5. mātrāśitīyō'dhyāyaḥ

Adhikarana 1 (1-2) · Śloka 2

অথাতো মাত্রাশিতীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

দ্বিতযমিহ শাস্ত্রপ্রযোজনং যদাতুরব্যাধিহরণং স্বস্থস্য স্বাস্থ্যরক্ষণং চ; যদাহ- স্বস্থাতুরপরাযণম্ (সূ.অ.১) ইতি; তেনোত্পন্নব্যাধিপ্রতীকারদ্বারাঽঽতুররক্ষণং ভেষজচতুষ্কমভিধায স্বস্থচতুষ্কোঽভিধাতব্যঃ; তত্রাপি স্বাস্থ্যপরিপালনহেতুষু মাত্রাবদন্নং প্রধানং; যদাহ- প্রাণিনাং পুনর্মূলমাহারো বলবর্ণৌজসাং চ (সু.সূ.অ.১) ইতি; তচ্চেহ মাত্রাবদন্নং বিধীযত ইত্যাদৌ মাত্রাশিতীয এবাভিধীযতে| মাত্রাশিতমধিকৃত্য কৃত্যোঽধ্যাযো মাত্রাশিতীযঃ| যদ্যপ্যধ্যাযাদৌ ‘মাত্রাশী’ ইতি পদমনুশ্রূযতে, তথাঽপি ‘মাত্রাশীযঃ’ ইতি সঞ্জ্ঞাপ্রণযনে কষ্টোচ্চারণভযাত্তদর্থপরপর্যাযশব্দেনেযং সঞ্জ্ঞা কৃতা; যথা “নবেগান্ধারণীয” (সূ.অ.৭) ইত্যাদিকা সঞ্জ্ঞা||১-২||

Adhikarana 2 (3) · Śloka 3

মাত্রাশী স্যাত্| আহারমাত্রা পুনরগ্নিবলাপেক্ষিণী||৩||

মাত্রাং মাত্রাবদন্নমশিতুং ভোক্তুং শীলং যস্যাসৌ মাত্রাশী, যদি বা মাত্রযাঽশিতুং ভোক্তুং শীলং যস্য স তথা| তত্রেহ মাত্রা অনপাযিপরিমাণম্| অশিরযমিহাবিশেষেণ খাদ্যপ্রাশ্যলেহ্যপেযানামভ্যবহারে বর্ততে| তেন মাত্রাশী স্যাদিত্যুক্তং খাদ্যপ্রাশ্যলেহ্যপেযানাং মাত্রযাঽভ্যবহরণং নোক্তমিতি যচ্চোচ্যতে, তন্নিরস্তং ভবতি| দৃষ্টশ্চাযমশিঃ খাদ্যাদ্যভ্যবহারে; যথা- দশমূলহরীতক্যাং- “একাভযাং প্রাশ্য ততশ্চ লেহাচ্ছুক্তিং নিহন্তি শ্বযথুং প্রবৃদ্ধম্” (চি.অ.১২); তথা- “ক্ষীরাশী তত্ প্রযোজযেত্” (চি.অ.১) ইতি| ইতশ্চাবগন্তব্যমশিরযং সর্বাভ্যবহারে বর্ততে, যেনৈতদ্বিবরণং সামান্যেনৈব কৃতম্- আহারমাত্রা পুনরিতি, ন পুনরশিতমাত্রা পুনরিতি| মাত্রাং ব্যাকরোতি- আহারেত্যাদি| অগ্নের্বলমুত্কৃষ্টং মধ্যমল্পং বাঽপেক্ষ্যোত্কৃষ্টা মধ্যাঽল্পা বা মাত্রা ভবতীত্যগ্নিবলাপেক্ষিণী| পুনঃশব্দো ভেষজাদিমাত্রাং ব্যাযামমাত্রাং চ ব্যাবর্তযতি; তেন ন সর্বমাত্রাঽগ্নিবলাপেক্ষিণী; যতো ভেষজমাত্রা ব্যাধ্যাতুরবলাপেক্ষিণী বক্তব্যা, ব্যাযামস্য তু দোষক্ষযাগ্নিবৃদ্ধ্যাদ্যুত্পাদশ্রমক্লমাদ্যনুত্পাদাপেক্ষিণী, ব্যবস্থাপযিতব্যা| যদি বা পুনঃশব্দঃ পৌনঃপুন্যে, তেনাহারমাত্রা পুনঃ পুনরগ্নিবলমপেক্ষতে| এতদুক্তং ভবতি- যদেকস্মিন্ পুরুষে একদা যাঽগ্নিবলেন ব্যবস্থাপিতা মাত্রা সা ন সর্বকালং ভবতি, যত ঋতুভেদেন বযোভেদেন চ তস্যৈবাগ্নিঃ কদাচিদ্বিবৃদ্ধো ভবতি, যথা- হেমন্তে যৌবনে চ, কদাচিন্মন্দো ভবতি, যথা- বর্ষাসু বার্ধক্যে চ; তেনাগ্নিবলভেদান্মাত্রাঽপ্যেকরূপা ন ভবতি, কিন্তু তত্কালভবমগ্নিবলমপেক্ষ্য পুনঃ পুনর্মাত্রাঽপি ভিদ্যত ইতি||৩||

Adhikarana 3 (4) · Śloka 4

যাবদ্ধ্যস্যাশনমশিতমনুপহত্য প্রকৃতিং যথাকালং জরাং গচ্ছতি তাবদস্য মাত্রাপ্রমাণং বেদিতব্যং ভবতি||৪||

অগ্নিবলাপেক্ষিত্বমেব বিবৃণোতি- যাবদ্ধীত্যাদি| যাবদিতি যাবত্পরিমাণম্| হিশব্দো হেতৌ| অস্যেতি ভোক্তুঃ| অশনং চতুর্বিধমপি ভোজ্যম্| অশিতং ভুক্তম্| প্রকৃতিং বাতাদীনাং রসাদীনাং চ সাম্যাবস্থাম্| অনুপহত্য বিকারমকৃত্বেত্যর্থঃ| যথাকালমিতি নিশাশেষে| তাবদিতি পূর্বপ্রমাণাবচ্ছিন্নমশনং প্রত্যবমৃশতি| দ্বিতীযমস্যেতি গ্রহণমন্যত্র প্রতিষেধার্থম্| তেন যস্যৈব যাবতী মাত্রা নির্বিকারা, তস্যৈব সা মন্তব্যা নান্যেষাং, প্রতিপুরুষমগ্নিবলস্য ভিন্নত্বাত্| যদ্যপি চৈকস্মিন্নপি পুরুষে কালাদিভেদেনাগ্নিবলভেদো ভবতি, তথাঽপ্যেকপুরুষ একমাত্রামবধার্য কিযন্তমপি কালং তযৈব মাত্রযা অগ্নিবলভেদহেত্বভাবে সতি ব্যবহারো ভবত্যেব| মাত্রাপ্রমাণং মাত্রেযত্তা; মাত্রাপ্রমাণশব্দেন চেহ মাত্রাপ্রমাণবদিতি বোদ্ধব্যম্; অন্যথা, তাবচ্ছব্দেনাবচ্ছিন্নাশনবাচিনা মাত্রাপ্রমাণশব্দস্য গুণবাচিনঃ সামানাধিকরণ্যং ন স্যাত্| ননু, প্রকৃতিমনুপহত্যেতি ন কর্তব্যং বিশেষণং, ন হ্যাহারো যো যথাকালং জরাং যাতি স মাত্রাদোষাদ্বিকারং করোতি, করোতি তু দ্রব্যস্বভাবসংস্কারাদিদোষাত্; যথা মন্দকলকুচাদযো যথাকালং জরাং গচ্ছন্তোঽপি দোষজনকা ভবন্ত্যেব; ন তাবতাঽপি তত্র মাত্রা দুষ্যতি, যথা বক্ষ্যতি ত্রিবিধকুক্ষীযে- “ন চ কেবলং মাত্রাবত্ত্বাদেবাহারস্য কৃত্স্নমাহারফলসৌষ্ঠবমবাপ্তুং শক্যং, প্রকৃত্যাদীনামষ্টানামাহারবিধিবিশেষাযতনানাং ভিন্নফলত্বাত্” (বি.অ.২) ইতি| নৈবং, দ্বিবিধা হি মাত্রা রসবিমানে বক্তব্যা- সর্বগ্রহরূপা, পরিগ্রহরূপা চ; তত্র সমুদিতস্যাহারস্য পরিমাণং সর্বগ্রহঃ, মধুরাম্লাদীনামাহারাবযবানাং প্রত্যেকং মাত্রযা গ্রহণং পরিগ্রহঃ; তেন যত্রাহারসমুদাযপরিমাণং সমুচিতমেব গৃহ্যতে, আহারাবযবানাং তু মধুরাদীনাং স্বভাবহিতানামপ্যযথোক্তমানং স্যাত্, তত্রাহারাবযবমাত্রাবৈষম্যাদ্ধাতুবৈষম্যং ভবত্যেব, অযথাকালং জরাগমনং চ স্যাত্; তদুক্তং- প্রকৃতিমনুপহত্যেতি বিশেষণম্| অন্যে তু ব্যাখ্যানযন্তি- ‘অস্য’ ইতি, ‘অশনম্’ ইতি, অশিতম্ ইতি চ পদত্রযং প্রকরণাদেব লভ্যতে; যত্ পুনঃ ক্রিযতে তদ্বিশেষপ্রতিপাদনার্থম্| তেন, অস্যেত্যনেন পরীক্ষকো ভোক্তাঽধিক্রিযতে, অশনমিত্যনেন চ প্রশস্তমশনং প্রকৃতিকরণসংযোগদেশকালাবিরুদ্ধমুচ্যতে, অশিতমিত্যনেন চ যথাবিধিভোজনমুচ্যতে; তদেবং সর্বগুণসম্পন্ন আহারো মাত্রাবানুচ্যতে||৪||

Adhikarana 4 (5) · Śloka 5

তত্র শালিষষ্টিকমুদ্গলাবকপিঞ্জলৈণশশশরভশম্বরাদীন্যাহারদ্রব্যাণি প্রকৃতিলঘূন্যপি মাত্রাপেক্ষীণি ভবন্তি| তথা পিষ্টেক্ষুক্ষীরবিকৃতিতিলমাষানূপৌদকপিশিতাদীন্যাহারদ্রব্যাণি প্রকৃতিগুরূণ্যপি মাত্রামেবাপেক্ষন্তে||৫||

মাত্রালক্ষণমুপদিশ্য ব্যবহারোপযোগিনং দ্রব্যভেদেন মাত্রাভেদং দর্শযতি- তত্র শালীত্যাদি| তত্র লঘুবর্গ এব প্রথমং পঠ্যতে, পথ্যতমত্বাত্; তত্রাপ্যাদৌ রক্তশালিরাহারদ্রব্যপ্রধানত্বাত্| কপিঞ্জলো গৌরতিত্তিরিঃ, এণঃ কৃষ্ণসারঃ, শরভো মহাশৃঙ্গী হরিণঃ, শম্বরস্তদ্বিশেষঃ| অন্নপানবিধৌ “শীতঃ স্নিগ্ধোঽগুরুঃ স্বাদুঃ” (সূ.অ.২৭) ইতি ষষ্টিকগুণকথনে “অগুরুঃ” ইত্যকারপ্রশ্লেষো দ্রষ্টব্যঃ, তেনেহ ষষ্টিকস্য লঘুত্বপ্রতিপাদনং ন বিরুধ্যতে| অপি সমুচ্চযে, তেন প্রকৃতিলঘূনি করণলঘূনি চ লাজাদীনি মাত্রাপেক্ষীণি ভবন্তীতি লভ্যতে| এবং প্রকৃতিগুরূণ্যপীত্যত্রাপি সংস্কারগুরুশক্তুপিণ্ডাদিগ্রহণং বাচ্যম্| আদিশব্দোঽত্র প্রকারবাচী, শালিষষ্টিকাদিগণাভাবাত্| বিকৃতিশব্দঃ পিষ্টেক্ষুক্ষীরৈঃ সম্বধ্যতে, ক্ষীরবিকৃতিঃ ক্ষীরকৃতা ভক্ষ্যাঃ; পিশিতমানূপৌদকাভ্যাং সম্বধ্যতে||৫||

Adhikarana 5 (6) · Śloka 6

ন চৈবমুক্তে দ্রব্যে গুরুলাঘবমকারণং মন্যেত, লঘূনি হি দ্রব্যাণি বায্বগ্নিগুণবহুলানি ভবন্তি; পৃথ্বীসোমগুণবহুলানীতরাণি, তস্মাত্ স্বগুণাদপি লঘূন্যগ্নিসন্ধুক্ষণস্বভাবান্যল্পদোষাণি চোচ্যন্তেঽপি সৌহিত্যোপযুক্তানি, গুরূণি পুনর্নাগ্নিসন্ধুক্ষণস্বভাবান্যসামান্যাত্, অতশ্চাতিমাত্রং দোষবন্তি সৌহিত্যোপযুক্তান্যন্যত্র ব্যাযামাগ্নিবলাত্; সৈষা ভবত্যগ্নিবলাপেক্ষিণী মাত্রা||৬||

ননু, যদি লঘু হিতমপি স্বগুণকরণে মাত্রামপেক্ষতে, গুরু চাহিতমপি মাত্রাপরিগৃহীতং হিতমেব স্যাত্, তত্ কিং গৌরবলাঘবোপদেশেনেত্যাশঙ্ক্যাহ- ন চৈবমিত্যাদি| লঘূনি যদ্যপ্যাকাশবায্বগ্নিগুণবহুলানি ভবন্তি, তথাঽপ্যাকাশস্যাগ্নিদীপনং প্রতি তথাবিধসামর্থ্যাভাবাত্ বায্বগ্ন্যোস্ত্বগ্নিদীপকত্বাদ্ বায্বগ্নিগুণবহুলানীত্যুক্তম্| তস্মাত্ কারণাল্লঘূনি মাত্রযা তাবদগ্নিং দীপযন্তি; স্বগুণাদপি বায্বগ্নিগুণবাহুল্যাদগ্নিসন্ধুক্ষণস্বভাবানি স্যুঃ| মাত্রাব্যতিক্রমে সমানেঽপি লঘুগুরুদ্রব্যযোর্লঘুদ্রব্যস্য বিশেষং দর্শযতি- অল্পদোষাণি চোচ্যন্তেঽপি সৌহিত্যোপযুক্তানি; সৌহিত্যং মাত্রাতিক্রমেণ তৃপ্তিঃ| গুরূণীত্যাদৌ পুনঃশব্দো ব্যাবৃত্ত্যর্থঃ| অসামান্যাদিতি বিরোধার্থে নঞ্, অসিতমিতি যথা; তেনাসামান্যাদিতি অগ্নিবিরুদ্ধপৃথ্বীতোযগুণবাহুল্যাদিত্যর্থঃ| ‘অন্যসামান্যাত্’ ইতিপাঠপক্ষেঽপ্যন্যশব্দো বিরুদ্ধবচন এব, তেন তথাঽপি স এবার্থঃ| অতশ্চেত্যাদিনা মাত্রাব্যতিক্রমে গুরৌ গরীযাংসং দোষং দর্শযতি| ননু, দৃশ্যন্তে কেচন ভারিকাদযঃ পুরুষা সৌহিত্যোপযুক্তগুরুদ্রব্যাহারেঽপি নির্দোষাঃ, তত্ কিমুচ্যতেঽতিমাত্রং দোষবন্তীত্যাশঙ্ক্যাহ- অন্যত্রেত্যাদি| ব্যাযামকৃতমগ্নিবলং ব্যাযামাগ্নিবলম্| যদ্যপি কালাহিতবলোঽগ্নির্মাত্রাঽধিকগুরুদ্রব্যক্ষমো ভবতি, যদুক্তং- “পক্তা ভবতি হেমন্তে মাত্রাদ্রব্যগুরুক্ষমঃ” (সূ.অ.৬) ইতি, তথাঽপি ব্যাযামাহিতবলো বহ্নির্নিতরাং বলবান্ ভবতীত্যযমেব প্রধানপরিগ্রহাদুক্তঃ| যে তু ব্যাযামাদিতি চাগ্নিবলাদিতি হেতুদ্বযং বর্ণযন্তি, তেষামেবং সতি ব্যাযামাপেক্ষিণ্যশনমাত্রা স্যাদিতি প্রকরণবিরুদ্ধোঽর্থঃ স্যাত্| প্রতিজ্ঞাতমর্থং ন্যাযসম্পাদিতমুপসংহরতি- সৈষেত্যাদি| সেতি অগ্নিবলাপেক্ষিণী প্রতিজ্ঞাতা মাত্রা, এষেতি ন্যাযেনাগ্ন্যপেক্ষিত্বেন নির্বাহিতা||৬||

Adhikarana 6 (7) · Śloka 7

ন চ নাপেক্ষতে দ্রব্যং; দ্রব্যাপেক্ষযা চ ত্রিভাগসৌহিত্যমর্ধসৌহিত্যং বা গুরূণামুপদিশ্যতে, লঘূনামপি চ নাতিসৌহিত্যমগ্নের্যুক্ত্যর্থম্||৭||

ননু, যদ্যপ্যগ্নিবলাপেক্ষিণী মাত্রা, তত্ কস্মাদেকরূপ এবাগ্নৌ লঘূনাং দ্রব্যাণাং ভূযসী মাত্রা ভবতি, গুরূণাং ততস্ত্রিভাগোচিতা অর্ধা বেত্যাহ- ন চেত্যাদি| দ্রব্যমপেক্ষত ইত্যর্থঃ| ত্রিভাগসৌহিত্যং মনাগ্গুরুভিঃ| এবং গৌরবপ্রকর্ষাপকর্ষাদন্যদপি কল্পনীযম্| লঘূনামপি নাতিসৌহিত্যমিত্যত্র সৌহিত্যশব্দস্তৃপ্তিমাত্রে বর্ততে, তেন লঘূনি তৃপ্ত্যতিক্রমেণ ন ভোক্তব্যানি, এবং হি তেষাং মাত্রাতিক্রমো ন স্যাত্ | অগ্নের্যুক্তিঃ স্বমানাবস্থিতিঃ, তদর্থম্| ননু, গুরূণাং তাবদতিমাত্রোপযোগোঽগ্নিপরিপালনার্থং নিষিধ্যতাং, যেন গুরূণ্যগ্ন্যসমানানি; লঘূনি পুনরগ্নিসমানানি, তত্তেষাং কথমতিমাত্রোপযোগো বহ্নিমান্দ্যমাবহতীতি? ব্রূমঃ- লঘূনাং দ্রব্যাণাং সামান্যমভিভূযাতিমাত্রত্বমেবাগ্নিমান্দ্যং করোতি, যথা- চক্ষুস্তৈজসং, তেজঃসহকৃতং চ পশ্যতি, তদেব তেজোতিযোগাদুপহন্যতে; তথা শস্ত্রমশ্মসম্ভবম্, অশ্মযোগাচ্চ তীক্ষ্ণং সম্পদ্যতে, অশ্মন্যেব চ মিথ্যাযোগাত্ প্রতিহতং ভবতি; তদুক্তং শালাক্যে- যত্তেজো জ্যোতিষাং দীপ্তং শারীরং প্রাণিনাং চ যত্| সংযুক্তং তেজসা তেজস্তদ্ধি রূপাণি পশ্যতি|| তদেব চক্ষুস্তান্যেব জ্যোতীংষ্যতি তু পশ্যতঃ| বিকারং ভজতেঽত্যর্থমথবাঽপি বিনশ্যতি|| শস্ত্রস্যাশ্মা যথা যোনির্নিশিতং চ তদশ্মনি| তীক্ষ্ণং ভবত্যতিযোগাত্তত্রৈব প্রতিহন্যতে ইতি||৭||

Adhikarana 7 (8) · Śloka 8

মাত্রাবদ্ধ্যশনমশিতমনুপহত্য প্রকৃতিং বলবর্ণসুখাযুষা যোজযত্যুপযোক্তারমবশ্যমিতি||৮||

এবং তাবদ্ব্যুত্পাদিতাঽগ্নিবলদ্রব্যাপেক্ষিণী মাত্রা, মাত্রান্বিতং চ ভোজ্যং ভোক্তব্যমিত্যুক্তং, মাত্রাশিতত্বে কো গুণ ইত্যাহ- মাত্রাবদ্ধীত্যাদি| ইহাবশ্যমিতি নিযমো বিরোধিকারণান্তরাভাবে সতি বোদ্ধব্যঃ; যতো যদ্যপি পূর্ববদশনাশিতোপযোক্তৃপদৈঃ প্রশস্তভোজনাদিবাচিভিঃ প্রকৃতিকরণাদিগুণসম্পন্নমন্নং লভ্যতে, তথাঽপি কালবিপর্যযপ্রজ্ঞাপরাধাসাত্ম্যশব্দস্পর্শরূপরসগন্ধাঃ সন্ত্যেবাহারজন্যবলাদিবিরোধকাঃ; যদাহ- “সন্তি হ্যৃতেঽপ্যহিতাহারাদন্যা রোগপ্রকৃতযঃ” (সূ.অ.২৮) ইতি; তেন মাত্রাপরিগৃহীতাঃ শুভা অপি প্রকৃত্যাদযঃ প্রাযো বলাদিহেতবো ভবন্তীতি মাত্রাবদাহারস্তুত্যর্থমবশ্যমিতি কৃতম্| সুখযুক্তমাযুঃ সুখাযুঃ, যদি বা সুখং চাযুশ্চেতি মন্তব্যং; স্বরূপেণাপি চাযুর্মৃগ্যমিতি প্রাক্ প্রতিপাদিতমেব||৮||

Adhikarana 8 (9) · Śloka 9

ভবন্তি চাত্র- গুরু পিষ্টমযং তস্মাত্তণ্ডুলান্ পৃথুকানপি| ন জাতু ভুক্তবান্ খাদেন্মাত্রাং খাদেদ্বুভুক্ষিতঃ||৯||

ভবন্তি চাত্রেতি| তন্ত্রকারস্য সমযোঽযং- যত্ পূর্বব্যাখ্যাতার্থসঙ্গ্রহার্থং যদা শ্লোকেন বক্তুমারভতে তদা ‘ভবতি চাত্র’ ইতি করোতি| পিষ্টমযং পিষ্টবিকারঃ| তস্মাদিতি গুরুত্বাত্| পৃথুকাঃ ‘চিপ্পিটা’ ইতি লোকপ্রসিদ্ধাঃ| ন জাতু ন কদাচিত্| মাত্রাং খাদেদিতি অনপাযিপরিমাণবন্তং খাদেত্||৯||

Adhikarana 9 (10-11) · Śloka 11

বল্লূরং শুষ্কশাকানি শালূকানি বিসানি চ| নাভ্যসেদ্গৌরবান্মাংসং কৃশং নৈবোপযোজযেত্||১০|| কূর্চিকাংশ্চ কিলাটাংশ্চ শৌকরং গব্যমাহিষে| মত্স্যান্ দধি চ মাষাংশ্চ যবকাংশ্চ ন শীলযেত্||১১||

বল্লূরং শুষ্কমাংসম্| নাভ্যসেন্ন নিরন্তরমুপযুঞ্জ্যাত্| অনভ্যাসহেতুমাহ- গৌরবাদিতি| মাংসং কৃশম্ অপুষ্টং রোগাদুপরতমৃগাদিসম্ভবমিত্যর্থঃ | এতচ্চাপথ্যত্বাদেব নিষিদ্ধং, ন গৌরবাদিতি ব্রুবতে| কূর্চিকঃ ক্ষীরেণ সমং দধি তক্রং বা পক্বং; কিলাটঃ কূর্চিকপিণ্ডঃ, নষ্টক্ষীরস্য ঘনো ভাগ ইত্যন্যে| শৌকরমিতি শূকরমাংসং, শৌকরসাহচর্যাদ্গব্যমাহিষে অপি মাংসে এব বোদ্ধব্যে| যবকঃ শূকধান্যবিশেষঃ| বক্ষ্যতি হি- “যবকঃ শূকধান্যানামপথ্যতমত্বে প্রকৃষ্টতমো ভবতি” (সূ.অ.২৫) ইতি||১০-১১||

Adhikarana 10 (12) · Śloka 12

ষষ্টিকাঞ্ছালিমুদ্গাংশ্চ সৈন্ধবামলকে যবান্| আন্তরীক্ষং পযঃ সর্পির্জাঙ্গলং মধু চাভ্যসেত্||১২||

অভ্যস্যান্ দর্শযতি- ষষ্টিকানিত্যাদি| ইহ ষষ্টিক আদৌ পঠ্যতে রক্তশালিমনু প্রধানত্বখ্যাপনার্থম্| আন্তরীক্ষমিতি আন্তরীক্ষং পানীযম্| পযঃ ক্ষীরম্| জাঙ্গলমিতি জাঙ্গলদেশভবং মৃগাদিমাংসম্| ইহ সৈন্ধবাভ্যাসোঽন্নসংস্কারত্বেন মাত্রযাঽভিপ্রেতঃ; তেন, “ত্রীণি দ্রব্যাণি নাত্যুপযুঞ্জীত পিপ্পল্যো লবণং ক্ষারঃ” (বি.অ.১) ইতি যদ্বক্ষ্যতি তেন সমং বিরোধো ন ভবতি, তত্র লবণাতিযোগস্য প্রতিষিদ্ধত্বাত্||১২||

Adhikarana 11 (13) · Śloka 13

তচ্চ নিত্যং প্রযুঞ্জীত স্বাস্থ্যং যেনানুবর্ততে| অজাতানাং বিকারাণামনুত্পত্তিকরং চ যত্||১৩||

মাত্রাশীত্যাদিনা স্বাস্থ্যপরিপালনোপায উচ্যতে, অতিবহু চ স্বস্থপরিপালনং তন্ত্রে বক্তব্যং, তচ্চেহাভিধীযমানং গ্রন্থগৌরবমাবহতি, অনভিধীযমানং চ গ্রন্থস্য ন্যূনতামাপাদযতি; অতস্তত্সূত্রমাত্রেণোদ্দেষ্টুমাহ- তচ্চেত্যাদি| সুষ্ঠু নির্বিকারত্বেনাবতিষ্ঠত ইতি স্বস্থঃ, তস্য ভাবঃ স্বাস্থ্যম্; উদ্বেজকধাতুবৈষম্য বিরহিতধাতুসাম্যমিত্যর্থঃ| তচ্চ স্বাস্থ্যমুভযথা পরিপাল্যতে বিশুদ্ধাহারাচারাভ্যাং সদা ক্ষীযমাণশরীরপোষণেন, প্রত্যবাযহেতুপরিহারেণ চ; যথা- দীপপরিপালনং স্নেহবর্তিদানাত্ পোষণেন ক্রিযতে, তথা শলভবাতাদিনির্বাপকহেতুপরিহারেণ চ| শরীরপ্রত্যবাযহেতুশ্চ দ্বিবিধঃ- বুদ্ধিদোষাদ্বিষমশরীরন্যাসাদির্বাতাদিকারকঃ, দুষ্পরিহরশ্চ কালবিশেষঃ স্বভাবাদিহ হেমন্তাদিঃ কফচযাদিকারকঃ| তত্র শ্লোকপূর্বার্ধেন স্বাস্থ্যপোষকহেতুমাহ, উত্তরার্ধেন তু অজাতানামিত্যাদিনা স্বাস্থ্যবিঘাতকহেতুপরিহারমাহ| যদ্যপি চাজাতানাং বিকারাণামনুত্পত্তিঃ স্বভাবসিদ্ধা বিদ্যত এব, বিদ্যমানে চ করোত্যর্থো মুখ্যো নাস্তি, তথাঽপীদমেবাজাতবিকারাণামনুত্পত্তিকরণং যত্তদ্বিকারহেতুপরিহরণং তথা দুষ্পরিহরকালবিশেষজনিতদোষহরণং , যথা বক্ষ্যতি- “মাধবপ্রথমে মাসি নভস্যপ্রথমে পুনঃ| সহস্যপ্রথমে চৈব বাহযেদ্দোষসঞ্চযম্ ” (সূ.অ.৭) ইতি; তথা হেত্বন্তরনিরপেক্ষোত্পদ্যমানচক্ষুঃশ্লেষ্মহরণার্থমঞ্জনম্; এবমাদি||১৩||

Adhikarana 12 (14) · Śloka 14

অত ঊর্ধ্বং শরীরস্য কার্যমক্ষ্যঞ্জনাদিকম্| স্বস্থবৃত্তিমভিপ্রেত্য গুণতঃ সম্প্রবক্ষ্যতে||১৪||

অত ঊর্ধ্বমিত্যাদি| অতঃ স্বাস্থ্যানুবৃত্তিকারণকথনাদূর্ধ্বং, কার্যম্ অবশ্যকার্যং, স্বস্থবৃত্তিমভিপ্রেত্য স্বস্থবৃত্তানুষ্ঠানে, অক্ষ্যঞ্জনাদ্যবশ্যং কার্যমিত্যর্থঃ; অঞ্জনশব্দোঽভ্যঞ্জনেঽপি বর্ততে, তদর্থমক্ষ্যঞ্জনমিত্যুক্তম্| অঞ্জনমেবাদাবুপাহিতং প্রধানাবযবচক্ষুঃপরিপালকত্বাত্| উক্তং চ- “চক্ষুঃ প্রধানং সর্বেষামিন্দ্রিযাণাং বিদুর্বুধাঃ| ঘননীহারযুক্তানাং জ্যোতিষামিব ভাস্করঃ” ইতি| যদি বা স্বস্থবৃত্তমধিকৃত্য যদঞ্জনাদি, তদুচ্যতে; রোগেষু তু যদঞ্জনাদি, তদ্রোগচিকিত্সাসু বক্তব্যম্| যদ্যপি চৈতদঞ্জনাদি রোগহরমপি বক্তব্যং, তথাঽপি প্রাযঃ স্বস্থবৃত্তমতমেতদিতি স্বস্থবৃত্তমভিপ্রেত্যেত্যুক্তম্||১৪||

Adhikarana 13 (15) · Śloka 15

সৌবীরমঞ্জনং নিত্যং হিতমক্ষ্ণোঃ প্রযোজযেত্| পঞ্চরাত্রেঽষ্টরাত্রে বা স্রাবণার্থে রসাঞ্জনম্||১৫||

সৌবীরমিত্যাদি| সুবীরানদীভবং সৌবীরম্| নিত্যং প্রত্যহম্| অক্ষ্ণোরিতি দ্বিবচনমক্ষিগোলকদ্বযেঽপ্যঞ্জনবিধানার্থম্| পঞ্চরাত্রাষ্টরাত্রগ্রহণমদূরান্তরকালে নিযমদর্শনার্থম্| তেন দোষকালমপেক্ষ্যার্বাঙ্মধ্যে ঊর্ধ্বং চ কর্তব্যং স্রাবণমঞ্জনমিতি ভবতি||১৫||

Adhikarana 14 (16-17) · Śloka 18

চক্ষুস্তেজোমযং তস্য বিশেষাচ্ছ্লেষ্মতো ভযম্| ততঃ শ্লেষ্মহরং কর্ম হিতং দৃষ্টেঃ প্রসাদনম্||১৬|| দিবা তন্ন প্রযোক্তব্যং নেত্রযোস্তীক্ষ্ণমঞ্জনম্| বিরেকদুর্বলা দৃষ্টিরাদিত্যং প্রাপ্য সীদতি||১৭|| তস্মাত্ স্রাব্যং নিশাযাং তু ধ্রুবমঞ্জনমিষ্যতে|১৮|

স্রাবণাঞ্জনপ্রকরণোপপত্তিমাহ- চক্ষুরিত্যাদি| চক্ষুরিন্দ্রিযস্য তৈজসস্য শ্লেষ্মত আপ্যাত্তৈজসবিরুদ্ধত্বেন হেতুনা, বিশেষাদিতি বাতাপিত্তভযাদধিকত্বেন ভযং ভবতি| শ্লেষ্মজযে চ স্রাবণং প্রধানং, তস্মাত্ স্রাব্যমিত্যর্থঃ| স্রাবণাঞ্জনকালং নিযমযতি- নিশাযামিত্যাদি| ধ্রুবমবশ্যং নিশাযামেব, অঞ্জনং প্রত্যাসন্নত্বাত্ স্রাবণাঞ্জনম্| জতূকর্ণেনাপি স্রাবণরসাঞ্জনং নিশাযামেব বিহিতং; যদুক্তং- “সপ্তাহাদ্রসাঞ্জনং নক্তম্” ইতি| শালাক্যেঽপ্যুক্তং- “বিরেকদুর্বলা দৃষ্টিরাদিত্যং প্রাপ্য সীদতি | রাত্রৌ স্বপ্নগুণাচ্চাক্ষি পুষ্যত্যঞ্জনকর্ষি(র্শি)তম্” ইতি| সৌবীরাঞ্জনং তু বিরেচনং ন ভবতি, চক্ষুঃপ্রসাদমাত্রং করোতি, তেন তদ্দিবাক্রিযমাণং ন বিরোধি| অন্যে তু ব্যাখ্যানযন্তি- ধ্রুবং নিত্যকর্তব্যং সৌবীরাঞ্জনং যত্তন্নিশি কর্তব্যং, স্রাবণাঞ্জনং তু শ্লেষ্মোদ্রেকবিষযে(যি) বমনবত্ পূর্বাহ্ণ এব কর্তব্যম্||১৬-১৭||-

Adhikarana 15 (18-19) · Śloka 20

যথা হি কনকাদীনাং মলিনাং বিবিধাত্মনাম্||১৮|| ধৌতানাং নির্মলা শুদ্ধিস্তৈলচেলকচাদিভিঃ| এবং নেত্রেষু মর্ত্যানামঞ্জনাশ্চ্যোতনাদিভিঃ||১৯|| দৃষ্টির্নিরাকুলা ভাতি নির্মলে নভসীন্দুবত্|২০|

অঞ্জনগুণমাহ- যথা হীত্যাদি| শুদ্ধিঃ স্বাভাবিকী; সাঽঽগন্তুধূল্যাদ্যপনযনেন নির্মলা সতি ভাতি| আশ্চ্যোতনং নেত্রবিরেকার্থং দ্রবৌষধদানং, তচ্চেহানভিহিতমপি ফলৈক্যাদভিহিতম্, আদিশব্দেন পুটপাকাদীনাং গ্রহণম্||১৮-১৯||-

Adhikarana 16 (20-24) · Śloka 25

হরেণুকাং প্রিযঙ্গুং চ পৃথ্বীকাং কেশরং নখম্||২০|| হ্রীবেরং চন্দনং পত্রং ত্বগেলোশীরপদ্মকম্| ধ্যামকং মধুকং মাংসী গুগ্গুল্বগুরুশর্করম্||২১|| ন্যগ্রোধোদুম্বরাশ্বত্থপ্লক্ষলোধ্রত্বচঃ শুভাঃ| বন্যং সর্জরসং মুস্তং শৈলেযং কমলোত্পলে||২২|| শ্রীবেষ্টকং শল্লকীং চ শুকবর্হমথাপি চ| পিষ্ট্বা লিম্পেচ্ছরেষীকাং তাং বর্তিং যবসন্নিভাম্||২৩|| অঙ্গুষ্ঠসম্মিতাং কুর্যাদষ্টাঙ্গুলসমাং ভিষক্| শুষ্কাং নিগর্ভাং তাং বর্তিং ধূমনেত্রার্পিতাং নরঃ||২৪|| স্নেহাক্তামগ্নিসম্প্লুষ্টাং পিবেত্ প্রাযোগিকীং সুখাম্|২৫|

ইহৈবাঞ্জনান্তে ধূমপানং বিধাস্যতি- “নাবনাঞ্জননিদ্রান্তে” ইত্যাদিনা; অতোঽঞ্জনানন্তরং ধূমোঽভিধীযতে; উক্তং চ শালাক্যে- “তীক্ষ্ণাঞ্জনেনাঞ্জিতলোচনস্য যঃ সম্প্রদুষ্টো ন নিরেতি নেত্রাত্| শ্লেষ্মা শিরঃস্থঃ স তু পীতমাত্রে ধূমে প্রশান্তিং লভতে ক্ষণেন” ইতি| হরেণুকামিত্যাদি| হরেণুকা রেণুকা| পৃথ্বীকা কৃষ্ণজীরকম্| কেশরং নাগকেশরম্| পদ্মকং পদ্মকাষ্ঠম্| ধ্যামকং গন্ধতৃণম্| ন্যগ্রোধাদীনাং প্লক্ষান্তানাং ত্বচঃ, তাসাং বিশেষণং শুভা ইতি| বন্যং কৈবর্তমুস্তকম্| শুকবর্হং গ্রন্থিপর্ণকম্| শরেষীকা শরপুষ্পস্য নালী ‘শরিকা’ ইতি প্রসিদ্ধা| অত্র বিধানং- পিষ্টৈর্ভেষজৈঃ শরিকা তথা বেষ্টযিতব্যা যথা অষ্টাঙ্গুলাযতা অঙ্গুষ্ঠপরিণাহা চ বর্তিঃ স্যাত্, তস্যাং চ শুষ্কাযাং সত্যাং শরেষীকামাকৃষ্য স্নেহেনাভ্যজ্যাগ্নিনৈকস্মিন্নগ্রেঽবদহ্য বক্ষ্যমাণধূমপাননলিকাযামগ্ররন্ধ্রে নিবেশ্যাতো ধূমঃ পেযঃ | প্রাযোগিকী চ নিত্যপেযধূমবর্তিসঞ্জ্ঞা| সুখামিত্যনেনাকটুকত্বমনত্যযত্বং চ দর্শযতি||২০-২৪||-

Adhikarana 17 (25) · Śloka 26

বসাঘৃতমধূচ্ছিষ্টৈর্যুক্তিযুক্তৈর্বরৌষধৈঃ||২৫|| বর্তিং মধুরকৈঃ কৃত্বা স্নৈহিকীং ধূমমাচরেত্|২৬|

স্নৈহিকধূমবর্তিমাহ- বসেত্যাদি| মধূচ্ছিষ্টং সিক্থকম্| বরৌষধৈরিতি মধুরকবিশেষণং; মধুরকাণি জীবনীযানি জীবকর্ষভকাদীনি| যুক্তিযুক্তৈরিত্যনেন তথা বসাদিগ্রহণং কর্তব্যং, যথা বর্তিঃ কর্তুং পার্যত ইতি দর্শযতি| বর্তিকরণং চ পূর্ববত্| স্নৈহিকী স্নেহনকারিকা||২৫||-

Adhikarana 18 (26) · Śloka 27

শ্বেতা জ্যোতিষ্মতী চৈব হরিতালং মনঃশিলা||২৬|| গন্ধাশ্চাগুরুপত্রাদ্যা ধূমং মূর্ধবিরেচনে |২৭|

বৈরেচনিকধূমপানবর্তিং দর্শযতি- শ্বেতেত্যাদি| শ্বেতা অপরাজিতা| গন্ধাঃ সুগন্ধদ্রব্যাণি, তেষাং বিশেষণমগুরুপত্রাদ্যাঃ, অগুরু চ পত্রাদ্যাশ্চ অগুরুপত্রাদ্যাঃ; অগুরুপত্রাদ্যাশ্চ জ্বরে বক্ষ্যমাণঃ “অগুরুকুষ্ঠতগরপত্র” (চি.অ.৩) ইত্যাদিগণো মন্তব্যঃ| অগুর্বাদ্যা ইতি ন কৃতং, কুষ্ঠতগরযোরতিতীক্ষ্ণত্বেন মস্তুলুঙ্গকস্রাবভযাত্ পরিহারার্থম্| বক্ষ্যতি চ ত্রিমর্মীযে- “ধূমবর্তিং পিবেদ্গন্ধৈরকুষ্ঠতগরৈস্তথা” (সি.অ.৯) ইতি, শালাক্যেঽপ্যুক্তং- “নতকুষ্ঠে স্রাবযতো ধূমবর্তিপ্রযোজিতে| মস্তুলুঙ্গং বিশেষেণ তস্মাত্তে নৈব যোজযেত্” ইতি; সুশ্রুতেঽপ্যুক্তং- “এলাদিনা তগরকুষ্ঠবর্জ্যেন” (সূ.চি.অ.৪০) ইতি||২৬||-

Adhikarana 19 (27-32) · Śloka 33

গৌরবং শিরসঃ শূলং পীনসার্ধাবভেদকৌ||২৭|| কর্ণাক্ষিশূলং কাসশ্চ হিক্কাশ্বাসৌ গলগ্রহঃ| দন্তদৌর্বল্যমাস্রাবঃ শ্রোত্রঘ্রাণাক্ষিদোষজঃ||২৮|| পূতির্ঘ্রাণাস্যগন্ধশ্চ দন্তশূলমরোচকঃ| হনুমন্যাগ্রহঃ কণ্ডূঃ ক্রিমযঃ পাণ্ডুতা মুখে||২৯|| শ্লেষ্মপ্রসেকো বৈস্বর্যং গলশুণ্ড্যুপজিহ্বিকা| খালিত্যং পিঞ্জরত্বং চ কেশানাং পতনং তথা||৩০|| ক্ষবথুশ্চাতিতন্দ্রা চ বুদ্ধের্মোহোঽতিনিদ্রতা| ধূমপানাত্ প্রশাম্যন্তি বলং ভবতি চাধিকম্||৩১|| শিরোরুহকপালানামিন্দ্রিযাণাং স্বরস্য চ| ন চ বাতকফাত্মানো বলিনোঽপ্যূর্ধ্বজত্রুজাঃ||৩২|| ধূমবক্ত্রকপানস্য ব্যাধযঃ স্যুঃ শিরোগতাঃ|৩৩|

ধূমপানগুণান্ দর্শযতি- গৌরবমিত্যাদি| শিরোরুহাঃ কেশাঃ; কপালাশ্চ শিরস এব| বলিনোঽপীতি বলবত্কারণা অপীত্যর্থঃ| ঊর্ধ্বজত্রুজত্বেনৈব শিরোগতা অপি লব্ধাস্তে পুনরভিধীযন্তে বিশেষবিধানার্থম্||২৭-৩২||-

Adhikarana 20 (33-35) · Śloka 36

প্রযোগপানে তস্যাষ্টৌ কালাঃ সম্পরিকীর্তিতাঃ||৩৩|| বাতশ্লেষ্মসমুত্ক্লেশঃ কালেষ্বেষু হি লক্ষ্যতে| স্নাত্বা ভুক্ত্বা সমুল্লিখ্য ক্ষুত্বা দন্তান্নিঘৃষ্য চ| নাবনাঞ্জননিদ্রান্তে চাত্মবান্ ধূমপো ভবেত্| তথা বাতকফাত্মানো ন ভবন্ত্যূর্ধ্বজত্রুজাঃ||৩৫|| রোগাস্তস্য তু পেযাঃ স্যুরাপানাস্ত্রিস্ত্রযস্ত্রযঃ|৩৬|

ধূমপানকালং দর্শযতি- প্রযোগেত্যাদি| প্রযোগপানে প্রাযোগিকধূমপানে এতেঽষ্টৌ কালাঃ, স্নৈহিকপানে তু বাতবৃদ্ধ্যুপলক্ষিতঃ কালঃ, বৈরেচনিকপানে তু শ্লেষ্মবৃদ্ধ্যুপলক্ষিতো মন্তব্যঃ| প্রাযোগিক এব প্রাযঃ স্বস্থবৃত্তাধিকারে, তেন তত্কাল এব কণ্ঠরবেণাভিধীযতে; যদি বা প্রযোগপানে সততপানে স্বস্থাধিকার ইতি যাবত্; তেন ধূমত্রযস্যাপ্যেতে কালা ভবন্তি| বাতকফাত্মশব্দেন বাতাত্মানঃ কফাত্মানো বাতকফাত্মানশ্চ গৃহ্যন্তে| পেযাঃ স্যুরিত্যাদাবাপানা ধূমাভ্যবহারমোক্ষাঃ; একৈকস্মিন্ স্নানাদিধূমপানকালে ত্রিরিতি আবৃত্তিত্রযং কর্তব্যাঃ; তে চাবৃত্তিত্রযেঽপি ত্রিধা ত্রিধা কর্তব্যাঃ; একৈকস্মিন্ ধূমপানকালে নব ধূমাভ্যবহারমোক্ষাঃ কর্তব্যাঃ; ত্রীংস্ত্রীনভ্যবহারান্ কৃত্বা বিশ্রামোঽন্তরা কর্তব্য ইত্যর্থঃ||৩৩-৩৫||-

Adhikarana 21 (36-37) · Śloka 38

পরং দ্বিকালপাযী স্যাদহ্নঃ কালেষু বুদ্ধিমান্||৩৬|| প্রযোগে, স্নৈহিকে ত্বেকং, বৈরেচ্যং ত্রিচতুঃ পিবেত্| হৃত্কণ্ঠেন্দ্রিযসংশুদ্ধির্লঘুত্বং শিরসঃ শমঃ||৩৭|| যথেরিতানাং দোষাণাং সম্যক্পীতস্য লক্ষণম্|৩৮|

অষ্টসু কালেষ্বেকস্মিন্নেকস্মিন্ দিবসে যস্মিন্ ধূমে যাবান্ যাবান্ পানকালনিযমস্তং দর্শযতি- পরমিত্যাদি| কালেষু স্নাত্বেত্যাদিকালেষু| প্রযোগে প্রাযোগিকধূমে| স্নৈহিকে ত্বেকমিতি স্নৈহিকধূমে একমেব কালং ব্যাপ্য ধূমং পিবেদিতি যোজ্যম্| ত্রিচতুরিতি বৈরেচ্যে দোষবলাপেক্ষো বিকল্পঃ||৩৬-৩৭||-

Adhikarana 22 (38-40) · Śloka 40

বাধির্যমান্ধ্যমূকত্বং রক্তপিত্তং শিরোভ্রমম্||৩৮|| অকালে চাতিপীতশ্চ ধূমঃ কুর্যাদুপদ্রবান্| তত্রেষ্টং সর্পিষঃ পানং নাবনাঞ্জনতর্পণম্||৩৯|| স্নৈহিকং ধূমজে দোষে বাযুঃ পিত্তানুগো যদি| শীতং তু রক্তপিত্তে স্যাচ্ছ্লেষ্মপিত্তে বিরূক্ষণম্||৪০||

বাধির্যেত্যাদি| ধূমজ ইত্যবিধিপ্রযুক্তধূমকৃতে যদি বাযুঃ পিত্তানুগো বৃদ্ধস্তদা নাবনাঞ্জনতর্পণং স্নৈহিকং স্নেহকৃতং কর্তব্যং, শীতং শীতদ্রব্যকৃতং কর্তব্যং নাবনাদ্যেব, বিরূক্ষণমপি নাবনাদ্যেব||৩৮-৪০||

Adhikarana 23 (41-45) · Śloka 46

পরং ত্বতঃ প্রবক্ষ্যামি ধূমো যেষাং বিগর্হিতঃ| ন বিরিক্তঃ পিবেদ্ধূমং ন কৃতে বস্তিকর্মণি||৪১|| ন রক্তী ন বিষেণার্তো ন শোচন্ন চ গর্ভিণী| ন শ্রমে ন মদে নামে ন পিত্তে ন প্রজাগরে||৪২|| ন মূর্চ্ছাভ্রমতৃষ্ণাসু ন ক্ষীণে নাপি চ ক্ষতে| ন মদ্যদুগ্ধে পীত্বা চ ন স্নেহং ন চ মাক্ষিকম্||৪৩|| ধূমং ন ভুক্ত্বা দধ্না চ ন রূক্ষঃ ক্রুদ্ধ এব চ| ন তালুশোষে তিমিরে শিরস্যভিহিতে ন চ||৪৪|| ন শঙ্খকে ন রোহিণ্যাং ন মেহে ন মদাত্যযে| এষু ধূমমকালেষু মোহাত্ পিবতি যো নরঃ||৪৫|| রোগাস্তস্য প্রবর্ধন্তে দারুণা ধূমবিভ্রমাত্|৪৬|

ন বিরিক্ত ইত্যাদৌ প্রতিনিষেধ্যং নকারকরণং নিষেধগৌরবদর্শনার্থম্| ধূমং ন ভুক্ত্বেতি পুনর্ধূমগ্রহণং দধ্না ভুক্তবতো বিশেষপ্রতিষেধার্থম্||৪১-৪৫||-

Adhikarana 24 (46-47) · Śloka 48

ধূমযোগ্যঃ পিবেদ্দোষে শিরোঘ্রাণাক্ষিসংশ্রযে||৪৬|| ঘ্রাণেনাস্যেন কণ্ঠস্থে মুখেন ঘ্রাণপো বমেত্| আস্যেন ধূমকবলান্ পিবন্ ঘ্রাণেন নোদ্বমেত্||৪৭|| প্রতিলোমং গতো হ্যাশু ধূমো হিংস্যাদ্ধি চক্ষুষী|৪৮|

ধূমযোগ্য ইত্যাদৌ ঘ্রাণেনেতি ছেদঃ| প্রতিলোমং গত আস্যপীতো ঘ্রাণং গত ইত্যর্থঃ| হিশব্দদ্বযং চ হেতৌ| তেনাযমর্থঃ- যস্মাত্ প্রতিলোমং বিমার্গং গতো ধূমস্তস্মাচ্চক্ষুষী হিংস্যাত্, যস্মাদ্ধিংস্যাত্ তস্মাদ্ ঘ্রাণেন নোদ্বমেদিতি||৪৬-৪৭||-

Adhikarana 25 (48) · Śloka 49

ঋজ্বঙ্গচক্ষুস্তচ্চেতাঃ সূপবিষ্টস্ত্রিপর্যযম্||৪৮|| পিবেচ্ছিদ্রং পিধাযৈকং নাসযা ধূমমাত্মবান্|৪৯|

সম্যগুপবিষ্টঃ সূপবিষ্টঃ| ত্রিপর্যযমিতি তু যদ্যপি পূর্বমেবোক্তম্ ‘আপানাস্ত্রিস্ত্রযস্ত্রযঃ’ ইত্যনেন, তথাঽপি ত্রিপর্যযধূমপানপর্যন্তমৃজ্বঙ্গচক্ষুরাদি কর্তব্যং নোপক্রমমাত্র এবেতি পুনরভিধানেন দর্শযতি| নাসিকযাঽপি রন্ধ্রৈকচ্ছিদ্রং পিধায পিবেন্ন পুনর্নাসিকযৈব পিবেদিতি নিযমঃ||৪৮||-

Adhikarana 26 (49-50) · Śloka 51

চতুর্বিংশতিকং নেত্রং স্বাঙ্গুলীভির্বিরেচনে||৪৯|| দ্বাত্রিংশদঙ্গুলং স্নেহে প্রযোগেঽধ্যর্ধমিষ্যতে| ঋজু ত্রিকোষাফলিতং কোলাস্থ্যগ্রপ্রমাণিতম্||৫০|| বস্তিনেত্রসমদ্রব্যং ধূমনেত্রং প্রশস্যতে|৫১|

নেত্রং নলিকা| চতুর্বিংশতিকং চতুর্বিংশত্যঙ্গুলম্| অধ্যর্ধং সার্ধমিত্যর্থঃ; ইহ বৈরেচনিকনেত্রমেব চতুর্বিংশত্যঙ্গুলপ্রমাণং সার্ধং সত্ ষট্ত্রিংশদঙ্গুলপ্রমাণং প্রাযোগিকধূমপানে; তত্তু জতূকর্ণপ্রত্যযাদ্বোদ্ধব্যম্| যদাহ- “সার্ধস্ত্র্যংশযুতঃ পূর্ণো হস্তঃ প্রাযোগিকাদিষু” ইতি| ত্রিকোষাফলিতমিতি ত্রিভিঃ পর্বভির্ভিন্নৈঃ সমন্বিতম্||৪৯-৫০||-

Adhikarana 27 (51) · Śloka 52

দূরাদ্বিনির্গতঃ পর্বচ্ছিন্নো নাডীতনূকৃতঃ||৫১|| নেন্দ্রিযং বাধতে ধূমো মাত্রাকালনিষেবিতঃ|৫২|

যথাভিহিতনলিকযা পানে গুণং দর্শযতি- দূরাদিত্যাদি||৫১||-

Adhikarana 28 (52-55) · Śloka 56

যদা চোরশ্চ কণ্ঠশ্চ শিরশ্চ লঘুতাং ব্রজেত্||৫২|| কফশ্চ তনুতাং প্রাপ্তঃ সুপীতং ধূমমাদিশেত্| অবিশুদ্ধঃ স্বরো যস্য কণ্ঠশ্চ সকফো ভবেত্||৫৩|| স্তিমিতো মস্তকশ্চৈবমপীতং ধূমমাদিশেত্| তালু মূর্ধা চ কণ্ঠশ্চ শুষ্যতে পরিতপ্যতে||৫৪|| তৃষ্যতে মুহ্যতে জন্তূ রক্তং চ স্রবতেঽধিকম্| শিরশ্চ ভ্রমতেঽত্যর্থং মূর্চ্ছা চাস্যোপজাযতে||৫৫|| ইন্দ্রিযাণ্যুপতপ্যন্তে ধূমেঽত্যর্থং নিষেবিতে|৫৬|

কেচিদ্ধূমসম্যক্পানাদিলক্ষণং গ্রন্থং পঠন্তি| তত্র, যদা চোরশ্চেত্যাদি সম্যগ্ধূমপানলক্ষণম্, অবিশুদ্ধ ইত্যাদ্যযোগলক্ষণং, তাল্বিত্যাদ্যতিযোগলক্ষণম্||৫২-৫৫||-

Adhikarana 29 (56-62) · Śloka 63

বর্ষে বর্ষেঽণুতৈলং চ কালেষু ত্রিষু না চরেত্||৫৬|| প্রাবৃট্শরদ্বসন্তেষু গতমেঘে নভস্তলে| নস্যকর্ম যথাকালং যো যথোক্তং নিষেবতে||৫৭|| ন তস্য চক্ষুর্ন ঘ্রাণং ন শ্রোত্রমুপহন্যতে| ন স্যুঃ শ্বেতা ন কপিলাঃ কেশাঃ শ্মশ্রূণি বা পুনঃ||৫৮|| ন চ কেশাঃ প্রমুচ্যন্তে বর্ধন্তে চ বিশেষতঃ| মন্যাস্তম্ভঃ শিরঃশূলমর্দিতং হনুসঙ্গ্রহঃ||৫৯|| পীনসার্ধাবভেদৌ চ শিরঃকম্পশ্চ শাম্যতি| সিরাঃ শিরঃকপালানাং সন্ধযঃ স্নাযুকণ্ডরাঃ||৬০|| নাবনপ্রীণিতাশ্চাস্য লভন্তেঽভ্যধিকং বলম্| মুখং প্রসন্নোপচিতং স্বরঃ স্নিগ্ধঃ স্থিরো মহান্||৬১|| সর্বেন্দ্রিযাণাং বৈমল্যং বলং ভবতি চাধিকম্| ন চাস্য রোগাঃ সহসা প্রভবন্ত্যূর্ধ্বজত্রুজাঃ||৬২|| জীর্যতশ্চোত্তমাঙ্গেষু জরা ন লভতে বলম্|৬৩|

ধূমনস্যযোর্নাসাদ্বারসামান্যাদ্ধূমমনু নস্যং ব্রূতে- বর্ষ ইত্যাদি| অণূনাং স্রোতসাং হিতমিত্যণুতৈলং, তচ্চাগ্রে বক্ষ্যমাণম্| শিরঃকপালানামেব সিরাঃ সন্ধযঃ স্নাযুকণ্ডরাশ্চ| উত্তমাঙ্গেষ্বিতি বহুবচনং শিরসোঽভ্যর্হিতত্বাত্; যদি বা জরা বলীপলিতাদিলক্ষণা যা সা উত্তমা প্রকর্ষপ্রাপ্তাঽঙ্গেষু মস্তকাদিষু নিষিধ্যতে||৫৬-৬২||-

Adhikarana 30 (63-70) · Śloka 71

চন্দনাগুরুণী পত্রং দার্বীত্বঙ্মধুকং বলাম্||৬৩|| প্রপৌণ্ডরীকং সূক্ষ্মৈলাং বিডঙ্গং বিল্বমুত্পলম্| হ্রীবেরমভযং বন্যং ত্বঙ্মুস্তং সারিবাং স্থিরাম্||৬৪|| জীবন্তীং পৃশ্নিপর্ণীং চ সুরদারু শতাবরীম্| হরেণুং বৃহতীং ব্যাঘ্রীং সুরভীং পদ্মকেশরম্||৬৫|| বিপাচযেচ্ছতগুণে মাহেন্দ্রে বিমলেঽম্ভসি| তৈলাদ্দশগুণং শেষং কষাযমবতারযেত্||৬৬|| তেন তৈলং কষাযেণ দশকৃত্বো বিপাচযেত্| অথাস্য দশমে পাকে সমাংশং ছাগলং পযঃ||৬৭|| দদ্যাদেষোঽণুতৈলস্য নাবনীযস্য সংবিধিঃ| অস্য মাত্রাং প্রযুঞ্জীত তৈলস্যার্ধপলোন্মিতাম্||৬৮|| স্নিগ্ধস্বিন্নোত্তমাঙ্গস্য পিচুনা নাবনৈস্ত্রিভিঃ| ত্র্যহাত্ত্র্যহাচ্চ সপ্তাহমেতত্ কর্ম সমাচরেত্||৬৯|| নিবাতোষ্ণসমাচারী হিতাশী নিযতেন্দ্রিযঃ| তৈলমেতত্ত্রিদোষঘ্নমিন্দ্রিযাণাং বলপ্রদম্||৭০|| প্রযুঞ্জানো যথাকালং যথোক্তানশ্নুতে গুণান্|৭১|

চন্দনেত্যাদৌ দার্ব্যাস্ত্বক্ দার্বীত্বক্, জীবন্তী সুবর্ণনালা স্বনামপ্রসিদ্ধা, সুরভী শূকশিম্বা, পদ্মস্য কেশরং পদ্মকেশরম্| মাহেন্দ্রে আন্তরিক্ষে| শতগুণে তৈলাদিতি যোজ্যম্| দশগুণমিত্যেতদপি তৈলাদিতি যোজনীযম্| অত্র তু ক্বাথ্যভেষজং তাবন্মানং গ্রাহ্যং যাবতা ক্বাথার্থোপাত্তং পানীযং ভেষজচতুর্গুণং ভবতি, “ক্বাথ্যাচ্চতুর্গুণং বারি” ইত্যস্যাবাধিতত্বাত্, ন তু ভেষজাচ্ছতগুণেঽম্ভসীত্যেবং ব্যাখ্যেযং; যদাহ জতূকর্ণঃ- “পক্ত্বাঽথাম্বুশতপ্রস্থে দশভাগস্থিতেন তু| তৈলপ্রস্থং পচেত্তেন ছাগীক্ষীরেণ সংযুতম্” ইতি| যদি বা, তৈলপ্রমাণানুমানেনৈব “স্নেহাচ্চতুর্গুণং ক্বাথ্যং” ইতি পরিভাষযা ক্বাথ্যদ্রব্যপরিমাণং ব্যবস্থাপনীযম্| পিচুনেতি তূলকপিণ্ডিকযা| নাবনৈস্ত্রিভিঃ বারত্রযেণেত্যর্থঃ| ত্র্যহাত্ত্র্যহাদিতি একৈকং দিনমন্তরীকৃত্য, সপ্তাহমিতি অন্তরিতদিনানি বর্জযিত্বা; তেনৈকৈকস্মিন্ ঋতৌ ত্রযোদশাহান্নস্যপ্রযোগঃ সমাপ্যতে||৬৩-৭০||-

Adhikarana 31 (71-75) · Śloka 76

আপোথিতাগ্রং দ্বৌ কালৌ কষাযকটুতিক্তকম্||৭১|| ভক্ষযেদ্দন্তপবনং দন্তমাংসান্যবাধযন্| নিহন্তি গন্ধং বৈরস্যং জিহ্বাদন্তাস্যজং মলম্||৭২|| নিষ্কৃষ্য রুচিমাধত্তে সদ্যো দন্তবিশোধনম্| করঞ্জকরবীরার্কমালতীককুভাসনাঃ||৭৩|| শস্যন্তে দন্তপবনে যে চাপ্যেবংবিধা দ্রুমাঃ| সুবর্ণরূপ্যতাম্রাণি ত্রপুরীতিমযানি চ||৭৪|| জিহ্বানির্লেখনানি স্যুরতীক্ষ্ণান্যনৃজূনি চ| জিহ্বামূলগতং যচ্চ মলমুচ্ছ্বাসরোধি চ||৭৫|| দৌর্গন্ধ্যং ভজতে তেন তস্মাজ্জিহ্বাং বিনির্লিখেত্|৭৬|

স্থানপ্রত্যাসত্ত্যা দন্তকাষ্ঠগুণান্ দর্শযতি- আপোথিতেত্যাদি| দ্বিকালং সাযং প্রাতরিতি| দন্তান্ পুনাতীতি দন্তপবনং দন্তকাষ্ঠম্| নিষ্কৃষ্য মলমিতি সম্বন্ধঃ| ককুভঃ অর্জুনঃ| এবংবিধা এবংরসা ইত্যর্থঃ||৭১-৭৫||-

Adhikarana 32 (76-77) · Śloka 77

ধার্যাণ্যাস্যেন বৈশদ্যরুচিসৌগন্ধ্যমিচ্ছতা||৭৬|| জাতীকটুকপূগানাং লবঙ্গস্য ফলানি চ| কক্কোলস্য ফলং পত্রং তাম্বূলস্য শুভং তথা| তথা কর্পূরনির্যাসঃ সূক্ষ্মৈলাযাঃ ফলানি চ||৭৭||

কটুকং লতাকস্তূরী| যদ্যপি লবঙ্গস্য বৃন্তমভিপ্রেতং তথাঽপি বহূনাং ফলস্য গ্রাহ্যত্বাচ্ছত্রিণো গচ্ছন্তীতি ন্যাযেন সামান্যেন ফলমিত্যুক্তম্||৭৬-৭৭||

Adhikarana 33 (78-89) · Śloka 89

হন্বোর্বলং স্বরবলং বদনোপচযঃ পরঃ| স্যাত্ পরং চ রসজ্ঞানমন্নে চ রুচিরুত্তমা||৭৮|| ন চাস্য কণ্ঠশোষঃ স্যান্নৌষ্ঠযোঃ স্ফুটনাদ্ভযম্| ন চ দন্তাঃ ক্ষযং যান্তি দৃঢমূলা ভবন্তি চ||৭৯|| ন শূল্যন্তে ন চাম্লেন হৃষ্যন্তে ভক্ষযন্তি চ| পরানপি খরান্ ভক্ষ্যাংস্তৈলগণ্ডূষধারণাত্||৮০|| নিত্যং স্নেহার্দ্রশিরসঃ শিরঃশূলং ন জাযতে| ন খালিত্যং ন পালিত্যং ন কেশাঃ প্রপতন্তি চ||৮১|| বলং শিরঃকপালানাং বিশেষেণাভিবর্ধতে| দৃঢমূলাশ্চ দীর্ঘাশ্চ কৃষ্ণাঃ কেশা ভবন্তি চ||৮২|| ইন্দ্রিযাণি প্রসীদন্তি সুত্বগ্ভবতি চাননম্ | নিদ্রালাভঃ সুখং চ স্যান্মূর্ধ্নি তৈলনিষেবণাত্||৮৩|| ন কর্ণরোগা বাতোত্থা ন মন্যাহনুসঙ্গ্রহঃ| নোচ্চৈঃ শ্রুতির্ন বাধির্যং স্যান্নিত্যং কর্ণতর্পণাত্||৮৪|| স্নেহাভ্যঙ্গাদ্যথা কুম্ভশ্চর্ম স্নেহবিমর্দনাত্| ভবত্যুপাঙ্গাদক্ষশ্চ দৃঢঃ ক্লেশসহো যথা||৮৫|| তথা শরীরমভ্যঙ্গাদ্দৃঢং সুত্বক্ চ জাযতে| প্রশান্তমারুতাবাধং ক্লেশব্যাযামসংসহম্||৮৬|| স্পর্শনেঽভ্যধিকো বাযুঃ স্পর্শনং চ ত্বগাশ্রিতম্| ত্বচ্যশ্চ পরমভ্যঙ্গস্তস্মাত্তং শীলযেন্নরঃ||৮৭|| ন চাভিঘাতাভিহতং গাত্রমভ্যঙ্গসেবিনঃ| বিকারং ভজতেঽত্যর্থং বলকর্মণি বা ক্বচিত্||৮৮|| সুস্পর্শোপচিতাঙ্গশ্চ বলবান্ প্রিযদর্শনঃ| ভবত্যভ্যঙ্গনিত্যত্বান্নরোঽল্পজর এব চ||৮৯||

হন্বোরিত্যাদি স্নেহগণ্ডূষগুণাঃ| নিত্যমিত্যাদি নিষেবণাদিত্যন্তং শিরস্তৈলগুণাঃ| মূর্ধ্নি তৈলনিষেবণাদিত্যুক্তেঽপি স্নেহার্দ্রশিরস ইতি যত্ করোতি, তেন যাবতা তৈলেনার্দ্রশিরাঃ স্যাত্তাবন্মূর্ধ্নি তৈলং সেব্যমিতি দর্শযতি| স্নেহাভ্যঙ্গাদিত্যাদি| উপাঙ্গস্নেহদানাত্, অক্ষো রথস্য চক্রনিবন্ধনকাষ্ঠম্| বহুদৃষ্টান্তকরণং তু কস্যচিত্ কিঞ্চিত্ প্রসিদ্ধং ভবিষ্যতি ন হি সর্বং সর্বত্র প্রসিদ্ধমিত্যভিপ্রাযেণ; যদি বা স্নেহস্য নানাকার্যকরণশক্ত্যুপদর্শনার্থম্| স্পর্শনে স্পর্শনেন্দ্রিযে বাযুরধিকঃ; বৈদ্যকদর্শনে পাঞ্চভৌতিকত্বাদিন্দ্রিযস্যেত্যর্থঃ| ত্বচ্যশ্চ পরমভ্যঙ্গ ইতি চকারাদ্বাতহিতশ্চ, এতেনাশ্রিতস্য বাতাধিকস্য স্পর্শনেন্দ্রিযস্য, আশ্রযস্য চ ত্বচো হিত ইত্যুক্তং ভবতি| বলেন সম্পাদ্যং কর্ম বলকর্ম গুরুভারহরণাদি||৭৮-৮৯||

Adhikarana 34 (90-92) · Śloka 92

খরত্বং স্তব্ধতা রৌক্ষ্যং শ্রমঃ সুপ্তিশ্চ পাদযোঃ| সদ্য এবোপশাম্যন্তি পাদাভ্যঙ্গনিষেবণাত্||৯০|| জাযতে সৌকুমার্যং চ বলং স্থৈর্যং চ পাদযোঃ| দৃষ্টিঃ প্রসাদং লভতে মারুতশ্চোপশাম্যতি||৯১|| ন চ স্যাদ্গৃধ্রসীবাতঃ পাদযোঃ স্ফুটনং ন চ| ন সিরাস্নাযুসঙ্কোচঃ পাদাভ্যঙ্গেন পাদযোঃ||৯২||

খরত্বমিত্যাদি পাদাভ্যঙ্গগুণাঃ| প্রথমং পাদযোরিতি পদং খরত্বাদিবিশেষণার্থং, দ্বিতীযং তু বলাদেঃ কালান্তরোত্পাদসূচনার্থং, তৃতীযং তু স্ফুটনবিশেষণার্থং, চতুর্থং তু সিরাস্নাযুবিশেষণার্থং, শিষ্টং তু পাদাভ্যঙ্গেনেতি পদং দূরান্তরিতস্য পাদাভ্যঙ্গস্য স্মরণার্থম্||৯০-৯২||

Adhikarana 35 (93-94) · Śloka 94

দৌর্গন্ধ্যং গৌরবং তন্দ্রাং কণ্ডূং মলমরোচকম্| স্বেদবীভত্সতাং হন্তি শরীরপরিমার্জনম্||৯৩|| পবিত্রং বৃষ্যমাযুষ্যং শ্রমস্বেদমলাপহম্ | শরীরবলসন্ধানং স্নানমোজস্করং পরম্||৯৪||

অভ্যঙ্গপূর্বকত্বাদুদ্বর্তনস্য তমনু পরিমার্জনমুদ্বর্তনং ব্রূতে- দৌর্গন্ধ্যমিত্যাদি| স্বেদেন বীভত্সতা স্বেদবীভত্সতা| শরীরস্য বলেন সন্ধানং যোজনং করোতীত্যর্থঃ||৯৩-৯৪||

Adhikarana 36 (95-102) · Śloka 102

কাম্যং যশস্যমাযুষ্যমলক্ষ্মীঘ্নং প্রহর্ষণম্| শ্রীমত্ পারিষদং শস্তং নির্মলাম্বরধারণম্||৯৫|| বৃষ্যং সৌগন্ধ্যমাযুষ্যং কাম্যং পুষ্টিবলপ্রদম্| সৌমনস্যমলক্ষ্মীঘ্নং গন্ধমাল্যনিষেবণম্||৯৬|| ধন্যং মঙ্গল্যমাযুষ্যং শ্রীমদ্ব্যসনসূদনম্| হর্ষণং কাম্যমোজস্যং রত্নাভরণধারণম্||৯৭|| মেধ্যং পবিত্রমাযুষ্যমলক্ষ্মীকলিনাশনম্| পাদযোর্মলমার্গাণাং শৌচাধানমভীক্ষ্ণশঃ||৯৮|| পৌষ্টিকং বৃষ্যমাযুষ্যং শুচি রূপবিরাজনম্| কেশশ্মশ্রুনখাদীনাং কল্পনং সম্প্রসাধনম্||৯৯|| চক্ষুষ্যং স্পর্শনহিতং পাদযোর্ব্যসনাপহম্| বল্যং পরাক্রমসুখং বৃষ্যং পাদত্রধারণম্||১০০|| ঈতেঃ প্রশমনং বল্যং গুপ্ত্যাবরণশঙ্করম্| ঘর্মানিলরজোম্বুঘ্নং ছত্রধারণমুচ্যতে||১০১|| স্খলতঃ সম্প্রতিষ্ঠানং শত্রূণাং চ নিষূদনম্| অবষ্টম্ভনমাযুষ্যং ভযঘ্নং দণ্ডধারণম্||১০২||

শ্রীমদিতি শোভাযুক্তম্| পরিষদি শস্তং পারিষদম্| শস্তং মঙ্গল্যম্| ব্যসনং সর্পপিশাচাদ্যভিঘাতঃ| রত্নবদাভরণানি, রত্নং তু বিশুদ্ধমাণিক্যহীরকমুক্তাফলসুবর্ণাদি| শৌচাধানং পানীযেন মৃদা চ| অভীক্ষ্ণশঃ পুনঃ পুনঃ| শুচি শুচিতাকারকম্| কল্পনং ছেদনং, সম্প্রসাধনং মণ্ডনম্; এতচ্চ যথাযোগ্যতযা যোজনীযং; কেশানাং প্রসাধনং সম্যগ্বন্ধনাদি; শ্মশ্রূণাং কল্পনমেব, নখস্য তু কল্পনমলক্তকাদিদানেন প্রসাধনং চ| আদিগ্রহণেন নাসালোমকল্পনাদি গৃহ্যতে| পাদযোরিতি স্পর্শনহিতমিত্যনেন ব্যসনাপহমিত্যনেন চ সম্বধ্যতে| পাদত্রং পাদধ্রী, পাদুকেতি যাবত্| অত্র চ বৃষ্যত্বচক্ষুষ্যত্বে প্রভাবাত্; যদি বা পাদসম্বদ্ধনেত্রপোষিকানাডীপ্রত্যবাযহরণাচ্চক্ষুষ্যম্| ঈতী রোগাদিদুর্দৈবম্| গুপ্তিঃ পিশাচাদিভ্যো রক্ষা, শঙ্করং কল্যাণকরম্| অবষ্টম্ভনং বলপ্রদম্| ভযঘ্নং সর্পাদিভ্যঃ||৯৫-১০২||

Adhikarana 37 (103) · Śloka 103

নগরী নগরস্যেব রথস্যেব রথী যথা| স্বশরীরস্য মেধাবী কৃত্যেষ্ববহিতো ভবেত্||১০৩||

সম্প্রত্যনুক্তস্বস্থবিধ্যুপসঙ্গ্রহার্থং তথোপদিষ্টস্যাবধানেন করণার্থমাহ- নগরীত্যাদি| কৃত্যেষু করণীযেষূক্তেষ্বনুক্তেষু চ| নগরদৃষ্টান্তেনান্তরপ্রত্যবাযহেতুবিঘাতকারিণি কৃত্যেঽবধানং দর্শযতি, রথদৃষ্টান্তেন চ বাহ্যস্পর্শাদিপরিহারকে কৃত্যেঽবধানং দর্শযতি| নগরোচ্ছেদে হ্যন্তরো দুষ্টজনসম্বন্ধ এব হেতুঃ প্রাযো ভবতি, রথভঙ্গে তু বাহ্যশ্বভ্রবিষমপতনাদিঃ||১০৩||

Adhikarana 38 (104) · Śloka 104

ভবতি চাত্র- বৃত্ত্যুপাযান্নিষেবেত যে স্যুর্ধর্মাবিরোধিনঃ| শমমধ্যযনং চৈব সুখমেবং সমশ্নুতে||১০৪||

প্রধানভূতাং শরীরপ্রত্যবেক্ষাং কৃত্বা স্বস্থেন সতা যদন্যচ্চ কর্তব্যং তদাহ- বৃত্ত্যুপাযানিত্যাদি| বৃত্তিঃ বর্তনং, তস্যোপাযাঃ কৃষ্যাদযো ধনৈষণাযাং তিস্রৈষণীযে বাচ্যাঃ| শমঃ শান্তিঃ, অধ্যযনং বেদাধ্যযনং, নিষেবেতেতি সম্বন্ধঃ| এবং সতি সুখং সমশ্নুতে প্রাপ্নোতি| এতেন কৃষ্যাদিভ্যোঽর্থঃ, শান্ত্যধ্যযনাভ্যাং ধর্মঃ, অর্থধর্মাভ্যাং চ সুখলক্ষণঃ কামঃ, ইতি ত্রিবর্গানুষ্ঠানং দর্শিতং ভবতি||১০৪||

Adhikarana 39 (105-111) · Śloka 111

তত্র শ্লোকাঃ- মাত্রা দ্রব্যাণি মাত্রাং চ সংশ্রিত্য গুরুলাঘবম্| দ্রব্যাণাং গর্হিতোঽভ্যাসো যেষাং, যেষাং চ শস্যতে||১০৫|| অঞ্জনং ধূমবর্তিশ্চ ত্রিবিধা বর্তিকল্পনা| ধূমপানগুণাঃ কালাঃ পানমানং চ যস্য যত্||১০৬|| ব্যাপত্তিচিহ্নং ভৈষজ্যং ধূমো যেষাং বিগর্হিতঃ| পেযো যথা যন্মযং চ নেত্রং যস্য চ যদ্বিধম্||১০৭|| নস্যকর্মগুণা নস্তঃকার্যং যচ্চ যথা যদা| ভক্ষযেদ্দন্তপবনং যথা যদ্যদ্গুণং চ যত্||১০৮|| যদর্থং যানি চাস্যেন ধার্যাণি কবলগ্রহে| তৈলস্য যে গুণা দিষ্টাঃ শিরস্তৈলগুণাশ্চ যে||১০৯|| কর্ণতৈলে তথাঽভ্যঙ্গে পাদাভ্যঙ্গেঽঙ্গমার্জনে| স্নানে বাসসি শুদ্ধে চ সৌগন্ধ্যে রত্নধারণে||১১০|| শৌচে সংহরণে লোম্নাং পাদত্রচ্ছত্রধারণে| গুণা মাত্রাশিতীযেঽস্মিংস্তথোক্তা দণ্ডধারণে||১১১||

মাত্রেত্যাদি অধ্যাযার্থসঙ্গ্রহঃ| মাত্রোক্তা যাবদ্ধ্যস্যাশনমিত্যাদিনা| তথা দ্রব্যাণি তত্র শালীত্যাদিনা| মাত্রাং চাশ্রিত্য গুরুলাঘবমিতি প্রকৃতিলঘূন্যপি মাত্রামেবাপেক্ষন্তে ইত্যেবম্প্রকারেণোক্তম্| পানস্য মানং পানমানম্, আপানাস্ত্রিস্ত্রযস্ত্রয ইত্যাদি| নস্তঃকার্যং যদিতি অণুতৈলম্| যথেতি পিচুনেত্যাদি| যদেতি প্রাবৃট্শরদিত্যাদি| শেষং সুগমম্||১০৫-১১১||

Adhikarana puShpikA · Śloka 5

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে মাত্রাশিতীযো নাম পঞ্চমোঽধ্যাযঃ সমাপ্তঃ||৫||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং দ্বিতীযে স্বস্থবৃত্তচতুষ্কে মাত্রাশিতীযো নাম পঞ্চমোঽধ্যাযঃ||৫||