Adhikarana 1 (1-2) · Śloka 2
অথাতো বিবিধাশিতপীতীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो विविधाशितपीतीयमध्यायं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
পূর্বাধ্যাযে ‘অন্নং প্রাণাঃ’ (সূ. ২৭) ইত্যুক্তং, তদ্যেন প্রকারেণান্নং প্রাণহেতুর্ভবতি তদভিধানার্থং বিবিধাশিতপীতীযোঽভিধীযতে| ইযমপ্যর্থপরা সঞ্জ্ঞা||১-২||
Adhikarana 2 (3) · Śloka 3
বিবিধমশিতং পীতং লীঢং খাদিতং জন্তোর্হিতমন্তরগ্নিসন্ধুক্ষিতবলেন যথাস্বেনোষ্মণা সম্যগ্বিপচ্যমানং কালবদনবস্থিতসর্বধাতুপাকমনুপহতসর্বধাতূষ্মমারুতস্রোতঃ কেবলং শরীরমুপচযবলবর্ণসুখাযুষা যোজযতি শরীরধাতূনূর্জযতি চ| ধাতবো হি ধাত্বাহারাঃ প্রকৃতিমনুবর্তন্তে||৩||
विविधमशितं पीतं लीढं खादितं जन्तोर्हितमन्तरग्निसन्धुक्षितबलेन यथास्वेनोष्मणा सम्यग्विपच्यमानं कालवदनवस्थितसर्वधातुपाकमनुपहतसर्वधातूष्ममारुतस्रोतः केवलं शरीरमुपचयबलवर्णसुखायुषा योजयति शरीरधातूनूर्जयति च| धातवो हि धात्वाहाराः प्रकृतिमनुवर्तन्ते||३||
🔊 Audio coming soon
বিবিধমিত্যাদি| বিবিধমিতি অনেনাশিতাদীনামবান্তরভেদং দর্শযতি; অশিতাদিষু যো যঃ প্রায উপযুজ্যতে স পূর্বমুক্তঃ| জন্তোর্হিতমিতি বচনমহিতস্যাশিতাদের্বলবর্ণাদিকর্তৃত্বাভাবাত্| অন্তরগ্নিনা জাঠরেণ বহ্নিনা সন্ধুক্ষিতং বলং যস্য তেনান্তরগ্নিসন্ধুক্ষিতবলেন| যথাস্বেনোষ্মণেতি পৃথিব্যাদিরূপাশিতাদের্যস্য য ঊষ্মা পার্থিবাগ্ন্যাদিরূপস্তেন; বচনং হি- “ভৌমাপ্যাগ্নেযবাযব্যাঃ পঞ্চোষ্মাণঃ সনাভসাঃ| পঞ্চাহারগুণান্ স্বান্ স্বান্ পার্থিবাদীন্ পচন্তি হি” (চি. ১৫) ইতি| সম্যগ্বিপচ্যমানমিতি অশিতাদি| কিংবা যথাস্বেনোষ্মণেতি যস্য রুধিরাদের্য ঊষ্মা ধাত্বগ্নিরূপস্তেন সম্যগ্বিপচ্যমানমশিতাদি রসতামাপন্নং যদা রক্তাদিধাতূন্ প্রতিপদ্যতে তদা রক্তাদ্যূষ্মণৈব পচ্যতে; এবং বিপচ্যমানমশিতাদি শরীরমুপচযাদিনা যোজযত্যূর্জযতি বর্ধযতীতি যোজনা| কিংবিশিষ্টং শরীরমিত্যাহ- কালবদিত্যাদি|- যথা কালো নিত্যগত্বেনানবস্থিতঃ, তথাঽনবস্থিতঃ অবিশ্রান্তঃ সর্বধাতূনাং পাকো যস্মিন্ শরীরে তত্তথা; এতেন সর্বদা স্বাগ্নিপাকক্ষীযমাণধাতোঃ শরীরস্যাশিতাদিনোপচযাদিযোজনমুপপন্নমিতি দর্শযতি, যদি হি পাকক্ষীযমাণং শরীরং ন স্যাত্তদা স্বতঃ সিদ্ধে উপচযাদৌ কিমশিতাদি কুর্যাদিতি ভাবঃ| কিংবা কালবদিত্যশিতাদিবিশেষণং; তেন যথোক্তকালকৃতমশিতাদীত্যর্থঃ , অকালভোজনস্যোপচযাদ্যকারকত্বাত্| তথা, অনবস্থিতসর্বধাতুপাকমিত্যেতদপি অশিতাদিবিশেষণং, তেন অনবস্থিতঃ সর্বধাতুষু পাকো যস্যাশিতাদেস্তত্তথা; এতেন ক্বচিদপি ধাতৌ স্থগিতস্যাশিতাদে রসরূপস্য পাকবিগমনান্নোপচযাদির্ভবতীতি দর্শযতি| এতচ্চ ব্যাখ্যানং নাতিসুন্দরম্, অস্যার্থস্য অনুপহতেত্যাদিশরীরবিশেষণেনৈব লব্ধত্বাত্ পুনঃ শরীরবিশেষণমনুপপন্নম্| অনুপহতেত্যাদি অনুপহতানি সর্বধাতূনামূষ্মমারুতস্রোতাংসি যস্য তত্তথা;, যদা হি একোঽপি ধাতুপাচকোঽগ্নিরুপহতঃ মারুতো বা ধাতুপোষকরসবাহী ব্যানরূপঃ ক্বচিদুপহতো ভবতি, তথা স্রোতো বা ধাতুপোষকরসবহমুপহতং স্যাত্, তদা অশিতাদিকং ধাতূনামবর্ধকত্বান্নোপচযাদিকারকমিতি ভাবঃ| কেবলমিতি কৃত্স্নং শরীরং; কিংবা কেবলমিতি অধর্মরহিতম্, অধর্মযুক্তে হি শরীরে বিফলমশিতাদি ভবতীতি| ননু শরীরধাতূনাং প্রকৃতিস্থিতানাং স্বত এবোপচযাদ্যস্তি, তত্ কিমশিতাদিনা ক্রিযত ইত্যাহ- ধাতবো হীত্যাদি| ধাতুরাহারো যেষাং তে ধাত্বাহারাঃ; ধাতবো রসাদযো নিত্যং ক্ষীযমাণা অশিতাদিজনিতধাত্বাহারা এব সন্তঃ পরং স্বাস্থ্যমনুবর্তন্তে, নান্যথেত্যর্থঃ||৩||
Adhikarana 3 (4) · Śloka 4
তত্রাহারপ্রসাদাখ্যো রসঃ কিট্টং চ মলাখ্যমভিনির্বর্ততে| কিট্টাত্ স্বেদমূত্রপুরীষবাতপিত্তশ্লেষ্মাণঃ কর্ণাক্ষিনাসিকাস্যলোমকূপপ্রজননমলাঃ কেশশ্মশ্রুলোমনখাদযশ্চাবযবাঃ পুষ্যন্তি| পুষ্যন্তি ত্বাহাররসাদ্রসরুধিরমাংসমেদোস্থিমজ্জশুক্রৌজাংসি পঞ্চেন্দ্রিযদ্রব্যাণি ধাতুপ্রসাদসঞ্জ্ঞকানি শরীরসন্ধিবন্ধপিচ্ছাদযশ্চাবযবাঃ| তে সর্ব এব ধাতবো মলাখ্যাঃ প্রসাদাখ্যাশ্চ রসমলাভ্যাং পুষ্যন্তঃ স্বং মানমনুবর্তন্তে যথাবযঃশরীরম্| এবং রসমলৌ স্বপ্রমাণাবস্থিতাবাশ্রযস্য সমধাতোর্ধাতুসাম্যমনুবর্তযতঃ| নিমিত্ততস্তু ক্ষীণবৃদ্ধানাং প্রসাদাখ্যানাং ধাতূনাং বৃদ্ধিক্ষযাভ্যামাহারমূলাভ্যাং রসঃ সাম্যমুত্পাদযত্যারোগ্যায, কিট্টং চ মলানামেবমেব| স্বমানাতিরিক্তাঃ পুনরুত্সর্গিণঃ শীতোষ্ণপর্যাযগুণৈশ্চোপচর্যমাণা মলাঃ শরীর ধাতুসাম্যকরাঃ সমুপলভ্যন্তে||৪||
तत्राहारप्रसादाख्यो रसः किट्टं च मलाख्यमभिनिर्वर्तते| किट्टात् स्वेदमूत्रपुरीषवातपित्तश्लेष्माणः कर्णाक्षिनासिकास्यलोमकूपप्रजननमलाः केशश्मश्रुलोमनखादयश्चावयवाः पुष्यन्ति| पुष्यन्ति त्वाहाररसाद्रसरुधिरमांसमेदोस्थिमज्जशुक्रौजांसि पञ्चेन्द्रियद्रव्याणि धातुप्रसादसञ्ज्ञकानि शरीरसन्धिबन्धपिच्छादयश्चावयवाः| ते सर्व एव धातवो मलाख्याः प्रसादाख्याश्च रसमलाभ्यां पुष्यन्तः स्वं मानमनुवर्तन्ते यथावयःशरीरम्| एवं रसमलौ स्वप्रमाणावस्थितावाश्रयस्य समधातोर्धातुसाम्यमनुवर्तयतः| निमित्ततस्तु क्षीणवृद्धानां प्रसादाख्यानां धातूनां वृद्धिक्षयाभ्यामाहारमूलाभ्यां रसः साम्यमुत्पादयत्यारोग्याय, किट्टं च मलानामेवमेव| स्वमानातिरिक्ताः पुनरुत्सर्गिणः शीतोष्णपर्यायगुणैश्चोपचर्यमाणा मलाः शरीर धातुसाम्यकराः समुपलभ्यन्ते||४||
🔊 Audio coming soon
যোঽসৌ ধাতূনামাহারস্তমাহ- তত্রেত্যাদি| তত্রেতি অশিতাদৌ| রসঃ কিট্টং চাভিনিবর্তত ইত্যন্বযঃ| আহারপ্রসাদ ইত্যাখ্যা যস্য স তথা; প্রসাদঃ সারঃ| কিট্টম্ অসারভাগঃ| কিট্টাদিতি কিট্টাংশাত্ ; তেন অন্নাদ্যঃ কিট্টাংশস্ততো মূত্রপুরীষে ভবতো বাযুশ্চ, রসাত্ পচ্যমানান্মলঃ কফঃ, এবমাদি গ্রহণ্যধ্যাযে বক্ষ্যমাণমনুসর্তব্যং; বক্ষ্যতি হি- “কিট্টমন্নস্য বিণ্মূত্রং রসস্য তু কফোঽসৃজঃ| পিত্তং মাংসস্য খমলো মলঃ স্বেদস্তু মেদসঃ|| স্যাত্ কিট্টং কেশলোমাস্থ্নো মজ্জ্ঞঃ স্নেহোঽক্ষিবিট্ ত্বচাম্” (চি. ১৫) ইতি| আদিগ্রহণাদক্ষিস্নেহাদি গ্রাহ্যম্| যদ্যপি চ বাতোঽনশনাদপ্যুপলভ্যতে, তথাঽপি রূক্ষকিট্টাদিভোজনমলাংশাদপ্যুত্পদ্যত এবেতি কিট্টাদ্বাতোত্পত্তির্যুক্তৈব; ন চাযং নিযমো যন্মলাদেবোত্পদ্যত ইতি, ব্যাযামাদবগাহাদেরপি চ বাতাদিসদ্ভাবাত্| প্রজননং লিঙ্গম্| রসপোষ্যমাহ- পুষ্যন্তি ত্বিত্যাদি| পঞ্চেন্দ্রিযদ্রব্যাণীতি পৃথিব্যাদীনি ঘ্রাণাদীন্দ্রিযকারণানি| ধাতুপ্রসাদসঞ্জ্ঞকানীতি অত্যর্থশুদ্ধেনৈব ধাতুপ্রসাদেনেন্দ্রিযাণ্যারভ্যন্ত ইতি দর্শযতি| শরীরং বধ্নাতীতি শরীরবন্ধঃ স্নাযুসিরাদিঃ| আদিগ্রহণাদার্তবস্তন্যাদিগ্রহণম্| অত্রাহাররসাদ্ রক্তাদিপোষণে কেচিদ্ব্রুবতে- যত্- রসো রক্তরূপতযা পরিণমতি, রক্তং চ মাংসরূপতযা, এবং মাংসাদযোঽপ্যুত্তরোত্তরধাতুরূপতযা পরিণমন্তি| অত্রাপি চ পক্ষে কেচিদ্ব্রুবতে- ক্ষীরাদ্যথা সর্বাত্মনা দধি ভবতি, তথা কৃত্স্নো রসো রক্তং ভবতি; এবং রক্তাদযোঽপি মাংসাদিরূপা ভবন্তি| অন্যে ত্বাহুঃ- কেদারীকুল্যান্যাযেন রসস্য ধাতুপোষণং; তত্রান্নাদুত্পন্নো রসো ধাতুরূপং রসমধিগম্য কিযতাঽপ্যংশেন তং রসং বর্ধযতি; অপরশ্চ রসরাশিস্তত্র গতঃ সন্ শোণিতগন্ধবর্ণযুক্তত্বাচ্ছোণিতমিব ভূত্বা কিযতাঽপি শোণিতসমানেনাংশেন ধাতুরূপং শোণিতং পুষ্ণাতি, শেষশ্চ ভাগো মাংসং যাতি, তত্রাপি শোণিতবদ্ব্যবস্থা; তথা মেদঃপ্রভৃতিষ্বপীতি| অত এব চ মুখ্যার্থোঽযং গ্রন্থো ভবতি; যথা- “রসাদ্রক্তং ততো মাংসং মাংসান্মেদস্ততোঽস্থি চ| অস্থ্নো মজ্জা ততঃ শুক্রং শুক্রাদ্গর্ভঃ প্রসাদজঃ ” (চি. ১৫) ইতি; তথা হারীতেঽপ্যুক্তং- “রসঃ সপ্তাহাদর্বাক্ পরিবর্তমানঃ শ্বেতকপোতহরিতহারিদ্রপদ্মকিংশুকালক্তকরসপ্রখ্যশ্চাযং যথাক্রমং দিবসপরিবর্তাদ্বর্ণপরিবর্তমাপদ্যমানঃ পিত্তোষ্মোপরাগাচ্ছোণিতত্বমাপদ্যতে” ইতি; তথা সুশ্রুতেঽপ্যুক্তং- “স খল্বাপ্যো রস একৈকস্মিন্ ধাতৌ ত্রীণি ত্রীণি কলাসহস্রাণি পঞ্চদশ চ কলা অবতিষ্ঠতে, এবং মাসেন রসঃ শুক্রীভবতি” (সু. সূ. ১৪) ইতি| অন্যে ত্বাহুঃ- খলেকপোতন্যাযেনাযমন্নরসঃ পৃথক্পৃথগ্ধাতুমার্গে গতঃ সন্ রসাদীন্ পোষযতি, ন ত্বস্য ধাতুপোষকো রসভাগো ধাত্বন্তরেণ সমং সম্বন্ধমপ্যনুভবতি, রসাদিপোষকাণি স্রোতাংস্যুত্তরোত্তরং সূক্ষ্মমুখানি দীর্ঘাণি চ, তেনৈব রসপোষকরসভাগো রসমার্গচারিত্বাদ্রসং পোষযতি, এবং রসপোষণকালাদুত্তরকালং (রক্তপোষকমার্গচারিত্বাত্ ) রক্তপোষকো রসভাগো রক্তং পোষযতি, তথা শোণিতপোষণকালাদুত্তরকালং মাংসপোষকো রসভাগো মাংসং পোষযতি, বিদূরসূক্ষ্মমার্গচারিত্বাত্; এবং মেদঃপ্রভৃতিপোষণেঽপি জ্ঞেযম্| তেন, “রসাদ্রক্তং ততো মাংসং” ইত্যাদেরযমর্থঃ- যত্- রসপুষ্টিকালাদুত্তরকালং রক্তং জাযতে, তথা রক্তপুষ্টিকালাদুত্তরকালং মাংসং প্রজাযতে ইত্যাদি| এবং সুশ্রুতহারীতবচনে অপি ব্যাখ্যেযে| যচ্চ “রক্তং বিবদ্ধমার্গত্বান্মাংসাদীন্ন প্রপদ্যতে” (চি.অ.৮) ইতি রাজযক্ষ্মণি বক্ষ্যতি, তদ্ধৃদযচারিশোণিতাভিপ্রাযেণ, ন তু পোষকশোণিতাভিপ্রাযেণ | কিঞ্চ, পরিণামপক্ষে বৃষ্যপ্রযোগস্য রক্তাদিরূপতাপত্তিক্রমেণাতিচিরেণ শুক্রং ভবতীতি, ক্ষীরাদযশ্চ সদ্য এব বৃষ্যা দৃশ্যন্তে; খলেকপোতপক্ষে তু বৃষ্যোত্পন্নো রসঃ প্রভাবাচ্ছীঘ্রমেব শুক্রেণ সম্বদ্ধঃ সন্ তত্পুষ্টিং করোতীতি যুক্তং; তথা রসদুষ্টৌ সত্যাং পরিণামপক্ষে তজ্জন্মনাং শোণিতাদীনাং সর্বেষামেব দুষ্টিঃ স্যাত্, দুষ্টকারণজাতত্বাত্| খলেকপোতপক্ষে তু যদ্ধাতুপোষকো রসভাগো দুষ্টঃ স এব দুষ্যতি ন সর্বে, তদিতরেষামদুষ্টকারণত্বাত্; তথা মেদোবৃদ্ধৌ সত্যাং ভূরিকারণত্বেনাস্থ্নাঽপি ভূযসা ভবিতব্যং, দৃশ্যতে চ ভূরিমেদস ইতরধাতুপরিক্ষযঃ; বচনং চ- “মেদস্বিনো মেদ এবোপচীযতে, ন তথেতরে ধাতবঃ” (সূ.অ.২১) ইতি; এবমাদি পরিণামবাদে দূষণম্| এষু চ পক্ষেষু সর্বাত্মপরিণামবাদো বিরুদ্ধ এব, যেন সর্বাত্মপরিণামে ত্রিচতুরোপবাসেনৈব নীরসত্বাচ্ছরীরস্য মরণং স্যাত্, মাসোপবাসে চ কেবলং শুক্রমযং শরীরং স্যাত্| কেদারীকুল্যান্যাযস্তু তুল্যবল এব খলেকপোতন্যাযেন; যতো যদুক্তং বৃষ্যপ্রভাবং প্রতি তত্ কেদারীকুল্যাপক্ষেঽপি প্রভাবাদেব শীঘ্রং রক্তাদিধাতূনভিগম্য শুক্রং জনযিষ্যতি বৃষ্যং, যথা খলেকপোতপক্ষেঽপি প্রভবাদিতি| যত্তু রসদুষ্টৌ শোণিতদূষণং; তন্ন ভবতি, ধাতুভূতশোণিতাংশপোষকস্য রসভাগস্যাদুষ্টত্বাত্; ইতি সমানং পূর্বেণ| অত্রাপি হি পক্ষে ন সর্বো রসো ধাতুরূপশোণিততামাপদ্যতে, কিং তর্হি কশ্চিদেব শোণিতসমানো ভাগঃ; শেষস্তু শোণিতস্থানগতত্বেন কিঞ্চিচ্ছোণিতসমানবর্ণাদিত্বাচ্চ শোণিতমুচ্যতে; অনেন ন্যাযেন মেদোবৃদ্ধৌ সত্যামস্থিবৃদ্ধিরপি নিরস্তা, যতো ন মেদসা অস্থি পোষ্যতে, অপি তর্হি মেদঃস্থানগতেনৈব রসেন মেদোনুকারিণা| এবমনযোঃ পক্ষযোর্মহাজনাদৃতত্বেন তুল্যন্যাযত্বেন চ নৈকমপি নিশ্চিতং ব্রূমঃ, বুদ্ধিবিভবান্ন পক্ষবলাবলম্, অত্র ন কশ্চিত্ কার্যবিরোধ ইত্যুপরম্যতে| নন্বাহাররসাদ্রসাদযঃ পুষ্যন্তীতি বদতা ধাতুরসাদাহাররসোত্পাদঃ পৃথক্ স্বীক্রিযতে, ততশ্চ তস্য কিং স্থানং কিংবা প্রমাণমিতি কিমিতি নোক্তম্? উচ্যতে- ন তস্যাহারোত্কর্ষাপকর্ষাবেবংবিধৌ, উত্কর্ষাপকর্ষস্য নিশ্চিতপ্রমাণত্বাভাবাত্; স্থানং তু ধমন্য এব| পোষকাহাররসস্য তস্য চ পৃথগ্রসাদিধাতুভ্যঃ প্রদেশান্তরগ্রহণং ন ক্রিযতে, রসাদিকারণরূপতযা রসাদিগ্রহণেনৈব গ্রহণাত্| অত্র যদ্যপ্যোজঃ সপ্তধাতুসাররূপং, তেন ধাতুগ্রহণেনৈব লভ্যতে, তথাঽপি প্রাণধারণকর্তৃত্বেন পৃথক্ পঠিতং; যে তু শুক্রজন্যমোজ ইচ্ছন্তি, তেষামষ্টমো ধাতুরোজঃ স্যাদিতি পক্ষে চাতিদেশং কৃত্বা বক্ষ্যতি- “রসাদীনাং শুক্রান্তানাং যত্ পরং তেজঃ, তত্ খল্বোজঃ” (সু.সূ.অ.১৫) ইতি| উপপাদিতপোষণানাং ধাতুমলানাং প্রকৃত্যনুবিধানমুপসংহরতি- তে সর্ব ইত্যাদি| মলাখ্যা অপি স্বেদমূত্রাদযঃ স্বমানাবস্থিতা দেহধারণাদ্ধাতবো ভবন্তীত্যুক্তং- ধাতবো মলাখ্যা ইতি| যথাবযঃশরীরমিতি যস্মিন্ বযসি বাল্যাদৌ যাদৃশং মানং ধাতূনাং তাদৃশং পুষ্যন্তঃ, তথা যস্মিঞ্ শরীরে প্রকৃত্যা দীর্ঘে হ্রস্বে কৃশে বা স্থূলে বা যাদৃশং মানং ধাতূনাং তাদৃশং পুষ্যন্ত ইতি যোজনা| এবমিত্যাদৌ স্বপ্রমাণাবস্থিতাবিতি অনতিরিক্তাবন্যূনৌ চ| আশ্রযস্যেতি শরীরস্য; যথাবত্পক্বৌ সর্বাশ্রযং পশ্চাদ্ধমনীভিঃ প্রপদ্যেতে, সর্বশরীরমিত্যর্থঃ| সমধাতোরিতি সমরসাদেঃ সমস্বেদমূত্রাদেশ্চ| নিমিত্তত ইত্যাদি| নিমিত্তত ইত্যনেনানিমিত্তে অরিষ্টরূপে ক্ষযবৃদ্ধী নিরাকরোতি| বৃদ্ধিক্ষযাভ্যামাহারমূলাভ্যামিতি যথাসঙ্খ্যং বৃদ্ধক্ষীণাহারকৃতাভ্যাম্, এতেনাহারবিশেষকৃতবৃদ্ধিক্ষযো রসঃ সাম্যং করোতীত্যর্থঃ | ধাতুসাম্যস্যারোগ্যত্বে সিদ্ধেঽপি যদারোগ্যাযেতি ব্রূতে তেন প্রাকৃতধাতূনাং ক্ষযেণ বাঽতিবৃদ্ধ্যা বা সাম্যং নিরাকরোতি, অস্য সাম্যস্য রোগকর্তৃত্বাদেব| কিট্টং চ মলানামেবমেবেতি যথা রসস্তথা কিট্টমপ্যারোগ্যায মলানাং সাম্যং প্রতিপাদিতরসক্রমেণ করোতি| বৃদ্ধমলানাং চিকিত্সান্তরমাহ- স্বমানেত্যাদি| উত্সর্গো বহির্নিঃসরণং সংশোধনরূপমেষাং শাস্ত্রোক্তমস্তি, উত্সর্গং বা বহন্তীত্যুত্সর্গিণঃ | বৃদ্ধানাং মলানাং চিকিত্সান্তরমাহ- শীতোষ্ণেত্যাদি| পর্যযঃ বিপর্যযঃ; তেন শীতোষ্ণবিপরীতগুণৈরিত্যর্থঃ; তেন, শীতসমুত্থে মলে উষ্ণং তথোষ্ণসমুত্থে শীতমুপচারো ভবতি| আদিশব্দশ্চাত্র লুপ্তনির্দিষ্টঃ; তেন স্নিগ্ধরূক্ষাদীনামপি বিপরীতগুণানাং গ্রহণম্| কিংবা পর্যযগুণা দ্বন্দ্বগুণাঃ স্নিগ্ধরূক্ষমৃদুতীক্ষ্ণাদযঃ, তৈশ্চ যথাযোগ্যতযোপচর্যমাণা ইতি জ্ঞেযম্| এতেন, বৃদ্ধমলানাং ত্রিবিধোঽপ্যুপক্রমো নিদানবর্জনশোধনশমনরূপ উক্তো ভবতি; তত্র নিদানবর্জনং বৃদ্ধমলে মলবৃদ্ধিহেত্বাহারপরিত্যাগাদল্পমলাহারোপযোগাদ্বা বোদ্ধব্যং, সংশোধনং চ উত্সর্গিণ ইত্যনেনোক্তং, শমনং চ শীতোষ্ণেত্যাদিগ্রন্থেনোক্তম্||৪||
Adhikarana 4 (5) · Śloka 5
তেষাং তু মলপ্রসাদাখ্যানাং ধাতূনাং স্রোতাংস্যযনমুখানি| তানি যথাবিভাগেন যথাস্বং ধাতূনাপূরযন্তি| এবমিদং শরীরমশিতপীতলীঢখাদিতপ্রভবম্| অশিতপীতলীঢখাদিতপ্রভবাশ্চাস্মিঞ্ শরীরে ব্যাধযো ভবন্তি| হিতাহিতোপযোগবিশেষাস্ত্বত্র শুভাশুভবিশেষকরা ভবন্তীতি||৫||
तेषां तु मलप्रसादाख्यानां धातूनां स्रोतांस्ययनमुखानि| तानि यथाविभागेन यथास्वं धातूनापूरयन्ति| एवमिदं शरीरमशितपीतलीढखादितप्रभवम्| अशितपीतलीढखादितप्रभवाश्चास्मिञ् शरीरे व्याधयो भवन्ति| हिताहितोपयोगविशेषास्त्वत्र शुभाशुभविशेषकरा भवन्तीति||५||
🔊 Audio coming soon
অযনানি চ তানি মুখানি চেত্যযনমুখানি, অত্র আযান্ত্যনেনেত্যযনানি মার্গাণি, মুখানি তু যৈঃ প্রবিশন্তি; এতেন মলানাং ধাতূনাং চ যদেবাযনং তদেব প্রবেশমুখমিতি নান্যেন প্রবেশো নান্যেন চ গমনমিত্যুক্তং ভবতি| রসাদীনাং যথাস্বনাম স্রোতোমুখং চাযনং চ| কিংবা, অযনস্য গমনস্য মুখানি মার্গাণি; তেন, অযনমুখানি গতিমার্গাণীত্যর্থঃ| তানি চ স্রোতাংসি মলপ্রসাদপূরিতানি ধাতূন্ যথাস্বমিতি যদ্যস্য পোষ্যং তচ্চ তত্ পূরযতি| যথাবিভাগেনেতি যস্য ধাতোর্যো বিভাগঃ প্রমাণং তেনৈব প্রমাণেন পূরযতি, তাদৃক্প্রমাণান্যেব পুষ্যন্তি, নাধিকন্যূনানীত্যর্থঃ| এতচ্চ প্রকৃতিস্থানাং কর্ম, বিকৃতানাং তু ন্যূনাতিরিক্তধাতুকরণমস্ত্যেবেতি বোদ্ধব্যম্| উক্তং চান্যত্র- “স্রোতসা চ যথাস্বেন ধাতুঃ পুষ্যতি ধাতুনা” (চি. ৮) ইতি| উপসংহরতি- এবমিত্যাদি| কথমশিতাদের্বিরুদ্ধযোঃ শরীরতদুপঘাতকরোগযোরুত্পাদ ইত্যাহ- হিতাহিতেত্যাদি| হিতরূপোঽশিতাদিবিশেষঃ শুভরূপবিশেষকারকঃ, অহিতরূপস্ত্বশিতাদিবিশেষোঽশুভরূপবিশেষকরো ভবতি; তেন নৈকরূপাত্ কারণাদ্বিরুদ্ধকার্যোদয ইতি ভাবঃ||৫||
Adhikarana 5 (6) · Śloka 6
এবংবাদিনং ভগবন্তমাত্রেযমগ্নিবেশ উবাচ- দৃশ্যন্তে হি ভগবন্! হিতসমাখ্যাতমপ্যাহারমুপযুঞ্জানা ব্যাধিমন্তশ্চাগদাশ্চ, তথৈবাহিতসমাখ্যাতম্; এবং দুষ্টে কথং হিতাহিতোপযোগবিশেষাত্মকং শুভাশুভবিশেষমুপলভামহ ইতি||৬||
एवंवादिनं भगवन्तमात्रेयमग्निवेश उवाच- दृश्यन्ते हि भगवन्! हितसमाख्यातमप्याहारमुपयुञ्जाना व्याधिमन्तश्चागदाश्च, तथैवाहितसमाख्यातम्; एवं दुष्टे कथं हिताहितोपयोगविशेषात्मकं शुभाशुभविशेषमुपलभामह इति||६||
🔊 Audio coming soon
দৃশ্যন্তে হি ভগবন্নিত্যাদৌ তথৈবাহিতসমাখ্যাতমুপযুঞ্জানা ব্যাধিমন্তশ্চাগদাশ্চেতি সম্বন্ধঃ| বিশেষাত্মকমিতি বিশেষোদ্ভবম্||৬||
Adhikarana 6 (7) · Śloka 7
তমুবাচ ভগবানাত্রেযঃ- ন হিতাহারোপযোগিনামগ্নিবেশ! তন্নিমিত্তা ব্যাধযো জাযন্তে, ন চ কেবলং হিতাহারোপযোগাদেব সর্বব্যাধিভযমতিক্রান্তং ভবতি, সন্তি হ্যৃতেঽপ্যহিতাহারোপযোগাদন্যা রোগপ্রকৃতযঃ, তদ্যথা- কালবিপর্যযঃ, প্রজ্ঞাপরাধঃ, শব্দস্পর্শরূপরসগন্ধাশ্চাসাত্ম্যা ইতি| তাশ্চ রোগপ্রকৃতযো রসান্ সম্যগুপযুঞ্জানমপি পুরুষমশুভেনোপপাদযন্তি; তস্মাদ্ধিতাহারোপযোগিনোঽপি দৃশ্যন্তে ব্যাধিমন্তঃ| অহিতাহারোপযোগিনাং পুনঃ কারণতো ন সদ্যো দোষবান্ ভবত্যপচারঃ| ন হি সর্বাণ্যপথ্যানি তুল্যদোষাণি, ন চ সর্বে দোষাস্তুল্যবলাঃ, ন চ সর্বাণি শরীরাণি ব্যাধিক্ষমত্বে সমর্থানি ভবন্তি| তদেব হ্যপথ্যং দেশকালসংযোগবীর্যপ্রমাণাতিযোগাদ্ভূযস্তরমপথ্যং সম্পদ্যতে| স এব দোষঃ সংসৃষ্টযোনির্বিরুদ্ধোপক্রমো গম্ভীরানুগতশ্চিরস্থিতঃ প্রাণাযতনসমুত্থো মর্মোপঘাতী কষ্টতমঃ ক্ষিপ্রকারিতমশ্চ সম্পদ্যতে| শরীরাণি চাতিস্থূলান্যতিকৃশান্যনিবিষ্টমাংসশোণিতাস্থীনি দুর্বলান্যসাত্ম্যাহারোপচিতান্যল্পাহারাণ্যল্পসত্ত্বানি চ ভবন্ত্যব্যাধিসহানি, বিপরীতানি পুনর্ব্যাধিসহানি| এভ্যশ্চৈবাপথ্যাহারদোষশরীরবিশেষেভ্যো ব্যাধযো মৃদবো দারুণাঃ ক্ষিপ্রসমুত্থাশ্চিরকারিণশ্চ ভবন্তি| ত এব বাতপিত্তশ্লেষ্মাণঃ স্থানবিশেষে প্রকুপিতা ব্যাধিবিশেষানভিনির্বর্তযন্ত্যগ্নিবেশ!||৭||
तमुवाच भगवानात्रेयः- न हिताहारोपयोगिनामग्निवेश! तन्निमित्ता व्याधयो जायन्ते, न च केवलं हिताहारोपयोगादेव सर्वव्याधिभयमतिक्रान्तं भवति, सन्ति ह्यृतेऽप्यहिताहारोपयोगादन्या रोगप्रकृतयः, तद्यथा- कालविपर्ययः, प्रज्ञापराधः, शब्दस्पर्शरूपरसगन्धाश्चासात्म्या इति| ताश्च रोगप्रकृतयो रसान् सम्यगुपयुञ्जानमपि पुरुषमशुभेनोपपादयन्ति; तस्माद्धिताहारोपयोगिनोऽपि दृश्यन्ते व्याधिमन्तः| अहिताहारोपयोगिनां पुनः कारणतो न सद्यो दोषवान् भवत्यपचारः| न हि सर्वाण्यपथ्यानि तुल्यदोषाणि, न च सर्वे दोषास्तुल्यबलाः, न च सर्वाणि शरीराणि व्याधिक्षमत्वे समर्थानि भवन्ति| तदेव ह्यपथ्यं देशकालसंयोगवीर्यप्रमाणातियोगाद्भूयस्तरमपथ्यं सम्पद्यते| स एव दोषः संसृष्टयोनिर्विरुद्धोपक्रमो गम्भीरानुगतश्चिरस्थितः प्राणायतनसमुत्थो मर्मोपघाती कष्टतमः क्षिप्रकारितमश्च सम्पद्यते| शरीराणि चातिस्थूलान्यतिकृशान्यनिविष्टमांसशोणितास्थीनि दुर्बलान्यसात्म्याहारोपचितान्यल्पाहाराण्यल्पसत्त्वानि च भवन्त्यव्याधिसहानि, विपरीतानि पुनर्व्याधिसहानि| एभ्यश्चैवापथ्याहारदोषशरीरविशेषेभ्यो व्याधयो मृदवो दारुणाः क्षिप्रसमुत्थाश्चिरकारिणश्च भवन्ति| त एव वातपित्तश्लेष्माणः स्थानविशेषे प्रकुपिता व्याधिविशेषानभिनिर्वर्तयन्त्यग्निवेश!||७||
🔊 Audio coming soon
তন্নিমিত্তা ইতি হিতাহারনিমিত্তাঃ| ন কেবলমিতি ন পরম্| রোগপ্রকৃতয ইতি রোগকারণানি| অহিতাহারোপযোগিনামিত্যাদি| কারণত ইতি নিমিত্তান্তরাত্ প্রতিবন্ধকাত্; তচ্চ কারণং ‘তদেব হ্যপথ্যং’ ইত্যাদিবক্ষ্যমাণগ্রন্থবিপরীতং বোদ্ধব্যম্| সদ্য ইতি তত্কালম্| অনেনাপথ্যস্য রোগজননং প্রতি কালান্তরবিকারকর্তৃত্বং প্রাযো ভবতীতি দর্শযতি; অন্যথা সদ্য ইত্যনর্থকং স্যাত্, কালান্তরেঽপি দোষাকর্তৃত্বাত্| দোষবানিতি ব্যাধিজনকঃ| অপচার ইতি অহিতাহারোপযোগঃ| উক্তে কারণমাহ- নহীত্যাদি| তুল্যদোষাণীতি তুল্যদোষকরাণি| ব্যাধিক্ষমত্বং ব্যাধিবলবিরোধিত্বং ব্যাধ্যুত্পাদপ্রতিবন্ধকত্বমিতি যাবত্| তদেবাপথ্যতুল্যদোষতাদি বিবৃণোতি- তদেবেত্যাদি| অত্র যদ্যপি প্রস্তুতত্বাদপথ্যপ্রতিবন্ধকানি কারণানি বক্তব্যানি, তথাঽপি সমানন্যাযতযাঽপথ্যশক্তিবর্ধকান্যুচ্যন্তে| তত্র দেশাদীনাং যোগাদিতি অনুগুণদেশাদিযোগাত্; যথা- ব্রীহিঃ পিত্তকর্তৃত্বেনাপথ্যঃ, স চানূপদেশযোগাদ্ভূযস্তরমপথ্যো ভবতি, ধন্বদেশে তু হীনবলো ভবতি; তথা শরত্কালস্যানুগুণস্য যোগাদ্বলবান্ ভবতি, হেমন্তে দুর্বলঃ; সংযোগাদ্যথা- স ব্রীহির্দধিফাণিতাদিযুক্তো বলবান্ , মধ্বাদিযুক্তশ্চ দুর্বলঃ; বীর্যাদ্যথা- স এবোষ্ণীকৃতো বলবান্, শীতস্তু দুর্বলঃ; স এব চ প্রামাণাতিযোগাদ্বলী, হীনমাত্রস্ত্ববলঃ; ইত্যাদ্যনুসর্তব্যম্| দোষতুল্যবলতামাহ- স এব দোষ ইত্যাদি| সংসৃষ্টা মিলিতা বহবো যোনযঃ কারণানি যস্য স তথা, কিংবা সংসৃষ্টযোনিরিতি অনুগুণদূষ্যঃ; যথা- পিত্তস্য রক্তং দূষ্যমাসাদ্য কষ্টত্বং ক্ষিপ্রকারিত্বং চ ভবতি| বিরুদ্ধোপক্রমো যথা- পিত্তং মেহারম্ভকং, বচনং হি- “পিত্তমেহাঃ সর্ব এব যাপ্যাঃ, বিরুদ্ধোপক্রমত্বাত্” (নি.অ.৪) ইতি; বিরুদ্ধতা চোপক্রমস্যাত্র যত্ পিত্তহরং মধুরাদি তন্মেহপ্রধানদূষ্যমেদসো বিরুদ্ধং, মেদোনুগুণং তু কট্বাদি পিত্তে বিরুদ্ধমিতি| গম্ভীরানুগত ইতি গম্ভীরমজ্জাদিধাতুগতঃ; বচনং হি- “ত্বঙ্মাংসাশ্রযমুত্তানং গম্ভীরং ত্বন্তরাশ্রযম্” (চি.অ.৩৯) ইতি| চিরস্থিত ইতি দেহে চিরকালাবস্থানেন কৃতমূলত্বাত্ কষ্টসাধ্যঃ| প্রাণাযতনসমুত্থ ইতি অগ্রেঽধ্যাযে (সূ.অ.২৯) বক্ষ্যমাণশঙ্খাদিদশপ্রাণাযতনাশ্রযী| মর্মোপঘাতীতি প্রাণাযতনব্যতিরিক্তক্ষিপ্রতলহৃদযাদিমর্মোপঘাতকারী| মর্মঘাতিত্বেনৈব মর্মবিশেষপ্রাণাযতনসমুত্থত্বে লব্ধে পুনস্তদ্বচনং প্রাণাযতনমর্মাশ্রযিণো বিশেষেণ কষ্টত্বপ্রতিপাদনার্থম্| কষ্টতম ইতি বহুদুঃখকর্তৃত্বেনাসাধ্যত্বেন চ| ক্ষিপ্রকারিতম ইতি আশুবিকারকারিতমঃ| চকারাত্ সংসৃষ্টযোনিত্বাদিহেতূনামল্পত্বেন কষ্ট-কষ্টতর-ক্ষিপ্রকারি-ক্ষিপ্রকারিতরাদিবিশেষাশ্চ ভবন্তীতি দর্শযতি; যথোক্তসর্বহেতুমেলকে কষ্টতমঃ ক্ষিপ্রকারিতমশ্চ ভবতীতি জ্ঞেযং, কষ্টতমত্বাদি চ যথাযোগ্যতযা জ্ঞেযং; বিরুদ্ধোপক্রমো দোষঃ কষ্ট এব ভবতি ন ক্ষিপ্রকারী| ব্যাধ্যক্ষমশরীরাণ্যাহ- শরীরাণি চেত্যাদি| অনিবিষ্টানি শ্লথানি মাংসাদীনি যেষাং শরীরাণাং তানি তথা; কিংবা, অনিবিষ্টানীতি বিষমাণি| উপচিতানীতি সংবর্ধিতানি; অসাত্ম্যপুষ্টং হি শরীরং ভূরিদোষভাবিতমেব ভবতীতি ভাবঃ| বিপরীতানীতি অনতিস্থূলত্বাদিযুক্তানি| ব্যাধিসহানীতি ব্যাধ্যুত্পাদকপ্রতিবন্ধকানি| এতচ্চ শরীরমধিকৃত্য বৈপরীত্যং ব্যাধিসহত্বে উদাহরণার্থমুপন্যস্তং, তেন যথোক্তাপথ্যবলবৈপরীত্যং দোষবলবৈপরীত্যং চ ন সদ্যো ব্যাধিকারকং ভবতীত্যেতদপ্যুক্তং বোদ্ধব্যম্| এতদেবাপথ্যাহারদোষশরীরাণামেবাবলবত্ত্ববলবত্ত্বাভ্যাং লক্ষণবিশেষং যথাযোগ্যতযা মৃদ্বাদিব্যাধিকারণত্বেনোপসংহরন্নাহ- এভ্যশ্চৈবেত্যাদি| বিশেষা যথোক্তা উক্তবিপরীতাশ্চ; তত্রোক্তবিপরীতবিশেষান্মৃদবস্তথা চিরকারিণশ্চ ভবন্তি, যথোক্তাপথ্যাদিবিশেষাত্তু দারুণাঃ ক্ষিপ্রকারিণশ্চ ভবন্তীতি মন্তব্যম্| অনেন প্রসঙ্গেন বাতাদীনাং রসাদিস্থানবিশেষেষু কুপিতানাং যে ব্যাধযো ভবন্তি তান্ দর্শযিতুমাহ- ত এবেত্যাদি||৭||
Adhikarana 7 (8) · Śloka 8
তত্র রসাদিষু স্থানেষু প্রকুপিতানাং দোষাণাং যস্মিন্ স্থানে যে যে ব্যাধযঃ সম্ভবন্তি তাংস্তান্ যথাবদনুব্যাখ্যাস্যামঃ||৮||
तत्र रसादिषु स्थानेषु प्रकुपितानां दोषाणां यस्मिन् स्थाने ये ये व्याधयः सम्भवन्ति तांस्तान् यथावदनुव्याख्यास्यामः||८||
🔊 Audio coming soon
তত্র রসেত্যাদৌ প্রকুপিতানাং দোষাণামিতি অনিযমেন রসে কুপিতো বাযুর্বা পিত্তং বা শ্লেষ্মা বা সংসৃষ্টা বা অশ্রদ্ধাদীনি কুর্বন্তি| সত্যপি দোষভেদেঽত্রাশ্রযস্যাভেদাদাশ্রযপ্রভাবেণৈবাশ্রদ্ধাদযো ভবন্তি, পরং দোষভেদে অশ্রদ্ধাদাবেব বাতাদিলিঙ্গং বিশিষ্টং ভবতি| কিংবা যথাযোগ্যতযা রসাশ্রযিণা বাতাদিনা অশ্রদ্ধাদিকরণং বোদ্ধব্যং, যতো ন গৌরবং বাতদুষ্টরসে ভবিতুমর্হতি; এতচ্চ নাতিসুন্দরং, তেন পূর্ব এব পক্ষো জ্যাযান্||৮||
Adhikarana 8 (9-10) · Śloka 11
অশ্রদ্ধা চারুচিশ্চাস্যবৈরস্যমরসজ্ঞতা| হৃল্লাসো গৌরবং তন্দ্রা সাঙ্গমর্দো জ্বরস্তমঃ ||৯|| পাণ্ডুত্বং স্রোতসাং রোধঃ ক্লৈব্যং সাদঃ কৃশাঙ্গতা| নাশোঽগ্নেরযথাকালং বলযঃ পলিতানি চ||১০|| রসপ্রদোষজা রোগা,...|১১|
अश्रद्धा चारुचिश्चास्यवैरस्यमरसज्ञता| हृल्लासो गौरवं तन्द्रा साङ्गमर्दो ज्वरस्तमः ||९|| पाण्डुत्वं स्रोतसां रोधः क्लैब्यं सादः कृशाङ्गता| नाशोऽग्नेरयथाकालं वलयः पलितानि च||१०|| रसप्रदोषजा रोगा,...|११|
🔊 Audio coming soon
অশ্রদ্ধাযাং মুখপ্রবিষ্টস্যাহারস্যাভ্যবহরণং ভবত্যেব পরং ত্বনিচ্ছা , অরুচৌ তু মুখপ্রবিষ্টং নাভ্যবহরতীতি ভেদঃ| আস্যবৈরস্যম্ উচিতাদাস্যরসাদন্যথাত্বম্ | অরসজ্ঞতা রসাপ্রতিপত্তিঃ| সাদঃ অঙ্গাবসাদঃ||৯-১০||-
Adhikarana 9 (11-12) · Śloka 14
...বক্ষ্যন্তে রক্তদোষজাঃ| কুষ্ঠবীসর্পপিডকা রক্তপিত্তমসৃগ্দরঃ||১১|| গুদমেঢ্রাস্যপাকশ্চ প্লীহা গুল্মোঽথ বিদ্রধিঃ| নীলিকা কামলা ব্যঙ্গঃ পিপ্প্লবস্তিলকালকাঃ||১২|| দদ্রুশ্চর্মদলং শ্বিত্রং পামা কোঠাস্রমণ্ডলম্| রক্তপ্রদোষাজ্জাযন্তে,...|১৪|
...वक्ष्यन्ते रक्तदोषजाः| कुष्ठवीसर्पपिडका रक्तपित्तमसृग्दरः||११|| गुदमेढ्रास्यपाकश्च प्लीहा गुल्मोऽथ विद्रधिः| नीलिका कामला व्यङ्गः पिप्प्लवस्तिलकालकाः||१२|| दद्रुश्चर्मदलं श्वित्रं पामा कोठास्रमण्डलम्| रक्तप्रदोषाज्जायन्ते,...|१४|
🔊 Audio coming soon
রক্তপ্রদোষজেষু কুষ্ঠগ্রহণাদেব দদ্র্বাদিলাভে সিদ্ধে পুনস্তদ্বচনং বিশেষপ্রাদুর্ভাবপ্রদর্শনার্থম্| তিলকালকাঃ তিলাকৃতযঃ| অস্রমণ্ডলং লোহিতমণ্ডলম্||১১-১২||-
Adhikarana 10 (13-14) · Śloka 15
...শৃণু মাংসপ্রদোষজান্||১৩|| অধিমাংসার্বুদং কীলং গলশালূকশুণ্ডিকে| পূতিমাংসালজীগণ্ডগণ্ডমালোপজিহ্বিকাঃ||১৪|| বিদ্যান্মাংসাশ্রযান্,...|১৫|
...शृणु मांसप्रदोषजान्||१३|| अधिमांसार्बुदं कीलं गलशालूकशुण्डिके| पूतिमांसालजीगण्डगण्डमालोपजिह्विकाः||१४|| विद्यान्मांसाश्रयान्,...|१५|
🔊 Audio coming soon
কীলশব্দেনাত্রার্শ উচ্যতে||১৩-১৪||-
Adhikarana 11 (15) · Śloka 15
... মেদঃসংশ্রযাংস্তু প্রচক্ষ্মহে| নিন্দিতানি প্রমেহাণাং পূর্বরূপাণি যানি চ||১৫||
... मेदःसंश्रयांस्तु प्रचक्ष्महे| निन्दितानि प्रमेहाणां पूर्वरूपाणि यानि च||१५||
🔊 Audio coming soon
নিন্দিতানি প্রমেহপূর্বরূপাণীতি কেশজটিলত্বাদীনি, তেষামেব নিন্দিতত্বাত্; নত্বাস্যবৈরস্যমধুরত্বাদীনি| কিংবা, নিন্দিতানীতি অতিস্থূলগতান্যাযুর্হ্রাসাদীন্যষ্টৌনিন্দিতীযোক্তানি, তেষাং চ নিন্দিতত্বং নিন্দিতাতিস্থূলসম্বদ্ধত্বেন| এবং পূর্বস্মিন্ ব্যাখ্যানে ‘যানি চ’ ইতি চকারো নিযমে, উত্তরব্যাখ্যানে তু সমুচ্চযে||১৫||
Adhikarana 12 (16) · Śloka 16
অধ্যস্থিদন্তৌ দন্তাস্থিভেদশূলং বিবর্ণতা| কেশলোমনখশ্মশ্রুদোষাশ্চাস্থিপ্রদোষজাঃ||১৬||
अध्यस्थिदन्तौ दन्तास्थिभेदशूलं विवर्णता| केशलोमनखश्मश्रुदोषाश्चास्थिप्रदोषजाः||१६||
🔊 Audio coming soon
অধ্যস্থিদন্তশব্দেন অধ্যস্থ্যধিদন্তযোর্গ্রহণম্| শূলমিতি অস্থিশূলমেব বোদ্ধব্যম্||১৬||
Adhikarana 13 (17) · Śloka 18
রুক্ পর্বণাং ভ্রমো মূর্চ্ছা দর্শনং তমসস্তথা| অরুষাং স্থূলমূলানাং পর্বজানাং চ দর্শনম্||১৭|| মজ্জপ্রদোষাত্, ...|১৮|
रुक् पर्वणां भ्रमो मूर्च्छा दर्शनं तमसस्तथा| अरुषां स्थूलमूलानां पर्वजानां च दर्शनम्||१७|| मज्जप्रदोषात्, ...|१८|
🔊 Audio coming soon
রুগিত্যাদি মজ্জদোষাজ্জ্ঞেযম্| অরুংষীতি ব্রণানি||১৭||-
Adhikarana 14 (18-19) · Śloka 19
...শুক্রস্য দোষাত্ ক্লৈব্যমহর্ষণম্| রোগি বা ক্লীবমল্পাযুর্বিরূপং বা প্রজাযতে||১৮|| ন চাস্য জাযতে গর্ভঃ পততি প্রস্রবত্যপি| শুক্রং হি দুষ্টং সাপত্যং সদারং বাধতে নরম্||১৯||
...शुक्रस्य दोषात् क्लैब्यमहर्षणम्| रोगि वा क्लीबमल्पायुर्विरूपं वा प्रजायते||१८|| न चास्य जायते गर्भः पतति प्रस्रवत्यपि| शुक्रं हि दुष्टं सापत्यं सदारं बाधते नरम्||१९||
🔊 Audio coming soon
ক্লৈব্যমিতি ধ্বজানুচ্ছ্রাযঃ| অহর্ষণং চ সত্যপি ধ্বজোত্থানে মৈথুনাশক্তিঃ | শুক্রং হি দুষ্টং সাপত্যং সদারং বাধতে নরমিতি অত্রাপত্যবাধা রোগিক্লীবাদ্যপত্যজনকত্বেন, দারবাধা তু স্রাবিগর্ভাদিজনকত্বেন||১৮-১৯||
Adhikarana 15 (20) · Śloka 20
ইন্দ্রিযাণি সমাশ্রিত্য প্রকুপ্যন্তি যদা মলাঃ| উপঘাতোপতাপাভ্যাং যোজযন্তীন্দ্রিযাণি তে||২০||
इन्द्रियाणि समाश्रित्य प्रकुप्यन्ति यदा मलाः| उपघातोपतापाभ्यां योजयन्तीन्द्रियाणि ते||२०||
🔊 Audio coming soon
উপঘাতেত্যাদৌ উপঘাতো বিনাশঃ, উপতাপস্তু কিঞ্চিদ্বৈকল্যম্||২০||
Adhikarana 16 (21) · Śloka 21
স্নাযৌ সিরাকণ্ডরাভ্যো দুষ্টাঃ ক্লিশ্নন্তি মানবম্| স্তম্ভসঙ্কোচখল্লীভির্গ্রন্থিস্ফুরণসুপ্তিভিঃ||২১||
स्नायौ सिराकण्डराभ्यो दुष्टाः क्लिश्नन्ति मानवम्| स्तम्भसङ्कोचखल्लीभिर्ग्रन्थिस्फुरणसुप्तिभिः||२१||
🔊 Audio coming soon
কণ্ডারাভ্য ইতি সপ্তম্যর্থে পঞ্চমী| খল্লী করপদাবমোটনম্| গ্রন্থিঃ স্নায্বাদিগ্রন্থিরেব||২১||
Adhikarana 17 (22) · Śloka 22
মলানাশ্রিত্য কুপিতা ভেদশোষপ্রদূষণম্| দোষা মলানাং কুর্বন্তি সঙ্গোত্সর্গাবতীব চ||২২||
मलानाश्रित्य कुपिता भेदशोषप्रदूषणम्| दोषा मलानां कुर्वन्ति सङ्गोत्सर्गावतीव च||२२||
🔊 Audio coming soon
মলানিত্যাদৌ ভেদশোষপ্রদূষণমিতি যথাসম্ভবং জ্ঞেযং; তত্র ভেদঃ পুরীষস্য, শোষস্তু বিশেষেণ সর্বমলেষু সম্ভবতি, প্রদূষণং তু প্রদুষ্টবর্ণাদিযুক্তত্বেন প্রাকৃতবর্ণাদ্যুপঘাতঃ| সঙ্গোত্সর্গাবতীব চেতি অতীব সঙ্গঃ অপ্রবৃত্তিঃ, অত্যুত্সর্গস্তু অতিপ্রবৃত্তিঃ||২২||
Adhikarana 18 (23-30) · Śloka 30
বিবিধাদশিতাত্ পীতাদহিতাল্লীঢখাদিতাত্| ভবন্ত্যেতে মনুষ্যাণাং বিকারা য উদাহৃতাঃ||২৩|| তেষামিচ্ছন্ননুত্পত্তিং সেবেত মতিমান্ সদা| হিতান্যেবাশিতাদীনি ন স্যুস্তজ্জাস্তথাঽঽমযাঃ||২৪|| রসজানাং বিকারাণাং সর্বং লঙ্ঘনমৌষধম্| বিধিশোণিতিকেঽধ্যাযে রক্তজানাং ভিষগ্জিতম্||২৫|| মাংসজানাং তু সংশুদ্ধিঃ শস্ত্রক্ষারাগ্নিকর্ম চ| অষ্টৌনিন্দিতিকেঽধ্যাযে মেদোজানাং চিকিত্সিতম্||২৬|| অস্থ্যাশ্রযাণাং ব্যাধীনাং পঞ্চকর্মাণি ভেষজম্| বস্ত্যঃ ক্ষীরসর্পীংষি তিক্তকোপহিতানি চ||২৭|| মজ্জশুক্রসমুত্থানামৌষধং স্বাদুতিক্তকম্| অন্নং ব্যবাযব্যাযামৌ শুদ্ধিঃ কালে চ মাত্রযা||২৮|| শান্তিরিন্দ্রিযজানাং তু ত্রিমর্মীযে প্রবক্ষ্যতে| স্নায্বাদিজানাং প্রশমো বক্ষ্যতে বাতরোগিকে||২৯|| নবেগান্ধারণেঽধ্যাযে চিকিত্সাসঙ্গ্রহঃ কৃতঃ| মলজানাং বিকারাণাং সিদ্ধিশ্চোক্তা ক্বচিত্ক্বচিত্||৩০||
विविधादशितात् पीतादहिताल्लीढखादितात्| भवन्त्येते मनुष्याणां विकारा य उदाहृताः||२३|| तेषामिच्छन्ननुत्पत्तिं सेवेत मतिमान् सदा| हितान्येवाशितादीनि न स्युस्तज्जास्तथाऽऽमयाः||२४|| रसजानां विकाराणां सर्वं लङ्घनमौषधम्| विधिशोणितिकेऽध्याये रक्तजानां भिषग्जितम्||२५|| मांसजानां तु संशुद्धिः शस्त्रक्षाराग्निकर्म च| अष्टौनिन्दितिकेऽध्याये मेदोजानां चिकित्सितम्||२६|| अस्थ्याश्रयाणां व्याधीनां पञ्चकर्माणि भेषजम्| बस्त्यः क्षीरसर्पींषि तिक्तकोपहितानि च||२७|| मज्जशुक्रसमुत्थानामौषधं स्वादुतिक्तकम्| अन्नं व्यवायव्यायामौ शुद्धिः काले च मात्रया||२८|| शान्तिरिन्द्रियजानां तु त्रिमर्मीये प्रवक्ष्यते| स्नाय्वादिजानां प्रशमो वक्ष्यते वातरोगिके||२९|| नवेगान्धारणेऽध्याये चिकित्सासङ्ग्रहः कृतः| मलजानां विकाराणां सिद्धिश्चोक्ता क्वचित्क्वचित्||३०||
🔊 Audio coming soon
সম্প্রত্যহিতাহারজনিতান্ দোষান্ দর্শযন্ যথাকর্তব্যমুপদিশতি- বিবিধাদিত্যাদি| ভিষগ্জিতম্ ‘উক্তম্’ ইতি শেষঃ| পঞ্চকর্মাণীত্যভিধাযাপি বস্তয ইতি বচনং তিক্তোপহিতবস্তের্বিশেষেণ হিতত্বোপদর্শনার্থম্| শুদ্ধিরিতি বমনাদিনা| সিদ্ধিঃ প্রোক্তা ক্বচিদিতি অতীসারগ্রহণ্যাদৌ||২৩-৩০||
Adhikarana 19 (31-32) · Śloka 32
ব্যাযামাদূষ্মণস্তৈক্ষ্ণ্যাদ্ধিতস্যানবচারণাত্| কোষ্ঠাচ্ছাখা মলা যান্তি দ্রুতত্বান্মারুতস্য চ||৩১|| তত্রস্থাশ্চ বিলম্বন্তে কদাচিন্ন সমীরিতাঃ| নাদেশকালে কুপ্যন্তি ভূযো হেতুপ্রতীক্ষিণঃ||৩২||
व्यायामादूष्मणस्तैक्ष्ण्याद्धितस्यानवचारणात्| कोष्ठाच्छाखा मला यान्ति द्रुतत्वान्मारुतस्य च||३१|| तत्रस्थाश्च विलम्बन्ते कदाचिन्न समीरिताः| नादेशकाले कुप्यन्ति भूयो हेतुप्रतीक्षिणः||३२||
🔊 Audio coming soon
সম্প্রতি রসাদীনাং শাখারূপত্বাত্ কোষ্ঠাশ্রযিণো দোষা যথা শাখাং যান্তি তদাহ- ব্যাযামেত্যাদি| তত্র ব্যাযামক্ষোভাত্ কোষ্ঠং পরিত্যজ্য শাখাং মলা যান্তি, ঊষ্মণো বহ্নেস্তীক্ষ্ণত্বাদ্বিলাযিতা দোষাঃ শাখাং যান্তি, হিতস্যানবচারণযাঽহিতসেবযাঽতিসেবযাঽতিমাত্রবৃদ্ধো দোষো জলাপূরবদ্বৃদ্ধঃ স্বস্থানমাপ্লাব্য স্থানান্তরং যাতীতি যুক্তম্| দ্রুতত্বান্মারুতস্যেতি চলত্বাদ্বাযোর্বাযুনা ক্ষিপ্তো যাতীত্যর্থঃ; বায্বন্তরেণ চ বাযোরাক্ষেপণমুপপন্নমেবেতি, অন্যথা মলা ইতি বহুবচনমসাধু| অথ শাখাগতাঃ কিং কুর্বন্তীত্যাহ- তত্রস্থাশ্চেত্যাদি| বিলম্বন্তে কদাচিদিতি কদাচিদ্ব্যাধিকরণে বিলম্বং কুর্বন্তি| কুতো বিলম্বন্ত ইত্যাহ- ন সমীরিতাঃ| যে দোষা অল্পত্বেনাবলবন্তস্তে হেত্বন্তরেণ সমীরিতাঃ সন্তঃ কুপ্যন্তি; তথা ত এব নাদেশ ইত্যননুগুণদেশে, তথা নাকাল ইত্যননুগুণকালে কুপ্যন্তীতি যোজনা| অত্রৈব হেতুমাহ- ভূয ইত্যাদি| যস্মাদ্ভূযো হেতুপ্রতীক্ষিণস্তেঽল্পবলা দোষাস্তস্মাদীরণাদ্যপেক্ষন্তে; এতেন ভূযো যেঽহেতুপ্রতীক্ষিণো ভবন্তি বলবত্ত্বান্ন তে ঈরণাদ্যপেক্ষন্তে, অত এবোক্তং কদাচিদিতি||৩১-৩২||
Adhikarana 20 (33) · Śloka 33
বৃদ্ধ্যা বিষ্যন্দনাত্ পাকাত্ স্রোতোমুখবিশোধনাত্| শাখা মুক্ত্বা মলাঃ কোষ্ঠং যান্তি বাযোশ্চ নিগ্রহাত্||৩৩||
वृद्ध्या विष्यन्दनात् पाकात् स्रोतोमुखविशोधनात्| शाखा मुक्त्वा मलाः कोष्ठं यान्ति वायोश्च निग्रहात्||३३||
🔊 Audio coming soon
সম্প্রতি শাখাভ্যঃ কোষ্ঠাগমনহেতুং দোষাণামাহ- বৃদ্ধ্যেত্যাদি| বিষ্যন্দনাদিতি বিলযনাত্, বিলীনশ্চ দ্রবত্বাদেব কোষ্ঠে নিম্নং যাতি| পাকাদিতি পক্বো দোষোঽবদ্ধত্বেনৈব নিম্নং কোষ্ঠং যাতি | স্রোতোমুখবিশোধনাদিতি অবরোধকাপগমাত্| বাযোর্নিগ্রহাদিতি ক্ষেপ্তুর্বাযোর্নিগ্রহাত্ প্রাকৃতং স্থানং কোষ্ঠং যাতি||৩৩||
Adhikarana 21 (34-35) · Śloka 35
অজাতানামনুত্পত্তৌ জাতানাং বিনিবৃত্তযে| রোগাণাং যো বিধির্দৃষ্টঃ সুখার্থী তং সমাচরেত্||৩৪|| সুখার্থাঃ সর্বভূতানাং মতাঃ সর্বাঃ প্রবৃত্তযঃ| জ্ঞানাজ্ঞানবিশেষাত্তু মার্গামার্গপ্রবৃত্তযঃ||৩৫||
अजातानामनुत्पत्तौ जातानां विनिवृत्तये| रोगाणां यो विधिर्दृष्टः सुखार्थी तं समाचरेत्||३४|| सुखार्थाः सर्वभूतानां मताः सर्वाः प्रवृत्तयः| ज्ञानाज्ञानविशेषात्तु मार्गामार्गप्रवृत्तयः||३५||
🔊 Audio coming soon
ইদানীং সঙ্ক্ষেপেণাখিলব্যাধিপ্রতীকারং সূত্রযতি- অজাতানামিত্যাদি | যো বিধির্দৃষ্ট ইতি কৃত্স্নে তন্ত্রে| ননু, যদি সুখার্থা সর্বপ্রাণিনাং প্রবৃত্তিস্তত্কথং কোঽপি অমার্গে প্রবর্তত ইত্যাহ- জ্ঞানেত্যাদি| অজ্ঞানাদেব সুখসাধনমিদমিতি কৃত্বা অপরীক্ষকাঃ প্রবর্তন্তে, ন তু দুঃখকর্তৃতাসন্ধানাদিতি ভাবঃ||৩৪-৩৫||
Adhikarana 22 (36-38) · Śloka 38
হিতমেবানুরুধ্যন্তে প্রপরীক্ষ্য পরীক্ষকাঃ| রজোমোহাবৃতাত্মানঃ প্রিযমেব তু লৌকিকাঃ||৩৬|| শ্রুতং বুদ্ধিঃ স্মৃতির্দাক্ষ্যং ধৃতির্হিতনিষেবণম্| বাগ্বিশুদ্ধিঃ শমো ধৈর্যমাশ্রযন্তি পরীক্ষকম্||৩৭|| লৌকিকং নাশ্রযন্ত্যেতে গুণা মোহরজঃশ্রিতম্ | তন্মূলা বহবো যন্তি রোগাঃ শারীরমানসাঃ||৩৮||
हितमेवानुरुध्यन्ते प्रपरीक्ष्य परीक्षकाः| रजोमोहावृतात्मानः प्रियमेव तु लौकिकाः||३६|| श्रुतं बुद्धिः स्मृतिर्दाक्ष्यं धृतिर्हितनिषेवणम्| वाग्विशुद्धिः शमो धैर्यमाश्रयन्ति परीक्षकम्||३७|| लौकिकं नाश्रयन्त्येते गुणा मोहरजःश्रितम् | तन्मूला बहवो यन्ति रोगाः शारीरमानसाः||३८||
🔊 Audio coming soon
হিতমেবেতি আযতিবিশুদ্ধমেব তদাত্বে দুঃখকরমপি| প্রিযমেবেতি তদাত্বে সুখকরমাযতিবিরুদ্ধম্| লৌকিকা অপরীক্ষকাঃ| পরীক্ষকং স্তৌতি- শ্রুতমিত্যাদি| পরীক্ষকমাশ্রযন্তীতি পরীক্ষকে ভবন্তি; কিংবা, বুদ্ধ্যাদিদেবতাঃ পরীক্ষকমাশ্রযন্তে, যদুক্তং- “বিবিশুর্জ্ঞানদেবতাঃ” (সূ. ১) ইতি| তন্মূলা ইতি রজস্তমোমূলাঃ||৩৬-৩৮||
Adhikarana 23 (39-40) · Śloka 40
প্রজ্ঞাপরাধাদ্ধ্যহিতানর্থান্ পঞ্চ নিষেবতে| সন্ধারযতি বেগাংশ্চ সেবতে সাহসানি চ||৩৯|| তদাত্বসুখসঞ্জ্ঞেষু ভাবেষ্বজ্ঞোঽনুরজ্যতে| রজ্যতে ন তু বিজ্ঞাতা বিজ্ঞানে হ্যমলীকৃতে||৪০||
प्रज्ञापराधाद्ध्यहितानर्थान् पञ्च निषेवते| सन्धारयति वेगांश्च सेवते साहसानि च||३९|| तदात्वसुखसञ्ज्ञेषु भावेष्वज्ञोऽनुरज्यते| रज्यते न तु विज्ञाता विज्ञाने ह्यमलीकृते||४०||
🔊 Audio coming soon
যথা অপরীক্ষকে রজস্তমোমূলা রোগা ভবন্তি তদাহ- প্রজ্ঞাপরাধাদিত্যাদি| অহিতার্থসেবাদি চ রোগং করোতীতি ভাবঃ| তদাত্বসুখেষ্বিতি বক্তব্যে, যত্ ‘সুখসঞ্জ্ঞেষু’ ইতি করোতি, তত্তদাত্বসুখস্যাপথ্যস্য দুঃখানুবন্ধসুখকর্তৃতযা পরমার্থতস্তদাত্বেঽপ্যসুখত্বং দর্শযতি; যথা ‘সুখসঞ্জ্ঞকমারোগ্যং’ (সূ.অ.৯) ইত্যত্রোক্তম্| বিজ্ঞাতেতি পরীক্ষকঃ||৩৯-৪০||
Adhikarana 24 (41) · Śloka 41
ন রাগান্নাপ্যবিজ্ঞানাদাহারানুপযোজযেত্| পরীক্ষ্য হিতমশ্নীযাদ্দেহো হ্যাহারসম্ভবঃ||৪১||
न रागान्नाप्यविज्ञानादाहारानुपयोजयेत्| परीक्ष्य हितमश्नीयाद्देहो ह्याहारसम्भवः||४१||
🔊 Audio coming soon
ন রাগাদিত্যাদি| অহিতত্বেন জানন্নপি রাগাদেব কশ্চিদ্দুষ্টঃ প্রবর্ততে, অজ্ঞানাচ্চাহিতত্বাজ্ঞানাদেব কশ্চিদ্ধিতাধ্যবসাযেন প্রবর্ততে; এতদ্দ্বযমপি নিষিধ্যতে||৪১||
Adhikarana 25 (42) · Śloka 42
আহারস্য বিধাবষ্টৌ বিশেষা হেতুসঞ্জ্ঞকাঃ| শুভাশুভসমুত্পত্তৌ তান্ পরীক্ষ্য প্রযোজযেত্||৪২||
आहारस्य विधावष्टौ विशेषा हेतुसञ्ज्ञकाः| शुभाशुभसमुत्पत्तौ तान् परीक्ष्य प्रयोजयेत्||४२||
🔊 Audio coming soon
কথমাহারঃ পরীক্ষ্য ইত্যাহ- আহারস্যেত্যাদি| আহারস্য বিধৌ বিধানেঽষ্টৌ বিশেষাঃ প্রকৃতিকরণসংযোগাদযো রসবিমানে (বি.অ.১) বক্তব্যা হেতুসঞ্জ্ঞকাঃ; ক্ব হেতুসঞ্জ্ঞকা ইত্যাহ- শুভেত্যাদি| শুভাশুভসমুত্পত্তৌ ইতি তে চ প্রকৃত্যাদযঃ শুভাঃ শুভকরাঃ, অশুভা অশুভকরাঃ, ইতি জ্ঞেযম্||৪২||
Adhikarana 26 (43-44) · Śloka 44
পরিহার্যাণ্যপথ্যানি সদা পরিহরন্নরঃ| ভবত্যনৃণতাং প্রাপ্তঃ সাধূনামিহ পণ্ডিতঃ||৪৩|| যত্তু রোগসমুত্থানমশক্যমিহ কেনচিত্| পরিহর্তুং ন তত্ প্রাপ্য শোচিতব্যং মনীষিভিঃ||৪৪||
परिहार्याण्यपथ्यानि सदा परिहरन्नरः| भवत्यनृणतां प्राप्तः साधूनामिह पण्डितः||४३|| यत्तु रोगसमुत्थानमशक्यमिह केनचित्| परिहर्तुं न तत् प्राप्य शोचितव्यं मनीषिभिः||४४||
🔊 Audio coming soon
ননু পথ্যসেবাযাং ক্রিযমাণাযামপি বলবত্প্রাক্তনাধর্মবশাদপি ব্যাধযো ভবন্তি, তত্ কিমনেন পথ্যসেবনেনেত্যাহ- পরিহার্যাণীত্যাদি| অনৃণতামিব প্রাপ্তোঽনৃণতাং প্রাপ্তঃ; এতেন পরিহার্যপরিহারেণ পুরুষকারেঽনপরাধঃ পুরুষো ভবতীতি দর্শযতি| যস্তু দৈবাগতস্তস্য ব্যাধিস্তত্র সাধবো নৈবং পথ্যসেবিনং গর্হযন্তি, এতদেবাহ- যত্ত্বিত্যাদি| অশক্যং পরিহর্তুমিতি বলবত্কর্মজন্যত্বাদিত্যর্থঃ| ন শোচিতব্যমিতি পুরুষকারস্য দৈবজন্যেঽবশ্যম্ভাবিনি ব্যাধাবকিঞ্চিত্করত্বাদিত্যর্থঃ||৪৩-৪৪||
Adhikarana 27 (45-48) · Śloka 48
তত্র শ্লোকাঃ- আহারসম্ভবং বস্তু রোগাশ্চাহারসম্ভবাঃ| হিতাহিতবিশেষাচ্চ বিশেষঃ সুখদুঃখযোঃ||৪৫|| সহত্বে চাসহত্বে চ দুঃখানাং দেহসত্ত্বযোঃ | বিশেষো রোগসঙ্ঘাশ্চ ধাতুজা যে পৃথক্পৃথক্||৪৬|| তেষাং চৈব প্রশমনং কোষ্ঠাচ্ছাখা উপেত্য চ| দোষা যথা প্রকুপ্যন্তি শাখাভ্যঃ কোষ্ঠমেত্য চ||৪৭|| প্রাজ্ঞাজ্ঞযোর্বিশেষশ্চ স্বস্থাতুরহিতং চ যত্| বিবিধাশিতপীতীযে তত্ সর্বং সম্প্রকাশিতম্||৪৮||
तत्र श्लोकाः- आहारसम्भवं वस्तु रोगाश्चाहारसम्भवाः| हिताहितविशेषाच्च विशेषः सुखदुःखयोः||४५|| सहत्वे चासहत्वे च दुःखानां देहसत्त्वयोः | विशेषो रोगसङ्घाश्च धातुजा ये पृथक्पृथक्||४६|| तेषां चैव प्रशमनं कोष्ठाच्छाखा उपेत्य च| दोषा यथा प्रकुप्यन्ति शाखाभ्यः कोष्ठमेत्य च||४७|| प्राज्ञाज्ञयोर्विशेषश्च स्वस्थातुरहितं च यत्| विविधाशितपीतीये तत् सर्वं सम्प्रकाशितम्||४८||
🔊 Audio coming soon
সঙ্গ্রহে বস্ত্বিতি শরীরম্| সহত্বে চাসহত্বে চেত্যাদিনা শরীরাণি চাতিস্থূলানি ইত্যাদি ‘বিপরীতানি পুনর্ব্যাধিসহানি’ ইত্যন্তং গ্রন্থং জ্ঞাপযতি||৪৫-৪৮||
Adhikarana puShpikA · Śloka 7
ইত্যগ্নিবেশকৃতে তন্ত্রে চরকপ্রতিসংস্কৃতে সূত্রস্থানে বিবিধাশিতপীতীযো নামাষ্টাবিংশোঽধ্যাযঃ||২৮|| ইত্যন্নপানচতুষ্কঃ||৭||
इत्यग्निवेशकृते तन्त्रे चरकप्रतिसंस्कृते सूत्रस्थाने विविधाशितपीतीयो नामाष्टाविंशोऽध्यायः||२८|| इत्यन्नपानचतुष्कः||७||
🔊 Audio coming soon
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যব্যাখ্যাযাং সূত্রস্থানে অন্নপানচতুষ্কে বিবিধাশিতপীতীযো নামাষ্টাবিংশোঽধ্যাযঃ||২৮||