6. tasyāśitīyō'dhyāyaḥ

Adhikarana 1 (1-2) · Śloka 2

অথাতস্তস্যাশিতীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

মাত্রাশিতীযে মাত্রাবদাহারস্য বলাদিহেতুত্বং প্রতিপাদিতং, তচ্চ ঋতুসাত্ম্যমপেক্ষ্য কৃতস্যাহারস্য ভবতি; তেন, ঋতুপ্রবিভাগপূর্বকমৃতুসাত্ম্যাভিধাযকং তস্যাশিতীযং ব্রূতে||১-২||

Adhikarana 2 (3) · Śloka 3

তস্যাশিতাদ্যাদাহারাদ্বলং বর্ণশ্চ বর্ধতে| যস্যর্তুসাত্ম্যং বিদিতং চেষ্টাহারব্যপাশ্রযম্||৩||

অশিতাদ্যাদিতি অশিতপীতলীঢজগ্ধাত্| বলং বর্ণশ্চেতি চকারেণ পূর্বাধ্যাযোক্তসুখাযুষী অপি গৃহ্যেতে; যদি বা বলবর্ণাভ্যামেব নান্তরীযকং কৃত্স্নং ধাতুসাম্যকার্যং সুখাদি গৃহ্যতে| বিদিতমিত্যনেন সম্যক্জ্ঞানপূর্বকমৃতুসাত্ম্যানুষ্ঠানং দর্শযতি| চেষ্টাগ্রহণেন ব্যবাযব্যাযামাভ্যঙ্গাদীনাং গ্রহণম্| চেষ্টাহারব্যপাশ্রযং চেষ্টাহারগোচরম্||৩||

Adhikarana 3 (4) · Śloka 4

ইহ খলু সংবত্সরং ষডঙ্গমৃতুবিভাগেন বিদ্যাত্| তত্রাদিত্যস্যোদগযনমাদানং চ ত্রীনৃতূঞ্ছিশিরাদীন্ গ্রীষ্মান্তান্ ব্যবস্যেত্, বর্ষাদীন্ পুনর্হেমন্তান্তান্ দক্ষিণাযনং বিসর্গং চ||৪||

ঋতুজ্ঞানমন্তরা ঋতুসাত্ম্যজ্ঞানং ন সম্ভবতীত্যৃতূনামুপযুক্তস্বরূপজ্ঞানার্থমাহ- ইহেত্যাদি| ঋতুপ্রতিপাদনপ্রস্তাবে সংবত্সরং বিদ্যাদিতি সংবত্সরপ্রতিপাদনমৃতূনামেব মিলিতানাং সংবত্সরত্বপ্রতিপাদনার্থম্| মেলকশ্চ বুদ্ধ্যা ব্যবহ্রিযতে , ন তু পরমার্থতঃ ঋতূনাং মেলকোঽস্তি| ঋতূনাং সংবত্সরাত্মকত্বং পুনঃ পুনস্ত এবর্তবঃ পরাবর্তন্ত ইতি জ্ঞানার্থমবশ্যং প্রতিপাদনীযম্| ইহেতি ইহ প্রকরণে, ষডঙ্গং বিদ্যাত্; অন্যত্র তু রোগভিষগ্জিতীযাদৌ তত্তত্কার্যবশাদন্যথাঽপি| উক্তং চ- “শীতোষ্ণবর্ষলক্ষণঃ কাল” ইত্যাদি| ষডঙ্গমিতি সমাহারে দ্বিগুঃ, ঋতুব্যতিরেকেণ সংবত্সরস্যাবিদ্যমানত্বাত্; যদি বা সমুদাযিভ্যোঽন্যঃ সমুদায ইত্যাশ্রিত্য বহুব্রীহিঃ কার্যঃ| তত্রেতি ঋতুবিভাগকথনে| উদগ্ উত্তরাং দিশং প্রতি, অযনং গমনমুদগযনম্| আদদাতি ক্ষপযতি পৃথিব্যাঃ সৌম্যাংশং প্রাণিনাং চ বলমিত্যাদানম্| ত্রীন্ শিশিরাদীনিত্যনেনৈব লব্ধেঽপি গ্রীষ্মান্তত্বে গ্রীষ্মান্তানিতি শিশিরস্যাদিরিতি বিগ্রহস্য তথাঽঽদিশব্দস্য প্রকারবাচিতাযাঃ প্রতিষেধার্থম্| এবং হেমন্তান্তানিতি চ ব্যাখ্যেযম্| দক্ষিণাং দিশং প্রতি অযনং দক্ষিণাযনম্| বিসৃজতি জনযতি আপ্যমংশং প্রাণিনাং চ বলমিতি বিসর্গঃ| সঞ্জ্ঞাপ্রণযনং চ ব্যবহারার্থং, নিরুক্তিপ্রতীযমানার্থপ্রতিপাদনার্থং চ||৪||

Adhikarana 4 (5) · Śloka 5

বিসর্গে পুনর্বাযবো নাতিরূক্ষাঃ প্রবান্তি, ইতরে পুনরাদানে; সোমশ্চাব্যাহতবলঃ শিশিরাভির্ভাভিরাপূরযঞ্জগদাপ্যাযযতি শশ্বত্, অতো বিসর্গঃ সৌম্যঃ| আদানং পুনরাগ্নেযং; তাবেতাবর্কবাযূ সোমশ্চ কালস্বভাবমার্গপরিগৃহীতাঃ কালর্তুরসদোষদেহবলনির্বৃত্তিপ্রত্যযভূতাঃ সমুপদিশ্যন্তে||৫||

বিসর্গধর্মং নির্দিশতি- বিসর্গে পুনরিত্যাদি| যদ্যপি চাদানমাদৌ পঠিতং, তথাঽপি প্রতিলোমতন্ত্রযুক্ত্যাঽঽদৌ বিসর্গগুণকথনং; যদি বা প্রথমমাদানস্যোত্তরাযণরূপস্য প্রশস্তত্বাদগ্রেঽভিধানম্, ইহ তু বিসর্গস্য বলজনকত্বেনাভিপ্রেতত্বাদগ্রেঽভিধানম্| নাতিরূক্ষা ইতি সৌম্যবিসর্গকালসম্বন্ধেন মন্দীকৃতরৌক্ষ্যাঃ প্রবান্তীতি| ইতরে পুনরাদান ইতি অপ্রশান্তাতিরূক্ষাশ্চ, আগ্নেযাদানসম্বন্ধাহিতরূক্ষত্বাত্ | সোমশ্চেত্যাদি প্রকৃতেন বিসর্গেণ সম্বধ্যতে| অব্যাহতবল ইতি কালমার্গমেঘবাতাদিভিস্তদা সূর্যস্য সোমপরিপন্থিনো হতবলত্বাত্| শিশিরাভিঃ শীতাভিঃ| শশ্বদিতি ছেদঃ| সৌম্যঃ সোমগুণপ্রধানঃ| আগ্নেযম্ অগ্নিগুণপ্রধানম্, অপ্রতিহতবলত্বেনেত্যর্থঃ| নন্বেতাবতৈবাদিত্যচন্দ্রবাতানাং বলবত্ত্বমবলবত্ত্বং চ কথং ভবতীত্যাহ- তাবেতাবিত্যাদি| কালো দেবতারূপঃ, স চ নিত্যরূপোঽপি প্রাণিনামদৃষ্টেন নানারূপেণ গৃহীতঃ সন্ কদাচিত্ সূর্যবলবাযুবলসোমবলাদীন্ করোতি; স্বভাবঃ সূর্যস্য সৌম্যাংশক্ষযকর্তৃত্বাদির্বাযোর্বিরূক্ষণাদিঃ সোমস্যাপ্যাযনাদিঃ; মার্গো দক্ষিণ উত্তরশ্চ, তত্র দক্ষিণঃ কর্কটাদযো ধনুরন্তাঃ, মকরাদিরুত্তরঃ| এতে চ কালস্বভাবমার্গপরিগ্রহা যথাসম্ভবং বোদ্ধব্যাঃ; ন হি সোমে মার্গপরিগ্রহঃ ক(কি)ঞ্চিদ্বিশেষমাবহতি, বাযোশ্চ মার্গপরিগ্রহ এব নাস্তি| পরিগৃহীতাঃ সম্বদ্ধাঃ| কালর্ত্বাদীনাং নির্বৃত্তিপ্রত্যযভূতা নিষ্পত্তিকারণভূতাঃ, উপদিশ্যন্তে ‘আচার্যৈঃ’ ইতি শেষঃ; কালঃ সংবত্সরোঽযনদ্বযং চ, ঋতবঃ শিশিরাদযঃ, দেহস্য বলং দেহবলম্| অন্যে তু ব্রুবতে- সংবত্সরস্যাযনদ্বযস্য চ ঋতুমেলকরূপত্বাদৃতুগ্রহণেনৈব গ্রহণং লব্ধং, তেন কালগ্রহণমৃতুবিশেষণং, তেন কালরূপঃ ঋতুরিতি স্ত্রীণামেবার্তবদর্শনং যদৃতুস্তদ্ব্যাবর্ত্যতে| প্রত্যযভূতা ইত্যত্র ভূতশব্দ উপমানে| কেচিদ্ব্যাখ্যানযন্তি- ‘অর্কবাযূ’ ইত্যেকতযা পঠিত্বা ‘সোমশ্চ’ ইতি যত্ পৃথক্ পঠতি, তেনার্কবায্বোর্মিলিতযোরাদানং প্রতি কারণত্বং, বিসর্গং প্রতি পৃথগেব সোমস্য কারণত্বমিতি দর্শযতি| এবং বলহরণবলকরণাদিষ্বপি বোদ্ধব্যম্||৫||

Adhikarana 5 (6) · Śloka 6

তত্র রবির্ভাভিরাদদানো জগতঃ স্নেহং বাযবস্তীব্ররূক্ষাশ্চোপশোষযন্তঃ শিশিরবসন্তগ্রীষ্মেষু যথাক্রমং রৌক্ষ্যমুত্পাদযন্তো রূক্ষান্ রসাংস্তিক্তকষাযকটুকাংশ্চাভিবর্ধযন্তো নৃণাং দৌর্বল্যমাবহন্তি||৬||

তত্রেত্যাদি| আদদান উচ্ছোষযন্| জগতঃ স্থাবরজঙ্গমস্য| স্নেহং সারং সৌম্যভাগমিত্যর্থঃ| ন কেবলং রবিঃ, বাযবশ্চ শোষযন্তঃ স্নেহমিতি সম্বন্ধঃ| তীব্রাশ্চ রূক্ষাশ্চ তীব্ররূক্ষাঃ; যদি বা তীব্রং রৌক্ষ্যং যেষাং তে তীব্ররূক্ষাঃ; এতচ্চাদানে তীব্রেণ রবিণা সম্বন্ধাদ্বাযোর্ভবতি যোগবাহিত্বাদ্বাযোঃ| উক্তং হি- “যোগবাহী(হঃ) পরং বাযুঃ সংযোগাদুভযার্থকৃত্” (চি.অ.৩) ইত্যাদি| যথাক্রমমিতি শিশিরে রৌক্ষ্যমল্পং তিক্তং রসমল্পং চ দৌর্বল্যং, তথা বসন্তে মধ্যং রৌক্ষ্যং কষাযং রসং মধ্যং দৌর্বল্যং, তথা গ্রীষ্মে প্রকৃষ্টং রৌক্ষ্যং কটুকং রসং মহচ্চ দৌর্বল্যং দর্শযতি| যদ্যপি চ কষাযো রসো রূক্ষতমঃ কটুকশ্চ রূক্ষতরঃ, যদুক্তং- “রৌক্ষ্যাত্ কষাযো রূক্ষাণাং প্রবরো মধ্যমঃ কটুঃ” (সূ.অ.২৬) ইত্যাদি; রৌক্ষ্যপ্রকর্ষশ্চ গ্রীষ্মে, মধ্যবলং চ রৌক্ষ্যং বসন্তে, তথাঽপি বায্বগ্নিগুণবাহুল্যাত্ কটুকস্য বায্বগ্নিগুণবহুলে গ্রীষ্মকাল এবোত্পত্তিঃ, পবনপৃথিব্যুত্কর্ষবতি তু বসন্তে পবনপৃথিব্যুত্কর্ষজন্যস্য কষাযস্যোত্পত্তিঃ| যদুক্তং- “বায্বগ্নিগুণভূযিষ্ঠত্বাত্ কটুকঃ, পবনপৃথিব্যতিরেকাত্ কষাযঃ” (সূ.অ.২৬) ইতি| পৃথিব্যাদ্যুত্কর্ষশ্চ কালবিশেষপ্রভাবকৃতঃ কার্যদর্শনাদুন্নেযঃ| অভিবর্ধযন্ত ইতি বচনাদ্যথাস্বকালে তিক্তাদীনামভিবৃদ্ধিঃ সূচ্যতে, তেন ন তদৈকরসত্বম্| অত্র চ ক্রমবদ্রৌক্ষ্যোত্পত্তিতিক্তাদ্যুত্পত্তী অপি দৌর্বল্যোত্পত্তৌ কারণং, যতো রৌক্ষ্যমুত্পাদযন্ত ইতি তিক্তকষাযকটুকানভিবর্ধযন্ত ইতি চ হেতুগর্ভবিশেষণদ্বযং কৃত্বা দৌর্বল্যমাবহন্তীত্যুক্তম্||৬||

Adhikarana 6 (7) · Śloka 7

বর্ষাশরদ্ধেমন্তেষু তু দক্ষিণাভিমুখেঽর্কে কালমার্গমেঘবাতবর্ষাভিহতপ্রতাপে, শশিনি চাব্যাহতবলে, মাহেন্দ্রসলিলপ্রশান্তসন্তাপে জগতি, অরূক্ষা রসাঃ প্রবর্ধন্তেঽম্ললবণমধুরা যথাক্রমং তত্র বলমুপচীযতে নৃণামিতি||৭||

বর্ষেত্যাদি| তুশব্দঃ পূর্বপক্ষব্যাবৃত্তৌ| দক্ষিণাভিমুখে দক্ষিণাশাং গন্তুমুদ্যত এবার্কে, তেন বিষুবদুদযোপলক্ষিতমধ্যদেশাদুত্তরেণ বর্তমানোঽপি রবির্যদৈব দক্ষিণাশাং গন্তুমুদ্যতো ভবতি তদৈব ক্ষীযমাণবলো ভবতি, উত্তরাশাগমনপ্রকর্ষাহিতবলপ্রকর্ষতযা তু স্তোকস্তোকক্রমাপচীযমানবলোঽপি তথা দুর্বলো ন লক্ষ্যতে| এবমুত্তরাযণেঽপি ব্যাখ্যেযম্| কালঃ পূর্বং ব্যাখ্যাতঃ, মার্গ ইহ দক্ষিণাভিমুখঃ, মেঘস্য বাতো মেঘবাতঃ, বর্ষণং বর্ষঃ, এতৈরভিহতপ্রতাপেঽর্ক ইতি সম্বন্ধঃ| বাতস্ত্বিহ মেঘসম্বন্ধাহিতশৈত্যোঽর্কতাপপরিপন্থী ভবতি, শশিনোঽব্যাহতবলত্বং সূর্যস্য পরিপন্থিনোঽভিহতপ্রতাপত্বাদনুগুণমেঘবাতবর্ষণযোগাচ্চ| জগতি স্থাবরজঙ্গমে| অত্র চ “পৃথিব্যগ্নিভূযিষ্ঠত্বাদম্লঃ”, “সলিলাগ্নিভূযিষ্ঠত্বাল্লবণঃ” (সূ.অ.২৬) ইত্যুক্তং, তত্ কথং সৌম্যে বিসর্গে তযোশ্চাগ্নেযযোরুত্পাদ ইতি ন বাচ্যম্, যতো বলপ্রকর্ষবতোঽর্কস্য ক্ষীযমাণবলস্যাপি বিষুবপর্যন্তং বলবত্ত্বমস্ত্যেবেতি ব্যুত্পাদিতমেব||৭||

Adhikarana 7 (8) · Śloka 8

ভবতি চাত্র- আদাবন্তে চ দৌর্বল্যং বিসর্গাদানযোর্নৃণাম্| মধ্যে মধ্যবলং, ত্বন্তে শ্রেষ্ঠমগ্রে চ নির্দিশেত্||৮||

সম্প্রতি শিশিরাদৌ বলহ্রাসঃ প্রতিপাদিতো বর্ষাদৌ চ বলোত্কর্ষঃ; তত্র শিশিরে দুর্বলা বর্ষাসু বলবন্তঃ প্রাণিনো ভবন্তীত্যাদিদুর্গ্রহং নিষেদ্ধুমাহ- আদাবন্তে চেত্যাদি| বিসর্গস্যাদৌ বর্ষাসু, আদানস্যান্তে গ্রীষ্মে, দৌর্বল্যং প্রকর্ষং প্রাপ্তং নির্দিশেদিতি সম্বন্ধঃ; তথা মধ্যে বিসর্গস্য শরদি, আদানস্য মধ্যে বসন্তে, মধ্যং নাতিক্ষীণং নাতিবৃদ্ধং বলং বিনির্দিশেদিতি যোজ্যং; তথাঽন্তে বিসর্গস্য হেমন্তে, অগ্রে চ প্রথমে আদানস্য শিশিরে, শ্রেষ্ঠং বলং বিনির্দিশেদিতি যোজনা| এবং মন্যতে- বিসর্গপ্রকর্ষাহিতবলপ্রকর্ষঃ পুরুষ আদানস্যাদৌ শিশিরে স্তোকক্ষীযমাণবলোঽপি বলবান্ ভবতি, যথা- পৌষমাসান্তাহিতবৃদ্ধিপ্রকর্ষা নিশা মাঘফাল্গুনযোঃ ক্ষীযমাণাঽপি দিবসান্মহত্যেব ভবতি| অনেন ন্যাযেন বর্ষাসু দৌর্বল্যং, বসন্তশরদোশ্চ মধ্যমং বলং বোদ্ধব্যম্| এবং কালর্তুরসদেহবলকারণত্বমর্কাদীনাং ব্যবস্থাপিতং, দোষকারণত্বং ত্বগ্রে ঋতুবিধাননির্দেশেঽভিধাস্যতে||৮||

Adhikarana 8 (9-18) · Śloka 18

শীতে শীতানিলস্পর্শসংরুদ্ধো বলিনাং বলী| পক্তা ভবতি হেমন্তে মাত্রাদ্রব্যগুরুক্ষমঃ||৯|| স যদা নেন্ধনং যুক্তং লভতে দেহজং তদা| রসং হিনস্ত্যতো বাযুঃ শীতঃ শীতে প্রকুপ্যতি||১০|| তস্মাত্তুষারসমযে স্নিগ্ধাম্ললবণান্ রসান্| ঔদকানূপমাংসানাং মেদ্যানামুপযোজযেত্||১১|| বিলেশযানাং মাংসানি প্রসহানাং ভৃতানি চ| ভক্ষযেন্মদিরাং শীধুং মধু চানুপিবেন্নরঃ||১২|| গোরসানিক্ষুবিকৃতীর্বসাং তৈলং নবৌদনম্| হেমন্তেঽভ্যস্যতস্তোযমুষ্ণং চাযুর্ন হীযতে||১৩|| অভ্যঙ্গোত্সাদনং মূর্ধ্নি তৈলং জেন্তাকমাতপম্| ভজেদ্ভূমিগৃহং চোষ্ণমুষ্ণং গর্ভগৃহং তথা||১৪|| শীতেষু সংবৃতং সেব্যং যানং শযনমাসনম্| প্রাবারাজিনকৌষেযপ্রবেণীকুথকাস্তৃতম্||১৫|| গুরূষ্ণবাসা দিগ্ধাঙ্গো গুরুণাঽগুরুণা সদা| শযনে প্রমদাং পীনাং বিশালোপচিতস্তনীম্||১৬|| আলিঙ্গ্যাগুরুদিগ্ধাঙ্গীং সুপ্যাত্ সমদমন্মথঃ| প্রকামং চ নিষেবেত মৈথুনং শিশিরাগমে||১৭|| বর্জযেদন্নপানানি বাতলানি লঘূনি চ| প্রবাতং প্রমিতাহারমুদমন্থং হিমাগমে||১৮||

বর্ধমানবলপ্রকর্ষবত্তযা হেমন্তস্যাভিপ্রেতত্বাত্তত্সাত্ম্যমেবাগ্রে প্রাহ- শীত ইত্যাদিনা| শীতে শীতগুণযুক্তে হেমন্তে, যদ্যপি চানুক্তে শীত ইতি বিশেষণে হেমন্তঃ শীত এব লভ্যতে, তথাঽপি ন পূর্বং ক্বচিদ্ধেমন্তে শীতত্বং প্রতিপাদিতমিতি প্রতিপাদ্যতে; যদি বা যদৈব হেমন্তে শীতং মহদ্ভবতি তদৈব বিশেষেণ বহ্নির্বলী ভবতি, নোপক্রমমাত্রেণাপি, ঋতুব্যাপত্তৌ শীতাযোগ ইতি চ শীত ইতি পদেন লভ্যতে| হিমসম্বন্ধাদ্বিশেষেণ শীতোঽনিলঃ শীতানিলঃ; বিশেষেণ শীতত্বং বাযোর্যোগবাহিত্বাচ্ছীতকালসম্বন্ধাদেব লব্ধং পুনরভিধীযতেঽগ্নিসংরোধহেতুত্বাত্ | বাযুর্হি হিমসম্বন্ধাদেব বহির্নির্গচ্ছচ্ছরীরোষ্মণো রোধং কৃত্বা কুম্ভকারপবনাহিতপঙ্কলেপ ইবান্তরস্য বহ্নের্বৃদ্ধিমাবহতি| এতেন যদুচ্যতে- অসমানাচ্ছীতবাতাত্ কথমগ্নিবৃদ্ধিরিত্যেতদপাস্তম্| নহ্যত্র শীতো বাতোঽগ্নিত্বেন পরিণমতে, কিং তর্হি নির্গচ্ছত্তেজঃপ্রতীপীভূতঃ| শীতানিলস্য স্পর্শঃ শরীরসম্বন্ধ ইত্যর্থঃ| বলিনাং প্রাণিনাং হেমন্তস্বভাবাদ্বলী ভবতি; অনেন প্রাণিবলবত্ত্বমগ্নিবলবত্ত্বে হেতুরিতি দর্শযতি| উক্তং চ হস্তিবৈদ্যকে বালগজানাং নীরোগত্বপ্রতিপাদনে; যথা- “অব্যাহতাদভিপ্রাযাত্ প্রীতিঃ, প্রীতের্বলং, বলাত্| অগ্নিরগ্নেশ্চ ধাতূনাং বলং , নাশস্ততো রুজাম্” ইতি| মাত্রযা যদ্ গুরু অতিমাত্রমিত্যর্থঃ, দ্রব্যতশ্চ দ্রব্যস্বভাবতশ্চ যদ্ গুরু নবধান্যাদি, তত্ক্ষমঃ| এবম্ভূতো বলী বহ্নির্যদা যুক্তং গুরুভূতং চান্নং ন লভতে, তদা দেহজং রসং হিনস্তি ক্ষযং নযতি; দেহার্থং দেহজাতং বা দেহজং ধাতুরূপং রসমিত্যর্থঃ| অত ইন্ধনাভাবে সতি রসধাতুক্ষযাদ্বাযুঃ প্রকুপ্যতি হেমন্তে| হেত্বন্তরমাহ বাতকোপে- শীতঃ শীত ইতি; যস্মাদযং শীতগুণো বাযুঃ, তস্মাচ্ছীতকালে হেমন্তলক্ষণে সমানং কারণমাসাদ্য কুপ্যতীত্যর্থঃ| অত্র বৃদ্ধো বাযুর্মেদস্বিনো যথাঽগ্নিবৃদ্ধিং করোতি, ন তু বৈষম্যমনতিবৃদ্ধত্বাত্, তথাঽগ্নিবৃদ্ধিমেব করোতি| যদুক্তং- “মেদসাঽঽবৃতমার্গত্বাদ্বাযুঃ কোষ্ঠে বিশেষতঃ| চরন্ সন্ধুক্ষযত্যগ্নিমাহারং শোষযত্যপি” (সূ.অ.২১) ইত্যাদিনাঽষ্টৌনিন্দিতীযে| তস্মাদিতি দেহজরসক্ষযভযাত্| প্রকরণলব্ধেঽপি তুষারসময ইতি যত্ পুনঃ করোতি, তদ্বিশেষেণ তুষারপাতে বিশেষেণ স্নিগ্ধাদীনাং ভোজনার্থম্| মেদ্যানাং মেদুরাণাম্| ঔদকানূপমাংসাদযশ্চ হেমন্তকালকফচযসংবর্ধকা অপি মহাত্যযবাতবিকারপ্রতিপক্ষত্বেন ব্যবাযাদিকফচযপ্রতিপক্ষযুক্তত্বাচ্চাভিপ্রেতাঃ | ঔদকাঃ কূর্মাদযোঽন্নপানে বক্ষ্যমাণাঃ, অনূপাঃ সৃমরখড্গাদযঃ, বিলেশযা গোধাপ্রভৃতযঃ, প্রসহা গোখরাদযঃ| ভৃতং ভট্টিত্রমিতি প্রসিদ্ধম্| হেমন্তেঽভ্যস্যত ইতি পুনর্হেমন্তগ্রহণং হেমন্তং ব্যাপ্যৈবোষ্ণোদকসেবোপদর্শনার্থম্| জেন্তাকঃ স্বেদবিশেষো বক্ষ্যমাণঃ| গর্ভগৃহং গৃহকোষ্ঠকম্| হেমন্ত ইত্যনেনার্থলব্ধেঽপি শীতে শীতেষ্বিতি পদং বর্ষাকালাদাবপি শীতপ্রাপ্তৌ সংবৃতযানাদিসেবোপদর্শনার্থম্| প্রাবারো গুরুপ্রাবরণং কম্বলাদি, অজিনং ব্যাঘ্রাদিচর্ম, কৌষেযং কোষকারকীটতন্তুমযং, প্রবেণী গোণীতি প্রসিদ্ধা, কুথকশ্চিত্রকম্বলঃ| গুরুণাঽগুরুণেতি অগুরুঘনপ্রলেপেনেত্যর্থঃ| বিশালাবাযামেন, উপচিতৌ পরিণাহেন| মৈথুনসেবোপদেশশ্চেহ প্রাণিনাং বলবত্ত্বেন শীতপ্রতীকারকত্বেন চীযমানকফবিরুদ্ধত্বেন চ; সুশ্রুতেঽপি হেমন্তে মৈথুনসেবোক্তা; যদুক্তং- “তত্রাপনীতহারাশ্চ প্রিযা নার্যঃ স্বলঙ্কৃতাঃ| রমযেযুর্যথাকামং বলাদপি মদোত্কটাঃ” ইতি||৯-১৮||

Adhikarana 9 (19-21) · Śloka 21

হেমন্তশিশিরৌ তুল্যৌ শিশিরেঽল্পং বিশেষণম্| রৌক্ষ্যমাদানজং শীতং মেঘমারুতবর্ষজম্||১৯|| তস্মাদ্ধৈমন্তিকঃ সর্বঃ শিশিরে বিধিরিষ্যতে| নিবাতমুষ্ণং ত্বধিকং শিশিরে গৃহমাশ্রযেত্||২০|| কটুতিক্তকষাযাণি বাতলানি লঘূনি চ| বর্জযেদন্নপানানি শিশিরে শীতলানি চ||২১||

শিশিরবিধিমাহ- হেমন্তেত্যাদি| বিশেষণং বিশেষঃ; শিশিরস্যাদানারম্ভত্বেন রৌক্ষ্যং, তথা মেঘমারুতবর্ষাঃ শিশিরেঽধিকা ভবন্তি তজ্জং চ শীতমধিকং হেমন্তাদস্তীত্যর্থঃ| তস্মাদিতি হেমন্ততুল্যত্বাদ্বিশিষ্টরৌক্ষ্যশীতযুক্তত্বাচ্চ হৈমন্তিকো বিধিঃ| নিবাতমুষ্ণং ত্বিতি তুশব্দঃ পক্ষান্তরপরিগ্রহার্থঃ; হেমন্তোক্তনিবাতোষ্ণগৃহাচ্ছিশিরে রূক্ষাতিশীতেঽধিকমুষ্ণং গৃহমাশ্রযেদিত্যভিপ্রাযঃ| কেচিদত্রাসেব্যপ্রতিপাদকং গ্রন্থং পঠন্তি, স ত্বনার্ষঃ||১৯-২১||

Adhikarana 10 (22-26) · Śloka 26

বসন্তে নিচিতঃ শ্লেষ্মা দিনকৃদ্ভাভিরীরিতঃ| কাযাগ্নিং বাধতে রোগাংস্ততঃ প্রকুরুতে বহূন্||২২|| তস্মাদ্বসন্তে কর্মাণি বমনাদীনি কারযেত্| গুর্বম্লস্নিগ্ধমধুরং দিবাস্বপ্নং চ বর্জযেত্||২৩|| ব্যাযামোদ্বর্তনং ধূমং কবলগ্রহমঞ্জনম্| সুখাম্বুনা শৌচবিধিং শীলযেত্ কুসুমাগমে||২৪|| চন্দনাগুরুদিগ্ধাঙ্গো যবগোধূমভোজনঃ| শারভং শাশমৈণেযং মাংসং লাবকপিঞ্জলম্||২৫|| ভক্ষযেন্নির্গদং সীধুং পিবেন্মাধ্বীকমেব বা| বসন্তেঽনুভবেত্ স্ত্রীণাং কাননানাং চ যৌবনম্||২৬||

বসন্ত ইত্যাদিনা বসন্তবিধিমাহ| নিচিতঃ সঞ্চিতো বসন্তপূর্বকালে, ঈরিতো বিলাযিতো বসন্তে| কাযাগ্নিমিতি কাযনির্বর্তকমগ্নিং জাঠরং, ন তু ধাত্বগ্নিবিশেষমাত্রম্| তত ইত্যত্র চকারো লুপ্তনির্দিষ্টো বোদ্ধব্যঃ, তেন ততোঽগ্নিবধাচ্চেত্যর্থঃ; যদি বা ততোঽগ্নিবধানন্তরম্| বমনাদীনি বমনপ্রধানানি; তেন, আদানমধ্যত্বেন যদি বাতপিত্তপ্রকোপস্তথাবিধো ভবতি তদা বিরেচনাস্থাপনানুবাসনানামপি প্রবৃত্তির্ভবতি, শিরোবিরেচনং তু কফজযার্থং কর্তব্যমেব| বসন্তশব্দেন বমনং প্রতি চৈত্র এব বোদ্ধব্যঃ; যেন, দোষচযাদ্যর্থং পঞ্চকর্মপ্রবৃত্ত্যর্থং চাভিধাতব্যপ্রাবৃডাদ্যৃতুক্রমেণ ফাল্গুনচৈত্রৌ বসন্তো ভবতি, ন বৈশাখঃ| অনেনৈবাভিপ্রাযেণ পূর্বশ্লোকেঽপি সামান্যেন নিচিত ইতি কৃতং, ন তু হেমন্তে নিচিত ইতি; হেমন্ত ইত্যুক্তে হি রসোত্পত্তিক্রমাভিহিতমার্গশীর্ষপৌষাত্মকে হেমন্তে প্রকৃতত্বাদ্দোষচযো বুধ্যতে, স চ নাভিপ্রেতঃ; উক্তস্তু দোষচযাদিক্রমোক্তপৌষমাঘাত্মকে হেমন্তে শ্লেষ্মচযঃ| সুখাম্বুনা সুখোষ্ণাম্বুনা| লাবকপিঞ্জলং মাংসমিতি সম্বন্ধঃ| ভক্ষযেদিতি চ্ছেদঃ| অনুভবেদিতি ভাষযা শ্লেষ্মক্ষযার্থং স্তোকং মৈথুনমনুজানাতি||২২-২৬||

Adhikarana 11 (27-32) · Śloka 32

মযূখৈর্জগতঃ স্নেহং গ্রীষ্মে পেপীযতে রবিঃ| স্বাদু শীতং দ্রবং স্নিগ্ধমন্নপানং তদা হিতম্||২৭|| শীতং সশর্করং মন্থং জাঙ্গলান্মৃগপক্ষিণঃ| ঘৃতং পযঃ সশাল্যন্নং ভজন্ গ্রীষ্মে ন সীদতি||২৮|| মদ্যমল্পং ন বা পেযমথবা সুবহূদকম্| লবণাম্লকটূষ্ণানি ব্যাযামং চ বিবর্জযেত্ ||২৯|| দিবা শীতগৃহে নিদ্রাং নিশি চন্দ্রাংশুশীতলে| ভজেচ্চন্দনদিগ্ধাঙ্গঃ প্রবাতে হর্ম্যমস্তকে||৩০|| ব্যজনৈঃ পাণিসংস্পর্শৈশ্চন্দনোদকশীতলৈঃ| সেব্যমানো ভজেদাস্যাং মুক্তামণিবিভূষিতঃ||৩১|| কাননানি চ শীতানি জলানি কুসুমানি চ| গ্রীষ্মকালে নিষেবেত মৈথুনাদ্বিরতো নরঃ||৩২||

মযূখৈরিত্যাদিনা গ্রৈষ্মবিধিমাহ| মযূখৈঃ তেজোভিঃ| স্নেহঃ সার ইত্যর্থঃ| পেপীযতে অত্যর্থং পিবতি| মন্থঃ- “সক্তবঃ সর্পিষা যুক্তাঃ শীতবারিপরিপ্লুতাঃ| নাত্যচ্ছা নাতিসান্দ্রাশ্চ মন্থ ইত্যভিধীযতে”| মদ্যমল্পমিতি একান্তমদ্যসাত্ম্যেন; নবেতি মদ্যস্য স্বভাবপাকাভ্যামম্লস্য গ্রীষ্মবিরুদ্ধত্বেন; সুবহূদকমিতি মদ্যসাত্ম্যস্যৈব, মদ্যস্যোষ্ণাম্লত্বাদ্যপবাদার্থং বহুতরং পানীযং প্রক্ষিপ্য পাতব্যমিতি দর্শযতি; তেনৈতত্ ফলতি- যন্মদ্যং গ্রীষ্মে ন পাতব্যমেব তাবত্; মদ্যসাত্ম্যানাং সাত্ম্যমদ্যত্যাগে সাত্ম্যত্যাগজা রোগা ভবন্তি, তেন তস্যাল্পং বা সুবহূদকং বা দেযমিত্যর্থঃ| মুক্তৈব মণির্মুক্তামণিঃ| গ্রীষ্মকালে চণ্ডাতপে মধ্যাহ্ন ইত্যর্থঃ| মৈথুনোপরতিস্তু দিবানিশং বোদ্ধব্যা||২৭-৩২||

Adhikarana 12 (33-40) · Śloka 40

আদানদুর্বলে দেহে পক্তা ভবতি দুর্বলঃ| স বর্ষাস্বনিলাদীনাং দূষণৈর্বাধ্যতে পুনঃ||৩৩|| ভূবাষ্পান্মেঘনিস্যন্দাত্ পাকাদম্লাজ্জলস্য চ| বর্ষাস্বগ্নিবলে ক্ষীণে কুপ্যন্তি পবনাদযঃ||৩৪|| তস্মাত্ সাধারণঃ সর্বো বিধির্বর্ষাসু শস্যতে| উদমন্থং দিবাস্বপ্নমবশ্যাযং নদীজলম্||৩৫|| ব্যাযামমাতপং চৈব ব্যবাযং চাত্র বর্জযেত্| পানভোজনসংস্কারান্ প্রাযঃ ক্ষৌদ্রান্বিতান্ ভজেত্||৩৬|| ব্যক্তাম্ললবণস্নেহং বাতবর্ষাকুলেঽহনি| বিশেষশীতে ভোক্তব্যং বর্ষাস্বনিলশান্তযে||৩৭|| অগ্নিসংরক্ষণবতা যবগোধূমশালযঃ| পুরাণা জাঙ্গলৈর্মাংসৈর্ভোজ্যা যূষৈশ্চ সংস্কৃতৈঃ||৩৮|| পিবেত্ ক্ষৌদ্রান্বিতং চাল্পং মাধ্বীকারিষ্টমম্বু বা| মাহেন্দ্রং তপ্তশীতং বা কৌপং সারসমেব বা||৩৯|| প্রঘর্ষোদ্বর্তনস্নানগন্ধমাল্যপরো ভবেত্| লঘুশুদ্ধাম্বরঃ স্থানং ভজেদক্লেদি বার্ষিকম্||৪০||

বর্ষাবিধিমাহ- আদানেত্যাদি| দেহস্য দুর্বলত্বে পক্তাঽপি দুর্বলো ভবতি, দেহবলানুবিধাযিত্বাদ্বহ্নেঃ| এতচ্চ বলিনাং বলী ভবতীত্যত্র ব্যুত্পাদিতম্| স দুর্বলো বহ্নিঃ| অনিলাদীনামিতি অনিলপ্রধানানাম্| বর্ষাসু বাতাদযঃ কুতঃ কুপ্যন্তীত্যাহ- ভূবাষ্পাদিত্যাদি| ভূবাষ্পঃ প্রভাবাদেব ত্রিদোষকোপকঃ| মেঘনিস্যন্দো বাতশ্লেষ্মকারকঃ| অম্লপাকতা জলস্য বর্ষাস্বভাবকৃতা পিত্তশ্লেষ্মকরী| অগ্নিবলে ক্ষীণ ইত্যনেনাদানাহিতমগ্নিমান্দ্যমপি দোষপ্রকোপকমিতি দর্শযতি| অগ্নিমান্দ্যং চাপাকবিদাহাভ্যাং কফপিত্তকারি, ধাতুপোষকরসানুত্পাদাচ্চ ধাতুক্ষযেণ বাতকারি| এতেন বর্ষাসু বহ্নিমান্দ্যেন বাতাদিকোপঃ, বাতাদিকোপেন চ বহ্নিমান্দ্যমিতি দর্শিতম্| যদুক্তং বাগ্ভটে- “ভূবাষ্পেণাম্লপাকেন মলিনেন চ বারিণা| বহ্নিনৈব চ মন্দেন তেষ্বিত্যন্যোঽন্যদূষিষু|| সাধারণো বিধিঃ কার্যস্ত্রিদোষঘ্নোঽগ্নিদীপনঃ” (বা.সূ.অ.৩) ইতি| উদকপ্রধানো মন্থ উদমন্থঃ| পানম্ উদকাদি, ভোজনং রক্তশাল্যাদি, তযোঃ সংস্কারাঃ সংস্কারবন্ত্যন্নপানানীত্যর্থঃ| ক্ষৌদ্রং চ যদ্যপি বাতপ্রকোপি, তথাঽপি বার্ষিকক্লেদশমনার্থং স্বল্পমাত্রযা ক্ষৌদ্রান্বিতপদেন বিহিতম্| বিশেষশীত ইতি হেতুগর্ভবিশেষণং; তেনাত্যর্থশীতে দিবসে যস্মান্মহাত্যযস্য বাতস্য কোপো ভবতি ততস্তজ্জযার্থং বর্ষাকালপ্রভাবক্রিযমাণপিত্তচযানুগুণযোরপ্যম্ললবণযোরুপযোগঃ কর্তব্য ইতি দর্শিতং ভবতি||৩৩-৪০||

Adhikarana 13 (41-48) · Śloka 48

বর্ষাশীতোচিতাঙ্গানাং সহসৈবার্করশ্মিভিঃ| তপ্তানামাচিতং পিত্তং প্রাযঃ শরদি কুপ্যতি||৪১|| তত্রান্নপানং মধুরং লঘু শীতং সতিক্তকম্| পিত্তপ্রশমনং সেব্যং মাত্রযা সুপ্রকাঙ্ক্ষিতৈঃ||৪২|| লাবান্ কপিঞ্জলানেণানুরভ্রাঞ্ছরভান্ শশান্| শালীন্ সযবগোধূমান্ সেব্যানাহুর্ঘনাত্যযে||৪৩|| তিক্তস্য সর্পিষঃ পানং বিরেকো রক্তমোক্ষণম্| ধারাধরাত্যযে কার্যমাতপস্য চ বর্জনম্||৪৪|| বসাং তৈলমবশ্যাযমৌদকানূপমামিষম্| ক্ষারং দধি দিবাস্বপ্নং প্রাগ্বাতং চাত্র বর্জযেত্||৪৫|| দিবা সূর্যাংশুসন্তপ্তং নিশি চন্দ্রাংশুশীতলম্| কালেন পক্বং নির্দোষমগস্ত্যেনাবিষীকৃতম্||৪৬|| হংসোদকমিতি খ্যাতং শারদং বিমলং শুচি| স্নানপানাবগাহেষু হিতমম্বু যথাঽমৃতম্ ||৪৭|| শারদানি চ মাল্যানি বাসাংসি বিমলানি চ| শরত্কালে প্রশস্যন্তে প্রদোষে চেন্দুরশ্মযঃ||৪৮||

শরদ্বিধিমাহ- বর্ষেত্যাদি| উচিতম্ অভ্যস্তম্, ‘উচ সমবাযে’ ইত্যস্মাদ্ধাতোঃ; শীতমুচিতান্যঙ্গানি যেষাং, তেষাম্| সহসৈবেতি পদেনাক্রমেণ শরদি তীব্রাতপসম্বন্ধাদনভ্যস্তাত্ পিত্তপ্রকোপো ন্যায্য ইতি দর্শযতি| আচিতমিতি বর্ষাসু| প্রায ইত্যনেন বর্ষাসু পিত্তচযপ্রতিকূলং বিধিং প্রযত্নেনাচরতো ন ভবত্যপি পিত্তচযঃ, শরদি তু প্রকোপো ন ভবতীতি দর্শযতি; এতচ্চ সামান্যন্যাযেন শ্লেষ্মণো বাতস্য চ চযপ্রকোপযোর্বোদ্ধব্যং; যদি বা, প্রাযঃ পিত্তং প্রকুপ্যতি শ্লেষ্মা চানুবলত্বেনেত্যর্থঃ| যদুক্তং- “তস্য চানুবলঃ কফঃ” (চি.অ.৩) ইতি| লঘ্বিতি অগ্নিসন্ধুক্ষণার্থম্| অত্র বহ্নেঃ সমানেনাপি পিত্তেন দ্রবাংশসম্বন্ধেনাগ্নিমান্দ্যং ক্রিযতে| যদুক্তং গ্রহণ্যধ্যাযে- “আপ্লাবযদ্ধন্ত্যনলং জলং তপ্তমিবানলম্” (চি.অ.১৫)| উত্সর্গসিদ্ধ এব ভোজনস্য মাত্রাবত্ত্বে মাত্রযেতি বচনং মাত্রাতিক্রমেণেহ বিশেষতো ভূরিদোষত্বদর্শনার্থম্| সুপ্রকাঙ্ক্ষিতৈঃ সুবুভুক্ষিতৈঃ| উরভ্রো মেষঃ| ঘনাত্যয ইতি পুনর্বচনং শরত্প্রবেশ এবৈতদুক্তবিধিকরণং গ্রন্থাধিক্যাত্ সূচযতীতি ব্যাখ্যানযন্তি; বযং তু পশ্যামঃ- পর্যাযশব্দানাং পুনঃ পুনঃ করণে যত্র তাত্পর্যং শাস্ত্রে প্রতীযতে তত্র তদেব বাচ্যং, যত্র তু তাত্পর্যান্তরং ন প্রতীযতে তত্র বাক্যভেদেনৈব পুনরভিধানমিতি| ধারাধরাণাং মেঘানামত্যযোঽদর্শনম্| তেন, প্রব্যক্তাযাং শরদি তিক্তসর্পিঃপানং বিরেকাদি চ কার্যম্| ক্রমশ্চাত্রাচার্যস্যাভিপ্রেতঃ, তেন প্রথমং তিক্তসর্পিষ্পানং, তেন পিত্তাপ্রশান্তৌ বিরেকঃ, তেনাপ্যশান্তৌ শোণিতদুষ্টৌ চ সত্যাং রক্তমোক্ষণং; রক্তং চাত্র কালস্বভাবাদ্দূষ্যত্যেব প্রাযঃ; যদাহ- “শরত্কালস্বভাবাচ্চ শোণিতং সম্প্রদূষ্যতি” (সূ.অ.২৪) ইতি| দিবেত্যাদি|- সূর্যাংশুতাপাদেব দিবেতি লব্ধে দিবেতি সকলদিনব্যাপ্ত্যর্থম্| সূর্যতপ্তমিতি বক্তব্যেংঽশুগ্রহণং মেঘাবরণরহিতাংশুসূর্যগ্রহণার্থম্ | সন্তপ্তমিত্যত্র সংশব্দঃ পরিতস্তাপোপদর্শনার্থঃ| এবং নিশীত্যাদি চ ব্যাখ্যেযম্| চন্দ্রাংশুগ্রহণেন চ নিশি সৌম্যাংশসম্বন্ধং লক্ষযতি| কালেনেতি শরত্কালস্বভাবেন| পক্বমিতি বর্ষাস্বভিনবভূমিসম্বন্ধজনিতপৈচ্ছিল্যব্যম্লত্বাদিদোষরহিতম্| যতঃ পক্বং ততো নির্দোষং দোষাজনকমিত্যর্থঃ| অগস্ত্যেনাবিষীকৃতমিত্যগস্ত্যোদযেন প্রভাবাদ্বর্ষাসু মেঘসম্বদ্ধোরগলূতাদিসম্বন্ধাত্সবিষমবিষং ভবতীতি বাচ্যম্| হংসোদকমিতি এবম্ভূতোদকস্য সঞ্জ্ঞা; হংসশব্দেন সূর্যাচন্দ্রমসাবভিধীযেতে, তাভ্যাং শোধিতমুদকং হংসোদকং; যদি বা হংসসেবাযোগ্যং হংসোদকং, হংসাঃ কিল বিশুদ্ধমেবোদকং ভজন্তে| অবগাহঃ চিরং জলাবস্থানম্| শারদানীতি মাল্যবিশেষণমনার্তবকুসুমনিষেধার্থম্| প্রদোষ ইতি নিশাপ্রবেশ এব পরং চন্দ্ররশ্মিসেবা; নোপরি, শিশিরভযাত্| অত্র পূর্বর্তুসাত্ম্যপরিত্যাগো ভবিষ্যদৃতুসাত্ম্যাভ্যাসশ্চ পূর্বর্ত্বন্তসপ্তাহাগাম্যৃত্বাদিসপ্তাহযোঃ কর্তব্যঃ| যদুক্তং বাগ্ভটে- “ঋত্বোরন্ত্যাদিসপ্তাহাবৃতুসন্ধিরিতি স্মৃতঃ| তত্র পূর্বো বিধিস্ত্যাজ্যঃ সেবনীযঃ পরঃ ক্রমাত্” (বা.সূ.অ.৩) ইতি||৪১-৪৮||

Adhikarana 14 (49) · Śloka 49

ইত্যুক্তমৃতুসাত্ম্যং যচ্চেষ্টাহারব্যপাশ্রযম্| উপশেতে যদৌচিত্যাদোকঃসাত্ম্যং তদুচ্যতে||৪৯||

উপসংহরতি- ইত্যুক্তমিত্যাদি| ঋতুসাত্ম্যপ্রসঙ্গেনাভ্যাসসাত্ম্যং দর্শযতি- উপশেতে ইত্যাদি| উপশেতে সুখযতি, অপথ্যমপি সদ্বিকারং ন জনযতি| কুত ইত্যাহ- ঔচিত্যাত্ অভ্যাসাদিত্যর্থঃ; অপথ্যমপি হি নিরন্তরাভ্যাসাদ্বিষমিবাশীবিষস্য নোপঘাতকং ভবতীতি ভাবঃ||৪৯||

Adhikarana 15 (50) · Śloka 50

দেশানামামযানাং চ বিপরীতগুণং গুণৈঃ| সাত্ম্যমিচ্ছন্তি সাত্ম্যজ্ঞাশ্চেষ্টিতং চাদ্যমেব চ||৫০||

দেশসাত্ম্যং রোগসাত্ম্যং চ দর্শযতি- দেশানামিত্যাদি| দেশানামনূপাদীনাং, গুণৈঃ স্নেহগৌরবাদিভিঃ সহ বিপরীতগুণং স্নেহগৌরববিপরীতগুণরৌক্ষ্যলাঘবযুক্তং জাঙ্গলমাংসমধ্বাদি; অদনীযমাদ্যং, চেষ্টিতং চ ব্যাযামাদি, দেশসাত্ম্যমিচ্ছন্ত্যাযুর্বেদবিদ ইত্যর্থঃ| এবমামযানাং চ বিপরীতগুণমিত্যাদি ব্যাখ্যেযম্| গুণশব্দশ্চেহ ধর্মমাত্রবচনঃ, যথোচ্যতে- দ্রব্যগুণো দ্রব্যধর্ম ইত্যর্থঃ| তেন বিপরীতপ্রভাবাদীনামপি গ্রহণং ভবতি| আমযশব্দেন চামযহেতুরপি গৃহীতব্যঃ| তত আমযবিপরীতানাম্, আমযহেতুবিপরীতানাং, তথা প্রভাববৈপরীত্যাত্তদ্বিপরীতার্থকারিণাং চ গ্রহণং ভবতি| তদুদাহরণানি যথাবসরং নিদানে করিষ্যামঃ| আদ্যগ্রহণেনৌষধাহারযোর্গ্রহণং, চেষ্টিতগ্রহণেন স্বপ্নাভ্যঙ্গাদীনাং গ্রহণং ব্যাখ্যেযম্||৫০||

Adhikarana 16 (51) · Śloka 51

তত্র শ্লোকঃ- ঋতাবৃতৌ নৃভিঃ সেব্যমসেব্যং যচ্চ কিঞ্চন| তস্যাশিতীযে নির্দিষ্টং হেতুমত্ সাত্ম্যমেব চ||৫১||

উক্তমধ্যাযার্থমুপসংহরতি- ঋতাবিত্যাদি| অত্র হেমন্তে অসেব্যং কণ্ঠরবেণ যদ্যপি ন প্রতিপাদিতং তথাঽপি ‘স যদা নেন্ধনং যুক্তং লভতে’ ইত্যভিধানাদল্পভোজনপরিহার উক্ত এব ভবতি; তেন, ঋতাবৃতাবিতি বীপ্সা কৃতাঽর্থবতী ভবতি; যদি বা ছত্রিণো গচ্ছন্তীতি ন্যাযাদ্বীপ্সোক্তা| হেমন্তপরিহারবিধিবচ্চ শিশিরপরিহারবিধির্ব্যাখ্যেযঃ| হেতুমদিতি উপপত্তিমত্, ঔচিত্যাদিহেতুনির্দেশোপপন্নমিত্যর্থঃ||৫১||

Adhikarana puShpikA · Śloka 6

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে তস্যাশিতীযো নাম ষষ্ঠোঽধ্যাযঃ||৬||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে স্বস্থচতুষ্কে তস্যাশিতীযো নাম ষষ্ঠোঽধ্যাযঃ||৬||