30. arthēdaśamahāmūlīyō'dhyāyaḥ

Adhikarana 1 (1-2) · Śloka 2

অথাতোঽর্থেদশমহামূলীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পারিশেষ্যাত্ কিংবা সূত্রস্থানমভিধায তন্ত্রসঙ্গ্রহং বক্তুমর্থেদশমহামূলীয উচ্যতে| অত্র ‘অধিকৃত্য কৃতে গ্রন্থে’ (পা. অ. ৪/৩/৮৭) ইত্যনুবর্তমানে “অধ্যাযানুবাকযোর্লুক্ চ” (পা. অ. ৫/২/৬০) ইতি চ্ছঃ||১-২||

Adhikarana 2 (3-4) · Śloka 4

অর্থে দশ মহামূলাঃ সমাসক্তা মহাফলাঃ| মহচ্চার্থশ্চ হৃদযং পর্যাযৈরুচ্যতে বুধৈঃ||৩|| ষডঙ্গমঙ্গং বিজ্ঞানমিন্দ্রিযাণ্যর্থপঞ্চকম্| আত্মা চ সগুণশ্চেতশ্চিন্ত্যং চ হৃদি সংশ্রিতম্||৪||

অর্থে ইতি হৃদযে, মহামূলা ইতি মহদ্ধৃদযং মূলং যাসাং ধমনীনাং তাস্তথা, সমাসক্তা ইত্যাশ্রিতাঃ| তস্য হৃদযস্য পর্যাযানাহ- মহচ্চেত্যাদি| মহত্সঞ্জ্ঞা তথা অর্থসঞ্জ্ঞা চ হৃদযস্য বৈদ্যব্যবহারসিদ্ধা ন সর্বত্র শাস্ত্রান্তরেষু| হৃদযস্য যথা যন্মহত্ত্বং যথা বা অর্থ্যমানত্বেনার্থত্বং তদ্ধৃদযস্যাভ্যর্হিতত্বাত্| অভ্যর্হিতত্বমাহ- ষডঙ্গমিত্যাদি| ষডঙ্গানি বাহুদ্বযজঙ্ঘাদ্বযশিরোন্তরাধিরূপাণি যস্য তত্ ষডঙ্গমঙ্গম্| অঙ্গং চ ষডঙ্গাদতিরিক্তং সমুদাযরূপমবযবিরূপং বা| অঙ্গমিতি বক্তব্যে ষডঙ্গবিশেষণং ষণ্ণামঙ্গানামপি হৃদযাশ্রিতত্বপ্রতিপাদনার্থং; কিংবা, অঙ্গশব্দস্যাবযববাচিনো নিষেধার্থম্| বিজ্ঞানং চ যদ্যপি ‘আত্মা চ সগুণঃ’ ইতি বচনাদেব আত্মগুণত্বেন লব্ধং, তথাঽপ্যাত্মগুণেষু প্রাধান্যাত্ পুনঃ পৃথগুচ্যতে; বচনং হি “সুখং সমগ্রং বিজ্ঞানং বিসর্গে চ প্রতিষ্ঠিতম্” ইতি| ইন্দ্রিযাণি চক্ষুরাদীনি পঞ্চ| অর্থপঞ্চকং শব্দাদি| সগুণ ইত্যনেন সুখাদিগ্রহণম্| চেতঃ মনঃ| চিন্ত্যং মনোবিষযঃ| এতে চ ষডঙ্গবিজ্ঞানাদযঃ প্রতি প্রতি পঠিতাঃ প্রত্যেকমেবোপাদেযত্বেন; তেনাত্র কস্যচিদর্থলব্ধত্বেনোপাদানং কর্তব্যমিতি নোদ্ভাবনীযম্, অর্থলব্ধো হ্যর্থঃ সাক্ষাদনভিধীযমানত্বাদপ্রধানং ভবতি||৩-৪||

Adhikarana 3 (5) · Śloka 6

প্রতিষ্ঠার্থং হি ভাবানামেষাং হৃদযমিষ্যতে| গোপানসীনামাগারকর্ণিকেবার্থচিন্তকৈঃ||৫|| তস্যোপঘাতান্মূর্চ্ছাযং ভেদান্মরণমৃচ্ছতি|৬|

অথ কথমমী ষডঙ্গাদযো হৃদযাশ্রযাঃ, যাবতা “হৃদযং দ্ব্যঙ্গুলং” (বি. ৮) ইতি বক্ষ্যতি, অঙ্গং চ ষডঙ্গাশ্রযং মহত্, ইন্দ্রিযাণ্যপি চ স্বাশ্রয চক্ষুরাদিস্থিতানি, অর্থাশ্চ বাহ্যদ্রব্যাশ্রযিণঃ, আত্মা চানাশ্রিত এব ব্যাপকঃ, তদ্গুণশ্চ বিজ্ঞানমাত্মন্যেবাশ্রিতং, মনোঽপ্যনাশ্রিতমাত্মগতং, চিন্ত্যং চ ধ্যেযাদি ন হৃদি, ইত্যাশঙ্ক্যাহ- প্রতিষ্ঠেত্যাদি|- প্রতিষ্ঠা কার্যকরণাবিরোধেনাবস্থানম্ | ভাবানামেষামিতি ষডঙ্গাদীনাম্| হৃদযমিষ্যতে ‘কারণম্’ ইতি শেষঃ| অত্রৈব দৃষ্টান্তমাহ গোপানসীনামিত্যাদি| গোপানস্যঃ গৃহাচ্ছাদনাধারকাষ্ঠানি | আগারকর্ণিকা গৃহাচ্ছাদনমধ্যে গৃহাচ্ছাদনকাষ্ঠনিবন্ধনী লোকে ‘আডকম্’ ইত্যুচ্যতে| অর্থচিন্তকৈরিতি হৃদযচিন্তকৈঃ| তেন, ষডঙ্গাদীনাং হৃদযাশ্রিতত্বং নাধারাধেযভাবেন, কিং তর্হি তদন্বযব্যতিরেকানুবিধাযিত্বেনেতি দর্শিতং ভবতি| হৃদযাশ্রিতত্বং হৃদযে প্রকৃতিস্থে ষডঙ্গাদিভাবানাং প্রকৃতিস্থত্বং, হৃদযোপঘাতে তদুপঘাত ইত্যর্থঃ| যদ্যপি চ, আত্মবিজ্ঞানমনসাং হৃদযাশ্রিতত্বমাধারাধেযভাবাদপি কষ্টসৃষ্ট্যা পার্যতে বক্তুং, তথাঽপি সর্বব্যাপকত্বান্নোপাদেযমাধারধেযত্বম্| নৈবম্, আত্মা হ্যত্র সংসারী ভোগাযতনত্বেনাভিপ্রেতঃ, স চ হৃদযপ্রদেশ এব সুখদুঃখাদ্যুপলভত ইত্যনুভবসিদ্ধং, তেন হৃদযাশ্রিত ইবাত্মা| তথা মনোঽপি প্রাযেণ হৃদ্যেব তিষ্ঠতি, যত উপরতক্রিযং মনো হৃদ্যেব তিষ্ঠতি, তথা ধ্যানে যোগে চ হৃদিস্থমেব মনো ভবতি| যদপ্যুক্তম্- “আত্মস্থে মনসি স্থিরে” (শা. ১) ইতি, তদপ্যাত্মস্থত্বং মনসো হৃদযস্থত্বমেব| এবং জ্ঞানসুখদুঃখানি চ হৃদযস্থান্যেব লক্ষ্যন্তে, তথা হ্যতিচিন্তনাত্তথা দুঃখাবেশাদ্বা হৃদযমেব পীড্যতে, নান্যদঙ্গম্| ভবত্বনেনাব্যাপকেনাশ্রযাশ্রযিভাবেন ব্যুত্পাদিতেন | তমেব হৃদযোপঘাতে ষডঙ্গাদিভাবোপঘাতমাহ- তস্যোপঘাতাদিত্যাদি| তস্যেতি হৃদযস্য| উপঘাতঃ কিঞ্চিদুপহননম্| ভেদাদিতি মহোপঘাতাত্| মরণং চ ষডঙ্গাদীনাং সর্বেষামেব যথোক্তপ্রতিষ্ঠানাশ ইতি ভাবঃ||৫||-

Adhikarana 4 (6-7) · Śloka 7

যদ্ধি তত্ স্পর্শবিজ্ঞানং ধারি তত্তত্র সংশ্রিতম্||৬|| তত্ পরস্যৌজসঃ স্থানং তত্র চৈতন্যসঙ্গ্রহঃ| হৃদযং মহদর্থশ্চ তস্মাদুক্তং চিকিত্সকৈঃ ||৭||

কথমেতদ্ভবতীত্যাহ- যদ্ধীত্যাদি| স্পর্শো বিজ্ঞাযতেঽনেনেতি স্পর্শং বা বিজানাতীতি স্পর্শবিজ্ঞানং; তস্যৈব বিশেষণং- ধারীতি, ধারি তু শরীরেন্দ্রিযসত্ত্বাত্মসংযোগঃ; যদুক্তং- “শরীরেন্দ্রিযসত্ত্বাত্মসংযোগো ধারি জীবিতম্” (সূ. ১) ইতি; এতেন যঃ শরীরাদিসংযোগঃ স্পর্শনেন বিজানাতি সর্বং জ্ঞেযং, যশ্চাযং শরীরধারণাদ্ধারীত্যুচ্যতে, স হৃদি স্থিতঃ| তেন, তদুপঘাতান্মূর্চ্ছা তথা তদ্ভেদান্মরণং চৈতন্যাননুবৃত্তিলক্ষণমুপপন্নম্| স্পর্শো হি দ্বিবিধ ঐন্দ্রিযকো মানসশ্চ, এতত্স্পর্শদ্বযং বিনা ন কিঞ্চিজ্জ্ঞানং ভবতি; যদুক্তং- “যশ্চৈবৈন্দ্রিযকঃ স্পর্শঃ স্পর্শো মানস এব চ| দ্বিবিধঃ সুখদুঃখানাং বেদনানাং প্রবর্তকঃ” (শা. ১) ইতি| মানসং চ স্পর্শনং শারীরে যথাস্থানমেব দর্শযিষ্যামঃ| স্পর্শো বিজ্ঞাযত ইতি নিরুক্তিপক্ষে তু স্পর্শশব্দেন লক্ষণযা স্পৃশ্যমানোঽর্থোঽভিপ্রেতঃ, তেন সর্বজ্ঞেযাবরোধঃ; যং প্রাপ্যৈবার্থমিন্দ্রিযাণি স্পর্শেনার্থং প্রকাশযন্তি, যদুক্তং- “স্পৃশ্যতে নানুপাদানো নাঽস্পৃষ্টো বেত্তি বেদনাঃ” (শা. ১) ইতি| যদ্যপি শরীরেন্দ্রিযসত্ত্বাত্মসংযোগঃ শরীরপ্রদেশান্তরেঽপ্যস্তি, তথাঽপি নাসৌ শরীরধারণে তথা জ্ঞানোত্পত্তৌ বা প্রধানং, তদুপঘাতেঽপি শরীরধারণজ্ঞানযোর্দৃষ্টত্বাত্; হৃদ্গতস্তু সংযোগঃ প্রধানং, তদন্বযব্যতিরেকানুবিধাযিত্বাত্ স্পর্শজ্ঞানশরীরধারণযোঃ; তেন সূক্তং- তত্তত্র সংশ্রিতমিতি| হৃদযাভ্যর্হিতত্বে ধর্মান্তরমাহ- তত্ পরস্যেত্যাদি| পরস্য শ্রেষ্ঠস্য| এতেন দ্বিবিধমোজো দর্শযতি- পরমপরং চ; তত্রাঞ্জলিপরিমাণমপরং, যদুক্তং- “তাবদেব পরিমাণং শ্লৈষ্মিকস্যৌজসঃ” (শা. ৭) ইতি; অল্পপ্রমাণং তু পরং, যদভিপ্রেত্যোক্তং- “হৃদি তিষ্ঠতি যচ্ছুদ্ধং রক্তমীষত্সপীতকম্” (সূ. ১৭) ইতি, তন্ত্রান্তরেঽপ্যুক্তং- “প্রাণাশ্রযস্যৌজসোঽষ্টৌ বিন্দবো হৃদযাশ্রিতাঃ” ইতি; কিঞ্চ, সতি হি পরে চাপরে চৌজসি ‘পরস্য’ ইতি বিশেষণং সার্থকং ভবতি, নত্বেকরূপে| অর্ধাঞ্জলিপরিমিতস্যৌজসো ধমন্য এব হৃদযাশ্রিতাঃ স্থানম্| তথা প্রমেহেঽর্ধাঞ্জলিপরিমিতমেবৌজঃ ক্ষীযতে নাষ্টবিন্দুকম্, অস্য হি কিঞ্চিত্ক্ষযেঽপি মরণং ভবতি; প্রমেহে তু ওজঃক্ষযে জীবত্যেব তাবত্; ওজঃক্ষযলক্ষণমপ্যর্ধাঞ্জল্যোজঃক্ষয এব বোদ্ধব্যম্| ওজঃশব্দশ্চ যদ্যপি রসেঽপি বর্ততে, যদুক্তং- “রসশ্চৌজসঙ্খ্যাতঃ” (নি. ৪) ইতি, তথা “মলীভবতি তত্ প্রাযঃ কল্পতে কিঞ্চিদোজসে” (চি. ৮) ইতি; তথাঽপীহ সর্বধাতুসারমোজোঽভিধীযতে| এতচ্চৌজ উপধাতুরূপং কেচিদাহুঃ; ধাতুর্হি ধারণপোষণযোগাদ্ভবতি, ওজস্তু দেহধারকং সদপি ন দেহপোষকং, তেন নাষ্টমো ধাতুরোজঃ| কেচিত্তু শুক্রবিশেষমোজঃ প্রাহুঃ, তচ্চ ন মনঃ প্রীণাতি| যে তু ব্রুবতে- সর্বধাতূনাং সারসমুদযভূতমোজঃ, তে রসাদিসাররূপতযা রসাদিভ্যোঽভিন্নমোজ ইতি পৃথগ্ধাতুত্বেনোপধাতুত্বেন বা ন নির্দেশ্যমিতি পশ্যন্তি; বচনং চ- “ভ্রমরৈঃ ফলপুষ্পেভ্যো যথা সঞ্চীযতে মধু| তদ্বদোজঃ শরীরেভ্যো গুণৈঃ সম্ভ্রিযতে নৃণাম্” (সূ. ১৭) ইতি; অত্র শরীরেভ্য ইতি ধাতুভ্যঃ, গুণৈরিতি সারভাগৈঃ| তত্র চৈতন্যসঙ্গ্রহ ইতি তত্র হৃদি আত্মা চৈতন্যস্য স্ববিষযে প্রসৃতস্য সঙ্গ্রহণং করোতি, তেন প্রসৃতং মনো হৃদযে নিগৃহ্য যোগজ্ঞো ভবত্যাত্মেত্যুক্তং ভবতি; ততশ্চ যোগস্য মোক্ষসাধনত্বেনোপাদেযস্যাপি হৃদযমেব স্থানমিতি হৃদযমভ্যর্হিতং ভবতি| যস্মাদেবঙ্গুণং হৃদযম্, অতো হৃদযং ‘মহদ্’ ইতি চ, তথা ‘অর্থ’ ইতি চোচ্যতে চিকিত্সকৈঃ||৬-৭||

Adhikarana 5 (8) · Śloka 8

তেন মূলেন মহতা মহামূলা মতা দশ| ওজোবহাঃ শরীরেঽস্মিন্ বিধম্যন্তে সমন্ততঃ||৮||

সম্প্রতি ধমনীনাং মহামূলত্বং প্রতিপাদযতি- তেনেত্যাদি| তেনেতি হৃদযেন মহতা, ‘যুক্তাঃ’ ইতি শেষঃ| বিধম্যন্তে বিসর্পন্তে ||৮||

Adhikarana 6 (9-11) · Śloka 12

যেনৌজসা বর্তযন্তি প্রীণিতাঃ সর্বদেহিনঃ | যদৃতে সর্বভূতানাং জীবিতং নাবতিষ্ঠতে||৯|| যত্ সারমাদৌ গর্ভস্য যত্তদ্গর্ভরসাদ্রসঃ | সংবর্তমানং হৃদযং সমাবিশতি যত্ পুরা ||১০|| যস্য নাশাত্তু নাশোঽস্তি ধারি যদ্ধৃদযাশ্রিতম্ | যচ্ছরীররসস্নেহঃ প্রাণা যত্র প্রতিষ্ঠিতাঃ||১১|| তত্ফলা বহুধা বা তাঃ ফলন্তীব(তি) মহাফলাঃ|১২|

সম্প্রতি ধমনীনামুক্তং মহাফলত্বং ব্যুত্পাদযন্নাহ- যেনৌজসেত্যাদি| যেনৌজসেতি সামান্যেন দ্বিবিধমপ্যোজো গ্রাহ্যম্| বর্তযন্তি জীবন্তি, বর্তযন্তীতি চৌরাদিকো ণিচ্| প্রীণিতা ইতি তর্পিতাঃ| যত্ সারমাদৌ গর্ভস্যেতি শুক্রশোণিতসংযোগে জীবাধিষ্ঠিতমাত্রে যত্ সারভূতং, তত্রাপি তিষ্ঠতি| যত্তদ্গর্ভরসাদ্রস ইতি গর্ভরসাচ্ছুক্রশোণিতসংযোগপরিণামেন কললরূপাত্, রস ইতি সারভূতম্| সংবর্তমানং হৃদযং সমাবিশতি যত্ পুরেতি যদা হৃদযং নিষ্পদ্যমানং, তদৈব ব্যক্তলক্ষণং সদ্ধৃদযমধিতিষ্ঠতি যদিত্যর্থঃ| এতেন, গর্ভাবস্থাত্রযেঽপি তদোজস্তিষ্ঠতীত্যুচ্যতে; পরং গর্ভাদৌ শুক্রশোণিতসাররূপতযা, কললাবস্থাযাং তু রসসাররূপতযা, অবযবনিষ্পত্তৌ তু স্বলক্ষণযুক্তমেব ভবত্যোজ ইত্যোজসঃ সর্বাবস্থাব্যাপকত্বেন মহত্ত্বমুচ্যতে| যস্য নাশাত্তু নাশোঽস্তীতি ধাত্বন্তরাক্ষযেঽপি সত্যোজঃক্ষযে মরণমিত্যর্থঃ| ধারীতি জীবধারকসংযোগিভ্যঃ প্রধানত্বাত্| শরীররসস্নেহ ইতি শরীরসারসারং; রসশব্দঃ স্নেহশব্দশ্চ সারবচনঃ, তেন শরীররসানাং ধাতূনামপি সার ইত্যর্থঃ| এতচ্চ প্রকারান্তরেণাভ্যর্হিতানেককর্মকথনমোজসোঽভ্যর্হিতত্বখ্যাত্যর্থম্| তত্ফলা ওজঃফলা ওজোবহা ইতি যাবত্| এতেন, যথোক্তগুণশালিত্বেনৌজো মহত্; এতদ্বহনেন ফলন্তীবেতি মহাফলা ধমন্য উক্তাঃ| দ্বিতীযাং নিরুক্তিমাহ- বহুধা বা তাঃ ফলন্তীতি, ‘তা হৃদযাশ্রিতা দশ ধমন্যো বহুধা অনেকপ্রকারং ফলন্তীতি’ নিষ্পদ্যন্তে; এতেন, মূলে হৃদযে দশরূপাঃ সত্যো মহাসঙ্খ্যাঃ শরীরে প্রতানভেদাদ্ভবন্তীত্যুক্তম্||৯-১১||-

Adhikarana 7 (12) · Śloka 12

ধ্মানাদ্ধমন্যঃ স্রবণাত্ স্রোতাংসি সরণাত্সিরাঃ||১২||

ধমনীশব্দাদিনিরুক্তিমাহ- ধ্মানাদিত্যাদি| ধ্মানাত্ পূরণাদ্ বাহ্যেন রসাদিনেত্যর্থঃ| স্রবণাদিতি রসাদেরেব পোষ্যস্য স্রবণাত্| সরণাদ্ দেশান্তরগমনাত্||১২||

Adhikarana 8 (13-14) · Śloka 14

তন্মহত্ তা মহামূলাস্তচ্চোজঃ পরিরক্ষতা| পরিহার্যা বিশেষেণ মনসো দুঃখহেতবঃ||১৩|| হৃদ্যং যত্ স্যাদ্যদৌজস্যং স্রোতসাং যত্ প্রসাদনম্| তত্তত্ সেব্যং প্রযত্নেন প্রশমো জ্ঞানমেব চ||১৪||

সম্প্রতি হৃদিস্থস্য মনসঃ পরিপালনহেতুমাহ- তন্মহদিত্যাদি| তন্মহদিতি ষডঙ্গাদিস্থানং হৃদযম্| তা মহামূলা ইতি ওজোবহা ধমন্যঃ| তচ্চৌজ ইতি যেনৌজসেত্যাদিনোক্তগুণমোজঃ| প্রশমঃ শান্তিঃ| জ্ঞানং তত্ত্বজ্ঞানম্||১৩-১৪||

Adhikarana 9 (15) · Śloka 15

অথ খল্বেকং প্রাণবর্ধনানামুত্কৃষ্টতমমেকং বলবর্ধনানামেকং বৃংহণানামেকং নন্দনানামেকং হর্ষণানামেকমযনানামিতি | তত্রাহিংসা প্রাণিনাং প্রাণবর্ধনানামুত্কৃষ্টতমং, বীর্যং বলবর্ধনানাং, বিদ্যা বৃংহণানাম্, ইন্দ্রিযজযো নন্দনানাং, তত্ত্বাববোধো হর্ষণানাং, ব্রহ্মচর্যমযনানামিতি ; এবমাযুর্বেদবিদো মন্যন্তে||১৫||

সেব্যপ্রস্তাবেন প্রাণবর্ধনাদ্যুত্কৃষ্টান্যহিংসাদীন্যপ্যাহ- অথ খল্বিত্যাদি| একমিতি একমেব, ন দ্বিতীযমুত্কৃষ্টতমমস্তীত্যর্থঃ| অযনানামিতি মার্গাণাম্| যদ্যপ্যন্নং প্রাণবর্ধনং তথাঽপ্যহিংসৈবোত্কৃষ্টা, অহিংসযা হি ধর্মজননাত্তত্কৃতমবিচাল্যং ভবতি| যদ্যপি মাংসং বৃংহণপ্রধানং, তথাঽপি তচ্ছরীরমাত্রবৃংহণং, বিদ্যা তু শরীরমনোবৃংহণীযাঽতিরিচ্যতে||১৫||

Adhikarana 10 (16-19) · Śloka 19

তত্রাযুর্বেদবিদস্তন্ত্রস্থানাধ্যাযপ্রশ্নানাং পৃথক্ত্বেন বাক্যশো বাক্যার্থশোঽর্থাবযবশশ্চ প্রবক্তারো মন্তব্যাঃ| তত্রাহ- কথং তন্ত্রাদীনি বাক্যশো বাক্যার্থশোঽর্থাবযবশশ্চোক্তানি ভবন্তীতি||১৬|| অত্রোচ্যতে- তন্ত্রমার্ষং কার্ত্স্ন্যেন যথাম্নাযমুচ্যমানং বাক্যশো ভবত্যুক্তম্||১৭|| বুদ্ধ্যা সম্যগনুপ্রবিশ্যার্থতত্ত্বং বাগ্ভির্ব্যাসসমাসপ্রতিজ্ঞাহেতূদাহরণোপনযনিগমনযুক্তাভিস্ত্রিবিধশিষ্যবুদ্ধিগম্যাভিরুচ্যমানং বাক্যার্থশো ভবত্যুক্তম্||১৮|| তন্ত্রনিযতানামর্থদুর্গাণাং পুনর্বিভাবনৈরুক্তমর্থাবযবশো ভবত্যুক্তম্||১৯||

আযুর্বেদশ্রবণপ্রসঙ্গেনাযুর্বেদনিরুক্ত্যাঽঽযুষস্তথাঽঽযুর্বেদস্য চ নিরূপকং প্রকরণং ব্রূতে- তত্রেত্যাদি| বাক্যশ ইত্যাদি স্বযমেব ব্যাকরিষ্যতি| আর্ষম্ ঋষিকৃতম্| তন্ত্রং শাস্ত্রম্| যথাম্নাযমুচ্যমানমিতি যথাপাঠক্রমেণোচ্যমানম্| উদাহরণং দৃষ্টান্তঃ; উপনযঃ সিদ্ধান্তোপপাদিতস্য সাধনধর্মস্য সাধ্যে পুনঃ কথনং, যথা- তথা চাযং ধূমবানিতি; নিগমনং হেতুসাধিতসাধ্যধর্মকথনং, যথা- তস্মাদগ্নিমানিতি| তন্ত্রনিযতানামিতি তন্ত্রগতানাম্| বিভাবনৈরুক্তমিতি ব্যাখ্যানৈঃ কথনম্; উক্তমিতি ভাবে ‘ক্তঃ’| অস্যোদাহরণং যথা- “শরীরচেষ্টা যা চেষ্টা স্থৈর্যার্থা বলবর্ধিনী” (সূ. ৭) ইত্যত্র ‘ইষ্টা যা চেষ্টা’ ইত্যেতাবন্মাত্রমুচ্যতে, তেন দ্বিতীযচেষ্টাপদস্য দুর্গস্য ব্যাকরণং পরং ভবতি||১৬-১৯||

Adhikarana 11 (20) · Śloka 20

তত্র চেত্ প্রষ্টারঃ স্যুঃ- চতুর্ণামৃক্সামযজুরথর্ববেদানাং কং বেদমুপদিশন্ত্যাযুর্বেদবিদঃ?, কিমাযুঃ?, কস্মাদাযুর্বেদঃ?, কিমর্থমাযুর্বেদঃ?, শাশ্বতোঽশাশ্বতো বা?, কতি কানি চাস্যাঙ্গানি?, কৈশ্চাযমধ্যেতব্যঃ?, কিমর্থং চ? ইতি||২০||

ইদানীমাযুর্বেদবিদঃ প্রশ্নেনৈব নির্ণেতব্যা ইত্যতঃ প্রশ্নানাহ- তত্র চেদিত্যাদি| কং বেদমুপদিশন্তি ‘আযুর্বেদম্’ ইতি শেষঃ||২০||

Adhikarana 12 (21) · Śloka 21

তত্র ভিষজা পৃষ্টেনৈবং চতুর্ণামৃক্সামযজুরথর্ববেদানামাত্মনোঽথর্ববেদে ভক্তিরাদেশ্যা, বেদো হ্যাথর্বণো দানস্বস্ত্যযনবলিমঙ্গলহোমনিযমপ্রাযশ্চিত্তোপবাসমন্ত্রাদিপরিগ্রহাচ্চিকিত্সাং প্রাহ; চিকিত্সা চাযুষো হিতাযোপদিশ্যতে||২১||

অথর্ববেদে ভক্তিঃ সেবেত্যর্থঃ; এতেন ভিষক্সেব্যত্বেনাথর্ববেদস্যাযুর্বেদত্বমুক্তং ভবতি| আযুর্বেদস্যাথর্ববেদাভেদহেতুমাহবেদো হীত্যাদি| এতেনৈকপ্রযোজনত্বাদথর্ববেদৈকদেশ এবাযুর্বেদ ইত্যুক্তং ভবতি||২১||

Adhikarana 13 (22) · Śloka 22

বেদং চোপদিশ্যাযুর্বাচ্যং ; তত্রাযুশ্চেতনানুবৃত্তির্জীবিতমনুবন্ধো ধারি চেত্যেকোঽর্থঃ||২২||

প্রশ্নক্রমেণ বেদং প্রতিপাদ্যাযুরেব প্রতিপাদনীযং ভবতীত্যাহ- বেদং চোপদিশ্যেত্যাদি| চেতনানুবৃত্তিরিতি চৈতন্যসন্তানঃ; এতচ্চ গর্ভাবধিমরণপর্যন্তং বোদ্ধব্যং, তদূর্ধ্বং চেতনাননুবৃত্তেঃ; সাক্ষাদনুপলব্ধত্বেনৈবাননুবৃত্তিরিতি ভাবঃ| ন চ বাচ্যং প্রসুপ্তস্য চৈতন্যবিচ্ছেদো ভবতীতি, যতস্তত্রাপি ‘সুখমহমস্বাপ্সম্’ ইত্যুত্তরকালীনপ্রতিসন্ধানদর্শনাত্ সূক্ষ্মজ্ঞানমস্ত্যেব| যদ্যপি দীর্ঘঞ্জীবিতীযে শরীরাদিসংযোগ আযুরিত্যুক্তং, তথাঽপি তত্কার্যত্বাদিহ চৈতন্যানুবৃত্তিঃ কার্যকারণযোরভেদবিবক্ষযা আযুরুচ্যতে| অনুবন্ধধারিশব্দৌ প্রথমাধ্যাযে ব্যাকৃতৌ||২২||

Adhikarana 14 (23) · Śloka 23

তদাযুর্বেদযতীত্যাযুর্বেদঃ ; কথমিতি চেত্? উচ্যতে- স্বলক্ষণতঃ সুখাসুখতো হিতাহিততঃ প্রমাণাপ্রমাণতশ্চ; যতশ্চাযুষ্যাণ্যনাযুষ্যাণি চ দ্রব্যগুণকর্মাণি বেদযত্যতোঽপ্যাযুর্বেদঃ| তত্রাযুষ্যাণ্যনাযুষ্যাণি চ দ্রব্যগুণকর্মাণি কেবলেনোপদেক্ষ্যন্তে তন্ত্রেণ||২৩||

কস্মাদাযুর্বেদঃ? ইত্যস্যোত্তরং- তদাযুরিত্যাদি| বেদযতি বোধযতি| যে ত্বত্র তন্ত্রান্তরে বিদের্লাভাদযোঽর্থা ব্যাখ্যাতাঃ, তে ন সাক্ষাত্তদর্থজন্যা ইতীহ নোক্তাঃ| স্বলক্ষণত ইত্যাদি স্বমযেবোদাহরিষ্যতি| আযুষ্যানাযুষ্যে আযুঃকারণত্বেন আযুঃশব্দেন বক্তব্যে, তেনাযুষ্যানাযুষ্যবেদপক্ষে গৌণী নিরুক্তিঃ ‘আযুর্বেদঃ’ ইতি; অত এবাত্র অপিশব্দঃ কৃতঃ- অতোঽপ্যাযুর্বেদ ইতি| অনাযুষ্যমপি চ জ্ঞাতমসেব্যত্বেনাব্যবহ্রিযমাণমাযুঃ কারণং ভবত্যেব, তেনানাযুষ্যমপ্যাযুঃকারণতযা আযুঃশব্দবাচ্যং, নাত্রাপরাধঃ||২৩||

Adhikarana 15 (24) · Śloka 24

তত্রাযুরুক্তং স্বলক্ষণতো যথাবদিহৈব পূর্বাধ্যাযে চ| তত্র শারীরমানসাভ্যাং রোগাভ্যামনভিদ্রুতস্য বিশেষেণ যৌবনবতঃ সমর্থানুগতবলবীর্যযশঃপৌরুষপরাক্রমস্য জ্ঞানবিজ্ঞানেন্দ্রিযেন্দ্রিযার্থবলসমুদযে বর্তমানস্য পরমর্দ্ধিরুচিরবিবিধোপভোগস্য সমৃদ্ধসর্বারম্ভস্য যথেষ্টবিচারিণঃ সুখমাযুরুচ্যতে; অসুখমতো বিপর্যযেণ; হিতৈষিণঃ পুনর্ভূতানাং পরস্বাদুপরতস্য সত্যবাদিনঃ শমপরস্য পরীক্ষ্যকারিণোঽপ্রমত্তস্য ত্রিবর্গং পরস্পরেণানুপহতমুপসেবমানস্য পূজার্হসম্পূজকস্য জ্ঞানবিজ্ঞানোপশমশীলস্য বৃদ্ধোপসেবিনঃ সুনিযতরাগরোষের্ষ্যামদমানবেগস্য সততং বিবিধপ্রদানপরস্য তপোজ্ঞানপ্রশমনিত্যস্যাধ্যাত্মবিদস্তত্পরস্য লোকমিমং চামুং চাবেক্ষমাণস্য স্মৃতিমতিমতো হিতমাযুরুচ্যতে; অহিতমতো বিপর্যযেণ||২৪||

ইহৈবেতি ‘তত্রাযুশ্চেতনানুবৃত্তিঃ’ ইত্যাদিনা| তত্র শারীরেত্যাদিনা সুখমাযুরভিধত্তে| পৌরুষম্ উত্কৃষ্টং কর্ম| জ্ঞানবিজ্ঞানেন্দ্রিযৈর্বলশব্দঃ, ইন্দ্রিযার্থেন চ সমুদযশব্দঃ সম্বধ্যতে; কিংবা জ্ঞানাদিভিঃ সর্বৈরেব সমুদযশব্দঃ সম্বধ্যতে; কিংবা জ্ঞানাদিভিঃ সর্বৈরেব ‘বলসমুদযে’ ইতি যোজ্যং; বলস্য সমুদযো বলসমুদযঃ| পরমা অত্যর্থা ঋদ্ধির্যস্য স পরমর্দ্ধিঃ| সমৃদ্ধা নিষ্পাদিতসাধ্যাঃ সর্বারম্ভা যস্য স তথা| হিতৈষিণো ভূতানামিতি সম্বন্ধঃ| তত্পরস্যেতি অধ্যাত্মপরস্য, অধ্যাত্মম্ আত্মাদিস্বরূপম্| অমুং চেতি পরলোকম্||২৪||

Adhikarana 16 (25-26) · Śloka 26

প্রমাণমাযুষস্ত্বর্থেন্দ্রিযমনোবুদ্ধিচেষ্টাদীনাং বিকৃতিলক্ষণৈরুপলভ্যতেঽনিমিত্তৈঃ, অযমস্মাত্ ক্ষণান্মুহূর্তাদ্দিবসাত্ ত্রিপঞ্চসপ্তদশদ্বাদশাহাত্ পক্ষান্মাসাত্ ষণ্মাসাত্ সংবত্সরাদ্বা স্বভাবমাপত্স্যত ইতি; তত্র স্বভাবঃ প্রবৃত্তেরুপরমো মরণমনিত্যতা নিরোধ ইত্যেকোঽর্থঃ; ইত্যাযুষঃ প্রমাণম্; অতো বিপরীতমপ্রমাণমরিষ্টাধিকারে; দেহপ্রকৃতিলক্ষণমধিকৃত্য চোপদিষ্টমাযুষঃ প্রমাণমাযুর্বেদে ||২৫|| প্রযোজনং চাস্য স্বস্থস্য স্বাস্থ্যরক্ষণমাতুরস্য বিকারপ্রশমনং চ||২৬||

বিকৃতিরূপৈর্লক্ষণৈঃ বিকৃতিলক্ষণৈঃ; তেষামেব বিশেষণম্- অনিমিত্তৈঃ; আকস্মিকৈঃ অরিষ্টৈরিত্যর্থঃ; অনিমিত্তা হি বিকৃতিরর্থেন্দ্রিযাণামরিষ্টম্| তত্রার্থবিকৃতির্যথা- “নানাপুষ্পোপমগন্ধো যস্য বাতি দিবানিশম্” (ইং. ২) ইত্যাদি, ইন্দ্রিযবিকৃতির্যথা- “যশ্চ পশ্যত্যদৃশ্যান্” (ইং. ৪) ইত্যাদি, মনোবিকৃতির্যথা- “যৈঃ পুরা বিন্দতে ভাবৈঃ সমেতৈঃ পরমাং রতিম্| তৈরেবারমমাণস্য গ্লাস্নোর্মরণমাদিশেত্” (ইং.অ.৮) ইতি, বুদ্ধিবিকৃতির্যথা- “বুদ্ধির্বলমহেতুকম্” ইত্যাদি, চেষ্টাবিকৃতির্যথা- “বিকর্ষন্নিব যঃ পাদৌ চ্যুতাংসঃ পরিধাবতি” (ইং. ১২) ইত্যাদি| আদিগ্রহণাত্ পরিজনবিকৃত্যাদযো জ্ঞেযাঃ| অত্র চ রিষ্টপ্রস্তাবে ক্ষণাদিবর্ষান্তকালকথনং বর্ষাদূর্ধ্বং রিষ্টজন্যমরণাভাবাত্| অতো বিপরীতমপ্রমাণমিতি রিষ্টহীনং ন নিশ্চিতপ্রমাণমাযুররিষ্টাধিকার ইত্যর্থঃ| অন্যদপি চাযুঃপ্রমাণজ্ঞানমাহদেহপ্রকৃতীত্যাদি | দেহশ্চ প্রকৃতিশ্চ লক্ষণং চ দেহপ্রকৃতিলক্ষণম্| তত্র দেহমধিকৃত্যাযুঃপ্রমাণং যথা- “সর্বৈঃ সারৈরুপেতাঃ” ইত্যারভ্য যাবত্ “চিরজীবিনশ্চ ভবন্তি” (বি. ৮) ইতি; প্রকৃতিতো যথা- “শ্লৈষ্মিকা বলবন্তো বসুমন্তো বিদ্যাবন্ত ওজস্বিনঃ শান্তা আযুষ্মন্তশ্চ ভবন্তি” (বি. ৮) ইতি; লক্ষণতো যথা- “তত্রেমান্যাযুষ্মতাং কুমারাণাং লক্ষণানি ভবন্তি” (শা. ৮) ইত্যাদি| কিংবা, দেহস্য সহজলক্ষণং দেহপ্রকৃতিলক্ষণং, তচ্চ সর্বং সারপ্রকৃত্যাদিলক্ষণং বোদ্ধব্যম্||২৫-২৬||

Adhikarana 17 (27) · Śloka 27

সোঽযমাযুর্বেদঃ শাশ্বতো নির্দিশ্যতে, অনাদিত্বাত্, স্বভাবসংসিদ্ধলক্ষণত্বাত্, ভাবস্বভাবনিত্যত্বাচ্চ| ন হি নাভূত্ কদাচিদাযুষঃ সন্তানো বুদ্ধিসন্তানো বা, শাশ্বতশ্চাযুষো বেদিতা, অনাদি চ সুখদুঃখং সদ্রব্যহেতুলক্ষণমপরাপরযোগাত্| এষ চার্থসঙ্গ্রহো বিভাব্যতে আযুর্বেদলক্ষণমিতি| গুরুলঘুশীতোষ্ণস্নিগ্ধরূক্ষাদীনাং দ্রব্যাণাং সামান্যবিশেষাভ্যাং বৃদ্ধিহ্রাসৌ, যথোক্তং- গুরুভিরভ্যস্যমানৈর্গুরূণামুপচযো ভবত্যপচযো লঘূনাং, এবমেবেতরেষামিতি, এষ ভাবস্বভাবো নিত্যঃ, স্বলক্ষণং চ দ্রব্যাণাং পৃথিব্যাদীনাং; সন্তি তু দ্রব্যাণি গুণাশ্চ নিত্যানিত্যাঃ| ন হ্যাযুর্বেদস্যাভূত্বোত্পত্তিরুপলভ্যতে, অন্যত্রাববোধোপদেশাভ্যাম্; এতদ্বৈ দ্বযমধিকৃত্যোত্পত্তিমুপদিশন্ত্যেকে| স্বাভাবিকং চাস্য লক্ষণমকৃতকং, যদুক্তমিহাদ্যেঽধ্যাযে চ; যথা- অগ্নেরৌষ্ণ্যম্, অপাং দ্রবত্বম্| ভাবস্বভাবনিত্যত্বমপি চাস্য, যথোক্তং- গুরুভিরভ্যস্যমানৈর্গুরূণামুপচযো ভবত্যপচযো লঘূনামিতি||২৭||

অনাদিত্বাদিতি হেতুত্রযমত্র| প্রথমস্য বিবরণং- ন হীত্যাদি| ইহ ব্যবহারনিত্যত্বমাযুর্বেদে সাধ্যং, তচ্চার্থরূপস্যাযুর্বেদস্য ন শব্দরূপস্য; কিংবা, ব্যবহারনিত্যাযুর্বেদার্থাভিধাযকস্যাযুর্বেদস্য পারম্পর্যযোগান্নিত্যত্বং সাধ্যতে| তত্রাযুষস্তাবদাযুর্বেদপ্রতিপাদ্যস্য নিত্যত্বম্| ন হি নাভূত্ কদাচিদাযুঃসন্তান ইতি সর্বদৈবাযুরপরাপরসন্তানন্যাযেন বিদ্যতে, আযুর্যুক্তানাং প্রাণিনামনুচ্ছেদাদিত্যর্থঃ| এবং বুদ্ধিসন্তানোঽপি নহি কদাচিন্নাভূদিতি যোজনা| এতেন তস্যাপি সন্তানেন নিত্যস্যাযুষো বেদনমপি নিত্যম্| শাশ্বতশ্চাযুষো বেদিতেতি অনেনাযুর্বেদবেদিতৃনিত্যত্বমুক্তম্| এতেন বেদ্যবেদনবেদিতৄণামনাদিত্বাদাযুর্বেদস্য নিত্যত্বম্| ন চাযুঃস্বরূপেণৈবাযুর্বেদবিষযঃ, কিং তর্হি রোগাদিগৃহীতমিত্যাহ- অনাদি চেত্যাদি| সুখদুঃখমিতি আরোগ্যং সুখং, ব্যাধির্দুঃখম্| সদ্রব্যহেতুলক্ষণমিতি সহেতুচিকিত্সিতলিঙ্গম| হেতুশব্দো হি দ্রব্যশব্দেনৈব ব্যাধিকারণস্যোক্তত্বাত্ প্রশমহেতুমাহ; কেচিত্তু ‘সহেতুলক্ষণম্’ ইতি পঠন্তি, তত্রাপি হেতুশব্দেন জনকঃ শমকশ্চ রোগহেতুর্বাচ্যঃ; যদি বা সুখহেতুর্ভেষজং দুঃখহেতুশ্চ নিদানমিতি জ্ঞেযং, লক্ষণং চ ব্যাধ্যারোগ্যযোরুভযোরপি; এতেন দুঃখং তাবত্ কদাচিদপ্যজিহাসিতং ন ভবতি, জিহাসিতমনুপাযং ন ভবতি, উপাযশ্চাযুর্বেদ এব, স চ সর্বদুঃখপরিহারার্থমুপাদেযঃ; তস্মাদ্দুঃখপ্রশমনোপাযোপদেশরূপাযুর্বেদস্যানাদিতেতি ভাবঃ| এবং সুখস্য নিত্যোপাদেযস্যানাদিত্বং জ্ঞেযং, তদুপাযস্যাযুর্বেদস্য চ| কথমনাদি সুখদুঃখমিত্যাহ- অপরাপরযোগাদিতি; সন্তানাদিত্যর্থঃ| স্বভাবসংসিদ্ধলক্ষণত্বং দ্বিতীযং হেতুমাহ- এব চেত্যাদি| এষ ইতি আযুর্বুদ্ধিবেদিতৃসুখদুঃখানি| অর্থসঙ্গ্রহঃ অভিধেযসঙ্গ্রহঃ; এতেন আযুরাদিরাযুর্বেদপ্রতিপাদ্য ইতি দর্শযতি| অযং চাযুরাদিরত্রাযুর্বেদলক্ষণমিতি বিভাব্যতে জ্ঞাযত ইত্যর্থঃ| আযুরাদিনাঽভিধেযেনাযুর্বেদো লক্ষ্যতে, বচনং হি- “হিতাহিতং সুখং দুঃখং” (সু. ১) ইত্যাদ্যাযুর্বেদলক্ষণম্| এতেন, আযুরাদেরর্থস্যাযুর্বেদলক্ষণস্যানাদিতযা যথোক্তযা স্বভাবসংসিদ্ধলক্ষণত্বং ব্যাকৃতং ভবতি| স্বভাবসংসিদ্ধমিতি সর্বদা সন্তানন্যাযেন সিদ্ধত্বমভিপ্রেতম্| ভাবস্বভাবনিত্যত্বাদিতি তৃতীযং হেতুং ব্যাকরোতি- গুর্বিত্যাদি| গুরুলঘুস্নিগ্ধরূক্ষশীতোষ্ণাদীনাং দ্রব্যাণাং সামান্যবিশেষাভ্যাং যথাক্রমং বৃদ্ধিহ্রাসৌ ভবতঃ| তদেব পূর্বোক্তং ঘটযতি- গুরুভিরিত্যাদিনা এবমেবেতরেষামিত্যন্তেন| এবমেবেতরেষামিতি লঘুভিরভ্যস্যমানৈর্লঘূনামুপচযো ভবতি, অপচযো গুরূণামিত্যাদি দ্রষ্টব্যম্| এষ ইত্যেবম্প্রকারঃ; ভাবস্বভাবো নিত্য ইতি নৈষ সামান্যবিশেষাভ্যাং বৃদ্ধিহ্রাসরূপো ভাবস্বভাবঃ কদাচিদন্যথা ভবতীত্যর্থঃ| ন কেবলমযং ভাবস্বভাবো নিত্যঃ, কিন্তর্হ্যন্যোঽপীত্যাহ- স্বলক্ষণং চেত্যাদি| স্বলক্ষণং পৃথিব্যাদীনাং খরদ্রবত্বাদি| কথং পৃথিব্যাদিস্বলক্ষণং নিত্যমিত্যাহ- সন্তি ত্বিত্যাদি| দ্রব্যাণি যস্মাত্ সর্বদা সন্তি, গুণাশ্চ নিত্যাঃ সন্তি সর্বদা, চকারাদ্দ্রব্যাণি চানিত্যানি সন্তি| তত্রাকাশাদি দ্রব্যং নিত্যং, পৃথিব্যাদি কার্যং চানিত্যম্| এবঙ্গুণা আকাশপরিমাণাদযো নিত্যাঃ, অনিত্যাশ্র কার্যগুণা রসাদযঃ, অনিত্যা অপি চ সজাতীযাপরাপরসন্তানন্যাযেন সর্বদা তিষ্ঠন্তীতি যুক্তমনিত্যানামপি সন্তাননিত্যত্বমিতি ভাবঃ| অত্র ভাবস্বভাবনিত্যত্বেন হেতুনা ভাবস্বভাবস্য ব্যাধিজনকস্য তথা ব্যাধিপ্রশমকস্য নিত্যত্বেন তত্প্রতিপাদকস্যাযুর্বেদস্যাপি নিত্যত্বমুক্তং ভবতীতি মন্তব্যম্| অথাযুর্বেদস্য যত্র তত্রোত্পত্তিশ্রবণাত্ কথং নিত্যত্বমিত্যাহ- ন হ্যাযুর্বেদস্যেত্যাদি| অভূত্বোত্পত্তিঃ পূর্বমসত উত্পত্তিঃ| অন্যত্রাববোধোপদেশাভ্যামিতি যত্র যত্রাযুর্বেদস্যোত্পত্তিরুক্তা, তত্র তত্রাববোধাদুপদেশাদ্বা; অববোধাদুত্পত্তির্যথা- ব্রহ্মণ আযুর্বেদোত্পত্তিঃ, উপদেশাচ্চোত্পত্তির্যথা- ইন্দ্রোপদেশাদ্ভরদ্বাজেন মর্ত্যলোকে আযুর্বেদ উত্পাদিত ইত্যাদি| এতদ্দ্বযমিতি অববোধোপদেশৌ | ননু, স্বভাবসংসিদ্ধলক্ষণত্বাদিতি যো হেতুরুক্তঃ, তত্র স্বাভাবিকং চ লক্ষণং ভবিষ্যত্যনিত্যং চ, যথা- ঘটে কম্বুগ্রীবাকারতাদি, ন হি তত্ স্বাভাবিকমপি ঘটস্য নিত্যতাং সাধযতীত্যাহ- স্বাভাবিকং চেত্যাদি| অকৃতকমিতি নাস্মদাদিনা কৃতম্| যদুক্তমিহ- ‘স্বলক্ষণতঃ সুখাসুখতঃ’ ইত্যাদিনা, আদ্যে চাধ্যাযে দীর্ঘঞ্জীবিতীযে “হিতাহিতং সুখং দুঃখং” (সূ. ১) ইত্যাদিনা| অত্রৈবাকৃতকত্বে দৃষ্টান্তমাহ- যথাঽগ্নেরৌষ্ণ্যমিত্যাদি| এতেন স্বলক্ষণস্যাকৃতকত্বেন ব্যবহারনিত্যত্বাত্তত্প্রতিপাদকস্যাযুর্বেদস্যাপি ব্যবহারনিত্যত্বমিতি ভাবঃ| ন কেবলং স্বাভাবিকং লক্ষণমকৃতকং, কিং তর্হি ভাবস্বভাবনিত্যত্বমপি ন কেনচিদীশ্বরাদিনা কৃতমিত্যাহ- ভাবস্বভাবনিত্যত্বমপি চেতি; অকৃতকমিতি চকারেণানুকর্ষতি| তদেব ভাবস্বভাবনিত্যত্বং দর্শযতি- যথোক্তমিত্যাদি| সামান্যবিশেষকৃতবৃদ্ধিহ্রাসকারকো(ণো)ঽপি ভাবস্বভাবো ন কেনচিত্ কৃত ইত্যর্থঃ, ততশ্চাযুর্বেদোঽপি নিত্যঃ||২৭||

Adhikarana 18 (28) · Śloka 28

তস্যাযুর্বেদস্যাঙ্গান্যষ্টৌ; তদ্যথা- কাযচিকিত্সা , শালাক্যং, শল্যাপহর্তৃকং, বিষগরবৈরোধিকপ্রশমনং, ভূতবিদ্যা, কৌমারভৃত্যকং, রসাযনং, বাজীকরণমিতি||২৮||

সম্প্রতি কানি চেত্যাদিপ্রশ্নস্যোত্তরং- তস্যেত্যাদি| কাযস্যান্তরগ্নেশ্চিকিত্সা কাযচিকিত্সা| পটলবেধশলাকাপ্রধানমঙ্গং শালাক্যম্| গরঃ কালান্তরপ্রকোপি বিষং, বৈরোধিকং সংযোগবিরুদ্ধম্ | ভূতানাং রাক্ষসাদীনাং জ্ঞানার্থা প্রশমার্থা চ বিদ্যা ভূতবিদ্যা| কুমারস্য ভরণমধিকৃত্য কৃতং কৌমারভৃত্যম্||২৮||

Adhikarana 19 (29) · Śloka 29

স চাধ্যেতব্যো ব্রাহ্মণরাজন্যবৈশ্যৈঃ| তত্রানুগ্রহার্থং প্রাণিনাং ব্রাহ্মণৈঃ, আরক্ষার্থং রাজন্যৈঃ, বৃত্ত্যর্থং বৈশ্যৈঃ; সামান্যতো বা ধর্মার্থকামপরিগ্রহার্থং সর্বৈঃ| তত্র যদধ্যাত্মবিদাং ধর্মপথস্থানাং ধর্মপ্রকাশকানাং বা মাতৃপিতৃভ্রাতৃবন্ধুগুরুজনস্য বা বিকারপ্রশমনে প্রযত্নবান্ ভবতি, যচ্চাযুর্বেদোক্তমধ্যাত্মমনুধ্যাযতি বেদযত্যনুবিধীযতে বা, সোঽস্য পরো ধর্মঃ; যা পুনরীশ্বরাণাং বসুমতাং বা সকাশাত্ সুখোপহারনিমিত্তা ভবত্যর্থাবাপ্তিরারক্ষণং চ, যা চ স্বপরিগৃহীতানাং প্রাণিনামাতুর্যাদারক্ষা, সোঽস্যার্থঃ; যত্ পুনরস্য বিদ্বদ্গ্রহণযশঃ শরণ্যত্বং চ, যা চ সম্মানশুশ্রূষা, যচ্চেষ্টানাং বিষযাণামারোগ্যমাধত্তে সোঽস্য কামঃ| ইতি যথাপ্রশ্নমুক্তমশেষেণ||২৯||

আরক্ষার্থং রাজন্যৈরিতি ক্ষত্রিযস্য পরিপালনধর্মত্বাত্| অনুধ্যাযতি মনসা চিন্তযতি| বেদযতীতি অন্যস্য প্রতিপাদযতি| অনুবিধীযত ইতি তদনুগুণং দেহেনানুতিষ্ঠতি| আরক্ষণম্ আত্মাদিরক্ষণম্| স্বপরিগৃহীতানামিতি ভৃত্যাদীনাম্| বিদ্বদ্গ্রহণমেব যশঃ বিদ্বদুপাদেযতাজন্যং যশ ইত্যর্থঃ| ইষ্টানামিতি বনিতাদীনাম্||২৯||

Adhikarana 20 (30) · Śloka 30

অথ ভিষগাদিত এব ভিষজা প্রষ্টব্যোঽষ্টবিধং ভবতি- তন্ত্রং, তন্ত্রার্থান্, স্থানং, স্থানার্থান্, অধ্যাযম্, অধ্যাযার্থান্, প্রশ্নং, প্রশ্নার্থাংশ্চেতি; পৃষ্টেন চৈতদ্বক্তব্যমশেষেণ বাক্যশো বাক্যার্থশোঽর্থাবযবশশ্চেতি ||৩০||

ভিষক্পরীক্ষার্থং পৃচ্ছাবিধিমাহ- অথেত্যাদি||৩০||

Adhikarana 21 (31-32) · Śloka 32

তত্রাযুর্বেদঃ শাখা বিদ্যা সূত্রং জ্ঞানং শাস্ত্রং লক্ষণং তন্ত্রমিত্যনর্থান্তরম্ ||৩১|| তন্ত্রার্থঃ পুনঃ স্বলক্ষণৈরুপদিষ্টঃ| স চার্থঃ প্রকরণৈর্বিভাব্যমানো ভূয এব শরীরবৃত্তিহেতুব্যাধিকর্মকার্যকালকর্তৃকরণবিধিবিনিশ্চযাদ্দশপ্রকরণঃ, তানি চ প্রকরণানি কেবলেনোপদেক্ষ্যন্তে তন্ত্রেণ||৩২||

তত্রেত্যাদি| স্বলক্ষণৈরিতি তদাযুর্বেদযতীত্যাযুর্বেদঃ, ইত্যাদিনা হিতাহিতাযূরূপৈরিত্যর্থঃ| প্রকরণৈরিতি আযুর্বেদপ্রদেশৈঃ| দশপ্রকরণানি দশভেদাঃ, তে চ শরীরাদযো দশ| তত্র শরীরং পঞ্চমহাভূতবিকারসমুদযাত্মকমবযবাদিভেদাদ্বহুপ্রকারং; বৃত্তিশ্চাহারোঽশিতপীতাদিভেদভিন্না(ন্নঃ); হেতুস্তু ব্যাধিহেতুরসাত্ম্যেন্দ্রিযার্থসংযোগপ্রজ্ঞাপরাধপরিণামলক্ষণঃ; ব্যাধিশ্চ ধাতুবৈষম্যরূপঃ; কর্ম চিকিত্সা; কার্যম্ আরোগ্যং; কালঃ ঋত্বাদিঃ, ক্রিযাকালশ্চ; কর্তা ভিষক্; করণং ভেষজং; বিধিঃ বিধানম্ উপকল্পনা, সা চ কালব্যাধিদ্রব্যাপেক্ষা বোদ্ধব্যা, যথা- “হেমন্তেঽভ্যসতস্তোযমুষ্ণমাযুর্ন হীযতে” (সূ. ৬) ইত্যাদি; দেশস্ত্বত্রাহিতো হেতুগ্রহণেন, হিতস্তু দেশঃ করণগ্রহণেন গৃহীতো মন্তব্যঃ | শরীরবৃত্ত্যাদিভেদাশ্চ বহবঃ কৃত্স্নে তন্ত্রে বুদ্ধিমতা বোদ্ধব্যাঃ| কেবলেনেতি সমগ্রেণ||৩১-৩২||

Adhikarana 22 (33) · Śloka 33

তন্ত্রস্যাস্যাষ্টৌ স্থানানি ; তদ্যথা- শ্লোকনিদানবিমানশারীরেন্দ্রিযচিকিত্সিতকল্পসিদ্ধিস্থানানি| তত্র ত্রিংশদধ্যাযকং শ্লোকস্থানম্, অষ্টাষ্টাধ্যাযকানি নিদানবিমানশারীরস্থানানি, দ্বাদশকমিন্দ্রিযাণাং, ত্রিংশকং চিকিত্সিতানাং, দ্বাদশকে কল্পসিদ্ধিস্থানে ভবতঃ||৩৩||

তন্ত্রস্যাস্যেত্যাদি| ইন্দ্রিযাণাং চিকিত্সিতানাং চেত্যুভযত্রাপি স্থানমিতি শেষঃ||৩৩||

Adhikarana 23 (34) · Śloka 34

ভবতি চাত্র- দ্বে ত্রিংশকে দ্বাদশকং ত্রযং চ ত্রীণ্যষ্টকান্যেষু সমাপ্তিরুক্তা| শ্লোকৌষধারিষ্টবিকল্পসিদ্ধিনিদানমানাশ্রযসঞ্জ্ঞকেষু||৩৪||

ত্রিংশকে ইতি সূত্রস্থানং চিকিত্সিতং চ| আশ্রযসঞ্জ্ঞকং শারীরস্থানম্, আশ্রযো হি শরীরমুচ্যতে||৩৪||

Adhikarana 24 (35) · Śloka 35

স্বে স্বে স্থানে যথাস্বং চ স্থানার্থ উপদেক্ষ্যতে| সবিংশমধ্যাযশতং শৃণু নামক্রমাগতম্||৩৫||

সবিংশমিতি বিংশতিশব্দাত্ স্বার্থে ‘ডঃ’, স্বার্থিকশ্চ ‘ডঃ’ প্রত্যযো ভবতি; তেন ললিতেশ্বরে চ- “চতুর্বিংশাধিকং” ইতি প্রযোগঃ সিদ্ধো ভবতি; বচনং হি “চতুর্বিংশাধিকং জ্ঞেযং ভুবনানাং শতত্রযম্” ইতি| এবং সুশ্রুতেঽপি ‘সবিংশং’ (সু.সূ.অ.১) ইতি ব্যাখ্যেযম্||৩৫||

Adhikarana 25 (36-68) · Śloka 68

দীর্ঘঞ্জীবোঽপ্যপামার্গতণ্ডুলারগ্বধাদিকৌ| ষড্বিরেকাশ্রযশ্চেতি চতুষ্কো ভেষজাশ্রযঃ||৩৬|| মাত্রাতস্যাশিতীযৌ চ নবেগান্ধারণং তথা| ইন্দ্রিযোপক্রমশ্চেতি চত্বারঃ স্বাস্থ্যবৃত্তিকাঃ ||৩৭|| খুড্ডাকশ্চ চতুষ্পাদো মহাংস্তিস্রৈষণস্তথা| সহ বাতকলাখ্যেন বিদ্যান্নৈর্দেশিকান্ বুধঃ||৩৮|| স্নেহনস্বেদনাধ্যাযাবুভৌ যশ্চোপকল্পনঃ| চিকিত্সাপ্রাভৃতশ্চৈব সর্ব এব প্রকল্পনাঃ||৩৯|| কিযন্তঃশিরসীযশ্চ ত্রিশোফাষ্টোদরাদিকৌ| রোগাধ্যাযো মহাংশ্চৈব রোগাধ্যাযচতুষ্টযম্||৪০|| অষ্টৌনিন্দিতসঙ্খ্যাতস্তথা লঙ্ঘনতর্পণে| বিধিশোণিতিকশ্চৈব ব্যাখ্যাতাস্তত্র যোজনাঃ||৪১|| যজ্জঃপুরুষসঙ্খ্যাতো ভদ্রকাপ্যান্নপানিকৌ| বিবিধাশিতপীতীযশ্চত্বারোঽন্নবিনিশ্চযাঃ||৪২|| দশপ্রাণাযতনিকস্তথাঽর্থেদশমূলিকঃ| দ্বাবেতৌ প্রাণদেহার্থৌ প্রোক্তৌ বৈদ্যগুণাশ্রযৌ||৪৩|| ঔষধস্বস্থনির্দেশকল্পনারোগযোজনাঃ| চতুষ্কাঃ ষট্ ক্রমেণোক্তাঃ সপ্তমশ্চান্নপানিকঃ||৪৪|| দ্বৌ চান্ত্যৌ সঙ্গ্রহাধ্যাযাবিতি ত্রিংশকমর্থবত্| শ্লোকস্থানং সমুদ্দিষ্টং তন্ত্রস্যাস্য শিরঃ শুভম্ ||৪৫|| চতুষ্কাণাং মহার্থানাং স্থানেঽস্মিন্ সঙ্গ্রহঃ কৃতঃ| শ্লোকার্থঃ সঙ্গ্রহার্থশ্চ শ্লোকস্থানমতঃ স্মৃতম্||৪৬|| জ্বরাণাং রক্তপিত্তস্য গুল্মানাং মেহকুষ্ঠযোঃ| শোষোন্মাদনিদানে চ স্যাদপস্মারিণাং চ যত্||৪৭|| ইত্যধ্যাযাষ্টকমিদং নিদানস্থানমুচ্যতে| রসেষু ত্রিবিধে কুক্ষৌ ধ্বংসে জনপদস্য চ||৪৮|| ত্রিবিধে রোগবিজ্ঞানে স্রোতঃস্বপি চ বর্তনে| রোগানীকে ব্যাধিরূপে রোগাণাং চ ভিষগ্জিতে||৪৯|| অষ্টৌ বিমানান্যুক্তানি মানার্থানি মহর্ষিণা| কতিধাপুরুষীযং চ গোত্রেণাতুল্যমেব চ||৫০|| খুড্ডিকা মহতী চৈব গর্ভাবক্রান্তিরুচ্যতে| পুরুষস্য শরীরস্য বিচযৌ দ্বৌ বিনিশ্চিতৌ||৫১|| শরীরসঙ্খ্যা সূত্রং চ জাতেরষ্টমমুচ্যতে | ইত্যুদ্দিষ্টানি মুনিনা শারীরাণ্যত্রিসূনুনা||৫২|| বর্ণস্বরীযঃ পুষ্পাখ্যস্তৃতীযঃ পরিমর্শনঃ| চতুর্থ ইন্দ্রিযানীকঃ পঞ্চমঃ পূর্বরূপিকঃ||৫৩|| কতমানিশরীরীযঃ পন্নরূপোঽপ্যবাক্শিরাঃ| যস্যশ্যাবনিমিত্তশ্চ সদ্যোমরণ এব চ||৫৪|| অণুজ্যোতিরিতি খ্যাতস্তথা গোমযচূর্ণবান্| দ্বাদশাধ্যাযকং স্থানমিন্দ্রিযাণামিতি স্মৃতম্ ||৫৫|| অভযামলকীযং চ প্রাণকামীযমেব চ| করপ্রচিতকং বেদসমুত্থানং রসাযনম্||৫৬|| সংযোগশরমূলীযমাসিক্তক্ষীরকং তথা| মাষপর্ণভৃতীযং চ পুমাঞ্জাতবলাদিকম্||৫৭|| চতুষ্কদ্বযমপ্যেতদধ্যাযদ্বযমুচ্যতে| রসাযনমিতি জ্ঞেযং বাজীকরণমেব চ||৫৮|| জ্বরাণাং রক্তপিত্তস্য গুল্মানাং মেহকুষ্ঠযোঃ| শোষোন্মাদেঽপ্যপস্মারে ক্ষতশোথোদরার্শসাম্||৫৯|| গ্রহণীপাণ্ডুরোগাণাং শ্বাসকাসাতিসারিণাম্| ছর্দিবীসর্পতৃষ্ণানাং বিষমদ্যবিকারযোঃ||৬০|| দ্বিব্রণীযং ত্রিমর্মীযমূরুস্তম্ভিকমেব চ| বাতরোগে বাতরক্তে যোনিব্যাপত্সু চৈব যত্||৬১|| ত্রিংশচ্চিকিত্সিতান্যুক্তান্যতঃ কল্পান্ প্রচক্ষ্মহে| ফলজীমূতকেক্ষ্বাকুকল্পো ধামার্গবস্য চ||৬২|| পঞ্চমো বত্সকস্যোক্তঃ ষষ্ঠশ্চ কৃতবেধনে| শ্যামাত্রিবৃতযোঃ কল্পস্তথৈব চতুরঙ্গুলে||৬৩|| তিল্বকস্য সুধাযাশ্চ সপ্তলাশঙ্খিনীষু চ| দন্তীদ্রবন্ত্যোঃ কল্পশ্চ দ্বাদশোঽযং সমাপ্যতে||৬৪|| কল্পনা পঞ্চকর্মাখ্যা বস্তিসূত্রী তথৈব চ| স্নেহব্যাপদিকী সিদ্ধির্নেত্রব্যাপদিকী তথা||৬৫|| সিদ্ধিঃ শোধনযোশ্চৈব বস্তিসিদ্ধিস্তথৈব চ| প্রাসৃতী মর্মসঙ্খ্যাতা সিদ্ধির্বস্ত্যাশ্রযা চ যা||৬৬|| ফলমাত্রা তথা সিদ্ধিঃ সিদ্ধিশ্চোত্তরসঞ্জ্ঞিতা| সিদ্ধযো দ্বাদশৈবৈতাস্তন্ত্রং চাসু সমাপ্যতে||৬৭|| স্বে স্বে স্থানে তথাঽধ্যাযে চাধ্যাযার্থঃ প্রবক্ষ্যতে| তং ব্রূযাত্ সর্বতঃ সর্বং যথাস্বং হ্যর্থসঙ্গ্রহাত্||৬৮||

দীর্ঘঞ্জীবেত্যাদিসঞ্জ্ঞাঃ শ্লোকানুরোধাদেকদেশলক্ষণা বোদ্ধব্যাঃ| প্রাণদেহার্থাবিত্যাদৌ দেহশব্দেনৌজোঽভিধীযতে | শিরঃ শুভমিত্যত্র শির ইব শিরঃ| শ্লোকার্থ ইত্যাদৌ সঙ্গ্রহার্থশ্চেতি চকারাত্ সুশ্রুতোক্তসূত্রণাদিকং, তেন “সূত্রণাত্ সূচনাচ্চৈব ধারণাদর্থসন্ততৈঃ| সূত্রস্থানং সমুদ্দিষ্টম্” (সু. সূ. ৩) ইত্যেতদপি গৃহীতং ভবতি| মানার্থানীতি জ্ঞানার্থানি| ইন্দ্রিযাণামিতি রিষ্টানাম্| চতুষ্কদ্বযমিতি রসাযনপাদচতুষ্ক একঃ, বাজীকরণপাদচতুষ্কশ্চৈকঃ; চতুষ্পাদশ্চাধ্যাযো ভবতীতি যুক্তমেবাধ্যাযত্বম্| তন্ত্রং চাসু সমাপ্যত ইতি আসু সমাপ্তাসু তন্ত্রং সমাপ্যত ইত্যর্থঃ| চাধ্যাযার্থ ইতি চকারো ভিন্নক্রমে; তেন অধ্যাযার্থশ্চাধ্যাযান্তে তথা স্থানার্থশ্চ স্থানান্তে কৃতসঙ্গ্রহঃ| যদ্যপি শারীরে স্থানার্থো ন ব্যক্তঃ, তথাঽপি শারীরশব্দব্যুপত্ত্যা বোদ্ধব্যস্তন্ত্রান্তরাদ্বা; যথা- “শরীরং চিন্ত্যতে সর্বং দৈবমানুষসম্পদা| সর্বভাবৈর্যতস্তস্মাচ্ছারীরং স্থানমুচ্যতে” (শা. ৮) ইতি||৩৬-৬৮||

Adhikarana 26 (69-71) · Śloka 71

পৃচ্ছা তন্ত্রাদ্যথাম্নাযং বিধিনা প্রশ্ন উচ্যতে| প্রশ্নার্থো যুক্তিমাংস্তস্য তন্ত্রেণৈবার্থনিশ্চযঃ ||৬৯|| নিরুক্তং তন্ত্রণাত্তন্ত্রং, স্থানমর্থপ্রতিষ্ঠযা| অধিকৃত্যার্থমধ্যাযনামসঞ্জ্ঞা প্রতিষ্ঠিতা ||৭০|| ইতি সর্বং যথাপ্রশ্নমষ্টকং সম্প্রকাশিতম্| কার্ত্স্ন্যেন চোক্তস্তন্ত্রস্য সঙ্গ্রহঃ সুবিনিশ্চিতঃ||৭১||

বিধিনা প্রশ্ন ইত্যত্র বিধিনেতি পূর্বাপরবিরোধাদিদোষশূন্যেন বাক্যেন| তন্ত্রণাদিতি শরীরধারণাত্; কিংবা আযুর্বেদানুপালনাত্| অর্থপ্রতিষ্ঠযেতি প্রধানভূতার্থাবস্থানাত্| এতাশ্চ যোগরূঢাঃ সঞ্জ্ঞাঃ; তেন, অতিপ্রসঙ্গো ন বাচ্যঃ| অধিকৃত্যেতি অধিকারিণং কৃত্বা| অর্থং দীর্ঘঞ্জীবিতাদিকম্| অধ্যাযনামসঞ্জ্ঞা অধ্যাযরূপা নামসঞ্জ্ঞা, নামসঞ্জ্ঞা চ যোগরূঢা সঞ্জ্ঞোচ্যতে; কিংবা, ‘অধ্যাযো নাম’ ইতি পাঠঃ, তদা নামশব্দঃ প্রকাশনে, তেন অধিকার ইত্যর্থঃ| অর্থশব্দোঽত্রার্থান্তরে, তেন যুক্তাঽধ্যাযসঞ্জ্ঞা, সা চ অধিকরণসাধনা করণসাধনা বা কর্মসাধনা বা বোদ্ধব্যা| অধীযতেঽস্মিন্, অধ্যেত্যনেন বা, অধীযতে বেত্যধ্যাযঃ||৬৯-৭১||

Adhikarana 27 (72-74) · Śloka 74

সন্তি পাল্লবিকোত্পাতাঃ সঙ্ক্ষোভং জনযন্তি যে| বর্তকানামিবোত্পাতাঃ সহসৈবাবিভাবিতাঃ||৭২|| তস্মাত্তান্ পূর্বসঞ্জল্পে সর্বত্রাষ্টকমাদিশেত্| পরাবরপরীক্ষার্থং তত্র শাস্ত্রবিদাং বলম্||৭৩|| শব্দমাত্রেণ তন্ত্রস্য কেবলস্যৈকদেশিকাঃ| ভ্রমন্ত্যল্পবলাস্তন্ত্রে জ্যাশব্দেনেব বর্তকাঃ||৭৪||

প্রশ্নাষ্টকস্যোক্তস্য নিরাকরণীযসঞ্জ্ঞামাহ - সন্তীত্যাদি| পাল্লবিকাঃ প্রাদেশিকাঃ| বর্তকা অকস্মাদুত্পতন্তঃ ক্ষোভং মনসো জনযন্তীতি লোকপ্রসিদ্ধম্| অষ্টকমিতি যথোক্তং প্রশ্নাষ্টকম্| পরাবরৌ শ্রেষ্ঠাশ্রেষ্ঠৌ| তত্র শাস্ত্রবিদাং বলমিতি শাস্ত্রবিদ এব প্রশ্নাষ্টকং জানন্তি ন পাল্লবিকাঃ||৭২-৭৪||

Adhikarana 28 (75-81) · Śloka 81

পশুঃ পশূনাং দৌর্বল্যাত্ কশ্চিন্মধ্যে বৃকাযতে| স সত্যং বৃকমাসাদ্য প্রকৃতিং ভজতে পশুঃ||৭৫|| তদ্বদজ্ঞোঽজ্ঞমধ্যস্থঃ কশ্চিন্মৌখর্যসাধনঃ| স্থাপযত্যাপ্তমাত্মানমাপ্তং ত্বাসাদ্য ভিদ্যতে||৭৬|| বভ্রুর্গূঢ ইবোর্ণাভিরবুদ্ধিরবহুশ্রুতঃ| কিং বৈ বক্ষ্যতি সঞ্জল্পে কুণ্ডভেদী জডো যথা||৭৭|| সদ্বৃত্তৈর্ন বিগৃহ্ণীযাদ্ভিষগল্পশ্রুতৈরপি| হন্যাত্ প্রশ্নাষ্টকেনাদাবিতরাংস্ত্বাপ্তমানিনঃ ||৭৮|| দম্ভিনো মুখরা হ্যজ্ঞাঃ প্রভূতাবদ্ধভাষিণঃ| প্রাযঃ, প্রাযেণ সুমুখাঃ সন্তো যুক্তাল্পভাষিণঃ||৭৯|| তত্ত্বজ্ঞানপ্রকাশার্থমহঙ্কারমনাশ্রিতঃ| স্বল্পাধারাজ্ঞমুখরান্মর্ষযেন্ন বিবাদিনঃ||৮০|| পরো ভূতেষ্বনুক্রোশস্তত্ত্বজ্ঞান(নে)পরা দযা| যেষাং তেষামসদ্বাদনিগ্রহে নিরতা মতিঃ||৮১||

প্রকৃতিঃ স্বভাবঃ| বভ্রুরূর্ণাবান্ কশ্চিত্ পশুঃ, স যথা মেষং যুদ্ধাযাত্মীযামিবোর্ণাং দৃষ্ট্বা উপসর্পন্নঙ্গভঙ্গমাপ্নোতি, তদ্বদজ্ঞোঽপ্যাপ্তং প্রাপ্য ভিদ্যত ইত্যর্থঃ; কিংবা, বভ্রুর্বৃদ্ধনকুল ঊর্ণারাশিমধ্যগো যথা কিঞ্চিন্ন প্রতিপদ্যতে, তথাঽবুদ্ধিরপি সঞ্জল্পে বাদিপ্রতিবাদিকথাযাম্| কুণ্ডভেদী ভ্রষ্টযোনিঃ; তেন পৃচ্ছাদিতাত্মীযনির্ণিতজাতির্যথাঽবদাতজাতিঃ সন্ কশ্চিদ্ব্রূতে, তথাঽবুদ্ধিরপি সঞ্জল্পে| বিগৃহ্ণীযাদ্ বিগৃহ্য সম্ভাষাং কুর্যাত্| ইতরান্ অসদ্বৃত্তান্| স্বল্পাধারাঃস্বল্পশ্রুতাঃ| ন মর্ষযেদিতি নোপেক্ষেত| অজ্ঞবৈদ্যসংবাদপ্রতিষেধফলমাহ- পরো ভূতেষ্বিত্যাদি| নিরতা ইতি তত্পরা||৭৫-৮১||

Adhikarana 29 (82-83) · Śloka 83

অসত্পক্ষাক্ষণিত্বার্তিদম্ভপারুষ্যসাধনাঃ| ভবন্ত্যনাপ্তাঃ স্বে তন্ত্রে প্রাযঃ পরবিকত্থকাঃ||৮২|| তান্ কালপাশসদৃশান্ বর্জযেচ্ছাস্ত্রদূষকান্| প্রশমজ্ঞানবিজ্ঞানপূর্ণাঃ সেব্যা ভিষক্তমাঃ||৮৩||

অজ্ঞবৈদ্যফলমাহ- অসত্পক্ষেত্যাদি| অসত্পক্ষাদি সাধনং যেষাং তে তথা; অসত্পক্ষঃ অনাগমপক্ষসিদ্ধঃ পক্ষঃ| অক্ষণিত্বং পৃচ্ছার্থমনুযুক্তস্য ‘সম্প্রতি বক্তুং ক্ষণো নাসি’ ইতি ভাষণম্, অর্তিঃ পৃচ্ছার্থমনুযুক্তস্য শিরোব্যথাদিকমুদ্ভাব্য ভাষণং, দম্ভঃ পুস্তকবৈদ্যভাণ্ডাদিভিঃ স্বার্থোত্কর্ষপ্রতিপাদনং, পারুষ্যং কৃচ্ছ্রতোঽপি নবাচ্যত্বাদিপরুষভাষণম্ | অনাপ্তাঃ স্বে তন্ত্র ইতি স্বতন্ত্রানভিজ্ঞানাত্| পরবিকত্থকাঃ পরদূষকাঃ||৮২-৮৩||

Adhikarana 30 (84-85) · Śloka 85

সমগ্রং দুঃখমাযত্তমবিজ্ঞানে দ্বযাশ্রযম্| সুখং সমগ্রং বিজ্ঞানে বিমলে চ প্রতিষ্ঠিতম্||৮৪|| ইদমেবমুদারার্থমজ্ঞানাং ন প্রকাশকম্| শাস্ত্রং দৃষ্টিপ্রণষ্টানাং যথৈবাদিত্যমণ্ডলম্||৮৫||

দ্বযাশ্রযমিতি মনঃশরীরাশ্রযম্| সমগ্রমিতি শারীরং মানসং চ সুখমারোগ্যাদিরূপম্| বিজ্ঞানে বিমল ইতি বিশুদ্ধজ্ঞানে, কিংবা বিজ্ঞানে বিমল ইতি মোক্ষে, মোক্ষে হি সুখং স্বচ্ছং সমগ্রং চ দুঃখাসম্ভিন্নত্বাত্; কিংবা, ভট্টদর্শনাত্ সুসম্ভবম্| ইদমিতি শাস্ত্রম্| এবমুদারার্থমিতি লোকদ্বযহিতার্থাভিধাযকম্| দৃষ্টিপ্রণষ্টানামিতি প্রণষ্টদৃশাম্||৮৪-৮৫||

Adhikarana 31 (86-89) · Śloka 89

তত্র শ্লোকাঃ- অর্থে দশমহামূলাঃ সঞ্জ্ঞা চাসাং যথা কৃতা| অযনান্তাঃ ষডগ্র্যাশ্চ রূপং বেদবিদাং চ যত্||৮৬|| সপ্তকশ্চাষ্টকশ্চৈব পরিপ্রশ্নাঃ সনির্ণযাঃ| যথা বাচ্যং যদর্থং চ ষড্বিধাশ্চৈকদেশিকাঃ||৮৭|| অর্থেদশমহামূলে সর্বমেতত্ প্রকাশিতম্| সঙ্গ্রহশ্চাযমধ্যাযস্তন্ত্রস্যাস্যৈব কেবলঃ||৮৮|| যথা সুমনসাং সূত্রং সঙ্গ্রহার্থং বিধীযতে| সঙ্গ্রহার্থং তথাঽর্থানামৃষিণা সঙ্গ্রহঃ কৃতঃ||৮৯||

সঙ্গ্রহে সঞ্জ্ঞা চাসাং যথা কৃতেতি ‘তেন মূলেন মহতা মহামূলা’ ইত্যাদিনা| অযনান্তাঃ ষডগ্র্যাশ্চেতি ‘একং প্রাণবর্ধনানাম্’ ইত্যাদিনোক্তাঃ| এতে চাহিংসাদযোঽগ্র্যাধিকারে যজ্জঃপুরুষীযে উক্তা উল্লঙ্ঘ্যেহোক্তা অধ্যাত্মবিষযত্বেন, পূর্বোক্তাস্ত্বগ্র্যরোগাধিকারিকাঃ; উক্তং হি তত্র- “অলমেতদ্বিকারাণাম্” (সূ.অ.২৫) ইত্যাদি| সপ্তকঃ প্রশ্নঃ ‘কিমাযুঃ? কস্মাদাযুর্বেদঃ?’ ইত্যাদি; অষ্টকঃ প্রশ্নঃ ‘তন্ত্রং তন্ত্রার্থং’ ইত্যাদি||৮৬-৮৯||

Adhikarana puShpikA · Śloka 30

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানেঽর্থেদশমহামূলীযো নাম ত্রিংশোঽধ্যাযঃ||৩০|| অগ্নিবেশকৃতে তন্ত্রে চরকপ্রতিসংস্কৃতে| ইযতাঽবধিনা সর্বং সূত্রস্থানং সমাপ্যতে|

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানেঽর্থেদশমহামূলীযস্ত্রিংশত্তমোঽধ্যাযঃ||৩০|| ইতি চরকচতুরাননশ্রীমচ্চক্রপাণিদত্তকৃতাযামাযুর্বেদদীপিকাযাং চরকতাত্পর্যটীকাযাং প্রথমং সূত্রস্থানম্||১||