13. snēhādhyāyaḥ

Adhikarana 1 (1-2) · Śloka 2

অথাতঃ স্নেহাধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

নির্দেশবাতকলাকলীযে বাতাদযোঽভিহিতাঃ, তেষাং ভেষজং যথা কল্পনীযং তদুপদেষ্টুং কল্পনাচতুষ্কোঽভিধীযতে| ভেষজানাং কল্পনা ভেষজকল্পনা, সা চ কল্পনা আশ্রযদ্রব্যাভিধানং বিনা ন পার্যতে কল্পযিতুম্ ; অতঃ স্নেহাদিদ্রব্যগোচরা স্নেহ-স্বেদ-বমন-বিরেচনকল্পনেহাভিধীযতে, বস্তিকল্পনা ত্বিহ বহুবক্তব্যত্বান্নোক্তা| অত্রাপি বমনাদিপ্রবৃত্তৌ স্নেহস্যৈব প্রথমং বিধীযমানতযা তথা দোষপ্রধানস্য বাতস্য প্রধানভেষজত্বাচ্চ তত্প্রতিপাদক এব স্নেহাধ্যাযোঽভিধীযতে| স্নেহস্য প্রতিপাদকোঽধ্যাযঃ স্নেহাধ্যাযঃ||১-২||

Adhikarana 2 (3) · Śloka 3

সাঙ্খ্যৈঃ সঙ্খ্যাতসঙ্খ্যেযৈঃ সহাসীনং পুনর্বসুম্| জগদ্ধিতার্থং পপ্রচ্ছ বহ্নিবেশঃ স্বসংশযম্||৩||

সঙ্খ্যা সম্যগ্জ্ঞানং, তেন ব্যবহরন্তীতি সাঙ্খ্যাঃ| সঙ্খ্যাতং জ্ঞাতং সঙ্খ্যেযং জ্ঞেযং যৈস্তে তথা; যদি বা ‘সঙ্খ্যাতসঙ্খ্যেযম্’ ইতি পাঠঃ, তদা পুনর্বসুবিশেষণমেতত্; অর্থস্তু সমানঃ| সাঙ্খ্যৈঃ সহাবস্থানোপদর্শনমাত্রেযস্য কর্তব্যপ্রশ্নানুগুণমনঃসমাধানোপদর্শনার্থম্| সংশযমিতি সংশযেন বিষযিণা বিষযং লক্ষযতি, তেন সংশযমিতি সংশযবিষযমিত্যর্থঃ||৩||

Adhikarana 3 (4-8) · Śloka 8

কিংযোনযঃ কতি স্নেহাঃ কে চ স্নেহগুণাঃ পৃথক্| কালানুপানে কে কস্য কতি কাশ্চ বিচারণাঃ||৪|| কতি মাত্রাঃ কথম্মানাঃ কা চ কেষূপদিশ্যতে| কশ্চ কেভ্যো হিতঃ স্নেহঃ প্রকর্ষঃ স্নেহনে চ কঃ||৫|| স্নেহ্যাঃ কে কে ন চ স্নিগ্ধাস্নিগ্ধাতিস্নিগ্ধলক্ষণম্| কিং পানাত্ প্রথমং পীতে জীর্ণে কিঞ্চ হিতাহিতম্||৬|| কে মৃদুক্রূরকোষ্ঠাঃ কা ব্যাপদঃ সিদ্ধযশ্চ কাঃ| অচ্ছে সংশোধনে চৈব স্নেহে কা বৃত্তিরিষ্যতে||৭|| বিচারণাঃ কেষু যোজ্যা বিধিনা কেন তত্ প্রভো!| স্নেহস্যামিতবিজ্ঞান জ্ঞানমিচ্ছামি বেদিতুম্||৮||

কোঽসৌ সংশয ইত্যাহ- কিংযোনয ইত্যাদি| কিংযোনযঃ কিমাধারকারণাঃ| কালশ্চানুপানং চ কালানুপানে| বিচারণা দ্রব্যান্তরাসংযুক্তস্নেহপানং বর্জযিত্বা স্নেহোপযোগঃ| কথম্মানা কীদৃঙ্মানা| কা চেতি মাত্রা| প্রকর্ষঃ কালপ্রকর্ষঃ| স্নেহনে স্নেহযুক্তিক্রিযাযাম্| কে নচেতি কে ন চ স্নেহ্যাঃ| কিং পানাত্ স্নেহপানাত্ প্রথমং পূর্বং হিতাহিতং; কিঞ্চ পীতে স্নেহে তথা জীর্ণে চ স্নেহে হিতাহিতমিতি যোজ্যম্| সিদ্ধযো ব্যাপত্সাধনানি ভেষজানি| অচ্ছে ইতি সংশোধনপৃথঙ্নির্দেশাদ্গোবলীবর্দন্যাযেন সংশমন ইতি ভবতি| বৃত্তিরিতি বৃত্তিঃ উপচারবিধানম্| জ্ঞানং শাস্ত্রম্||৪-৮||

Adhikarana 4 (9-11) · Śloka 11

অথ তত্সংশযচ্ছেত্তা প্রত্যুবাচ পুনর্বসুঃ| স্নেহানাং দ্বিবিধা সৌম্য যোনিঃ স্থাবরজঙ্গমা||৯|| তিলঃ প্রিযালাভিষুকৌ বিভীতকশ্চিত্রাভযৈরণ্ডমধূকসর্ষপাঃ| কুসুম্ভবিল্বারুকমূলকাতসীনিকোচকাক্ষোডকরঞ্জশিগ্রুকাঃ||১০|| স্নেহাশযাঃ স্থাবরসঞ্জ্ঞিতাস্তথা স্যুর্জঙ্গমা মত্স্যমৃগাঃ সপক্ষিণঃ| তেষাং দধিক্ষীরঘৃতামিষং বসা স্নেহেষু মজ্জা চ তথোপদিশ্যতে||১১||

অভিষুক ঔত্তরাপথিকঃ| চিত্রা গোরক্ষকর্কটী, তদ্বীজমিহ; যদি বা চিত্রা লোহিতৈরণ্ডঃ| অতসী ‘উমা’ ইতি খ্যাতা | আরুকনিকোচকাক্ষোডা ঔত্তরাপথিকাঃ| স্নেহাশযাঃ স্নেহস্থানানি| এতে চাবিষ্কৃততমত্বেনোক্তাঃ, তেন নিম্বতৈলাদযো বোদ্ধব্যাঃ| আমিষং মাংসম্||৯-১১||

Adhikarana 5 (12) · Śloka 1

সর্বেষাং তৈলজাতানাং তিলতৈলং বিশিষ্যতে| বলার্থে স্নেহনে চাগ্র্যমৈরণ্ডং তু বিরেচনে||১২|| (কটূষ্ণং তৈলমৈরণ্ডং বাতশ্লেষ্মহরং গুরু | কষাযস্বাদুতিক্তৈশ্চ যোজিতং পিত্তহন্ত্রপি ||১||)|

তৈলজাতানামিতি জাতশব্দঃ প্রকারবচনঃ; যথা- “যদাহারজাতমগ্নিবেশ” (সূ.অ.২৫) ইত্যাদি| অত্র যদ্যপি যোগাত্তিলভবমেব তৈলং, তথাঽপি রূঢ্যেহ সর্ব এব স্থাবরস্নেহাস্তৈলমিত্যুচ্যন্তে| যদুক্তং সুশ্রুতে- “নিষ্পত্তেস্তদ্গুণত্বাচ্চ তৈলত্বমিতরেষ্বপি” (সু.সূ.অ.৪৫) ইতি| বিশিষ্যতে অতিরিচ্যতে| অগ্র্যমিত্যৈরণ্ডেন সম্বধ্যতে||১২||

Adhikarana 6 (13) · Śloka 13

সর্পিস্তৈলং বসা মজ্জা সর্বস্নেহোত্তমা মতাঃ| এষু চৈবোত্তমং সর্পিঃ সংস্কারস্যানুবর্তনাত্||১৩||

সর্বস্নেহোত্তমা ইত্যত্র সর্বশব্দেন দধিক্ষীরাদযো গৃহ্যন্তে; সর্বস্নেহোত্তমত্বং চ সর্পিরাদীনাং স্নেহগুণপ্রকর্ষবত্ত্বেন| সংস্কারো গুণান্তরারোপণং, তস্যানুবর্তনমনুবিধানং স্বীকরণমিতি যাবত্| এতদুক্তং ভবতি- যত্- ন তথা তৈলাদযো দ্রব্যান্তরসংস্কৃতাঃ সংস্কারগুণান্ বহন্তি যথা সর্পিরিতি| অত এবোক্তং- “নান্যঃ স্নেহস্তথা কশ্চিত্ সংস্কারমনুবর্ততে| যথা সর্পিরতঃ সর্পিঃ সর্বস্নেহোত্তমং মতম্” (নি. অ.১)| অত এব সংস্কারকদ্রব্যচিত্রকাদিগুণানুবিধানেঽপি সর্পির্ন স্বগুণান্ স্নেহশৈত্যাদীন্ জহাতি, কিঞ্চ স্বগুণান্ তদ্গুণাংশ্চ বহতি, যতোঽনুশব্দেন পশ্চাদ্বাচিনা স্বগুণবর্তনস্য পশ্চাত্ সংস্কারকগুণবর্তনমুচ্যতে| অত এবোক্তং- “স্নেহাদ্বাতং শমযতি পিত্তং মাধুর্যশৈত্যতঃ| ঘৃতং তুল্যগুণং দোষং সংস্কারাত্তু জযেত্ কফম্” (নি. অ.১) ইতি| ন চ বাচ্যং রূক্ষোষ্ণচিত্রকাদিসংস্কারাদ্রূক্ষোষ্ণং সর্পির্ভূতং, ততশ্চ সর্পিষঃ স্নেহশৈত্যে তদ্বিরুদ্ধে কথং তিষ্ঠতঃ? ইতি; যতঃ সর্পিঃসম্বদ্ধচিত্রকাবযবানুগতং হি রূক্ষোষ্ণত্বং, সর্পির্গতে চ স্নেহশৈত্যে ইতি ভিন্নাশ্রযত্বান্ন বিরোধঃ; ইদমেব চ সর্পিষঃ সংস্কারানুবর্তনং যত্- স্বগুণবিরুদ্ধস্যাপি তস্যানুপঘাতেন ধারণং; সংস্কারকচিত্রকাদিগুণবহনেঽপি সর্পিষঃ শৈত্যাদযঃ কদাচিদভিভূযন্তে সংস্কারকগুণৈরুষ্ণাদিভির্ন পুনঃ স্নেহগুণঃ, তস্য স্নেহেষু সর্বাত্মনা ব্যবস্থিতস্য প্রবলত্বাত্; অত এব সর্পিরাদযঃ স্নেহপ্রধানত্বাত্ ‘স্নেহা’ ইত্যুচ্যন্তে| অন্যে তু সংস্কারানুবর্তনং স্বগুণোপঘাতেন সংস্কারকগুণবহনং ব্রুবতে, এতচ্চ তৈলে তিষ্ঠতি ন সর্পিষীতি বদন্তি; সর্পিষি তু সংস্কারানুবর্তনমুক্তং যত্ তত্ সর্পিষি সর্বথা কস্যচিদ্গুণস্য সংস্কারগুণেনানুপঘাতাদ্ভবতি ; তথাহি- দাহপ্রশমনার্থং জ্বরে চন্দনাদিশীতদ্রব্যসাধিততৈলমুক্তং, যতঃ শীতেন সাধিতং তৈলমুষ্ণমপি স্বভাবাচ্ছীতমেব ভবতীতি||১৩||

Adhikarana 7 (14-17) · Śloka 17

ঘৃতং পিত্তানিলহরং রসশুক্রৌজসাং হিতম্| নির্বাপণং মৃদুকরং স্বরবর্ণপ্রসাদনম্||১৪|| মারুতঘ্নং ন চ শ্লেষ্মবর্ধনং বলবর্ধনম্| ত্বচ্যমুষ্ণং স্থিরকরং তৈলং যোনিবিশোধনম্||১৫|| বিদ্ধভগ্নাহতভ্রষ্টযোনিকর্ণশিরোরুজি| পৌরুষোপচযে স্নেহে ব্যাযামে চেষ্যতে বসা||১৬|| বলশুক্ররসশ্লেষ্মমেদোমজ্জবিবর্ধনঃ| মজ্জা বিশেষতোঽস্থ্নাং চ বলকৃত্ স্নেহনে হিতঃ||১৭||

স্নেহগুণানভিধত্তে- ঘৃতমিত্যাদি| নির্বাপণং দাহপ্রশমনম্| মারুতঘ্নমিত্যাদি তৈলগুণাঃ| স্থিরকরম্ অঙ্গস্থৈর্যকরম্| বিদ্ধেত্যাদি বসাগুণাঃ| পৌরুষোপচযঃ শুক্রোপচযঃ| স্নেহে শরীরস্নেহনে কর্তব্যে| বলশুক্রেত্যাদি মজ্জগুণাঃ||১৪-১৭||

Adhikarana 8 (18) · Śloka 18

সর্পিঃ শরদি পাতব্যং বসা মজ্জা চ মাধবে| তৈলং প্রাবৃষি নাত্যুষ্ণশীতে স্নেহং পিবেন্নরঃ||১৮||

সর্পিরাদিপানকালমাহ- সর্পিঃ শরদীত্যাদি| মাধবে বৈশাখে| প্রাবৃডাষাঢশ্রাবণৌ, যদুক্তং- “প্রাবৃট্ শুক্রনভৌ জ্ঞেযৌ” (সি.অ.৬) ইতি| শরদি বহুপিত্তত্বেন পিত্তবিরুদ্ধং ঘৃতমেব যৌগিকং, নান্যস্তৈলাদিঃ| বসামজ্জ্ঞোস্তু নাতিশীতোষ্ণত্বাত্ সাধারণে; যতস্তযোরনুপানে শীতত্বেন বোষ্ণত্বেন বা নির্দেশো ন কৃতঃ; “যথাসত্ত্বং তু শৈত্যৌষ্ণ্যে বসামজ্জ্ঞোর্বিনির্দিশেত্” (সূ.অ.২৭) ইতি তু বচনেন শৈত্যৌষ্ণ্যাভিধানং সামান্যেন, তৈলসর্পির্বদৌষ্ণ্যশৈত্যানভিধানান্ন প্রকর্ষপ্রাপ্তশৈত্যোষ্ণত্বপ্রাপকম্| অত এবোক্তং- “তৈলবসামজ্জসর্পিষাং তু যথাপূর্বং শ্রেষ্ঠত্বং বাতশ্লেষ্মবিকারেষু ভবতি, যথোত্তরং পিত্তবিকারেষু” (বি.অ.৮) ইতি| অত্রোত্তরস্য সর্পিষঃ শৈত্যাত্ পিত্তহরত্বং, তৈলস্য তূষ্ণত্বাদ্বাতশ্লেষ্মহরত্বং, বসামজ্জ্ঞোস্তু সাধারণত্বেন মধ্যগতত্বমিতি স্থিতম্| এবং বসামজ্জ্ঞোঃ সাধারণত্বেন তথা বল্যত্বধাতুবৃদ্ধিকরত্বাভ্যামনতিশীতোষ্ণে তথা বলক্ষযধাতুক্ষযযুক্তে মাধবে প্রযোগো যুক্তঃ| চৈত্রস্তু মুখ্যসাধারণগুণোঽপি প্রভূতশ্লেষ্মতযা ন স্নেহবিষয ইত্যনুক্তঃ| সামান্যেন স্নেহোপযোগে শস্তং কালমাহ- নাত্যুষ্ণেত্যাদি| নাত্যুষ্ণে গ্রীষ্মে, নাতিশীতে হেমন্তে শিশিরে চ তথা বর্ষজনিতশৈত্যে বর্ষাকালে| অযং চানাত্যযিকবিকারে সতি কালনিযমো জ্ঞেযঃ, অগ্রে উষ্ণে শীতে চ কালে স্নেহোপদেশাত্||১৮||

Adhikarana 9 (19) · Śloka 19

বাতপিত্তাধিকো রাত্রাবুষ্ণে চাপি পিবেন্নরঃ| শ্লেষ্মাধিকো দিবা শীতে পিবেচ্চামলভাস্করে||১৯||

কালবিশেষে দোষবিশেষে চ পানক্রমং দর্শযতি- বাতেত্যাদিনা| বাতশ্চ পিত্তং চ বাতপিত্তং, তদধিকো বাতপিত্তাধিকঃ| রাত্রাবিতি সাযম্| উষ্ণে গ্রীষ্মে| শ্লেষ্মাধিকগ্রহণমত্যন্তশীতবিকারগৃহীতপুরুষোপলক্ষণার্থং, তেন বাতশ্লেষ্মাধিকঃ শ্লেষ্মাধিকশ্চ গৃহ্যতে; অত এব সুশ্রুতেঽপ্যুক্তং- “বাতপিত্তাধিকো রাত্রৌ বাতশ্লেষ্মাধিকো দিবা” (সু.চি.৩১) ইতি| কেবলবাতাধিকস্য তথা পিত্তাধিকস্য শ্লেষ্মাধিকস্য চ সাধারণে শরদাদৌ কালে উত্সর্গসিদ্ধ এব পানকালো বক্ষ্যমাণো ভবতি| বক্ষ্যতি হি- “পিবেত্ সংশমনং স্নেহমন্নকালে” ইত্যাদি| অন্যে তু ব্রুবতে- বাতাধিকগ্রহণেন কেবলবাতস্যাপি গ্রহণং, শ্লেষ্মাধিকব্যপদেশাচ্চ বাতশ্লেষ্ম-পিত্তশ্লেষ্মণোরপি গ্রহণমিতি| শীতে হেমন্তাদৌ| অমলঃ প্রবলরশ্মির্যস্মিন্ দিনস্য ভাগে ভাস্করঃ সোঽমলভাস্করো মধ্যাহ্ন ইতি যাবত্||১৯||

Adhikarana 10 (20-21) · Śloka 21

অত্যুষ্ণে বা দিবা পীতো বাতপিত্তাধিকেন বা| মূর্চ্ছাং পিপাসামুন্মাদং কামলাং বা সমীরযেত্||২০|| শীতে রাত্রৌ পিবন্ স্নেহং নরঃ শ্লেষ্মাধিকোঽপি বা| আনাহমরুচিং শূলং পাণ্ডুতাং বা সমৃচ্ছতি||২১||

উক্তকালনিযমবিপর্যযে দোষমাহ- অত্যুষ্ণে বেত্যাদি| অত্যুষ্ণে কালে দিবা পীতঃ স্নেহঃ শ্লৈষ্মিকস্যাপি যথোক্তবিকারকরঃ, তথা বাতপিত্তাধিকেন পীতঃ শীতকালেঽপি যথোক্তবিকারকরঃ; এবং নিশাপানেঽপি বাক্যার্থঃ; পরং নিষিদ্ধস্য কালস্য দোষস্য চ মেলকেঽত্যযে চোক্তবিকারপ্রকর্ষাপ্রকর্ষৌ তর্কণীযৌ||২০-২১||

Adhikarana 11 (22) · Śloka 22

জলমুষ্ণং ঘৃতে পেযং যূষস্তৈলেঽনু শস্যতে| বসামজ্জ্ঞোস্তু মণ্ডঃ স্যাত্ সর্বেষূষ্ণমথাম্বু বা||২২||

অনুপানমাহ- জলমিত্যাদি| তৈলেঽন্বিতি অনুপানে| অনুপানপরিমাণং তু সম্যগ্ভেষজপাকার্থং ক্রিযমাণং ভেষজাবৈকারিকপাকেনৈবোন্নেযং, বৃদ্ধবৈদ্যব্যবহারাচ্চ||২২||

Adhikarana 12 (23-25) · Śloka 25

ওদনশ্চ বিলেপী চ রসো মাংসং পযো দধি| যবাগূঃ সূপশাকৌ চ যূষঃ কাম্বলিকঃ খডঃ||২৩|| সক্তবস্তিলপিষ্টং চ মদ্যং লেহাস্তথৈব চ| ভক্ষ্যমভ্যঞ্জনং বস্তিস্তথা চোত্তরবস্তযঃ||২৪|| গণ্ডূষঃ কর্ণতৈলং চ নস্তঃকর্ণাক্ষিতর্পণম্| চতুর্বিংশতিরিত্যেতাঃ স্নেহস্য প্রবিচারণাঃ ||২৫||

বিচারণাঃ সঙ্খ্যযা স্বরূপেণ চৈকগ্রন্থেনাহ- ওদনশ্চেত্যাদি| বিলেপী বিরলদ্রবা যবাগূর্বহুসিক্থসমন্বিতা জ্ঞেযা| সশাকপল্লবেন কৃতো যূষঃ খডঃ| কাম্বলিকো দধিলবণস্নেহতিলাদিকৃত ঈষদম্লঃ| এতযোরুদাহরণং যথা- “তক্রে কপিত্থচাঙ্গেরীমরিচাজাজিচিত্রকৈঃ | সুপক্বঃ খডযূষোঽযমযং কাম্বলিকো মতঃ|| দধ্যম্লো লবণস্নেহতিলমাষান্বিতঃ শৃতঃ” ইতি| লেহঃ শর্করাদীনাং পাকাত্ কৃতঃ; লিহ্যত ইতি লেহঃ| প্রবিচার্যতে অবচার্যতেঽনুকল্পেনোপযুজ্যতেঽনযেতি প্রবিচারণা ওদনাদযঃ; ওদনাদযশ্চ স্নেহপ্রবিচারণাযাং স্নেহযুক্তা এব বোদ্ধব্যাঃ; অভ্যঞ্জনাদযস্তু যদ্যপি শুদ্ধস্নেহসম্পাদ্যাস্তথাঽপি জঠরাগ্নিসম্বন্ধে ন ব্যাপ্রিযন্ত ইতি তন্ত্রে বিচারণাশব্দেনোচ্যন্তে||২৩-২৫||

Adhikarana 13 (26) · Śloka 26

অচ্ছপেযস্তু যঃ স্নেহো ন তামাহুর্বিচারণাম্| স্নেহস্য স ভিষগ্দৃষ্টঃ কল্পঃ প্রাথমকল্পিকঃ||২৬||

কেবলস্নেহপানং তু স্নেহনে শক্ত্যতিশযবত্ত্বেন ন বিচারণাসঞ্জ্ঞযোচ্যতে, এতদেবাহ- অচ্ছপেয ইত্যাদি| অচ্ছশ্চ পেযশ্চ অচ্ছপেযঃ, ওদনাদ্যসম্বন্ধে সতি পেয ইত্যর্থঃ| ন তামাহুর্বিচারণামিতি বচনেন বৈদ্যপরম্পরাসিদ্ধোঽযং ব্যবহার ইতি দর্শযতি| ভিষগ্ভির্দৃষ্টো ভিষগ্দৃষ্টঃ| প্রথমে শ্রেষ্ঠে কল্পে পক্ষে ভবতীতি প্রাথমকল্পিকঃ, শ্রেষ্ঠ ইত্যর্থঃ||২৬||

Adhikarana 14 (27-28) · Śloka 28

রসৈশ্চোপহিতঃ স্নেহঃ সমাসব্যাসযোগিভিঃ| ষড্ভিস্ত্রিষষ্টিধা সঙ্খ্যাং প্রাপ্নোত্যেকশ্চ কেবলঃ||২৭|| এবমেতাশ্চতুঃষষ্টিঃ স্নেহানাং প্রবিচারণা | ওকর্তুব্যাধিপুরুষান্ প্রযোজ্যা জানতা ভবেত্||২৮||

প্রকারান্তরেণ বিচারণাভেদমাহ- রসৈশ্চেত্যাদি| সমাসো রসানামন্যোন্যমেলকঃ, ব্যাসোঽমেলকঃ; সমাসব্যাসবদ্ভিঃ ষড্ভী রসৈরোদনাদিগতৈরুপহিতো যুক্তঃ সন্ স্নেহস্ত্রিষষ্টিসঙ্খ্যাং প্রাপ্নোতি| একশ্চ কেবল ইত্যচ্ছপেযং বর্জযিত্বাঽভ্যঞ্জনাদিপ্রযোজ্যঃ| ত্রিষষ্ঠী রসভেদা আত্রেযভদ্রকাপ্যীযে “স্বাদুরম্লাদিভির্যোগং” (সূ.অ.২৬) ইত্যাদিবাক্যে বক্ষ্যমাণা বোদ্ধব্যাঃ| এবং স্নেহানাং রসযুক্তানাং চতুঃষষ্টিঃ প্রবিচারণা ভবন্তি| চতুঃষষ্টিরিতি স্নেহানামিত্যনেন সম্বধ্যতে, তেন প্রবিচারণেত্যেকবচনমুপপন্নং ভবতি| ন সর্ববিচারণা সর্বত্র কর্তব্যা, কিন্তু সাত্ম্যর্তুব্যাধিদোষপুরুষান্ পরীক্ষ্য যা যত্র যুজ্যতে সা তত্র কর্তব্যেত্যাহ- ওকর্ত্বিত্যাদি| ওকঃ অভ্যাসঃ| পুরুষগ্রহণেন কস্মিন্ দেশেঽযং পুরুষো বর্তত ইতি পরীক্ষযা দেশোঽপ্যবরুদ্ধো বোদ্ধব্যঃ, বযোবলপ্রভৃতযশ্চ বোদ্ধব্যাঃ||২৭-২৮||

Adhikarana 15 (29-40) · Śloka 40

অহোরাত্রমহঃ কৃত্স্নমর্ধাহং চ প্রতীক্ষতে| প্রধানা মধ্যমা হ্রস্বা স্নেহমাত্রা জরাং প্রতি||২৯|| ইতি তিস্রঃ সমুদ্দিষ্টা মাত্রাঃ স্নেহস্য মানতঃ| তাসাং প্রযোগান্ বক্ষ্যামি পুরুষং পুরুষং প্রতি||৩০|| প্রভূতস্নেহনিত্যা যে ক্ষুত্পিপাসাসহা নরাঃ| পাবকশ্চোত্তমবলো যেষাং যে চোত্তমা বলে||৩১|| গুল্মিনঃ সর্পদষ্টাশ্চ বিসর্পোপহতাশ্চ যে| উন্মত্তাঃ কৃচ্ছ্রমূত্রাশ্চ গাঢবর্চস এব চ||৩২|| পিবেযুরুত্তমাং মাত্রাং তস্যাঃ পানে গুণাঞ্ছৃণু| বিকারাঞ্ছমযত্যেষাং শীঘ্রং সম্যক্প্রযোজিতা||৩৩|| দোষানুকর্ষিণী মাত্রা সর্বমার্গানুসারিণী| বল্যা পুনর্নবকরী শরীরেন্দ্রিযচেতসাম্||৩৪|| অরুষ্কস্ফোটপিডকাকণ্ডূপামাভিরর্দিতাঃ| কুষ্ঠিনশ্চ প্রমীঢাশ্চ বাতশোণিতিকাশ্চ যে||৩৫|| নাতিবহ্বাশিনশ্চৈব মৃদুকোষ্ঠাস্তথৈব চ| পিবেযুর্মধ্যমাং মাত্রাং মধ্যমাশ্চাপি যে বলে||৩৬|| মাত্রৈষা মন্দবিভ্রংশা ন চাতিবলহারিণী| সুখেন চ স্নেহযতি শোধনার্থে চ যুজ্যতে||৩৭|| যে তু বৃদ্ধাশ্চ বালাশ্চ সুকুমারাঃ সুখোচিতাঃ| রিক্তকোষ্ঠত্বমহিতং যেষাং মন্দাগ্নযশ্চ যে||৩৮|| জ্বরাতীসারকাসাশ্চ যেষাং চিরসমুত্থিতাঃ| স্নেহমাত্রাং পিবেযুস্তে হ্রস্বাং যে চাবরা বলে||৩৯|| পরিহারে সুখা চৈষা মাত্রা স্নেহনবৃংহণী| বৃষ্যা বল্যা নিরাবাধা চিরং চাপ্যনুবর্ততে||৪০||

মাত্রাযাঃ সঙ্খ্যাং প্রমাণং চাহ- অহোরাত্রমিত্যাদি| অহোরাত্রশব্দোঽষ্টপ্রহরোপলক্ষণঃ, এবমহঃশব্দার্ধাহশব্দৌ চতুঃপ্রহরদ্বিপ্রহরোপলক্ষণৌ, তেন প্রহরাদ্যতীতেঽপ্যহনি পীতা মাত্রা যথোক্তপ্রহরকালপ্রাপ্ত্যা দিনান্তরে রাত্রৌ বা জীর্যমাণা মন্তব্যা; অন্যে ত্বহোরাত্রশব্দেন ন্যূনেনাপ্যহ্না যুক্তা রাত্রিরহোরাত্রশব্দেনোচ্যতে , কৃত্স্নার্ধাহৌ তু প্রহরোপলক্ষণাবিতি বদন্তি| অত্র যদা অহোরাত্রপরিণামিনী মাত্রা ক্রিযতে, তদা তদহরাহারো ন কর্তব্যঃ; অত এবৈতত্পানং পুরুষবিশেষবিষযকথনে উক্তং- “ক্ষুত্পিপাসাসহানরাঃ” ইতি| প্রভূতস্নেহনিত্যাঃ প্রভূতস্নেহসাত্ম্যাঃ| সম্যগ্যো জিতেতিবচনেন মহাব্যাপত্তিত্বমস্যাঃ সূচযতি| সর্বমার্গাঃ কোষ্ঠসন্ধিমর্মশাখাঃ| পুনর্নবকরী নিঃশেষদোষহরত্বেন| অরুষ্কেত্যাদি মধ্যমমাত্রাগুণঃ; অরুষ্কা অরূংষিকা| শোধনার্থ ইতি শোধনার্থ(ঙ্গ)স্নেহকরণে; এতেন উত্তমমাত্রা সংশমনে এব পরং, ন তু শোধনাঙ্গস্নেহে কর্তব্যেতি দর্শযতি| যে ত্বিত্যাদি হ্রস্বমাত্রাগুণঃ| পরিহারে সুখেতি অল্পপরিহারত্বেন||২৯-৪০||

Adhikarana 16 (41-43) · Śloka 43

বাতপিত্তপ্রকৃতযো বাতপিত্তবিকারিণঃ| চক্ষুঃকামাঃ ক্ষতাঃ ক্ষীণা বৃদ্ধা বালাস্তথাঽবলাঃ||৪১|| আযুঃপ্রকর্ষকামাশ্চ বলবর্ণস্বরার্থিনঃ| পুষ্টিকামাঃ প্রজাকামাঃ সৌকুমার্যার্থিনশ্চ যে||৪২|| দীপ্ত্যোজঃস্মৃতিমেধাগ্নিবুদ্ধীন্দ্রিযবলার্থিনঃ| পিবেযুঃ সর্পিরার্তাশ্চ দাহশস্ত্রবিষাগ্নিভিঃ||৪৩||

যঃ স্নেহো যত্র কার্যস্তমাহ- বাতপিত্তেত্যাদি| বাতপিত্তবিকারগ্রহণেনৈব বাতপিত্তপ্রকৃতিষু লব্ধেষু পুনস্তদভিধানং বাতপিত্তপ্রকৃতীনাং স্তোকশ্লেষ্মবিকারেঽপি ঘৃতপানোপদেশার্থম্; এবং বাতব্যাধিভিরাবিষ্টা বাতপ্রকৃতযশ্চ য ইত্যত্র ব্যাখ্যেযম্| বলার্থিন ইত্যত্র বলশব্দঃ স্মৃত্যাদিভিঃ সম্বধ্যতে| আর্তাঃ পীডিতাঃ, দাহাদিভিরিতি সম্বন্ধঃ||৪১-৪৩||

Adhikarana 17 (44-46) · Śloka 46

প্রবৃদ্ধশ্লেষ্মমেদস্কাশ্চলস্থূলগলোদরাঃ| বাতব্যাধিভিরাবিষ্টা বাতপ্রকৃতযশ্চ যে||৪৪|| বলং তনুত্বং লঘুতাং দৃঢতাং স্থিরগাত্রতাম্ | স্নিগ্ধশ্লক্ষ্ণতনুত্বক্তাং যে চ কাঙ্ক্ষন্তি দেহিনঃ||৪৫|| কৃমিকোষ্ঠাঃ ক্রূরকোষ্ঠাস্তথা নাডীভিরর্দিতাঃ| পিবেযুঃ শীতলে কালে তৈলং তৈলোচিতাশ্চ যে||৪৬||

তৈলবিষযমাহ- প্রবৃদ্ধেত্যাদি| শীতলে কাল ইতি তৈলস্যোষ্ণত্বেন শীতলেঽপি কাল ইত্যর্থঃ; তেন সামান্যপ্রতিষেধঃ ‘নাত্যুষ্ণশীতে স্নেহং পিবেন্নরঃ’ ইতি ন বিরুধ্যতে; যদি বা সর্পিঃপানকালাপেক্ষযা শীতত্বং বোদ্ধব্যম্||৪৪-৪৬||

Adhikarana 18 (47-49) · Śloka 49

বাতাতপসহা যে চ রূক্ষা ভারাধ্বকর্শিতাঃ| সংশুষ্করেতোরুধিরা নিষ্পীতকফমেদসঃ||৪৭|| অস্থিসন্ধিসিরাস্নাযুমর্মকোষ্ঠমহারুজঃ| বলবান্মারুতো যেষাং খানি চাবৃত্য তিষ্ঠতি||৪৮|| মহচ্চাগ্নিবলং যেষাং বসাসাত্ম্যাশ্চ যে নরাঃ| তেষাং স্নেহযিতব্যানাং বসাপানং বিধীযতে||৪৯||

বসাবিষযমাহ- বাতাতপেত্যাদি| সংশুষ্কনিষ্পীতশব্দৌ ক্ষীণার্থাবেব| মহারুজ ইত্যস্থ্যাদিভিঃ সম্বধ্যতে| খানি স্রোতাংসি||৪৭-৪৯||

Adhikarana 19 (50) · Śloka 51

দীপ্তাগ্নযঃ ক্লেশসহা ঘস্মরাঃ স্নেহসেবিনঃ| বাতার্তাঃ ক্রূরকোষ্ঠাশ্চ স্নেহ্যা মজ্জানমাপ্নুযুঃ||৫০|| যেভ্যো যেভ্যো হিতো যো যঃ স্নেহঃ স পরিকীর্তিতঃ|৫১|

দীপ্তাগ্নয ইত্যাদি মজ্জপানবিষযঃ| ঘস্মরা বহুভক্ষকাঃ| আপ্নুযুঃ উপযুঞ্জীরন্||৫০||-

Adhikarana 20 (51) · Śloka 51

স্নেহনস্য প্রকর্ষৌ তু সপ্তরাত্রত্রিরাত্রকৌ||৫১||

প্রকর্ষাবিতি অল্পপ্রকর্ষভূযঃপ্রকর্ষৌ ; তেন, অল্পত্বেন ত্রৈরাত্রিকঃ প্রকর্ষঃ, ভূযস্ত্বেন সাপ্তরাত্রিক ইতি চ ভবতি| এতচ্চ বক্ষ্যমাণসদ্যঃস্নেহপ্রযোগাতিরিক্তপ্রযোগে বোদ্ধব্যং; যদি বা, সদ্যঃস্নেহপ্রযোগা অপি ত্র্যহেণৈব স্নেহযন্তি, স্তুত্যর্থং তু তেষু সদ্য ইত্যুক্তম্| যদুক্তং- “ত্র্যহাবরং সপ্তদিনং পরং তু স্নিগ্ধো নরঃ স্বেদযিতব্য ইষ্টঃ| নাতঃ পরং স্নেহনমাদিশন্তি সাত্ম্যীভবেত্ সপ্তদিনাত্ পরং তু” (সি.অ.১.) ইতি||৫১||

Adhikarana 21 (52) · Śloka 52

স্বেদ্যাঃ শোধযিতব্যাশ্চ রূক্ষা বাতবিকারিণঃ| ব্যাযামমদ্যস্ত্রীনিত্যাঃ স্নেহ্যাঃ স্যুর্যে চ চিন্তকাঃ||৫২||

সামান্যেন স্নেহ্যানাহ- স্বেদ্যা ইত্যাদি| স্বেদ্যাঃ স্বতন্ত্রস্বেদসাধ্যা বাতরুগার্তাদযঃ, শোধনাঙ্গস্বেদসাধ্যানাং তু শোধযিতব্যা ইত্যনেনৈব গৃহীতত্বাত্| চিন্তকা ইতি চিন্তাবহুলাঃ||৫২||

Adhikarana 22 (53-56) · Śloka 56

সংশোধনাদৃতে যেষাং রূক্ষণং সম্প্রবক্ষ্যতে| ন তেষাং স্নেহনং শস্তমুত্সন্নকফমেদসাম্||৫৩|| অভিষ্যণ্ণাননগুদা নিত্যমন্দাগ্নযশ্চ যে| তৃষ্ণামূর্চ্ছাপরীতাশ্চ গর্ভিণ্যস্তালুশোষিণঃ||৫৪|| অন্নদ্বিষশ্ছর্দযন্তো জঠরামগরার্দিতাঃ| দুর্বলাশ্চ প্রতান্তাশ্চ স্নেহগ্লানা মদাতুরাঃ||৫৫|| ন স্নেহ্যা বর্তমানেষু ন নস্তো বস্তিকর্মসু| স্নেহপানাত্ প্রজাযন্তে তেষাং রোগাঃ সুদারুণাঃ||৫৬||

অস্নেহ্যানাহ- সংশোধনাদৃত ইত্যাদি| যেষাং রূক্ষণং বক্ষ্যতে লঙ্ঘনবৃংহণীযে- “অভিষ্যন্দা মহাদোষা মর্মস্থা ব্যাধযশ্চ যে| ঊরুস্তম্ভপ্রভৃতযো রূক্ষণীযা নিদর্শিতাঃ” (সূ. অ.২২) ইত্যনেন, তেষাং শোধনাদৃতে স্নেহনং ন শস্তং, যদা তু শোধনেন বিরূক্ষ্যন্তে তদা পরং শোধনাঙ্গ(র্থ)স্তত্র স্নেহঃ কর্তব্য ইতি ভাবঃ| উত্সন্নো বৃদ্ধঃ কফো মেদশ্চ যেষাং তে তথা; এতচ্চ বিশেষণং বিরূক্ষণীযা এবম্ভূতা এব ভবন্তীতি দর্শযতি | অভিষ্যণ্ণঃ দ্রবপ্রধানশ্লেষ্মবিকারী| গরঃ কৃত্রিমং বিষম্| অতিপ্রতান্তঃ অতিক্ষীণদ্রবধাতুঃ| বর্তমানেষু ক্রিযমাণেষ্বিত্যর্থঃ||৫৩-৫৬||

Adhikarana 23 (57-59) · Śloka 59

পুরীষং গ্রথিতং রূক্ষং বাযুরপ্রগুণো মৃদুঃ| পক্তা খরত্বং রৌক্ষ্যং চ গাত্রস্যাস্নিগ্ধলক্ষণম্||৫৭|| বাতানুলোম্যং দীপ্তোঽগ্নির্বর্চঃ স্নিগ্ধমসংহতম্| মার্দবং স্নিগ্ধতা চাঙ্গে স্নিগ্ধানামুপজাযতে||৫৮|| পাণ্ডুতা গৌরবং জাড্যং পুরীষস্যাবিপক্বতা| তন্দ্রীররুচিরুত্কেশঃ স্যাদতিস্নিগ্ধলক্ষণম্||৫৯||

অস্নিগ্ধলক্ষণমাহ- পুরীষমিত্যাদি| মৃদুরিতি পক্তুর্বিশেষণম্| বাতানুলোম্যমিত্যাদি স্নিগ্ধলক্ষণম্| পাণ্ডুতেত্যাদি অতিস্নিগ্ধলক্ষণম্| জাড্যম্ ইন্দ্রিযজডত্বম্||৫৭-৫৯||

Adhikarana 24 (60-61) · Śloka 61

দ্রবোষ্ণমনভিষ্যন্দি ভোজ্যমন্নং প্রমাণতঃ| নাতিস্নিগ্ধমসঙ্কীর্ণং শ্বঃ স্নেহং পাতুমিচ্ছতা||৬০|| পিবেত্ সংশমনং স্নেহমন্নকালে প্রকাঙ্ক্ষিতঃ| শুদ্ধ্যর্থং পুনরাহারে নৈশে জীর্ণে পিবেন্নরঃ||৬১||

স্নেহাত্ পূর্বং যত্ পথ্যং তদাহ- দ্রবোষ্ণমিত্যাদি| অসঙ্কীর্ণম্ অবিরুদ্ধবীর্যম্| শ্ব ইত্যাগামিদিনে| অন্নকালে দ্বিপ্রহরাদিলক্ষণে বুভুক্ষা কদাচিন্ন স্যাদপি তদর্থং বিশেষণং- প্রকাঙ্ক্ষিত ইতি| শুদ্ধ্যর্থং তু স্নেহং নৈশে দিনান্তরকৃতে আহারে জীর্ণ এব প্রাতরেব পিবেদিত্যর্থঃ| সংশমনার্থস্নেহো যদি জরণান্তে প্রাতরেব ক্রিযতে তদা কোষ্ঠোপলেপকদোষস্যাক্ষযাত্তেন দোষেণ সম্বদ্ধো দোষোত্ক্লেশং কুর্যান্ন সংশমনং, সংশোধনার্থস্তু দোষোত্ক্লেশং করোতীত্যপেক্ষণীয এবেতি ভাবঃ| এতচ্চ কালকথনমুত্সর্গেণ, তেন “বাতপিত্তাধিকো রাত্রৌ” ইত্যুক্তকালবিরোধো ন ভবতি||৬০-৬১||

Adhikarana 25 (62-64) · Śloka 64

উষ্ণোদকোপচারী স্যাদ্ব্রহ্মচারী ক্ষপাশযঃ | শকৃন্মূত্রানিলোদ্গারানুদীর্ণাংশ্চ ন ধারযেত্||৬২|| ব্যাযামমুচ্চৈর্বচনং ক্রোধশোকৌ হিমাতপৌ| বর্জযেদপ্রবাতং চ সেবেত শযনাসনম্||৬৩|| স্নেহং পীত্বা নরঃ স্নেহং প্রতিভুঞ্জান এব চ| স্নেহমিথ্যোপচারাদ্ধি জাযন্তে দারুণা গদাঃ||৬৪||

ক্ষপাযামেব স্বপিতীতি ক্ষপাশযঃ| অপ্রবাতং চেতি শযনাসনবিশেষণম্| স্নেহং প্রতিভুঞ্জান ইতি স্নেহে জীর্ণেঽপি স্নেহপ্রযোগানুগুণমন্যস্নেহমবিরুদ্ধবীর্যাদিগুণযুক্তং ভুঞ্জানঃ| এতেন স্নেহে পীতে জীর্ণে কিঞ্চ হিতাহিতমিতি প্রশ্নদ্বযস্যোত্তরমিদম্- উষ্ণোদকোপচারী স্যাদিত্যাদি ভবতি||৬২-৬৪||

Adhikarana 26 (65-69) · Śloka 69

মৃদুকোষ্ঠস্ত্রিরাত্রেণ স্নিহ্যত্যচ্ছোপসেবযা| স্নিহ্যতি ক্রূরক্রোষ্ঠস্তু সপ্তরাত্রেণ মানবঃ||৬৫|| গুডমিক্ষুরসং মস্তু ক্ষীরমুল্লোডিতং দধি| পাযসং কৃশরাং সর্পিঃ কাশ্মর্যত্রিফলারসম্||৬৬|| দ্রাক্ষারসং পীলুরসং জলমুষ্ণমথাপি বা| মদ্যং বা তরুণং পীত্বা মৃদুকোষ্ঠো বিরিচ্যতে||৬৭|| বিরেচযন্তি নৈতানি ক্রূরকোষ্ঠং কদাচন| ভবতি ক্রূরকোষ্ঠস্য গ্রহণ্যত্যুল্বণানিলা||৬৮|| উদীর্ণপিত্তাঽল্পকফা গ্রহণী মন্দমারুতা| মৃদুকোষ্ঠস্য তস্মাত্ স সুবিরেচ্যো নরঃ স্মৃতঃ||৬৯||

মৃদুকোষ্ঠাদিলক্ষণমাহ- মৃদ্বিত্যাদি| অভ্যর্হিতত্বাত্ কোষ্ঠজ্ঞানস্যান্যথাঽপি তল্লক্ষণমাহ- গুডমিত্যাদি| উল্লোডিতং দধিসরঃ| কৃশরা তিলতণ্ডুলমাষকৃতা যবাগূঃ; বচনং হি- “তিলতণ্ডুলমাষৈস্তু কৃশরা ত্রিসরেতি চ”| ক্রূরকোষ্ঠাবিরেচনহেতুমাহ- ভবতীত্যাদি| গ্রহণী কোষ্ঠস্থাগ্ন্যধিষ্ঠানভূতা নাডী; যদুক্তম্- “অগ্ন্যধিষ্ঠানমন্নস্য গ্রহণাদ্গ্রহণী মতা” (চি.অ.১৫) ইতি| উদীর্ণপিত্তেত্যাদি মৃদুকোষ্ঠস্বরূপকথনম্| ক্রূরকোষ্ঠস্য গ্রহণীগতো বাযুর্গুডাদীনাং সরত্বং প্রতিবধ্নাতি, মৃদুকোষ্ঠস্য হি গ্রহণ্যাং বিরোধকো বাযুর্নাস্তি, স্তম্ভকোঽপি শ্লেষ্মাঽল্পঃ, উদ্ভূতসরত্বগুণং চ পিত্তং প্রবলং; তেন গুডাদিভিঃ সুখং বিরেচনং ভবতীতি ভাবঃ||৬৫-৬৯||

Adhikarana 27 (70-78) · Śloka 78

উদীর্ণপিত্তা গ্রহণী যস্য চাগ্নিবলং মহত্| ভস্মীভবতি তস্যাশু স্নেহঃ পীতোঽগ্নিতেজসা||৭০|| স জগ্ধ্বা স্নেহমাত্রাং তামোজঃ প্রক্ষারযন্ বলী| স্নেহাগ্নিরুত্তমাং তৃষ্ণাং সোপসর্গামুদীরযেত্||৭১|| নালং স্নেহসমৃদ্ধস্য শমাযান্নং সুগুর্বপি| স চেত্ সুশীতং সলিলং নাসাদযতি দহ্যতে| যথৈবাশীবিষঃ কক্ষমধ্যগঃ স্ববিষাগ্নিনা||৭২|| অজীর্ণে যদি তু স্নেহে তৃষ্ণা স্যাচ্ছর্দযেদ্ভিষক্| শীতোদকং পুনঃ পীত্বা ভুক্ত্বা রূক্ষান্নমুল্লিখেত্||৭৩|| ন সর্পিঃ কেবলং পিত্তে পেযং সামে বিশেষতঃ| সর্বং হ্যনুরজেদ্দেহং হত্বা সঞ্জ্ঞাং চ মারযেত্||৭৪|| তন্দ্রা সোত্ক্লেশ আনাহো জ্বরঃ স্তম্ভো বিসঞ্জ্ঞতা| কুষ্ঠানি কণ্ডূঃ পাণ্ডুত্বং শোফার্শাংস্যরুচিস্তৃষা||৭৫|| জঠরং গ্রহণীদোষাঃ স্তৈমিত্যং বাক্যনিগ্রহঃ| শূলমামপ্রদোষাশ্চ জাযন্তে স্নেহবিভ্রমাত্||৭৬|| তত্রাপ্যুল্লেখনং শস্তং স্বেদঃ কালপ্রতীক্ষণম্| প্রতি প্রতি ব্যাধিবলং বুদ্ধ্বা স্রংসনমেব চ||৭৭|| তক্রারিষ্টপ্রযোগশ্চ রূক্ষপানান্নসেবনম্| মূত্রাণাং ত্রিফলাযাশ্চ স্নেহব্যাপত্তিভেষজম্||৭৮||

সম্প্রতি স্নেহব্যাপদো দর্শযতি- উদীর্ণেত্যাদি| ওজঃ সর্বধাতুসারভূতং হৃদি স্থিতং, প্রক্ষারযন্ স্থানাদ্ভ্রংশযন্ ক্ষপযংশ্চ| বলীত্যনেন স্নেহেন্ধনো বহ্নির্নিতরাং বলবান্ ভবতীতি দর্শযতি| বচনং হি- “নালং স্নেহসমৃদ্ধস্য শমাযান্নং সুগুর্বপি” ইতি| উত্তমাং মহতীং মাত্রাম্| সোপসর্গাং সোপদ্রবাম্| কক্ষঃ কাষ্ঠসমূহঃ| ছর্দযেদিতি প্রথমং স্নেহমেব তৃষ্ণাকারকং ছর্দযিত্বা পুনঃ শীতোদকং পীত্বা রূক্ষান্নং চ ভুক্ত্বা উল্লিখেদিতি যোজনীযম্| ন সর্পিরিত্যাদি|- ন সর্পিঃ সামে পিত্তে পেযং, কেবলং ত্বসংস্কৃতং বিশেষতো ন পেযং সামপিত্ত এবেতি যোজনা; এবং মন্যতে- সংস্কৃতং তিক্তকাদিভির্যুতং সামে পিত্তে তিক্তকাদিপাচনগুণানুযোগাদ্যোগ্যং কদাচিদ্ভবত্যপি , অসংস্কৃতং তু সর্বথা বিরুদ্ধমেব; যদিবা, কেবলমসংস্কৃতং সর্পিঃ পিত্তে সামান্যেন সামে নিরামে বা ন পেযং, সামে পিত্তে বিশেষত ইতি যোজনা| এতেন, যত্রাপি সামান্যেন ঘৃতং বিহিতং, যথা- “অত ঊর্ধ্বং কফে মন্দে বাতপিত্তোত্তরে জ্বরে| পরিপক্বেষু দোষেষু সর্পিঃপানং যথাঽমৃতম্” (চি.অ.৩) ইত্যাদৌ, তত্রাপ্যুচিতভেষজসংস্কৃতমেব বোদ্ধব্যম্| যদিবা, ন কেবলং পিত্তে সামে সর্পির্বিশেষতো ন পেযং, কিন্তর্হি তৈলাদীন্যপি বাতশ্লেষ্মবিহিতানি তযোঃ সামযোর্ন পেযানীত্যর্থঃ| অস্মিন্ ব্যাখ্যানেঽপেযমিত্যকারপ্রশ্লেষো দ্রষ্টব্যঃ| অনুরজেত্ পিত্তবর্ণং কুর্যাত্| সঞ্জ্ঞা স্মৃতিঃ, তদ্ধননং চেহ ব্যাধিপ্রভাবাত্| স্তৈমিত্যম্ আর্দ্রবস্ত্রাগুণ্ঠিতত্বমিব| আমপ্রদোষা অলসকবিসূচিকাদযঃ| কালপ্রতীক্ষণং স্নেহজনিতদোষক্ষযং যাবদভোজনম্| তক্রস্যারিষ্টানাং চ চিকিত্সাবক্ষ্যমাণানাং প্রযোগঃ| মূত্রাণাং ত্রিফলাযাশ্চ সেবনমিতি সম্বন্ধঃ||৭০-৭৮||

Adhikarana 28 (79) · Śloka 79

অকালে চাহিতশ্চৈব মাত্রযা ন চ যোজিতঃ| স্নেহো মিথ্যোপচারাচ্চ ব্যাপদ্যেতাতিসেবিতঃ||৭৯||

মিথ্যোপচারাত্ যথোক্তবিধ্যননুষ্ঠানাত্| অতিসেবিতঃ কালপ্রকর্ষেণ সেবিতঃ||৭৯||

Adhikarana 29 (80) · Śloka 80

স্নেহাত্ প্রস্কন্দনং জন্তুস্ত্রিরাত্রোপরতঃ পিবেত্| স্নেহবদ্দ্রবমুষ্ণং চ ত্র্যহং ভুক্ত্বা রসৌদনম্||৮০||

সংশোধনস্নেহপানে বৃত্তিপ্রচারমাহ- স্নেহাদিত্যাদি| স্নেহাত্ স্নেহপ্রযোগাত্| ত্রিরাত্রোপরতঃ ত্রিরাত্রং পরিত্যক্তস্নেহপান ইত্যর্থঃ| প্রস্কন্দনং বিরেচনম্| স্নেহোপরমত্রিরাত্র এব ভোজনং দর্শযতি- স্নেহবদিত্যাদি| রসপ্রধানমোদনং রসৌদনম্||৮০||

Adhikarana 30 (81) · Śloka 81

একাহোপরতস্তদ্বদ্ভুক্ত্বা প্রচ্ছর্দনং পিবেত্|৮১|

বমনে স্নেহবৃত্তিমাহ- একেত্যাদি| একাহোপরতঃ স্নেহাদিতি যোজনা| তদ্বদিতি স্নেহবদ্দ্রবমুষ্ণং চ রসৌদনং স্নেহোপরমদিবস এব|৮১|-

Adhikarana 31 (81) · Śloka 81

স্যাত্ত্বসংশোধনার্থীযে বৃত্তিঃ স্নেহে বিরিক্তবত্||৮১||

সংশমনবিধিমাহ- স্যাত্ত্বিত্যাদি| অসংশোধনার্থীযে সংশমনে| বৃত্তিঃ উপচারঃ| বিরিক্তবদিত্যনেনাগতাবেক্ষণেনোপকল্পনীযবক্ষ্যমাণং “সম্যগ্বিরিক্তং চৈনং” (সূ. অ.১৫) ইত্যাদিগ্রন্থপ্রতিপাদনীযমুপচারমাহ, নতু পেযাদিক্রমমাত্রম্ | যদ্যপি বমনোক্তা এব তত্রোচ্চৈর্ভাষ্যাদযো বিরেচনবৃত্তাবপ্যতিদিষ্টাস্তথাঽপীহ বমনবিধি পরিত্যজ্য বিরেচনবিধ্যতিদেশো ধূমপানপ্রতিষেধার্থঃ, বিরেচনে হি তত্র “ধূমপানবর্জং” (সূ. অ.১৫) ইতি কৃতং, স্নেহপানে চ ধূমপানং নিষিদ্ধং মাত্রাশিতীযে- “ন মদ্যদুগ্ধে পীত্বা চ ন স্নেহং” (সূ. অ.৫) ইত্যাদিনা||৮১||

Adhikarana 32 (82-90) · Śloka 1

স্নেহদ্বিষঃ স্নেহনিত্যা মৃদুকোষ্ঠাশ্চ যে নরাঃ| ক্লেশাসহা মদ্যনিত্যাস্তেষামিষ্টা বিচারণা||৮২|| লাবতৈত্তিরমাযূরহাংসবারাহকৌক্কুটাঃ| গব্যাজৌরভ্রমাত্স্যাশ্চ রসাঃ স্যুঃ স্নেহনে হিতাঃ||৮৩|| যবকোলকুলত্থাশ্চ স্নেহাঃ সগুডশর্করাঃ| দাডিমং দধি সব্যোষং রসসংযোগসঙ্গ্রহঃ||৮৪|| স্নেহযন্তি তিলাঃ পূর্বং জগ্ধাঃ সস্নেহফাণিতাঃ| কৃশরাশ্চ বহুস্নেহাস্তিলকাম্বলিকাস্তথা||৮৫|| ফাণিতং শৃঙ্গবেরং চ তৈলং চ সুরযা সহ| পিবেদ্রূক্ষো ভৃতৈর্মাংসৈর্জীর্ণেঽশ্নীযাচ্চ ভোজনম্||৮৬|| তৈলং সুরাযা মণ্ডেন বসাং মজ্জানমেব বা| পিবন্ সফাণিতং ক্ষীরং নরঃ স্নিহ্যতি বাতিকঃ||৮৭|| ধারোষ্ণং স্নেহসংযুক্তং পীত্বা সশর্করং পযঃ| নরঃ স্নিহ্যতি পীত্বা বা সরং দধ্নঃ সফাণিতম্||৮৮|| পাঞ্চপ্রসৃতিকী পেযা পাযসো মাষমিশ্রকঃ| ক্ষীরসিদ্ধো বহুস্নেহঃ স্নেহযেদচিরান্নরম্||৮৯|| সর্পিস্তৈলবসামজ্জাতণ্ডুলপ্রসৃতৈঃ শৃ(কৃ)তা| পাঞ্চপ্রসৃতিকী পেযা পেযা স্নেহনমিচ্ছতা||৯০|| (শৌকরো বা রসঃ স্নিগ্ধঃ সর্পির্লবণসংযুতঃ | পীতো দ্বির্বাসরে যত্নাত্ স্নেহযেদচিরান্নরম্ ||১||)|

বিচারণাবিষযমাহ- স্নেহদ্বিষ ইত্যাদিনা| লাবাদিরসানামুক্তানাং সংস্কারমাহ- যবেত্যাদি| রসে স্নেহার্থোক্তরস উচিতঃ সংযোগো যেষাং তে রসসংযোগাঃ, তেষাং সঙ্গ্রহণং সঙ্গ্রহঃ| পূর্বমিতি ভোজনাত্ পূর্বম্| তিলপ্রধানঃ কাম্বলিকস্তিলকাম্বলিকঃ| ফাণিতমিত্যাদৌ শৃঙ্গবেরমিতি শৃঙ্গবেররসম্| ভৃতৈঃ ভটিত্রীকৃতৈঃ| পাঞ্চপ্রসৃতিকী অগ্রে বক্ষ্যমাণা| মাষমিশ্রকো মাষতণ্ডুলকৃতমন্নম্| পেযা পাতব্যা||৮২-৯০||

Adhikarana 33 (91-94) · Śloka 94

গ্রাম্যানূপৌদকং মাংসং গুডং দধি পযস্তিলান্| কুষ্ঠী শোথী প্রমেহী চ স্নেহনে ন প্রযোজযেত্||৯১|| স্নেহৈর্যথার্হং তান্ সিদ্ধৈঃ স্নেহযেদবিকারিভিঃ| পিপ্পলীভির্হরীতক্যা সিদ্ধৈস্ত্রিফলযাঽপি বা||৯২|| দ্রাক্ষামলকযূষাভ্যাং দধ্না চাম্লেন সাধযেত্| ব্যোষগর্ভং ভিষক্ স্নেহং পীত্বা স্নিহ্যতি তং নরঃ||৯৩|| যবকোলকুলত্থানাং রসাঃ ক্ষারঃ সুরা দধি| ক্ষীরসর্পিশ্চ তত্ সিদ্ধং স্নেহনীযং ঘৃতোত্তমম্||৯৪||

যথার্হমিতি যো যত্র স্নেহো যুজ্যতে সর্পিরাদিঃ| সিদ্ধৈরিতি পিপ্পলীভিস্তথা হরীতক্যা তথা ত্রিফলযা চেতি পৃথগ্যোজনীযং; পিপ্পল্যাদিসিদ্ধস্নেহশ্চ কুষ্ঠাদিষু যথাসঙ্খ্যমিতি কেচিত্| যূষশব্দঃ ক্বাথবচনঃ| ব্যোষগর্ভং ব্যোষকল্কম্| অত্র ত্রিভির্দ্রব্যৈর্মিলিত্বা চাতুর্গুণ্যম্| যবকোলাদৌ ষড্দ্রব্যাণি স্নেহসমানি| ক্ষারো যবক্ষারঃ কল্কঃ||৯১-৯৪||

Adhikarana 34 (95) · Śloka 95

তৈলমজ্জবসাসর্পির্বদরত্রিফলারসৈঃ| যোনিশুক্রপ্রদোষেষু সাধযিত্বা প্রযোজযেত্||৯৫||

তৈলমজ্জেত্যাদি|- চতুঃস্নেহোঽকল্ক এব, তৈলমজ্জবসাসর্পিরিত্যেকবদ্ভাবাদ্দ্বিতীযান্তঃ প্রযোগঃ||৯৫||

Adhikarana 35 (96-97) · Śloka 97

গৃহ্ণাত্যম্বু যথা বস্ত্রং প্রস্রবত্যধিকং যথা| যথাগ্নি জীর্যতি স্নেহস্তথা স্রবতি চাধিকঃ||৯৬|| যথা বাঽঽক্লেদ্য মৃত্পিণ্ডমাসিক্তং ত্বরযা জলম্| স্রবতি স্রংসতে স্নেহস্তথা ত্বরিতসেবিতঃ||৯৭||

সম্প্রতি স্নেহ উপযুক্তো যথা শরীরং সস্নেহ্যাধিকো দৃশ্যতে, তদাহ- গৃহ্ণাতীত্যাদি| তচ্চ শিষ্যেণাধ্যাযাদাবপৃষ্টমপি শিষ্যহিততযাঽভিধীযতে| যথাগ্নীতি অগ্ন্যনধিক ইত্যর্থঃ| নন্বগ্ন্যধিকশ্চেত্ স্রবতি, তদবধি চ স্নেহলক্ষণমুক্তং, যদুচ্যতে- “অধস্তাত্ স্নেহদর্শনম্” ইতি, তেনৈকদিন এবাধিকস্নেহপানং ক্রিযতামিত্যাহ- যথা চেত্যাদি| আক্লেদ্য ঈষত্ক্লেদযিত্বা| ত্বরিতসেবিতঃ স্নেহো ধাতূনস্নেহযিত্বৈব স্রংসতেঽধো যাতি যাবান্, ন তাবতা স্নেহনং ভবতীতি ভাবঃ||৯৬-৯৭||

Adhikarana 36 (98) · Śloka 98

লবণোপহিতাঃ স্নেহাঃ স্নেহযন্ত্যচিরান্নরম্| তদ্ধ্যভিষ্যন্দ্যরূক্ষং চ সূক্ষ্মমুষ্ণং ব্যবাযি চ||৯৮||

স্নেহনে সর্বস্নেহেষু লবণপ্রযোগমাহ- লবণোপহিতা ইত্যাদি| তদিতি লবণম্| অভিষ্যন্দি দোষসঙ্ঘাতবিচ্ছেদকম্| ব্যবাযি অখিলদেহব্যাপ্তিপূর্বকপাকগামি||৯৮||

Adhikarana 37 (99) · Śloka 99

স্নেহমগ্রে প্রযুঞ্জীত ততঃ স্বেদমনন্তরম্| স্নেহস্বেদোপপন্নস্য সংশোধনমথেতরত্ ||৯৯||

অতো বক্ষ্যমাণস্বেদোপকল্পনাধ্যাযযোঃ সম্বন্ধসূচকং স্বেদাদিষু স্নেহস্য প্রাগ্ভাবমাহ- স্নেহমিত্যাদি||৯৯||

Adhikarana 38 (100) · Śloka 100

তত্র শ্লোকঃ- স্নেহাঃ স্নেহবিধিঃ কৃত্স্নব্যাপত্সিদ্ধিঃ সভেষজা| যথাপ্রশ্নং ভগবতা ব্যাহৃতং চান্দ্রভাগিনা||১০০||

চান্দ্রভাগী পুনর্বসুঃ||১০০||

Adhikarana puShpikA · Śloka 13

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে স্নেহাধ্যাযো নাম ত্রযোদশোঽধ্যাযঃ সমাপ্তঃ||১৩||

ইতি শ্রীচক্রপাণিদত্তবিরচিতাযাং চরকতাত্পর্যব্যাখ্যাযামাযুর্বেদদীপিকাযাং সূত্রস্থানে কল্পনাচতুষ্কে স্নেহাধ্যাযো নাম ত্রযোদশোঽধ্যাযঃ||১৩||