापादशूलहृदयस्पन्दननेत्रपीडाङ्गशैथिल्य- शुक्रमार्गशोणितागमनकासश्वासशोणितष्ठीवनस्वरावसादकटीदौर्बल्यैकाङ्गसर्वाङ्गरोगमुष्कश्वयथु- वातवर्चोमूत्रसङ्गशुक्रविसर्गजाड्यवेपथुबाधिर्यविषादादयः स्युः; अवलुप्यत इव गुदः, ताड्यत इव मेढ्रम्, अवसीदतीव मनो, वेपते हृदयं, पीड्यन्ते सन्धयः, तमः प्रवेश्यत इव च (८)| इत्येवमेभिरष्टभिरपचारैरेते प्रादुर्भवन्त्युपद्रवाः||१४||
🔊 Audio coming soon
অত্রোচ্চৈর্ভাষ্যাদিকো গ্রন্থঃ প্রাযো ব্যক্ত এব| অতিভাষিতস্যাসূত্রিতস্যোচ্চৈর্ভাষ্যেণ সমানত্বাদুদাহরণম্| পিণ্ডিকোদ্বেষ্টনং জঙ্ঘাপিণ্ডিকযোরুদ্বেষ্টনাকারা বেদনা| সিরাধমনীহর্ষঃ সিরাধমন্যোরুচ্ছূল(ন)ত্বম্| রথক্ষোভজা ইত্যুক্তে সন্ধিশৈথিল্যাদীনামপি প্রসক্তিঃ স্যাদতস্তন্নিরাসার্থমাহ- স্ফিক্পার্শ্ববঙ্ক্ষণবৃষণকটীপৃষ্ঠবেদনাদযঃ স্যুরিতি| অজীর্ণাধ্যশনাভ্যামিত্যত্র অজীর্ণাশনস্যামজবিকারকর্তৃত্বাদধ্যশনস্যাসূত্রিতস্যোপাদানম্| এবমহিতাশনজবিকারসমানবিকারকারিত্বাদ্বিষমাশনস্যাপ্যসূত্রিতস্যোপাদানম্| অবলুপ্যত ইব ছিদ্যত ইব||১৩-১৪||
Adhikarana 7 (15) · Śloka 15
তেষাং সিদ্ধিঃ- তত্রোচ্চৈর্ভাষ্যাতিভাষ্যজানামভ্যঙ্গস্বেদোপনাহধূমনস্যোপরিভক্তস্নেহপানরসক্ষীরাদির্বাতহরঃ সর্বো বিধির্মৌনং চ (১)| রথক্ষোভাতিচঙ্ক্রমণাত্যাসনজানাং স্নেহস্বেদাদিবাতহরং কর্ম সর্বং নিদানবর্জনং চ (২)| অজীর্ণাধ্যশনজানাং নিরবশেষতশ্ছর্দনং রূক্ষঃ স্বেদো লঙ্ঘনীযপাচনীযদীপনীযৌষধাবচারণং চ (৩)| বিষমাহিতাশনজানাং যথাস্বং দোষহরাঃ ক্রিযাঃ (৪)| দিবাস্বপ্নজানাং ধূমপানলঙ্ঘনবমনশিরোবিরেচনব্যাযামরূক্ষাশনারিষ্টদীপনীযৌষধোপযোগঃ প্রঘর্ষণোন্মর্দনপরিষেচনাদিশ্চ শ্লেষ্মহরঃ সর্বো বিধিঃ (৫)| মৈথুনজানাং জীবনীযসিদ্ধযোঃ ক্ষীরসর্পিষোরুপযোগঃ, তথা বাতহরাঃ স্বেদাভ্যঙ্গোপনাহা বৃষ্যাশ্চাহারাঃ স্নেহাঃ স্নেহবিধযো যাপনাবস্তযোঽনুবাসনং চ; মূত্রবৈকৃতবস্তিশূলেষু চোত্তরবস্তির্বিদারীগন্ধাদিগণজীবনীযক্ষীরসংসিদ্ধং তৈলং স্যাত্||১৫||
तेषां सिद्धिः- तत्रोच्चैर्भाष्यातिभाष्यजानामभ्यङ्गस्वेदोपनाहधूमनस्योपरिभक्तस्नेहपानरसक्षीरादिर्वातहरः सर्वो विधिर्मौनं च (१)| रथक्षोभातिचङ्क्रमणात्यासनजानां स्नेहस्वेदादिवातहरं कर्म सर्वं निदानवर्जनं च (२)| अजीर्णाध्यशनजानां निरवशेषतश्छर्दनं रूक्षः स्वेदो लङ्घनीयपाचनीयदीपनीयौषधावचारणं च (३)| विषमाहिताशनजानां यथास्वं दोषहराः क्रियाः (४)| दिवास्वप्नजानां धूमपानलङ्घनवमनशिरोविरेचनव्यायामरूक्षाशनारिष्टदीपनीयौषधोपयोगः प्रघर्षणोन्मर्दनपरिषेचनादिश्च श्लेष्महरः सर्वो विधिः (५)| मैथुनजानां जीवनीयसिद्धयोः क्षीरसर्पिषोरुपयोगः, तथा वातहराः स्वेदाभ्यङ्गोपनाहा वृष्याश्चाहाराः स्नेहाः स्नेहविधयो यापनाबस्तयोऽनुवासनं च; मूत्रवैकृतबस्तिशूलेषु चोत्तरबस्तिर्विदारीगन्धादिगणजीवनीयक्षीरसंसिद्धं तैलं स्यात्||१५||
🔊 Audio coming soon
তেষাং সিদ্ধিরিতি তেষামুক্তবিকারাণাং সাধনং ভেষজমিত্যর্থঃ| নিরবশেষতশ্ছর্দনমিতি অজীর্ণান্নস্য নিরবশেষতশ্ছর্দনম্| মূত্রবৈকৃতেত্যাদি যদা মৈথুনান্মূত্রবৈকৃতাদি ভবতি তদা বিদারিগন্ধাদিজীবনীযগণাভ্যাং ক্বাথকল্কীকৃতাভ্যাং সক্ষীরং তৈলং সাধযিত্বোত্তরবস্তির্দেযঃ||১৫||
Adhikarana 8 (16-17) · Śloka 17
যাপনাশ্চ বস্তযঃ সর্বকালং দেযাঃ; তানুপদেক্ষ্যামঃ- মুস্তোশীরবলারগ্বধরাস্নামঞ্জিষ্ঠাকটুরোহিণীত্রাযমাণাপুনর্নবাবিভীতকগুডূচীস্থিরাদিপঞ্চমূলানি পলিকানি খণ্ডশঃ ক্লৃপ্তান্যষ্টৌ চ মদনফলানি প্রক্ষাল্য জলাঢকে পরিক্বাথ্য পাদশেষো রসঃ ক্ষীরদ্বিপ্রস্থসংযুক্তঃ পুনঃ শৃতঃ ক্ষীরাবশেষঃ পাদজাঙ্গলরসস্তুল্যমধুঘৃতঃ শতকুসুমামধুককুটজফলরসাঞ্জনপ্রিযঙ্গুকল্কীকৃতঃ সসৈন্ধবঃ সুখোষ্ণো বস্তিঃ শুক্রমাংসবলজননঃ ক্ষতক্ষীণকাসগুল্মশূলবিষমজ্বরব্রধ্ন(বর্ধ্ম)- কুণ্ডলোদাবর্তকুক্ষিশূলমূত্রকৃচ্ছ্রাসৃগ্রজোবিসর্পপ্রবাহিকাশিরোরুজা- জানূরুজঙ্ঘাবস্তিগ্রহাশ্মর্যুন্মাদার্শঃপ্রমেহাধ্মানবাতরক্তপিত্তশ্লেষ্মব্যাধিহরঃ সদ্যো বলজননো রসাযনশ্চেতি (১)| এরণ্ডমূলপলাশাত্ ষট্পলং শালিপর্ণীপৃশ্নিপর্ণী বৃহতী কণ্টকারিকা গোক্ষুরকো রাস্নাঽশ্বগন্ধা গুডূচী বর্ষাভূরারগ্বধো দেবদার্বিতি পলিকানি খণ্ডশঃ ক্লৃপ্তানি ফলানি চাষ্টৌ প্রক্ষাল্য জলাঢকে ক্ষীরপাদে পচেত্| পাদশেষং কষাযং পূতং শতকুসুমাকুষ্ঠমুস্তপিপ্পলীহপুষাবিল্ববচাবত্সকফলরসাঞ্জনপ্রিযঙ্গুযবানিপ্রক্ষেপকল্কিতং মধুঘৃততৈলসৈন্ধবযুক্তং সুখোষ্ণং নিরূহমেকং দ্বৌ ত্রীন্ বা দদ্যাত্| সর্বেষাং প্রশস্তো বিশেষতো ললিতসুকুমারস্ত্রীবিহারক্ষীণক্ষতস্থবিরচিরার্শসামপত্যকামানাং চ (২)| তদ্বত্ সহচরবলাদর্ভমূলসারিবাসিদ্ধেন পযসা (৩)| তথা বৃহতীকণ্টকারীশতাবরীচ্ছিন্নরুহাশৃতেন পযসা মধুকমদনপিপ্পলীকল্কিতেন পূর্ববদ্বস্তিঃ (৪)| তথা বলাতিবলাবিদারীশালিপর্ণীপৃশ্নিপর্ণীবৃহতীকণ্টকারিকাদর্ভমূলপরূষককাশ্মর্যবিল্বফলযবসিদ্ধেন পযসা মধুকমদনকল্কিতেন মধুঘৃতসৌবর্চলযুক্তেন কাসজ্বরগুল্মপ্লীহার্দিতস্ত্রীমদ্যক্লিষ্টানাং সদ্যোবলজননো রসাযনশ্চ (৫)| বলাতিবলারাস্নারগ্বধমদনবিল্বগুডূচীপুনর্নবৈরণ্ডাশ্বগন্ধাসহচরপলাশদেবদারুদ্বিপঞ্চমূলানি পলিকানি যবকোলকুলত্থদ্বিপ্রসৃতং শুষ্কমূলকানাং চ জলদ্রোণসিদ্ধং নিরূহপ্রমাণাবশেষং কষাযং পূতং মধুকমদনশতপুষ্পাকুষ্ঠপিপ্পলীবচাবত্সকফলরসাঞ্জনপ্রিযঙ্গুযবানীকল্কিকৃতং গুডঘৃততৈলক্ষৌদ্রক্ষীরমাংসরসাম্লকাঞ্জিকসৈন্ধবযুক্তং সুখোষ্ণং বস্তিং দদ্যাচ্ছুক্রমূত্রবর্চঃসঙ্গেঽনিলজে গুল্মহৃদ্রোগাধ্মানব্রধ্নপার্শ্বপৃষ্ঠকটীগ্রহসঞ্জ্ঞানাশবলক্ষযেষু চ (৬)| হপুষার্ধকুডবো দ্বিগুণার্ধক্ষুণ্ণযবঃ ক্ষীরোদকসিদ্ধঃ ক্ষীরশেষো মধুঘৃততৈললবণযুক্তঃ সর্বাঙ্গবিসৃতবাতরক্তসক্তবিণ্মূত্রস্ত্রীখেদিতহিতো বাতহরো বুদ্ধিমেধাগ্নিবলজননশ্চ (৭)| হ্রস্বপঞ্চমূলীকষাযঃ ক্ষীরোদকসিদ্ধঃ পিপ্পলীমধুকমদনকল্কীকৃতঃ সগুডঘৃততৈললবণঃ ক্ষীণবিষমজ্বরকর্শিতস্য বস্তিঃ (৮)| বলাতিবলাপামার্গাত্মগুপ্তাষ্টপলার্ধক্ষুণ্ণযবাঞ্জলিকষাযঃ সগুডঘৃততৈললবণযুক্তঃ পূর্ববদ্বস্তিঃস্থবিরদুর্বলক্ষীণশুক্ররুধিরাণাং পথ্যতমঃ (৯)| বলামধুকবিদারীদর্ভমূলমৃদ্বীকাযবৈঃ কষাযমাজেন পযসা পক্ত্বা মধুকমদনকল্কিতং সমধুঘৃতসৈন্ধবং জ্বরার্তেভ্যো বস্তিং দদ্যাত্ (১০)| শালিপর্ণীপৃশ্নিপর্ণীগোক্ষুরকমূলকাশ্মর্যপরূষকখর্জূরফলমধূকপুষ্পৈরজাক্ষীরজলপ্রস্থাভ্যাং সিদ্ধঃ কষাযঃ পিপ্পলীমধুকোত্পলকল্কিতঃ সঘৃতসৈন্ধবঃ ক্ষীণেন্দ্রিযবিষমজ্বরকর্শিতস্য বস্তিঃ শস্তঃ (১১)| স্থিরাদিপঞ্চমূলীপঞ্চপলেন শালিষষ্টিকযবগোধূমমাষপঞ্চপ্রসৃতেন ছাগং পযঃ শৃতং পাদশেষং কুক্কুটাণ্ডরসসমমধুঘৃতশর্করাসৈন্ধবসৌবর্চলযুক্তো বস্তির্বৃষ্যতমো বলবর্ণজননশ্চ | ইতি যাপনা বস্তযো দ্বাদশ||১৬|| কল্পশ্চৈষ শিখিগোনর্দহংসসারসাণ্ডরসেষু স্যাত্||১৭||
यापनाश्च बस्तयः सर्वकालं देयाः; तानुपदेक्ष्यामः- मुस्तोशीरबलारग्वधरास्नामञ्जिष्ठाकटुरोहिणीत्रायमाणापुनर्नवाबिभीतकगुडूचीस्थिरादिपञ्चमूलानि पलिकानि खण्डशः क्लृप्तान्यष्टौ च मदनफलानि प्रक्षाल्य जलाढके परिक्वाथ्य पादशेषो रसः क्षीरद्विप्रस्थसंयुक्तः पुनः शृतः क्षीरावशेषः पादजाङ्गलरसस्तुल्यमधुघृतः शतकुसुमामधुककुटजफलरसाञ्जनप्रियङ्गुकल्कीकृतः ससैन्धवः सुखोष्णो बस्तिः शुक्रमांसबलजननः क्षतक्षीणकासगुल्मशूलविषमज्वरब्रध्न(वर्ध्म)- कुण्डलोदावर्तकुक्षिशूलमूत्रकृच्छ्रासृग्रजोविसर्पप्रवाहिकाशिरोरुजा- जानूरुजङ्घाबस्तिग्रहाश्मर्युन्मादार्शःप्रमेहाध्मानवातरक्तपित्तश्लेष्मव्याधिहरः सद्यो बलजननो रसायनश्चेति (१)| एरण्डमूलपलाशात् षट्पलं शालिपर्णीपृश्निपर्णी बृहती कण्टकारिका गोक्षुरको रास्नाऽश्वगन्धा गुडूची वर्षाभूरारग्वधो देवदार्विति पलिकानि खण्डशः क्लृप्तानि फलानि चाष्टौ प्रक्षाल्य जलाढके क्षीरपादे पचेत्| पादशेषं कषायं पूतं शतकुसुमाकुष्ठमुस्तपिप्पलीहपुषाबिल्ववचावत्सकफलरसाञ्जनप्रियङ्गुयवानिप्रक्षेपकल्कितं मधुघृततैलसैन्धवयुक्तं सुखोष्णं निरूहमेकं द्वौ त्रीन् वा दद्यात्| सर्वेषां प्रशस्तो विशेषतो ललितसुकुमारस्त्रीविहारक्षीणक्षतस्थविरचिरार्शसामपत्यकामानां च (२)| तद्वत् सहचरबलादर्भमूलसारिवासिद्धेन पयसा (३)| तथा बृहतीकण्टकारीशतावरीच्छिन्नरुहाशृतेन पयसा मधुकमदनपिप्पलीकल्कितेन पूर्ववद्वस्तिः (४)| तथा बलातिबलाविदारीशालिपर्णीपृश्निपर्णीबृहतीकण्टकारिकादर्भमूलपरूषककाश्मर्यबिल्वफलयवसिद्धेन पयसा मधुकमदनकल्कितेन मधुघृतसौवर्चलयुक्तेन कासज्वरगुल्मप्लीहार्दितस्त्रीमद्यक्लिष्टानां सद्योबलजननो रसायनश्च (५)| बलातिबलारास्नारग्वधमदनबिल्वगुडूचीपुनर्नवैरण्डाश्वगन्धासहचरपलाशदेवदारुद्विपञ्चमूलानि पलिकानि यवकोलकुलत्थद्विप्रसृतं शुष्कमूलकानां च जलद्रोणसिद्धं निरूहप्रमाणावशेषं कषायं पूतं मधुकमदनशतपुष्पाकुष्ठपिप्पलीवचावत्सकफलरसाञ्जनप्रियङ्गुयवानीकल्किकृतं गुडघृततैलक्षौद्रक्षीरमांसरसाम्लकाञ्जिकसैन्धवयुक्तं सुखोष्णं बस्तिं दद्याच्छुक्रमूत्रवर्चःसङ्गेऽनिलजे गुल्महृद्रोगाध्मानब्रध्नपार्श्वपृष्ठकटीग्रहसञ्ज्ञानाशबलक्षयेषु च (६)| हपुषार्धकुडवो द्विगुणार्धक्षुण्णयवः क्षीरोदकसिद्धः क्षीरशेषो मधुघृततैललवणयुक्तः सर्वाङ्गविसृतवातरक्तसक्तविण्मूत्रस्त्रीखेदितहितो वातहरो बुद्धिमेधाग्निबलजननश्च (७)| ह्रस्वपञ्चमूलीकषायः क्षीरोदकसिद्धः पिप्पलीमधुकमदनकल्कीकृतः सगुडघृततैललवणः क्षीणविषमज्वरकर्शितस्य बस्तिः (८)| बलातिबलापामार्गात्मगुप्ताष्टपलार्धक्षुण्णयवाञ्जलिकषायः सगुडघृततैललवणयुक्तः पूर्ववद्बस्तिःस्थविरदुर्बलक्षीणशुक्ररुधिराणां पथ्यतमः (९)| बलामधुकविदारीदर्भमूलमृद्वीकायवैः कषायमाजेन पयसा पक्त्वा मधुकमदनकल्कितं समधुघृतसैन्धवं ज्वरार्तेभ्यो बस्तिं दद्यात् (१०)| शालिपर्णीपृश्निपर्णीगोक्षुरकमूलकाश्मर्यपरूषकखर्जूरफलमधूकपुष्पैरजाक्षीरजलप्रस्थाभ्यां सिद्धः कषायः पिप्पलीमधुकोत्पलकल्कितः सघृतसैन्धवः क्षीणेन्द्रियविषमज्वरकर्शितस्य बस्तिः शस्तः (११)| स्थिरादिपञ्चमूलीपञ्चपलेन शालिषष्टिकयवगोधूममाषपञ्चप्रसृतेन छागं पयः शृतं पादशेषं कुक्कुटाण्डरससममधुघृतशर्करासैन्धवसौवर्चलयुक्तो वस्तिर्वृष्यतमो बलवर्णजननश्च | इति यापना बस्तयो द्वादश||१६|| कल्पश्चैष शिखिगोनर्दहंससारसाण्डरसेषु स्यात्||१७||
🔊 Audio coming soon
প্রতিজ্ঞাতান্ যাপনবস্তীনাহ- যাপনাশ্চেত্যাদি| সর্বকালং দেযা ইত্যনেন পূর্বনিরূহাণামসার্বকালিকত্বং দর্শযতি; এতেষাং চ সর্বস্মিন্ কালে দানমবিরুদ্ধম্| আযুষো যাপনং দীর্ধকালানুবর্তনং কুর্বন্তীতি যাপনা বস্তযঃ| মুস্তেত্যাদৌ খণ্ডশঃ ক্লৃপ্তানীতি খণ্ডং খণ্ডং কৃতানি| পাদজাঙ্গলরস ইতি যথোক্তক্ষীরকৃতক্বাথপাদিকজাঙ্গলরস ইত্যর্থঃ| তুল্যং মধুনা ঘৃতং যস্মিন্ স তুল্যমধুঘৃতঃ; এতেন পূর্বং বস্তৌ যথানিযমিতস্নেহমানেন যাবদ্ ঘৃতং দেযং ভবতি তাবন্মানং মধ্বপ্যত্র দেযম্| অস্মিংশ্চ বস্তৌ পূর্বোক্তবস্তিমানবিভাগেনৈব বস্তিঃ কল্পযিতব্যঃ| অত্র ক্ষীরং কষাযস্থানে ভবতি| শতকুসুমা শতপুষ্পা| সসৈন্ধবমিতি ঈষত্সৈন্ধবম্| এরণ্ডমূলেত্যাদির্দ্বিতীযঃ| তদ্বত্ সহচরেত্যাদিকস্তৃতীযঃ| তদ্বদিতি পূর্ববদ্বস্তিবিধানেন| তথা বৃহতীত্যাদিকশ্চতুর্থঃ| অত্র চ বস্তৌ ফলশ্রুতির্নাস্তি, সামান্যেন ‘ইত্যেতে বস্তযঃ স্নেহাশ্চোক্তা’ ইত্যাদিনা বক্ষ্যমাণা ফলশ্রুতির্জ্ঞেযা| বলাতিবলাবিদারীত্যাদিকঃ পঞ্চমঃ| বলাতিবলারাস্নেত্যাদিকঃ ষষ্ঠঃ| শুষ্কমূলকাণাং চেত্যত্র ‘দ্বিপ্রসৃতং’ ইত্যনুবর্ততে| নিরূহপ্রমাণ্শেষং কষাযমিতি নিরূহপুটকত্রযযোগ্যপ্রমাণং কষাযম্; এবং পুটকত্রযদেযাঃ পঞ্চকষাযপ্রসৃতাঃ স্থাপ্যা ভবিষ্যন্তি| ক্বাথপরিভাষযৈব কর্তব্যোঽত্র চ ক্বাথঃ| নিরূহপ্রমাণশেষং কষাযং মধুকমদনাদিনা যুক্তং সিদ্ধং বস্তিং দদ্যাদিতি যোজনীযম্| হপুষেত্যাদিকঃ সপ্তমঃ| স্তিমিতাঃ শুষ্কাঃ পুনঃ কণ্ডিতাঃ ক্ষুণ্ণা উচ্যন্তে| পূর্বপঠিতং মুস্তাদিকমত্র প্রদেশে কাশ্মীরাঃ পঠন্তি| হ্রস্বপঞ্চমূলীত্যাদিকোঽষ্টমঃ| বলাতিবলাপামার্গেত্যাদিকো নবমঃ| বলামধুকেত্যাদিকো দশমঃ| অত্র বলাদিকষাযস্য পুনরাজেন পযসা পাকাত্ ক্ষীরশেষঃ পাকঃ কর্তব্যঃ| শালিপর্ণীত্যাদিক একাদশঃ| স্থিরেত্যাদিকো দ্বাদশঃ| এরকা হোগ্গলঃ| কল্পশ্চেত্যাদিনা আতিদেশিকাস্ত্রযোঽভিধীযন্তে||১৬-১৭||
Adhikarana 9 (18) · Śloka 18
সতিত্তিরিঃ সমযূরঃ সরাজহংসঃ পঞ্চমূলীপযঃ সিদ্ধঃ শতপুষ্পামধুকরাস্নাকুটজমদনফলপিপ্পলী কল্কো ঘৃততৈলগুডসৈন্ধবযুক্তো বস্তির্বলবর্ণশুক্রজননো রসাযনশ্চ (১)| দ্বিপঞ্চমূলীকুক্কুটরসসিদ্ধং পযঃ পাদশেষং পিপ্পলীমধুকরাস্নামদনকল্কং শর্করামধুঘৃতযুক্তং স্ত্রীষ্বতিকামানাং বলজননো বস্তিঃ (২)| মযূরমপিত্তপক্ষপাদাস্যান্ত্রং স্থিরাদিভিঃ পলিকৈঃ সজলে পযসি পক্ত্বা ক্ষীরশেষং মদনপিপ্পলীবিদারীশতকুসুমামধুককল্কীকৃতং মধুঘৃতসৈন্ধবযুক্তং বস্তিং দদ্যাত্ স্ত্রীষ্বতিপ্রসক্তক্ষীণেন্দ্রিযেভ্যো বলবর্ণকরম্ (৩)| কল্পশ্চৈষ বিষ্কিরপ্রতুদপ্রসহাম্বুচরেষু স্যাত্, অক্ষীরো রোহিতাদিষু চ মত্স্যেষু (৪)| গোধানকুলমার্জারমূষিকশল্লকমাংসানাং দশপলান্ ভাগান্ সপঞ্চমূলান্ পযসি পক্ত্বা তত্পযঃপিপ্পলীফলকল্কসৈন্ধবসৌবর্চলশর্করামধুঘৃততৈলযুক্তো বস্তির্বল্যো রসাযনঃ ক্ষীণক্ষতস্য সন্ধানকরো মথিতোরস্করথগজহযভগ্নবাতবলাসকপ্রভৃত্যুদাবর্তবাতসক্তমূত্রবর্চশ্শুকাণাং হিততমশ্চ (৫)| কূর্মাদীনামন্যতমপিশিতসিদ্ধং পযো গোবৃষনাগহযনক্রহংসকুক্কুটাণ্ডরসমধুঘৃতশর্করাসৈন্ধবেক্ষুরকাত্মগুপ্তাফলকল্কসংসৃষ্টো বস্তির্বৃদ্ধানামপি বলজননঃ (৬)| কর্কটকরসশ্চটকাণ্ডরসযুক্তঃ সমধুঘৃতশর্করো বস্তিঃ; ইত্যেতে বস্তযঃ পরমবৃষ্যাঃ উচ্চটকেক্ষুরকাত্মগুপ্তাশৃতক্ষীরপ্রতিভোজনানুপানাত্ স্ত্রীশতগামিনং নরং কুর্যুঃ (৭)| গোবৃষবস্তবরাহবৃষণকর্কটচটকসিদ্ধং ক্ষীরমুচ্চটকেক্ষুরকাত্মগুপ্তামধুঘৃতসৈন্ধবযুক্তঃ কিঞ্চিল্লবণিতো বস্তিঃ (৮)| দশমূলমযূরহংসকুক্কুটক্বাথাত্ পঞ্চপ্রসৃতং তৈলঘৃতবসামজ্জচতুষ্প্রসৃতযুক্তং শতপুষ্পামুস্তহপুষাকল্কীকৃতঃ সলবণো বস্তিঃ পাদগুল্ফোরুজানুজঙ্ঘাত্রিকবঙ্ক্ষণবস্তিবৃষণানিলরোগহরঃ (৯)| মৃগবিষ্কিরানূপবিলেশযানামেতেনৈব কল্পেন বস্তযো দেযাঃ (১০)| মধুঘৃতদ্বিপ্রসৃতস্তুল্যোষ্ণোদকঃ শতপুষ্পার্ধপলঃ সৈন্ধবার্ধাক্ষযুক্তো বস্তির্বৃষ্যতমো মূত্রকৃচ্ছ্রপিত্তবাতহরঃ (১১)| সদ্যোঘৃততৈলবসামজ্জচতুষ্প্রস্থং হপুষার্ধপলং সৈন্ধবার্ধাক্ষযুক্তো বস্তির্বৃষ্যতমো মূত্রকৃচ্ছ্রপিত্তব্যাধিহরো রসাযনঃ (১২)| মধুতৈলং চতুঃপ্রসৃতং শতপুষ্পার্ধপলং সৈন্ধবার্ধাক্ষযুক্তো বস্তির্দীপনো বৃংহণো বলবর্ণকরো নিরুপদ্রবো বৃষ্যতমো রসাযনঃ ক্রিমিকুষ্ঠোদাবর্তগুল্মার্শোব্রধ্নপ্লীহমেহহরঃ (১৩)| তদ্বন্মধুঘৃতাভ্যাং পযস্তুল্যো বস্তিঃ পূর্বকল্কেন বলবর্ণকরো বৃষ্যতমো নিরুপদ্রবো বস্তিমেঢ্রপাকপরিকর্তিকামূত্রকৃচ্ছ্রপিত্তব্যাধিহরো রসাযনশ্চ (১৪)| তদ্বন্মধুঘৃতাভ্যাং মাংসরসতুল্যো মুস্তাক্ষযুক্তঃ পূর্ববদ্বস্তির্বাতবলাসপাদহর্ষগুল্মত্রিকোরুজানূরুনিকুঞ্চনবস্তিবৃষণমেঢ্রত্রিকপৃষ্ঠশূলহরঃ (১৫)| সুরাসৌবীরককুলত্থমাংসরসমধুঘৃততৈলসপ্তপ্রসৃতো মুস্তশতাহ্বাকল্কিতঃ সলবণো বস্তিঃ সর্ববাতরোগহরঃ (১৬)| দ্বিপঞ্চমূলত্রিফলাবিল্বমদনফলকষাযো গোমূত্রসিদ্ধঃ কুটজমদনফলমুস্তপাঠাকল্কিতঃ সৈন্ধবযাবশূকক্ষৌদ্রতৈলযুক্তো বস্তিঃ শ্লেষ্মব্যাধিবস্ত্যাটোপবাতশুক্রসঙ্গপাণ্ডুরোগাজীর্ণবিসূচিকালসকেষু দেয ইতি||১৮||
सतित्तिरिः समयूरः सराजहंसः पञ्चमूलीपयः सिद्धः शतपुष्पामधुकरास्नाकुटजमदनफलपिप्पली कल्को घृततैलगुडसैन्धवयुक्तो बस्तिर्बलवर्णशुक्रजननो रसायनश्च (१)| द्विपञ्चमूलीकुक्कुटरससिद्धं पयः पादशेषं पिप्पलीमधुकरास्नामदनकल्कं शर्करामधुघृतयुक्तं स्त्रीष्वतिकामानां बलजननो बस्तिः (२)| मयूरमपित्तपक्षपादास्यान्त्रं स्थिरादिभिः पलिकैः सजले पयसि पक्त्वा क्षीरशेषं मदनपिप्पलीविदारीशतकुसुमामधुककल्कीकृतं मधुघृतसैन्धवयुक्तं बस्तिं दद्यात् स्त्रीष्वतिप्रसक्तक्षीणेन्द्रियेभ्यो बलवर्णकरम् (३)| कल्पश्चैष विष्किरप्रतुदप्रसहाम्बुचरेषु स्यात्, अक्षीरो रोहितादिषु च मत्स्येषु (४)| गोधानकुलमार्जारमूषिकशल्लकमांसानां दशपलान् भागान् सपञ्चमूलान् पयसि पक्त्वा तत्पयःपिप्पलीफलकल्कसैन्धवसौवर्चलशर्करामधुघृततैलयुक्तो बस्तिर्बल्यो रसायनः क्षीणक्षतस्य सन्धानकरो मथितोरस्करथगजहयभग्नवातबलासकप्रभृत्युदावर्तवातसक्तमूत्रवर्चश्शुकाणां हिततमश्च (५)| कूर्मादीनामन्यतमपिशितसिद्धं पयो गोवृषनागहयनक्रहंसकुक्कुटाण्डरसमधुघृतशर्करासैन्धवेक्षुरकात्मगुप्ताफलकल्कसंसृष्टो बस्तिर्वृद्धानामपि बलजननः (६)| कर्कटकरसश्चटकाण्डरसयुक्तः समधुघृतशर्करो बस्तिः; इत्येते बस्तयः परमवृष्याः उच्चटकेक्षुरकात्मगुप्ताशृतक्षीरप्रतिभोजनानुपानात् स्त्रीशतगामिनं नरं कुर्युः (७)| गोवृषबस्तवराहवृषणकर्कटचटकसिद्धं क्षीरमुच्चटकेक्षुरकात्मगुप्तामधुघृतसैन्धवयुक्तः किञ्चिल्लवणितो बस्तिः (८)| दशमूलमयूरहंसकुक्कुटक्वाथात् पञ्चप्रसृतं तैलघृतवसामज्जचतुष्प्रसृतयुक्तं शतपुष्पामुस्तहपुषाकल्कीकृतः सलवणो बस्तिः पादगुल्फोरुजानुजङ्घात्रिकवङ्क्षणबस्तिवृषणानिलरोगहरः (९)| मृगविष्किरानूपबिलेशयानामेतेनैव कल्पेन बस्तयो देयाः (१०)| मधुघृतद्विप्रसृतस्तुल्योष्णोदकः शतपुष्पार्धपलः सैन्धवार्धाक्षयुक्तो बस्तिर्वृष्यतमो मूत्रकृच्छ्रपित्तवातहरः (११)| सद्योघृततैलवसामज्जचतुष्प्रस्थं हपुषार्धपलं सैन्धवार्धाक्षयुक्तो बस्तिर्वृष्यतमो मूत्रकृच्छ्रपित्तव्याधिहरो रसायनः (१२)| मधुतैलं चतुःप्रसृतं शतपुष्पार्धपलं सैन्धवार्धाक्षयुक्तो बस्तिर्दीपनो बृंहणो बलवर्णकरो निरुपद्रवो वृष्यतमो रसायनः क्रिमिकुष्ठोदावर्तगुल्मार्शोब्रध्नप्लीहमेहहरः (१३)| तद्वन्मधुघृताभ्यां पयस्तुल्यो बस्तिः पूर्वकल्केन बलवर्णकरो वृष्यतमो निरुपद्रवो बस्तिमेढ्रपाकपरिकर्तिकामूत्रकृच्छ्रपित्तव्याधिहरो रसायनश्च (१४)| तद्वन्मधुघृताभ्यां मांसरसतुल्यो मुस्ताक्षयुक्तः पूर्ववद्बस्तिर्वातबलासपादहर्षगुल्मत्रिकोरुजानूरुनिकुञ्चनबस्तिवृषणमेढ्रत्रिकपृष्ठशूलहरः (१५)| सुरासौवीरककुलत्थमांसरसमधुघृततैलसप्तप्रसृतो मुस्तशताह्वाकल्कितः सलवणो बस्तिः सर्ववातरोगहरः (१६)| द्विपञ्चमूलत्रिफलाबिल्वमदनफलकषायो गोमूत्रसिद्धः कुटजमदनफलमुस्तपाठाकल्कितः सैन्धवयावशूकक्षौद्रतैलयुक्तो बस्तिः श्लेष्मव्याधिबस्त्याटोपवातशुक्रसङ्गपाण्डुरोगाजीर्णविसूचिकालसकेषु देय इति||१८||
🔊 Audio coming soon
সতিত্তিরিরিত্যাদিক একৈকযোগেন বক্ষ্যমাণানামেকোনত্রিংশতাং বস্তীনাং মধ্যে ত্রযোদশঃ| দ্বিপঞ্চমূলীত্যাদিকশ্চতুর্দশঃ| মযূরমপিত্তপক্ষেত্যাদিকঃ পঞ্চদশঃ| কল্পশ্চৈষ ইত্যাদিনাঽঽতিদেশিকং পঞ্চদশাধিকং শতমাহ| তত্র বিষ্কিরৈঃ “লাবো বর্তীরকশ্চৈব” ইত্যাদিনোক্তৈস্তথা “বর্তকো বর্তিকা” (সূ.অ.২৭) ইত্যাদিনোক্তৈর্বিংশতির্যোগা ভবন্তি; মযুরশ্চাত্র বিষ্কিরপঠিতোঽপি পূর্বোক্তত্বান্নেহ গণ্যতে; প্রতুদৈশ্চ ‘শতপত্র...’ (সূ.অ.২৭) ইত্যাদিনোক্তৈস্ত্রিংশদ্ভবন্তি; তথা প্রসহৈশ্চ ‘গোখরাশ্বতর...’ (সূ.অ.২৭) ইত্যাদিনোক্তৈরেকোনত্রিংশত্; অম্বুচরাশ্চ হংসাদযঃ সপ্তবিংশতিরুক্তাঃ, এতৈঃ সপ্তবিংশতির্ভবন্তি; রোহিতাদিভির্মত্স্যৈর্নব; এবং পঞ্চদশোত্তরং শতং ভবতি| অক্ষীর ইতি রোহিতাদিষু সম্বধ্যতে| গোধানকুলেত্যাদিভিঃ প্রত্যেকং গণনীযেষু ষোডশঃ| কূর্মাদীনামন্যতমেত্যাদিকঃ সপ্তদশঃ| অত্র কূর্মকর্কটাদয একাদশ পঠিতাঃ| তত্র যঃ প্রাযঃ কূর্মেণ ক্রিযতে স প্রত্যেকং গণনাযাং প্রবিশতি| কর্কটাদিভিস্ত্বাদিগ্রহণগৃহীতৈর্যে দশ বস্তযো ভবন্তি তে অতিদেশিকা জ্ঞেযাঃ| গোবৃষবস্তাদিরষ্টাদশঃ| গোবৃষঃ পুংবৃষঃ| কর্কটাদিরেকোনবিংশতিতমঃ| ইত্যেতে বস্তয ইত্যনেন কূর্মাদীনামন্যতমমিত্যাদিগ্রন্থোক্তা বস্তযঃ প্রত্যবমৃশ্যন্তে| উচ্চটকেত্যাদি উচ্চটা স্বনামখ্যাতা, ইক্ষুরকঃ কোকিলাক্ষঃ| দশমূলীত্যাদিকো বিংশতিতমঃ| মৃগবিষ্কিরেত্যাদিনা আতিদেশিকা ঊনষষ্টির্যোগাঃ| তত্র মৃগৈঃ ‘পৃষতঃ শরভো রামঃ’ (সূ.অ.২৭) ইত্যাদিনোক্তৈঃ সপ্তদশ, সপ্তদশভির্বিষ্কিরৈশ্চ সপ্তদশ, লাবাদিভিশ্চ মযূরকুক্কুটবর্জিতৈরুনবিংশত্যা ঊনবিংশতিঃ, আনূপৈশ্চ সৃমরাদিভির্নব, বিলেশযৈঃ শ্বেতশ্যামচতুর্দংষ্ট্রাদিভিশ্চতুর্দশ| মধুঘৃতেত্যাদিক একবিংশতিতমঃ| সদ্যোঘৃততৈলেত্যাদিকো দ্বাবিংশতিতমঃ| মধুতৈলমিত্যাদিকস্ত্রযোবিংশতিতমঃ| তদ্বন্মধুঘৃতাভ্যামিত্যাদিকশ্চতুর্বিংশতিতমঃ| এতদন্তাঃ ষট্ প্রযোগা উক্তা মধুতৈলপ্রধানত্বান্মাধুতৈলিকা জ্ঞেযাঃ| দ্বিপঞ্চমূলীত্যাদিকং কেচিন্ন পঠন্তি, স চ সঙ্খ্যাতিরেকাদ্বস্তিসূত্রীযসিদ্ধিপঠিতত্বাচ্চেহ ন পঠনীয ইতি চ বদন্তি||১৮||
Adhikarana 10 (19(1)) · Śloka 19
অত ঊর্ধ্বং বৃষ্যতমান্ স্নেহান্ বক্ষ্যামঃ| শতাবরীগুডূচীক্ষুবিদার্যামলকদ্রাক্ষাখর্জূরাণাং যন্ত্রপীডিতানাং রসপ্রস্থং পৃথগেকৈকং তদ্বদ্ঘৃততৈলগোমহিষ্যজাক্ষীরাণাং দ্বৌ দ্বৌ দদ্যাত্, জীবকর্ষভকমেদামহামেদাত্বক্ক্ষীরীশৃঙ্গাটকমধূলিকামধুকোচ্চটাপিপ্পলীপুষ্করবীজনীলোত্পলকদম্বপুষ্প- পুণ্ডরীককেশরকল্কান্ পৃষততরক্ষুমাংসকুক্কুটচটকচকোরমত্তাক্ষবর্হিজীবঞ্জীবকুলিঙ্গহংসাণ্ডরসবসামজ্জাদেশ্চ প্রস্থং দত্ত্বা সাধযেত্| ব্রহ্মঘোষশঙ্খপটহভেরীনিনাদৈঃ সিদ্ধং সিতচ্ছত্রকৃতচ্ছাযং গজস্কন্ধমারোপযেদ্ভগবন্তং বৃষধ্বজমভিপূজ্য, তং স্নেহং ত্রিভাগমাক্ষিকং মঙ্গলাশীঃ স্তুতিদেবতার্চনৈর্বস্তিং গমযেত্| নৃণাং স্ত্রীবিহারিণাং নষ্টরেতসাং ক্ষতক্ষীণবিষমজ্বরার্তানাং ব্যাপন্নযোনীনাং বন্ধ্যানাং রক্তগুল্মিনীনাং মৃতাপত্যানামনার্তবানাং চ স্ত্রীণাং ক্ষীণমাংসরুধিরাণাং পথ্যতমং রসাযনমুত্তমং বলীপলিতনাশনং বিদ্যাত্ (১)|১৯|
अत ऊर्ध्वं वृष्यतमान् स्नेहान् वक्ष्यामः| शतावरीगुडूचीक्षुविदार्यामलकद्राक्षाखर्जूराणां यन्त्रपीडितानां रसप्रस्थं पृथगेकैकं तद्वद्घृततैलगोमहिष्यजाक्षीराणां द्वौ द्वौ दद्यात्, जीवकर्षभकमेदामहामेदात्वक्क्षीरीशृङ्गाटकमधूलिकामधुकोच्चटापिप्पलीपुष्करबीजनीलोत्पलकदम्बपुष्प- पुण्डरीककेशरकल्कान् पृषततरक्षुमांसकुक्कुटचटकचकोरमत्ताक्षबर्हिजीवञ्जीवकुलिङ्गहंसाण्डरसवसामज्जादेश्च प्रस्थं दत्त्वा साधयेत्| ब्रह्मघोषशङ्खपटहभेरीनिनादैः सिद्धं सितच्छत्रकृतच्छायं गजस्कन्धमारोपयेद्भगवन्तं वृषध्वजमभिपूज्य, तं स्नेहं त्रिभागमाक्षिकं मङ्गलाशीः स्तुतिदेवतार्चनैर्बस्तिं गमयेत्| नृणां स्त्रीविहारिणां नष्टरेतसां क्षतक्षीणविषमज्वरार्तानां व्यापन्नयोनीनां वन्ध्यानां रक्तगुल्मिनीनां मृतापत्यानामनार्तवानां च स्त्रीणां क्षीणमांसरुधिराणां पथ्यतमं रसायनमुत्तमं वलीपलितनाशनं विद्यात् (१)|१९|
🔊 Audio coming soon
স্নেহবস্তিত্রযার্থং স্নেহত্রযং দর্শযন্নাহ- অত ঊর্ধ্বমিত্যাদি| মত্তাক্ষঃ কোকিলঃ| জীবঞ্জীবঃ বিষদর্শনমৃত্যুঃ| পুষ্করাক্ষঃ হংসবিশেষঃ| ব্রহ্মঘোষঃ বেদধ্বনিঃ| এতে চ ব্রহ্মঘোষাদযোঽদৃষ্টদ্বারা উপকারকা রক্ষঃপ্রভৃতিবীর্যাপহরণার্থং ক্রিযন্তে||১৯(১)||
Adhikarana 11 (19(2)) · Śloka 19
বলাগোক্ষুরকরাস্নাশ্বগন্ধাশতাবরীসহচরাণাং শতং শতমাপোথ্য জলদ্রোণশতে প্রসাধ্যং, তস্মিন্ জলদ্রোণাবশেষে রসে বস্ত্রপূতে বিদার্যামলকস্বরসযোর্বস্তমহিষবরাহবৃষকুক্কুটবর্হিহংসকারণ্ডবসারসাণ্ডরসানাং ঘৃততৈলযোশ্চৈকৈকং প্রস্থমষ্টৌ প্রস্থান্ ক্ষীরস্য দত্ত্বা চন্দনমধুকমধূলিকাত্বক্ক্ষীরীবিসমৃণালনীলোত্পলপটোলাত্মগুপ্তান্নপাকিতালমস্তকখর্জূরমৃদ্বীকাতামলকী- কণ্টকারীজীবকর্ষভকক্ষুদ্রসহামহাসহাশতাবরীমেদাপিপ্পলীহ্রীবেরত্বক্পত্রকল্কাংশ্চ দত্ত্বা সাধযেত্| ব্রহ্মঘোষাদিনা বিধিনা সিদ্ধং বস্তিং দদ্যাত্| তেন স্ত্রীশতং গচ্ছেত্; ন চাত্রাস্তে বিহারাহারযন্ত্রণা কাচিত্| এষ বৃষ্যো বল্যো বৃংহণ আযুষ্যো বলীপলিতনুত্ ক্ষতক্ষীণনষ্টশুক্রবিষমজ্বরার্তানাং ব্যাপন্নযোনীনাং চ পথ্যতমঃ (২)|১৯|
बलागोक्षुरकरास्नाश्वगन्धाशतावरीसहचराणां शतं शतमापोथ्य जलद्रोणशते प्रसाध्यं, तस्मिन् जलद्रोणावशेषे रसे वस्त्रपूते विदार्यामलकस्वरसयोर्बस्तमहिषवराहवृषकुक्कुटबर्हिहंसकारण्डवसारसाण्डरसानां घृततैलयोश्चैकैकं प्रस्थमष्टौ प्रस्थान् क्षीरस्य दत्त्वा चन्दनमधुकमधूलिकात्वक्क्षीरीबिसमृणालनीलोत्पलपटोलात्मगुप्तान्नपाकितालमस्तकखर्जूरमृद्वीकातामलकी- कण्टकारीजीवकर्षभकक्षुद्रसहामहासहाशतावरीमेदापिप्पलीह्रीबेरत्वक्पत्रकल्कांश्च दत्त्वा साधयेत्| ब्रह्मघोषादिना विधिना सिद्धं बस्तिं दद्यात्| तेन स्त्रीशतं गच्छेत्; न चात्रास्ते विहाराहारयन्त्रणा काचित्| एष वृष्यो बल्यो बृंहण आयुष्यो वलीपलितनुत् क्षतक्षीणनष्टशुक्रविषमज्वरार्तानां व्यापन्नयोनीनां च पथ्यतमः (२)|१९|
🔊 Audio coming soon
বলেত্যাদিকং দ্বিতীযং তৈলম্||১৯(২)||
Adhikarana 12 (19) · Śloka 19
সহচরপলশতমুদকদ্রোণচতুষ্ট্যে পক্ত্বা দ্রোণশেষে রসে সুপূতে বিদারীক্ষুরসপ্রস্থাভ্যামষ্টগুণক্ষীরং ঘৃততৈলপ্রস্থং বলামধুকমধূকচন্দনমধূলিকাসারিবামেদামহামেদাকাকোলিক্ষীরকাকোলীপযস্যাগুরুমঞ্জিষ্ঠাব্যাঘ্রনখ- শটীসহচরসহস্রবীর্যাবরাঙ্গলোধ্রাণামক্ষমাত্রৈর্দ্বিগুণশর্করৈঃ কল্কৈঃ সাধযেত্| বহ্মঘোষাদিনা বিধিনা সিদ্ধং বস্তিং দদ্যাত্| এষ সর্বরোগহরো রসাযনো ললিতানাং শ্রেষ্ঠোঽন্তঃপুরচারিণীনাং ক্ষতক্ষযবাতপিত্তবেদনাশ্বাসকাসহরস্ত্রিভাগমাক্ষিকো বলীপলিতনুদ্বর্ণরূপবলমাংসশুক্রবর্ধনঃ (৩)| ইত্যেতে রসাযনাঃ স্নেহবস্তযঃ সতি বিভবে শতপাকাঃ সহস্রপাকা বা কার্যা বীর্যবলাধানার্থমিতি||১৯||
सहचरपलशतमुदकद्रोणचतुष्ट्ये पक्त्वा द्रोणशेषे रसे सुपूते विदारीक्षुरसप्रस्थाभ्यामष्टगुणक्षीरं घृततैलप्रस्थं बलामधुकमधूकचन्दनमधूलिकासारिवामेदामहामेदाकाकोलिक्षीरकाकोलीपयस्यागुरुमञ्जिष्ठाव्याघ्रनख- शटीसहचरसहस्रवीर्यावराङ्गलोध्राणामक्षमात्रैर्द्विगुणशर्करैः कल्कैः साधयेत्| बह्मघोषादिना विधिना सिद्धं बस्तिं दद्यात्| एष सर्वरोगहरो रसायनो ललितानां श्रेष्ठोऽन्तःपुरचारिणीनां क्षतक्षयवातपित्तवेदनाश्वासकासहरस्त्रिभागमाक्षिको वलीपलितनुद्वर्णरूपबलमांसशुक्रवर्धनः (३)| इत्येते रसायनाः स्नेहबस्तयः सति विभवे शतपाकाः सहस्रपाका वा कार्या वीर्यबलाधानार्थमिति||१९||
🔊 Audio coming soon
সহচরপলশতমিত্যাদিকঃ স্নেহস্তৃতীযঃ| সহস্রবীর্যা দূর্বা| বরাঙ্গং গুডত্বক্| শতপাকাঃ সহস্রপাকাশ্চেত্যত্র স্নেহাপেক্ষযা শতগুণেন সহস্রগুণেন বা দ্রবেণ একদৈব পাকং মন্যন্তে কেচিত্||১৯||
Adhikarana 13 (20-22) · Śloka 22
ভবন্তি চাত্র- ইত্যেতে বস্তযঃ স্নেহাশ্চোক্তা যাপনসঞ্জ্ঞিতাঃ| স্বস্থানামাতুরাণাং চ বৃদ্ধানাং চাবিরোধিনাঃ||২০|| অতিব্যবাযশীলানাং শুক্রমাংসবলপ্রদাঃ| সর্বরোগপ্রশমনাঃ সর্বেষ্বৃতুষু যৌগিকাঃ||২১|| নারীণামপ্রজাতানাং নরাণাং চাপ্যপত্যদাঃ| উভযার্থকরা দৃষ্টাঃ স্নেহবস্তিনিরূহযোঃ||২২||
भवन्ति चात्र- इत्येते बस्तयः स्नेहाश्चोक्ता यापनसञ्ज्ञिताः| स्वस्थानामातुराणां च वृद्धानां चाविरोधिनाः||२०|| अतिव्यवायशीलानां शुक्रमांसबलप्रदाः| सर्वरोगप्रशमनाः सर्वेष्वृतुषु यौगिकाः||२१|| नारीणामप्रजातानां नराणां चाप्यपत्यदाः| उभयार्थकरा दृष्टाः स्नेहबस्तिनिरूहयोः||२२||
🔊 Audio coming soon
উভযার্থকরা দৃষ্টা ইতি স্নেহবস্তিনিরূহযোরিপি সাধ্যমর্থং স্নেহনং শোধনং চ কুর্বত ইতি ভাবঃ||২০-২২||
Adhikarana 14 (23) · Śloka 23
ব্যাযামো মৈথুনং মদ্যং মধূনি শিশিরাম্বু চ| সম্ভোজনং রথক্ষোভো বস্তিষ্বেতেষু গর্হিতম্||২৩||
व्यायामो मैथुनं मद्यं मधूनि शिशिराम्बु च| सम्भोजनं रथक्षोभो बस्तिष्वेतेषु गर्हितम्||२३||
🔊 Audio coming soon
যাপনবস্তিষু বর্জনীযমাহ- ব্যাযাম ইত্যাদি||২৩||
Adhikarana 15 (24-28) · Śloka 29
তত্র শ্লোকাঃ - শিখিগোনর্দহংসাণ্ডৈর্দক্ষবদ্বস্তযস্ত্রযঃ| বিংশতির্বিষ্কিরৈস্ত্রিংশত্প্রতুদৈঃ প্রসহৈর্নব||২৪|| বিংশতিশ্চ তথা সপ্তবিংশতিশ্চাম্বুচারিভিঃ| নব মত্স্যাদিভিশ্চৈব শিখিকল্পেন বস্তযঃ||২৫|| দশ কর্কটকাদ্যৈশ্চ কূর্মকল্কেন বস্তযঃ| মৃগৈঃ সপ্তদশৈকোনবিংশতির্বিষ্কিরৈর্দশ ||২৬|| আনূপৈর্দক্ষশিখিবদ্ভূশযৈশ্চ চতুর্দশ| একোনত্রিংশদিত্যেতে সহ স্নেহৈঃ সমাসতঃ||২৭|| প্রোক্তা বিস্তরশো ভিন্না দ্বে শতে ষোডশোত্তরে| এতে মাক্ষিকসংযুক্তাঃ কুর্বন্ত্যতিবৃষং নরম্||২৮|| নাতিযোগং ন বাঽযোগং স্তম্ভিতাস্তে চ কুর্বতে|২৯|
तत्र श्लोकाः - शिखिगोनर्दहंसाण्डैर्दक्षवद्बस्तयस्त्रयः| विंशतिर्विष्किरैस्त्रिंशत्प्रतुदैः प्रसहैर्नव||२४|| विंशतिश्च तथा सप्तविंशतिश्चाम्बुचारिभिः| नव मत्स्यादिभिश्चैव शिखिकल्पेन बस्तयः||२५|| दश कर्कटकाद्यैश्च कूर्मकल्केन बस्तयः| मृगैः सप्तदशैकोनविंशतिर्विष्किरैर्दश ||२६|| आनूपैर्दक्षशिखिवद्भूशयैश्च चतुर्दश| एकोनत्रिंशदित्येते सह स्नेहैः समासतः||२७|| प्रोक्ता विस्तरशो भिन्ना द्वे शते षोडशोत्तरे| एते माक्षिकसंयुक्ताः कुर्वन्त्यतिवृषं नरम्||२८|| नातियोगं न वाऽयोगं स्तम्भितास्ते च कुर्वते|२९|
🔊 Audio coming soon
শিখিগোনর্দেত্যাদিনা উক্তবস্তিসঙ্গ্রহং করোতি| সঙ্গ্রহার্থশ্চ পূর্বমেব ব্যাহৃতঃ| একোনত্রিংশদিত্যেতে ইতি প্রত্যেকং নির্দিষ্টা বস্তযঃ স্নেহৈঃ সমমেকোনত্রিংশদ্ভবন্তীত্যর্থঃ| সমাহারসঙ্খ্যামাহ- দ্বে শতে ষোডশোত্তরে ইতি| তচ্চ যথাঽস্মাভির্ব্যাখ্যাতং তথা ব্যক্তমেব পূর্যতে| অতিবৃষমিতি শুক্রোপচযবন্তম্| স্তম্ভিতাশ্চেতি মধুনা স্তম্ভিতাঃ||২৪-২৮||-
Adhikarana 16 (29) · Śloka 30
মৃদুত্বান্ন নিবর্তন্তে যস্য ত্বেতে প্রযোজিতাঃ||২৯|| সমূত্রৈর্বস্তিভিস্তীক্ষ্ণৈরাস্থাপ্যঃ ক্ষিপ্রমেব সঃ|৩০|
मृदुत्वान्न निवर्तन्ते यस्य त्वेते प्रयोजिताः||२९|| समूत्रैर्बस्तिभिस्तीक्ष्णैरास्थाप्यः क्षिप्रमेव सः|३०|
🔊 Audio coming soon
যাপনাবস্ত্যপ্রবৃত্তৌ কর্তব্যমাহ- মৃদুত্বাদিত্যাদি||২৯||-
Adhikarana 17 (30) · Śloka 31
শোফাগ্নিনাশপাণ্ডুত্বশূলার্শঃপরিকর্তিকাঃ||৩০|| স্যুর্জ্বরশ্চাতিসারশ্চ যাপনাত্যর্থসেবনাত্|৩১|
शोफाग्निनाशपाण्डुत्वशूलार्शःपरिकर्तिकाः||३०|| स्युर्ज्वरश्चातिसारश्च यापनात्यर्थसेवनात्|३१|
🔊 Audio coming soon
যাপনাবস্ত্যতিপ্রযোগে দোষমাহ- শোফেত্যাদি||৩০||-
Adhikarana 18 (31-32) · Śloka 33
অরিষ্টক্ষীরসীধ্বাদ্যা তত্রেষ্টা দীপনী ক্রিযা||৩১|| যুক্ত্যা তস্মান্নিষেবেত যাপনান্ন প্রসঙ্গতঃ| ইত্যুচ্চৈর্ভাষ্যপূর্বাণাং ব্যাপদঃ সচিকিত্সিতাঃ||৩২|| বিস্তরেণ পৃথক্ প্রোক্তাস্তেভ্যো রক্ষেন্নরং সদা|৩৩|
अरिष्टक्षीरसीध्वाद्या तत्रेष्टा दीपनी क्रिया||३१|| युक्त्या तस्मान्निषेवेत यापनान्न प्रसङ्गतः| इत्युच्चैर्भाष्यपूर्वाणां व्यापदः सचिकित्सिताः||३२|| विस्तरेण पृथक् प्रोक्तास्तेभ्यो रक्षेन्नरं सदा|३३|
🔊 Audio coming soon
এতচ্ছোফাদিষু চিকিত্সামাহ- অরিষ্টেত্যাদি| তস্মাদিতি যাপনাত্যর্থপ্রযোগে শোথাদিদর্শনাত্| ন প্রসঙ্গত ইতি ন অভ্যাসতঃ সেবেত| তেভ্যো রক্ষেদিতি উচ্চৈর্ভাষ্যাদিজন্যব্যাপভ্দ্যো রক্ষেত্||৩১-৩২||-
Adhikarana 19 (33) · Śloka 34
কর্মণাং বমনাদিনামসম্যক্করণাপদাম্||৩৩|| যত্রোক্তং সাধনং স্থানে সিদ্ধিস্থানং তদুচ্যতে|৩৪|
कर्मणां वमनादिनामसम्यक्करणापदाम्||३३|| यत्रोक्तं साधनं स्थाने सिद्धिस्थानं तदुच्यते|३४|
🔊 Audio coming soon
সম্প্রতি সিদ্ধিস্থানশব্দস্য নিরুক্তিং দর্শযন্ সিদ্ধিস্থানাভিধেযং বাক্যার্থং সঙ্গৃহ্ণন্নাহ- কর্মণামিত্যাদি| অসম্যক্করণাপদামিতি বমনাদীনামসম্যক্প্রযোগে জনিতানামাপদাং; বমনাদিব্যাপত্প্রতিকারশ্চ সিদ্ধিস্থানার্থঃ প্রধানতযোপদর্শিতঃ; তেন বমনাদিকল্পনাদ্যভিধানমপি অনাগতবমনাদিব্যাপন্নিষেধপ্রযোজনকং সিদ্ধিস্থানে যুক্তমেব||৩৩||-
Adhikarana 20 (34) · Śloka 35
ইত্যধ্যাযশতং বিংশমাত্রেযমুনিবাঙ্মযম্||৩৪|| হিতার্থং প্রাণিনাং প্রোক্তমগ্নিবেশেন ধীমতা|৩৫|
इत्यध्यायशतं विंशमात्रेयमुनिवाङ्मयम्||३४|| हितार्थं प्राणिनां प्रोक्तमग्निवेशेन धीमता|३५|
🔊 Audio coming soon
সিদ্ধিস্থানং সমাপ্য কৃত্স্নং তন্ত্রমুপসংহরতি- ইত্যধ্যাযেত্যাদি| আত্রেযমুনিবাঙ্মযমিতি অনুকৃতাত্রেযবচনভযম্||৩৪||-
Adhikarana 21 (35) · Śloka 36
দীর্ঘমাযুর্যশঃ স্বাস্থ্যং ত্রিবর্গং চাপি পুষ্কলম্||৩৫|| সিদ্ধিং চানুত্তমাং লোকে প্রাপ্নোতি বিধিনা পঠন্|৩৬|
दीर्घमायुर्यशः स्वास्थ्यं त्रिवर्गं चापि पुष्कलम्||३५|| सिद्धिं चानुत्तमां लोके प्राप्नोति विधिना पठन्|३६|
🔊 Audio coming soon
এতত্তন্ত্রাধ্যযনে ফলমাহ- দীর্ঘমাযুরিত্যাদি| ত্রিবর্গমিতি ধর্মার্থকামান্| পুষ্কলমিতি মোক্ষং; কিংবা পুষ্কলমিতি ত্রিবর্গবিশেষণম্| সিদ্ধিমিতি চিকিত্সাপ্রযোগসাধ্যনিষ্পাদকত্বম্| বিধিনা পঠন্নিতি রোগভিষগ্জিতীযোক্তেন পাঠবিধিনা| এতত্সবিংশমধ্যাযশতং পঠতঃ দীর্ঘাযুর্লাভাদযশ্চ এবম্ভূতপাঠজনিতধর্মবশাদেব তথা পাঠজনিতশাস্ত্রাববোধপূর্বকশাস্ত্রানুষ্ঠানাচ্চ ভবন্তি||৩৫||-
Adhikarana 22 (36-40) · Śloka 41
বিস্তারযতি লেশোক্তং সঙ্ক্ষিপত্যতিবিস্তরম্||৩৬|| সংস্কর্তা কুরুতে তন্ত্রং পুরাণং চ পুনর্নবম্| অতস্তন্ত্রোত্তমমিদং চরকেণাতিবুদ্ধিনা||৩৭|| সংস্কৃতং তত্ত্বসম্পূর্ণং ত্রিভাগেনোপলক্ষ্যতে| তচ্ছঙ্করং ভূতপতিং সম্প্রসাদ্য সমাপযত্||৩৮|| অখণ্ডার্থং দৃঢবলো জাতঃ পঞ্চনদে পুরে| কৃত্বা বহুভ্যস্তন্ত্রেভ্যো বিশেষোঞ্ছশিলোচ্চযম্||৩৯|| সপ্তদশৌষধাধ্যাযসিদ্ধিকল্পৈরপূরযত্| ইদমন্যূনশব্দার্থং তন্ত্রদোষবিবর্জিতম্||৪০|| ষড্বিংশতা বিচিত্রাভির্ভূষিতং তন্ত্রযুক্তিভিঃ|৪১|
विस्तारयति लेशोक्तं सङ्क्षिपत्यतिविस्तरम्||३६|| संस्कर्ता कुरुते तन्त्रं पुराणं च पुनर्नवम्| अतस्तन्त्रोत्तममिदं चरकेणातिबुद्धिना||३७|| संस्कृतं तत्त्वसम्पूर्णं त्रिभागेनोपलक्ष्यते| तच्छङ्करं भूतपतिं सम्प्रसाद्य समापयत्||३८|| अखण्डार्थं दृढबलो जातः पञ्चनदे पुरे| कृत्वा बहुभ्यस्तन्त्रेभ्यो विशेषोञ्छशिलोच्चयम्||३९|| सप्तदशौषधाध्यायसिद्धिकल्पैरपूरयत्| इदमन्यूनशब्दार्थं तन्त्रदोषविवर्जितम्||४०|| षड्विंशता विचित्राभिर्भूषितं तन्त्रयुक्तिभिः|४१|
🔊 Audio coming soon
এতচ্ছাস্ত্রসংস্কারোপপত্যুপদর্শনপূর্বকং শাস্ত্রস্য সংস্কারকৌ চরকদৃঢবলৌ দর্শযন্নাহ দৃঢবলঃ- বিস্তারযতীত্যাদি| যস্মাচ্ছাস্ত্রে প্রথমমতিবিস্তারতযা ক্বচিল্লেশোক্ত্যা চ প্রতিপাদিতেষু ন সম্যগর্থাবগমঃ, তেন তদতিবিস্তরলেশোক্তদোষনিরাসার্থং সংস্কর্তা যুজ্যতে, অতঃ তন্ত্রোত্তমমিদং চরকেণ সংস্কৃতম্| পূর্বগ্রন্থস্য চাতীব বিস্তরত্বাদিনা তন্ত্রাভিধানং পূর্বশ্রোতৃজনাভিপ্রাযাদেব বোদ্ধব্যম্; ইদানীন্তনশ্রোতৃপুরুষাভিপ্রাযেণ তু সংস্কর্তুঃ সংস্কারো জ্ঞেযঃ| উক্তং চ- “সঙ্ক্ষেপোক্তমতিহন্তি বিস্তরোক্তং ন গৃহ্যতে| সঙ্ক্ষেপবিস্তরৌ হিত্বা সংস্কুর্যাচ্ছাস্ত্রমাদিতঃ” ইতি| পুরাণং চ পুনর্নবমিতি বিস্তারসঙ্ক্ষেপাদিনা পুনর্নবং কুরুতে| চরকসংস্কারাপূর্ণতাং দর্শযন্ দৃঢবল আহ- তত্বিত্যাদি| তৃতীযো ভাগস্ত্রিভাগঃ| ত্রিভাগাসম্পূর্ণতা চেযমদূরান্তরতযোক্তা, তেন দৃঢবলপ্রতিপাদিতৈকচত্বারিংশদধ্যাযানাং ন সবিংশাধ্যাযশতত্রিভাগতা যুজ্যতে ইতি নোদ্ভাবনীযম্| আত্মনঃ পঞ্চনদপুরভবত্বেন শ্রেষ্ঠপ্রদেশভবত্বং দর্শযতি| আত্মনঃ সংস্কারে তন্ত্রান্তরানীতার্থেন সংস্কারং দর্শযন্নাহ- কৃত্বা বহুভ্য ইত্যাদি| তন্ত্রেভ্যঃ সুশ্রুতবিদেহাদিতন্ত্রেভ্যঃ| বিশেষস্য চরকোক্তার্থাদতিরিক্তরূপস্য উঞ্ছশিলরূপ উচ্চযো বিশেষোঞ্ছশিলোচ্চযঃ; তমন্যতন্ত্রেভ্যঃ কৃত্বা সপ্তদশৌষধাধ্যাযসিদ্ধিকল্পৈরিদমন্যূনশব্দার্থং তন্ত্রদোষবিবর্জিতং ষড্বিংশত্তন্ত্রযুক্তিভির্ভূষিতমপূরযদৃঢবল ইতি যোজনা| তত্র ভূমিপতিতানামণূনাং ধান্যাদিবীজানাং শোধন্যা সংহরণমুঞ্ছঃ; প্রবিরলস্য তু কণিশাদিরূপতযা পতিতস্য চযনং শিলঃ| এতেন তন্ত্রেষু যত্সারভূতং তচ্চরকাচার্যৈঃ সঙ্গৃহীতং; মযা তু উর্বরিতং পরিশিষ্টং কৃত্বা পূরিতমিতি দর্শযতি| অন্যূনশব্দমন্যূনার্থং চেতি অন্যূনশব্দার্থম্| তন্ত্রদোষাশ্চতুর্দশ “পুনরুক্তং দুষ্প্রণীতসূত্রসঙ্গ্রহমক্রমং” (বি.অ.৮) ইত্যাদিনা রোগভিষগ্জিতীযোক্তাস্তৈর্বর্জিতম্ | তন্ত্রযুক্তিভিরিতি বক্ষ্যমাণতন্ত্রযুক্তিভিঃ| বিচিত্রাভিরিতি বিচিত্রার্থন্যাযযুক্তাভিস্তন্ত্রযুক্তিভিঃ||৩৬-৪০||-
Adhikarana 23 (41-44) · Śloka 45
তত্রাধিকরণং যোগো হেত্বর্থোঽর্থঃ পদস্য চ||৪১|| প্রদেশোদ্দেশনির্দেশবাক্যশেষাঃ প্রযোজনম্| উপদেশাপদেশাতিদেশার্থাপত্তিনির্ণযাঃ||৪২|| প্রসঙ্গৈকান্তনৈকান্তাঃ সাপবর্গো বিপর্যযঃ| পূর্বপক্ষবিধানানুমতব্যাখ্যানসংশযাঃ||৪৩|| অতীতানাগতাবেক্ষাস্বসঞ্জ্ঞোহ্যসমুচ্চযাঃ| নিদর্শনং নির্বচনং সন্নিযোগো বিকল্পনম্||৪৪|| প্রত্যুত্সারস্তথোদ্ধারঃ সম্ভবস্তন্ত্রযুক্তযঃ|৪৫|
तत्राधिकरणं योगो हेत्वर्थोऽर्थः पदस्य च||४१|| प्रदेशोद्देशनिर्देशवाक्यशेषाः प्रयोजनम्| उपदेशापदेशातिदेशार्थापत्तिनिर्णयाः||४२|| प्रसङ्गैकान्तनैकान्ताः सापवर्गो विपर्ययः| पूर्वपक्षविधानानुमतव्याख्यानसंशयाः||४३|| अतीतानागतावेक्षास्वसञ्ज्ञोह्यसमुच्चयाः| निदर्शनं निर्वचनं सन्नियोगो विकल्पनम्||४४|| प्रत्युत्सारस्तथोद्धारः सम्भवस्तन्त्रयुक्तयः|४५|
🔊 Audio coming soon
তন্ত্রযুক্তীরেবাহ - তত্রেত্যাদি| অধিকরণং নাম যমর্থমধিকৃত্য প্রবর্ততে কর্তা; যথা “বিঘ্নভূতা যদা রোগা” (সূ.অ.১) ইত্যাদি| অত্র রোগাদিকমধিকৃত্যাযুর্বেদো মহর্ষিভিঃ কৃত ইতি ‘রোগাঃ’ ইত্যধিকরণম্| যোগো নাম যোজনা ব্যস্তানাং পদানামেকীকরণম্| উদাহরণং তাবদ্যথা- প্রতিজ্ঞাহেতূদাহরণোপনযনিগমনানি; তত্র প্রতিজ্ঞা- মাতৃজশ্চাযং গর্ভঃ, হেতুঃ- মাতরমন্তরেণ গর্ভানুপপত্তেঃ, দৃষ্টান্তঃ- কূটাগারঃ, উপনযঃ- যথা নানাদ্রব্যসমুদাযাত্ কূটাগারস্তথা গর্ভনির্বর্তনং, তস্মান্মাতৃজশ্চাযমিত্যেষাং প্রতিজ্ঞাযোগঃ; এবমন্যেঽপি যোগার্থা ব্যাখ্যেযাঃ| হেত্বর্থো নামযদন্যত্রাভিহিতমন্যত্রোপপদ্যতে; যথা- “সমানগুণাভ্যাসো হি ধাতূনাং বৃদ্ধিকারণম্” (সূ.অ.১২) ইতি বাতমধিকৃত্যোক্তং, তত্র বাতস্যেতি বক্তব্যে যদযং সমানশব্দং ধাতূনামিতি করোতি, তেন যথা বাযোস্তথা রসাদীনামপি সমানগুণাভ্যাসো বৃদ্ধিকারণমিতি গম্যতে| পদার্থো নাম পদস্য পদযোঃ পদানাং বাঽর্থঃ পদার্থঃ| তত্র দ্রব্যমিতিপদেন খাদযশ্চেতনাষষ্ঠা উচ্যন্তে; পদযোরর্থো নাম যথা- ‘আযুষো বেদ’ ইতি পদযোরাযুর্বোধকং তন্ত্রমিত্যর্থঃ; এবং পদানামপ্যর্থ উদাহার্যঃ| প্রদেশো নাম যদ্বহুত্বাদর্থস্য কার্ত্স্ন্যেনাভিধাতুমশক্যমেকদেশেনাভিধীযতে; যথা- “অনুপানৈকদেশোঽযমুক্তঃ প্রাযোপযোগিকঃ’ (সূ.অ.২৭) ইত্যাদি| উদ্দেশো নাম সঙ্ক্ষেপাভিধানং; যথা- “হেতুলিঙ্গৌষধজ্ঞানং” (সূ.অ.১), অনেন সর্বাযুর্বেদাভিধেযোদ্দেশঃ| নির্দেশো নাম সঙ্খ্যেযোক্তস্য বিবরণং; যথা- হেতুলিঙ্গৌষধস্য পুনঃ প্রপঞ্চনং “সর্বদা সর্বভাবানাং” ইত্যাদিনা “ইত্যুক্তং কারণং”(সূ.অ.১) ইত্যন্তেন কারণপ্রপঞ্চনমিত্যাদি| বাক্যশেষো নাম যল্লাঘবার্থমাচার্যেণ বাক্যেষু পদমকৃতং গম্যমানতযা পূর্যতে; যথা “প্রবৃত্তির্হেতুভাবানাং” (সূ.অ.১৬) ইত্যত্র ‘অস্তি’ ইতি পদং পূর্যতে, তথা “জাঙ্গলজৈ রসৈঃ” ইত্যত্র মাংসশব্দঃ পূর্যতে| বাক্যেষু চৈত এব পদাঃ শেষাঃ ক্রিযন্তে, যেঽনিবেশিতা অপি প্রতীযন্তে| প্রযোজনং নাম যদর্থং কামযমানঃ প্রবর্ততে; যথা- “ধাতুসাম্যক্রিযা চোক্তা তন্ত্রস্যাস্য প্রযোজনম্” (সূ.অ.১)| উপদেশো নামাপ্তানুশাসনং; যথা- “স্নেহমগ্রে প্রযুঞ্জীত ততঃ স্বেদমনন্তরম্” (সূ.অ.১৩) ইত্যাদি| অপদেশো নাম যত্প্রতিজ্ঞাতার্থসাধনায হেতুবচনং; যথা- “বাতাজ্জলং জলাদ্দেশং দেশাত্ কালং স্বভাবতঃ| বিদ্যাদ্দুষ্পরিহার্যত্বাত্” (বি.অ.৩) ইত্যাদি, তত্র প্রতিজ্ঞাতার্থস্য হেতুবচনং- দুষ্পরিহার্যত্বাদিতি| অতিদেশো নাম যত্কিঞ্চিদেব প্রকাশ্যার্থমনুক্তার্থসাধনাযৈব এবমন্যদপি প্রত্যেতব্যমিতি পরিভাষ্যতে; যথা- “যচ্চান্যদপি কিঞ্চিত্ স্যাদনুক্তমিহ পূজিতম্| বৃতং তদপি চাত্রেযঃ সদৈবাভ্যনুমন্যতে” (সূ.অ.৮) ইতি| অর্থাপত্তির্নাম যদকির্তিতমর্থাদাপদ্যতে সাঽর্থাপত্তিঃ; যথা- নক্তং দধিভোজননিষেধঃ, অর্থাদ্দিবা ভুঞ্জীতেত্যাপদ্যতে| নির্ণযো নাম বিচারিতস্যার্থস্য ব্যবস্থাপনং; যথা- চতুষ্পদভেষজত্বাদি বিচারং কৃত্বাঽভিধীযতে- “যদুক্তং ষোডশকলং পূর্বাধ্যাযে ভেষজং তদ্যুক্তিযুক্তমলমারোগ্যায” (সূ.অ.১০) ইতি| প্রসঙ্গো নাম পূর্বাভিহিতস্যার্থস্য প্রকরণাগতত্বাদিনা পুনরভিধানং; যথা- “তত্রাতিপ্রভাবতাং দৃশ্যানাতিমাত্রদর্শনমতিযোগঃ” (সূ.অ.১১) এবমাদ্যভিধায, পুনঃ “অত্যুগ্রশব্দশ্রবণাচ্ছ্রবণাত্ সর্বশো ন চ” (শা.অ.১) ইত্যাদিনা পূর্বোক্ত এবার্থোঽভিধীযতে| একান্তো নাম যদবধারণেনোচ্যতে; যথা- নিজঃ শরীরদোষোত্থঃ, ত্রিবৃদ্বিরেচযতীত্যাদি| অনৈকান্তো নাম অন্যতরপক্ষানবধারণং, যথা- “যে হ্যাতুরাঃ কেবলাদ্ভেষজাদৃতে ম্রিযন্তে, ন চ তে সর্ব এব ভেষজোপপন্নাঃ সমুত্তিষ্ঠেরন্” (সূ.অ.১০) ইত্যাদি| অপবর্গো নাম সাকল্যেনোদ্দিষ্টস্যৈকদেশাপকর্ষণং; যথা- “ন পর্যুষিতান্নমাদদীতান্যত্র মাংসহরিতকশুষ্কশাকফলভক্ষ্যেভ্যঃ” (সূ.অ.৮) ইতি| অত্র হি সামান্যেন পর্যুষিতভক্ষণনিষেধং কৃত্বা মাংসাদেঃ পর্যুষিতস্যাপি ভক্ষণমপকৃষ্য বিধীযতে| বিপর্যযো নাম অপকৃষ্টাত্ প্রতীপোদাহরণং; যথা- “নিদানোক্তান্যস্য নোপশেরতে বিপরীতানি চোপশেরতে” (নি.অ.৩) ইতি| পূর্বপক্ষো নাম প্রতিজ্ঞাতার্থসন্দূষকং বাক্যং; যথা- “মত্স্যান্ন পযসাঽভ্যবহরেত্” ইতি প্রতিজ্ঞাতস্যার্থস্য “সর্বানেব মত্স্যান্ন পযসাঽভ্যবহরেদন্যত্র চিলিচিমাত্” (সূ.অ.২৬) ইতি| বিধানং নাম সূত্রকারশ্চ বিধায বর্ণযতি; যথা- “মলাযনানি বাধ্যন্তে দুষ্টৈর্মাত্রাধিকৈর্মলৈঃ” ইত্যত্র দুষ্টিশব্দেন মলানাং হীনত্বমধিকত্বমাচার্যগৃহীতমাচার্যো বর্ণযতি- “মলবৃদ্ধিং গুরুতযা লাঘবান্মলসঙ্ক্ষযম্| মলাযনানাং বুধ্যেত সঙ্গোত্সর্গাদতীব চ” (সূ.অ.৭) ইতি; কেচিত্তু প্রকরণানুপূর্ব্যাঽর্থাভিধানং বিধানমাহুঃ, যথা- রসরুধিরমাংসমেদোস্থিমজ্জশুক্রাণামুত্পাদক্রমানুরোধেনাভিধানম্| অনুমতং নাম একীযমতস্যানিবারণেনানুমননং; যথা- “গর্ভশল্যস্য জরাযুঃপ্রপাতনং কর্ম সংশমনমিত্যেকে” (শা.অ.৮) ইত্যাদ্যেকীযমতং প্রতিপাদ্যাপ্রতিষেধাদনুমন্যতে| ব্যাখ্যানং নাম যত্ সর্ববুদ্ধ্যবিষযং ব্যাক্রিযতে, যথা- “প্রথমে মাসি সম্মূর্ছিতঃ সর্বধাতুকলুষীকৃতঃ খেটভূতো ভবত্যব্যক্তবিগ্রহঃ” (শা.অ.৪) ইত্যাদিনাঽস্মদাদ্যবিদিতার্থব্যাকরণম্| সংশযো নাম বিশেষাকাঙ্ক্ষানির্ধারিতোভযবিষযজ্ঞানং, যথা- “মাতরং পিতরং চৈকে মন্যন্তে জন্মকারণম্| স্বভাবং পরনির্মাণং যদৃচ্ছাং চাপরে জনাঃ||” (সূ.অ.১১) ইত্যাদিনোক্তঃ সংশযঃ| অতীতাবেক্ষণং নাম যদতীতমেবোচ্যতে; যথা- “সা কুটী তচ্চ শযনং জ্বরং সংশমযত্যপি” (চি.অ.৩) ইত্যত্র স্বেদাধ্যাযবিহিতকুট্যাদিকমতীতমবেক্ষতে অনাগতাবেক্ষণং নাম যদনাগতং বিধিং প্রমাণিকৃত্যার্থসাধনং; যথা- “অথবা তিক্তসর্পিষঃ” ইত্যাদ্যনাগতাবেক্ষণেনোচ্যতে| স্বসঞ্জ্ঞা নাম যা তন্ত্রকারৈর্ব্যবহারার্থং সঞ্জ্ঞা ক্রিযতে; যথা- জেন্তাকহোলাকাদিকা সঞ্জ্ঞা| ঊহ্যং নাম যদনিবদ্ধং গ্রন্থে প্রজ্ঞযা তর্ক্যত্বেনোপদিশ্যতে; যথা- “পরিসঙ্খ্যাতমপি যদ্যদ্ দ্রব্যমযৌগিকং মন্যেত তত্তদপকর্ষযেত্” (বি.অ.৮) ইতি| সমুচ্চযো নাম যদিদং চেদং চেতি কৃত্বা বিধীযতে; যথা- ‘বর্ণশ্চ স্বরশ্চ’ (ই.অ.১) ইত্যাদি| নিদর্শনং নাম- মূর্খবিদুষাং বুদ্ধিসাম্যবিষযো দৃষ্টান্তঃ; যথা- “বিজ্ঞাতমমৃতং যথা” (সূ.অ.১) ইত্যাদি| নির্বচনং নাম পণ্ডিতবুদ্ধিগম্যো দৃষ্টান্তঃ; যথা- “জ্ঞাযতে নিত্যগস্যেব কালস্যাত্যযকারণম্” (সূ.অ.১৬) ইতি| নিদর্শননির্বচনযোরযং বিশেষঃ- যন্নিদর্শনং মূর্খবিদুষাং বুদ্ধিসামান্যবিষযং, নির্বচনং তু পণ্ডিতবুদ্ধিবেদ্যমেব; কিংবা নির্বচনং নিরুক্তিঃ- যথা- “বিবিধং সর্পতি যতো বিসর্পস্তেন সঞ্জ্ঞিতঃ” (চি.অ.২১) ইত্যাদি| নিযোগো নাম অবশ্যানুষ্ঠেযতযা বিধানং; যথা- “ন ত্বযা স্বেদমূর্চ্ছাপরীতেনাপি পিণ্ডিকৈষা বিমোক্তব্যা” (সূ.অ.১৪) ইত্যাদি| বিকল্পঃ পাক্ষিকাভিধানং; যথা- “সারোদকং বাঽথ কুশোদকং বা” (চি.অ.৬) ইত্যাদি| প্রত্যুত্সারো নাম উপপত্ত্যা পরমতনিবারণং; যথা বার্যোবিদঃ প্রাহ- “রসজানি তু ভূতানি রজসা ব্যাধযঃ স্মৃতাঃ” (সূ.অ.২৫) ইত্যাদি, হিরণ্যাক্ষো নিষেধযতি- “ন হ্যাত্মা রজসঃ স্মৃতঃ” ইত্যাদি| উদ্ধারো নাম পরপক্ষদূষণং কৃত্বা স্বপক্ষোদ্ধরণং; যথা- “যেষামেব হি ভাবানাং সম্পত্ সঞ্জনযেন্নরম্| তেষামেব হি ভাবানাং বিপদ্ব্যাধীনুদীরযেত্” (সূ.অ.২৫) ইত্যাদিনা স্বপক্ষোদ্ধরণম্| সম্ভবো নাম যদ্যস্মিন্নুপপদ্যতে স তস্য সম্ভবঃ; যথা- মুখে পিপ্লুব্যঙ্গনীলিকাদযঃ সম্ভবন্তীত্যাদি| ইত্যেতাঃ ষট্ত্রিংশত্তন্ত্রযুক্তযো ব্যাহৃতাঃ| ভট্টারহরিচন্দ্রেণ ত্বন্যাশ্চতস্রস্তন্ত্রযুক্তযঃ পরিপ্রশ্ন-ব্যাকরণ-ব্যুত্ক্রান্তাভিধান-হেত্বাখ্যা ব্যাহৃতাঃ; তাশ্চ তন্ত্রেঽপঠিতত্বাদেতা স্বেবান্তর্ভাবনীযাঃ| তত্র পরিপ্রশ্ন উদ্দেশেঽন্তর্ভবতি, ব্যাকরণং তু ব্যাখ্যানে, ব্যুত্ক্রান্তাভিধানং নির্দেশপ্রভেদঃ, হেতুশব্দেন যানি প্রত্যক্ষাদীনি প্রমাণান্যুক্তানি তানি হেতাবন্তর্ভবন্তি| ব্যাখ্যা পঞ্চদশপ্রকারা, সপ্তবিধা কল্পনা, একবিংশতিরর্থাশ্রযাঃ, সপ্তদশ তাচ্ছীল্যানি, চতুর্দশ চ তন্ত্রদোষা ভবন্তি, তদুত্তরতন্ত্রে প্রতিপাদিতত্বান্নেহ বিলিখিতা আচার্যেণ (?)||৪১-৪৪||-
Adhikarana 24 (45) · Śloka 46
তন্ত্রে সমাসব্যাসোক্তে ভবন্ত্যেতা হি কৃত্স্নশঃ||৪৫|| একদেশেন দৃশ্যন্তে সমাসাভিহিতে তথা|৪৬|
तन्त्रे समासव्यासोक्ते भवन्त्येता हि कृत्स्नशः||४५|| एकदेशेन दृश्यन्ते समासाभिहिते तथा|४६|
🔊 Audio coming soon
সম্প্রতি তন্ত্রযুক্তীরুদ্দিশ্য তাসাং তন্ত্রে এবানুসরণমাহ- তন্ত্রে সমাসব্যাসোক্তে ইত্যাদি| সমাসাভিহিতে ইত্যনেন অতিসঙ্ক্ষিপ্তে তন্ত্রে নাবশ্যং সর্বাস্তন্ত্রযুক্তযো ভবন্তীতি দর্শযতি, কিংবা সমাসাভিহিতে একদেশেন দৃশ্যন্তে ইতি সম্বন্ধঃ||৪৫||-
Adhikarana 25 (46) · Śloka 47
যথাঽম্বুজবনস্যার্কঃ প্রদীপো বেশ্মনো যথা||৪৬|| প্রবোধনপ্রকাশার্থাস্তথা তন্ত্রস্য যুক্তযঃ|৪৭|
यथाऽम्बुजवनस्यार्कः प्रदीपो वेश्मनो यथा||४६|| प्रबोधनप्रकाशार्थास्तथा तन्त्रस्य युक्तयः|४७|
🔊 Audio coming soon
তন্ত্রযুক্তীনাং কার্যং দৃষ্টান্তেন দর্শযন্নাহ- যথেত্যাদি| যথাঽম্বুজবনস্য সঙ্কুচিতস্য বিস্তারকোঽর্কস্তথা তন্ত্রে সঙ্কুচিতস্যার্থপ্রদেশস্য বিস্তারকাস্তন্ত্রযুক্তযঃ; প্রবোধনাদ্বিস্তারকা ভবন্তীত্যর্কদৃষ্টান্তেন দর্শযতি; দীপদৃষ্টান্তেন তু যথা দীপঃ সন্তমেব তমসা পিহিতং প্রকাশযতি তথা হেত্বাদিকাস্তন্ত্রযুক্তযঃ সন্তমর্থং গূঢং প্রকাশযন্তীতি দর্শযতি| এতদেবার্থদ্বযং তন্ত্রযুক্তীনাং সম্পাদ্যমভিপ্রেত্যোক্তং প্রবোধনপ্রকাশার্থা ইতি||৪৬||-
Adhikarana 26 (47-48) · Śloka 48
একস্মিন্নপি যস্যেহ শাস্ত্রে লব্ধাস্পদা মতিঃ||৪৭|| স শাস্ত্রমন্যদপ্যাশু যুক্তিজ্ঞত্বাত্ প্রবুধ্যতে| অধীযানোঽপি শাস্ত্রাণি তন্ত্রযুক্ত্যা বিনা ভিষক্| নাধিগচ্ছতি শাস্ত্রার্থানর্থান্ ভাগ্যক্ষযে যথা||৪৮||
एकस्मिन्नपि यस्येह शास्त्रे लब्धास्पदा मतिः||४७|| स शास्त्रमन्यदप्याशु युक्तिज्ञत्वात् प्रबुध्यते| अधीयानोऽपि शास्त्राणि तन्त्रयुक्त्या विना भिषक्| नाधिगच्छति शास्त्रार्थानर्थान् भाग्यक्षये यथा||४८||
🔊 Audio coming soon
সম্যক্শাস্ত্রাভ্যাসফলমাহ- একস্মিন্নপীত্যাদি||৪৭-৪৮||
Adhikarana 27 (49-50) · Śloka 50
দুর্গৃহীতং ক্ষিণোত্যেব শাস্ত্রং শস্ত্রমিবাবুধম্| সুগৃহীতং তদেব জ্ঞং শাস্ত্রং শস্ত্রং চ রক্ষতি||৪৯|| (তস্মাদেতাঃ প্রবক্ষ্যন্তে বিস্তরেণোত্তরে পুনঃ| তত্ত্বজ্ঞানার্থমস্যৈব তন্ত্রস্য গুণদোষতঃ)||৫০||
दुर्गृहीतं क्षिणोत्येव शास्त्रं शस्त्रमिवाबुधम्| सुगृहीतं तदेव ज्ञं शास्त्रं शस्त्रं च रक्षति||४९|| (तस्मादेताः प्रवक्ष्यन्ते विस्तरेणोत्तरे पुनः| तत्त्वज्ञानार्थमस्यैव तन्त्रस्य गुणदोषतः)||५०||
🔊 Audio coming soon
শাস্ত্রে দুর্জ্ঞানসম্যক্জ্ঞানযোর্দোষগুণানাহ- দুর্গৃহীতমিত্যাদি| দুর্গৃহীতং শস্ত্রং যথাঽঽত্মন এব করচ্ছেদাদিকমাপাদযতি, তথা দুর্গৃহীতং শাস্ত্রং মিথ্যাভেষজপ্রযোগাদাত্মনোঽপি ব্যাপদমাবহতি, যথা বা শস্ত্রং সুগৃহীতং তস্করাদিভ্যো রক্ষাং করোতি, তথা সুগৃহীতং শাস্ত্রমাত্মন আতুরস্য চ রক্ষামাপাদযতীতি| তস্মাদেতা ইত্যাদিকং শ্লোকমুত্তরে তন্ত্রে তন্ত্রেযুক্তিব্যাকরণে প্রতিপাদকং পঠন্তি, তং চানার্ষং বৃদ্ধা বদন্তি, অগ্নিবেশতন্ত্রে উত্তরতন্ত্রাস্যৈবানার্ষত্বাত্||৪৯-৫০||
Adhikarana 28 (51) · Śloka 51
ইদমখিলমধীত্য সম্যগর্থান্ বিমৃশতি যোঽবিমনাঃ প্রযোগনিত্যঃ| স মনুজসুখজীবিতপ্রদাতা ভবতি ধৃতিস্মৃতিবুদ্ধিধর্মবৃদ্ধঃ||৫১||
इदमखिलमधीत्य सम्यगर्थान् विमृशति योऽविमनाः प्रयोगनित्यः| स मनुजसुखजीवितप्रदाता भवति धृतिस्मृतिबुद्धिधर्मवृद्धः||५१||
🔊 Audio coming soon
তন্ত্রাধ্যযনফলমাহ- ইদমখিলমিত্যাদি| অবিমনা ইতি তন্ত্রার্থাবিচলিতমনাঃ| প্রযোগনিত্য ইতি নিত্যং চিকিত্সা কর্তব্যতযা যস্য সঃ| সুখস্য জীবিতস্য চ প্রদাতা; কিংবা সুকারূপস্য জীবিতস্য প্রদাতা সুখজীবিতপ্রদাতা| ধৃত্যাদীতি উপচিতা ধৃতিস্মৃতিবুদ্ধিধর্মা যস্য স ধৃতিস্মৃতিবুদ্ধিধর্মবৃদ্ধঃ||৫১||
Adhikarana 29 (52-55) · Śloka 55
(যস্য দ্বাদশসাহস্রী হৃদি তিষ্ঠতি সংহিতা| সোঽর্থজ্ঞঃ স বিচারজ্ঞশ্চিকিত্সাকুশলশ্চ সঃ||৫২|| রোগাংস্তেষাং চিকিত্সাং চ স কিমর্থং ন বুধ্যতে| চিকিত্সা বহ্নিবেশস্য সুস্থাতুরহিতং প্রতি||৫৩|| যদিহাস্তি তদন্যত্র যন্নেহাস্তি ন তত্ক্বচিত্| অগ্নিবেশকৃতে তন্ত্রে চরকপ্রতিসংস্কৃতে||৫৪|| সিদ্ধিস্থানেঽষ্টমে প্রাপ্তে তস্মিন্ দৃঢবলেন তু| সিদ্ধিস্থানং স্বসিদ্ধ্যর্থং সমাসেন সমাপিতম্)||৫৫||
(यस्य द्वादशसाहस्री हृदि तिष्ठति संहिता| सोऽर्थज्ञः स विचारज्ञश्चिकित्साकुशलश्च सः||५२|| रोगांस्तेषां चिकित्सां च स किमर्थं न बुध्यते| चिकित्सा वह्निवेशस्य सुस्थातुरहितं प्रति||५३|| यदिहास्ति तदन्यत्र यन्नेहास्ति न तत्क्वचित्| अग्निवेशकृते तन्त्रे चरकप्रतिसंस्कृते||५४|| सिद्धिस्थानेऽष्टमे प्राप्ते तस्मिन् दृढबलेन तु| सिद्धिस्थानं स्वसिद्ध्यर्थं समासेन समापितम्)||५५||
🔊 Audio coming soon
যস্য দ্বাদশসাহস্রীত্যাদিশ্লোকত্রযং কেচিত্ পঠন্তি; তচ্চাপ্রস্তুতমিতি||৫২-৫৫||
Adhikarana puShpikA · Śloka 12
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে উত্তরবস্তিসিদ্ধির্নাম দ্বাদশোঽধ্যাযঃ||১২|| ইতি চরকসংহিতাযাং অষ্টমং সিদ্ধিস্থানং সম্পূর্ণম্| সমাপ্তেযং চরকসংহিতা|
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते सिद्धिस्थाने उत्तरबस्तिसिद्धिर्नाम द्वादशोऽध्यायः||१२|| इति चरकसंहितायां अष्टमं सिद्धिस्थानं सम्पूर्णम्| समाप्तेयं चरकसंहिता|
🔊 Audio coming soon
গৌডাধিনাথরসবত্যধিকারিপাত্রনারাযণস্য তনযঃ সুনযোঽন্তরঙ্গাত্| ভানোরনু প্রথিতলোধ্র্রবলীকুলীনঃ শ্রীচক্রপাণিরিহ কর্তৃপদাধিকারী|| ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং সিদ্ধিস্থানে উত্তরবস্তিসিদ্ধির্নাম দ্বাদশোঽধ্যাযঃ||১২||