Adhikarana 1 (1-2) · Śloka 2
অথাত আরগ্বধীযমধ্যাযং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
View original
अथात आरग्वधीयमध्यायं व्याख्यास्यामः||१||
इति ह स्माह भगवानात्रेयः||२||
দ্বিবিধং হি ভেষজমন্তঃপরিমার্জনং বহিঃপরিমার্জনং চ; তত্রাপামার্গতণ্ডুলীযেন পঞ্চকর্মযবাগূরূপমন্তঃপরিমার্জনমভিধাযাবশিষ্টং বহিঃপরিমার্জনং প্রলেপাদ্যারগ্বধীযেনাহ- অথাত আরগ্বধীযমিত্যাদি| যদ্যপি কুষ্ঠচিকিত্সিতং পৃথগেব চিকিত্সাস্থানে ভবিষ্যতি, তত্রৈব চাবসরপ্রাপ্তা এতে আরগ্বধাদযো বক্তুমুচিতাঃ; তথাঽপীহ পৃথক্ কুষ্ঠযোগানামভিধানেন কুষ্ঠস্যানুবন্ধিত্বেন চ মহারোগত্বং খ্যাপযতি; অভ্যর্হিতো হ্যর্থঃ পুনঃ পুনরভিধীযতে| ইযং চ কুষ্ঠচিকিত্সাঽঽনাগতাবেক্ষণতন্ত্রযুক্ত্যা নিদানস্থানে হেতুলক্ষণাদিভির্লক্ষিতং কুষ্ঠমুদ্দিশ্যোক্তা; তেনালক্ষিতস্য চিকিত্সাঽভিধীযমানাঽজ্ঞাতবিষযত্বেন ন যুজ্যত ইতি যদুচ্যতে তন্নিরস্তং ভবতি| যদ্যপি রাজযক্ষ্মপ্রভৃতযোঽপি মহারোগাঃ সন্তি, তথাঽপি ন তে ভূরিবহিঃপরিমার্জনবিষযা যথা কুষ্ঠমিতি কুষ্ঠবিষযা এব বহিঃপরিমার্জনযোগা অভিধীযন্তে| কুষ্ঠহরবহিঃপরিমার্জনোপোদ্ঘাতেন চ বাতাপহাঃ “কোলং কুলত্থা” ইত্যাদযোঽভিধাস্যন্তে| কিঞ্চ কুষ্ঠহরবহিঃপরিমার্জনপ্রযোগাণামিদং স্বরূপং যচ্ছোধনানন্তরং প্রযুজ্যমানাঃ সিদ্ধিভাজো ভবন্তি; যদুক্তং- “যে লেপাঃ কুষ্ঠানাং প্রযুজ্যন্তে নির্হৃতাস্রদোষাণাম্| সংশোধিতাশযানাং সদ্যঃ সিদ্ধির্ভবেত্তেষাম্” (চি.অ.৭) ইতি; তত্ পূর্বাধ্যাযে সংশোধনমভিধাযেহ কুষ্ঠপ্রযোগানবসরপ্রাপ্তানভিদধতাঽঽচার্যেণ সাধু গ্রন্থনিবেশঃ কৃতঃ| যদ্যপি চ “খদিরঃ কুষ্ঠহরাণাম্” (সূ.অ.২৫) ইতি বচনেন খদিরঃ কুষ্ঠহরভেষজেষু প্রধানং, তথাঽপি খদিরং পরিত্যজ্যারগ্বধমাদাবুপদিশতি, কুষ্ঠহরবহিঃপরিমার্জনভেষজেষ্বারগ্বধস্যৈব প্রধানত্বখ্যাপনার্থম্||১-২||
Adhikarana 2 (3-17) · Śloka 17
আরগ্বধঃ সৈডগজঃ করঞ্জো বাসা গুডূচী মদনং হরিদ্রে|
শ্র্যাহ্বঃ সুরাহ্বঃ খদিরো ধবশ্চ নিম্বো বিডঙ্গং করবীরকত্বক্||৩||
গ্রন্থিশ্চ ভৌর্জো লশুনঃ শিরীষঃ সলোমশো গুগ্গুলুকৃষ্ণগন্ধে|
ফণিজ্ঝকো বত্সকসপ্তপর্ণৌ পীলূনি কুষ্ঠং সুমনঃপ্রবালাঃ||৪||
বচা হরেণুস্ত্রিবৃতা নিকুম্ভো ভল্লাতকং গৈরিকমঞ্জনং চ|
মনঃশিলালে গৃহধূম এলা কাশীসলোধ্রার্জুনমুস্তসর্জাঃ||৫||
ইত্যর্ধরূপৈর্বিহিতাঃ ষডেতে গোপিত্তপীতাঃ পুনরেব পিষ্টাঃ|
সিদ্ধাঃ পরং সর্ষপতৈলযুক্তাশ্চূর্ণপ্রদেহা ভিষজা প্রযোজ্যাঃ||৬||
কুষ্ঠানি কৃচ্ছ্রাণি নবং কিলাসং সুরেশলুপ্তং কিটিভং সদদ্রু|
ভগন্দরার্শাংস্যপচীং সপামাং হন্যুঃ প্রযুক্তাস্ত্বচিরান্নরাণাম্||৭||
কুষ্ঠং হরিদ্রে সুরসং পটোলং নিম্বাশ্বগন্ধে সুরদারুশিগ্রূ|
সসর্ষপং তুম্বুরুধান্যবন্যং চণ্ডাং চ চূর্ণানি সমানি কুর্যাত্||৮||
তৈস্তক্রপিষ্টৈঃ প্রথমং শরীরং তৈলাক্তমুদ্বর্তযিতুং যতেত|
তেনাস্যকণ্ডূঃ পিডকাঃ সকোঠাঃ কুষ্ঠানি শোফাশ্চ শমং ব্রজন্তি||৯||
কুষ্ঠামৃতাসঙ্গকটঙ্কটেরীকাসীসকম্পিল্লকমুস্তলোধ্রাঃ|
সৌগন্ধিকং সর্জরসো বিডঙ্গং মনঃশিলালে করবীরকত্বক্||১০||
তৈলাক্তগাত্রস্য কৃতানি চূর্ণান্যেতানি দদ্যাদবচূর্ণনার্থম্|
দদ্রূঃ সকণ্ডূঃ কিটিভানি পামা বিচর্চিকা চৈব তথৈতি শান্তিম্||১১||
মনঃশিলালে মরিচানি তৈলমার্কং পযঃ কুষ্ঠহরঃ প্রদেহঃ|
তুত্থং বিডঙ্গং মরিচানি কুষ্ঠং লোধ্রং চ তদ্বত্ সমনঃশিলং স্যাত্||১২||
রসাঞ্জনং সপ্রপুন্নাডবীজং যুক্তং কপিত্থস্য রসেন লেপঃ|
করঞ্জবীজৈডগজং সকুষ্ঠং গোমূত্রপিষ্টং চ পরঃ প্রদেহঃ||১৩||
উভে হরিদ্রে কুটজস্য বীজং করঞ্জবীজং সুমনঃপ্রবালান্|
ত্বচং সমধ্যাং হযমারকস্য লেপং তিলক্ষারযুতং বিদধ্যাত্||১৪||
মনঃশিলা ত্বক্ কুটজাত্ সকুষ্ঠাত্ সলোমশঃ সৈডগজঃ করঞ্জঃ|
গ্রন্থিশ্চ ভৌর্জঃ করবীরমূলং চূর্ণানি সাধ্যানি তুষোদকেন||১৫||
পলাশনির্দাহরসেন চাপি কর্ষোদ্ধৃতান্যাঢকসম্মিতেন|
দর্বীপ্রলেপং প্রবদন্তি লেপমেতং পরং কুষ্ঠনিসূদনায||১৬||
পর্ণানি পিষ্ট্বা চতুরঙ্গুলস্য তক্রেণ পর্ণান্যথ কাকমাচ্যাঃ|
তৈলাক্তগাত্রস্য নরস্য কুষ্ঠান্যুদ্বর্তযেদশ্বহনচ্ছদৈশ্চ||১৭||
View original
आरग्वधः सैडगजः करञ्जो वासा गुडूची मदनं हरिद्रे|
श्र्याह्वः सुराह्वः खदिरो धवश्च निम्बो विडङ्गं करवीरकत्वक्||३||
ग्रन्थिश्च भौर्जो लशुनः शिरीषः सलोमशो गुग्गुलुकृष्णगन्धे|
फणिज्झको वत्सकसप्तपर्णौ पीलूनि कुष्ठं सुमनःप्रवालाः||४||
वचा हरेणुस्त्रिवृता निकुम्भो भल्लातकं गैरिकमञ्जनं च|
मनःशिलाले गृहधूम एला काशीसलोध्रार्जुनमुस्तसर्जाः||५||
इत्यर्धरूपैर्विहिताः षडेते गोपित्तपीताः पुनरेव पिष्टाः|
सिद्धाः परं सर्षपतैलयुक्ताश्चूर्णप्रदेहा भिषजा प्रयोज्याः||६||
कुष्ठानि कृच्छ्राणि नवं किलासं सुरेशलुप्तं किटिभं सदद्रु|
भगन्दरार्शांस्यपचीं सपामां हन्युः प्रयुक्तास्त्वचिरान्नराणाम्||७||
कुष्ठं हरिद्रे सुरसं पटोलं निम्बाश्वगन्धे सुरदारुशिग्रू|
ससर्षपं तुम्बुरुधान्यवन्यं चण्डां च चूर्णानि समानि कुर्यात्||८||
तैस्तक्रपिष्टैः प्रथमं शरीरं तैलाक्तमुद्वर्तयितुं यतेत|
तेनास्यकण्डूः पिडकाः सकोठाः कुष्ठानि शोफाश्च शमं व्रजन्ति||९||
कुष्ठामृतासङ्गकटङ्कटेरीकासीसकम्पिल्लकमुस्तलोध्राः|
सौगन्धिकं सर्जरसो विडङ्गं मनःशिलाले करवीरकत्वक्||१०||
तैलाक्तगात्रस्य कृतानि चूर्णान्येतानि दद्यादवचूर्णनार्थम्|
दद्रूः सकण्डूः किटिभानि पामा विचर्चिका चैव तथैति शान्तिम्||११||
मनःशिलाले मरिचानि तैलमार्कं पयः कुष्ठहरः प्रदेहः|
तुत्थं विडङ्गं मरिचानि कुष्ठं लोध्रं च तद्वत् समनःशिलं स्यात्||१२||
रसाञ्जनं सप्रपुन्नाडबीजं युक्तं कपित्थस्य रसेन लेपः|
करञ्जबीजैडगजं सकुष्ठं गोमूत्रपिष्टं च परः प्रदेहः||१३||
उभे हरिद्रे कुटजस्य बीजं करञ्जबीजं सुमनःप्रवालान्|
त्वचं समध्यां हयमारकस्य लेपं तिलक्षारयुतं विदध्यात्||१४||
मनःशिला त्वक् कुटजात् सकुष्ठात् सलोमशः सैडगजः करञ्जः|
ग्रन्थिश्च भौर्जः करवीरमूलं चूर्णानि साध्यानि तुषोदकेन||१५||
पलाशनिर्दाहरसेन चापि कर्षोद्धृतान्याढकसम्मितेन|
दर्वीप्रलेपं प्रवदन्ति लेपमेतं परं कुष्ठनिसूदनाय||१६||
पर्णानि पिष्ट्वा चतुरङ्गुलस्य तक्रेण पर्णान्यथ काकमाच्याः|
तैलाक्तगात्रस्य नरस्य कुष्ठान्युद्वर्तयेदश्वहनच्छदैश्च||१७||
তানেব কুষ্ঠহরযোগানাহ- আরগ্বধ ইত্যাদি| শ্র্যাহ্বো ‘নবনীতখোটিঃ’ ইতি প্রসিদ্ধঃ| গ্রন্থিশ্চ ভৌর্জ ইতি ভূর্জপত্রগ্রন্থিঃ| সলোমশো ধাতুকাসীসম্| ফণিজ্ঝকঃ পর্ণাসভেদঃ| সুমনঃপ্রবালা জাতীপল্লবাঃ| নিকুম্ভো দন্তী| আলং হরিতালম্| অর্ধরূপৈরিতি অর্ধশ্লোকৈঃ| গোপিত্তপীতা ইতি পীতগোপিত্তাঃ, মযূরব্যংসকাদিত্বেন পূর্বনিপাতনিযমাত্; যদি বা গোপিত্তভাবনযা পীতবর্ণা গোপিত্তপীতাঃ| পরমত্যর্থং সিদ্ধাঃ; যদ্যপি সর্বপ্রযোগা মহর্ষিপ্রণীতাঃ স্ববিষযে সিদ্ধাস্তথাঽপীহ বহূনাং দুশ্চিকিত্স্যানাং রোগাণামাশুহরণাত্ পরং সিদ্ধা ইত্যুচ্যন্তে| চূর্ণানি চ প্রদেহাশ্চ চূর্ণপ্রদেহাঃ; যদি বা চূর্ণীকৃতানাং প্রদেহাশ্চূর্ণপ্রদেহা; প্রদেহো লেপঃ, প্রদেহতাকরণং চৈষাং যোগানাং কুষ্ঠহরগোমূত্রগোপিত্তাদিনা বোদ্ধব্যম্| সুরেশলুপ্তম্ ইন্দ্রলুপ্তম্| কুষ্ঠগ্রহণেন লব্ধানামপি কিটিভদদ্রুপামাদীনাং পুনরভিধানং প্রযোগাণাং বিশেষেণ তদ্ধরণশক্তিখ্যাপনার্থম্| তুম্বুরু স্বনামপ্রসিদ্ধম্| বন্যং কৈবর্তমুস্তকম্| চণ্ডা চোরপুষ্পী| প্রথমমিতি তৈলাক্তমিত্যনেন সম্বধ্যতে| তৈলং চেহ কুষ্ঠহরপ্রকরণে সার্ষপং বোদ্ধব্যম্| অমৃতাসঙ্গঃ তুত্থকম্| কটঙ্কটেরী দারুহরিদ্রা| সৌগন্ধিকং গন্ধতৃণং গন্ধকো বা| আর্কং পযঃ অর্কক্ষীরম্| তদ্বদিতি প্রদেহঃ কুষ্ঠহরঃ | প্রপুন্নাড এডগজঃ| হযমারকঃ করবীরঃ; তস্য ত্বগ্ গ্রাহ্যা, মধ্যং চ পৃথগ্ভাবেন গ্রাহ্যম্| তুষোদকং সতুষৈর্যবৈঃ সন্ধানবিশেষাত্ কৃতং কাঞ্জিকম্| পলাশস্য নির্দাহেন গৃহীতো রসঃ পলাশনির্দাহরসঃ; স চ পলাশস্য প্রধানমূলে চ্ছিন্নেঽধঃ কুম্ভং দত্ত্বোপরি বৃক্ষদাহাদ্যো গলতি স্বরসঃ স গৃহ্যতে| চতুরঙ্গুলঃ স্বর্ণহালিঃ| অশ্বহনঃ করবীরঃ| চতুরঙ্গুলকাকমাচ্যশ্বহনচ্ছদৈরেকঃ প্রযোগঃ, দ্বিত্বে হ্যস্য দ্বাত্রিংশত্সঙ্খ্যা বক্ষ্যমাণা বিরুধ্যতে||৩-১৭||
Adhikarana 3 (18-22) · Śloka 23
কোলং কুলত্থাঃ সুরদারুরাস্নামাষাতসীতৈলফলানি কুষ্ঠম্|
বচা শতাহ্বা যবচূর্ণমম্লমুষ্ণানি বাতামযিনাং প্রদেহঃ||১৮||
আনূপমত্স্যামিষবেসবারৈরুষ্ণৈঃ প্রদেহঃ পবনাপহঃ স্যাত্|
স্নেহৈশ্চতুর্ভির্দশমূলমিশ্রৈর্গন্ধৌষধৈশ্চানিলহঃ প্রদেহঃ||১৯||
তক্রেণ যুক্তং যবচূর্ণমুষ্ণং সক্ষারমর্তিং জঠরে নিহন্যাত্|
কুষ্ঠং শতাহ্বাং সবচাং যবানাং চূর্ণং সতৈলাম্লমুশন্তি বাতে||২০||
উভে শতাহ্বে মধুকং মধূকং বলাং প্রিযালং চ কশেরুকং চ|
ঘৃতং বিদারীং চ সিতোপলাং চ কুর্যাত্ প্রদেহং পবনে সরক্তে||২১||
রাস্না গুডূচী মধুকং বলে দ্বে সজীবকং সর্ষভকং পযশ্চ|
ঘৃতং চ সিদ্ধং মধুশেষযুক্তং রক্তানিলার্তিং প্রণুদেত্ প্রদেহঃ||২২||
বাতে সরক্তে সঘৃতং প্রদেহো গোধূমচূর্ণং ছগলীপযশ্চ|২৩|
View original
कोलं कुलत्थाः सुरदारुरास्नामाषातसीतैलफलानि कुष्ठम्|
वचा शताह्वा यवचूर्णमम्लमुष्णानि वातामयिनां प्रदेहः||१८||
आनूपमत्स्यामिषवेसवारैरुष्णैः प्रदेहः पवनापहः स्यात्|
स्नेहैश्चतुर्भिर्दशमूलमिश्रैर्गन्धौषधैश्चानिलहः प्रदेहः||१९||
तक्रेण युक्तं यवचूर्णमुष्णं सक्षारमर्तिं जठरे निहन्यात्|
कुष्ठं शताह्वां सवचां यवानां चूर्णं सतैलाम्लमुशन्ति वाते||२०||
उभे शताह्वे मधुकं मधूकं बलां प्रियालं च कशेरुकं च|
घृतं विदारीं च सितोपलां च कुर्यात् प्रदेहं पवने सरक्ते||२१||
रास्ना गुडूची मधुकं बले द्वे सजीवकं सर्षभकं पयश्च|
घृतं च सिद्धं मधुशेषयुक्तं रक्तानिलार्तिं प्रणुदेत् प्रदेहः||२२||
वाते सरक्ते सघृतं प्रदेहो गोधूमचूर्णं छगलीपयश्च|२३|
তৈলযোনিফলান্যেরণ্ডফলতিলাদীনি| অম্লমিতি কাঞ্জিকাদিযোগাত্| আনূপানাং খড্গাদীনাং মত্স্যানাং চামিষং মাংসমানূপমত্স্যামিষম্| বেসবারঃ- “নিরস্থি পিশিতং পিষ্টং স্বিন্নং গুডঘৃতান্বিতম্| কৃষ্ণামরিচসংযুক্তং বেসবার ইতি স্মৃতঃ”| গন্ধপ্রধানান্যৌষধানি গন্ধৌষধানি, তানি চাগুর্বাদীনি জ্বরাধ্যাযে প্রতিপাদ্যানি; গন্ধৌষধৈশ্চ সিদ্ধৈরিতি যোজনীযং; তেন দশমূলগন্ধৌষধাভ্যাং স্নেহাঃ সাধনীযাঃ (কিংবা গন্ধৌষধৈর্দশমূলসিদ্ধৈঃ স্নেহপৃক্তৈরযং প্রদেহঃ )| উশন্তি কথযন্তি| বিদারী বিদারীকন্দঃ| সিতোপলা সিতশর্করা| মধুশেষঃ সিক্থকম্| সিদ্ধমিতি ঘৃতদুগ্ধযুক্তং সত্ কিঞ্চিদেবাগ্নৌ সাধিতম্||১৮-২২||-
Adhikarana 4 (23-29) · Śloka 29
নতোত্পলং চন্দনকুষ্ঠযুক্তং শিরোরুজাযাং সঘৃতং প্রদেহঃ||২৩||
প্রপৌণ্ডরীকং সুরদারু কুষ্ঠং যষ্ট্যাহ্বমেলা কমলোত্পলে চ|
শিরোরুজাযাং সঘৃতঃ প্রদেহো লোহৈরকাপদ্মকচোরকৈশ্চ||২৪||
রাস্না হরিদ্রে নলদং শতাহ্বে দ্বে দেবদারূণি সিতোপলা চ|
জীবন্তিমূলং সঘৃতং সতৈলমালেপনং পার্শ্বরুজাসু কোষ্ণম্||২৫||
শৈবালপদ্মোত্পলবেত্রতুঙ্গপ্রপৌণ্ডরীকাণ্যমৃণাললোধ্রম্|
প্রিযঙ্গুকালেযকচন্দনানি নির্বাপণঃ স্যাত্ সঘৃতঃ প্রদেহঃ||২৬||
সিতালতাবেতসপদ্মকানি যষ্ট্যাহ্বমৈন্দ্রী নলিনানি দূর্বা|
যবাসমূলং কুশকাশযোশ্চ নির্বাপণঃ স্যাজ্জলমেরকা চ||২৭||
শৈলেযমেলাগুরুণী সকুষ্ঠে চণ্ডা নতং ত্বক্ সুরদারু রাস্না|
শীতং নিহন্যাদচিরাত্ প্রদেহো বিষং শিরীষস্তু সসিন্ধুবারঃ||২৮||
শিরীষলামজ্জকহেমলোধ্রৈস্ত্বগ্দোষসংস্বেদহরঃ প্রঘর্ষঃ|
পত্রাম্বুলোধ্রাভযচন্দনানি শরীরদৌর্গন্ধ্যহরঃ প্রদেহঃ||২৯||
View original
नतोत्पलं चन्दनकुष्ठयुक्तं शिरोरुजायां सघृतं प्रदेहः||२३||
प्रपौण्डरीकं सुरदारु कुष्ठं यष्ट्याह्वमेला कमलोत्पले च|
शिरोरुजायां सघृतः प्रदेहो लोहैरकापद्मकचोरकैश्च||२४||
रास्ना हरिद्रे नलदं शताह्वे द्वे देवदारूणि सितोपला च|
जीवन्तिमूलं सघृतं सतैलमालेपनं पार्श्वरुजासु कोष्णम्||२५||
शैवालपद्मोत्पलवेत्रतुङ्गप्रपौण्डरीकाण्यमृणाललोध्रम्|
प्रियङ्गुकालेयकचन्दनानि निर्वापणः स्यात् सघृतः प्रदेहः||२६||
सितालतावेतसपद्मकानि यष्ट्याह्वमैन्द्री नलिनानि दूर्वा|
यवासमूलं कुशकाशयोश्च निर्वापणः स्याज्जलमेरका च||२७||
शैलेयमेलागुरुणी सकुष्ठे चण्डा नतं त्वक् सुरदारु रास्ना|
शीतं निहन्यादचिरात् प्रदेहो विषं शिरीषस्तु ससिन्धुवारः||२८||
शिरीषलामज्जकहेमलोध्रैस्त्वग्दोषसंस्वेदहरः प्रघर्षः|
पत्राम्बुलोध्राभयचन्दनानि शरीरदौर्गन्ध्यहरः प्रदेहः||२९||
নতং তগরপাদিকা, তদভাবে শীউলীচোপ্পডকো গৃহ্যতে| প্রপৌণ্ডরীকঃ পুণ্ডরীকম্| লোহম্ অগুরু| এরকা হোগ্গলঃ| অযং প্রপৌণ্ডরীকাদিভিশ্চোরকৈশ্চেত্যন্ত একঃ প্রযোগঃ| চোরকঃ চোরপুষ্পিকা স্বনামপ্রসিদ্ধঃ| নলদং মাংসী| শতাহ্বে ইতি শতপুষ্পামধুরিকে| তুঙ্গঃ পুন্নাগঃ| অমৃণালম্ উশীরম্| কালেযকং কালিযাকাষ্ঠম্| লতা মঞ্জিষ্ঠা| ঐন্দ্রী গোরক্ষকর্কটী| নলিনং কমলম্| যবাসমূলং দুরালভামূলম্| কুশকাশযোশ্চ মূলম্| অযং সিতাদিরেরকা চেত্যন্ত একো যোগঃ| জলং বালকম্| সিন্ধুবারঃ নির্গুণ্ডী| বিষমিত্যাদিরপরঃ প্রযোগঃ| লামজ্জকম্ উশীরম্| হেম নাগকেশরম্| অভযম্ উশীরম্||২৩-২৯||
Adhikarana 5 (30) · Śloka 30
তত্র শ্লোকঃ- ইহাত্রিজঃ সিদ্ধতমানুবাচ দ্বাত্রিংশতং সিদ্ধমহর্ষিপূজ্যঃ|
চূর্ণপ্রদেহান্ বিবিধামযঘ্নানারগ্বধীযে জগতো হিতার্থম্||৩০||
View original
तत्र श्लोकः- इहात्रिजः सिद्धतमानुवाच द्वात्रिंशतं सिद्धमहर्षिपूज्यः|
चूर्णप्रदेहान् विविधामयघ्नानारग्वधीये जगतो हितार्थम्||३०||
অধ্যাযার্থসঙ্গ্রহঃ- ইহাত্রিজ ইত্যাদি| চূর্ণপ্রদেহানিতি পূর্ববদ্ব্যাখ্যেযম্| দ্বাত্রিংশতমিতি সঙ্খ্যাকরণং ন্যূনাধিকসঙ্খ্যা দুর্বোধনিরাকরণার্থম্||৩০||
Adhikarana puShpikA · Śloka 3
ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে আরগ্বধীযো নাম তৃতীযোঽধ্যাযঃ||৩||
View original
इत्यग्निवेशकृते तन्त्रे चरकप्रतिसंस्कृते श्लोकस्थाने आरग्वधीयो नाम तृतीयोऽध्यायः||३||
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে প্রথমে ভেষজচতুষ্কে আরগ্বধীযো নাম তৃতীযোঽধ্যাযঃ||৩||