6. vamanavirēcanavyāpatsiddhiḥ

Adhikarana 1 (1-2) · Śloka 2

অথাতো বমনবিরেচনব্যাপত্সিদ্ধিং ব্যাখ্যাস্যামঃ| ইতি হ স্মাহ ভগবানাত্রেযঃ||২||

ব্যাপত্সিদ্ধ্যভিধানপ্রসঙ্গাদ্বমনবিরেচনযোরপি ব্যাপত্সিদ্ধিরুচ্যতে, বস্তিব্যাপত্সিদ্ধিস্তু বমনবিরেচনপূর্বকত্বাদ্বস্তেঃ পশ্চাদভিধীযতে; তেন বস্তিব্যাপত্সিদ্ধ্যভিধানেন বস্তেরিহ কর্মভ্যঃ প্রাধান্যমপি দ্যোতিতং; বস্তিপ্রাধান্যং “তস্মাচ্চিকিত্সার্ধমিতি ব্রুবন্তি সর্বাং চিকিত্সামপি বস্তিমেকে” (সি.অ.১) ইত্যনেনোক্তম্| অত্র চানাগতব্যাপচ্চিকিত্সার্থত্বাদ্বমনবিরেচনযোঃ সম্যগ্বিধ্যভিধানং তেন নোত্সূত্রতা বমনবিরেচনবিধ্যভিধানস্য||১-২||

Adhikarana 2 (3) · Śloka 3

অথ শোধনযোঃ সম্যগ্বিধিমূর্ধ্বানুলোমযোঃ| অসম্যক্কৃতযোশ্চৈব দোষান্ বক্ষ্যামি সৌষধান্||৩||

অথেত্যাদৌ সম্যগিতি বিধিবিশেষণম্| ঊর্ধ্বানুলোমযোরিতি বমনবিরেচনযোঃ| দোষানিতি ব্যাপদঃ| শোধনযোশ্চ বিধির্যদ্যপি কল্পনাসিদ্ধ্যুপকল্পনীযাদৌ তত্র তত্রাভিহিতঃ, তথাঽপ্যনুক্তবিশেষপ্রতিপাদনার্থমভিধানং, তত্প্রসঙ্গাচ্চ তত্রাপ্যুক্তোঽর্থ উচ্যতে, সর্বথাঽনুক্তাভিধানং ‘নাতিস্নিগ্ধান্ বিরেচযেত্’ ইত্যাদি জ্ঞেযম্||৩||

Adhikarana 3 (4) · Śloka 4

অত্যুষ্ণবর্ষশীতা হি গ্রীষ্মবর্ষাহিমাগমাঃ| তদন্তরে প্রাবৃডাদ্যাস্তেষাং সাধারণাস্ত্রযঃ||৪||

ঔত্সর্গিকং সংশোধনযোগ্যং কালং দর্শযন্নাহ- অত্যুষ্ণেত্যাদি| অত্যুষ্ণেত্যাদি গ্রীষ্মাদিষু যথাসঙ্খ্যং জ্ঞেযম্| তদন্তরে ইতি গ্রীষ্মাদীনাং মধ্যে| প্রাবৃডাদ্যা ইতি প্রাবৃট্শরদ্বসন্তাঃ| তেষাং সাধারণা ইতি উষ্ণবর্ষশীতানাং সাধারণাঃ; অনুদ্ভূতোষ্ণবর্ষশীতা ইতি যাবত্||৪||

Adhikarana 4 (5-6) · Śloka 6

প্রাবৃট্ শুচিনভৌ জ্ঞেযৌ শরদূর্জসহৌ পুনঃ| তপস্যশ্চ মধুশ্চৈব বসন্তঃ শোধনং প্রতি||৫|| এতানৃতূন্ বিকল্প্যৈবং দদ্যাত্ সংশোধনং ভিষক্| স্বস্থবৃত্তমভিপ্রেত্য ব্যাধৌ ব্যাধিবশেন তু||৬||

প্রাবৃডাদীন্ মাসবিভাগেন দর্শযন্নাহ- প্রাবৃট্ শুচিনভাবিত্যাদি| শুচিনভৌ আষাঢশ্রাবণৌ| ঊর্জসহৌ কার্তিকমার্গশীর্ষৌ| তপস্যঃ ফাল্গুনঃ| মধু চৈত্রঃ| শোধনং প্রতীতি শোধনে কর্তব্যেঽযং যথোক্তঃ প্রাবৃডাদিঋতুবিভাগো ভবতি; স্বস্থবৃত্তৌ রসোত্পত্তৌ বা তস্যাশিতীযোক্ত এব বর্ষাশরদ্ধেমন্তশিশিরবসন্তগ্রীষ্মরূপঃ ঋতুক্রমো ভবতি| এতানৃতূনিতি প্রাবৃডাদীনৃতূন্| বিকল্প্যৈবমিতি যথোক্তমাসবিভাগেন ব্যবস্থাপ্য সংশোধনং দদ্যাত্| এতদুক্তসংশোধনাঙ্গর্তুক্রমবিভাগেনৈব চরকসংস্কারঽপি নবেগান্ধারণীযে “মাধবপ্রথমে মাসি” (সূ.অ.৭) ইত্যাদিনা গ্রন্থেন চৈত্রশ্রাবণাগ্রহাযণেষু বমনাদিসংশোধনমুক্তং, তথা রোগভিষগ্জিতীযে (বি.অ.৮) চ শিশিরং পরিত্যজ্য প্রাবৃডাদিনৈব ঋতুক্রমঃ সংশোধনাঙ্গতযোক্তঃ; তেন, রসবলোত্পাদচিন্তাযাং স্বস্থবৃত্তানুষ্ঠানেষু চ শিশিরাদিক্রমো ভবতি, সংশোধনব্যবস্থাযাং তু প্রাবৃডাদিরিতি প্রাবৃডাদিক্রমোঽযং সংশোধনানুকূলতযাঽঽচার্যেণ কল্পিতো ন পারমার্থিকঃ| যে তু, প্রাবৃডাদিক্রমং গঙ্গাযা দক্ষিণে কূলে, উত্তরেঽপি শিশিরাদিক্রমং বদন্তি, তন্মতে ‘শোধনং প্রতি’ ইতি গ্রন্থোঽনুপপন্নঃ; তেন, “ভূযো বর্ষতি পর্জন্যো গঙ্গাযা দক্ষিণে জলম্| তেন বর্ষাপ্রাবৃডাখ্যৌ ঋতূ তেষাং প্রকল্পিতৌ ” ইত্যাদিনা গ্রন্থেন যদি নাম দেশভেদেনাপি ঋতুক্রমঃ পারমার্থিকোঽভিধীযতে, তথাঽপি নাসাবাচার্যস্যেহাভিমতঃ, প্রপঞ্চিতশ্চাযমর্থঃ সূত্রস্থান এব| অযং চ শোধনকালোপদেশোঽনাত্যযিকে ব্যাধৌ জ্ঞেযঃ, আত্যযিকে তু ঊষ্মাদিপ্রতিকারং কৃত্বা অত্যুষ্ণেঽপি কালে সংশোধনপ্রবৃত্তির্ভবত্যেব, উক্তো হ্যযমর্থো রোগভিষগ্জিতীযে- “আত্যযিকে তু পুনঃ কর্মণি কামমৃতুং বিকল্প্য কৃত্রিমগুণোপধানেন” (বি.অ.৮) ইত্যাদিনা গ্রন্থেন||৫-৬||

Adhikarana 5 (7) · Śloka 7

কর্মণাং বমনাদীনামন্তরেষ্বন্তরেষু চ| স্নেহস্বেদৌ প্রযুঞ্জীত স্নেহং চান্তে প্রযোজযেত্||৭||

কর্মণামিত্যাদৌ অন্তরেষ্বিতি বমনানন্তরং বিরেচনে কর্তব্যে বিরেচনানন্তরং বা বস্তৌ কর্তব্যে স্নেহস্বেদৌ যথোক্তবিধানেন পুনঃ কর্তব্যৌ, ন সকৃত্প্রযুক্তেনৈব স্নেহস্বেদেন পঞ্চকর্মাণি কর্তব্যানীত্যর্থঃ| স্নেহং চান্তে প্রযোজযেদিতি সংশোধনকর্মপরিসমাপ্তৌ সংশোধনজনিতগ্লানিপরিহারার্থং সংশমনীযস্নেহং প্রযোজযেদিত্যর্থঃ||৭||

Adhikarana 6 (8) · Śloka 8

বিসর্পপিডকাশোফকামলাপাণ্ডুরোগিণঃ | অভিঘাতবিষার্তাংশ্চ নাতিস্নিগ্ধান্ বিরেচযেত্||৮||

নাতিস্নিগ্ধানিতি অনতিস্নিগ্ধকাযান্ নরান্||৮||

Adhikarana 7 (9) · Śloka 9

নাতিস্নিগ্ধশরীরায দদ্যাত্ স্নেহবিরেচনম্| স্নেহোত্ক্লিষ্টশরীরায রূক্ষং দদ্যাদ্বিরেচনম্||৯||

অবশ্যকর্তব্যে বিরেচনে সতি অতিস্নিগ্ধাস্নিগ্ধযোঃ সম্যগ্যোগকারকং বিরেচনং দর্শযন্নাহ- নাতীত্যাদি| স্নেহবিরেচনমিতি স্নিগ্ধং বিরেচনমিত্যর্থঃ| অনতিস্নিগ্ধে স্নেহবিরেচনমনতিস্নিগ্ধত্বেন ক্রিযমাণবিরেচনাযোগপ্রতিষেধার্থম্; অতিস্নিগ্ধস্য স্নেহবিরেচনং স্নেহনপ্রকর্ষাদতিবেগং গচ্ছন্ প্রচলিতানপি দোষান্ নিহন্তুং ন শক্নোতি, দোষাস্তু তেন বিরেচনেন স্বস্থানাত্ প্রচ্যাবিতা ভূযঃস্রোতঃসু লীযন্তে, তত্প্রতিষেধার্থং রূক্ষং বিরেচনং সম্যগ্যোগকারকং দদ্যাদিত্যযমাশযঃ||৯||

Adhikarana 8 (10) · Śloka 10

স্নেহস্বেদোপপন্নেন জীর্ণে মাত্রাবদৌষধম্| একাগ্রমনসা পীতং সম্যগ্যোগায কল্পতে||১০||

সম্যগ্যোগকারিকাং সংশোধনসামগ্রীমাহ- স্নেহস্বেদোপপন্নেনেত্যাদি| মাত্রাবদিতি ‘অল্পমাত্রং মহাবেগং’ ইত্যাদিনা বক্ষ্যমাণমল্পমাত্রাবত্ত্বং জ্ঞেযম্| একাগ্রমনসেতি সংশোধনৈকচিত্তেন, কামাদিব্যগ্রমনসো হি বেগবিঘাতাদযোগঃ স্যাত্||১০||

Adhikarana 9 (11-13) · Śloka 13

স্নিগ্ধাত্ পাত্রাদ্যথা তোযমযত্নেন প্রণুদ্যতে| কফাদযঃ প্রণুদ্যন্তে স্নিগ্ধাদ্দেহাত্তথৌষধৈঃ||১১|| আর্দ্রং কাষ্ঠং যথা বহ্নির্বিষ্যন্দযতি সর্বতঃ| তথা স্নিগ্ধস্য বৈ দোষান্ স্বেদো বিষ্যন্দযেত্ স্থিরান্||১২|| ক্লিষ্টং বাসো যথোত্ক্লেশ্য মলঃ সংশোধ্যতেঽম্ভসা| স্নেহস্বেদৈস্তথোত্ক্লেশ্য শোধ্যতে শোধনৈর্মলঃ ||১৩||

স্নেহস্বেদযোঃ ফলং ‘স্নিগ্ধাত্ পাত্রাত্’ ইত্যাদিনা ভূরিদৃষ্টান্তেন দর্শযন্ স্নেহস্বেদযোরবশ্যকর্তব্যতাং সূচযতি| অযত্নেনেতি অল্পাযাসেন| প্রণুদ্যন্তে ইতি আকৃষ্যন্তে| বিষ্যন্দযতি সর্বত ইতি সর্বতঃ স্থিতং দ্রবমাকর্ষতি| অগ্নিদৃষ্টান্তেন স্নিগ্ধগাত্রস্য সম্যগ্দোষহরণমুচ্যতে, তৃতীযদৃষ্টান্তেন তু স্নেহস্বেদযোর্মিলিতযোঃ ফলমুচ্যতে| ক্লিষ্টমিতি ম্লানম্| উত্ক্লেশ্যেতি ক্ষারাগ্নিসম্বন্ধাত্ সমুত্ক্লেশ্য||১১-১৩||

Adhikarana 10 (14) · Śloka 14

অজীর্ণে বর্ধতে গ্লানির্বিবন্ধশ্চাপি জাযতে| পীতং সংশোধনং চৈব বিপরীতং প্রবর্ততে||১৪||

শোধনসম্যগ্যোগসামগ্র্যভিধানে প্রোক্তস্নেহস্বেদযোঃ ফলমভিধায, ক্রমাগতস্য জীর্ণে পীতমিত্যস্য বিপর্যযে দোষমাহ- অজীর্ণে বর্ধতে গ্লানিরিতি; অজীর্ণাবস্থাযাং পীতে শোধনে সতি গ্লানির্মহতী ভবতি| বিপরীতং প্রবর্ততে ইতি বমনমধো যাতি, বিরেচনং চোর্ধ্বং যাতি||১৪||

Adhikarana 11 (15-16) · Śloka 16

অল্পমাত্রং মহাবেগং বহুদোষহরং সুখম্| লঘুপাকং সুখাস্বাদং প্রীণনং ব্যাধিনাশনম্||১৫|| অবিকারি চ ব্যাপত্তৌ নাতিগ্লানিকরং চ যত্| গন্ধবর্ণরসোপেতং বিদ্যান্মাত্রাবদৌষধম্||১৬||

মাত্রাবদিতি যদুক্তং তদ্বিবৃণোতি- অল্পমাত্রমিত্যাদি| অল্পমাত্রং মহাবেগমিতি অল্পমাত্রত্বে সত্যপি প্রশস্তমহাবেগম্| অবিকারীতি ব্যাপত্তাবপি ঈষদ্বিকারকারি| মাত্রাবদিতি প্রশস্তমাত্রাবত্| যদ্যপি চ সুখাস্বাদাদযো মাত্রাযাঃ ফলং ন ভবন্তি, তথাঽপীহ মাত্রাযাঃ প্রশস্তত্বেন দ্রব্যসংস্কারাদিবিশেষাধীনা অপি তে গৃহ্যন্তে; সুখাদ্যাশ্রযদ্রব্যগতত্বমপি হি মাত্রাযাঃ প্রাশস্ত্যমিহ; কিংবা, এবম্ভূতে এব সংশোধনে এতন্মাত্রাবত্ত্বং পরিভাষিতং জ্ঞেযম্||১৫-১৬||

Adhikarana 12 (17) · Śloka 17

বিধূয মানসান্ দোষান্ কামাদীনশুভোদযান্ | একাগ্রমনসা পীতং সম্যগ্যোগায কল্পতে||১৭||

একাগ্রমনসেতি যদুক্তং তদ্বিবৃণোতি- বিধূযেত্যাদি||১৭||

Adhikarana 13 (18) · Śloka 19

নরঃ শ্বো বমনং পাতা ভুঞ্জীত কফবর্ধনম্| সুজরং দ্রবভূযিষ্ঠং, লঘ্বশীতং বিরেচনম্||১৮|| উত্ক্লিষ্টাল্পকফত্বেন ক্ষিপ্রং দোষাঃ স্রবন্তি হি|১৯|

বমনবিরেচনযোঃ পূর্বদিনে যথা ভোক্তব্যং তদাহ- নর ইত্যাদি| এতত্ প্রাগুক্তমপি প্রকরণবশাদ্বিশেষাভিধিত্সযাঽভিধীযতে| পাতেতি পাতুকামঃ| দ্রবভূযিষ্ঠমিতি চ্ছেদঃ| বিরেচনং পাতা লঘু অশীতং চ ভুঞ্জীতেতি সম্বন্ধঃ| এবম্ভূতভোজনোপপত্তিমাহ- উত্ক্লিষ্টেত্যাদি| উত্ক্লিষ্টাল্পকফত্বেনেতি বমনং প্রতি উত্ক্লিষ্টকফত্বেন, বিরেচনং প্রতি ত্বল্পকফত্বেনেতি বিভাগঃ||১৮||-

Adhikarana 14 (19-20) · Śloka 20

পীতৌষধস্য তু ভিষক্ শুদ্ধিলিঙ্গানি লক্ষযেত্||১৯|| ঊর্ধ্বং কফানুগে পিত্তে বিট্পিত্তেঽনুকফে ত্বধঃ| হৃতদোষং বদেত্ কার্শ্যদৌর্বল্যে চেত্ সলাঘবে||২০||

বমনবিরেচনযোঃ শুদ্ধিলিঙ্গানি যদ্যপি প্রাগুক্তানি, তথাঽপীহ শেষৌষধমলাদিবিশেষাভিধানার্থং পুনঃ পীতৌষধস্যেত্যাদিনা তান্যভিধত্তে| কফানুগে পিত্তে ঊর্ধ্বহৃতদোষং বদেত্, বিট্পিত্তে চানুকফে দৃশ্যমানেঽধোহৃতদোষং বদেদিতি যোজনা; এতত্ কফান্তত্বং বিরেচনস্য, বমনস্য চ পিত্তান্তত্বং পূর্বমেব ব্যাহৃতম্| এতত্ পিত্তান্তত্বং কফান্তত্বং বাঽসম্যক্শুদ্ধেঽপি দোষস্যানুপূর্ব্যাঽবস্থানাদ্ভবতীতি কৃত্বা লক্ষণান্তরাণ্যপি এতযোঃ সাহচর্যেণাহ- কার্শ্যদৌর্বল্যে চেত্ সলাঘবে ইতি||১৯-২০||

Adhikarana 15 (21) · Śloka 22

বামযেত্তু ততঃ শেষমৌষধং ন ত্বলাঘবে| স্তৈমিত্যেঽনিলসঙ্গে চ নিরুদ্গারেঽপি বামযেত্||২১|| আলাঘবাত্তনুত্বাচ্চ কফস্যাপত্ পরং ভবেত্|২২|

বিরেচনযোগে সাবশেষ এবৌষধে শুদ্ধিলক্ষণদর্শনে সতি কর্তব্যমাহ- বামযেত্তু ততঃ শেষমৌষধমিতি; শুদ্ধিলক্ষণে জাতে শেষমৌষধমুপলভ্য বিরেচনাতিযোগপ্রতিষেধার্থং বামযেদিত্যর্থঃ| ন ত্বলাঘবে ইত্যনেন লাঘবব্যতিরিক্তশেষশুদ্ধিলক্ষণদর্শনে সত্যপি ন বিরেচনশেষৌষধবমিঃ কর্তব্যা| বমনৌষধপ্রযোগে কর্তব্যমাহ- স্তৈমিত্যে ইত্যাদি| বমনৌষধপ্রযোগে যাবত্ স্তৈমিত্যানিলসঙ্গৌ বর্তেতে, তাবন্নিরুদ্গারেঽপি ভেষজে সতি বমনং কারযিতব্যম্| এতদ্বমনাবধিমাহ- আলাঘবাত্তনুত্বাচ্চ কফস্যেতি| প্রমাদাল্লাঘবতনুত্বযোঃ পরতঃ ক্রিযমাণবমনস্য দোষমাহ- আপত্ পরং ভবেদিতি; আপদিতি অতিযোগলক্ষণা| অন্যে তু, স্তৈমিত্যে ইত্যাদিনাঽপি বিরেচনৌষধস্যৈবাবস্থিকং বমনমুচ্যতে ইত্যাহুঃ||২১||-

Adhikarana 16 (22-23) · Śloka 23

বমিতে বর্ধতে বহ্নিঃ শমং দোষা ব্রজন্তি হি||২২|| বমিতং লঙ্ঘযেত্ সম্যগ্জীর্ণলিঙ্গান্যলক্ষযন্| তানি দৃষ্ট্বা তু পেযাদিক্রমং কুর্যান্ন লঙ্ঘনম্||২৩||

যথোক্তবমনফলমাহ- বমিতে বর্ধতে ইত্যাদিনা| সম্যগ্জীর্ণলিঙ্গান্যলক্ষযন্নিতি সংশোধনভেষজস্য বক্ষ্যমাণসম্যগ্জীর্ণলিঙ্গান্যলক্ষযন্| তানীতি জীর্ণৌষধলিঙ্গানি||২২-২৩||

Adhikarana 17 (24) · Śloka 24

সংশোধনাভ্যাং শুদ্ধস্য হৃতদোষস্য দেহিনঃ| যাত্যগ্নির্মন্দতাং তস্মাত্ ক্রমং পেযাদিমাচরেত্||২৪||

শুদ্ধস্য পেযাদিক্রমোপপত্তিমাহ- সংশোধনাভ্যামিত্যাদি| যদ্যপি নিরূঢস্যাপ্যগ্নিমান্দ্যং ভবতি, তথাঽপি নিরূঢস্য তাদৃগগ্নিমান্দ্যং ন ভবতি যেন পেযাদিক্রমঃ ক্রিযতে, অতো নিরূহব্যুদাসার্থং সংশোধনাভ্যামিতি দ্বিবচনং কৃতম্| যা তু সম্যগ্বিরিক্তলক্ষণে “ঊর্জোঽগ্নিঃ” (সি.অ.১) ইত্যনেনাগ্নিবৃদ্ধিরুক্তা, সা চ বিরেচনৌষধক্ষোভাতিসঙ্গাত্ কৃতাঽগ্নিমান্দ্যাপেক্ষযাঽগ্নিবৃদ্ধিঃ ; তেনেহ যাত্যগ্নির্মন্দতামিতি বচনেন সমং ন বিরোধঃ||২৪||

Adhikarana 18 (25) · Śloka 25

কফপিত্তে বিশুদ্ধেঽল্পং মদ্যপে বাতপৈত্তিকে| তর্পণাদিক্রমং কুর্যাত্ পেযাঽভিষ্যন্দযেদ্ধি তান্||২৫||

তর্পণাদিবিষযমাহ- কফপিত্তে ইত্যাদি| বিশুদ্ধেঽল্পমিতি অসম্যগ্বিশুদ্ধে| তর্পণাদিক্রমে চ পেযাযাঃ স্থানে স্বচ্ছতর্পণং, বিলেপ্যাঃ স্থানে চ ঘনতর্পণং দেযম্||২৫||

Adhikarana 19 (26-27) · Śloka 27

অনুলোমোঽনিলঃ স্বাস্থ্যং ক্ষুত্তৃষ্ণোর্জো মনস্বিতা| লঘুত্বমিন্দ্রিযোদ্গারশুদ্ধির্জীর্ণৌষধাকৃতিঃ||২৬|| ক্লমো দাহোঽঙ্গসদনং ভ্রমো মূর্চ্ছা শিরোরুজা| অরতির্বলহানিশ্চ সাবশেষৌষধাকৃতিঃ||২৭||

জীর্ণৌষধলিঙ্গান্যাহ- অনুলোম ইত্যাদি| ঊর্জঃ বলম্| ইন্দ্রিযশুদ্ধিঃ ইন্দ্রিযপাটবম্| উদ্গারস্য চৌষধগন্ধাদিবিরহিত্বমেব শুদ্ধিঃ||২৬-২৭||

Adhikarana 20 (28) · Śloka 28

অকালেঽল্পাতিমাত্রং চ পুরাণং ন চ ভাবিতম্| অসম্যক্সংস্কৃতং চৈব ব্যাপদ্যেতৌষধং দ্রুতম্||২৮||

যাদৃশমৌষধং ব্যাপদ্যতে তদাহ- অকালে ইত্যাদি| অল্পং বা অতিমাত্রং বাঽল্পাতিমাত্রম্| ন চ ভাবিতমিতি স্বরসৈস্তুল্যবীর্যৈর্বাঽভাবিতম্||২৮||

Adhikarana 21 (29-30) · Śloka 30

আধ্মানং পরিকর্তিশ্চ স্রাবো হৃদ্গাত্রযোর্গ্রহঃ| জীবাদানং সবিভ্রংশঃ স্তম্ভঃ সোপদ্রবঃ ক্লমঃ||২৯|| অযোগাদতিযোগাচ্চ দশৈতা ব্যাপদো মতাঃ| প্রেষ্যভৈষজ্যবৈদ্যানাং বৈগুণ্যাদাতুরস্য চ||৩০||

সংশোধনাযোগাতিযোগজন্যা আবিষ্কৃতা ব্যাপদঃ প্রাহ- আধ্মানমিত্যাদি| (আধ্মানাদযশ্চামী নাবশ্যমযোগাতিযোগান্তে ভবন্তি, তেনোপদ্রবভূতত্বাত্ পৃথগুক্তাঃ|) এতা ব্যাপদঃ প্রেষ্যাদিবৈগুণ্যাদুত্পন্না অযোগাদতিযোগাচ্চ ভবন্তীতি বাক্যার্থঃ| তত্রাধ্মানমযোগাদ্ভবতি, পরিকর্তিকা ত্বতিযোগাত্, স্রাবোঽযোগাত্, হৃদ্গ্রহোঽপ্যযোগাদেব, তথাঽঙ্গগ্রহোঽযোগাচ্চ ভবতি, জীবাদানমতিযোগাত্; বিভ্রংশস্তু গুদভ্রংশ-সঞ্জ্ঞাভ্রংশ-কণ্ড্বাদিলক্ষণভ্রংশভেদাত্ত্রিবিধো বক্তব্যঃ; গুদভ্রংশ-সঞ্জ্ঞাভ্রংশাবতিযোগজন্যৌ, শেষস্তু বিভ্রংশোঽযোগজন্যঃ; উপদ্রবোঽপ্যযোগজন্য এব, ক্লমোঽপ্যযোগজঃ| এতেষাং চাযোগাতিযোগজন্যত্ববিভাগ উত্তরগ্রন্থে স্ফুটো ভবিষ্যতি| যদ্যপি চাযোগাতিযোগমিথ্যাযোগাস্তত্র তত্র কারণত্বেনোক্তাঃ, তথাঽপীহ বমনবিরেচনযোর্মিথ্যাযোগং নেচ্ছতি; যতো দোষাণাং চতুর্বিধৈব প্রবৃত্তির্ভবতি, যত্- অতিপ্রবৃতিঃ, অসম্যক্প্রবৃত্তির্বা, অপ্রবৃত্তিঃ, অল্পপ্রবৃত্তির্বা; তত্রাপ্যপ্রবৃত্ত্যল্পবৃত্তী অযোগগৃহীতে এব; যাঽপি চাত্র প্রাতিলোম্যেন প্রবৃত্তিঃ, সাঽপি দোষস্যাপেক্ষিতস্যাপ্রবর্তকত্বাদযোগগৃহীততৈব; বক্ষ্যতি হি “অযোগঃ প্রাতিলোম্যেন ন চাল্পং বা প্রবর্তনম্” ইতি||২৯-৩০||

Adhikarana 22 (31-34) · Śloka 34

যোগঃ সম্যক্প্রবৃত্তিঃ স্যাদতিযোগোঽতিবর্তনম্| অযোগঃ প্রাতিলোম্যেন ন চাল্পং বা প্রবর্তনম্||৩১|| শ্লেষ্মোত্ক্লিষ্টেন দুর্গন্ধমহৃদ্যমতি বা বহু| বিরেচনমজীর্ণে চ পীতমূর্ধ্বং প্রবর্ততে||৩২|| ক্ষুধার্তমৃদুকোষ্ঠাভ্যাং স্বল্পোত্ক্লিষ্টকফেন বা| তীক্ষ্ণং পীতং স্থিতং ক্ষুব্ধং বমনং স্যাদ্বিরেচনম্||৩৩|| প্রাতিলোম্যেন দোষাণাং হরণাত্তে হ্যকৃত্স্নশঃ| অযোগসঞ্জ্ঞে, কৃচ্ছ্রেণ যাতি দোষো নবাঽল্পশঃ||৩৪||

যোগাতিযোগাযোগস্বরূপমাহ- যোগ ইত্যাদি| অতিবর্তনমিতি সংশোধ্যাতিরিক্তপ্রবর্তনম্| প্রাতিলোম্যেনেতি বমনস্য বিরেচনেন, বিরেচনস্য বমনেন প্রবর্তনম্; এতচ্চ প্রাতিলোম্যপ্রবর্তনং প্রাযো বিবক্ষিতদোষাপ্রবর্তকতযৈবাযোগনিক্ষিপ্তম্| ন চাল্পং বা প্রবর্তনমিতি সর্বথাঽপ্রবর্তনমল্পং বা প্রবর্তনমিতি| স্থিতমিতি ঝটিতি ঊর্ধ্বং গচ্ছত্ | এতত্প্রাতিলোম্যপ্রবৃত্ত্যা যথাঽযোগত্বং তদাহ- প্রাতিলোম্যেনেত্যাদি| প্রাতিলোম্যেনাকৃত্স্নহরণাত্ অযোগসঞ্জ্ঞে তে ইতি যোজ্যম্| প্রাতিলোম্যহরণেঽকৃস্নদোষহরণমেব দর্শযন্নাহ- কৃচ্ছ্রেণেত্যাদি| প্রতিলোমহরণে কৃত্স্নো দোষো ন যাতি, অল্পশো বা যাতীতি ভাবঃ; তেনাকৃত্স্নদোষহরণং প্রতিলোমহরণে উপপন্নমিতি ভাবঃ| ‘কৃচ্ছ্রেণ যদাগচ্ছতি চাল্পশ’ ইতি পাঠে, যচ্ছব্দো হেতৌ; পূর্বত্র পাঠে বা শব্দো হেতৌ||৩১-৩৪||

Adhikarana 23 (35-36) · Śloka 36

পীতৌষধো ন শুদ্ধশ্চেজ্জীর্ণে তস্মিন্ পুনঃ পিবেত্| ঔষধং ন ত্বজীর্ণেঽন্যদ্ভযং স্যাদতিযোগতঃ||৩৫|| কোষ্ঠস্য গুরুতাং জ্ঞাত্বা লঘুত্বং বলমেব চ| অযোগে মৃদু বা দদ্যাদৌষধং তীক্ষ্ণমেব বা||৩৬||

আধ্মানাদীনামযোগাতিযোগৌ কারণত্বেনোক্তৌ, তেন কারণযোরযোগাতিযোগযোঃ প্রথমং হেতুলিঙ্গচিকিত্সিতানি প্রাহ- পীতৌষধ ইত্যাদি| জীর্ণে ইতি ঔষধে জীর্ণে| পুনঃ পিবেদিতি তদহরেব| ভযং স্যাদতিযোগত ইতি পূর্বাজীর্ণৌষধনবীনৌষধাভ্যামতিযোগঃ স্যাত্| মৃদু বা দদ্যাদিত্যাদৌ গুরুকোষ্ঠে বলবতি তীক্ষ্ণং, লঘুকোষ্ঠে দুর্বলে চ মৃদু দদ্যাদিতি ব্যবস্থা||৩৫-৩৬||

Adhikarana 24 (37) · Śloka 37

বমনং ন তু দুশ্ছর্দং দুষ্কোষ্ঠং ন বিরেচনম্| পাযযেতৌষধং ভূযো হন্যাত্ পীতং পুনর্হি তৌ||৩৭||

পুনর্বমনবিরেচনাদানবিষযৌ প্রাহ- বমনং ন ত্বিত্যাদি| পুনঃ পীতং তু হন্যাদিত্যর্থঃ||৩৭||

Adhikarana 25 (38-39) · Śloka 39

অস্নিগ্ধাস্বিন্নদেহস্য রূক্ষস্যানবমৌষধম্| দোষানুত্ক্লিশ্য নির্হর্তুমশক্তং জনযেদ্গদান্||৩৮|| বিভ্রংশং শ্বযথুং হিক্কাং তমসো দর্শনং ভৃশম্ | পিণ্ডিকোদ্বেষ্টনং কণ্ডূমূর্বোঃ সাদং বিবর্ণতাম্||৩৯||

স্তোকপ্রবৃত্তিরূপমযোগং কারণভেদেনাহ- অস্নিগ্ধেত্যাদি| অস্নিগ্ধস্যেতি অসম্যক্স্নিগ্ধস্য| রূক্ষস্যেতি ন মনাগপি স্নিগ্ধস্য| অনবমিতি জীর্ণতযা মন্দবীর্যম্| নির্হর্তুমিতি নিঃশেষেণ হর্তুম্| বিভ্রংশমিতি বিপরীতপ্রবৃত্তিসামর্থ্যম্||৩৮-৩৯||

Adhikarana 26 (40-44) · Śloka 44

স্নিগ্ধস্বিন্নস্য চাত্যল্পং দীপ্তাগ্নের্জীর্ণমৌষধম্| শীতৈর্বা স্তব্ধমামে বা দোষানুত্ক্লিশ্য নাহরেত্||৪০|| তানেব জনযেদ্রোগানযোগঃ সর্ব এব সঃ| বিজ্ঞায মতিমাংস্তত্র যথোক্তাং কারযেত্ ক্রিযাম্||৪১|| তং তৈললবণাভ্যক্তং স্বিন্নং প্রস্তরসঙ্করৈঃ| পাযযেত পুনর্জীর্ণে সমূত্রৈর্বা নিরূহযেত্||৪২|| নিরূঢং চ রসৈর্ধান্বৈর্ভোজযিত্বাঽনুবাসযেত্| ফলমাগধিকাদারুসিদ্ধতৈলেন মাত্রযা||৪৩|| স্নিগ্ধং বাতহরৈঃ স্নেহৈঃ পুনস্তীক্ষ্ণেন শোধযেত্| ন চাতিতীক্ষ্ণেন ততো হ্যতিযোগস্তু জাযতে||৪৪||

অপরমযোগমাহ- স্নিগ্ধস্বিন্নস্য চেত্যাদি| জীর্ণমিতি অল্পত্বাদ্দীপ্তাগ্নিত্বাচ্চ জীর্ণম্| আমে ইতি অপক্বে দোষে, ‘পীতং’ ইতি শেষঃ| এতেঽত্রাযোগলক্ষণত্রযেণ যে প্রতিপাদিতা গদা ন তে ভিন্নসামগ্রীজন্যা ভিন্নচিকিত্সা বা, তেন ন পূর্বমযোগজন্যব্যাপত্তিপ্রস্তাবে পঠিতাঃ; এবমতিযোগলক্ষণতযা বক্ষ্যমাণগদেষ্বপি বাচ্যম্| যথোক্তমিতি ‘পীতৌষধো ন শুদ্ধশ্চেত্’ ইত্যাদিনোক্তং; কিংবাঽগ্রে ‘তং তৈল’ ইত্যাদিগ্রন্থেনোক্তম্| পাযযেতেতি সংশোধনং পাযযেত| ধান্বৈরিতি ধন্বমৃগপক্ষিমাংসরসৈঃ||৪০-৪৪||

Adhikarana 27 (45-51) · Śloka 51

অতিতীক্ষ্ণং ক্ষুধার্তস্য মৃদুকোষ্ঠস্য ভেষজম্| হৃত্বাঽঽশু বিট্পিত্তকফান্ ধাতূন্বিস্রাবযেদ্দ্রবান্||৪৫|| বলস্বরক্ষযং দাহং কণ্ঠশোষং ভ্রমং তৃষাম্| কুর্যাচ্চ মধুরৈস্তত্র শেষমৌষধমুল্লিখেত্||৪৬|| বমনে তু বিরেকঃ স্যাদ্বিরেকে বমনং পুনঃ | পরিষেকাবগাহাদ্যৈঃ সুশীতৈঃ স্তম্ভযেচ্চ তত্||৪৭|| কষাযমধুরৈঃ শীতৈরন্নপানৌষধৈস্তথা| রক্তপিত্তাতিসারঘ্নৈর্দাহজ্বরহরৈরপি||৪৮|| অঞ্জনং চন্দনোশীরমজ্জাসৃক্শর্করোদকম্| লাজচূর্ণৈঃ পিবেন্মন্থমতিযোগহরং পরম্||৪৯|| শুঙ্গাভির্বা বটাদীনাং সিদ্ধাং পেযাং সমাক্ষিকাম্| বর্চঃসাঙ্গ্রাহিকৈঃ সিদ্ধং ক্ষীরং ভোজ্যং চ দাপযেত্||৫০|| জাঙ্গলৈর্বা রসৈর্ভোজ্যং পিচ্ছাবস্তিশ্চ শস্যতে| মধুরৈরনুবাস্যশ্চ সিদ্ধেন ক্ষীরসর্পিষা||৫১||

অতিযোগস্য হেত্বাদিকমাহ- অতিতীক্ষ্ণমিত্যাদি| ইযং চ সামগ্রী বিরেচনাতিযোগস্যৈব ঘটতে; যতো মৃদুকোষ্ঠে বুভুক্ষিতে চ বিট্পিত্তকফহরণক্রমেণ চ সৈবাতিযুজ্যতে ; বমনাতিযোগসামগ্রী চানেনোদাহরণেনোন্নেযা; কিংবা, অতিতীক্ষ্ণমিতি পদেনৈব বমনস্যাপ্যতিতীক্ষ্ণত্বমতিযোগকারণমুক্তং, বিট্পিত্তকফহরণং যথাযোগ্যতযা ক্রমেণ বিরেচনে বমনে চ বোদ্ধব্যম্| শেষমৌষধমুল্লিখেদিতি তাদাত্বিকী চিকিত্সা| মৃদ্বিতিপদং বমনেন বিরেচনেন চ সম্বধ্যতে| বটাদীনামিতি ন্যগ্রোধোদুম্বরাশ্বত্থকপীতনানাম্| বর্চঃসঙ্গ্রাহিকাঃ ষড্বিরেচনশতাশ্রিতীযোক্তাঃ প্রিযঙ্গ্বনন্তাদযঃ||৪৫-৫১||

Adhikarana 28 (52-56) · Śloka 56

বমনস্যাতিযোগে তু শীতাম্বুপরিষেচিতঃ| পিবেত্ কফহরৈর্মন্থং সঘৃতক্ষৌদ্রশর্করম্||৫২|| সোদ্গারাযাং ভৃশং বম্যাং মূর্চ্ছাযাং ধান্যমুস্তযোঃ| সমধূকাঞ্জনং চূর্ণং লেহযেন্মধুসংযুতম্||৫৩|| বমতোঽন্তঃপ্রবিষ্টাযাং জিহ্বাযাং কবলগ্রহাঃ| স্নিগ্ধাম্ললবণৈর্হৃদ্যৈর্যূষক্ষীররসৈর্হিতাঃ||৫৪|| ফলান্যম্লানি খাদেযুস্তস্য চান্যেঽগ্রতো নরাঃ| নিঃসৃতাং তু তিলদ্রাক্ষাকল্কলিপ্তাং প্রবেশযেত্||৫৫|| বাগ্গ্রহানিলরোগেষু ঘৃতমাংসোপসাধিতাম্| যবাগূং তনুকাং দদ্যাত্ স্নেহস্বেদৌ চ বুদ্ধিমান্||৫৬||

পুরতোঽম্লফলখাদনং মুখস্রাবণেন জিহ্বাস্তব্ধত্বং হন্তুম্ | অতিযোগে নিঃসৃতামিতি জিহ্বাবিশেষণম্||৫২-৫৬||

Adhikarana 29 (57) · Śloka 57

বমিতশ্চ বিরিক্তশ্চ মন্দাগ্নিশ্চ বিলঙ্ঘিতঃ| অগ্নিপ্রাণবিবৃদ্ধ্যর্থং ক্রমং পেযাদিকং ভজেত্ ||৫৭||

অতিযোগেঽপি যথা পেযাদিক্রমো ভবতি তদাহ- বমিতশ্চেত্যাদি| অতিহরণাদতিবমিতোঽতিবিরিক্তশ্চেতি বোদ্ধব্যম্||৫৭||

Adhikarana 30 (58-60) · Śloka 60

বহুদোষস্য রূক্ষস্য হীনাগ্নেরল্পমৌষধম্| সোদাবর্তস্য চোত্ক্লিশ্য দোষান্মার্গান্নিরুধ্য চ||৫৮|| ভৃশমাধ্মাপযেন্নাভিং পৃষ্ঠপার্শ্বশিরোরুজম্| শ্বাসবিণ্মূত্রবাতানাং সঙ্গং কুর্যাচ্চ দারুণম্||৫৯|| অভ্যঙ্গস্বেদবর্ত্যাদি সনিরূহানুবাসনম্| উদাবর্তহরং সর্বং কর্মাধ্মাতস্য শস্যতে||৬০||

অযোগাতিযোগযোরাধ্মানাদিব্যাপদাং যথাক্রমং হেতুলিঙ্গচিকিত্সাদি নির্দিশন্নাহ- বহুদোষস্যেত্যাদি| এতাশ্চ ব্যাপদো নাবশ্যমতিযোগাযোগযোর্ভবন্তি, উপদ্রবভূতত্বাত্ ; অত এবোপকল্পনীযে- “অতিযোগাযোগনিমিত্তানিমানুপদ্রবান্ বিদ্যাত্”- “আধ্মানং পরিকর্তিকা”(সূ.অ.১৫) ইত্যাদিনা গ্রন্থেন এতা দশ ব্যাপদঃ প্রতিপাদিতাঃ||৫৮-৬০||

Adhikarana 31 (61-63) · Śloka 63

স্নিগ্ধেন গুরুকোষ্ঠেন সামে বলবদৌষধম্| ক্ষামেণ মৃদুকোষ্ঠেন শ্রান্তেনাল্পবলেন বা||৬১|| পীতং গত্বা গুদং সামমাশু দোষং নিরস্য চ| তীব্রশূলাং সপিচ্ছাস্রাং করোতি পরিকর্তিকাম্||৬২|| লঙ্ঘনং পাচনং সামে রূক্ষোষ্ণং লঘুভোজনম্| বৃংহণীযো বিধিঃ সর্বঃ ক্ষামস্য মধুরস্তথা||৬৩||

পরিকর্তিকামাহ- স্নিগ্ধেনেত্যাদি| পীতং গত্বা গুদমিত্যাদি বিরেচনাতিযোগজন্যপরিকর্তিকাযাং সঙ্গতং, ন বমনাতিযোগজন্যপরিকর্তিকাযাম্; উপকল্পনীযে চ সাক্ষাদ্বমনাযোগাতিযোগজন্যতযৈবাধ্মানাদয উক্তাঃ, তেনানুক্তোঽপি বমনব্যাপত্তৌ পরিকর্তোঽনেনোদাহরণেন কল্পনীযঃ; তন্ত্রান্তরেঽপ্যুক্তং- ‘যা তু পরিকর্তিকা বিরেচনে, তদ্বমনে কণ্ঠকর্ষণং; যোঽধঃপরিস্রাবো বিরেচনে, স বমনে কফপ্রসেকঃ” (সু.চি.অ.৩৪) ইতি; তদনযা দিশা আধ্মানাদীনি বমনবিরেচনযোরযোগাতিযোগজন্যতযা ব্যাখ্যাতানীত্যেকে| আশু দোষং নিরস্যেতি বমনাতিযোগজন্যেযং ব্যাপত্| অত্র লঙ্ঘনাদিক্রিযা অতিযোগে সত্যপ্যামপাচনায জ্ঞেযা| ক্ষামেণ মৃদুকোষ্ঠেনেত্যাদিসম্প্রাপ্তিজনিতস্য ক্ষামপুরুষপ্রভবস্য লঙ্ঘনপাচনাদ্যমুপক্রান্তমেব||৬১-৬৩||

Adhikarana 32 (64-67) · Śloka 67

আমে জীর্ণেঽনুবন্ধশ্চেত্ ক্ষারাম্লং লঘু শস্যতে| পুষ্পকাসীসমিশ্রং বা ক্ষারেণ লবণেন বা||৬৪|| সদাডিমরসং সর্পিঃ পিবেদ্বাতেঽধিকে সতি| দধ্যম্লং ভোজনে পানে সংযুক্তং দাডিমত্বচা||৬৫|| দেবদারুতিলানাং বা কল্কমুষ্ণাম্বুনা পিবেত্| অশ্বত্থোদুম্বরপ্লক্ষকদম্বৈর্বা শৃতং পযঃ||৬৬|| কষাযমধুরং শীতং পিচ্ছাবস্তিমথাপি বা| যষ্টীমধুকসিদ্ধং বা স্নেহবস্তিং প্রদাপযেত্||৬৭||

আমাবস্থাকর্তব্যমাহ- আমে জীর্ণ ইত্যাদি| ক্ষারাম্লং লঘু শস্যত ইতি অতীসারে যদুক্তং- “চাঙ্গেরীকোলদধ্যম্লনাগরক্ষারসংযুতম্| ঘৃতং” (চি.অ.১৯) ইতি; লঘুমাত্রং চ শস্যত ইতি জ্ঞেযম্| পুষ্পকাসীসমিত্যত্র পুষ্পশব্দেন কেচিত্ সাঙ্গ্রাহিকানি ধাতকীকুসুমাদীনি গ্রাহযন্তি||৬৪-৬৭||

Adhikarana 33 (68-70) · Śloka 70

অল্পং তু বহুদোষস্য দোষমুত্ক্লিশ্য ভেষজম্| অল্পাল্পং স্রাবযেত্ কণ্ডূং শোফং কুষ্ঠানি গৌরবম্||৬৮|| কুর্যাচ্চাগ্নিবলোত্ক্লেশস্তৈমিত্যারুচিপাণ্ডুতাঃ| পরিস্রাবঃ স, তং দোষং শমযেদ্বামযেদপি||৬৯|| স্নেহিতং বা পুনস্তীক্ষ্ণং পাযযেত্ বিরেচনম্| শুদ্ধে চূর্ণাসবারিষ্টান্ সংস্কৃতাংশ্চ প্রদাপযেত্||৭০||

অল্পমিত্যাদিনা পরিস্রাবমাহ| শমযেদ্বামযেদপীত্যাদৌ অল্পদোষে শমনং, বহুদোষে ঊর্ধ্বগতদোষে তু বমনমিতি ব্যবস্থা| বামযেদপীত্যত্রাপি স্নেহিতং পুনরিতি সম্বধ্যতে| চূর্ণাসবারিষ্টা গ্রহণ্যর্শশ্চিকিত্সাদিষু জ্ঞেযাঃ||৬৮-৭০||

Adhikarana 34 (71-75) · Śloka 75

পীতৌষধস্য বেগানাং নিগ্রহান্মারুতাদযঃ| কুপিতা হৃদযং গত্বা ঘোরং কুর্বন্তি হৃদ্গ্রহম্||৭১|| স হিক্কাকাসপার্শ্বার্তিদৈন্যলালাক্ষিবিভ্রমৈঃ| জিহ্বাং খাদতি নিঃসঞ্জ্ঞো দন্তান্ কিটিকিটাপযন্||৭২|| ন গচ্ছেদ্বিভ্রমং তত্র বামযেদাশু তং ভিষক্| মধুরৈঃ পিত্তমূর্চ্ছার্তং কটুভিঃ কফমূর্চ্ছিতম্||৭৩|| পাচনীযৈস্ততশ্চাস্য দোষশেষং বিপাচযেত্| কাযাগ্নিং চ বলং চাস্য ক্রমেণোত্থাপযেত্ততঃ ||৭৪|| পবনেনাতিবমতো হৃদযং যস্য পীড্যতে| তস্মৈ স্নিগ্ধাম্ললবণং দদ্যাত্ পিত্তকফেঽন্যথা||৭৫||

পীতৌষধস্যেত্যাদিনা হৃদ্গ্রহমাহ| ন গচ্ছেদ্বিভ্রমং তত্রেতি হৃদ্গ্রহপীডিতোঽযং ম্রিযমাণো বাঽযমিতি ভ্রান্তিং ন গচ্ছেদিত্যর্থঃ| বমনং চাত্র মূর্চ্ছিতে দুঃশকপ্রযোগং, তেন মূর্চ্ছারম্ভ এব বমনং কারযিতব্যং; কিংবা মূর্চ্ছাযামপ্যঙ্গুলীপ্রবেশাদিনা বমনং কারযিতব্যম্| পিত্তমূর্চ্ছার্তমিতি পিত্তপ্রবলদোষজনিতমূর্চ্ছার্তম্| অতিবমত ইতি বমনাযাতিপ্রবাহণং কুর্বতঃ| পিত্তকফেঽন্যথেতি পিত্তে কফে বা হৃদযপীডাকরে স্নিগ্ধাম্ললবণবিপরীতং রূক্ষতিক্তকটুকাদিক্রমং কুর্যাত্||৭১-৭৫||

Adhikarana 35 (76-77) · Śloka 77

পীতৌষধস্য বেগানাং নিগ্রহেণ কফেন বা| রুদ্ধোঽতি বা বিশুদ্ধস্য গৃহ্ণাত্যঙ্গানি মারুতঃ||৭৬|| স্তম্ভবেপথুনিস্তোদসাদোদ্বেষ্টনমন্থনৈঃ| তত্র বাতহরং সর্বং স্নেহস্বেদাদি কারযেত্ ||৭৭||

পীতৌষধস্যেত্যাদিনা অঙ্গগ্রহণমযোগজমতিযোগজং চাহ| কফেন বা রুদ্ধো দোষঃ পুনরঙ্গানি নিগৃহ্ণাতি; শুদ্ধস্য বা মারুতঃ কুপিতোঽঙ্গানি প্রতিগৃহ্ণাতি স্তম্ভাদিভিঃ||৭৬-৭৭||

Adhikarana 36 (78-84) · Śloka 84

অতিতীক্ষ্ণং মৃদৌ কোষ্ঠে লঘুদোষস্য ভেষজম্| দোষান্ হৃত্বা বিনির্মথ্য জীবং হরতি শোণিতম্||৭৮|| তেনান্নং মিশ্রিতং দদ্যাদ্বাযসায শুনেঽপি বা| ভুঙ্ক্তে তচ্চেদ্বদেজ্জীবং ন ভুঙ্ক্তে পিত্তমাদিশেত্||৭৯|| শুক্লং বা ভাবিতং বস্ত্রমাবানং কোষ্ণবারিণা| প্রক্ষালিতং বিবর্ণং স্যাত্ পিত্তে শুদ্ধং তু শোণিতে||৮০|| তৃষ্ণামূর্চ্ছামদার্তস্য কুর্যাদামরণাত্ ক্রিযাম্| তস্য পিত্তহরীং সর্বামতিযোগে চ যা হিতা ||৮১|| মৃগগোমহিষাজানাং সদ্যস্কং জীবতামসৃক্| পিবেজ্জীবাভিসন্ধানং জীবং তদ্ধ্যাশু গচ্ছতি ||৮২|| তদেব দর্ভমৃদিতং রক্তং বস্তিং প্রদাপযেত্| শ্যামাকাশ্মর্যবদরীদূর্বোশীরৈঃ শৃতং পযঃ||৮৩|| ঘৃতমণ্ডাঞ্জনযুতং শীতং বস্তিং প্রদাপযেত্| পিচ্ছাবস্তিং সুশীতং বা ঘৃতমণ্ডানুবাসনম্||৮৪||

অতিতীক্ষ্ণমিত্যাদিনা জীবাদানমাহ| লঘুদোষস্যেতি স্বল্পদোষস্য| বিনির্মথ্যেতি শোণিতমেব ক্ষোভযিত্বা | জীবমিতি জীবনহেতুধাতুরূপং শোণিতম্| শোণিতং কিঞ্চিদ্রক্তপিত্তক্ষোভাদ্ভবতি, কিঞ্চিচ্চ জীবশোণিতং ভবতি; তদ্বিশেষপরীক্ষার্থমাহ- তেনান্নমিত্যাদি| পিত্তমাদিশেদিতি শোণিতগতং পিত্তমাদিশেদ্ রক্তপিত্তমিতি যাবত্| আবানমিতি শুষ্কম্| পিত্তে ইতি রক্তপিত্তে সতি ক্ষালিতং বস্ত্রং বিবর্ণং ভবতি, জীবশোণিতে তু সতি শুদ্ধং বস্ত্রং ভবতি| পরীক্ষা চ চিকিত্সাভেদার্থমেব; রক্তপিত্তে রক্তপিত্তহরী ক্রিযা, জীবশোণিতং তু দৃষ্ট্বা ‘তৃষ্ণামূর্চ্ছামদার্তস্য’ ইত্যাদিনোক্তা কর্তব্যা| অতিযোগে চ যা হিতেতি অত্রৈব ‘পরিষেকাবগাহাদ্যৈঃ সুশীতৈঃ স্তম্ভযেচ্চ তম্’ ইত্যাদিনোক্তা জ্ঞেযা| জীবং তদ্ধ্যাশু গচ্ছতীতি অসৃক্প্রভাবাদাশ্বেব শোণিতরূপতাং যাতি সদ্যস্কমসৃক্| শ্যামেত্যাদৌ শ্যামা প্রিযঙ্গুঃ||৭৮-৮৪||

Adhikarana 37 (85-87) · Śloka 87

গুদং ভ্রষ্টং কষাযৈশ্চ স্তম্ভযিত্বা প্রবেশযেত্| সাম গান্ধর্বশব্দাংশ্চ সঞ্জ্ঞানাশেঽস্য কারযেত্||৮৫|| যদা বিরেচনং পীতং বিডন্তমবতিষ্ঠতে| বমনং ভেষজান্তং বা দোষানুত্ক্লিশ্য নাবহেত্||৮৬|| তদা কুর্বন্তি কণ্ড্বাদীন্ দোষাঃ প্রকুপিতা গদান্| স বিভ্রংশো মতস্তত্র স্যাদ্যথাব্যাধি ভেষজম্||৮৭||

গুদং ভ্রষ্টমিত্যাদিনা গুদভ্রংশরূপং বিভ্রংশমাহ| কষাযৈরিতি কষাযরসৈঃ| সামেত্যাদিনা সঞ্জ্ঞাবিভ্রংশরূপবিভ্রংশচিকিত্সামাহ| সাম সান্ত্বনম্| গান্ধর্বশব্দো গীতম্| এতৌ চ বিভ্রংশাবতিযোগজন্যৌ| যদেত্যাদিনা তৃতীযমযোগজন্যবিভ্রংশমাহ| বিডন্তমবতিষ্ঠত ইতি মলমাত্রমপহৃত্যাবতিষ্ঠতে| ভেষজান্তমিতি ভেষজমাত্রং বমনেনাবতিষ্ঠতে| নাবহেদিতি নাপহরতি| এতদ্ব্যাপদশ্চ বিভ্রংশসঞ্জ্ঞা পারিভাষিকী| যথাব্যাধিভেষজমিতি কণ্ড্বাদিবিপরীতং ভেষজম্||৮৫-৮৭||

Adhikarana 38 (88-89) · Śloka 89

পীতং স্নিগ্ধেন সস্নেহং তদ্দোষৈর্মার্দবাদ্বৃতম্| ন বাহযতি দোষাংস্তু স্বস্থানাত্ স্তম্ভযেচ্চ্যুতান্||৮৮|| বাতসঙ্গগুদস্তম্ভশূলৈঃ ক্ষরতি চাল্পশঃ| তীক্ষ্ণং বস্তিং বিরেকং বা সোঽর্হো লঙ্ঘিতপাচিতঃ||৮৯||

পীতং স্নিগ্ধেনেত্যাদিনা স্তম্ভমাহ| মার্দবাদ্বৃতমিতি ভেষজস্য মৃদুতযা দোষৈর্বৃতম্| স্বস্থানাচ্চ্যুতান্ স্তম্ভযেদিতি যোজনীযম্| সোঽর্হ ইতি লঙ্ঘনপাচনানন্তরং তীক্ষ্ণং বস্তিং বিরেকং বা তীক্ষ্ণমর্হতীত্যর্থঃ||৮৮-৮৯||

Adhikarana 39 (90-91) · Śloka 91

রূক্ষং বিরেচনং পীতং রূক্ষেণাল্পবলেন বা| মারুতং কোপযিত্বাঽঽশু কুর্যাদ্ধোরানুপদ্রবান্||৯০|| স্তম্ভশূলানি ঘোরাণি সর্বগাত্রেষু মুহ্যতঃ| স্নেহস্বেদাদিকস্তত্র কার্যো বাতহরো বিধিঃ||৯১||

রূক্ষমিত্যাদিনা উপদ্রবানাহ| যদ্যপ্যাধ্মানাদযোঽপ্যমী উপদ্রবা এব, তথাঽপি তেষাং সঞ্জ্ঞান্তরেণৈব গৃহীতত্বাচ্ছূলাদয এব উপদ্রবশব্দাভিহিতাঃ| শূলাদযশ্চামী প্রধানান্যুত্তরকালভাবিত্বাদনুপদ্রবরূপা অপ্যুপদ্রবশব্দেনোচ্যন্তে; যথা- “ধূমঃ কুর্যাদুপদ্রবান্” (সূ.অ.৫) ইতি; কিংবা, অযোগাখ্যস্য ব্যাধেরমী উপদ্রবা ইতি জ্ঞেযম্||৯০-৯১||

Adhikarana 40 (92-93) · Śloka 93

স্নিগ্ধস্য মৃদুকোষ্ঠস্য মৃদূত্ক্লিশ্যৌষধং কফম্| পিত্তং বাতং চ সংরুধ্য সতন্দ্রাগৌরবং ক্লমম্||৯২|| দৌর্বল্যং চাঙ্গসাদং চ কুর্যাদাশু তদুল্লিখেত্| লঙ্ঘনং পাচনং চাত্র স্নিগ্ধং তীক্ষ্ণং চ শোধনম্||৯৩||

স্নিগ্ধস্যেত্যাদিনা ক্লমমাহ| কফং পিত্তং চোত্ক্লিশ্য বাতং চ তাভ্যামেব সংরুধ্য ভেষজং তন্দ্রাদিযুক্তং ক্লমং কুর্যাত্| তদুল্লিখেদিতি তদ্ ভেষজং কফপিত্তং চোল্লিখেদিত্যর্থঃ||৯২-৯৩||

Adhikarana 41 (94-95) · Śloka 95

তত্র শ্লোকৌ- ইত্যেতা ব্যাপদঃ প্রোক্তাঃ সরূপাঃ সচিকিত্সিতাঃ| বমনস্য বিরেকস্য কৃতস্যাকুশলৈর্নৃণাম্ ||৯৪|| এতা বিজ্ঞায মতিমানবস্থাশ্চৈব তত্ত্বতঃ| দদ্যাত্ সংশোধনং সম্যগারোগ্যার্থী নৃণাং সদা||৯৫||

ইত্যেতা ইত্যাদিনা অধ্যাযার্থসঙ্গ্রহং দর্শযিত্বা ব্যাপদুত্পাদহেতুমাহ| দদ্যাত্ সংশোধনং সম্যগিতি তথা সংশোধনং দদ্যাদ্ যথা ব্যাপদো নোত্পদ্যন্ত এবেত্যর্থঃ||৯৪-৯৫||

Adhikarana puShpikA · Śloka 6

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে বমনবিরেচনব্যাপত্সিদ্ধির্নাম ষষ্ঠোঽধ্যাযঃ||৬||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং সিদ্ধিস্থানে বমনবিরেচনব্যাপত্সিদ্ধি(সংশোধনব্যাপত্সিদ্ধি)র্নাম ষষ্ঠোঽধ্যাযঃ||৬||