9. khuḍḍākacatuṣpādō'dhyāyaḥ

Adhikarana 1 (1-2) · Śloka 2

অথাতঃ খুড্ডাকচতুষ্পাদমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

স্বস্থচতুষ্কানন্তরং স্বস্থাতুরযোরুভযোরপি হিতত্বেন নির্দেশচতুষ্কোঽভিধীযতে| স্বস্থাতুরহিতং বৈদ্যভেষজাদি নির্দিশতীতি নির্দেশচতুষ্কঃ, তত্রাপি স্বস্থাতুরহিতেষু প্রধানভূতচিকিত্সাঙ্গবৈদ্যাদিপাদচতুষ্টযাভিধাযকত্বেন খুড্ডাকচতুষ্পাদোঽভিধীযতে| খুড্ডাকশব্দোঽল্পবচনঃ; যথা- খুড্ডিকা গর্ভাবক্রান্তিঃ, অল্পেত্যর্থঃ| বৈদ্যৌষধপরিচারকরোগিণশ্চিকিত্সাযাশ্চত্বারঃ পাদাঃ, চতুষ্পাদং তং খুড্ডাকমভিধেযতযাঽধিকৃত্য কৃতোঽধ্যাযঃ খুড্ডাকচতুষ্পাদঃ| অত্রোত্পন্নস্য তু প্রত্যযস্য “অধ্যাযানুবাকযোর্লুক্ চ” (পা.অ.৫পা.২সূ.৬০) ইতি লুক্| খুড্ডাকত্বং চাস্য বক্ষ্যমাণমহাচতুষ্পাদমপেক্ষ্য||১-২||

Adhikarana 2 (3) · Śloka 3

ভিষগ্দ্রব্যাণ্যুপস্থাতা রোগী পাদচতুষ্টযম্| গুণবত্ কারণং জ্ঞেযং বিকারব্যুপশান্তযে||৩||

অত্র ভিষগাদাবুক্তঃ প্রধানত্বাত্, বক্ষ্যতি হি- “প্রধানং ভিষগত্র তু” ইতি; তদনু ভেষজং, চিকিত্সাযাং প্রধানকারণভূতত্বাত্; তদনু পরিচারকঃ, ভেষজপ্রযোগস্য কল্কক্বাথাদিসাধ্যস্য তদধীনত্বাত্| যদ্যপ্যাতুরাধিকরণমারোগ্যং পাদৈঃ সম্পাদ্যতে , স এব চ বৈদ্যাদীনামুপকার্যঃ, উপকার্যশ্চ প্রধানং ভবতি, তথাঽপীহ ব্যাধিপ্রশমে সাধ্যে যথা বৈদ্যাদিপাদত্রযস্য ব্যাপারো ন তথাঽঽতুরস্যেত্যপ্রাধান্যবিবক্ষযা পশ্চাদুক্তঃ| পাদশ্চতুর্থো ভাগঃ, শ্লোকাদিপাদবদ্বৈদ্যাদিষু পাদসঞ্জ্ঞাকরণেনান্যতরবৈকল্যেনাপি চিকিত্সা ন ভবতীতি দর্শযতি| গুণবদিতি বক্ষ্যমাণ-শ্রুতেপর্যবদাতত্বাদিগুণবত্| ইহ চ বৈদ্যাদযো ব্যাপ্রিযমাণা এব বিকারপ্রশমনে কারণং ভবন্তি, যতঃ কারণত্বং কার্যে ব্যাপারবতামেব ভবতি; তথা হি- দেবদত্তঃ পাচক ইত্যুক্তে তুষবুসপ্রক্ষেপাদিক্রিযযৈব পাকং করোতীতি গম্যতে; এতেন যদুচ্যতে- “চতুর্ণাং ভিষগাদীনাং” ইত্যাদিনা শ্লোকেন বৈদ্যাদীনাং প্রবৃত্তিশ্চিকিত্সা ব্যাধিপ্রশমহেতুরভিধাতব্যা, ইহ তু বৈদ্যাদয এবেতি পূর্বাপরবিরোধঃ; তন্ন ভবতি, ইহ বৈদ্যাদিপ্রবৃত্তের্বৈদ্যাদিগ্রহণেনৈব গ্রহণাত্| চতুর্ণামিত্যাদৌ শ্লোকে বৈদ্যাদীনাং ধর্মিণাং ধর্মরূপাযাশ্চ প্রবৃত্তের্ভেদং পুরস্কৃত্য চিকিত্সাযাঃ ক্রিযারূপাযাঃ কথনম্| এতে বৈদ্যাদযো বিকারশমনে কারণমেবেতি নিযমঃ, ন পুনরেতৈরেব বিকারপ্রশমনমিতি নিযমঃ, যতো বৈদ্যাদীন্ প্রত্যাখ্যাযাপি রোগশান্তির্ভবতি; বক্ষ্যতি হি মহাচতুষ্পাদে- “যে হ্যাতুরাঃ কেবলাদ্ভেষজাদৃতে সমুত্তিষ্ঠন্তে” (সূ.অ.১০) ইত্যাদিনা||৩||

Adhikarana 3 (4) · Śloka 4

বিকারো ধাতুবৈষম্যং, সাম্যং প্রকৃতিরুচ্যতে| সুখসঞ্জ্ঞকমারোগ্যং, বিকারো দুঃখমেব চ||৪||

অত্র বিকারব্যুপশান্তয ইত্যুক্তং, তেন বিকারস্বরূপজ্ঞানার্থমাহ- বিকারো ধাতুবৈষম্যমিত্যাদি| ধাতবো বাতাদযো রসাদযশ্চ তথা রজঃপ্রভৃতযশ্চ, তেষাং বৈষম্যং ব্যবহ্রিযমাণস্বাস্থ্যহেতোঃ স্বমানান্ন্যূনত্বমধিকত্বং বা| সাম্যং ধাতুসাম্যং; প্রকৃতিঃ আরোগ্যম্| উচ্যতেগ্রহণাদ্বৈদ্যকসিদ্ধান্তে হীযং প্রকৃতিবিকারব্যবস্থা, অন্যদর্শনসিদ্ধান্তপরিগ্রহে তু বিকারঃ ষোডশকঃ, প্রকৃতির্গুণানাং সাম্যাবস্থা ভবতীতি দর্শযতি| ননু, রাত্রিদিনভোজনানাং তাসু তাস্ববস্থাসু শ্লেষ্মপ্রকোপাদিনা নিত্যং ধাতুবৈষম্যমস্তি, তত্কুতো ধাতুসাম্যমিত্যাহ- সুখসঞ্জ্ঞকমিত্যাদি| সুখহেতুঃ সুখম্, এবং দুঃখহেতুর্দুঃখং; যতো ন দুঃখং ব্যাধিঃ, তথা হি সতি ন জ্বরাদীনাং ব্যাধিত্বং স্যাত্; অত এব সুশ্রুতেঽপ্যুক্তং- “তত্তু সপ্তবিধে ব্যাধাবুপনিপততি” (সু.সূ. অ.২৪) ইতি; সঞ্জ্ঞকগ্রহণাত্ পরমার্থতোঽসুখমপি লোকে সুখমিতি যদ্ ব্যবহ্রিযতে, তদিহ গৃহ্যত ইতি দর্শযতি; তেন, দিবারাত্রিভোজনাবস্থাদিজনিতং ধাতুবৈষম্যমুদ্বেজকবিকারাকর্তৃত্বেন সুখমিতি ব্যবহ্রিযতে, তেন যো হ্যল্পঃ স নাস্ত্যেবেতি কৃত্বাঽল্পেঽপি ধাতুবৈষম্যে ধাতুসাম্যব্যবহারঃ সিদ্ধো ভবতি; তথা সঞ্জ্ঞকগ্রহণেন লৌকিকসুখং ন পরমার্থতঃ সুখমিতি দর্শযতি, যতো বক্ষ্যতি “সর্বং কারণবদ্দুঃখং” (শা. অ.১) ইত্যাদি; ‘এব চ’ গ্রহণেন দুঃখং পরমার্থতোঽপি দুঃখমেবেতি দর্শযতি, ন সুখমিব ব্যবহারমাত্রেণ| অত্র চ ধাতুবৈষম্যেণ কারণেনোপচারাত্তত্কার্যজ্বরাদযোঽভিধীযন্তে, যতো ধাতুবৈষম্যজো হি বিকারো ন ধাতুবৈষম্যমাত্রং, যদ্বক্ষ্যতি- “স্বধাতুবৈষম্যনিমিত্তজা যে বিকারসঙ্ঘা বহবঃ শরীরে” (সূ. অ.১৯) ইত্যাদি, তথা “বিকৃতিমাপন্না নানাবিধৈর্বিকারৈঃ শরীরমুপতপন্তি” (বি. অ.১) ইত্যাদি, তথা সুশ্রুতেঽপ্যুক্তং- “বাতপিত্তকফশোণিতসন্নিপাতবৈষম্যনিমিত্তাঃ ” (সূ.অ.১) ইতি| অত্র পক্ষে ধাতুবৈষম্যজশ্চেদ্বিকারস্তদা জনিতবিকারং ধাতুবৈষম্যং ক্ব প্রবিশতু; কিং বিকারে, উত আরোগ্যে? ন তাবদারোগ্যে, যতঃ “ইত্যুক্তং কারণং কার্যং ধাতুসাম্যমিহোচ্যতে| ধাতুসাম্যক্রিযা চোক্তা তন্ত্রস্যাস্য প্রযোজনম্” (সূ. অ.১) ইত্যনেন গ্রন্থেনারোগ্যং ধাতুসাম্যমিত্যুক্তং; ন চ রোগে প্রবিশতি, রোগহেতুত্বেনৈব কথিতত্বাত্; অথ মতং ধাতুবৈষম্যং ভবতি, বিকারো ন ভবতীতি; এষা দশা নাস্ত্যেব; যতোঽবশ্যং প্রমাণাধিকো দোষঃ স্বলিঙ্গাধিকো ভবতি, ক্ষীণো বা ক্ষীণস্বলক্ষণ ইতি; ইহ তর্হি ধাতুবৈষম্যমেব বিকারোঽস্তু, এবমযং গ্রন্থোঽপি মুখ্যো ভবতি; ধাতুবৈষম্যজবিকারপ্রতিপাদকস্তু গ্রন্থ আবিষ্কৃততমজ্বরাদিপ্রতিপাদকত্বেন ব্যবস্থাপ্যতাং, তেন ধাতুবৈষম্যং চ ধাতুবৈষম্যজাশ্চ জ্বরাদযো বিকারা ভবন্তি; ধাতুবৈষম্যজাতেষ্বপি হি জ্বরাদিষু ধাতুবৈষম্যরূপতাঽস্ত্যেব; কিঞ্চ স্বমানক্ষীণা দোষাঃ কিঞ্চিদ্বিকারং ন জনযন্তি, ক্ষীণলক্ষণং বৈষম্যমেব পরং যান্তি; বচনং হি- “ক্ষীণা জহতি লিঙ্গং স্বং সমাঃ স্বং কর্ম কুর্বতে” (সূ.অ.৭) ইতি; নাত্র ধাতুবৈষম্যমাত্রং বিকার ইতি ব্রুবতামযং পন্থাঃ; যে তু ধাতুবৈষম্যজো বিকার ইতি ব্যবস্থিতাঃ, তে ত্বজনিতব্যপদেশ্যবিকারং ধাতুবৈষম্যং রাত্রিদিনাবস্থাদিকৃতধাতুবৈষম্যবদল্পত্বেনাব্যপদেশ্যতযা ধাতুসাম্য এব প্রক্ষিপন্তীতি; তিলকালকমষকপ্রভৃতীনাং তু ধাতুবৈষম্যজত্বেনেহ চরকে রোগত্বং সুব্যক্তমেব, দুঃখহেতুত্বং চ তেষাং জ্ঞাতানাং মনোদুঃখকর্তৃত্বেন||৪||

Adhikarana 4 (5) · Śloka 5

চতুর্ণাং ভিষগাদীনাং শস্তানাং ধাতুবৈকৃতে| প্রবৃত্তির্ধাতুসাম্যার্থা চিকিত্সেত্যভিধীযতে||৫||

বিকারলক্ষণানন্তরং বিকারপ্রশমহেতোশ্চিকিত্সাযা লক্ষণমাহ- চতুর্ণামিত্যাদি| চতুর্ণামিতি পদং বৈদ্যাদীনাং মিলিতানামেব গ্রাহকম্| শস্তানামিতি বক্ষ্যমাণশ্রুতে পর্যবদাতত্বমিত্যাদিগুণযোগেন প্রশস্তানাম্| ধাতুবৈকৃতে রোগে চিকিত্সাধিকরণভূতে| ধাতুসাম্যার্থা আরোগ্যকরণার্থেত্যর্থঃ| ধাতুবৈকৃত ইতি পদং স্পষ্টার্থং, যেন ধাতুসাম্যার্থা প্রবৃত্তির্ধাতুবৈকৃতে এব বৈদ্যাদীনাং ভবতি| প্রবৃত্তির্বৈদ্যস্য ইদং কর্তব্যমিদং ন কর্তব্যমিত্যাদিকোপদেশরূপা, দ্রব্যস্য তূপযোগে সতি স্বকার্যারম্ভরূপা, পরিচারকপ্রবৃত্তির্ভেষজসংস্করণাতুরপরিচর্যাদিরূপা, আতুরপ্রবৃত্তির্বৈদ্যোক্তানুষ্ঠানব্যাধিস্বরূপকথনাদিকা||৫||

Adhikarana 5 (6) · Śloka 6

শ্রুতে পর্যবদাতত্বং বহুশো দৃষ্টকর্মতা| দাক্ষ্যং শৌচমিতি জ্ঞেযং বৈদ্যে গুণচতুষ্টযম্||৬||

পূর্বসূত্রিতবৈদ্যগুণান্ দর্শযতি- শ্রুত ইত্যাদি| শ্রুতমাদৌ শ্রেষ্ঠবৈদ্যগুণত্বাত্, এবমন্যত্রাপি ব্যাখ্যেযম্| পর্যবদাতত্বং বিশুদ্ধজ্ঞানবত্ত্বং গুরুশাস্ত্রসেবনাদিনা| শৌচমদৃষ্টদ্বারোপকারকম্| জিতহস্তত্বাদযোঽপরেঽপি বৈদ্যগুণা অত্রৈব গুণচতুষ্টযেঽন্তর্ভাবনীযাঃ||৬||

Adhikarana 6 (7) · Śloka 7

বহুতা তত্রযোগ্যত্বমনেকবিধকল্পনা| সম্পচ্চেতি চতুষ্কোঽযং দ্রব্যাণাং গুণ উচ্যতে||৭||

বহুতা ভেষজগুণঃ, অল্পং হি ভেষজং গুণবদপ্যবিদ্যমানমিব, অসাধকত্বাত্| তত্র প্রতিকর্তব্যে ব্যাধৌ যোগ্যত্বং তত্রযোগ্যত্বম্| অনেকবিধকল্পনা নানাপ্রকারস্বরসাদ্যুপযুক্তকল্পনাযোগ্যত্বমিত্যর্থঃ; যতঃ প্রাণিনঃ কেচিত্ স্বরসদ্বিষঃ, কেচিত্ কল্কদ্বিষ এবমাদি; এবং ব্যাধিস্বভাবাদপি কাচিত্ কল্পনা হিতা ভবতি, যথা- জ্বরে কষায ইত্যাদি; তেনানেককল্পনাযোগ্যত্বাদ্যদ্যত্র যুজ্যতে তত্তত্র ক্রিযতে| সম্পদিতি ক্রিমিসলিলাদ্যনুপহতত্বেন রসাদিসম্পত্||৭||

Adhikarana 7 (8) · Śloka 8

উপচারজ্ঞতা দাক্ষ্যমনুরাগশ্চ ভর্তরি| শৌচং চেতি চতুষ্কোঽযং গুণঃ পরিচরে জনে||৮||

উপচারজ্ঞতা যূষরসাদিকরণসংবাহনস্বাপনাদিজ্ঞতা||৮||

Adhikarana 8 (9) · Śloka 9

স্মৃতির্নির্দেশকারিত্বমভীরুত্বমথাপি চ| জ্ঞাপকত্বং চ রোগাণামাতুরস্য গুণাঃ স্মৃতাঃ||৯||

নির্দেশকারিত্বং বৈদ্যোপদিষ্টার্থকর্তৃত্বম্| অভীরুত্বং গুণঃ, ভীরুত্বস্য রোগকর্তৃত্বাত্; যদুক্তং- “বিষাদো রোগবর্ধনানাং” (সূ.অ.২৫) ইতি| অথাপি চেতিশব্দেন ক্বচিদ্ভীরুত্বমপ্যস্মৃতিরপি গুণো ভবতীতি দর্শযতি; যথোন্মাদে “সর্পেণোদ্ধৃতদংষ্ট্রেণ” ইত্যাদিনা ত্রাসনমুক্তং চিকিত্সাযাং, তত্র যদ্যপ্যভীরুঃ স্যাদ্রোগী তদা চিকিত্সা ন ফলতি; অস্মৃতিস্তু জ্বরবেগাগমনকালাস্মরণেঽভিপ্রেতা, যদুক্তং- “জ্বরবেগং চ কালং চ চিন্তযঞ্জ্বর্যতে তু যঃ| তস্যেষ্টৈশ্চ বিচিত্রৈশ্চ প্রযোগৈর্নাশযেত্ স্মৃতিম্” (চি.অ.৩) ইতি||৯||

Adhikarana 9 (10) · Śloka 10

কারণং ষোডশগুণং সিদ্ধৌ পাদচতুষ্টযম্| বিজ্ঞাতা শাসিতা যোক্তা প্রধানং ভিষগত্র তু||১০||

এবং বৈদ্যাদীনাং চতুর্ণামপি কারণত্বে সিদ্ধে বৈদ্যস্য প্রাধান্যং দর্শযতি- কারণমিত্যাদি| বিজ্ঞাতা ঔষধস্য| শাসিতা পরিচারকস্য- এবং কুর্বেবং মা কুর্বিতি| যোক্তা আতুরস্য| এতেন বৈদ্যপরাধীনা ভেষজাদীনাং প্রবৃত্তিঃ, বৈদ্যস্তু স্বতন্ত্রঃ, ততশ্চ বৈদ্যঃ প্রধানমিতি বাক্যার্থঃ||১০||

Adhikarana 10 (11-12) · Śloka 12

পক্তৌ হি কারণং পক্তুর্যথা পাত্রেন্ধনানলাঃ| বিজেতুর্বিজযে ভূমিশ্চমূঃ প্রহরণানি চ||১১|| আতুরাদ্যাস্তথা সিদ্ধৌ পাদাঃ কারণসঞ্জ্ঞিতাঃ| বৈদ্যস্যাতশ্চিকিত্সাযাং প্রধানং কারণং ভিষক্||১২||

এতদেবাভ্যর্হিতত্বাদ্দৃষ্টান্তদ্বযেন দর্শযতি- পক্তাবিত্যাদি| পক্তৌ পাকে কর্তব্যে, পাত্রস্থানীয আতুরঃ, পরিচারক ইন্ধনরূপঃ, অনলো ভেষজরূপঃ| কারণমিতি উপকরণম্| ভূমিঃ যুদ্ধানুগুণো দেশঃ| অত্রাপি পূর্ববদেবাতুরাদিস্থানীযত্বং ভূম্যাদীনাম্||১১-১২||

Adhikarana 11 (13) · Śloka 13

মৃদ্দণ্ডচক্রসূত্রাদ্যাঃ কুম্ভকারাদৃতে যথা| নাবহন্তি গুণং বৈদ্যাদৃতে পাদত্রযং তথা||১৩||

সম্প্রতি ব্যতিরেকদৃষ্টান্তেন বৈদ্যপ্রাধান্যং দর্শযতি- মৃদ্দণ্ডেত্যাদিনা| নাবহন্তি ন নিষ্পাদযন্তি| গুণং সাধ্যমিত্যর্থঃ||১৩||

Adhikarana 12 (14) · Śloka 15

গন্ধর্বপুরবন্নাশং যদ্বিকারাঃ সুদারুণাঃ| যান্তি যচ্চেতরে বৃদ্ধিমাশূপাযপ্রতীক্ষিণঃ||১৪|| সতি পাদত্রযে জ্ঞাজ্ঞৌ ভিষজাবত্র কারণম্|১৫|

অন্বযেন ব্যতিরেকেণ চ পৃথগ্দৃষ্টান্তং দর্শযিত্বা কৌশলেনৈকত্রৈব দৃষ্টান্তে গন্ধর্বপুরেত্যাদিনাঽন্বযে গুণং ব্যতিরেকে চ দোষং দর্শযতি| একত্রপক্ষে নাশমাশু যান্তীতি সম্বন্ধঃ, ইতরে অপরেঽনভিজ্ঞবৈদ্যোপক্রান্তা গন্ধর্বপুরবদাশু বৃদ্ধিং যান্তীতি সম্বন্ধঃ| উপাযপ্রতীক্ষিণ ইতি বৃদ্ধৌ শান্তৌ চ| আশু বিকারশান্তৌ জ্ঞো ভিষক্কারণম্, আশুবৃদ্ধৌ চাজ্ঞঃ||১৪||-

Adhikarana 13 (15-16) · Śloka 16

বরমাত্মা হুতোঽজ্ঞেন ন চিকিত্সা প্রবর্তিতা||১৫|| পাণিচারাদ্যথাঽচক্ষুরজ্ঞানাদ্ভীতভীতবত্| নৌর্মারুতবশেবাজ্ঞো ভিষক্ চরতি কর্মসু||১৬||

অজ্ঞবৈদ্যস্য চিকিত্সাপ্রবৃত্তিং নিষেধযতি- বরমিত্যাদি| ন বরম্ অনুচিতমেব| প্রবর্তিতেতিভাষযা অজ্ঞবৈদ্যেন বলাত্ কৃতেতি দর্শযতি| পাণিচারাত্ হস্তপরামর্শাত্| কর্মসু চিকিত্সাসু||১৫-১৬||

Adhikarana 14 (17) · Śloka 17

যদৃচ্ছযা সমাপন্নমুত্তার্য নিযতাযুষম্| ভিষঙ্মানী নিহন্ত্যাশু শতান্যনিযতাযুষাম্||১৭||

যদৃচ্ছযেতি বৈদ্যসম্যগ্জ্ঞানপূর্বকপ্রবৃত্তিং বিনা কর্মবশাদিত্যর্থঃ| সমাপন্নং সম্যগুপক্রান্তম্| নিযতাযুষমিত্যনেনাযুর্বলেনৈব ব্যাধিমুত্তীর্যমাণমিত্যর্থঃ | আত্মানমভিষজং ভিষক্ত্বেন মন্যত ইতি ভিষঙ্মানী| অনিযতাযুষামিতি যত্রাযুঃকারণং বলবত্ কর্ম নাস্তি, তত্র পুরুষকারাপরাধেন বৈদ্যদোষান্মরণং ভবতীতি দর্শযতি||১৭||

Adhikarana 15 (18) · Śloka 18

তস্মাচ্ছাস্ত্রেঽর্থবিজ্ঞানে প্রবৃত্তৌ কর্মদর্শনে| ভিষক্ চতুষ্টযে যুক্তঃ প্রাণাভিসর উচ্যতে||১৮||

শাস্ত্রে শাস্ত্রাবধারণে | অর্থবিজ্ঞানে শাস্ত্রার্থাববোধে| প্রবৃত্তৌ স্বযং কর্মকরণে| যুক্ত উদ্যুক্ত উদ্যোগনিষ্পাদিতগুণপ্রকর্ষ ইতি যাবত্| প্রাণান্ গচ্ছতো ব্যাবর্তযতীতি প্রাণাভিসরঃ||১৮||

Adhikarana 16 (19-23) · Śloka 23

হেতৌ লিঙ্গে প্রশমনে রোগাণামপুনর্ভবে| জ্ঞানং চতুর্বিধং যস্য স রাজার্হো ভিষক্তমঃ||১৯|| শস্ত্রং শাস্ত্রাণি সলিলং গুণদোষপ্রবৃত্তযে| পাত্রাপেক্ষীণ্যতঃ প্রজ্ঞাং চিকিত্সার্থং বিশোধযেত্||২০|| বিদ্যা বিতর্কো বিজ্ঞানং স্মৃতিস্তত্পরতা ক্রিযা| যস্যৈতে ষড্গুণাস্তস্য ন সাধ্যমতিবর্ততে||২১|| বিদ্যা মতিঃ কর্মদৃষ্টিরভ্যাসঃ সিদ্ধিরাশ্রযঃ| বৈদ্যশব্দাভিনিষ্পত্তাবলমেকৈকমপ্যতঃ||২২|| যস্য ত্বেতে গুণাঃ সর্বে সন্তি বিদ্যাদযঃ শুভাঃ| স বৈদ্যশব্দং সদ্ভূতমর্হন্ প্রাণিসুখপ্রদঃ||২৩||

পাত্রাপেক্ষীণীতি গুণবতি পাত্রে সগুণানি, দোষবতি পাত্রে দোষবন্তি ভবন্তীত্যর্থঃ| বিশোধযেত্ সদ্গুরুসচ্ছাস্ত্রসেবাদিভিরিত্যর্থঃ| বিদ্যা বৈদ্যকশাস্ত্রজ্ঞানম্| বিতর্কঃ শাস্ত্রমূল ঊহাপোহঃ| বিজ্ঞানং শাস্ত্রান্তরজ্ঞানং; কিংবা সহজং বিশুদ্ধং জ্ঞানম্| তত্পরতেহ ব্যাধিচিকিত্সাযাং প্রযত্নাতিশযত্বম্| ক্রিযা পুনঃ পুনশ্চিকিত্সাকরণম্| মতিঃ সহজবিশুদ্ধমতিঃ| অভ্যাসঃ কর্মাভ্যাসঃ| সিদ্ধিঃ প্রাযশো ব্যাধিপ্রশমকত্বম্| আশ্রযঃ সদ্গুর্বাশ্রয ইত্যর্থঃ| বৈদ্যশব্দাভিনিষ্পত্তাবিত্যনেন পারমার্থিকবৈদ্যত্বনিষ্পত্তাবিতি দর্শযতি| এত ইত্যনেনৈব লব্ধেঽপি বিদ্যাদয ইতি বচনং পূর্বোক্তগুণব্যুদাসার্থং, তদ্ব্যুদাসশ্চ বিদ্যাদিষ্বেবান্তর্ভাবনীযঃ; এতচ্চ প্রবন্ধেন পৃথক্ পৃথগ্গুণকথনং বৈদ্যস্য গুণোত্পাদনে যত্নাতিশযং কারযিতুং তথা দ্রব্যাদিভ্যঃ পাদেভ্যো বৈদ্যস্যৈব প্রধানতোপদর্শনার্থং; বৈদ্যো হি পাদত্রযং বিগুণমপি কল্পনযা শিক্ষযা মন্ত্রণেন চ সম্পাদ্য চিকিত্সিতুং পারযতি, নতু গুণবদ্বৈদ্যং বিনা দ্রব্যাদযঃ পাদা গুণবন্তোঽপি ক্ষমাঃ||১৯-২৩||

Adhikarana 17 (24-25) · Śloka 25

শাস্ত্রং জ্যোতিঃ প্রকাশার্থং দর্শনং বুদ্ধিরাত্মনঃ| তাভ্যাং ভিষক্ সুযুক্তাভ্যাং চিকিত্সন্নাপরাধ্যতি||২৪|| চিকিত্সিতে ত্রযঃ পাদা যস্মাদ্বৈদ্যব্যপাশ্রযঃ| তস্মাত্ প্রযত্নমাতিষ্ঠেদ্ভিষক্ স্বগুণসম্পদি||২৫||

শাস্ত্রশব্দেন শাস্ত্রাভ্যাসকৃতা মতিঃ, সা হি জ্যোতিঃ বাহ্যালোক ইব, প্রকাশার্থং বস্তূনাং গ্রহণযোগ্যতাং কর্তুমিত্যর্থঃ| দর্শনমিব দর্শনং চক্ষুরিবেত্যর্থঃ| যদ্যপি বুদ্ধিরাত্মন এব ভবতি, তথাঽপ্যাত্মন ইত্যনেন সহজাং বুদ্ধিং দর্শযতি, যতঃ সহজাং বুদ্ধিং বিনা শাস্ত্রজা বুদ্ধির্যা বৈনাযকীত্যভিধীযতে, সা ন সম্যক্চিকিত্সাসমর্থা ভবতীতি| তাভ্যামিতি সহজবিশুদ্ধবুদ্ধিশাস্ত্রাভ্যাং সহজবৈনাযকবুদ্ধিভ্যাম্||২৪-২৫||

Adhikarana 18 (26) · Śloka 26

মৈত্রী কারুণ্যমার্তেষু শক্যে প্রীতিরুপেক্ষণম্| প্রকৃতিস্থেষু ভূতেষু বৈদ্যবৃত্তিশ্চতুর্বিধেতি||২৬||

বৈদ্যেন চ যাদৃশ্যা বুদ্ধ্যা ব্যবহর্তব্যং, তাং দর্শযতি- মৈত্রীত্যাদি| মৈত্রী পূর্বমেব ব্যাকৃতা| আর্তেষু আর্তিযুক্তেষু| কারুণ্যং পরদুঃখপ্রহাণেচ্ছা| শক্যে সাধযিতুং শক্যে, সাধ্যব্যাধিগৃহীত ইতি যাবত্| প্রকৃতিরিহ মরণং, প্রকৃতিরুচ্যতে স্বভাবঃ; তথা- “ইদমস্মান্মুহূর্তাত্....স্বভাবমাপত্স্যতে” (সূ.অ.৩০), মরণমিত্যর্থঃ; মরণসমীপগতত্বাদুচ্যতে “প্রকৃতিস্থে” ইতি| তস্মিন্নুপেক্ষা কর্তব্যা; ন তত্র ভেষজদানাদি কর্তব্যং, যশোহান্যাদিভযাত্||২৬||

Adhikarana 19 (27-28) · Śloka 28

তত্র শ্লোকৌ- ভিষগ্জিতং চতুষ্পাদং পাদঃ পাদশ্চতুর্গুণঃ| ভিষক্ প্রধানং পাদেভ্যো যস্মাদ্বৈদ্যস্তু যদ্গুণঃ||২৭|| জ্ঞানানি বুদ্ধির্ব্রাহ্মী চ ভিষজাং যা চতুর্বিধা| সর্বমেতচ্চতুষ্পাদে খুড্ডাকে সম্প্রকাশিতমিতি||২৮||

সঙ্গ্রহে ব্রাহ্মী বুদ্ধিঃ চতুর্বিধা মৈত্রীকারুণ্যাদিকা||২৭-২৮||

Adhikarana puShpikA · Śloka 9

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে খুড্ডাকচতুষ্পাদো নাম নবমোঽধ্যাযঃ||৯||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে তৃতীযে নির্দেশচতুষ্কে খুড্ডাকচতুষ্পাদো নাম নবমোঽধ্যাযঃ||৯||