13. snēhādhyāyaḥ

Adhikarana 1 (1-2) · Śloka 2

অথাতঃ স্নেহাধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

Adhikarana 2 (3) · Śloka 3

সাঙ্খ্যৈঃ সঙ্খ্যাতসঙ্খ্যেযৈঃ সহাসীনং পুনর্বসুম্| জগদ্ধিতার্থং পপ্রচ্ছ বহ্নিবেশঃ স্বসংশযম্||৩||

Adhikarana 3 (4-8) · Śloka 8

কিংযোনযঃ কতি স্নেহাঃ কে চ স্নেহগুণাঃ পৃথক্| কালানুপানে কে কস্য কতি কাশ্চ বিচারণাঃ||৪|| কতি মাত্রাঃ কথম্মানাঃ কা চ কেষূপদিশ্যতে| কশ্চ কেভ্যো হিতঃ স্নেহঃ প্রকর্ষঃ স্নেহনে চ কঃ||৫|| স্নেহ্যাঃ কে কে ন চ স্নিগ্ধাস্নিগ্ধাতিস্নিগ্ধলক্ষণম্| কিং পানাত্ প্রথমং পীতে জীর্ণে কিঞ্চ হিতাহিতম্||৬|| কে মৃদুক্রূরকোষ্ঠাঃ কা ব্যাপদঃ সিদ্ধযশ্চ কাঃ| অচ্ছে সংশোধনে চৈব স্নেহে কা বৃত্তিরিষ্যতে||৭|| বিচারণাঃ কেষু যোজ্যা বিধিনা কেন তত্ প্রভো!| স্নেহস্যামিতবিজ্ঞান জ্ঞানমিচ্ছামি বেদিতুম্||৮||

Adhikarana 4 (9-11) · Śloka 11

অথ তত্সংশযচ্ছেত্তা প্রত্যুবাচ পুনর্বসুঃ| স্নেহানাং দ্বিবিধা সৌম্য যোনিঃ স্থাবরজঙ্গমা||৯|| তিলঃ প্রিযালাভিষুকৌ বিভীতকশ্চিত্রাভযৈরণ্ডমধূকসর্ষপাঃ| কুসুম্ভবিল্বারুকমূলকাতসীনিকোচকাক্ষোডকরঞ্জশিগ্রুকাঃ||১০|| স্নেহাশযাঃ স্থাবরসঞ্জ্ঞিতাস্তথা স্যুর্জঙ্গমা মত্স্যমৃগাঃ সপক্ষিণঃ| তেষাং দধিক্ষীরঘৃতামিষং বসা স্নেহেষু মজ্জা চ তথোপদিশ্যতে||১১||

Adhikarana 5 (12) · Śloka 1

সর্বেষাং তৈলজাতানাং তিলতৈলং বিশিষ্যতে| বলার্থে স্নেহনে চাগ্র্যমৈরণ্ডং তু বিরেচনে||১২|| (কটূষ্ণং তৈলমৈরণ্ডং বাতশ্লেষ্মহরং গুরু | কষাযস্বাদুতিক্তৈশ্চ যোজিতং পিত্তহন্ত্রপি ||১||)|

Adhikarana 6 (13) · Śloka 13

সর্পিস্তৈলং বসা মজ্জা সর্বস্নেহোত্তমা মতাঃ| এষু চৈবোত্তমং সর্পিঃ সংস্কারস্যানুবর্তনাত্||১৩||

Adhikarana 7 (14-17) · Śloka 17

ঘৃতং পিত্তানিলহরং রসশুক্রৌজসাং হিতম্| নির্বাপণং মৃদুকরং স্বরবর্ণপ্রসাদনম্||১৪|| মারুতঘ্নং ন চ শ্লেষ্মবর্ধনং বলবর্ধনম্| ত্বচ্যমুষ্ণং স্থিরকরং তৈলং যোনিবিশোধনম্||১৫|| বিদ্ধভগ্নাহতভ্রষ্টযোনিকর্ণশিরোরুজি| পৌরুষোপচযে স্নেহে ব্যাযামে চেষ্যতে বসা||১৬|| বলশুক্ররসশ্লেষ্মমেদোমজ্জবিবর্ধনঃ| মজ্জা বিশেষতোঽস্থ্নাং চ বলকৃত্ স্নেহনে হিতঃ||১৭||

Adhikarana 8 (18) · Śloka 18

সর্পিঃ শরদি পাতব্যং বসা মজ্জা চ মাধবে| তৈলং প্রাবৃষি নাত্যুষ্ণশীতে স্নেহং পিবেন্নরঃ||১৮||

Adhikarana 9 (19) · Śloka 19

বাতপিত্তাধিকো রাত্রাবুষ্ণে চাপি পিবেন্নরঃ| শ্লেষ্মাধিকো দিবা শীতে পিবেচ্চামলভাস্করে||১৯||

Adhikarana 10 (20-21) · Śloka 21

অত্যুষ্ণে বা দিবা পীতো বাতপিত্তাধিকেন বা| মূর্চ্ছাং পিপাসামুন্মাদং কামলাং বা সমীরযেত্||২০|| শীতে রাত্রৌ পিবন্ স্নেহং নরঃ শ্লেষ্মাধিকোঽপি বা| আনাহমরুচিং শূলং পাণ্ডুতাং বা সমৃচ্ছতি||২১||

Adhikarana 11 (22) · Śloka 22

জলমুষ্ণং ঘৃতে পেযং যূষস্তৈলেঽনু শস্যতে| বসামজ্জ্ঞোস্তু মণ্ডঃ স্যাত্ সর্বেষূষ্ণমথাম্বু বা||২২||

Adhikarana 12 (23-25) · Śloka 25

ওদনশ্চ বিলেপী চ রসো মাংসং পযো দধি| যবাগূঃ সূপশাকৌ চ যূষঃ কাম্বলিকঃ খডঃ||২৩|| সক্তবস্তিলপিষ্টং চ মদ্যং লেহাস্তথৈব চ| ভক্ষ্যমভ্যঞ্জনং বস্তিস্তথা চোত্তরবস্তযঃ||২৪|| গণ্ডূষঃ কর্ণতৈলং চ নস্তঃকর্ণাক্ষিতর্পণম্| চতুর্বিংশতিরিত্যেতাঃ স্নেহস্য প্রবিচারণাঃ ||২৫||

Adhikarana 13 (26) · Śloka 26

অচ্ছপেযস্তু যঃ স্নেহো ন তামাহুর্বিচারণাম্| স্নেহস্য স ভিষগ্দৃষ্টঃ কল্পঃ প্রাথমকল্পিকঃ||২৬||

Adhikarana 14 (27-28) · Śloka 28

রসৈশ্চোপহিতঃ স্নেহঃ সমাসব্যাসযোগিভিঃ| ষড্ভিস্ত্রিষষ্টিধা সঙ্খ্যাং প্রাপ্নোত্যেকশ্চ কেবলঃ||২৭|| এবমেতাশ্চতুঃষষ্টিঃ স্নেহানাং প্রবিচারণা | ওকর্তুব্যাধিপুরুষান্ প্রযোজ্যা জানতা ভবেত্||২৮||

Adhikarana 15 (29-40) · Śloka 40

অহোরাত্রমহঃ কৃত্স্নমর্ধাহং চ প্রতীক্ষতে| প্রধানা মধ্যমা হ্রস্বা স্নেহমাত্রা জরাং প্রতি||২৯|| ইতি তিস্রঃ সমুদ্দিষ্টা মাত্রাঃ স্নেহস্য মানতঃ| তাসাং প্রযোগান্ বক্ষ্যামি পুরুষং পুরুষং প্রতি||৩০|| প্রভূতস্নেহনিত্যা যে ক্ষুত্পিপাসাসহা নরাঃ| পাবকশ্চোত্তমবলো যেষাং যে চোত্তমা বলে||৩১|| গুল্মিনঃ সর্পদষ্টাশ্চ বিসর্পোপহতাশ্চ যে| উন্মত্তাঃ কৃচ্ছ্রমূত্রাশ্চ গাঢবর্চস এব চ||৩২|| পিবেযুরুত্তমাং মাত্রাং তস্যাঃ পানে গুণাঞ্ছৃণু| বিকারাঞ্ছমযত্যেষাং শীঘ্রং সম্যক্প্রযোজিতা||৩৩|| দোষানুকর্ষিণী মাত্রা সর্বমার্গানুসারিণী| বল্যা পুনর্নবকরী শরীরেন্দ্রিযচেতসাম্||৩৪|| অরুষ্কস্ফোটপিডকাকণ্ডূপামাভিরর্দিতাঃ| কুষ্ঠিনশ্চ প্রমীঢাশ্চ বাতশোণিতিকাশ্চ যে||৩৫|| নাতিবহ্বাশিনশ্চৈব মৃদুকোষ্ঠাস্তথৈব চ| পিবেযুর্মধ্যমাং মাত্রাং মধ্যমাশ্চাপি যে বলে||৩৬|| মাত্রৈষা মন্দবিভ্রংশা ন চাতিবলহারিণী| সুখেন চ স্নেহযতি শোধনার্থে চ যুজ্যতে||৩৭|| যে তু বৃদ্ধাশ্চ বালাশ্চ সুকুমারাঃ সুখোচিতাঃ| রিক্তকোষ্ঠত্বমহিতং যেষাং মন্দাগ্নযশ্চ যে||৩৮|| জ্বরাতীসারকাসাশ্চ যেষাং চিরসমুত্থিতাঃ| স্নেহমাত্রাং পিবেযুস্তে হ্রস্বাং যে চাবরা বলে||৩৯|| পরিহারে সুখা চৈষা মাত্রা স্নেহনবৃংহণী| বৃষ্যা বল্যা নিরাবাধা চিরং চাপ্যনুবর্ততে||৪০||

Adhikarana 16 (41-43) · Śloka 43

বাতপিত্তপ্রকৃতযো বাতপিত্তবিকারিণঃ| চক্ষুঃকামাঃ ক্ষতাঃ ক্ষীণা বৃদ্ধা বালাস্তথাঽবলাঃ||৪১|| আযুঃপ্রকর্ষকামাশ্চ বলবর্ণস্বরার্থিনঃ| পুষ্টিকামাঃ প্রজাকামাঃ সৌকুমার্যার্থিনশ্চ যে||৪২|| দীপ্ত্যোজঃস্মৃতিমেধাগ্নিবুদ্ধীন্দ্রিযবলার্থিনঃ| পিবেযুঃ সর্পিরার্তাশ্চ দাহশস্ত্রবিষাগ্নিভিঃ||৪৩||

Adhikarana 17 (44-46) · Śloka 46

প্রবৃদ্ধশ্লেষ্মমেদস্কাশ্চলস্থূলগলোদরাঃ| বাতব্যাধিভিরাবিষ্টা বাতপ্রকৃতযশ্চ যে||৪৪|| বলং তনুত্বং লঘুতাং দৃঢতাং স্থিরগাত্রতাম্ | স্নিগ্ধশ্লক্ষ্ণতনুত্বক্তাং যে চ কাঙ্ক্ষন্তি দেহিনঃ||৪৫|| কৃমিকোষ্ঠাঃ ক্রূরকোষ্ঠাস্তথা নাডীভিরর্দিতাঃ| পিবেযুঃ শীতলে কালে তৈলং তৈলোচিতাশ্চ যে||৪৬||

Adhikarana 18 (47-49) · Śloka 49

বাতাতপসহা যে চ রূক্ষা ভারাধ্বকর্শিতাঃ| সংশুষ্করেতোরুধিরা নিষ্পীতকফমেদসঃ||৪৭|| অস্থিসন্ধিসিরাস্নাযুমর্মকোষ্ঠমহারুজঃ| বলবান্মারুতো যেষাং খানি চাবৃত্য তিষ্ঠতি||৪৮|| মহচ্চাগ্নিবলং যেষাং বসাসাত্ম্যাশ্চ যে নরাঃ| তেষাং স্নেহযিতব্যানাং বসাপানং বিধীযতে||৪৯||

Adhikarana 19 (50) · Śloka 51

দীপ্তাগ্নযঃ ক্লেশসহা ঘস্মরাঃ স্নেহসেবিনঃ| বাতার্তাঃ ক্রূরকোষ্ঠাশ্চ স্নেহ্যা মজ্জানমাপ্নুযুঃ||৫০|| যেভ্যো যেভ্যো হিতো যো যঃ স্নেহঃ স পরিকীর্তিতঃ|৫১|

Adhikarana 20 (51) · Śloka 51

স্নেহনস্য প্রকর্ষৌ তু সপ্তরাত্রত্রিরাত্রকৌ||৫১||

Adhikarana 21 (52) · Śloka 52

স্বেদ্যাঃ শোধযিতব্যাশ্চ রূক্ষা বাতবিকারিণঃ| ব্যাযামমদ্যস্ত্রীনিত্যাঃ স্নেহ্যাঃ স্যুর্যে চ চিন্তকাঃ||৫২||

Adhikarana 22 (53-56) · Śloka 56

সংশোধনাদৃতে যেষাং রূক্ষণং সম্প্রবক্ষ্যতে| ন তেষাং স্নেহনং শস্তমুত্সন্নকফমেদসাম্||৫৩|| অভিষ্যণ্ণাননগুদা নিত্যমন্দাগ্নযশ্চ যে| তৃষ্ণামূর্চ্ছাপরীতাশ্চ গর্ভিণ্যস্তালুশোষিণঃ||৫৪|| অন্নদ্বিষশ্ছর্দযন্তো জঠরামগরার্দিতাঃ| দুর্বলাশ্চ প্রতান্তাশ্চ স্নেহগ্লানা মদাতুরাঃ||৫৫|| ন স্নেহ্যা বর্তমানেষু ন নস্তো বস্তিকর্মসু| স্নেহপানাত্ প্রজাযন্তে তেষাং রোগাঃ সুদারুণাঃ||৫৬||

Adhikarana 23 (57-59) · Śloka 59

পুরীষং গ্রথিতং রূক্ষং বাযুরপ্রগুণো মৃদুঃ| পক্তা খরত্বং রৌক্ষ্যং চ গাত্রস্যাস্নিগ্ধলক্ষণম্||৫৭|| বাতানুলোম্যং দীপ্তোঽগ্নির্বর্চঃ স্নিগ্ধমসংহতম্| মার্দবং স্নিগ্ধতা চাঙ্গে স্নিগ্ধানামুপজাযতে||৫৮|| পাণ্ডুতা গৌরবং জাড্যং পুরীষস্যাবিপক্বতা| তন্দ্রীররুচিরুত্কেশঃ স্যাদতিস্নিগ্ধলক্ষণম্||৫৯||

Adhikarana 24 (60-61) · Śloka 61

দ্রবোষ্ণমনভিষ্যন্দি ভোজ্যমন্নং প্রমাণতঃ| নাতিস্নিগ্ধমসঙ্কীর্ণং শ্বঃ স্নেহং পাতুমিচ্ছতা||৬০|| পিবেত্ সংশমনং স্নেহমন্নকালে প্রকাঙ্ক্ষিতঃ| শুদ্ধ্যর্থং পুনরাহারে নৈশে জীর্ণে পিবেন্নরঃ||৬১||

Adhikarana 25 (62-64) · Śloka 64

উষ্ণোদকোপচারী স্যাদ্ব্রহ্মচারী ক্ষপাশযঃ | শকৃন্মূত্রানিলোদ্গারানুদীর্ণাংশ্চ ন ধারযেত্||৬২|| ব্যাযামমুচ্চৈর্বচনং ক্রোধশোকৌ হিমাতপৌ| বর্জযেদপ্রবাতং চ সেবেত শযনাসনম্||৬৩|| স্নেহং পীত্বা নরঃ স্নেহং প্রতিভুঞ্জান এব চ| স্নেহমিথ্যোপচারাদ্ধি জাযন্তে দারুণা গদাঃ||৬৪||

Adhikarana 26 (65-69) · Śloka 69

মৃদুকোষ্ঠস্ত্রিরাত্রেণ স্নিহ্যত্যচ্ছোপসেবযা| স্নিহ্যতি ক্রূরক্রোষ্ঠস্তু সপ্তরাত্রেণ মানবঃ||৬৫|| গুডমিক্ষুরসং মস্তু ক্ষীরমুল্লোডিতং দধি| পাযসং কৃশরাং সর্পিঃ কাশ্মর্যত্রিফলারসম্||৬৬|| দ্রাক্ষারসং পীলুরসং জলমুষ্ণমথাপি বা| মদ্যং বা তরুণং পীত্বা মৃদুকোষ্ঠো বিরিচ্যতে||৬৭|| বিরেচযন্তি নৈতানি ক্রূরকোষ্ঠং কদাচন| ভবতি ক্রূরকোষ্ঠস্য গ্রহণ্যত্যুল্বণানিলা||৬৮|| উদীর্ণপিত্তাঽল্পকফা গ্রহণী মন্দমারুতা| মৃদুকোষ্ঠস্য তস্মাত্ স সুবিরেচ্যো নরঃ স্মৃতঃ||৬৯||

Adhikarana 27 (70-78) · Śloka 78

উদীর্ণপিত্তা গ্রহণী যস্য চাগ্নিবলং মহত্| ভস্মীভবতি তস্যাশু স্নেহঃ পীতোঽগ্নিতেজসা||৭০|| স জগ্ধ্বা স্নেহমাত্রাং তামোজঃ প্রক্ষারযন্ বলী| স্নেহাগ্নিরুত্তমাং তৃষ্ণাং সোপসর্গামুদীরযেত্||৭১|| নালং স্নেহসমৃদ্ধস্য শমাযান্নং সুগুর্বপি| স চেত্ সুশীতং সলিলং নাসাদযতি দহ্যতে| যথৈবাশীবিষঃ কক্ষমধ্যগঃ স্ববিষাগ্নিনা||৭২|| অজীর্ণে যদি তু স্নেহে তৃষ্ণা স্যাচ্ছর্দযেদ্ভিষক্| শীতোদকং পুনঃ পীত্বা ভুক্ত্বা রূক্ষান্নমুল্লিখেত্||৭৩|| ন সর্পিঃ কেবলং পিত্তে পেযং সামে বিশেষতঃ| সর্বং হ্যনুরজেদ্দেহং হত্বা সঞ্জ্ঞাং চ মারযেত্||৭৪|| তন্দ্রা সোত্ক্লেশ আনাহো জ্বরঃ স্তম্ভো বিসঞ্জ্ঞতা| কুষ্ঠানি কণ্ডূঃ পাণ্ডুত্বং শোফার্শাংস্যরুচিস্তৃষা||৭৫|| জঠরং গ্রহণীদোষাঃ স্তৈমিত্যং বাক্যনিগ্রহঃ| শূলমামপ্রদোষাশ্চ জাযন্তে স্নেহবিভ্রমাত্||৭৬|| তত্রাপ্যুল্লেখনং শস্তং স্বেদঃ কালপ্রতীক্ষণম্| প্রতি প্রতি ব্যাধিবলং বুদ্ধ্বা স্রংসনমেব চ||৭৭|| তক্রারিষ্টপ্রযোগশ্চ রূক্ষপানান্নসেবনম্| মূত্রাণাং ত্রিফলাযাশ্চ স্নেহব্যাপত্তিভেষজম্||৭৮||

Adhikarana 28 (79) · Śloka 79

অকালে চাহিতশ্চৈব মাত্রযা ন চ যোজিতঃ| স্নেহো মিথ্যোপচারাচ্চ ব্যাপদ্যেতাতিসেবিতঃ||৭৯||

Adhikarana 29 (80) · Śloka 80

স্নেহাত্ প্রস্কন্দনং জন্তুস্ত্রিরাত্রোপরতঃ পিবেত্| স্নেহবদ্দ্রবমুষ্ণং চ ত্র্যহং ভুক্ত্বা রসৌদনম্||৮০||

Adhikarana 30 (81) · Śloka 81

একাহোপরতস্তদ্বদ্ভুক্ত্বা প্রচ্ছর্দনং পিবেত্|৮১|

Adhikarana 31 (81) · Śloka 81

স্যাত্ত্বসংশোধনার্থীযে বৃত্তিঃ স্নেহে বিরিক্তবত্||৮১||

Adhikarana 32 (82-90) · Śloka 1

স্নেহদ্বিষঃ স্নেহনিত্যা মৃদুকোষ্ঠাশ্চ যে নরাঃ| ক্লেশাসহা মদ্যনিত্যাস্তেষামিষ্টা বিচারণা||৮২|| লাবতৈত্তিরমাযূরহাংসবারাহকৌক্কুটাঃ| গব্যাজৌরভ্রমাত্স্যাশ্চ রসাঃ স্যুঃ স্নেহনে হিতাঃ||৮৩|| যবকোলকুলত্থাশ্চ স্নেহাঃ সগুডশর্করাঃ| দাডিমং দধি সব্যোষং রসসংযোগসঙ্গ্রহঃ||৮৪|| স্নেহযন্তি তিলাঃ পূর্বং জগ্ধাঃ সস্নেহফাণিতাঃ| কৃশরাশ্চ বহুস্নেহাস্তিলকাম্বলিকাস্তথা||৮৫|| ফাণিতং শৃঙ্গবেরং চ তৈলং চ সুরযা সহ| পিবেদ্রূক্ষো ভৃতৈর্মাংসৈর্জীর্ণেঽশ্নীযাচ্চ ভোজনম্||৮৬|| তৈলং সুরাযা মণ্ডেন বসাং মজ্জানমেব বা| পিবন্ সফাণিতং ক্ষীরং নরঃ স্নিহ্যতি বাতিকঃ||৮৭|| ধারোষ্ণং স্নেহসংযুক্তং পীত্বা সশর্করং পযঃ| নরঃ স্নিহ্যতি পীত্বা বা সরং দধ্নঃ সফাণিতম্||৮৮|| পাঞ্চপ্রসৃতিকী পেযা পাযসো মাষমিশ্রকঃ| ক্ষীরসিদ্ধো বহুস্নেহঃ স্নেহযেদচিরান্নরম্||৮৯|| সর্পিস্তৈলবসামজ্জাতণ্ডুলপ্রসৃতৈঃ শৃ(কৃ)তা| পাঞ্চপ্রসৃতিকী পেযা পেযা স্নেহনমিচ্ছতা||৯০|| (শৌকরো বা রসঃ স্নিগ্ধঃ সর্পির্লবণসংযুতঃ | পীতো দ্বির্বাসরে যত্নাত্ স্নেহযেদচিরান্নরম্ ||১||)|

Adhikarana 33 (91-94) · Śloka 94

গ্রাম্যানূপৌদকং মাংসং গুডং দধি পযস্তিলান্| কুষ্ঠী শোথী প্রমেহী চ স্নেহনে ন প্রযোজযেত্||৯১|| স্নেহৈর্যথার্হং তান্ সিদ্ধৈঃ স্নেহযেদবিকারিভিঃ| পিপ্পলীভির্হরীতক্যা সিদ্ধৈস্ত্রিফলযাঽপি বা||৯২|| দ্রাক্ষামলকযূষাভ্যাং দধ্না চাম্লেন সাধযেত্| ব্যোষগর্ভং ভিষক্ স্নেহং পীত্বা স্নিহ্যতি তং নরঃ||৯৩|| যবকোলকুলত্থানাং রসাঃ ক্ষারঃ সুরা দধি| ক্ষীরসর্পিশ্চ তত্ সিদ্ধং স্নেহনীযং ঘৃতোত্তমম্||৯৪||

Adhikarana 34 (95) · Śloka 95

তৈলমজ্জবসাসর্পির্বদরত্রিফলারসৈঃ| যোনিশুক্রপ্রদোষেষু সাধযিত্বা প্রযোজযেত্||৯৫||

Adhikarana 35 (96-97) · Śloka 97

গৃহ্ণাত্যম্বু যথা বস্ত্রং প্রস্রবত্যধিকং যথা| যথাগ্নি জীর্যতি স্নেহস্তথা স্রবতি চাধিকঃ||৯৬|| যথা বাঽঽক্লেদ্য মৃত্পিণ্ডমাসিক্তং ত্বরযা জলম্| স্রবতি স্রংসতে স্নেহস্তথা ত্বরিতসেবিতঃ||৯৭||

Adhikarana 36 (98) · Śloka 98

লবণোপহিতাঃ স্নেহাঃ স্নেহযন্ত্যচিরান্নরম্| তদ্ধ্যভিষ্যন্দ্যরূক্ষং চ সূক্ষ্মমুষ্ণং ব্যবাযি চ||৯৮||

Adhikarana 37 (99) · Śloka 99

স্নেহমগ্রে প্রযুঞ্জীত ততঃ স্বেদমনন্তরম্| স্নেহস্বেদোপপন্নস্য সংশোধনমথেতরত্ ||৯৯||

Adhikarana 38 (100) · Śloka 100

তত্র শ্লোকঃ- স্নেহাঃ স্নেহবিধিঃ কৃত্স্নব্যাপত্সিদ্ধিঃ সভেষজা| যথাপ্রশ্নং ভগবতা ব্যাহৃতং চান্দ্রভাগিনা||১০০||

Adhikarana puShpikA · Śloka 13

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে স্নেহাধ্যাযো নাম ত্রযোদশোঽধ্যাযঃ সমাপ্তঃ||১৩||