8. indriyōpakramaṇīyō'dhyāyaḥ

Adhikarana 1 (1-2) · Śloka 2

অথাত ইন্দ্রিযোপক্রমণীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

স্বস্থাধিকারে আহারাচারচেষ্টাসু পরং প্রযত্নমাতিষ্ঠেদিত্যুক্তং, তত্রাহারচেষ্টাঃ কাশ্চিত্ পূর্বাধ্যাযত্রযেণ প্রতিপাদিতাঃ, তেনাবশিষ্টস্যাচারস্যাভিধানার্থং তথেন্দ্রিযমনসামতিযোগাযোগমিথ্যাযোগপরিহাররূপচেষ্টোপদর্শনার্থং চেন্দ্রিযোপক্রমণীযমাহ| তত্রাপি বক্ষ্যমাণচেষ্টাচারযোঃ প্রাযেণেন্দ্রিযাদিবিষযত্বেনেন্দ্রিযাদীন্যেব তাবদাহ| ইন্দ্রিযস্যোপক্রমণং ব্যাকর্তুমারম্ভঃ, তমিন্দ্রিযোপক্রমমিন্দ্রিযব্যাকরণমধিকৃত্য কৃতোঽধ্যায ইন্দ্রিযোপক্রমণীযঃ||১-২||

Adhikarana 2 (3) · Śloka 3

ইহ খলু পঞ্চেন্দ্রিযাণি, পঞ্চেন্দ্রিযদ্রব্যাণি, পঞ্চেন্দ্রিযাধিষ্ঠানানি, পঞ্চেন্দ্রিযার্থাঃ, পঞ্চেন্দ্রিযবুদ্ধযো ভবন্তি, ইত্যুক্তমিন্দ্রিযাধিকারে||৩||

ইহেতি ইহ প্রকরণে পঞ্চেন্দ্রিযাণি, তেন প্রকরণান্তরে দর্শনান্তরপরিগ্রহেণ বক্ষ্যমাণৈকাদশেন্দ্রিযাভিধানেন সমং ন বিরোধঃ; যতঃ সর্বপারিষদমিদং শাস্ত্রং, তেনাযুর্বেদাবিরুদ্ধবৈশেষিকসাঙ্খ্যাদিদর্শনভেদেন বিরুদ্ধার্থোঽভিধীযমানো ন পূর্বাপরবিরোধমাবহতীত্যর্থঃ| মনস্তু যদ্যপি বৈশেষিকমতেঽপীন্দ্রিযং, শাস্ত্রকারেণাপি মধুররসপ্রস্তাবে “ষডিন্দ্রিযপ্রসাদনঃ” (সূ. অ.২৬) ইত্যভিধানাদনুমতমেব, তথাঽপীহ প্রকরণে চক্ষুরাদিভ্যো বক্ষ্যমাণাধিকধর্মযোগিতযা নেন্দ্রিযত্বেন পঠিতম্| ইন্দ্রিযাদীনি স্বযমেব ব্যাকরিষ্যতি- তত্র চক্ষুরিত্যাদিনা| ইত্যেতাবদেবোক্তমিন্দ্রিযাধিকারে, ‘পূর্বাচার্যৈঃ’ ইতি শেষঃ; এতেনান্যশাস্ত্রেঽপীন্দ্রিযাধিকারে এতাবদেবোক্তমিতি ফলতি||৩||

Adhikarana 3 (4) · Śloka 4

অতীন্দ্রিযং পুনর্মনঃ সত্ত্বসঞ্জ্ঞকং, ‘চেতঃ’ ইত্যাহুরেকে, তদর্থাত্মসম্পদাযত্তচেষ্টং চেষ্টাপ্রত্যযভূতমিন্দ্রিযাণাম্||৪||

চক্ষুরাদিভ্যো বিশিষ্টেন ধর্মেণ মনো দর্শযতি- অতীন্দ্রিযমিত্যাদি| অতিক্রান্তমিন্দ্রিযমতীন্দ্রিযং; চক্ষুরাদীনাং যদিন্দ্রিযত্বং বাহ্যজ্ঞানকারণত্বং, তদতিক্রান্তমিত্যর্থঃ; যদ্যপি মনোঽপি সুখাদিজ্ঞানং প্রতি কারণত্বেনেন্দ্রিযং, তথাঽপীন্দ্রিযচক্ষুরাদ্যধিষ্ঠাযকত্ববিশেষাদতীন্দ্রিযমিত্যুক্তং; যদি বাঽতীন্দ্রিযমিতি চক্ষুরাদিভ্যোঽপ্যতীন্দ্রিযেভ্যঃ সূক্ষ্মতরং, দুরববোধাত্| সত্ত্বমিত্যেষা সঞ্জ্ঞা যস্য তত্তথা| চেত ইত্যাহুরেক ইতি পরমতস্যাপ্রতিষেধাত্ স্বযমপ্যনুমতম্| পর্যাযকথনং শাস্ত্রে ব্যবহারার্থম্| তদিতি মনঃ, অর্থো মনোঽর্থঃ, স চ সুখাদিশ্চিন্ত্যবিচার্যাদিশ্চ, আত্মা চেতনপ্রতিসন্ধাতা, অনযোঃ সম্পত্ তদর্থাত্মসম্পত্, এতদাযত্তা চেষ্টা ব্যাপারো যস্য তত্তথা; তত্রার্থসম্পত্ সুখাদীনাং সন্নিকর্ষশ্চিন্ত্যাদীনামাভিমুখ্যং চ, আত্মসম্পদর্থগ্রহণে প্রযত্নশালিত্বং, মনশ্চেষ্টা চ সুখাদিজ্ঞানং তথা চিন্ত্যচিন্তনাদি তথা চক্ষুরাদীন্দ্রিযপ্রেরণং চ| ইন্দ্রিযাণাং চক্ষুরাদীনাং যা চেষ্টা স্ববিষযরূপাদিজ্ঞানলক্ষণা, তত্র প্রত্যযভূতং কারণভূতং মন ইতি যোজ্যম্| এতেনৈতদুক্তং ভবতি- যদা সুখাদযশ্চিন্ত্যাদযোঽপি বিষযা ভবন্ত্যাঽঽত্মা চ প্রযত্নবান্ ভবতি তদা মনঃ স্ববিষযে প্রবর্ততে, ইন্দ্রিযাণি চাধিতিষ্ঠতি, ইন্দ্রিযাণি চ মনোঽধিষ্ঠিতান্যেব স্ববিষযজ্ঞানে প্রবর্তন্তে||৪||

Adhikarana 4 (5) · Śloka 5

স্বার্থেন্দ্রিযার্থসঙ্কল্পব্যভিচরণাচ্চানেকমেকস্মিন্ পুরুষে সত্ত্বং, রজস্তমঃসত্ত্বগুণযোগাচ্চ; ন চানেকত্বং, নহ্যেকং হ্যেককালমনেকেষু প্রবর্ততে ; তস্মান্নৈককালা সর্বেন্দ্রিযপ্রবৃত্তিঃ||৫||

ইদানীং তন্মন একস্মিন্ পুরুষে উপাধিভেদাদনেকং পরমার্থতস্ত্বেকমিতি দর্শযতি- স্বার্থেত্যাদি| সত্ত্বং মনঃ| অনেকম্ অনেকমিব, স্বার্থেন্দ্রিযার্থসঙ্কল্পব্যভিচরণাত্ তথা রজস্তমঃসত্ত্বগুণযোগাচ্চ| চকারঃ পরস্পরসমুচ্চযে| স্বার্থস্য মনোঽর্থস্য চিন্ত্যস্য ব্যভিচরণাদেকং চিন্ত্যমর্থং পরিত্যজ্যান্যস্যার্থস্য গ্রহণাদিত্যর্থঃ; এতেনৈতদুক্তং ভবতি- যদেকমেব মনো যদা ধর্মং চিন্তযেত্তদা ধর্মচিন্তকং, যদা ধর্মং পরিত্যজ্য তদেব কামং চিন্তযতি তদা কামচিন্তকম্, ইত্যেবমাদিনা ধর্মভেদেনাভিন্নমপি ভিন্নমভিধীযতে; এবমিন্দ্রিযার্থব্যভিচরণেঽপি যদা রূপং গৃহ্ণাতি তদা রূপগ্রাহকং, যদা গন্ধং গৃহ্ণাতি তদা গন্ধগ্রাহকমিত্যাদি বাচ্যম্; এবং সঙ্কল্পব্যভিচরণেঽপি ব্যাখ্যেযং, তত্র সঙ্কল্পঃ প্রতিপন্নানাং ভাবানামুপকারকং মমেদমপকারকং মমেদমিতি বা গুণতো দোষতো বা কল্পনম্; এতদ্ব্যভিচরণে চ কদাচিদ্গুণকল্পকং কদাচিদ্দোষকল্পকমিতি মনোভেদো ব্যাখ্যেযঃ| তথা একপুরুষে একমেব মনো যদা বহুরজোযুক্তং ভবতি তদা ক্রোধাদিমদ্ভবতি, যদা বহুতমোযুক্তং ভবতি তদাঽজ্ঞানভযাদিমদ্ভবতি, যদা সত্ত্বযুক্তং ভবতি তদা সত্যশৌচাদিযুক্তং ভবতি, ততশ্চানেকমিব মনো ভবতি| তদেতত্ প্রতিপাদিতমনেকত্বং পরমার্থতো ন ভবতীত্যাহ- ন চেত্যাদি| ন চানেকত্বং মনস ইত্যর্থঃ| চকারাদমহত্ত্বং চ মনস ইতি সমুচ্চিনোতি| যদুক্তম্- “অণুত্বমথ চৈকত্বং দ্বৌ গুণৌ মনসঃ স্মৃতৌ” (শা.অ.১) ইতি| কুতো নানেকত্বমিত্যাহ- ন হীত্যাদি| অনেকমেককালমনেকেষু প্রবর্ততে; অনেকং যন্মনঃ দেবদত্তযজ্ঞদত্তবিষ্ণুমিত্রেষু শরীরিষু দৃষ্টং তদেককালং যুগপদনেকেষু রূপজ্ঞানশব্দজ্ঞানগন্ধজ্ঞানেষু বর্ততে এবং দৃষ্টং, তদ্যদি একপুরুষেঽপি বহূনি মনাংসি স্যুস্তদা তান্যপি যুগপদেকপুরুষ এব রূপাদিজ্ঞানেষু প্রবর্তেরন্, ন তু প্রবর্তন্তে, তস্মাদেকমেবৈকপুরুষে মন ইত্যর্থঃ| দীর্ঘাং শষ্কুলীং ভক্ষযতো যুগপত্ পঞ্চজ্ঞানান্যুত্পদ্যন্ত ইতি তু জ্ঞানং যুগপদুত্পলপত্রশতব্যক্তিভেদজ্ঞানবদ্ভ্রান্তম্| পরমার্থতো যুগপজ্জ্ঞানোত্পত্তৌ হি সতি বিষযসন্নিকর্ষে সর্বদৈব হি যুগপজ্জ্ঞানানি স্যুঃ| অত এব হি কারণান্মহত্ত্বমপি মনসো নাস্তি, মহত্ত্বে হি সতি যুগপত্পঞ্চেন্দ্রিযাধিষ্ঠানাজ্জ্ঞানোত্পত্তিঃ স্যাত্, ন চ ভবতি, তস্মাদেকমণু চ মন ইতি| যস্মাচ্চৈকপুরুষে একং মনোঽণুপরিমাণং চ, তস্মাত্ কারণান্নৈককালা সর্বেন্দ্রিযপ্রবৃত্তিঃ ন যুগপদিন্দ্রিযাণি স্ববিষযোপলব্ধৌ প্রবর্তন্ত ইত্যর্থঃ| ইন্দ্রিযাণি মনোঽধিষ্ঠিতানি প্রবর্তন্তে, তেন যদা মনশ্চক্ষুরধিতিষ্ঠতি তদা ন ঘ্রাণাদীনি, এবং যদা ঘ্রাণমধিতিষ্ঠতি তদা ন চক্ষুরাদীনি||৫||

Adhikarana 5 (6) · Śloka 6

যদ্গুণং চাভীক্ষ্ণং পুরুষমনুবর্ততে সত্ত্বং তত্সত্ত্বমেবোপদিশন্তি মুনযো বাহুল্যানুশযাত্||৬||

ননু যদ্যেকস্মিন্নেব পুরুষে কদাচিদ্রজোযুক্তং কদাচিত্তমোযুক্তং কদাচিত্ সত্ত্বযুক্তং মনো ভবতি, তত্ কথমযং সাত্ত্বিকোঽযং রাজস ইত্যাদিব্যপদেশো ভবতীত্যাহ- যদ্গুণমিত্যাদি| যেন গুণেন সত্ত্বাদিনা যুক্তং যদ্গুণম্, অভীক্ষ্ণং পুনঃ পুনঃ, সত্ত্বং মনঃ, অনুবর্ততেঽনুবধ্নাতি, তত্সত্ত্বং সাত্ত্বিকং রাজসং তামসং বা উপদিশন্তি, বাহুল্যানুশযাত্ ভূরিসম্বন্ধাদিত্যর্থঃ| এতদুক্তং ভবতি- সত্যপি গুণান্তরান্বযে সত্ত্ববাহুল্যাত্ সত্ত্বকার্যাণি সত্যশৌচাদীনি যস্য ভবন্তি স সাত্ত্বিক ইতি ব্যপদিশ্যতে; এবমপরমপি ব্যাখ্যেযম্||৬||

Adhikarana 6 (7) · Śloka 7

মনঃপুরঃসরাণীন্দ্রিযাণ্যর্থগ্রহণসমর্থানি ভবন্তি||৭||

উক্তং মনশ্চেষ্টাপ্রত্যযভূতমিন্দ্রিযাণাং তদ্ব্যাকরোতি- মন ইত্যাদি| মনঃপুরঃসরাণি মনোধিষ্ঠিতানি||৭||

Adhikarana 7 (8) · Śloka 8

তত্র চক্ষুঃ শ্রোত্রং ঘ্রাণং রসনং স্পর্শনমিতি পঞ্চেন্দ্রিযাণি||৮||

পঞ্চেন্দ্রিযাণীত্যুক্তং তদ্বিবৃণোতি- তত্র চক্ষুরিত্যাদি| চষ্টে রূপং রূপবন্তং চ প্রকাশযতীতি চক্ষুঃ| তচ্চোভযনযগোলকাধিষ্ঠানমেকমেব| শৃণোত্যনেনেতি শ্রোত্রম্| জিঘ্রত্যনেনেতি ঘ্রাণম্| রসত্যাস্বাদযত্যনেনেতি রসনম্| স্পৃশত্যনেনেতি স্পর্শনম্||৮||

Adhikarana 8 (9) · Śloka 9

পঞ্চেন্দ্রিযদ্রব্যাণি- খং বাযুর্জ্যোতিরাপো ভূরিতি||৯||

ইন্দ্রিযাণাং প্রাধান্যেনারম্ভকং দ্রব্যমিন্দ্রিযদ্রব্যম্; ইন্দ্রিযেষু চক্ষুরাদৌ নির্দিষ্টং, প্রাধান্যাত্| যদুক্তং শালাক্যে- “শ্রোত্রত্বক্ঘ্রাণরসনৈঃ শ্রেষ্ঠৈরপি সমন্বিতঃ | বলবর্ণাদ্যুপেতোঽপি নষ্টদৃক্ কুড্যসন্নিভঃ” ইতি| ইন্দ্রিযদ্রব্যনির্দেশে তু উদিতত্বেন নির্দেশঃ কৃতো বক্ষ্যমাণেন “মহাভূতানি খং বাযুরগ্নিরাপঃ ক্ষিতিস্তথা” (শা.অ.১) ইতি গ্রন্থক্রমানুরোধেন||৯||

Adhikarana 9 (10) · Śloka 10

পঞ্চেন্দ্রিযাধিষ্ঠানানি- অক্ষিণী কর্ণৌ নাসিকে জিহ্বা ত্বক্ চেতি||১০||

ইন্দ্রিযাধিষ্ঠানমিন্দ্রিযাশ্রযঃ| যদ্যপি চাক্ষিণী কর্ণৌ নাসাপুটে দ্বে তথাঽপ্যেকেন্দ্রিযাধিষ্ঠানত্বেনৈকমেবেতি কৃত্বা “পঞ্চ” ইত্যুক্তম্||১০||

Adhikarana 10 (11) · Śloka 11

পঞ্চেন্দ্রিযার্থাঃ- শব্দস্পর্শরূপরসগন্ধাঃ||১১||

ইন্দ্রিযার্থা ইন্দ্রিযবিষযাঃ| অত্র চ স্পর্শগ্রহণেন স্পর্শস্য স্পর্শাশ্রযস্য চ দ্রব্যস্য স্পর্শৈকার্থসমবেতস্য চ পরিমাণাদেঃ স্পর্শগ্রাহ্যস্য গ্রহণম্| এবং রূপাদিষ্বপি বাচ্যম্||১১||

Adhikarana 11 (12) · Śloka 12

পঞ্চেন্দ্রিযবুদ্ধযঃ- চক্ষুর্বুদ্ধ্যাদিকাঃ; তাঃ পুনরিন্দ্রিযেন্দ্রিযার্থসত্ত্বাত্মসন্নিকর্ষজাঃ, ক্ষণিকা, নিশ্চযাত্মিকাশ্চ, ইত্যেতত্ পঞ্চপঞ্চকম্||১২||

অসাধারণেন কারণেনেন্দ্রিযেণ ব্যপদিষ্টা বুদ্ধয ইন্দ্রিযবুদ্ধযঃ| চক্ষুষা অসাধারণেন কারণেন জনিতা বুদ্ধিশ্চক্ষুর্বুদ্ধিঃ; এবং শ্রোত্রাদিবুদ্ধিষু বাচ্যম্| ইহ চক্ষুর্বুদ্ধিরাদাবুপদিশ্যতে, চক্ষুর্বুদ্ধেরেব বহুবিষযত্বাত্| ইন্দ্রিযবুদ্ধ্যুত্পাদসামগ্রীমাহ- তাঃ পুনরিত্যাদি| সন্নিকর্ষঃ সম্বন্ধঃ; স চ ক্বচিত্ সংযোগঃ, ক্বচিত্ সমবাযঃ; তেন চক্ষুর্বুদ্ধ্যাদাবাত্মা মনসা সংযুজ্যতে, মন ইন্দ্রিযেণ, ইন্দ্রিযমর্থেন; শ্রোত্রবুদ্ধৌ তু শ্রোত্রশব্দযোঃ সমবায ইতি বিশেষঃ| ক্ষণিকা ইতি আশুতরবিনাশিন্যঃ, ন তু বৌদ্ধসিদ্ধান্তবদেকক্ষণাবস্থাযিন্যঃ| নিশ্চযাত্মিকা বস্তুস্বরূপপরিচ্ছেদাত্মিকা | ক্ষণিকত্বেঽপি বস্তুপরিচ্ছেদকত্বং প্রদীপার্চির্জ্বলনবদ্বুদ্ধীনামবিরুদ্ধমিত্যর্থঃ ||১২||

Adhikarana 12 (13) · Śloka 13

মনো মনোর্থো বুদ্ধিরাত্মা চেত্যধ্যাত্মদ্রব্যগুণসঙ্গ্রহঃ শুভাশুভপ্রবৃত্তিনিবৃত্তিহেতুশ্চ, দ্রব্যাশ্রিতং চ কর্ম; যদুচ্যতে ক্রিযেতি||১৩||

মনোঽর্থো বক্ষ্যমাণো ‘মনসস্তু চিন্ত্যমর্থঃ’ ইত্যনেন| বুদ্ধিরিহ মনোবুদ্ধির্বিবক্ষিতা, ইন্দ্রিযবুদ্ধীনাং পঞ্চপঞ্চকেনৈব গ্রহণাত্| আত্মানমধিকৃত্যাধ্যাত্মম্; আত্মানমধিকৃত্য যানি দ্রব্যাণি যে চ গুণাঃ, তেষাং সঙ্গ্রহোঽধ্যাত্মদ্রব্যগুণসঙ্গ্রহঃ| তত্র গুণা রূপাদিবুদ্ধযঃ, শেষং দ্রব্যম্| এতদুক্তং ভবতি- আত্মনোঽপকারকোপকারকাণাং দ্রব্যগুণানামযং সঙ্গ্রহ ইতি| যোঽযং সঙ্গ্রহঃ শুভস্য ধর্মস্য সুখস্য চ প্রবৃত্তৌ হেতুর্ভবতি, অশুভস্যাধর্মস্যাসুখস্য চ নিবৃত্তৌ হেতুর্ভবতি; তত্রোক্তসঙ্গ্রহস্য সম্যগ্যোগঃ শুভস্য প্রবৃত্তাবশুভস্য নিবৃত্তৌ হেতুর্ভবতি, অযোগাতিযোগমিথ্যাযোগাস্তু অশুভস্য প্রবৃত্তৌ হেতবঃ; যদি বা শুভস্য পূর্বব্যাকৃতস্য, অশুভস্য চ পূর্বব্যাকৃতস্য প্রবৃত্তেঃ সংসারস্য, নিবৃত্তের্মোক্ষস্য যথোক্তসঙ্গ্রহো হেতুরিতি ব্যাখ্যেযং; তত্র সঙ্গ্রহস্য শুভাশুভহেতুত্বং পূর্ববদেব ব্যাখ্যেযং; দুর্জ্ঞাতস্তু সঙ্গ্রহঃ সংসারস্য হেতুর্ভবতি, তত্ত্বতো জ্ঞাতস্তু মোক্ষহেতুরিতি ব্যাখ্যেযম্| অধ্যাত্মদ্রব্যগুণাদধিকমনুক্তং শুভাদিহেতুমাহ- দ্রব্যাশ্রিতং চেত্যাদি| কর্মেত্যুচ্যমানে বমনাদিষ্বপি তথাঽঽস্যাস্বপ্নাদিষ্বপি কর্মশব্দবাচ্যেষু প্রসক্তিঃ স্যাত্, অতস্তদ্ব্যাবৃত্ত্যর্থং দ্রব্যাশ্রিতমিতি পদং; তথাঽপি ধর্মাধর্মযোঃ কর্মশব্দবাচ্যযোঃ প্রসক্তিঃ স্যাদিত্যত উক্তং- যদুচ্যতে ক্রিযেতি| কর্মণঃ পৃথক্কৃত্বাঽভিধানং পঞ্চকর্মাদিষু কর্মণোঽপ্রবিষ্টত্বাত্||১৩||

Adhikarana 13 (14) · Śloka 14

তত্রানুমানগম্যানাং পঞ্চমহাভূতবিকারসমুদাযাত্মকানামপি সতামিন্দ্রিযাণাং তেজশ্চক্ষুষি, খং শ্রোত্রে, ঘ্রাণে ক্ষিতিঃ, আপো রসনে, স্পর্শনেঽনিলো বিশেষেণোপপদ্যতে| তত্র যদ্যদাত্মকমিন্দ্রিযং বিশেষাত্তত্তদাত্মকমেবার্থমনুগৃহ্ণাতি, তত্স্বভাবাদ্বিভুত্বাচ্চ||১৪||

সম্প্রতি বৈদ্যকসিদ্ধান্তেন পাঞ্চভৌতিকানামপি চক্ষুরাদীনাং যথা তৈজসত্বাদিব্যপদেশো ভবতি তদাহ- তত্রেত্যাদি| অনুমানেন প্রতীযন্ত ইত্যনুমানগম্যানি; অনুমানং চ- চক্ষুর্বুদ্ধ্যাদযঃ করণকার্যাঃ, ক্রিযাত্বাত্; ছিদিক্রিযাবত্| মহাভূতানি খাদীনি, তেষাং বিকারঃ পরিণামবিশেষঃ, সমুদাযো মেলকঃ, স আত্মা সমবাযিকারণং যেষাং তানি| বিশেষেণ অধিকত্বেন| এতদুক্তং ভবতি- পাঞ্চভৌতিকত্বেঽপি তেজোধিকত্বাচ্চক্ষুস্তৈজসং ব্যপদিশ্যতে; এবং ঘ্রাণাদিষ্বপি পৃথিব্যাদ্যধিকত্বেন পার্থিবত্বাদিব্যপদেশঃ| অথ কথং চক্ষুস্তেজোধিকং, ঘ্রাণং পৃথিব্যধিকমিত্যাদ্যবধার্যত ইত্যাহ- তত্রেত্যাদি| যদিন্দ্রিযং বিশেষাদ্ভূযস্ত্বেন যদাত্মকং যদ্ভূতারব্ধং, তদিন্দ্রিযং তদাত্মকমেব তদ্ভূতাত্মকমেব, অর্থং বিষযমনুগৃহ্ণাতি অনুধাবতি; যত্তেজঃপ্রধানং তত্তেজঃপ্রধানমেব বিষযং গৃহ্ণাতীত্যর্থঃ, এবং পার্থিবাদিষ্বপি বাচ্যম্| তত্র হেতুমাহ- তত্স্বভাবাদ্বিভুত্বাচ্চ| তত্স্বভাবাদিতি গ্রাহ্যাণাং রূপাদীনাং যঃ স্বভাবস্তৈজসত্বাদিঃ,চক্ষুরাদীনামপি তত্স্বভাবাদেবেত্যর্থঃ; বিভুত্বাদিতি শক্তত্বাত্, সমানজাতীযতৈজসাদিগ্রহণ এব চক্ষুরাদীনাং শক্তত্বাদিত্যর্থঃ| তদনেন গ্রন্থেনৈতদনুমানমুপদিশ্যতে- যত্- চক্ষুস্তৈজসং, রূপাদীনাং মধ্যে রূপস্যৈব প্রকাশকত্বাদ্বাহ্যালোকবত্; রসনমাপ্যং, রূপাদীনাং মধ্যে রসস্যৈব প্রকাশকত্বাদ্দন্তোদকবত্; তথা গন্ধঃ স্বজাতীযগুণোত্কর্ষবদিন্দ্রিযগ্রাহ্যঃ, ভূতবিশেষগুণত্বাদ্রূপবদিত্যাদি||১৪||

Adhikarana 14 (15) · Śloka 15

তদর্থাতিযোগাযোগমিথ্যাযোগাত্ সমনস্কমিন্দ্রিযং বিকৃতিমাপদ্যমানং যথাস্বং বুদ্ধ্যুপঘাতায সম্পদ্যতে, সামর্থ্যযোগাত্ পুনঃ প্রকৃতিমাপদ্যমানং যথাস্বং বুদ্ধিমাপ্যাযযতি||১৫||

শুভাশুভপ্রবৃত্তিহেতুরিতি যদুক্তং তদুপপাদযতি- তদর্থেত্যাদি| তত্ ইন্দ্রিযম্, অর্থস্য রূপাদেরতিযোগো রূপাদ্যতিদর্শনম্, অযোগো হীনমাত্ররূপাদিদর্শনং সর্বশো রূপাদ্যদর্শনং চ, মিথ্যাযোগো বিকৃতবীভত্সরূপাদিদর্শনম্| সমনস্কং মনসা সহিতং, বিকৃতিং বিকারমাপদ্যমানং; সমনস্কমিতি বিশেষণং কুর্বন্ চক্ষুরাদ্যুপঘাতান্মনসোঽপ্যুদ্বিগ্নত্বদৈন্যাদিলক্ষণো বিকারো ভবতীতি দর্শযতি| যথাস্বং যা যস্যাত্মীযা বুদ্ধিঃ| সামর্থ্যযোগাত্ সমযোগাত্| পুনঃশব্দঃ পূর্বপক্ষাদ্ব্যাবর্তযতি| প্রকৃতিং স্বভাবম্, আপদ্যমানম্ অনুবিধীযমানম্; ‘ইন্দ্রিযম্’ ইতি শেষঃ| যথাস্বং বুদ্ধিমাপ্যাযযতীতি আত্মীযামাত্মীযাং বুদ্ধিং সাতত্যেন জনযতীত্যর্থঃ||১৫||

Adhikarana 15 (16) · Śloka 16

মনসস্তু চিন্ত্যমর্থঃ| তত্র মনসো মনোবুদ্ধেশ্চ ত এব সমানাতিহীনমিথ্যাযোগাঃ প্রকৃতিবিকৃতিহেতবো ভবন্তি||১৬||

পূর্বং মন উক্তং, তস্য গ্রাহ্যং বিষযমাহ- মনসস্তু চিন্ত্যমর্থ ইতি| ইন্দ্রিযনিরপেক্ষং মনো যদ্গৃহ্ণাতি তচ্চিন্ত্যং (যদি বা, ইন্দ্রিযগৃহীতমেবার্থং যত্ পুনরিন্দ্রিযনিরপেক্ষং মনো গৃহ্ণাতি তচ্চিন্ত্যম্ )| এতচ্চ প্রাধান্যাদুক্তং; তেন মনোর্থানাং সুখাদীনামনুপাদানং দোষত্বেন নৈবোদ্ভাবনীযম্| ত এবেত্যাদি মনোবিষযস্য চিন্ত্যস্য সমযোগস্তথাঽতিহীনমিথ্যাযোগাশ্চ| প্রকৃতিঃ অবিকারঃ স্বভাব ইতি যাবত্; বিকৃতিঃ বিকারঃ| তত্র চিন্ত্যস্য সম্যগ্যোগো মনসো মনোবুদ্ধেশ্চ প্রকৃতিহেতুর্ভবতি, অতিযোগাদযস্তু চিন্ত্যস্য মনসো মনোবুদ্ধেশ্চ চিন্তনধ্যানাদিলক্ষণাযা বিকৃতের্হেতবো ভবন্তীতি বাচ্যম্| অচিন্তনাতিচিন্তনভযানকচিন্তনৈর্মনোঽপি বিকৃতং মনোবুদ্ধিমপি বিকৃতাং জনযতীতি ভাবঃ||১৬||

Adhikarana 16 (17) · Śloka 17

তত্রেন্দ্রিযাণাং সমনস্কানামনুপতপ্তানামনুপতাপায প্রকৃতিভাবে প্রযতিতব্যমেভির্হেতুভিঃ; তদ্যথা- সাত্ম্যেন্দ্রিযার্থসংযোগেন বুদ্ধ্যা সম্যগবেক্ষ্যাবেক্ষ্য কর্মণাং সম্যক্ প্রতিপাদনেন, দেশকালাত্মগুণবিপরীতোপাসনেন চেতি| তস্মাদাত্মহিতং চিকীর্ষতা সর্বেণ সর্বং সর্বদা স্মৃতিমাস্থায সদ্বৃত্তমনুষ্ঠেযম্||১৭||

তদীদৃশে কর্তব্যমাহ- তত্রেত্যাদি| অনুপতাপায অনুপঘাতায; উপঘাতকহেতুবর্জনেনেত্যভিপ্রাযঃ| প্রকৃতিভাবে নির্বিকারত্বকরণে; ভেষজোপযোগেনেত্যভিপ্রাযঃ| সাত্ম্যেন্দ্রিযার্থসংযোগেনেতি ইন্দ্রিযার্থসমযোগেন| বুদ্ধ্যা সম্যগিদং মম হিতমিদং মমাহিতমিত্যবেক্ষ্যাবেক্ষ্য| কর্মণাং প্রবৃত্তীনাং সম্যক্প্রতিপাদনেনেতি অহিতকর্মপরিত্যাগেন হিতকর্মাচরণেন চ| এতেন প্রজ্ঞাপরাধমূলাহিতপ্রবৃত্তিনিষেধেন হিতার্থপ্রবৃত্ত্যুপদেশঃ কৃতো ভবতি| এতেন চাসাত্ম্যেন্দ্রিযার্থসংযোগপ্রজ্ঞাপরাধপরিহারাভ্যামনাগতাবাধপ্রতিষেধরূপা চেষ্টোক্তা ভবতি| উত্পন্নবিকারপ্রতিষেধোপাযস্তু দেশকালেত্যাদিনা কথ্যতে; গুণশব্দঃ প্রত্যেকমভিসম্বধ্যতে, আত্মশব্দেন প্রকৃতিবিকারযোর্গ্রহণম্| তস্মাত্ কর্মণাং ক্রিযারূপাণাং শাস্ত্রবিহিতত্বেন প্রতিপাদিতানাং সম্যগনুষ্ঠানমারোগ্যহেতুঃ| তচ্চ কর্ম হিতং সদ্বৃত্তানুষ্ঠানরূপম্| তস্মাত্ কারণাদাত্মহিতং কর্তুমিচ্ছতা, স্মৃতিমাস্থাযাবধানেন সদ্বৃত্তোপদেশং স্মৃত্বেত্যর্থঃ, সতাং বৃত্তমনুষ্ঠানং দেহবাঙ্মনঃপ্রবৃত্তিরূপং সদ্বৃত্তমনুষ্ঠেযম্| ইহ জন্মনি জন্মান্তরে চ শান্তিশৌচাচারাদিযোগজনিতধর্মপ্রভাবাত্ত্রিবর্গমব্যাকুলমুপযুঞ্জানাস্তিষ্ঠন্তীতি ‘সন্ত’ ইত্যুচ্যন্তে, অধার্মিকাস্তু বিদ্যমানা অপ্যপ্রশস্তাবস্থানত্বেন| ‘অসন্ত’ ইত্যুচ্যন্তে||১৭||

Adhikarana 17 (18) · Śloka 18

তদ্ধ্যনুতিষ্ঠন্ যুগপত্ সম্পাদযত্যর্থদ্বযমারোগ্যমিন্দ্রিযবিজযং চেতি; তত্ সদ্বৃত্তমখিলেনোপদেক্ষ্যামোঽগ্নিবেশ ! তদ্যথা- দেবগোব্রাহ্মণগুরুবৃদ্ধসিদ্ধাচার্যানর্চযেত্, অগ্নিমুপচরেত্, ওষধীঃ প্রশস্তা ধারযেত্, দ্বৌ কালাবুপস্পৃশেত্, মলাযনেষ্বভীক্ষ্ণং পাদযোশ্চ বৈমল্যমাদধ্যাত্, ত্রিঃপক্ষস্য কেশশ্মশ্রুলোমনখান্ সংহারযেত্, নিত্যমনুপহতবাসাঃ সুমনাঃ সুগন্ধিঃ স্যাত্, সাধুবেশঃ, প্রসিদ্ধকেশঃ , মূর্ধশ্রোত্রঘ্রাণপাদতৈলনিত্যঃ, ধূমপঃ, পূর্বাভিভাষী, সুমুখঃ, দুর্গেষ্বভ্যুপপত্তা, হোতা, যষ্টা, দাতা, চতুষ্পথানাং নমস্কর্তা, বলীনামুপহর্তা, অতিথীনাং পূজকঃ, পিতৃভ্যঃ পিণ্ডদঃ, কালে হিতমিতমধুরার্থবাদী, বশ্যাত্মা, ধর্মাত্মা, হেতাবীর্ষ্যুঃ, ফলে নের্ষ্যুঃ, নিশ্চিন্তঃ, নির্ভীকঃ, হ্রীমান্, ধীমান্, মহোত্সাহঃ, দক্ষঃ, ক্ষমাবান্, ধার্মিকঃ, আস্তিকঃ, বিনযবুদ্ধিবিদ্যাভিজনবযোবৃদ্ধসিদ্ধাচার্যাণামুপাসিতা , ছত্রী দণ্ডী মৌলী সোপানত্কো যুগমাত্রদৃগ্বিচরেত্ , মঙ্গলাচারশীলঃ, কুচেলাস্থিকণ্টকামেধ্যকেশতুষোত্করভস্মকপালস্নানবলিভূমীনাং পরিহর্তা, প্রাক্ শ্রমাদ্ ব্যাযামবর্জী স্যাত্, সর্বপ্রাণিষু বন্ধুভূতঃ স্যাত্, ক্রুদ্ধানামনুনেতা, ভীতানামাশ্বাসযিতা, দীনানামভ্যুপপত্তা, সত্যসন্ধঃ, সামপ্রধানঃ , পরপরুষবচনসহিষ্ণুঃ, অমর্ষঘ্নঃ, প্রশমগুণদর্শী, রাগদ্বেষহেতূনাং হন্তা চ||১৮||

সদ্বৃত্তানুষ্ঠানং দর্শযতি- তদিত্যাদি| সদ্বৃত্তানুষ্ঠানেন নান্যশ্রিযমভিলষেদিত্যাদ্যনুষ্ঠানেনেন্দ্রিযং যন্ত্র্যতে, যন্ত্রণাভ্যাসাত্তদিন্দ্রিযং জীযত ইত্যুক্তমিন্দ্রিযবিজযং চেতি; যস্মাদেবঙ্গুণং সদ্বৃত্তানুষ্ঠানং তত্ তস্মাত্ সদ্বৃত্তমুপদেক্ষ্যামঃ; অখিলেন কার্ত্স্ন্যেন| দ্বৌ কালৌ সাযং প্রাতঃ, উপস্পৃশেত্ স্নাযাত্; যদি বা উপস্পৃশেত্ সন্ধ্যামুপাসীত| ত্রিঃ পক্ষস্যেতি পঞ্চভিঃ পঞ্চভির্দিনৈঃ, যদি বা ক্ষারপাণিবচনপ্রামাণ্যাত্ পক্ষশব্দোঽযং মাসে বর্ততে, পততি পঞ্চদশাহাভ্যাং পক্ষরূপাভ্যাং মাস ইতি পঞ্চদশাহঃ পক্ষোঽভিধীযতে, এবং পততি ঋতুর্মাসাভ্যাং পক্ষরূপাভ্যামিতি মাসোঽপি পক্ষাভিধেযঃ; উক্তং চ ক্ষারপাণৌ- “ত্রির্মাসস্য রোমনখান্ সংহারযেত্” ইতি| অনুপহতবাসা অম্লানবাসাঃ| প্রসিদ্ধকেশঃ প্রসাধিতকেশঃ; ইহ কেশপ্রসাধনাভিধানাত্ পূর্বং কেশসংহরণে বচনং তীর্থাদিপ্রাপ্তনিমিত্তেন কৃতমুণ্ডনস্নাতকাদিবিষযম্| পূর্বাভিভাষী প্রথমসম্ভাষণশীলঃ| দুর্গেষ্বভ্যুপপত্তা দুর্গতিপতিতানাং রক্ষিতা| যষ্টা যজ্ঞকারকঃ| বশ্যাত্মা বশ্যেন্দ্রিযঃ, আত্মশব্দোঽযমিন্দ্রিযবচনঃ| হেতাবীর্ষ্যুরিতি যেন হেতুনাঽযং ধনবান্ বিদ্যাবান্ বা জাতঃ স হেতুর্মে কথং ভবেদিতি প্রযত্নবতা ভবিতব্যমিতি দর্শযতি| ফলে নের্ষ্যুরিত্যনেন পরস্য ন ধনাদিফলসম্বন্ধনিবারণেচ্ছা কর্তব্যেতি দর্শযতি| নির্ভীক ইতি উপস্থিতেঽপরিহার্যে ভযহেতৌ বোদ্ধব্যং, শক্যপরিহারেষু তু দৃষ্টাদৃষ্টপ্রত্যবাযহেতুষু ভেতব্যমেব| অভিজনো বিশুদ্ধকুলম্| সর্বপ্রাণিষু বন্ধুভূত ইতি তু যদ্যপি রাজদ্বিষ্টপতিতাদীনামধর্মভযাচ্চিকিত্সাং ন করোতি, তথাঽপি তেষ্বপি করুণার্দ্রহৃদযত্বেন মন্তব্যম্| অভ্যুপপত্তা উপকারার্থং স্বীকর্তা| সত্যসন্ধঃ প্রতিজ্ঞাতার্থনির্বাহকঃ| অমর্ষঃ অক্ষমা, তাং হন্তীতি অমর্ষঘ্নঃ| প্রশমং শান্তিং গুণত্বেন দ্রষ্টুং শীলং যস্য স প্রশমগুণদর্শী||১৮||

Adhikarana 18 (19) · Śloka 19

নানৃতং ব্রূযাত্, নান্যস্বমাদদীত, নান্যস্ত্রিযমভিলষেন্নান্যশ্রিযং, ন বৈরং রোচযেত্, ন কুর্যাত্ পাপং, ন পাপেঽপি পাপী স্যাত্, নান্যদোষান্ ব্রূযাত্, নান্যরহস্যমাগমযেন্, নাধার্মিকৈর্ন নরেন্দ্রদ্বিষ্টৈঃ সহাসীত নোন্মত্তৈর্ন পতিতৈর্ন ভ্রূণহন্তৃভির্ন ক্ষুদ্রৈর্ন দুষ্টৈঃ, ন দুষ্টযানান্যারোহেত, ন জানুসমং কঠিনমাসনমধ্যাসীত, নানাস্তীর্ণমনুপহিতমবিশালমসমং বা শযনং প্রপদ্যেত, ন গিরিবিষমমস্তকেষ্বনুচরেত্, ন দ্রুমমারোহেত্, ন জলোগ্রবেগমবগাহেত, ন কুলচ্ছাযামুপাসীত , নাগ্ন্যুত্পাতমভিতশ্চরেত্, নোচ্চৈর্হসেত্, ন শব্দবন্তং মারুতং মুঞ্চেত্, নানাবৃতমুখো জৃম্ভাং ক্ষবথুং হাস্যং বা প্রবর্তযেত্, ন নাসিকাং কুষ্ণীযাত্, ন দন্তান্ বিঘট্টযেত্, ন নখান্ বাদযেত্, নাস্থীন্যভিহন্যাত্, ন ভূমিং বিলিখেত্, ন ছিন্দ্যাত্তৃণং, ন লোষ্টং মৃদ্নীযাত্, ন বিগুণমঙ্গৈশ্চেষ্টেত, জ্যোতীংষ্যনিষ্টমমেধ্যমশস্তং চ নাভিবীক্ষেত, ন হুঙ্কুর্যাচ্ছবং , ন চৈত্যধ্বজগুরুপূজ্যাশস্তচ্ছাযামাক্রামেত্, ন ক্ষপাস্বমরসদনচৈত্যচত্বরচতুষ্পথোপবনশ্মশানাঘাতনান্যাসেবেত , নৈকঃ শূন্যগৃহং ন চাটবীমনুপ্রবিশেত্, ন পাপবৃত্তান্ স্ত্রীমিত্রভৃত্যান্ ভজেত, নোত্তমৈর্বিরুধ্যেত, নাবরানুপাসীত, ন জিহ্মং রোচযেত্, নানার্যমাশ্রযেত্, ন ভযমুত্পাদযেত্, ন সাহসাতিস্বপ্নপ্রজাগরস্নানপানাশনান্যাসেবেত, নোর্ধ্বজানুশ্চিরং তিষ্ঠেত্, ন ব্যালানুপসর্পেন্ন দংষ্ট্রিণো ন বিষাণিনঃ, পুরোবাতাতপাবশ্যাযাতিপ্রবাতাঞ্জহ্যাত্, কলিং নারভেত, নাসুনিভৃতোঽগ্নিমুপাসীত নোচ্ছিষ্টঃ, নাধঃ কৃত্বা প্রতাপযেত্, নাবিগতক্লমো নানাপ্লুতবদনো ন নগ্ন উপস্পৃশেত্, ন স্নানশাট্যা স্পৃশেদুত্তমাঙ্গং, ন কেশাগ্রাণ্যভিহন্যাত্, নোপস্পৃশ্য তে এব বাসসী বিভৃযাত্, নাস্পৃষ্ট্বা রত্নাজ্যপূজ্যমঙ্গলসুমনসোঽভিনিষ্ক্রামেত্, ন পূজ্যমঙ্গলান্যপসব্যং গচ্ছেন্নেতরাণ্যনুদক্ষিণম্||১৯||

নানৃতং ব্রূযাদিত্যস্য রাজযক্ষ্মণি “কাকাংস্তিত্তিরিশব্দেন” (চি. অ.৮) ইত্যাদ্যযথাভাষণোপদেশেন বিরোধো ন বাচ্যঃ, যতঃ পরাপকারফলমসত্যভাষণমনৃতব্যাহারদোষেণ স্পৃশ্যতে, নতু পরস্য জীবনার্থমন্যথাভাষণম্; উক্তং চ- “প্রাণাত্যযে সর্বধনাপহারে পঞ্চানৃতান্যাহুরপাতকানি”| আগমযেত্ বুধ্যেত| অধার্মিকসঙ্গনিষেধেনৈব পতিতাদিসঙ্গনিষেধে লব্ধে পুনস্তদভিধানং বিশেষপ্রতিষেধার্থম্| ভ্রূণহা গর্ভঘাতকঃ| অনুপহিতম্ অনুপধানং গণ্ডুকাদিরহিতম্| ন দ্রুমমারোহেদিতি সামান্যো বিধিঃ, অস্য চ বিশেষেণ রসাযনবক্ষ্যমাণামলকীবৃক্ষারোহণোপদেশেন মহাফলেন বাধা ভবত্যেব| কুষ্ণীযাত্ বিঘট্টযেত্| ইহ সদ্বৃত্তোপদেশে যত্র ন নখান্ বাদযেদিত্যাদৌ সাক্ষাদ্দৃষ্টমদৃষ্টং বা ফলং ন দৃশ্যতে তত্রাপ্যদৃষ্টফলং বচনপ্রামাণ্যাদেব বোদ্ধব্যম্| ন শবং হুঙ্কুর্যাদিত্যত্রাগমঃ- “যঃ শবং হুঙ্করোতি তেন সোমো বহির্নিরস্তো ভবতি” ইতি| চৈত্যো গ্রামপ্রধানতরুঃ, আঘাতনং বধস্থানম্| অবরা নীচাঃ| জিহ্মং কুটিলম্| আরাদ্দূরাত্ পাপেভ্যো যাত আর্যঃ, তদ্বিপরীতোঽনার্যঃ| অতিশব্দঃ স্বপ্নাদিভিঃ সহ প্রত্যেকমভিসম্বধ্যতে| ইহ চ প্রকরণে সাহসনক্তদধিভোজনাদীনাং যেষাং প্রকরণান্তর এব নিষেধঃ কৃতস্তানি পুনর্নিষিধ্যন্তে প্রকরণবশাদেব, প্রকরণপ্রাপ্তো হ্যর্থঃ প্রাগুক্তোঽপি পুনরভিধীযমানঃ প্রকৃতগ্রন্থস্য ন্যূনতামুদস্যতি, পুনরভিধীযমানার্থগৌরবং চ দর্শযতি, ন পুনরুক্তদোষমাবহতি| যদুক্তম্- “অধিকরণবশাদ্দার্ঢ্যাদ্গুণদোষপ্রাপ্তিতোঽর্থসম্বন্ধাত্| স্তুত্যর্থং সংশযতঃ শিষ্যধিযাং চাভিবৃদ্ধ্যর্থম্|| তন্ত্রে স্যাত্ পুনরুক্তং পুনরুক্তং নেষ্যতে তদ্ধি” ইতি| ঊর্ধ্বজানুঃ দণ্ডাযমানঃ| ব্যালাঃ সর্পাঃ| অসুনিভৃতঃ অসমাহিতঃ, নাধঃকৃত্বা অগ্নিমিতি সম্বন্ধঃ| তে এব বাসসী স্নানবাসসীত্যর্থঃ, যদি বা স্নানকালাত্ পূর্বং ধৃতে| অপসব্যং বামম্||১৯||

Adhikarana 19 (20) · Śloka 20

নারত্নপাণির্নাস্নাতো নোপহতবাসা নাজপিত্বা নাহুত্বা দেবতাভ্যো নানিরূপ্য পিতৃভ্যো নাদত্ত্বা গুরুভ্যো নাতিথিভ্যো নোপাশ্রিতেভ্যো নাপুণ্যগন্ধো নামালী নাপ্রক্ষালিতপাণিপাদবদনো নাশুদ্ধমুখো নোদঙ্মুখো ন বিমনা নাভক্তাশিষ্টাশুচিক্ষুধিতপরিচরো ন পাত্রীষ্বমেধ্যাসু নাদেশে নাকালে নাকীর্ণে নাদত্ত্বাঽগ্রমগ্নযে নাপ্রোক্ষিতং প্রোক্ষণোদকৈর্ন মন্ত্রৈরনভিমন্ত্রিতং ন কুত্সযন্ন কুত্সিতং ন প্রতিকূলোপহিতমন্নমাদদীত, ন পর্যুষিতমন্যত্র মাংসহরিতকশুষ্কশাকফলভক্ষ্যেভ্যঃ, নাশেষভুক্ স্যাদন্যত্র দধিমধুলবণসক্তুসর্পিভ্যঃ, ন নক্তং দধি ভুঞ্জীত, ন সক্তূনেকানশ্নীযান্ন নিশি ন ভুক্ত্বা ন বহূন্ন দ্বির্নোদকান্তরিতাত্, ন ছিত্ত্বা দ্বিজৈর্ভক্ষযেত্||২০||

অনিরূপ্য অনিবেদ্য| আকীর্ণে বহুজনাকীর্ণে| অন্নস্য প্রোক্ষণাভিমন্ত্রণানি বেদে বোদ্ধব্যানি| কুত্সিতং স্বরূপত এব কদর্থত্বেন নিন্দিতম্| হরিতকম্ আর্দ্রকাদি, শুষ্কশাকং শুষ্কপত্রাদি, ভক্ষ্যা মোদকাদযঃ| নাশেষভুক্ স্যাত্ নিঃশেষভোজী ন স্যাদিত্যর্থঃ| নক্তং দধিভোজননিষেধে আগমঃ- “দিবা কপিত্থে বসতি রাত্রৌ দধ্নি চ সক্তুষু| অলক্ষ্মীঃ কলহাধারা কোবিদারে কৃতালযা” ইতি| একানিতি ঘৃতশর্করারহিতান্| নোদকান্তরিতান্ নোদকমন্তরা পীত্বেত্যর্থঃ||২০||

Adhikarana 20 (21) · Śloka 21

নানৃজুঃ ক্ষুযান্নাদ্যান্ন শযীত, ন বেগিতোঽন্যকার্যঃ স্যাত্, ন বায্বগ্নিসলিলসোমার্কদ্বিজগুরুপ্রতিমুখং নিষ্ঠীবিকা(বাত)বর্চোমূত্রাণ্যুত্সৃজেত্, ন পন্থানমবমূত্রযেন্ন জনবতি নান্নকালে, ন জপহোমাধ্যযনবলিমঙ্গলক্রিযাসু শ্লেষ্মসিঙ্ঘাণকং মুঞ্চেত্||২১||

নাদ্যাদনৃজুঃ, ন শযীতানৃজুরিতি চ যোজ্যম্||২১||

Adhikarana 21 (22) · Śloka 22

ন স্ত্রিযমবজানীত, নাতিবিশ্রম্ভযেত্, ন গুহ্যমনুশ্রাবযেত্, নাধিকুর্যাত্| ন রজস্বলাং নাতুরাং নামেধ্যাং নাশস্তাং নানিষ্টরূপাচারোপচারাং নাদক্ষাং নাদক্ষিণাং নাকামাং নান্যকামাং নান্যস্ত্রিযং নান্যযোনিং নাযোনৌ ন চৈত্যচত্বরচতুষ্পথোপবনশ্মশানাঘাতনসলিলৌষধিদ্বিজগুরুসুরালযেষু ন সন্ধ্যযোর্নাতিথিষু নাশুচির্নাজগ্ধভেষজো নাপ্রণীতসঙ্কল্পো নানুপস্থিতপ্রহর্ষো নাভুক্তবান্নাত্যশিতো ন বিষমস্থো ন মূত্রোচ্চারপীডিতো ন শ্রমব্যাযামোপবাসক্লমাভিহতো নারহসি ব্যবাযং গচ্ছেত্||২২||

নাতিবিশ্রম্ভযেত্ নাতিপ্রশ্রযবতীং কুর্যাত্| নাধিকুর্যান্ ন সর্বত্রাধিকৃতাং কুর্যাত্| অশস্তাং কুষ্ঠাদিসম্বন্ধেন| নান্যযোনিমিত্যস্যান্তে অভিগচ্ছেত্ ইতি শেষঃ, অন্যযোনিঃ অসবর্ণা| ওষধ্যাদিভিরালযশব্দঃ সম্বধ্যতে| নাতিথিষ্বিতি ন নিষিদ্ধাসু মৈথুনং প্রতিপত্পূর্ণিমাপ্রভৃতিষু| অজগ্ধভেষজঃ অনুপযুক্তবৃষ্যভেষজঃ| অনুপস্থিতপ্রহর্ষঃ অজাতধ্বজোচ্ছ্রাযঃ| অরহসি অবিজনে||২২||

Adhikarana 22 (23-24) · Śloka 24

ন সতো ন গুরূন্ পরিবদেত্, নাশুচিরভিচারকর্মচৈত্যপূজ্যপূজাধ্যযনমভিনির্বর্তযেত্||২৩|| ন বিদ্যুত্স্বনার্তবীষু নাভ্যুদিতাসু দিক্ষু নাগ্নিসম্প্লবে ন ভূমিকম্পে ন মহোত্সবে নোল্কাপাতে ন মহাগ্রহোপগমনে ন নষ্টচন্দ্রাযাং তিথৌ ন সন্ধ্যযোর্নামুখাদ্গুরোর্নাবপতিতং নাতিমাত্রং ন তান্তং ন বিস্বরং নানবস্থিতপদং নাতিদ্রুতং ন বিলম্বিতং নাতিক্লীবং নাত্যুচ্চৈর্নাতিনীচৈঃ স্বরৈরধ্যযনমভ্যস্যেত্||২৪||

অভ্যুদিতাসু দিক্ষু দাহবতীষু দিক্ষু| মহাগ্রহোপগমনং চন্দ্রসূর্যগ্রহণম্| অবপতিতং হীনবর্ণম্| তান্তং রূক্ষস্বরম্| অতিক্লীবম্ অতিবিলম্বিতোচ্চারণম্||২৩-২৪||

Adhikarana 23 (25) · Śloka 25

নাতিসমযং জহ্যাত্, ন নিযমং ভিন্দ্যাত্, ন নক্তং নাদেশে চরেত্, ন সন্ধ্যাস্বভ্যবহারাধ্যযনস্ত্রীস্বপ্নসেবী স্যাত্, ন বালবৃদ্ধলুব্ধমূর্খক্লিষ্টক্লীবৈঃ সহ সখ্যং কুর্যাত্, ন মদ্যদ্যূতবেশ্যাপ্রসঙ্গরুচিঃ স্যাত্, ন গুহ্যং বিবৃণুযাত্, ন কঞ্চিদবজানীযাত্, নাহম্মানী স্যান্নাদক্ষো নাদক্ষিণো নাসূযকঃ, ন ব্রাহ্মণান্ পরিবদেত্, ন গবাং দণ্ডমুদ্যচ্ছেত্, ন বৃদ্ধান্ন গুরূন্ন গণান্ন নৃপান্ বাঽধিক্ষিপেত্, ন চাতিব্রূযাত্, ন বান্ধবানুরক্তকৃচ্ছ্রদ্বিতীযগুহ্যজ্ঞান্ বহিষ্কুর্যাত্||২৫||

অতিসমযো মিলিত্বা বহুভিঃ কৃতো নিযমঃ| ন সন্ধ্যাস্বিত্যাদৌ পুনঃ স্ত্রীনিষেধঃ সন্ধ্যাসু যাবদকর্তব্যস্য ন্যূনতাপরিহারার্থমুক্তঃ, পূর্বং তু স্ত্রী যথা ন সেব্যা তন্নিখিলেনোপদিশতা ন সন্ধ্যযোরিত্যুক্তম্, ইতি প্রকরণভেদান্ন পৌনরুক্ত্যম্| ক্লীবো হীনসত্ত্বঃ| ক্লিষ্টো নিন্দিতো রোগাদিনা| গণান্ মিলিতান্| কৃচ্ছ্রদ্বিতীয আপদি সহাযঃ| বহিষ্কুর্যাত্ অবজানীযাত্||২৫||

Adhikarana 24 (26) · Śloka 26

নাধীরো নাত্যুচ্ছ্রিতসত্ত্বঃ স্যাত্, নাভৃতভৃত্যঃ, নাবিশ্রব্ধস্বজনঃ, নৈকঃ সুখী, ন দুঃখশীলাচারোপচারঃ, ন সর্ববিশ্রম্ভী, ন সর্বাভিশঙ্কী, ন সর্বকালবিচারী||২৬||

নৈকঃ সুখী স্যাদিতি ন সুখহেতূন্যাম্রফলাদীন্যেক এবাবিভজ্যোপযুঞ্জ্যাদিত্যর্থঃ| শীলং স্বাভাবিকং বৃত্তম্, আচারঃ শাস্ত্রোপদেশানুরূপো ব্যবহারঃ, উপচারঃ পরিচ্ছদঃ, এতেষাং চ দুঃখত্বং দুঃখহেতুত্বাত্| সর্ববিশ্রম্ভী সর্বেষু বিশ্বাসী||২৬||

Adhikarana 25 (27) · Śloka 27

ন কার্যকালমতিপাতযেত্, নাপরীক্ষিতমভিনিবিশেত্, নেন্দ্রিযবশগঃ স্যাত্, ন চঞ্চলং মনোঽনুভ্রামযেত্, ন বুদ্ধীন্দ্রিযাণামতিভারমাদধ্যাত্, ন চাতিদীর্ঘসূত্রী স্যাত্, ন ক্রোধহর্ষাবনুবিদধ্যাত্, ন শোকমনুবসেত্, ন সিদ্ধাবুত্সেকং যচ্ছেন্নাসিদ্ধৌ দৈন্যং, প্রকৃতিমভীক্ষ্ণং স্মরেত্, হেতুপ্রভাবনিশ্চিতঃ স্যাদ্ধেত্বারম্ভনিত্যশ্চ, ন কৃতমিত্যাশ্বসেত্, ন বীর্যং জহ্যাত্, নাপবাদমনুস্মরেত্||২৭||

চঞ্চলমিতি ক্রিযাবিশেষণং, যদি বা মনোবিশেষণম্| বুদ্ধেরিন্দ্রিযাণাং বুদ্ধীন্দ্রিযাণাম্| অতিদীর্ঘসূত্রী শতৈকবিনিপাতাশঙ্কী, কিংবা দীর্ঘসূত্রী চিরক্রিযঃ| ন শোকমনুবসেদিতি ন চিরং শোকবশগঃ স্যাত্| উত্সেকম্ অতিগর্বম্ | প্রকৃতিম্ উত্পত্তিকারণং স্মরেত্; প্রকৃতিং পঞ্চভূতসমুদাযলক্ষণামনিত্যাং স্মরন্ন রাগদ্বেষাদিভিরভিভূযতে| হেতুপ্রভাবনিশ্চিত ইতি অস্তি শুভাশুভহেতূনাং শুভাশুভফলসম্বন্ধ ইতি নিশ্চযমুপেযাত্, নাত্র কথং তাবান্ স্যাদিত্যর্থঃ| হেত্বারম্ভনিত্যঃ শুভহেতুযো(যা)গাদ্যারম্ভপরঃ||২৭||

Adhikarana 26 (28) · Śloka 28

নাশুচিরুত্তমাজ্যাক্ষততিলকুশসর্ষপৈরগ্নিং জুহুযাদাত্মানমাশীর্ভিরাশাসানঃ, অগ্নির্মে নাপগচ্ছেচ্ছরীরাদ্বাযুর্মে প্রাণানাদধাতু বিষ্ণুর্মে বলমাদধাতু ইন্দ্রো মে বীর্যং শিবা মাং প্রবিশন্ত্বাপ আপোহিষ্ঠেত্যপঃ স্পৃশেত্, দ্বিঃ পরিমৃজ্যোষ্ঠৌ পাদৌ চাভ্যুক্ষ্য মূর্ধনি খানি চোপস্পৃশেদদ্ভিরাত্মানং হৃদযং শিরশ্চ||২৮||

উত্তমাজ্যং গোসর্পিঃ| আশীর্ভিরাশাসান ইতি চ্ছেদঃ| ‘অগ্নির্মে’ ইত্যাদিনা ‘আপোহিষ্ঠা’ ইত্যন্তঃ স্নানমন্ত্রঃ||২৮||

Adhikarana 27 (29) · Śloka 29

ব্রহ্মচর্যজ্ঞানদানমৈত্রীকারুণ্যহর্ষোপেক্ষাপ্রশমপরশ্চ স্যাদিতি||২৯||

মৈত্রী সর্বভূতেষ্বাত্মনীবাপ্রতিকূলা প্রবৃত্তিঃ| ননু মৈত্রীপরঃ স্যাদিতি বিরুদ্ধমেতত্, যেন শাস্ত্রকার এবাযং দিগ্ধবিদ্ধস্বযম্মৃতাদিমাংসপরিত্যাগেন বযস্থত্বাদিগুণযুক্তানাং মৃগাদীনাং সদ্যস্কং মাংসং সেব্যত্বেনোপদিশন্ সাক্ষান্মৈত্রীবিরুদ্ধাং হিংসামেবাহ; নৈবং, রাগত এব প্রাণিনাং হিংসাপূর্বকমাংসভক্ষণে প্রাপ্তেঽযমাযুর্বেদোপদেষ্টা মাংসস্য ক্বচিদ্রোগে কস্যচিদ্ধিতত্বং ক্বচিচ্চাহিতত্বমুপদিশতি, নতু মাংসভক্ষণং হিংসাং বা বিদধাতি; ন হ্যযং মদিরাযা অপি স্বস্থবৃত্তে রোগিবৃত্তে বা হিতত্বমুপদিশন্ মদিরাপানং প্রত্যুপদেষ্টা ভবতি; এবং চ রোগাধিকারে রাজযক্ষ্মাদৌ মাংসোপদেশস্তথা শরদৃতুচর্যাদৌ “লাবান্ কপিঞ্জলানেণান্” (সূ.অ.৬) ইত্যাদিগ্রন্থো লাবাদিমাংসহিতত্বোপদেশার্থো ন হিংসাবিধাযকঃ; তেন রোগিণঃ স্বস্থাশ্চ হিংসাফলভাজো ভবন্ত্যেব; যথা- “শ্যেনেনাভিচরন্ যজেত” ইত্যত্রাভিচারস্য কামত এব প্রাপ্তত্বাচ্ছ্যেনস্যাভিচারসাধনত্বমাত্রমেব বিধির্ব্রূতে, তেন শ্যেনেনাভিচারকরণেঽধর্মো ভবত্যেব; অযং ত্বত্র বিশেষঃ- যদি হিংসোপার্জিতমাংসোপযোগং বিনা পুরুষো ন জীবতি, অতো হিংসাং করোতি, তদা “সর্বত্রাত্মানং গোপাযীত” ইতি বেদবচনবিহিতত্বাত্তথাবিধহিংসা ন প্রত্যবাযহেতুঃ, জীবনোপাযান্তরসম্ভবে তু পুষ্ট্যাদিপ্রযোজনা হিংসা প্রত্যবাযহেতুরেব; কিঞ্চ ভবতু বাঽঽযুর্বেদবিহিতা হিংসা, তথাঽপি হিংসা দোষার্থমুচ্যতে; ন হ্যাযুর্বেদবিধযো ধর্মসাধনমেবোপদিশন্তি, কিং তর্হ্যারোগ্যসাধনং “ধাতুসাম্যক্রিযা চোক্তা তন্ত্রস্যাস্য প্রযোজনম্” (সূ.অ.১) ইত্যুক্তেঃ||২৯||

Adhikarana 28 (30-33) · Śloka 33

তত্র শ্লোকাঃ- পঞ্চপঞ্চকমুদ্দিষ্টং মনো হেতুচতুষ্টযম্| ইন্দ্রিযোপক্রমেঽধ্যাযে সদ্বৃত্তমখিলেন চ||৩০|| স্বস্থবৃত্তং যথোদ্দিষ্টং যঃ সম্যগনুতিষ্ঠতি| স সমাঃ শতমব্যাধিরাযুষা ন বিযুজ্যতে||৩১|| নৃলোকমাপূরযতে যশসা সাধুসম্মতঃ| ধর্মার্থাবেতি ভূতানাং বন্ধুতামুপগচ্ছতি||৩২|| পরান্ সুকৃতিনো লোকান্ পুণ্যকর্মা প্রপদ্যতে| তস্মাদ্বৃত্তমনুষ্ঠেযমিদং সর্বেণ সর্বদা||৩৩||

সঙ্গ্রহে হেতুচতুষ্টযং সমাতিহীনমিথ্যাযোগাঃ| সমাঃ শতং বর্ষশতং; যদ্যপি সদ্বৃত্তানুষ্ঠানেঽপি দৈববিপর্যযেণান্তরা মরণং ব্যাধযো বা ভবন্তি, তথাঽপি প্রাধান্যাদ্দৈবকৃতব্যাধেঃ পুরুষাপরাধাবিষযত্বাদুক্তং সমাঃ শতমিত্যাদি; যদুক্তং- “পরিহার্যাণি যত্নেন সদা পরিহরন্নরঃ| ভবত্যনৃণতাং প্রাপ্তঃ সাধূনামিহ পণ্ডিতঃ” (সূ.অ.২৮) ইতি||৩০-৩৩||

Adhikarana 29 (34) · Śloka 34

যচ্চান্যদপি কিঞ্চিত্ স্যাদনুক্তমিহ পূজিতম্| বৃত্তং তদপি চাত্রেযঃ সদৈবাভ্যনুমন্যতে||৩৪||

অনুক্তসদ্বৃত্তোপসঙ্গ্রহার্থমাহ- যচ্চান্যদপীত্যাদি| বৃত্তম্ আচারঃ| ইহাযুর্বেদেঽনুক্তমপ্যাচারোপদেশকেষু ধর্মশাস্ত্রেষু পূজিতং, যথা- “নাকস্মাদ্বিকচো ভবেন্ন পরশস্যেষু গাং চরন্তীং ধাবন্তীং বা পরস্য ব্রূযাত্” ইত্যাদি, সর্বমাত্রেযস্যানুমতং সাক্ষাদাযুর্বেদাবিষযত্বেন গ্রন্থবিস্তরভযাচ্চ ন প্রোক্তমিত্যভিপ্রাযঃ|||৩৪||

Adhikarana puShpikA · Śloka 2

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে ইন্দ্রিযোপক্রমণীযো নামাষ্টমোঽধ্যাযঃ||৮|| ইতি স্বস্থচতুষ্কো দ্বিতীযঃ||২||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে দ্বিতীযে স্বস্থচতুষ্কে ইন্দ্রিযোপক্রমণীযো নামাষ্টমোঽধ্যাযঃ||৮||