Adhikarana 1 (1-2) · Śloka 2
অথাত আত্রেযভদ্রকাপ্যীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथात आत्रेयभद्रकाप्यीयमध्यायं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
হিতাহিতৈকদেশমভিধায কৃত্স্নদ্রব্যহিতাহিতত্বজ্ঞানার্থং রসবীর্যবিপাকাভিধাযক আত্রেযভদ্রকাপ্যীযোঽভিধীযতে| তত্রাপি বিপাকাদীনামপি রসেনৈব প্রাযো লক্ষণীযত্বাদ্রসপ্রকরণমাদৌ কৃতম্||১-২||
Adhikarana 2 (3-7) · Śloka 7
আত্রেযো ভদ্রকাপ্যশ্চ শাকুন্তেযস্তথৈব চ| পূর্ণাক্ষশ্চৈব মৌদ্গল্যো হিরণ্যাক্ষশ্চ কৌশিকঃ||৩|| যঃ কুমারশিরা নাম ভরদ্বাজঃ স চানঘঃ| শ্রীমান্ বার্যোবিদশ্চৈব রাজা মতিমতাং বরঃ||৪|| নিমিশ্চ রাজা বৈদেহো বডিশশ্চ মহামতিঃ| কাঙ্কাযনশ্চ বাহ্লীকো বাহ্লীকভিষজাং বরঃ||৫|| এতে শ্রুতবযোবৃদ্ধা জিতাত্মানো মহর্ষযঃ| বনে চৈত্ররথে রম্যে সমীযুর্বিজিহীর্ষবঃ||৬|| তেষাং তত্রোপবিষ্টানামিযমর্থবতী কথা| বভূবার্থবিদাং সম্যগ্রসাহারবিনিশ্চযে||৭||
आत्रेयो भद्रकाप्यश्च शाकुन्तेयस्तथैव च| पूर्णाक्षश्चैव मौद्गल्यो हिरण्याक्षश्च कौशिकः||३|| यः कुमारशिरा नाम भरद्वाजः स चानघः| श्रीमान् वार्योविदश्चैव राजा मतिमतां वरः||४|| निमिश्च राजा वैदेहो बडिशश्च महामतिः| काङ्कायनश्च बाह्लीको बाह्लीकभिषजां वरः||५|| एते श्रुतवयोवृद्धा जितात्मानो महर्षयः| वने चैत्ररथे रम्ये समीयुर्विजिहीर्षवः||६|| तेषां तत्रोपविष्टानामियमर्थवती कथा| बभूवार्थविदां सम्यग्रसाहारविनिश्चये||७||
🔊 Audio coming soon
মুনিমতৈঃ পূর্বপক্ষং কৃত্বা সিদ্ধান্তব্যবস্থাপনং শিষ্যব্যুত্পত্ত্যর্থম্| রসেনাহারবিনিশ্চযো রসাহারবিনিশ্চযঃ; কিংবা অযং রসবিনিশ্চযঃ, তথা ‘পরং চাতো বিপাকানাং’ ইত্যাদিরাহারবিনিশ্চযঃ ||৩-৭||
Adhikarana 3 (8) · Śloka 8
এক এব রস ইত্যুবাচ ভদ্রকাপ্যঃ, যং পঞ্চানামিন্দ্রিযার্থানামন্যতমং জিহ্বাবৈষযিকং ভাবমাচক্ষতে কুশলাঃ, স পুনরুদকাদনন্য ইতি| দ্বৌ রসাবিতি শাকুন্তেযো ব্রাহ্মণঃ, ছেদনীয উপশমনীযশ্চেতি| ত্রযো রসা ইতি পূর্ণাক্ষো মৌদ্গল্যঃ, ছেদনীযোপশমনীযসাধারণা ইতি| চত্বারো রসা ইতি হিরণ্যাক্ষঃ কৌশিকঃ, স্বাদুর্হিতশ্চ স্বাদুরহিতশ্চাস্বাদুর্হিতশ্চাস্বাদুরহিতশ্চেতি| পঞ্চ রসা ইতি কুমারশিরা ভরদ্বাজঃ, ভৌমৌদকাগ্নেযবাযব্যান্তরিক্ষাঃ| ষড্রসা ইতি বার্যোবিদো রাজর্ষিঃ, গুরুলঘুশীতোষ্ণস্নিগ্ধরূক্ষাঃ| সপ্ত রসা ইতি নিমির্বৈদেহঃ, মধুরাম্ললবণকটুতিক্তকষাযক্ষারাঃ| অষ্টৌ রসা ইতি বডিশো ধামার্গবঃ, মধুরাম্ললবণকটুতিক্তকষাযক্ষারাব্যক্তাঃ| অপরিসঙ্খ্যেযা রসা ইতি কাঙ্কাযনো বাহ্লীকভিষক্, আশ্রযগুণকর্মসংস্বাদবিশেষাণামপরিসঙ্খ্যেযত্বাত্||৮||
एक एव रस इत्युवाच भद्रकाप्यः, यं पञ्चानामिन्द्रियार्थानामन्यतमं जिह्वावैषयिकं भावमाचक्षते कुशलाः, स पुनरुदकादनन्य इति| द्वौ रसाविति शाकुन्तेयो ब्राह्मणः, छेदनीय उपशमनीयश्चेति| त्रयो रसा इति पूर्णाक्षो मौद्गल्यः, छेदनीयोपशमनीयसाधारणा इति| चत्वारो रसा इति हिरण्याक्षः कौशिकः, स्वादुर्हितश्च स्वादुरहितश्चास्वादुर्हितश्चास्वादुरहितश्चेति| पञ्च रसा इति कुमारशिरा भरद्वाजः, भौमौदकाग्नेयवायव्यान्तरिक्षाः| षड्रसा इति वार्योविदो राजर्षिः, गुरुलघुशीतोष्णस्निग्धरूक्षाः| सप्त रसा इति निमिर्वैदेहः, मधुराम्ललवणकटुतिक्तकषायक्षाराः| अष्टौ रसा इति बडिशो धामार्गवः, मधुराम्ललवणकटुतिक्तकषायक्षाराव्यक्ताः| अपरिसङ्ख्येया रसा इति काङ्कायनो बाह्लीकभिषक्, आश्रयगुणकर्मसंस्वादविशेषाणामपरिसङ्ख्येयत्वात्||८||
🔊 Audio coming soon
এক এবেত্যাদি | ইন্দ্রিযার্থানামিতি নির্ধারণে ষষ্ঠী| অন্যতমমিতি একম্; অন্যশব্দো হ্যযমেকবচনঃ, যথা- অন্যো দক্ষিণেন গতোঽন্য উত্তরেণ; এক ইত্যর্থঃ; তমপ্প্রত্যযশ্চ স্বার্থিকঃ| জিহ্বাবৈষযিকমিতি জিহ্বাগ্রাহ্যম্| রসাভাবোঽপি জিহ্বযা গৃহ্যতেঽত আহ- ভাবমিতি| উদকাদনন্য ইতি রসোদকযোরেকত্বখ্যাপনার্থং, পূর্বপক্ষত্বাদদুষ্টম্| পূর্বপক্ষশ্চ কপিলমতেন, তে হি রসতন্মাত্রং গন্ধতন্মাত্রমিত্যাদিবচনেন গুণাব্যতিরিক্তং দ্রব্যমিতি ব্রুবতে| ছেদনীয ইতি অপতর্পণকারকঃ| উপশমনীয ইতি বৃংহণঃ| সাধারণ ইত্যাগ্নেযসৌম্যসামান্যাদুভযোরপি লঙ্ঘনবৃংহণযোঃ কর্তা , পরস্পরবিরোধাদকর্তা বা| স্বাদুরিতি অভীষ্টঃ, হিত ইতি আযতাবনপকারী| আশ্রীযত ইত্যাশ্রযো দ্রব্যং, গুণাঃ স্নিগ্ধগুর্বাদযঃ; কর্ম ধাতুবর্ধনক্ষপণাদি, সংস্বাদঃ রসানামবান্তরভেদঃ; এষাং বিশেষাণাং ভেদানামিত্যর্থঃ| তত্র দ্রব্যভেদাদাধারভেদেনাশ্রিতস্যাপি রসস্য ভেদো ভবতি, আশ্রযো হি কারণং, কারণভেদাচ্চ কার্যভেদোঽবশ্যং ভবতীত্যর্থঃ| গুর্বাদিগুণভেদাস্তথা কর্মভেদাশ্চ রসকৃতা এব| ততশ্চ কার্যভেদাদবশ্যং কারণভেদ ইতি পূর্বপক্ষাভিপ্রাযঃ| সংস্বাদভেদস্তু একস্যামপি মধুরজাতাবিক্ষুক্ষীরগুডাদিগতঃ প্রত্যক্ষমেব ভেদো দৃশ্যতে, স তু সংস্বাদভেদঃ স্বসংবেদ্য এব; যদুক্তং- “ইক্ষুক্ষীরগুডাদীনাং মাধুর্যস্যান্তরং মহত্| ভেদস্তথাঽপি নাখ্যাতুং সরস্বত্যাঽপি শক্যতে” ইতি||৮||
Adhikarana 4 (9) · Śloka 9
ষডেব রসা ইত্যুবাচ ভগবানাত্রেযঃ পুনর্বসুঃ, মধুরাম্ললবণকটুতিক্তকষাযাঃ| তেষাং ষণ্ণাং রসানাং যোনিরুদকং, ছেদনোপশমনে দ্বে কর্মণী, তযোর্মিশ্রীভাবাত্ সাধারণত্বং, স্বাদ্বস্বাদুতা ভক্তিঃ , হিতাহিতৌ প্রভাবৌ, পঞ্চমহাভূতবিকারাস্ত্বাশ্রযাঃ প্রকৃতিবিকৃতিবিচারদেশকালবশাঃ, তেষ্বাশ্রযেষু দ্রব্যসঞ্জ্ঞকেষু গুণা গুরুলঘুশীতোষ্ণস্নিগ্ধরূক্ষাদ্যাঃ; ক্ষরণাত্ ক্ষারঃ, নাসৌ রসঃ দ্রব্যং তদনেকরসসমুত্পন্নমনেকরসং কটুকলবণভূযিষ্ঠমনেকেন্দ্রিযার্থসমন্বিতং করণাভিনির্বৃত্তম্; অব্যক্তীভাবস্তু খলু রসানাং প্রকৃতৌ ভবত্যনুরসেঽনুরসসমন্বিতে বা দ্রব্যে; অপরিসঙ্খ্যেযত্বং পুনস্তেষামাশ্রযাদীনাং ভাবানাং বিশেষাপরিসঙ্খ্যেযত্বান্ন যুক্তম্, একৈকোঽপি হ্যেষামাশ্রযাদীনাং ভাবানাং বিশেষানাশ্রযতে বিশেষাপরিসঙ্খ্যেযত্বাত্, ন চ তস্মাদন্যত্বমুপপদ্যতে; পরস্পরসংসৃষ্টভূযিষ্ঠত্বান্ন চৈষামভিনির্বৃত্তের্গুণপ্রকৃতীনামপরিসঙ্খ্যেযত্বং ভবতি; তস্মান্ন সংসৃষ্টানাং রসানাং কর্মোপদিশন্তি বুদ্ধিমন্তঃ| তচ্চৈব কারণমপেক্ষমাণাঃ ষণ্ণাং রসানাং পরস্পরেণাসংসৃষ্টানাং লক্ষণপৃথক্ত্বমুপদেক্ষ্যামঃ||৯||
षडेव रसा इत्युवाच भगवानात्रेयः पुनर्वसुः, मधुराम्ललवणकटुतिक्तकषायाः| तेषां षण्णां रसानां योनिरुदकं, छेदनोपशमने द्वे कर्मणी, तयोर्मिश्रीभावात् साधारणत्वं, स्वाद्वस्वादुता भक्तिः , हिताहितौ प्रभावौ, पञ्चमहाभूतविकारास्त्वाश्रयाः प्रकृतिविकृतिविचारदेशकालवशाः, तेष्वाश्रयेषु द्रव्यसञ्ज्ञकेषु गुणा गुरुलघुशीतोष्णस्निग्धरूक्षाद्याः; क्षरणात् क्षारः, नासौ रसः द्रव्यं तदनेकरससमुत्पन्नमनेकरसं कटुकलवणभूयिष्ठमनेकेन्द्रियार्थसमन्वितं करणाभिनिर्वृत्तम्; अव्यक्तीभावस्तु खलु रसानां प्रकृतौ भवत्यनुरसेऽनुरससमन्विते वा द्रव्ये; अपरिसङ्ख्येयत्वं पुनस्तेषामाश्रयादीनां भावानां विशेषापरिसङ्ख्येयत्वान्न युक्तम्, एकैकोऽपि ह्येषामाश्रयादीनां भावानां विशेषानाश्रयते विशेषापरिसङ्ख्येयत्वात्, न च तस्मादन्यत्वमुपपद्यते; परस्परसंसृष्टभूयिष्ठत्वान्न चैषामभिनिर्वृत्तेर्गुणप्रकृतीनामपरिसङ्ख्येयत्वं भवति; तस्मान्न संसृष्टानां रसानां कर्मोपदिशन्ति बुद्धिमन्तः| तच्चैव कारणमपेक्षमाणाः षण्णां रसानां परस्परेणासंसृष्टानां लक्षणपृथक्त्वमुपदेक्ष्यामः||९||
🔊 Audio coming soon
সিদ্ধান্তং পুনর্বসুবচনেনাহ- ষডেবেত্যাদি| পূর্বপক্ষোক্তরসৈকত্বাদিব্যবস্থামাহ- তেষাং ষণ্ণামিত্যাদি| যোনিঃ আধারকারণং, কার্যকারণযোশ্চ ভেদাত্ সিদ্ধ উদকাদ্রসভেদঃ প্রত্যক্ষ এবেতি ভাবঃ| ক্ষিতিব্যতিরিক্তমুদকমেব যথা রসযোনিস্তথা “রসনার্থো রসস্তস্য” (সূ. ১) ইত্যাদৌ বিবৃতমেব দীর্ঘঞ্জীবিতীযে| তযোর্মিশ্রীভাবাদিতি কর্মণোরমূর্তযোর্মিশ্রীভাবানুপপত্তৌ তদাধারযোর্দ্রব্যযোর্মিশ্রীভাবাদিতি বোদ্ধব্যম্| সাধারণমিতি সাধারণকার্যযোগিত্বম্ | ভক্তিঃ ইচ্ছেত্যর্থঃ| তেন, যোযমিচ্ছতি স তস্য স্বাদুরস্বাদুরিতর ইতি পুরুষাপেক্ষৌ ধর্মৌ, ন রসভেদকার্যাবিত্যর্থঃ| পঞ্চমহাভূতেত্যাদৌ ‘তু’ শব্দোঽবধারণে; তেন আশ্রযা এব, ন রসা ইত্যর্থঃ| কিম্ভূতা ভৌমাদযো ভূতবিকারা আশ্রযা ইত্যাহ- প্রকৃতিবিকৃতিবিচারদেশকালবশা ইতি; বশশব্দোঽধীনার্থঃ, স চ প্রকৃত্যাদিভিঃ প্রত্যেকং যোজ্যঃ| তত্র প্রকৃতিবশা যথা- মুদ্গাঃ কষাযা মধুরাশ্চ সন্তঃ প্রকৃত্যা লঘবঃ; এতদ্ধি লাঘবং ন রসবশং, তথাহি সতি কষাযমধুরত্বাদ্গুরুত্বং স্যাত্ ; বিকৃতিবশং চ ব্রীহের্লাজানাং লঘুত্বং, তথা সক্তুসিদ্ধপিণ্ডকানাং চ গুরুত্বম্; বিচারণা বিচারো দ্রব্যান্তরসংযোগ ইত্যর্থঃ, তেন বিচারণাবশং যথা- মধুসর্পিষী সংযুক্তে বিষং, তথা বিষং চাগদসংযুক্তং স্বকার্যব্যতিরিক্তকার্যকারি ; দেশো দ্বিবিধো ভূমিরাতুরশ্চ, তত্র ভূমৌ ‘শ্বেতকাপোতী বল্মীকাধিরূঢা বিষহরী’, তথা “হিমবতি ভেষজানি মহাগুণানি ভবন্তি”, শরীরদেশে যথা- “সক্থিমাংসাদ্গুরুতরং স্কন্ধক্রোডশিরস্পদাম্” (সূ. ২৭) ইত্যাদি; কালবশং তু যথা মূলকমধিকৃত্যোক্তং- “তদ্বালং দোষহরং বৃদ্ধং ত্রিদোষম্” (সূ. ২৭), তথা “যথর্তুপুষ্পফলমাদদীত” (ক. ১) ইত্যাদি| অত্র চৈকপ্রকরণোক্তা যেঽনুক্তাস্তে চকারাত্ স্বভাবাদিষ্বেবান্তর্ভাবনীযাঃ| যদুক্তং- “চরঃ শরীরাবযবাঃ স্বভাবো ধাতবঃ ক্রিযাঃ| লিঙ্গং প্রমাণং সংস্কারো মাত্রা চাস্মিন্ পরীক্ষ্যতে” (সূ. ২৭) ইতি| তত্র, চরশরীরাবযবধাতূনাং দেশেন গ্রহণং, মাত্রা বিচারে প্রবিশতি, শেষং স্বভাবে; তথা রসবিমানে বক্ষ্যমাণং চাত্রাপ্রবিষ্টমাহারবিশেষাযতনমন্তর্ভাবনীযং যথাসম্ভবম্| স্নিগ্ধরূক্ষাদ্যা ইত্যত্রাদিগ্রহণেনানুক্তা অপি তীক্ষ্ণমৃদ্বাদযো ন রসাঃ, কিন্তু দ্রব্যগুণাঃ পৃথগেবেতি দর্শযতি| ক্ষরণাত্ অধোগমনক্রিযাযোগাত্ ক্ষারো দ্রব্যং নাসৌ রসঃ, রসস্য হি নিষ্ক্রিযস্য ক্রিযাঽনুপপন্নেত্যর্থঃ| ক্ষরণং চ ক্ষারস্য পানীযযুক্তস্যাধোগমনেন, বদন্তি হি লৌকিকাঃ- ‘ক্ষারং স্রাবযামঃ’ ইতি; শাস্ত্রং চ- “ছিত্ত্বা ছিত্ত্বাঽঽশযাত্ ক্ষারঃ ক্ষরত্বাত্ ক্ষারযত্যধঃ” (চি. ৫) ইতি| হেত্বন্তরমাহ- দ্রব্যং তদনেকরসোত্পন্নমিতি; অনেকরসেভ্যো মুষ্ককাপামার্গাদিভ্য উত্পন্নমনেকরসোত্পন্নং; যতশ্চানেকরসোত্পন্নমত এবানেকরসং, কারণগুণানুবিধাযিত্বাত্ কার্যগুণস্যেতি ভাবঃ| অনেকরসত্বমেবাহ- কটুকলবণভূযিষ্ঠমিতি|- ভূযিষ্ঠশব্দেনাপ্রধানরসান্তরসম্বন্ধোঽস্তীতি দর্শযতি| হেত্বন্তরমাহ- অনেকেন্দ্রিযার্থসমন্বিতমিতি| ক্ষারো হি স্পর্শেন গন্ধেন চান্বিতঃ, তেন দ্রব্যং, রসে হি গুণে ন স্পর্শো নাপি গন্ধ ইতি ভাবঃ| হেত্বন্তরমাহ- করণাভিনির্বৃত্তমিতি; করণেন ভস্মপরিস্রাবণাদিনাঽভিনির্বৃত্তং কৃতমিত্যর্থঃ, ন রসোঽনেন প্রকারেণ ক্রিযত ইতি ভাবঃ| অব্যক্তরসপক্ষং নিষেধযতি- অব্যক্তীভাব ইত্যাদি| অব্যক্তীভাব ইত্যভূততদ্ভাবে চ্বিপ্রত্যযেন রসানাং মধুরাদীনাং ব্যক্তানামেব ক্বচিদাধারেঽব্যক্তত্বং, নান্যো মধুরাদিভ্যোঽব্যক্তরস ইত্যর্থঃ| রসানামিতি মধুরাদীনাং ষণ্ণাম্| প্রকৃতাবিত্যাদি| প্রকৃতৌ কারণে জল ইত্যর্থঃ| অব্যক্তত্বং চ রসসামান্যমাত্রোপলব্ধির্মধুরাদিবিশেষশূন্যা, সা চ জলে ভবতি; যত উক্তং জলগুণকথনে সুশ্রুতে- “ব্যক্তরসতা রসদোষঃ” (সু. সূ. ৪৫) ইতি, ইহাপি চ ‘অব্যক্তরসং চ’ ইতি বক্ষ্যতি, লোকেঽপি চাব্যক্তরসং দ্রব্যমাস্বাদ্য বক্তারো বদন্তি- জলস্যেবাস্য রসো ন কশ্চিন্মধুরাদির্ব্যক্ত ইতি| বিশেষমধুরাদ্যনুপলব্ধিশ্চানুদ্ভূতত্বেন| যথা- দূরাদবিজ্ঞাযমানবিশেষবর্ণে বস্তুনি রূপসামান্যপ্রতীতির্ভবতি, ন শুক্লত্বাদিবিশেষবুদ্ধিঃ, তথাঽনুরসেঽব্যক্তীভাবো ভবতি; প্রধানং ব্যক্তং রসমনুগতোঽব্যক্তত্বেনেত্যনুরসঃ, যথা বেণুযবে মধুরে কষাযোঽনুরসঃ| যদুক্তং- “রূক্ষঃ কষাযানুরসো মধুরঃ কফপিত্তহা” (সূ. ২৭) ইতি| অনুরসসমন্বিত ইতি সর্বানুরসযুক্তে, যথা- বিষে; বচনং হি- “উষ্ণমনির্দেশ্যরসং” (চি. ২৩) ইত্যাদি| কিংবা, ‘অণুরসসমন্বিতে’ ইতি পাঠঃ; তেন, অণুরসেনৈকেন মরিচেন শর্করাপানকে কটুত্বমব্যক্তং স্যাত্| অপরিসঙ্খ্যেযপক্ষং দূষযতি- অপরীত্যাদি| তেষামিতি রসানাম্, অপরিসঙ্খ্যেযত্বং ন যুক্তম্; আশ্রযাদীনাং ভাবানামিতি আশ্রযগুণকর্মসংস্বাদানাম্; বিশেষাপরিসঙ্খ্যেযত্বাদিতি আশ্রযাদি ভেদস্যাপরিসঙ্খ্যেযত্বাত্| অত্র হেতুমাহ- একৈকোঽপি হীত্যাদি| এষামাশ্রযগুণকর্মসংস্বাদানাং বিশেষানেকৈকোঽপি মধুরাদিরাশ্রযতে, ন চ তস্মাদাশ্রযাদিভেদাদন্যত্বমাশ্রিতস্য মধুরাদের্ভবতি| এবং মন্যতে- যদ্যপি শালিমুদ্গঘৃতক্ষীরাদযো মধুরস্যাশ্রযা ভিন্নাঃ, তথাঽপি তত্র মধুরত্বজাত্যাক্রান্ত এক এব রসো ভবতি বলাকাক্ষীরকার্পাসাদিষু শুক্লবর্ণ ইব| তথা গুণানাং গুরুপিচ্ছিলস্নিগ্ধাদীনামন্যত্বেঽপি কর্মণাং বা রসাদিবর্ধনাযুর্জননবর্ণকরত্বাদীনাং ভিন্নত্বে সত্যপি ন মধুররসস্যান্যত্বং, যত এক এব মধুরস্তত্তদ্গুণযুক্তো ভবতি তত্কর্মকারী চেতি কো বিরোধঃ| তথা মধুরস্যাবান্তরাস্বাদভেদেঽপি মধুরত্বজাত্যনতিক্রমঃ, কৃষ্ণবর্ণাবান্তরভেদে যথা কৃষ্ণত্বানতিক্রমঃ| ননু, মৈবং ভবত্বপরিসঙ্খ্যেযত্বং রসানাং, পরস্পরসংযোগাত্তু য আস্বাদবিশেষঃ স কার্যবিশেষকরোঽপি; নহি যন্মধুরাম্লেন ক্রিযতে, তন্মধুরেণ বাঽম্লেন বা শক্যম্; অতস্তেন পরস্পরসংযোগেনাপরিসঙ্খ্যেযত্বং ভবিষ্যতীত্যাহ- পরস্পরেত্যাদি| সংসৃষ্টমিতি ভাবেক্তঃ, তেন পরস্পরসংসর্গভূযিষ্ঠত্বাদেষাং মধুরাদীনামভিনির্বৃত্তের্ন গুণপ্রকৃতীনামসঙ্খ্যেযত্বমিতি যোজনা; অযমর্থঃ- যদ্যপি রসাঃ পরস্পরসংসর্গেণাতিভূযসা যুক্তাঃ সন্তোঽভিনির্বৃত্তা দ্বিরসাদৌ দ্রব্যে ভবন্তি, তথাঽপি ন তেষাং গুণা গুরুলঘ্বাদযঃ, প্রকৃতযো বা মধুরাদীনাং যা যা আযুষ্যত্বরসাভিবর্ধকত্বাদ্যাস্তা অসঙ্খ্যেযা ভবন্তি, কিন্তু য এব মধুরাদীনাং প্রত্যেকং গুণাঃ প্রকৃতযশ্চ উদ্দিষ্টাস্ত এব মিশ্রা ভবন্তি| কিংবা গুণপ্রকৃতীনামিতি মধুরাদিষড্গুণস্বরূপাণামিত্যর্থঃ; তেন, রসস্য রসান্তরসংসর্গে দোষাণামিব দোষান্তরসংসর্গে রসানাং নাপরিসঙ্খ্যেযত্বমিত্যর্থঃ| প্রকৃতিশব্দেন কর্ম বোচ্যতে, তেন গুণকর্মণামিত্যর্থঃ| মধুরাদীনামবান্তরাস্বাদবিশেষোঽপি পরস্পরসংসর্গকৃতে জ্ঞেযঃ| যত এব হেতো রসানাং সংসৃষ্টানাং নান্যে গুণকর্মণী ভবতঃ, অত এব সংসৃষ্টানাং রসানাং পৃথক্কর্ম শাস্ত্রান্তরেঽপি নোক্তমিত্যাহ- তস্মাদিত্যাদি| কর্মশব্দেনেহ গৌরবলাঘবাদিকারকা গুরুত্বাদযো রসরক্তাদিজননাদযশ্চাপি বোদ্ধব্যাঃ| ন কেবলমন্যশাস্ত্রকারৈ রসানাং সংসৃষ্টানাং কর্ম নোপদিষ্টং, কিন্তু বযমপি নোপদেক্ষ্যাম ইত্যাহ- তচ্চৈবেত্যাদি| তচ্চৈব কারণমিতি পরস্পরসংসর্গেঽপি রসানামনধিকগুণকর্মত্বম্| লক্ষণেন পৃথক্ত্বং লক্ষণপৃথক্ত্বম্| তত্র লক্ষ্যতে যেন তল্লক্ষণম্; অতস্তু ‘মধুরো রসঃ’ ইত্যাদিনা গ্রন্থেন, তথা ‘স্নেহনপ্রীণনহ্লাদন’ ইত্যাদিনা চ যদ্বাচ্যং, তত্ সর্বং গৃহ্যতে;| কিংবা, লক্ষণশব্দেন ‘মধুরো রস’ ইত্যাদিগ্রন্থবাচ্যং লক্ষণমুচ্যতে, পৃথক্ত্বং চ রসভেদজ্ঞানার্থং যদ্বক্ষ্যতি ‘স্নেহনপ্রীণন’ ইত্যাদি তদ্গৃহ্যতে||৯||
Adhikarana 5 (10) · Śloka 10
অগ্রে তু তাবদ্দ্রব্যভেদমভিপ্রেত্য কিঞ্চিদভিধাস্যামঃ| সর্বং দ্রব্যং পাঞ্চভৌতিকমস্মিন্নর্থে ; তচ্চেতনাবদচেতনং চ, তস্য গুণাঃ শব্দাদযো গুর্বাদযশ্চ দ্রবান্তাঃ, কর্ম পঞ্চবিধমুক্তং বমনাদি||১০||
अग्रे तु तावद्द्रव्यभेदमभिप्रेत्य किञ्चिदभिधास्यामः| सर्वं द्रव्यं पाञ्चभौतिकमस्मिन्नर्थे ; तच्चेतनावदचेतनं च, तस्य गुणाः शब्दादयो गुर्वादयश्च द्रवान्ताः, कर्म पञ्चविधमुक्तं वमनादि||१०||
🔊 Audio coming soon
অগ্রে ত্বিত্যাদি| রসেষু বাচ্যেষু দ্রব্যভেদমভিপ্রেত্য প্রতিপাদনীযতযা পরিগৃহ্য রসানাং দ্রব্যজ্ঞানাধীনজ্ঞানত্বাদ্দ্রব্যাভিধানমগ্রে কৃতমিত্যর্থঃ| কিঞ্চিদিতি আযুর্বেদোপযোগিদ্রব্যস্বরূপং ন সর্বম্, অপ্রসঙ্গদোষাদিতি ভাবঃ| সর্বদ্রব্যমিতি কার্যদ্রব্যম্| অস্মিন্নর্থে অস্মিন্ প্রকরণে| দ্রবান্তা ইতি বচনেন পূর্বোক্তান্ বিংশতিগুণানাহ| অত্র চ পরত্বাপরত্বাদীনামিহানভিধানেন চিকিত্সাযাং পরত্বাদীনামপ্রাধান্যং দর্শযতি; যেঽপি তত্রাপি যুক্তিসংযোগপরিমাণসংস্কারাভ্যাসা অত্যর্থচিকিত্সোপযোগিনোঽপি ন তে পর্থিবাদিদ্রব্যাণাং শব্দাদিবত্ সাংসিদ্ধিকাঃ কিন্তর্হ্যাধেযাঃ, অত ইহ নৈসর্গিকগুণকথনে নোক্তাঃ| উক্তমিতি অপামার্গতণ্ডুলীযে| এতচ্চ প্রাধান্যাদুচ্যতে, তেন বৃংহণাদ্যপি বোদ্ধব্যম্||১০||
Adhikarana 6 (11) · Śloka 11
তত্র দ্রব্যাণি গুরুখরকঠিনমন্দস্থিরবিশদসান্দ্রস্থূলগন্ধগুণবহুলানি পার্থিবানি , তান্যুপচযসঙ্ঘাতগৌরবস্থৈর্যকরাণি; দ্রবস্নিগ্ধশীতমন্দমৃদুপিচ্ছিলরসগুণবহুলান্যাপ্যানি, তান্যুপক্লেদস্নেহবন্ধবিষ্যন্দমার্দবপ্রহ্লাদকরাণি; উষ্ণতীক্ষ্ণসূক্ষ্মলঘুরূক্ষবিশদরূপগুণবহুলান্যাগ্নেযানি, তানি দাহপাকপ্রভাপ্রকাশবর্ণকরাণি; লঘুশীতরূক্ষখরবিশদসূক্ষ্মস্পর্শগুণবহুলানি বাযব্যানি, তানি রৌক্ষ্যগ্লানিবিচারবৈশদ্যলাঘবকরাণি; মৃদুলঘুসূক্ষ্মশ্লক্ষ্ণশব্দগুণবহুলান্যাকাশাত্মকানি, তানি মার্দবসৌষির্যলাঘবকরাণি||১১||
तत्र द्रव्याणि गुरुखरकठिनमन्दस्थिरविशदसान्द्रस्थूलगन्धगुणबहुलानि पार्थिवानि , तान्युपचयसङ्घातगौरवस्थैर्यकराणि; द्रवस्निग्धशीतमन्दमृदुपिच्छिलरसगुणबहुलान्याप्यानि, तान्युपक्लेदस्नेहबन्धविष्यन्दमार्दवप्रह्लादकराणि; उष्णतीक्ष्णसूक्ष्मलघुरूक्षविशदरूपगुणबहुलान्याग्नेयानि, तानि दाहपाकप्रभाप्रकाशवर्णकराणि; लघुशीतरूक्षखरविशदसूक्ष्मस्पर्शगुणबहुलानि वायव्यानि, तानि रौक्ष्यग्लानिविचारवैशद्यलाघवकराणि; मृदुलघुसूक्ष्मश्लक्ष्णशब्दगुणबहुलान्याकाशात्मकानि, तानि मार्दवसौषिर्यलाघवकराणि||११||
🔊 Audio coming soon
বহুলশব্দো গুর্বাদিভিঃ প্রত্যেকং সম্বধ্যতে; কিংবা গন্ধেনৈব, যতো গন্ধগুণবহুলা পৃথিব্যেব ভবতি; অত এব দ্রব্যান্তরলক্ষণেঽপি বৈশেষিকগুণোঽন্ত এব পঠ্যতে ‘রসগুণবহুলানি’ ইত্যাদি; তেন তত্রাপি রসাদিভিরেব বহুলশব্দো যোজ্যঃ| সর্বকার্যদ্রব্যাণাং পাঞ্চভৌতিকত্বেঽপি পৃথিব্যাদ্যুত্কর্ষেণ পার্থিবত্বাদি জ্ঞেযম্| সঙ্ঘাতঃ কাঠিন্যং, স্থৈর্যম্ অবিচাল্যম্| বন্ধনং পরস্পরযোজনং, প্রহ্লাদঃ শরীরেন্দ্রিযতর্পণম্| সূক্ষ্মং সূক্ষ্মস্রোতোঽনুসারি| প্রভা বর্ণপ্রকাশিনী দীপ্তিঃ; যদুক্তং- “বর্ণমাক্রামতি চ্ছাযা প্রভা বর্ণপ্রকাশিকা” (ইং.অ.৭) ইত্যাদি| বিচরণং বিচারো গতিরিত্যর্থঃ| সৌষির্যং রন্ধ্রবহুলতা| অত্রাকাশবাহুল্যং দ্রব্যস্য পৃথিব্যাদিভূতান্তরাল্পত্বেন ভূরিব্যক্তাকাশত্বেন চ জ্ঞেযং, যদেব ভূরিশুষিরং তন্নাভসং; কিংবা আকাশগুণবহুলত্বেন নাভসং দ্রব্যমিত্যুচ্যতে||১১||
Adhikarana 7 (12) · Śloka 12
অনেনোপদেশেন নানৌষধিভূতং জগতি কিঞ্চিদ্দ্রব্যমুপলভ্যতে তাং তাং যুক্তিমর্থং চ তং তমভিপ্রেত্য||১২||
अनेनोपदेशेन नानौषधिभूतं जगति किञ्चिद्द्रव्यमुपलभ्यते तां तां युक्तिमर्थं च तं तमभिप्रेत्य||१२||
🔊 Audio coming soon
অনেনেতি প্রতিনিযতদ্রব্যগুণোপদেশেন; যত্ পার্থিবাদি দ্রব্যং যদ্গুণং তদ্গুণে দেহে সম্পাদ্যে তদ্ ভেষজং ভবতীত্যর্থঃ| তচ্চ পার্থিবাদি দ্রব্যং ন সর্বথা ন চ সর্বস্মিন্ ব্যাধৌ ভেষজমিত্যাহ- তাং তাং যুক্তিমিত্যাদি|- যুক্তিমিতি উপাযম্, অর্থমিতি প্রযোজনম্, অভিপ্রেত্যেতি অধিকৃত্য; তেন কেনচিদুপাযেন ক্বচিত্ প্রযোজনে কিঞ্চিদ্দ্রব্যমৌষধং ভবতি ন সর্বত্র| তেন যদুচ্যতে- বৈরোধিকানাং সর্বদাঽপথ্যত্বেন ‘নানৌষধং দ্রব্যম্’ ইতি বচো বিরোধি; তন্ন ভবতি, বৈরোধিকানি হি সংযোগসংস্কারদেশকালাদ্যপেক্ষাণি ভবন্তি, বৈরোধিকসংযোগাদ্যভাবে তু পথ্যান্যপি ক্বচিত্ স্যুঃ| যান্যপি (সর্বদাঽপি ) স্বভাবাদেব বিষমন্দকাদীন্যপথ্যানি, তান্যপ্যুপাযযুক্তানি ক্বচিত্ পথ্যানি ভবন্তি; যথা উদরে- “বিষস্য তিলং দদ্যাত্” (চি. ১৩) ইত্যাদি| যত্তু তৃণপাংশুপ্রভৃতীনি নোপযুজ্যন্তে, অতো ন তানি ভেষজানীত্যুচ্যতে; তন্ন, তেষামপি ভেষজস্বেদাদ্যুপাযত্বেন ভেষজত্বাত্||১২||
Adhikarana 8 (13) · Śloka 13
ন তু কেবলং গুণপ্রভাবাদেব দ্রব্যাণি কার্মুকাণি ভবন্তি; দ্রব্যাণি হি দ্রব্যপ্রভাবাদ্গুণপ্রভাবাদ্দ্রব্যগুণপ্রভাবাচ্চ তস্মিংস্তস্মিন্ কালে তত্তদধিকরণমাসাদ্য তাং তাং চ যুক্তিমর্থং চ তং তমভিপ্রেত্য যত্ কুর্বন্তি, তত্ কর্ম; যেন কুর্বিন্তি, তদ্বীর্যং; যত্র কুর্বন্তি, তদধিকরণং; যদা কুর্বন্তি, স কালঃ; যথা কুর্বন্তি, স উপাযঃ; যত্ সাধযন্তি, তত্ ফলম্||১৩||
न तु केवलं गुणप्रभावादेव द्रव्याणि कार्मुकाणि भवन्ति; द्रव्याणि हि द्रव्यप्रभावाद्गुणप्रभावाद्द्रव्यगुणप्रभावाच्च तस्मिंस्तस्मिन् काले तत्तदधिकरणमासाद्य तां तां च युक्तिमर्थं च तं तमभिप्रेत्य यत् कुर्वन्ति, तत् कर्म; येन कुर्विन्ति, तद्वीर्यं; यत्र कुर्वन्ति, तदधिकरणं; यदा कुर्वन्ति, स कालः; यथा कुर्वन्ति, स उपायः; यत् साधयन्ति, तत् फलम्||१३||
🔊 Audio coming soon
পার্থিবাদিদ্রব্যাণাং গুরুখরাদিগুণযোগাদ্ভেষজত্বমুক্তং, তেন গুণপ্রভাবাদেব ভেষজং স্যাদিতি শঙ্কাং নিরস্যন্নাহ- ন তু কেবলমিত্যাদি| দ্রব্যপ্রভাবাদ্যথা- দন্ত্যা বিরেচকত্বং, তথা মণীনাং বিষাদিহন্তৃত্বমিত্যাদি| গুণপ্রভাবাদ্যথা- জ্বরে তিক্তকো রসঃ, শীতেঽগ্নিরিত্যাদি| দ্রব্যগুণপ্রভাবাদ্যথা- কৃষ্ণাজিনস্যোপরীতি, অত্রাপি কৃষ্ণত্বং গুণোঽজিনং চ দ্রব্যমভিপ্রেতং; যথা বা- “মণ্ডলৈর্জাতরূপস্য তস্যা এব পযঃ শৃতম্” (চি. অ. ২. পা. ৩); তত্র মণ্ডলগুণযুক্তস্যৈব জাতরূপস্য কার্মুকত্বম্ | কথং কুর্বন্তীত্যাহ- তস্মিংস্তস্মিন্নিত্যাদি| তাং তাং যুক্তিমাসাদ্যেতি তাং তাং যোজনাং প্রাপ্য| যত্ কুর্বন্তীত্যাদাবুদাহরণং যথা- শিরোবিরেচনদ্রব্যাণি যচ্ছিরোবিরেচনং কুর্বন্তি, তচ্ছিরোবিরেচনং কর্ম; যেনোষ্ণত্বাদিকারণেন শিরোবিরেচনং কুর্বন্তি, তদ্বীর্যং, বীর্যং শক্তিঃ, সা চ দ্রব্যস্য গুণস্য বা; যত্র শিরোবিরেচনং কুর্বন্তি তদধিকরণং শিরঃ, নান্যত্রাধিকরণে শিরোবিরেচনদ্রব্যং প্রভবতীত্যর্থঃ; যদেতি বসন্তাদৌ শিরোগৌরবাদিযুক্তে চ কালে, এতেনাকালে শীতে শিরোবিরেচনং স্তব্ধত্বান্ন কার্মুকং, কিন্তু স্বকাল এব; যথা যেন প্রকারেণ প্রধমনাবপীডনাদিনা তথা “প্রসারিতাঙ্গমুত্তানং শযনে সংস্তরাস্তৃতে| ঈষত্প্রলম্বশিরসং সংবেশ্য চাবৃতেক্ষণম্” ইত্যাদিনা বিধিনা কুর্বন্তি, স উপাযঃ; যত্ সাধযন্তি শিরোগৌরবশূলাদ্যুপরমং , তত্ ফলং; ফলম্ উদ্দেশ্যম্| কর্ম কার্যং সাধনম্, উদ্দেশ্যং ফলং সাধ্যং; যথা- যাগনিষ্পাদ্যো ধর্মঃ কার্যতযা কর্ম, তজ্জন্যস্তু স্বর্গাদিরুদ্দেশ্যঃ ফলম্; এবং বমনাদিষ্বপি কর্মাধিকরণাদ্যুন্নেযম্||১৩||
Adhikarana 9 (14) · Śloka 14
ভেদশ্চৈষাং ত্রিষষ্টিবিধবিকল্পো দ্রব্যদেশকালপ্রভাবাদ্ভবতি, তমুপদেক্ষ্যামঃ||১৪||
भेदश्चैषां त्रिषष्टिविधविकल्पो द्रव्यदेशकालप्रभावाद्भवति, तमुपदेक्ष्यामः||१४||
🔊 Audio coming soon
সম্প্রতি দ্রব্যমভিধায বিকৃতানাং রসানামেব ভেদমাহ - ভেদশ্চৈষামিত্যাদি| প্রভাবশব্দো দ্রব্যদেশকালৈঃ প্রত্যেকং যুজ্যতে; তত্র দ্রব্যপ্রভাবাদ্যথা- ’সোমগুণাতিরেকান্মধুরঃ’ ইত্যাদি; দেশপ্রভাবাদ্যথা- হিমবতি দ্রাক্ষাদাডিমাদীনি মধুরাণি ভবন্ত্যন্যত্রাম্লানীত্যাদি; কালপ্রভাবাদ্যথা- বালাম্রং সকষাযং তরুণমম্লং পক্বং মধুরং, তথা হেমন্তে ওষধ্যো মধুরা বর্ষাস্বম্লা ইত্যাদি| অগ্নিসংযোগাদযো যেঽন্যে রসহেতবস্তেঽপি কালে দ্রব্যে বাঽন্তর্ভাবনীযাঃ||১৪||
Adhikarana 10 (15) · Śloka 15
স্বাদুরম্লাদিভির্যোগং শেষৈরম্লাদযঃ পৃথক্| যান্তি পঞ্চদশৈতানি দ্রব্যাণি দ্বিরসানি তু||১৫||
स्वादुरम्लादिभिर्योगं शेषैरम्लादयः पृथक्| यान्ति पञ्चदशैतानि द्रव्याणि द्विरसानि तु||१५||
🔊 Audio coming soon
ভেদমাহ- স্বাদুরিত্যাদি| তত্র স্বাদোরম্লাদিযোগাত্ পঞ্চ, শেষৈরিতি আদিত্বেনোপযুক্তাদন্যৈঃ; তেনাম্লস্য লবণাদিযোগাচ্চত্বারি, এবং লবণস্য কট্বাদিযোগাত্ত্রীণি, কটুকস্য তিক্তকষাযযোগাদ্দ্বে, তিক্তস্য কষাযযোগাদেকম্, এবং পঞ্চদশ দ্বিরসানি ||১৫||
Adhikarana 11 (16) · Śloka 17
পৃথগম্লাদিযুক্তস্য যোগঃ শেষৈঃ পৃথগ্ভবেত্| মধুরস্য তথাঽম্লস্য লবণস্য কটোস্তথা||১৬|| ত্রিরসানি যথাসঙ্খ্যং দ্রব্যাণ্যুক্তানি বিংশতিঃ|১৭|
पृथगम्लादियुक्तस्य योगः शेषैः पृथग्भवेत्| मधुरस्य तथाऽम्लस्य लवणस्य कटोस्तथा||१६|| त्रिरसानि यथासङ्ख्यं द्रव्याण्युक्तानि विंशतिः|१७|
🔊 Audio coming soon
ত্রিরসমাহ- পৃথগিত্যাদি| মধুরস্যাম্লাদিরসচতুষ্টযেন পৃথগিত্যেকৈকশো যুক্তস্য শেষৈর্লবণাদিভির্যোগো ভবতি; তত্র মধুরস্যাম্লযুক্তস্য শেষলবণাদিযোগাচ্চত্বারি, তথা মধুরস্য লবণযুক্তস্য কট্বাদিযোগাত্ত্রীণি, তথা কটুযুক্তস্য তিক্তাদিযোগাদ্দ্বে, তথা তিক্তযুক্তস্য কষাযযোগাদেকম্, এবং মধুরেণাদিস্থিতেন দশ| এবমম্লস্যাদিস্থিতস্য লবণযুক্তস্য কট্বাদিযোগাত্ত্রীণি, তথা কটুকযুক্তস্য শেষাভ্যাং যোগাদ্দ্বে, এবং তিক্তযুক্তস্য কষাযযোগাদেকম্, এবমম্লস্য ষট্| অনেনৈব ন্যাযেন লবণস্য ত্রীণি, কটোশ্চৈকমেব; এবং মিলিত্বা ত্রিরসানি বিংশতিঃ ||১৬||-
Adhikarana 12 (17-20) · Śloka 21
বক্ষ্যন্তে তু চতুষ্কেণ দ্রব্যাণি দশ পঞ্চ চ||১৭|| স্বাদ্বম্লৌ সহিতৌ যোগং লবণাদ্যৈঃ পৃথগ্গতৌ| যোগং শেষৈঃ পৃথগ্যাতশ্চতুষ্করসসঙ্খ্যযা||১৮|| সহিতৌ স্বাদুলবণৌ তদ্বত্ কট্বাদিভিঃ পৃথক্| যুক্তৌ শেষৈঃ পৃথগ্যোগং যাতঃ স্বাদূষণৌ তথা||১৯|| কট্বাদ্যৈরম্ললবণৌ সংযুক্তৌ সহিতৌ পৃথক্| যাতঃ শেষৈঃ পৃথগ্যোগং শেষৈরম্লকটূ তথা||২০|| যুজ্যতে তু কষাযেণ সতিক্তৌ লবণোষণৌ|২১|
वक्ष्यन्ते तु चतुष्केण द्रव्याणि दश पञ्च च||१७|| स्वाद्वम्लौ सहितौ योगं लवणाद्यैः पृथग्गतौ| योगं शेषैः पृथग्यातश्चतुष्करससङ्ख्यया||१८|| सहितौ स्वादुलवणौ तद्वत् कट्वादिभिः पृथक्| युक्तौ शेषैः पृथग्योगं यातः स्वादूषणौ तथा||१९|| कट्वाद्यैरम्ललवणौ संयुक्तौ सहितौ पृथक्| यातः शेषैः पृथग्योगं शेषैरम्लकटू तथा||२०|| युज्यते तु कषायेण सतिक्तौ लवणोषणौ|२१|
🔊 Audio coming soon
চতূরসে স্বাদ্বম্লাবাদিস্থিতৌ লবণাদিভিরেকৈকশ্যেন যুক্তৌ শেষৈঃ কট্বাদিভির্যোগাত্ ষড্ ভবন্তি| স্বাদুলবণৌ সহিতৌ আদিস্থিতৌ, কট্বাদিভিরিতি কটুতিক্তাভ্যাং পৃথগ্যুক্তৌ, শেষৈরিতি তিক্তকষাযাভ্যাং, তেনেহ বহুবচনং জাতৌ বোদ্ধব্যম্; এবং ত্রীণি| স্বাদূষণৌ তথেত্যনেন স্বাদুকটুকতিক্তকষাযরূপমেকম্| কট্বাদ্যৈরিত্যাদাবপি বহুবচনং জাতৌ| অম্ললবণৌ সংযুক্তৌ কটুনা সহিতৌ শেষাভ্যাং যোগাদ্দ্বে, তথাঽম্ললবণৌ তিক্তযুক্তৌ শেষযোগাদেকম্| অম্লকটূ তথেত্যনেনাম্লকটুতিক্তকষাযরূপমেকম্| যুজ্যেতে ত্বিত্যাদিনা চৈকম্| এবং পঞ্চদশ চতূরসানি||১৭-২০||-
Adhikarana 13 (21) · Śloka 22
ষট্ তু পঞ্চরসান্যাহুরেকৈকস্যাপবর্জনাত্||২১|| ষট্ চৈবৈকরসানি স্যুরেকং ষড্রসমেব তু|২২|
षट् तु पञ्चरसान्याहुरेकैकस्यापवर्जनात्||२१|| षट् चैवैकरसानि स्युरेकं षड्रसमेव तु|२२|
🔊 Audio coming soon
অপবর্জনাদিতি ত্যাগাত্| অত্র চ রসানাং গুণত্বেনৈকস্মিন্ দ্রব্যে সমবাযো যোগশব্দেনোচ্যতে||২১||-
Adhikarana 14 (22-23) · Śloka 23
ইতি ত্রিষষ্টির্দ্রব্যাণাং নির্দিষ্টা রসসঙ্খ্যযা||২২|| ত্রিষষ্টিঃ স্যাত্ত্বসঙ্খ্যেযা রসানুরসকল্পনাত্ | রসাস্তরতমাভ্যাং তাং সঙ্খ্যামতিপতন্তি হি||২৩||
इति त्रिषष्टिर्द्रव्याणां निर्दिष्टा रससङ्ख्यया||२२|| त्रिषष्टिः स्यात्त्वसङ्ख्येया रसानुरसकल्पनात् | रसास्तरतमाभ्यां तां सङ्ख्यामतिपतन्ति हि||२३||
🔊 Audio coming soon
রসসংসর্গস্য প্রকারান্তরেণাসঙ্খ্যেযতামাহ- ত্রিষষ্টিঃ স্যাদিত্যাদি| অনুরসোঽগ্রে বক্ষ্যমাণঃ| অত্র চ ত্রিষষ্ট্যাত্মকরসে রসানুরসকল্পনা নাস্তি, কেবলে মধুরাদৌ তদভাবাত্; তেন যথাসম্ভবং সপ্তপঞ্চাশত্সংযোগবিষযং রসানুরসকল্পনং জ্ঞেযম্| কিংবা, একরসেঽপ্যনুরসোঽস্ত্যেবাব্যপদেশ্যঃ| প্রকারান্তরেণাপ্যসঙ্খ্যেযতামাহ- রসাস্তরতমাভ্যামিত্যাদি| মধুরমধুরতরমধুরতমাদিভেদাদসঙ্খ্যেযতা রসানাং ভবতীতি ভাবঃ| কিংবা, রসানুরসত্বেনৈব যাঽসঙ্খ্যেযতা তত্রৈবাযং হেতুঃ- রসাস্তরতমাভ্যামিত্যাদিঃ||২২-২৩||
Adhikarana 15 (24) · Śloka 24
সংযোগাঃ সপ্তপঞ্চাশত্ কল্পনা তু ত্রিষষ্টিধা| রসানাং তত্র যোগ্যত্বাত্ কল্পিতা রসচিন্তকৈঃ||২৪||
संयोगाः सप्तपञ्चाशत् कल्पना तु त्रिषष्टिधा| रसानां तत्र योग्यत्वात् कल्पिता रसचिन्तकैः||२४||
🔊 Audio coming soon
এবমসঙ্খ্যেযত্বেঽপি ত্রিষষ্টিবিধৈব কল্পনা চিকিত্সাব্যবহারার্থমিহাচার্যৈঃ কল্পিতেত্যাহ- সংযোগা ইত্যাদি| তত্র যোগ্যত্বাদিতি তত্র স্বস্থাতুরহিতচিকিত্সাপ্রযোগেঽনতিসঙ্ক্ষেপবিস্তররূপতযা হিতত্বাদিত্যর্থঃ||২৪||
Adhikarana 16 (25-26) · Śloka 26
ক্বচিদেকো রসঃ কল্প্যঃ সংযুক্তাশ্চ রসাঃ ক্বচিত্| দোষৌষধাদীন্ সঞ্চিন্ত্য ভিষজা সিদ্ধিমিচ্ছতা||২৫|| দ্রব্যাণি দ্বিরসাদীনি সংযুক্তাংশ্চ রসান্ বুধাঃ| রসানেকৈকশো বাঽপি কল্পযন্তি গদান্ প্রতি||২৬||
क्वचिदेको रसः कल्प्यः संयुक्ताश्च रसाः क्वचित्| दोषौषधादीन् सञ्चिन्त्य भिषजा सिद्धिमिच्छता||२५|| द्रव्याणि द्विरसादीनि संयुक्तांश्च रसान् बुधाः| रसानेकैकशो वाऽपि कल्पयन्ति गदान् प्रति||२६||
🔊 Audio coming soon
তমেব চিকিত্সাপ্রযোগমাহ- ক্বচিদিত্যাদি| অত্রাদিগ্রহণাদ্দেশকালবলাদীনামনুক্তানাং গ্রহণম্| এতদেব সংযুক্তাসংযুক্তরসকল্পনং ভিন্নরসদ্রব্যমেলকাদ্বাঽনেকরসৈকদ্রব্যপ্রযোগাদেকরসদ্রব্যপ্রযোগাদ্বা ভবতীতি দর্শযন্নাহ- দ্রব্যাণীত্যাদি| দ্বিরসাদীনি উত্পত্তিসিদ্ধদ্বিরসত্রিরসাদীনি; দ্বিরসং যথা- কষাযমধুরো মুদ্গঃ; ত্রিরসং যথা- “মধুরাম্লকষাযং চ বিষ্টম্ভি গুরু শীতলম্| পিত্তশ্লেষ্মহরং ভব্যং” (সূ. ২৭) ইত্যাদি; চতূরসস্তিলঃ, যদুক্তং- “স্নিগ্ধোষ্ণমধুরস্তিক্তঃ কষাযঃ কটুকস্তিলঃ” (সূ. ২৭); পঞ্চরসং ত্বামলকং হরীতকী চ, “শিবা পঞ্চরসা” ইত্যাদিবচনাত্; ব্যক্তষড্রসং তু দ্রব্যমিহানুক্তং, বিষং ত্বব্যক্তষড্রসসংযুক্তং; হারীতে ত্বেণমাংসং ব্যক্তষড্রসসংযুক্তমুক্তম্| এবং দ্বিরসাদিদ্রব্যযোগাদ্দ্বিরসাদ্যুপযোগঃ| তথা সংযুক্তাংশ্চ রসানিতি একৈকরসাদিদ্রব্যমেলকাত্ সংযুক্তান্ রসানেকৈকশঃ কল্পযন্তি প্রযোজযন্তি| গদান্ প্রতীতি প্রাধান্যেন, তেন স্বস্থবৃত্তেঽপি বোদ্ধব্যং; কিংবা, দ্বিরসাদিভেদো গদ এব, স্বস্থে তু সর্বরসপ্রযোগ এব; যদুক্তং- “সমসর্বরসং সাত্ম্যং সমধাতোঃ প্রশস্যতে” (সূ. ৭) ইতি| এবং চ ব্যাখ্যানে সতি ‘ক্বচিদেকো রস’ ইত্যাদিনা সমমস্য ন পৌনরুক্ত্যম্| কিংবা, ‘ক্বচিদেকো রস’ ইত্যাদিনা স্বমতমুক্তম্, অত্রৈবার্থে ‘দ্রব্যাণি দ্বিরসাদীনি’ ইত্যাদিনাঽঽচার্যান্তরসম্মতিং দর্শযতি; অত এবান্যাচার্যান্তরাভিপ্রাযেণ কল্পযন্তীত্যুক্তং, তেন ন পৌনরুক্ত্যম্||২৫-২৬||
Adhikarana 17 (27) · Śloka 27
যঃ স্যাদ্রসবিকল্পজ্ঞঃ স্যাচ্চ দোষবিকল্পবিত্| ন স মুহ্যেদ্বিকারাণাং হেতুলিঙ্গোপশান্তিষু ||২৭||
यः स्याद्रसविकल्पज्ञः स्याच्च दोषविकल्पवित्| न स मुह्येद्विकाराणां हेतुलिङ्गोपशान्तिषु ||२७||
🔊 Audio coming soon
রসজ্ঞানফলমাহ- যঃ স্যাদিত্যাদি| অত্র রসবিকল্পজ্ঞানাদেব ব্যাধিহেতুদ্রব্যজ্ঞানং কৃত্স্নমবরুদ্ধং, রসজ্ঞানেনৈব প্রাযঃ সকলদ্রব্যগুণস্য বক্ষ্যমাণত্বাত্| দোষবিকল্পজ্ঞানাচ্চ লিঙ্গজ্ঞানং, যাবদ্ধি লিঙ্গং তত্ সর্বং দোষবিকল্পসম্বদ্ধম্| রসদোষবিকল্পজ্ঞানাত্তু ভেষজজ্ঞানং, যতো রসতঃ স্বরূপজ্ঞানং ভেষজদ্রব্যস্য, দোষতশ্চ ভেষজপ্রযোগবিষযবিজ্ঞানম্| কিংবা, রসবিকল্পাচ্চ তথা দোষবিকল্পাচ্চ হেত্বাদিজ্ঞানং পৃথগেব বক্তব্যং; রসভেদাদ্ধি তত্কার্যং লিঙ্গমপি জ্ঞাযতে, হেতুভেষজবিজ্ঞানং তু রসভেদবিজ্ঞানাদেব বক্তব্যং, যতো রসভেদবদ্দ্রব্যমেব বিকারাণাং হেতুর্ভেষজং চ ভবতীতি; এবং দোষভেদং জ্ঞাত্বা চ তস্য সমানং হেতুং প্রত্যেতি, দোষবিরোধি চ দ্রব্যং ভেষজমিতি| তদ্যুক্তমুক্তং- ন স মুহ্যেদ্বিকারাণাং হেতুলিঙ্গোপশান্তিষ্বিতি||২৭||
Adhikarana 18 (28) · Śloka 28
ব্যক্তঃ শুষ্কস্য চাদৌ চ রসো দ্রব্যস্য লক্ষ্যতে| বিপর্যযেণানুরসো রসো নাস্তি হি সপ্তমঃ||২৮||
व्यक्तः शुष्कस्य चादौ च रसो द्रव्यस्य लक्ष्यते| विपर्ययेणानुरसो रसो नास्ति हि सप्तमः||२८||
🔊 Audio coming soon
পূর্বোক্তরসানুরসলক্ষণমাহ- ব্যক্ত ইত্যাদি| শুষ্কস্য চেতি চকারাদার্দ্রস্য চ, আদৌ চেতি চকারাদন্তে চ; তেন শুষ্কস্য বাঽঽর্দ্রস্য বা প্রথমজিহ্বাসম্বন্ধে বাঽঽস্বাদান্তে বা যো ব্যক্তত্বেন মধুরোঽযমম্লোঽযমিত্যাদিনা বিকল্পেন গৃহ্যতে, স ব্যক্তঃ; যস্তূক্তাবস্থাচতুষ্টযেঽপি ব্যক্তো নোপলভ্যতে, কিন্তর্হ্যব্যপদেশ্যতযা ছাযামাত্রেণ কার্যদর্শনেন বা মীযতে, সোঽনুরস ইতি বাক্যার্থঃ| যতশ্চ মধুরাদয এব ব্যক্তত্বাব্যক্তত্বাভ্যাং রসানুরসরূপাঃ, অতোঽব্যক্তো নাম সপ্তমো রসো নাস্তি| অযং চার্থঃ পূর্বং প্রতিষিদ্ধোঽপ্যনুগুণস্পষ্টহেতুপ্রাপ্ত্যা পুনর্নিষিধ্যতে| অন্যে ত্বাহুঃ- শুষ্কস্য চেত্যনেন যস্য দ্রব্যস্য শুষ্কস্য চার্দ্রস্য চোপযোগঃ, তত্র শুষ্কাবস্থাযাং যোঽব্যক্তঃ স রস উচ্যতে; যস্ত্বার্দ্রাবস্থাযাং ব্যক্তঃ সন্ শুষ্কাবস্থাযাং নানুযাতি , নাসৌ রসঃ, কিন্ত্বনুরসঃ| যথা- পিপ্পল্যা আর্দ্রাযা মধুরো রসো ব্যক্তঃ, শুষ্কাযাস্তু পিপ্পল্যাঃ কটুকঃ; তেন কটুক এব রসঃ পিপ্পল্যাঃ, মধুরস্ত্বনুরসঃ; যস্তু দ্রাক্ষাদীনামার্দ্রাবস্থাযাং শুষ্কাবস্থাযাং চ মধুর এব, তত্র বিপ্রতিপত্তিরপি নাস্তি, তেন তত্র মধুর এব রসঃ; নিত্যার্দ্রপ্রযোজ্যানাং তু কাঞ্জিকতক্রাদীনামাদৌ ব্যক্তো য উপলভ্যতে রসঃ, অনু চোপলভ্যতে যঃ সোঽনুরসো যুক্তস্তিক্তত্বাদিঃ; তথা, আর্দ্রাবস্থাযাং শুষ্কাবস্থাবিপরীতো যঃ পিপ্পল্যা ইব মধুরঃ, সোঽনুরস ইতি| কিন্ত্বার্দ্রাঽপি পিপ্পলী মধুররসৈবেতি পশ্যামঃ, যতো বক্ষ্যতি- “শ্লেষ্মলা মধুরা চার্দ্রা গুর্বী স্নিগ্ধা চ পিপ্পলী” (সূ. ২৭) ইতি; মধুরস্য তত্রানুরসত্বে গুরুত্বশ্লেষ্মকর্তৃত্বান্যনুপপন্নানি; তেন, আর্দ্রা পিপ্পলী ব্যক্তমধুররসৈব, শুষ্কা তু মধুরানুরসেতি যুক্তম্||২৮||
Adhikarana 19 (29-35) · Śloka 35
পরাপরত্বে যুক্তিশ্চ সঙ্খ্যা সংযোগ এব চ| বিভাগশ্চ পৃথক্ত্বং চ পরিমাণমথাপি চ||২৯|| সংস্কারোঽভ্যাস ইত্যেতে গুণা জ্ঞেযাঃ পরাদযঃ| সিদ্ধ্যুপাযাশ্চিকিত্সাযা লক্ষণৈস্তান্ প্রচক্ষ্মহে||৩০|| দেশকালবযোমানপাকবীর্যরসাদিষু| পরাপরত্বে, যুক্তিশ্চ যোজনা যা তু যুজ্যতে||৩১|| সঙ্খ্যা স্যাদ্গণিতং, যোগঃ সহ সংযোগ উচ্যতে| দ্রব্যাণাং দ্বন্দ্বসর্বৈককর্মজোঽনিত্য এব চ||৩২|| বিভাগস্তু বিভক্তিঃ স্যাদ্বিযোগো ভাগশো গ্রহঃ| পৃথক্ত্বং স্যাদসংযোগো বৈলক্ষণ্যমনেকতা||৩৩|| পরিমাণং পুনর্মানং, সংস্কারঃ করণং মতম্| ভাবাভ্যসনমভ্যাসঃ শীলনং সততক্রিযা||৩৪|| ইতি স্বলক্ষণৈরুক্তা গুণাঃ সর্বে পরাদযঃ| চিকিত্সা যৈরবিদিতৈর্ন যথাবত্ প্রবর্ততে||৩৫||
परापरत्वे युक्तिश्च सङ्ख्या संयोग एव च| विभागश्च पृथक्त्वं च परिमाणमथापि च||२९|| संस्कारोऽभ्यास इत्येते गुणा ज्ञेयाः परादयः| सिद्ध्युपायाश्चिकित्साया लक्षणैस्तान् प्रचक्ष्महे||३०|| देशकालवयोमानपाकवीर्यरसादिषु| परापरत्वे, युक्तिश्च योजना या तु युज्यते||३१|| सङ्ख्या स्याद्गणितं, योगः सह संयोग उच्यते| द्रव्याणां द्वन्द्वसर्वैककर्मजोऽनित्य एव च||३२|| विभागस्तु विभक्तिः स्याद्वियोगो भागशो ग्रहः| पृथक्त्वं स्यादसंयोगो वैलक्षण्यमनेकता||३३|| परिमाणं पुनर्मानं, संस्कारः करणं मतम्| भावाभ्यसनमभ्यासः शीलनं सततक्रिया||३४|| इति स्वलक्षणैरुक्ता गुणाः सर्वे परादयः| चिकित्सा यैरविदितैर्न यथावत् प्रवर्तते||३५||
🔊 Audio coming soon
সম্প্রতি পূর্বোক্তগুর্বাদিগুণাতিরিক্তান্ পরত্বাপরত্বাদীন্ দশগুণান্ রসধর্মত্বেনোপদেষ্টব্যানাহ- পরেত্যাদি| তচ্চ পরত্বং প্রধানত্বম্, অপরত্বম্ অপ্রধানত্বম্| তদ্বিবরণং- দেশকালেত্যাদি| তত্র দেশো মরুঃ পরঃ, অনূপোঽপরঃ; কালো বিসর্গঃ পরঃ, আদানমপরঃ; বযস্তরুণং পরম্, অপরমিতরত্; মানং চ শরীরস্য যথা বক্ষ্যমাণং শারীরে পরং, ততোঽন্যদপরং; পাকবীর্যরসাস্তু যে যস্য যোগিনস্তে তং প্রতি পরাঃ, অযৌগিকাস্ত্বপরাঃ| আদিগ্রহণাত্ প্রকৃতিবলাদীনাং গ্রহণম্| কিংবা, পরত্বাপরত্বে বৈশেষিকোক্তে জ্ঞেযে; তত্র দেশাপেক্ষযা সন্নিকৃষ্টদেশসম্বন্ধিনমপেক্ষ্য বিদূরদেশসম্বন্ধিনি পরত্বং, সন্নিকৃষ্টদেশসম্বন্ধিনি চাপরত্বং ভবতি; এবং সন্নিকৃষ্টবিপ্রকৃষ্টকালাপেক্ষযা চ স্থবিরে পরত্বং, যূনি চাপরত্বং ভবতি| বযঃপ্রভৃতিষু পরত্বাপরত্বং যথাসম্ভবং কালদেশকৃতমেবেহোপযোগাদুপচরিতমপ্যভিহিতং, যতো ন গুণে মানাদৌ গুণান্তরসম্ভবঃ| যুক্তিশ্চেত্যাদৌ যোজনা দোষাদ্যপেক্ষযা ভেষজস্য সমীচীনকল্পনা, অত এবোক্তং- যা তু যুজ্যতে; যা কল্পনা যৌগিকী ভবতি সা তু যুক্তিরুচ্যতে, অযৌগিকী তু কল্পনাঽপি সতী যুক্তির্নোচ্যতে পুত্রোঽপ্যপুত্রবত্| যুক্তিশ্চেযং সংযোগপরিমাণসংস্কারাদ্যন্তর্গতাঽপ্যত্যুপযুক্তত্বাত্ পৃথগুচ্যতে| সঙ্খ্যাং লক্ষযতি- সঙ্খ্যেত্যাদি| গণিতমিহৈকদ্বিত্র্যাদি| সংযোগমাহ- যোগ ইত্যাদি | সহেতি মিলিতানাং দ্রব্যাণাং যোগঃ প্রাপ্তিরিত্যর্থঃ, সহেত্যনেনেহাকিঞ্চিত্করং পরস্পরসংযোগং নিরাকরোতি| তদ্ভেদমাহ- দ্বন্দ্বেত্যাদি| তত্র দ্বন্দ্বকর্মজো যথা- যুধ্যমানযোর্মেষযোঃ, সর্বকর্মজো যথা- ভাণ্ডে প্রক্ষিপ্যমাণানাং মাষাণাং বহুলমাষক্রিযাযোগজঃ, এককর্মজো যথা- বৃক্ষবাযসযোঃ| অনিত্য ইতি সংযোগস্য কর্মজত্বেনানিত্যত্বং দর্শযতি| বিভাগমাহ- বিভাগস্ত্বিত্যাদি| বিভক্তিঃ বিভজনম্| বিভক্তিমেব বিবৃণোতি- বিযোগ ইতি; সংযোগস্য বিগমো বিযোগঃ| তত্ কিং সংযোগাভাব এব বিযোগ ইত্যাহ- ভাগশো গ্রহ ইতি|- বিভাগশো বিভক্তত্বেন গ্রহণং যতো ভবতীতি ভাবঃ; তেন বিভক্তিরিত্যেষা ভাবরূপা প্রতীতিঃ, ন সংযোগাভাবমাত্রং ভবতি, কিন্তর্হি ভাবরূপবিভাগগুণযুক্তা ইত্যর্থঃ | পৃথক্ত্বং তু ‘ইদং দ্রব্যং পটলক্ষণং, ঘটাত্ পৃথগ্’ ইত্যাদিকা বুদ্ধির্যতো ভবতি, তত্ পৃথক্ত্বং ভবতি| তচ্চাচার্যস্ত্রৈবিধ্যেনাহ- পৃথক্ত্বমিত্যাদি| তত্র যত্ সর্বথাঽসংযুজ্যমানযোরিব মেরুহিমাচলযোঃ পৃথক্ত্বম্, এতদসংযোগ ইত্যনেনোক্তম্| তথা সংযুজ্যমানানামপি পৃথক্ত্বং বিজাতীযানাং মহিষবরাহাদীনাং, তদাহ- বৈলক্ষণ্যমিত্যাদি|- বিশিষ্টলক্ষণযুক্তত্বলক্ষিতং বিজাতীযানাং পৃথক্ত্বমিত্যর্থঃ| তথৈকজাতীযানামপ্যবিলক্ষণানাং মাষাণাং পৃথক্ত্বং ভবতীত্যাহ- অনেকতেতি| একজাতীযেষু হি সংযুক্তেষু ন বৈলক্ষণ্যং নাপ্যসংযোগঃ, অথ চানেকতা পৃথক্ত্বরূপা ভবতীতি ভাবঃ| কিংবা, পৃথক্ত্বং গুণান্তরমিচ্ছন্ লোকব্যবহারার্থমসংযোগবৈলক্ষণ্যানেকতারূপমেব যথোদাহৃতং পৃথক্ত্বং দর্শযতি | মানং প্রস্থাঢকাদিতুলাদিমেযম্| করণং গুণান্তরাধাযকত্বং সংস্করণমিত্যর্থঃ; যদ্বক্ষ্যতি- “সংস্কারো হি গুণান্তরাধানমুচ্যতে” (বি. ১) ইতি| ভাবস্য ষষ্টিকাদের্ব্যাযামাদেশ্চাভ্যসনমভ্যাসঃ| অভ্যসনমেব লোকপ্রসিদ্ধাভ্যাং পর্যাযাভ্যাং বিবৃণোতি- শীলনং সততক্রিযেতি; যং লোকাঃ শীলনসততক্রিযাভ্যামভিদধতি সোঽভ্যাস ইতি ভাবঃ| অযং চ সংযোগসংস্কারবিশেষরূপোঽপি বিশেষেণ চিকিত্সোপযুক্তত্বাত্ পৃথগুচ্যতে| ন যথাবত্ প্রবর্তত ইতি বচনেন শব্দাদিষু চ গুর্বাদিষু চ পরাদীনামপ্রাধান্যং সূচযতি||২৯-৩৫||
Adhikarana 20 (36) · Śloka 36
গুণা গুণাশ্রযা নোক্তাস্তস্মাদ্রসগুণান্ ভিষক্| বিদ্যাদ্দ্রব্যগুণান্ কর্তুরভিপ্রাযাঃ পৃথগ্বিধাঃ||৩৬||
गुणा गुणाश्रया नोक्तास्तस्माद्रसगुणान् भिषक्| विद्याद्द्रव्यगुणान् कर्तुरभिप्रायाः पृथग्विधाः||३६||
🔊 Audio coming soon
সম্প্রতি রসানাং পরস্পরসংযোগো গুণ উক্তঃ, তথাঽগ্রে চ স্নিগ্ধত্বাদির্গুণো বাচ্যঃ, স চ গুণরূপরসে ন সম্ভবতীতি যথা রসানাং গুণনির্দেশো বোদ্ধব্যস্তদাহ- গুণা ইত্যাদি| গুণা গুণাশ্রযা নোক্তা ইতি দীর্ঘঞ্জীবিতীযে “সমবাযী তু নিশ্চেষ্টঃ কারণং গুণঃ” (সূ. ১) ইত্যনেন| রসগুণানিতি রসে স্নিগ্ধাদীন্ গুণান্নির্দিষ্টান্ তদ্রসাধারদ্রব্যগুণানেব বিদ্যাত্| ননু, যদি দ্রব্যগুণা এব তে, তত্ কিমিতি রসগুণত্বেনোচ্যন্ত ইত্যাহ- কর্তুরিত্যাদি; কর্তুরিতি তন্ত্রকর্তুঃ| অভিপ্রাযা ইতি তত্র তত্রোপচারেণ তথা সামান্যশব্দাদিপ্রযোগেণ তন্ত্রকরণবুদ্ধযঃ; সামান্যশব্দোপচারাদিপ্রযোগশ্চ প্রকরণাদিবশাদেব স্ফুটত্বাত্ তথা প্রযোজনবশাচ্চ ক্রিযতে| তচ্চ প্রকরণাদি ‘অতশ্চ প্রকৃতং বুদ্ধ্বা’ ইত্যাদৌ দর্শযিষ্যামঃ| ইহ চ দ্রব্যগুণানাং রসেষু যদুপচরণং তস্যাযমভিপ্রাযো- যত্- মধুরাদিনির্দেশেনৈব স্নিগ্ধশীতাদিগুণা অপি প্রাযো মধুরাদ্যব্যভিচারিণো দ্রব্যে নির্দিষ্টা ভবন্তীতি ন মধুরত্বং নির্দিশ্য স্নিগ্ধত্বাদিপ্রতিপাদনং পুনঃ পৃথক্ ক্রিযত ইতি||৩৬||
Adhikarana 21 (37) · Śloka 37
অতশ্চ প্রকৃতং বুদ্ধ্বা দেশকালান্তরাণি চ| তন্ত্রকর্তুরভিপ্রাযানুপাযাংশ্চার্থমাদিশেত্||৩৭||
अतश्च प्रकृतं बुद्ध्वा देशकालान्तराणि च| तन्त्रकर्तुरभिप्रायानुपायांश्चार्थमादिशेत्||३७||
🔊 Audio coming soon
অভিপ্রাযপৃথক্ত্বে সতি যথা গ্রন্থো বোদ্ধব্যস্তদাহ- অতশ্চেত্যাদি| তত্র প্রকৃতং বুদ্ধ্বা, যথা- “ক্ষারাঃ ক্ষীরং ফলং পুষ্পম্” ইত্যত্রোদ্ভিদগণস্য প্রকৃতত্বাত্ ক্ষীরমিতি স্নুহ্যাদিক্ষীরমেব ক্ষীরশব্দেন বদেত্| দেশান্তরং বুদ্ধ্বেতি যথা- শিরসি শোধনেঽভিধীযমানে “ক্রিমিব্যাধৌ” (সূ. ২) ইতি, তচ্ছিরোগতক্রিমিব্যাধাবেব ভবতি| কালান্তরে যথা- বমনকালেঽভিহিতং “প্রতিগ্রহাংশ্চোপহারযেত্” (সূ. ১৫) ইতি, তত্র প্রতিগ্রহশব্দেন পাত্রমুচ্যতে, ন তু গ্রহণং প্রতিগ্রহঃ| তন্ত্রকর্তুরভিপ্রাযানিতি যথোক্তং রসেষু গুণারোপণে তদ্বোদ্ধব্যম্| উপাযানিতি শাস্ত্রোপাযান্ তন্ত্রযুক্তিরূপান্| অর্থম্ অভিধেযম্| যদ্যপি প্রকৃতাদযোঽপি তন্ত্রকর্তুরভিপ্রাযা এব, তথাঽপি যত্র প্রকৃতত্বাদি ন স্ফুটং প্রতীযতে তত্র তন্ত্রকর্তুরভিপ্রাযত্বেন বোদ্ধব্যম্||৩৭||
Adhikarana 22 (38) · Śloka 38
ষড্বিভক্তীঃ প্রবক্ষ্যামি রসানামত উত্তরম্| ষট্ পঞ্চভূতপ্রভবাঃ সঙ্খ্যাতাশ্চ যথা রসাঃ||৩৮||
षड्विभक्तीः प्रवक्ष्यामि रसानामत उत्तरम्| षट् पञ्चभूतप्रभवाः सङ्ख्याताश्च यथा रसाः||३८||
🔊 Audio coming soon
ষড্বিভক্তীরিতি মধুরাদিষড্বিভাগানিত্যর্থঃ| ষট্ পঞ্চভূতপ্রভবা ইতি পঞ্চভূতপ্রভবাঃ সন্তো যথোক্তেন প্রকারেণ ‘সোমগুণাতিরেকাত্’ ইত্যাদিনা যথা ষট্ সঙ্খ্যাতাঃ ষট্সঙ্খ্যাপরিচ্ছিন্না ভবন্তি, তথা বক্ষ্যামীতি যোজনা||৩৮||
Adhikarana 23 (39) · Śloka 39
সৌম্যাঃ খল্বাপোঽন্তরিক্ষপ্রভবাঃ প্রকৃতিশীতা লঘ্ব্যশ্চাব্যক্তরসাশ্চ, তাস্ত্বন্তরিক্ষাদ্ভ্রশ্যমানা ভ্রষ্টাশ্চ পঞ্চমহাভূতগুণসমন্বিতা জঙ্গমস্থাবরাণাং ভূতানাং মূর্তীরভিপ্রীণযন্তি, তাসু মূর্তিষু ষডভিমূর্চ্ছন্তি রসাঃ||৩৯||
सौम्याः खल्वापोऽन्तरिक्षप्रभवाः प्रकृतिशीता लघ्व्यश्चाव्यक्तरसाश्च, तास्त्वन्तरिक्षाद्भ्रश्यमाना भ्रष्टाश्च पञ्चमहाभूतगुणसमन्विता जङ्गमस्थावराणां भूतानां मूर्तीरभिप्रीणयन्ति, तासु मूर्तिषु षडभिमूर्च्छन्ति रसाः||३९||
🔊 Audio coming soon
সম্প্রতি রসানামাদিকারণমেব তাবদাহ- সৌম্যা ইত্যাদি| সৌম্যাঃ সোমদেবতাকাঃ| ভ্রশ্যমানা ইতি বদতা ভূমিসম্বন্ধব্যতিরেকেণান্তরীক্ষেরিতৈঃ পৃথিব্যাদিপরমাণ্বাদিভিঃ সম্বন্ধো রসারম্ভকো ভবতীতি দর্শ্যতে| মূর্তীরিতি ব্যক্তীঃ| অভিপ্রীণযন্তীতি তর্পযন্তি, কিংবা জনযন্তি| অভিমূর্চ্ছন্তি রসা ইতি ব্যক্তিং যান্তি| অত্র চান্তরীক্ষমুদকং রসকারণত্বে প্রধানত্বাদুক্তং, তেন ক্ষিতিস্থমপি স্থাবরজঙ্গমোত্পত্তৌ রসকারণং ভবত্যেব||৩৯||
Adhikarana 24 (40) · Śloka 40
তেষাং ষণ্ণাং রসানাং সোমগুণাতিরেকান্মধুরো রসঃ, পৃথিব্যগ্নিভূযিষ্ঠত্বাদম্লঃ, সলিলাগ্নিভূযিষ্ঠত্বাল্লবণঃ, বায্বগ্নিভূযিষ্ঠত্বাত্ কটুকঃ, বায্বাকাশাতিরিক্তত্বাত্তিক্তঃ, পবনপৃথিবীব্যতিরেকাত্ কষায ইতি| এবমেষাং রসানাং ষট্ত্বমুপপন্নং ন্যূনাতিরেকবিশেষান্মহাভূতানাং ভূতানামিব স্থাবরজঙ্গমানাং নানাবর্ণাকৃতিবিশেষাঃ; ষডৃতুকত্বাচ্চ কালস্যোপপন্নো মহাভূতানাং ন্যূনাতিরেকবিশেষঃ||৪০||
तेषां षण्णां रसानां सोमगुणातिरेकान्मधुरो रसः, पृथिव्यग्निभूयिष्ठत्वादम्लः, सलिलाग्निभूयिष्ठत्वाल्लवणः, वाय्वग्निभूयिष्ठत्वात् कटुकः, वाय्वाकाशातिरिक्तत्वात्तिक्तः, पवनपृथिवीव्यतिरेकात् कषाय इति| एवमेषां रसानां षट्त्वमुपपन्नं न्यूनातिरेकविशेषान्महाभूतानां भूतानामिव स्थावरजङ्गमानां नानावर्णाकृतिविशेषाः; षडृतुकत्वाच्च कालस्योपपन्नो महाभूतानां न्यूनातिरेकविशेषः||४०||
🔊 Audio coming soon
সোমগুণাতিরেকাদিতি অতিরেকশব্দেন সর্বেষ্বেব রসেষু সর্বভূতসান্নিধ্যমস্তি, ক্বচিত্তু কস্যচিদ্ভূতগুণস্যাতিরেকাদ্রসবিশেষো ভবতীতি দর্শযতি; এতচ্চ মধুরং প্রতি অব্গুণাতিরিক্তত্বং বিশেষোত্পত্তৌ কারণত্বেন জ্ঞেযং; যচ্চাধারকারণত্বমপাং, তত্ সর্বসাধারণম্| এবং লবণেঽপ্যপাং কারণত্বং জ্ঞেযম্| লবণস্তু সুশ্রুতে পৃথিব্যগ্ন্যতিরেকাত্ পঠিতঃ, অস্মিংশ্চ বিরোধে কার্যবিরোধো নাস্ত্যেব| ননু, উষ্ণশীতাভ্যামগ্নিসলিলাভ্যাং কৃতস্য লবণস্যাপ্যুষ্ণশীতত্বেন ভবিতব্যং, তল্লবণং কথমুষ্ণং ভবতি? নৈবং, যতো ভূতানামযং স্বভাবঃ- যত্- কেনচিত্ প্রকারেণ সন্নিবিষ্টাঃ কঞ্চিদ্গুণমারভন্তে, ন সর্বম্| যথা- মকুষ্ঠকেঽদ্ভির্মধুরো রসঃ ক্রিযতে, ন স্নেহঃ; তথা সৈন্ধবে বহ্নিনাঽপি নোষ্ণত্বমারভ্যতে| অযং চ ভূতানাং সন্নিবেশোঽদৃষ্টপ্রভাবকৃত এব, স চ সন্নিবেশঃ কার্যদর্শনেনোন্নেযঃ| তেন যত্র কার্যং দৃশ্যতে তত্র কল্প্যতে, যথা- লবণে উষ্ণত্বাদগ্নির্বিষ্যন্দিত্বাচ্চ জলমনুমীযতে| আগমবেদনীযশ্চাযমর্থো নাত্রাস্মদ্বিধানাং কল্পনাঃ প্রসরন্তি| এতেন যদুচ্যতে- তোযবত্ পৃথিব্যাদযোঽপি কিমিতি পৃথগ্রসান্তরং ন কুর্বন্তি, তথা তোযবাতাদিসংযোগাদিভ্যঃ কিমিতি রসান্তরাণি নোত্পদ্যন্ত ইতি, তদপি ভূতস্বভাবাপর্যনুযোগাদেব প্রত্যুক্তম্| ইহ চ কারণত্বং ভূতানাং রসস্য মধুরত্বাদিবিশেষ এব নিমিত্তকারণরূপমুচ্যতে, তেন নীরসানামপি হি দহনাদীনাং কারণত্বমুপপন্নমেব ব্যুত্পাদিতম্| রসভেদং দৃষ্টান্তেন সাধযন্নাহ- এবমিত্যাদি| রসানাং ষট্ত্বং মহাভূতানাং ন্যূনাতিরেকবিশেষাত্ সোমগুণাতিরেকপৃথিব্যগ্ন্যতিরেকাদেঃ ষডুত্পাদকারণাদুপপন্নং, ষড্ভ্যঃ কারণেভ্যঃ ষট্ কার্যাণি ভবন্তীতি যুক্তমেবেতি ভাবঃ| ভূতানাং যথা নানাবর্ণাকৃতিবিশেষা মহাভূতানাং ন্যূনাতিরেকবিশেষাত্, তথা রসানামপীতি| ভূতানাং যথোক্তানামতিরেকবিশেষহেতুমাহ- ষডৃতুকত্বাদিত্যাদি| ষডৃতুকত্বেন কালো নানাহেমন্তাদিরূপতযা কঞ্চিদ্ভূতবিশেষং ক্বচিদ্বর্ধযতি, স চাত্মকার্যং রসং পুষ্টং করোতি, যথা- হেমন্তকালে সোমগুণাতিরেকো ভবতি, শিশিরে বায্বাকাশাতিরেকঃ, এবং তস্যাশিতীযোক্তরসোত্পাদক্রমেণ বসন্তাদাবপি ভূতোত্কর্ষো জ্ঞেযঃ; ষডৃতুকাচ্চেতি চকারেণাহোরাত্রকৃতোঽপি ভূতোত্কর্ষো জ্ঞেযঃ, তথাঽদৃষ্টকৃতশ্চ; তেন হেমন্তাদাবপি রসান্তরোত্পাদঃ ক্বচিদ্বস্তুন্যুপপন্নো ভবতি| যদ্যপি চ, ঋতুভেদেঽপি ভূতোত্কর্ষবিশেষ এব কারণং, যদুক্তং- “তাবেতাবর্কবাযূ” (সূ. ৬) ইত্যাদি, তথাঽপি বীজাঙ্কুরকার্যকারণভাববত্ সংসারানাদিতযৈব ভূতবিশেষর্ত্বোঃ কার্যকারণভাবো বাচ্যঃ||৪০||
Adhikarana 25 (41) · Śloka 41
তত্রাগ্নিমারুতাত্মকা রসাঃ প্রাযেণোর্ধ্বভাজঃ, লাঘবাদুত্প্লবনত্বাচ্চ বাযোরূর্ধ্বজ্বলনত্বাচ্চ বহ্নেঃ; সলিলপৃথিব্যাত্মকাস্তু প্রাযেণাধোভাজঃ, পৃথিব্যা গুরুত্বান্নিম্নগত্বাচ্চোদকস্য; ব্যামিশ্রাত্মকাঃ পুনরুভযতোভাজঃ||৪১||
तत्राग्निमारुतात्मका रसाः प्रायेणोर्ध्वभाजः, लाघवादुत्प्लवनत्वाच्च वायोरूर्ध्वज्वलनत्वाच्च वह्नेः; सलिलपृथिव्यात्मकास्तु प्रायेणाधोभाजः, पृथिव्या गुरुत्वान्निम्नगत्वाच्चोदकस्य; व्यामिश्रात्मकाः पुनरुभयतोभाजः||४१||
🔊 Audio coming soon
ভূতবিশেষকৃতং রসানাং ধর্মান্তরমাহ- তত্রেত্যাদি| প্রাযেণেতি ন সর্বে| রসা ইতি রসযুক্তানি দ্রব্যাণি| প্লবনত্বাদিতি গতিমত্ত্বাত্; যদ্যপি গতিরধোঽপি স্যাত্, তথাঽপি লঘুত্বপরিগতগতিরিহ বাযোরূর্ধ্বমেব গমনং করোতি, যথা- শাল্মলীতুলানাম্| হেত্বন্তরমাহ- ঊর্ধ্বজ্বলনত্বাচ্চাগ্নেরিতি; অগ্নেরপ্যূর্ধ্বগতিত্বাদিত্যর্থঃ| নিম্নগত্বমধোগত্বমেব||৪১||
Adhikarana 26 (42) · Śloka 42
তেষাং ষণ্ণাং রসানামেকৈকস্য যথাদ্রব্যং গুণকর্মাণ্যনুব্যাখ্যাস্যামঃ||৪২||
तेषां षण्णां रसानामेकैकस्य यथाद्रव्यं गुणकर्माण्यनुव्याख्यास्यामः||४२||
🔊 Audio coming soon
যথাদ্রব্যমিতি যদ্যস্য রসস্য দ্রব্যমাধারস্তদনতিক্রমেণ| এতেন রসানাং গুণকর্মণী রসাধারে দ্রব্যে বোদ্ধব্যে ইতি দর্শযতি||৪২||
Adhikarana 27 (43) · Śloka 43
তত্র, মধুরো রসঃ শরীরসাত্ম্যাদ্রসরুধিরমাংসমেদোস্থিমজ্জৌজঃশুক্রাভিবর্ধন আযুষ্যঃ ষডিন্দ্রিযপ্রসাদনো বলবর্ণকরঃ পিত্তবিষমারুতঘ্নস্তৃষ্ণাদাহপ্রশমনস্ত্বচ্যঃ কেশ্যঃ কণ্ঠ্যো বল্যঃ প্রীণনো জীবনস্তর্পণো বৃংহণঃ স্থৈর্যকরঃ ক্ষীণক্ষতসন্ধানকরো ঘ্রাণমুখকণ্ঠৌষ্ঠজিহ্বাপ্রহ্লাদনো দাহমূর্চ্ছাপ্রশমনঃ ষট্পদপিপীলিকানামিষ্টতমঃ স্নিগ্ধঃ শীতো গুরুশ্চ| স এবঙ্গুণোঽপ্যেক এবাত্যর্থমুপযুজ্যমানঃ স্থৌল্যং মার্দবমালস্যমতিস্বপ্নং গৌরবমনন্নাভিলাষমগ্নের্দৌর্বল্যমাস্যকণ্ঠযোর্মাংসাভিবৃদ্ধিং শ্বাসকাসপ্রতিশ্যাযালসকশীতজ্বরানাহাস্যমাধুর্যবমথুসঞ্জ্ঞাস্বরপ্রণাশগলগণ্ডগণ্ডমালাশ্লীপদ- গলশোফবস্তিধমনীগলোপলেপাক্ষ্যামযাভিষ্যন্দানিত্যেবম্প্রভৃতীন্ কফজান্ বিকারানুপজনযতি (১)|৪৩|
तत्र, मधुरो रसः शरीरसात्म्याद्रसरुधिरमांसमेदोस्थिमज्जौजःशुक्राभिवर्धन आयुष्यः षडिन्द्रियप्रसादनो बलवर्णकरः पित्तविषमारुतघ्नस्तृष्णादाहप्रशमनस्त्वच्यः केश्यः कण्ठ्यो बल्यः प्रीणनो जीवनस्तर्पणो बृंहणः स्थैर्यकरः क्षीणक्षतसन्धानकरो घ्राणमुखकण्ठौष्ठजिह्वाप्रह्लादनो दाहमूर्च्छाप्रशमनः षट्पदपिपीलिकानामिष्टतमः स्निग्धः शीतो गुरुश्च| स एवङ्गुणोऽप्येक एवात्यर्थमुपयुज्यमानः स्थौल्यं मार्दवमालस्यमतिस्वप्नं गौरवमनन्नाभिलाषमग्नेर्दौर्बल्यमास्यकण्ठयोर्मांसाभिवृद्धिं श्वासकासप्रतिश्यायालसकशीतज्वरानाहास्यमाधुर्यवमथुसञ्ज्ञास्वरप्रणाशगलगण्डगण्डमालाश्लीपद- गलशोफबस्तिधमनीगलोपलेपाक्ष्यामयाभिष्यन्दानित्येवम्प्रभृतीन् कफजान् विकारानुपजनयति (१)|४३|
🔊 Audio coming soon
তত্রেত্যাদি| মধুর আদাবুচ্যতে প্রশস্তাযুষ্যাদিগুণতযা প্রাযঃ প্রাণিপ্রিযতযা চ| ষডিন্দ্রিযাণি মনসা সমম্| জীবনঃ অভিঘাতাদিমূর্চ্ছিতস্য জীবনঃ| আযুষ্যস্তু আযুঃপ্রকর্ষকারিত্বেন| ক্ষীণস্য সন্ধানকরো ধাতুপোষকত্বেন; কিংবা ক্ষীণশ্চাসৌ ক্ষতশ্চেতি, তেন ক্ষীণক্ষতস্য উরঃক্ষতং সন্দধাতি| ষট্পদাদ্যভীষ্টত্বগুণকথনং প্রমেহপূর্বরূপাদিজ্ঞানোপযুক্তম্ | যদুক্তং- “মূত্রেঽভিধাবন্তি পিপীলিকাশ্চ” (চি. ৬) ইতি, তথা রিষ্টে বক্ষ্যতি- “যস্মিন্ গৃধ্নন্তি মক্ষিকাঃ” (ই. ৫) ইতি, অনেন চ মধুরত্বং জ্ঞাযতে| অক্ষ্যামযেনৈবাভিষ্যন্দে লব্ধে বিশেষোপাদানার্থং পুনর্বচনং; কিংবা অভিষ্যন্দো নাসাদিষ্বপি জ্ঞেযঃ (১)||৪৩||
Adhikarana 28 (43) · Śloka 43
অম্লো রসো ভক্তং রোচযতি, অগ্নিং দীপযতি, দেহং বৃংহযতি ঊর্জযতি, মনো বোধযতি, ইন্দ্রিযাণি দৃঢীকরোতি, বলং বর্ধযতি, বাতমনুলোমযতি, হৃদযং তর্পযতি, আস্যমাস্রাবযতি, ভুক্তমপকর্ষযতি ক্লেদযতি জরযতি, প্রীণযতি, লঘুরুষ্ণঃ স্নিগ্ধশ্চ| স এবঙ্গুণোঽপ্যেক এবাত্যর্থমুপযুজ্যমানো দন্তান্ হর্ষযতি, তর্ষযতি, সম্মীলযত্যক্ষিণী, সংবেজযতি লোমানি, কফং বিলাপযতি, পিত্তমভিবর্ধযতি, রক্তং দূষযতি,মাংসং বিদহতি, কাযং শিথিলীকরোতি, ক্ষীণক্ষতকৃশদুর্বলানাং শ্বযথুমাপাদযতি, অপি চ ক্ষতাভিহতদষ্টদগ্ধভগ্নশূনপ্রচ্যুতাবমূত্রিতপরিসর্পিতমর্দিতচ্ছিন্নভিন্নবিশ্লিষ্টোদ্বিদ্ধোত্পিষ্টাদীনি পাচযত্যাগ্নেযস্বভাবাত্, পরিদহতি কণ্ঠমুরো হৃদযং চ (২)|৪৩|
अम्लो रसो भक्तं रोचयति, अग्निं दीपयति, देहं बृंहयति ऊर्जयति, मनो बोधयति, इन्द्रियाणि दृढीकरोति, बलं वर्धयति, वातमनुलोमयति, हृदयं तर्पयति, आस्यमास्रावयति, भुक्तमपकर्षयति क्लेदयति जरयति, प्रीणयति, लघुरुष्णः स्निग्धश्च| स एवङ्गुणोऽप्येक एवात्यर्थमुपयुज्यमानो दन्तान् हर्षयति, तर्षयति, सम्मीलयत्यक्षिणी, संवेजयति लोमानि, कफं विलापयति, पित्तमभिवर्धयति, रक्तं दूषयति,मांसं विदहति, कायं शिथिलीकरोति, क्षीणक्षतकृशदुर्बलानां श्वयथुमापादयति, अपि च क्षताभिहतदष्टदग्धभग्नशूनप्रच्युतावमूत्रितपरिसर्पितमर्दितच्छिन्नभिन्नविश्लिष्टोद्विद्धोत्पिष्टादीनि पाचयत्याग्नेयस्वभावात्, परिदहति कण्ठमुरो हृदयं च (२)|४३|
🔊 Audio coming soon
হৃদযং তর্পযতীতি হৃদ্যো ভবতি| ভুক্তমপকর্ষযতীতি সারযতি; ক্লেদযতি তথা জরযতি ভুক্তমেব| অবমূত্রিতং মূত্রবিষৈর্জন্তুভিঃ, পরিসর্পিতং চ স্পর্শবিশেষৈঃ কারণ্ডাদিভিঃ (২)||৪৩||
Adhikarana 29 (43) · Śloka 43
লবণো রসঃ পাচনঃ ক্লেদনো দীপনশ্চ্যাবনশ্ছেদনো ভেদনস্তীক্ষ্ণঃ সরো বিকাস্যধঃস্রংস্যবকাশকরো বাতহরঃ স্তম্ভবন্ধসঙ্ঘাতবিধমনঃ সর্বরসপ্রত্যনীকভূতঃ, আস্যমাস্রাবযতি, কফং বিষ্যন্দযতি, মার্গান্ বিশোধযতি, সর্বশরীরাবযবান্ মৃদূকরোতি, রোচযত্যাহারম্, আহারযোগী, নাত্যর্থং গুরুঃ স্নিগ্ধ উষ্ণশ্চ| স এবঙ্গুণোঽপ্যেক এবাত্যর্থমুপযুজ্যমানঃ পিত্তং কোপযতি, রক্তং বর্ধযতি, তর্ষযতি, মূর্চ্ছযতি , তাপযতি, দারযতি, কুষ্ণাতি মাংসানি, প্রগালযতি কুষ্ঠানি, বিষং বর্ধযতি, শোফান্ স্ফোটযতি, দন্তাংশ্চ্যাবযতি, পুংস্ত্বমুপহন্তি, ইন্দ্রিযাণ্যুপরুণদ্ভি, বলিপলিতখালিত্যমাপাদযতি, অপি চ লোহিতপিত্তাম্লপিত্তবিসর্পবাতরক্তবিচর্চিকেন্দ্রলুপ্তপ্রভৃতীন্বিকারানুপজনযতি (৩)|৪৩|
लवणो रसः पाचनः क्लेदनो दीपनश्च्यावनश्छेदनो भेदनस्तीक्ष्णः सरो विकास्यधःस्रंस्यवकाशकरो वातहरः स्तम्भबन्धसङ्घातविधमनः सर्वरसप्रत्यनीकभूतः, आस्यमास्रावयति, कफं विष्यन्दयति, मार्गान् विशोधयति, सर्वशरीरावयवान् मृदूकरोति, रोचयत्याहारम्, आहारयोगी, नात्यर्थं गुरुः स्निग्ध उष्णश्च| स एवङ्गुणोऽप्येक एवात्यर्थमुपयुज्यमानः पित्तं कोपयति, रक्तं वर्धयति, तर्षयति, मूर्च्छयति , तापयति, दारयति, कुष्णाति मांसानि, प्रगालयति कुष्ठानि, विषं वर्धयति, शोफान् स्फोटयति, दन्तांश्च्यावयति, पुंस्त्वमुपहन्ति, इन्द्रियाण्युपरुणद्भि, वलिपलितखालित्यमापादयति, अपि च लोहितपित्ताम्लपित्तविसर्पवातरक्तविचर्चिकेन्द्रलुप्तप्रभृतीन्विकारानुपजनयति (३)|४३|
🔊 Audio coming soon
বিকাসী ক্লেদচ্ছেদনঃ | অধঃস্রংসী বিষ্যন্দনশীলঃ| সর্বরসপ্রত্যনীকভূত ইতি যত্র মাত্রাতিরিক্তো লবণো ভবতি তত্র নান্যো রস উপলক্ষ্যতে| আহারযোগীতি আহারে সদা যুজ্যতে| মোহযতি বৈচিত্যং কুরুতে| মূর্চ্ছযতীতি সঞ্জ্ঞানাশং করোতি (৩)||৪৩||
Adhikarana 30 (43) · Śloka 43
কটুকো রসো বক্ত্রং শোধযতি, অগ্নিং দীপযতি, ভুক্তং শোষযতি, ঘ্রাণমাস্রাবযতি, চক্ষুর্বিরেচযতি, স্ফুটীকরোতীন্দ্রিযাণি, অলসকশ্বযথূপচযোদর্দাভিষ্যন্দস্নেহস্বেদক্লেদমলানুপহন্তি, রোচযত্যশনং, কণ্ডূর্বিনাশযতি , ব্রণানবসাদযতি, ক্রিমীন্ হিনস্তি, মাংসং বিলিখতি, শোণিতসঙ্ঘাতং ভিনত্তি, বন্ধাংশ্ছিনত্তি, মার্গান্ বিবৃণোতি, শ্লেষ্মাণং শমযতি, লঘুরুষ্ণো রূক্ষশ্চ| স এবঙ্গুণোঽপ্যেক এবাত্যর্থমুপযুজ্যমানো বিপাকপ্রভাবাত্ পুংস্ত্বমুপহন্তি, রসবীর্যপ্রভাবান্মোহযন্তি, গ্লাপযতি, সাদযতি, কর্শযতি, মূর্চ্ছযতি, নমযতি, তমযতি, ভ্রমযতি, কণ্ঠং পরিদহতি, শরীরতাপমুপজনযতি, বলং ক্ষিণোতি, তৃষ্ণাং জনযতি; অপি চ বায্বগ্নিগুণবাহুল্যাদ্ভ্রমদবথুকম্পতোদভেদৈশ্চরণভুজপার্শ্বপৃষ্ঠপ্রভৃতিষু মারুতজান্ বিকারানুপজনযতি (৪); তিক্তো রসঃ স্বযমরোচিষ্ণুরপ্যরোচকঘ্নো বিষঘ্নঃ ক্রিমিঘ্নো মূর্চ্ছাদাহকণ্ডূকুষ্ঠতৃষ্ণাপ্রশমনস্ত্বঙ্মাংসযোঃ স্থিরীকরণো জ্বরঘ্নো দীপনঃ পাচনঃ স্তন্যশোধনো লেখনঃ ক্লেদমেদোবসামজ্জলসীকাপূযস্বেদমূত্রপুরীষপিত্তশ্লেষ্মোপশোষণো রূক্ষঃ শীতো লঘুশ্চ| স এবঙ্গুণোঽপ্যেক এবাত্যর্থমুপযুজ্যমানো রৌক্ষ্যাত্খরবিষদস্বভাবাচ্চ রসরুধিরমাংসমেদোস্থিমজ্জশুক্রাণ্যুচ্ছোষযতি, স্রোতসাং খরত্বমুপপাদযতি, বলমাদত্তে, কর্শযতি, গ্লপযতি, মোহযতি, ভ্রমযতি, বদনমুপশোষযতি, অপরাংশ্চ বাতবিকারানুপজনযতি (৫); কষাযো রসঃ সংশমনঃ সঙ্গ্রাহী সন্ধানকরঃ পীডনো রোপণঃ শোষণঃ স্তম্ভনঃ শ্লেষ্মরক্তপিত্তপ্রশমনঃ শরীরক্লেদস্যোপযোক্তা রূক্ষঃ শীতোঽলঘুশ্চ| স এবঙ্গুণোঽপ্যেক এবাত্যর্থমুপযুজ্যমান আস্যং শোষযতি, হৃদযং পীডযতি, উদরমাধ্মাপযতি, বাচং নিগৃহ্ণাতি, স্রোতাংস্যববধ্নাতি, শ্যাবত্বমাপাদযতি, পুংস্ত্বমুপহন্তি, বিষ্টভ্য জরাং গচ্ছতি, বাতমূত্রপুরীষরেতাংস্যবগৃহ্ণাতি, কর্শযতি, গ্লপযতি, তর্ষযতি, স্তম্ভযতি, খরবিশদরূক্ষত্বাত্ পক্ষবধগ্রহাপতানকার্দিতপ্রভৃতীংশ্চ বাতবিকারানুপজনযতি||৪৩||
कटुको रसो वक्त्रं शोधयति, अग्निं दीपयति, भुक्तं शोषयति, घ्राणमास्रावयति, चक्षुर्विरेचयति, स्फुटीकरोतीन्द्रियाणि, अलसकश्वयथूपचयोदर्दाभिष्यन्दस्नेहस्वेदक्लेदमलानुपहन्ति, रोचयत्यशनं, कण्डूर्विनाशयति , व्रणानवसादयति, क्रिमीन् हिनस्ति, मांसं विलिखति, शोणितसङ्घातं भिनत्ति, बन्धांश्छिनत्ति, मार्गान् विवृणोति, श्लेष्माणं शमयति, लघुरुष्णो रूक्षश्च| स एवङ्गुणोऽप्येक एवात्यर्थमुपयुज्यमानो विपाकप्रभावात् पुंस्त्वमुपहन्ति, रसवीर्यप्रभावान्मोहयन्ति, ग्लापयति, सादयति, कर्शयति, मूर्च्छयति, नमयति, तमयति, भ्रमयति, कण्ठं परिदहति, शरीरतापमुपजनयति, बलं क्षिणोति, तृष्णां जनयति; अपि च वाय्वग्निगुणबाहुल्याद्भ्रमदवथुकम्पतोदभेदैश्चरणभुजपार्श्वपृष्ठप्रभृतिषु मारुतजान् विकारानुपजनयति (४); तिक्तो रसः स्वयमरोचिष्णुरप्यरोचकघ्नो विषघ्नः क्रिमिघ्नो मूर्च्छादाहकण्डूकुष्ठतृष्णाप्रशमनस्त्वङ्मांसयोः स्थिरीकरणो ज्वरघ्नो दीपनः पाचनः स्तन्यशोधनो लेखनः क्लेदमेदोवसामज्जलसीकापूयस्वेदमूत्रपुरीषपित्तश्लेष्मोपशोषणो रूक्षः शीतो लघुश्च| स एवङ्गुणोऽप्येक एवात्यर्थमुपयुज्यमानो रौक्ष्यात्खरविषदस्वभावाच्च रसरुधिरमांसमेदोस्थिमज्जशुक्राण्युच्छोषयति, स्रोतसां खरत्वमुपपादयति, बलमादत्ते, कर्शयति, ग्लपयति, मोहयति, भ्रमयति, वदनमुपशोषयति, अपरांश्च वातविकारानुपजनयति (५); कषायो रसः संशमनः सङ्ग्राही सन्धानकरः पीडनो रोपणः शोषणः स्तम्भनः श्लेष्मरक्तपित्तप्रशमनः शरीरक्लेदस्योपयोक्ता रूक्षः शीतोऽलघुश्च| स एवङ्गुणोऽप्येक एवात्यर्थमुपयुज्यमान आस्यं शोषयति, हृदयं पीडयति, उदरमाध्मापयति, वाचं निगृह्णाति, स्रोतांस्यवबध्नाति, श्यावत्वमापादयति, पुंस्त्वमुपहन्ति, विष्टभ्य जरां गच्छति, वातमूत्रपुरीषरेतांस्यवगृह्णाति, कर्शयति, ग्लपयति, तर्षयति, स्तम्भयति, खरविशदरूक्षत्वात् पक्षवधग्रहापतानकार्दितप्रभृतींश्च वातविकारानुपजनयति||४३||
🔊 Audio coming soon
বিপাকস্য প্রভাবো বিপাকপ্রভাবঃ, বিপাকশ্চ কটূনাং কটুরেব; রসস্য বীর্যস্য চ প্রভাবো রসবীর্যপ্রভাবঃ; অযং চ বক্ষ্যমাণে সর্বত্র হেতুঃ| চরণাদীনাং সাক্ষাদ্গ্রহণং তত্রৈব প্রাযো বাতবিকারভাবাত্| অত্র চ বিপাকপ্রভাবাদিকথনমুদাহরণার্থং, তেন মধুরাদিষু বিপাকাদিকার্যমুন্নেযম্| গ্লপযতি হর্ষক্ষযং করোতি| পীডনো ব্রণপীডনঃ| শরীরক্লেদস্যোপযোক্তেতি আচূষকঃ| ‘শীতোঽলঘুশ্চ’ ইত্যকারপ্রশ্লেষাদলঘুঃ | অবগৃহ্ণাতীতি বদ্ধানি করোতি ||৪৩||
Adhikarana 31 (44) · Śloka 44
ইত্যেবমেতে ষড্রসাঃ পৃথক্ত্বেনৈকত্বেন বা মাত্রশঃ সম্যগুপযুজ্যমানা উপকারায ভবন্ত্যধ্যাত্মলোকস্য, অপকারকরাঃ পুনরতোঽন্যথা ভবন্ত্যুপযুজ্যমানাঃ; তান্ বিদ্বানুপকারার্থমেব মাত্রশঃ সম্যগুপযোজযেদিতি||৪৪||
इत्येवमेते षड्रसाः पृथक्त्वेनैकत्वेन वा मात्रशः सम्यगुपयुज्यमाना उपकाराय भवन्त्यध्यात्मलोकस्य, अपकारकराः पुनरतोऽन्यथा भवन्त्युपयुज्यमानाः; तान् विद्वानुपकारार्थमेव मात्रशः सम्यगुपयोजयेदिति||४४||
🔊 Audio coming soon
পৃথক্ত্বেনেতি একৈকশো মাত্রশঃ| একত্বেনেতি একীকৃত্য সমুদাযমাত্রশ ইত্যর্থঃ| মাত্রশ ইতি মাত্রযা| তচ্চৈকীকরণং দ্বিত্র্যাদিভিঃ সর্বৈর্জ্ঞেযম্| অধ্যাত্মলোকস্যেতি সর্বপ্রাণিজনস্য| অন্যথেতি অমাত্রযা||৪৪||
Adhikarana 32 (45) · Śloka 45
ভবন্তি চাত্র- শীতং বীর্যেণ যদ্দ্রব্যং মধুরং রসপাকযোঃ| তযোরম্লং যদুষ্ণং চ যদ্দ্রব্যং কটুকং তযোঃ||৪৫||
भवन्ति चात्र- शीतं वीर्येण यद्द्रव्यं मधुरं रसपाकयोः| तयोरम्लं यदुष्णं च यद्द्रव्यं कटुकं तयोः||४५||
🔊 Audio coming soon
সম্প্রতি রসদ্বারেণৈব দ্রব্যাণাং বীর্যমাহ- শীতমিত্যাদি | যদ্দ্রব্যং রসে পাকে চ মধুরং তচ্ছীতং বীর্যেণ জ্ঞেযং; তথা তযোরিতি রসপাকযোর্যদম্লং দ্রব্যং তদুষ্ণং বীর্যেণ; তথা যচ্চ দ্রব্যং তযোরিতি রসপাকযোঃ কটুকমুক্তং তচ্চোষ্ণং বীর্যেণ, ‘ভবতি’ ইতি শেষঃ| কিংবা ‘যচ্চোষ্ণং কটুকং তযোঃ’ ইতি পাঠঃ| তত্র যদ্রসতো মধুরং তদ্বীর্যতঃ শীতমিতি বক্তব্যে যদ্রসপাকযোরিতি করোতি, তন্মধুররসোচিতপাকস্যৈব মধুরদ্রব্যস্য শীতবীর্যতাপ্রাপ্ত্যর্থম্; এবমম্লকটুকযোরপি বাচ্যম্||৪৫||
Adhikarana 33 (46-47) · Śloka 47
তেষাং রসোপদেশেন নির্দেশ্যো গুণসঙ্গ্রহঃ| বীর্যতোঽবিপরীতানাং পাকতশ্চোপদেক্ষ্যতে||৪৬|| যথা পযো যথা সর্পির্যথা বা চব্যচিত্রকৌ| এবমাদীনি চান্যানি নির্দিশেদ্রসতো ভিষক্||৪৭||
तेषां रसोपदेशेन निर्देश्यो गुणसङ्ग्रहः| वीर्यतोऽविपरीतानां पाकतश्चोपदेक्ष्यते||४६|| यथा पयो यथा सर्पिर्यथा वा चव्यचित्रकौ| एवमादीनि चान्यानि निर्दिशेद्रसतो भिषक्||४७||
🔊 Audio coming soon
তেষামিতি মধুরপাকাদীনাং, রসোপদেশেনেতি রসমাত্রকথনেনৈব, যতো বিপাকোঽপি রসত এব প্রাযো জ্ঞাযতে; যদ্বক্ষ্যতি- ‘কটুতিক্তকষাযাণাং বিপাকঃ প্রাযশঃ কটুঃ’ ইত্যাদি| এতচ্চ ন সর্বত্রেত্যাহ- বীর্যত ইত্যাদি| বীর্যতোঽবিপরীতানাং রসদ্বারা বীর্যজ্ঞানং, ন তু রসবিরুদ্ধবীর্যাণাং মহাপঞ্চমূলাদীনাং; ন কেবলং রসেন কিন্তর্হি পাকতশ্চ য উপদেক্ষ্যতে গুণসঙ্গ্রহঃ ‘শুক্রহা বদ্ধবিণ্মূত্রো বিপাকো বাতলঃ কটুঃ’ ইত্যাদিনা, স চ বীর্যতোঽবিরুদ্ধানাং বিজ্ঞেযঃ; যদি তত্র বীর্যং বিরোধি ভবতি তদা বিপাকোঽপি যথোক্তগুণকারী ন স্যাত্| কিংবা, পাকতশ্চাবিপরীতানাং রসোপদেশেন গুণসঙ্গ্রহঃ শীতোষ্ণলক্ষণো নির্দেশ্যঃ, যস্যাস্তু পিপ্পল্যাঃ কটুকাযা অপি বিপরীতমধুরপাকিত্বং, ন তত্র কটুরসত্বেনোষ্ণত্বমিত্যর্থঃ| অস্মিংশ্চ পক্ষে ‘উপদেক্ষ্যতে’ ইতি ‘যথা পযঃ’ ইত্যাদিনা সম্বধ্যতে| তান্যেবাবিপরীতবীর্যবিপাকান্যাহ- যথা পয ইত্যাদি| পযঃপ্রভৃতীনি হি দ্রব্যগুণকথনেঽবিরুদ্ধবীর্যবিপাকান্যুপদেষ্টব্যানি||৪৬-৪৭||
Adhikarana 34 (48-49) · Śloka 49
মধুরং কিঞ্চিদুষ্ণং স্যাত্ কষাযং তিক্তমেব চ| যথা মহত্পঞ্চমূলং যথাঽব্জানূপমামিষম্||৪৮|| লবণং সৈন্ধবং নোষ্ণমম্লমামলকং তথা| অর্কাগুরুগুডূচীনাং তিক্তানামুষ্ণমুচ্যতে||৪৯||
मधुरं किञ्चिदुष्णं स्यात् कषायं तिक्तमेव च| यथा महत्पञ्चमूलं यथाऽब्जानूपमामिषम्||४८|| लवणं सैन्धवं नोष्णमम्लमामलकं तथा| अर्कागुरुगुडूचीनां तिक्तानामुष्णमुच्यते||४९||
🔊 Audio coming soon
সম্প্রতি যত্র বিরুদ্ধবীর্যত্বেন রসেনোষ্ণত্বাদি ন নির্দেশ্যং তদাহ- মধুরমিত্যাদি| কিঞ্চিত্ কষাযং চোষ্ণং তিক্তং চোষ্ণমিতি যোজনা, কষাযতিক্তলবণানামুদাহরণমসূত্রিতানামপি প্রকরণাত্ কৃতম্| মহত্পঞ্চমূলং বিল্বাদিপঞ্চমূলমিহ| এতচ্চ তিক্তস্য কষাযস্য চোষ্ণতাযামুদাহরণম্, অব্জানূপামিষং তু মধুরস্যোষ্ণবীর্যত্বে||৪৮-৪৯||
Adhikarana 35 (50-52) · Śloka 52
কিঞ্চিদম্লং হি সঙ্গ্রাহি কিঞ্চিদম্লং ভিনত্তি চ| যথা কপিত্থং সঙ্গ্রাহি ভেদি চামলকং তথা||৫০|| পিপ্পলী নাগরং বৃষ্যং কটু চাবৃষ্যমুচ্যতে| কষাযঃ স্তম্ভনঃ শীতঃ সোঽভযাযামতোঽন্যথা||৫১|| তস্মাদ্রসোপদেশেন ন সর্বং দ্রব্যামাদিশেত্| দৃষ্টং তুল্যরসেঽপ্যেবং দ্রব্যে দ্রব্যে গুণান্তরম্||৫২||
किञ्चिदम्लं हि सङ्ग्राहि किञ्चिदम्लं भिनत्ति च| यथा कपित्थं सङ्ग्राहि भेदि चामलकं तथा||५०|| पिप्पली नागरं वृष्यं कटु चावृष्यमुच्यते| कषायः स्तम्भनः शीतः सोऽभयायामतोऽन्यथा||५१|| तस्माद्रसोपदेशेन न सर्वं द्रव्यामादिशेत्| दृष्टं तुल्यरसेऽप्येवं द्रव्ये द्रव्ये गुणान्तरम्||५२||
🔊 Audio coming soon
বীর্যপ্রসঙ্গাদন্যমপ্যম্লাদীনাং বিরুদ্ধগুণমাহ- কিঞ্চিদিত্যাদি| অভযাযামতোঽন্যথেতি অভযাযাং কষাযো রসো ভেদনশ্চোষ্ণশ্চেত্যর্থঃ||৫০-৫২||
Adhikarana 36 (53-56) · Śloka 57
রৌক্ষ্যাত্ কষাযো রূক্ষাণামুত্তমো মধ্যমঃ কটুঃ| তিক্তোঽবরস্তথোষ্ণানামুষ্ণত্বাল্লবণঃ পরঃ||৫৩|| মধ্যোঽম্লঃ কটুকশ্চান্ত্যঃ স্নিগ্ধানাং মধুরঃ পরঃ| মধ্যোঽম্লো লবণশ্চান্ত্যো রসঃ স্নেহান্নিরুচ্যতে||৫৪|| মধ্যোত্কৃষ্টাবরাঃ শৈত্যাত্ কষাযস্বাদুতিক্তকাঃ | স্বাদুর্গুরুত্বাদধিকঃ কষাযাল্লবণোঽবরঃ||৫৫|| অম্লাত্ কটুস্ততস্তিক্তো লঘুত্বাদুত্তমোত্তমঃ| কেচিল্লঘূনামবরমিচ্ছন্তি লবণং রসম্||৫৬|| গৌরবে লাঘবে চৈব সোঽবরস্তূভযোরপি|৫৭|
रौक्ष्यात् कषायो रूक्षाणामुत्तमो मध्यमः कटुः| तिक्तोऽवरस्तथोष्णानामुष्णत्वाल्लवणः परः||५३|| मध्योऽम्लः कटुकश्चान्त्यः स्निग्धानां मधुरः परः| मध्योऽम्लो लवणश्चान्त्यो रसः स्नेहान्निरुच्यते||५४|| मध्योत्कृष्टावराः शैत्यात् कषायस्वादुतिक्तकाः | स्वादुर्गुरुत्वादधिकः कषायाल्लवणोऽवरः||५५|| अम्लात् कटुस्ततस्तिक्तो लघुत्वादुत्तमोत्तमः| केचिल्लघूनामवरमिच्छन्ति लवणं रसम्||५६|| गौरवे लाघवे चैव सोऽवरस्तूभयोरपि|५७|
🔊 Audio coming soon
রৌক্ষ্যাদিত্যাদি| রৌক্ষ্যেণ কষায উত্তম ইতি রূক্ষতমঃ, তিক্তো রূক্ষঃ, কটুস্তু মধ্যো রূক্ষতরঃ; এবমন্যত্রাপি| কটুকশ্চান্ত্য ইতি অবর ইত্যর্থঃ| এবং লবণশ্চান্ত্য ইতি অবর ইত্যর্থঃ| লবণোঽবর ইতি গুরুত্বেনেত্যর্থঃ| অম্লাত্ কটুরিত্যাদৌ অম্লাত্ কটুর্লঘুঃ, ততঃ কটুকাদুত্তমাত্তিক্তো লঘুত্বেনোত্তমোত্তমঃ; উত্তমাত্ কটুকাদুত্তম উত্তমোত্তমঃ| একীযমতমাহ- কেচিদিত্যাদি| একীযমতং বচনভঙ্গ্যা স্বীকুর্বন্নাহ- গৌরব ইত্যাদি| এতেন, গৌরবে লাঘবে চাবরত্বং লবণস্য স্বীকুর্বন্ গৌরবেঽবর ইত্যনেনাম্লকটুতিক্তেভ্যো গুরুত্বং স্বীকরোতি লবণস্য, লাঘবে চাবর ইত্যনেনাম্লাদপি লঘুনোঽল্পং লাঘবং লবণস্য স্বীকরোতি| ন চ বাচ্যম্- অম্লে পৃথিবী কারণং লবণে তু তোযং, ততঃ পৃথিব্যপেক্ষযা তোযজন্যস্য লবণস্যৈব লাঘবমুচিতমিতি; যতো ন ভূতনিবেশেন গৌরবলাঘবে শক্যেতেঽবধারযিতুং, তথাহি তোযাতিরেককৃতো মধুরঃ পৃথিব্যতিরেককৃতাত্ কষাযাদ্গুরুর্ভবতি||৫৩-৫৬||-
Adhikarana 37 (57-58) · Śloka 58
পরং চাতো বিপাকানাং লক্ষণং সম্প্রবক্ষ্যতে||৫৭|| কটুতিক্তকষাযাণাং বিপাকঃ প্রাযশঃ কটুঃ| অম্লোঽম্লং পচ্যতে স্বাদুর্মধুরং লবণস্তথা||৫৮||
परं चातो विपाकानां लक्षणं सम्प्रवक्ष्यते||५७|| कटुतिक्तकषायाणां विपाकः प्रायशः कटुः| अम्लोऽम्लं पच्यते स्वादुर्मधुरं लवणस्तथा||५८||
🔊 Audio coming soon
সম্প্রতি বিপাকস্যাপি রসরূপত্বাল্লক্ষণমাহ- পরমিত্যাদি| প্রাযোগ্রহণাত্ পিপ্পলীকুলত্থাদীনাং রসাননুগুণপাকিতাং দর্শযতি| কটুকাদিশব্দেন চ তদাধারং দ্রব্যমুচ্যতে, যতো ন রসাঃ পচ্যন্তে কিন্তু দ্রব্যমেব| লবণস্তথেতি লবণোঽপি মধুরবিপাকঃ প্রায ইত্যর্থঃ| বিপাকলক্ষণং তু- জঠরাগ্নিযোগাদাহারস্য নিষ্ঠাকালে যো গুণ উত্পদ্যতে স বিপাকঃ; বচনং হি- “জাঠরেণাগ্নিনা যোগাদ্যদুদেতি রসান্তরম্| আহারপরিণামান্তে স বিপাকঃ প্রকীর্তিতঃ” (বা. সূ. ৯)||৫৭-৫৮||
Adhikarana 38 (59-60) · Śloka 60
মধুরো লবণাম্লৌ চ স্নিগ্ধভাবাত্ত্রযো রসাঃ| বাতমূত্রপুরীষাণাং প্রাযো মোক্ষে সুখা মতাঃ||৫৯|| কটুতিক্তকষাযাস্তু রূক্ষভাবাত্ত্রযো রসাঃ| দুঃখায মোক্ষে দৃশ্যন্তে বাতবিণ্মূত্ররেতসাম্||৬০||
मधुरो लवणाम्लौ च स्निग्धभावात्त्रयो रसाः| वातमूत्रपुरीषाणां प्रायो मोक्षे सुखा मताः||५९|| कटुतिक्तकषायास्तु रूक्षभावात्त्रयो रसाः| दुःखाय मोक्षे दृश्यन्ते वातविण्मूत्ररेतसाम्||६०||
🔊 Audio coming soon
সম্প্রতি বক্ষ্যমাণবিপাকলক্ষণে মধুরাম্লপাকযোর্বাতমূত্রপুরীষানবরোধকত্বে তথা কটোর্বিপাকস্য বাতমূত্রপুরীষবিবন্ধকত্বে হেতুমাহ- মধুর ইত্যাদি| অত্র মধুরাম্ললবণা নিষ্ঠাপাকং গতা অপি সন্তঃ স্নেহগুণযোগাদ্বাতমূত্রপুরীষাণাং বিসর্গং সুখেন কুর্বন্তীতি বাক্যার্থঃ| তেন মধুরাম্লপাকযোরেতত্ সমানং লক্ষণম্| এবং কটুতিক্তকষাযেষ্বপি বিপর্যযেঽপি বাক্যার্থঃ||৫৯-৬০||
Adhikarana 39 (61-62) · Śloka 62
শুক্রহা বদ্ধবিণ্মূত্রো বিপাকো বাতলঃ কটুঃ| মধুরঃ সৃষ্টবিণ্মূত্রো বিপাকঃ কফশুক্রলঃ||৬১|| পিত্তকৃত্ সৃষ্টবিণ্মূত্রঃ পাকোঽম্লঃ শুক্রনাশনঃ| তেষাং গুরুঃ স্যান্মধুরঃ কটুকাম্লাবতোঽন্যথা||৬২||
शुक्रहा बद्धविण्मूत्रो विपाको वातलः कटुः| मधुरः सृष्टविण्मूत्रो विपाकः कफशुक्रलः||६१|| पित्तकृत् सृष्टविण्मूत्रः पाकोऽम्लः शुक्रनाशनः| तेषां गुरुः स्यान्मधुरः कटुकाम्लावतोऽन्यथा||६२||
🔊 Audio coming soon
সম্প্রতি বিপাকলক্ষণং হেতুব্যুত্পাদিতং শুক্রহত্বাদিবিশেষযুক্তং বক্তুমাহ- শুক্রহেত্যাদি| অতোঽন্যথেতি লঘুঃ||৬১-৬২||
Adhikarana 40 (63) · Śloka 63
বিপাকলক্ষণস্যাল্পমধ্যভূযিষ্ঠতাং প্রতি| দ্রব্যাণাং গুণবৈশেষ্যাত্তত্র তত্রোপলক্ষযেত্||৬৩||
विपाकलक्षणस्याल्पमध्यभूयिष्ठतां प्रति| द्रव्याणां गुणवैशेष्यात्तत्र तत्रोपलक्षयेत्||६३||
🔊 Audio coming soon
সম্প্রতি যথোক্তবিপাকলক্ষণানাং দ্রব্যভেদে ক্বচিদল্পত্বং ক্বচিন্মধ্যত্বং ক্বচিচ্চোত্কৃষ্টত্বং যথা ভবতি তদাহ- বিপাকেত্যাদি| বিপাকলক্ষণস্যাল্পমধ্যভূযিষ্ঠতামুপলক্ষযেত্, প্রতি প্রতি দ্রব্যাণাং গুণবৈশেষ্যাদ্ধেতোরিত্যর্থঃ| এতেন, দ্রব্যেষু যদ্গুণবৈশেষ্যং মধুরত্বমধুরতরত্বমধুরতমত্বাদি, ততো হেতোর্বিপাকানামল্পত্বাদযো বিশেষা ভবন্তীত্যুক্তং ভবতি| অত্র কেচিদ্ব্রুবতে- প্রতিরসং পাকো ভবতি, যথা মধুরাদীনাং ষণ্ণাং ষণ্মধুরাদযঃ পাকা ইতি; কেচিদ্ব্রুবতে- বলবতাং রসানামবলবন্তো রসা বশতাং যান্তি, ততশ্চানবস্থিতঃ পাকঃ| তত্রৈতদ্দ্বিতযমপি পাকে ব্যবস্থাঽকরণমনাদৃত্য সুশ্রুতেন দ্বিবিধঃ পাকো মধুরঃ কটুশ্চাঙ্গীকৃতঃ| দ্বৈবিধ্যং চ পঞ্চভূতাত্মকে দ্রব্যে গুরুভূতপৃথিবীতোযাতিরেকান্মধুরঃ পাকো ভবতি, শেষলঘুভূতাতিরেকাত্তু কটুকঃ পাকো ভবতি; যদুক্তং- “দ্রব্যেষু পচ্যমানেষু যেষ্বম্বুপৃথিবীগুণাঃ| নির্বর্তন্তেঽধিকাস্তত্র পাকো মধুর উচ্যতে|| তেজোঽনিলাকাশগুণাঃ পচ্যমানেষু যেষু তু| নির্বর্তন্তেঽধিকাস্তত্র পাকঃ কটুক উচ্যতে ” (সু. সূ. ৪০) ইতি| প্রতিরসপাকে তথাঽনবস্থিতপাকে চ দ্রব্যং রসগুণেনৈব তুল্যং পাকাবস্থাযামপি ভবতি, তেন ন কশ্চিদ্বিশেষো বিপাকেন তত্র বোধ্যত ইতি সুশ্রুতেন তত্পক্ষদ্বযমুপেক্ষিতমিতি সাধুকৃতম্| তৃতীযাম্লপাকনিরাসস্তু দোষমাবহতি, যতো ব্রীহিকুলত্থাদীনামম্লপাকতযা পিত্তকর্তৃত্বমুপলভ্যতে; অথ মন্যসে- ব্রীহ্যাদেরুষ্ণবীর্যত্বেন তত্র পিত্তকর্তৃত্বং; তন্ন, মধুরস্য ব্রীহেস্তন্মতে মধুরবিপাকস্যোষ্ণবীর্যতাযামপি সত্যাং ন পিত্তকর্তৃত্বমুপপদ্যতে, রসবিপাকাভ্যামেকস্য বীর্যস্য বাধনীযত্বাত্| কিঞ্চ, অম্লপাকত্বাদ্ব্রীহ্যাদেঃ পিত্তমম্লগুণমুত্পদ্যতে, যদি তু তদুষ্ণবীর্যতাকৃতং স্যাত্তদা কটুগুণভূযিষ্ঠং পিত্তং স্যাত্; দৃশ্যতে চ ব্রীহিভক্ষণাদম্লোদ্গারাদিনাঽম্লগুণভূযিষ্ঠতৈবেতি| কিঞ্চ, পৃথিবীসোমগুণাতিরেকান্মধুরঃ পাকো ভবতি, বায্বগ্ন্যাকাশাতিরেকাচ্চ কটুর্ভবতীতি পক্ষে যদা ব্যামিশ্রগুণাতিরেকতা ভবতি তদা সোমাগ্ন্যাত্মকস্যাম্লস্যোত্পাদঃ কথং প্রতিক্ষেপণীযঃ| অথবা, তন্ত্রকারযোঃ কিমনযোরনেন বচনমাত্রবিরোধেন কর্তব্যং; যতো যদম্লপাকং চরকো ব্রূতে, তত্ সুশ্রুতেন বীর্যোষ্ণমিতি কৃত্বা সমাধীযতে; তেন ন কশ্চিদ্দ্রব্যগুণে বিরোধঃ| যত্তু সুশ্রুতেঽম্লপাকনিরাসার্থং দূষণমুচ্যতে “পিত্তং হি বিদগ্ধমম্লতামুপৈতি” (সু. সূ. ৪০) ইত্যাদিনা, তদনভ্যুপগমাদেব নিরস্তম্| ননু, লবণস্য মধুরপাকিত্বে পিত্তরক্তাদিকর্তৃত্বমনুপপন্নং, তথা তিক্তকষাযযোঃ কটুপাকিত্বে পিত্তহন্তৃত্বমনুপপন্নং? নৈবং, সত্যপি লবণস্য মধুরপাকিত্বে তত্র লবণরস উষ্ণং চ বীর্যং যদস্তি তেন তত্ পিত্তরক্তাদিকারকং, বিপাকস্তু তত্র পিত্তরক্তহরণলক্ষণে কার্যে বাধিতঃ সন্ ‘সৃষ্টবিণ্মূত্রং’ ইত্যাদিনা লক্ষণেন লক্ষ্যত এব| এতেন যদুচ্যতে- লবণে মধুরো বিপাকশ্চেদ্রসবীর্যাভ্যাং বাধিতঃ সন্ স্বকার্যকরো ন ভবতি তত্ কিং তেনোপদিষ্টেনেতি, তন্নিরস্তং ভবতি| যতোঽস্ত্যেব সৃষ্টবিণ্মূত্রতাদিনা তত্র লবণে মধুরবিপাকিত্বং লক্ষণীযম্| অনযা দিশা তিক্তকষাযযোরপি পূর্বপক্ষপরিহারঃ| অন্যে ত্বেতদ্দোষভযাল্লবণোঽপ্যম্লং পচ্যত ইতি ব্যাখ্যানযন্তি, লবণস্তথেত্যত্র তথাশব্দেন বিপ্রকৃষ্টস্যাম্লমিত্যস্য কর্ষণাদিতি| তন্ন, “কট্বাদীনাং কটুর্বিপাকোঽম্লোঽম্লস্য শেষযোর্মধুরঃ” ইতি জতূকর্ণবচনাত্| নচ বাচ্যং, কস্মাত্ত্রয এব বিপাকা ভবন্তি ন পুনস্তিক্তাদযোঽপীতি; যতো ভূতস্বভাব এবৈষঃ, যেন মধুরাদযস্ত্রয এব ভবন্তি, ভূতস্বভাবাশ্চাপর্যনুযোজ্যাঃ| ননু, যশ্চ রসবিপরীতঃ পাকো যথা- লবণস্য মধুরঃ, তিক্তকষাযযোশ্চ কটুঃ, স উচ্যতাং; যস্তু সমানগুণো মধুরস্য মধুরোঽম্লস্যাম্লঃ কটুকস্য বা কটুকঃ, তত্কথনে কিং প্রযোজনং? যতো রসগুণৈরেব তত্র বিপাকগুণোঽপি জ্ঞাস্যতে| নৈবং, যেন লবণাদিবদ্বিসদৃশরসান্তরোত্পাদশঙ্কানিরাসার্থমপি তত্রানুগুণোঽপি বিপাকো বক্তব্য এব; বিপাকজশ্চ রস আহারপরিণামান্তে ভবতি, প্রাকৃতস্তু রসো বিপাকবিরুদ্ধঃ পরিণামকালং বর্জযিত্বা জ্ঞেযঃ; তেন পিপ্পল্যাঃ কটুকরসত্বমাদৌ কণ্ঠস্থশ্লেষ্মক্ষপণমুখশোধনাদিকর্তৃত্বেন সপ্রযোজনং, মধুরবিপাকত্বং তু পরিণামেন বৃষ্যত্বাদিজ্ঞাপনেন সপ্রযোজনম্| তথা, যত্র বিপাকস্য রসাঃ সমানগুণতযাঽনুগুণা ভবন্তি তত্র বলবত্ কার্যং ভবতি, বিপর্যযে তু দুর্বলমিতি জ্ঞেযম্| এতচ্চ পাকত্রযং দ্রব্যনিযতং, তেন গ্রহণ্যধ্যাযে বক্ষ্যমাণাহারাবস্থাপাকাদ্ভিন্নমেব; তত্র হ্যবিশেষেণ সর্বেষামেব রসানামবস্থাবশাত্ ত্রযঃ পাকা বাচ্যাঃ “অন্নস্য ভুক্তমাত্রস্য ষড্রসস্য প্রপাকতঃ” (চি. ১৫) ইত্যাদিনা গ্রন্থেন||৬৩||
Adhikarana 41 (64-65) · Śloka 65
মৃদুতীক্ষ্ণগুরুলঘুস্নিগ্ধরূক্ষোষ্ণশীতলম্| বীর্যমষ্টবিধং কেচিত্, কেচিদ্দ্বিবিধমাস্থিতাঃ||৬৪|| শীতোষ্ণমিতি, বীর্যং তু ক্রিযতে যেন যা ক্রিযা| নাবীর্যং কুরুতে কিঞ্চিত্ সর্বা বীর্যকৃতা ক্রিযা||৬৫||
मृदुतीक्ष्णगुरुलघुस्निग्धरूक्षोष्णशीतलम्| वीर्यमष्टविधं केचित्, केचिद्द्विविधमास्थिताः||६४|| शीतोष्णमिति, वीर्यं तु क्रियते येन या क्रिया| नावीर्यं कुरुते किञ्चित् सर्वा वीर्यकृता क्रिया||६५||
🔊 Audio coming soon
একীযমতেন বীর্যলক্ষণমাহ- মৃদ্বিত্যাদি| এতচ্চৈকীযমতদ্বযং পারিভাষিকীং বীর্যসঞ্জ্ঞাং পুরস্কৃত্য প্রবৃত্তম্| বৈদ্যকে হি রসবিপাকপ্রভাবব্যতিরিক্তে প্রভূতকার্যকারিণী গুণে বীর্যমতি সঞ্জ্ঞা, তেনাষ্টবিধবীর্যবাদিমতে পিচ্ছিলবিশদাদযো গুণা ন রসাদিবিপরীতং কার্যং প্রাযঃ কুর্বন্তি, তেন তেষাং রসাদ্যুপদেশেনৈব গ্রহণং; মৃদ্বাদীনাং তু রসাদ্যভিভাবকত্বমস্তি, যথা- পিপ্পল্যাং কটুরসকার্যং পিত্তকোপনমভিভূয তদ্গতে মৃদুশীতবীর্যে পিত্তমেব শমযত ইতি, তথা কষাযে তিক্তানুরসে মহতি পঞ্চমূলে তত্কার্যং বাতকোপনমভিভূযোষ্ণেন বীর্যেণ তদ্বিরুদ্ধং বাতশমনমেব ক্রিযতে, তথা মধুরেঽপীক্ষৌ শীতবীর্যত্বেন বাতবৃদ্ধিরিত্যাদি| যদুক্তং সুশ্রুতে- “এতানি খলু বীর্যাণি স্ববলগুণোত্কর্ষাদ্রসমভিভূযাত্মকর্ম দর্শযন্তি ” (সু. সূ. ৪০) ইত্যাদি| শীতোষ্ণবীর্যবাদিমতং ত্বগ্নীষোমীযত্বাজ্জগতঃ শীতোষ্ণযোরেব প্রাধান্যাজ্জ্ঞেযম্| উক্তং চ “নানাঽঽত্মকমপি দ্রব্যমগ্নীষোমৌ মহাবলৌ| ব্যক্তাব্যক্তং জগদিব নাতিক্রামতি জাতুচিত্” (বা. সূ. ৯) ইতি| এতচ্চ মতদ্বযমপ্যাচার্যস্য পরিভাষাসিদ্ধমনুমতমেব, যেনোত্তরত্র “রসবীর্যবিপাকানাং সামান্যং যত্র লক্ষ্যতে” ইত্যাদৌ পারিভাষিকমেব বীর্যং নির্দেক্ষ্যতি| পারিভাষিকবীর্যসঞ্জ্ঞাপরিত্যাগেন তু শক্তিপর্যাযস্য বীর্যস্য লক্ষণমাহ- বীর্যং ত্বিত্যাদি | বীর্যমিতি শক্তিঃ| যেনেতি রসেন বা বিপাকেন বা প্রভাবেণ বা গুর্বাদিপরাদিভির্বা গুণৈর্যা ক্রিযা তর্পণহ্লাদনশমনাদিরূপা ক্রিযতে , তস্যাং ক্রিযাযাং তদ্ রসাদি বীর্যম্| অত এবোক্তং সুশ্রুতে- “যেন কুর্বন্তি তদ্বীর্যম্” (সু. সূ. ৪০) ইতি| অত্রৈব লোকপ্রসিদ্ধামুপপত্তিমাহ- নাবীর্যমিত্যাদি | অবীর্যম্ অশক্তমিত্যর্থঃ| বীর্যকৃতেতি বীর্যবতা কৃতা বীর্যকৃতা||৬৪-৬৫||
Adhikarana 42 (66) · Śloka 66
রসো নিপাতে দ্রব্যাণাং, বিপাকঃ কর্মনিষ্ঠযা| বীর্যং যাবদধীবাসান্নিপাতাচ্চোপলভ্যতে||৬৬||
रसो निपाते द्रव्याणां, विपाकः कर्मनिष्ठया| वीर्यं यावदधीवासान्निपाताच्चोपलभ्यते||६६||
🔊 Audio coming soon
রসাদীনামেকদ্রব্যনিবিষ্টানাং ভেদেন জ্ঞানার্থং লক্ষণমাহ- রসো নিপাত ইত্যাদি| নিপাত ইতি রসনাযোগে| কর্মনিষ্ঠযেতি কর্মণো নিষ্ঠা নিষ্পত্তিঃ কর্মনিষ্ঠা ক্রিযাপরিসমাপ্তিঃ, রসোপযোগে সতি যোঽন্ত্যাহারপরিণামকৃতঃ কর্মবিশেষঃ কফশুক্রাভিবৃদ্ধ্যাদিলক্ষণঃ, তেন বিপাকো নিশ্চীযতে| অধীবাসঃ সহাবস্থানং, যাবদধীবাসাদিতি যাবচ্ছরীরনিবাসাত্; এতচ্চ বিপাকাত্ পূর্বং নিপাতাচ্চোর্ধ্বং জ্ঞেযম্| নিপাতাচ্চেতি শরীরসংযোগমাত্রাত্; তেন কিঞ্চিদ্বীর্যমধীবাসাদুপলভ্যতে, যথা- আনূপমাংসাদেরুষ্ণত্বং; কিঞ্চিচ্চ নিপাতাদেব লভ্যতে, যথা- মরীচাদীনাং তীক্ষ্ণত্বাদি; কিঞ্চিচ্চ নিপাতাধীবাসাভ্যাং, যথা- মরীচাদীনামেব| এতেন রসঃ প্রত্যক্ষেণৈব; বিপাকস্তু নিত্যপরোক্ষঃ, তত্কার্যেণানুমীযতে; বীর্যং তু কিঞ্চিদনুমানেন, যথা- সৈন্ধবগতং শৈত্যমানূপমাংসগতং বা ঔষ্ণ্যং, কিঞ্চিচ্চ বীর্যং প্রত্যক্ষেণৈব, যথা- রাজিকাগতং তৈক্ষ্ণ্যং ঘ্রাণেন, পিচ্ছিলবিশদস্নিগ্ধরূক্ষাদযঃ চক্ষুঃস্পর্শনাভ্যাং নিশ্চীযন্ত ইতি বাক্যার্থঃ| এতচ্চ বীর্যং সহজং কৃত্রিমং চ জ্ঞেযম্ | এতচ্চ যথাসম্ভবং গুরুলঘ্বাদিষু বীর্যেষু লক্ষণং জ্ঞেযম্| দ্রব্যাণামিতি উপযুজ্যমানদ্রব্যাণাম্| এতচ্চ বীর্যলক্ষণং পারিভাষিকবীর্যবিষযমেব||৬৬||
Adhikarana 43 (67) · Śloka 67
রসবীর্যবিপাকানাং সামান্যং যত্র লক্ষ্যতে| বিশেষঃ কর্মণাং চৈব প্রভাবস্তস্য স স্মৃতঃ||৬৭||
रसवीर्यविपाकानां सामान्यं यत्र लक्ष्यते| विशेषः कर्मणां चैव प्रभावस्तस्य स स्मृतः||६७||
🔊 Audio coming soon
প্রভাবলক্ষণমাহ- রসবীর্যেত্যাদি| সামান্যমিতি তুল্যতা| বিশেষঃ কর্মণামিতি দন্ত্যাদ্যাশ্রযাণাং বিরেচনত্বাদীনাম্| সামান্যং লক্ষ্যত ইত্যনেন রসাদিকার্যত্বেন যন্নাবধারযিতুং শক্যতে কার্যং তত্ প্রভাবকৃতমিতি সূচযতি, অত এবোক্তম্- প্রভাবোঽচিন্ত্য উচ্যতে; রসবীর্যবিপাককার্যতযাঽচিন্ত্য ইত্যর্থঃ||৬৭||
Adhikarana 44 (68-72) · Śloka 73
কটুকঃ কটুকঃ পাকে বীর্যোষ্ণশ্চিত্রকো মতঃ| তদ্বদ্দন্তী প্রভাবাত্তু বিরেচযতি মানবম্ ||৬৮|| বিষং বিষঘ্নমুক্তং যত্ প্রভাবস্তত্র কারণম্| ঊর্ধ্বানুলোমিকং যচ্চ তত্ প্রভাবপ্রভাবিতম্||৬৯|| মণীনাং ধারণীযানাং কর্ম যদ্বিবিধাত্মকম্| তত্ প্রভাবকৃতং তেষাং প্রভাবোঽচিন্ত্য উচ্যতে ||৭০|| সম্যগ্বিপাকবীর্যাণি প্রভাবশ্চাপ্যুদাহৃতঃ| কিঞ্চিদ্রসেন কুরুতে কর্ম বীর্যেণ চাপরম্||৭১|| দ্রব্যং গুণেন পাকেন প্রভাবেণ চ কিঞ্চন| রসং বিপাকস্তৌ বীর্যং প্রভাবস্তানপোহতি||৭২|| বলসাম্যে রসাদীনামিতি নৈসর্গিকং বলম্|৭৩|
कटुकः कटुकः पाके वीर्योष्णश्चित्रको मतः| तद्वद्दन्ती प्रभावात्तु विरेचयति मानवम् ||६८|| विषं विषघ्नमुक्तं यत् प्रभावस्तत्र कारणम्| ऊर्ध्वानुलोमिकं यच्च तत् प्रभावप्रभावितम्||६९|| मणीनां धारणीयानां कर्म यद्विविधात्मकम्| तत् प्रभावकृतं तेषां प्रभावोऽचिन्त्य उच्यते ||७०|| सम्यग्विपाकवीर्याणि प्रभावश्चाप्युदाहृतः| किञ्चिद्रसेन कुरुते कर्म वीर्येण चापरम्||७१|| द्रव्यं गुणेन पाकेन प्रभावेण च किञ्चन| रसं विपाकस्तौ वीर्यं प्रभावस्तानपोहति||७२|| बलसाम्ये रसादीनामिति नैसर्गिकं बलम्|७३|
🔊 Audio coming soon
অস্যৈব দুরভিগমত্বাদুদাহরণানি বহূন্যাহ- কটুক ইত্যাদিনা| তদ্বদিতি চিত্রকসমানগুণা | বিষঘ্নমুক্তমিতি “তস্মাদ্দংষ্ট্রাবিষং মৌলং” (চি. ২৩) ইত্যাদিনা| ঊর্ধ্বানুলোমিকমিতি যুগপদুভযভাগহরং, কিংবা ঊর্ধ্বহরং তথাঽনুলোমহরং চ| কর্ম যদ্বিবিধাত্মকমিতি বিষহরণশূলহরণাদি| এতচ্চোদাহরণমাত্রং, তেন জীবনমেধ্যাদিদ্রব্যস্য রসাদ্যচিন্ত্যং সর্বং ‘প্রভাব’ ইতি জ্ঞেযম্| প্রভাবশ্চেহ দ্রব্যশক্তিরভিপ্রেতা, সা চ দ্রব্যাণাং সামান্যবিশেষঃ দন্তীত্বাদিযুক্তা ব্যক্তিরেব, যতঃ শক্তির্হি স্বরূপমেব ভাবানাং, নাতিরিক্তং কিঞ্চিদ্ধর্মান্তরম্; এবং প্রদেশান্তরোক্তগুণপ্রভাবাদিষ্বপি বাচ্যম্; যথোক্তং- ‘দ্রব্যাণি হি দ্রব্যপ্রভাবাদ্গুণপ্রভাবাত্’ ইত্যাদি| ন চ বাচ্যং দন্ত্যাদিঃ স্বরূপত এব বিরেচযতি, তেন কিমিতি জলাদ্যুপহতা দন্তী ন বিরেচযতীতি; প্রতিবন্ধকাভাববিশিষ্টস্যৈব প্রভাবস্য কারণত্বাত্, জলোপহতাযাং দন্ত্যাং জলোপঘাতঃ প্রতিবন্ধক ইত্যাদ্যনুসরণীযম্| নৈযাযিকশক্তিবাদে যা চ বিষস্য বিষঘ্নত্বে উপপত্তিরুক্তা ঊর্ধ্বাধোগামিত্ববিরোধলক্ষণা সাঽন্তর্ভাগত্বাত্ প্রভাবাদেব ভবতি| এবমূর্ধ্বানুলোমিকত্বাদৌ পার্থিবত্বাদিকথনেঽপি বাচ্যম্||৬৮-৭২||-
Adhikarana 45 (74-79) · Śloka 79
ষণ্ণাং রসানাং বিজ্ঞানমুপদেক্ষ্যাম্যতঃ পরম্||৭৩|| স্নেহনপ্রীণনাহ্লাদমার্দবৈরুপলভ্যতে| মুখস্থো মধুরশ্চাস্যং ব্যাপ্নুবঁল্লিম্পতীব চ||৭৪|| দন্তহর্ষান্মুখাস্রাবাত্ স্বেদনান্মুখবোধনাত্| বিদাহাচ্চাস্যকণ্ঠস্য প্রাশ্যৈবাম্লং রসং বদেত্||৭৫|| প্রলীযন্ ক্লেদবিষ্যন্দমার্দবং কুরুতে মুখে| যঃ শীঘ্রং লবণো জ্ঞেযঃ স বিদাহান্মুখস্য চ||৭৬|| সংবেজযেদ্যো রসানাং নিপাতে তুদতীব চ| বিদহন্মুখনাসাক্ষি সংস্রাবী স কটুঃ স্মৃতঃ||৭৭|| প্রতিহন্তি নিপাতে যো রসনং স্বদতে ন চ| স তিক্তো মুখবৈশদ্যশোষপ্রহ্লাদকারকঃ ||৭৮|| বৈশদ্যস্তম্ভজাড্যৈর্যো রসনং যোজযেদ্রসঃ| বধ্নাতীব চ যঃ কণ্ঠং কষাযঃ স বিকাস্যপি||৭৯||
षण्णां रसानां विज्ञानमुपदेक्ष्याम्यतः परम्||७३|| स्नेहनप्रीणनाह्लादमार्दवैरुपलभ्यते| मुखस्थो मधुरश्चास्यं व्याप्नुवँल्लिम्पतीव च||७४|| दन्तहर्षान्मुखास्रावात् स्वेदनान्मुखबोधनात्| विदाहाच्चास्यकण्ठस्य प्राश्यैवाम्लं रसं वदेत्||७५|| प्रलीयन् क्लेदविष्यन्दमार्दवं कुरुते मुखे| यः शीघ्रं लवणो ज्ञेयः स विदाहान्मुखस्य च||७६|| संवेजयेद्यो रसानां निपाते तुदतीव च| विदहन्मुखनासाक्षि संस्रावी स कटुः स्मृतः||७७|| प्रतिहन्ति निपाते यो रसनं स्वदते न च| स तिक्तो मुखवैशद्यशोषप्रह्लादकारकः ||७८|| वैशद्यस्तम्भजाड्यैर्यो रसनं योजयेद्रसः| बध्नातीव च यः कण्ठं कषायः स विकास्यपि||७९||
🔊 Audio coming soon
বিজ্ঞাযতেঽনেনেতি বিজ্ঞানং লক্ষণমিত্যর্থঃ| প্রলীযন্নিতি বিলীনো ভবন্ | সংস্রাবযতীতি সংস্রাবী| বিকাসীতি হৃদযবিকসনশীলঃ; উক্তং হি সুশ্রুতে- “হৃদযং পীডযতি” (সু. সূ. ৪২) ইতি||৭৪-৭৯||
Adhikarana 46 (80) · Śloka 80
এবমুক্তবন্তং ভগবন্তমাত্রেযমগ্নিবেশ উবাচ- ভগবন্! শ্রুতমেতদবিতথমর্থসম্পদ্যুক্তং ভগবতো যথাবদ্দ্রব্যগুণকর্মাধিকারে বচঃ, পরং ত্বাহারবিকারাণাং বৈরোধিকানাং লক্ষণমনতিসঙ্ক্ষেপেণোপদিশ্যমানং শুশ্রূষামহ ইতি||৮০||
एवमुक्तवन्तं भगवन्तमात्रेयमग्निवेश उवाच- भगवन्! श्रुतमेतदवितथमर्थसम्पद्युक्तं भगवतो यथावद्द्रव्यगुणकर्माधिकारे वचः, परं त्वाहारविकाराणां वैरोधिकानां लक्षणमनतिसङ्क्षेपेणोपदिश्यमानं शुश्रूषामह इति||८०||
🔊 Audio coming soon
সম্প্রতি বিরুদ্ধাহারং বক্তুমাহ- এবমিত্যাদি| শরীরধাতুবিরোধং কুর্বন্তীতি বৈরোধিকাঃ, লক্ষ্যতে বৈরোধিকমনেনেতি লক্ষণং বৈরোধিকাভিধাযকো গ্রন্থ এব| ‘যত্ কিঞ্চিদ্দোষমাস্রাব্য’ ইত্যাদি বৈরোধিকলক্ষণং জ্ঞেযম্||৮০||
Adhikarana 47 (81) · Śloka 81
তমুবাচ ভগবানাত্রেযঃ- দেহধাতুপ্রত্যনীকভূতানি দ্রব্যাণি দেহধাতুভির্বিরোধমাপদ্যন্তে; পরস্পরগুণবিরুদ্ধানি কানিচিত্, কানিচিত্ সংযোগাত্, সংস্কারাদপরাণি, দেশকালমাত্রাদিভিশ্চাপরাণি, তথা স্বভাবাদপরাণি||৮১||
तमुवाच भगवानात्रेयः- देहधातुप्रत्यनीकभूतानि द्रव्याणि देहधातुभिर्विरोधमापद्यन्ते; परस्परगुणविरुद्धानि कानिचित्, कानिचित् संयोगात्, संस्कारादपराणि, देशकालमात्रादिभिश्चापराणि, तथा स्वभावादपराणि||८१||
🔊 Audio coming soon
দেহধাতুপ্রত্যনীকভূতানীতি দেহধাতূনাং রসাদীনাং বাতাদীনাং চ প্রকৃতিস্থানাং প্রত্যনীকস্বরূপাণি| বিরোধমাপদ্যন্ত ইতি দেহধাতূনাং বিরোধমাচরন্তি, দূষযন্তীতি যাবত্| যথাভূতানি দ্রব্যাণি দেহধাতুভির্বিরোধমাপদ্যন্তে তদাহ- পরস্পরবিরুদ্ধানি কানিচিদিত্যাদি| তত্র পরস্পরগুণবিরুদ্ধানি যথা- “ন মত্স্যান্ পযসাঽভ্যবহরেত্, উভযং হ্যেতত্” ইত্যাদিনোক্তানি| সংযোগবিরুদ্ধং যথা- “তদেব নিকুচং পক্বং ন মাষ” ইত্যাদি নোক্তং; যত্ সংস্কারাদিবিরুদ্ধগুণকথনং বিনা সাহিত্যমাত্রেণ বিরুদ্ধমুচ্যতে, তত্ সংযোগবিরুদ্ধম্| মত্স্যপযসোস্তু যদ্যপি সহোপযোগো বিরুদ্ধত্বেনোক্তঃ, তথাঽপ্যসৌ গুণবিরুদ্ধত্বেন কথিত ইতি গুণবিরোধকস্যৈবোদাহরণম্| বিরোধশ্চ বিরুদ্ধগুণত্বে সত্যপি ক্বচিদেব দ্রব্যপ্রভাবাদ্ভবতি; তেন ষড্রসাহারোপযোগে মধুরাম্লযোর্বিরুদ্ধশীতোষ্ণবীর্যযোর্বিরোধো নোদ্ভাবনীযঃ| সংস্কারতো বিরুদ্ধং যথা- “ন কপোতান্ সর্ষপতৈলভৃষ্টান্” ইত্যাদি| দেশো দ্বিবিধঃ- ভূমিঃ, শরীরং চ| তত্র ভূমিবিরুদ্ধং যথা- “তদেব ভস্মপাংশুপরিধ্বস্তম্”, কিংবা যত্ কিঞ্চিদগোচরভৃতং তদ্দেশবিরুদ্ধং; শরীরবিরুদ্ধং যথা- উষ্ণার্তস্য মধু মরণায| কালবিরুদ্ধং যথা- পর্যুষিতা কাকমাচী মরণায| মাত্রাবিরুদ্ধং যথা- সমঘৃতে মধুসর্পিষী মরণায| আদিগ্রহণাদ্দোষপ্রকৃত্যাদিবিরুদ্ধানাং গ্রহণম্| স্বভাববিরুদ্ধং যথা- বিষম্||৮১||
Adhikarana 48 (82-83) · Śloka 83
তত্র যান্যাহারমধিকৃত্য ভূযিষ্ঠমুপযুজ্যন্তে তেষামেকদেশং বৈরোধিকমধিকৃত্যোপদেক্ষ্যামঃ- ন মত্স্যান্ পযসা সহাভ্যবহরেত্, উভযং হ্যেতন্মধুরং মধুরবিপাকং মহাভিষ্যন্দি শীতোষ্ণত্বাদ্বিরুদ্ধবীর্যং বিরুদ্ধবীর্যত্বাচ্ছোণিতপ্রদূষণায মহাভিষ্যন্দিত্বান্মার্গোপরোধায চ||৮২|| তন্নিশম্যাত্রেযবচনমনু ভদ্রকাপ্যোঽগ্নিবেশমুবাচ- সর্বানেব মত্স্যান্ পযসা সহাভ্যবহরেদন্যত্রৈকস্মাচ্চিলিচিমাত্, স পুনঃ শকলী লোহিতনযনঃ সর্বতো লোহিতরাজী রোহিতাকারঃ প্রাযো ভূমৌ চরতি, তং চেত্ পযসা সহাভ্যবহরেন্নিঃসংশযং শোণিতজানাং বিবন্ধজানাং চ ব্যাধীনামন্যতমমথবা মরণং প্রাপ্নুযাদিতি||৮৩||
तत्र यान्याहारमधिकृत्य भूयिष्ठमुपयुज्यन्ते तेषामेकदेशं वैरोधिकमधिकृत्योपदेक्ष्यामः- न मत्स्यान् पयसा सहाभ्यवहरेत्, उभयं ह्येतन्मधुरं मधुरविपाकं महाभिष्यन्दि शीतोष्णत्वाद्विरुद्धवीर्यं विरुद्धवीर्यत्वाच्छोणितप्रदूषणाय महाभिष्यन्दित्वान्मार्गोपरोधाय च||८२|| तन्निशम्यात्रेयवचनमनु भद्रकाप्योऽग्निवेशमुवाच- सर्वानेव मत्स्यान् पयसा सहाभ्यवहरेदन्यत्रैकस्माच्चिलिचिमात्, स पुनः शकली लोहितनयनः सर्वतो लोहितराजी रोहिताकारः प्रायो भूमौ चरति, तं चेत् पयसा सहाभ्यवहरेन्निःसंशयं शोणितजानां विबन्धजानां च व्याधीनामन्यतममथवा मरणं प्राप्नुयादिति||८३||
🔊 Audio coming soon
বৈরোধিকমধিকৃত্যেতি বৈরোধিকমুদ্দিশ্য| শীতোষ্ণত্বাদিতি পযঃ শীতমুষ্ণবীর্যাশ্চ মত্স্যাঃ, শেষং মধুরত্বাদি সমানম্| এতচ্চ দ্রব্যপ্রভাবাদেব বিরোধি| ‘স পুনঃ শকলী’ ইত্যাদিনা ‘নান্দিনিঃ’ ইতি খ্যাতো মত্স্য উচ্যতে||৮২-৮৩||
Adhikarana 49 (84) · Śloka 84
নেতি ভগবানাত্রেযঃ- সর্বানেব মত্স্যান্ন পযসা সহাভ্যবহরেদ্বিশেষতস্তু চিলিচিমং, স হি মহাভিষ্যন্দিত্বাত্ স্থূললক্ষণতরানেতান্ ব্যাধীনুপজনযত্যামবিষমুদীরযতি চ| গ্রাম্যানূপৌদকপিশিতানি চ মধুতিলগুডপযোমাষমূলকবিসৈর্বিরূঢধান্যৈর্বা নৈকধ্যমদ্যাত্, তন্মূলং হি বাধির্যান্ধ্যবেপথুজাড্যকলমূকতামৈণ্মিণ্যমথবা মরণমাপ্নোতি| ন পৌষ্করং রোহিণীকং শাকং কপোতান্ বা সর্ষপতৈলভ্রষ্টান্মধুপযোভ্যাং সহাভ্যবহরেত্, তন্মূলং হি শোণিতাভিষ্যন্দধমনীপ্রবি(তি)চযাপস্মারশঙ্খকগলগণ্ডরোহিণীনামন্যতমং প্রাপ্নোত্যথবা মরণমিতি| ন মূলকলশুনকৃষ্ণগন্ধার্জকসুমুখসুরসাদীনি ভক্ষযিত্বা পযঃ সেব্যং, কুষ্ঠাবাধভযাত্| ন জাতুকশাকং ন নিকুচং পক্বং মধুপযোভ্যাং সহোপযোজ্যম্, এতদ্ধি মরণাযাথবা বলবর্ণতেজোবীর্যোপরোধাযালঘুব্যাধযে ষাণ্ঢ্যায চেতি| তদেব নিকুচং পক্বং ন মাষসূপগুডসর্পির্ভিঃ সহোপযোজ্যং বৈরোধিকত্বাত্| তথাঽঽম্রাম্রাতকমাতুলুঙ্গনিকুচকরমর্দমোচদন্তশঠবদরকোশাম্রভব্যজাম্ববকপিত্থতিন্তিডীক- পারাবতাক্ষোডপনসনালিকেরদাডিমামলকান্যেবম্প্রকারাণি চান্যানি দ্রব্যাণি সর্বং চাম্লং দ্রবমদ্রবং চ পযসা সহ বিরুদ্ধম্| তথা কঙ্গুবনকমকুষ্ঠককুলত্থমাষনিষ্পাবাঃ পযসা সহ বিরুদ্ধাঃ| পদ্মোত্তরিকাশাকং শার্করো মৈরেযো মধু চ সহোপযুক্তং বিরুদ্ধং বাতং চাতিকোপযতি| হারিদ্রকঃ সর্ষপতৈলভৃষ্টো বিরুদ্ধঃ পিত্তং চাতিকোপযতি| পাযসো মন্থানুপানো বিরুদ্ধঃ শ্লেষ্মাণং চাতিকোপযতি| উপোদিকা তিলকল্কসিদ্ধা হেতুরতীসারস্য| বলাকা বারুণ্যা সহ কুল্মাষৈরপি বিরুদ্ধা, সৈব শূকরবসাপরিভৃষ্টা সদ্যো ব্যাপাদযতি| মযূরমাংসমেরণ্ডসীসকাবসক্তমেরণ্ডাগ্নিপ্লুষ্টমেরণ্ডতৈলযুক্তং সদ্যো ব্যাপাদযতি| হারিদ্রকমাংসং হারিদ্রসীসকাবসক্তং হারিদ্রাগ্নিপ্লুষ্টং সদ্যো ব্যাপাদযতি; তদেব ভস্মপাংশুপরিধ্বস্তং সক্ষৌদ্রং সদ্যো মরণায| মত্স্যনিস্তালনসিদ্ধাঃ পিপ্পল্যস্তথা কাকমাচী মধু চ মরণায| মধু চোষ্ণমুষ্ণার্তস্য চ মধু মরণায| মধুসর্পিষী সমঘৃতে, মধু বারি চান্তরিক্ষং সমঘৃতং, মধু পুষ্করবীজং, মধু পীত্বোষ্ণোদকং, ভল্লাতকোষ্ণোদকং, তক্রসিদ্ধঃ কম্পিল্লকঃ, পর্যুষিতা কাকমাচী, অঙ্গারশূল্যো ভাসশ্চেতি বিরুদ্ধানি| ইত্যেতদ্যথাপ্রশ্নমভিনির্দিষ্টং ভবতীতি||৮৪||
नेति भगवानात्रेयः- सर्वानेव मत्स्यान्न पयसा सहाभ्यवहरेद्विशेषतस्तु चिलिचिमं, स हि महाभिष्यन्दित्वात् स्थूललक्षणतरानेतान् व्याधीनुपजनयत्यामविषमुदीरयति च| ग्राम्यानूपौदकपिशितानि च मधुतिलगुडपयोमाषमूलकबिसैर्विरूढधान्यैर्वा नैकध्यमद्यात्, तन्मूलं हि बाधिर्यान्ध्यवेपथुजाड्यकलमूकतामैण्मिण्यमथवा मरणमाप्नोति| न पौष्करं रोहिणीकं शाकं कपोतान् वा सर्षपतैलभ्रष्टान्मधुपयोभ्यां सहाभ्यवहरेत्, तन्मूलं हि शोणिताभिष्यन्दधमनीप्रवि(ति)चयापस्मारशङ्खकगलगण्डरोहिणीनामन्यतमं प्राप्नोत्यथवा मरणमिति| न मूलकलशुनकृष्णगन्धार्जकसुमुखसुरसादीनि भक्षयित्वा पयः सेव्यं, कुष्ठाबाधभयात्| न जातुकशाकं न निकुचं पक्वं मधुपयोभ्यां सहोपयोज्यम्, एतद्धि मरणायाथवा बलवर्णतेजोवीर्योपरोधायालघुव्याधये षाण्ढ्याय चेति| तदेव निकुचं पक्वं न माषसूपगुडसर्पिर्भिः सहोपयोज्यं वैरोधिकत्वात्| तथाऽऽम्राम्रातकमातुलुङ्गनिकुचकरमर्दमोचदन्तशठबदरकोशाम्रभव्यजाम्बवकपित्थतिन्तिडीक- पारावताक्षोडपनसनालिकेरदाडिमामलकान्येवम्प्रकाराणि चान्यानि द्रव्याणि सर्वं चाम्लं द्रवमद्रवं च पयसा सह विरुद्धम्| तथा कङ्गुवनकमकुष्ठककुलत्थमाषनिष्पावाः पयसा सह विरुद्धाः| पद्मोत्तरिकाशाकं शार्करो मैरेयो मधु च सहोपयुक्तं विरुद्धं वातं चातिकोपयति| हारिद्रकः सर्षपतैलभृष्टो विरुद्धः पित्तं चातिकोपयति| पायसो मन्थानुपानो विरुद्धः श्लेष्माणं चातिकोपयति| उपोदिका तिलकल्कसिद्धा हेतुरतीसारस्य| बलाका वारुण्या सह कुल्माषैरपि विरुद्धा, सैव शूकरवसापरिभृष्टा सद्यो व्यापादयति| मयूरमांसमेरण्डसीसकावसक्तमेरण्डाग्निप्लुष्टमेरण्डतैलयुक्तं सद्यो व्यापादयति| हारिद्रकमांसं हारिद्रसीसकावसक्तं हारिद्राग्निप्लुष्टं सद्यो व्यापादयति; तदेव भस्मपांशुपरिध्वस्तं सक्षौद्रं सद्यो मरणाय| मत्स्यनिस्तालनसिद्धाः पिप्पल्यस्तथा काकमाची मधु च मरणाय| मधु चोष्णमुष्णार्तस्य च मधु मरणाय| मधुसर्पिषी समघृते, मधु वारि चान्तरिक्षं समघृतं, मधु पुष्करबीजं, मधु पीत्वोष्णोदकं, भल्लातकोष्णोदकं, तक्रसिद्धः कम्पिल्लकः, पर्युषिता काकमाची, अङ्गारशूल्यो भासश्चेति विरुद्धानि| इत्येतद्यथाप्रश्नमभिनिर्दिष्टं भवतीति||८४||
🔊 Audio coming soon
গ্রাম্যপিশিতাদীনি মধ্বাদীনামন্যতরেণাপি বিরুদ্ধানি| কলমূকতেতি কলমূকতা অব্যক্তবচনতা| পৌষ্করাদীনাং মধুপযোভ্যাং সহাভ্যবহারো বিরুদ্ধঃ, পৌষ্করং পুষ্করত্রত্ররূপং শাকং, রোহিণী কটুরোহিণী| (ধমনীপ্রতিচযঃ সিরাজগ্রন্থিঃ |) জাতুশাকং বংশপত্রিকা| বৈরোধিকত্বাদিত্যনেন প্রকরণলব্ধস্যাপি বৈরোধিকত্বস্য পুনরভিধানং সামান্যোক্তষাণ্ঢ্যাদিব্যাধিকর্তৃতোপদর্শনার্থম্, এবমন্যত্রাপি সামান্যেঽপি বৈরোধিকত্বমাত্রাভিধানে বক্তব্যম্| তথাঽম্লেত্যাদৌ অম্লগ্রহণেন লব্ধানাপ্যম্লাম্রাতকাদীনামভিধানং বিশেষবিরোধসূচনার্থম্| সর্বগ্রহণেনৈব দ্রবাদ্রবাম্লে প্রাপ্তে পুনর্দ্রবাদ্রববচনং ‘সর্ব’ শব্দস্য দ্রবাদ্রবাম্লকার্ত্স্ন্যার্থতাপ্রতিষেধার্থং, ভবতি হি প্রকরণাদেকদেশেঽপি সর্বব্যপদেশঃ, যথা সর্বান্ ভোজযেদিতিঃ, কিংবা সর্বগ্রহণমম্লবিপাকানাং ব্রীহ্যাদীনাং গ্রহণার্থম্| পযসেতি তৃতীযযৈব সহার্থে লব্ধে পুনঃ সহেত্যভিধানং কেবলাম্লাদিযুক্তস্যৈব বিরোধিতোপদর্শনার্থং; তেন, অম্লপযঃসংযোগে গুডাদিসংযোগে সতি বিরুদ্ধত্বং ন দুগ্ধাম্রাদীনাম্| বনকো বনকোদ্রবঃ| পদ্মোত্তরিকা কুসুম্ভঃ| শার্কর ইতি মৈরেযবিশেষণম্| বাতং চাতিকোপযতীতি বচনেন পিত্তকফাবল্পং কোপযতীতি বোধযতি; এবং পিত্তং চাতিকোপযতি কফং চাতিকোপযতীত্যেতযোরপি বাচ্যম্| হারিদ্রকো ‘হরিতাল’ ইতি খ্যাতঃ পক্ষী| বলাকা বারুণ্যা সহ বিরুদ্ধা, তথা কুল্মাষৈশ্চ বলাকা বিরুদ্ধা| এরণ্ডসীসকাবসক্তমিতি এরণ্ডকাষ্ঠাবসক্তং, সীসকো হি ভটিত্রকরণকাষ্ঠমুচ্যতে| তদেবেতি হারিদ্রকমাংসম্| মত্স্যা নিস্তাল্যন্তে পচ্যন্তে যস্মিন্ তন্মত্স্যনিস্তালনং; কিংবা নিস্তালনং বসা, জতূকর্ণেঽপ্যুক্তং- “মত্স্যবসাসিদ্ধাঃ পিপ্পল্যঃ” ইতি| কাকমাচী মধু চেতি সংযোগবিরুদ্ধম্| ভাসো গোষ্ঠকুক্কুটঃ||৮৪||
Adhikarana 50 (85) · Śloka 85
ভবন্তি চাত্র শ্লোকাঃ- যত্ কিঞ্চিদ্দোষমাস্রাব্য ন নির্হরতি কাযতঃ| আহারজাতং তত্ সর্বমহিতাযোপপদ্যতে||৮৫||
भवन्ति चात्र श्लोकाः- यत् किञ्चिद्दोषमास्राव्य न निर्हरति कायतः| आहारजातं तत् सर्वमहितायोपपद्यते||८५||
🔊 Audio coming soon
অনুক্তবৈরোধিকসঙ্গ্রহার্থমাহ- যত্ কিঞ্চিদিত্যাদি| আহ্রিযত ইত্যাহারো ভেষজমপি| দোষমাস্রাব্যেতি দোষানুত্ক্লিষ্টরূপান্ জনযিত্বা ন নির্হরতীতি| অনেন বমনবিরেচনদ্রব্যাণি নিরাকরোতি, তানি হি দোষানাস্রাব্য নির্হরন্তি||৮৫||
Adhikarana 51 (86-101) · Śloka 101
যচ্চাপি দেশকালাগ্নিমাত্রাসাত্ম্যানিলাদিভিঃ| সংস্কারতো বীর্যতশ্চ কোষ্ঠাবস্থাক্রমৈরপি||৮৬|| পরিহারোপচারাভ্যাং পাকাত্ সংযোগতোঽপি চ| বিরুদ্ধং তচ্চ ন হিতং হৃত্সম্পদ্বিধিভিশ্চ যত্||৮৭|| বিরুদ্ধং দেশতস্তাবদ্রূক্ষতীক্ষ্ণাদি ধন্বনি| আনূপে স্নিগ্ধশীতাদি ভেষজং যন্নিষেব্যতে||৮৮|| কালতোঽপি বিরুদ্ধং যচ্ছীতরূক্ষাদিসেবনম্| শীতে কালে, তথোষ্ণে চ কটুকোষ্ণাদিসেবনম্||৮৯|| বিরুদ্ধমনলে তদ্বদন্নপানং চতুর্বিধে| মধুসর্পিঃ সমধৃতং মাত্রযা তদ্বিরুধ্যতে||৯০|| কটুকোষ্ণাদিসাত্ম্যস্য স্বাদুশীতাদিসেবনম্| যত্তত্ সাত্ম্যবিরুদ্ধং তু বিরুদ্ধং ত্বনিলাদিভিঃ||৯১|| যা সমানগুণাভ্যাসবিরুদ্ধান্নৌষধক্রিযা| সংস্কারতো বিরুদ্ধং তদ্যদ্ভোজ্যং বিষবদ্ভবেত্||৯২|| এরণ্ডসীসকাসক্তং শিখিমাংসং যথৈব হি| বিরুদ্ধং বীর্যতো জ্ঞেযং বীর্যতঃ শীতলাত্মকম্||৯৩|| তত্ সংযোজ্যোষ্ণবীর্যেণ দ্রব্যেণ সহ সেব্যতে| ক্রূরকোষ্ঠস্য চাত্যল্পং মন্দবীর্যমভেদনম্||৯৪|| মৃদকোষ্ঠস্য গুরু চ ভেদনীযং তথা বহু| এতত্ কোষ্ঠবিরুদ্ধং তু, বিরুদ্ধং স্যাদবস্থযা||৯৫|| শ্রমব্যবাযব্যাযামসক্তস্যানিলকোপনম্| নিদ্রালসস্যালসস্য ভোজনং শ্লেষ্মকোপনম্||৯৬|| যচ্চানুত্সৃজ্য বিণ্মূত্রং ভুঙ্ক্তে যশ্চাবুভুক্ষিতঃ| তচ্চ ক্রমবিরুদ্ধং স্যাদ্যচ্চাতিক্ষুদ্বশানুগঃ||৯৭|| পরিহারবিরুদ্ধং তু বরাহাদীন্নিষেব্য যত্| সেবেতোষ্ণং ঘৃতাদীংশ্চ পীত্বা শীতং নিষেবতে||৯৮|| বিরুদ্ধং পাকতশ্চাপি দুষ্টদুর্দারুসাধিতম্| অপক্বতণ্ডুলাত্যর্থপক্বদগ্ধং চ যদ্ভবেত্| সংযোগতো বিরুদ্ধং তদ্যথাঽম্লং পযসা সহ||৯৯|| অমনোরুচিতং যচ্চ হৃদ্বিরুদ্ধং তদুচ্যতে| সম্পদ্বিরুদ্ধং তদ্বিদ্যাদসঞ্জাতরসং তু যত্||১০০|| অতিক্রান্তরসং বাঽপি বিপন্নরসমেব বা| জ্ঞেযং বিধিবিরুদ্ধং তু ভুজ্যতে নিভৃতে ন যত্| তদেবংবিধমন্নং স্যাদ্বিরুদ্ধমুপযোজিতম্||১০১||
यच्चापि देशकालाग्निमात्रासात्म्यानिलादिभिः| संस्कारतो वीर्यतश्च कोष्ठावस्थाक्रमैरपि||८६|| परिहारोपचाराभ्यां पाकात् संयोगतोऽपि च| विरुद्धं तच्च न हितं हृत्सम्पद्विधिभिश्च यत्||८७|| विरुद्धं देशतस्तावद्रूक्षतीक्ष्णादि धन्वनि| आनूपे स्निग्धशीतादि भेषजं यन्निषेव्यते||८८|| कालतोऽपि विरुद्धं यच्छीतरूक्षादिसेवनम्| शीते काले, तथोष्णे च कटुकोष्णादिसेवनम्||८९|| विरुद्धमनले तद्वदन्नपानं चतुर्विधे| मधुसर्पिः समधृतं मात्रया तद्विरुध्यते||९०|| कटुकोष्णादिसात्म्यस्य स्वादुशीतादिसेवनम्| यत्तत् सात्म्यविरुद्धं तु विरुद्धं त्वनिलादिभिः||९१|| या समानगुणाभ्यासविरुद्धान्नौषधक्रिया| संस्कारतो विरुद्धं तद्यद्भोज्यं विषवद्भवेत्||९२|| एरण्डसीसकासक्तं शिखिमांसं यथैव हि| विरुद्धं वीर्यतो ज्ञेयं वीर्यतः शीतलात्मकम्||९३|| तत् संयोज्योष्णवीर्येण द्रव्येण सह सेव्यते| क्रूरकोष्ठस्य चात्यल्पं मन्दवीर्यमभेदनम्||९४|| मृदकोष्ठस्य गुरु च भेदनीयं तथा बहु| एतत् कोष्ठविरुद्धं तु, विरुद्धं स्यादवस्थया||९५|| श्रमव्यवायव्यायामसक्तस्यानिलकोपनम्| निद्रालसस्यालसस्य भोजनं श्लेष्मकोपनम्||९६|| यच्चानुत्सृज्य विण्मूत्रं भुङ्क्ते यश्चाबुभुक्षितः| तच्च क्रमविरुद्धं स्याद्यच्चातिक्षुद्वशानुगः||९७|| परिहारविरुद्धं तु वराहादीन्निषेव्य यत्| सेवेतोष्णं घृतादींश्च पीत्वा शीतं निषेवते||९८|| विरुद्धं पाकतश्चापि दुष्टदुर्दारुसाधितम्| अपक्वतण्डुलात्यर्थपक्वदग्धं च यद्भवेत्| संयोगतो विरुद्धं तद्यथाऽम्लं पयसा सह||९९|| अमनोरुचितं यच्च हृद्विरुद्धं तदुच्यते| सम्पद्विरुद्धं तद्विद्यादसञ्जातरसं तु यत्||१००|| अतिक्रान्तरसं वाऽपि विपन्नरसमेव वा| ज्ञेयं विधिविरुद्धं तु भुज्यते निभृते न यत्| तदेवंविधमन्नं स्याद्विरुद्धमुपयोजितम्||१०१||
🔊 Audio coming soon
যচ্চাপি দেশকালাগ্নীত্যাদিগ্রন্থং কেচিত্ পঠন্তি, স চ ব্যক্ত এব||৮৬-১০১||
Adhikarana 52 (102-103) · Śloka 103
ষাণ্ঢ্যান্ধ্যবীসর্পদকোদরাণাং বিস্ফোটকোন্মাদভগন্দরাণাম্| মূর্চ্ছামদাধ্মানগলগ্রহাণাং পাণ্ড্বামযস্যামবিষস্য চৈব||১০২|| কিলাসকুষ্ঠগ্রহণীগদানাং শোথাম্লপিত্তজ্বরপীনসানাম্ | সন্তানদোষস্য তথৈব মৃত্যোর্বিরুদ্ধমন্নং প্রবদন্তি হেতুম্||১০৩||
षाण्ढ्यान्ध्यवीसर्पदकोदराणां विस्फोटकोन्मादभगन्दराणाम्| मूर्च्छामदाध्मानगलग्रहाणां पाण्ड्वामयस्यामविषस्य चैव||१०२|| किलासकुष्ठग्रहणीगदानां शोथाम्लपित्तज्वरपीनसानाम् | सन्तानदोषस्य तथैव मृत्योर्विरुद्धमन्नं प्रवदन्ति हेतुम्||१०३||
🔊 Audio coming soon
ষাণ্ঢ্যং নপুংসকতা| সন্তানদোষো মৃতবত্সত্বাদিঃ| এতচ্চ বৈরোধিককথনং বিশেষবচনেন বাধ্যতে; তেন লশুনস্য ক্ষীরেণ পানং ক্বচিন্ন বিরোধি; যদুক্তং- “সাধযেচ্ছুদ্ধশুষ্কস্য লশুনস্য চতুষ্পলম্| ক্ষীরোদকেঽষ্টগুণিতে ক্ষীরশেষং চ পাযযেত্” (চি.অ.৫), তথা “মূলকস্বরসং ক্ষীরং” ইত্যাদিপ্রযোগেষূন্নেযম্| কিংবা, অনেকদ্রব্যসংযোগাদত্র বিরোধিনামবিরোধঃ; বিরোধিমাত্রসংযোগ এব বিরোধী ভবতি| যতু মধুন উষ্ণেন বমনেন সংযুক্তস্য সত্যপি মদনফলাদিদ্রব্যসংযোগেঽবিরোধার্থমুক্তমপক্বগমনাদি, তন্মধুনো দ্রব্যান্তরসংযোগেঽপ্যুষ্ণসম্বন্ধত্বে বিরোধিত্বোপদর্শনার্থং; যতো বিষান্বযং মধু, বিষস্য চোষ্ণবিরোধি| লশুনাদীনাং তু দ্রব্যান্তরাসংযোগে সত্যেব মেলকো বিরুদ্ধ ইতি শাস্ত্রবচনাদুন্নীযতে||১০২-১০৩||
Adhikarana 53 (104-106) · Śloka 106
এষাং খল্বপরেষাং চ বৈরোধিকনিমিত্তানাং ব্যাধীনামিমে ভাবাঃ প্রতিকারা ভবন্তি| তদ্যথা- বমনং বিরেচনং চ, তদ্বিরোধিনাং চ দ্রব্যাণাং সংশমনার্থমুপযোগঃ, তথাবিধৈশ্চ দ্রব্যৈঃ পূর্বমভিসংস্কারঃ শরীরস্যেতি||১০৪|| ভবতশ্চাত্র- বিরুদ্ধাশনজান্ রোগান্ প্রতিহন্তি বিবেচনম্| বমনং শমনং চৈব পূর্বং বা হিতসেবনম্||১০৫|| সাত্ম্যতোঽল্পতযা বাঽপি দীপ্তাগ্নেস্তরুণস্য চ| স্নিগ্ধব্যাযামবলিনাং বিরুদ্ধং বিতথং ভবেত্||১০৬||
एषां खल्वपरेषां च वैरोधिकनिमित्तानां व्याधीनामिमे भावाः प्रतिकारा भवन्ति| तद्यथा- वमनं विरेचनं च, तद्विरोधिनां च द्रव्याणां संशमनार्थमुपयोगः, तथाविधैश्च द्रव्यैः पूर्वमभिसंस्कारः शरीरस्येति||१०४|| भवतश्चात्र- विरुद्धाशनजान् रोगान् प्रतिहन्ति विवेचनम्| वमनं शमनं चैव पूर्वं वा हितसेवनम्||१०५|| सात्म्यतोऽल्पतया वाऽपि दीप्ताग्नेस्तरुणस्य च| स्निग्धव्यायामबलिनां विरुद्धं वितथं भवेत्||१०६||
🔊 Audio coming soon
তদ্বিরোধিনামিতি ষাঢ্যাদিহরাণাম্| তথাবিধৈরিতি বিরুদ্ধাহারজব্যাধিবিরুদ্ধৈঃ| অভিসংস্কার ইতি সততোপযোগেন শরীরভাবনম্| কিংবা তথাবিধৈরিতি রসাযনপ্রযোগৈঃ| এতচ্চানাগতাবাধচিকিত্সিতং জ্ঞেযম্||১০৪-১০৬||
Adhikarana 54 (107-113) · Śloka 113
তত্র শ্লোকাঃ- মতিরাসীন্মহর্ষীণাং যা যা রসবিনিশ্চযে| দ্রব্যাণি গুণকর্মভ্যাং দ্রব্যসঙ্খ্যা রসাশ্রযা||১০৭|| কারণং রসসঙ্খ্যাযা রসানুরসলক্ষণম্| পরাদীনাং গুণানাং চ লক্ষণানি পৃথক্পৃথক্||১০৮|| পঞ্চাত্মকানাং ষট্ত্বং চ রসানাং যেন হেতুনা| ঊর্ধ্বানুলোমভাজশ্চ যদ্গুণাতিশযাদ্রসাঃ||১০৯|| ষণ্ণাং রসানাং ষট্ত্বে চ সবিভক্তা বিভক্তযঃ| উদ্দেশশ্চাপবাদশ্চ দ্রব্যাণাং গুণকর্মণি||১১০|| প্রবরাবরমধ্যত্বং রসানাং গৌরবাদিষু| পাকপ্রভাবযোর্লিঙ্গং বীর্যসঙ্খ্যাবিনিশ্চযঃ||১১১|| ষণ্ণামাস্বাদ্যমানানাং রসানাং যত্ স্বলক্ষণম্| যদ্যদ্বিরুধ্যতে যস্মাদ্যেন যত্কারি চৈব যত্||১১২|| বৈরোধিকনিমিত্তানাং ব্যাধীনামৌষধং চ যত্| আত্রেযভদ্রকাপ্যীযে তত্ সর্বমবদন্মুনিঃ||১১৩||
तत्र श्लोकाः- मतिरासीन्महर्षीणां या या रसविनिश्चये| द्रव्याणि गुणकर्मभ्यां द्रव्यसङ्ख्या रसाश्रया||१०७|| कारणं रससङ्ख्याया रसानुरसलक्षणम्| परादीनां गुणानां च लक्षणानि पृथक्पृथक्||१०८|| पञ्चात्मकानां षट्त्वं च रसानां येन हेतुना| ऊर्ध्वानुलोमभाजश्च यद्गुणातिशयाद्रसाः||१०९|| षण्णां रसानां षट्त्वे च सविभक्ता विभक्तयः| उद्देशश्चापवादश्च द्रव्याणां गुणकर्मणि||११०|| प्रवरावरमध्यत्वं रसानां गौरवादिषु| पाकप्रभावयोर्लिङ्गं वीर्यसङ्ख्याविनिश्चयः||१११|| षण्णामास्वाद्यमानानां रसानां यत् स्वलक्षणम्| यद्यद्विरुध्यते यस्माद्येन यत्कारि चैव यत्||११२|| वैरोधिकनिमित्तानां व्याधीनामौषधं च यत्| आत्रेयभद्रकाप्यीये तत् सर्वमवदन्मुनिः||११३||
🔊 Audio coming soon
সঙ্গ্রহে দ্রব্যসঙ্খ্যা রসাশ্রযা ইতি ‘ভেদশ্চৈষাং’ ইত্যাদিনা; রসসঙ্খ্যা হি পরমার্থতো দ্রব্যসঙ্খ্যৈব, নির্গুণত্বাদ্রসানামিতি ভাবঃ| কারণং রসসঙ্খ্যাযা ইতি ‘রসানাং তত্র যোগ্যত্বাত্’ ইত্যাদিনা| বিভক্তযো ভেদঃ ‘তত্র মধুর’ ইত্যাদিনা| উদ্দেশো দ্রব্যাণাং ‘শীতং বীর্যেণ’ ইত্যাদিনা, অপবাদো দ্রব্যাণাং ‘মধুরং কিঞ্চিত্’ ইত্যাদিনা||১০৭-১১৩||
Adhikarana puShpikA · Śloka 26
ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে আত্রেযভদ্রকাপ্যীযো নাম ষড্বিংশোঽধ্যাযঃ||২৬||
इत्यग्निवेशकृते तन्त्रे चरकप्रतिसंस्कृते श्लोकस्थाने आत्रेयभद्रकाप्यीयो नाम षड्विंशोऽध्यायः||२६||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে অন্নপানচতুষ্কে আত্রেযভদ্রকাপ্যীযো নাম ষড্বিংশতিতমোঽধ্যাযঃ||২৬||