2. apāmārgataṇḍulīyō'dhyāyaḥ

Adhikarana 1 (1-6) · Śloka 6

অথাতোঽপামার্গতণ্ডুলীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২|| অপামার্গস্য বীজানি পিপ্পলীর্মরিচানি চ| বিডঙ্গান্যথ শিগ্রূণি সর্ষপাংস্তুম্বুরূণি চ||৩|| অজাজীং চাজগন্ধাং চ পীলূন্যেলাং হরেণুকাম্| পৃথ্বীকাং সুরসাং শ্বেতাং কুঠেরকফণিজ্ঝকৌ||৪|| শিরীষবীজং লশুনং হরিদ্রে লবণদ্বযম্| জ্যোতিষ্মতীং নাগরং চ দদ্যাচ্ছীর্ষবিরেচনে||৫|| গৌরবে শিরসঃ শূলে পীনসেঽর্ধাবভেদকে| ক্রিমিব্যাধাবপস্মারে ঘ্রাণনাশে প্রমোহকে||৬||

দীর্ঘঞ্জীবিতীযে মূলিন্যশ্চ ফলিন্যশ্চ পঞ্চকর্মাঙ্গভূতা উক্তাঃ, অপরাণ্যপি চ পিপ্পলীমরিচপ্রভৃতীনি পঞ্চকর্মসাধনানি সন্তি, তথা পঞ্চকর্মপ্রভৃতিবিষযোঽপি তত্র নোক্তঃ, তেনানন্তরং শেষপঞ্চকর্মোপযোগিদ্রব্যপঞ্চকর্মপ্রবৃত্তিবিষযাভিধাযকোঽপামার্গতণ্ডুলীযোঽভিধীযতে| পূর্বোক্তান্যপি চাপামার্গাদীনি যত্ পুনরিহাভিধীযন্তে তদাচার্য এবাধ্যাযান্তে ‘পূর্বং মূলফল’ ইত্যাদিনা শ্লোকদ্বযেন সমাধাস্যতি| অপামার্গবীজীয ইতি সঞ্জ্ঞাযাং প্রাপ্তাযামপামার্গতণ্ডুলীয ইতি সঞ্জ্ঞাকরণমপামার্গাদিবীজানাং নিস্তুষাণামেব গ্রহণার্থম্| অধ্যাযসঞ্জ্ঞাং তণ্ডুলেন কৃত্বাঽপামার্গস্য বীজানীতি যদ্বীজশব্দং করোতি তদঙ্কুরজননসমর্থবীজভবানামেব তণ্ডুলানাং গ্রহণার্থম্| যদ্যপি চেহোত্সর্গতঃ পঞ্চকর্মপ্রবৃত্তির্বমনপূর্বিকৈব ভবতি, যদুক্তং- “সাধারণেষ্বৃতুষু বমনাদীনাং প্রবৃত্তির্ভবতি” (বি.অ.৮) ইত্যাদি, তথা সুশ্রুতেঽপ্যুক্তং- “অবান্তস্য হি সম্যগ্বিরিক্তস্যাপ্যধঃস্রস্তঃ শ্লেষ্মা গ্রহণীমাচ্ছাদযতি” (সু.চি.অ.৩৩) ইত্যাদি; তথাঽপি ক্বচিত্ প্রবলদোষাপেক্ষযাঽন্যথাঽপি ক্রমো ভবতি, যথা শরদ্যুদ্রিক্তে পিত্তে বিরেচনাদি, তথা প্রাবৃষি প্রবলবাতে বস্ত্যাদিরিত্যনিযমার্থমিহ শিরোবিরেচনমাদাবভিহিতং; যদি বা, প্রধানাঙ্গশিরঃশোধনত্বাচ্ছিরোবিরেচনমাদৌ কৃতম্| যদুক্তং- “যদুত্তমাঙ্গমঙ্গানাং শিরস্তদভিধীযতে” (সূ.অ.১৭) ইতি| শালাক্যেঽপ্যুক্তং- “অনামযে যথা মূলে বৃক্ষঃ সম্যক্ প্রবর্ধতে | অনামযে শিরস্যেবং দেহঃ সম্যক্ প্রবর্ধতে” ইতি| অপামার্গাভিধানমাদৌ শিরোবিরেচনপ্রাধান্যাত্| যদুক্তং- “প্রত্যক্পুষ্পা শিরোবিরেচনানাম্” ইতি (সূ.অ.২৫)| অজগন্ধা অজমোদা, “ফোফান্ধী” ইতি কেচিত্| পীলু ঔত্তরাপথিকং ফলম্| লবণদ্বযং লবণবর্গাদিপঠিতং সৌবর্চলং সৈন্ধবং চ| অযং বর্গো ব্যস্তঃ সমস্তশ্চ শিরোবিরেচনে প্রযোজ্যো গণত্বাত্| যদুক্তং- “পরিসঙ্খ্যাতমপি হি যদ্দ্রব্যমযৌগিকং মন্যেত তদপহরেত্” (বি.অ.৮) ইতি| অন্যত্রাপ্যুক্তং- “সমস্তং বর্গমর্ধং বা যথালাভমথাপি বা” (সু.সূ.অ.৩৭) ইতি| শিরস ইতি গৌরব ইত্যনেন শূল ইত্যনেন চ সম্বধ্যতে| ক্রিমিব্যাধিরিহ শিরোগত এব বোদ্ধব্যঃ, তত্রৈব শিরোবিরেচনস্য সমর্থত্বাত্| প্রমোহকো মূর্চ্ছা, ইন্দ্রিযাপটুত্বং বা||১-৬||

Adhikarana 2 (7-8) · Śloka 8

মদনং মধুকং নিম্বং জীমূতং কৃতবেধনম্| পিপ্পলীকুটজেক্ষ্বাকূণ্যেলাং ধামার্গবাণি চ||৭|| উপস্থিতে শ্লেষ্মপিত্তে ব্যাধাবামাশযাশ্রযে| বমনার্থং প্রযুঞ্জীত ভিষগ্দেহমদূষযন্||৮||

বমনদ্রব্যে আদৌ মদনমুক্তং প্রাধান্যাত্; উক্তং হি- “বমনদ্রব্যেষু মদনফলানি শ্রেষ্ঠতমান্যাচক্ষতেঽনপাযিত্বাত্” ইতি (ক.অ.১)| উপস্থিত ইতি আমাশযোর্ধ্বভাগে শ্লেষ্মণঃ স্থানং গত্বোত্ক্লেশং গত ইতি ব্যাখ্যেযম্| শ্লেষ্মপিত্ত ইতি শ্লেষ্মপিত্তে শ্লেষ্মণি পিত্তে চ| পিত্তং চ যদ্যপি সাক্ষান্ন বমনবিষযং তথাঽপি শ্লেষ্মস্থানগতত্বেন শ্লেষ্মসম্বন্ধাদ্বমনবিষযম্| যদুক্তং- “দোষস্থানগতং দোষং স্থানিবত্ সমুপাচরেত্” ইতি| দেহমদূষযন্নিতি যদ্যপি বমনে প্রোক্তং তথাঽপি বিরেচনাদিষ্বপি বোদ্ধব্যং, তত্রাপ্যতিযোগাযোগমিথ্যাযোগৈর্দেহদুষ্টিশঙ্কাযাঃ সমানত্বাত্| উচ্যতে চ ন্যাযবিদ্ভির্যত্- “সমানেষ্বর্থেষ্বেকত্রাভিহিতো বিধিরন্যত্রাপ্যনুষঞ্জনীযঃ” ইতি||৭-৮||

Adhikarana 3 (9-10) · Śloka 10

ত্রিবৃতাং ত্রিফলাং দন্তীং নীলিনীং সপ্তলাং বচাম্| কম্পিল্লকং গবাক্ষীং চ ক্ষীরিণীমুদকীর্যকাম্||৯|| পীলূন্যারগ্বধং দ্রাক্ষাং দ্রবন্তীং নিচুলানি চ| পক্বাশযগতে দোষে বিরেকার্থং প্রযোজযেত্||১০||

বমনমনু বিরেচনাভিধানং শিরঃপূর্বকদেহশোধনাভিধানানুক্রমেণামাশযোর্ধ্বভাগশোধনানন্তরমামাশযাধোভাগস্থিতপিত্তহরত্বেন| এবং বিরেচনানন্তরং বস্ত্যভিধানেঽপি বাচ্যম্| ত্রিবৃদাদাবুচ্যতে, বিরেচনদ্রব্যেষু শ্রেষ্ঠত্বাত্| উক্তং হি- “ত্রিবৃত্ সুখবিরেচনানাম্” (সূ.অ.২৫) ইতি| নীলিকা নীলবুহ্না | ক্ষীরিণী দুগ্ধিকা| দ্রবন্তী দন্তীভেদঃ| নিচুলং হিজ্জলমিতি প্রসিদ্ধম্| পক্বশ্চাসাবাশযগতশ্চেতি পক্বাশযগতঃ| তেন পিত্তাশযে এবামাশযাধোভাগলক্ষণে দোষো বিরেচনবিষযো ভবতি, ন পক্বাশযগতঃ| দোষশব্দেন চেহ বিরেচননির্হরণযোগ্যত্বাত্ পিত্তং কফপিত্তং বা গৃহ্যতে| যদুক্তং- “পিত্তং বা কফপিত্তং বা পিত্তাশযগতং হরেত্| স্রংসনং, ত্রীন্ মলান্ বস্তির্হরেত্ পক্বাশযস্থিতান্” (চি.অ.৩) ইতি| যদি বা পক্বাশযসমীপগতত্বেনাধঃপ্রবৃত্ত্যুন্মুখো দোষঃ পক্বাশযগত ইত্যুচ্যতে; যথা- গঙ্গাযাং ঘোষ ইতি||৯-১০||

Adhikarana 4 (11-14) · Śloka 14

পাটলাং চাগ্নিমন্থং চ বিল্বং শ্যোনাকমেব চ| কাশ্মর্যং শালপর্ণীং চ পৃশ্নিপর্ণীং নিদিগ্ধিকাম্||১১|| বলাং শ্বদংষ্ট্রাং বৃহতীমেরণ্ডং সপুনর্নবম্| যবান্ কুলত্থান্ কোলানি গুডূচীং মদনানি চ||১২|| পলাশং কত্তৃণং চৈব স্নেহাংশ্চ লবণানি চ| উদাবর্তে বিবন্ধেষু যুঞ্জ্যাদাস্থাপনেষু চ||১৩|| অত এবৌষধগণাত্ সঙ্কল্প্যমনুবাসনম্| মারুতঘ্নমিতি প্রোক্তঃ সঙ্গ্রহঃ পাঞ্চকর্মিকঃ||১৪||

পাটলামিত্যাদিনাঽনুবাসনাত্ প্রাঙ্নিরূহাভিধানং, নিরূহস্য দোষহরণপ্রধানত্বাত্| কত্তৃণং গন্ধতৃণম্| স্নেহাঃ সর্পিস্তৈলবসামজ্জানঃ| লবণানি সৈন্ধবাদীনি রোগভিষগ্জিতীযে (বি.অ.৮) বস্ত্যর্থং মুখ্যান্যুক্তানি গণেন| অত এবেতি নিরূহোক্তপাটলাদিগণাত্| সঙ্কল্প্যমনুবাসনমিত্যনেন স্নেহসাধনং ব্রূতে; অনুবাসনং হি স্নেহ এব ভবতি| অনুবাসনার্থং স্নেহসাধনদ্রব্যং পৃথঙ্নোক্তং, নিরূহার্থোক্তভেষজগণেনৈব তত্সিদ্ধেঃ| মারুতঘ্নমিত্যনেনানুবাসনপ্রবৃত্তিবিষযং দর্শযতি; মারুতে হন্তব্যেঽনুবাসনং প্রকল্প্যমিত্যর্থঃ| যদি বা পাটলাদের্মারুতহরাদ্গণান্মারুতঘ্নমনুবাসনং প্রকল্প্যম্; অন্যত্র তু পিত্তহরাদ্গণাত্ পিত্তঘ্নং, তথা শ্লেষ্মহরাদ্গণাচ্ছ্লেষ্মঘ্নমিতি সূচযতি| সঙ্গ্রহ ইত্যনেন রোগভিষগ্জিতীযে (বি.অ.৮) কল্পে সিদ্ধৌ চ বক্ষ্যমাণপঞ্চকর্মপ্রপঞ্চং সূচযতি||১১-১৪||

Adhikarana 5 (15) · Śloka 15

তান্যুপস্থিতদোষাণাং স্নেহস্বেদোপপাদনৈঃ| পঞ্চকর্মাণি কুর্বীত মাত্রাকালৌ বিচারযন্||১৫||

পঞ্চকর্ম যথা কর্তব্যং তথা তানীত্যাদিনা দর্শযতি| তানীতি পূর্বোক্তানি| স্নেহস্বেদোপপাদনৈরিতি বহুবচনং নানাবিধস্নেহস্বেদোপদর্শনার্থম্| উপস্থিতদোষাণামিতি শাখাং ত্যক্ত্বা কোষ্ঠগমনেন তথা লীনত্বপরিত্যাগেন প্রধানাবস্থাপ্রাপ্তদোষাণাম্ | তত্র পঞ্চকর্মপ্রবৃত্তাবুপস্থিতদোষত্বমেব হেতুঃ, তদ্যদি স্নেহস্বেদোপপাদনমন্তরাঽপি স্যাত্, যথা জ্বরে “কফপ্রধানানুত্ক্লিষ্টান্ দোষানামাশযস্থিতান্| বুদ্ধ্বা জ্বরকরান্ কালে বম্যানাং বমনৈর্হরেত্” (চি.অ.৩) ইতি; তত্র স্নেহস্বেদাবন্তরেণাপি বমনপ্রবৃত্তির্ভবত্যেব| স্নেহস্বেদোপপাদনং তু প্রাযিকত্বেন তথাঽন্যথোপস্থিতদোষেঽপি স্তোকমাত্রযা পঞ্চকর্মপ্রবৃত্তিক্ষোভজন্যবাতজযার্থং ক্রিযমাণত্বেনোক্তম্| মাত্রাকালযোর্বিচার্যত্বেন গ্রহণং প্রাধান্যাত্, তেন দোষভেষজাদযোঽপি বিচার্যত্বেনেহ বোদ্ধব্যাঃ; যদি বা পূর্ববত্ কালগ্রহণাদেব শেষাণাং দোষাদীনামবরোধো ব্যাখ্যেযঃ| তানীত্যুক্তেঽপি পুনঃ পঞ্চগ্রহণং পঞ্চানামপ্যুপস্থিতদোষত্বে সতি প্রবৃত্ত্যুপদেশার্থম্| ইহ বমনাদিষু কর্মলক্ষণং বহ্বিতিকর্তব্যতাযোগিদোষনির্হরণশক্তিজ্যাযস্ত্বম্| তেন তন্ত্রান্তরে স্নেহস্বেদৌ প্রক্ষিপ্য সপ্তকর্মাণীতি যদুচ্যতে তন্ন ভবতি, নহি স্নেহস্বেদৌ দোষবহির্নিঃসরণং কুরুতঃ, দোষসংশমনং তু তৌ কুরুতঃ; পঞ্চকর্মাঙ্গত্বেন ব্যাপ্রিযমাণৌ তু স্নেহস্বেদৌ দোষোপস্থান এব পরং ব্যাপ্রিযেতে, ন দোষনির্হরণে বমনাদিসম্পাদ্যে| অনুবাসনং তু যদ্যপি বমনাদিবন্ন বহুদোষনির্হরণকারণং ভবতি, তথাঽপি পুরীষস্য পক্বাশযগতবাতস্য চ বহির্নির্হারকত্বাত্ কর্মলক্ষণপ্রাপ্তমেব| নিষ্ঠীবননেত্রাঞ্জনাদৌ তু ন স্নেহস্বেদাদিবদ্বহ্বিতিকর্তব্যতাযোগো নচ বহুদোষনির্হারকত্বং, তেন ন তত্ কর্মশব্দবাচ্যম্| উত্তরবস্তিস্তু স্নেহরূপো নিরূহঃ স্নেহবস্তাবেবান্তর্ভবতি| যদি বেহ বমনাদিষু পঞ্চকর্মসু পঙ্কজশব্দবদ্যোগরূঢেযং সঞ্জ্ঞা; তেন স্নেহস্বেদনিষ্ঠীবনাদিষু ন প্রবর্ততে||১৫||

Adhikarana 6 (16) · Śloka 16

মাত্রাকালাশ্রযা যুক্তিঃ, সিদ্ধির্যুক্তৌ প্রতিষ্ঠিতা| তিষ্ঠত্যুপরি যুক্তিজ্ঞো দ্রব্যজ্ঞানবতাং সদা||১৬||

মাত্রাকালবিচারফলমাহ- মাত্রাকালেত্যাদি| যুক্তিঃ যোজনা ভেষজস্য দেহদোষাদ্যপেক্ষযা| যুক্তিং স্তৌতি- সিদ্ধিরিত্যাদিনা| সিদ্ধিরিহ বিকারোপশমস্য সাধ্যস্য নিষ্পত্তিঃ||১৬||

Adhikarana 7 (17) · Śloka 17

অত ঊর্ধ্বং প্রবক্ষ্যামি যবাগূর্বিবিধৌষধাঃ| বিবিধানাং বিকারাণাং তত্সাধ্যানাং নিবৃত্তযে||১৭||

ইদানীং বমনাদীনামযোগান্মন্দীভূতস্য বহ্নেঃ সন্ধুক্ষণার্থং তথা বমনাদিষ্বপ্রযোগজনিতস্য শূলাদেঃ প্রশমার্থং প্রতিজ্ঞাপূর্বকং যবাগূরভিধত্তে- অত ঊর্ধ্বমিত্যাদি| উক্তং হি “যথাঽণুরগ্নিস্তৃণগোমযাদ্যৈঃ সন্ধুক্ষ্যমাণো ভবতি ক্রমেণ| মহান্ স্থিরঃ সর্বপচস্তথৈব শুদ্ধস্য পেযাদিভিরন্তরগ্নিঃ” (সি.অ.১) ইতি| পিপ্পল্যাদিযবাগূনির্দেশে উপসাধিতেতি বচনং ভেষজপানীযতণ্ডুলাদিপ্রকৃতিদ্রব্যাণামুচিতপরিমাণগ্রহণার্থম্ | সাক্ষাদ্ভেষজাদীনাং প্রমাণমিহ নোক্তং, মাত্রাযা অগ্ন্যাদিভেদেনানবস্থিতত্বাত্ | যদুক্তং- “মাত্রাযা নাস্ত্যবস্থানং দোষমগ্নিং বলং বযঃ| ব্যাধিং দ্রব্যং চ কোষ্ঠং চ বীক্ষ্য মাত্রাং প্রযোজযেত্” ইতি| যদ্যপ্যেবং তথাঽপি পরিভাষাদর্শনাদ্বৃদ্ধবৈদ্যব্যবহারদর্শনাচ্চ যথা কর্তব্যং তদুচ্যতে- যবাগূসাধনদ্রব্যং তাবদ্দ্বিবিধং- বীর্যপ্রধানমৌষধদ্রব্যং, তথা রসপ্রধানমাহারদ্রব্যং চ| তত্রাপ্যৌষধদ্রব্যং ত্রিবিধং, বীর্যভেদাত্; তীক্ষ্ণবীর্যং যথা শুণ্ঠ্যাদি, মধ্যবীর্যং বিল্বাগ্নিমন্থাদি, মৃদুবীর্যং চামলকাদি; তত্র তীক্ষ্ণানাং কর্ষঃ, মধ্যানামর্ধপলং, মৃদূনাং পলমিত্যুত্সর্গঃ| যদুক্তমগ্নিবেশেন- “কর্ষার্ধং বা কণাশুণ্ঠ্যোঃ কল্কদ্রব্যস্য বা পলম্| বিনীয পাচযেদ্যুক্ত্যা বারিপ্রস্থেন চাপরাম্” ইতি| অত্র মধ্যবীর্যাণামর্ধপলমাত্রা নোক্তা সা মধ্যপ্রমাণগ্রহণাদ্বোদ্ধব্যা| তথা “জীবন্ত্যজাজীশটীপুষ্করাহ্বৈঃ” (চি.অ.১২) ইত্যাদিকাযাং পেযাযাং নবভির্দ্রব্যৈঃ কোলপ্রমাণৈর্মিলিত্বা পলমদূরান্তরং ভবতি, তচ্চ মৃদুবীর্যাভিপ্রাযেণৈব; “ক্বাথ্যদ্রব্যাঞ্জলিং ক্ষুণ্ণং শ্রপযিত্বা জলাঢকে| অর্ধশৃতেন তেনাথ যবাগ্বাদ্যুপকল্পযেত্” ইত্যত্র চতুষ্পলদ্রব্যাভিধানং রসপ্রধানদ্রব্যাভিপ্রাযেণৈব; তেন “সিদ্ধা বরাহনির্যূহে যবাগূর্বৃংহণী মতা” ইত্যাদাবিযং পরিভাষা বোদ্ধব্যা| ষডঙ্গসাধনপরিভাষাযাং “যদপ্সু শৃতশীতাসু ষডঙ্গাদি প্রযুজ্যতে| কর্ষমাত্রং ততো দ্রব্যং সাধযেত্ প্রাস্থিকেঽম্ভসি|| অর্ধশৃতং প্রযোক্তব্যং পানে পেযাদিসংবিধৌ” ইত্যত্র পেযাং প্রতি কর্ষদ্রব্যাভিধানং মধ্যবীর্যস্যাপি ষডঙ্গস্য মন্দানলপুরুষাভিপ্রাযেণ বোদ্ধব্যম্| বারিমানং তু ষডঙ্গার্থপরিভাষাযাং কর্ষদ্রব্যে বারিপ্রস্থোঽভিহিতঃ, তদনুসারেণান্যত্রাপি জলোত্কর্ষো বোদ্ধব্যঃ| কল্কসাধ্যা তু যবাগূর্যত্র ভবতি, তত্র সূদশাস্ত্রোক্তপরিমাণাজ্জলং গ্রাহ্যম্| যদুক্তং- “অন্নং পঞ্চগুণে সাধ্যং বিলেপী চ চতুর্গুণে| মণ্ডশ্চতুর্দশগুণে যবাগূঃ ষড্গুণেঽম্ভসি” ইতি| এতচ্চ পঞ্চগুণে ইত্যাদি তণ্ডুলভেষজসমুদাযাদ্বোদ্ধব্যম্| যবাগূপ্রকৃতিভূততণ্ডুলমানং তু সুশ্রুতবচনাদ্বোদ্ধব্যম্| যদুক্তং- “বিলেপীমুচিতাদ্ভক্তাচ্চতুর্ভাগকৃতাং ভিষগ্” (সু.চি.অ.৩৯) ইত্যাদি| তথা “যবাগূঃ স্বল্পতণ্ডুলা” ইতি||১৭||

Adhikarana 8 (18-33) · Śloka 33

পিপ্পলীপিপ্পলীমূলচব্যচিত্রকনাগরৈঃ| যবাগূর্দীপনীযা স্যাচ্ছূলঘ্নী চোপসাধিতা||১৮|| দধিত্থবিল্বচাঙ্গেরীতক্রদাডিমসাধিতা| পাচনী গ্রাহিণী, পেযা সবাতে পাঞ্চমূলিকী||১৯|| শালপর্ণীবলাবিল্বৈঃ পৃশ্নিপর্ণ্যা চ সাধিতা| দাডিমাম্লা হিতা পেযা পিত্তশ্লেষ্মাতিসারিণাম্||২০|| পযস্যর্ধোদকে চ্ছাগে হ্রীবেরোত্পলনাগরৈঃ| পেযা রক্তাতিসারঘ্নী পৃশ্নিপর্ণ্যা চ সাধিতা||২১|| দদ্যাত্ সাতিবিষাং পেযাং সামে সাম্লাং সনাগরাম্| শ্বদংষ্ট্রাকণ্টকারীভ্যাং মূত্রকৃচ্ছ্রে সফাণিতাম্||২২|| বিডঙ্গপিপ্পলীমূলশিগ্রুভির্মরিচেন চ| তক্রসিদ্ধা যবাগূঃ স্যাত্ ক্রিমিঘ্নী সসুবর্চিকা||২৩|| মৃদ্বীকাসারিবালাজপিপ্পলীমধুনাগরৈঃ| পিপাসাঘ্নী, বিষঘ্নী চ সোমরাজীবিপাচিতা||২৪|| সিদ্ধা বরাহনির্যূহে যবাগূর্বৃংহণী মতা| গবেধুকানাং ভৃষ্টানাং কর্শনীযা সমাক্ষিকা||২৫|| সর্পিষ্মতী বহুতিলা স্নেহনী লবণান্বিতা| কুশামলকনির্যূহে শ্যামাকানাং বিরূক্ষণী||২৬|| দশমূলীশৃতা কাসহিক্কাশ্বাসকফাপহা| যমকে মদিরাসিদ্ধা পক্বাশযরুজাপহা||২৭|| শাকৈর্মাংসৈস্তিলৈর্মাষৈঃ সিদ্ধা বর্চো নিরস্যতি| জম্ব্বাম্রাস্থিদধিত্থাম্লবিল্বৈঃ সাঙ্গ্রাহিকী মতা||২৮|| ক্ষারচিত্রকহিঙ্গ্বম্লবেতসৈর্ভেদিনী মতা| অভযাপিপ্পলীমূলবিশ্বৈর্বাতানুলোমনী ||২৯|| তক্রসিদ্ধা যবাগূঃ স্যাদ্ধৃতব্যাপত্তিনাশিনী| তৈলব্যাপদি শস্তা স্যাত্তক্রপিণ্যাকসাধিতা||৩০|| গব্যমাংসরসৈঃ সাম্লা বিষমজ্বরনাশিনী| কণ্ঠ্যা যবানাং যমকে পিপ্পল্যামলকৈঃ শৃতা||৩১|| তাম্রচূডরসে সিদ্ধা রেতোমার্গরুজাপহা| সমাষবিদলা বৃষ্যা ঘৃতক্ষীরোপসাধিতা||৩২|| উপোদিকাদধিভ্যাং তু সিদ্ধা মদবিনাশিনী| ক্ষুধং হন্যাদপামার্গক্ষীরগোধারসৈঃ শৃতা||৩৩||

পঞ্চকোলসাধিতা যবাগূরাদাবুচ্যতে, পঞ্চকর্মক্ষীণাগ্নিবৃদ্ধিহেতুত্বেন| দধিত্থঃ কপিত্থঃ| তক্রমিহ জলার্থকারকম্| গ্রাহিণীতি ছেদঃ| সবাতে ইতি সবাতেঽতীসারে| পঞ্চমূলমত্র স্থিরাদিপঞ্চমূলং; যদুক্তং জতূকর্ণে- “ধ্রুবাদ্যৈর্বায্বতীসারে” ইতি; ধ্রুবাদিঃ বিদারিগন্ধাদিঃ| পৃশ্নিপর্ণী বর্তুলপত্রা সিংহপুচ্ছী| দাডিমাম্লেতি বচনেন যাবতা দাডিমেনাম্লত্বং স্যাত্তাবন্মানং দাডিমং দর্শযতি| পযস্যর্ধোদকে ইত্যাদৌ নাগরং মুস্তং; যদুক্তং জতূকর্ণে- “রক্তাতীসারেঽজাক্ষীরজলে ঘনজলোত্পলৈঃ” ইতি| পৃশ্নিপর্ণ্যা চেতি রক্তাতীসারঘ্নযবাগ্বামেব| সাম্লামিতি দাডিমাম্লামিতি বোদ্ধব্যম্| শ্বদংষ্ট্রেত্যাদৌ জতূকর্ণঃ- “পৃশ্নিগোকণ্টকগুডৈর্মূত্রার্তিবস্তিশূলনুত্” ইতি| সুবর্চিকা সর্জিকাক্ষারঃ| পিপাসাঘ্নীতি ছেদঃ| সোমরাজী অবল্গুজঃ | গবেধুকো ঘুলুঞ্চঃ; গবেধুকাশ্চ তণ্ডুলস্থানে| শ্যামাকঃ তৃণবিশেষঃ; তস্য চ বীজতণ্ডুলা গ্রাহ্যাঃ| যমকে ঘৃততৈলে| মদিরা দ্রবস্থানে| শাকাদিভিঃ সমানৈর্যবাগূর্মন্তব্যা| দধিত্থাম্লশব্দেন কপিত্থস্যাম্লাবস্থাযামেব গ্রহণং দর্শযতি| ক্ষারো যবক্ষারঃ| তক্রসিদ্ধেতি তক্রকৃতোদককার্যা| পিণ্যাকঃ তিলকল্কঃ| যমক ইত্যনেন যমকেন পরিভর্জনং দর্শযতি| সমাষবিদলেত্যাদৌ তণ্ডুলেন মাষবিদলস্য তুল্যমানতা, ক্ষীরং চ জলস্থানে, ঘৃতং চ পরিভর্জনে; কিংবা মাষপ্রকৃতিকৈবেযম্| মদশব্দেন বিষজ-রৌধির-মদ্যমদানাং ত্রযাণামপি গ্রহণম্, অবিশেষাভিধানাত্| ক্ষুধং হন্যাদিত্যাদাবপামার্গতণ্ডুলাস্তণ্ডুলস্থানে; ক্ষীরগোধামাংসরসৌ তু জলস্থানে||১৮-৩৩||

Adhikarana 9 (34) · Śloka 34

তত্র শ্লোকঃ- অষ্টাবিংশতিরিত্যেতা যবাগ্বঃ পরিকীর্তিতাঃ| পঞ্চকর্মাণি চাশ্রিত্য প্রোক্তো ভৈষজ্যসঙ্গ্রহঃ||৩৪||

প্রতিলোমতন্ত্রযুক্ত্যাঽধ্যাযসঙ্গ্রহং করোতি- অষ্টাবিংশতিরিত্যাদি||৩৪||

Adhikarana 10 (35) · Śloka 35

পূর্বং মূলফলজ্ঞানহেতোরুক্তং যদৌষধম্| পঞ্চকর্মাশ্রযজ্ঞানহেতোস্তত্ কীর্তিতং পুনঃ||৩৫||

দীর্ঘঞ্জীবিতীযে মূলিনীফলিনীগণপঠিতানামপামার্গজীমূতাদীনাং পুনর্বচনে উপপত্তিমাহ- পূর্বমিত্যাদি| মূলফলজ্ঞানহেতোরিতি অস্য মূলেন ব্যবহারঃ, অস্য ফলেন ব্যবহারঃ, ইতি জ্ঞাতুমিত্যর্থঃ| পঞ্চকর্মণামাশ্রযঃ, আশ্রযশব্দশ্চ ভাবপ্রধানঃ; তেন পঞ্চকর্মাশ্রযত্বে জ্ঞানার্থমিতি ফলতি| যদ্যপি মূলিন্যশ্চ ফলিন্যশ্চ দীর্ঘঞ্জীবিতীযেঽপি “শণপুষ্পী চ বিম্বী চ” (সূ.অ.১) ইত্যাদিনা গ্রন্থেন পঞ্চকর্মাশ্রযত্বেনাপ্যুক্তাঃ, তথাঽপীহ মুখ্যপ্রপঞ্চেনাভিধীযমানপঞ্চকর্মাশ্রযদ্রব্যগণেঽনভিধানাত্ পঞ্চকর্মাশ্রযত্বেনাপ্রাধান্যং বাঽপামার্গাদীনাং শঙ্কেত, অত উক্তং- পঞ্চকর্মাশ্রযজ্ঞানহেতোস্তত্ কীর্তিতং পুনরিতি||৩৫||

Adhikarana 11 (36) · Śloka 36

স্মৃতিমান্ হেতুযুক্তিজ্ঞো জিতাত্মা প্রতিপত্তিমান্| ভিষগৌষধসংযোগৈশ্চিকিত্সাং কর্তুমর্হতি||৩৬||

এতদধ্যাযপ্রতিপাদিতাযাঃ পঞ্চকর্মপ্রবৃত্তের্দুর্জ্ঞেযত্বেন যথাভূতেন বৈদ্যেন চিকিত্সা কর্তব্যাং তাদৃশং বৈদ্যমাহ- স্মৃতিমানিত্যাদি| প্রতিপত্তিরুত্পন্নাযামাপদি ঝটিতি যথাকর্তব্যতাজ্ঞানং, তদ্বান্ প্রতিপত্তিমান্||৩৬||

Adhikarana puShpikA · Śloka 2

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানেঽপামার্গতণ্ডুলীযো নাম দ্বিতীযোঽধ্যাযঃ||২||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে প্রথমে ভেষজচতুষ্কেঽপামার্গতণ্ডুলীযো নাম দ্বিতীযোঽধ্যাযঃ||২||