14. svēdādhyāyaḥ

Adhikarana 1 (1-2) · Śloka 2

অথাতঃ স্বেদাধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

স্নেহপূর্বকত্বাত্ স্বেদস্য স্বেদাধ্যাযোঽভিধীযতে| স্বেদপ্রতিপাদকোঽধ্যাযঃ স্বেদাধ্যাযঃ||১-২||

Adhikarana 2 (3-5) · Śloka 5

অতঃ স্বেদাঃ প্রবক্ষ্যন্তে যৈর্যথাবত্প্রযোজিতৈঃ| স্বেদসাধ্যাঃ প্রশাম্যন্তি গদা বাতকফাত্মকাঃ||৩|| স্নেহপূর্বং প্রযুক্তেন স্বেদেনাবজিতেঽনিলে| পুরীষমূত্ররেতাংসি ন সজ্জন্তি কথঞ্চন||৪|| শুষ্কাণ্যপি হি কাষ্ঠানি স্নেহস্বেদোপপাদনৈঃ| নমযন্তি যথান্যাযং কিং পুনর্জীবতো নরান্||৫||

বাতকফাত্মকা অসংসৃষ্টবাতকফজাঃ, বাতকফজত্বেঽপ্যুদরাদযঃ স্বেদেন ন শাম্যন্তি, অত আহ- স্বেদসাধ্যাঃ; এতেনোদরাদযোঽস্বেদ্যা ব্যাবর্ত্যন্তে| স্নেহপূর্বমিতি ক্রিযাবিশেষণম্| ন সজ্জন্তি অপ্রবৃত্তানি ন ভবন্তি| যথান্যাযং যথাগমম্, এতচ্চ স্নেহস্বেদোপপাদনৈরিত্যনেন সম্বধ্যতে; যদি বা যথান্যাযং যথাসহজং নমযন্তীতি সম্বন্ধঃ||৩-৫||

Adhikarana 3 (6) · Śloka 6

রোগর্তুব্যাধিতাপেক্ষো নাত্যুষ্ণোঽতিমৃদুর্ন চ| দ্রব্যবান্ কল্পিতো দেশে স্বেদঃ কার্যকরো মতঃ||৬||

রোগমৃতুং ব্যাধিতং চ বলবত্ত্বাদিনাঽপেক্ষত ইতি রোগর্তুব্যাধিতাপেক্ষঃ| নাত্যুষ্ণো নাতিচণ্ডতাপঃ| দ্রব্যবানিতি স্নিগ্ধরূক্ষাদিদ্রব্যবান্| কল্পিত ইতি রোগাদীনপেক্ষ্য যথোচিতেন দ্রব্যেণ দেশে চামাশযাদৌ যথাযোগ্যতযা সম্পাদিত ইতি মন্তব্যম্||৬||

Adhikarana 4 (7-8) · Śloka 8

ব্যাধৌ শীতে শরীরে চ মহান্ স্বেদো মহাবলে| দুর্বলে দুর্বলঃ স্বেদো মধ্যমে মধ্যমো হিতঃ||৭|| বাতশ্লেষ্মণি বাতে বা কফে বা স্বেদ ইষ্যতে| স্নিগ্ধরূক্ষস্তথা স্নিগ্ধো রূক্ষশ্চাপ্যুপকল্পিতঃ||৮||

রোগাদ্যপেক্ষযোক্তকল্পনাং দর্শযতি- ব্যাধাবিত্যাদি| ব্যাধৌ মহাবলে তথা শীতে কালকৃতে মহাবলে| মহানিতি চণ্ডতাপ এব পুনঃ পুনঃ ক্রিযমাণত্বেন মৃদুস্বেদাপেক্ষযাঽধিকতাপত্বেন জ্ঞেযঃ| দুর্বল ইতি তথা মধ্যম ইতি চ ব্যাধ্যাদিষু পূর্ববদ্যোজনীযম্| স্নিগ্ধরূক্ষদ্রব্যকৃতঃ স্নিগ্ধরূক্ষঃ, স্নিগ্ধরূক্ষদ্রব্যাদযো বাতশ্লেষ্মাদিষু যথাসঙ্খ্যং মন্তব্যাঃ; এতচ্চ স্নিগ্ধরূক্ষাদিকথনং দ্রব্যাপেক্ষকল্পনোদাহরণং; বাতে স্নিগ্ধঃ, কফে রূক্ষঃ||৭-৮||

Adhikarana 5 (9) · Śloka 9

আমাশযগতে বাতে কফে পক্বাশযাশ্রিতে| রূক্ষপূর্বো হিতঃ স্বেদঃ স্নেহপূর্বস্তথৈব চ||৯||

তং দেশবিশেষসম্বন্ধেন ব্যভিচারযন্ দেশাপেক্ষাং কল্পনামাহ- আমাশযেত্যাদি| আমাশযগতে বাতে রূক্ষপূর্বঃ স্থানাপেক্ষযা পূর্বং রূক্ষং কৃত্বা পশ্চাদ্বাতাপেক্ষঃ স্নিগ্ধঃ কার্যঃ, এবং পক্বাশযগতে কফে স্নেহপূর্বো ব্যাখ্যেযঃ; আমাশযশব্দেন কফস্থানং জ্ঞেযং, কফস্থানাপেক্ষযা হি প্রথমং রূক্ষঃ ক্রিযতে, যদুক্তং- “স্থানং জযেদ্ধি পূর্বং তু স্থানস্থস্যাবিরুদ্ধতঃ” ইতি||৯||

Adhikarana 6 (10) · Śloka 10

বৃষণৌ হৃদযং দৃষ্টী স্বেদযেন্মৃদু নৈব বা| মধ্যমং বঙ্ক্ষণৌ শেষমঙ্গাবযবমিষ্টতঃ||১০||

মৃদু নৈব বেতি স্বেদৈকসাধ্যে বৃষণাদিগতে ব্যাধৌ মৃদুস্বেদঃ, স্বেদব্যতিরিক্তোপাযান্তরসম্ভবে তু ন বেতি বোদ্ধব্যম্| ইষ্টত ইত্যাতুরেচ্ছাতো বৈদ্যেচ্ছাতশ্চ| ইষ্টত ইতি ভাবাদিচ্ছাবচনঃ||১০||

Adhikarana 7 (11) · Śloka 11

সুশুদ্ধৈর্নক্তকৈঃ পিণ্ড্যা গোধূমানামথাপি বা| পদ্মোত্পলপলাশৈর্বা স্বেদ্যঃ সংবৃত্য চক্ষুষী||১১||

স্বেদে ক্রিযমাণে চক্ষুষঃ স্বেদপরিহারোপাযমাহ- সুশুদ্ধৈরিত্যাদি| নক্তকঃ কর্পটাবযবঃ ||১১||

Adhikarana 8 (12) · Śloka 12

মুক্তাবলীভিঃ শীতাভিঃ শীতলৈর্ভাজনৈরপি| জলার্দ্রৈর্জলজৈর্হস্তৈঃ স্বিদ্যতো হৃদযং স্পৃশেত্||১২||

স্বেদে ক্রিযমাণে হৃদযরক্ষণার্থমাহ- মুক্তাবলীভিরিত্যাদি| জলজানি পঙ্কজাদীনি| এবমস্বেদ্যত্বসামান্যত্বাদ্বৃষণরক্ষাঽপ্যুন্নেতব্যা, প্রাধান্যাদ্ধৃদযচক্ষুঃপালনমুক্তম্||১২||

Adhikarana 9 (13) · Śloka 13

শীতশূলব্যুপরমে স্তম্ভগৌরবনিগ্রহে| সঞ্জাতে মার্দবে স্বেদে স্বেদনাদ্বিরতির্মতা||১৩||

শীতশূলেত্যাদি| স্বেদ ইতি স্বেদভবে ঘর্মে| স্বেদনাদ্বিরতির্মতেত্যুপদিশন্ শীতাদিব্যুপরমে সতি স্বেদো নিবর্তনীযঃ, শীতাদ্যনুপরমে চ স্বেদঃ কর্তব্য ইতি দ্বযমুপদিশতি; ততশ্চ ইত এব স্বেদনিবৃত্তিবিষযশীতাদিব্যুপরমোত্পাদঃ স্বেদস্য সম্যগ্যোগলক্ষণং তথা শীতাদিব্যুপরমানুত্পাদশ্চ স্বেদানিবৃত্তিবিষযোঽযোগলক্ষণমুক্তং ভবতীতি নাযোগলক্ষণানভিধানমুদ্ভাবনীযম্||১৩||

Adhikarana 10 (14-15) · Śloka 15

পিত্তপ্রকোপো মূর্চ্ছা চ শরীরসদনং তৃষা| দাহঃ স্বরাঙ্গদৌর্বল্যমতিস্বিন্নস্য লক্ষণম্||১৪|| উক্তস্তস্যাশিতীযে যো গ্রৈষ্মিকঃ সর্বশো বিধিঃ| সোঽতিস্বিন্নস্য কর্তব্যো মধুরঃ স্নিগ্ধশীতলঃ||১৫||

অতিস্বিন্নচিকিত্সিতমাহ- উক্ত ইত্যাদি| গ্রৈষ্মিকো বিধিরিত্যনেন লব্ধে পুনর্মধুরঃ স্নিগ্ধশীতল ইত্যাদিবচনং “মদ্যমল্পং ন বা পেযং” (সূ.অ.৬) ইত্যত্রোপদিষ্টমদ্যপানস্য প্রতিষেধার্থং, মধুরশীতাদিযোগবিশেষবিধানার্থং চ||১৪-১৫||

Adhikarana 11 (16-19) · Śloka 19

কষাযমদ্যনিত্যানাং গর্ভিণ্যা রক্তপিত্তিনাম্| পিত্তিনাং সাতিসারাণাং রূক্ষাণাং মধুমেহিনাম্||১৬|| বিদগ্ধভ্রষ্টব্রধ্নানাং বিষমদ্যবিকারিণাম্| শ্রান্তানাং নষ্টসঞ্জ্ঞানাং স্থূলানাং পিত্তমেহিনাম্||১৭|| তৃষ্যতাং ক্ষুধিতানাং চ ক্রুদ্ধানাং শোচতামপি| কামল্যুদরিণাং চৈব ক্ষতানামাঢ্যরোগিণাম্||১৮|| দুর্বলাতিবিশুষ্কাণামুপক্ষীণৌজসাং তথা| ভিষক্ তৈমিরিকাণাং চ ন স্বেদমবতারযেত্||১৯||

অস্বেদ্যানাহ- কষাযেত্যাদি| কষাযদ্রব্যকৃতং মদ্যং কষাযমদ্যং; কিংবা কষাযশব্দোঽমধুরবচনঃ, ন তেন যদুচ্যতে- কষাযনিত্যস্য বাতপ্রধানতা স্যাত্ কষাযস্য বাতকারিত্বাত্, বাতে চ স্বেদো বিহিত এব, তত্ কথং কষাযনিত্যং প্রতি স্বেদনিষেধ ইতি, তন্নিরস্তং ভবতি| কিংবা, কষাযনিত্যা রূক্ষাতিস্তব্ধগাত্রা ভবন্তি, কষাযস্য বিরূক্ষকস্তম্ভকত্বেন; ততশ্চ তেষাং স্বেদঃ পর্বভেদমাবহতীত্যতঃ কষাযনিত্যনিষেধঃ| রক্তপিত্তিনামবিধানাদেব স্বেদে নিষিদ্ধে, পুনঃ স্বেদনিষেধো রক্তপিত্তিনাং যদ্যন্যোঽপি স্বেদসাধ্যো বাতশ্লেষ্মজো বিকারো ভবতি তত্রাপি স্বেদনিষেধার্থং, তথা রক্তপিত্তিনাং বমনবিরেচনাঙ্গতযা প্রাপ্তস্বেদপ্রতিপ্রসবনিষেধার্থং চ; এবং পিত্তমেহিকামল্যাদিষ্বপি ব্যাখ্যেযম্| পিত্তিনামিতি পিত্তপ্রকৃতীনাম্| মধুমেহশব্দেন সর্ব এবং মেহা গৃহ্যন্তে, মধুমেহশব্দো হি সর্বেষ্বেব মেহেষু বর্তত ইতি কিযন্তঃশিরসীযে দর্শনীযং, মেহেষু চ সর্বেষ্বেব শরীরশৈথিল্যপ্রবৃত্তেষু বিশেষতঃ শরীরশৈথিল্যহেতুত্বেন স্বেদো ন যুজ্যতে; পিত্তমেহিনামিতি তু পুনরভিধানং পিত্তসম্বন্ধেন বিশেষপ্রতিষেধতাদর্শনার্থম্| ব্রধ্নঃ গুদঃ| মদ্যবিকারিণামিতি মদ্যনিত্যস্য বাতকফজমদাত্যযে স্বেদনিষেধার্থম্| আঢ্যরোগীহ বাতরক্তী| এষু চাস্বেদবিষযেষু যদি স্বেদৈকসাধ্যঃ সন্ন্যাসাদির্ভবতি তদা মহাপ্রত্যবাযভযাদল্পপ্রত্যবাযমুপেক্ষ্যাপি স্বেদো বিধেয ইতি ন্যাযসিদ্ধমেব; যদাহুর্ন্যাযবিদঃ- “ভূযোবিরোধে স্বল্পমন্যায্যম্” ইতি||১৬-১৯||

Adhikarana 12 (20-24) · Śloka 24

প্রতিশ্যাযে চ কাসে চ হিক্কাশ্বাসেষ্বলাঘবে| কর্ণমন্যাশিরঃশূলে স্বরভেদে গলগ্রহে||২০|| অর্দিতৈকাঙ্গসর্বাঙ্গপক্ষাঘাতে বিনামকে| কোষ্ঠানাহবিবন্ধেষু মূত্রাঘাতে বিজৃম্ভকে||২১|| পার্শ্বপৃষ্ঠকটীকুক্ষিসঙ্গ্রহে গৃধ্রসীষু চ| মূত্রকৃচ্ছ্রে মহত্ত্বে চ মুষ্কযোরঙ্গমর্দকে||২২|| পাদজানূরুজঙ্ঘার্তিসঙ্গ্রহে শ্বযথাবপি| খল্লীষ্বামেষু শীতে চ বেপথৌ বাতকণ্টকে||২৩|| সঙ্কোচাযামশূলেষু স্তম্ভগৌরবসুপ্তিষু | সর্বাঙ্গেষু বিকারেষু স্বেদনং হিতমুচ্যতে||২৪||

প্রতিশ্যাযে চেত্যাদিনা স্বেদ্যান্ দর্শযতি| বিনামকঃ শরীরবিনমনকারী বাতঃ| বিজৃম্ভকো বহিরাযামঃ, জৃম্ভাবহুত্বং বা| পাদজানূরুজঙ্ঘাভিরর্তিঃ সঙ্গ্রহশ্চ পৃথক্ সম্বধ্যতে| খল্লী হস্তপদাবমোটনম্| বাতকণ্টকো গুল্ফাশ্রিতো বাতঃ| অলাঘব ইতি পূর্বমুক্তেঽপি পুনর্গৌরববচনমঙ্গানাং গুরুতরত্বপ্রতিপাদনার্থম্, অলাঘববচনং তু লাঘবপ্রতিষেধমাত্রপ্রযোজনং নাতিগুরুত্বং ব্রূতে, যতঃ সর্বত্র নঞ্ বিরুদ্ধে ন বর্ততে, যথা “অরূক্ষমনভিষ্যন্দি ত্বাসীনপ্রচলাযিতম্” (সূ.অ.২১) ইত্যত্র ন হ্যরূক্ষশব্দেন স্নিগ্ধত্বমভিপ্রেতং, কিং তর্হি রূক্ষতাপ্রতিষেধমাত্রমেব||২০-২৪||

Adhikarana 13 (25-27) · Śloka 27

তিলমাষকুলত্থাম্লঘৃততৈলামিষৌদনৈঃ| পাযসৈঃ কৃশরৈর্মাংসৈঃ পিণ্ডস্বেদং প্রযোজযেত্||২৫|| গোখরোষ্ট্রবরাহাশ্বশকৃদ্ভিঃ সতুষৈর্যবৈঃ| সিকতাপাংশুপাষাণকরীষাযসপূটকৈঃ||২৬|| শ্লৈষ্মিকান্ স্বেদযেত্ পূর্বৈর্বাতিকান্ সমুপাচরেত্| দ্রব্যাণ্যেতানি শস্যন্তে যথাস্বং প্রস্তরেষ্বপি||২৭||

বক্ষ্যমাণানাং সঙ্করাদিস্বেদানাং দ্রব্যাণ্যাহ- তিলমাষেত্যাদি| পিণ্ডরূপঃ স্বেদঃ পিণ্ডস্বেদঃ| করীষঃ শুষ্কগোমযঃ; আযসঃ অযোবিকারঃ, স চেহ পুটকরণযোগ্যো বোদ্ধব্যঃ| পূর্বৈরিতি তিলমাষাদিভিঃ| যথাস্বমিত্যনেন তিলমাষাদযো বাতে, গোখরাদিগ্রন্থোক্তাশ্চ শ্লেষ্মণি, প্রস্তরস্বেদে কর্তব্যা ইতি দর্শযতি||২৫-২৭||

Adhikarana 14 (28) · Śloka 28

ভূগৃহেষু চ জেন্তাকেষূষ্ণগর্ভগৃহেষু চ| বিধূমাঙ্গারতপ্তেষু স্বভ্যক্তঃ স্বিদ্যতে সুখম্||২৮||

ভূগৃহেষ্বিতি ভূস্বেদার্থেষু গৃহেষু| উষ্ণগর্ভগৃহেষ্বিতি কুটীস্বেদং দর্শযতি| স্বভ্যক্ত ইতি সম্যগভ্যক্তঃ||২৮||

Adhikarana 15 (29-33) · Śloka 33

গ্রাম্যানূপৌদকং মাংসং পযো বস্তশিরস্তথা| বরাহমধ্যপিত্তাসৃক্ স্নেহবত্তিলতণ্ডুলাঃ||২৯|| ইত্যেতানি সমুত্ক্বাথ্য নাডীস্বেদং প্রযোজযেত্| দেশকালবিভাগজ্ঞো যুক্ত্যপেক্ষো ভিষক্তমঃ||৩০|| বারুণামৃতকৈরণ্ডশিগ্রুমূলকসর্ষপৈঃ| বাসাবংশকরঞ্জার্কপত্রৈরশ্মন্তকস্য চ||৩১|| শোভাঞ্জনকসৈরেযমালতীসুরসার্জকৈঃ | পত্রৈরুত্ক্বাথ্য সলিলং নাডীস্বেদং প্রযোজযেত্||৩২|| ভূতীকপঞ্চমূলাভ্যাং সুরযা দধিমস্তুনা| মূত্রৈরম্লৈশ্চ সস্নেহৈর্নাডীস্বেদং প্রযোজযেত্||৩৩||

বস্তশিরঃ ছাগমস্তকম্| স্নেহবন্তশ্চৈরণ্ডবীজাদযঃ তিলাশ্চ তণ্ডুলাশ্চ স্নেহবত্তিলতণ্ডুলাঃ| গ্রাম্যেত্যাদিনা বাতাপহো নাডীস্বেদ উক্তঃ, বারুণেত্যাদিনা কফাপহঃ, ভূতীকেত্যাদিনা বাতশ্লেষ্মাপহঃ| বারুণো বরুণঃ অমৃতকা গুডূচী, সর্ষপৈরিত্যত্র পত্রৈরিতি সম্বধ্যতে| বংশো বেণুঃ| পুনঃ শোভাঞ্জনগ্রহণাদ্দ্বিতীযো বিটপশোভাঞ্জনো গৃহ্যতে, সৈরেযঃ ঝিণ্টী||২৯-৩৩||

Adhikarana 16 (34) · Śloka 34

এত এব চ নির্যূহাঃ প্রযোজ্যা জলকোষ্ঠকে| স্বেদনার্থং ঘৃতক্ষীরতৈলকোষ্ঠাংশ্চ কারযেত্||৩৪||

এত এবেতি নাডীস্বেদোক্তাস্ত্রযোঽপি| জলকোষ্ঠঃ অবগাহার্থং কৃতং মহজ্জলপাত্রম্; এবং ঘৃতক্ষীরতৈলকোষ্ঠাশ্চ ব্যাখ্যাতাঃ||৩৪||

Adhikarana 17 (35-37) · Śloka 37

গোধূমশকলৈশ্চূর্ণৈর্যবানামম্লসংযুতৈঃ| সস্নেহকিণ্বলবণৈরুপনাহঃ প্রশস্যতে||৩৫|| গন্ধৈঃ সুরাযাঃ কিণ্বেন জীবন্ত্যা শতপুষ্পযা| উমযা কুষ্ঠতৈলাভ্যাং যুক্তযা চোপনাহযেত্||৩৬|| চর্মভিশ্চোপনদ্ধব্যঃ সলোমভিরপূতিভিঃ| উষ্ণবীর্যৈরলাভে তু কৌশেযাবিকশাটকৈঃ||৩৭||

গোধূমশকলৈঃ গোধূমচূর্ণৈঃ| কিণ্বঃ সুরাবীজম্| উপনাহঃ বহলং লেপং দত্ত্বা চর্মাদিভিরাবৃত্য ব্যাধিযুক্তস্যাঙ্গস্য বন্ধনম্; চর্মভিশ্চোপনদ্ধব্য ইত্যত্র উপনাহোঽনগ্নিস্বেদো গ্রাহ্যঃ| গন্ধৈঃ সুগন্ধিদ্রব্যৈরুপনাহো বন্ধনীযঃ| উষ্ণবীর্যৈরিতি উষ্ণবীর্যমৃগাদিপ্রাণিপ্রভবৈঃ | আবিকশাটকঃ কম্বলঃ||৩৫-৩৭||

Adhikarana 18 (38) · Śloka 38

রাত্রৌ বদ্ধং দিবা মুঞ্চেন্মুঞ্চেদ্রাত্রৌ দিবা কৃতম্| বিদাহপরিহারার্থং, স্যাত্ প্রকর্ষস্তু শীতলে||৩৮||

উপনাহস্বেদে বন্ধমোক্ষাবধিং দর্শযতি- রাত্রৌ বদ্ধমিত্যাদি| দিবাকৃতমিত্যত্র ‘বন্ধং’ ইতি শেষঃ| বিদাহঃ রক্তাদিবিদাহঃ| শীতলে ইত্যত্র “কালে” ইতি শেষঃ| প্রকর্ষ উক্তাদ্বন্ধনকালাদধিককালত্বং বন্ধনস্য||৩৮||

Adhikarana 19 (39-40) · Śloka 40

সঙ্করঃ প্রস্তরো নাডী পরিষেকোঽবগাহনম্| জেন্তাকোঽশ্মঘনঃ কর্ষূঃ কুটী ভূঃ কুম্ভিকৈব চ||৩৯|| কূপো হোলাক ইত্যেতে স্বেদযন্তি ত্রযোদশ| তান্ যথাবত্ প্রবক্ষ্যামি সর্বানেবানুপূর্বশঃ||৪০||

সম্প্রতি সাগ্নিস্বেদানাং সঙ্করাদীনাং লক্ষণমভিধাতুং সঙ্করাদীন্ স্বেদান্ নামতস্তাবদুদ্দিশতি- সঙ্কর ইত্যাদি| সঙ্করাদিশব্দাশ্চাযুর্বেদপরম্পরাসিদ্ধাঃ; তত্র ক্বচিন্নাডীস্বেদাদৌ নাড্যা প্রণীযত ইত্যন্বযোঽপ্যনুসরণীযঃ, জেন্তাকাদযশ্চান্বযনিরপেক্ষা এব||৩৯-৪০||

Adhikarana 20 (41) · Śloka 41

তত্র বস্ত্রান্তরিতৈরবস্ত্রান্তরিতৈর্বা পিণ্ডৈর্যথোক্তৈরুপস্বেদনং সঙ্করস্বেদ ইতি বিদ্যাত্||৪১||

পিণ্ডৈর্যথোক্তৈরিতি তিলমাষাদিপিণ্ডৈস্তথা গোখরাদিগ্রন্থোক্তপুটকরূপৈশ্চ পিণ্ডৈঃ; স্বেদনমেবোপস্বেদনম্||৪১||

Adhikarana 21 (42) · Śloka 42

শূকশমীধান্যপুলাকানাং বেশবারপাযসকৃশরোত্কারিকাদীনাং বা প্রস্তরে কৌশেযাবিকোত্তরপ্রচ্ছদেপঞ্চাঙ্গুলোরুবূকার্কপত্রপ্রচ্ছদে বা স্বভ্যক্তসর্বগাত্রস্য শযানস্যোপস্বেদনং প্রস্তরস্বেদ ইতি বিদ্যাত্||৪২||

পুলাকঃ তুচ্ছধান্যম্| উত্কারিকা মাষাদিকৃতোত্কারাকৃতিব্যঞ্জনবিশেষঃ | প্রস্তীর্যত ইতি প্রস্তরঃ শযনপ্রমাণেন স্বেদবস্তূনাং বিস্তরণং, তস্মিন্ প্রস্তরে| কৌশেযাবিকোত্তরপ্রচ্ছদে কৌশেযাবিকপিহিত ইত্যর্থঃ| পঞ্চাঙ্গুল এরণ্ডভেদঃ||৪২||

Adhikarana 22 (43) · Śloka 43

স্বেদনদ্রব্যাণাং পুনর্মূলফলপত্রশুঙ্গাদীনাং মৃগশকুনপিশিতশিরস্পদাদীনামুষ্ণস্বভাবানাং বা যথার্হমম্ললবণস্নেহোপসংহিতানাং মূত্রক্ষীরাদীনাং বা কুম্ভ্যাং বাষ্পমনুদ্বমন্ত্যামুত্ক্বথিতানাং নাড্যা শরেষীকাবংশদলকরঞ্জার্কপত্রান্যতমকৃতযা গজাগ্রহস্তসংস্থানযা ব্যামদীর্ঘযা ব্যামার্ধদীর্ঘযা বা ব্যামচতুর্ভাগাষ্টভাগমূলাগ্রপরিণাহস্রোতসা সর্বতো বাতহরপত্রসংবৃতচ্ছিদ্রযা দ্বিস্ত্রির্বা বিনামিতযা বাতহরসিদ্ধস্নেহাভ্যক্তগাত্রো বাষ্পমুপহরেত্; বাষ্পো হ্যনৃজুগামী বিহতচণ্ডবেগস্ত্বচমবিদহন্ সুখং স্বেদযতীতি নাডীস্বেদঃ||৪৩||

স্বেদনেত্যাদিনা নাডীস্বেদমাহ| স্বেদনদ্রব্যাণি স্বেদোপগগণোক্তানি ইহ চ নাডীস্বেদক্বাথার্থমুক্তানি| শিরঃপদং মস্তকম্| বাষ্পমনুদ্বমন্ত্যামিত্যনেন ক্বথনকালে বাষ্পো যথা ন নির্যাতি তথা কর্তব্যমিতি দর্শযতি| উত্ক্বথিতানাং বাষ্পং স্নেহাক্তগাত্রঃ সন্ নাড্যা উপহরেদিতি সম্বন্ধঃ| নাডীকরণবিধিমাহ- শরেষীকেত্যাদি| বংশদলো বংশবিদলঃ | গজাগ্রহস্তসংস্থানত্বং নাড্যা অগ্র এব বোদ্ধব্যম্| ব্যামঃ তির্যগ্বিস্তৃতবাহুদ্বযপ্রমাণং; ব্যামদীর্ঘত্বং নাড্যা বহলস্বেদে কর্তব্যম্| ব্যামচতুর্থভাগেন ব্যামাষ্টভাগেন চ মূলে অগ্রে চ যথাসঙ্খ্যং মানং নাড্যা বেদিতব্যং; পরিণাহেন বেষ্টনেন স্রোতো রন্ধ্রং যস্যাঃ সা তথা| যথোক্তনাডীকরণে গুণমাহ- বাষ্পো হীত্যাদি| বিহতচণ্ডবেগত্বং নাডীকাযা দীর্ঘত্বেন বক্রত্বেন চ বোদ্ধব্যম্||৪৩||

Adhikarana 23 (44) · Śloka 44

বাতিকোত্তরবাতিকানাং পুনর্মূলাদীনামুত্ক্বাথৈঃ সুখোষ্ণৈঃ কুম্ভীর্বর্ষণিকাঃ প্রনাডীর্বা পূরযিত্বা যথার্হসিদ্ধস্নেহাভ্যক্তগাত্রং বস্ত্রাবচ্ছন্নং পরিষেচযেদিতি পরিষেকঃ||৪৪||

পরিষেকবিধিমাহ- বাতিকেত্যাদি| বাতিকানি বাতহরাণি, উত্তরবাতিকানি উত্তরবাতে প্রধানবাতে বাতশ্লেষ্মণি হিতানীহ গ্রাহ্যাণি| বর্ষণিকা অল্পঘটী, ‘সহস্রধারা’ ইত্যন্যে; প্রণাডী বেণুনলনাড্যাদ্যাঃ||৪৪||

Adhikarana 24 (45) · Śloka 45

বাতহরোত্ক্বাথক্ষীরতৈলঘৃতপিশিতরসোষ্ণসলিলকোষ্ঠকাবগাহস্তু যথোক্ত এবাবগাহঃ||৪৫||

যথোক্ত এবেতি লোকপ্রসিদ্ধ এব| অবগাহঃ অবগাহস্বেদঃ||৪৫||

Adhikarana 25 (46) · Śloka 46

অথ জেন্তাকং চিকীর্ষুর্ভূমিং পরীক্ষেত- তত্র পূর্বস্যাং দিশ্যুত্তরস্যাং বা গুণবতি প্রশস্তে ভূমিভাগে কৃষ্ণমধুরমৃত্তিকে সুবর্ণমৃত্তিকে বা পরীবাপপুষ্করিণ্যাদীনাং জলাশযানামন্যতমস্য কূলে দক্ষিণে পশ্চিমে বা সূপতীর্থে সমসুবিভক্তভূমিভাগে সপ্তাষ্টৌ বাঽরত্নীরুপক্রম্যোদকাত্ প্রাঙ্মুখমুদঙ্মুখং বাঽভিমুখতীর্থং কূটাগারং কারযেত্, উত্সেধবিস্তারতঃ পরমরত্নীঃ ষোডশ, সমন্তাত্ সুবৃত্তং মৃত্কর্মসম্পন্নমনেকবাতাযনম্; অস্য কূটাগারস্যান্তঃ সমন্ততো ভিত্তিমরত্নিবিস্তারোত্সেধাং পিণ্ডিকাং কারযেদাকপাটাত্, মধ্যে চাস্য কূটাগারস্য চতুষ্কিষ্কুমাত্রং পুরুষপ্রমাণং মৃন্মযং কন্দুসংস্থানং বহুসূক্ষ্মচ্ছিদ্রমঙ্গারকোষ্ঠকস্তম্ভং সপিধানং কারযেত্; তং চ খাদিরাণামাশ্বকর্ণাদীনাং বা কাষ্ঠানাং পূরযিত্বা প্রদীপযেত্; স যদা জানীযাত্ সাধু দগ্ধানি কাষ্ঠানি গতধূমান্যবতপ্তং চ কেবলমগ্নিনা তদগ্নিগৃহং স্বেদযোগ্যেন চোষ্মণা যুক্তমিতি, তত্রৈনং পুরুষং বাতহরাভ্যক্তগাত্রং বস্ত্রাবচ্ছন্নং প্রবেশযেত্, প্রবেশযংশ্চৈনমনুশিষ্যাত্- সৌম্য! প্রবিশ কল্যাণাযারোগ্যায চেতি, প্রবিশ্য চৈনাং পিণ্ডিকামধিরুহ্য পার্শ্বাপরপার্শ্বাভ্যাং যথাসুখং শযীথাঃ, ন চ ত্বযা স্বেদমূর্চ্ছাপরীতেনাপি সতা পিণ্ডিকৈষা বিমোক্তব্যাঽঽপ্রাণোচ্ছ্বাসাত্, ভ্রশ্যমানো হ্যতঃ পিণ্ডিবকাবকাশাদ্দ্বারমনধিগচ্ছন্ স্বেদমূর্চ্ছাপরীততযা সদ্যঃ প্রাণাঞ্জহ্যাঃ, তস্মাত্ পিণ্ডিকামেনাং ন কথঞ্চন মুঞ্চেথাঃ; ত্বং যদা জানীযাঃ- বিগতাভিষ্যন্দমাত্মানং সম্যক্প্রস্রুতস্বেদপিচ্ছং সর্বস্রোতোবিমুক্তং লঘূভূতমপগতবিবন্ধস্তম্ভসুপ্তিবেদনাগৌরবমিতি, ততস্তাং পিণ্ডিকামনুসরন্ দ্বারং প্রপদ্যেথাঃ, নিষ্ক্রম্য চ ন সহসা চক্ষুষোঃ পরিপালনার্থং শীতোদকমুপস্পৃশেথাঃ, অপগতসন্তাপক্লমস্তু মুহূর্তাত্ সুখোষ্ণেন বারিণা যথান্যাযং পরিষিক্তোঽশ্নীযাঃ; ইতি জেন্তাকস্বেদঃ||৪৬||

জেন্তাকবিধিমাহ- অথেত্যাদি| অথশব্দো মঙ্গলে আনন্তর্যে বা| পূর্বস্যামুত্তরস্যাং বেতি গ্রামাদ্বাদ্ধব্যম্| গুণবতীতি সস্যপ্ররোহাদিযুক্তত্বেন; প্রশস্তভূমিভাগত্বং তুষাঙ্গারাদিরহিতত্বেন| পরীবাপঃ দীর্ঘিকা| সুষ্ঠু উপ সমীপে তীর্থং যস্য তস্মিন্ সূপতীর্থে| অরত্নিঃ হস্তঃ| প্রাঙ্মুখমিতি পশ্চিমে, উদঙ্মুখমিতি দক্ষিণে; এবং হ্যভিমুখং তীর্থং ভবতি| কূটাগারমিতি বর্তুলাগারম্| আকপাটাদিত্যনেন দ্বারপর্যন্তং লক্ষযতি| কিষ্কুঃ হস্তঃ| পুরুষপ্রমাণমিতি ঊর্ধ্বতঃ| কন্দুঃ কন্দ্বাকারাগ্নিস্থানম্| অঙ্গারার্থং কোষ্ঠোঽবকাশো বিদ্যতে যস্মিন্ সোঽঙ্গারকোষ্ঠকঃ, স এব স্তম্ভ ইত্যঙ্গারকোষ্ঠকস্তম্ভঃ| খাদিরাণামিতি পূরণে ষষ্ঠী| স ইত্যত্র ‘ত্বং’ ইত্যধ্যাহার্যং, জানীযা ইত্যর্থঃ; কিংবা, ‘জানীযাত্’ ইতি পাঠঃ, উত্তরত্রাপি ‘প্রবেশযেত্’ ইতি পাঠঃ; এবং চ সুগমম্| পিচ্ছা স্বেদস্যৈব পিচ্ছিলো ভাগঃ| সর্বেষু স্রোতঃসু বিমুক্তং সর্বস্রোতোবিমুক্তম্ অপগতবিবন্ধস্তু অপগতমলবিবন্ধো বোদ্ধব্যঃ| চক্ষুষোঃ পরিপালনার্থমিতি অত্রোপতপ্তস্য সহসা শীতজলপ্রবেশে শীতজলপরাহত ঊষ্মা নযনোপঘাতং করোতীত্যভিপ্রাযঃ| অত্র চ জেন্তাকে ভূমিবিশেষপরিগ্রহজলসান্নিধ্যাদযো মঙ্গলার্থাঃ; জলসান্নিধ্যং তু স্বিদ্যমানস্য দর্শনেন দৃষ্টেঃ পরিপালনার্থং চ, তথা স্বেদাতিযোগপ্রতিক্রিযার্থং কূটাগারস্য জলসান্নিধ্যে সুখেন করণার্থং চ||৪৬||

Adhikarana 26 (47-49) · Śloka 50

শযানস্য প্রমাণেন ঘনামশ্মমযীং শিলাম্| তাপযিত্বা মারুতঘ্নৈর্দারুভিঃ সম্প্রদীপিতৈঃ||৪৭|| ব্যপোজ্ঝ্য সর্বানঙ্গারান্ প্রোক্ষ্য চৈবোষ্ণবারিণা| তাং শিলামথ কুর্বীত কৌষেযাবিকসংস্তরাম্||৪৮|| তস্যাং স্বভ্যক্তসর্বাঙ্গঃ স্বপন্ স্বিদ্যতি না সুখম্| কৌরবাজিনকৌষেযপ্রাবারাদ্যৈঃ সুসংবৃতঃ ||৪৯|| ইত্যক্তোঽশ্মঘনস্বেদঃ,...|৫০|

কৌরবং কার্পাসম্||৪৭-৪৯||-

Adhikarana 27 (50-51) · Śloka 51

...কর্ষূস্বেদঃ প্রবক্ষ্যতে| খানযেচ্ছযনস্যাধঃ কর্ষূং স্থানবিভাগবিত্||৫০|| দীপ্তৈরধূমৈরঙ্গারৈস্তাং কর্ষূং পূরযেত্ততঃ| তস্যামুপরি শয্যাযাং স্বপন্ স্বিদ্যতি না সুখম্||৫১||

কর্ষূঃ অভ্যন্তরবিস্তীর্ণঃ স্বল্পমুখো গর্তঃ||৫০-৫১||

Adhikarana 28 (52-55) · Śloka 55

অনত্যুত্সেধবিস্তারাং বৃত্তাকারামলোচনাম্| ঘনভিত্তিং কুটীং কৃত্বা কুষ্ঠাদ্যৈঃ সম্প্রলেপযেত্||৫২|| কুটীমধ্যে ভিষক্ শয্যাং স্বাস্তীর্ণামুপকল্পযেত্| প্রাবারাজিনকৌশেযকুথকম্বলগোলকৈঃ||৫৩|| হসন্তিকাভিরঙ্গারপূর্ণাভিস্তাং চ সর্বশঃ| পরিবার্যান্তরারোহেদভ্যক্তঃ স্বিদ্যতে সুখম্||৫৪|| য এবাশ্মঘনস্বেদবিধির্ভূমৌ স এব তু| প্রশস্তাযাং নিবাতাযাং সমাযামুপদিশ্যতে||৫৫||

অনত্যুত্সেধবিস্তারামিতি স্বল্পপ্রমাণোচ্ছ্রাযবিস্তারাম্| অলোচনাং নির্জালকাম্| কুষ্ঠাদ্যৈরিতি অত্রাদিশব্দঃ প্রকারবচনঃ, তেনোষ্ণসুগন্ধিদ্রব্যৈরিতি ভবতি| হসন্তিকা অঙ্গারধানি(রি)কা, পরিবার্যেতি হসন্তিকাভিরিত্যনেন সম্বধ্যতে| তামিতি উপকল্পিতশয্যাং কুটীম্, আরোহেদিতি সম্বন্ধঃ||৫২-৫৫||

Adhikarana 29 (56-58) · Śloka 58

কুম্ভীং বাতহরক্বাথপূর্ণাং ভূমৌ নিখানযেত্| অর্ধভাগং ত্রিভাগং বা শযনং তত্র চোপরি||৫৬|| স্থাপযেদাসনং বাঽপি নাতিসান্দ্রপরিচ্ছদম্| অথ কুম্ভ্যাং সুসন্তপ্তান্ প্রক্ষিপেদযসো গুডান্||৫৭|| পাষাণান্ বোষ্মণা তেন তত্স্থঃ স্বিদ্যতি না সুখম্| সুসংবৃতাঙ্গঃ স্বভ্যক্তঃ স্নেহৈরনিলনাশনৈঃ||৫৮||

শযনং তত্র চোপরীতি অত্র কুম্ভীকোপরি শযনং খট্টাদি তথা কর্তব্যং যথা কুম্ভীকা ন ভজ্যতে| তত্স্থ ইতি যথোক্তশযনাসনস্থঃ||৫৬-৫৮||

Adhikarana 30 (59-60) · Śloka 60

কূপং শযনবিস্তারং দ্বিগুণং চাপি বেধতঃ| দেশে নিবাতে শস্তে চ কুর্যাদন্তঃসুমার্জিতম্||৫৯|| হস্ত্যশ্বগোখরোষ্ট্রাণাং করীষৈর্দগ্ধপূরিতে| স্ববচ্ছন্নঃ সুসংস্তীর্ণেঽভ্যক্তঃ স্বিদ্যতি না সুখম্||৬০||

কূপমিতি কূপমিব কূপং গভীরত্বেন| দ্বিগুণমিতি বিস্তারাদ্বোদ্ধব্যম্| বেধত ইত্যধঃখননপ্রমাণেন| সুসংস্তীর্ণ ইতি সুষ্ঠু সংস্তীর্ণে আচ্ছাদিতে, শয্যযা খট্বোপরিস্থিতযা আচ্ছাদিতে কূপে ইতি বোদ্ধব্যম্||৫৯-৬০||

Adhikarana 31 (61-63) · Śloka 63

ধীতীকাং তু করীষাণাং যথোক্তানাং প্রদীপযেত্| শযনান্তঃপ্রমাণেন শয্যামুপরি তত্র চ||৬১|| সুদগ্ধাযাং বিধূমাযাং যথোক্তামুপকল্পযেত্| স্ববচ্ছন্নঃ স্বপংস্তত্রাভ্যক্তঃ স্বিদ্যতি না সুখম্||৬২|| হোলাকস্বেদ ইত্যেষ সুখঃ প্রোক্তো মহর্ষিণা| ইতি ত্রযোদশবিধঃ স্বেদোঽগ্নিগুণসংশ্রযঃ||৬৩||

ধীতীকামিত্যাদিনা হোলাকস্বেদঃ| ধীতীকা শুষ্কগোমযাদিকৃতোঽগ্ন্যাশ্রযবিশেষঃ| যথোক্তানামিতি পূর্বোক্তহস্ত্যশ্বাদিভবানাম্| শযনান্তঃপ্রমাণেন ধীতীকাং ‘কৃত্বা’ ইত্যধ্যাহার্য যোজ্যম্| যথোক্তামিতি নাতিসান্দ্রপরিচ্ছদাম্| উপসংহরতি- ইতীত্যাদি| সাক্ষাদগ্নের্গুণমুষ্ণত্বমাশ্রিত্য স্বেদযতীত্যগ্নিগুণসংশ্রযঃ||৬১-৬৩||

Adhikarana 32 (64) · Śloka 65

ব্যাযাম উষ্ণসদনং গুরুপ্রাবরণং ক্ষুধা| বহুপানং ভযক্রোধাবুপনাহাহবাতপাঃ||৬৪|| স্বেদযন্তি দশৈতানি নরমগ্নিগুণাদৃতে|৬৫|

সম্প্রত্যনগ্নিস্বেদানাহ- ব্যাযাম ইত্যাদি| উষ্ণসদনমিতি অগ্নিসন্তাপব্যতিরেকেণ নির্জালকতযা ঘনভিত্তিতযা চ যদ্গৃহং স্বেদযতি তদ্বোদ্ধব্যম্| বহুপানমিতি বহুমদ্যপানম্| উপনাহো দ্বিবিধঃ- সাগ্নিরনগ্নিশ্চ; তত্র যঃ সাগ্নিরুপনাহঃ স সঙ্কর এব বোদ্ধব্যঃ, যদুক্তং- “কোলং কুলত্থাঃ সুরদারুরাস্নাঃ” (সূ.অ.৩) ইত্যাদিনাঽঽরগ্বধীযে; যস্ত্বনগ্নির্বহলত্বেন শরীরোষ্মরোধং কৃত্বা স্বেদযতি স ইহ বোদ্ধব্যঃ| আতপশ্চ যদ্যপ্যুষ্ণঃ, তথাঽপ্যগ্নিকৃতং তস্যোষ্ণত্বং ন ভবতীত্যনগ্নিস্বেদ উক্তঃ| অগ্নিগুণাদৃতে ইতি সাক্ষাদগ্নিসম্বন্ধেন কৃতাদুষ্ণত্বাদ্বিনা||৬৪||-

Adhikarana 33 (65-66) · Śloka 66

ইত্যুক্তো দ্বিবিধঃ স্বেদঃ সংযুক্তোঽগ্নিগুণৈর্ন চ||৬৫|| একাঙ্গসর্বাঙ্গগতঃ স্নিগ্ধো রূক্ষস্তথৈব চ| ইত্যেতত্ত্রিবিধং দ্বন্দ্বং স্বেদমুদ্দিশ্য কীর্তিতম্||৬৬||

সর্বস্বেদমুপসংহরতি- ইত্যুক্ত ইত্যাদি| একাঙ্গগতাঃ সঙ্করনাড্যাদযঃ, সর্বাঙ্গগতাঃ প্রস্তরজেন্তাকাদযঃ| স্নিগ্ধো বাতবিহিতঃ স্বেদঃ| রূক্ষঃ কফবিহিতঃ| স্নিগ্ধরূক্ষস্তু বাতশ্লেষ্মবিহিতোঽনযোর্ন ভিদ্যত ইতি পৃথঙ্গোক্তঃ| দ্বন্দ্বং পরস্পরং বিরুদ্ধং যুগ্মম্||৬৫-৬৬||

Adhikarana 34 (67) · Śloka 67

স্নিগ্ধঃ স্বেদৈরুপক্রম্যঃ স্বিন্নঃ পথ্যাশনো ভবেত্| তদহঃ স্বিন্নগাত্রস্তু ব্যাযামং বর্জযেন্নরঃ||৬৭||

স্বিন্নেন যথা কর্তব্যং তদাহ- স্নিগ্ধ ইত্যাদি| পথ্যাশনো ভবেদিত্যত্র যদ্যপি শৃঙ্গগ্রাহিকযা পথ্যং নোক্তং, তথাঽপি স্বেদপ্রবৃত্তিবিষযদোষস্য যত্ পথ্যং তদেব বোদ্ধব্যম্||৬৭||

Adhikarana 35 (68-71) · Śloka 71

তত্র শ্লোকাঃ- স্বেদো যথা কার্যকরো হিতো যেভ্যশ্চ যদ্বিধঃ| যত্র দেশে যথা যোগ্যো দেশো রক্ষ্যশ্চ যো যথা||৬৮|| স্বিন্নাতিস্বিন্নরূপাণি তথাঽতিস্বিন্নভেষজম্| অস্বেদ্যাঃ স্বেদযোগ্যাশ্চ স্বেদদ্রব্যাণি কল্পনা||৬৯|| ত্রযোদশবিধঃ স্বেদো বিনা দশবিধোঽগ্নিনা| সঙ্গ্রহেণ চ ষট্ স্বেদাঃ স্বেদাধ্যাযে নিদর্শিতাঃ||৭০|| স্বেদাধিকারে যদ্বাচ্যমুক্তমেতন্মহর্ষিণা | শিষ্যৈস্তু প্রতিপত্তব্যমুপদেষ্টা পুনর্বসুঃ||৭১||

সঙ্গ্রহে স্বেদো যথা কার্যকর ইতি স্নেহপূর্বং প্রযুক্তেনেত্যাদি| যেভ্যশ্চ যদ্বিধ ইতি বাতে স্নিগ্ধ ইত্যাদি সঙ্গৃহ্ণাতি| যত্র দেশে যথা যোগ্য ইতি আমাশযগতে বাতে রূক্ষপূর্ব ইত্যাদি| শেষং সুগমম্||৬৮-৭১||

Adhikarana puShpikA · Śloka 14

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে স্বেদাধ্যাযো নাম চতুর্দশোঽধ্যাযঃ||১৪||

ইতি শ্রীচক্রপাণিদত্তকৃতাযাং চরকতাত্পর্যটীকাযামাযুর্বেদদীপিকাখ্যাযাং সূত্রস্থানে নির্দেশচতুষ্কে স্বেদাধ্যাযশ্চতুর্দশঃ||১৪||