4. ṣaḍvirēcanaśatāśritīyō'dhyāyaḥ

Adhikarana 1 (1-3) · Śloka 3

অথাতঃ ষড্বিরেচনশতাশ্রিতীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২|| ইহ খলু ষড্ বিরেচনশতানি ভবন্তি, ষড্ বিরেচনাশ্রযাঃ, পঞ্চ কষাযযোনযঃ, পঞ্চবিধং কষাযকল্পনং, পঞ্চাশন্মহাকষাযাঃ, পঞ্চ কষাযশতানি, ইতি সঙ্গ্রহঃ||৩||

অপামার্গতণ্ডুলীযেঽন্তঃপরিমার্জনমুক্তম্, আরগ্বধীযে চ বহিঃপরিমার্জনমুক্তং; সম্প্রতি পূর্বাধ্যাযদ্বযাপ্রতিপাদিতভেষজচতুষ্কাবশ্যবক্তব্যমবশিষ্টমুভযপরিমার্জনভেষজমভিধাতুং ষড্বিরেচনশতাশ্রিতীযোঽভিধীযতে| আশ্রীযত ইত্যাশ্রিতমাশ্রয ইত্যর্থঃ| ষট্সঙ্খ্যাবচ্ছিন্নানি বিরেচনশতান্যাশ্রিতানি চাধিকৃত্য কৃতোঽধ্যাযঃ ষড্বিরেচনশতাশ্রিতীযঃ, এতেনৈতদুক্তং- ষড্বিরেচনশতানি, ষড্বিরেচনাশ্রযাঃ, এতদ্দ্বযমধিকৃত্য সঞ্জ্ঞেযং প্রণীতেতি মন্তব্যম্| যদ্যপি চাধ্যাযাদাবিহ খল্বিতি পদং শ্রূযতে, তথাঽপি তদপ্রধানত্বান্নাধ্যাযসঞ্জ্ঞাপ্রণযনে নিবেশিতম্| ইহেতি অগ্নিবেশতন্ত্রেঽনতিসঙ্ক্ষেপবিস্তরে| এতেন বক্ষ্যমাণবিরেচনষট্শতানাং তথা পঞ্চাশন্মহাকষাযাণাং তথা পঞ্চকষাযশতানাং বিস্তরকল্পনাযামধিকত্বমপি ভবতীতি সূচ্যতে| অত এব বক্ষ্যতি কল্পে- “উদ্দেশমাত্রমেতাবদ্দ্রষ্টব্যমিহ ষট্শতম্| স্ববুদ্ধ্যৈবং সহস্রাণি কোটির্বা সম্প্রকল্পযেত্” (ক.অ.১২) ইতি| তথাঽত্রৈব বক্ষ্যতি- “ন হি বিস্তরস্য প্রমাণমস্তি” ইত্যাদি| খলুশব্দঃ প্রকাশনে| বিরেচনশব্দেনেহ বমনং বিরেচনং চ গৃহ্যতে| যতো বক্ষ্যতি কল্পে- “উভযং বা দোষমলবিরেচনাদ্বিরেচনশব্দং লভতে” (ক.অ.১) ইতি| ন চ বাচ্যং দোষমলবিরেচনাচ্চেদ্বিরেচনসঞ্জ্ঞা, তেন বস্তিশিরোবিরেচনযোরপি বিরেচনসঞ্জ্ঞাপ্রবৃত্তিঃ; যতস্তন্ত্রকারসিদ্ধেযং সঞ্জ্ঞা ন পাচকবদ্যোগমাত্রপ্রবৃত্তা; তন্ত্রকারশ্চ বমনবিরেচনযোরেব যোগরূঢাং সঞ্জ্ঞাং বিদধাতি নান্যত্র, তত্ কুতোঽন্যত্র প্রসক্তিঃ| ষড্বিরেচনশতানীত্যাদি স্বযমেবাচার্যো ব্যাখ্যাস্যতি| পঞ্চ কষাযশতানীত্যত্র কষাযশব্দেন মধুরাদীনাং লবণবর্জানাং রসানাং কষাযত্বেন পরিভাষিতানামাশ্রযত্বেনৌষধদ্রব্যমুচ্যতে| কষাযযোনযঃ কষাযজাতযঃ| কষাযাণাং যথোক্তদ্রব্যাণাং কল্পনমুপযোগার্থং সংস্করণং কষাযকল্পনম্| মহাকষাযা ইতি দশসঙ্খ্যাবচ্ছিন্নস্যৈককার্যকরণার্থোপাত্তস্যৌষধগণস্য সঞ্জ্ঞা; যদ্বক্ষ্যতি- “দশেমানি জীবনীযানি” ইত্যাদিনা||১-৩||

Adhikarana 2 (4) · Śloka 4

ষড্ বিরেচনশতানি, ইতি যদুক্তং তদিহ সঙ্গ্রহেণোদাহৃত্য বিস্তরেণ কল্পোপনিষদি ব্যাখ্যাস্যামঃ; (তত্র ) ত্রযস্ত্রিংশদ্যোগশতং প্রণীতং ফলেষু, একোনচত্বারিংশজ্জীমূতকেষু যোগাঃ, পঞ্চচত্বারিংশদিক্ষ্বাকুষু, ধামার্গবঃ ষষ্টিধা ভবতি যোগযুক্তঃ, কুটজস্ত্বষ্টাদশধা যোগমেতি, কৃতবেধনং ষষ্টিধা ভবতি যোগযুক্তং, শ্যামাত্রিবৃদ্যোগশতং প্রণীতং দশাপরে চাত্র ভবন্তি যোগাঃ, চতুরঙ্গুলো দ্বাদশধা যোগমেতি, লোধ্রং বিধৌ ষোডশযোগযুক্তং, মহাবৃক্ষো ভবতি বিংশতিযোগযুক্তঃ, একোনচত্বারিংশত্ সপ্তলাশঙ্খিন্যোর্যোগাঃ, অষ্টচত্বারিংশদ্দন্তীদ্রবন্ত্যোঃ, ইতি ষড্বিরেচনশতানি||৪||

সঙ্গ্রহেণ উদ্দেশমাত্রেণ| কল্প এবোপনিষত্ কল্পোপনিষত্; উপনিষদিত্যত্যুপযুক্তরহস্যবিদ্যোপদেশস্থানমুচ্যতে বেদে; তদ্বদিহাপি কল্পস্যাত্যুপযুক্তত্বেন রহস্যবমনবিরেচনপ্রযোগোপদেশকত্বাত্ কল্প এবোপনিষদিত্যুচ্যতে| ন চ বাচ্যং কল্প এব বিস্তরেণ ষড্বিরেচনশতান্যভিধাস্যন্তে, তেন তদেবাস্তু, অলমনেন সঙ্ক্ষেপাভিধানেন সম্যগববোধানুপাযত্বাত্; যতস্তন্ত্রধর্মোঽযং- যত্ প্রথমং সূত্রণং ভবতি, তদনু তদ্বিবরণং প্রপঞ্চেন; উচ্যতে চ ন্যাযবিদ্ভিঃ- “তে বৈ বিষযাশ্চ সুসঙ্গৃহীতা ভবন্তি যেষাং সমাসো ব্যাসশ্চ” ইতি| ত্রযস্ত্রিংশতাঽধিকং যোগশতং ত্রযস্ত্রিংশদ্যোগশতম্| কৃতবেধনযোগান্তা যোগা বমনস্য, শেষা বিরেচনস্য| অত্রেতি শ্যামাত্রিবৃতোরেব| শ্যামেতি শ্যামমূলা ত্রিবৃত্, ত্রিবৃদিতি অরুণমূলা ত্রিবৃত্||৪||

Adhikarana 3 (5) · Śloka 5

ষড্ বিরেচনাশ্রযা ইতি ক্ষীরমূলত্বক্পত্রপুষ্পফলানীতি||৫||

ষডিত্যাদি| ষডেব বিরেচনাশ্রযা বিরেচনাধিকরণানি| অত্র হি ক্ষীরমাদৌ কৃতং তীক্ষ্ণবিরেচনত্বাত্; উক্তং হি- “স্নুক্পযস্তীক্ষ্ণবিরেচনানাম্” (সূ.অ.২৫) ইতি| ত্বগিত্যনেন লোধ্রত্বগ্গৃহ্যতে| পত্রমিত্যনেন ইক্ষ্বাক্বাদিপত্রম্| যদ্বক্ষ্যতি কল্পে- “অপুষ্পস্য প্রবালানাং মুষ্টিং প্রাদেশসম্মিতাম্| ক্ষীরপ্রস্থে শৃতং দদ্যাত্ পিত্তোদ্রিক্তে কফজ্বরে” (ক.অ.৩) ইতি| যদ্যপি চৈরণ্ডতৈলতাম্রপারদাদীনাং ক্ষীরাদ্যধিকানামপি বিরেচনাশ্রযত্বং সম্ভবতি, তথাঽপি তেষামিহ তন্ত্রে কল্পস্থানে বিরেচনাশ্রযত্বেনানভিধানাদধ্যাযাদিপ্রতিপাদিতেনেহশব্দেন যোগাদিহ ষডাশ্রযা ইত্যবিরুদ্ধমেব||৫||

Adhikarana 4 (6) · Śloka 6

পঞ্চ কষাযযোনয ইতি মধুরকষাযোঽম্লকষাযঃ কটুকষাযস্তিক্তকষাযঃ কষাযকষাযশ্চেতি তন্ত্রে সঞ্জ্ঞা||৬||

পঞ্চ কষাযশতানি মহাকষাযব্যাখ্যযা ব্যাখ্যাতব্যানি, অতস্তদুল্লঙ্ঘ্য পঞ্চ কষাযযোনযোঽভিধীযন্তে| মধুরশ্চাসৌ কষাযশ্চেতি মধুরকষাযঃ, এবং শেষেষ্বপি| তন্ত্রে সঞ্জ্ঞেত্যনেন লবণরসং বর্জযিত্বা মধুরাদযো রসাঃ কষাযসঞ্জ্ঞযা ব্যবহ্রিযন্তে ইত্যযং স্বতন্ত্রসময ইতি সূচযতি, নাত্র পরতন্ত্রব্যবহার ইতি| অথ কিমর্থং পুনরাচার্যেণ কষাযসঞ্জ্ঞাপ্রণযনে লবণস্য মধুরাদেরিব গুণাদিভিরুদ্দিষ্টস্য তথা প্রযোগেষু চিত্রকগুডিকাদৌ “দ্বৌ ক্ষারৌ লবণানি চ” (চি.অ.১৫) ইত্যাদিনোদ্দিষ্টস্য রোগভিষগ্জিতীযে (বি.অ.৮) চ স্কন্ধেনোপদিষ্টস্য রসাধিকারেষু চ তেষু তেষু মধুরাদিবদুপদিষ্টস্য পরিত্যাগঃ ক্রিযতে? উচ্যতে- কষাযসঞ্জ্ঞেযং ভেষজত্বেন ব্যাপ্রিযমাণেষু রসেষ্বাচার্যেণ নিবেশিতা| অত্র চ কেবলস্য লবণস্য প্রযোগো নাস্তি, মধুরাদীনাং তু কেবলানামপি প্রযোগোঽস্তি, লবণং তু দ্রব্যান্তরসংযুক্তমেবোপযুজ্যতে| মধুরাদিষু স্বরসকল্কাদিলক্ষণা কল্পনা সম্ভবতি, ন লবণে| যতো ন তাবল্লবণস্য স্বরসোঽস্তি; কল্কোঽপি দ্রব্যস্য দ্রবেণ পেষণাত্ ক্রিযতে, তচ্চ ন সম্ভবতি লবণে, লবণং হি পানীযযোগাত্ পানীযমেব ভবতি; যদ্যপি কল্কস্যৈব ভেদশ্চূর্ণং, চূর্ণতা চ লবণস্য সম্ভবতি, তথাঽপি লবণস্য চূর্ণরূপতা ন পূর্বস্মাদচূর্ণরূপাত্ কিঞ্চিচ্ছক্তিবিশেষমাপাদযতি, শক্তিবিশেষকল্পনার্থং চ কল্পনা ক্রিযত ইত্যুত্তরত্র প্রতিপাদযিষ্যামঃ, তস্মাচ্চূর্ণত্বমপি লবণস্য কল্পনকল্পনমিব; শৃতশীতফাণ্টকষাযাস্তু দ্রব্যস্য কার্ত্স্ন্যেনানুপযোজ্যস্য তত্তত্সংস্কারবশাদ্দ্রবেষু দ্রব্যস্য স্তোকাবযবানুপ্রবেশার্থমুপদিশ্যন্তে; লবণে চৈতন্ন সম্ভবতি, লবণং হি দ্রবসম্বন্ধে সর্বাত্মনৈব দ্রবমনুগতং ভবতি; তস্মাল্লবণং পৃথক্প্রযোগাভাবাত্ কল্পনাঽসম্ভবাচ্চাচার্যেণ কষাযসঞ্জ্ঞাপ্রণযনে নিরস্তমিতি ন নিষ্প্রযোজনেযমাচার্যপ্রবৃত্তিঃ||৬||

Adhikarana 5 (7) · Śloka 7

পঞ্চবিধং কষাযকল্পনমিতি তদ্যথা- স্বরসঃ, কল্কঃ, শৃতঃ, শীতঃ, ফাণ্টঃ, কষায ইতি| (যন্ত্রনিষ্পীডিতাদ্দ্রব্যাদ্রসঃ স্বরস উচ্যতে | যঃ পিণ্ডো রসপিষ্টানাং স কল্কঃ পরিকীর্তিতঃ || বহ্নৌ তু ক্বথিতং দ্রব্যং শৃতমাহুশ্চিকিত্সকাঃ | দ্রব্যাদাপোত্থিতাত্তোযে প্রতপ্তে নিশি সংস্থিতাত্ || কষাযো যোঽভিনির্যাতি স শীতঃ সমুদাহৃতঃ | ক্ষিপ্ত্বোষ্ণতোযে মৃদিতং তত্ ফাণ্টং পরিকীর্তিতম্ ||) তেষাং যথাপূর্বং বলাধিক্যম্; অতঃ কষাযকল্পনা ব্যাধ্যাতুরবলাপেক্ষিণী; ন ত্বেবং খলু সর্বাণি সর্বত্রোপযোগীনি ভবন্তি||৭||

কল্পনমুপযোগার্থং প্রকল্পনং সংস্করণমিতি যাবত্ স্বরসাদিবহুলক্ষণং; যথা- “স্বো রসঃ স্বরসঃ প্রোক্তঃ, কল্কো দৃষদি পেষিতঃ| ক্বথিতস্তু শৃতঃ, শীতঃ শর্বরীমুষিতো মতঃ|| ক্ষিপ্তোষ্ণতোযে মৃদিতঃ ফাণ্ট ইত্যভিধীযতে” ইতি| অত্র শৌনকবচনং তু “দ্রব্যাদাপোথিতাত্তোযে প্রতপ্তে নিশি সংস্থিতাত্| কষাযো যোঽভিনির্যাতি স শীতঃ সমুদাহৃতঃ” ইতি| ফাণ্টঃ কষায ইতি কষাযশব্দোঽযং স্বরসাদিভিরপি সম্বধ্যতে, তেন স্বরসঃ কষাযঃ, কল্কঃ কষাযঃ, ইত্যাদ্যপি বোদ্ধব্যম্| তেষাং স্বরসাদীনাং যথাপূর্বং বলাধিক্যমিতি ফাণ্টাচ্ছীতো গুরুঃ, শীতাচ্ছৃতো গুরুরিত্যাদি| যতো যথাপূর্বং গুর্বী কষাযকল্পনা, অত এব ব্যাধ্যাতুরবলাপেক্ষিণী; ব্যাধেরাতুরস্য চ বলমপেক্ষত ইত্যর্থঃ| অত্রোপপত্তিমাহ- ন ত্বেবমিত্যাদি| বলবতি পুরুষে ব্যাধৌ চ দ্রব্যসারভাগমযত্বেনাত্যর্থং গুরুর্বহুকার্যকরঃ স্বরসো যুজ্যতে, নাযমল্পবলে পুরুষে রোগে বা যোগবান্ ভবতি, বলভ্রংশভেষজাতিযোগদোষকর্তৃত্বাদিতি ভাবঃ; এবমন্যত্রাপি ব্যাখ্যেযম্| তথা ন সর্বাণি স্বরসাদীনি সর্বত্র পুরুষে যোগ্যানি ভবন্তি; যতঃ কেচিত্ স্বরসদ্বিষঃ, কেচিত্ স্বরসপ্রিযা ইতরকল্পনাদ্বিষ এবমাদি| ন চাত্যর্থং দ্বিষ্টভেষজস্য প্রযোগ ইষ্যতে, তত্ক্ষণবমনারুচ্যাদিদোষকর্তৃত্বাত্ | তথা কষাযকল্পনা ব্যাধ্যাতুরবলাপেক্ষিণীত্যেতদুদাহরণার্থং, তেন দ্রব্যাপেক্ষিণীত্যেতদপি বোদ্ধব্যম্| যতো দ্রব্যনিযমেন কল্পনানিযমং বক্ষ্যতি রসাযনে; যথা- “মণ্ডূকপর্ণ্যাঃ স্বরসঃ প্রযোজ্যঃ, ক্ষীরেণ যষ্টীমধুকস্য চূর্ণম্| রসো গুডূচ্যাস্তু সমূলপুষ্প্যাঃ, কল্কঃ প্রযোজ্যঃ খলু শঙ্খপুষ্প্যাঃ” (চি.অ.১) ইতি| চূর্ণং কল্ক এবান্তর্ভাবনীযং, দ্বিবিধো হি কল্কঃ সদ্রবোঽদ্রবশ্চেতি কৃত্বা; তেন “নিশি স্থিতা বা স্বরসীকৃতা বা কল্কীকৃতা চূর্ণমথো শৃতা বা” (চি.অ.৪) ইত্যাদৌ পৃথক্ চূর্ণপাঠেনাধিককল্পনাপ্রসঙ্গো নোদ্ভাবনীযঃ||৭||

Adhikarana 6 (8) · Śloka 8

‘পঞ্চাশন্মহাকষাযা’ ইতি যদুক্তং তদনুব্যাখ্যাস্যামঃ; তদ্যথা- জীবনীযো বৃংহণীযো লেখনীযো ভেদনীযঃ সন্ধানীযো দীপনীয ইতি ষট্কঃ কষাযবর্গঃ; বল্যো বর্ণ্যঃ কণ্ঠ্যো হৃদ্য ইতি চতুষ্কঃ কষাযবর্গঃ; তৃপ্তিঘ্নোঽর্শোঘ্নঃ কুষ্ঠঘ্নঃ কণ্ডূঘ্নঃ ক্রিমিঘ্নো বিষঘ্ন ইতি ষট্কঃ কষাযবর্গঃ; স্তন্যজননঃ স্তন্যশোধনঃ শুক্রজননঃ শুক্রশোধন ইতি চতুষ্কঃ কষাযবর্গঃ; স্নেহোপগঃ স্বেদোপগো বমনোপগো বিরেচনোপগ আস্থাপনোপগোঽনুবাসনোপগঃ শিরোবিরেচনোপগ ইতি সপ্তকঃ কষাযবর্গঃ; ছর্দিনিগ্রহণস্তৃষ্ণানিগ্রহণো হিক্কানিগ্রহণ ইতি ত্রিকঃ কষাযবর্গঃ; পুরীষসঙ্গ্রহণীযঃ পুরীষবিরজনীযো মূত্রসঙ্গ্রহণীযো মূত্রবিরজনীযো মূত্রবিরেচনীয ইতি পঞ্চকঃ কষাযবর্গঃ; কাসহরঃ শ্বাসহরঃ শোথহরো জ্বরহরঃ শ্রমহর ইতি পঞ্চকঃ কষাযবর্গঃ; দাহপ্রশমনঃ শীতপ্রশমন উদর্দপ্রশমনোঽঙ্গমর্দপ্রশমনঃ শূলপ্রশমন ইতি পঞ্চকঃ কষাযবর্গঃ; শোণিতস্থাপনো বেদনাস্থাপনঃ সঞ্জ্ঞাস্থাপনঃ প্রজাস্থাপনো বযঃস্থাপন ইতি পঞ্চকঃ কষাযবর্গঃ; ইতি পঞ্চাশন্মহাকষাযা মহতাং চ কষাযাণাং লক্ষণোদাহরণার্থং ব্যাখ্যাতা ভবন্তি| তেষামেকৈকস্মিন্ মহাকষাযে দশ দশাবযবিকান্ কষাযাননুব্যাখ্যাস্যামঃ; তান্যেব পঞ্চ কষাযশতানি ভবন্তি||৮||

মহাকষাযানুদাহরতি- পঞ্চাশদিত্যাদি| জীবনে হিতো জীবনীযঃ; এবমন্যত্রাপি| ষড্ভির্নিষ্পাদিতঃ ষট্কঃ, এবং চতুষ্কাদিষ্বপি বোধ্যম্| অত্র চ ষট্কাদির্মহাকষাযাণাং পরিচ্ছেদঃ কস্যচিদর্থস্যানুগমেন বোদ্ধব্যঃ; যথা- জীবনীযাদৌ ষট্কে ঈযান্তত্বং, বল্যাদৌ যপ্রত্যযান্তত্বং, তৃপ্তিঘ্নাদৌ ঘ্নান্তত্বং, স্তন্যজননাদৌ স্তন্যশুক্রবিষযত্বম্, এবমাদ্যূহ্যম্ | এতচ্চ ঈযপ্রত্যযান্তত্বাদিনা বহুভেদকথনং বৈচিত্র্যেণ গ্রন্থস্য পুষ্কলাভিধানতাকরণার্থম্| এতচ্চ শাস্ত্রেঽবশ্যং কর্তব্যম্| যদুক্তমিহৈব শাস্ত্রগুণকথনে যথা- “অনবপতিতশব্দমকষ্টশব্দং পুষ্কলাভিধানম্” (বি.অ.৮) ইত্যাদি| জীবনীযশব্দেনেহাযুষ্যত্বমভিপ্রেতম্| যত্র চ মধুররসগুণে “আযুষ্যো জীবনীযঃ” (সূ.অ.২৬) ইতি চ করিষ্যতি তত্র মূর্চ্ছিতস্য সঞ্জ্ঞাজনকত্বেন জীবনীযত্বং ব্যাখ্যেযম্| তৃপ্তিঃ শ্লেষ্মবিকারো যেন তৃপ্তমিবাত্মানং মন্যতে, তদ্ঘ্নং তৃপ্তিঘ্নম্| স্নেহোপগানীতি স্নেহস্য সর্পিরাদেঃ স্নেহনক্রিযাযাং সহাযত্বেনোপগচ্ছন্তীতি স্নেহোপগানি, মৃদ্বীকাদিস্নেহোপগযুক্তস্য সর্পিরাদেঃ স্নেহনে প্রকর্ষবতী শক্তির্ভবতীত্যর্থঃ; তথা বমনোপগানীত্যত্র মদনফলাদীনাং বমনদ্রব্যাণাং মধুমধুকাদীনি সহাযানি ভবন্তীতি; এবং স্বেদোপগাদৌ ব্যাখ্যেযম্| শিরোবিরেচনোপগে তু শিরোবিরেচনপ্রধানান্যেব দ্রব্যাণি বোদ্ধব্যানি| পুরীষস্য বিরজনং দোষসম্বন্ধনিরাসং করোতীতি পুরীষবিরজনীযঃ| এবং মূত্রবিরজনীযে ব্যাখ্যেযম্| মূত্রস্য বিরেচনং করোতীতি মূত্রবিরেচনীযঃ| উদর্দো বরটীদষ্টাকারঃ শোথঃ, তত্প্রশমন উদর্দপ্রশমনঃ; ন পুনরিহ মহারোগাধ্যাযে পঠিতো বাতবিকারো গৃহ্যতে, তিন্দুকাদীনামুদর্দপ্রশমনানাং বাতং প্রত্যননুকূলত্বাত্| শোণিতস্য দুষ্টস্য দুষ্টিমপহৃত্য প্রকৃতৌ শোণিতং স্থাপযতীতি শোণিতস্থাপনম্| বেদনাযাং সম্ভূতাযাং তাং নিহত্য শরীরং প্রকৃতৌ স্থাপযতীতি বেদনাস্থাপনম্| সঞ্জ্ঞাং জ্ঞানং চ স্থাপযতীতি সঞ্জ্ঞাস্থাপনম্| প্রজোপঘাতকং দোষং হৃত্বা প্রজাং স্থাপযতীতি প্রজাস্থাপনম্| বযস্তরুণং স্থাপযতীতি বযঃস্থাপনম্| উপসংহরতি- ইতীত্যাদি| মহতাং কষাযাণাং পঞ্চাশন্মহাকষাযা ভবন্তীত্যনেনোদ্দিষ্টানাং, লক্ষণং স্বরূপং জীবনীযাদি, তস্যোদাহরণং প্রপঞ্চেন কথনং, তদর্থং ব্যাখ্যাতা নির্দেশেন কথিতা ইত্যর্থঃ; যদি বা মহতাং কষাযাণাং যল্লক্ষণমনেকৈঃ কষাযৈর্মিলিত্বৈকার্থজীবনীযাদিসম্পাদনং, তস্যোদাহরণার্থং দৃষ্টান্তার্থম্| এতেনান্যান্যপি মহাকষাযাণি বাতপ্রশমনপিত্তপ্রশমনাদীন্যেককার্যসম্পাদকানেকদ্রব্যমযানি ভবন্তীতি সূচযতি| মহতাং চেতি চকার উদাহরণার্থং চেত্যত্র বোদ্ধব্যঃ, তেনাল্পবুদ্ধীনাং ব্যবহারার্থং চেতি সমুচ্চিনোতি; এতচ্চোত্তরত্র স্ফুটং ভবিষ্যতি| উত্তরত্র যদ্বক্ষ্যতি- “মহতাং চ কষাযাণাং লক্ষণোদাহরণার্থং ব্যাখ্যাতা ভবন্তি” ইতি, তত্ তদ্যথেত্যাদিগ্রন্থস্যার্থং ব্যাকর্তুং; কিংবাঽত্র ব্যাখ্যাতা ইতি পদং সঞ্জ্ঞামাত্রেণ মহাকষাযকথনে বর্ততে, তত্র তু ব্যাখ্যাতা ইতি পদং প্রতি প্রতি জীবকাদিদ্রব্যকথনে বর্ততে, তেন ন পৌনরুক্ত্যম্| অবযবা এবাবযবিকাঃ, তান্যেব পঞ্চাশন্মহাকষাযাণি দশাবযবগুণিতান্যেকৈকদ্রব্যরূপাণি পঞ্চ কষাযশতানি ভবন্তীত্যর্থঃ||৮||

Adhikarana 7 (9) · Śloka 9

তদ্যথা- জীবকর্ষভকৌ মেদা মহামেদা কাকোলী ক্ষীরকাকোলী মুদ্গপর্ণীমাষপর্ণ্যৌ জীবন্তী মধুকমিতি দশেমানি জীবনীযানি ভবন্তি (১), ক্ষীরিণী রাজক্ষবকাশ্বগন্ধাকাকোলীক্ষীরকাকোলীবাট্যাযনীভদ্রৌদনীভারদ্বাজীপযস্যর্ষ্যগন্ধা ইতি দশেমানি বৃংহণীযানি ভবন্তি (২), মুস্তকুষ্ঠহরিদ্রাদারুহরিদ্রাবচাতিবিষাকটুরোহিণীচিত্রকচিরবিল্বহৈমবত্য ইতি দশেমানি লেখনীযানি ভবন্তি (৩), সুবহার্কোরুবুকাগ্নিমুখীচিত্রাচিত্রকচিরবিল্বশঙ্খিনীশকুলাদনীস্বর্ণক্ষীরিণ্য ইতি দশেমানি ভেদনীযানি ভবন্তি (৪), মধুকমধুপর্ণীপৃশ্নিপর্ণ্যম্বষ্ঠকীসমঙ্গামোচরসধাতকীলোধ্রপ্রিযঙ্গুকট্ফলানীতি দশেমানি সন্ধানীযানি ভবন্তি (৫), পিপ্পলীপিপ্পলীমূলচব্যচিত্রকশৃঙ্গবেরাম্লবেতসমরিচাজমোদাভল্লাতকাস্থিহিঙ্গুনির্যাসা ইতি দশেমানি দীপনীযানি ভবন্তি (৬), ইতি ষট্কঃ কষাযবর্গঃ||৯||

জীবনীযমাদাবুচ্যতে সর্বেষাং জীবনহিতস্যৈবাত্যর্থমভিপ্রেতত্বাত্| মুদ্গমাষপর্ণ্যন্তং সুগমম্| জীবন্তী স্বনামখ্যাতা সুবর্ণবর্ণাভা, মধুকং যষ্টীমধুকম্ (১)| ক্ষীরিণী ক্ষীরলতা, রাজক্ষবকো দুগ্ধিকা, বাট্যাযনী শ্বেতবলা, ভদ্রৌদনী পীতবলা, ভারদ্বাজী বনকার্পাসী, পযস্যা বিদারীকন্দঃ, ঋষ্যগন্ধা ঋষ্যজাঙ্গলকঃ (২)| কটুকা কটুরোহিণী, চিরবিল্বঃ করঞ্জঃ, হৈমবতী শ্বেতবচা (৩)| সুবহা ত্রিবৃত্, অগ্নিমুখী ‘লাঙ্গলিযা’ ইতি খ্যাতা, চিত্রা দন্তী, শঙ্খিনী শ্বেতবুহ্না, শকুলাদনী কটুরোহিণী, স্বর্ণক্ষীরিণী অঙ্গুষ্ঠপ্রভা (৪)| অম্বষ্ঠকী অকর্ণবিদ্ধা, সমঙ্গা বরাহক্রান্তা, কট্ফলং স্বনামপ্রসিদ্ধং, সন্ধানীযঃ সঙ্গ্রহণঃ সামান্যেন; পুরীষস্য সঙ্গ্রহণস্তু ভিন্নমলমাত্রসঙ্গ্রহণঃ (৫)| শৃঙ্গবেরঃ শুণ্ঠী, হিঙ্গুনির্যাসো হিঙ্গু||৯||

Adhikarana 8 (10) · Śloka 10

ঐন্দ্র্যৃষভ্যতিরসর্ষ্যপ্রোক্তাপযস্যাশ্বগন্ধাস্থিরারোহিণীবলাতিবলা ইতি দশেমানি বল্যানি ভবন্তি (৭), চন্দনতুঙ্গপদ্মকোশীরমধুকমঞ্জিষ্ঠাসারিবাপযস্যাসিতালতা ইতি দশেমানি বর্ণ্যানি ভবন্তি (৮), সারিবেক্ষুমূলমধুকপিপ্পলীদ্রাক্ষাবিদারীকৈটর্যহংসপাদীবৃহতীকণ্টকারিকা ইতি দশেমানি কণ্ঠ্যানি ভবন্তি (৯), আম্রাম্রাতকলিকুচকরমর্দবৃক্ষাম্লাম্লবেতসকুবলবদরদাডিমমাতুলুঙ্গানীতি দশেমানি হৃদ্যানি ভবন্তি (১০), ইতি চতুষ্কঃ কষাযবর্গঃ||১০||

ঐন্দ্রী গোরক্ষকর্কটী, ঋষভী শূকশিম্বা, অতিরসা শতাবরী ঋদ্ধির্বা, ঋষ্যপ্রোক্তা মাষপর্ণী, অতিবলা পীতবলা, পযস্যেহ ক্ষীরবিদারী কাকোলী বা (৭)| তুঙ্গঃ পুন্নাগঃ, সিতা শ্বেতদূর্বা, লতা শ্যামদূর্বা (৮)| সারিবা অনন্তমূলম্, ইক্ষুমূলমত্রেক্ষোর্মূলং মোরটো বা, বিদারী বিদারীকন্দঃ, কৈটর্যং কট্ফলং, হংসপাদী স্বনামপ্রসিদ্ধা (৯)| আম্রাতক আম্রাডকঃ, বৃক্ষাম্লং বৃহদম্লম্ (১০)||১০||

Adhikarana 9 (11) · Śloka 11

নাগরচব্যচিত্রকবিডঙ্গমূর্বাগুডূচীবচামুস্তপিপ্পলীপটোলানীতি দশেমানি তৃপ্তিঘ্নানি ভবন্তি (১১), কুটজবিল্বচিত্রকনাগরাতিবিষাভযাধন্বযাসকদারুহরিদ্রাবচাচব্যানীতি দশেমান্যর্শোঘ্নানি ভবন্তি (১২), খদিরাভযামলকহরিদ্রারুষ্করসপ্তপর্ণারগ্বধকরবীরবিডঙ্গজাতীপ্রবালা ইতি দশেমানি কুষ্ঠঘ্নানি ভবন্তি (১৩), চন্দননলদকৃতমালনক্তমালনিম্বকুটজসর্ষপমধুকদারুহরিদ্রামুস্তানীতি দশেমানি কণ্ডূঘ্নানি ভবন্তি (১৪), অক্ষীবমরিচগণ্ডীরকেবুকবিডঙ্গনির্গুণ্ডীকিণিহীশ্বদংষ্ট্রাবৃষপর্ণিকাখুপর্ণিকা ইতি দশেমানি ক্রিমিঘ্নানি ভবন্তি (১৫), হরিদ্রামঞ্জিষ্ঠাসুবহাসূক্ষ্মৈলাপালিন্দীচন্দনকতকশিরীষসিন্ধুবারশ্লেষ্মাতকা ইতি দশেমানি বিষঘ্নানি ভবন্তি (১৬), ইতি ষট্কঃ কষাযবর্গঃ||১১||

তৃপ্তিঘ্নো ব্যক্তঃ (১১)| ধন্বযাসো দুরালভা (১২)| অরুষ্করো ভল্লাতকঃ (১৩)| নলদং মাংসী, কৃতমালঃ সুবর্ণহলিঃ, নক্তমালঃ করঞ্জঃ (১৪)| অক্ষীবোঽব্দকঃ শোভাঞ্জনো বা, গণ্ডীরঃ শমঠশাকং, নির্গুণ্ডী সিন্ধুবারঃ, কিণিহী কটভী, আখুপর্ণী মূষিকপর্ণী, বৃষপর্ণী চ তদ্ভেদঃ ‘ফঞ্জিপত্রিকা’ ইতি খ্যাতা (১৫)| সুবহা রাস্না হাফরমালী বা, পালিন্দী শ্যামলতা, শ্লেষ্মাতকো বহুবারঃ (১৬)||১১||

Adhikarana 10 (12) · Śloka 12

বীরণশালিষষ্টিকেক্ষুবালিকাদর্ভকুশকাশগুন্দ্রেত্কটকত্তৃণমূলানীতি দশেমানি স্তন্যজননানি ভবন্তি (১৭), পাঠামহৌষধসুরদারুমুস্তমূর্বাগুডূচীবত্সকফলকিরাততিক্তককটুরোহিণীসারিবা ইতি দশেমানি স্তন্যশোধনানি ভবন্তি (১৮), জীবকর্ষভককাকোলীক্ষীরকাকোলীমুদ্গপর্ণীমাষপর্ণীমেদাবৃদ্ধরুহাজটিলাকুলিঙ্গা ইতি দশেমানি শুক্রজননানি ভবন্তি (১৯), কুষ্ঠৈলবালুককট্ফলসমুদ্রফেনকদম্বনির্যাসেক্ষুকাণ্ডেক্ষ্বিক্ষুরকবসুকোশীরাণীতি দশেমানি শুক্রশোধনানি ভবন্তি (২০), ইতি চতুষ্কঃ কষাযবর্গঃ||১২||

ইক্ষুবালিকা খাগালিকা, দর্ভ উলুযাতৃণং, গুন্দ্রা গুলুঞ্চ (১৭)| স্তন্যশোধনো ব্যক্তঃ (১৮)| বৃদ্ধরুহা শতাবরী, বৃক্ষরুহাপাঠপক্ষে বন্দাকঃ, জটিলা উচ্চটা, কুলিঙ্গ উচ্চটাভেদঃ (১৯)| কদম্বো বহুফলস্তস্য নির্যাসঃ, ইক্ষুরকঃ কোকিলাক্ষঃ, বসুকো বসুহট্টকঃ, অত্র জতূকর্ণঃ পঠত্যেলবালুকং কট্ফলস্থানে (২০)||১২||

Adhikarana 11 (13) · Śloka 13

মৃদ্বীকামধুকমধুপর্ণীমেদাবিদারীকাকোলীক্ষীরকালোলীজীবকজীবন্তীশালপর্ণ্য ইতি দশেমানি স্নেহোপগানি ভবন্তি (২১), শোভাঞ্জনকৈরণ্ডার্কবৃশ্চীরপুনর্নবাযবতিলকুলত্থমাষবদরাণীতি দশেমানি স্বেদোপগানি ভবন্তি (২২), মধুমধুককোবিদারকর্বুদারনীপবিদুলবিম্বীশণপুষ্পীসদাপুষ্পাপ্রত্যক্পুষ্পা ইতি দশেমানি বমনোপগানি ভবন্তি (২৩), দ্রাক্ষাকাশ্মর্যপরূষকাভযামলকবিভীতককুবলবদরকর্কন্ধুপীলূনীতি দশেমানি বিরেচনোপগানি ভবন্তি (২৪), ত্রিবৃদ্বিল্বপিপ্পলীকুষ্ঠসর্ষপবচাবত্সকফলশতপুষ্পামধুকমদনফলানীতি দশেমান্যাস্থাপনোপগানি ভবন্তি (২৫), রাস্নাসুরদারুবিল্বমদনশতপুষ্পাবৃশ্চীরপুনর্নবাশ্বদংষ্ট্রাগ্নিমন্থশ্যোনাকা ইতি দশেমান্যনুবাসনোপগানি ভবন্তি (২৬), জ্যোতিষ্মতীক্ষবকমরিচপিপ্পলীবিডঙ্গশিগ্রুসর্ষপাপামার্গতণ্ডুলশ্বেতামহাশ্বেতা ইতি দশেমানি শিরোবিরেচনোপগানি ভবন্তি (২৭), ইতি সপ্তকঃ কষাযবর্গঃ||১৩||

স্নেহোপগো ব্যক্তঃ (২১)| বৃশ্চীরঃ শ্বেতপুনর্নবা (২২)| কোবিদারঃ স্বনামপ্রসিদ্ধঃ, কর্বুদারঃ শ্বেতকাঞ্চনঃ, বিদুলো হিজ্জলঃ, শণপুষ্পী ঘণ্টারবা, সদাপুষ্পা অর্কঃ, প্রত্যক্পুষ্পা অপামার্গঃ (২৩)| বদরীত্রযম্ (২৪)| ব্যক্তঃ (২৫)| ব্যক্তঃ (২৬)| ক্ষবকঃ ছিক্কাকারকঃ, শ্বেতা অপরাজিতা, মহাশ্বেতা তদ্ভেদঃ কটভী বা (২৭)||১৩||

Adhikarana 12 (14) · Śloka 14

জম্ব্বাম্রপল্লবমাতুলুঙ্গাম্লবদরদাডিমযবযষ্টিকোশীরমৃল্লাজা ইতি দশেমানি ছর্দিনিগ্রহণানি ভবন্তি (২৮), নাগরধন্বযবাসকমুস্তপর্পটকচন্দনকিরাততিক্তকগুডূচীহ্রীবেরধান্যকপটোলানীতি দশেমানি তৃষ্ণানিগ্রহণানি ভবন্তি (২৯), শটীপুষ্করমূলবদরবীজকণ্টকারিকাবৃহতীবৃক্ষরুহাভযাপিপ্পলীদুরালভাকুলীরশৃঙ্গ্য ইতি দশেমানি হিক্কানিগ্রহণানি ভবন্তি (৩০), ইতি ত্রিকঃ কষাযবর্গঃ||১৪||

ব্যক্তঃ (২৮)| ব্যক্তঃ (২৯)| ব্যক্তঃ (৩০)||১৪||

Adhikarana 13 (15) · Śloka 15

প্রিযঙ্গ্বনন্তাম্রাস্থিকট্বঙ্গলোধ্রমোচরসসমঙ্গাধাতকীপুষ্পপদ্মাপদ্মকেশরাণীতি দশেমানি পুরীষসঙ্গ্রহণীযানি ভবন্তি (৩১), জম্বুশল্লকীত্বক্কচ্ছুরামধূকশাল্মলীশ্রীবেষ্টকভৃষ্টমৃত্পযস্যোত্পলতিলকণা ইতি দশেমানি পুরীষবিরজনীযানি ভবন্তি (৩২), জম্ব্বাম্রপ্লক্ষবটকপীতনোডুম্বরাশ্বত্থভল্লাতকাশ্মন্তকসোমবল্কা ইতি দশেমানি মূত্রসঙ্গ্রহণীযানি ভবন্তি (৩৩), পদ্মোত্পলনলিনকুমুদসৌগন্ধিকপুণ্ডরীকশতপত্রমধুকপ্রিযঙ্গুধাতকীপুষ্পাণীতি দশেমানি মূত্রবিরজনীযানি ভবন্তি (৩৪), বৃক্ষাদনীশ্বদংষ্ট্রাবসুকবশিরপাষাণভেদদর্ভকুশকাশগুন্দ্রেত্কটমূলানীতি দশেমানি মূত্রবিরেচনীযানি ভবন্তি (৩৫), ইতি পঞ্চকঃ কষাযবর্গঃ||১৫||

অনন্তা অনন্তমূলং, কট্বঙ্গঃ শ্যোনাকঃ, মোচরসঃ শাল্মলীবেষ্টকঃ, পদ্মা ব্রাহ্মণযষ্টিকা (৩১)| শল্লকী স্বনামপ্রসিদ্ধা, কচ্ছুরা শূকশিম্বা, শাল্মলীবেষ্টকঃ শিমলীআঠা, শ্রীবেষ্টকো নবনীতখোটী (৩২)| কপীতনো গন্ধমুণ্ডঃ, অশ্মন্তকঃ অম্ললোটঃ, সোমবল্কঃ খদিরঃ (৩৩)| পদ্মভেদাশ্চত্বারঃ, সৌগন্ধিকঃ শুন্ধী (৩৪)| বৃক্ষাদনী বন্দাকো বিদারিকন্দো বা, বশিরঃ সূর্যাবর্তঃ (৩৫) ||১৫||

Adhikarana 14 (16) · Śloka 16

দ্রাক্ষাভযামলকপিপ্পলীদুরালভাশৃঙ্গীকণ্টকারিকাবৃশ্চীরপুনর্নবাতামলক্য ইতি দশেমানি কাসহরাণি ভবন্তি (৩৬), শটীপুষ্করমূলাম্লবেতসৈলাহিঙ্গ্বগুরুসুরসাতামলকীজীবন্তীচণ্ডা ইতি দশেমানি শ্বাসহরাণি ভবন্তি (৩৭), পাটলাগ্নিমন্থশ্যোনাকবিল্বকাশ্মর্যকণ্টকারিকাবৃহতীশালপর্ণীপৃশ্নিপর্ণীগোক্ষুরকা ইতি দশেমানি শ্বযথুহরাণি ভবন্তি (৩৮), সারিবাশর্করাপাঠামঞ্জিষ্ঠাদ্রাক্ষাপীলুপরূষকাভযামলকবিভীতকানীতি দশেমানি জ্বরহরাণি ভবন্তি (৩৯), দ্রাক্ষাখর্জূরপ্রিযালবদরদাডিমফল্গুপরূষকেক্ষুযবষষ্টিকা ইতি দশেমানি শ্রমহরাণি ভবন্তি (৪০), ইতি পঞ্চকঃ কষাযবর্গঃ||১৬||

তামলকী ভূম্যামলকী (৩৬)| চণ্ডা চোরহুলী (৩৭)| ব্যক্তঃ (৩৮)| ব্যক্তঃ (৩৯)| ফল্গুঃ কাষ্ঠোদুম্বরকঃ (৪০)||১৬||

Adhikarana 15 (17) · Śloka 17

লাজাচন্দনকাশ্মর্যফলমধূকশর্করানীলোত্পলোশীরসারিবাগুডূচীহ্রীবেরাণীতি দশেমানি দাহপ্রশমনানি ভবন্তি (৪১), তগরাগুরুধান্যকশৃঙ্গবেরভূতীকবচাকণ্টকার্যগ্নিমন্থশ্যোনাকপিপ্পল্য ইতি দশেমানি শীতপ্রশমনানি ভবন্তি (৪২), তিন্দুকপ্রিযালবদরখদিরকদরসপ্তপর্ণাশ্বকর্ণার্জুনাসনারিমেদা ইতি দশেমান্যুদর্দপ্রশমনানি ভবন্তি (৪৩), বিদারীগন্ধাপৃশ্নিপর্ণীবৃহতীকণ্টকারিকৈরণ্ডকাকোলীচন্দনোশীরৈলামধুকানীতি দশেমান্যঙ্গমর্দপ্রশমনানি ভবন্তি (৪৪), পিপ্পলীপিপ্পলীমূলচব্যচিত্রকশৃঙ্গবেরমরিচাজমোদাজগন্ধাজাজীগণ্ডীরাণীতি দশেমানি শূলপ্রশমনানি ভবন্তি (৪৫), ইতি পঞ্চকঃ কষাযবর্গঃ||১৭||

লাজাদৌ জতূকর্ণপাঠাত্ গুডূচীস্থানে পদ্মকঃ, যদি বা “অর্কাগুরুগুডূচীনাং তিক্তানাং চৌষ্ণ্যমিষ্যতে” (সূ.অ.২৬), ইতি বচনাদ্যদ্যপ্যুষ্ণা গুডূচী, তথাঽপি তস্যা দাহপ্রশমকত্বং প্রভাবাদ্বোদ্ধব্যম্ (৪১)| ভূতীকো যবানিকা (৪২)| তিন্দুকঃ ‘কেন্দুঃ’ ইতি প্রসিদ্ধঃ, কদরো বিট্খদিরঃ, অরিমেদঃ খদিরভেদঃ (৪৩)| ব্যক্তঃ (৪৪)| অজগন্ধা ফোকান্দী (৪৫)||১৭||

Adhikarana 16 (18) · Śloka 18

মধুমধুকরুধিরমোচরসমৃত্কপাললোধ্রগৈরিকপ্রিযঙ্গুশর্করালাজা ইতি দশেমানি শোণিতস্থাপনানি ভবন্তি (৪৬), শালকট্ফলকদম্বপদ্মকতুম্বমোচরসশিরীষবঞ্জুলৈলবালুকাশোকা ইতি দশেমানি বেদনাস্থাপনানি ভবন্তি (৪৭), হিঙ্গুকৈটর্যারিমেদাবচাচোরকবযস্থাগোলোমীজটিলাপলঙ্কষাশোকরোহিণ্য ইতি দশেমানি সঞ্জ্ঞাস্থাপনানি ভবন্তি (৪৮), ঐন্দ্রীব্রাহ্মীশতবীর্যাসহস্রবীর্যাঽমোঘাঽব্যথাশিবাঽরিষ্টাবাট্যপুষ্পীবিষ্বক্সেনকান্তা ইতি দশেমানি প্রজাস্থাপনানি ভবন্তি (৪৯), অমৃতাঽভযাধাত্রীমুক্তাশ্বেতাজীবন্ত্যতিরসামণ্ডূকপর্ণীস্থিরাপুনর্নবা ইতি দশেমানি বযঃস্থাপনানি ভবন্তি (৫০), ইতি পঞ্চকঃ কষাযবর্গঃ||১৮||

রুধিরং কুঙ্কুমম্ (৪৬)| বঞ্জুলো বেতসঃ (৪৭)| কৈটর্যঃ পর্বতনিম্বঃ, বযঃস্থা ব্রাহ্মী, গোলোমী ভূতকেশী, পলঙ্কষা গুগ্গুলুঃ জটামাংসী বা (৪৮)| শতবীর্যাসহস্রবীর্যে দূর্বে; অমোঘা পাটলা, আমলকী বা, লক্ষ্মণা বা; অব্যথা কদলী, গুডূচী বা, হরীতকী বা; অরিষ্টা কটুরোহিণী; বিষ্বক্সেনকান্তা প্রিযঙ্গুঃ (৪৯)| মুক্তা রাস্না; শ্বেতাস্থানে ‘শ্রেযসী’ ইতি কেচিত্, সা রাস্নাভেদঃ (৫০)||১৮||

Adhikarana 17 (19) · Śloka 19

ইতি পঞ্চকষাযশতান্যভিসমস্য পঞ্চাশন্মহাকষাযা মহতাং চ কষাযাণাং লক্ষণোদাহরণার্থং ব্যাখ্যাতা ভবন্তি||১৯||

সম্প্রত্যেতান্যেব জীবকাদীন্যুক্তানি প্রত্যেকশো দ্রব্যগণনযা পঞ্চকষাযশতানি স্যুঃ, দশকগণনযা চ পঞ্চাশন্মহাকষাযাঃ শৃঙ্গগ্রাহিকযোক্তা ভবন্তীতি দর্শযন্নুপসংহরতি- ইতীত্যাদি| অভিসমস্যেতি দশকসঙ্খ্যযৈকবর্গীকৃত্য| লক্ষণস্যোদাহরণং (লক্ষণোদাহরণং ), পূর্বং জীবনীযাদিসঞ্জ্ঞা লক্ষণমভিপ্রেত্যোক্তা; লক্ষণোদাহরণার্থমিতি সম্প্রতি জীবকর্ষভকাদীন্যুদাহরণার্থং ব্যাখ্যাতানি; জীবকাদিভির্দশভির্লক্ষ্যতে জ্ঞাযতে জীবনীযো মহাকষাযঃ| মহতাং চেতি চকারঃ পঞ্চকষাযশতানাং চ লক্ষণস্যোদাহরণার্থমিতি সমুচ্চিনোতি| তত্র জীবকাদযঃ প্রত্যেকং পঞ্চকষাযশতানামেকৈকদ্রব্যরূপাণাং লক্ষণস্বরূপা ভবন্তি| যদি বা লক্ষণার্থমুদাহরণার্থং চেতি; তত্র মন্দবুদ্ধীনাং লক্ষণার্থং পঞ্চকষাযশতপঞ্চাশন্মহাকষাযজ্ঞানার্থমিত্যর্থঃ, বুদ্ধিমতাং তূদাহরণার্থং দৃষ্টান্তার্থম্||১৯||

Adhikarana 18 (20) · Śloka 20

নহি বিস্তরস্য প্রমাণমস্তি, ন চাপ্যতিসঙ্ক্ষেপোঽল্পবুদ্ধীনাং সামর্থ্যাযোপকল্পতে, তস্মাদনতিসঙ্ক্ষেপেণানতিবিস্তরেণ চোপদিষ্টাঃ| এতাবন্তো হ্যলমল্পবুদ্ধীনাং ব্যবহারায, বুদ্ধিমতাং চ স্বালক্ষণ্যানুমানযুক্তিকুশলানামনুক্তার্থজ্ঞানাযেতি||২০||

ননু কষাযদ্রব্যাণি যাবন্তি সন্তি তাবন্তি বাঽভিধীযন্তাং, দৃষ্টান্তার্থং দ্বিত্রাণি বা; তত্ কিমর্থমযং নাতিবিস্তরো নাতিসঙ্ক্ষেপ ইত্যত্রাহ- নহীত্যাদি| ন হি বিস্তরস্য প্রমাণমিযত্তাপরিচ্ছেদোঽস্তি, তেন বিস্তরো নাভিধীযত ইত্যর্থঃ| অতিসঙ্ক্ষেপোঽপি দ্বিত্রলক্ষণাভিধানরূপো নাল্পবুদ্ধীনামনুমানাকুশলানাং সামর্থ্যায চিকিত্সাব্যবহারাযোপকল্পতে| এতাবন্তো যথোক্তাঃ| অলং সমর্থাঃ| ব্যবহারাযেতি চিকিত্সাব্যবহারায| স্বলক্ষণস্য ভাবঃ স্বালক্ষণ্যং, তেনানুমানং, তত্র কুশলা অভিজ্ঞা ইত্যর্থঃ| বুদ্ধিমন্তো হি, জীবকাদযো হি স্নিগ্ধশীতমধুরবৃষ্যাদিগুণযুক্তাঃ সন্তো জীবনং কুর্বন্তীতি ভূযোদর্শনাদবধার্য তদ্গুণযুক্তেঽন্যত্রাপি দ্রাক্ষাপযোবিদার্যাদৌ তজ্জাতীযত্বেন জীবনানীত্যনুমিমতে, যথা জীবকাদীনামেকজীবনকার্যকর্তৃত্বেন মহাকষাযত্বং, তদ্বত্ পাঠাসমঙ্গাপ্রভৃতীনামপ্যতীসারহরাণামতীসারহরমহাকষাযত্বমিত্যনুমানেন কৃত্স্নমেব কষাযং প্রতিপদ্যন্ত ইতি ভাবঃ||২০||

Adhikarana 19 (21-22) · Śloka 22

এবংবাদিনং ভগবন্তমাত্রেযমগ্নিবেশ উবাচ- নৈতানি ভগবন্! পঞ্চ কষাযশতানি পূর্যন্তে, তানি তানি হ্যেবাঙ্গান্যুপপ্লবন্তে তেষু তেষু মহাকষাযেষ্বিতি||২১|| তমুবাচ ভগবানাত্রেযঃ- নৈতদেবং বুদ্ধিমতা দ্রষ্টব্যমগ্নিবেশ| একোঽপি হ্যনেকাং সঞ্জ্ঞাং লভতে কার্যান্তরাণি কুর্বন্, তদ্যথা- পুরুষো বহূনাং কর্মণাং করণে সমর্থো ভবতি, স যদ্যত্ কর্ম করোতি তস্য তস্য কর্মণঃ কর্তৃ-করণ-কার্যসম্প্রযুক্তং তত্তদ্গৌণং নামবিশেষং প্রাপ্নোতি, তদ্বদৌষধদ্রব্যমপি দ্রষ্টব্যম্| যদি চৈকমেব কিঞ্চিদ্দ্রব্যমাসাদযামস্তথাগুণযুক্তং যত্ সর্বকর্মণাং করণে সমর্থং স্যাত্, কস্ততোঽন্যদিচ্ছেদুপধারযিতুমুপদেষ্টুং বা শিষ্যেভ্য ইতি||২২||

পূর্বপক্ষমুত্থাপযতি- এবমিত্যাদি| তানি তানীতি জীবকক্ষীরকাকোলীপ্রভৃতীনি, তেষু তেষু জীবনীযবৃংহণীযশুক্রজননাদিষু, উপপ্লবন্তে পুনঃ পুনস্তান্যেব পঠ্যন্তে; একং দ্রব্যমনেকেষু পঠ্যমানমেকমেব, ততশ্চ ন সঙ্খ্যা পূর্যত ইতি পূর্বপক্ষঃ| সিদ্ধান্তযতি- নৈতদেবমিত্যাদি| একস্যানেকত্বেনাভিধানে দৃষ্টান্তমাহ- যথেত্যাদি| একঃ পুরুষঃ কর্মণাং ব্যাপারাণামোদনপচনকুম্ভকরণখনিত্রকরণভূমিখননানাং করণে সমর্থো ভবতি, য ইত্যধ্যাহার্যং, স ইত্যুক্তগুণং পুরুষং প্রত্যবমৃষতি; যদ্যত্ কর্মেতি ওদনপাকাদি, যদ্যত্ কর্ম করোতি তস্য তস্য কর্মণঃ কর্তৃসম্প্রযুক্তং ‘পাচক’ ইতি, করণসম্প্রযুক্তং ‘খানিত্রিক’ ইতি, কার্যসম্প্রযুক্তং ‘কুম্ভকার’ ইতি নামবিশেষং; গুণযোগপ্রবৃত্তং গৌণং; গুণযোগশ্চ ‘পাচক’ ইত্যত্র পচিক্রিযাযাং কর্তৃত্বং, ‘খানিত্রিক’ ইত্যত্র খনিত্রকরণকখননং প্রতি কর্তৃত্বং, কুম্ভকার ইত্যত্র কুম্ভোপহিতং কর্তৃত্বমিত্যেভিস্ত্রিভির্গুণৈরভিন্নো ভিন্নোঽভিধীযতে ব্যবহ্রিযতে চেতি ভাবঃ| তদ্বত্ পুরুষবদৌষধদ্রব্যমপি; একমপি সত্ ক্ষীরকাকোলীদ্রব্যং জীবনবৃংহণশুক্রজননলক্ষণনানাগুণযোগান্নানাজীবনীযাদিশব্দেনাভিধীযতে ব্যবহ্রিযতে চেত্যর্থঃ| অথ কিমর্থং পুনরেকমেব দ্রব্যং বহুজীবনীযাদিগুণযোগাত্তত্র তত্র পঠ্যতে, সন্তি তাবদ্বহূনি দ্রব্যাণ্যেকৈকজীবনীযাদিগুণানি স্বরূপতো ভিন্নানি, তান্যেব পৃথক্কস্মান্ন পঠ্যন্ত ইত্যাহ- যদি চৈকমেবেত্যাদি| যথা বহুদ্রব্যাণ্যেকৈকজীবনীযাদিকার্যকরণসমর্থানি ভবন্তি, তথৈকমেব দ্রব্যমনেকজীবনীযাদিকার্যকরণসমর্থমস্তি, তত্রৈকমেব দ্রব্যং বহুকার্যকর্তৃ শিষ্যেভ্য উপদেষ্টুমুপধারযিতুং চ যুজ্যতেঽল্পপ্রযত্নবোধ্যত্বাদল্পপ্রযত্নধার্যত্বাচ্চ; ন বহূন্যেককার্যনিযতানি, বহুপ্রযাসোপপাদ্যত্বাদ্বহুপ্রযাসবোধ্যত্বাদ্বহুপ্রযাসধার্যত্বাচ্চ ; কার্যং চ জীবনবৃংহণাদ্যুভযোরপি পক্ষযোরবিশিষ্টমিতি বাক্যার্থঃ| তথাগুণযুক্তম্ অনেকজীবনীযাদিকার্যসমর্থম্| তথাগুণযুক্তত্বমেব বিবৃণোতি- যত্ সর্বকর্মণাং জীবনীযাদীনাং করণে সমর্থং স্যাত্, ততো বহুকার্যকারকাদেকস্মাত্, অন্যদ্বহু প্রতিনিযতকর্মকারকং, ক ইচ্ছেত্? ন কোঽপীচ্ছেদিত্যর্থঃ| উপধারযিতুম্ আবর্তনেন স্মৃত্যারূঢং কর্তুম্| কস্তত ইত্যস্যাদৌ ‘তদা’ ইত্যধ্যাহার্যম্||২১-২২||

Adhikarana 20 (23-29) · Śloka 29

তত্র শ্লোকাঃ- যতো যাবন্তি যৈর্দ্রব্যৈর্বিরেচনশতানি ষট্| উক্তানি সঙ্গ্রহেণেহ তথৈবৈষাং ষডাশ্রযাঃ||২৩|| রসা লবণবর্জ্যাশ্চ কষায ইতি সঞ্জ্ঞিতাঃ| তস্মাত্ পঞ্চবিধা যোনিঃ কষাযাণামুদাহৃতা||২৪|| তথা কল্পনমপ্যেষামুক্তং পঞ্চবিধং পুনঃ| মহতাং চ কষাযাণাং পঞ্চাশত্ পরিকীর্তিতা||২৫|| পঞ্চ চাপি কষাযাণাং শতান্যুক্তানি ভাগশঃ| লক্ষণার্থং, প্রমাণং হি বিস্তরস্য ন বিদ্যতে||২৬|| ন চালমতিসঙ্ক্ষেপঃ সামর্থ্যাযোপকল্পতে| অল্পবুদ্ধেরযং তস্মান্নাতিসঙ্ক্ষেপবিস্তরঃ||২৭|| মন্দানাং ব্যবহারায, বুধানাং বুদ্ধিবৃদ্ধযে| পঞ্চাশত্কো হ্যযং বর্গঃ কষাযাণামুদাহৃতঃ||২৮|| তেষাং কর্মসু বাহ্যেষু যোগমাভ্যন্তরেষু চ| সংযোগং চ প্রযোগং চ যো বেদ স ভিষগ্বরঃ||২৯||

অধ্যাযার্থসঙ্গ্রহমাহ- যত ইত্যাদি| যতঃ মদনফলাদেঃ| যাবন্তি ত্রযস্ত্রিংশদ্যোগশতমিত্যাদীনি| যৈর্দ্রব্যৈর্বিরেচনশতানি ষডিতি যৈরেব মদনফলাদিভির্মিলিতৈরুক্তানি বিরেচনশতানি ষডিতি| লক্ষণার্থমিত্যাদিগ্রন্থোঽনতিসঙ্ক্ষেপবিস্তরেণোক্তপঞ্চাশন্মহাকষাযোপপত্তিসঙ্গ্রাহকঃ| অলমিতি সমর্থঃ| অল্পবুদ্ধেরযমিত্যত্রাযমিতিপদমতিসঙ্ক্ষেপ ইত্যনেন সম্বধ্যতে; যদ্যপি চেহাতিসঙ্ক্ষেপো নাস্তি, তথাঽপি বুদ্ধিস্থিরীকৃতঃ প্রত্যবমৃশ্যতে| পঞ্চাশত্কো হ্যযমিত্যত্রাযমিতি পদং সুঘটমেব | বাহ্যেষু প্রলেপাদিষু| আভ্যন্তরেষু বমনপাচনাদিষু| সংযোগং দ্রব্যাণামুচিতং মেলন(ক)ম্| প্রযোগং কালপ্রকৃত্যাদ্যপেক্ষা যোজনা||২৩-২৯||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে ষড্বিরেচনশতাশ্রিতীযো নাম চতুর্থোঽধ্যাযঃ||৪|| ইতি ভেষজচতুষ্কঃ||১||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে প্রথমে ভেষজচতুষ্কে ষড্বিরেচনশতাশ্রিতীযশ্চতুর্থোঽধ্যাযঃ||৪||