1. dīrghañjīvitīyō'dhyāyaḥ

Adhikarana 1 (1) · Śloka 1

অথাতো দীর্ঘঞ্জীবিতীযমধ্যাযং ব্যাখ্যাস্যামঃ||১||

গুণত্রযবিভেদেন মূর্তিত্রযমুপেযুষে| ত্রযীভুবে ত্রিনেত্রায ত্রিলোকীপতযে নমঃ||১|| সরস্বত্যৈ নমো যস্যাঃ প্রসাদাত্ পুণ্যকর্মভিঃ| বুদ্ধিদর্পণসঙ্ক্রান্তং জগদধ্যক্ষমীক্ষ্যতে||২|| ব্রহ্মদক্ষাশ্বিদেবেশভরদ্বাজপুনর্বসুহুতাশবেশচরকপ্রভৃতিভ্যো নমো নমঃ||৩|| পাতঞ্জলমহাভাষ্যচরকপ্রতিসংস্কৃতৈঃ| মনোবাক্কাযদোষাণাং হর্ত্রেঽহিপতযে নমঃ||৪|| নরদত্তগুরূদ্দিষ্টচরকার্থানুগামিনী| ক্রিযতে চক্রদত্তেন টীকাঽঽযুর্বেদদীপিকা||৫|| সভ্যাঃ সদ্গুরুবাক্সুধাস্রুতিপরিস্ফীতশ্রুতীনস্মি বো নালং তোষযিতুং পযোদপযসা নাম্ভোনিধিস্তৃপ্যতি| ব্যাখ্যাভাসরসপ্রকাশনমিদং ত্বস্মিন্ যদি প্রাপ্যতে ক্বাপি ক্বাপি কণো গুণস্য তদসৌ কর্ণে ক্ষণং ধীযতাম্ ||৬|| ইহ হি ধর্মার্থকামমোক্ষপরিপন্থিরোগোপশমায ব্রহ্মপ্রভৃতিভিঃ প্রণীতাযুর্বেদতন্ত্রেষ্বতিবিস্তরত্বেন সম্প্রতি বর্তমানাল্পাযুর্মেধসাং পুরুষাণাং ন সম্যগর্থাধিগমঃ, তদনধিগমাচ্চ তদ্বিহিতার্থানামননুষ্ঠানে তথৈবোপপ্লবো রুজামিতি মন্বানঃ পরমকারুণিকোঽত্রভবানগ্নিবেশোঽল্পাযুর্মেধসামপি সুখোপলম্ভার্থং নাতিসঙ্ক্ষেপবিস্তরং কাযচিকিত্সাপ্রধানমাযুর্বেদতন্ত্রং প্রণেতুমারব্ধবান্| তস্মিংশ্চ শ্লোকনিদানবিমানশারীরেন্দ্রিযচিকিত্সিতকল্পসিদ্ধিস্থানাত্মকেঽভিধাতব্যে নিখিলতন্ত্রপ্রধানার্থাভিধাযকতযা শ্লোকস্থানমেবাগ্রে বক্তব্যমমন্যত| বক্ষ্যতি হি- “শ্লোকস্থানং সমুদ্দিষ্টং তন্ত্রস্যাস্য শিরঃ শুভম্| চতুষ্কাণাং মহার্থানাং স্থানেঽস্মিন্ সঙ্গ্রহঃ কৃতঃ” (সূ. অ.৩০) ইতি| তত্র চ সূত্রস্থানেঽপ্যুত্পন্নরোগগ্রহণে ত্বরযা রোগোপঘাতিভেষজাভিধাযিচতুষ্কেঽভিধাতব্যে নিখিলতন্ত্রবীজভূতহেতুলিঙ্গৌষধাদ্যর্থস্য তথা তন্ত্রপ্রবৃত্ত্যঙ্গপ্রযোজনবদাযুর্বেদাগমাদেরভিধাযকং দীর্ঘঞ্জীবিতীযমধ্যাযমভিধাতুমারব্ধবান্| শ্রোতৃজনপ্রবৃত্তিহেত্বভিধেযপ্রযোজনসম্বন্ধোপদর্শকং শ্রোতৃবুদ্ধিসমাধানায ব্যাখ্যানপ্রতিজ্ঞাপরমষ্টপদমষ্টসঙ্খ্যাযা মঙ্গলত্বেনাদৌ সূত্রং নিবেশিতবান্- অথাতো দীর্ঘঞ্জীবিতীযমধ্যাযং ব্যাখ্যাস্যাম ইতি| যতো নিরভিধেযে কচটতপাদৌ সাভিধেযে বা নিষ্প্রযোজনে কাকদন্তপরীক্ষাদৌ প্রেক্ষাবতাং প্রবৃত্তির্নোপলভ্যতে, তেনাদাবভিধেযপ্রযোজনে অভিধাতব্যে| যদুক্তং- “অভিধেযফলজ্ঞানবিরহস্তিমিতোদ্যমাঃ| শ্রোতুমল্পমপি গ্রন্থং নাদ্রিযন্তে হি সাধবঃ” ইতি| অভিধেযবত্ত্বপ্রযোজনবত্ত্বনির্বাহার্থং চাভিধেযশাস্ত্রযোরভিধানাভিধেযলক্ষণঃ সম্বন্ধঃ, প্রযোজনশাস্ত্রযোশ্চ সাধ্যসাধনভাবলক্ষণোঽভিধাতব্যঃ| তত্রেহাভিধেযং হিতাহিতাদিরূপেণাযুঃ| বক্ষ্যতি হি- “হিতাহিতং সুখং দুঃখমাযুস্তস্য হিতাহিতম্| মানং চ তচ্চ যত্রোক্তমাযুর্বেদঃ স উচ্যতে” (সূ. অ.৩০) ইতি| অত্র চ সর্বাভিধেযাবরোধো যথাস্থানমেব ব্যাকরণীযঃ| প্রযোজনং চ ধাতুসাম্যম্| যথোক্তং- “ধাতুসাম্যক্রিযা চোক্তা তন্ত্রস্যাস্য প্রযোজনম্” (সূ. অ.১) ইতি| সম্বন্ধোঽপ্যাযুঃশাস্ত্রযোরভিধানাভিধেযলক্ষণঃ, প্রযোজনেন চ ধাতুসাম্যেন সমমস্য শাস্ত্রস্য হেযোপাদেযজ্ঞানাবান্তরব্যাপারস্য সাধ্যসাধনভাবলক্ষণঃ| তদেতত্সর্বং দীর্ঘঞ্জীবিতীযমিত্যনেন পদেন দীর্ঘঞ্জীবিতশব্দমধিকৃত্য কৃতপ্রযোজনাভিধাযক ‘ধাতুসাম্যক্রিযা চোক্তা’ ইত্যাদিবাক্যাভিধাযকেন দর্শিতং মন্তব্যম্| ননু, প্রযোজনাভিধানং শাস্ত্রপ্রবৃত্ত্যর্থমিতি যদুক্তং তন্ন যুক্তং, যতো ন প্রযোজনাভিধানমাত্রেণ প্রযোজনবত্তাবধারণং, বিপ্রলম্ভকসংসারমোচনপ্রতিপাদকাদিশাস্ত্রেষু প্রযোজনাভিধানেঽপি নিষ্প্রযোজনত্বদর্শনাত্| অথ মন্যসে, আপ্তপ্রযোজনাভিধানমেতদতোঽত্র যথার্থত্বং; ননু ভো কথমযং প্রযোজনাভিধাযী আপ্তঃ? তদভিহিতশাস্ত্রস্য যথার্থত্বাদিতি চেত্, হন্ত ন যাবচ্ছাস্ত্রস্য প্রযোজনবত্ত্বাবধারণং ন তাবচ্ছাস্ত্রপ্রবৃত্তিঃ, ন যাবচ্ছাস্ত্রপ্রবৃত্তির্ন তাবচ্ছাস্ত্রস্য যথার্থত্বাবধারণং, ন যাবচ্ছাস্ত্রস্য যথার্থত্বাবধারণং ন তাবচ্ছাস্ত্রস্য কর্তুরাপ্তত্বমবধার্যতে, আপ্তত্বানবধৃতৌ চ কুতস্তদভিহিতপ্রযোজনবত্তাবধারণমিতি চক্রকমাপদ্যতে ; অথ মন্যসে, মা ভবতু প্রযোজনবত্তাবধারণম্, অর্থরূপপ্রযোজনবত্তাসন্দেহ এব প্রবর্তকো ভবিষ্যতি, কৃষ্যাদাবপি হি প্রবৃত্তিরর্থসন্দেহাদেব; নহি তত্র কৃষীবলানাং ফললাভাবধারণং বিদ্যতে, অন্তরাঽবগ্রহাদেরপি সম্ভাব্যমানত্বাত্; নন্বেবমসত্যপি প্রযোজনাভিধানে সপ্রযোজননিষ্প্রযোজনশাস্ত্রদর্শনাচ্ছাস্ত্রত্বমেব প্রযোজনবত্তাসন্দেহোপদর্শকমস্তু, তথাঽপ্যলং প্রযোজনাভিধানেন| নৈবং, নহি সামান্যেন প্রযোজনসন্দেহঃ প্রযোজনবিশেষার্থিনং তথা প্রবর্তযতি যথাঽভিপ্রেতপ্রযোজনবিশেষবিষযঃ সন্দেহঃ; অভিপ্রেতবিশেষবিষযশ্চ সন্দেহো ন বিশেষবিষযস্মরণমন্তরা ভবতি, অতো যে তাবদনবধৃতাগ্নিবেশপ্রামাণ্যাস্তেষাং ধাতুসাম্যসাধনমিদং শাস্ত্রং ন বেত্যেবমাকারবিশেষসন্দেহোত্পাদনার্থং প্রযোজনবিশেষাভিধানং; যে পুনঃ পরমর্ষেরগ্নিবেশস্যাদ্যত এবাবধৃতপ্রামাণ্যাস্তেষাং তদভিহিতপ্রযোজনবত্তাবধারণেনৈব প্রবৃত্তিরিতি যুক্তং প্রযোজনাভিধানম্| প্রযোজনাভিধাযিবাক্যে তু স্বল্পপ্রযত্নবোধ্যে প্রযোজনসামান্যসন্দেহাদেব প্রবৃত্তিরুপপন্না, ন পুনরনেকসংবত্সরক্লেশবোধ্যে শাস্ত্রে| তদেবং যদুচ্যতে- ‘প্রযোজনাভিধাযিবাক্যপ্রবৃত্তাবপি প্রযোজনমভিধাতব্যং, তথা চানবস্থা’ ইতি, তন্নিরস্তং ভবতি| অথেত্যাদিসূত্রেঽথশব্দো ব্রহ্মাদিপ্রণীততন্ত্রেষ্বল্পাযুর্মেধসামর্থানবধারণস্য, তথাঽভীষ্টদেবতানমস্কারশাস্ত্রকরণার্থগুর্বাজ্ঞালাভযোরানন্তর্যে প্রযুক্তোঽপি শাস্ত্রাদৌ স্বরূপেণ মঙ্গলং ভবত্যুদকাহরণপ্রবৃত্তোদকুম্ভদর্শনমিব প্রস্থিতানাম্| গ্রন্থাদৌ মঙ্গলসেবানিরস্তান্তরাযাণাং গ্রন্থকর্তৃশ্রোতৄণামবিঘ্নেনেষ্টলাভো ভবতীতি যুক্তং মঙ্গলোপাদানম্| অথশব্দস্য মঙ্গলত্বে স্মৃতিঃ- “ওঙ্কারশ্চাথশব্দশ্চ দ্বাবেতৌ ব্রহ্মণঃ পুরা| কণ্ঠং ভিত্ত্বা বিনির্যাতৌ তেন মাঙ্গলিকাবুভৌ” ইতি| শাস্ত্রান্তরে চাদৌ মঙ্গলত্বেন দৃষ্টোঽযমথশব্দঃ| যথা- “অথ শব্দানুশাসনম্” (ব্যা. ম. ভা. অ. ১ পা. ১ আ. ১), “অথাতো ধর্মং ব্যাখ্যাস্যামঃ” (বৈ . অ.১আ.১সূ.১) ইত্যাদৌ| অভীষ্টদেবতানমস্কারস্তু গ্রন্থাদৌ শিষ্টাচারপ্রাপ্তঃ পরমশিষ্টেনাগ্নিবেশেন কৃত এব, অন্যথা শিষ্টাচারলঙ্ঘনেন শিষ্টত্বমেব ন স্যাদ্ ব্যাখ্যানান্তরাযভযশ্চ ; তথা গ্রন্থাবিনিবেশিতস্যাপি নমস্কারস্য প্রত্যবাযাপহত্বাচ্চ ন গ্রন্থনিবেশনম্| যথা চ গুর্বাজ্ঞালাভানন্তরমেতত্তন্ত্রকরণং তথা “অথ মৈত্রীপরঃ পুণ্যম্” (সূ. অ. ১) ইত্যাদৌ স্ফুটমেব| গ্রন্থকরণে চ গুর্বনুমতিপ্রতিপাদনেন গ্রন্থস্যোপাদেযতা প্রদর্শিতা ভবতি| যত্ পুনঃ শিষ্যপ্রশ্নানন্তর্যার্থত্বমথশব্দস্য বর্ণ্যতে তন্ন মাং ধিনোতি, নহি শিষ্যান্ পুরো ব্যবস্থাপ্য শাস্ত্রং ক্রিযতে; শ্রোতৃবুদ্ধিস্থীকারে তু শাস্ত্রকরণং যুক্তং, ন চ বুদ্ধিস্থীকৃতাঃ প্রষ্টারো ভবন্তি| অতঃ শব্দোঽধিকারপ্রাগবধ্যুপদর্শকঃ, অত ঊর্ধ্বং যদুপদেক্ষ্যামো দীর্ঘঞ্জীবিতীযং তদিতি; যদি বা হেতৌ, যেন ব্রহ্মাদিপ্রণীতাযুর্বেদতন্ত্রাণামুক্তেন ন্যাযেনোত্সম্বন্ধত্বমিব , অতো হেতোর্দীর্ঘঞ্জীবিতীযং ব্যাখ্যাস্যাম ইতি যোজনীযম্| দীর্ঘঞ্জীবিতীযমিত্যত্র দীর্ঘঞ্জীবিতশব্দোঽস্মিন্নস্তীতি মত্বর্থে “অধ্যাযানুবাকযোর্লুক্ চ” (পা. অ. ৫/২/৬০) ইতি ছপ্রত্যযঃ| যদি বা দীর্ঘঞ্জীবিতশব্দমধিকৃত্য কৃতো গ্রন্থোঽধ্যাযরূপস্তন্ত্ররূপো বা, ইত্যস্যাং বিবক্ষাযাম্ “অধিকৃত্য কৃতে গ্রন্থে” (পা. অ. ৪/৩/৮৭) ইত্যধিকারাত্ “শিশুক্রন্দযমসভ” (পা. অ. ৪/৩/৮৮) ইত্যাদিনা ছঃ| এবমন্যত্রাপ্যেবঞ্জাতীযে মন্তব্যম্| অত্র চ সত্যপি শব্দান্তরে দীর্ঘঞ্জীবিতশব্দেনৈব সঞ্জ্ঞা কৃতা, দীর্ঘঞ্জীবিতশব্দস্যৈব প্রবচনাদৌ নিবেশাত্ প্রশস্তত্বাচ্চ| ‘দীর্ঘঞ্জীবিতশব্দোঽস্মিন্নস্তি’ ইতি, দীর্ঘঞ্জীবিতশব্দমধিকৃত্য কৃতো বা, ইত্যনযা ব্যুত্পত্ত্যা দীর্ঘঞ্জীবিতীযশব্দস্তন্ত্রেঽধ্যাযে চ প্রবর্তনীযঃ| তেন দীর্ঘঞ্জীবিতীযং ব্যাখ্যাস্যাম ইত্যনেন তন্ত্রং প্রতি ব্যাখ্যানপ্রতিজ্ঞা লব্ধা ভবতি, পুনর্দীর্ঘঞ্জীবিতীযমিতি পদমাবর্ত্যাধ্যাযপদসমভিব্যাহৃতমধ্যাযব্যাখ্যানপ্রতিজ্ঞাং লম্ভযতি| দৃষ্টং চাবৃত্য পদস্য যোজনং, যথা- অপামার্গতণ্ডুলীযে “গৌরবে শিরসঃ শূলে পীনসে” (সূ. অ. ২) ইত্যাদৌ ‘শিরস’ ইতি পদং ‘গৌরবে’ ইত্যনেন যুজ্যতে, আবৃত্য ‘শূলে’ ইত্যনেন চ| অতশ্চ যদুচ্যতে- অকৃততন্ত্রপ্রতিজ্ঞস্যাধ্যাযপ্রতিজ্ঞা ঊনকাযমানেতি, তন্নিরস্তং ভবতি| যদি বা, অধ্যাযপ্রতিজ্ঞৈবাস্তু, তযৈব তন্ত্রপ্রতিজ্ঞাঽপ্যর্থলব্ধৈব, ন হ্যধ্যাযস্তন্ত্রব্যতিরিক্তঃ, তেনাবযবব্যাখ্যানে তন্ত্রস্যাপ্যবযবিনো ব্যাখ্যা ভবত্যেব; যথা- অঙ্গুলীগ্রহণেন দেবদত্তোঽপি গৃহীতো ভবতি| অবযবান্তরব্যাখ্যানপ্রতিজ্ঞা তু ন লভ্যতে, তাং তু প্রত্যধ্যাযমেব করিষ্যতি| অধ্যাযমিতি অধিপূর্বাদিঙঃ “ইঙশ্চ” (পা. অ. ২/৪/৪৭) ইতি কর্মণি ঘঞা সাধ্যম্| তেন অধীযতে ইত্যধ্যাযঃ| ন চানযা ব্যুত্পত্ত্যা প্রকরণচতুষ্কস্থানাদিষ্বতিপ্রসঙ্গঃ, যতো যোগরূঢেযমধ্যাযসঞ্জ্ঞাঽধ্যাযস্য প্রকরণসমূহবিশেষ এব দীর্ঘঞ্জীবিতীযাদিলক্ষণে পঙ্কজশব্দবদ্বর্ততে ন যোগমাত্রেণ বর্ততে| বক্ষ্যতি হি- “অধিকৃত্যেযমধ্যাযনামসঞ্জ্ঞা প্রতিষ্ঠিতা” (সূ. অ. ৩০) ইতি; নামসঞ্জ্ঞা যোগরূঢসঞ্জ্ঞেত্যর্থঃ| যদি বা করণাধিকরণযোরর্থযোঃ “অধ্যাযন্যাযোদ্যাবসংহারাশ্চ” (পা. অ. ৩/৩/১১২) ইতিসূত্রেণ নিপাতনাদধ্যাযপদসিদ্ধিঃ| অধীযতেঽস্মিন্ননেন বাঽর্থবিশেষ ইত্যধ্যাযঃ| অতিপ্রসক্তিনিষেধস্তূক্তন্যাযঃ| ব্যাখ্যাস্যাম ইতি ব্যাঙ্পূর্বাত্ খ্যাতের্লৃটা সাধ্যম্| চক্ষিঙো হি প্রযোগেঽনিচ্ছতোঽপি ব্যাখ্যাতুঃ ক্রিযাফলসম্বন্ধস্য দুর্নিবারত্বেন “স্বরিতঞিত” (পা. অ. ১/৩/৭২) ইত্যাদিনাঽঽত্মনেপদং স্যাদিতি| ‘বি’ ইতি বিশেষে, বিশেষাশ্চ ব্যাসসমাসাদযঃ| আঙযং ক্রিযাযোগে, যে তু মর্যাদাযামভিবিধৌ বা আঙ্প্রযোগং মন্যন্তে তেষামভিপ্রাযং ন বিদ্মঃ| যতো মর্যাদাযামভিবিধৌ চাঙঃ প্রাতিপদিকেন যোগঃ স্যাত্; যথা- “আসমুদ্রক্ষিতীশানাং” (র. বং. অ. ১) “আপাটলীপুত্রাদ্বৃষ্টো দেব” ইত্যাদৌ, ইহাপি চ তথা| ক্রিযাযোগবিরহে “উপসর্গাঃ ক্রিযাযোগে” (পা. অ. ১/৪/৫৯) ইতি নিযমাদাঙ উপসর্গত্বং ন স্যাত্; ততশ্চানুপসর্গেণাঙা ব্যবধানাদ্ বেরুপসর্গস্য প্রযোগো ন স্যাত্| যেনাব্যবহিতঃ সজাতীযব্যবহিতো বা ধাতোরুপসর্গো ভবতি| ব্যাঙোরুভযোরপ্যনুপসর্গত্বে তত্সম্বন্ধোচিতভূরিপ্রাতিপদিককল্পনাগৌরবপ্রসঙ্গঃ স্যাত্; তস্মাত্ ক্রিযাযোগিত্বমেবাঙো ন্যায্যম্| অথ, অতঃ, দীর্ঘং, জীবিতীযম্, অধ্যাযং, বি, আ, খ্যাস্যাম ইত্যষ্টপদত্বম্||১||

Adhikarana 2 (2) · Śloka 2

ইতি হ স্মাহ ভগবানাত্রেযঃ||২||

ননু কথমগ্নিবেশঃ সকলপদার্থাশেষবিশেষজ্ঞানব্যাখ্যেযমাযুর্বেদং ব্যাখ্যাস্যতি; যতো ন তাবদ্ভেষজাদীনামশেষবিশেষঃ প্রত্যক্ষজ্ঞেযঃ, সর্বপদার্থানাং বিশেষাণাং প্রত্যক্ষাবিষযত্বাত্; অন্বযব্যতিরেকাভ্যাং তু সর্বপদার্থাবধারণং দুষ্করমেব , যত একমেব মধু স্বরূপেণ জীবযতি, মারযতি চোষ্ণং সমঘৃতং চ, কফপ্রকৃতের্হিতমহিতং বাতপ্রকৃতেঃ, অনূপে সাত্ম্যমসাত্ম্যং মরৌ, শীতে সেব্যমসেব্যং গ্রীষ্মে, হিতমবৃদ্ধে বৃদ্ধে চাহিতম্, অল্পং গুণকরমাবাধকরমত্যুপযুক্তম্, আমতাং গতমুদরে উপক্রমবিরোধিত্বাদতিবিভ্রমকরং, কাকমাচীযুক্তং পক্বনিকুচেন চ সহোপযুক্তং মরণায অথবা বলবর্ণবীর্যতেজৌপঘাতায ভবতি, ইত্যেবমাদি তত্তদ্যুক্তং তত্তচ্ছতশঃ করোতি; অত এবৈকস্যৈব মধুনো রূপং যদাঽনেন প্রকারেণ দুরধিগমং, তদাঽত্র কৈব কথা নিখিলপদার্থাশেষবিশেষজ্ঞানস্য; অজানংশ্চ ব্যাচক্ষাণঃ কথমুপাদেযবচন ইতি কৃত্বা গুরোরাপ্তাত্ প্রতিপন্নং প্রতিপাদযিষ্যাম ইতি দর্শযন্ তামিমাং শঙ্কাং নিরাচিকীর্ষুর্গুরূক্তানুবাদরূপতাং স্বগ্রন্থস্য দর্শযন্নাহ- ইতি হ স্মাহ ভগবানাত্রেয ইতি| অত্র ইতিশব্দো বক্ষ্যমাণার্থপরামর্শকঃ, হশব্দোঽবধারণে; যথা- “ন হ বৈ সশরীরস্য প্রিযাপ্রিযযোরপহতিরস্তি” ইতি, অত্র ন হেতি নৈবেত্যর্থঃ| অত্র ‘স্মাহ’ ইতি স্মশব্দপ্রযোগেণ ভূতমাত্র এব লিডর্থে “লট্ স্মে” (পা.অ.৩পা.২সূ.১১৮) ইতি লট্; ন ভূতানদ্যতনপরোক্ষে, আত্রেযোপদেশস্যাগ্নিবেশং প্রত্যপরোক্ষত্বাত্| যথা চ ভূতমাত্রে লিড্ ভবতি তথাচ দর্শযিষ্যামঃ| ভগং পূজিতং জ্ঞানং, তদ্বান্; যথোক্তম্- “উত্পত্তিং প্রলযং চৈব ভূতানামাগতিং গতিম্| বেত্তি বিদ্যামবিদ্যাং চ স বাচ্যো ভগবানিতি”; যদি বা ভগশব্দঃ সমস্তৈশ্বর্যমাহাত্ম্যাদিবচনঃ ; যথোক্তম্- “ঐশ্বর্যস্য সমগ্রস্য বীর্যস্য যশসঃ শ্রিযঃ| জ্ঞানবৈরাগ্যযোশ্চৈব ষণ্ণাং ভগ ইতীঙ্গনাঃ” ইতি| অত্রেরপত্যমাত্রেযঃ; অনেন বিশুদ্ধবংশত্বং দর্শিতং ভবতি| অত্রান্যে বর্ণযন্তি- “চতুর্বিধং সূত্রং ভবতি- গুরুসূত্রং, শিষ্যসূত্রং, প্রতিসংস্কর্তৃসূত্রম্, একীযসূত্রং চেতি”| তত্র গুরুসূত্রং যথা- “নৈতদ্বুদ্ধিমতা দ্রষ্টব্যমগ্নিবেশ” (সূ.অ.৪) ইত্যাদি, প্রতিসংস্কর্তৃসূত্রং যথা- “তমুবাচ ভগবানাত্রেযঃ” (সূ.অ.৪) ইত্যাদি, শিষ্যসূত্রং যথা- “নৈতানি ভগবন্ পঞ্চকষাযশতানি পূর্যন্তে” (সূ.অ.৪) ইত্যাদি, একীযসূত্রং যথা- “কুমারস্য শিরঃ পূর্বমভিনির্বর্তত ইতি কুমারশিরা ভরদ্বাজঃ” (শা.অ.৬) ইত্যাদি| তেনাদ্যং ব্যাখ্যানপ্রতিজ্ঞাসূত্রং গুরোরেব, শিষ্যস্যাগ্নিবেশস্য ব্যাখ্যানেঽনধিকারত্বাত্| দ্বিতীযং চ সূত্রং প্রতিসংস্কর্তুঃ| ইতিশব্দেন চ প্রকারবাচিনা ‘দীর্ঘঞ্জীবিতীযং ব্যাখ্যাস্যাম’ ইতি পরামৃশ্যতে; তেনাহস্মেতি ভূতানদ্যতনপরোক্ষ এব ভবতি, প্রতিসংস্কর্তারং প্রত্যাত্রেযোপদেশস্য পরোক্ষত্বাত্| অনেন চ ন্যাযেন তমুবাচ ভগবানাত্রেয ইত্যাদাবপি লিড্বিধিরুপপন্নো ভবতি| সুশ্রুতে চ “যথোবাচ ভগবান্ ধন্বন্তরিঃ” (সু.সূ.অ.১) ইতি প্রতিসংস্কর্তৃসূত্রমিতি কৃত্বা টীকাকৃতা “লিড্বিধিরুপপাদিতঃ’ ইতি| অত্র ব্রূমঃ- যত্তাবদুক্তং শিষ্যস্যাগ্নিবেশস্য ব্যাখ্যানানধিকারাদিদং গুরোঃ সূত্রং; তন্ন, নহি জাত্যা গুরুত্বমস্তি, যতঃ স এবাত্রেযঃ স্বগুরুমপেক্ষ্য শিষ্যঃ, অগ্নিবেশাদীনপেক্ষ্য গুরুঃ; এবমগ্নিবেশোঽপি গ্রন্থকরণকালে স্ববুদ্ধিস্থীকৃতাঞ্ শিষ্যান্ প্রতি গুরুরিতি ন কশ্চিদ্দোষঃ| যত্পুনর্দ্বিতীযসূত্রস্য প্রতিসংস্কর্তৃসূত্রতযা ভূতানদ্যতনপরোক্ষে লিড্বিধিরুপপাদ্যতে, তত্র বিচার্যং- কিমিদং দ্বিতীযং সূত্রং পূর্ববাক্যৈকতাপন্নং ন বা? যদ্যেকবাক্যতাপন্নং তদা সুশ্রুতে- তথা ব্যাখ্যাস্যামো যথোবাচ ধন্বন্তরিরিতি যোজনীযং, তথাচ তথা ব্যাখ্যাস্যাম ইতি ক্রিযৈকবাক্যতাপন্নমুবাচেতি পদং ন ভিন্নকর্তৃকং ভবিতুমর্হতি, তথাচ কুতো লিড্বিধিঃ; অথ নৈকতাপন্নং, তদা গৌরশ্বঃ পুরুষো হস্তীতিবন্নার্থসঙ্গতিঃ| কিঞ্চ জতূকর্ণাদৌ প্রতিসংস্কর্তৃশ্রুতিগন্ধোঽপি নাস্তি, তত্ কথং “নানাশ্রুতপরিপূর্ণকণ্ঠঃ শিষ্যো জতূকর্ণঃ প্রাঞ্জলিরধিগম্যোবাচ” ইত্যাদৌ লিড্বিধিঃ| অনেন ন্যাযেন চরকেঽপি প্রতিসংস্কর্তৃসূত্রপক্ষে লিড্বিধির্নাস্তি, তস্মাচ্চরকেঽগ্নিবেশঃ সুশ্রুতে সুশ্রুত এব সূত্রাণাং প্রণেতা, ক্বচিত্ কিঞ্চিদর্থং স্তোতুং নিন্দিতুং বাঽঽখ্যাযিকারূপং পুরাকল্পং দর্শযন্ কিমপি সূত্রং গুরূক্তানুবাদরূপতযা কিমপ্যেকীযমতানুবাদরূপতযা লিখতি; প্রতিসংস্কর্তা ত্বযং গ্রন্থং পূরযতি তদাদ্যগ্রন্থকর্তৃতযৈব| লিড্বিধিস্তু ভূতানদ্যতনমাত্র এব ছন্দোবিহিতো ভাষাযামপি বর্ণনীযঃ, অন্যথা উবাচেতি পদং জতূকর্ণাদৌ ন স্যাত্; তথা চ হরিবংশে ধন্যোপাখ্যানে “মামুবাচ” ইতি, তথা “অহমুবাচ” ইতি চ ন স্যাত্; যথা “স মামুবাচাম্বুচরঃ কূর্মো মানুষবত্ স্বযম্| কিমাশ্চর্যং মযি মুনে ধন্যশ্চাহং কথং বিভো” (হরিবংশে, বিষ্ণুপর্ব ২অ.১১০) ইতি, তথা “স্বযম্ভুবচনাত্ সোঽহং বেদান্ বৈ সমুপস্থিতঃ| উবাচ চৈনাংশ্চতুরঃ” ইতি| যদপি ‘ইতি হ স্মাহ’ ইত্যত্র ইতিশব্দেন পূর্বসূত্রং পরামৃশ্যতে; তন্ন, যেন দীর্ঘঞ্জীবিতীযাদিসূত্রমাত্রস্য তদর্থস্য বা গুরূক্তত্বপ্রতিপাদনে সতি নৈবোত্তরত্রাভিধেযাভিধানেন নিখিলতন্ত্রস্য গুরূক্তানুবাদরূপতযা করণং শ্রোতৃশ্রদ্ধাকরণং প্রতিপাদিতং ভবতি| ভবতি তু ভাবযিতুং যথা পুরা ব্যাখ্যাতং, তস্মাত্তদেব ন্যায্যমিতি| অগ্নিবেশস্য ব্যাখ্যাস্যাম ইতি বহুবচনমেকস্মিন্নপ্যস্মদঃ প্রযোগাদ্বহুবচনপ্রযোগস্য সাধুত্বাত্; সাধু হি বদন্তি বক্তারো- ‘বযং করিষ্যামঃ’ ইতি| ভগবানাত্রেয ইত্যত্র ত্বেকবচননির্দেশঃ কৃতঃ, ভগবানিত্যনেনৈবাত্রেযস্য গুরোর্গৌরবস্য দর্শিতত্বাত্||২||

Adhikarana 3 (3) · Śloka 3

দীর্ঘং জীবিতমন্বিচ্ছন্ভরদ্বাজ উপাগমত্| ইন্দ্রমুগ্রতপা বুদ্ধ্বা শরণ্যমমরেশ্বরম্||৩||

ননু যথাঽগ্নিবেশস্যাযুর্বেদস্য দুরধিগমত্বেন প্রত্যক্ষতো বাঽন্বযব্যতিরেকাদ্বা জ্ঞানং ন সম্ভাব্যতে, এবমাত্রেযস্যাপি কথমাযুর্বেদজ্ঞানং স্যাত্, যন্মূলমগ্নিবেশস্যাযুর্বেদজ্ঞানং সমীচীনমুচ্যতে, ইত্যাশঙ্ক্যাযুর্বেদস্যাবিপ্লুতাগমত্বং দর্শযন্নাহ- দীর্ঘং জীবিতমিত্যাদি| জীবিতং শরীরেন্দ্রিযসত্ত্বাত্মসংযোগঃ| তচ্চ দীর্ঘমিতি দীর্ঘকালসম্বন্ধি, কালশব্দোঽপ্যত্র লুপ্তনির্দিষ্টো দ্রষ্টব্যঃ| যত্তন্ত্রশৈলী চেযমাচার্যস্য যত আদিমধ্যান্তলোপান্ করোতি, যে লুপ্তা অপি গম্যন্ত এব| যথা “গ্রাম্যানূপৌদকরসা” (সূ.অ.২১) ইত্যত্র মাংসশব্দো লুপ্তঃ, তথা ‘দগ্ধবিদ্ধ’ ইত্যত্র বিষশব্দো লুপ্ত ইত্যাদি| অন্বিচ্ছন্নিতি অনুরূপং দীর্ঘমিচ্ছন্| ভরদ্বাজ ইতি গোত্রনাম| ‘উগ্রতপা’ ইতি বিশেষণেন ভরদ্বাজস্য মানুষস্যাপীন্দ্রাভিগমনশক্তিঃ, তথা শরণ্যত্বপ্রতীতিশক্তিশ্চোপদর্শ্যতে; অচিন্ত্যো হি তপসাং প্রভাবো যেনাগস্ত্যো মহোদধিমপি চুলুকনিপেযমকরোত্| নচ বাচ্যমুগ্রতপস্ত্বেনৈব কিমিত্যযমাযুর্বেদমপি ন বুধ্যতে, যতস্তপঃপ্রভাবোঽপি প্রতিনিযতবিষযত্বান্ন সর্বত্র শক্তিমান্, শক্তিশ্চাস্য কার্যোন্নেযা; তেন গুরুনিরপেক্ষাযুর্বেদজ্ঞানলক্ষণকার্যাদর্শনান্ন তত্তপস্তত্র সমর্থমিত্যবধারযামঃ; কিংবা গুরুপূর্বক্রমেণৈবাযুর্বেদজ্ঞানং ফলতীতীন্দ্রমুপাগমদ্ভরদ্বাজঃ| অথ কথং ব্রহ্মাদিষ্বাযুর্বেদপূর্বগুরুষু বিদ্যমানেষ্বিন্দ্রমেবাযমুপাগমত্? যুক্তং চ প্রধানগুরোরেব শ্রবণং, যতঃ শিষ্যপরম্পরাসঞ্চারিণী বিদ্যাঽসম্যগ্গ্রহণাদিদোষাত্ পাত্রপরম্পরাসঞ্চার্যমাণমধুবত্ ক্ষীণাঽপি সম্ভাব্যেত; অত আহ- বুদ্ধ্বা শরণ্যমমরেশ্বরমিতি| যস্মাদযমেবেন্দ্রোঽল্পাযুঃ, স এব ভযত্রস্তানাং যথা শরণ্যো রক্ষণহিতো ন তথা ব্রহ্মাদযঃ, তেন তমেবোপাগমত্| অমরেশ্বর ইত্যনেন চেন্দ্রস্য রক্ষণোপযুক্ততাং দর্শযতি; রাজা হি প্রজারক্ষণে প্রযত্নাতিশযবান্ ভবতি| ননু দীর্ঘং জীবিতমন্বিচ্ছন্নিত্যত্র দীর্ঘস্যাব্যবস্থিতত্বেন কিযত্কালং তদ্দীর্ঘমভিপ্রেতং? তত্র যুগানুরূপং বর্ষশতং, যদুক্তং- “বর্ষশতং খল্বাযুষঃ প্রমাণমস্মিন্ কালে” (বি.অ.৩) ইতি| এতচ্চ কলিকালাদৌ পরমাযুঃকালস্য যথা যথা ক্ষযস্তথাঽঽযুষঃ ক্ষযঃ| যদাহ- “সংবত্সরশতে পূর্ণে যাতি সংবত্সরঃ ক্ষযম্| দেহিনামাযুষঃ কালে যত্র যন্মানমিষ্যতে” (বি.অ.৩) ইতি| এতদনুসারেণ পূর্বযুগেষ্বাযুঃপ্রকর্ষঃ| যদাহ ভগবান্ ব্যাসঃ- “পুরুষাঃ সর্বসিদ্ধাশ্চ চতুর্বর্ষশতাযুষঃ| কৃতে ত্রেতাদিকেঽপ্যেবং পাদশো হ্রসতি ক্রমাত্” ইতি| কর্মানুরূপং চাযুর্নিযতং বা, অনিযতং বা ভবতি| তত্র বলবত্কর্মারব্ধং নিযতং, যথাঽযমস্মিন্ কালে ম্রিযত এব পরম্; অবলবত্কর্মারব্ধং ত্বনিযতং, তদ্যদা দৃষ্টং বিষাদি মারকং প্রত্যযমাসাদযতি তদা সঞ্জাতবলং মারযতি, যদা ন প্রাপ্নোতি দৃষ্টং মারকং কারণং তদা যুগানুরূপাযুঃপ্রাপ্তৌ যুগপ্রভাবজর্জরীকৃতশরীরং মারযতি| অত্র দৃষ্টান্তশ্চাচার্যেণ দর্শিতঃ “যথা হ্যক্ষঃ স্বগুণোপপন্নো বাহ্যমানো যথাকালং স্বপ্রমাণক্ষযাদেবাবসানং গচ্ছতি, স এবাক্ষোঽতিভারাধিষ্ঠিত” ইত্যারভ্য যাবত্ “অন্তরা ব্যসনমাপদ্যতে; তথাঽনিযতাযুষোঽন্তরা প্রাণা অপরাধান্নিরুধ্যন্তে” (বি.অ.৩) ইত্যন্তেন| যদা ত্বনিযতাযুষো রসাযনমাচরন্তি তদা তত্প্রভাবাদ্যুগপ্রভাবনিযতাযুর্লঙ্ঘনং ভবতি| যদাহ- “তানি যাবন্তি ভক্ষযেত্| জীবেদ্বর্ষসহস্রাণি তাবন্ত্যাগতযৌবনঃ” (চি.অ.১) ইত্যাদি| ন তু বলবত্কর্মনিযতস্যাযুষো লঙ্ঘনমস্তি, যদাহ- “কর্ম কিঞ্চিত্ ক্বচিত্কালে বিপাকে নিযতং মহত্| কিঞ্চিত্ত্বকালনিযতং প্রত্যযৈঃ প্রতিবোধ্যতে” (বি.অ.৩) ইতি| হন্ত যদ্যেবং তদা সর্বত্র কর্মৈব কারণং মরণে জীবিতে বা তথা ব্যাধৌ ব্যাধ্যপগমে বা, তত্ কিমনেনাযুর্বেদেন কর্মজনিতফলানুবিধাযিনা; তথাহি- যত্তাবদুচ্যতে- নিযতং কর্ম, তত্র তাবদাযুর্বেদব্যাপারো নাস্তি, যেন নিযতেনৈব কর্মণা মিলিতমপি দৃষ্টং তত্র বিফলীক্রিযতে; যচ্চাবলবত্কর্মারব্ধত্বেনানিযতমাযুরুচ্যতে তদপি ন শ্রদ্ধাধীনং, যেনাদৃষ্টশক্তিপরাভবেন দৃষ্টস্য কার্যকারিতাং দৃষ্ট্বাঽপি বিবাদাধ্যাসিতে বিষযেঽদৃষ্টমেব কারণমবধারযামঃ, দৃষ্টং ত্বদৃষ্টাকৃষ্টমেব তত্র ভবতি| নৈবম্, এবং সতি সর্বানুষ্ঠানস্যোপরমপ্রসঙ্গঃ; কিঞ্চ কেবলকর্মবাদিনো দৃষ্টমপবদতোঽদৃষ্টোত্পত্তিরেব ন প্রাপ্নোতি, অদৃষ্টং হি দৃষ্টাগ্নিষ্টোমাদিজন্যং, দৃষ্টং চ কারণং কর্মবাদিনোঽভিমতম্; অথাদৃষ্টকারণং দৃষ্টমিচ্ছন্তি হন্ত তর্হি তেনৈব ন্যাযেন দহনাদীনামপি কিমিতি শীতাপহত্বস্ফোটাদিজনকত্বাদি ন স্বীক্রিযতে; কিঞ্চ কেবলকর্মবাদিনো দৃষ্টে কারণে ব্যাপ্তিগ্রহণাভাবাদদৃষ্টানুমানমেব ন স্যাত্, তস্মাদ্দৃষ্টমদৃষ্টং চ কারণম্| তত্র ক্বচিদদৃষ্টং দৃষ্টেন বাধ্যতে, ক্বচিচ্চ দৃষ্টমদৃষ্টেনেতি; তেন যত্র পুরুষে বলবন্নিযতমরণকারণমদৃষ্টং , তত্র জীবিতমরণযোরকিঞ্চিত্করোঽযমাযুর্বেদঃ, কিন্তু তত্রাপি নিযতমরণকালাদর্বাগ্দুঃখজনকব্যাধিপ্রশমনে ব্যাপ্রিযত এব যদি ব্যাধিরপি তস্য নিযতকর্মজন্যো ন স্যাত্; যত্তু কর্মানিযতবিপাকং ভবতি তত্প্রতি সর্বথা প্রযোজনবদাযুর্বেদোপাদানম্| যত্তু যুগনিযতমাযুঃ, তন্নাতিবলবতা কর্মণা নিযমিতং; যেন রসাযনপ্রযোগাত্তদ্বাধনং দৃষ্টত্বাদনুমন্যন্তে, ন তু স্বস্থহিতাতুরহিতচিকিত্সাভ্যাম্| অযং চ বাদঃ শাস্ত্রকারেণ স্বযমেব প্রপঞ্চেন নির্লোচনীয ইতি নেহ প্রতন্যতে||৩||

Adhikarana 4 (4-5) · Śloka 5

ব্রহ্মণা হি যথাপ্রোক্তমাযুর্বেদং প্রজাপতিঃ| জগ্রাহ নিখিলেনাদাবশ্বিনৌ তু পুনস্ততঃ||৪|| অশ্বিভ্যাং ভগবাঞ্ছক্রঃ প্রতিপেদে হ কেবলম্| ঋষিপ্রোক্তো ভরদ্বাজস্তস্মাচ্ছক্রমুপাগমত্||৫||

কথমিন্দ্র এব শরণ্যো ন ব্রহ্মাদয ইত্যাহ- ব্রহ্মণা হীত্যাদি| হি যস্মাদর্থে| প্রজাপতির্দক্ষনামা| প্রোক্তমিতি প্রকর্ষেণোক্তং, প্রকর্ষশ্চানবশেষেণাভিধানম্| যথেত্যনেন তথাশব্দস্য নিত্যসম্বন্ধস্যাকর্ষণাদ্যাদৃশং প্রোক্তং তাদৃশমেব জগ্রাহ| নিখিলেনেতি অনবশেষেণ| অশ্বিনৌ তু ততঃ প্রজাপতের্জগৃহতুঃ| অত্রাপি যথাপ্রোক্তং নিখিলেন চেতিপদং তথৈব যোজনীযম্| এবমশ্বিভ্যাং ভগবাঞ্ছক্রঃ প্রতিপেদে হেত্যত্রাপি যথাপ্রোক্তমিত্যাদি যোজনীযম্| হশব্দস্ত্ববধারণে, তেন প্রতিপেদে এব পরং শক্রো নতু কস্মৈচিদাযুর্বেদং দত্তবানিত্যর্থঃ| অনেন চ গ্রন্থেনান্যূনাধিকাযুর্বেদাগমোপদর্শকেন যথা ব্রহ্মণ আযুর্বেদজ্ঞানং তথেন্দ্রস্যাপীতি দর্শিতম্| তেন ব্রহ্মণো বাঽঽযুর্বেদঃ শ্রূযতে ইন্দ্রাদ্বেতি ন কিঞ্চিদর্থতো বিশেষঃ| ইন্দ্রে ত্বিদমধিকং- যদযমসঙ্ক্রামিতবিদ্যত্বেন শিষ্যার্থী| যদুক্তং- “যো হি গুরুভ্যঃ সম্যগাদায বিদ্যাং ন প্রযচ্ছত্যন্তেবাসিভ্যঃ স খল্বৃণী গুরুজনস্য মহদেনো বিন্দতি” ইতি, অতোঽকৃতশিষ্যত্বেন শিষ্যার্থিত্ববিশেষযোগাদ্ব্রহ্মাদিভ্যো বিশেষেণেন্দ্র এব শরণ্য ইতি| ব্রহ্মণস্তু পরমগুরোর্বিদিতসকলবেদস্য সর্বত্রাতিরোহিতমতেরাযুর্বেদজ্ঞানং স্বতঃসিদ্ধমেবেতি ন গুর্বন্তরাপেক্ষা| এতচ্চ ব্রহ্মাদিগুরুপরম্পরোপদর্শনমাযুর্বেদস্যাবিপ্লুতাগমোপদর্শনার্থং তথা মহাপুরুষসেবিতত্বেনোপাদেযত্বোপদর্শনার্থং চ| বচনং হি- “তত্র যন্মন্যেত মহদ্যশস্বিসুধীরপুরুষাসেবিতম্” ইত্যাদি যাবত্ “তদভিপ্রপদ্যেত শাস্ত্রম্” (বি.অ.৮) ইতি| ঋষিপ্রোক্ত ইতি বক্ষ্যমাণবৃত্তান্তেন ঋষিপ্রোক্তঃ| তস্মাদিতি যস্মাদিন্দ্র এব বিশেষেণ শরণ্যঃ||৪-৫||

Adhikarana 5 (6-7) · Śloka 7

বিঘ্নভূতা যদা রোগাঃ প্রাদুর্ভূতাঃ শরীরিণাম্| তপোপবাসাধ্যযনব্রহ্মচর্যব্রতাযুষাম্ ||৬|| তদা ভূতেষ্বনুক্রোশং পুরস্কৃত্য মহর্ষযঃ| সমেতাঃ পুণ্যকর্মাণঃ পার্শ্বে হিমবতঃ শুভে||৭||

অথ কথমযমৃষিপ্রোক্ত ইত্যাযুর্বেদস্য মর্ত্যলোকাগমে হেতুমাহ- বিঘ্নভূতা ইত্যাদি| বিঘ্নভূতা ইত্যন্তরাযস্বরূপাঃ| রুজন্তীতি রোগাঃ| প্রাদুর্ভূতা ইত্যাবির্ভূতাঃ| অযং চ রোগপ্রাদুর্ভাবঃ কৃতযুগান্তে বোদ্ধব্যঃ| বক্ষ্যতি হি- “ভ্রশ্যতি তু কৃতযুগে” (বি.অ.৩) ইত্যাদিনা রোগপ্রাদুর্ভাবং জনপদোদ্ধ্বংসনীযে| প্রাদুর্ভাবশ্চ পূর্বসিদ্ধস্যৈবাবির্ভাবঃ| তেন রোগসন্তাননিত্যতাঽপ্যবিরুদ্ধা ভবত্যর্থেদশমহামূলীযে (সূ.অ.৩০) বক্তব্যা| শীর্যত ইতি শরীরং, তদস্যাস্তীতি শরীরী| এতেন শরীরং স্বত এব শীর্যমাণং রোগসম্বন্ধাত্তু নিতরাং শীর্যত ইতি সূচযতি| কেষাং বিঘ্নভূতা ইত্যাহ- তপোপবাসাধ্যযনেত্যাদি| রোগগ্রস্তা হি শরীরিণস্তপঃপ্রভৃতীনি কর্তুং ন পারযন্তি বিকৃতত্বাত্; তথা, আযুষশ্চ মারকত্বেন কেচিদ্গদা বিরোধকা ভবন্তি| অত্র তপশ্চান্দ্রাযণাদি, উপবাসঃ ক্রোধাদিপরিত্যাগঃ সত্যাদ্যুপাদানং চ, বচনং হি- “উপাবৃত্তস্য পাপেভ্যঃ সহবাসো গুণে হি যঃ| উপবাসঃ স বিজ্ঞেযো ন শরীরস্য শোষণম্” ইতি; অধ্যযনং বেদাধ্যযনং, ব্রহ্মণে মোক্ষায চর্যং ব্রহ্মচর্যমুপস্থনিগ্রহাদি, ব্রতমীপ্সিতকামো নিযমঃ, আযুরুক্তম্| তপোপবাসেতি প্রযোগঃ পূর্বত্রাসিদ্ধবিধেরনিত্যত্বেন তপঃসকারস্থানিভূতযলোপস্য সিদ্ধত্বাজ্জ্ঞেযঃ, যথা “নোপধাযাঃ” (পা.অ.৬পা.৪সূ.৭) ইতি| ভূতেষু প্রাণিষু| অনুক্রোশমিতি অনুকম্পাং, কস্মাত্? অনেকার্থত্বাদ্ধাতূনাম্| পুরস্কৃত্য আদৃত্য| এতেন প্রাণিরোগহরণমেব প্রধানমাযুর্বেদোপগমনে মহর্ষীণাং ফলম্; আযুঃপ্রকর্ষস্ত্বনুষঙ্গসিদ্ধস্তেষাং মহাত্মনামিতি ভাবঃ| নরেষ্বিতি বক্তব্যে যদযং ভূতেষ্বিতি সামান্যশব্দং করোতি, তেন ন সমানজীবপ্রযুক্তেযমনুকম্পা , কিন্তু প্রাণিমাত্রপ্রযুক্তেতি সমদর্শিতামৃষীণাং দর্শযতি| মহান্তশ্চ তে ঋষযশ্চেতি মহর্ষযঃ; অনেন চতুর্বিধা অপি ঋষযঃ- ঋষিকা, ঋষিপুত্রা, দেবর্ষযো, মহর্ষযশ্চ গৃহ্যন্তে; মহর্ষ্যনুগামিত্বাদৃষিকাদীনামপি গ্রহণম্| পুণ্যং পাবনং কর্ম যেষাং তে পুণ্যকর্মাণঃ| পর্শুকাভিস্তৃতং পার্শ্বং, তেন পার্শ্বমিব (ততং) পার্শ্বম্| শুভে ইতি পদং কর্তব্যসমাধ্যনুগুণোপদর্শনার্থং, যতঃ শুভে হি দেশে সমাধযঃ প্রসীদন্তি||৬-৭||

Adhikarana 6 (8-14) · Śloka 15

অঙ্গিরা জমদগ্নিশ্চ বসিষ্ঠঃ কশ্যপো ভৃগুঃ| আত্রেযো গৌতমঃ সাঙ্খ্যঃ পুলস্ত্যো নারদোঽসিতঃ||৮|| অগস্ত্যো বামদেবশ্চ মার্কণ্ডেযাশ্বলাযনৌ| পারিক্ষির্ভিক্ষুরাত্রেযো ভরদ্বাজঃ কপিঞ্জ(ষ্ঠ)লঃ||৯|| বিশ্বামিত্রাশ্মরথ্যৌ চ ভার্গবশ্চ্যবনোঽভিজিত্| গার্গ্যঃ শাণ্ডিল্যকৌণ্ডিল্যৌ(ন্যৌ)বার্ক্ষির্দেবলগালবৌ||১০|| সাঙ্কৃত্যো বৈজবাপিশ্চ কুশিকো বাদরাযণঃ| বডিশঃ শরলোমা চ কাপ্যকাত্যাযনাবুভৌ||১১|| কাঙ্কাযনঃ কৈকশেযো ধৌম্যো মারীচকাশ্যপৌ| শর্করাক্ষো হিরণ্যাক্ষো লোকাক্ষঃ পৈঙ্গিরেব চ||১২|| শৌনকঃ শাকুনেযশ্চ মৈত্রেযো মৈমতাযনিঃ| বৈখানসা বালখিল্যাস্তথা চান্যে মহর্ষযঃ||১৩|| ব্রহ্মজ্ঞানস্য নিধযো দ(য)মস্য নিযমস্য চ| তপসস্তেজসা দীপ্তা হূযমানা ইবাগ্নযঃ||১৪|| সুখোপবিষ্টাস্তে তত্র পুণ্যাং চক্রুঃ কথামিমাম্|১৫|

কে তে মহর্ষয ইত্যাহ- অঙ্গিরা ইত্যাদি| বহ্বৃষীণামত্র কীর্তনং গ্রন্থাদৌ পাপক্ষযহেতুত্বেন, তথাঽঽযুর্বেদস্যৈবংবিধমহাপুরুষসেবিতত্বেন সেব্যত্বোপদর্শনার্থং চেতি| এষু চ মধ্যে কেচিদ্যাযাবরাঃ, কেচিচ্ছালীনাঃ, কেচিদযোনিজাঃ, এবম্প্রকারাশ্চ সর্বে মিলিতা বোদ্ধব্যাঃ| ভিক্ষুরিত্যাত্রেযবিশেষণং, বক্ষ্যতি হি- “তন্নেতি ভিক্ষুরাত্রেযঃ” (সূ.অ.২৫) ইতি| বৈখানসা ইতি কর্মবিশেষপ্রযুক্তা সঞ্জ্ঞা| বালখিল্যাস্তু স্বল্পপ্রমাণাঃ কেচিদৃষযঃ| নিধয ইব নিধযোঽক্ষযস্থানত্বেন| দমো দান্তত্বম্| ইমামিতি অগ্রে বক্ষ্যমাণাম্||৮-১৪||-

Adhikarana 7 (15-17) · Śloka 18

ধর্মার্থকামমোক্ষাণামারোগ্যং মূলমুত্তমম্||১৫|| রোগাস্তস্যাপহর্তারঃ শ্রেযসো জীবিতস্য চ| প্রাদুর্ভূতো মনুষ্যাণামন্তরাযো মহানযম্||১৬|| কঃ স্যাত্তেষাং শমোপায ইত্যুক্ত্বা ধ্যানমাস্থিতাঃ| অথ তে শরণং শক্রং দদৃশুর্ধ্যানচক্ষুষা||১৭|| স বক্ষ্যতি শমোপাযং যথাবদমরপ্রভুঃ|১৮|

ধারণাদ্ধর্মঃ স চাত্মসমবেতঃ কার্যদর্শনানুমেযঃ, অর্থঃ সুবর্ণাদিঃ, কাম্যত ইতি কামো বনিতাপরিষ্বঙ্গাদিঃ, মোক্ষঃ সংসারবিমোক্ষঃ| আরোগ্যং রোগাভাবাদ্ধাতুসাম্যম্| মূলং কারণম্| উত্তমমিতি প্রধানং; তেনারোগ্যং চতুর্বর্গে প্রধানং কারণং, রোগগৃহীতস্য ক্বচিদপি পুরুষার্থেঽসমর্থত্বাদিত্যুক্তম্| তস্যাপহর্তার ইতি আরোগ্যস্যাপহর্তারঃ; ইদমেব চ রোগাণামারোগ্যাপহরণং যদনর্থলাভঃ; ন পুনরুত্পন্নো রোগঃ পশ্চাদারোগ্যমপহরতি, ভাবাভাবযোঃ পরস্পরাভাবাত্মকত্বাত্| শ্রেযসো জীবিতস্য চেতি শ্রেযোবজ্জীবিতং হিতত্বেন সুখত্বেন চার্থেদশমহামূলীযে (সূ.অ.৩০) বক্ষ্যমাণং, তস্য জীবিতস্যাপহর্তার ইতি যোজনীযম্; অশ্রেযোজীবিতমহিতত্বেন দুঃখহেতুতযা চানুপাদেযমিতি কৃত্বা তদপহরণমিহ নোক্তম্| অত্র সুখহিতজীবিতোপঘাতো ধর্মাদ্যুপঘাতেনৈব লব্ধঃ; তেন বযং পশ্যামঃ- শ্রেযঃশব্দেন সামান্যেনাভ্যুদযবাচিনা ধর্মাদযোঽভিধীযন্তে, জীবিতশব্দেন চ জীবিতমাত্রং, যতো জীবিতং স্বরূপেণৈব সর্বপ্রাণিনাং নিরুপাধ্যুপাদেযং; বচনং হি- “আচকমে চ ব্রহ্মণ ইযমাত্মা আশীঃ- আযুষ্মান্ ভূযাসম্” ইতি| যত্ত্বত্যন্তদুঃখগৃহীতস্য জীবিতং জিহাসিতং, তত্র দুঃখস্যাত্যন্তজিহাসিতস্যান্যথাহাতুমশক্যত্বাত্ প্রিযমপি জীবিতং ত্যক্তুমিচ্ছতি ন স্বরূপেণ| অন্তরায ইতি ধর্মাদিসাধনে বোদ্ধব্যঃ| অযমিতি রোগপ্রাদুর্ভাবরূপঃ| তেষামিতি রোগাণাম্| শরণমিতি রক্ষিতারম্| শক্তত্বাচ্ছক্র উচ্যতে| ধ্যানং সমাধিবিশেষঃ, তদুপলব্ধিসাধনত্বাচ্চক্ষুরিব ধ্যানচক্ষুঃ, ‘তেন স বক্ষ্যতি শমোপাযং যথাবদমরপ্রভুঃ’ ইতি ধ্যানচক্ষুষা দদৃশুরিতি যোজনা||১৫-১৭||-

Adhikarana 8 (18-23) · Śloka 23

কঃ সহস্রাক্ষভবনং গচ্ছেত্ প্রষ্টুং শচীপতিম্||১৮|| অহমর্থে নিযুজ্যেযমত্রেতি প্রথমং বচঃ| ভরদ্বাজোঽব্রবীত্তস্মাদৃষিভিঃ স নিযোজিতঃ||১৯|| স শক্রভবনং গত্বা সুরর্ষিগণমধ্যগম্ | দদর্শ বলহন্তারং দীপ্যমানমিবানলম্||২০|| সোঽভিগম্য জযাশীর্ভিরভিনন্দ্য সুরেশ্বরম্| প্রোবাচ বিনযাদ্ধীমানৃষীণাং বাক্যমুত্তমম্||২১|| ব্যাধযো হি সমুত্পন্নাঃ সর্বপ্রাণিভযঙ্করাঃ| তদ্ব্রূহি মে শমোপাযং যথাবদমরপ্রভো||২২|| তস্মৈ প্রোবাচ ভগবানাযুর্বেদং শতক্রতুঃ| পদৈরল্পৈর্মতিং বুদ্ধ্বা বিপুলাং পরমর্ষযে||২৩||

অথৈতেষু মধ্যে ভরদ্বাজঃ কথমিন্দ্রমুপাগমদিত্যাহ- ক ইত্যাদি| শচীপতিমিত্যনেন শচীসম্ভোগব্যাসক্তমপ্যহমুপাসিতুং ক্ষম ইতি ভরদ্বাজো দর্শযতি| অর্থে প্রযোজনে| নিযুজ্যেযং ব্যাপারযেযম্| অত্রেতি প্রকৃতপ্রযোজন এব, অত্রেতিশব্দো যস্মাদর্থে| যথা- সুভিক্ষমিত্যাগতঃ; যস্মাত্ সুভিক্ষং তস্মাদাগত ইত্যর্থঃ| নিযোজিত ইতি চৌরাদিকো ণিচ্, ন হেতৌ| অনেন প্রকরণেন ভরদ্বাজস্যাযুর্বেদাগমে বিশেষেণার্থিত্বান্ন প্রেরণমিতি দর্শিতং ভবতি| প্রোবাচেতি সম্যগুবাচ; ন তু প্রশব্দঃ প্রপঞ্চার্থঃ, পদৈরল্পৈরিত্যুক্তত্বাত্| কস্মাত্ পদৈরল্পৈরুবাচেত্যাহ- মতিং বুদ্ধ্বা বিপুলামিতি; যস্মাদ্বিপুলমতিং ভরদ্বাজং প্রতিপন্নবান্ তস্মাত্ পদৈরল্পৈরুবাচেতি ভাবঃ; মতিশ্চ বহুবিষযত্বেনোপচারাদ্বিপুলেত্যুচ্যতে, সা চ মতিঃ শুশ্রূষাশ্রবণগ্রহণধারণোহাপোহতত্ত্বাভিনিবেশবতীহ বিপুলা বোদ্ধব্যা| অত্র চেন্দ্রেণ দিব্যদৃশা ভরদ্বাজাভিপ্রাযমগ্রত এব বুদ্ধ্বাঽঽযুর্বেদ উপদিষ্টঃ; তেন ভরদ্বাজস্যেন্দ্রপৃচ্ছাদীহ ন দর্শিতং, কিংবা ভূতমপীন্দ্রপৃচ্ছাদি গ্রন্থবিস্তরভযাদিহ ন লিখিতম্||১৮-২৩||

Adhikarana 9 (24) · Śloka 24

হেতুলিঙ্গৌষধজ্ঞানং স্বস্থাতুরপরাযণম্| ত্রিসূত্রং শাশ্বতং পুণ্যং বুবুধে যং পিতামহঃ||২৪||

যাদৃশোঽসাবল্পপদৈরুপদিষ্ট আযুর্বেদস্তমাহ- হেত্বিত্যাদি| হেতুলিঙ্গৌষধজ্ঞানমিতি হেত্বাদীনি জ্ঞাযন্তেঽনেনেতি হেতুলিঙ্গৌষধজ্ঞানং, যাবচ্চাযুর্বেদবাচ্যং তাবদ্ধেত্বাদ্যন্তর্ভূতমিত্যর্থঃ| হেতুগ্রহণেন সন্নিকৃষ্টবিপ্রকৃষ্টব্যাধিহেতুগ্রহণং; লিঙ্গগ্রহণেন চ ব্যাধেরারোগ্যস্য চ কৃত্স্নং লিঙ্গমুচ্যতে, তেন ব্যাধ্যারোগ্যে অপি লিঙ্গশব্দবাচ্যে, যতস্তাভ্যামপি হি তল্লিঙ্গং লিঙ্গ্যত এব; বক্ষ্যতি হি বিষমারম্ভমূলানাং জ্বর একো হি লক্ষণম্| বিষমারম্ভমূলাদ্যৈর্জ্বর একো নিগদ্যতে (নি.অ.৮) ইত্যাদি; ঔষধগ্রহণেন চ সর্বপথ্যাবরোধঃ| শরীরং চাত্র হেতৌ লিঙ্গে চান্তর্ভবতি| স্বস্থাতুরযোঃ পরমুত্কৃষ্টমযনং মার্গ ইতি স্বস্থাতুরপরাযণম্| কিমন্যোঽযং হেতুলিঙ্গৌষধজ্ঞানরূপ আযুর্বেদো ব্রহ্মবুদ্ধাদাযুর্বেদাদুতানন্য ইত্যাহ- ত্রিসূত্রমিত্যাদি| পিতামহোঽপি যং ত্রিসূত্রং বুবুধে তমিন্দ্রঃ প্রোবাচ| ত্রীণি হেত্বাদীনি সূত্র্যন্তে যস্মিন্ যেন বা তত্ত্রিসূত্রম্| তত্র সূচনাত্ সূত্রণাচ্চার্থসন্ততেঃ সূত্রম্| এতেন তং যথা ব্রহ্মা ত্রিসূত্রং বুবুধে তথৈব হেতুলিঙ্গৌষধজ্ঞানমিন্দ্রঃ প্রোবাচেত্যবিপ্লুতমাগমং দর্শযতি| বুবুধ ইতি ন কৃতবান্| অত এবোক্তং- শাশ্বতং; নিত্যমিত্যর্থঃ| তচ্চ নিত্যত্বং সূত্রস্থানান্তে ব্যুত্পাদনীযম্||২৪||

Adhikarana 10 (25-26) · Śloka 26

সোঽনন্তপারং ত্রিস্কন্ধমাযুর্বেদং মহামতিঃ| যথাবদচিরাত্ সর্বং বুবুধে তন্মনা মুনিঃ||২৫|| তেনাযুরমিতং লেভে ভরদ্বাজঃ সুখান্বিতম্| ঋষিভ্যোঽনধিকং তচ্চ শশংসানবশেষযন্||২৬||

অথোদ্দিষ্টমাযুর্বেদং কথং গৃহীতবান্ ভরদ্বাজ ইত্যাহ- সোঽনন্তেত্যাদি| অবিদ্যমানাবন্তপারৌ যস্যাসাবনন্তপারঃ, অত্র পারশব্দেন গোবলীবর্দন্যাযেনাদিরুচ্যতে; পারশব্দো হ্যুভযোরপি নদীকূলযোর্বিবক্ষাবশাদ্বর্ততে; কিংবা অনন্তো মোক্ষঃ, পারমুত্কৃষ্টং ফলং যস্যাযুর্বেদস্যাসাবনন্তপারঃ| বক্ষ্যতি হি- চিকিত্সা তু নৈষ্ঠিকী যা বিনোপধাম্ (শা.অ.১) ইতি| অত্র নৈষ্ঠিকী মোক্ষসাধনহেতুঃ | ত্রযো হেত্বাদযঃ স্কন্ধরূপা যস্য স ত্রিস্কন্ধঃ; স্কন্ধশ্চ স্থূলাবযবঃ প্রবিভাগো বা| তত্রৈবাযুর্বেদগ্রহণে মনো যস্য স তন্মনাঃ| মননাত্ জ্ঞানপ্রকর্ষশালিত্বান্মুনিঃ | এতেন যস্মাদযং মহামতিস্তন্মনাঃ মুনিশ্চ তেনানন্তপারমপ্যাযুর্বেদং হেত্বাদিস্কন্ধত্রযমালম্বনং কৃত্বা যথাবদচিরাদেব প্রতিপন্নবানিত্যাশযঃ| অচিরাদিতি অচিরেণ| অত্র চ যথা ব্রহ্মা ত্রিসূত্রং বুবুধে যথা চেন্দ্রো হেতুলিঙ্গৌষধজ্ঞানং প্রোবাচ তথৈব ভরদ্বাজোঽপি ত্রিস্কন্ধং তং বুবুধে ইত্যনেনাযুর্বেদস্যাবিপ্লুতাগমত্বমুপদর্শ্যতে; তেন ত্রিসূত্রত্রিস্কন্ধযোর্ন পুনরুক্তিঃ| তেনেতি ইন্দ্রাদ্গৃহীতেনাযুর্বেদেন| অমিতমিতি অমিতমিবামিতম্, অতিদীর্ঘত্বাত্| আযুঃশব্দশ্চাযুঃকারণে রসাযনজ্ঞানে বোদ্ধব্যঃ; যেনোত্তরকালং হি রসাযনোপযোগাদযং ভরদ্বাজোঽমিতমাযুরবাপ্স্যতি (ন ঋষিভ্য আযুর্বেদকথনাত্ পূর্বং রসাযনমাচরতি স্ম); কিংবা সর্বপ্রাণ্যুপকারার্থাধীতাযুর্বেদজনিতধর্মবশাত্তত্কালমেবামিতমাযুর্লেভে ভরদ্বাজ ইতি বোদ্ধব্যম্| তচ্চেতি শ্রুতং; যদা তমিতি পাঠঃ, তদা তমাযুর্বেদম্| অনবশেষযন্নিতি কার্ত্স্ন্যেনেত্যর্থঃ| আযুর্বেদমধীত্যানন্তরমেবাযং তমৃষিভ্যো দত্তবান্||২৫-২৬||

Adhikarana 11 (27-29) · Śloka 29

ঋষযশ্চ ভরদ্বাজাজ্জগৃহুস্তং প্রজাহিতম্| দীর্ঘমাযুশ্চিকীর্ষন্তো বেদং বর্ধনমাযুষঃ||২৭|| মহর্ষযস্তে দদৃশুর্যথাবজ্জ্ঞানচক্ষুষা| সামান্যং চ বিশেষং চ গুণান্ দ্রব্যাণি কর্ম চ||২৮|| সমবাযং চ তজ্জ্ঞাত্বা তন্ত্রোক্তং বিধিমাস্থিতাঃ| লেভিরে পরমং শর্ম জীবিতং চাপ্যনিত্বরম্ ||২৯||

দীর্ঘমাযুশ্চিকীর্ষন্ত ইতি প্রাণিনামাত্মনশ্চ| জ্ঞানার্থং জ্ঞানরূপং বা চক্ষুর্জ্ঞানচক্ষুঃ, তেন জ্ঞানচক্ষুষা| গৃহীতেন তেনাযুর্বেদেন কিং দদৃশুরিত্যাহ- সামান্যং চেত্যাদি| এষাং চোত্তরত্র লক্ষণং ষণ্ণাং পদার্থানাং বিশ্বরূপাণাং ভবিষ্যতি; তেনৈতত্তত্রৈব ব্যাকরণীযম্| তদিতি সামান্যাদি| তন্ত্রোক্তং বিধিমিতি অপথ্যপরিহারপথ্যোপাদানরূপম্| শর্ম সুখম্| পরমিতি দুঃখানাক্রান্তম্| অনিত্বরমিতি অগত্বরম্||২৭-২৯||

Adhikarana 12 (30-31) · Śloka 31

অথ মৈত্রীপরঃ পুণ্যমাযুর্বেদং পুনর্বসুঃ| শিষ্যেভ্যো দত্তবান্ ষড্ভ্যঃ সর্বভূতানুকম্পযা||৩০|| অগ্নিবেশশ্চ ভেল(ড)শ্চ জতূকর্ণঃ পরাশরঃ| হারীতঃ ক্ষারপাণিশ্চ জগৃহুস্তন্মুনের্বচঃ||৩১||

অথেত্যাদিনা ভরদ্বাজশিষ্যস্যাত্রেযস্য পুনর্বস্বপরনাম্নোঽগ্নিবেশাদিগুরুতাং দর্শযতি| অত্র কেচিদ্ভরদ্বাজাত্রেযযোরৈক্যং মন্যন্তে, তন্ন; ভরদ্বাজসঞ্জ্ঞযা আত্রেযস্য ক্বচিদপি তন্ত্রপ্রদেশেঽকীর্তনাত্; হারীতে চাত্রেযাদিগুরুতযা ভরদ্বাজ উক্তঃ- “শক্রাদহমধীতবান্” ইত্যাদিনা “মত্তঃ পুনরসঙ্খ্যেযাস্ত্রিসূত্রং ত্রিপ্রযোজনম্| অত্রাত্রেযাদিপর্যন্তা বিদুঃ সপ্ত মহর্ষযঃ|| আত্রেযাদ্ধারীত-ঋষিঃ”- ইত্যন্তেন| বাগ্ভটেন তু যদুক্তং “ব্রহ্মা স্মৃত্বাঽঽযুষো বেদং প্রজাপতিমজিগ্রহত্| সোঽশ্বিনৌ তৌ সহস্রাক্ষং সোঽত্রিপুত্রাদিকান্ মুনীন্” (বা.সূ.অ.১) ইত্যনেনাত্রেযস্যেন্দ্রশিষ্যত্বং, তদাযুর্বেদসমুত্থানীযরসাযনপাদে আদিশব্দেন বক্ষ্যমাণেন্দ্রশিষ্যতাযোগাত্ সমর্থনীযম্| তত্র হীন্দ্রেণ পুনর্মহর্ষীণামাযুর্বেদ উপদিষ্ট ইতি বক্তব্যম্| মৈত্রীপরো মৈত্রীপ্রধানঃ; মৈত্রী চ সর্বপ্রাণিষ্বাত্মনীব বুদ্ধিঃ||৩০-৩১||

Adhikarana 13 (32-40) · Śloka 40

বুদ্ধের্বিশেষস্তত্রাসীন্নোপদেশান্তরং মুনেঃ| তন্ত্রস্য কর্তা প্রথমমগ্নিবেশো যতোঽভবত্||৩২|| অথ ভেলাদযশ্চক্রুঃ স্বং স্বং তন্ত্রং কৃতানি চ| শ্রাবযামাসুরাত্রেযং সর্ষিসঙ্ঘং সুমেধসঃ||৩৩|| শ্রুত্বা সূত্রণমর্থানামৃষযঃ পুণ্যকর্মণাম্| যথাবত্সূত্রিতমিতি প্রহৃষ্টাস্তেঽনুমেনিরে||৩৪|| সর্ব এবাস্তুবংস্তাংশ্চ সর্বভূতহিতৈষিণঃ| সাধু ভূতেষ্বনুক্রোশ ইত্যুচ্চৈরব্রুবন্ সমম্||৩৫|| তং পুণ্যং শুশ্রুবুঃ শব্দং দিবি দেবর্ষযঃ স্থিতাঃ| সামরাঃ পরমর্ষীণাং শ্রুত্বা মুমুদিরে পরম্||৩৬|| অহো সাধ্বিতি নির্ঘোষো লোকাংস্ত্রীনন্ববা(না)দযত্| নভসি স্নিগ্ধগম্ভীরো হর্ষাদ্ভূতৈরুদীরিতঃ||৩৭|| শিবো বাযুর্ববৌ সর্বা ভাভিরুন্মীলিতা দিশঃ| নিপেতুঃ সজলাশ্চৈব দিব্যাঃ কুসুমবৃষ্টযঃ||৩৮|| অথাগ্নিবেশপ্রমুখান্ বিবিশুর্জ্ঞানদেবতাঃ| বুদ্ধিঃ সিদ্ধিঃ স্মৃতির্মেধা ধৃতিঃ কীর্তিঃ ক্ষমা দযা||৩৯|| তানি চানুমতান্যেষাং তন্ত্রাণি পরমর্ষিভিঃ| ভ(ভা)বায ভূতসঙ্ঘানাং প্রতিষ্ঠাং ভুবি লেভিরে||৪০||

বুদ্ধের্বিশেষ উত্কর্ষঃ| যত ইতি বুদ্ধের্বিশেষাত্| স্বং স্বং তন্ত্রমিতি স্বস্বনামাঙ্কিতং ভেলতন্ত্রং, জতূকর্ণতন্ত্রমিত্যাদিকম্| কৃতানি চেত্যত্র ‘তন্ত্রাণি’ ইতি শেষঃ| পুণ্যমাযুর্বেদতন্ত্রকরণলক্ষণং কর্ম যেষামগ্নিবেশাদীনাং তে পুণ্যকর্মাণঃ, তেষাং পুণ্যকর্মণাম্| সর্বভূতহিতৈষিণ ইত্যগ্নিবেশাদিবিশেষণং; কিংবা ঋষিসঙ্ঘবিশেষণম্| সাধুশব্দোঽজহল্লিঙ্গতযা নপুংসকলিঙ্গ এব; যথা- বেদাঃ প্রমাণমিতি| কেচিত্তু সাধ্বিতি বিশেষণস্য নপুংসকলিঙ্গতানুরোধাদনুক্রোশমিত্যপি নপুংসকলিঙ্গং পঠন্তি| অহো ইতি সাধ্বিতি প্রশংসাযাম্| স্নিগ্ধ ইতি অনুত্কটত্বেনাহ্লাদকত্বেন চ| শিবো বাযুর্ববাবিত্যাদিনা শুভলক্ষণেন প্রকৃততন্ত্রকরণস্য দেবৈরপ্যর্থতোঽনুমতত্বমুপদর্শ্যতে| জ্ঞানদেবতা ইতি জ্ঞানাভিমানিন্যো দেবতাঃ| তেন গ্রন্থকরণাত্ পূর্বমেবাগ্নিবেশাদীনাং বুদ্ধ্যাদযো ব্যবস্থিতাঃ, তন্ত্রকরণোত্তরকালং ত্বাদরেণ বুদ্ধ্যাদিদেবতানুপ্রবেশ ইতি| সিদ্ধিঃ সাধ্যসাধনজ্ঞানম্| কীর্তিঃ কীর্তনং বক্তুং জ্ঞানমিত্যর্থঃ; নতু কীর্তির্যশোরূপা, তস্যা অজ্ঞানরূপত্বাত্; জ্ঞানদেবতাশ্চেহোচ্যন্তে| ভবায স্থিতযে, রোগানুপহতজীবিতাযেতি যাবত্| প্রতিষ্ঠা জনোপাদেযতযাঽবস্থানম্||৩২-৪০||

Adhikarana 14 (41) · Śloka 41

হিতাহিতং সুখং দুঃখমাযুস্তস্য হিতাহিতম্| মানং চ তচ্চ যত্রোক্তমাযুর্বেদঃ স উচ্যতে||৪১||

সম্প্রত্যাযুর্বেদব্যুত্পত্তিং কুর্বন্নাযুর্বেদাভিধেযং দর্শযতি- হিতাহিতমিত্যাদি| হিতং চাহিতং চ হিতাহিতং, তথা সুখযুক্তত্বাত্ সুখং, দুঃখযুক্তত্বাদ্দুঃখং; এতচ্চ চতুষ্প্রকারমপ্যাযুরর্থেদশমহামূলীযে “তত্র শারীরমানসাভ্যাম্” ইত্যাদিনা গ্রন্থেন “অহিতমতো বিপর্যযেণ” (সূ.অ.৩০) ইত্যন্তেন বক্ষ্যতি| তস্য হিতাহিতমিতি আযুষঃ পথ্যাপথ্যম্| মানং চেত্যাযুষ এব, তচ্চ প্রমাণং মাসিকদ্বিমাসিকত্বাদিভির্বিকৃতিলক্ষণৈরিন্দ্রিযস্থানে তথা প্রকৃতিলক্ষণৈঃ “ইদমাযুষ্মতাং কুমারাণাং লক্ষণং ভবতি” (শা.অ.৮) ইত্যাদিনা শারীরে বক্তব্যম্| তচ্চেতি আযুঃ স্বরূপেণ “শরীরেন্দ্রিযসত্ত্বাত্মসংযোগ” ইত্যাদিনা বক্ষ্যমাণম্| তেন হিতাহিতমিত্যাদিনা ‘আযুর্বেদযতীত্যাযুর্বেদ’ ইত্যুক্তং ভবতি| বিদধাতুশ্চেহ জ্ঞানার্থ এবাভিপ্রেতঃ| যদ্বক্ষ্যত্যর্থে দশমহামূলীযে- “তদাযুর্বেদযতীত্যাযুর্বেদঃ” (সূ.অ.৩০) ইতি| লাভাদযস্ত্বর্থা বিদেরিহ নোক্তাঃ, তেষাং সাক্ষাদাযুর্বেদাজন্যত্বাদিতি ভাবঃ||৪১||

Adhikarana 15 (42) · Śloka 42

শরীরেন্দ্রিযসত্ত্বাত্মসংযোগো ধারি জীবিতম্| নিত্যগশ্চানুবন্ধশ্চ পর্যাযৈরাযুরুচ্যতে||৪২||

আযুর্বেদপদে পূর্বপদবাচ্যমাযুরাহ- শরীরেত্যাদি| শরীরং পঞ্চমহাভূতবিকারাত্মকমাত্মনো ভোগাযতনম্, ইন্দ্রিযাণি চক্ষুরাদীনি, সত্ত্বং মনঃ, আত্মা জ্ঞানপ্রতিসন্ধাতা, এষাং সম্যগদৃষ্টযন্ত্রিতো যোগঃ সংযোগঃ| যদ্যপি শরীরগ্রহণেনৈব ইন্দ্রিযাণ্যপি লভ্যন্তে, তথাঽপি প্রাধান্যাত্তানি পুনঃ পৃথগুক্তানি| অযং চ সংযোগঃ সংযোগিনঃ শরীরস্য ক্ষণিকত্বেন যদ্যপি ক্ষণিকস্তথাঽপি সন্তানব্যবস্থিতোঽযমেকতযোচ্যতে| তস্যাযুষঃ পর্যাযানাহ- ধারীত্যাদি| ধারযতি শরীরং পূতিতাং গন্তুং ন দদাতীতি ধারি| জীবযতি প্রাণান্ ধারযতীতি জীবিতম্| নিত্যং শরীরস্য ক্ষণিকত্বেন গচ্ছতীতি নিত্যগঃ| অনুবধ্নাত্যাযুরপরাপরশরীরাদিসংযোগরূপতযেত্যনুবন্ধঃ| পর্যাযৈরাযুরুচ্যত ইতি একার্থাভিধাযিভিঃ শব্দৈরুচ্যতে| যদ্যপি চ নিত্যগানুবন্ধশব্দাভ্যাং ন ক্বচিদপ্যাযুরভিধীযতে, তথাঽপি নিত্যগত্বানুবন্ধত্বধর্মখ্যাপনার্থমেবৈতত্সঞ্জ্ঞাদ্বযং বোদ্ধব্যং, ধারিসঞ্জ্ঞা ত্বর্থেদশমহামূলীযে ভবিষ্যতি| ননু, উত্তরত্র “চৈতন্যানুবৃত্তিরাযুঃ” (সূ.অ.৩০) ইত্যাযুর্লক্ষণং করিষ্যতি, ইহ তু শরীরেন্দ্রিযসত্ত্বাত্মসংযোগ ইতি কিমর্থমুক্তম্? ব্রূমঃ- শরীরেন্দ্রিযসত্ত্বাত্মসংযোগজন্যা চৈতন্যানুবৃত্তির্যথোক্তসংযোগাব্যভিচারিত্বেন ব্যক্তত্বেন চার্থেদশমহামূলীযে লক্ষণত্বেনোক্তা; শরীরাদিসংযোগরূপমেব ত্বাযুঃ পরমার্থতঃ; এবম্ভূতসংযোগাভাবে মরণমাযুরুপরমরূপং ভবতি, মৃতশরীরে তু চেতসোঽভাবাদাযূরূপসংযোগাভাবঃ||৪২||

Adhikarana 16 (43) · Śloka 43

তস্যাযুষঃ পুণ্যতমো বেদো বেদবিদাং মতঃ| বক্ষ্যতে যন্মনুষ্যাণাং লোকযোরুভযোর্হিতম্ ||৪৩||

তস্যেত্যাদি| বেদযতীতি বেদঃ| বেদবিদাং মত ইতি বেদবিদ্ভিঃ পূজিতঃ| অথ কস্মাদাযুর্বেদলক্ষণো বেদঃ পুণ্যতমো বেদবিদাং চ পূজিত ইত্যাহ- বক্ষ্যত ইত্যাদি| যদিতি যস্মাত্; এবমুক্তং ভবতি- যদন্যে ঋগ্বেদাদযঃ প্রাযঃ পরলোকহিতমেবার্থং বদন্তি তেন পুণ্যাঃ, পুণ্যতমশ্চাযমাযুর্বেদো যদ্ যস্মান্মনুষ্যাণামুভযোরপি লোকযোর্যদ্ধিতমাযুরারোগ্যসাধনং ধর্মসাধনং চ তদ্বক্ষ্যতে, তেনাতিশযেন পুণ্যতমস্তথা বেদবিদাং চ পূজিত ইতি| কেচিত্ ‘বক্ষ্যতে যঃ’ ইতি পঠন্তি, তত্রাপি হেতুগর্ভমিতি ব্যাখ্যেযম্| জীবিতপ্রদাতৃত্বাদাযুর্বেদস্য পুণ্যতমত্বং বোদ্ধব্যং, যতশ্চতুর্বর্গসাধনীভূতজীবিতপ্রদমেব সর্বোত্তমং ভবতি| উচ্যতে চ- “ন হি জীবিতদানাদ্ধি দানমন্যদ্বিশিষ্যতে” (চি.অ.১) ইতি||৪৩||

Adhikarana 17 (44) · Śloka 44

সর্বদা সর্বভাবানাং সামান্যং বৃদ্ধিকারণম্| হ্রাসহেতুর্বিশেষশ্চ, প্রবৃত্তিরুভযস্য তু||৪৪||

সম্প্রত্যাযুর্বেদাভিধেযতযা সূত্রিতে সামান্যাদৌ সামান্যস্য প্রথমসূত্রিতত্বাত্তথা সামান্যজ্ঞানমূলত্বাচ্চাযুর্বেদপ্রতিপাদ্যস্য হেত্বাদেঃ সামান্যমেবাগ্রে নির্দিশতি- সর্বদেত্যাদি| সর্বদা সর্বস্মিন্ কালে নিত্যগে চাবস্থিকে চ| সর্বভাবানামিত্যত্র সর্বশব্দঃ কৃত্স্নবাচী; ভবন্তি সত্তামনুভবন্তীতি ভাবা দ্রব্যগুণকর্মাণীত্যর্থঃ, নতু ভবন্ত্যুত্পদ্যন্ত ইতি ভাবাঃ; তথা সতি পৃথিব্যাদিপরমাণূনাং নিত্যানাং সামান্যস্য পার্থিবদ্ব্যণুকাদিবৃদ্ধং কার্যমসঙ্গৃহীতং স্যাত্| সামান্যং চ “সামান্যমেকত্বকরং” ইত্যাদিনা বক্ষ্যমাণলক্ষণম্| বৃদ্ধিঃ আধিক্যং, তত্কারণং বৃদ্ধিকারণম্| এতচ্চ সামান্যং সামান্যবতো মাংসদ্রব্যাদের্বৃদ্ধিকারণস্য লক্ষণত্বেন বৃদ্ধিকারণমিত্যুক্তম্| যতো ন সামান্যং মাংসত্বাদিজাতিরূপং বৃদ্ধৌ কারণং ভবতি, তথাহি সতি সামান্যং মাংসত্বরূপং যথা বর্ধকে ভোজ্যরূপে মাংসেঽস্তি তথা শরীরধাতুরূপে বর্ধনীযেঽপ্যস্তি, ততশ্চ নিত্যং মাংসত্বসম্বন্ধাদমাংসাদানামপি মাংসেন বর্ধিতব্যং; তস্মাদ্বৃদ্ধিকারণলক্ষণত্বেন সামান্যং বৃদ্ধিকারণমিত্যুক্তম্| অত এব বৈশেষিকেঽপ্যুক্তং- “ত্রযাণামকার্যত্বমকারণত্বং চ” ইতি| অত্র ত্রযাণামিতি সামান্যবিশেষসমবাযানাম্| যে তু সমানমেব সামান্যমিতি কৃত্বা দ্রব্যাদ্যেব সামান্যশব্দেনাভিদধতি, তেষাং মতে “সামান্যং চ বিশেষং চ” (সূ.অ.১) ইত্যাদিগ্রন্থোক্তস্য সামান্যস্য ন কিঞ্চিদনেনোক্তং স্যাদিত্যসম্বন্ধার্থত্বং প্রকরণস্য স্যাত্| এতচ্চ বৃদ্ধিকারণত্বং সামান্যস্য ন লক্ষণং, কিং তর্হ্যাযুর্বেদোপযোগিনা ধর্মেণ নির্দেশঃ; লক্ষণং তু “সামান্যমেকত্বকরম্” ইতি করিষ্যতি| এবং দ্রব্যাদাবপি চোদ্দেশানন্তরং নির্দেশং করিষ্যতি “খাদীন্যাত্মা” ইত্যাদিনা, ততো লক্ষণং “যত্রাশ্রিতাঃ কর্মগুণা” ইত্যাদিনা করিষ্যতি| সামান্যস্য চ বৃদ্ধিকারণত্বং হ্যসতি বিরোধিকারণে বোদ্ধব্যং, তেনামলকাদিগতানামম্লত্বাদীনাং পিত্তগতাম্লত্বাদ্যবর্ধকত্বমামলকগতশিশিরত্বপ্রভাববিরোধিত্বাদুপপন্নম্| এবমন্যত্রাপি ত্রিদোষহরদ্রব্যে বোদ্ধব্যম্| ইহ চ সামান্যস্য বৃদ্ধিকারণত্বমিত্যুচ্যতে, নতু সামান্যমেব বৃদ্ধিকারণমিত্যুচ্যতে, তেনাসমানাদপি ঘৃতান্মেধাযা বহ্নেশ্চ বৃদ্ধিঃ প্রভাবাদেবোপপন্না, যদুক্তং- “ঘৃতমগ্নিমেধে করোতি” ইতি; তথা চিন্তযা বাতবৃদ্ধিঃ, তথা সঙ্কল্পাদ্বৃষ্যপাদযুগলেপাচ্চ শুক্রবৃদ্ধিরিত্যাদি প্রভাবাদুপপন্নম্| সামান্যং চেহ বৃদ্ধিকারণমিত্যুচ্যমানে সমানস্যেতি গম্যতে, ন হি শোণিতং প্রতি মাংসত্বং সামান্যং, কিন্তু ব্যাবৃত্তবুদ্ধিজনকত্বাদ্বিশেষ এব| অথ বৈশেষিকোক্তানামন্ত্যবিশেষাণামিহ শাস্ত্রে চিকিত্সাযামনুপযুক্তত্বাত্তদ্বিশেষধর্মব্যাবর্তকত্বযোগাত্ সামান্যবিশেষানেব হ্রাসকারণত্বেনাহ- হ্রাসহেতুরিত্যাদি| অত্রাপি সর্বদা সর্বভাবানামিতি যোজনীযম্| হ্রাসঃ অপচযঃ| বিশিষ্যতে ব্যাবর্তত ইতি বিশেষঃ| সামান্যমেব গবেধুকত্বং মাংসাদীন্ প্রতি বিশেষঃ; গবেধুকো হি গবেধুকত্বেন গবেধুকব্যক্ত্যন্তরাপেক্ষযা সমানঃ, মাংসাপেক্ষযা ব্যাবৃত্তত্বাদ্বিশেষঃ; ন হি মাংসে গবেধুকত্বমস্তি| এবং মাংসত্বং মাংসান্তরাপেক্ষযাঽনুগতত্বাত্ সামান্যং, শোণিতাদ্যপেক্ষযা তু মাংসানাং ব্যাবৃত্তত্বাদ্বিশেষ এব| অত্রাপি হ্রাসহেতুত্বং হ্রাসহেতুদ্রব্যাদিলক্ষণত্বেন সামান্যবজ্জ্ঞেযং; তথা হ্রাসহেতুত্বমপ্যসতি বিরোধকে সামান্যোক্তন্যাযেন জ্ঞেযং; তেন মন্দকনিকুচাদীনাং বাতাদিবিরুদ্ধানামপি স্নিগ্ধত্বাদীনাং বাতাদ্যশমকত্বং দ্রব্যস্যাপথ্যত্বপ্রভাবাদেব জ্ঞেযম্| বিশেষশ্চেহ বিরুদ্ধবিশেষোঽভিপ্রেতঃ; তে(যে)নোত্তরত্র বিরুদ্ধবিশেষমেব হ্রাসহেতুতযা তত্র তত্রোপদেক্ষ্যতি; যথা- “বৃদ্ধিঃ সমানৈঃ সর্বেষাং বিপরীতৈর্বিপর্যযঃ” (বা.সূ.অ.১) ইতি, তথা “বিপরীতগুণৈর্দেশমাত্রাকালোপপাদিতৈঃ” (সূ.অ.১) ইত্যাদি, তথা বিপরীতগুণৈর্দ্রব্যৈর্মারুতঃ সম্প্রশাম্যতি (সূ.অ.১) ইত্যাদি, তথা জতূকর্ণেঽপ্যুক্তং- “সমানৈঃ সর্বভাবানাং বৃদ্ধির্হানির্বিপর্যযাত্” ইতি| অবিরুদ্ধবিশেষস্তু যদ্যপি হ্রাসে বৃদ্ধৌ বাঽপ্যকারণং, যথা- পৃথিব্যা অনুষ্ণাশীতস্পর্শো বাতস্য শৈত্যং ন বর্ধযতি নাপি হ্রাসযতি, তথাঽপ্যগ্নিক্ষীযমাণানাং ধাতূনামসমানত্বেনাজনকত্বাদ্ধ্রাসকারণমি(মে)ব ভবতি; যতোঽসমানদ্রব্যোপযোগে সতি হ্রাসো বিনশ্বরাণাং ভাবানামাপূরকহেত্বভাবাদুপলভ্যত এব; যথা- বহতো জলস্য পূর্বদেশসেতুনোত্তরদেশজলস্য হ্রাসঃ| এবম্ভূতং চাবিরুদ্ধবিশেষোপযোগেঽপি হ্রাসং পশ্যতাঽঽচার্যেণ সামান্যেনৈবেহোক্তং হ্রাসহেতুর্বিশেষ ইতি| চশব্দঃ সর্বভাবানামিতি সমুচ্চিনোতি| অথ কিমসম্বদ্ধাবপি সামান্যবিশেষৌ বৃদ্ধিহ্রাসকারণং নেত্যাহ - প্রবৃত্তিরুভযস্য ত্বিতি| ‘কারণং’ ইতি শেষঃ| উভযস্য সামান্যস্য বিশেষস্য চ, প্রবৃত্তিঃ প্রবর্তনং শরীরেণাভিসম্বন্ধ ইতি যাবত্; এবম্ভূতা প্রবৃত্তিঃ ধাতুসামান্যবিশেষযোর্বৃদ্ধিহ্রাসে কারণমিত্যর্থঃ| তুশব্দোঽবধারণে; তেন নাসম্বদ্ধৌ সামান্যবিশেষৌ স্বকার্যং কুরুত ইতি দর্শযতি| কিংবা প্রবৃত্তিঃ উচিতা ধাতুপ্রবৃত্তির্ধাতুসাম্যমিতি যাবত্, সা উভযস্য সামান্যস্য বিশেষস্য চ ‘কার্যা’ ইতি শেষঃ| তেন কেবলসমানোপযোগাদ্ধাতুবৃদ্ধ্যা ধাতুবৈষম্যং , কেবলবিশেষোপযোগাচ্চ ধাতুক্ষযাদ্ধাতুবৈষম্যং, যুগপত্সমানবিশিষ্টদ্রব্যোপযোগাত্ প্রবৃত্তির্ধাতুসাম্যরূপা ভবতীত্যুক্তং ভবতি| তুশব্দঃ পূর্বপক্ষাদেকদ্রব্যোপযোগলক্ষণাদ্ব্যাবর্তযতি||৪৪||

Adhikarana 18 (45) · Śloka 45

সামান্যমেকত্বকরং, বিশেষস্তু পৃথক্ত্বকৃত্| তুল্যার্থতা হি সামান্যং, বিশেষস্তু বিপর্যযঃ||৪৫||

অথ কিংলক্ষণং তত্ সামান্যং কিংলক্ষণো বা স বিশেষ ইত্যাহ- সামান্যমিত্যাদি| একত্বকরমিতি একত্ববুদ্ধিকরং, সামান্যং যদনেকাসু ভিন্নদেশকালাসু গবাদিব্যক্তিষু ‘অযং গৌরযং গৌঃ’ ইত্যাদিপ্রকারা একাকারা বুদ্ধিস্তত্ সামান্যম্| ন হি ভিন্নাসু ব্যক্তিষ্বভিন্নং সামান্যমেকরূপং বিনাঽভ্রান্তা একাকারা বুদ্ধির্ভবতীতি ভাবঃ| যত্রাপি চ ‘অযং পাচকোঽযং পাচকঃ’ ইতি, তথা অযং ‘শুক্লোঽযং শুক্লঃ’ ইত্যাদৌ ক্রিযাগুণাদিসামান্যাদেকরূপা বুদ্ধিস্তত্রাপি সামান্যমেকক্রিযাগুণাদিগতমেকরূপাধ্যবসাযে হেতুঃ| ন হ্যেকস্মিন্ পাচকে যা ক্রিযা সা পাচকান্তরেঽপি, কিন্তর্হি তজ্জাতীযা| অতঃ ক্রিযাসামান্যং তত্রাপ্যেকত্বাধ্যবসাযে কারণম্| বিশেষলক্ষণং- পৃথক্ত্বকৃদিতি|- ব্যাবৃত্তবুদ্ধিকৃত্; তেন যদ্গোব্যক্ত্যন্তরাপেক্ষযৈকবুদ্ধিকর্তৃতযা গোত্বং সামান্যং, তদেব গোত্বমশ্বাদ্যপেক্ষযা ব্যাবৃত্তবুদ্ধিকর্তৃত্বাদশ্বাদীন্ প্রতি বিশেষ ইত্যুক্তং ভবতি| তেন মাংসত্বং মাংসং প্রতি মাংসান্তরাপেক্ষযা সমানত্বাদ্বৃদ্ধিকারণং ভবতি, তদেব তু মাংসত্বং বাতং প্রতি বিশেষরূপতযা হ্রাসহেতুর্ভবতি; শোণিতাদীন্ প্রতি ত্ববিরোধিবিশেষত্বেন ন তথা হ্রাসকারণং, গুণসামান্যাত্তু বর্ধকমপি মাংসং শোণিতাদীনাং ভবতি| কথমনেকাসু ব্যক্তিষু সামান্যমেকবুদ্ধিমব্যভিচারিণীং করোতীত্যাহ- তুল্যার্থতা হীত্যাদি| তুল্যার্থতা একসামান্যরূপার্থানুযোগিতা| এতেন যস্মাদ্ভিন্নাসু ব্যক্তিষু সামান্যমেকরূপসম্বন্ধমস্তি , ততস্তদনেকার্থাবলম্বা সত্যপি ব্যক্তিভেদে একবুদ্ধির্যুক্তেতি ভাবঃ| বিশেষস্তু বিপর্যয ইতি অতুল্যার্থতা হি বিশেষত্বং , তেন গোগজযোরতুল্যগোত্বগজত্বরূপার্থযোঃ পৃথগ্বুদ্ধির্যুক্তৈবেতি দর্শিতং ভবতি| অন্যে তু ব্যাখ্যানযন্তি যত্- ত্রিবিধং সামান্যং, বিশেষশ্চ ত্রিবিধঃ; যথা- দ্রব্যগোচরঃ, গুণগোচরঃ, কর্মগোচরশ্চ; তত্র সর্বদেত্যাদিনা দ্রব্যসামান্যমুচ্যতে; সামান্যমেকত্বকরমিত্যনেন গুণসামান্যং; যথা- পযঃশুক্রযোর্ভিন্নজাতীযযোরপি মধুরত্বাদিগুণসামান্যং তত্রৈকতাং করোতি, এবং বিশেষেঽপ্যুদাহার্যং; তুল্যার্থতেত্যাদিনা তু কর্মসামান্যং নিগদ্যতে, আস্যারূপং হি কর্ম ন শ্লেষ্মণা সমানমপি তু পানীযাদিকফসমানদ্রব্যার্থক্রিযাকারিত্বাত্ কফবর্ধকরূপতযা আস্যাঽপি কফসমানেত্যুচ্যতে; এবং স্বপ্নাদাবপি কর্মণি বোদ্ধব্যম্| তদেতদ্ভট্টারহরিচন্দ্রেণৈব দূষিতং; যতঃ সর্বদেত্যাদিনৈব লক্ষণেন ত্রিবিধিমপি সামান্যং লভ্যতে, তেনাস্মিন্ পক্ষে সামান্যমেকত্বকরমিত্যাদ্যবাচ্যং স্যাদিতি কৃত্বা| অন্যে তু পশ্যন্তি- যত্ত্রিবিধং সামান্যম্- অত্যন্তসামান্যং, মধ্যসামান্যম্, একদেশসামান্যং চ; তত্র সর্বদেত্যাদিনাঽত্যন্তসামান্যমুচ্যতে, সামান্যমেকত্বকরমিত্যনেন মধ্যসামান্যং, তুল্যার্থতা হীত্যাদিনৈকদেশসামান্যং এতদপি ত্রৈবিধ্যকথনং নাতিপ্রযোজনমসঙ্গতলক্ষণং চেতি নাতিশ্রদ্ধাকরম্| কেচিত্ সামান্যং দ্বিবিধমিচ্ছন্তি- উভযবৃত্তি, তথৈকবৃত্তি চ; তত্র মাংসং মাংসবর্ধকম্, উভযবৃত্তিসামান্যাত্; মাংসত্বং হি পোষ্যে পোষকে চ গতত্বাদুভযবৃত্তি; একবৃত্তি তু যথা- ঘৃতমগ্নিকরং, তথা ধাবনাদিকর্ম বাতকরং, তথাঽঽস্যাদি কফকরম্; এতদ্ধি সর্বং ন বর্ধনীযেন সমানং, কিন্তু প্রভাবাদ্বর্ধকং; প্রভাবশ্চ ঘৃতত্বধাবনত্বাদিরেব; স চৈকবৃত্তিসামান্যরূপঃ, তেনাত্রাপি সামান্যমেব বৃদ্ধিকারণমিতি ব্রুবতে| অস্মিংস্তু পক্ষেঽনুভযবৃত্তিসামান্যং বিশেষ এব ভবতি, তথা সমানমসমানং চ বৃদ্ধিকারণং ভবতীতি ন কিঞ্চিত্ সামান্যস্যোক্তং স্যাত্| অস্মন্মতে তু সামান্যং বৃদ্ধৌ কারণমেব ভবতীতি সামান্যং বৃদ্ধিকারণত্বেন নিযম্যতে; ন তু বৃদ্ধিঃ সামান্যকারণিকৈবেতি নিযম্যতে, তেনাসমানাদপি বৃদ্ধির্ভবতি নির্দোষা| যত্তূচ্যতে- কর্মসামান্যং নেহ তন্ত্রে বৃদ্ধিকারণমস্তি, যতো ন ধাবনেন বাযুঃ সমান ইতি; অত এবাচার্যেণ দ্রব্যসামান্যমুক্তং “মাংসমাপ্যাযতে মাংসেন” (শা.অ.৬) ইত্যাদিনা, তথা “সমানগুণানামাহারবিকারাণামুপযোগঃ” (শা.অ.৬) ইত্যাদিনা গুণসামান্যমুক্তং; নৈবং কর্মসামান্যমুক্তং, বচনং হি “কর্মাপি চ যদ্যস্য ধাতোর্বৃদ্ধিকরং তত্তদাসেব্যম্” (শা.অ.৬) ইতি; ন তত্র সামান্যোপগ্রহঃ কৃতঃ| অত্র ব্রূমঃ- কর্মণাং প্রাযঃ প্রভাবেণৈব বৃদ্ধিহেতুত্বাত্ সামান্যানুপগ্রহঃ কৃতঃ, ন তু কর্মসামান্যাভাবাত্; যতঃ ক্রিযাবতো বাতস্য ক্রিযাবতা ব্যাযামাদিযুক্তেন শরীরেণ বৃদ্ধিঃ ক্রিযতে, নিষ্ক্রিযতযা চাস্য বাতস্য হ্রাসঃ| স্বপ্নাদযস্তু “সংযোগে চ বিভাগে চ” ইত্যনেন বক্ষ্যমাণলক্ষণেনানুক্তা অপি শাস্ত্রব্যবহারাত্ কর্মশব্দেনোচ্যতে| তত্র স্বপ্নঃ স্বকারণাদেব চীযমানস্য কফস্য ক্ষযকারণশরীরপরিস্পন্দাদিনিরোধকত্বেন বৃদ্ধিকর উচ্যতে, ন তু স্বপ্নঃ সাক্ষাচ্ছ্লেষ্মবৃদ্ধিং করোতি| এবমাস্যাদাবপি চিন্তনীযম্| যত্র ত্বেবং কারণং চিন্তযিতুং ন পার্যতে তত্র প্রভাব এব বর্ণনীযঃ| ননু মাংসং মাংসং বর্ধযতি সামান্যাত্, বিশেষাচ্চ বাতং ক্ষপযতি, তত্ কথং যুগপদ্বিরুদ্ধার্থদ্বযকর্তৃত্বং মাংসস্য; ন হি দেবদত্তো যদৈব কুম্ভং করোতি তদৈব কাণ্ডমপি| নৈবং, ক্রিযাবতামযং ধর্মো নাক্রিযাবতামিতি ; তথাহি- শব্দো যুগপদনেকানেব শব্দানেককালমারভতে, তথাঽগ্নিঃ প্রকাশদাহৌ যুগপত্ করোতি; অত এবোক্তমাচার্যেণ- “তস্মাদ্ভেষজং সম্যগবচার্যমাণং যুগপদূনাতিরিক্তানাং ধাতূনাং সাম্যকরং ভবতি; অধিকমপকর্ষতি, ন্যূনমাপ্যাযযতি” (শা.অ.৬) ইতি| যদুচ্যতে- ক্ষীযমাণধাতোর্বৃদ্ধস্য তথা বহুদোষস্য সমানগুণোঽপ্যাহারো ন বৃদ্ধিহেতুঃ, তথা গ্রীষ্মে চ মধুরাদিনা সমানেনাপি ন কফাভিবৃদ্ধিরিত্যাদি; তত্র প্রতিবন্ধকানাং জরা-বহুদোষত্ব-গ্রীষ্মোষ্ণত্বাদীনাং বিদ্যমানত্বান্ন সামান্যং বর্ধকম্; অসতি চ বিরোধকে সামান্যং বৃদ্ধিকারণমিতি সিদ্ধান্তঃ; তেন ন কাচিত্ ক্ষতিঃ| কিংবা বৃদ্ধাদীনাং সমানেনাহারেণ ক্রিযত এব বৃদ্ধিঃ; পরমতিবলবতা ক্ষযহেতুনাঽঽধীযমানক্ষযে পুরুষে সা বৃদ্ধির্নোপলভ্যতে| অত্র চ দ্রব্যসামান্যমেব ধাতূনাং দ্রব্যরূপাণাং বর্ধকং ন গুণসামান্যং, গুণানাং দ্রব্যানারম্ভকত্বাত্| গুণসামান্যাত্তু তদ্গুণাশ্রযং দ্রব্যমনুমীযতে; তচ্চ দ্রব্যং ধাতুবর্ধকং ভবতি, যথা- রূক্ষাদীন্ গুণান্ দৃষ্ট্বা চিত্রকো বায্বধিকো যোঽনুমিতঃ, স চ চিত্রক উপযুক্তো বাতং বর্ধযতি, গুণাস্তু গুণানেব জনযন্তোঽভিবর্ধযন্তি| সামান্যং চ বৃদ্ধিকারণলক্ষণং ন সাক্ষাদ্বৃদ্ধিকারণমিতি প্রাগেবোক্তম্; এবং বিশেষেঽপি| অযং চ সামান্যবিশেষবাদো গ্রন্থবিস্তরভযাদাযুর্বেদোপযুক্তধর্মমাত্রেণোক্তঃ; বিস্তরস্ত্বস্য বৈশেষিকে বোদ্ধব্যঃ||৪৫||

Adhikarana 19 (46-47) · Śloka 47

সত্ত্বমাত্মা শরীরং চ ত্রযমেতত্ত্রিদণ্ডবত্| লোকস্তিষ্ঠতি সংযোগাত্তত্র সর্বং প্রতিষ্ঠিতম্||৪৬|| স পুমাংশ্চেতনং তচ্চ তচ্চাধিকরণং স্মৃতম্| বেদস্যাস্য, তদর্থং হি বেদোঽযং সম্প্রকাশিতঃ||৪৭||

সম্প্রতি সামান্যবিশেষাবভিধায, উদ্দেশক্রমানুরোধাদ্গুণেঽভিধাতব্যে, গুণেষু প্রধানভূতমাযুর্বেদোপকার্যং সত্ত্বাত্মশরীরসংযোগং বক্তুমাহ- সত্ত্বমিত্যাদি; কিংবা সামান্যবিশেষাভ্যামেব হেতুলিঙ্গৌষধানি দর্শিতানি, সামান্যবিশেষবত এব সর্বত্র কারণত্বাল্লিঙ্গত্বাচ্চৈতাবদেব বিচার্যমাণং তন্ত্রং ভবতি, অধিকরণং চ নোক্তম্, অতঃ সত্ত্বাদিমেলকং হেত্বাদ্যধিকরণমাহ- সত্ত্বমিত্যাদি| সত্ত্বং মনঃ| চশব্দঃ সমুচ্চযে| সঙ্খ্যেযনির্দেশাদেব সঙ্খ্যাযাং লব্ধাযাং ত্রযমিতি পদং মিলিতানামেব গ্রহণার্থম্| এতদিত্যনন্তরোক্তনির্দেশঃ| ত্রিদণ্ডঃ পরস্পরসংযোগবিধৃতঃ কুম্ভাদিধারকস্তদ্বত্| এতেন যথা ত্রিদণ্ডেঽন্যতমাপাযে নাবস্থানং, তথা সত্ত্বাদীনামন্যতমাপাযেঽপি ন লোকস্থিতিরিত্যুক্তং ভবতি| লোকত আলোকত ইতি লোকঃ, তেনেহ জঙ্গমো ভূতগ্রাম উচ্যতে| সংযোগাত্তিষ্ঠতীতি পরস্পরোপগ্রাহকাত্ সংযোগাত্ স্বার্থক্রিযাং কুর্বন্ন বিশকলিতং ভবতি| অত্র তু পৃথগিন্দ্রিযগ্রহণং ন কৃতং, শরীরগ্রহণেনৈব গৃহীতত্বাত্| তত্র সর্বং প্রতিষ্ঠিতমিতি তস্মিংল্লোকে কর্মফলাদি ব্যবস্থিতং; যদ্বক্ষ্যতি- “অত্র কর্মফলং চাত্র জ্ঞানং চাত্র প্রতিষ্ঠিতম্| অত্র মোহঃ সুখং দুঃখং জীবিতং মরণং স্বতা” (শা.অ.১) ইতি| স পুমানিতি তত্ সত্ত্বাদিত্রযং পুমানিতি ভণ্যতে| তত্র যদ্যপি সত্ত্বাদিত্রযং নপুংসকলিঙ্গং, তথাঽপি পুমানিতি বক্ষ্যমাণলিঙ্গগ্রহণাত্ ‘স’ ইতি পুংলিঙ্গনির্দেশঃ; যথা- “ণেরণৌ যত্কর্ম ণৌ চেত্ স কর্তানাধ্যানে” (পা.অ.১পা.৩সূ.৬৭) ইত্যাদৌ| কিঞ্চৈতদিতি যদ্যপি বর্তমাননির্দেশঃ কৃতস্তথাঽপি তস্যৈব ‘স’ ইত্যতীতনির্দিশোঽপি সর্বনাম্নাং সর্বকালনির্দেশাদেবাবিরুদ্ধো মন্তব্যঃ| বদন্তি হি লাক্ষণিকাঃ- “প্রত্যক্ষে চ পরোক্ষে চ সামীপ্যে দূর এব চ| এতেষ্বর্থেষু বিদ্বদ্ভিঃ সর্বনাম প্রযুজ্যতে” ইতি| চেতনমিতি জ্ঞানবত্| তচ্চাধিকরণং স্মৃতং তন্ত্রস্যেত্যত্র হেতুমাহ- তদর্থং হীত্যাদি| তদর্থমিতি তদুপকারার্থম্; এতেন তদুদ্দিশ্য প্রবৃত্তিরধিকরণার্থা নাধারার্থেতি দর্শযতি| অত্র সত্ত্বমাদৌ কৃতং, তদধীনত্বাদাত্মশরীরক্রিযাযাঃ; যদুক্তং- “অচেতনং ক্রিযাবচ্চ মনশ্চেতযিতা পরঃ| যুক্তস্য মনসা তস্য নির্দিশন্ত্যাত্মনঃ ক্রিযাম্” (শা.অ.১) ইতি| পূর্বং শরীরেত্যাদিনাঽঽযুরুক্তং, সত্ত্বমাত্মেত্যাদিনা তু তন্ত্রাধিকরণভূতপুরুষ উচ্যত ইতি ন পৌনরুক্ত্যম্| অত্র চাত্মগ্রহণেন বুদ্ধ্যহঙ্কারাদীনাং গ্রহণং, শরীরগ্রহণেনেন্দ্রিযাণামর্থানাং চ শরীরসম্বদ্ধানাং গ্রহণং ব্যাখ্যেযম্||৪৬-৪৭||

Adhikarana 20 (48) · Śloka 48

খাদীন্যাত্মা মনঃ কালো দিশশ্চ দ্রব্যসঙ্গ্রহঃ| সেন্দ্রিযং চেতনং দ্রব্যং, নিরিন্দ্রিযমচেতনম্||৪৮||

সম্প্রতি গুণাভিধানং ক্রমপ্রাপ্তমুল্লঙ্ঘ্য দ্রব্যাণি নির্দিশতা গুণাধারতযা দ্রব্যস্য প্রাধান্যমুচ্যতে; সূত্রে চ “সামান্যং চ বিশেষং চ” ইত্যাদৌ গুণানাদৌ নির্দিশতা গুণানামেব রসাদীনাং প্রাযঃ শাস্ত্রে কার্মুকত্বমুপদর্শ্যতে; অত এবাত্রেযভদ্রকাপ্যীযে (সূ.অ.২৬) মধুরাদিরসদ্বারা সর্বগুণান্ কর্মাণি চ দ্রব্যস্য বক্ষ্যতি; কিঞ্চ সর্বপ্রধানং যজ্জীবিতং তদেব সংযোগগুণরূপমিত্যগ্রে তত্র গুণগ্রহণং, স চ সংযোগগুণঃ সত্ত্বমাত্মেত্যাদিনা প্রথমমুক্ত এব; বিশেষগুণেষু তু দ্রব্যং প্রধানমিতি দ্রব্যমুচ্যতে- খাদীনীত্যাদি| খাদীনীত্যাদাবাত্মা কস্মাত্ প্রধানভূতোঽপি প্রথমং নোক্তঃ? উচ্যতে- শরীরস্যেহ ব্যাধ্যারোগ্যাধিকরণতযা প্রধানত্বাত্তদারম্ভকানি খাদীন্যেবোচ্যন্তে নাত্মা, তস্য নির্বিকারত্বাত্; বচনং হি “নির্বিকারঃ পরস্ত্বাত্মা” (সূ.অ.১) ইত্যাদি; খাদীনি চ “মহাভূতানি খং বাযুরগ্নিরাপঃ ক্ষিতিস্তথা” (শা.অ.১) ইত্যনেন ক্রমেণোক্তানি ভূতান্যনাগতাবেক্ষণেনোচ্যন্তে | আত্মাদীনাং চ যথাভ্যর্হিতস্য পূর্বনির্দেশঃ| দ্রব্যসঙ্গ্রহ ইতি করচরণহরীতকীত্রিবৃতাদ্যসঙ্খ্যেযভেদভিন্নস্য কার্যদ্রব্যস্য কারণদ্বারা সঙ্ক্ষেপ ইত্যর্থঃ| সর্বকার্যদ্রব্যাণামপি ব্যবস্থামাহ- সেন্দ্রিযমিত্যাদি| নিরিন্দ্রিযমিত্যত্র নিঃশব্দোঽভাবে, নির্মক্ষিকমিতিবত্| অত্র সেন্দ্রিযং চেতনমিত্যেবাবতৈবার্থাপত্ত্যা নিরিন্দ্রিযমচেতনমিতি লব্ধেঽপি পুনস্তদ্বচনমেবম্ভূতার্থাপত্তেরনৈকান্তিকত্বাদ্বোদ্ধব্যম্| যথা নবজ্বরে দিবাস্বপ্নাদি নিষিদ্ধং, অর্থাজ্জীর্ণে জ্বরে তদাপদ্যেত , ন চৈবং; তত্র তেষাং দিবাস্বপ্নাদীনাং নিষিদ্ধত্বাত্; তস্মাত্ত্রিবিধশিষ্যবুদ্ধিহিততযোহ্যমপি সাক্ষাদেবোচ্যতে; বদন্তি হি ন্যাযবিদো- “ব্যাখ্যানাদ্বরং করণম্” ইতি| যদ্যপি চাত্মৈব চেতনো ন শরীরং, নাপি মনঃ, যদুক্তং- “চেতনাবান্ যতশ্চাত্মা ততঃ কর্তা নিরুচ্যতে” (শা.অ.১) ইতি, তথাঽপি সলিলৌষ্ণ্যবত্ সংযুক্তসমবাযেন শরীরাদ্যপি চেতনম্| ইদমেব চাত্মনশ্চেতনত্বং যদিন্দ্রিযযোগে সতি জ্ঞানশালিত্বং, ন কেবলস্যাত্মনশ্চেতনত্বং ; যদুক্তং- “আত্মা জ্ঞঃ, করণৈর্যোগাজ্জ্ঞানং ত্বস্য প্রবর্ততে” (শা.অ.১) ইতি| অত্র সেন্দ্রিযত্বেন বৃক্ষাদীনামপি চেতনত্বং বোদ্ধব্যং; তথাহি- সূর্যভক্তাযা যথা যথা সূর্যো ভ্রমতি তথা তথা ভ্রমণাদ্দৃগনুমীযতে, তথা লবলী মেঘস্তনিতশ্রবণাত্ ফলবতী ভবতি, বীজপূরকমপি শৃগালাদিবসাগন্ধেনাতীব ফলবদ্ভবতি, চূতানাং চ মত্স্যবসাসেকাত্ ফলাঢ্যতযা রসনমনুমীযতে, অশোকস্য চ কামিনীপাদতলাহতিসুখিনঃ স্তবকিতস্য স্পর্শনানুমানং; স্মৃতিশ্চানুমানং দ্রঢযতি, যথা- “যোঽভিবাদিতবিপ্রস্তু নাশিষং সম্প্রযচ্ছতি| শ্মশানে জাযতে বৃক্ষো গৃধ্রকঙ্কোপসেবিতঃ” ইতি; তথা “বৃক্ষগুল্মং বহুবিধং তত্রৈব তৃণজাতযঃ| তমসাঽধর্মরূপেণ চ্ছাদিতাঃ কর্মহেতুনা|| অন্তঃসঞ্জ্ঞা ভবন্ত্যেতে সুখদুঃখসমন্বিতাঃ| এতদন্তাশ্চ গতযো ব্রহ্মাদ্যাঃ সমুদাহৃতাঃ” (মনুস্মৃতি অ.১) ইতি| তথা তন্ত্রকারশ্চ বানস্পত্যানূকান্ প্রাণিনো বক্ষ্যতি; তেনাগমসংবলিতযা যুক্ত্যা চেতনা বৃক্ষাঃ||৪৮||

Adhikarana 21 (49) · Śloka 49

সার্থা গুর্বাদযো বুদ্ধিঃ প্রযত্নান্তাঃ পরাদযঃ| গুণাঃ প্রোক্তাঃ ...|৪৯|

সম্প্রতি গুণান্নির্দেষ্টুমাহ- সার্থা ইত্যাদি| অনেন ত্রিবিধা অপি বৈশেষিকাঃ সামান্যা আত্মগুণাশ্চোদ্দিষ্টাঃ| তত্রার্থাঃ শব্দস্পর্শরূপরসগন্ধাঃ| যদুক্তম্- “অর্থাঃ শব্দাদযো জ্ঞেযা গোচরা বিষযা গুণাঃ” (শা.অ.১) ইতি| এতে চ বৈশেষিকাঃ; যত আকাশস্যৈব শব্দঃ প্রাধান্যেন, বাযোরেব স্পর্শঃ প্রাধান্যেন, এবমগ্ন্যাদিষু রূপাদযঃ| অন্যগুণানাং চান্যত্র দর্শনং ভূতান্তরানুপ্রবেশাত্ | বচনং হি- “বিষ্টং হ্যপরং পরেণ” (ন্যা.দ.অ.৩আ.১সূ.৬৬) ইতি| গুর্বাদযস্তু গুরুলঘুশীতোষ্ণস্নিগ্ধরূক্ষমন্দতীক্ষ্ণস্থিরসরমৃদুকঠিনবিশদপিচ্ছিলশ্লক্ষ্ণখরস্থূলসূক্ষ্মসান্দ্রদ্রবা বিংশতিঃ| এতে চ সামান্যগুণাঃ, পৃথিব্যাদীনাং সাধারণত্বাত্| এতে যজ্জঃপুরুষীযে প্রায আযুর্বেদোপযুক্তত্বাত্ পরাদিভ্যঃ পৃথক্ পঠিতাঃ| বুদ্ধিঃ জ্ঞানম্; অনেন চ স্মৃতিচেতনাধৃত্যহঙ্কারাদীনাং বুদ্ধিবিশেষাণাং গ্রহণম্| প্রযত্নোঽন্তে যেষাং নির্দেশে তে প্রযত্নান্তাঃ; এতেন চেচ্ছাদ্বেষসুখদুঃখপ্রযত্নানাং গ্রহণম্| বচনং হি- “ইচ্ছা দ্বেষঃ সুখং দুঃখং প্রযত্নশ্চেতনা ধৃতিঃ| বুদ্ধিঃ স্মৃতিরহঙ্কারো লিঙ্গানি পরমাত্মনঃ” (শা.অ.১) ইতি| ইহ চেতনাদীনাং বুদ্ধিগ্রহণেনৈব গ্রহণং, শারীরে তু চেতনাদীনামপি পৃথগাত্মগমকত্বেন পৃথক্ পাঠঃ| এতচ্চ তত্রৈব ব্যাকরণীযম্| পরাদযো যথা- “পরাপরত্বে যুক্তিশ্চ সঙ্খ্যা সংযোগ এব চ| বিভাগশ্চ পৃথক্ত্বং চ পরিমাণমথাপি চ|| সংস্কারোঽভ্যাস ইত্যেতে গুণাঃ প্রোক্তাঃ পরাদযঃ|” (সূ.অ.২৬) ইতি| এতে চ সামান্যগুণা অপি নাত্যুপযুক্তত্বাত্তথা বুদ্ধিপ্রাধান্যাচ্চান্তে প্রোক্তাঃ| প্রোক্তা ইতি প্রকর্ষেণ বিশেষগুণত্বাদিনোক্তাঃ|৪৯|-

Adhikarana 22 (49) · Śloka 49

...প্রযত্নাদি কর্ম চেষ্টিতমুচ্যতে||৪৯||

ক্রমাগতং কর্ম নির্দিশতি- প্রযত্নাদীত্যাদি| প্রযতনং প্রযত্নঃ কর্মৈবাদ্যমাত্মনঃ; যথা- “তুল্যাস্যপ্রযত্নং সবর্ণম্” (পা.অ.১পা.১সূ.৯) ইত্যত্র ব্যাখ্যাতম্| আদিশব্দঃ প্রকারবাচী| তেন সংস্কারগুরুত্বাদিজন্যকৃত্স্নক্রিযাবরোধঃ| যদ্যপি চেষ্টিতং প্রাণিব্যাপার উচ্যতে, তথাঽপীহ সামান্যেন ক্রিযা বিবক্ষিতা| চেষ্টিতপদেনৈব সর্বকর্মলাভে সিদ্ধে বমনাদিকর্মনিষেধে চ সিদ্ধে প্রযত্নাদীতি পদং সুসূক্ষ্মপ্রযত্নরূপকর্মব্যাপিত্বদ্যোতনার্থম্ | অন্যে তু প্রযত্নাদীতি প্রযত্নকারণমিতি ব্রুবতে, প্রযত্নগ্রহণং চ কারণোপলক্ষণং বদন্তি; তেন গুরুত্বাদিকার্যস্যাপি কর্মণো গ্রহণমিতি| প্রযত্নশব্দশ্চাযুর্বেদেঽপি কর্মবচনো দৃশ্যতে; “প্রবৃত্তিস্তু চেষ্টা কার্যার্থা, সৈব ক্রিযা প্রযত্নঃ কার্যসমারম্ভশ্চ” (বি.অ.৮) ইতি বচনাত্||৪৯||

Adhikarana 23 (50) · Śloka 50

সমবাযোঽপৃথগ্ভাবো ভূম্যাদীনাং গুণৈর্মতঃ| স নিত্যো যত্র হি দ্রব্যং ন তত্রানিযতো গুণঃ||৫০||

সমবাযমাহ- সমবায ইত্যাদি| সমবাযস্য চাযং নির্দেশ এব লক্ষণম্| তেনোত্তরত্র দ্রব্যাদিলক্ষণে পুনরস্য লক্ষণং ন কর্তব্যম্| সমবায ইতি লক্ষ্যনির্দেশঃ, অপৃথগ্ভাব ইতি লক্ষণম্; অপৃথগ্ভাবঃ অযুতসিদ্ধিঃ, সহৈবাবস্থানমিতি যাবত্| যথা- অবযবাবযবিনোঃ, গুণগুণিনোঃ, কর্মকর্মবতোঃ, সামান্যসামান্যবতোঃ; নহ্যবযবাদীন্ বিরহয্যাবযব্যাদয উপলভ্যন্তে| অপৃথগ্ভাবমেব বিশেষযন্নাহ- ভূম্যাদীনাং গুণৈর্মত ইতি| ভূম্যাদীনাং ভূমিপ্রকারাণাং; ভূমিশ্চ ভূযসামাধেযানামাধারা, তেনাধারত্বোদাহরণার্থমুক্তা; যতো ভূমেরর্থাঃ সর্বে গুর্বাদিপরাদ্যাশ্চ গুণাস্তথা চাবযবিসামান্যক(ধ)র্মাণ্যপ্যাধেযানি, নেতরদ্রব্যে যথোক্তসর্বাধেযসম্পত্তিঃ| এতেন ভূম্যাদীনামিত্যাধারাণাং, গুণৈরিতি অপ্রধানৈরাধেযৈঃ; আধেযো হ্যাধারাপেক্ষযাঽপ্রধানম্, অপ্রধানে চ গুণশব্দো যথা- গুণীভূতোঽযমিতি, অপ্রধানমিত্যর্থঃ; তেনাধারাণামাধেযৈর্যোঽপৃথগ্ভাবঃ স সমবাযঃ ইতি| তেন পৃথিবীত্বগন্ধবত্ত্বযোরপৃথক্সিদ্ধযোরপ্যাধারাধেযভাবাভাবান্ন সমবায ইত্যুক্তং ভবতি| অত এবোক্তং বৈশেষিকে যত্- “অযুতসিদ্ধানামাধার্যাধারভূতানাং যঃ সম্বন্ধ ইহেতিপ্রত্যযহেতুঃ স সমবাযঃ” (প.ধ.সং.দ্রব্যপদার্থনিরূপণ) ইতি| স নিত্য ইতি সমবাযোঽবিনাশী| সত্যপি সমবাযিনাং দ্রব্যাণাং নাশে সমবাযো ন বিনশ্যতি| অত্র হেতুমাহ- যত্র হীত্যাদি| যত্র দ্রব্যং নিযতং নিত্যং, যথা- আকাশং, ন তত্র নিত্য আকাশেঽনিযতো বিনাশী গুণঃ, ‘কশ্চিত্’ ইতি শেষঃ| এবং মন্যতে- নিত্যে ব্যোম্নি পরিমাণমপি তাবন্নিত্যং, তথা দ্রব্যত্বমপ্যাকাশগতং নিত্যং, তথা নিত্যযোরাকাশতদ্গুণযোঃ সমবাযলক্ষণঃ সম্বন্ধোঽপি নিত্য এব| এবং তত্র সমবাযস্য নিত্যত্বে সিদ্ধে একরূপত্বাত্ সমবাযস্যান্যত্রাপি নিত্যত্বমেব| ন চাশ্রযদ্রব্যনাশে সমবাযবিনাশঃ| যথা- গোব্যক্তিবিনাশেঽপি গোত্বস্য সামান্যস্য ন বিনাশঃ| নিত্যস্যৈব সমবাযস্য তে তে পার্থিবদ্রব্যাদযস্তত্র তত্র ব্যঞ্জকা ভবন্তি সামান্যস্যেব ব্যক্তযঃ| অন্যৈস্তু নিত্যানিত্যভেদেন দ্বিবিধঃ সমবাযো ব্যাখ্যাতঃ; অযং চ গ্রন্থো ভূম্যাদীনাং গুণৈরেব যঃ সম্বন্ধস্তস্যৈব যথাশ্রুতস্য প্রতিপাদক ইতি ব্যাখ্যাতং; তত্তু ন ব্যাপকং নাপি বৈশেষিকমতানুযাযীতি নেহ প্রপঞ্চিতম্||৫০||

Adhikarana 24 (51) · Śloka 51

যত্রাশ্রিতাঃ কর্মগুণাঃ কারণং সমবাযি যত্| তদ্দ্রব্যং ...|৫১|

দ্রব্যলক্ষণমাহ- যত্রেত্যাদি| যত্রাশ্রিতা যত্র সমবেতাঃ, কর্ম চ গুণাশ্চ কর্মগুণাঃ| কারণং সমবাযি যদিতি সমবাযি কারণং যত্, দ্রব্যমেব হি দ্রব্যগুণকর্মণাং সমবাযিকারণম্| সমবাযিকারণং চ তদ্ যত্ স্বসমবেতং কার্যং জনযতি; গুণকর্মণী তু ন স্বসমবেতং কার্যং জনযতঃ, অতো ন তে সমবাযিকারণে| এতত্কর্মবত্ত্বং হি দ্রব্যস্য গুণাদিপঞ্চপদার্থব্যাবৃত্তিমাত্রলক্ষণকথনং, ন তু সজাতীযব্যাপকবিজাতীযব্যাবর্তকলক্ষণকথনং; যেন কর্মসমবাযো নাকাশাদীনাং বর্ততে , তেন লক্ষণানুগতং বিজাতীযব্যাবৃত্তং দ্রব্যস্য লক্ষণং গুণবত্ত্বং সমবাযিকারণত্বং চ বোদ্ধব্যম্| যদু(ত্তূ)ত্পন্নমাত্রং দ্রব্যং প্রথমক্ষণে নির্গুণং, তদপি দ্বিতীযক্ষণাবশ্যম্ভাবিগুণবত্তযা তদ্যোগ্যত্বাদ্গুণবদেবেতি মন্তব্যম্| বৈশেষিকেঽপ্যুচ্যতে- ক্রিযাবদ্গুণবত্ সমবাযিকারণং দ্রব্যম্ (বৈ.দ.অ.১সূ.১৫) ইতি| তত্রাপি চ যথেহ ব্যাখ্যাতং তথৈব ব্যাখ্যাতম্| ৫১|-

Adhikarana 25 (51) · Śloka 51

...সমবাযী তু নিশ্চেষ্টঃ কারণং গুণঃ||৫১||

গুণলক্ষণমাহ- সমবাযীত্যাদি| সমবাযীতি সমবাযাধেযঃ; তেন ব্যাপকদ্রব্যেভ্যো নিষ্ক্রিযেভ্য আকাশাদিভ্যো গুণস্য ব্যাবৃত্তিঃ; নহ্যাকাশাদযঃ সমবাযাধেযাঃ| নির্গতশ্চেষ্টাযাঃ নিশ্চেষ্টঃ; চেষ্টানির্গত্যা চেহ চেষ্টাশূন্যত্বং তথা চেষ্টাব্যতিরিক্তত্বং চোচ্যতে; তেন চেষ্টারূপাত্ কর্মণো ব্যাবৃত্তিঃ, তথা ক্রিযাধারত্বযোগেভ্যো মূর্তদ্রব্যেভ্যো ব্যাবৃত্তিঃ সিদ্ধা; গুণস্য কারণমিত্যনেন চাকারণেভ্যঃ সামান্যবিশেষসমবাযেভ্যো ব্যাবৃত্তিঃ সিদ্ধা| কারণত্বং তু বিভুদ্রব্যপরিমাণান্ত্যাবযবিরূপাদিষু লক্ষণীযেষু গুণেষু নাস্তি, তেন ভাগাসিদ্ধং লক্ষণং স্যাত্, অতঃ কারণত্বেনেহ ভাবরূপকারণাব্যভিচারি সামান্যবত্ত্বং লক্ষণতযা বোদ্ধব্যম্| তচ্চ সামান্যবত্ত্বং সর্বগুণব্যাপকং সামান্যাদিব্যাবর্তকং চ, সামান্যাদীনাং সামান্যবত্ত্বাভাবাত্| অথবা বিভুদ্রব্যপরিমাণান্ত্যাবযবিরূপাদ্যন্তরাণাং কারণত্বদর্শনাদ্বিভুদ্রব্যপরিমাণান্ত্যাবযবিরূপাদাবপি কারণত্বযোগ্যত্বমস্ত্যেবেতি ন ভাগাসিদ্ধতা কারণত্বস্য; কিংবা যোগিপ্রত্যক্ষজ্ঞানহেতুতযা বিভুদ্রব্যপরিমাণাদীনামপি কারণত্বং বোদ্ধব্যম্| এবম্ভূতং চ কারণত্বং যদ্যপি সামান্যাদিষ্বপি ক্বচিদনুগম্যতে, তথাঽপি ‘সমবাযী তু’ ইতি পদেন সমবাযাধারতা তথা সমবাযাধেযতা চ যুগপদ্বিপক্ষিতা; তেন সমবাযকেবলাধারস্য বিভুদ্রব্যস্য তথা সমবাযকেবলাধেযস্য সামান্যাদেশ্চ ব্যুদাসঃ সিদ্ধো ভবতি||৫১||

Adhikarana 26 (52) · Śloka 52

সংযোগে চ বিভাগে চ কারণং দ্রব্যমাশ্রিতম্| কর্তব্যস্য ক্রিযা কর্ম কর্ম নান্যদপেক্ষতে||৫২||

কর্মলক্ষণমাহ- সংযোগ ইত্যাদি| সংযোগে চ বিভাগে চ যুগপত্ কারণম্| তেন সংযোগে উত্তরদেশসংযোগকারকে বিভাগাকারণে, তথা বিভাগে চ বিভাগজবিভাগমাত্রকারণে সংযোগাকারণে ব্যাবৃত্তিঃ সিদ্ধা| দ্রব্যমাশ্রিতমিতি স্বরূপমাত্রকথনং ব্যাখ্যেযং, দ্রব্যব্যাবৃত্তিস্তু ‘কর্ম নান্যদপেক্ষতে’ ইত্যনেনৈব সিদ্ধা | অস্যাযমর্থো যত্- কর্ম উত্পন্নং স্বাশ্রযস্য দ্রব্যস্য পূর্বদেশবিভাগে উত্তরদেশসংযোগে চ কর্তব্যে নান্যত্কারণং পশ্চাত্কালভাব্যপেক্ষতে; দ্রব্যং তু যদ্যপি সংযোগবিভাগকারণং যুগপদ্ভবতি, তথাঽপি তদুত্পন্নং সদ্যদা কর্মযুক্তং ভবতি তদৈব সংযোগবিভাগকারণং স্যাত্ ; কর্ম তূত্পন্নং করোত্যেব পরং সংযোগবিভাগৌ ন তু কারণান্তরং পশ্চাদ্ভাব্যপেক্ষতে, সংযোগবিভাগাশ্রযপ্রত্যাসত্তিং ত্বপেক্ষতে, সা চ পূর্বসিদ্ধৈবেতি ন চরমভাবিকারণান্তরাপেক্ষতা কর্মণঃ| অথ কর্মশব্দেন বমনাদীনাং তথাঽদৃষ্টস্য তথা ক্রিযাযাশ্চাভিধীযমানত্বাত্ কস্য কর্মণ ইদং লক্ষণমিত্যত আহ- কর্তব্যস্য ক্রিযা কর্মেতি| এতেন ক্রিযারূপস্য কর্মণ ইদং লক্ষণং নাদৃষ্টাদেরিতি||৫২||

Adhikarana 27 (53) · Śloka 53

ইত্যুক্তং কারণং...|৫৩|

প্রকরণমুপসংহরতি- ইতীত্যাদি| ইতি সমাপ্তৌ; তেনৈতাবদেব সামান্যাদিষট্কং সর্বস্যৈব কার্যজাতস্য কারণং, নান্যত্ কারণমস্তি|৫৩|-

Adhikarana 28 (53) · Śloka 53

... কার্যং ধাতুসাম্যমিহোচ্যতে| ধাতুসাম্যক্রিযা চোক্তা তন্ত্রস্যাস্য প্রযোজনম্||৫৩||

কারণং সামান্যেনাভিধাযাযুর্বেদোপযুক্তং কার্যমাহ- কার্যমিত্যাদি| ধাতুসাম্যম্ আরোগ্যং; বক্ষ্যতি হি- “বিকারো ধাতুবৈষম্যং সাম্যং প্রকৃতিরুচ্যতে| সুখসঞ্জ্ঞকমারোগ্যম্” (সূ.অ.৯) ইত্যাদি| ইহেত্যাযুর্বেদে; তেনান্যত্রান্যদপি ঘটাদি কার্যমুচ্যতে| ইহ তু কিমিতি তত্ কার্যং নোচ্যত ইত্যাহ- ধাতুসাম্যেত্যাদি| চকারো হেতৌ| ধাতুসাম্যক্রিযৈব যস্মাদাযুর্বেদপ্রযোজনং, তস্মাদাযুর্বেদে ধাতুসাম্যমেব কার্যমুচ্যতে প্রযোজনং কথ্যতে; অন্যত্ত্ববিবক্ষিতত্বাত্তথাঽপ্রধানত্বাচ্চ নেহ কার্যত্বেনোচ্যতে||৫৩||

Adhikarana 29 (54) · Śloka 54

কালবুদ্ধীন্দ্রিযার্থানাং যোগো মিথ্যা ন চাতি চ| দ্বযাশ্রযাণাং ব্যাধীনাং ত্রিবিধো হেতুসঙ্গ্রহঃ||৫৪||

সম্প্রতি সামান্যেন কারণমুক্তং তদাযুর্বেদোপযুক্তদ্বারেণ বক্তব্যং; তত্র ব্যাধিকারণমেব তাবদগ্রেঽভিধীযতে- কালেত্যাদিনা সূত্রক্রমানুরোধাত্| সূত্রণং হি “হেতুলিঙ্গৌষধজ্ঞানম্” (সূ.অ.১) ইতি| কালঃ শীতোষ্ণবর্ষলক্ষণঃ, বুদ্ধিঃ প্রজ্ঞা, ইন্দ্রিযার্থাঃ শব্দস্পর্শরূপরসগন্ধাস্তত্সহচরিতানি দ্রব্যগুণকর্মাণীন্দ্রিযদ্বারোপযুজ্যমানানি চ; তেষাং কালাদীনাং যোগঃ সম্বন্ধঃ| তস্য বিশেষণত্রযং- মিথ্যা ন চাতি চেতি| তেন কালাদীনাং মিথ্যাযোগঃ, নচ যোগঃ অযোগ ইত্যর্থঃ, অতি চ যোগঃ অতিযোগ ইত্যর্থঃ| দ্বযাশ্রযাণামিতি মনঃশরীরাশ্রযাণাম্| এতচ্চ মনঃশরীরাধিষ্ঠানত্বং পৃথঙ্মিলিতং চ বোদ্ধব্যম্| ত্রিবিধ ইত্যযোগাতিযোগমিথ্যাযোগরূপঃ| হেতুসঙ্গ্রহঃ হেতুসঙ্ক্ষেপঃ| এতে চ কালাদীনামতিযোগাযোগমিথ্যাযোগাস্তিস্রৈষণীযে “তত্রাতিপ্রভাবতাং” (সূ.অ.১১) ইত্যাদিনা গ্রন্থেন সুব্যক্তং বাচ্যা ইতি নেহ বিব্রিযন্তে| কালগ্রহণং ত্বিহাদৌ কৃতং, কালস্য দুষ্পরিহারত্বাত্| তদনু বুদ্ধিরুচ্যতে, বুদ্ধ্যপরাধস্যৈবেন্দ্রিযার্থাতিযোগাদিহেতুত্বাত্; বক্ষ্যতি হি- “প্রজ্ঞাপরাধাদ্ধ্যহিতানর্থান্ পঞ্চ নিষেবতে” (সূ.অ.২৮) ইতি; এবং চ যদ্যপ্যসাত্ম্যেন্দ্রিযার্থসংযোগঃ প্রজ্ঞাপরাধে প্রবিশতি, তথাঽপি প্রত্যাসন্নকারণত্বাদসাত্ম্যেন্দ্রিযার্থসংযোগেনৈবাযং পৃথক্ তন্ত্রে সূচ্যতে, প্রজ্ঞাপরাধস্ত্বসাত্ম্যেন্দ্রিযার্থসংযোগব্যতিরিক্তকাযবাঙ্মনঃক্রিযাপরাধে বর্ততে| অত্র চাধর্মোঽপি ব্যাধিহেতুরস্তি, যদুক্তং- “ক্রিযাঘ্নাঃ কর্মজা রোগাঃ” (শা.অ.১) ইত্যাদি; তস্য চাধর্মস্য কালগ্রহণেনৈব গ্রহণং কেচিন্মন্যন্তে; তন্ন, তিস্রৈষণীযে প্রজ্ঞাপরাধেনৈবাধর্মগ্রহণাত্| তত্র হি, অনৃতবচনাভিধ্যাদিবাঙ্মনোমিথ্যাযোগরূপঃ প্রজ্ঞাপরাধবিশেষ উক্তঃ; নত্বনৃতবচনাদীনাং স্বরূপেণ ব্যাধিকর্তৃত্বং, কিন্ত্বধর্মোত্পাদাবান্তরব্যাপারাণামেব; তেন প্রজ্ঞাপরাধ এবাধর্মোত্পাদাবান্তরব্যাপারঃ কর্মজরোগেষু কারণং, যাগ ইব ধর্মোত্পাদাবান্তরব্যাপারঃ স্বর্গে| যত্তূচ্যতে- কালপরিণামজাযমানত্বাত্ কর্মজবিকারাণাং কালজত্বং, যদুক্তং- “কালস্য পরিণামেন জরামৃত্যুনিমিত্তজাঃ| রোগাঃ স্বাভাবিকা দৃষ্টাঃ স্বভাবো নিষ্প্রতিক্রিযঃ” (শা.অ.১) ইতি; তন্ন, তথা সত্যসাত্ম্যেন্দ্রিযার্থসংযোগজস্যাপি কিঞ্চিত্কালপরিণামজাযমানস্য কালজত্বং স্যাত্| নচ কালাতিযোগাদ্যভিধাযিগ্রন্থে তিস্রৈষণীযে কর্মাবরোধঃ কথমপি প্রতিভাতি| কতিধাপুরুষীযে তু “ধীধৃতিস্মৃতিবিভ্রংশঃ সম্প্রাপ্তিঃ কালকর্মণাম্| অসাত্ম্যেন্দ্রিযসংযোগা বিজ্ঞেযা রোগহেতবঃ” (শা.অ.১) ইত্যভিধায স্বাভাবিকানাং রোগাণাং তথা কর্মজানাং চ কালজ এবাবরোধঃ কৃতঃ| উক্তং হি তত্র- “কালস্য পরিণামেন জরামৃত্যুনিমিত্তজাঃ| রোগাঃ স্বাভাবিকা দৃষ্টাঃ স্বভাবো নিষ্প্রতিক্রিযঃ” (শা.অ.১) ইতি, তথা “নির্দিষ্টং দৈবসঞ্জ্ঞং তু কর্ম যত্ পৌর্বদৈহিকম্| হেতুস্তদপি কালেন রোগাণামুপলভ্যতে” (শা.অ.১) ইতি| অত্রাপি বুদ্ধিমিথ্যাযোগরূপঃ প্রজ্ঞাপরাধ এব রোগজনককর্মকারণম্| কালবিশেষপ্রাপ্ত্যা তু যেষাং ব্যাধীনামাগমো ভবতি, তে কালমিথ্যাদিযোগজন্যা বা ভবন্তু, অসাত্ম্যেন্দ্রিযার্থপ্রজ্ঞাপরাধজন্যা বা; সর্ব এবাবিশেষেণ কালকৃতাভিব্যক্তিমাত্রপরিগ্রহণাত্তত্র কালসম্প্রাপ্তিজন্যা ইত্যুক্তা গদাঃ| তথাহি- তত্র সন্ততাদিজ্বরা অপি কালজন্যা এবোক্তাঃ| বচনং হি- “সন্ততঃ সততোঽন্যেদ্যুস্তৃতীযকচতুর্থকৌ| স্বে স্বে কালে প্রবর্তন্তে কালে হ্যেষাং বলাগমঃ” (শা.অ.১) ইতি| নচ সন্ততাদৌ কালস্য মিথ্যাযোগাদযঃ কারণত্বেনোপলভ্যন্তে, কিন্তর্হ্যসাত্ম্যেন্দ্রিযার্থসংযোগপ্রজ্ঞাপরাধাবেব; তথা স্বাভাবিকেষু চ রোগেষু ন কালমিথ্যাযোগাদযঃ কারণত্বেনোপলভ্যন্তে; তস্মান্ন তত্র কালমিথ্যাযোগাদিজন্যাঃ কালজত্বেনাচার্যস্যাভিপ্রেতাঃ, কিন্তু কালাভিব্যঞ্জনীযাঃ কালজাঃ; অত এব চ তত্র “সম্প্রাপ্তিঃ কালকর্মণাম্” (শা.অ.১) ইতি পঠিতং নতু “কালো মিথ্যা ন চাতি চ” ইতি পঠিতম্ | কিঞ্চ তত্রাপি কালমভিধাযাপি কর্মণামিতি পদং পৃথক্ পঠিত্বা কালে জাতঃ কর্মজঃ পৃথগেব সূচিতঃ| কিঞ্চ, উন্মাদনিদানে সাক্ষাদেবাচার্যেণ কর্মজস্য প্রজ্ঞাপরাধজত্বমুক্তম্| বচনং হি- “প্রজ্ঞাপরাধাত্ সম্ভূতে ব্যাধৌ কর্মজ আত্মনঃ| নাভিশংসেদ্বুধো দেবান্ন পিতৄন্ন চ রাক্ষসান্” (নি.অ.৭) ইতি| জনপদোদ্ধ্বংসনীযেঽপ্যুক্তং- “তস্যমূলমধর্মঃ, তন্মূলং চাসত্কর্ম পূর্বকৃতং, তযোর্যোনিঃ প্রজ্ঞাপরাধ এব” (বি.অ.৩)| (তদেবং কর্মাপেক্ষদ্বযমুপদর্শিতং,) বলাবলং তু বিদ্বাংসঃ স্বযমেব নির্লোচযিষ্যন্তি| ইদং ত্বত্র চিন্ত্যতাং- স্বাভাবিকানাং ক্ষুত্পিপাসাদীনাং তথা কালসম্যগ্যোগেঽপি জাযমানানাং দোষচযপ্রকোপাণাং ক্ব প্রবেশো ভবতু; ন তাবত্ কালজে, যতঃ কালো হি তত্র সম্যগ্যুক্ত এব, কালসম্যগ্যোগশ্চ ন ব্যাধিকারণমিতি সিদ্ধান্তঃ; অথ কালপ্রতিনিযতস্তত্রাসাত্ম্যেন্দ্রিযার্থসংযোগ এব কারণমিষ্যতে, তথাঽপ্যেবং সতি কালমিথ্যাযোগাদাবপ্যসাত্ম্যেন্দ্রিযার্থসংযোগ এব কারণমিতি বক্তুং পার্যতে; তস্মাদস্মিন্মার্গে এবং বুদ্ধির্বলতে - যত্- সহজানাং বিকারাণাং নিষ্প্রতিক্রিযত্বেনেহাযোগাদিজন্যত্বেনাবরোধো ন কৃত এব, কালস্বভাবজা অপি সহজা এব; যা ত্বত্র প্রতিক্রিযা কালস্বভাবজানামনাগতানাং ভাবানাং সত্ত্বগুণদ্রব্যসেবাদিরূপা তথা স্বাভাবিকানাং চ ক্ষুত্পিপাসাজরাদীনাং কালভোজনরসাযনাদিরূপা, তস্যা অকরণে সতি কালস্বভাবজস্য রোগস্য প্রাদুর্ভাবঃ প্রজ্ঞাপরাধজন্য এব, উচিতে হি কালে কর্তব্যাকরণং প্রজ্ঞাপরাধ এব; উক্তং হি কতিধাপুরুষীযেঽপি প্রজ্ঞাপরাধসঙ্গ্রহে- “কর্মকালাতিপাতশ্চ মিথ্যারম্ভশ্চ কর্মণাম্” (শা.অ.১) ইতি| অন্যে তু মিথ্যাযোগাদিশূন্যকালবিদ্যমানত্বেন কাল এবাবরোধ এষাং বিকারাণামিতি কতিধাপুরুষীযে বক্ষ্যমাণগ্রন্থস্য যথাশ্রুতার্থপরিগ্রহাদ্বর্ণযন্তি| নচেতি চকারাদ্ধীনযোগং গৃহ্ণাতি| বক্ষ্যতি হি- “মিথ্যাতিহীনলিঙ্গেভ্যো যো ব্যাধিরুপজাযতে” (শা.অ.১) ইতি| হীনযোগস্য তু সাক্ষাদপঠনমযোগপ্রভেদত্বাত্; স্বল্পযোগে(গো)ঽপ্যযোগো ভবতি, যথৈকতণ্ডুলাভ্যবহারেঽনশনমুচ্যতে||৫৪||

Adhikarana 30 (55) · Śloka 55

শরীরং সত্ত্বসঞ্জ্ঞং চ ব্যাধীনামাশ্রযো মতঃ| তথা সুখানাং, যোগস্তু সুখানাং কারণং সমঃ||৫৫||

দ্বযাশ্রযাণামিত্যনেনোক্তমাশ্রযং দর্শযতি- শরীরমিত্যাদি| অত্র শরীরমাদৌ কৃতং, শরীররোগাধিকারেণৈবাস্য তন্ত্রস্য প্রবৃত্তত্বাত্| সত্ত্বসঞ্জ্ঞশব্দেন মন উচ্যতে; কিংবা সত্ত্বশব্দেনৈব মনসি লব্ধে সঞ্জ্ঞাশব্দেনাত্মশরীরসম্বদ্ধং মন উচ্যতে, শরীরাদ্যসম্বন্ধস্য মনসো ব্যাধ্যনাশ্রযত্বাত্| অসমাসেন চ পৃথগপি শরীরমনসোর্ব্যাধ্যাশ্রযত্বং দর্শযতি| যতঃ কুষ্ঠাদযঃ শারীরা এব, কামাদযস্তু মানসাঃ, উন্মাদাদযশ্চ দ্বযাশ্রযাঃ| আরোগ্যস্যাশ্রযং হেতুং চাহ- তথা সুখানামিত্যাদি| সুখানামিতি আরোগ্যাণাম্| বচনং হি- “সুখসঞ্জ্ঞকমারোগ্যং বিকারো দুঃখমেব তু” (সূ.অ.৯) ইতি| তথেতি শরীরং মনশ্চ, তত্র শরীররোগাভাবরূপস্যারোগ্যস্য শরীরমাশ্রযঃ, মানসরোগাভাবস্য তু মনঃ| যোগস্তু সমঃ কালবুদ্ধীন্দ্রিযার্থানাং সম্যগ্যোগরূপস্তথা সুখানামারোগ্যাণাং কারণম্| সুখানামিতি সুখপদাভিধেযানাং চ রোগাভাবানাং বহুত্বং নিষেধ্যরোগবহুত্বাদেব বোদ্ধব্যম্| ইদমেব হ্যভাবানাং বহুত্বং যন্নিষেধ্যভাববহুত্বম্| ননু “আযুর্বেদাগমো হেতুঃ” (সূ.অ.১) ইত্যাদাবধ্যাযার্থসঙ্গ্রহে ব্যাধ্যাশ্রযো ন সঙ্গৃহীতঃ, তত্ কিমিদমনার্ষং? ন, হেতবশ্চেত্যনেন ব্যাধ্যাশ্রযরূপস্যাপি হেতোস্তত্র সঙ্গ্রহণম্||৫৫||

Adhikarana 31 (56) · Śloka 56

নির্বিকারঃ পরস্ত্বাত্মা সত্ত্বভূতগুণেন্দ্রিযৈঃ| চৈতন্যে কারণং নিত্যো দ্রষ্টা পশ্যতি হি ক্রিযাঃ||৫৬||

সত্ত্বমাত্মা শরীরং চেতি বচনেন ত্রযমুপাত্তম্, অত্র শরীরমনসী ব্যাধ্যাশ্রযতযোক্তে , আত্মনস্তু কা ব্যবস্থেত্যাহ- নির্বিকার ইত্যাদি| নির্বিকারো নির্বিকৃতিঃ, তেন নীরোগত্বমাত্মনঃ| পর ইতি সূক্ষ্মঃ শ্রেষ্ঠো বা, তেন সত্ত্বশরীরাত্মমেলকরূপো য আত্মশব্দেনোচ্যতে তং ব্যাবর্তযতি; যদুক্তং- “সংযোগপুরুষস্যেষ্টো বিশেষো বেদনাকৃতঃ” (শা.অ.১) ইতি| সংযোগেঽপি চাত্মাদীনাং মনস্যেব বেদনা ভবতি, সা তু মনঃসংযুক্তে আত্মন্যপি সম্বদ্ধেত্যুচ্যতে, তেন “নির্ব্যথে চান্তরাত্মনি” (সূ.অ.২২) ইতি বচনং নির্ব্যথে মনসীতি স্যাত্ ; তথা শরীরাদাবপ্যাত্মশব্দো বর্ততে, তদ্ব্যবচ্ছেদার্থং পর ইতি পদম্| উক্তং হ্যন্যত্র- “ব্রহ্মেন্দ্রবায্বগ্নিমনোধৃতীনাং ধর্মস্য কীর্তের্যশসঃ শ্রিযশ্চ| তথা শরীরস্য শরীরিণশ্চ স্যাদ্দ্বাদশস্বিঙ্গিত আত্মশব্দঃ” ইতি| ননু, যদ্যাত্মা নির্বিকারস্তত্ কিং জ্ঞানরূপোঽপ্যস্য বিকারোঽস্তি বা নাস্তীত্যাহ- সত্ত্বেত্যাদি| সত্ত্বং মনঃ, ভূতগুণাঃ শব্দাদযঃ, ইন্দ্রিযাণি চক্ষুরাদীনি, এতৈঃ করণভূতৈশ্চৈতন্যে কারণং ভবত্যাত্মা| চৈতন্যং চাত্মনি জাযতে ব্যজ্যতে বা| অত এব চ সত্ত্বাদীনাং জ্ঞানকারণানাং সর্বত্রাসম্ভবাত্ সর্বগতেঽপ্যাত্মনি ন সর্বত্র প্রদেশে জ্ঞানং ভবতি| ননু যদি চৈতন্যবানাত্মা, তদা কদাচিজ্জ্ঞানবান্ কদাচিদজ্ঞ ইত্যনিত্যঃ স্যাদিত্যাহ- নিত্য ইতি| নিত্যস্যাপ্যাত্মনো জ্ঞানমনিত্যং; নচ ধর্মানিত্যত্বে ধর্মিণোঽপ্যনিত্যত্বং, নহ্যাকাশগুণশব্দানিত্যত্বেঽপ্যাকাশস্যাপ্যনিত্যত্বমিতি ভাবঃ| নিত্যত্বং চাত্মনঃ পূর্বাপরাবস্থানুভূতার্থপ্রতিসন্ধানাত্; নহ্যনিত্যে জ্ঞাতরি পূর্বানুভূতমর্থমুত্তরো জ্ঞাতা প্রতিসন্ধত্তে ; নহি দেবদত্তবুদ্ধমর্থং যজ্ঞদত্তোঽবগতত্বেন প্রতিসন্দধাতি| ননু, দৃশ্যতে জ্ঞানবতঃ সুখোপলব্ধাবনুরাগলক্ষণো বিকারস্তথা দুঃখোপলব্ধৌ চ দ্বেষলক্ষণঃ, তত্ কথং সুখদুঃখোপলব্ধাবযমাত্মা নির্বিকার ইত্যাহ- দ্রষ্টা পশ্যতি হি ক্রিযা ইতি| দ্রষ্টা সাক্ষী; তেন যতির্যথা পরমশান্তঃ সাক্ষী সঞ্জগতঃ ক্রিযাঃ সর্বাঃ পশ্যন্ন রাগদ্বেষাদিনা যুজ্যতে, তথাঽঽত্মাঽপি সুখদুঃখাদ্যুপলভমানোঽপি ন রাগাদিনা যুজ্যতে; দৃশ্যমানরাগাদিবিকারস্তু মনসি, প্রাকৃতবুদ্ধৌ বা সাঙ্খ্যদর্শনপরিগ্রহাদ্ভবতীতি ভাবঃ| সাঙ্খ্যমতে চ মনঃশব্দেন বুদ্ধিরন্তঃকরণং চ গৃহ্যতে||৫৬||

Adhikarana 32 (57) · Śloka 57

বাযুঃ পিত্তং কফশ্চোক্তঃ শারীরো দোষসঙ্গ্রহঃ| মানসঃ পুনরুদ্দিষ্টো রজশ্চ তম এব চ||৫৭||

সম্প্রতি বিকারাশ্রযং তথা বিকারস্য ব্যবহিতং চ হেতুমভিধায প্রত্যাসন্নং দোষরূপহেতুমাহ- বাযুরিত্যাদি| অত্র প্রধানত্বাদগ্রে বাযুরুক্তঃ, প্রাধান্যং চাশুভূরিদারুণবিকারকর্তৃত্বাত্; বচনং হি- ‘আশুকারী মুহুশ্চারী’ (সু. নি. অ. ১) ইতি; তথা অশীতিং বাতজান্ বিকারান্, চত্বারিংশত্ পিত্তবিকারান্, বিংশতিং চ কফজান্ বক্ষ্যতি হি মহারোগাধ্যাযে (সূ. অ. ২)| বাতমনু পিত্তং প্রধানং, শরীরমূলভূতাগ্নিহেতুত্বাত্তথা কফাধিকবিকারকর্তৃত্বাত্তথা কফাপেক্ষযা চাশুকারিত্বাত্| অসমাসকরণং তু পৃথগপি বায্বাদীনাং রোগকর্তৃত্বোপদর্শনার্থম্| শারীর ইতি মানসদোষব্যবচ্ছেদার্থম্| সঙ্গ্রহ ইতি “দ্ব্যুল্বণৈকোল্বণৈঃ ষট্ স্যুর্হীনমধ্যাধিকৈশ্চ ষট্” (সূ.অ.১৭) ইত্যাদিবক্ষ্যমাণপ্রপঞ্চস্য সঙ্ক্ষেপঃ| ননু, শোণিতস্যাপি দোষত্বান্নাযং সঙ্গ্রহঃ সাধুঃ, যতো রক্তস্যাপি বাতাদিবদ্বিশিষ্টহেতুলক্ষণবিকারচিকিত্সিতনির্দেশঃ কৃতঃ; তত্র হেতুনির্দেশো যথা- “কালে চানবসেচনাত্” (সূ.অ.২৪/৯) ইত্যাদি, লক্ষণং চ যথা- “তপনীযেন্দ্রগোপাভং পদ্মালক্তকসন্নিভম্” (সূ.অ.২৪/২২) ইত্যাদি, রক্তবিকারাশ্চ রক্তার্শঃপ্রদররক্তপিত্তাদয উক্তাঃ, উপক্রমশ্চ “স্রাবণং শোণিতস্য তু” (সূ.অ.২৪/১৮) ইত্যাদিনোক্তঃ, তথা দোষসঞ্জ্ঞা চ চরকে কৃতা, যদুক্তং- “কফে বাতে জিতপ্রাযে পিত্তং শোণিতমেব বা| যদি কুপ্যতি বাতস্য ক্রিযমাণে চিকিত্সিতে|| যথোল্বণস্য দোষস্য তত্র কার্যং ভিষগ্জিতম্” (চি.অ.৫/২৭) ইতি; তথা চ তন্ত্রান্তরেঽপি শল্যে শোণিতং দোষত্বেনোক্তং- “তৈরেতৈঃ শোণিতচতুর্থৈঃ” (সু.সূ.অ.২১) ইতি বচনাত্| নৈবং, দোষো হি স্বতন্ত্রদূষণাত্মক উচ্যতে; যতো ন বাতাদযো বৃদ্ধাঃ কিঞ্চিদপেক্ষ্য দূষযন্তি কিন্তু স্বত এব, শোণিতং তু দুষ্টবাতাদিসংসর্গমপেক্ষ্যৈব দূষকং ভবতি, ন হি শোণিতং বিকৃতবাতাদিসম্বন্ধমন্তরেণ বিকৃতং ভবতি; সর্বদা বাতাদিজনকৈরেব শোণিতদুষ্টেঃ; তথা সর্বদা বাতাদিলক্ষণযুক্তস্যৈব শোণিতস্য দুষ্টত্বাত্; যশ্চ হেত্বাদিবিশেষ উক্তঃ স বাতাদিযুক্তস্যৈব শোণিতস্য ভবতি; তেন বাতাদয এব তত্রাপি দূষণাত্মকাঃ, শোণিতং তু স্বপ্রমাণাতিরিক্তমপি দূষ্যমেব; ন চ দূষ্যস্য হেত্বাদযো বিশিষ্টা ন ভবন্তি, যতো মাংসাদীনামপি হেত্বাদিবিশেষোঽস্তি; যথা মাংসদুষ্টৌ- “মাংসবাহীনি দুষ্যন্তি ভুক্ত্বা চ স্বপতাং দিবা” (বি.অ.৫) ইত্যাদি বক্ষ্যতি; মাংসদুষ্টিলক্ষণং “শৃণু মাংসপ্রদোষজান্” (সূ.অ.২৮) ইত্যাদিনা বিবিধাশিতপীতীযে বক্ষ্যতি যান্ বিকারাস্তে জ্ঞেযাঃ, যত এতানেব মাংসদোষবিকারান্ স্রোতোবিমানে মাংসদুষ্টিলক্ষণত্বেনাতিদেশাদভিধাস্যতি, দুষ্টমাংসবিকারাশ্চাধিমাংসার্বুদাদয উক্তাঃ; উপক্রমশ্চ “মাংসজানাং তু সংশুদ্ধিঃ শস্ত্রক্ষারাগ্নিকর্ম চ” (সূ.অ.২৮) ইত্যুক্তঃ| তস্মাদ্দূষ্যাধিকারে দোষকৃতে কার্যে দূষ্যেণ ব্যপদেশঃ- রক্তজোঽযং, মাংসজোঽযমিত্যাদি; যথা- স্নেহাধারেণ বহ্নিনা দগ্ধে স্নেহদগ্ধ ইতি ব্যপদেশঃ| দোষসঞ্জ্ঞা তু পীডাকর্তৃত্বসামান্যাদদোষেঽপি স্যাত্ ; যথা- “স্বযং প্রবৃত্তং তং দোষমুপেক্ষেত হিতাশনৈঃ” (চি.অ.৫/৪৬) ইত্যত্র পুরীষমেব দোষত্বেনোক্তম্| সুশ্রুতে তু শোণিতস্য দোষত্বং ব্রণেষু প্রাযঃ শোণিতদুষ্টিদর্শনাদুপচরিতমেবোক্তম্| যতঃ প্রদেশান্তরে ব্রণপ্রশ্নে বাতাদযস্ত্রয এব তত্রাপ্যুক্তাঃ- “বাতপিত্তশ্লেষ্মাণ এব দেবসম্ভবহেতবো ভবন্তি” (সু.সূ.অ.২১) ইত্যাদিনা| কিঞ্চ যদি শোণিতং দোষঃ স্যাত্তদা বাতাদিবত্প্রকৃত্যারম্ভকং স্যাত্, নচারভতে; তস্মাত্ত্রয এব দোষা ইতি সিদ্ধম্| মানসদোষমাহ- মানসঃ পুনরিত্যাদি| পুনঃশব্দোঽবধারণে, তেন মানস উদ্দিষ্ট এব পরং ন শারীরদোষবত্ প্রপঞ্চিতঃ, মানসদোষাণামস্মিংস্তন্ত্রে কাযচিকিত্সারূপেঽপ্রাস্তাবিকত্বাদিতি ভাবঃ| আদৌ রজ উক্তং প্রাধান্যাত্; বচনং হি- “নারজস্কং তমঃ প্রবর্ততে” (বি.অ.৬) ইতি| এবশব্দেন সত্ত্বাখ্যগুণস্যাদোষত্বমবধারযতি, সত্ত্বং হ্যবিকারি||৫৭||

Adhikarana 33 (58) · Śloka 58

প্রশাম্যত্যৌষধৈঃ পূর্বো দৈবযুক্তিব্যপাশ্রযৈঃ| মানসো জ্ঞানবিজ্ঞানধৈর্যস্মৃতিসমাধিভিঃ||৫৮||

সম্প্রতি দোষপ্রশমকারণমাহ- প্রশাম্যতীত্যাদি| পূর্ব ইতি শারীরঃ| দোষগ্রহণেন তজ্জন্যা ব্যাধযোঽপি গৃহ্যন্তে, বিকৃতদোষাদনন্যত্বাদ্ব্যাধীনাম্| দৈবমদৃষ্টং, তদাশ্রিত্য যদ্ব্যাধিপ্রতীকারং করোতি তদ্দৈবব্যপাশ্রযং বলিমঙ্গলাদি; এতচ্চ প্রথমমুক্তং সদ্যোঽক্লেশেন চ ব্যাধিপ্রশমকত্বাত্| যুক্তিঃ যোজনা; শরীরভেষজযোর্হিতো যো যোগস্তদপেক্ষং সংশোধনসংশমনাদি যুক্তিব্যপাশ্রযমুচ্যতে| জ্ঞানম্ অধ্যাত্মজ্ঞানং, বিজ্ঞানং শাস্ত্রজ্ঞানং , ধৈর্যম্ অনুন্নতিশ্চেতসঃ, স্মৃতিঃ অনুভূতার্থস্মরণং, সমাধিঃ বিষযেভ্যো নিবর্ত্যাত্মনি মনসো নিযমনম্||৫৮||

Adhikarana 34 (59-61) · Śloka 61

রূক্ষঃ শীতো লঘুঃ সূক্ষ্মশ্চলোঽথ বিশদঃ খরঃ| বিপরীতগুণৈর্দ্রব্যৈর্মারুতঃ সম্প্রশাম্যতি||৫৯|| সস্নেহমুষ্ণং তীক্ষ্ণং চ দ্রবমম্লং সরং কটু| বিপরীতগুণৈঃ পিত্তং দ্রব্যৈরাশু প্রশাম্যতি||৬০|| গুরুশীতমৃদুস্নিগ্ধমধুরস্থিরপিচ্ছিলাঃ| শ্লেষ্মণঃ প্রশমং যান্তি বিপরীতগুণৈর্গুণাঃ||৬১||

সম্প্রতি শরীররোগাধিকারপ্রবৃত্তত্বাদস্য তন্ত্রস্য শারীররোগজনকবাতাদিলক্ষণং ভেষজং চাহ- রূক্ষ ইত্যাদি| প্রধানত্বাদগ্রে বাযোরভিধানম্| রূক্ষাদীনাং জ্যাযস্ত্বাদভিধানং, তেন দারুণাদযোঽপি গুণা বোদ্ধব্যাঃ; রূক্ষত্বং চ বাযাবধিকং, স্নেহসাধ্যত্বাদ্বাযোঃ; অতো রূক্ষত্বমগ্রেঽভিহিতম্| যদ্যপি বৈশেষিকেঽনুষ্ণাশীতো বাযুঃ, তথাঽপীহ শীতেন বৃদ্ধিদর্শনাদুষ্ণেন চ প্রশমদর্শনাত্তথা কেবলবাতারব্ধে রোগে শীতদর্শনাচ্চ শীত এব বাযুঃ; যচ্চ পিত্তযুক্তস্যোষ্ণত্বং, তদ্যোগবাহিত্বাত্; যথা পাষাণস্য যেন দ্রব্যেণ শীতেনোষ্ণেন বা যোগো ভবতি তদ্গুণানুবিধানং, তথা বাযোরপি| বিপরীতা বাতগুণপ্রতিপক্ষা গুণা যস্য তদ্বিপরীতগুণং; গুণশব্দেন চেহ ধর্মবাচিনা রসবীর্যবিপাকপ্রভাবাঃ সর্ব এব গৃহ্যন্তে, তেন প্রভাবাদপি যদ্বাতবিপরীতং তদপি গৃহ্যতে| অন্যে ত্বেকবিপরীতশব্দলোপাদ্বিপরীতং বিপরীতগুণং চ গ্রাহযন্তি; তেন বিপরীতগ্রহণাত্ প্রভাববিপরীতং গৃহ্যতে, গুণবৈপরীত্যাদ্বিপাকাদযো গৃহ্যন্তে| ননু বিপরীতগুণভূযিষ্ঠৈরপি বাতাদীনাং প্রশমো ভবতি, যতো ন হি সর্বং ভেষজং বাতাদীনাং সর্বাত্মনা বিরুদ্ধং ভবতি; উক্তং হি- “বিরুদ্ধগুণসন্নিপাতে হি ভূযসাঽল্পমবজীযতে” (বি.অ.১) ইতি; তত্ কিমিতি বিরুদ্ধগুণভূযিষ্ঠস্যাগ্রহণম্? উচ্যতে- বিরুদ্ধগুণভূযিষ্ঠস্যাপি বিপরীতগুণশব্দেনৈব গ্রহণাত্| বিপরীতগুণভূযিষ্ঠেঽপি যে বিপরীতা অল্পা অবলা বা গুণাস্তে স্বকার্যাকর্তৃত্বাদব্যপদেশ্যা এব; কিংবা সর্বথা বিপরীতগুণৈরধিকা প্রশস্তা চ শান্তির্ভবতি, অত এব সম্প্রশব্দৌ শীঘ্রসম্যক্প্রশমার্থাভিধাযকৌ কৃতৌ; বিপরীতগুণভূযিষ্ঠৈর্ন তথা শান্তির্ভবতি, অত এব সম্প্রশব্দাভ্যাং ন তত্ সাক্ষাদুক্তম্| এবং চ ব্যাখ্যানং পিত্তশ্লেষ্মণোরপি কর্তব্যম্| সস্নেহমিতি ঈষত্স্নেহং, তেন পিত্তে সর্পিষঃ স্নিগ্ধস্য ভেষজত্বমুপপন্নম্| অম্লরসতা চেহ পিত্তস্যোচ্যতে, অপ্তেজঃসমারব্ধত্বাত্ পিত্তস্য; সুশ্রুতে তু কটুত্বমেব পিত্তস্যোক্তম্, অম্লতা চ বিদগ্ধস্য পিত্তস্যোক্তা| যদুক্তং- “বিদগ্ধং চাম্লমেব চ” (সু.সূ.অ.২১) ইতি| এবং সস্নেহতাযামপি পিত্তস্য সুশ্রুতস্বরসো নাস্তি| এতচ্চ স্নিগ্ধত্বমম্লত্বং চ জলানলারব্ধত্বাত্ পিত্তস্যোপপন্নমেব, সুশ্রুতে তু তেজোরূপপিত্তাভিপ্রাযেণৈব তন্নিরস্তং ভবতি| শ্লেষ্মণো বিপরীতগুণৈর্গুণানাং প্রশম উচ্যতে, ন পুনঃ শ্লেষ্মণঃ প্রশমোঽভিধীযতে; কস্মাদেবমুচ্যতে? গুণপ্রশমনেন চ গুণিপ্রশমো গুণবৃদ্ধ্যা চ গুণিবৃদ্ধির্ভবতীতি সূচনার্থম্| যত উষ্ণেন শীতপ্রশমে ক্রিযমাণে শীতাধারস্যোদকভাগস্যাবশ্যমেব প্রশমঃ ক্রিযতে||৫৯-৬১||

Adhikarana 35 (62) · Śloka 63

বিপরীতগুণৈর্দেশমাত্রাকালোপপাদিতৈঃ| ভেষজৈর্বিনিবর্তন্তে বিকারাঃ সাধ্যসম্মতাঃ||৬২|| সাধনং ন ত্বসাধ্যানাং ব্যাধীনামুপদিশ্যতে|৬৩|

বিপরীতগুণৈরপ্যল্পমাত্রৈস্তথাঽবিপরীতদেশকালাদিপ্রতিবদ্ধৈশ্চ ন প্রশমো ভবতীত্যাহ- বিপরীতেত্যাদি| দেশো ভূমিরাতুরশ্চ, মাত্রা অনপাযিপরিমাণং, কালো নিত্যগঃ ঋত্বাদিরাবস্থিকো বাল্যাদিশ্চ; দেশাদ্যপেক্ষযা যথোচিতত্বেন কল্পিতো দেশমাত্রাকালোপপাদিতঃ| উপপাদিতৈরিতি চৌরাদিকো ণিচ্; কিংবা বৈদ্যেনোপপাদিতৈঃ| অত্র দেশগ্রহণাদ্বলশরীরাহারসাত্ম্যসত্ত্বপ্রকৃতীনাং গ্রহণং, কালগ্রহণাদ্বযসোঽপি গ্রহণং, দোষস্তু প্রশমনীযতযৈব গৃহীতঃ, ভেষজং তু সাক্ষাদেবোক্তম্; এবং দোষভেষজদেশকালবলশরীরাহারসাত্ম্যসত্ত্বপ্রকৃতিবযসাং পরীক্ষ্যাণাং দশবিধানাং সর্বেষামেব গ্রহণং ভবতি| সাধ্যত্বেন প্রামাণিকানাং সম্মতাঃ সাধ্যসম্মতাঃ; এতেনাজ্ঞেনাজ্ঞানাদ্যে সাধ্যত্বেন গৃহীতাস্তে নিরাক্রিযন্তে| যত্তু সম্যগ্গ্রহণেন যাপ্যযাপনমুচ্যতে তন্নাতিসুন্দরং, বিনিবর্তন্ত ইতি বচনাত্; ন চ যাপ্যযাপনং বিনিবৃত্তিঃ| অসাধ্যে ভেষজনিবৃত্তিমাহ- সাধনমিত্যাদি| নন্বসাধ্যানামপি সাধনং দৃষ্টং, যতোঽরিষ্টবাংস্তাবদবশ্যং মৃত্যুগৃহীতত্বেনাসাধ্যঃ; যদুক্তং- “অরিষ্টং চাপি তন্নাস্তি যদ্বিনা মরণং ভবেত্| মরণং চাপি তন্নাস্তি যন্নারিষ্টপুরঃসরম্” (ইং.অ.২); উত্পন্নারিষ্টসাধনং চ সুশ্রুতে প্রোক্তং- “ধ্রুবং ত্বরিষ্টে মরণং ব্রাহ্মণৈস্তত্ কিলামলৈঃ| রসাযনতপোজপ্যতত্পরৈর্বা নিবার্যতে” (সু.সূ.অ.২৮) ইতি; তথা চাহ ভগবানগস্ত্যঃ- “রসাযনতপোজপ্যযোগসিদ্ধৈর্মহাত্মভিঃ| কালমৃত্যুরপি প্রাজ্ঞৈর্জীযতে নালসৈর্নরৈঃ” ইতি; তথাঽন্যত্রাপ্যুক্তং- “জাতাঽরিষ্টোঽপি জীবতি” ইতি| অত্রাহুরেকে- দ্বিবিধমরিষ্টং নিযতমনিযতং চ; তত্র যন্নিযতং তদসাধ্যমেব, অত এবোক্তং “ন ত্বরিষ্টস্য জাতস্য নাশোঽস্তি মরণাদৃতে” (ইং.অ.২); অত্র জাতস্যেতি বচনান্নিযতস্যেতি গম্যতে; যত্ত্বনিযতমরিষ্টং তত্প্রতি সুশ্রুতাগস্ত্যবচনযোরর্থবত্তা| চরকেঽপ্যনিযতমরিষ্টমুক্তং; যথা- সংশযপ্রাপ্তমাত্রেযো জীবিতং তস্য মন্যতে (ইং.অ.৯) ইতি| অন্যে তু ব্রুবতে- সংশযপ্রাপ্তমিতি উক্তিভেদমাত্রমত্র; তেন সর্বারিষ্টং মারকমেবাসতি রসাযনাদৌ, রসাযনতপঃপ্রভৃতযস্তু প্রভাবাতিশযযোগাদিতরক্রিযযাঽসাধ্যমপি সাধযন্তি; তচ্চারিষ্টনিবারণং বিরলেষ্বেব পুরুষাতিশযেষু নন্দিকেশ্বরাদিষু দৃষ্টং, ন সর্বপুরুষৈস্তচ্ছক্যমতো জাতারিষ্টানামসাধ্যতৈব তন্ত্রে প্রোচ্যতে| যত্তু কৈশ্চিদুচ্যতে- নিযতাযুষো মৃত্যুররিষ্টপূর্বো ভবতি, অনিযতাযুষস্ত্বরিষ্টং বিনৈব মৃত্যুর্ভবতি| তন্ন, “মরণং চাপি তন্নাস্তি যন্নারিষ্টপুরঃসরম্” (ইং.অ.২) ইতি বচনাত্| যদুচ্যতে- অনিযতাযুষঃ সত্যপি রিষ্টপ্রাদুর্ভাবে সম্যক্ক্রিযোপপাদনাজ্জীবিতেন ভবিতব্যং, যতোঽনিযতাযুষঃ পুরুষকারাপরাধাদেব পরং মৃত্যুর্ভবতি, সম্যক্ক্রিযাযাং চ পুরুষকারাপরাধো নাস্তি| তন্ন, নহ্যনিযতাযুষঃ সর্বদৈব পুরুষকারসাধ্যাঃ, কিন্তু যথোচিতকালক্রিযমাণস্বস্থাতুরহিতসেবারূপপুরুষকারসাধ্যাঃ; তেন যথোচিতকালে হিতাসেবনাদসাধ্যত্বযুক্তে ব্যাধৌ রিষ্টে জাতে কিং ভেষজমতীতকালক্রিযমাণমপক্রান্তে সলিল ইব সেতুবন্ধঃ করিষ্যতীতি| তস্মাদসাধ্যানাং সাধনং নোপদিশ্যত ইতি সাধু||৬২||-

Adhikarana 36 (63) · Śloka 63

ভূযশ্চাতো যথাদ্রব্যং গুণকর্মাণি বক্ষ্যতে||৬৩||

কিমেতান্যেব গুণকর্মাণি, উতাপরাণ্যপীত্যাহ- ভূযশ্চেত্যাদি| গুণানাং কর্মাণি গুণকর্মাণি| যথাদ্রব্যমিতি যস্মিন্ যস্মিন্ দ্রব্যে যদ্যদ্গুণকর্ম তত্তত্তস্মিংস্তস্মিন্ দ্রব্যেঽন্নপানাদৌ কৃত্স্নে বা তন্ত্রে বক্ষ্যতে ‘আচার্য’ ইতি শেষঃ; বক্ষ্যতে ইতি ব্রূঞো বচিরাদেশাত্ প্রযোগঃ| কিংবা যথাদ্রব্যমিতি যথাহেতুং; তদ্যথা- গুরুখরকঠিনাদিগুণবহুলং পার্থিবদ্রব্যং, তেষাং চ পার্থিবানাং গুণানাং কর্ম উপচযসঙ্ঘাতগৌরবাদীতি||৬৩||

Adhikarana 37 (64) · Śloka 64

রসনার্থো রসস্তস্য দ্রব্যমাপঃ ক্ষিতিস্তথা| নির্বৃত্তৌ চ বিশেষে চ প্রত্যযাঃ খাদযস্ত্রযঃ||৬৪||

সম্প্রতি দোষানভিধায তত্প্রশমনপ্রধানান্ রসান্ বক্তুমুদ্যতো রসলক্ষণপূর্বকং রসোত্পত্তিক্রমমাহ- রসনার্থ ইত্যাদি| রস্যত আস্বাদ্যত ইতি রসঃ| রসনার্থ ইতি জিহ্বাগ্রাহ্যঃ| এতচ্চ ষণ্ণামপি রসানামনুগতং রূপাদিষু চ ব্যাবৃত্তত্বাত্ সাধুলক্ষণম্| তস্যেতি রসস্য| দ্রব্যমিতি আধারকারণম্| দ্রব্যশব্দো হ্যাধারকারণবাচী; যথা- “পঞ্চেন্দ্রিযদ্রব্যাণি” (সূ.অ.৮) ইতি| ক্ষিতিস্তথেতি যথা আপ আধারকারণং তথা ক্ষিতিরপি| ‘অপ্ক্ষিতী’ ইতি বক্তব্যে ক্ষিতিস্তথেতিবচনাত্ ক্ষিতেরাধারকারণত্বমমুখ্যমিতি দর্শযতি| যেনাপো হি নিসর্গেণ রসবত্যঃ| তথা হ্যাত্রেযভদ্রকাপ্যীযে “সৌম্যাঃ খল্বাপঃ” (সূ.অ.২৬) ইত্যাদিনা জল এব রসস্য ব্যক্তিরিতি দর্শযতি| সুশ্রুতেঽপ্যুক্তং- “তস্মাদাপ্যো রসঃ” (সু.সূ.অ.৪২) ইতি| ক্ষিতিস্ত্বপামেব রসেন নিত্যানুষক্তেন রসবতীত্যুচ্যতে| যতো নিত্যঃ ক্ষিতিজলসম্বন্ধঃ; বচনং হি- “বিষ্টং হ্যপরং পরেণ” (ন্যা.দ.৩/১/৬০) ইতি| অস্যার্থঃ- খবায্বগ্নিজলক্ষিতীনামুত্তরোত্তরে ভূতে পূর্বপূর্বভূতস্য নিত্যমনুপ্রবেশঃ, তত্কৃতশ্চ খাদিষু গুণোত্কর্ষঃ| রসস্য কিং ব্যক্তাবপ্ক্ষিতী কারণং কিংবা বিশেষে ইত্যাহ- নির্বৃত্তাবিত্যাদি| নির্বৃত্তৌ চেতি অভিব্যক্তৌ| এতেন রসোঽভিব্যজ্যমানো জলক্ষিত্যাধার এব ব্যজ্যত ইতি দর্শযতি| চকারাদ্বিশেষেঽপি মধুরাদিলক্ষণে অপ্ক্ষিতী প্রত্যযৌ| তেন “সোমগুণাতিরেকান্মধুরঃ, পৃথিব্যগ্নিগুণাতিরেকাদম্লঃ” (সূ.অ.২৬) ইত্যাদিনা জলপৃথিব্যোরপি বিশেষকারণত্বং বক্ষ্যমাণমুপপন্নম্| বিশেষে চ প্রত্যযাঃ খাদয ইতি মধুরাদিবিশেষনির্বৃত্তৌ নিমিত্তকারণং খবায্বনলাঃ, ন ত্বাধারকারণভূতাঃ| খাদয ইত্যনেনৈব ত্রিত্বে লব্ধে পুনস্ত্রয ইতি বচনং তেষামেব ব্যস্তসমস্তানামপি প্রত্যযত্বদর্শনার্থম্; অত এব ব্যস্তসমস্তাকাশাদিসংসর্গভেদাদ্রসানাং মধুরতরমধুরতমাদ্যবান্তরভেদ উপপন্নঃ| বিশেষে চেতি চকারাদভিব্যক্তাবপ্যাকাশাদীনাং নিমিত্তকারণত্বং দর্শযতি| বক্ষ্যতি হি- তাস্ত্বন্তরীক্ষাদ্ভ্রশ্যমানা ভ্রষ্টাশ্চ পঞ্চমহাভূতবিকারগুণসমন্বিতা জঙ্গমস্থাবরাণাং ভূতানাং মূর্তীরভিপ্রীণযন্তি; তাসু ষডভিমূর্চ্ছন্তি রসাঃ (সূ.অ.২৬) ইতি| অন্যে তু বিশেষে চেতি চকারং খাদযশ্চেত্যত্র যোজযন্তি; তেন চকারাত্ কালোঽপি বিশেষেঽভিব্যক্তৌ চ কারণং লভ্যতে| সাক্ষাত্তু কালস্যাবচনেন খাদিভ্যোঽপ্যপকৃষ্টং কালস্য কারণত্বং দর্শ্যতে| কিংবা রসস্যাপো দ্রব্যং ক্ষিতিস্তথেতি পূর্ববদেব; নির্বৃত্তৌ চেতি ক্ষিতিরেব নির্বৃত্তাবভিব্যক্তৌ প্রত্যযো নাপঃ; যত আপো হ্যব্যক্তরসা এব, ক্ষিতিসম্বন্ধাদেব চ রসোঽভিব্যক্ত উপলভ্যতে| উক্তং চ- “জঙ্গমস্থাবরাণাং ভূতানাং মূর্তীরভিপ্রীণযন্তি, তাসু ষডভিমূর্চ্ছন্তি রসাঃ” (সূ.অ.২৬) ইতি| তেন পার্থিবদ্রব্যসম্বন্ধাদেবাপাং রসো ব্যজ্যতে, নান্যথা| বিশেষে চেতি চকারাদপ্ক্ষিতী বিশেষে কারণে| যদ্যপি চাপ্ক্ষিতী বিশেষে কারণে, তথাঽপি “সোমগুণাতিরেকান্মধুরঃ”- (সূ.অ.২৬) ইত্যাদৌ তু খাদয এব তথা সন্নিবিশন্তি যথা সোমোঽতিরিক্তো ভবতি, তেন তত্রাপ্যূনত্বেন সন্নিবিষ্টাঃ খাদয এব বিশেষহেতব ইতি| যদ্যপিচাভিব্যক্তির্মধুরাদিবিশেষরহিতা ক্বচিদ্ভবতি, তথাঽপি সামান্যেন সর্বত্র যদভিব্যক্তযেঽনুগতং কারণমুপলভ্যতে ক্ষিতিরূপং জলক্ষিতিরূপং বা তদভিব্যক্তিকারণং; যদনুগমাত্তু মধুরাদিবিশেষোপলব্ধিস্তদ্বিশেষকারণমুচ্যতে||৬৪||

Adhikarana 38 (65) · Śloka 65

স্বাদুরম্লোঽথ লবণঃ কটুকস্তিক্ত এব চ| কষাযশ্চেতি ষট্কোঽযং রসানাং সঙ্গ্রহঃ স্মৃতঃ||৬৫||

রসবিশেষানাহ- স্বাদুরিত্যাদি| অত্র সর্বপ্রাণিনামিষ্টত্বাদাদৌ মধুর উক্তঃ; তদনু চ প্রাণ্যভীষ্টোত্কর্ষক্রমেণৈবাম্লাদিনির্দেশক্রমো বোদ্ধব্যঃ| ষট্ক ইতি পুনঃ সঙ্খ্যাকরণং পরবাদিমতসপ্তসঙ্খ্যত্বাদিনিষেধার্থম্| অযং সঙ্গ্রহ ইত্যনেনাবান্তরভেদবহুত্বং তথা বক্ষ্যমাণরসসংসর্গবহুত্বং চ দর্শযতি||৬৫||

Adhikarana 39 (66) · Śloka 1

স্বাদ্বম্ললবণা বাযুং, কষাযস্বাদুতিক্তকাঃ| জযন্তি পিত্তং, শ্লেষ্মাণং কষাযকটুতিক্তকাঃ||৬৬|| (কট্বম্ললবণাঃ পিত্তং, স্বাদ্বম্ললবণাঃ কফম্| কটুতিক্তকষাযাশ্চ কোপযন্তি সমীরণম্ ||১||)|

রসানামুপযুক্ততরং কার্যমাহ- স্বাদ্বম্লেত্যাদি| অত্র চ বাযোর্নীরসস্যাপি রসসহচরিতস্নিগ্ধত্বাদিগুণৈর্বিপরীতৈঃ প্রশমো জ্ঞেযঃ| এবং মধুররসস্যাপি শ্লেষ্মণোঽম্ললবণাভ্যাং স্নিগ্ধত্বাভিষ্যন্দিত্বাদিসহচরিতগুণযোগাদেব বৃদ্ধিঃ| অত্র চ যে প্রশমকত্বেন রসা বাতাদীনাং নোক্তাস্তে বর্ধকা বোদ্ধব্যাঃ| যদাহ বাগ্ভটঃ- “তত্রাদ্যা মারুতং ঘ্নন্তি ত্রযস্তিক্তাদযঃ কফম্| কষাযতিক্তমধুরাঃ পিত্তমন্যে তু কুর্বতে” (বা.সূ.অ.১) ইতি| রসকর্মাতিদেশেনৈব গুণবীর্যবিপাকানামপি কর্মনির্দেশঃ কৃত এব| যতো মধুরাদিরসেনৈব সর্বগুণান্ বীর্যবিপাকাংশ্চ নির্দেক্ষ্যত্যাত্রেযভদ্রকাপ্যীযে- “তত্র স্বাদুঃ” (সূ.অ.২৬) ইত্যাদিনা; তথা “কটুতিক্তকষাযাণাং বিপাকঃ প্রাযশঃ কটুঃ” (সূ.অ.২৬); তথা “অম্লোঽম্লং পচ্যতে স্বাদুর্মধুরং লবণস্তথা” (সূ.অ.২৬) তথা “শীতং বীর্যেণ যদ্দ্রব্যং মধুরং রসপাকযোঃ| তযোরম্লং যদুষ্ণং চ যচ্চোষ্ণং কটুকং তযোঃ” (সূ.অ.২৬) ইত্যাদিনা||৬৬||

Adhikarana 40 (67) · Śloka 67

কিঞ্চিদ্দোষপ্রশমনং কিঞ্চিদ্ধাতুপ্রদূষণম্| স্বস্থবৃত্তৌ মতং কিঞ্চিত্ত্রিবিধং দ্রব্যমুচ্যতে||৬৭||

অতোঽবশিষ্টং দ্রব্যকার্যং প্রভাবকৃতং বক্তুং প্রভাবভেদেন দ্রব্যভেদমাহ- কিঞ্চিদিত্যাদি| কিঞ্চিদিতি ন সর্বম্| দোষস্য দোষযোর্দোষাণাং বা প্রশমনং দোষপ্রশমনম্| দোষগ্রহণেন দুষ্টা রসাদযোঽপি গৃহ্যন্তে| তেন দ্রব্যমহিম্না যদ্দোষাণাং দুষ্টানাং রসাদীনাং ধাতূনাং বা শমকমামলকদুরালভাদি তদ্গৃহ্যতে| আমলকং হি শিবত্বাত্ত্রিদোষহরং; দুরালভা চাপি বাতপিত্তশ্লেষ্মহরী| যদ্যপি চামলকস্য “হন্তি বাতং তদম্লত্বাত্” (সু.সূ.অ.৪৬) ইত্যাদিনা গুণদ্বারা ত্রিদোষহরত্বমুচ্যতে, তথাঽপি তত্প্রভাববৃংহিতমেব বোদ্ধব্যম্| যতস্তত্রাম্লত্বাদিনা পিত্তাদিকোঽপি যুজ্যতে, স ত্বামলকপ্রভাবান্ন ভবতি| ধাতুপ্রদূষণমিতি বাতাদীনাং সমত্বেন শরীরধারণাত্মকানাং তথা রসাদীনাং চ দূষণং কিঞ্চিত্, যথা- যবকমন্দকবিষাদি| সুষ্ঠু অবতিষ্ঠতে নীরোগত্বেনেতি স্বস্থঃ, তস্য বৃত্তিঃ স্বস্থরূপতযাঽনুবর্তনং, তত্র স্বস্থবৃত্তৌ মতমভিমতং পূজিতমিতি যাবত্| সঙ্খ্যেযনির্দেশাদেব ত্রিত্বে লব্ধে ত্রিবিধগ্রহণং নিযমার্থম্| তেন সংশোধনসংশমনাদীনামনেকবিধানামপ্যত্রৈবাবরোধঃ| রসাযনবাজীকরণে তু স্বস্থবৃত্তিমাত্র এব| যদুক্তং- “স্বস্থস্যোজস্করং যত্তু তদ্বৃষ্যং তদ্রসাযনম্” (চি.অ.১পা.১) ইতি| প্রতিপাদে কিঞ্চিদ্গ্রহণং দোষহরত্বাদিকর্মণাং বিভিন্নদ্রব্যাশ্রযিত্বোপদর্শনার্থম্; এককিঞ্চিদ্গ্রহণে ত্বেকমেব দ্রব্যং দোষহরং ধাতুপ্রদূষকং স্বস্থবৃত্তিমতং চ স্যাত্, ন চ তদভিমতম্| ননু, স্বস্থবৃত্তিমতানাং রক্তশালিষষ্টিকযবাদীনাং দোষপ্রশমনত্বমপি দৃশ্যতে, যতো বক্ষ্যতি তত্র তত্র রক্তশাল্যাদীনাং জ্বরাদৌ প্রযোগং; তথা প্রকৃতিশরীরদেশকালমাত্রাভি(দি)যুক্তং দোষপ্রশমনমপি দোষকরং ভবতি, যথা- আমলকমতিমাত্রমগ্নিমান্দ্যাযেত্যাদি জ্ঞেযং; তথা ধাতুপ্রদূষণমপি দোষশমনং দৃশ্যতে, যথা- বিষমুদরহরং, তথা যদেব মন্দকাদি দোষকরং তদেব ক্ষীণদোষং প্রতি দোষবৃদ্ধ্যা সাম্যাপাদনেন দোষপ্রশমনং ভবতি; তদেবমব্যবস্থিতত্বাত্ কিঞ্চিদ্দোষপ্রশমনমিত্যাদি বিরুদ্ধম্| অত্রোচ্যতে- স্বস্থবৃত্তিমতং রক্তশাল্যাদি দোষপ্রশমনমপি ভবতি, পরং তত্ প্রাযঃ স্বস্থবৃত্তিহিতত্বাত্ স্বস্থবৃত্তিমতত্বেন গৃহ্যতে| বচনং হি- “স্বস্থস্যোর্জস্করং যত্তু তদ্বৃষ্যং তদ্রসাযনম্| প্রাযঃ, প্রাযেণ রোগাণাং দ্বিতীযং শমনে হিতম্|| প্রাযঃশব্দো বিশেষার্থ উভযং হ্যুভযার্থকৃত্” (চি.অ.১) ইতি| দোষপ্রশমনানি দ্রব্যাণি বিগুণপ্রকৃত্যাদিপ্রতিবন্ধকাভাবে দোষপ্রশমনমাচরন্ত্যেব, প্রতিবন্ধকসদ্ভাবে তু ন কুর্বন্তি, ন চৈতাবতা তেষাং স স্বভাবো ন ভবতি; নহ্যগ্নির্মন্ত্রাদিপ্রতিবন্ধাত্ কদাচিন্ন দহতীতি দাহকত্বেন নোপদিশ্যতে; এবং ধাতুপ্রদূষকস্যাপি কদাচিদ্ধাতুপ্রশমকত্বং নিমিত্তান্তরযোগাদ্ভবন্ন ধাতুপ্রদূষকস্বরূপতাং হন্তি, যথা সলিলস্যাগ্নিসম্বন্ধাদুষ্ণত্বম্| তস্মাদ্যদ্যস্য প্রাযিকমনন্যোপাধিকৃতং চ রূপং, তেনৈব ব্যপদেশো যুক্তঃ| যচ্চ মন্দকাদীনাং ক্ষীণদোষবর্ধকত্বেন দোষপ্রশমকত্বং তদ্বিদ্যমানমপি কাদাচিত্কত্বাত্তথা হ্যুত্তরকালং দোষাবহত্বাচ্চ ন ব্যপদিশ্যতে দোষপ্রশমকত্বেন| ননু, যদ্যপ্যেবং তথাঽপি যদেকদোষহরমপরদোষকরং যথা মরিচং শ্লেষ্মহরং পিত্তকরং চেত্যাদি বহুদ্রব্যজাতং তত্ কুত্র প্রবিশতু? অত্রৈকে বদন্তি- যদুভযাত্মকং তদ্দোষহরং দোষকরং চ, নচৈতাবতা দ্রব্যত্রিত্বক্ষতিঃ; যতো ন বাতাদিসংসর্গজব্যাধিসদ্ভাবে বাতাদিজন্যত্বেন যত্ত্রৈবিধ্যং রোগাণামুচ্যতে তত্ খণ্ডিতং ভবতি; কিংবা মরিচাদীনাং যদুভযকর্তৃত্বং ন তদ্দ্রব্যপ্রভাবকৃতং, কিং তর্হি রসাদিকৃতং, তেন ন দ্রব্যপ্রভাবপ্রস্তাবে তদুদাহরণীযং; নচ কিঞ্চিদ্দ্রব্যং তাদৃশমস্তি যত্ প্রভাবাদেব কিঞ্চিদ্দোষং করোতি কিঞ্চিচ্ছমযতীতি ন দোষপ্রশমনত্বাদিপ্রভাবং প্রতি নিযমঃ; অযমেব চ পক্ষঃ সাধুঃ| ননু ‘কিঞ্চিদ্দোষপ্রশমনং কিঞ্চিদ্দোষপ্রদূষণম্’ ইতি বা ক্রিযতাং, ‘কিঞ্চিদ্ধাতুপ্রশমনং কিঞ্চিদ্ধাতুপ্রদূষণম্’ ইতি বা| নৈবং, তথা সতি দোষশব্দস্য মুখ্যবৃত্ত্যা বাতাদিষ্বেব বৃত্তিত্বাত্তথা ধাতুশব্দস্য চ রসাদিবৃত্তিত্বাদুভযগ্রহণং ন প্রাপ্যতে; উভযপদোপাদানেন দ্বযং নিপুণকারী তন্ত্রকারো দূষণত্বধারণত্বযোগপরিগ্রহাদ্দোষপ্রশমনেন দুষ্টরসাদিপ্রশমনমপি ভেষজং বিবিধাশিতপীতীযাদিবক্ষ্যমাণং, তথা ধাতুপ্রদূষণেন বাতাদিপ্রদূষকমপি নিদানাদিবক্ষ্যমাণং গ্রাহযতি| প্রশব্দোঽত্র প্রকারে; তেন প্রকারেণ মৃদুমধ্যাদিনা প্রকোপণং, তথা প্রকারেণ সংশোধনসংশমনাদিনা শমনমুচ্যতে; কিংবা ধাত্বর্থানুবৃত্তাবেব ইমৌ প্রশব্দৌ, যথা- ‘চ্যুতাংশঃ পরিধাবতি’ ইত্যত্র ধাবতীত্যর্থঃ| আদৌ দোষপ্রশমনগ্রহণং তস্যৈবেহাভিপ্রেতত্বাত্| ননু স্বস্থবৃত্তিমতং দ্রব্যং ভাবিদোষহরত্বেন দোষপ্রশমনমেব| নৈবং, নহি স্বাস্থ্যানুবৃত্তিজনকত্বাদ্দোষনিবৃত্তিকরং দোষহরণমুচ্যতে, কিং তর্হি সমধাতূনামবর্ধকত্বেনাক্ষযকরত্বেন চ রসাদিস্রোতসাং চানুগুণত্বেন ধাতুসাম্যানুবৃত্তিকরমুচ্যতে| বচনং হি- “পথ্যং পথোঽনপেতং যত্” (সূ.অ.২৫) ইতি||৬৭||

Adhikarana 41 (68-73) · Śloka 74

তত্ পুনস্ত্রিবিধং প্রোক্তং জঙ্গমৌদ্ভিদপার্থিবম্ | মধূনি গোরসাঃ পিত্তং বসা মজ্জাঽসৃগামিষম্||৬৮|| বিণ্মূত্রচর্মরেতোঽস্থিস্নাযুশৃঙ্গনখাঃ খুরাঃ| জঙ্গমেভ্যঃ প্রযুজ্যন্তে কেশা লোমানি রোচনাঃ||৬৯|| সুবর্ণং সমলাঃ পঞ্চ লোহাঃ সসিকতাঃ সুধা| মনঃশিলালে মণযো লবণং গৈরিকাঞ্জনে||৭০|| ভৌমমৌষধমুদ্দিষ্টমৌদ্ভিদং তু চতুর্বিধম্| বনস্পতিস্তথা বীরুদ্বানস্পত্যস্তথৌষধিঃ||৭১|| ফলৈর্বনস্পতিঃ পুষ্পৈর্বানস্পত্যঃ ফলৈরপি| ওষধ্যঃ ফলপাকান্তাঃ প্রতানৈর্বীরুধঃ স্মৃতাঃ||৭২|| মূলত্বক্সারনির্যাসনাল(ড)স্বরসপল্লবাঃ| ক্ষারাঃ ক্ষীরং ফলং পুষ্পং ভস্ম তৈলানি কণ্টকাঃ||৭৩|| পত্রাণি শুঙ্গাঃ কন্দাশ্চ প্ররোহাশ্চৌদ্ভিদো গণঃ|৭৪|

সম্প্রত্যন্যথা দ্রব্যভেদমাহ- তত্ পুনরিত্যাদি| তদিতি দ্রব্যম্| গচ্ছতীতি জঙ্গমম্, উদ্ভিদ্য পৃথিবীং জাযত ইতি ঔদ্ভিদং বৃক্ষাদি, উক্তপ্রকারদ্বযাতিরিক্তঃ পৃথিবীবিকারঃ পার্থিবম্| সংস্বেদজস্যেহ ক্রিম্যাদের্জঙ্গমেঽবরোধঃ, কুকুণ্ডকাদেশ্চ ঔদ্ভিদে| ইহ চ দ্রব্যশব্দেন পার্থিবদ্রব্যমেবোচ্যতে; তেন জলানিলাগ্ন্যাদীনামগ্রহণাদব্যাপ্তির্ন বাচ্যা| জঙ্গমশব্দেন জঙ্গমপ্রভবং গোরসমধ্বাদ্যপি গ্রাহ্যম্| এবমৌদ্ভিদপার্থিবযোরপি গ্রহণং বাচ্যম্| রোচনা গোরোচনা| এতচ্চ মধ্বাদি প্রায উপযোগিত্বাত্ প্রাধান্যাদুক্তং; তেনাণ্ডবস্ত্যাদীনাং চ গ্রহণং বোদ্ধব্যম্| যদ্যপি জঙ্গমানন্তরং বহুপ্রপঞ্চত্বেন প্রধানত্বাদৌদ্ভিদমুপদিষ্টং, তথাঽপ্যবহুবক্তব্যত্বাত্ পার্থিবমেব জঙ্গমানন্তরং বিব্রিযতে; তদনু বহুবক্তব্যমৌদ্ভিদম্| সুবর্ণমিত্যাদি| পঞ্চ লোহা ইতি তাম্ররজতত্রপুশীসকৃষ্ণলোহানাং গ্রহণম্| সমলা ইতি মলশব্দেন শিলাজতূনি লোহমলরূপাণি গৃহ্যন্তে, তচ্চ সুশ্রুতদর্শনাত্ সুবর্ণরজতাদিভবং ষড্বিধমেব গৃহ্যতে; সুশ্রুতে হি ষড্বিধমেব শিলাজতূক্তম্, ইহ তু রসাযনে চতুর্বিধমুক্তং- “চতুর্ভ্যো ধাতুভ্যস্তস্য সম্ভবঃ| হেম্নোঽথ রজতাত্তাম্রাদ্বরং কৃষ্ণাযসাদপি” (চি.অ.১) ইতি বচনাত্| এতচ্চ বচনং রসাযনাধিকারিতাং চতুর্বিধস্য শিলাজতুনো দর্শযতি, নতু ষড্বিধশিলাজতুপ্রতিষেধপরমিতি ন সুশ্রুতেন সমং বিরোধঃ| কিংবা সুবর্ণং নির্মলং, সমলাস্তু রজততাম্রত্রপুশীসলোহাঃ (ইতি মিলিত্বা পঞ্চ লোহাঃ|) শিলাজতুপাষাণপঙ্কপ্রভৃতীনাং তু গ্রহণমুদ্দিষ্টশব্দেন সূচিতম্; উদ্দেশো হ্যল্পকথনম্| সুধা গাঙ্গেযিকা| আলং হরিতালম্| অঞ্জনং সৌবীরাঞ্জনম্| ফলৈর্বনস্পতিরিতি বিনাপুষ্পৈঃ ফলৈর্যুক্তা বটোদুম্বরাদযঃ| যদুক্তং হারীতে- “তেষামপুষ্পাঃ ফলিনো বনস্পতয ইতি স্মৃতাঃ” ইতি| পুষ্পৈর্বানস্পত্যঃ ফলৈরপীতি পুষ্পানন্তরং ফলভাজ ইত্যর্থঃ| ফলস্য পাকাদন্তো বিনাশো যেষাং তিলমুদ্গাদীনাং তে ফলপাকান্তাঃ; অত্র কেচিত্ ফলপাকান্তাঃ পাকান্তাশ্চৌষধ্য ইতি বদন্তি; তেন বিনাঽপি ফলং পাকেনৈবান্তো যেষাং দূর্বাদীনাং তেঽপি গৃহ্যন্তে| প্রতানশব্দেন লতা গুল্মাশ্চ গৃহ্যন্তে| যদুক্তং হারীতেন- “লতা গুল্মাশ্চ বীরুধঃ” ইতি| মূলত্বগিত্যাদৌ নির্যাসো লাক্ষাসর্জরসাদিঃ| ঔদ্ভিদো গণ ইত্যৌদ্ভিদসমুদ্ভূতো গণঃ||৬৮-৭৩||-

Adhikarana 42 (74-76) · Śloka 76

মূলিন্যঃ ষোডশৈকোনা ফলিন্যো বিংশতিঃ স্মৃতাঃ||৭৪|| মহাস্নেহাশ্চ চত্বারঃ পঞ্চৈব লবণানি চ| অষ্টৌ মূত্রাণি সঙ্খ্যাতান্যষ্টাবেব পযাংসি চ||৭৫|| শোধনার্থাশ্চ ষড্ বৃক্ষাঃ পুনর্বসুনিদর্শিতাঃ| য এতান্ বেত্তি সংযোক্তুং বিকারেষু স বেদবিত্||৭৬||

সম্প্রত্যত্রৈব জঙ্গমৌদ্ভিদপার্থিবদ্রব্যে যত্ প্রশস্তং তদাহ- মূলিন্য ইত্যাদি| মূলং প্রশস্ততমং যাসাং তা মূলিন্যঃ; এবং ফলিন্যোঽপি| ষোডশেতি চ্ছেদঃ| মহাস্নেহা ইতি ক্ষীরমাংসাদীনামপি স্নেহতযা স্নেহাধ্যাযে বক্ষ্যমাণত্বেন তেষু সর্পিরাদীনাং ভূরিস্নেহবত্ত্বেন মহত্ত্বম্| পঞ্চৈব লবণানীতি বিমানে (বি.অ.৮) বক্ষ্যমাণলবণবহুত্বে পঞ্চানামেব প্রশস্তত্বেন দর্শনার্থম্| এবং মূত্রাদিষ্বপি প্রাধান্যমুন্নেযং সজাতীযেষু| বেদবিদিতি আযুর্বেদবিত্||৭৪-৭৬||

Adhikarana 43 (77-79) · Śloka 80

হস্তিদন্তী হৈমবতী শ্যামা ত্রিবৃদধোগুডা| সপ্তলা শ্বেতনামা চ প্রত্যক্শ্রেণী গবাক্ষ্যপি||৭৭|| জ্যোতিষ্মতী চ বিম্বী চ শণপুষ্পী বিষাণিকা| অজগন্ধা দ্রবন্তী চ ক্ষীরিণী চাত্র ষোডশী||৭৮|| শণপুষ্পী চ বিম্বী চ চ্ছর্দনে হৈমবত্যপি| শ্বেতা জ্যোতিষ্মতী চৈব যোজ্যা শীর্ষবিরেচনে||৭৯|| একাদশাবশিষ্টা যাঃ প্রযোজ্যাস্তা বিরেচনে| ইত্যুক্তা নামকর্মভ্যাং মূলিন্যঃ...|৮০|

হস্তিদন্তীত্যাদি| হস্তিদন্তী বৃহত্ফলা গোডুম্বা, ‘ইযমেব নাগদন্তী ভণ্যতে’ ইত্যেকে| হৈমবতী বচা| শ্যামা শ্যামমূলা ত্রিবৃত্| অধোগুডা প্রদ্ধদারকঃ| সপ্তলা চর্মকষা| শ্বেতনামা শ্বেতাঽপরাজিতা| প্রত্যক্শ্রেণী দন্তী| বিম্বী ওষ্ঠোপমফলা| শণপুষ্পী ঘণ্টারবা| বিষাণিকা আবর্তনী| অজগন্ধা ‘ফোকান্দী’ ইতি খ্যাতা| দ্রবন্তী দন্ত্যেব চীরিতপত্রা| ক্ষীরিণী দুগ্ধিকা| মূলিনীনাং বমনাদিবিনিযোগমাহ- শণপুষ্পীত্যাদি||৭৭-৭৯||-

Adhikarana 44 (80-85) · Śloka 86

...ফলিনীঃ শৃণু||৮০|| শঙ্খিন্যথ বিডঙ্গানি ত্রপুষং মদনানি চ| ধামার্গবমথেক্ষ্বাকু জীমূতং কৃতবেধনম্| আনূপং স্থলজং চৈব ক্লীতকং দ্বিবিধং স্মৃতম্||৮১|| প্রকীর্যা চোদকীর্যা চ প্রত্যক্পুষ্পা তথাঽভযা| অন্তঃকোটরপুষ্পী চ হস্তিপর্ণ্যাশ্চ শারদম্||৮২|| কম্পিল্লকারগ্বধযোঃ ফলং যত্ কুটজস্য চ| ধামার্গবমথেক্ষ্বাকু জীমূতং কৃতবেধনম্||৮৩|| মদনং কুটজং চৈব ত্রপুষং হস্তিপর্ণিনী| এতানি বমনে চৈব যোজ্যান্যাস্থাপনেষু চ||৮৪|| নস্তঃ প্রচ্ছর্দনে চৈব প্রত্যক্পুষ্পা বিধীযতে| দশ যান্যবশিষ্টানি তান্যুক্তানি বিরেচনে||৮৫|| নামকর্মভিরুক্তানি ফলান্যেকোনবিংশতিঃ|৮৬|

শঙ্খিনী শ্বেতবুহ্না(ধ্ন)| ক্লীতকং যষ্টীমধু; অস্য তু যদ্যপি সুশ্রুতে মূলং প্রশস্তং, মূলেনৈব ব্যবহারঃ, তথাঽপি বিরেচনং প্রতি যষ্টীমধুদ্বযস্যাপি ফলমেব প্রশস্তং জ্ঞেযম্| ধামার্গবঃ পীতঘোষকঃ| ইক্ষ্বাকুঃ তিক্তালাবুঃ| জীমূতো ঘোষকভেদঃ| কৃতবেধনং জ্যোত্স্নিকা| প্রকীর্যোদকীর্যে করঞ্জদ্বযম্| প্রত্যক্পুষ্পা অপামার্গঃ| অন্তঃকোটরপুষ্পী নীলবুধ্না| হস্তিপর্ণী মোরটঃ, অস্যাশ্চ শরত্কালভবমেব ফলং গ্রাহ্যং; অত উক্তং- হস্তিপর্ণ্যাশ্চ শারদমিতি| কম্পিল্লকং গুণ্ডারোচনিকা| আরগ্বধস্য যদ্যপি সুশ্রুতে পত্রং প্রধানমুক্তং, তথাঽপীহ ফলং গৃহ্যতে প্রধানতমত্বাত্| ধামার্গবমিত্যাদিনা পঞ্চকর্মবিনিযোগ উচ্যতে| নস্তঃ প্রচ্ছর্দন ইতি শিরোবিরেচনে||৮০-৮৫||-

Adhikarana 45 (86-87) · Śloka 88

সর্পিস্তৈলং বসা মজ্জা স্নেহো দিষ্টশ্চতুর্বিধঃ ||৮৬|| পানাভ্যঞ্জনবস্ত্যর্থং নস্যার্থং চৈব যোগতঃ| স্নেহনা জীবনা বর্ণ্যা বলোপচযবর্ধনাঃ||৮৭|| স্নেহা হ্যেতে চ বিহিতা বাতপিত্তকফাপহাঃ|৮৮|

মহাস্নেহেষু সর্পিরাদৌ পঠিতং, প্রাধান্যাত্; বচনং হি- “নান্যঃ স্নেহস্তথা কশ্চিত্ সংস্কারমনুবর্ততে| যথা সর্পিরতঃ সর্পিঃ সর্বস্নেহোত্তমং মতম্” (নি.অ.১) ইতি||৮৬-৮৭||-

Adhikarana 46 (88-91) · Śloka 92

সৌবর্চলং সৈন্ধবং চ বিডমৌদ্ভিদমেব চ||৮৮|| সামুদ্রেণ সহৈতানি পঞ্চ স্যুর্লবণানি চ| স্নিগ্ধান্যুষ্ণানি তীক্ষ্ণানি দীপনীযতমানি চ||৮৯|| আলেপনার্থে যুজ্যন্তে স্নেহস্বেদবিধৌ তথা| অধোভাগোর্ধ্বভাগেষু নিরূহেষ্বনুবাসনে||৯০|| অভ্যঞ্জনে ভোজনার্থে শিরসশ্চ বিরেচনে| শস্ত্রকর্মণি বর্ত্যর্থমঞ্জনোত্সাদনেষু চ||৯১|| অজীর্ণানাহযোর্বাতে গুল্মে শূলে তথোদরে| উক্তানি লবণা(নি)...|৯২|

লবণেষু যদ্যপি সৈন্ধবং প্রধানং, যতো বক্ষ্যতি- “সৈন্ধবং লবণানাম্” (সূ.অ.২৫) ইত্যগ্র্যাধিকারে, তথাঽপি সৌবর্চলস্য রোচনত্বপ্রকর্ষাত্তথা সৈন্ধবমনু প্রাধান্যখ্যাপনার্থমগ্রে পাঠঃ| ঔদ্ভিদম্ ঔত্কারিকালবণং, কেচিচ্ছাম্ভরিলবণমাহুঃ| সামুদ্রং দক্ষিণসমুদ্রভবং ‘করকচ’ ইতি খ্যাতম্| অভ্যঞ্জন ইতি স্নেহাভ্যঙ্গে| বর্ত্যর্থমিতি ফলবর্ত্যর্থম্||৮৮-৯১||-

Adhikarana 47 (92-104) · Śloka 105

... ন্যূ(ঊ)র্ধ্বং মূত্রাণ্যষ্টৌ নিবোধ মে||৯২|| মুখ্যানি যানি দিষ্টানি সর্বাণ্যাত্রেযশাসনে| অবিমূত্রমজামূত্রং গোমূত্রং মাহিষং চ যত্ ||৯৩|| হস্তিমূত্রমথোষ্ট্রস্য হযস্য চ খরস্য চ| উষ্ণং তীক্ষ্ণমথোঽরূক্ষং কটুকং লবণান্বিতম্||৯৪|| মূত্রমুত্সাদনে যুক্তং যুক্তমালেপনেষু চ| যুক্তমাস্থাপনে মূত্রং যুক্তং চাপি বিরেচনে||৯৫|| স্বেদেষ্বপি চ তদ্যুক্তমানাহেষ্বগদেষু চ| উদরেষ্বথ চার্শঃসু গুল্মিকুষ্ঠিকিলাসিষু ||৯৬|| তদ্যুক্তমুপনাহেষু পরিষেকে তথৈব চ| দীপনীযং বিষঘ্নং চ ক্রিমিঘ্নং চোপদিশ্যতে||৯৭|| পাণ্ডুরোগোপসৃষ্টানামুত্তমং শর্ম চোচ্যতে| শ্লেষ্মাণং শমযেত্ পীতং মারুতং চানুলোমযেত্||৯৮|| কর্ষেত্ পিত্তমধোভাগমিত্যস্মিন্ গুণসঙ্গ্রহঃ| সামান্যেন মযোক্তস্তু পৃথক্ত্বেন প্রবক্ষ্যতে||৯৯|| অবিমূত্রং সতিক্তং স্যাত্ স্নিগ্ধং পিত্তাবিরোধি চ| আজং কষাযমধুরং পথ্যং দোষান্নিহন্তি চ||১০০|| গব্যং সমধুরং কিঞ্চিদ্দোষঘ্নং ক্রিমিকুষ্ঠনুত্| কণ্ডূং চ শমযেত্ পীতং সম্যগ্দোষোদরে হিতম্||১০১|| অর্শঃশোফোদরঘ্নং তু সক্ষারং মাহিষং সরম্| হাস্তিকং লবণং মূত্রং হিতং তু ক্রিমিকুষ্ঠিনাম্||১০২|| প্রশস্তং বদ্ধবিণ্মূত্রবিষশ্লেষ্মামযার্শসাম্| সতিক্তং শ্বাসকাসঘ্নমর্শোঘ্নং চৌষ্ট্রমুচ্যতে||১০৩|| বাজিনাং তিক্তকটুকং কুষ্ঠব্রণবিষাপহম্| খরমূত্রমপস্মারোন্মাদগ্রহবিনাশনম্||১০৪|| ইতীহোক্তানি মূত্রাণি যথাসামর্থ্যযোগতঃ|১০৫|

অবিমূত্রমিত্যাদৌ স্ত্রীমূত্রমেব প্রশস্তমিতি লিঙ্গপরিগ্রহাদ্দর্শযতি; যতঃ স্ত্রীণাং লঘ্বঙ্গত্বান্মূত্রমপি লঘু; বচনং হি- “লাঘবং জাতিসামান্যে স্ত্রীণাং পুংসাং চ গৌরবম্” (সূ.অ.২৭) ইতি| যত্তূচ্যতে- পুংসাং মূত্রং শুক্রসম্বন্ধাদ্গুরু; তন্ন, শুক্রসম্বন্ধস্য স্ত্রীণামপি শুক্রবত্ত্বেন তুল্যত্বাত্; বচনং হি- “যদা নারী হি নার্যা তু মৈথুনাযোপপদ্যতে| মুঞ্চতঃ শুক্রমন্যোঽন্যমনস্থিস্তত্র জাযতে ” ইত্যাদি; নপুংসকমূত্রং ত্বমঙ্গলত্বান্ন গৃহ্যতে| অগদেষ্বিত্যনেনাগদপ্রযোগযৌগিকত্বং, বিষঘ্নমিত্যনেন চ কেবলস্যৈব বিষহন্তৃত্বমিতি ন পৌনরুক্ত্যম্| শর্ম চোচ্যত ইতি আরোগ্যরূপসুখকর্তৃত্বাত্| অধোভাগমিতি অধোমার্গেণ পিত্তং কর্ষেত্; কিংবা যদেবাধোগতং পিত্তং তদেব বিরেচযতি নোর্ধ্বগম্| যথাসামর্থ্যযোগত ইতি যাদৃশঃ শক্তিযোগো মূত্রাণাং তথা||৯২-১০৪||-

Adhikarana 48 (105-113) · Śloka 113

অতঃ ক্ষীরাণি বক্ষ্যন্তে কর্ম চৈষাং গুণাশ্চ যে||১০৫|| অবিক্ষীরমজাক্ষীরং গোক্ষীরং মাহিষং চ যত্| উষ্ট্রীণামথ নাগীনাং বডবাযাঃ স্ত্রিযাস্তথা||১০৬|| প্রাযশো মধুরং স্নিগ্ধং শীতং স্তন্যং পযো মতম্| প্রীণনং বৃংহণং বৃষ্যং মেধ্যং বল্যং মনস্করম্||১০৭|| জীবনীযং শ্রমহরং শ্বাসকাসনিবর্হণম্| হন্তি শোণিতপিত্তং চ সন্ধানং বিহতস্য চ||১০৮|| সর্বপ্রাণভৃতাং সাত্ম্যং শমনং শোধনং তথা| তৃষ্ণাঘ্নং দীপনীযং চ শ্রেষ্ঠং ক্ষীণক্ষতেষু চ||১০৯|| পাণ্ডুরোগেঽম্লপিত্তে চ শোষে গুল্মে তথোদরে| অতীসারে জ্বরে দাহে শ্বযথৌ চ বিশেষতঃ ||১১০|| যোনিশুক্রপ্রদোষেষু মূত্রেষ্বপ্রচুরেষু চ| পুরীষে গ্রথিতে পথ্যং বাতপিত্তবিকারিণাম্||১১১|| নস্যালেপাবগাহেষু বমনাস্থাপনেষু চ| বিরেচনে স্নেহনে চ পযঃ সর্বত্র যুজ্যতে||১১২|| যথাক্রমং ক্ষীরগুণানেকৈকস্য পৃথক্ পৃথক্| অন্নপানাদিকেঽধ্যাযে ভূযো বক্ষ্যাম্যশেষতঃ||১১৩||

প্রাযশো মধুরমিতি প্রাধান্যেন মধুরম্| তেন ক্ষীরমুষ্ট্রীণামীষল্লবণং তথা ছাগং কষাযমিত্যাদৌ রসান্তরস্যাপ্রাধান্যেনানুবন্ধোঽপি ক্ষীরে ভবতীতি দর্শযতি| প্রাযশ ইতি বৃংহণং স্নিগ্ধমিত্যেতাভ্যাং তথা শীতমিত্যনেন চ সম্বধ্যতে; তেনৌষ্ট্রস্য রূক্ষোষ্ণত্বাভিধানং ন বিরোধি| স্তন্যমিতি স্তন্যবৃদ্ধিকরম্| মনস্করমিতি প্রভাবাদোজস্করত্বাচ্চ; ওজোবৃদ্ধ্যা হি তদনুবিধাযিনো মনসোঽপি স্বকর্মসামর্থ্যং ভবতি| এতদেব চ নিত্যস্যেহ মনসঃ করণং যন্মনসঃ প্রকর্ষবুদ্ধ্যুত্কর্ষাদিগুণকরণম্| হন্তি শোণিতপিত্তমিতি অবস্থাবিশেষাপন্নমেব শোণিতপিত্তং হন্তি| বচনং হি- “কষাযযোগৈর্বিবিধৈর্যথোক্তৈর্দীপ্তেঽনলে শ্লেষ্মণি নির্জিতে চ| যদ্রক্তপিত্তং প্রশমং ন যাতি তত্রানিলঃ স্যাদনু, তত্র কার্যম্|| ছাগং পযঃ স্যাত্ পরমং প্রযোগে গব্যং শৃতং পঞ্চগুণে জলে বা” (চি.অ.৪) ইতি| এবং চ যদুচ্যতে- অধোভাগে রক্তপিত্তে সরত্বাত্ ক্ষীরমযৌগিকম্, ঊর্ধ্বগে চ কফকর্তৃতযাঽযৌগিকমিতি, তন্নিরস্তম্| সর্বপ্রাণভৃতাং সাত্ম্যমিত্যত্র সর্বশব্দশ্চিকিত্স্যতযা প্রকৃতসর্বমনুষ্যেষ্বেব বর্ততে, তেন ক্ষীরস্য সংস্বেদজাদিপ্রাণ্যসাত্ম্যত্বং নোদ্ভাবনীযং; কিংবা সর্বশব্দোঽযং ভূরিবচনঃ||১০৫-১১৩||

Adhikarana 49 (114-115) · Śloka 115

অথাপরে ত্রযো বৃক্ষাঃ পৃথগ্যে ফলমূলিভিঃ| স্নুহ্যর্কাশ্মন্তকাস্তেষামিদং কর্ম পৃথক্ পৃথক্||১১৪|| বমনেঽশ্মন্তকং বিদ্যাত্ স্নুহীক্ষীরং বিরেচনে| ক্ষীরমর্কস্য বিজ্ঞেযং বমনে সবিরেচনে||১১৫||

ফলমূলিভিরিতি পৃথক্শব্দযোগাদপাদানে তৃতীযা| অশ্মন্তকো মালুযাসদৃশপত্রো বৃক্ষঃ||১১৪-১১৫||

Adhikarana 50 (116-119) · Śloka 119

ইমাংস্ত্রীনপরান্ বৃক্ষানাহুর্যেষাং হিতাস্ত্বচঃ| পূতীকঃ কৃষ্ণগন্ধা চ তিল্বকশ্চ তথা তরুঃ||১১৬|| বিরেচনে প্রযোক্তব্যঃ পূতীকস্তিল্বকস্তথা| কৃষ্ণগন্ধা পরীসর্পে শোথেষ্বর্শঃসু চোচ্যতে||১১৭|| দদ্রুবিদ্রধিগণ্ডেষু কুষ্ঠেষ্বপ্যলজীষু চ| ষড্বৃক্ষাঞ্ছোধনানেতানপি বিদ্যাদ্বিচক্ষণঃ||১১৮|| ইত্যুক্তাঃ ফলমূলিন্যঃ স্নেহাশ্চ লবণানি চ| মূত্রং ক্ষীরাণি বৃক্ষাশ্চ ষড্ যে দিষ্টপযস্ত্বচঃ||১১৯||

পূতীকঃ কণ্টকীকরঞ্জঃ| তিল্বকো লোধ্রঃ; তস্য তরুরিতি বিশেষণেন পট্টিকালোধ্রং ব্যুদস্যতি, শাবরলোধ্রং চ মহাপ্রমাণং তরুশব্দযোগ্যং গ্রাহযতি; কিংবা তরুবিশেষণেন বালং লোধ্রং ব্যুদস্যতি| ষড্বৃক্ষাঞ্ শোধনানিত্যত্র যদ্যপি কৃষ্ণগন্ধাযাঃ পঞ্চকর্মণ্যনভিধানান্ন শোধনত্বং, তথাঽপি বাহ্যালেপনেন বহিঃস্থিতদোষসংশোধনত্বং বোদ্ধব্যং; কিংবা অপিশব্দাত্ কৃষ্ণগন্ধাযা অশোধনত্বমপি সূচ্যতে||১১৬-১১৯||

Adhikarana 51 (120-123) · Śloka 123

ওষধীর্নামরূপাভ্যাং জানতে হ্যজপা বনে| অবিপাশ্চৈব গোপাশ্চ যে চান্যে বনবাসিনঃ||১২০|| ন নামজ্ঞানমাত্রেণ রূপজ্ঞানেন বা পুনঃ| ওষধীনাং পরাং প্রাপ্তিং কশ্চিদ্বেদিতুমর্হতি||১২১|| যোগবিত্ত্বপ্যরূপজ্ঞস্তাসাং তত্ত্ববিদুচ্যতে| কিং পুনর্যো বিজানীযাদোষধীঃ সর্বথা ভিষক্||১২২|| যোগমাসাং তু যো বিদ্যাদ্দেশকালোপপাদিতম্| পুরুষং পুরুষং বীক্ষ্য স জ্ঞেযো ভিষগুত্তমঃ||১২৩||

উক্তানামোষধীনাং যোগজ্ঞানস্য প্রাধান্যং দর্শযন্নাহ- ওষধীরিত্যাদি| পরাং প্রাপ্তিমিতি উত্কৃষ্টং ব্যাধিশরীরাদ্যপেক্ষং সম্যগ্যোগম্| যোগো ব্যাধিশরীরাদ্যপেক্ষা সম্যগ্যোজনা ভেষজস্য| সর্বথেতি নামরূপযোগৈঃ| যোগমেব বিশিষ্টং দর্শযন্নাহ- যোগমিত্যাদি| দেশকালোপপাদিতমিতি দেশকালকৃতম্| পুরুষং পুরুষং বীক্ষ্যেতি বীপ্সাযাং, প্রতিপুরুষং প্রকৃত্যাদিভেদেন যোগস্য প্রাযো ভেদো ভবতীতি দর্শযতি| পুরুষশব্দেন চেহ সংযোগপুরুষোঽভিপ্রেতঃ||১২০-১২৩||

Adhikarana 52 (124-125) · Śloka 125

যথা বিষং যথা শস্ত্রং যথাঽগ্নিরশনির্যথা| তথৌষধমবিজ্ঞাতং বিজ্ঞাতমমৃতং যথা||১২৪|| ঔষধং হ্যনভিজ্ঞাতং নামরূপগুণৈস্ত্রিভিঃ| বিজ্ঞাতং চাপি দুর্যুক্তমনর্থাযোপপদ্যতে||১২৫||

যোগস্যৌষধজ্ঞানাধীনত্বাদৌষধাজ্ঞানস্য মহানর্থকারিতাং বহুভির্দৃষ্টান্তৈর্দর্শযতি- যথা বিষমিত্যাদি| বিষাদিবহুদৃষ্টান্তেনাজ্ঞাতং ভেষজং কিঞ্চিদ্বিষবত্ সঞ্জ্ঞানাশং কৃত্বা মারযতি, কিঞ্চিচ্চ শস্ত্রবন্মর্মচ্ছেদং কৃত্বা মারযতি, কিঞ্চিচ্চাগ্নিবত্ স্ফোটাদিকং কৃত্বা মারযতি, কিঞ্চিচ্চাশনিবত্ সদ্যো মারযতীতি দর্শযতি| নামরূপগুণৈরিত্যনেন ত্রিত্বে লব্ধে পুনস্ত্রিভিরিতি বচনমেকৈকজ্ঞানপ্রতিষেধার্থং; তেন ত্রিভিরেব মিলিতৈর্জ্ঞাতং ভেষজং প্রশস্তমিতি দর্শযতি||১২৪-১২৫||

Adhikarana 53 (126-133) · Śloka 133

যোগাদপি বিষং তীক্ষ্ণমুত্তমং ভেষজং ভবেত্| ভেষজং চাপি দুর্যুক্তং তীক্ষ্ণং সম্পদ্যতে বিষম্||১২৬|| তস্মান্ন ভিষজা যুক্তং যুক্তিবাহ্যেন ভেষজম্| ধীমতা কিঞ্চিদাদেযং জীবিতারোগ্যকাঙ্ক্ষিণা||১২৭|| কুর্যান্নিপতিতো মূর্ধ্নি সশেষং বাসবাশনিঃ| সশেষমাতুরং কুর্যান্নত্বজ্ঞমতমৌষধম্||১২৮|| দুঃখিতায শযানায শ্রদ্দধানায রোগিণে| যো ভেষজমবিজ্ঞায প্রাজ্ঞমানী প্রযচ্ছতি||১২৯|| ত্যক্তধর্মস্য পাপস্য মৃত্যুভূতস্য দুর্মতেঃ| নরো নরকপাতী স্যাত্তস্য সম্ভাষণাদপি||১৩০|| বরমাশীবিষবিষং ক্বথিতং তাম্রমেব বা| পীতমত্যগ্নিসন্তপ্তা ভক্ষিতা বাঽপ্যযোগুডাঃ||১৩১|| নতু শ্রুতবতাং বেশং বিভ্রতা শরণাগতাত্| গৃহীতমন্নং পানং বা বিত্তং বা রোগপীডিতাত্||১৩২|| ভিষগ্বুভূষুর্মতিমানতঃ স্বগুণসম্পদি| পরং প্রযত্নমাতিষ্ঠেত্ প্রাণদঃ স্যাদ্যথা নৃণাম্||১৩৩||

যোগং স্তৌতি- যোগাদপীত্যাদি| বিষং চ সম্যগ্যোগাদ্ভেষজং ভবতীতি “তিলং দদ্যাদ্বিষস্য তু” (চি.অ.১) ইত্যাদিপ্রযোগে বোদ্ধব্যম্| ন কেবলমাতুরেণৈবাভিষজো ভেষজং নাদেযং, কিন্তু ভিষজাঽপি যুক্তিবাহ্যেন ভেষজমাতুরায ন দেযমিত্যাহ- দুঃখিতাযেত্যাদি||১২৬-১৩৩||

Adhikarana 54 (134) · Śloka 134

তদেব যুক্তং ভৈষজ্যং যদারোগ্যায কল্পতে| স চৈব ভিষজাং শ্রেষ্ঠো রোগেভ্যো যঃ প্রমোচযেত্||১৩৪||

অথ সম্যগ্যুক্তস্য ভেষজস্য কিং লক্ষণং কিংবা উপাদেযস্য শ্রেষ্ঠবৈদ্যস্য লক্ষণমিত্যাহ- তদেবেত্যাদি| রোগেভ্যো যঃ প্রমোচযেদিত্যনেন চ জ্ঞানপূর্বং ভেষজপ্রযোগেণ রোগহারকত্বমুচ্যতে; তেন যাদৃচ্ছিকসিদ্ধ্যা কুবৈদ্যব্যবহারো ন বাচ্যঃ; যাদৃচ্ছিকসিদ্ধৌ হি বৈদ্যো ন রোগপ্রমোক্ষে কারণং, কিন্তু ঘুণাক্ষরন্যাযেন দৈবাগতো ভেষজস্য সম্যগ্যোগ ইতি||১৩৪||

Adhikarana 55 (135) · Śloka 135

সম্যক্প্রযোগং সর্বেষাং সিদ্ধিরাখ্যাতি কর্মণাম্| সিদ্ধিরাখ্যাতি সর্বৈশ্চ গুণৈর্যুক্তং ভিষক্তমম্||১৩৫||

কথমারোগ্যাত্ সম্যগ্যোগো ভেষজস্য জ্ঞাযতে ইত্যাহ- সম্যক্প্রযোগমিত্যাদি| সর্বেষামিত্যনেনান্যেষামপি কর্মণাং প্রতিমাকরণাদীনাং সিদ্ধিঃ সম্যগ্যোগং তত্কারণতাং খ্যাপযতি; ন হ্যসম্যক্প্রযুক্তে কারণে সম্যক্ কার্যং ভবতি| সিদ্ধিরাখ্যাতীতি উক্তা প্রাতিনিযমিকী সিদ্ধিঃ, ন যাদৃচ্ছিকী| সর্বৈর্গুণৈরিতি শ্রুতে পর্যবদাতত্বাদিভিঃ খুড্ডাকচতুষ্পাদ (সূ.অ.১০) বক্ষ্যমাণৈঃ||১৩৫||

Adhikarana 56 (136-140) · Śloka 140

তত্র শ্লোকাঃ- আযুর্বেদাগমো হেতুরাগমস্য প্রবর্তনম্| সূত্রণস্যাভ্যনুজ্ঞানমাযুর্বেদস্য নির্ণযঃ||১৩৬|| সম্পূর্ণং কারণং কার্যমাযুর্বেদপ্রযোজনম্| হেতবশ্চৈব দোষাশ্চ ভেষজং সঙ্গ্রহেণ চ||১৩৭|| রসাঃ সপ্রত্যযদ্রব্যাস্ত্রিবিধো দ্রব্যসঙ্গ্রহঃ| মূলিন্যশ্চ ফলিন্যশ্চ স্নেহাশ্চ লবণানি চ||১৩৮|| মূত্রং ক্ষীরাণি বৃক্ষাশ্চ ষড্ যে ক্ষীরত্বগাশ্রযাঃ| কর্মাণি চৈষাং সর্বেষাং যোগাযোগগুণাগুণাঃ||১৩৯|| বৈদ্যাপবাদো যত্রস্থাঃ সর্বে চ ভিষজাং গুণাঃ| সর্বমেতত্ সমাখ্যাতং পূর্বাধ্যাযে মহর্ষিণা||১৪০||

তত্র শ্লোকা ইতি তন্ত্রকারস্য রীতিরিযং যত্- যত্রোক্তমর্থং সঙ্গ্রহেণাভিধত্তে তত্র ‘তত্র শ্লোকা’ ইতি করোতি; যত্র তূক্তাদনধিকমুচ্যতে তত্র ‘ভবতি চাত্র’ ইতি করোতি; ন চাস্য নিষ্প্রযোজনত্বং, তন্ত্রধর্মত্বাত্| অধ্যাযোক্তমর্থমধ্যাযান্তে সঙ্গ্রহেণাভিধত্তে- আযুর্বেদাগম ইত্যাদিনা| সঙ্গ্রহকথনং চ পূর্বোক্তার্থস্য সঙ্ক্ষেপেণ গ্রহণার্থং তথা দুর্জ্ঞানপ্রতিষেধার্থং চ| যতো যত্কিঞ্চিদত্র দুর্জ্ঞানং স্যাত্তদিহ প্রতিপাদিতার্থসংবাদেনাবধার্যতে| বচনং হি- “গদ্যোক্তো যঃ পুনঃ শ্লোকৈরর্থঃ সমনুগীযতে| তদ্ব্যক্তিব্যবসাযার্থং দ্বিরুক্তিঃ সা ন গর্হ্যতে” (নি.অ.১) ইতি| অত্র চ গদ্যোক্ত ইতি বিস্তরোক্তোপলক্ষণম্| তেন শ্লোকোক্তস্যাপ্যারগ্বধীযাদ্যর্থস্য পুনঃ শ্লোকেন সঙ্গ্রহণমবিরুদ্ধম্| ব্যক্তিঃ স্পষ্টতা, ব্যবসাযঃ অবধারণম্| আগম ইতি “দীর্ঘঞ্জীবিতমন্বিচ্ছন্” ইত্যাদিনা, হেতুরিতি আযুর্বেদাগমহেতুঃ, স চ “বিঘ্নভূতা যদা রোগা” ইত্যাদিনা রোগপ্রাদুর্ভাব উক্তঃ; কিংবা “দীর্ঘঞ্জীবিতমন্বিচ্ছন্” ইত্যাদিশ্লোকো বিশেষেণাযুর্বেদাগমস্য তথাঽঽযুর্বেদাগমহেতোশ্চ পিণ্ডসূত্ররূপঃ, “ব্রহ্মণা হি” ইত্যাদিগ্রন্থস্ত্বাযুর্বেদাগমপ্রতিপাদকঃ, হেতুপ্রতিপাদকস্তু “বিঘ্নভূতা” ইত্যাদিগ্রন্থো যথোক্ত এব| আগমস্য প্রবর্তনমিতি ইন্দ্রাদানীয ভরদ্বাজেন মর্ত্যলোকে প্রবর্তনমাযুর্বেদগ্রহণপর্যন্তম্| সূত্রণমিত্যাযুর্বেদতন্ত্রকরণমগ্নিবেশাদীনাম্| অভ্যনুজ্ঞানমিতি “তানি চানুমতানি” ইত্যাদি| শেষং সুগমম্||১৩৬-১৪০||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে সূত্রস্থানে দীর্ঘঞ্জীবিতীযো নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযামাযুর্বেদদীপিকাখ্যাযাং চরকতাত্পর্যটীকাযাং সূত্রস্থানে দীর্ঘঞ্জীবিতীযো নাম প্রথমোঽধ্যাযঃ||১||