11. tisraiṣaṇīyō'dhyāyaḥ

Adhikarana 1 (1-2) · Śloka 2

অথাতস্তিস্রৈষণীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পূর্বাধ্যাযে চতুষ্পাদমারোগ্যকারণং ব্যবস্থাপিতং, ততশ্চতুষ্পাদসম্পত্ত্যা প্রাপ্তারোগ্যেণ সতা যদনুষ্ঠেযং প্রাণপরিপালনসাধনং, তথা ধনার্জনসাধনং, তথা ধর্মার্জনসাধনং, তদিহৈষণাত্রযরূপমভিধীযত ইত্যনন্তরং তিস্রৈষণীযোঽভিধীযতে| তিস্রৈষণাশব্দোঽস্মিন্নস্তীতি মত্বর্থীযশ্ছঃ, অত্রানুকার্যানুকরণযোর্ভেদাবিবক্ষযা যলোপাসিদ্ধেরভাবাত্ সংহিতযা ‘তিস্রৈষণীযঃ’ ইতি সঞ্জ্ঞাযতে, অধ্যাযান্তে “তিস্রৈষণীযে মার্গাশ্চ” ইতি শ্লোকপাদং করিষ্যতি; যদ্যপ্যন্যেঽপ্যত্র শব্দাঃ সন্তি, তথাঽপি প্রধানত্বেনাযং গৃহ্যতে||১-২||

Adhikarana 2 (3) · Śloka 3

ইহ খলু পুরুষেণানুপহতসত্ত্ববুদ্ধিপৌরুষপরাক্রমেণ হিতমিহ চামুষ্মিংশ্চ লোকে সমনুপশ্যতা তিস্র এষণাঃ পর্যেষ্টব্যা ভবন্তি| তদ্যথা- প্রাণৈষণা, ধনৈষণা, পরলোকৈষণেতি||৩||

ইহেতি ভোগার্থিপুরুষাধিকারে, যতো মোক্ষার্থিপুরুষং প্রতি ধনৈষণা সর্বথৈবানুপযুক্তা| পুরুষেণেতি পদং কুর্বন্ য এব পুরুষ এষণাত্রযমন্বিষ্যতি স এব পুরুষো ভণ্যতে নান্যঃ, পশুতুল্যত্বাদিতি দর্শযতি| পৌরুষং শারীরং বলং, পরাক্রমস্তু শৌর্যাখ্যং মানসং বলম্| ইহেতি ইহ জন্মনি, অমুষ্মিন্নিতি জন্মান্তরে| ইষ্যতেঽন্বিষ্যতে সাধ্যতেঽনযেত্যেষণা| প্রাণো জীবিতং, তত্ সাধ্যতে দীর্ঘত্বেন রোগানুপহতত্বেন চানযেতি প্রাণৈষণা| এবং ধনৈষণা| পরলোকোপকারকস্য ধর্মস্যৈষণা পরলোকৈষণা| কামৈষণা তু প্রাণৈষণাধনৈষণযোরন্তর্ভাবনীযা, শরীরসম্পত্তিধনসম্পত্তিসাধ্যত্বাত্ কামস্য; যদি বা কামৈষণাযাং স্বত এব পুরুষঃ প্রবৃত্তো ভবতি নোপদেশমপেক্ষত ইতি তদেষণোপদেশো ন কৃতঃ||৩||

Adhikarana 3 (4) · Śloka 4

আসাং তু খল্বেষণানাং প্রাণৈষণাং তাবত্ পূর্বতরমাপদ্যেত| কস্মাত্? প্রাণপরিত্যাগে হি সর্বত্যাগঃ| তস্যানুপালনং- স্বস্থস্য স্বস্থবৃত্তানুবৃত্তিঃ, আতুরস্য বিকারপ্রশমনেঽপ্রমাদঃ, তদুভযমেতদুক্তং বক্ষ্যতে চ; তদ্যথোক্তমনুবর্তমানঃ প্রাণানুপালনাদ্দীর্ঘমাযুরবাপ্নোতীতি প্রথমৈষণা ব্যাখ্যাতা ভবতি||৪||

প্রাণৈষণাযাঃ প্রথমানুষ্ঠানে উপপত্তিমাহ- আসাং ত্বিত্যাদি| ত্রযাণাং মধ্যে দ্বে পূর্বে ভবতঃ, তৃতীযাযাঃ সর্বোত্তরত্বেনাপূর্বত্বাত্; তেন দ্বযোস্তর ইতি ন্যাযাত্ পূর্বতরং প্রাণৈষণেতি সাধুস্তরপ্রযোগঃ| প্রাণশব্দো জীবিতবচন একবচনান্তোঽপ্যস্তি; যদুক্তং- “দশৈবাযতনান্যাহুঃ প্রাণো যেষু প্রতিষ্ঠিতঃ” (সূ.অ.৩০) ইতি, তেন প্রাণপ্রত্যবমর্শকং ‘তস্য’ ইতি পদমেকবচনেন যুক্তমেব| বিকারান্ প্রশমযতীতি বিকারপ্রশমনং চিকিত্সা, তস্মিন্| অপ্রমাদঃ অবধানেনানুষ্ঠানম্| বক্ষ্যতে চেতি নিখিলেন শাস্ত্রেণ| প্রাণানুপালনাদিতি প্রাণানুপালনসাধনাত্; তেন প্রাণানুপালনদীর্ঘাযুষ্ট্বযোরর্থাভেদাত্ সাধ্যসাধনভাবো নাস্তীতি যচ্চোচ্যতে তন্নিরস্তং ভবতি| প্রথমেতি প্রাধান্যাত্ প্রাণৈষণা||৪||

Adhikarana 4 (5) · Śloka 5

অথ দ্বিতীযাং ধনৈষণমাপদ্যেত, প্রাণেভ্যো হ্যনন্তরং ধনমেব পর্যেষ্টব্যং ভবতি ; ন হ্যতঃ পাপাত্ পাপীযোঽস্তি যদনুপকরণস্য দীর্ঘমাযুঃ, তস্মাদুপকরণানি পর্যেষ্টুং যতেত| তত্রোপকরণোপাযাননুব্যাখ্যাস্যামঃ; তদ্যথা- কৃষিপাশুপাল্যবাণিজ্যরাজোপসেবাদীনি, যানি চান্যান্যপি সতামবিগর্হিতানি কর্মাণি বৃত্তিপুষ্টিকরাণি বিদ্যাত্তান্যারভেত কর্তুং; তথা কুর্বন্ দীর্ঘজীবিতং জীবত্যনবমতঃ পুরুষো ভবতি | ইতি দ্বিতীযা ধনৈষণা ব্যাখ্যাতা ভবতি||৫||

অথেতি প্রাণৈষণানন্তরম্| দ্বিতীযামিতি হেতুগর্ভং বিশেষণং, যস্মাদিযমেব দ্বিতীযা প্রাণৈষণানন্তরমবশ্যোপাদেযত্বেন, তত ইযমেবোচ্যত ইত্যর্থঃ| প্রাণৈষণামনু চাস্যাঃ প্রাধান্যং দর্শযতি- প্রাণেভ্যো হীত্যাদি| পাপশব্দেন পাপকার্যং দুঃখমুচ্যতে| উপকরণম্ আরোগ্যভোগধর্মসাধনীভূতো ধনপ্রপঞ্চঃ, স যস্য নাস্ত্যসাবনুপকরণঃ| ধনোপাযানিতি বক্তব্যে উপকরণোপাযানিতি যতঃ করোতি, তেন ধনস্য ভোগধর্মসাধনার্থমেবোত্পাদমিচ্ছন্তি, ন পুনঃ কৃপণস্যেব বিনিযোগশূন্যস্য সুসংবর্ধিতমাত্রকরণার্থম্ | অন্যান্যপীতি প্রতিগ্রহাধ্যাপনাদীনি| বৃত্তিঃ বর্তনং, পুষ্টিঃ ধনসম্পত্তিঃ| অনবমতঃ অনবজ্ঞাতো বহুমানগৃহীত ইতি যাবত্| দীর্ঘং জীবিতং জীবতি ধারযতীত্যর্থঃ, অনেকার্থত্বাদ্ধাতূনাং; যদি বা দীর্ঘজীবিতং যথা স্যাত্তথা জীবতীতি ক্রিযাবিশেষণত্বেন ব্যাখ্যেযম্||৫||

Adhikarana 5 (6) · Śloka 6

অথ তৃতীযাং পরলোকৈষণামাপদ্যেত| সংশযশ্চাত্র, কথং? ভবিষ্যাম ইতশ্চ্যুতা নবেতি; কুতঃ পুনঃ সংশয ইতি, উচ্যতে- সন্তি হ্যেকে প্রত্যক্ষপরাঃ পরোক্ষত্বাত্ পুনর্ভবস্য নাস্তিক্যমাশ্রিতাঃ, সন্তি চাগমপ্রত্যযাদেব পুনর্ভবমিচ্ছন্তি; শ্রুতিভেদাচ্চ- ‘মাতরং পিতরং চৈকে মন্যন্তে জন্মকারণম্ | স্বভাবং পরনির্মাণং যদৃচ্ছাং চাপরে জনাঃ’ || ইতি | অতঃ সংশযঃ- কিং নু খল্বস্তি পুনর্ভবো ন বেতি||৬||

পরলোকৈষণাং ব্যাকরোতি- অথেত্যাদি| অত্র চ পরলোকস্য দুর্জ্ঞেযত্বেন চার্বাকাদিনাস্তিকাসম্মতত্বেন চ পরলোকং প্রমাণেন ব্যবস্থাপযিতুং নির্ণযার্থং প্রমাণপ্রবৃত্তিবিষযং সংশযমেব তাবত্ পরলোকে দর্শযতি- সংশযশ্চাত্রেত্যাদি| ইতশ্চ্যুতা ইহ জন্মনি মৃতাঃ, ভবিষ্যামো জন্মান্তর ইত্যর্থঃ| সংশযহেতুং পৃচ্ছতি- কুতঃ সংশযঃ পুনরিতি| বাদিবিপ্রতিপত্তিং সংশযহেতুমাহ- উচ্যত ইত্যাদি| প্রত্যক্ষপরা অনুমতপ্রত্যক্ষৈকপ্রমাণাঃ| পরোক্ষত্বাত প্রত্যক্ষাবিষযত্বাত্| পুনর্ভবস্য জন্মান্তরস্য| নাস্তি পুনর্ভবো নাস্তি কর্মফলং নাস্ত্যাত্মেত্যাদিনাস্তিনা প্রচরতীতি নাস্তিকঃ, তস্য ভাবো নাস্তিক্যম্| যত প্রত্যক্ষপ্রমাণেনোপলভ্যতে ঘটপটাদি, তদেব পরমস্তি; নোপলভ্যতে চ প্রত্যক্ষেণ পরলোকঃ, তস্মান্নাস্তি পরলোক ইতি নাস্তিকাভিপ্রাযঃ| অস্তি পুনর্ভব ইতি যেষাং মতং তান্ দর্শযতি- সন্তীত্যাদি| সন্তি চেত্যত্র ‘অপরে’ ইতি বাক্যশেষঃ| আগমপ্রত্যযাত্ আগমপ্রামাণ্যাত্| আগমং চ পুনর্ভবপ্রতিপাদকং দানতপোযজ্ঞেত্যাদি দর্শযিষ্যত্যগ্রে| ইচ্ছন্তীত্যত্র ‘যে’ ইতি বাক্যশেষঃ| এবং তাবদ্বাদিবিপ্রতিপত্তিরেকা সংশযকারণং দর্শিতা; সংশযহেত্বন্তরমাহ- শ্রুতিভেদাচ্চেত্যাদি| শ্রূযত ইতি শ্রুতিঃ; প্রতিবাদিবচনমেবঙ্গ্রন্থনিবদ্ধম্| এতানি চ মাতাপিতরাবেব জন্মকারণমিত্যাদীনি পুনর্ভবপ্রতিক্ষেপকাণি বচনানি| আগমপ্রত্যযাদস্তি পুনর্ভব ইতি যো ব্রূতে, তদ্বচনেন সমং বাদিবিপ্রতিপত্তিরূপতযৈব সংশযকারণং ভবতীত্যত উক্তমুপসংহারে ‘অতঃ সংশযঃ’ ইতি| একে মন্যন্তে জন্মকারণমিতি জন্মকারণমিতি পদং মাতরং পিতরং তথা স্বভাবং তথা পরনির্মাণমিতি পদত্রযেণ সম্বধ্যতে; যদৃচ্ছাং চাঽপরে জনা ইত্যত্র মন্যন্তে জন্মকারণমিতি পদং সম্বধ্যতে| মাতাপিতরাবেবাত্মান্তরনিরপেক্ষাবপত্যোত্পাদনে কারণং, তেন পূর্বশরীরং পরিত্যজ্য শরীরান্তরপরিগ্রহরূপ আত্মনঃ পরলোকো নাস্তীতি প্রথমবাদিনঃ পক্ষঃ| পরিদৃশ্যমানপৃথিব্যাদিভাবানামেবাযং স্বভাবো- যত্- সংযোগবিশেষান্মিলিতাঃ সন্তশ্চেতনং পুরুষাদিলক্ষণং কার্যবিশেষমারভন্তে, যথা সুরাবীজাদীনি প্রত্যেকমমদকরাণ্যপি মদকরং মদ্যমারভন্তে, নাত্র কশ্চিদাত্মা বিদ্যতে যস্য পরলোকঃ স্যাদিতি স্বভাববাদিনো ভাবঃ| পর ঐশ্বর্যাদিগুণযুক্ত আত্মবিশেষঃ, তেন সংসার্যাত্মনিরপেক্ষিণা নির্মাণং পরনির্মাণং, তত্রাপি পরস্যৈবৈশ্বর্যাদিগুণযুক্তস্যাত্মবিশেষস্য প্রভাবাদ্ভূতানি চেতযন্তে নাত্মান্তরমস্তীতি পরলোকাভাবঃ| যদৃচ্ছা কারণাপ্রতিনিযমেনোত্পাদঃ; ন কারণপ্রতিনিযমেন কার্যোত্পাদোঽবধারযিতুং শক্যতে, অবধারকপ্রমাণানাং প্রামাণ্যানবধারণাত্; তস্মাদাত্মৈব পুনর্ভবমনুভবতীতি ন বাচ্যমিতি যাদৃচ্ছিকস্যাভিপ্রাযঃ||৬||

Adhikarana 6 (7) · Śloka 7

তত্র বুদ্ধিমান্নাস্তিক্যবুদ্ধিং জহ্যাদ্বিচিকিত্সাং চ| কস্মাত্? প্রত্যক্ষং হ্যল্পম্; অনল্পমপ্রত্যক্ষমস্তি, যদাগমানুমানযুক্তিভিরুপলভ্যতে; যৈরেব তাবদিন্দ্রিযৈঃ প্রত্যক্ষমুপলভ্যতে, তান্যেব সন্তি চাপ্রত্যক্ষাণি||৭||

পুনর্ভবাস্তিত্বপক্ষং গৃহীত্বা প্রাহ- তত্রেত্যাদি| বুদ্ধিমানিতি প্রশস্তবুদ্ধিযুক্তঃ| নাস্ত্যেব পরলোক ইতি বিপর্যযজ্ঞানং নাস্তিক্যবুদ্ধিঃ, তাং জহ্যাত্| পরলোকবিষযো বিপর্যযো যথা ধর্মানুষ্ঠানং প্রতি বিরোধকঃ, তথা স্তোকক্রমেণাস্তি পরলোকো ন বেতি সংশযোঽপি ধর্মানুষ্ঠানং প্রতি বিরোধক ইত্যাহ- বিচিকিত্সাং চেতি; বিচিকিত্সাং জহ্যাদিতি সম্বন্ধঃ, বিচিকিত্সা সন্দেহঃ, সা চেহ প্রকৃতত্বাত্ পরলোকবিষযৈব| অত্রৈব হেতুপ্রশ্নপূর্বকং হেতুমাহ- কস্মাদিত্যাদি| অপ্রত্যক্ষত্বাত্ পরলোকো নাস্তীতি প্রথমবাদিমতং দূষযতি- প্রত্যক্ষমিত্যাদি| যথা, প্রত্যক্ষং প্রমাণমব্যভিচারিপ্রমাজনকত্বেন; তথাঽঽগমাদীন্যপি তথাভূতপ্রমাজনকত্বাত্ প্রমাণান্যেব; ততশ্চ প্রত্যক্ষাবিষযত্বেনৈব যত্ পুনর্ভবস্য নাস্তিত্বং ব্যবস্থাপ্যতে তন্ন যুক্তমিতি প্রকরণার্থঃ| পুনর্ভবসাধকানি চাগমাদীন্যগ্রে বক্ষ্যমাণানি সন্ত্যেবেতি ভাবঃ| আগমাদীনি লক্ষণতোঽগ্রেঽভিধাস্যন্তে| প্রত্যক্ষাবিষযত্বে সত্যপি যান্যন্যপ্রমাণসিদ্ধানি সন্তি তান্যাহ- যৈরেবেত্যাদি| প্রত্যক্ষমিতি প্রত্যক্ষবিষযং ঘটাদি| সন্তীতি ইন্দ্রিযোপক্রমণীযোক্তানুমানগম্যত্বাদিতি বোদ্ধব্যম্||৭||

Adhikarana 7 (8) · Śloka 8

সতাং চ রূপাণামতিসন্নিকর্ষাদতিবিপ্রকর্ষাদাবরণাত্ করণদৌর্বল্যান্মনোনবস্থানাত্ সমানাভিহারাদভিভবাদতিসৌক্ষ্ম্যাচ্চ প্রত্যক্ষানুপলব্ধিঃ; তস্মাদপরীক্ষিতমেতদুচ্যতে- প্রত্যক্ষমেবাস্তি, নান্যদস্তীতি||৮||

ইতশ্চ প্রত্যক্ষানুপলব্ধির্ন বস্ত্বভাবনিশ্চযকারিকেত্যাহ- সতামিত্যাদি| সতামিত্যগ্রে বক্ষ্যমাণাতিসন্নিকর্ষাদ্যভাবে প্রত্যক্ষেণৈব গৃহ্যমাণত্বেন সতামিত্যর্থঃ| প্রত্যক্ষানুপলব্ধিরিত্যতিসন্নিকর্ষাদিভিঃ সহ প্রত্যেকমভিসম্বধ্যতে| অতিসন্নিকর্ষাদনুপলব্ধির্যথা- নযনগতকজ্জলাদেঃ, অতিবিপ্রকর্ষাদ্যথা- দূরাকাশগতস্য পক্ষিণঃ, আবরণাদ্যথা- কুড্যাদিপিহিতস্য ঘটাদেঃ, করণদৌর্বল্যাদ্যথা- কামলাদ্যুপহতস্য চক্ষুষঃ পটশৌক্ল্যাদ্যপ্রতিভানং, মনোনবস্থানাদ্যথা- কান্তামুখনিরীক্ষণপ্রহিতমনসঃ পার্শ্বাগতবচনানববোধঃ, সমানাভিহারাদ্যথা- বিল্বরাশিপ্রবিষ্টস্য বিল্বস্যেন্দ্রিযসম্বদ্ধস্যাপি ভেদেনাগ্রহণম্, অভিভবাদ্যথা- মধ্যন্দিনে উল্কাপাতস্য, সৌক্ষ্ম্যাদ্যথা- ত্রিচতুর্হস্তপ্রমাণদেশবর্তিনঃ ক্রিমিবিশেষলিখ্যাদেরগ্রহণম্||৮||

Adhikarana 8 (9-10) · Śloka 10

শ্রুতযশ্চৈতা ন কারণং, যুক্তিবিরোধাত্| আত্মা মাতুঃ পিতুর্বা যঃ সোঽপত্যং যদি সঞ্চরেত্| দ্বিবিধং সঞ্চরেদাত্মা সর্বোবাঽবযবেন বা||৯|| সর্বশ্চেত্ সঞ্চরেন্মাতুঃ পিতুর্বা মরণং ভবেত্| নিরন্তরং, নাবযবঃ কশ্চিত্সূক্ষ্মস্য চাত্মনঃ||১০||

সম্প্রতি শ্রুতিভেদবাদিমতং দূষযতি- শ্রুতযশ্চেত্যাদি| ন কারণমিতি ন পুনর্ভবপ্রতিষেধে কারণমিত্যর্থঃ| যুক্তিবিরোধাত্ উপপত্তিবিরোধাত্| অপত্যশরীরে মাতাপিত্রোঃ কারণত্বমনুমতমেব, যতস্তথাবিধে মাতাপিত্রোঃ কারণত্বে সত্যপি চৈতন্যহেতোরাত্মনঃ পরলোকাদাগমনে প্রেত্যভাবোঽখণ্ডিত এবেতি| চৈতন্যমপত্যস্য মাতাপিত্রোরপি চৈতন্যহেতুর্য আত্মা তত এব ভবতীতি যো মন্যতে তং প্রত্যাহ- আত্মা মাতুরিত্যাদি| দ্বিবিধং দ্বিপ্রকারম্| সর্ব ইতি মাতরং পিতরং পরিত্যজ্যাপত্যং গচ্ছেত্; অবযবেনেতি একোঽবযবো বাঽঽত্মনো মাতরি পিতরি বা তিষ্ঠেত্, অন্যশ্চৈকদেশ আত্মনোঽপত্যং গচ্ছেত্| প্রথমপক্ষে দূষণমাহ- সর্বশ্চেত্যাদি| নিরন্তরমিতি চ্ছেদঃ, নিরন্তরং তত্কালমেব, যদি মাতুরাত্মাঽপত্যং সঞ্চরেত্তদা তত্কালমেব মাতুর্মরণং, যদি তু পিতুরাত্মাঽপত্যং সঞ্চরেত্তদা তত্কালমেব পিতুর্মরণং, স্যাদিতি| দ্বিতীযং পক্ষং দূষযতি- নাবযব ইত্যাদি| সূক্ষ্মস্যেতি অস্থূলস্য; স্থূলানাং পৃথিব্যাদীনামবযবা ভবন্তি, ন তু সূক্ষ্মাণামাকাশকালমনোবুদ্ধিপ্রভৃতীনাং; ততশ্চাবযবাভাবাদাত্মনোঽবযবেন সঞ্চরণং দূরমপাস্তমিত্যর্থঃ||৯-১০||

Adhikarana 9 (11) · Śloka 11

বুদ্ধির্মনশ্চ নির্ণীতে যথৈবাত্মা তথৈব তে| যেষাং চৈষা মতিস্তেষাং যোনির্নাস্তি চতুর্বিধা||১১||

অথ শঙ্ক্যতে- মাঽঽত্মা মাতাপিত্রোঃ সঞ্চরতু, বুদ্ধিস্তু তযোর্মনো বাঽপত্যং সঞ্চরতু, অত এবাপত্যস্য চৈতন্যং ভবিষ্যতীত্যাহ- বুদ্ধির্মনশ্চেত্যাদি| নির্ণীতে ব্যবস্থাপিতে প্রমাণেন, কিম্ভূতেনেত্যাহ- যথৈবাত্মা নিরবযবত্বেনাবযবসঞ্চরণাক্ষমস্তথা তত্কালমেব মাতাপিতৃপরিত্যাগপ্রসঙ্গেন কার্ত্স্ন্যেনাপি সঞ্চরিতুমক্ষমঃ, তথা তে অপি বুদ্ধিমনসী নিরবযবত্বান্নৈকদেশেন সঞ্চরেযাতাং, মাতাপিত্রোস্তত্কালমেবাবুদ্ধিমত্ত্বামনস্কত্বপ্রসঙ্গাচ্চ ন কার্ত্স্ন্যেন সঞ্চরেযাতামিতি ভাবঃ| দূষণান্তরমাহ- যেষামিত্যাদি| যেষাং মতিরিতি মাতাপিতরাবেবাপত্যে চৈতন্যকারণমিত্যেবংরূপা| চতুর্বিধা যোনিরিতি জরাযুজাণ্ডজসংস্বেদজোদ্ভিজ্জলক্ষণা| এবং মন্যতে- সংস্বেদজানাং মশকাদীনাং তথোদ্ভিজ্জানাং গণ্ডূপদাদীনাং চেতনানাং মাতাপিতরৌ ন বিদ্যেতে; ততস্তেষামচৈতন্যং স্যাত্, মাতাপিত্রোশ্চেতনকারণযোরভাবাদিতি||১১||

Adhikarana 10 (12) · Śloka 12

বিদ্যাত্ স্বাভাবিকং ষণ্ণাং ধাতূনাং যত্ স্বলক্ষণম্| সংযোগে চ বিযোগে চ তেষাং কর্মৈব কারণম্||১২||

স্বাভাবিকবাদিনো ভূতচৈতন্যপক্ষং দূষযতি- বিদ্যাদিত্যাদি| স্বভাবকৃতং স্বাভাবিকম্| ষণ্ণাং ধাতূনামিতি পৃথিব্যপ্তেজোবায্বাকাশাত্মনাম্, এষাং চ ধাতুত্বং শরীরধারণাজ্জগদ্ধারণাচ্চ| স্বলক্ষণম্ আত্মীযমব্যভিচারি লক্ষণং; তচ্চ পৃথিব্যাঃ কাঠিন্যাদি, অপাং দ্রবত্বাদি, তেজস উষ্ণত্বাদি, বাযোস্তির্যগ্গমনাদি, আকাশস্যাপ্রতিঘাতাদি আত্মনো জ্ঞানাদি; এতেন, এতদেব পরমেষাং লক্ষণং স্বাভাবিকং, ন তাবদাত্মরহিতানামেষাং চৈতন্যমপি স্বাভাবিকমস্তীতি দর্শযতি| ততশ্চ যত্ প্রত্যেকং ভূতানাং ন সম্ভবতি তন্মিলিতানামপি ন সম্ভবতি চৈতন্যং; যতো ভূতানামপি সংযোগাচ্চৈতন্যসম্ভবে বহূনি চেতনানি স্যুর্বাল্যাদ্যবস্থাভেদাত্, ততশ্চ জ্ঞাতৃভেদাত্ প্রতিসন্ধানানুপপত্তিরিতি ভাবঃ; আত্মসম্বন্ধেন তু চৈতন্যং সম্মতমেব, পরং তত্রাপি গর্ভোত্পত্তৌ ভূতানামাত্মসম্বন্ধে তথা মরণে ভূতানামাত্মনো বিযোগে কর্মৈব জন্মান্তরকৃতং কারণং, নান্যত্| তত্ ভূতসংযোগবিভাগকারণজন্মান্তরকৃতকর্মস্বীকারাত্ প্রেত্যভাবঃ স্বীকৃতো ভবতীতি ভাবঃ||১২||

Adhikarana 11 (13) · Śloka 13

অনাদেশ্চেতনাধাতোর্নেষ্যতে পরনির্মিতিঃ| পর আত্মা স চেদ্ধেতুরিষ্টোঽস্তু পরনির্মিতিঃ||১৩||

পরনির্মাণপক্ষং দূষযতি- অনাদেরিত্যাদি| অত্র পরনির্মাণপক্ষে শরীরস্যাত্মরহিতস্য পরেণ নির্মাণং বাঽভিপ্রেতং স্যাত্, আত্মনো বাঽপি পরেণ নির্মাণমভিপ্রেতং স্যাত্; আত্মনঃ পরনির্মাণং দূষযতি- অনাদেরিত্যাদি| নিত্যস্য চেতনাধাতোরিতি আত্মনঃ; নেষ্যতে নিত্যস্যোত্পাদককারণাভাবাদিতি ভাবঃ; নিত্যত্বং চাত্মনঃ শারীরে প্রতিপাদযিষ্যতি| অথ শরীরমাত্রস্য পরনির্মাণমভিপ্রেতং, তদনুমতমেব; পরেণাঽঽত্মনা ধর্মাধর্মসহাযেন তস্য ক্রিযমাণত্বাদিত্যাহ- পর ইত্যাদি| হেতুরিষ্ট ইতি শরীরোত্পাদে হেতুরিষ্ট ইত্যর্থঃ; অস্তু পরনির্মিতিরীদৃশী প্রেত্যভাবাবিরোধিনীতি ভাবঃ| এবং মন্যতে- পরেণৈশ্বর্যাদিগুণযুক্তেনাত্মবিশেষেণৈতচ্চেতনং শরীরং ক্রিযমাণং চেতনাহেতুভূতাতিরিক্তাত্মসম্বন্ধমন্তরা (চেতনাযুক্তং ) কর্তুং ন পার্যেত, ঘটাদিবদচেতনত্বপ্রসঙ্গাত্; চেতনাহেতুশ্চাত্মা নিত্যত্বেন ন ক্রিযতে, তস্মাচ্চেতনাহেতুনিত্যত্বেন জন্মান্তরসম্বন্ধিনমাত্মানং গৃহীত্বা শরীরং চেতনং পরঃ করোতীতি স্বীকরণীযম্; এবমপি চেশ্বরদরিদ্রাদিজগদ্বৈচিত্র্যদর্শনাদাত্মনো ধর্মাধর্মযোগবৈচিত্র্যং কল্পনীযং; তথাচ সত্যাত্মন এব ধর্মাধর্মসহাযতাঽবশ্যং স্বীকরণীযা, তস্মাত্ স এব শরীরাদ্যুত্পত্তৌ কারণমস্তু কিমপরেণেহাত্মবিশেষকল্পনেন; যদি বা, এবমাত্মন্যনেকজন্মসম্বন্ধিনি সংসারহেতুধর্মাধর্মগুণশালিনি সিদ্ধে অস্তু সোঽপ্যাত্মবিশেষঃ কারণম্, অতো ন কাচিত্ ক্ষতিরিতি||১৩||

Adhikarana 12 (14-15) · Śloka 15

ন পরীক্ষা ন পরীক্ষ্যং ন কর্তা কারণং ন চ| ন দেবা নর্ষযঃ সিদ্ধাঃ কর্ম কর্মফলং ন চ||১৪|| নাস্তিকস্যাস্তি নৈবাত্মা যদৃচ্ছোপহতাত্মনঃ| পাতকেভ্যঃ পরং চৈতত্ পাতকং নাস্তিকগ্রহঃ||১৫||

যদৃচ্ছাবাদিমতং দূষযতি- ন পরীক্ষেত্যাদি| যদৃচ্ছাবাদী খল্বেকমপি প্রমাণং নানুমন্যতে, ততশ্চ তস্যাপ্রামাণিকত্বাত্ প্রমাণং বিনৈব যত্কিঞ্চিদ্ব্রুবতো ন শ্রদ্ধেযং বচনং ভবতি, তস্মাদুপেক্ষণীয এবাযমিতি প্রকরণাভিপ্রাযঃ| যদৃচ্ছযা অপরিস্থিতপক্ষতযা, উপহত ইহলোকপরলোকানুপযুক্ত আত্মা যস্য স যদৃচ্ছোপহতাত্মা; তস্য পরীক্ষা নাস্তীতি পরীক্ষাহেতূনাং প্রমাণানামভাবাদিত্যর্থঃ; পরীক্ষ্যমপি নাস্তি, পরীক্ষকপ্রমাণাভাবাদেব; এবং কর্তাঽপি নাস্তি তত্কারণমপি নাস্তি, প্রমাণাস্বীকারাদিতি ভাবঃ; তথা সর্বজনসিদ্ধা দেবাদযোঽপি ন সন্তীত্যভিধানেন নাস্তিকস্য বর্জনীযত্বং দর্শযতি| পাতকেভ্যো ব্রহ্মাবধাদিভ্যঃ; পরং শ্রেষ্ঠং; নাস্তি পরলোক ইত্যাদিকো গ্রহো নাস্তিকগ্রহঃ; নাস্তিকবুদ্ধ্যা হ্যুচ্ছৃঙ্খলঃ পুরুষঃ সর্বমপি পাতকং করোতীতি ভাবঃ||১৪-১৫||

Adhikarana 13 (16) · Śloka 16

তস্মান্মতিং বিমুচ্যৈতামমার্গপ্রসৃতাং বুধঃ| সতাং বুদ্ধিপ্রদীপেন পশ্যেত্সর্বং যথাতথম্||১৬||

নাস্তিকতাপরিত্যাগেন যথাকর্তব্যতামাহ- তস্মাদিত্যাদি| এতামিতি নাস্তিকবুদ্ধিম্| অমার্গে অধর্মে প্রসৃতা অমার্গপ্রসৃতা| বুদ্ধিরেব প্রদীপো বুদ্ধিপ্রদীপঃ, তেন প্রত্যক্ষাদিপ্রমাণেন পশ্যেদিত্যর্থঃ| যথাতথমিতি যথাস্বরূপম্||১৬||

Adhikarana 14 (17) · Śloka 17

দ্বিবিধমেব খলু সর্বং সচ্চাসচ্চ; তস্য চতুর্বিধা পরীক্ষা- আপ্তোপদেশঃ, প্রত্যক্ষম্, অনুমানং, যুক্তিশ্চেতি||১৭||

সম্প্রতি পরপক্ষং দূষযিত্বা স্বপক্ষপরলোকসাধনানি প্রমাণান্যবতারযতি- দ্বিবিধমিত্যাদি| সর্বমিতি যত্কিঞ্চিত্ প্রমাণপ্রতীযমানং, তদ্দ্বিবিধং; তদ্দ্বৈবিধ্যমাহ- সচ্চাসচ্চ; সদিতি বিধিবিষযপ্রমাণগম্যং ভাবরূপম্, অসদিতি নিষেধবিষযপ্রমাণগম্যমভাবরূপম্| পরীক্ষ্যতে ব্যবস্থাপ্যতে বস্তুস্বরূপমনযেতি পরীক্ষা প্রমাণানি, আপ্তোপদেশাদয উত্তরগ্রন্থে স্ফুটা ভবিষ্যন্তি||১৭||

Adhikarana 15 (18-19) · Śloka 19

আপ্তাস্তাবত্- রজস্তমোভ্যাং নির্মুক্তাস্তপোজ্ঞানবলেন যে| যেষাং ত্রিকালমমলং জ্ঞানমব্যাহতং সদা||১৮|| আপ্তাঃ শিষ্টা বিবুদ্ধাস্তে তেষাং বাক্যমসংশযম্| সত্যং, বক্ষ্যন্তি তে কস্মাদসত্যং নীরজস্তমাঃ ||১৯||

আপ্তোপদেশং দর্শযিতুমাপ্তমেব তাবদাহ- আপ্তা ইত্যাদি| নিঃশেষেণ মুক্তা নির্মুক্তাঃ| তপোজ্ঞানবলেনেতি রজস্তমোনির্মুক্তৌ কারণত্বেন যোজনীযম্| ত্রিকালমিতি অতীতানাগতবর্তমানবিষযম্| অমলমিতি যথার্থগ্রাহিত্বেন| অব্যাহতমিতি ক্বচিদপি বিষযেঽকুণ্ঠিতশক্তিত্বেন| আপ্তী রজস্তমোরূপদোষক্ষযঃ, তদ্যুক্তা আপ্তাঃ ; শাসতি জগত্কৃত্স্নং কার্যাকার্যপ্রবৃত্তিনিবৃত্ত্যুপদেশেনেতি শিষ্টাঃ; বোদ্ধব্যং বিশেষেণ বুদ্ধমেতৈরিতি বিবুদ্ধাঃ; আপ্তাঃ, শিষ্টাঃ, বিবুদ্ধা ইতি সঞ্জ্ঞাত্রযেণাপ্তানাং লোকে প্রসিদ্ধিং দর্শযতি; তেষামাপ্তানাং বাক্যমসংশযং নিশ্চিতং সত্যং যথার্থমিত্যর্থঃ| তদ্বাক্যসত্যত্বে হেতুমাহ- বক্ষন্তি তে কস্মাদসত্যং নীরজস্তমা ইতি| নীরজস্তমা ইতি তমপ্প্রত্যযান্তঃ শব্দঃ, তেন নীরজস্ত্বপ্রকর্ষেণ তমোঽপি ব্যুদস্তং ভবতি; ন হি সর্বথা নীরজস্কে পুরুষে তমো ভবতি; যদুক্তং- “নারজস্কং তমঃ” (বি.অ.৬) ইতি| বক্ষন্তি তে কস্মাদসত্যং ন কস্মাদপীত্যর্থঃ; অসত্যং মিথ্যাজ্ঞানাদ্বাঽভিধীযতে, সম্যগ্জ্ঞানে সত্যপি রাগদ্বেষাভ্যাং বাঽভিধীযতে, তচ্চ ত্রিতযমপি মিথ্যাজ্ঞানরাগদ্বেষরূপং রজস্তমোনির্মুক্তে সত্ত্বগুণোদ্রেকাদমলবিজ্ঞানে ন সম্ভবতীত্যর্থঃ; যদি বা ‘নীরজস্তমসো মৃষা’ ইতি পাঠঃ সুগমঃ| এতচ্চাপ্তলক্ষণং সহজাপ্তব্রহ্মাদ্যভিপ্রাযেণ, লৌকিকানাং তু পুরুষাণামাপ্তত্বং প্রতিবিষযসম্যগ্জ্ঞানসম্ভবনে তদ্বিষযরাগদ্বেষাসম্ভবেন চ বোদ্ধব্যম্; এতেন, আপ্তোপদেশ ইতি শব্দরূপপ্রমাণলক্ষণমুক্তং ভবতি; বুদ্ধিপ্রমাণপক্ষে তু, আপ্তোপদেশজনিতা বুদ্ধিঃ প্রমাণমিতি বোদ্ধব্যম্||১৮-১৯||

Adhikarana 16 (20) · Śloka 20

আত্মেন্দ্রিযমনোর্থানাং সন্নিকর্ষাত্ প্রবর্ততে| ব্যক্তা তদাত্বে যা বুদ্ধিঃ প্রত্যক্ষং স নিরুচ্যতে||২০||

প্রত্যক্ষলক্ষণমাহ- আত্মেন্দ্রিযেত্যাদি| সন্নিকর্ষাদিতি সম্বন্ধাত্; স চ সম্বন্ধঃ- সংযোগঃ, সমবাযঃ, সংযুক্তসমবাযঃ, সংযুক্তসমবেতসমবাযঃ, সমবেতসমবাযঃ, বিশেষণবিশেষ্যভাবলক্ষণো বোদ্ধব্যঃ| ব্যক্তা ইত্যনেন ব্যভিচারিণীমযথার্থবুদ্ধিং সংশযং চ নিরাকরোতি| তদাত্বে তত্ক্ষণম্; অনেন চ প্রত্যক্ষজ্ঞানানন্তরোত্পন্নানুমানজ্ঞানং স্মরণং চ পরম্পরযাঽঽত্মেন্দ্রিযমনোর্থসন্নিকর্ষজং ব্যবচ্ছিনত্তি; আত্মাদিচতুষ্টযসন্নিকর্ষাভিধানং চ প্রত্যক্ষকারণাভিধানপরং; তেন, ‘ইন্দ্রিযার্থসন্নিকর্ষাত্ প্রবর্ততে যা’ ইত্যেতাবদেব লক্ষণং বোদ্ধব্যম্; এতেন সুখাদিবিষযমপি প্রত্যক্ষং গৃহীতং ভবতি; তত্র হি চতুষ্টযসন্নিকর্ষো নাস্তি, আত্মসন্নিকর্ষস্তু প্রমাণজ্ঞানসাধারণত্বেনৈব লক্ষণানুপযুক্তঃ | ইহ চ প্রত্যক্ষফলরূপাঽপি বুদ্ধিঃ প্রত্যক্ষশব্দেনাভিধীযতে, তথৈব লোকব্যবহারাত্; পরমার্থতস্তু যতো ভবতীন্দ্রিযাদেরীদৃশী বুদ্ধিস্তত্ প্রত্যক্ষম্||২০||

Adhikarana 17 (21-22) · Śloka 22

প্রত্যক্ষপূর্বং ত্রিবিধং ত্রিকালং চানুমীযতে| বহ্নির্নিগূঢো ধূমেন মৈথুনং গর্ভদর্শনাত্||২১|| এবং ব্যবস্যন্ত্যতীতং বীজাত্ ফলমনাগতম্| দৃষ্ট্বা বীজাত্ ফলং জাতমিহৈব সদৃশং বুধাঃ||২২||

অনুমানস্বরূপমাহ- প্রত্যক্ষেত্যাদি| প্রত্যক্ষগ্রহণং ব্যাপ্তিগ্রাহকপ্রমাণোপলক্ষণার্থং, তেন প্রত্যক্ষপূর্বমিতি ব্যাপ্তিগ্রাহকপ্রমাণপূর্বকম্| ত্রিবিধমিত্যনেনানুমানত্রৈবিদ্ধ্যং দর্শযতি; তেন, কার্যাত্ কারণানুমানং, যথা- গর্ভদর্শনান্মৈথুনানুমানং; তথা কারণাত্ কার্যানুমানং, যথা- বীজাত্ সহকারিকারণান্তরযুক্তাত্ ফলানুমানং; তথাঽকার্যকারণভূতানাং চ সামান্যতো দর্শনাদনুমানং, যথা- ধূমাদ্বর্তমানক্ষণসম্বন্ধাদগ্ন্যনুমানম্; এতত্ত্রিবিধমনুমানং গৃহীতং ভবতি| ত্রিকালমিত্যনেন ত্রিকালবিষযত্বমনুমানস্য দর্শযতি| অনুমীযতে ইত্যত্র ‘যেন তদনুমানম্’ ইতি বাক্যশেষঃ| তেন, ব্যাপ্তিগ্রহণাদনু অনন্তরং মীযতে সম্যঙ্নিশ্চীযতে পরোক্ষার্থো যেন তদনুমানং, ব্যাপ্তিস্মরণসহাযলিঙ্গদর্শনমিত্যর্থঃ| ত্রিবিধমিতি যদুক্তং তস্যোদাহরণং দর্শযতি- বহ্নিরিত্যাদি| এতচ্চ ব্যাকৃতমেব | নিগূঢঃ অদৃশ্যমানঃ| এবং ব্যবস্যন্ত্যতীতমিতি ব্যবচ্ছেদঃ| বীজাদিতি সহকারিকারণান্তরজলকর্ষণাদিযুক্তাদিতি বোদ্ধব্যম্| অনাগতং ফলং সদৃশং ব্যবস্যন্তীতি সম্বন্ধঃ| দৃষ্ট্বা বীজাত্ ফলং জাতমিত্যনেন বীজফলযোঃ কারণকার্যলক্ষণাং ব্যাপ্তিং দর্শযতি; যদ্যপি চ কারণং কার্যং ব্যভিচরতি, যতো নাবশ্যং বীজসদ্ভাবে ফলং ভবতি, তথাঽপি সহকারিকারণান্তরযুক্তং বীজং ফলং ন ব্যভিচরতীত্যভিপ্রাযো বোদ্ধব্যঃ; কারণসামগ্রী চ কার্যং ন ব্যভিচরত্যেব||২১-২২||

Adhikarana 18 (23-24) · Śloka 24

জলকর্ষণবীজর্তুসংযোগাত্ সস্যসম্ভবঃ| যুক্তিঃ ষড্ধাতুসংযোগাদ্গর্ভাণাং সম্ভবস্তথা||২৩|| মথ্যমন্থন(ক)মন্থানসংযোগাদগ্নিসম্ভবঃ| যুক্তিযুক্তা চতুষ্পাদসম্পদ্ব্যাধিনিবর্হণী||২৪||

যুক্তেঃ প্রমাণস্যান্যশাস্ত্রপ্রসিদ্ধত্বেনোদাহরণান্যেব তাবদ্দর্শযতি, উদাহরণে জ্ঞাতে যুক্তের্লক্ষণং সুখেন জ্ঞাযতে ইত্যভিপ্রাযেণ- জলকর্ষণেত্যাদি| কর্ষণশব্দেন কর্ষণসংস্কৃতা ভূমির্গৃহ্যতে, জলকর্ষণবীজর্তুসংযোগাত্ সস্যস্য সম্ভবো ভবতীতি যজ্জ্ঞানং তদ্যুক্তিরিতি যোজনীযম্| ষড্ধাতুসংযোগাত্ পঞ্চমহাভূতাত্মসংযোগাত্| তথাশব্দো যুক্তিরিত্যাকর্ষতি| মথ্যং মন্থনকাষ্ঠযন্ত্রকং, কাষ্ঠং মন্থনং, মন্থানং কাষ্ঠভ্রামণং; কিংবা ‘মন্থক’ ইতি পাঠঃ, তত্র মন্থানং ভ্রাম্যমাণকাষ্ঠং; সংযোগান্মেলকাদিতি বোদ্ধব্যং, যতো মন্থনস্য ক্রিযারূপস্য সংযোগো ন সঙ্গচ্ছতে; কিংবা মন্থনশব্দেন মন্থনরজ্জুরুচ্যতে| যুজ্যতে সম্বধ্যতেঽনযেতি যুক্তিঃ, তযা যুক্তা যুক্তিযুক্তা| চতুষ্পাদ ইতি বক্তব্যে সম্পদ্গ্রহণং গুণবচ্চতুষ্পাদগ্রহণার্থম্||২৩-২৪||

Adhikarana 19 (25) · Śloka 25

বুদ্ধিঃ পশ্যতি যা ভাবান্ বহুকারণযোগজান্| যুক্তিস্ত্রিকালা সা জ্ঞেযা ত্রিবর্গঃ সাধ্যতে যযা||২৫||

সম্প্রতি যুক্তের্লক্ষণমাহ- বুদ্ধিরিত্যাদি| যা বুদ্ধির্ভাবান্ পশ্যতি বিষযীকরোতি, বহুকারণযোগো বহূপপত্তিযোগঃ, জনিশ্চাযং জ্ঞানার্থে, তেন বহূপপত্তিযোগজ্ঞাযমানানর্থান্ যা বুদ্ধিঃ পশ্যতি ঊহলক্ষণা সা যুক্তিরিতি প্রমাণসহাযীভূতা| এবমনেন ভবিতব্যমিত্যেবংরূপ ঊহোঽত্র যুক্তিশব্দেনাভিধীযতে; সা চ পরমার্থতোঽপ্রমাণভূতাঽপি বস্তুপরিচ্ছেদে প্রমাণসহাযত্বেন ব্যাপ্রিযমাণত্বাত্, তথা তযৈব ঊহরূপযা প্রাযো লোকানাং ব্যবহারাদিহ প্রমাণত্বেনোক্তা| অত এব প্রদেশান্তরে যুক্তিং বিনা যথোক্তং প্রমাণত্রযং দর্শযিষ্যতি- “ত্রিবিধা বা (পরীক্ষা) সহোপদেশেন” (বি. অ.৪) ইতি বচনাত্| তথা, উপমানং গৃহীত্বা রোগভিষগ্জিতীযে শব্দাদীনি চত্বারি প্রমাণান্যভিধাস্যতি| ত্রিকালা বর্তমানাতীতানাগতবিষযা; ত্রিকালবিষযত্বং চাস্যাস্ত্রিকালানুমানবিষযোপদেশকত্বেনৈব| ত্রিবর্গসাধকত্বং চ ত্রিবর্গসাধনাদেব, ঊহেনৈব হি প্রাযস্ত্রিবর্গানুষ্ঠানে প্রবৃত্তির্ভবতি; (প্রমাণপরিচ্ছেদেন তু প্রচারো বিরল এব|) যত্তু বহুকারণজলকর্ষণবীজর্তুসংযোগাদ্ভাবিসস্যজ্ঞানং যুক্তিরুচ্যতে, তচ্চানুমানান্নার্থান্তরভূতং; তত্রানুমানাদ্ভেদো দুষ্কর ইতি নাদ্রিযামহে; কিঞ্চ কারণেভ্যঃ কার্যং প্রতীযমানং ন কদাঽপি বর্তমানং প্রতীযতে, ততশ্চ ত্রিকালেতি পরাহতং স্যাত্| অত্র শান্তরক্ষিতকমলশীলাভ্যাং যুক্তিপ্রমাণান্তরস্বীকারে পূর্বপক্ষসিদ্ধান্তাবুক্তৌ- “যস্মিন্ সতি ভবত্যেব ন ভবত্যসতীতি চ| তস্মাদতো ভবত্যেতদ্যুক্তিরেষাঽভিধীযতে|| প্রমাণান্তরমেবেদমিত্যাহ চরকা মুনিঃ| নানুমানমিযং যস্মাদ্দৃষ্টান্তোঽত্র ন বিদ্যতে” (ত.সং.কা.১৬৯২-৯৩) ইতি| এতচ্ছান্তরক্ষিতবচনং কমলশীলেন ব্যাখ্যাতং- “তদ্ভাবভাবিত্বেন যা তত্কার্যতাপ্রতীতিরিযং যুক্তিঃ; ইযং চ সবিকল্পত্বান্ন প্রত্যক্ষং; নাপ্যনুমানং দৃষ্টান্তাভাবাত্, তথাহি- দৃষ্টান্তোঽপি- অত এব তদ্ভাবভাবিত্বাত্তত্কার্যতাপ্রতিপত্তিঃ, তত্রাপি দৃষ্টান্তোঽন্যোঽন্বেষণীযঃ , তত্রাপ্যপর ইত্যনবস্থা স্যাত্; তস্মাত্ প্রমাণান্তরং যুক্তিরিত্যাহ চরকো বৈদ্যঃ; এবং পূর্বপক্ষমুত্থাপ্য দূষিতং যত্- “কার্যকারণভাবস্য প্রতিপত্তির্ন সঙ্গতা| তস্মাদস্যাং ন ভেদোঽস্তি সাধ্যসাধনযোর্যতঃ|| তদ্ভাবব্যবহারে তু যোগ্যতাযাঃ প্রসাধনে| সঙ্কেতকালবিজ্ঞাতো বিদ্যতেঽর্থো নিদর্শনম্” (ত.সং.কা.১৬৯৬-৪৮)| এতদ্ব্যাখ্যাতং কমলশীলেন- “যুক্তৌ ন সাধ্যসাধনযোর্ভেদঃ; তথাহি- অত্র তদ্ভাবভাবিতা হেতুঃ, কার্যকারণতা চ সাধ্যা, ন চানযোর্ভেদ উপলভ্যতে পর্যাযত্বাত্তরুপাদপবত্; অথ মতং- ন কার্যকারণতা সাধ্যতে কিন্তর্হি তদ্ভাবব্যবহার ইতি, তত্রাহ- তদ্ভাবব্যবহারে ইত্যাদি; তস্যা হেতুফলতাযা ভাবস্তদ্ভাবঃ, তত্র ব্যবহারো যঃ স তদ্ভাবব্যবহারঃ জ্ঞানাভিধানপ্রবৃত্তিলক্ষণমনুষ্ঠানং, তস্মিন্ যোগ্যতা মূঢং প্রতি সাধ্যতে; যে যদ্ব্যাপারানন্তরনিযতোপলম্ভস্বভাবাস্তে তত্কার্যব্যবহারযোগ্যাঃ, তদ্যথা- সঙ্কেতকালানুভূতাঃ কুলালাদিব্যাপারানন্তরোপলম্ভস্বভাবা ঘটাদযঃ; তথা চ তাল্বাদিব্যাপারানন্তরনিযতোপলম্ভস্বভাবাঃ শব্দা ইতি স্বভাবো হেতুঃ; ততশ্চ স দৃষ্টান্তত্বাদনুমানাদভেদো যুক্তেঃ”| এতৌ চ পূর্বপক্ষসিদ্ধান্তৌ এবম্ভূতযুক্ত্যস্বীকারাদেবাপ্রতিবিধেযৌ ||২৫||

Adhikarana 20 (26) · Śloka 26

এষা পরীক্ষা নাস্ত্যন্যা যযা সর্বং পরীক্ষ্যতে| পরীক্ষ্যং সদসচ্চৈবং তযা চাস্তি পুনর্ভবঃ||২৬||

উপসংহরতি- এষেত্যাদি| নাস্ত্যন্যেতিবচনেনার্থাপত্ত্যসম্ভবাদীনামন্যতন্ত্রমতানাং প্রমাণানাং নিষেধং করোতি| প্রস্তুতে পরীক্ষাং প্রযোজযতি- তযা চাস্তি উপলভ্যতে চ পুনর্ভব ইতি||২৬||

Adhikarana 21 (27) · Śloka 27

তত্রাপ্তাগমস্তাবদ্বেদঃ , যশ্চান্যোঽপি কশ্চিদ্বেদার্থাদবিপরীতঃ পরীক্ষকৈঃ প্রণীতঃ শিষ্টানুমতো লোকানুগ্রহপ্রবৃত্তঃ শাস্ত্রবাদঃ, স চাঽঽপ্তাগমঃ; আপ্তাগমাদুপলভ্যতেদানতপোযজ্ঞসত্যাহিংসাব্রহ্মচর্যাণ্যভ্যুদযনিঃশ্রেযসকরাণীতি||২৭||

তত্র শব্দস্য পুনর্ভবপ্রতিপাদকত্বং দর্শযতি- তত্রাঽঽপ্তাগম ইত্যাদি| প্রথমং বেদং প্রদর্শযন্ বেদস্য নিরস্তবিভ্রমাশঙ্কং প্রামাণ্যং দর্শযতি, যশ্চান্যোঽপীত্যনেন গ্রন্থেন বেদার্থাবিপরীতত্বাদিভির্হেতুভিঃ পরিচ্ছেদনীযপ্রামাণ্যাযুর্বেদস্মৃতিশাস্ত্রাদীনি দর্শযতি| শাস্ত্ররূপো বাদঃ শাস্ত্রবাদঃ| আপ্তাগমাদিতি বেদাত্| যজ্ঞঃ অগ্নিষ্টোমাদিঃ; ব্রহ্মাচর্যম্ উপস্থসংযমাদি| অভ্যুদযঃ স্বর্গঃ, নিঃশ্রেযসং মোক্ষঃ; অত্র যথাযোগ্যতযা স্বর্গস্য মোক্ষস্য চ কারণমিতি বোদ্ধব্যম্| এতেন জন্মান্তরভোগ্যস্বর্গানেকজন্মলভ্যমোক্ষোপদেশেনাত্মনঃ পরলোকঃ কথিতো ভবতীতি ভাবঃ||২৭||

Adhikarana 22 (28) · Śloka 28

ন চানতিবৃত্তসত্ত্বদোষাণামদোষৈরপুনর্ভবো ধর্মদ্বারেষূপদিশ্যতে||২৮||

আগমান্তরমাহ- ন চেত্যাদি| অনতিবৃত্তৌ অবনুপশান্তৌ সত্ত্বদোষৌ মনোদোষৌ রজস্তমোরূপৌ যেষাং তে তথা, তেষাম্; পুনর্ভবো মোক্ষঃ, ধর্মদ্বারেষু ধর্মশাস্ত্রেষু, অদোষৈঃ নির্মনোদোষৈর্মহর্ষিভিঃ, উপদিশ্যতে ন, ইতি সম্বন্ধঃ; তেন পুনর্ভব উপদিশ্যতে ইত্যর্থঃ||২৮||

Adhikarana 23 (29) · Śloka 29

ধর্মদ্বারাবহিতৈশ্চ ব্যপগতভযরাগদ্বেষলোভমোহমানৈর্ব্রহ্মপরৈরাপ্তৈঃ কর্মবিদ্ভিরনুপহতসত্ত্ববুদ্ধিপ্রচারৈঃ পূর্বৈঃ পূর্বতরৈর্মহর্ষিভির্দিব্যচক্ষুভির্দৃষ্ট্বোপদিষ্টঃ পুনর্ভব ইতি ব্যবস্যেদেবম্ ||২৯||

আগমান্তরমৃষিবচনমাহ- ধর্মদ্বারেত্যাদি| ব্রহ্মা অধ্যাত্মজ্ঞানং, তত্পরৈঃ| কর্মবিদ্ভিঃ অনুষ্ঠাতব্যযাগাদিকর্মবিদ্ভিঃ| অনুপহতসত্ত্বগুণো বুদ্ধেঃ প্রচারো বোধলক্ষণো যেষাং তে তথা, এতেন বিশুদ্ধবুদ্ধিত্বং দর্শযতি| দিব্যমতীন্দ্রিযার্থদর্শি চক্ষুঃ সমাধিরূপং জ্ঞানং যেষাং তে দিব্যচক্ষুষঃ, তৈঃ| দৃষ্ট্বোপদিষ্টঃ স্বযমনুভূয কথিত ইত্যর্থঃ| ইতিশব্দো হেতৌ| এবমিতি আগমেন||২৯||

Adhikarana 24 (30) · Śloka 30

প্রত্যক্ষমপি চোপলভ্যতে- মাতাপিত্রোর্বিসদৃশান্যপত্যানি, তুল্যসম্ভবানাং বর্ণস্বরাকৃতিসত্ত্ববুদ্ধিভাগ্যবিশেষাঃ, প্রবরাবরকুলজন্ম, দাস্যৈশ্বর্যং, সুখাসুখমাযুঃ, আযুষো বৈষম্যম্, ইহ কৃতস্যাবাপ্তিঃ, অশিক্ষিতানাং চ রুদিতস্তনপানহাসত্রাসাদীনাং প্রবৃত্তিঃ, লক্ষণোত্পত্তিঃ, কর্মসাদৃশ্যে ফলবিশেষঃ, মেধা ক্বচিত্ ক্বচিত্ কর্মণ্যমেধা, জাতিস্মরণম্- ইহাগমনমিতশ্চ্যুতানামিতি , সমদর্শনে প্রিযাপ্রিযত্বম্||৩০||

প্রত্যক্ষং চ যদ্যপি পুনর্ভবং ন গৃহ্ণাতি, তথাঽপি তত্ পুনর্ভবগ্রাহকানুমানস্য লিঙ্গগ্রহণে যথা ব্যাপ্রিযতে তথা দর্শযতি- প্রত্যক্ষমপীত্যাদি| বিসদৃশানীতি কশ্চিত্ কুরূপঃ, কশ্চিত্ সুরূপঃ| তুল্যসম্ভবানাং তুল্যোত্পাদকারণানাং কশ্চিদ্গৌরঃ কশ্চিত্ কৃষ্ণঃ, এবং স্বরাদাবপি বিশেষো বোদ্ধব্যঃ| দাস্যৈশ্বর্যমিতি কস্যচিদ্দাস্যং কস্যচিদৈশ্বর্যম্| এবমপরত্রাপি বিপর্যযঃ পুরুষভেদেন বোদ্ধব্যঃ| সুখাসুখমিতি আযুষো বিশেষণম্| রুদিতাদযোঽমী অব্যুত্পন্নবালগোচরতযা বোদ্ধব্যাঃ; এতে চ রুদিতাদযো যথাযোগমিষ্টানিষ্টস্মরণমন্তরা ন ভবন্তি, স্মরণং চ পূর্বজ্ঞানং বিনা ন ভবতীতি পূর্বজন্মজ্ঞানানুমানাত্ পরলোকানুমাযকা ভবন্তি| পূর্বপ্রতিপাদিতং চ বিসদৃশত্বাদিবৈচিত্র্যমুত্তরত্র প্রতিপাদনীযং চ লক্ষণোত্পত্ত্যাদিকারণান্তরাদর্শনে সতি পূর্বজন্মকৃতকারণানুমাযকমিতি পরলোকানুমাযকং মন্তব্যম্| লক্ষণোত্পত্তিরিতি সামুদ্রকলক্ষণপ্রতিপাদিতলক্ষণোত্পত্তিঃ| কর্মসাদৃশ্যে সেবাদিসাদৃশ্যে| মেধা ক্বচিত্ কর্মণি চিত্রলেখনাস্ত্রবিদ্যাদৌ| জাতেরতীতাযাঃ স্মরণং জাতিস্মরণং; তদেব স্মরণং দর্শযতি- ইহাগমনমিতশ্চ্যুতানামিতি; ইহ কুলে জাতোঽস্মি, ইতশ্চ কুলাদাগতোঽস্মীত্যেবমাকারং জাতিস্মরণমিত্যর্থঃ যদি বা, ইহ জন্মনি চ্যুতানামিহ জন্মনি পুনরাগমনম্, অনেন চ নামভ্রান্ত্যা যমপুরুষৈর্নীতস্য পুনরাগমনং দৃশ্যতে| সমদর্শনে তুল্যাকারে ক্বচিত্ পুরুষে প্রিযত্বং ক্বচিত্ পুনরপ্রিযত্বমিতি সমদর্শনে প্রিযাপ্রিযত্বম্| অত্র চাবান্তরানুমানভেদো বিস্তরভযান্ন দর্শিতঃ||৩০||

Adhikarana 25 (31) · Śloka 31

অত এবানুমীযতে- যত্- স্বকৃতমপরিহার্যমবিনাশি পৌর্বদেহিকং দৈবসঞ্জ্ঞকমানুবন্ধিকং কর্ম, তস্যৈতত্ ফলম্; ইতশ্চান্যদ্ভবিষ্যতীতি; ফলদ্বীজমনুমীযতে, ফলং চ বীজাত্||৩১||

এবং প্রত্যক্ষেণ লিঙ্গগ্রহণং দর্শযিত্বাঽনুমানমাহ- অত এবেত্যাদি| স্বকৃতম্ আত্মনা কৃতম্| অবিনাশীতি উপভোগং বিনাঽবিনাশি| পৌর্বদেহিকং পূর্বদেহকৃতম্| জন্মান্তরাণ্যনুগচ্ছতীত্যানুবন্ধিকম্| এতত্ফলমিতি বিসদৃশাপত্যোত্পাদাদি ফলম্; এতচ্চ সঙ্ক্ষেপাদ্ব্যুত্পাদিতমেব| ইতশ্চেতি ইহ জন্মনি কৃতাত্ কর্মণঃ, অন্যদিতি ভাবিজন্মান্তরং, ভবিষ্যতীত্যনুমীযত ইতি সম্বন্ধঃ| কথমনুমীযতে ইত্যাহ- ফলাদিত্যাদি| ফলাত্ ফলসদৃশাপত্যদর্শনাত্ , বীজং পূর্বজন্মকৃতং কর্মাদিকারণমনুমীযতে; তথা ফলং চ ভাবিজন্মান্তরে সুখদুঃখাদি, বীজাদিহজন্মকৃতাত্ কর্মণোঽনুমীযত ইতি যোজনা||৩১||

Adhikarana 26 (32) · Śloka 32

যুক্তিশ্চৈষা- ষড্ধাতুসমুদযাদ্গর্ভজন্ম, কর্তৃকরণসংযোগাত্ ক্রিযা; কৃতস্য কর্মণঃ ফলং নাকৃতস্য, নাঙ্কুরোত্পত্তিরবীজাত্; কর্মসদৃশং ফলং, নান্যস্মাদ্বীজাদন্যস্যোত্পত্তিঃ; ইতি যুক্তিঃ||৩২||

তর্করূপযুক্তিবিষযতাং পরলোকস্য দর্শযতি- যুক্তিশ্চৈষেত্যাদি| ষড্ধাতুসমুদাযাদ্গর্ভজন্মেতি বদতা আত্মসম্বন্ধমন্তরা চেতনা গর্ভস্য নোত্পদ্যতে, আত্মা চ পরলোকসম্বন্ধ এবেতি পরলোকসদ্ভাবে যুক্তিরুপদর্শ্যতে| কর্তৃকরণসংযোগাত্ ক্রিযেতি আত্মানং কর্তারং বিনা ক্রিযা পরিদৃশ্যমানা যাগাদিলক্ষণা ন ভবতীতি| আত্মন ঊহং দর্শযতি- কৃতস্যেত্যাদিনাঽবীজাদিত্যন্তেন| পরিদৃশ্যমানদাস্যৈশ্বর্যাদিফলেন জন্মান্তরকৃতস্য কর্মণঃ কারণভাবং দর্শযতি| কর্মসদৃশং ফলমিতি পূর্বকৃতশুভকর্মণঃ শুভং পুত্রধনাদি ফলম্| অত্র দৃষ্টান্তমাহ- নান্যস্মাদিত্যাদি| নান্যবীজাত্ শালিবীজাদন্যস্য যবাঙ্কুরস্যোত্পত্তিরিত্যর্থঃ| যুক্তিমুপসংহরতি- ইতি যুক্তিরিতি| অত্র বহুবক্তব্যে প্রমেযে তথাবিধোপযোগাভাবাদ্বিস্তরভযাচ্চ বিস্তরো ন কৃতঃ||৩২||

Adhikarana 27 (33) · Śloka 33

এবং প্রমাণৈশ্চতুর্ভিরুপদিষ্টে পুনর্ভবে ধর্মদ্বারেষ্ববধীযেত; তদ্যথা- গুরুশুশ্রূষাযামধ্যযনে ব্রতচর্যাযাং দারক্রিযাযামপত্যোত্পাদনে ভৃত্যভরণেঽতিথিপূজাযাং দানেঽনভিধ্যাযাং তপস্যনসূযাযাং দেহবাঙ্মানসে কর্মণ্যক্লিষ্টে দেহেন্দ্রিযমনোর্থবুদ্ধ্যাত্মপরীক্ষাযাং মনঃসমাধাবিতি; যানি চান্যান্যপ্যেবংবিধানি কর্মাণি সতামবিগর্হিতানি স্বর্গ্যাণি বৃত্তিপুষ্টিকরাণি বিদ্যাত্তান্যারভেত কর্তুং; তথা কুর্বন্নিহ চৈব যশো লভতে প্রেত্য চ স্বর্গম্| ইতি তৃতীযা পরলোকৈষণা ব্যাখ্যাতা ভবতি||৩৩||

সম্প্রতি পরলোকং ব্যুত্পাদ্য তদুপযুক্তধর্মসাধনান্যাহ- এবমিত্যাদি| ধর্মদ্বারেষু ধর্মসাধনদ্বারেষু| ইহ চাতিথিপূজাদীনি সদ্বৃত্তোক্তান্যপি প্রকরণপ্রাপ্তত্বেনোদাহরণার্থং পুনরভিধীযন্তে| দেহাদিপরীক্ষাযামবধীযেতেতি বচনাদবধানোপদর্শনেন দেহাদীনাং ক্ষযিত্বাদি ধর্মনিরূপণেনোপজাযমানাং মতিং বিষযানভিষঙ্গং চ জাযমানমিচ্ছন্তি| বিষযেষু প্রসক্তিং মনসো বারযিত্বাঽঽত্মনি সমাধানং মনঃসমাধিঃ| অত্র চ সর্বত্র ‘অবধীযেত’ ইতি সম্বন্ধঃ| স্বর্গ্যাণি স্বর্গহিতানি স্বর্গকরাণীতি যাবত্| বৃত্তের্ধনস্য পুষ্টিঃ বৃত্তিপুষ্টিঃ, ধর্মৈষণাযাং চ বৃত্তিপুষ্টিকরাভিধানং ধর্মহেতূনাং বৃত্তিহেত্ববিরোধেনাচরণোপদেশার্থম্| যশো লভতে ধার্মিকোঽযমিত্যেবমাদিখ্যাতিরূপম্| পরলৌকৈষণা তৃতীযৈব, ততশ্চ পুনস্তৃতীযেতি পদং ধর্মস্য প্রাণধনকারণত্বেন ধর্মৈষণাযাঃ প্রাণধনৈষণাত্বপ্রসক্তিপ্রতিষেধার্থম্||৩৩||

Adhikarana 28 (34) · Śloka 34

অথ খলু ত্রয উপস্তম্ভাঃ, ত্রিবিধং বলং, ত্রীণ্যাযতনানি, ত্রযো রোগাঃ, ত্রযো রোগমার্গাঃ, ত্রিবিধা ভিষজঃ, ত্রিবিধমৌষধমিতি||৩৪||

সম্প্রতি ত্রিসঙ্খ্যাবচ্ছিন্নোপোদ্ধাতেনান্যান্যপি ত্রিসঙ্খ্যাবচ্ছিন্নানি স্বস্থাতুরহিতত্বেনেহ বক্তব্যান্যাহ- অথ খল্বিত্যাদি| প্রথমমুপস্তম্ভা অভিধীযন্তে মূলভূতশরীরধারকত্বেন, তদনু বলমুপস্তম্ভাহারাদিজন্যত্বাত্, তদনু রোগাযতনানি বলবিরোধকর্তৃত্বেন, তদনু রোগাস্তজ্জন্যত্বেন, তদনু তন্মার্গজ্ঞানং সুবিন্যস্তমেব, তদনু রোগপ্রতিষেধার্থং প্রধানকারণবৈদ্যাভিধানং, তদনু তদুপকরণত্বেন ভৈষজ্যম্||৩৪||

Adhikarana 29 (35) · Śloka 35

ত্রয উপস্তম্ভা ইতি- আহারঃ, স্বপ্নো, ব্রহ্মচর্যমিতি; এভিস্ত্রিভির্যুক্তিযুক্তৈরুপস্তব্ধমুপস্তম্ভৈঃ শরীরং বলবর্ণোপচযোপচিতমনুবর্ততে যাবদাযুঃসংস্কারাত্ সংস্কারমহিতমনুপসেবমানস্য , য ইহৈবোপদেক্ষ্যতে||৩৫||

অন্যেন স্তভ্যমানং ধার্যমাণমুপ সমীপং প্রধানকারণস্য গত্বা স্তম্ভযতি ধারযতীত্যুপস্তম্ভঃ; যথা গৃহধারণনিযুক্তপ্রধানস্তম্ভসমীপবর্তী তদ্বলাধাযক উপস্তম্ভঃ, তথেহাপি শরীরস্যাযুঃসম্প্রবর্তকেন কর্মণা ধ্রিযমাণস্যাহারাদযো ধারকত্বেনোপস্তম্ভা ইত্যুচ্যন্তে| আযতনানি কারণানি ‘রোগস্য’ ইতি শেষঃ| ব্রহ্মচর্যশব্দেন ইন্দ্রিযসংযমসৌমনস্যপ্রভৃতযো ব্রহ্মজ্ঞানানুগুণা গৃহ্যন্তে| আহারাদযশ্চেহ প্রধানকল্পনযা প্রশস্তা এব গৃহ্যন্তে, তেন বিরূঢকাহারাদীনাং শরীরানুস্তম্ভকত্বং নোদ্ভাবনীযম্; অত এব যুক্তিযুক্তৈরিতি বিশেষণং করিষ্যতি, যুক্ত্যা প্রশস্তেন যোগেন যুক্তা যুক্তিযুক্তাঃ| ব্রহ্মচর্যস্যাযুক্তিরনভ্যাসাদতিমাত্রেন্দ্রিযসংযমনাদিরূপা, সা হি মনঃক্ষোভাদিহেতুর্ভবতি| উপচিতং যুক্তম্| আযুঃসংস্কারাত্ আযুঃকারণং ধর্মাধর্মাবসানং যাবদিত্যর্থঃ; সংস্কারশব্দঃ কারণবচনঃ| আহারাদযশ্চ প্রাধান্যেনোক্তাঃ; তেনাভ্যঙ্গাদীনাং শরীরধারকত্বমবিরুদ্ধমেব| নন্বাহারাদীনি সম্যগাচরতোঽপি বিশেষৈরসাত্মেন্দ্রিযার্থসংযোগাদিজন্যৈর্ব্যাধিভিরন্তরাপি মরণং দৃষ্টমিত্যাহ- সংস্কারমিত্যাদি| সংস্কারং কারণম্| অহিতং ‘শরীরস্য’ ইতি শেষঃ| য ইহৈবোপদেক্ষ্যত ইতি ‘ত্রীণ্যাযতনানি’ ইত্যাদিনা গ্রন্থেন||৩৫||

Adhikarana 30 (36) · Śloka 36

ত্রিবিধং বলমিতি- সহজং, কালজং, যুক্তিকৃতং চ| সহজং যচ্ছরীরসত্ত্বযোঃ প্রাকৃতং, কালকৃতমৃতুবিভাগজং বযঃকৃতং চ, যুক্তিকৃতং পুনস্তদ্যদাহারচেষ্টাযোগজম্||৩৬||

যুক্তিঃ আহারচেষ্টযোঃ সম্যক্ শরীরেণ যোজনা| সত্ত্বং মনঃ, মনসো বলং বা যত্ ‘উত্সাহ ’ উচ্যতে| প্রাকৃতমিতি জন্মাদিপ্রবৃত্তং প্রাকৃতধাতুবৃদ্ধ্যা হেত্বন্তরনিরপেক্ষং বৃদ্ধং, দৃশ্যন্তে হি কেচিত্ স্বভাবাদেব বলিনো দুর্বলাশ্চ কেচিত্| ঋতুবিভাগজম্ “আদাবন্তে চ দৌর্বল্যং” (সূ.অ.৬) ইত্যাদ্যুক্তম্| আহারস্য মাংসসর্পিরাদেঃ, চেষ্টাযা উচিতবিশ্রামব্যাযামাদের্যোগ আহারচেষ্টাযোগঃ; অন্যে তু যোগশব্দেন রসাযনপ্রযোগং গ্রাহযন্তি||৩৬||

Adhikarana 31 (37) · Śloka 37

ত্রীণ্যাযতনানীতি- অর্থানাং কর্মণঃ কালস্য চাতিযোগাযোগমিথ্যাযোগাঃ| তত্রাতিপ্রভাবতাং দৃশ্যানামতিমাত্রং দর্শনমতিযোগঃ, সর্বশোঽদর্শনমযোগঃ, অতিশ্লিষ্টাতিবিপ্রকৃষ্টরৌদ্রভৈরবাদ্ভুতদ্বিষ্টবীভত্সনবিকৃতবিত্রাসনাদিরূপদর্শনং মিথ্যাযোগঃ; তথাঽতিমাত্রস্তনিতপটহোত্ক্রুষ্টাদীনাং শব্দানামতিমাত্রং শ্রবণমতিযোগঃ, সর্বশোঽশ্রবণমযোগঃ, পরুষেষ্টবিনাশোপঘাতপ্রধর্ষণভীষণাদিশব্দশ্রবণং মিথ্যাযোগঃ; তথাঽতিতীক্ষ্ণোগ্রাভিষ্যন্দিনাং গন্ধানামতিমাত্রং ঘ্রাণমতিযোগঃ, সর্বশোঽঘ্রাণমযোগঃ, পূতিদ্বিষ্টামেধ্যক্লিন্নবিষপবনকুণপগন্ধাদিঘ্রাণং মিথ্যাযোগঃ; তথা রসানামত্যাদানমতিযোগঃ, সর্বশোঽনাদানমযোগঃ, মিথ্যাযোগো রাশিবর্জ্যেষ্বাহারবিধিবিশেষাযতনেষূপদেক্ষ্যতে; তথাঽতিশীতোষ্ণানাং স্পৃশ্যানাং স্নানাভ্যঙ্গোত্সাদনাদীনাং চাত্যুপসেবনমতিযোগঃ, সর্বশোঽনুপসেবনমযোগঃ, স্নানাদীনাং শীতোষ্ণাদীনাং চ স্পৃশ্যানামনানুপূর্ব্যোপসেবনং বিষমস্থানাভিঘাতাশুচিভূতসংস্পর্শাদযশ্চেতি মিথ্যাযোগঃ||৩৭||

অর্থানাম্ ইন্দ্রিযার্থানাম্| কর্মণঃ কাযবাঙ্মনঃপ্রবৃত্তেঃ| কালস্য শীতোষ্ণবর্ষলক্ষণস্য| অতিপ্রভাবতাম্ আতপাগ্নিপ্রভৃতীনাম্| অত্র হীনমাত্রদর্শনং বিকারং ন করোতি, তেন ‘সর্বশ’ ইত্যুক্তম্| অদর্শনং চাতিপ্রভাবতামেব বোদ্ধব্যম্, অপ্রভাবতাং চ ঘটাদীনাং দর্শনমতিযোগাদপি ন দোষকরম্; এবমন্যত্রাপি সর্বশ ইতি ব্যাখ্যেযম্| অতিশ্লিষ্টং নযনপ্রত্যাসন্নম্, অতিবিপ্রকৃষ্টম্ অতিদূরবর্তি, রৌদ্রম্ অদ্ভুতকারণাত্মকং ভযজনকং, ভৈরবম্ অনদ্ভুতমপি ব্যাঘ্রাদি, দিষ্টং যদ্যস্য দ্বেষ্যং, বীভত্সনং মনস উদ্বেগকারকং, বিকৃতং হীনাঙ্গাদি, বিত্রাসনং ঝটিতি ভযজনকম্; আদিগ্রহণাদমেধ্যাদীনাং গ্রহণম্| রৌদ্রাদযো যদ্যপি ন রূপং কিন্ত্বাকৃতিবিশেষাঃ, তথাঽপি রূপৈকার্থসমবাযেন চক্ষুরর্থা এব; ন চেহেন্দ্রিযার্থগ্রহণেন রূপাদীনামেব পরং গ্রহণমিতি পূর্বমেব ব্যাখ্যাতং, যতঃ স্পর্শনরসনযোঃ সম্যগ্যোগেঽসম্যগ্যোগে চ বহবঃ স্পর্শরসব্যতিরিক্তাঃ স্নানাভ্যঙ্গাদযঃ প্রকৃতিসংযোগসংস্কারাদযশ্চ কারণত্বেন বক্তব্যাঃ| অতিমাত্রস্তনিতং প্রবৃদ্ধো মেঘধ্বনিঃ, পটহঃ পটহশব্দঃ, উত্ক্রুষ্টং দর্পাদতিমাত্রং শব্দিতং, প্রধর্ষণং তিরস্কারঃ| তীক্ষ্ণো গন্ধশ্চক্ষুর্বিরেচনকারকঃ, যথা- কৃষ্ণজীরকাদীনাম্; উগ্রো বমনকারকো বচাদীনাম্; অভিষ্যন্দী স্তৈমিত্যকারকো মস্তুসুরাসবাদীনাং ; পূতি অত্যর্থক্লিন্নং; বিষযুক্তঃ পবনো বিষপবনঃ; কুণপঃ শবঃ| রসানামিতি রসসহিতানাং দ্রব্যাণাম্| ইহানাদানমিতি কুর্বন্ হীনযোগোঽপি রসানাং বিকারকর ইতি দর্শযতি| আহারবিধিবিশেষাযতনানি রসবিমানে বক্ষ্যমাণানি “প্রকৃতিকরণসংযোগরাশিদেশকালোপযোগসংস্থোপযোত্ক্রষ্টমানি” (বি.অ.১); তত্র রাশিবর্জ্যেষ্বিতিবচনেন রাশিং পৃথক্করোতি, রাশেরাহারস্য পরিমাণরূপস্য যো দোষঃ- হীনমাত্রত্বমতিমাত্রত্বং বা, তস্যাতিযোগাযোগাভ্যামেব গৃহীতত্বাত্; ন মিথ্যাযোগো রাশেঃ সম্ভবতি; উক্তং হি- “রাশিঃ পুনর্মাত্রামাত্রাফলবিনিশ্চযার্থঃ” (বি.অ.১.) ইতি| প্রকৃত্যাদীনাং তু দোষাদাহারস্য মিথ্যাযোগ এব পরং সম্ভবতি, যতঃ প্রকৃতিবিরুদ্ধানাং মাষাদীনাং ভোজনং মিথ্যাযোগ এবাহারস্য ভবতি; এবং সংস্কারবিরুদ্ধশক্তুপিণ্ডিকেঽপি মিথ্যাযোগ এব, তথা সংযোগবিরুদ্ধসমধৃতমধুসর্পিরুপযোগেঽপি; এবং কালাদিবিরুদ্ধোদাহরণমপি রসবিমানে প্রতিপাদিতং সর্বং মিথ্যাযোগরূপমেব, তেষামযোগাতিযোগনিরপেক্ষাণামেব দোষকর্তৃত্বাত্| শীতোষ্ণাদীনামিত্যাদি| যদ্যপি শীতোষ্ণাদীনামভ্যঙ্গাদীনাং চ হীনযোগোঽপি রোগকরস্তথাঽপি সর্বশোঽনুপসেবনমিতি বচনং সর্বশোঽনুপসেবনস্য ভূরিপ্রব্যক্তবিকারকর্তৃত্বাভিপ্রাযেণ| অনানুপূর্ব্যা যথোক্তক্রমলঙ্ঘনেন, যথা- স্নাত্বা উত্সাদনং, তথোষ্ণপীডিতস্য সহসা শীতলপানীযাবগাহনম্, এবমাদি| অভিঘাতঃ খঙ্গহননাদি, ভূতাঃ প্রাণিনঃ পিশাচপ্রভৃতযঃ| আদিগ্রহণাদ্যত্কিঞ্চিত্ স্পর্শনসম্বদ্ধং শরীরোপঘাতকমযোগাতিযোগব্যতিরিক্তং তদ্গৃহ্যতে||৩৭||

Adhikarana 32 (38) · Śloka 38

তত্রৈকং স্পর্শনমিন্দ্রিযাণামিন্দ্রিযব্যাপকং , চেতঃ- সমবাযি, স্পর্শনব্যাপ্তের্ব্যাপকমপি চ চেতঃ; তস্মাত্ সর্বেন্দ্রিযাণাং ব্যাপকস্পর্শকৃতো যো ভাববিশেষঃ, সোঽযমনুপশযাত্ পঞ্চবিধস্ত্রিবিধবিকল্পো ভবত্যসাত্ম্যেন্দ্রিযার্থসংযোগঃ; সাত্ম্যার্থো হ্যুপশযার্থঃ||৩৮||

ননু চক্ষুরাদীনি পঞ্চেন্দ্রিযাণি, অতস্তেষাং প্রতিনিযতাঃ পঞ্চাসাত্ম্যেন্দ্রিযার্থসংযোগাঃ, তত্ কথমেকোঽসাত্ম্যেন্দ্রিযার্থসংযোগ ইত্যাখ্যাযত ইত্যাশঙ্ক্য স্পর্শনেন্দ্রিযস্য সর্বেন্দ্রিযব্যাপকত্বং দর্শযিত্বা সর্বেন্দ্রিযানুগতং স্পর্শমর্থগ্রহণকারণমেকরূপং দর্শযতি, ততশ্চ তস্যৈকস্যাসাত্ম্যেন্দ্রিযার্থেন সংযোগাদুপপন্ন একরূপোঽসাত্ম্যেন্দ্রিযার্থসংযোগ ইতি দর্শযতি- তত্রৈকমিত্যাদিনা সাত্ম্যার্থো হ্যুপশযার্থ ইত্যন্তেন| একং স্পর্শনমিতি স্পর্শনেন্দ্রিযমেব, নান্যচ্চক্ষুরাদি| ইন্দ্রিযাণামিতি নির্ধারণে ষষ্ঠী| ইন্দ্রিযাণি চক্ষুরাদীনি ব্যাপ্নোতীতীন্দ্রিযব্যাপকং; স্পর্শনং হি সর্বেষ্বিন্দ্রিযেষ্বস্তি, অত এব স্পৃষ্ট্বৈবার্থমিন্দ্রিযাণি গৃহ্ণন্তি| তর্হি কথং ন সর্বদাঽর্থগ্রহণং ভবতীত্যত আহ- চেত ইত্যাদিনা| শ্রোত্রং চাস্মদ্দর্শনে পাঞ্চভৌতিকং কর্ণশষ্কুলীগতনভোরূপং, তেন তস্যাপি স্পর্শোঽস্তি; চেতঃসমবাযি মনঃসম্বন্ধি; মনঃসম্বন্ধকথনেন চার্থগ্রহণং প্রতি সমর্থত্বং স্পর্শস্য দর্শযতি, মনোঽধিষ্ঠিতানামিন্দ্রিযাণামর্থগ্রাহকত্বাত্| তত্ কিমণুপরিমাণেন মনসৈকত্রস্থিতেনৈব স্পর্শনস্য সর্বেন্দ্রিযব্যাপকস্য সম্বন্ধাত্ সর্বেন্দ্রিযাণি প্রবর্তন্তে, তথা সতি যুগপত্পঞ্চজ্ঞানোত্পত্তিপ্রসঙ্গ ইত্যাহ- স্পর্শনেন্দ্রিযব্যাপ্তের্ব্যাপকমপি চেত ইতি| স্পর্শনেনেন্দ্রিযাণাং ব্যাপ্তিঃ স্পর্শনেন্দ্রিযব্যাপ্তিঃ, তস্যাশ্চেতোঽপি ব্যাপকম্; এতদুক্তং ভবতি- যাবতি প্রদেশে স্পর্শনং তিষ্ঠতি তাবন্তং দেশং মনোঽপি ভ্রমতি প্রত্যক্ষেণার্থগ্রহণার্থং, তেন যস্মিন্ প্রদেশে যদা মনো বর্ততে তদা তেন প্রদেশেন চক্ষুরাদিরূপেণার্থং গৃহ্ণাতীতি ন যুগপজ্জ্ঞানোত্পত্তিঃ| প্রকৃতে যোজযতি- তস্মাদিত্যাদি| ব্যাপকশ্চাসৌ স্পর্শশ্চেতি ব্যাপকস্পর্শঃ, তেন কৃতস্তন্নিবন্ধনঃ; সর্বেন্দ্রিযাণাং ভাববিশেষঃ স্বভাববিশেষোঽর্থগ্রহণকারণীভূতঃ স্পর্শ ইত্যর্থঃ; যমধিকৃত্যোক্তম্- “স্পর্শনেন্দ্রিযসংস্পর্শঃ স্পর্শো মানস এব চ| দ্বিবিধঃ সুখদুঃখানাং বেদনানাং প্রবর্তকঃ” (শা. অ.১) ইতি; অত্র শ্লোকে স্পর্শনসম্বন্ধকৃতঃ সর্বেন্দ্রিযস্পর্শঃ স্পর্শনেন্দ্রিযসংস্পর্শশব্দেনোক্তঃ, মানসস্তু স্পর্শশ্চিন্ত্যেন বিষযেণ সতাঽপি সম্ভবতীতি তত্রৈব ব্যাখ্যেযম্| বিশেষ ইত্যত্র ‘অস্তি’ ইতি শেষঃ| সোঽযমেকস্যেন্দ্রিযব্যাপকস্য স্পর্শস্যৈকরূপোঽসাত্ম্যেন্দ্রিযার্থসংযোগঃ, অনুপশযাদিতি দুঃখকর্তৃত্বাত্, পঞ্চবিধঃ চক্ষুরসাত্ম্যেন্দ্রিযার্থসংযোগো ঘ্রাণাসাত্ম্যেন্দ্রিযার্থসংযোগ ইত্যাদিরূপঃ সন্, পুনস্ত্রিবিধবিকল্পো ভবতি- অযোগাতিযোগমিথ্যাযোগেনেতি ভাবঃ| এবং চৈকপ্রকারস্ত্রিপ্রকারস্তথা পঞ্চদশপ্রকারোঽসাত্ম্যেন্দ্রিযার্থসংযোগ উক্তো ভবতি| অনুপশযশব্দেন চক্ষুরাদ্যনুপশযবিশেষোঽত্রাসাত্ম্যেন্দ্রিযার্থসংযোগস্য পঞ্চবিধহেতুত্বোপদেশাদ্বোদ্ধব্যঃ, ন হ্যেকরূপোঽনুপশযঃ পঞ্চবিধত্বমসাত্ম্যেন্দ্রিযার্থস্য কর্তুং সমর্থঃ, যতশ্চক্ষুরাদীনাং প্রতিনিযতান্যেবোপঘাতকান্যতিভাস্বররূপাদীনি, ততশ্চ স্পর্শেন্দ্রিযব্যাপ্ত্যাঽপি নৈকস্পর্শনেন্দ্রিযত্বং চক্ষুরাদীনাম্, একত্বে হ্যেকেন্দ্রিযোপঘাতকমন্যেষামপ্যুপঘাতকং স্যাদিতি মন্তব্যম্| সাত্ম্যোপশযযোরেকার্থতাং দর্শযতি- সাত্ম্যার্থো হ্যুপশযার্থ ইতি| এতেনানুপশযেনেন্দ্রিযার্থসংযোগং দর্শযিত্বাঽসাত্ম্যেন্দ্রিযার্থসংযোগ ইতি সঞ্জ্ঞাকরণমবিরুদ্ধমিতি দর্শিতং ভবতি||৩৮||

Adhikarana 33 (39) · Śloka 39

কর্ম বাঙ্মনঃশরীরপ্রবৃত্তিঃ| তত্র বাঙ্মনঃশরীরাতিপ্রবৃত্তিরতিযোগঃ; সর্বশোঽপ্রবৃত্তিরযোগঃ; বেগধারণোদীরণবিষমস্খলনপতনাঙ্গপ্রণিধানাঙ্গপ্রদূষণপ্রহারমর্দনপ্রাণোপরোধসঙ্ক্লেশনাদিঃ শারীরো মিথ্যাযোগঃ, সূচকানৃতাকালকলহাপ্রিযাবদ্ধানুপচারপরুষবচনাদির্বাঙ্মিথ্যাযোগঃ, ভযশোকক্রোধলোভমোহমানের্ষ্যামিথ্যাদর্শনাদির্মানসো মিথ্যাযোগঃ||৩৯||

অর্থানামযোগাতিযোগমিথ্যাযোগানভিধায কর্মণস্তানাহ- কর্মেত্যাদি| অত্র যদ্যপি ভূরিপ্রধানশরীররোগকর্তৃত্বেন পূর্বং শারীরমেব কর্মাসাত্ম্যমভিধাতুং যুজ্যতে, তথাঽপ্যল্পত্বেন বাঙ্মনসে কর্মণী পূর্বমুক্তে, প্রত্যেকমিথ্যাযোগকথনে তু প্রাধান্যাচ্ছারীর এব মিথ্যাযোগঃ প্রথমং দর্শিতঃ| অত্রাতিযোগরূপাঽতিপ্রবৃত্তিস্তথাঽযোগরূপাঽপ্রবৃত্তির্বিহিতানাং কাযবাঙ্মনঃ কর্মণাং বোদ্ধব্যা, অহিতাচরণস্য তু সর্বস্য মিথ্যাযোগত্বেন বক্তব্যত্বাত্| বেগোদীরণম্ অপ্রাপ্তবেগোদীরণম্| বিষমশব্দোঽঙ্গপ্রণিধানান্তৈঃ সবধ্যতে| অঙ্গদূষণম্ অতিকণ্ডূযনাদিভিঃ| সঙ্ক্লেশনং মদ্যাতপজলসেচনাদিভিঃ| অবদ্ধবচনম্ অসম্বদ্ধং যাবত্তাবত্কীর্তনম্| অনুপচারবচনম্| ইহ চানৃতবচনাদযোঽধর্মদ্বারেণ রোগকরাঃ||৩৯||

Adhikarana 34 (40) · Śloka 40

সঙ্গ্রহেণ চাতিযোগাযোগবর্জং কর্ম বাঙ্মনঃশরীরজমহিতমনুপদিষ্টং যত্তচ্চ মিথ্যাযোগং বিদ্যাত্||৪০||

অনুক্তমিথ্যাযোগসঙ্গ্রহার্থমাহ- সঙ্গ্রহেণেত্যাদি| অহিতমিহ জন্মনি, অনুপদিষ্টমিত্যনেন পরলোকেঽধর্মহেতুতযা পাপকারকং পরদারসেবাদি গ্রাহযতি; এতেন যদুচ্যতে- অধর্মস্যাগ্রহণান্ন্যূনমেতদাযতনকথনমিতি, তন্ন ভবতি| শারীরমানসিকবাচনিককর্মমিথ্যাযোগেনৈবাধর্মোত্পাদাবান্তরব্যাপারেণাধর্মজন্যানাং বিকারাণাং ক্রিযমাণত্বাত্, যথা- অগ্নিষ্টোমেন স্বর্গঃ ক্রিযতে ধর্মোত্পাদাবান্তরব্যাপারেণৈব; অন্যে তু কালমিথ্যাযোগেঽধর্মং ক্ষিপন্তি, অধর্মো হি কালবশাদেব ফলতি ন তত্কালমিতি কৃত্বা; এতচ্চ প্রথমাধ্যায এব প্রপঞ্চিতম্||৪০||

Adhikarana 35 (41) · Śloka 41

ইতি ত্রিবিধবিকল্পং ত্রিবিধমেব কর্ম প্রজ্ঞাপরাধ ইতি ব্যবস্যেত্||৪১||

সম্প্রতি কর্মাসম্যগ্যোগঃ প্রজ্ঞাপরাধমূলত্বাত্ প্রজ্ঞাপরাধ এবোচ্যত ইতি ত্রিবিধমিত্যাদিনা দর্শযন্, যদুক্তং পূর্বং হেতুত্রযকথনে “অসাত্ম্যেন্দ্রিযার্থসংযোগঃ প্রজ্ঞাপরাধঃ পরিণামশ্চ” ইত্যস্যাবিরোধং দর্শযতি; এবং যদগ্রে বক্ষ্যতি ‘কালঃ পুনঃ পরিণাম উচ্যতে’ তত্রাপি পূর্বোক্তাবিরোধোপদর্শনং ব্যাখ্যেযমিতি| ত্রিবিধবিকল্পমিহাতিযোগাদিরূপম্||৪১||

Adhikarana 36 (42) · Śloka 42

শীতোষ্ণবর্ষলক্ষণাঃ পুনর্হেমন্তগ্রীষ্মবর্ষাঃ সংবত্সরঃ, স কালঃ| তত্রাতিমাত্রস্বলক্ষণঃ কালঃ কালাতিযোগঃ, হীনস্বলক্ষণঃ (কালঃ) কালাযোগঃ, যথাস্বলক্ষণবিপরীতলক্ষণস্তু (কালঃ) কালমিথ্যাযোগঃ| কালঃ পুনঃ পরিণাম উচ্যতে||৪২||

কালাতিশযযোগাদীন্ দর্শযতি- শীতোষ্ণেত্যাদি| অতিমাত্রস্বলক্ষণঃ অতিমাত্রশীতাদিঃ| যথাস্বলক্ষণাচ্ছীতাদের্বিপরীতলক্ষণো যথা- হেমন্তে বর্ষণং, বর্ষাসু শীতমিত্যাদি||৪২||

Adhikarana 37 (43) · Śloka 43

ইত্যসাত্ম্যেন্দ্রিযার্থসংযোগঃ, প্রজ্ঞাপরাধঃ, পরিণামশ্চেতি ত্রযস্ত্রিবিধবিকল্পা হেতবো বিকারাণাং; সমযোগযুক্তাস্তু প্রকৃতিহেতবো ভবন্তি||৪৩||

আযতনান্যুপসংহরতি- ইতীত্যাদি| বিকারাণাং হেতবো ভবন্তীতি সম্বন্ধঃ; তথা সমযোগযুক্তাঃ সম্যগ্যোগযুক্তাঃ প্রকৃতিহেতবো ভবন্তীতি যোজ্যং; প্রকৃতিঃ আরোগ্যম্||৪৩||

Adhikarana 38 (44) · Śloka 44

সর্বেষামেব ভাবানাং ভাবাভাবৌ নান্তরেণ যোগাযোগাতিযোগমিথ্যাযোগান্ সমুপলভ্যেতে; যথাস্বযুক্ত্যপেক্ষিণৌ হি ভাবাভাবৌ||৪৪||

ইদানীং ধাতুসাম্যবৈষম্যহেতুত্বেন সম্যগ্যোগাযোগৌ চ প্রতিপাদ্য বাহ্যানামপি বৃক্ষঘটাদীনাং সম্যক্স্থিতিবিনাশযোঃ সম্যগ্যোগাযোগাবেব কারণমিতি দৃষ্টান্তার্থং ভাবস্বরূপজ্ঞানার্থং চাহ- সর্বেষামিত্যাদি| ভাবঃ সম্যগবস্থানম্, অভাবঃ, অসম্যগবস্থানং বিনাশো বা; যোগাত্ সম্যগ্যোগাদ্ভাবঃ, অযোগাদিভ্যোঽভাবঃ; যথাস্বং যুক্তির্যা যস্য ভাবস্যাভাবস্য বা যুক্তিঃ স্বকারণযুক্তিঃ, তদপেক্ষিণৌ ভবত ইতি সম্বন্ধঃ| যথা- বৃক্ষস্য ভাবে অবস্থানেঽনত্যল্পপানীযযোগাদির্যুক্তিঃ, অভাবে তু বৃক্ষস্য পানীযাতপাতিযোগাযোগৌ তথা বজ্রপাতাদির্যুক্তিঃ; ততস্তদপেক্ষৌ বৃক্ষস্য ভাবাভাবৌ ভবত ইত্যাদি কল্পনীযম্||৪৪||

Adhikarana 39 (45) · Śloka 45

ত্রযো রোগা ইতি- নিজাগন্তুমানসাঃ| তত্র নিজঃ শারীরদোষসমুত্থঃ, আগন্তুর্ভূতবিষবায্বগ্নিসম্প্রহারাদিসমুত্থঃ, মানসঃ পুনরিষ্টস্য লাভাল্লাভাচ্চানিষ্টস্যোপজাযতে||৪৫||

রোগানাহ- ত্রযো রোগা ইত্যাদি| ইষ্টলাভাজ্জাযতে কামহর্ষাদিঃ, অনিষ্টপ্রিযবিযোগাদিলাভাচ্চ শোকাদযঃ; যদি বা ‘ইষ্টস্যালাভাল্লাভাচ্চানিষ্টস্য’ ইতি পাঠঃ; অত্র তু পাঠে চকারাদিষ্টলাভোঽপি হেতুর্বোদ্ধব্যঃ||৪৫||

Adhikarana 40 (46) · Śloka 46

তত্র বুদ্ধিমতা মানসব্যাধিপরীতেনাপি সতা বুদ্ধ্যা হিতাহিতমবেক্ষ্যাবেক্ষ্য ধর্মার্থকামানামহিতানামনুপসেবনে হিতানাং চোপসেবনে প্রযতিতব্যং, ন হ্যন্তরেণ লোকে ত্রযমেতন্মানসং কিঞ্চিন্নিষ্পদ্যতে সুখং বা দুঃখং বা; তস্মাদেতচ্চানুষ্ঠেযং- তদ্বিদ্যানাং চোপসেবনে প্রযতিতব্যম্, আত্মদেশকুলকালবলশক্তিজ্ঞানে যথাবচ্চেতি||৪৬||

সম্প্রতি মানসব্যাধিচিকিত্সাযা অল্পবক্তব্যত্বেনেহৈব তচ্চিকিত্সামাহ- তত্রেত্যাদি| মানসব্যাধিপরীতেনাপীতি অপিশব্দেন শারীরব্যাধিযুক্তেনাপি বক্ষ্যমাণমনুষ্ঠেযমিতি সূচযতি| ত্রযমেতদ্ধর্মার্থকামরূপং মানসং সুখং বা মানসং দুঃখং বা নিষ্পদ্যত ইতি যোজ্যম্| তদ্বিদ্য ইহ মানসব্যাধিভেষজবেদী| আত্মদেশেত্যাদি|- কোঽহং, কিং মে হিতমিত্যাত্মজ্ঞানং; কো দেশঃ, অস্মিন্ কিমুচিতমিতি দেশজ্ঞানম্; এবং কালাদাবপি জ্ঞানং বোদ্ধব্যম্||৪৬||

Adhikarana 41 (47) · Śloka 47

ভবতি চাত্র- মানসং প্রতি ভৈষজ্যং ত্রিবর্গস্যান্ববেক্ষণম্| তদ্বিদ্যসেবা বিজ্ঞানমাত্মাদীনাং চ সর্বশঃ||৪৭||

সম্প্রত্যমুমেবার্থং সুখগ্রহণার্থং শ্লোকেনাহ- মানসং প্রতীত্যাদি|- মানসং বিকারমিতি ভাবঃ| ত্রিবর্গস্য ধর্মাদেঃ||৪৭||

Adhikarana 42 (48) · Śloka 48

ত্রযো রোগমার্গা ইতি- শাখা, মর্মাস্থিসন্ধযঃ, কোষ্ঠশ্চ| তত্র শাখা রক্তাদযো ধাতবস্ত্বক্ চ, স বাহ্যো রোগমার্গঃ; মর্মাণি পুনর্বস্তিহৃদযমূর্ধাদীনি, অস্থিসন্ধযোঽস্থিসংযোগাস্তত্রোপনিবদ্ধাশ্চ স্নাযুকণ্ডরাঃ , স মধ্যমো রোগমার্গঃ; কোষ্ঠঃ পুনরুচ্যতে মহাস্রোতঃ শরীরমধ্যং মহানিম্নমামপক্বাশযশ্চেতি পর্যাযশব্দৈস্তন্ত্রে, স রোগমার্গ আভ্যন্তরঃ||৪৮||

অত্র রোগমার্গানাহ - ত্রয ইত্যাদি| মর্মাস্থিসন্ধিভ্যামেকো মার্গঃ| অত্র শাখেতিসঞ্জ্ঞাকরণং ব্যবহারার্থং, তথা রক্তাদীনাং ধাতূনাং শাখাভিধেযানাং বৃক্ষশাখাতুল্যত্বেন বাহ্যত্বজ্ঞাপনার্থম্| ত্বক্চেতি ত্বক্শব্দেন তদাশ্রযো রসোঽপি গৃহ্যতে; সাক্ষাত্তু রসানভিধানং হৃদযস্থাযিনো রসস্য শাখাসঞ্জ্ঞাব্যবচ্ছেদার্থং , তস্য হি কোষ্ঠগ্রহণেনৈব গ্রহণম্; অনেন ন্যাযেন যকৃত্প্লীহাশ্রিতং চ শোণিতং কোষ্ঠত্বেনৈবাভিপ্রেতমিতি বোদ্ধব্যং, সমানন্যাযত্বাত্ | উক্তং চ কোষ্ঠবিবরণে- “স্থানান্যামাগ্নিপক্বানাং মূত্রস্য রুধিরস্য চ| হৃদুণ্ডুকঃ ফুফ্ফুসশ্চ কোষ্ঠ ইত্যভিধীযতে” (সু.চি. অ.২) ইতি| অস্থিসন্ধিবিবরণম্- অস্থিসংযোগা ইত্যাদি| তত্রেতি অস্থিসন্ধৌ| কণ্ডরা ইহ তন্ত্রে স্থূলস্নাযুঃ| আমস্য পক্বস্য চাশয আমপক্বাশযঃ| এতচ্চ মার্গভেদকথনং তদাশ্রিতব্যাধীনাং সুখসাধ্যত্বাদিজ্ঞানার্থম্||৪৮||

Adhikarana 43 (49) · Śloka 49

তত্র, গণ্ডপিডকালজ্যপচীচর্মকীলাধিমাংসমষককুষ্ঠব্যঙ্গাদযো বিকারা বহির্মার্গজাশ্চ বিসর্পশ্বযথুগুল্মার্শোবিদ্রধ্যাদযঃ শাখানুসারিণো ভবন্তি রোগাঃ; পক্ষবধগ্রহাপতানকার্দিতশোষরাজযক্ষ্মাস্থিসন্ধিশূলগুদভ্রংশাদযঃ শিরোহৃদ্বস্তিরোগাদযশ্চ মধ্যমমার্গানুসারিণো ভবন্তি রোগাঃ; জ্বরাতীসারচ্ছর্দ্যলসকবিসূচিকাকাসশ্বাসহিক্কানাহোদরপ্লীহাদযোঽন্তর্মার্গজাশ্চ বিসর্পশ্বযথুগুল্মার্শোবিদ্রধ্যাদযঃ কোষ্ঠানুসারিণো ভবন্তি রোগাঃ||৪৯||

সম্প্রতি যন্মার্গাশ্রিতো যো রোগো ভবতি তং দর্শযতি- তত্র গণ্ডেত্যাদি| বহির্মার্গজাশ্চেতি বিসর্পাদীনাং বিশেষণং বিসর্পাদযো হ্যন্তর্মার্গভাজোঽপি সম্ভবন্ত্যতস্তদ্ব্যুদাসার্থম্| পক্ষশব্দো বধগ্রহাভ্যাং সম্বধ্যতে, শোষো ধাতুশোষঃ| জ্বরো যদ্যপি সর্বশরীরগ এব, তথাঽপি বিশেষেণামাশযসমুত্থত্বাদিহোচ্যতে| অন্তর্মার্গজাশ্চেতি বিসর্পাদিবিশেষণম্| অর্শো বহির্বল্যাশ্রিতং শাখাগতম্, অন্যচ্চ কোষ্ঠগতম্| বহির্মার্গজো গুল্মো যো বহিরুত্তুণ্ডিত উপলভ্যতে বহিশ্চ পচ্যতে স জ্ঞেযঃ, অন্যস্তু সর্বঃ কোষ্ঠগত এব||৪৯||

Adhikarana 44 (50-53) · Śloka 53

ত্রিবিধা ভিষজ ইতি- ভিষক্ছদ্মচরাঃ সন্তি সন্ত্যেকে সিদ্ধসাধিতাঃ| সন্তি বৈদ্যগুণৈর্যুক্তাস্ত্রিবিধা ভিষজো ভুবি||৫০|| বৈদ্যভাণ্ডৌষধৈঃ পুস্তৈঃ পল্লবৈরবলোকনৈঃ| লভন্তে যে ভিষক্শব্দমজ্ঞাস্তে প্রতিরূপকাঃ||৫১|| শ্রীযশোজ্ঞানসিদ্ধানাং ব্যপদেশাদতদ্বিধাঃ| বৈদ্যশব্দং লভন্তে যে জ্ঞেযাস্তে সিদ্ধসাধিতাঃ||৫২|| প্রযোগজ্ঞানবিজ্ঞানসিদ্ধিসিদ্ধাঃ সুখপ্রদাঃ| জীবিতাভিসরাস্তে স্যুর্বৈদ্যত্বং তেষ্ববস্থিতমিতি||৫৩||

ভিষক্ছদ্মচরা ভিষগ্বেশচরাঃ| সিদ্ধেন প্রসিদ্ধেন সাধিতাঃ সিদ্ধসাধিতাঃ| বৈদ্যভাণ্ডং বস্তিনেত্রাদি| প্রতিরূপকা বৈদ্যসদৃশাঃ| ব্যপদেশঃ অন্যসম্বন্ধেন কীর্তনম্| অতদ্বিধা জ্ঞানহীনাঃ||৫০-৫৩||

Adhikarana 45 (54) · Śloka 54

ত্রিবিধমৌষধমিতি- দৈবব্যপাশ্রযং, যুক্তিব্যপাশ্রযং, সত্ত্বাবজযশ্চ| তত্র দৈবব্যপাশ্রযং- মন্ত্রৌষধিমণিমঙ্গলবল্যুপহারহোমনিযমপ্রাযশ্চিত্তোপবাসস্বস্ত্যযনপ্রণিপাতগমনাদি, যুক্তিব্যপাশ্রযং- পুনরাহারৌষধদ্রব্যাণাং যোজনা, সত্ত্বাবজযঃ- পুনরহিতেভ্যোঽর্থেভ্যো মনোনিগ্রহঃ||৫৪||

দৈবমদৃষ্টং তদ্ব্যপাশ্রযং, তচ্চ যদদৃষ্টজননেন ব্যাধিপ্রত্যনীকং মন্ত্রাদি; যদি বা দৈবশব্দেন দেবা উচ্যন্তে, তানাশ্রিত্য যদুপকরোতি তত্তথা; মন্ত্রাদযো হি দেবপ্রভাবাদেব ব্যাধিহরাঃ, বল্যুপহারাদিপ্রীতাশ্চ দেবা এব প্রভাবাদ্ব্যাধীন্ ঘ্নন্তি| অত্র দৈবব্যপাশ্রযমাদাবুক্তমাশুব্যাধিহরত্বেন| প্রণিপাতো দেবাদীনাং শারীরো নমস্কারঃ, গমনং বিদূরদেবাদিগমনম্||৫৪||

Adhikarana 46 (55) · Śloka 55

শরীরদোষপ্রকোপে খলু শরীরমেবাশ্রিত্য প্রাযশস্ত্রিবিধমৌষধমিচ্ছন্তি- অন্তঃপরিমার্জনং, বহিঃপরিমার্জনং, শস্ত্রপ্রণিধানং চেতি| তত্রান্তঃপরিমার্জনং যদন্তঃশরীরমনুপ্রবিশ্যৌষধমাহারজাতব্যাধীন্ প্রমার্ষ্টি, যত্পুনর্বহিঃস্পর্শমাশ্রিত্যাভ্যঙ্গস্বেদপ্রদেহপরিষেকোন্মর্দনাদ্যৈরামযান্ প্রমার্ষ্টি তদ্বহিঃপরিমার্জনং, শস্ত্রপ্রণিধানং পুনশ্ছেদনভেদনব্যধনদারণলেখনোত্পাটনপ্রচ্ছনসীবনৈষণক্ষারজলৌকসশ্চেতি||৫৫||

সম্প্রতি প্রকারান্তরেণোপযুক্তং ভেষজত্রৈবিধ্যমাহ- শরীরেত্যাদি| প্রাযঃশব্দঃ শরীরদোষকোপ ইত্যনেন সম্বধ্যতে; তেন, মানসদোষজেঽপ্যুন্মাদাপস্মারাদাবঞ্জনাদি ভবতীতি দর্শযতি; যদি বা প্রাযস্ত্রিবিধমিত্যনেন শারীরেঽপি দৈবব্যপাশ্রযং স্বস্ত্যযনাদি দর্শযতি||৫৫||

Adhikarana 47 (56-63) · Śloka 63

ভবন্তি চাত্র- প্রাজ্ঞো রোগে সমুত্পন্নে বাহ্যেনাভ্যন্তরেণ বা| কর্মণা লভতে শর্ম শস্ত্রোপক্রমণেন বা||৫৬|| বালস্তু খলু মোহাদ্বা প্রমাদাদ্বা ন বুধ্যতে| উত্পদ্যমানং প্রথমং রোগং শত্রুমিবাবুধঃ||৫৭|| অণুর্হি প্রথমং ভূত্বা রোগঃ পশ্চাদ্বিবর্ধতে| স জাতমূলো মুষ্ণাতি বলমাযুশ্চ দুর্মতেঃ||৫৮|| ন মূঢো লভতে সঞ্জ্ঞাং তাবদ্যাবন্ন পীড্যতে| পীডিতস্তু মতিং পশ্চাত্ কুরুতে ব্যাধিনিগ্রহে||৫৯|| অথ পুত্রাংশ্চ দারাংশ্চ জ্ঞাতীংশ্চাহূয ভাষতে| সর্বস্বেনাপি মে কশ্চিদ্ভিষগানীযতামিতি||৬০|| তথাবিধং চ কঃ শক্তো দুর্বলং ব্যাধিপীডিতম্| কৃশং ক্ষীণেন্দ্রিযং দীনং পরিত্রাতুং গতাযুষম্||৬১|| স ত্রাতারমনাসাদ্য বালস্ত্যজতি জীবিতম্| গোধা লাঙ্গূলবদ্ধেবাকৃষ্যমাণা বলীযসা||৬২|| তস্মাত্ প্রাগেব রোগেভ্যো রোগেষু তরুণেষু বা| ভেষজৈঃ প্রতিকুর্বীত য ইচ্ছেত্ সুখমাত্মনঃ||৬৩||

বৈদ্যভেদাভিধানপ্রসঙ্গেনাতুরভেদমাহ- প্রাজ্ঞ ইত্যাদি| শর্ম সুখমারোগ্যমিতি যাবত্| প্রমাদঃ বুদ্ধ্বাঽপি রোগমপ্রতীকারঃ| সঞ্জ্ঞা সম্যগ্জ্ঞানং ব্যাধিরযং ত্বরযা প্রতিকর্তব্য এবমাকারম্| ত্রাতারং বৈদ্যমনাসাদ্য; তথাবিধং হি রোগিণং বৈদ্যো নোপসর্পতীতি ভাবঃ| বালঃ অজ্ঞঃ| গোধাদৃষ্টান্তেন জীবনার্থং যত্নং কুর্বন্নপি বিপদ্যত ইতি দর্শযতি| প্রতিকুর্বীত ‘যত্নম্’ ইতি শেষঃ||৫৬-৬৩||

Adhikarana 48 (64-65) · Śloka 65

তত্র শ্লোকৌ- এষণাঃ সমুপস্তম্ভা বলং কারণমামযাঃ| তিস্রৈষণীযে মার্গাশ্চ ভিষজো ভেষজানি চ||৬৪|| ত্রিত্বেনাষ্টৌ সমুদ্দিষ্টাঃ কৃষ্ণাত্রেযেণ ধীমতা| ভাবা, ভাবেষ্বসক্তেন যেষু সর্বং প্রতিষ্ঠিতম্||৬৫||

সঙ্গ্রহে ধীমতা ভাবা ইতি ছেদঃ; অষ্টৌ ভাবা ইতি সম্বন্ধঃ| ভাবেষু বিষযেষু| অসক্তেন অপ্রসক্তেন| যেষু এষণাদিষ্বষ্টসু| সর্বমিতি ধর্মার্থকামাঃ||৬৪-৬৫||

Adhikarana puShpikA · Śloka 11

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে তিস্রৈষণীযো নামৈকাদশোঽধ্যাযঃ||১১||

ইতি শ্রীচক্রপাণিদত্তবিরচিতাযাং চরকতাত্পর্যব্যাখ্যাযামাযুর্বেদদীপিকাখ্যাযাং সূত্রস্থানে নির্দেশচতুষ্কে তিস্রৈষণীযো নামৈকাদশোঽধ্যাযঃ||১১||