6. vamanavirēcanavyāpatsiddhiḥ

Adhikarana 1 (1-2) · Śloka 2

অথাতো বমনবিরেচনব্যাপত্সিদ্ধিং ব্যাখ্যাস্যামঃ| ইতি হ স্মাহ ভগবানাত্রেযঃ||২||

Adhikarana 2 (3) · Śloka 3

অথ শোধনযোঃ সম্যগ্বিধিমূর্ধ্বানুলোমযোঃ| অসম্যক্কৃতযোশ্চৈব দোষান্ বক্ষ্যামি সৌষধান্||৩||

Adhikarana 3 (4) · Śloka 4

অত্যুষ্ণবর্ষশীতা হি গ্রীষ্মবর্ষাহিমাগমাঃ| তদন্তরে প্রাবৃডাদ্যাস্তেষাং সাধারণাস্ত্রযঃ||৪||

Adhikarana 4 (5-6) · Śloka 6

প্রাবৃট্ শুচিনভৌ জ্ঞেযৌ শরদূর্জসহৌ পুনঃ| তপস্যশ্চ মধুশ্চৈব বসন্তঃ শোধনং প্রতি||৫|| এতানৃতূন্ বিকল্প্যৈবং দদ্যাত্ সংশোধনং ভিষক্| স্বস্থবৃত্তমভিপ্রেত্য ব্যাধৌ ব্যাধিবশেন তু||৬||

Adhikarana 5 (7) · Śloka 7

কর্মণাং বমনাদীনামন্তরেষ্বন্তরেষু চ| স্নেহস্বেদৌ প্রযুঞ্জীত স্নেহং চান্তে প্রযোজযেত্||৭||

Adhikarana 6 (8) · Śloka 8

বিসর্পপিডকাশোফকামলাপাণ্ডুরোগিণঃ | অভিঘাতবিষার্তাংশ্চ নাতিস্নিগ্ধান্ বিরেচযেত্||৮||

Adhikarana 7 (9) · Śloka 9

নাতিস্নিগ্ধশরীরায দদ্যাত্ স্নেহবিরেচনম্| স্নেহোত্ক্লিষ্টশরীরায রূক্ষং দদ্যাদ্বিরেচনম্||৯||

Adhikarana 8 (10) · Śloka 10

স্নেহস্বেদোপপন্নেন জীর্ণে মাত্রাবদৌষধম্| একাগ্রমনসা পীতং সম্যগ্যোগায কল্পতে||১০||

Adhikarana 9 (11-13) · Śloka 13

স্নিগ্ধাত্ পাত্রাদ্যথা তোযমযত্নেন প্রণুদ্যতে| কফাদযঃ প্রণুদ্যন্তে স্নিগ্ধাদ্দেহাত্তথৌষধৈঃ||১১|| আর্দ্রং কাষ্ঠং যথা বহ্নির্বিষ্যন্দযতি সর্বতঃ| তথা স্নিগ্ধস্য বৈ দোষান্ স্বেদো বিষ্যন্দযেত্ স্থিরান্||১২|| ক্লিষ্টং বাসো যথোত্ক্লেশ্য মলঃ সংশোধ্যতেঽম্ভসা| স্নেহস্বেদৈস্তথোত্ক্লেশ্য শোধ্যতে শোধনৈর্মলঃ ||১৩||

Adhikarana 10 (14) · Śloka 14

অজীর্ণে বর্ধতে গ্লানির্বিবন্ধশ্চাপি জাযতে| পীতং সংশোধনং চৈব বিপরীতং প্রবর্ততে||১৪||

Adhikarana 11 (15-16) · Śloka 16

অল্পমাত্রং মহাবেগং বহুদোষহরং সুখম্| লঘুপাকং সুখাস্বাদং প্রীণনং ব্যাধিনাশনম্||১৫|| অবিকারি চ ব্যাপত্তৌ নাতিগ্লানিকরং চ যত্| গন্ধবর্ণরসোপেতং বিদ্যান্মাত্রাবদৌষধম্||১৬||

Adhikarana 12 (17) · Śloka 17

বিধূয মানসান্ দোষান্ কামাদীনশুভোদযান্ | একাগ্রমনসা পীতং সম্যগ্যোগায কল্পতে||১৭||

Adhikarana 13 (18) · Śloka 19

নরঃ শ্বো বমনং পাতা ভুঞ্জীত কফবর্ধনম্| সুজরং দ্রবভূযিষ্ঠং, লঘ্বশীতং বিরেচনম্||১৮|| উত্ক্লিষ্টাল্পকফত্বেন ক্ষিপ্রং দোষাঃ স্রবন্তি হি|১৯|

Adhikarana 14 (19-20) · Śloka 20

পীতৌষধস্য তু ভিষক্ শুদ্ধিলিঙ্গানি লক্ষযেত্||১৯|| ঊর্ধ্বং কফানুগে পিত্তে বিট্পিত্তেঽনুকফে ত্বধঃ| হৃতদোষং বদেত্ কার্শ্যদৌর্বল্যে চেত্ সলাঘবে||২০||

Adhikarana 15 (21) · Śloka 22

বামযেত্তু ততঃ শেষমৌষধং ন ত্বলাঘবে| স্তৈমিত্যেঽনিলসঙ্গে চ নিরুদ্গারেঽপি বামযেত্||২১|| আলাঘবাত্তনুত্বাচ্চ কফস্যাপত্ পরং ভবেত্|২২|

Adhikarana 16 (22-23) · Śloka 23

বমিতে বর্ধতে বহ্নিঃ শমং দোষা ব্রজন্তি হি||২২|| বমিতং লঙ্ঘযেত্ সম্যগ্জীর্ণলিঙ্গান্যলক্ষযন্| তানি দৃষ্ট্বা তু পেযাদিক্রমং কুর্যান্ন লঙ্ঘনম্||২৩||

Adhikarana 17 (24) · Śloka 24

সংশোধনাভ্যাং শুদ্ধস্য হৃতদোষস্য দেহিনঃ| যাত্যগ্নির্মন্দতাং তস্মাত্ ক্রমং পেযাদিমাচরেত্||২৪||

Adhikarana 18 (25) · Śloka 25

কফপিত্তে বিশুদ্ধেঽল্পং মদ্যপে বাতপৈত্তিকে| তর্পণাদিক্রমং কুর্যাত্ পেযাঽভিষ্যন্দযেদ্ধি তান্||২৫||

Adhikarana 19 (26-27) · Śloka 27

অনুলোমোঽনিলঃ স্বাস্থ্যং ক্ষুত্তৃষ্ণোর্জো মনস্বিতা| লঘুত্বমিন্দ্রিযোদ্গারশুদ্ধির্জীর্ণৌষধাকৃতিঃ||২৬|| ক্লমো দাহোঽঙ্গসদনং ভ্রমো মূর্চ্ছা শিরোরুজা| অরতির্বলহানিশ্চ সাবশেষৌষধাকৃতিঃ||২৭||

Adhikarana 20 (28) · Śloka 28

অকালেঽল্পাতিমাত্রং চ পুরাণং ন চ ভাবিতম্| অসম্যক্সংস্কৃতং চৈব ব্যাপদ্যেতৌষধং দ্রুতম্||২৮||

Adhikarana 21 (29-30) · Śloka 30

আধ্মানং পরিকর্তিশ্চ স্রাবো হৃদ্গাত্রযোর্গ্রহঃ| জীবাদানং সবিভ্রংশঃ স্তম্ভঃ সোপদ্রবঃ ক্লমঃ||২৯|| অযোগাদতিযোগাচ্চ দশৈতা ব্যাপদো মতাঃ| প্রেষ্যভৈষজ্যবৈদ্যানাং বৈগুণ্যাদাতুরস্য চ||৩০||

Adhikarana 22 (31-34) · Śloka 34

যোগঃ সম্যক্প্রবৃত্তিঃ স্যাদতিযোগোঽতিবর্তনম্| অযোগঃ প্রাতিলোম্যেন ন চাল্পং বা প্রবর্তনম্||৩১|| শ্লেষ্মোত্ক্লিষ্টেন দুর্গন্ধমহৃদ্যমতি বা বহু| বিরেচনমজীর্ণে চ পীতমূর্ধ্বং প্রবর্ততে||৩২|| ক্ষুধার্তমৃদুকোষ্ঠাভ্যাং স্বল্পোত্ক্লিষ্টকফেন বা| তীক্ষ্ণং পীতং স্থিতং ক্ষুব্ধং বমনং স্যাদ্বিরেচনম্||৩৩|| প্রাতিলোম্যেন দোষাণাং হরণাত্তে হ্যকৃত্স্নশঃ| অযোগসঞ্জ্ঞে, কৃচ্ছ্রেণ যাতি দোষো নবাঽল্পশঃ||৩৪||

Adhikarana 23 (35-36) · Śloka 36

পীতৌষধো ন শুদ্ধশ্চেজ্জীর্ণে তস্মিন্ পুনঃ পিবেত্| ঔষধং ন ত্বজীর্ণেঽন্যদ্ভযং স্যাদতিযোগতঃ||৩৫|| কোষ্ঠস্য গুরুতাং জ্ঞাত্বা লঘুত্বং বলমেব চ| অযোগে মৃদু বা দদ্যাদৌষধং তীক্ষ্ণমেব বা||৩৬||

Adhikarana 24 (37) · Śloka 37

বমনং ন তু দুশ্ছর্দং দুষ্কোষ্ঠং ন বিরেচনম্| পাযযেতৌষধং ভূযো হন্যাত্ পীতং পুনর্হি তৌ||৩৭||

Adhikarana 25 (38-39) · Śloka 39

অস্নিগ্ধাস্বিন্নদেহস্য রূক্ষস্যানবমৌষধম্| দোষানুত্ক্লিশ্য নির্হর্তুমশক্তং জনযেদ্গদান্||৩৮|| বিভ্রংশং শ্বযথুং হিক্কাং তমসো দর্শনং ভৃশম্ | পিণ্ডিকোদ্বেষ্টনং কণ্ডূমূর্বোঃ সাদং বিবর্ণতাম্||৩৯||

Adhikarana 26 (40-44) · Śloka 44

স্নিগ্ধস্বিন্নস্য চাত্যল্পং দীপ্তাগ্নের্জীর্ণমৌষধম্| শীতৈর্বা স্তব্ধমামে বা দোষানুত্ক্লিশ্য নাহরেত্||৪০|| তানেব জনযেদ্রোগানযোগঃ সর্ব এব সঃ| বিজ্ঞায মতিমাংস্তত্র যথোক্তাং কারযেত্ ক্রিযাম্||৪১|| তং তৈললবণাভ্যক্তং স্বিন্নং প্রস্তরসঙ্করৈঃ| পাযযেত পুনর্জীর্ণে সমূত্রৈর্বা নিরূহযেত্||৪২|| নিরূঢং চ রসৈর্ধান্বৈর্ভোজযিত্বাঽনুবাসযেত্| ফলমাগধিকাদারুসিদ্ধতৈলেন মাত্রযা||৪৩|| স্নিগ্ধং বাতহরৈঃ স্নেহৈঃ পুনস্তীক্ষ্ণেন শোধযেত্| ন চাতিতীক্ষ্ণেন ততো হ্যতিযোগস্তু জাযতে||৪৪||

Adhikarana 27 (45-51) · Śloka 51

অতিতীক্ষ্ণং ক্ষুধার্তস্য মৃদুকোষ্ঠস্য ভেষজম্| হৃত্বাঽঽশু বিট্পিত্তকফান্ ধাতূন্বিস্রাবযেদ্দ্রবান্||৪৫|| বলস্বরক্ষযং দাহং কণ্ঠশোষং ভ্রমং তৃষাম্| কুর্যাচ্চ মধুরৈস্তত্র শেষমৌষধমুল্লিখেত্||৪৬|| বমনে তু বিরেকঃ স্যাদ্বিরেকে বমনং পুনঃ | পরিষেকাবগাহাদ্যৈঃ সুশীতৈঃ স্তম্ভযেচ্চ তত্||৪৭|| কষাযমধুরৈঃ শীতৈরন্নপানৌষধৈস্তথা| রক্তপিত্তাতিসারঘ্নৈর্দাহজ্বরহরৈরপি||৪৮|| অঞ্জনং চন্দনোশীরমজ্জাসৃক্শর্করোদকম্| লাজচূর্ণৈঃ পিবেন্মন্থমতিযোগহরং পরম্||৪৯|| শুঙ্গাভির্বা বটাদীনাং সিদ্ধাং পেযাং সমাক্ষিকাম্| বর্চঃসাঙ্গ্রাহিকৈঃ সিদ্ধং ক্ষীরং ভোজ্যং চ দাপযেত্||৫০|| জাঙ্গলৈর্বা রসৈর্ভোজ্যং পিচ্ছাবস্তিশ্চ শস্যতে| মধুরৈরনুবাস্যশ্চ সিদ্ধেন ক্ষীরসর্পিষা||৫১||

Adhikarana 28 (52-56) · Śloka 56

বমনস্যাতিযোগে তু শীতাম্বুপরিষেচিতঃ| পিবেত্ কফহরৈর্মন্থং সঘৃতক্ষৌদ্রশর্করম্||৫২|| সোদ্গারাযাং ভৃশং বম্যাং মূর্চ্ছাযাং ধান্যমুস্তযোঃ| সমধূকাঞ্জনং চূর্ণং লেহযেন্মধুসংযুতম্||৫৩|| বমতোঽন্তঃপ্রবিষ্টাযাং জিহ্বাযাং কবলগ্রহাঃ| স্নিগ্ধাম্ললবণৈর্হৃদ্যৈর্যূষক্ষীররসৈর্হিতাঃ||৫৪|| ফলান্যম্লানি খাদেযুস্তস্য চান্যেঽগ্রতো নরাঃ| নিঃসৃতাং তু তিলদ্রাক্ষাকল্কলিপ্তাং প্রবেশযেত্||৫৫|| বাগ্গ্রহানিলরোগেষু ঘৃতমাংসোপসাধিতাম্| যবাগূং তনুকাং দদ্যাত্ স্নেহস্বেদৌ চ বুদ্ধিমান্||৫৬||

Adhikarana 29 (57) · Śloka 57

বমিতশ্চ বিরিক্তশ্চ মন্দাগ্নিশ্চ বিলঙ্ঘিতঃ| অগ্নিপ্রাণবিবৃদ্ধ্যর্থং ক্রমং পেযাদিকং ভজেত্ ||৫৭||

Adhikarana 30 (58-60) · Śloka 60

বহুদোষস্য রূক্ষস্য হীনাগ্নেরল্পমৌষধম্| সোদাবর্তস্য চোত্ক্লিশ্য দোষান্মার্গান্নিরুধ্য চ||৫৮|| ভৃশমাধ্মাপযেন্নাভিং পৃষ্ঠপার্শ্বশিরোরুজম্| শ্বাসবিণ্মূত্রবাতানাং সঙ্গং কুর্যাচ্চ দারুণম্||৫৯|| অভ্যঙ্গস্বেদবর্ত্যাদি সনিরূহানুবাসনম্| উদাবর্তহরং সর্বং কর্মাধ্মাতস্য শস্যতে||৬০||

Adhikarana 31 (61-63) · Śloka 63

স্নিগ্ধেন গুরুকোষ্ঠেন সামে বলবদৌষধম্| ক্ষামেণ মৃদুকোষ্ঠেন শ্রান্তেনাল্পবলেন বা||৬১|| পীতং গত্বা গুদং সামমাশু দোষং নিরস্য চ| তীব্রশূলাং সপিচ্ছাস্রাং করোতি পরিকর্তিকাম্||৬২|| লঙ্ঘনং পাচনং সামে রূক্ষোষ্ণং লঘুভোজনম্| বৃংহণীযো বিধিঃ সর্বঃ ক্ষামস্য মধুরস্তথা||৬৩||

Adhikarana 32 (64-67) · Śloka 67

আমে জীর্ণেঽনুবন্ধশ্চেত্ ক্ষারাম্লং লঘু শস্যতে| পুষ্পকাসীসমিশ্রং বা ক্ষারেণ লবণেন বা||৬৪|| সদাডিমরসং সর্পিঃ পিবেদ্বাতেঽধিকে সতি| দধ্যম্লং ভোজনে পানে সংযুক্তং দাডিমত্বচা||৬৫|| দেবদারুতিলানাং বা কল্কমুষ্ণাম্বুনা পিবেত্| অশ্বত্থোদুম্বরপ্লক্ষকদম্বৈর্বা শৃতং পযঃ||৬৬|| কষাযমধুরং শীতং পিচ্ছাবস্তিমথাপি বা| যষ্টীমধুকসিদ্ধং বা স্নেহবস্তিং প্রদাপযেত্||৬৭||

Adhikarana 33 (68-70) · Śloka 70

অল্পং তু বহুদোষস্য দোষমুত্ক্লিশ্য ভেষজম্| অল্পাল্পং স্রাবযেত্ কণ্ডূং শোফং কুষ্ঠানি গৌরবম্||৬৮|| কুর্যাচ্চাগ্নিবলোত্ক্লেশস্তৈমিত্যারুচিপাণ্ডুতাঃ| পরিস্রাবঃ স, তং দোষং শমযেদ্বামযেদপি||৬৯|| স্নেহিতং বা পুনস্তীক্ষ্ণং পাযযেত্ বিরেচনম্| শুদ্ধে চূর্ণাসবারিষ্টান্ সংস্কৃতাংশ্চ প্রদাপযেত্||৭০||

Adhikarana 34 (71-75) · Śloka 75

পীতৌষধস্য বেগানাং নিগ্রহান্মারুতাদযঃ| কুপিতা হৃদযং গত্বা ঘোরং কুর্বন্তি হৃদ্গ্রহম্||৭১|| স হিক্কাকাসপার্শ্বার্তিদৈন্যলালাক্ষিবিভ্রমৈঃ| জিহ্বাং খাদতি নিঃসঞ্জ্ঞো দন্তান্ কিটিকিটাপযন্||৭২|| ন গচ্ছেদ্বিভ্রমং তত্র বামযেদাশু তং ভিষক্| মধুরৈঃ পিত্তমূর্চ্ছার্তং কটুভিঃ কফমূর্চ্ছিতম্||৭৩|| পাচনীযৈস্ততশ্চাস্য দোষশেষং বিপাচযেত্| কাযাগ্নিং চ বলং চাস্য ক্রমেণোত্থাপযেত্ততঃ ||৭৪|| পবনেনাতিবমতো হৃদযং যস্য পীড্যতে| তস্মৈ স্নিগ্ধাম্ললবণং দদ্যাত্ পিত্তকফেঽন্যথা||৭৫||

Adhikarana 35 (76-77) · Śloka 77

পীতৌষধস্য বেগানাং নিগ্রহেণ কফেন বা| রুদ্ধোঽতি বা বিশুদ্ধস্য গৃহ্ণাত্যঙ্গানি মারুতঃ||৭৬|| স্তম্ভবেপথুনিস্তোদসাদোদ্বেষ্টনমন্থনৈঃ| তত্র বাতহরং সর্বং স্নেহস্বেদাদি কারযেত্ ||৭৭||

Adhikarana 36 (78-84) · Śloka 84

অতিতীক্ষ্ণং মৃদৌ কোষ্ঠে লঘুদোষস্য ভেষজম্| দোষান্ হৃত্বা বিনির্মথ্য জীবং হরতি শোণিতম্||৭৮|| তেনান্নং মিশ্রিতং দদ্যাদ্বাযসায শুনেঽপি বা| ভুঙ্ক্তে তচ্চেদ্বদেজ্জীবং ন ভুঙ্ক্তে পিত্তমাদিশেত্||৭৯|| শুক্লং বা ভাবিতং বস্ত্রমাবানং কোষ্ণবারিণা| প্রক্ষালিতং বিবর্ণং স্যাত্ পিত্তে শুদ্ধং তু শোণিতে||৮০|| তৃষ্ণামূর্চ্ছামদার্তস্য কুর্যাদামরণাত্ ক্রিযাম্| তস্য পিত্তহরীং সর্বামতিযোগে চ যা হিতা ||৮১|| মৃগগোমহিষাজানাং সদ্যস্কং জীবতামসৃক্| পিবেজ্জীবাভিসন্ধানং জীবং তদ্ধ্যাশু গচ্ছতি ||৮২|| তদেব দর্ভমৃদিতং রক্তং বস্তিং প্রদাপযেত্| শ্যামাকাশ্মর্যবদরীদূর্বোশীরৈঃ শৃতং পযঃ||৮৩|| ঘৃতমণ্ডাঞ্জনযুতং শীতং বস্তিং প্রদাপযেত্| পিচ্ছাবস্তিং সুশীতং বা ঘৃতমণ্ডানুবাসনম্||৮৪||

Adhikarana 37 (85-87) · Śloka 87

গুদং ভ্রষ্টং কষাযৈশ্চ স্তম্ভযিত্বা প্রবেশযেত্| সাম গান্ধর্বশব্দাংশ্চ সঞ্জ্ঞানাশেঽস্য কারযেত্||৮৫|| যদা বিরেচনং পীতং বিডন্তমবতিষ্ঠতে| বমনং ভেষজান্তং বা দোষানুত্ক্লিশ্য নাবহেত্||৮৬|| তদা কুর্বন্তি কণ্ড্বাদীন্ দোষাঃ প্রকুপিতা গদান্| স বিভ্রংশো মতস্তত্র স্যাদ্যথাব্যাধি ভেষজম্||৮৭||

Adhikarana 38 (88-89) · Śloka 89

পীতং স্নিগ্ধেন সস্নেহং তদ্দোষৈর্মার্দবাদ্বৃতম্| ন বাহযতি দোষাংস্তু স্বস্থানাত্ স্তম্ভযেচ্চ্যুতান্||৮৮|| বাতসঙ্গগুদস্তম্ভশূলৈঃ ক্ষরতি চাল্পশঃ| তীক্ষ্ণং বস্তিং বিরেকং বা সোঽর্হো লঙ্ঘিতপাচিতঃ||৮৯||

Adhikarana 39 (90-91) · Śloka 91

রূক্ষং বিরেচনং পীতং রূক্ষেণাল্পবলেন বা| মারুতং কোপযিত্বাঽঽশু কুর্যাদ্ধোরানুপদ্রবান্||৯০|| স্তম্ভশূলানি ঘোরাণি সর্বগাত্রেষু মুহ্যতঃ| স্নেহস্বেদাদিকস্তত্র কার্যো বাতহরো বিধিঃ||৯১||

Adhikarana 40 (92-93) · Śloka 93

স্নিগ্ধস্য মৃদুকোষ্ঠস্য মৃদূত্ক্লিশ্যৌষধং কফম্| পিত্তং বাতং চ সংরুধ্য সতন্দ্রাগৌরবং ক্লমম্||৯২|| দৌর্বল্যং চাঙ্গসাদং চ কুর্যাদাশু তদুল্লিখেত্| লঙ্ঘনং পাচনং চাত্র স্নিগ্ধং তীক্ষ্ণং চ শোধনম্||৯৩||

Adhikarana 41 (94-95) · Śloka 95

তত্র শ্লোকৌ- ইত্যেতা ব্যাপদঃ প্রোক্তাঃ সরূপাঃ সচিকিত্সিতাঃ| বমনস্য বিরেকস্য কৃতস্যাকুশলৈর্নৃণাম্ ||৯৪|| এতা বিজ্ঞায মতিমানবস্থাশ্চৈব তত্ত্বতঃ| দদ্যাত্ সংশোধনং সম্যগারোগ্যার্থী নৃণাং সদা||৯৫||

Adhikarana puShpikA · Śloka 6

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে বমনবিরেচনব্যাপত্সিদ্ধির্নাম ষষ্ঠোঽধ্যাযঃ||৬||