25. yajjaḥpuruṣīyō'dhyāyaḥ

Adhikarana 1 (1-2) · Śloka 2

অথাতো যজ্জঃপুরুষীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

য ইমে যোজনাচতুষ্কে ষডুপক্রমা অভিহিতাস্তেঽন্নপানাপেক্ষযৈব ব্যাধিহরণে সমর্থাঃ, অতোঽন্নপানচতুষ্কোঽভিধীযতে| তত্রাপি সঙ্ক্ষেপেণান্নপানগুণাভিধাযকো যজ্জঃপুরুষীযোঽভিধীযতে| তত্রাদৌ পুরুষব্যাধিকারণনিশ্চাযকপ্রকরণং ত্বাহারগুণপ্রশ্নাবতারার্থং তথা পূর্বোক্তষডুপক্রমণীযরোগকারণজ্ঞানার্থং চ ‘যজ্জঃপুরুষ’ ইতি প্রশ্নং প্রাধান্যেনাধিকৃত্য কৃতোঽধ্যাযো যজ্জঃপুরুষীযো জ্ঞেযঃ| যদ্যপি ‘পুরুষো যজ্জঃ’ ইতি প্রশ্নক্রমঃ, তথাঽপি প্রশ্নার্থোঽত্র গৃহীতঃ||১-২||

Adhikarana 2 (3-4) · Śloka 4

পুরা প্রত্যক্ষধর্মাণং ভগবন্তং পুনর্বসুম্| সমেতানাং মহর্ষীণাং প্রাদুরাসীদিযং কথা ||৩|| আত্মেন্দ্রিযমনোর্থানাং যোঽযং পুরুষসঞ্জ্ঞকঃ| রাশিরস্যামযানাং চ প্রাগুত্পত্তিবিনিশ্চযে||৪||

প্রত্যক্ষধর্মত্বং তপঃপ্রভাবাত্| ইযমিতি অগ্রে বক্ষ্যমাণা| কথা তত্ত্বজিজ্ঞাসার্থমন্যোন্যপৃচ্ছা| রাশিঃ মেলকঃ, আত্মেন্দ্রিযমনোঽর্থসমুদায ইত্যর্থঃ| অস্য রাশেরামযানাং চোত্পত্তিবিনিশ্চযে উত্পত্তিবিনিশ্চযবিষযিণী কথা প্রাদুরাসীদিতি সম্বন্ধঃ||৩-৪||

Adhikarana 3 (5-6) · Śloka 6

তদন্তরং কাশিপতির্বামকো বাক্যমর্থবিত্ | ব্যাজহারর্ষিসমিতিমুপসৃত্যাভিবাদ্য চ||৫|| কিন্নু ভোঃ পুরুষো যজ্জস্তজ্জাস্তস্যামযাঃ স্মৃতাঃ| ন বেত্যুক্তে নরেন্দ্রেণ প্রোবাচর্ষীন্ পুনর্বসুঃ||৬||

তামেব পরস্পরপ্রশ্নরূপাং কথাং দর্শযতি- তদন্তরমিত্যাদি| অন্তরশব্দঃ কালবচনঃ; যথা- “অপস্মারায কুর্বন্তি বেগং কিঞ্চিদথান্তরম্” (চি. ১০) ইতি; কিঞ্চিত্কালমিত্যর্থঃ; তেন তদন্তরমিতি কথারম্ভকাল ইত্যর্থঃ| কাশী বারাণসী তস্যাঃ পতিঃ, তেষাং বহুত্বাদ্বিশেষণং- বামক ইতি| যস্মাজ্জাতো যজ্জঃ; তত এব পুরুষজনকাত্ কারণাজ্জাতাস্তজ্জাঃ| ন বেতি অন্যতঃ পুরুষো জাযতেঽন্যতশ্চ তস্য রোগা ইত্যর্থঃ| নরেন্দ্রেণেতি কাশিপতিনাম্না রাজর্ষিণা||৫-৬||

Adhikarana 4 (7) · Śloka 7

সর্ব এবামিতজ্ঞানবিজ্ঞানচ্ছিন্নসংশযাঃ| ভবন্তশ্ছেত্তুমর্হন্তি কাশিরাজস্য সংশযম্||৭||

অমিতাভ্যাং জ্ঞানবিজ্ঞানাভ্যাং ছিন্নঃ সংশযো যেষাং তে তথা| “ভবন্তশ্ছেত্তুমর্হন্তি কাশিরাজস্য সংশযম্” ইতি পাঠঃ সুগমঃ| “ভবন্তোঽর্হন্তি নশ্ছেত্তুং কাশিরাজে চ সংশযম্” ইতি তু পাঠে, নোঽস্মাকং কাশিরাজেঽস্মন্মধ্যগত ইত্যর্থঃ| এতেন স্বপক্ষে কাশিরাজে ন ব্যামোহবচনং বক্তব্যমিতি শিক্ষযতি| চকারেণান্যেষাং চ ঋষীণাং সংশযং সমুচ্চিনোতি| অন্যে তু, নোঽস্মাকং সংশযং কাশিরাজে চ সংশযমিতি ব্যাখ্যানযন্তি| সংশযদ্বযে চৈকোঽত্র ঋষীণামাত্মেন্দ্রিযেত্যাদিনা শ্লোকেন দর্শিতঃ সংশযঃ, স চ পুরুষস্যামযানাং চ প্রাগুত্পত্তিং প্রথমোত্পত্তিং প্রতীতি ব্যাখ্যানযন্তি; দ্বিতীযস্তু কাশিপতের্যথোক্ত এব||৭||

Adhikarana 5 (8-9) · Śloka 9

পারীক্ষিস্তত্পরীক্ষ্যাগ্রে মৌদ্গল্যো বাক্যমব্রবীত্| আত্মজঃ পুরুষো রোগাশ্চাত্মজাঃ কারণং হি সঃ||৮|| স চিনোত্যুপভুঙ্ক্তে চ কর্ম কর্মফলানি চ| নহ্যৃতে চেতনাধাতোঃ প্রবৃত্তিঃ সুখদুঃখযোঃ||৯||

আত্মজঃ পুরুষ ইত্যাদিপ্রশ্নদ্বযস্যোত্তরং; তত্র পূর্বপ্রশ্নস্য পুরুষস্যামযানাং চ কুত উত্পত্তিরিত্যেবংরূপস্য প্রশ্নস্যোত্তরং আত্মজঃ পুরুষো রোগাশ্চেতি, কাশিপতিপ্রশ্নমাত্রেঽপ্যুত্তরমেতত্ যত এবাত্মতঃ পুরুষো জাযতে তত এব রোগা ইত্যর্থরূপমেব | প্রশ্নোত্তরতা ত্বস্য গ্রন্থস্য সুগমৈব| কারণত্বে হেতুমাহ- স চিনোতীত্যাদি| চিনোতি কর্ম, কর্মফলানি চ শরীরারোগ্যবিকারাদীনি ভুঙ্ক্ত ইতি যোজনা| কর্মসহাযস্যাত্মনঃ শরীরবিকারাদিকর্তৃত্বাত্ কারণত্বমিতি ভাবঃ| এতদেব ব্যতিরেকেণাহ- নহ্যৃত ইত্যাদি| চেতনাধাতুঃ আত্মা| সুখদুঃখযোরিতি সুখদুঃখসাধনযোঃ নীরুক্শরীরবিকারযোরিত্যর্থঃ||৮-৯||

Adhikarana 6 (10-13) · Śloka 13

শরলোমা তু নেত্যাহ ন হ্যাত্মাঽঽত্মানমাত্মনা| যোজযেদ্ব্যাধিভির্দুঃখৈর্দুঃখদ্বেষী কদাচন||১০|| রজস্তমোভ্যাং তু মনঃ পরীতং সত্ত্বসঞ্জ্ঞকম্| শরীরস্য সমুত্পত্তৌ বিকারাণাং চ কারণম্||১১|| বার্যোবিদস্তু নেত্যাহ ন হ্যেকং কারণং মনঃ | নর্তে শরীরাচ্ছারীররোগা ন মনসঃ স্থিতিঃ||১২|| রসজানি তু ভূতানি ব্যাধযশ্চ পৃথগ্বিধাঃ| আপো হি রসবত্যস্তাঃ স্মৃতা নির্বৃত্তিহেতবঃ||১৩||

মন ইত্যুক্তে মন্যতেঽনেনেতি ব্যুত্পত্ত্যাঽঽত্মাঽপি শঙ্ক্যেত, তদুক্তং- সত্ত্বসঞ্জ্ঞকমিতি| নর্তে শরীরাচ্ছারীরা বাতাদিজন্যাঃ শোষাদযস্তিষ্ঠন্তি; তথা ন মনসঃ স্থিতিঃ, ঋতে শরীরাদিতি যোজ্যম্| রজস্তমঃপরীতস্য হি মনসো নিত্যং শরীর এব স্থিতিঃ; যত্তু নির্দোষং মনস্তত্তু ন পুরুষস্য নাপি চ ব্যাধেঃ কারণমিতি ভাবঃ| রসজানীত্যাদৌ স্মৃতা নির্বৃত্তিহেতব ইতি ব্যাধিপুরুষযোঃ| এতেন ব্যাধিপুরুষজনকরসকারণত্বেনাপঃ কারণকারণতযা পুরুষবিকারযোঃ কারণং ভবন্তি| কিংবা আপো নির্বৃত্তিহেতব ইতি রসানাং; কিংবা যস্মাদ্রসবত্য আপস্তস্মাত্তা নির্বৃত্তিহেতব ইতি যোজনা||১০-১৩||

Adhikarana 7 (14-15) · Śloka 15

হিরণ্যাক্ষস্তু নেত্যাহ ন হ্যাত্মা রসজঃ স্মৃতঃ| নাতীন্দ্রিযং মনঃ সন্তি রোগাঃ শব্দাদিজাস্তথা||১৪|| ষড্ধাতুজস্তু পুরুষো রোগাঃ ষড্ধাতুজাস্তথা| রাশিঃ ষড্ধাতুজো হ্যেষ সাঙ্খ্যৈরাদ্যৈঃ প্রকীর্তিতঃ ||১৫||

নহ্যাত্মেত্যাদৌ নাতীন্দ্রিযং মনো রসজং স্মৃতমিতি যোজনা; যস্মাদতীন্দ্রিযং মন আত্মা চাতীন্দ্রিযঃ, তস্মান্ন রসজৌ; রসাদ্ধি জাযমানং কারণগুণানুবিধানাদৈন্দ্রিযকং স্যাদিত্যর্থঃ| হেত্বন্তরমাহ- সন্তীত্যাদি| অহিতশব্দরূপাদিজন্যে বিকারে ন রসঃ কারণমিত্যর্থঃ| আত্মা পৃথিব্যাদীনি চ পঞ্চ ষড্ ধাতবঃ| যদুক্তং- “খাদযশ্চেতনাষষ্ঠা ধাতবঃ পুরুষঃ স্মৃতঃ” (শা. ১) ইতি||১৪-১৫||

Adhikarana 8 (16-17) · Śloka 17

তথা ব্রুবাণং কুশিকমাহ তন্নেতি কৌশিকঃ| কস্মান্মাতাপিতৃভ্যাং হি বিনা ষড্ধাতুজো ভবেত্||১৬|| পুরুষঃ পুরুষাদ্গৌর্গোরশ্বাদশ্বঃ প্রজাযতে| পিত্র্যা মেহাদযশ্চোক্তা রোগাস্তাবত্র কারণম্||১৭||

কুশিক ইতি হিরণ্যাক্ষস্য নাম| কস্মাদিতি আক্ষেপে| মাতাপিত্রনপেক্ষিত্বে সর্বপ্রাণিষু ষড্ধাতুসমুদাযস্য বিদ্যমানত্বেন নরগোঽশ্বাদিভেদো ন স্যাদিতি ভাবঃ| হেত্বন্তরমাহ- পিত্র্যা মেহাদযশ্চোক্তা ইতি| পিতৃতোঽপত্যং গচ্ছন্তীতি পিত্র্যাঃ; আদিশব্দেন কুষ্ঠার্শঃপ্রভৃতযো গ্রাহ্যাঃ| স্বপক্ষং দর্শযতি- তাবত্র কারণমিতি; তৌ মাতাপিতরৌ||১৬-১৭||

Adhikarana 9 (18-19) · Śloka 19

ভদ্রকাপ্যস্তু নেত্যাহ নহ্যন্ধোঽন্ধাত্ প্রজাযতে| মাতাপিত্রোরপি চ তে প্রাগুত্পত্তির্ন যুজ্যতে||১৮|| কর্মজস্তু মতো জন্তুঃ কর্মজাস্তস্য চামযাঃ| নহ্যৃতে কর্মণো জন্ম রোগাণাং পুরুষস্য বা||১৯||

ন হ্যন্ধ ইত্যাদি| মাতাপিতৃকারণত্বেঽন্ধেন জাতোঽন্ধঃ স্যাদিত্যর্থঃ| হেত্বন্তরমাহ- মাতাপিত্রোরপীত্যাদি| তে তব মাতাপিতৃকারণবাদিনঃ, প্রাগিতি সর্গাদৌ মাতাপিত্রোরুত্পত্তির্ন স্যাত্; সর্গাদৌ নিঃশরীরিণি আদিভূতযোর্মাতাপিত্রোরভাবাদুত্পাদো নোপপন্ন ইতি ভাবঃ||১৮-১৯||

Adhikarana 10 (20-21) · Śloka 21

ভরদ্বাজস্তু নেত্যাহ কর্তা পূর্বং হি কর্মণঃ| দৃষ্টং ন চাকৃতং কর্ম যস্য স্যাত্ পুরুষঃ ফলম্||২০|| ভাবহেতুঃ স্বভাবস্তু ব্যাধীনাং পুরুষস্য চ| খরদ্রবচলোষ্ণত্বং তেজোন্তানাং যথৈব হি||২১||

কর্তা পূর্বং হীত্যাদি| কর্মণঃ পূর্বং কর্তা ‘ভবতি’ ইতি শেষঃ| যেন কর্মণা স পুরুষঃ কর্তব্যঃ, তস্য কর্মণঃ পুরুষপূর্বভাবিত্বাত্ কারণত্বং স্বীকর্তব্যং; ততশ্চ স চেদ্বিনা কর্ম পুরুষোঽভূত্ , তত্ কথং পুরুষস্য কর্ম কারণমিতি ভাবঃ| অথ শঙ্ক্যতে অকৃতমেবাদৌ পুরুষজনকং কর্ম ভবিষ্যতীত্যাহ- দৃষ্টং ন চেত্যাদি| অকৃতং কর্ম ন দৃষ্টং, প্রমাণেন নোপলব্ধমিত্যর্থঃ| যস্মাচ্ছুভাশুভকর্ম ক্রিযাজন্যমেব ধর্মাধর্মরূপং সর্বং ভবতীতি ভাবঃ| ভাবহেতুঃ উত্পত্তিহেতুঃ| স্বাভাবিকত্বে দৃষ্টান্তমাহ- খরেত্যাদি| তেজোঽন্তানামিতি “খরদ্রবচলোষ্ণত্বং ভূজলানিলতেজসাম্” (শা. ১) ইত্যাদিবক্ষ্যমাণক্রমেণ ভবেত্||২০-২১||

Adhikarana 11 (22-25) · Śloka 25

কাঙ্কাযনস্তু নেত্যাহ ন হ্যারম্ভফলং ভবেত্| ভবেত্ স্বভাবাদ্ভাবানামসিদ্ধিঃ সিদ্ধিরেব বা||২২|| স্রষ্টা ত্বমিতসঙ্কল্পো ব্রহ্মাপত্যং প্রজাপতিঃ| চেতনাচেতনস্যাস্য জগতঃ সুখদুঃখযোঃ||২৩|| তন্নেতি ভিক্ষুরাত্রেযো ন হ্যপত্যং প্রজাপতিঃ| প্রজাহিতৈষী সততং দুঃখৈর্যুঞ্জ্যাদসাধুবত্||২৪|| কালজস্ত্বেব পুরুষঃ কালজাস্তস্য চামযাঃ| জগত্ কালবশং সর্বং কালঃ সর্বত্র কারণম্||২৫||

স্বভাবাদিত্যত্র আদৌ ‘যদি’ ইত্যধ্যাহর্তব্যং; তেন যদি স্বভাবাদেব ভাবানাং বিকারশরীরাদীনাং সিদ্ধ্যসিদ্ধী ভবতঃ, তদা আরম্ভফলং ন ভবেত্, স্বাভাবিকত্বাদ্ভাবানাং; য ইমে লোকশাস্ত্রসিদ্ধা যাগকৃষ্যধ্যযনাদ্যারম্ভাস্তে নিষ্প্রযোজনা ভবেযুঃ, অকারণত্বাদিত্যর্থঃ | স্রষ্টেত্যাদৌ জগতঃ সুখদুঃখযোশ্চ স্রষ্টা প্রজাপতিরিতি যোজনা| স চ ব্রহ্মণোঽপত্যম্| অমিতসঙ্কল্প ইতি যুগপদপরিমিতস্থাবরজঙ্গমরূপকার্যকর্তৃত্বেনাপরিমিততজ্জননসঙ্কল্প ইত্যর্থঃ| অসাধুবদিতি অসাধুঃ অপত্যদ্রোহকারী||২২-২৫||

Adhikarana 12 (26-29) · Śloka 29

তথর্ষীণাং বিবদতামুবাচেদং পুনর্বসুঃ| মৈবং বোচত তত্ত্বং হি দুষ্প্রাপং পক্ষসংশ্রযাত্||২৬|| বাদান্ সপ্রতিবাদান্ হি বদন্তো নিশ্চিতানিব| পক্ষান্তং নৈব গচ্ছন্তি তিলপীডকবদ্গতৌ||২৭|| মুক্ত্বৈবং বাদসঙ্ঘট্টমধ্যাত্মমনুচিন্ত্যতাম্| নাবিধূতে তমঃস্কন্ধে জ্ঞেযে জ্ঞানং প্রবর্ততে||২৮|| যেষামেব হি ভাবানাং সম্পত্ সঞ্জনযেন্নরম্| তেষামেব বিপদ্ব্যাধীন্বিবিধান্সমুদীরযেত্||২৯||

পক্ষসংশ্রযাদিতি রাগতঃ পক্ষসঙ্গ্রহাত্| নিশ্চিতানিবেতি পরমার্থতোঽনিশ্চিতা এব, পরং পক্ষরাগাদ্বুদ্ধিপ্রকর্ষান্নিশ্চিতা ইবাভিধীযন্তে পক্ষা ইত্যর্থঃ| পক্ষান্তমিতি সম্যগর্থাবধারণরূপং পক্ষান্তম্| তিলপীডকস্তৈলার্থং যন্ত্রোপরি স্থিতো মনুষ্যঃ; তিলপীডকো যথা গতৌ গমনে সতি, গম্যদেশাপ্রাপ্ত্যা চান্তং নাসাদযতি, পুনস্তত্রৈব ভ্রমণাত্; তথা পক্ষসংশ্রযাদ্বাদিনোঽপীত্যর্থঃ| সঙ্ঘট্টঃ অন্যোন্যপীডকো মেলকঃ| অধ্যাত্মং তত্ত্বম্| স্কন্ধঃ সমূহঃ| পক্ষরাগশ্চেহ তত্ত্বজ্ঞানপ্রতিবন্ধকত্বেন তমস্কন্ধ উচ্যতে| সিদ্ধান্তমাহ- যেষামিত্যাদি| যেষামিতি যজ্জাতীযানাং, তে চ মহাভূতাদযঃ| তেন মহাভূতত্বেনৈব বাতাদীনাং গ্রহণম্| সম্পদিতি প্রশস্তগুণতা| নরমিতি সংযোগিপুরুষম্| বিপদিতি বৈগুণ্যম্| সমুদীরযেদিতি জনযেত্| এতেষাং চ ঋষিবাদানাং কথনং পূর্বপক্ষসিদ্ধান্তশ্রবণেন শিষ্যসন্দেহনিবৃত্ত্যর্থম্ ||২৬-২৯||

Adhikarana 13 (30-32) · Śloka 32

অথাত্রেযস্য ভগবতো বচনমনুনিশম্য পুনরেব বামকঃ কাশিপতিরুবাচ ভগবন্তমাত্রেযং- ভগবন্! সম্পন্নিমিত্তজস্য পুরুষস্য বিপন্নিমিত্তজানাং চ রোগাণাং কিমভিবৃদ্ধিকারণমিতি||৩০|| তমুবাচ ভগবানাত্রেযঃ- হিতাহারোপযোগ এক এব পুরুষবৃদ্ধিকরো ভবতি, অহিতাহারোপযোগঃ পুনর্ব্যাধিনিমিত্তমিতি ||৩১|| এবংবাদিনং ভগবন্তমাত্রেযমগ্নিবেশ উবাচ- কথমিহ ভগবন্! হিতাহিতানামাহারজাতানাং লক্ষণমনপবাদমভিজানীমহে; হিতসমাখ্যাতানামাহারজাতানামহিতসমাখ্যাতানাং চ মাত্রাকালক্রিযাভূমিদেহদোষপুরুষাবস্থান্তরেষু বিপরীতকারিত্বমুপলভামহ ইতি||৩২||

হিতাহারোপযোগ এক এবেত্যবধারণেনাস্য প্রাধান্যং দর্শযতি নান্যপ্রতিষেধম্, আচারস্য স্বপ্নাদেস্তথা শব্দাদীনামপি কারণত্বেনোক্তত্বাত্| ব্যাধিনিমিত্তমিতি ব্যাধ্যভিবৃদ্ধিনিমিত্তং মধ্যপদলোপাজ্জ্ঞেযম্, অভিবৃদ্ধিকারণস্যৈব পৃষ্টত্বাত্; তথাঽহিতাহারস্য যদ্ব্যাধিনিমিত্তত্বং, তস্য ‘তেষামেব বিপদ্ব্যাধীন্ বিবিধান্ সমুদীরযেত্’ ইত্যনেনৈবোক্তত্বাত্| কিংবা ব্যাধিনিমিত্তশব্দেন সামান্যেন জনকো বর্ধকশ্চ হেতুরুচ্যতে| অনপবাদমিতি অব্যভিচারি| হিতাহিতাহারদুর্জ্ঞানতাহেতুমাহ- হিতসমাখ্যাতানামিত্যাদি| বিপরীতকারিত্বমিতি পথ্যস্যাপথ্যত্বং তথা অপথ্যস্য পথ্যত্বং মাত্রাদিবশাদ্ভবতি| তত্র পথ্যা রক্তশাল্যাদযোঽতিমাত্রা হীনমাত্রা বা মাত্রাদোষাদপথ্যা ভবন্তি| তথা কালবশাত্ত এব রক্তশাল্যাদযো লঘুত্বাদ্বলবদগ্নীনাং হেমন্তে ন হিতাঃ; কালশব্দেন চেহ নিত্যগ এব কালো গৃহ্যতে, আবস্থিকস্য পুরষাবস্থাশব্দেন গৃহীতত্বাত্| ক্রিযা তু সংস্করণং, তেন চ রক্তশালিরসম্যক্স্বিন্নাপ্রস্রুতত্বাদিনা ওদনদোষেণাহিতো ভবতি, তথা স এব ভূমিসম্বন্ধাদানূপদেশজঃ সন্নপথ্যো ভবতি| তথা দেহাপেক্ষযা মেদস্বিনো রক্তশালির্লঘুতযা ন হিতো ভবতি, তদুক্তং- “গুরু চাতর্পণং চেষ্টং স্থূলানাং কর্শনং প্রতি” (সূ. ২১) ইতি| তথা স এব দোষে বাযাবহিতঃ, দোষশব্দেন ব্যাধিরপি গ্রহীতব্যঃ| তথা- পুরুষস্য বাল্যাবস্থাযাং শ্লেষ্মপ্রধানাযাং তিক্তাদি পথ্যং, তত্তু বার্ধক্যে বৃদ্ধবাতে ন পথ্যম্| অবস্থান্তরশব্দশ্চ মাত্রাদিভিঃ প্রত্যেকং সম্বধ্যতে| এবমহিতস্যাপি মাত্রাদিপরিগ্রহেণ হিতত্বমুন্নেতব্যম্||৩০-৩২||

Adhikarana 14 (33-34) · Śloka 34

তমুবাচ ভগবানাত্রেযঃ- যদাহারজাতমগ্নিবেশ! সমাংশ্চৈব শরীরধাতূন্ প্রকৃতৌ স্থাপযতি বিষমাংশ্চ সমীকরোতীত্যেতদ্ধিতং বিদ্ধি, বিপরীতং ত্বহিতমিতি; ইত্যেতদ্ধিতাহিতলক্ষণমনপবাদং ভবতি||৩৩|| এবংবাদিনং চ ভগবন্তমাত্রেযমগ্নিবেশ উবাচ- ভগবন্! ন ত্বেতদেবমুপদিষ্টং ভূযিষ্ঠকল্পাঃ সর্বভিষজো বিজ্ঞাস্যন্তি||৩৪||

সিদ্ধান্তযতি- যদাহারজাতমিত্যাদি| অনেন চ গ্রন্থেন হিতাহিতত্বং ন স্বরূপেণ ভাবানাং, কিন্তু মাত্রাদিসব্যপেক্ষমিতি দর্শিতং ভবতি| ন ত্বেতদিত্যাদি| এতদিতি হিতাহিতম্| এবমুপদিষ্টমিতি যদাহারজাতমিত্যাদিলক্ষণোদ্দিষ্টম্| বিজ্ঞাস্যন্তি ন ত্বিতি সম্বন্ধঃ| এতস্মিন্ হিতাহিতলক্ষণে মাত্রাদ্যবস্থান্তরজ্ঞানং বিনা ন হিতত্বমহিতত্বং বা হিতানাং রক্তশাল্যাদীনামহিতানাং যবকাদীনাং চ জ্ঞাতুং পার্যতে, মাত্রাদ্যবস্থাযাশ্চ দুর্জ্ঞানত্বেন সর্ববৈদ্যা জ্ঞাতুমক্ষমা ইতি ভাবঃ||৩৩-৩৪||

Adhikarana 15 (35) · Śloka 35

তমুবাচ ভগবানাত্রেযঃ- যেষাং হি বিদিতমাহারতত্ত্বমগ্নিবেশ! গুণতো দ্রব্যতঃ কর্মতঃ সর্বাবযবশশ্চ মাত্রাদযো ভাবাঃ, ত এতদেবমুপদিষ্টং বিজ্ঞাতুমুত্সহন্তে| যথা তু খল্বেতদুপদিষ্টং ভূযিষ্ঠকল্পাঃ সর্বভিষজো বিজ্ঞাস্যন্তি, তথৈতদুপদেক্ষ্যামো মাত্রাদীন্ ভাবাননুদাহরন্তঃ; তেষাং হি বহুবিধবিকল্পা ভবন্তি| আহারবিধিবিশেষাংস্তু খলু লক্ষণতশ্চাবযবতশ্চানুব্যাখ্যাস্যামঃ||৩৫||

এতদেবাসর্বভিষগ্জ্ঞেযত্বং লক্ষণস্যাহ- যেষাং হীত্যাদি| গুণত ইতি ইহ প্রকরণে গুরুলঘুত্বাদিগুণতঃ| দ্রব্যত ইতি কারণতঃ, যথা- ইদমাপ্যমিদমাগ্নেযমিত্যাদি; কিংবা দ্রব্যত ইত্যাহারদ্রব্যাদ্রক্তশাল্যাদেঃ| কর্মতঃ কার্যতঃ; যথা- ইদং জীবনমিদং বৃংহণমিত্যাদি| সর্বাবযবশশ্চেতি রসবীর্যবিপাকপ্রভাবেভ্যঃ| মাত্রাদযশ্চানন্তরোক্তাঃ পুরুষান্তা জ্ঞেযাঃ| আহারতত্ত্বং চ গুণাদিভ্যো বিদিতং মাত্রাদযশ্চ বিদিতা ইতি যোজনা| কিংবা গুণশব্দেন রসবীর্যাদীনামপি গ্রহণং, সর্বাবযবশশ্চেতি মাত্রাদিজ্ঞানেন সম্বধ্যতে| যথেত্যাদৌ এতদিতি হিতাহিতম্| ভূযিষ্ঠকল্পা নানাপ্রকারা উত্তমাধমমধ্যমা ইত্যর্থঃ, ভূযিষ্ঠকল্পা ইতি কৃত্বা সর্বগ্রহণমুত্তমাদীনামেব শ্রেষ্ঠশ্রেষ্ঠতরশ্রেষ্ঠতমাদিভেদগ্রহণার্থং; কিংবা শল্যাদ্যষ্টাঙ্গাধ্যাযিবৈদ্যগ্রহণার্থং ; কিংবা ভূযিষ্ঠকল্পা ইতি বিজ্ঞাতভূরিহিতাহিতোদাহরণাঃ; অগ্র্যাধিকারে হি বহু হিতাহিতং বক্তব্যং, তচ্চাল্পবুদ্ধীনাং ব্যবহারায ভবতি, প্রকৃষ্টবুদ্ধীনাং চানুক্তজ্ঞানাযেতি ভাবঃ| লক্ষণত ইতি লক্ষণমাহারত্বং স্থাবরজঙ্গমাত্মকত্বাদি, এতচ্চ ‘তদ্যথা- আহারত্বং’ ইত্যাদিনা ‘করণবাহুল্যাত্’ ইত্যন্তেন বক্ষ্যতি| অবযবত ইতি একদেশতঃ, একদেশাশ্চ লোহিতশাল্যাদযঃ; তে তু ‘তদ্যথা লোহিতশালযঃ’ ইত্যাদিনা বক্ষ্যন্তে||৩৫||

Adhikarana 16 (36) · Śloka 36

তদ্যথা- আহারত্বমাহারস্যৈকবিধমর্থাভেদাত্; স পুনর্দ্বিযোনিঃ, স্থাবরজঙ্গমাত্মকত্বাত্; দ্বিবিধপ্রভাবঃ, হিতাহিতোদর্কবিশেষাত্; চতুর্বিধোপযোগঃ, পানাশনভক্ষ্যলেহ্যোপযোগাত্; ষডাস্বাদঃ, রসভেদতঃ ষড্বিধত্বাত্; বিংশতিগুণঃ, গুরুলঘুশীতোষ্ণস্নিগ্ধরূক্ষমন্দতীক্ষ্ণস্থিরসরমৃদুকঠিন- বিশদপিচ্ছিলশ্লক্ষ্ণখরসূক্ষ্মস্থূলসান্দ্রদ্রবানুগমাত্; অপরিসঙ্খ্যেযবিকল্পঃ, দ্রব্যসংযোগকরণবাহুল্যাত্||৩৬||

অর্থাভেদাদিতি অভ্যবহ্রিযমাণত্বার্থাভেদাত্| দ্বিযোনিরিতি দ্বিপ্রভবঃ| হিতরূপোঽহিতরূপো বোদর্কো হিতাহিতোদর্কঃ, স এব বিশেষঃ; উদর্ক উত্তরকালীনং ফলম্| গুরুলাঘবাদযো যুগ্মাঃ পরস্পরবিরোধিনো জ্ঞেযাঃ; অনুগমাদিতি অনুগতত্বাত্| আত্রেযভদ্রকাপ্যীযে (সূ. ২৬) বক্ষ্যমাণাঃ পরত্বাদযো গুণা ন তথাঽত্রোপকারকা ইতি নেহোচ্যন্তে| যে তু তত্র সংযোগকরণে আহারবিধৌ ভূর্যুপযোগিনী, তে বহুবিধত্বেন ত্বপরিসঙ্খ্যেযবিকল্পহেতুত্বেনৈব নিবেশিতে| পরিমাণং তু মাত্রা, সা চেহানুদাহরণীযত্বেন প্রতিজ্ঞাতা ‘মাত্রাদীন্ ভাবাননুদাহরন্তঃ’ ইতি বচনেন| দ্রব্যসংযোগকরণবাহুল্যাদিতি দ্রব্যং শূকধান্যাদিকং, সংযোগ আহারদ্রব্যাণাং মেলকঃ, করণং সংস্কারঃ||৩৬||

Adhikarana 17 (37) · Śloka 37

তস্য খলু যে যে বিকারাবযবা ভূযিষ্ঠমুপযুজ্যন্তে, ভূযিষ্ঠকল্পানাং চ মনুষ্যাণাং প্রকৃত্যৈব হিততমাশ্চাহিততমাশ্চ, তাংস্তান্ যথাবদুপদেক্ষ্যামঃ||৩৭||

বিকারাবযবা ইতি বিকারৈকদেশাঃ| ভূযিষ্ঠকল্পানামিতি কিঞ্চিন্ন্যূনবহূনাং , কল্পশব্দো হ্যযমীষদসমাপ্ত্যর্থঃ , যথারাজকল্প ইতি| এতেন প্রাযশো বহূনাং যে হিতা অহিতাশ্চ ত উচ্যন্ত ইত্যর্থঃ| অন্যে তু ভূযিষ্ঠকল্পানামিতি সমানধাতুপ্রকৃতীনামিতি ব্রুবতে| প্রকৃত্যেতি ন সংযোগকরণাদিনা, কিন্তু স্বভাবেন||৩৭||

Adhikarana 18 (38) · Śloka 38

তদ্যথা- লোহিতশালযঃ শূকধান্যানাং পথ্যতমত্বে শ্রেষ্ঠতমা ভবন্তি, মুদ্গাঃ শমীধান্যানাম্, আন্তরিক্ষমুদকানাং, সৈন্ধবং লবণানাং, জীবন্তীশাকং শাকানাম্, ঐণেযং মৃগমাংসানাং, লাবঃ পক্ষিণাং, গোধা বিলেশযানাং, রোহিতো মত্স্যানাং, গব্যং সর্পিঃ সর্পিষাং, গোক্ষীরং ক্ষীরাণাং, তিলতৈলং স্থাবরজাতানাং স্নেহানাং, বরাহবসা আনূপমৃগবসানাং, চুলুকীবসা মত্স্যবসানাং, পাকহংসবসা জলচরবিহঙ্গবসানাং, কুক্কুটবসা বিষ্কিরশকুনিবসানাং, অজমেদঃ শাখাদমেদসাং, শৃঙ্গবেরং কন্দানাং, মৃদ্বীকা ফলানাং, শর্করেক্ষুবিকারাণাম্, ইতি প্রকৃত্যৈব হিততমানামাহারবিকারাণাং প্রাধান্যতো দ্রব্যাণি ব্যাখ্যাতানি ভবন্তি||৩৮||

লোহিতশালী রক্তশালিঃ| শূকধান্যানামিত্যাদৌ নির্ধারণে ষষ্ঠী| পথ্যতমত্ব ইতি তমপ্প্রযোগঃ সজাতীযেভ্যঃ প্রকৃষ্টত্বেন শ্রেষ্ঠতমা ইতি, যথা- শ্রেষ্ঠতম ইতি প্রশস্যঃ; কিংবা তমপ্গ্রহণং স্বার্থিকং, যথা- “যুধিষ্ঠিরঃ শ্রেষ্ঠতমঃ কুরূণাম্” ইতি, তথা ‘অন্যতমং জিহ্বাবৈষযিকম্’ (সূ. ২৬) ইতি| যদ্যপি কাকমাচী ত্রিদোষঘ্নী রসাযনী চ, তথাঽপীহ জীবন্তী স্বস্থহিতত্বপ্রকর্ষাদুচ্যতে, স্বস্থহিতত্বপ্রকর্ষশ্চেহ বচনাদেব লভ্যতে| এবমন্যত্রাপি ব্যাখ্যেযম্| কাকমাচ্যাং ত্বযং বিশেষঃ- যত্- কাকমাচী পর্যুষিতা মরণায| যদ্যপি গোধারোহিতৌ কফপিত্তবর্ধনৌ, বচনং হি- “ভূশযা বারিজাতাশ্চ কফপিত্তবিবর্ধনাঃ” ইতি, তথাঽপীহ সজাতীযেষু পথ্যত্বপ্রকর্ষেণেহোচ্যেতে; তথা কিঞ্চিদ্দোষকরস্যাপি ঋতুভেদেন পথ্যত্বং ভবত্যেব; কিঞ্চিত্ স্বস্থহিতত্বং দ্রব্যস্য পৃথগেব গুণঃ ন দোষকর্তৃত্বং দোষহরত্বং বাঽপেক্ষতে; যদুক্তং- “কিঞ্চিদ্দোষপ্রশমনং কিঞ্চিদ্ধাতুপ্রদূষণম্| স্বস্থবৃত্তৌ মতং কিঞ্চিদ্দ্রব্যং ত্রিবিধমুচ্যতে” (সূ. ১) ইতি| চুল্লুকী ‘সুগৃহ’ ইতি খ্যাতঃ| পাকহংসঃ শ্বেতহংসঃ||৩৮||

Adhikarana 19 (39) · Śloka 39

অহিততমানপ্যুপদেক্ষ্যামঃ- যবকাঃ শূকধান্যানামপথ্যতমত্বেন প্রকৃষ্টতমা ভবন্তি, মাষাঃ শমীধান্যানাং, বর্ষানাদেযমুদকানাম্, ঊষরং লবণানাং, সর্ষপশাকং শাকানাং, গোমাংসং মৃগমাংসানাং, কাণকপোতঃ পক্ষিণাং, ভেকো বিলেশযানাং, চিলিচিমো মত্স্যানাম্, আবিকং সর্পিঃ সর্পিষাম্, অবিক্ষীরং ক্ষীরাণাং, কুসুম্ভস্নেহঃ স্থাবরস্নেহানাং, মহিষবসা আনূপমৃগবসানাং, কুম্ভীরবসা মত্স্যবসানাং, কাকমদ্গুবসা জলচরবিহঙ্গবসানাং, চটকবসা বিষ্কিরশুকনিবসানাং, হস্তিমেদঃ শাখাদমেদসাং, নিকুচং ফলানাম্, আলুকং কন্দানাং, ফাণিতমিক্ষুবিকারাণাম্, ইতি প্রকৃত্যৈবাহিততমানামাহারবিকারাণাং প্রকৃষ্টতমানি দ্রব্যাণি ব্যাখ্যাতানি ভবন্তি; (ইতি) হিতাহিতাবযবো ব্যাখ্যাত আহারবিকারাণাম্||৩৯||

প্রকৃষ্টতমা ইতি তমপ্প্রযোগঃ পূর্ববত্ স্বার্থিকঃ| যদ্যপ্যপথ্যতম ইতি তমপ্প্রযোগেণৈব প্রকৃষ্টত্বং প্রতিপাদিতং, তথাঽপ্যপথ্যতমানাং বহূনাং মধ্যে প্রকর্ষখ্যাপনার্থং প্রকৃষ্টতম ইতি পদম্| বর্ষাসু নাদেযং বর্ষানাদেযম্| ঊষরদেশভবমূষরম্| কাণকপোত ইত্যত্র কাণশব্দোঽল্পবচনঃ; যথা- কাণো মেঘ ইতি| চিলিচিমো মহাশকলী মত্স্যো রোহিতভেদঃ, অত্রৈব হ্যগ্রে রোহিতভেদমেব চিলিচিমং বক্ষ্যতি| কাকমদ্গুঃ পানীযকাকিকা| চটকঃ প্রসিদ্ধঃ| হিতাহিতাবযব ইত্যাদি| অত্রাদৌ ‘ইতি’ শব্দোঽধ্যাহার্যঃ, তেন ইতি হিতাহিতাবযব আহারবিকারাণাং ব্যাখ্যাতো ভবতীতি পূর্বেণৈব যোজনীযম্||৩৯||

Adhikarana 20 (40) · Śloka 40

অতো ভূযঃ কর্মৌষধানাং চ প্রাধান্যতঃ সানুবন্ধানি দ্রব্যাণ্যনুব্যাখ্যাস্যামঃ| তদ্যথা- অন্নং বৃত্তিকরাণাং শ্রেষ্ঠম্, উদকমাশ্বাসকরাণাং (সুরা শ্রমহরাণাং ), ক্ষীরং জীবনীযানাং, মাংসং বৃংহণীযানাং, রসস্তর্পণীযানাং, লবণমন্নদ্রব্যরুচিকরাণাম্, অম্লং হৃদ্যানাং, কুক্কুটো বল্যানাং, নক্ররেতো বৃষ্যাণাং, মধু শ্লেষ্মপিত্তপ্রশমনানাং, সর্পির্বাতপিত্তপ্রশমনানাং, তৈলং বাতশ্লেষ্মপ্রশমনানাং, বমনং শ্লেষ্মহরাণাং, বিরেচনং পিত্তহরাণাং, বস্তির্বাতহরাণাং, স্বেদো মার্দবকরাণাং, ব্যাযামঃ স্থৈর্যকরাণাং, ক্ষারঃ পুংস্ত্বোপঘাতিনাং, (তিন্দুকমনন্নদ্রব্যরুচিকরাণাম্ ,) আমং কপিত্থমকণ্ঠ্যানাম্, আবিকং সর্পিরহৃদ্যানাম্, অজাক্ষীরং শোষঘ্নস্তন্যসাত্ম্যরক্তসাঙ্গ্রাহিকরক্তপিত্তপ্রশমনানাম্, অবিক্ষীরং শ্লেষ্মপিত্তজননানাং, মহিষীক্ষীরং স্বপ্নজননানাং, মন্দকং দধ্যভিষ্যন্দকরাণাং, গবেধুকান্নং কর্শনীযানাম্, উদ্দালকান্নং বিরূক্ষণীযানাম্, ইক্ষুর্মূত্রজননানাং, যবাঃ পুরীষজননানাং, জাম্ববং বাতজননানাং, শষ্কুল্যঃ শ্লেষ্মপিত্তজননানাং, কুলত্থা অম্লপিত্তজননানাং, মাষাঃ শ্লেষ্মপিত্তজননানাং, মদনফলং বমনাস্থাপনানুবাসনোপযোগিনাং, ত্রিবৃত্ সুখবিরেচনানাং, চতুরঙ্গুলো মৃদুবিরেচনানাং, স্নুক্পযস্তীক্ষ্ণবিরেচননাং, প্রত্যক্পুষ্পা শিরোবিরেচনানাং, বিডঙ্গং ক্রিমিঘ্নানাং, শিরীষো বিষঘ্নানাং, খদিরঃ কুষ্ঠঘ্নানাং, রাস্না বাতহরাণাম্, আমলকং বযঃস্থাপনানাং, হরীতকী পথ্যানাম্, এরণ্ডমূলং বৃষ্যবাতহরাণাং, পিপ্পলীমূলং দীপনীযপাচনীযানাহপ্রশমনানাং, চিত্রকমূলং দীপনীযপাচনীযগুদশোথার্শঃশূলহরাণাং, পুষ্করমূলং হিক্কাশ্বাসকাসপার্শ্বশূলহরাণাং, মুস্তং সাঙ্গ্রাহিকদীপনীযপাচনীযানাম্, উদীচ্যং নির্বাপণদীপনীযপাচনীযচ্ছর্দ্যতীসারহরাণাং, কট্বঙ্গং সাঙ্গ্রাহিকপাচনীযদীপনীযানাম্, অনন্তা সাঙ্গ্রাহিকরক্তপিত্তপ্রশমনানাম্, অমৃতা সাঙ্গ্রাহিকবাতহরদীপনীযশ্লেষ্মশোণিতবিবন্ধপ্রশমনানাং, বিল্বং সাঙ্গ্রাহিকদীপনীযবাতকফপ্রশমনানাম্, অতিবিষা দীপনীযপাচনীযসাঙ্গ্রাহিকসর্বদোষহরাণাম্, উত্পলকুমুদপদ্মকিঞ্জল্কঃ সাঙ্গ্রাহিকরক্তপিত্তপ্রশমনানাং, দুরালভা পিত্তশ্লেষ্মপ্রশমনানাং, গন্ধপ্রিযঙ্গুঃ শোণিতপিত্তাতিযোগপ্রশমনানাং, কুটজত্বক্ শ্লেষ্মপিত্তরক্তসাঙ্গ্রাহিকোপশোষণানাং, কাশ্মর্যফলং রক্তসাঙ্গ্রাহিকরক্তপিত্তপ্রশমনানাং, পৃশ্নিপর্ণী সাঙ্গ্রাহিকবাতহরদীপনীযবৃষ্যাণাং, বিদারিগন্ধা বৃষ্যসর্বদোষহরাণাং, বলা সাঙ্গ্রাহিকবল্যবাতহরাণাং, গোক্ষুরকো মূত্রকৃচ্ছ্রানিলহরাণাং, হিঙ্গুনির্যাসশ্ছেদনীযদীপনীযানুলোমিকবাতকফপ্রশমনানাম্, অম্লবেতসো ভেদনীযদীপনীযানুলোমিকবাতশ্লেষ্মহরাণাং, যাবশূকঃ স্রংসনীযপাচনীযার্শোঘ্নানাং, তক্রাভ্যাসো গ্রহণীদোষশোফার্শোঘৃতব্যাপত্প্রশমনানাং, ক্রব্যান্মাংসরসাভ্যাসো গ্রহণীদোষশোষার্শোঘ্নানাং, ক্ষীরঘৃতাভ্যাসো রসাযনানাং, সমঘৃতসক্তুপ্রাশাভ্যাসো বৃষ্যোদাবর্তহরাণাং, তৈলগণ্ডূষাভ্যাসো দন্তবলরুচিকরাণাং, চন্দনং দুর্গন্ধহরদাহনির্বাপণলেপনানাং, রাস্নাগুরুণী শীতাপনযনপ্রলেপনানাং, লামজ্জকোশীরং দাহত্বগ্দোষস্বেদাপনযনপ্রলেপনানাং, কুষ্ঠং বাতহরাভ্যঙ্গোপনাহোপযোগিনাং, মধুকং চক্ষুষ্যবৃষ্যকেশ্যকণ্ঠ্যবর্ণ্যবিরজনীযরোপণীযানাং, বাযুঃ প্রাণসঞ্জ্ঞাপ্রদানহেতূনাম্, অগ্নিরামস্তম্ভশীতশূলোদ্বেপনপ্রশমনানাং, জলং স্তম্ভনীযানাং, মৃদ্ভৃষ্টলোষ্ট্রনির্বাপিতমুদকং তৃষ্ণাচ্ছর্দ্যতিযোগপ্রশমনানাম্, অতিমাত্রাশনমামপ্রদোষহেতূনাং, যথাগ্ন্যভ্যবহারোঽগ্নিসন্ধুক্ষণানাং, যথাসাত্ম্যং চেষ্টাভ্যবহারৌ সেব্যানাং, কালভোজনমারোগ্যকরাণাং, তৃপ্তিরাহারগুণানাং, বেগসন্ধারণমনারোগ্যকরাণাং, মদ্যং সৌমনস্যজননানাং, মদ্যাক্ষেপো ধীধৃতিস্মৃতিহরাণাং, গুরুভোজনং দুর্বিপাককরাণাম্, একাশনভোজনং সুখপরিণামকরাণাং, স্ত্রীষ্বতিপ্রসঙ্গঃ শোষকরাণাং, শুক্রবেগনিগ্রহঃ ষাণ্ড্যকরাণাং, পরাঘাতনমন্নাশ্রদ্ধাজননানাম্, অনশনমাযুষো হ্রাসকরাণাং, প্রমিতাশনং কর্শনীযানাম্, অজীর্ণাধ্যশনং গ্রহণীদূষণানাং, বিষমাশনমগ্নিবৈষম্যকরাণাং, বিরুদ্ধবীর্যাশনং নিন্দিতব্যাধিকরাণাং, প্রশমঃ পথ্যানাং, আযাসঃ সর্বাপথ্যানাং, মিথ্যাযোগো ব্যাধিকরাণাং, রজস্বলাভিগমনমলক্ষ্মীমুখানাং, ব্রহ্মচর্যমাযুষ্যাণাং, পরদারাভিগমনমনাযুষ্যাণাং, সঙ্কল্পো বৃষ্যাণাং, দৌর্মনস্যমবৃষ্যাণাম্, অযথাবলমারম্ভঃ প্রাণোপরোধিনাং, বিষাদো রোগবর্ধনানাং, স্নানং শ্রমহরাণাং, হর্ষঃ প্রীণনানাং, শোকঃ শোষণানাং, নিবৃত্তিঃ পুষ্টিকরাণাং, পুষ্টিঃস্বপ্নকরাণাম্, অতিস্বপ্নস্তন্দ্রাকরাণাং, সর্বরসাভ্যাসো বলকরাণাম্, একরসাভ্যাসো দৌর্বল্যকরাণাং, গর্ভশল্যমাহার্যাণাম্, অজীর্ণমুদ্ধার্যাণাং, বালো মৃদুভেষজীযানাং, বৃদ্ধো যাপ্যানাং, গর্ভিণী তীক্ষ্ণৌষধব্যবাযব্যাযামবর্জনীযানাং, সৌমনস্যং গর্ভধারণানাং, সন্নিপাতো দুশ্চিকিত্স্যানাম্, আমো বিষমচিকিত্স্যানাং , জ্বরো রোগাণাং, কুষ্ঠং দীর্ঘরোগাণাং, রাজযক্ষ্মা রোগসমূহানাং, প্রমেহোঽনুষঙ্গিণাং, জলৌকসোঽনুশস্ত্রাণাং, বস্তিস্তন্ত্রাণাং, হিমবানৌষধিভূমীনাং, সোম ওষধীনাং, মরুভূমিরারোগ্যদেশানাম্, অনূপোঽহিতদেশানাম্, নির্দেশকারিত্বমাতুরগুণানাং, ভিষক্ চিকিত্সাঙ্গানাং, নাস্তিকোবর্জ্যানাং, লৌল্যং ক্লেশকরাণাম্, অনির্দেশকারিত্বমরিষ্টানাং, অনির্বেদো বার্তলক্ষণানাং, বৈদ্যসমূহো নিঃসংশযকরাণং, যোগো বৈদ্যগুণানাং, বিজ্ঞানমৌষধীনাং, শাস্ত্রসহিতস্তর্কঃ সাধনানাং, সম্প্রতিপত্তিঃ কালজ্ঞানপ্রযোজনানাম্, অব্যবসাযঃ কালাতিপত্তিহেতূনাং, দৃষ্টকর্মতা নিঃসংশযকরাণাম্, অসমর্থতা ভযকরাণাং, তদ্বিদ্যসম্ভাষা বুদ্ধিবর্ধনানাম্, আচার্যঃ শাস্ত্রাধিগমহেতূনাম্, আযুর্বেদোঽমৃতানাং, সদ্বচনমনুষ্ঠেযানাম্, অসদ্গ্রহণং সর্বাহিতানাং, সর্বসন্ন্যাসঃ সুখানামিতি||৪০||

অতো ভূয ইতি অত ইতি হেতৌ, যস্মাদ্ধিতাহিতাদ্যুক্তং ন তু তেষাং কর্মেত্যর্থঃ| ভূযঃ শব্দঃ পুনরর্থে, কর্মেতি কার্যম্; তেন, অতো ভূয আহারবিকারাণাং কর্ম| যথা- ‘অন্নং বৃত্তিকরাণাম্’, ‘উদকমাশ্বাসকরাণাম্’ ইত্যাদি; তথৌষধানাং চ কর্ম, যথা- ‘ত্রিবৃত্ সুখবিরেচনানাম্’ ইত্যাদি বক্ষ্যামঃ| প্রাধান্যত ইত্যনেন ন সর্বেষামাহারবিকারাণামৌষধানাং চ কর্মাভিধানং , কিন্তু যথাপ্রধানমিতি দর্শযতি| সানুবন্ধানীতি সপ্রযোজনানি, যথা- অজীর্ণমুদ্ধার্যাণামিত্যাদি; অজীর্ণজ্বরাদিকর্মকথনং হি চিকিত্সোপযোগি ব্যক্তমেব| দ্রব্যাণীতি মহাভূতানি, যথা- জলং স্তম্ভনানাং, বাযুঃ প্রাণসঞ্জ্ঞাপ্রদানহেতূনাম্, ইত্যাদি| দ্রব্যাণীত্যুপলক্ষণং; তচ্চ সানুবন্ধানীত্যস্য বিশেষণং, তেনাদ্রব্যমপি সানুবন্ধমুচ্যতে; যথা- ‘শাস্ত্রসহিতস্তর্কঃ সাধনানাম্’ ইত্যাদি| কিংবা, হিতাহিতাবযবমিতি কর্মবিশেষণং; তেন, হিতাহিতৈকদেশরূপং কর্মাহারবিকারণামিতি ভবতি; তত্র হিতং কর্ম ‘অন্নং বৃত্তিকরাণাম্’ ইত্যাদি, অহিতং কর্ম ‘আবিকং সর্পিরহৃদ্যানাম্’ ইত্যাদি| ঔষধানাং কর্ম ‘ত্রিবৃত্ সুখবিরেচনানাম্’ ইত্যাদি ব্যাখ্যানং পূর্ববদেব| বৃত্তিকরাণামিতি শরীরস্থিতিকরাণাম্ | অন্নদ্রব্যরুচিকরাণামিতি লবণমন্নেন সংযুক্তং সদন্নে রুচিং করোতীত্যর্থঃ| অম্লং হৃদ্যানামিতি রুচ্যানাম্, অম্লং তু স্বযমেব রোচতে| মধু শ্লেষ্মপিত্তপ্রশমনানামিতি দ্রবদ্রব্যেষু, দুরালভা ত্বৌষধদ্রব্যেষু; তেন দুরালভাযা মধুনশ্চ শ্লেষ্মপিত্তপ্রশমনশ্রেষ্ঠত্বাবধারণং ন বিরোধি| বস্তিরিতি অবিশেষাদাস্থাপনানুবাসনে| অবিক্ষীরং পিত্তশ্লেষ্মজননানামিতি পেযেষু মধ্যে, মাষাঃ পিত্তশ্লেষ্মজননানামিতি ভোজ্যেষু, শষ্কুল্যঃ পিত্তশ্লেষ্মজননানামিতি ভক্ষ্যেষু মধ্যে; কিংবা, ত্রযমপ্যেতত্ পিত্তশ্লেষ্মজননং প্রতি সমানমিতি ত্রিতযমপ্যুচ্যতে; এবমন্যত্রাপি তুল্যশ্রেষ্ঠতাভিধানং তজ্জাতীযশ্রেষ্ঠতাভিপ্রাযেণ তথা তুল্যত্বেন চ জ্ঞেযম্| মন্দকমিতি মন্দজাতম্| উদ্দালকো বনকোদ্রবঃ| গুদশোথঃ অর্শঃ| গন্ধপ্রিযঙ্গুঃ প্রিযঙ্গুরেব| ক্রব্যং মাংসমত্তীতি ক্রব্যাদ্ ব্যাঘ্রাদিঃ| সমঘৃত ইত্যত্র সমশব্দঃ সহার্থঃ| উদ্বেপনমিতি বেপনম্| উদকমাশ্বাসনস্তম্ভনানামিতি বক্তব্যে, যত্ পৃথক্ ‘উদকমাশ্বাসকরাণাং’, তথা ‘জলং স্তম্ভনানাং’ ইতি করোতি, তেন কর্মদ্বযেঽপি জলস্যানন্যসাধারণতাং দর্শযতি; মিলিত্বা গুণপাঠে হ্যুভযকর্মকর্তৃষ্বেব প্রাধান্যং স্যাত্; এবমন্যত্রাপ্যনেককর্মকর্তৃত্বে যস্য প্রাধান্যমুক্তং পিপ্পলীমূলাদৌ, তত্র তথাভূতানেককর্মকর্তৃত্বেষ্বেব প্রাধান্যং জ্ঞেযং, ন পৃথক্কর্মণি| লামজ্জকোশীরমুশীরদ্বযং সগন্ধমগন্ধং চ গৃহ্যতে| একাশনভোজনমিতি এককালভোজনম্; অনেনৈকাশনস্য সুখপরিণামতামাত্রমুচ্যতে, ন দ্বিতীযান্নপ্রতিষেধঃ ক্রিযতে; এতেন দ্বির্ভোজনেঽপ্যব্যাহতাগ্নিতানিদ্রাদযঃ সুখপরিণামকারণত্বেন জ্ঞেযাঃ| শোষদ্বারাণামিতি শোষকারণানাম্| পরাঘাতনং বধস্থানং, বধ্যমানপ্রাণিদর্শনাদ্ধি ঘৃণযা নান্নে শ্রদ্ধা স্যাত্| ‘যথাঽশিতং’ ইতি কেচিত্ পঠন্তি, তন্নাতিসাধু| প্রমিতাশনম্ অতীতকালভোজনং, স্তোকভোজনং বা| বিষমাশনং প্রকৃতিকরণাদিবিষমাশনম্| নিন্দিতব্যাধিঃ শ্বিত্রকুষ্ঠাদিঃ| অলক্ষ্মীমুখানাম্ অলক্ষ্মীকারণানাম্| মিথ্যাযোগঃ সম্যগ্যোগাদন্যস্ত্রিবিধো যোগঃ| সঙ্কল্পঃ স্ত্রীসঙ্গসঙ্কল্পঃ| জ্বরো রোগাণামিতি রুজাকর্তৄণাম্| অনুষঙ্গী পুনর্ভাবী| তন্ত্রাণামিতি কর্মণাম্| সোম ওষধিরাজঃ পঞ্চদশপর্বা| বার্তলক্ষণানামিতি আরোগ্যলক্ষণানাম্| জ্ঞানমিতি ঔষধাদিবিজ্ঞানম্| সাধনানামিতি জ্ঞানসাধনানাম্| সম্প্রতিপত্তিঃ যথাকর্তব্যতানুষ্ঠানম্ | তৃপ্তিরাহারগুণানামিত্যত্র গুণশব্দঃ প্রশস্তধর্মবচনঃ| একরসাভ্যাসঃ কর্শনানামিতি অপবাদং বর্জযিত্বা, তেন ঘৃতাভ্যাসো রসাযনানামিতি ন বিরুধ্যতে| অমৃতানামিতি জীবিতপ্রধা(দা)নহেতূনাম্| সর্বসন্ন্যাসঃ সর্বক্রিযাত্যাগঃ , স হি পরমসুখমোক্ষহেতুঃ শারীরে বক্তব্যঃ||৪০||

Adhikarana 21 (41) · Śloka 41

ভবন্তি চাত্র- অগ্র্যাণাং শতমুদ্দিষ্টং যদ্দ্বিপঞ্চাশদুত্তরম্| অলমেতদ্বিকারাণাং বিঘাতাযোপদিশ্যতে||৪১||

অগ্র্যাণামিত্যাদৌ অগ্র্যশব্দঃ শ্রেষ্ঠবচনঃ| অলমিতি সমর্থম্| অত্র জ্বরপ্রমেহাদযোঽপি স্বরূপেণাতিপীডাকরত্বানুষঙ্গিকত্বাদিনা জ্ঞাতাঃ সন্তশ্চিকিত্সাযামুপযুক্তা ভবন্তি, অতো জ্বরাদিজ্ঞানমপি বিকারাণাং বিঘাতায সমর্থং ভবতি | অগ্র্যাণাং চ বিকারশমকত্বাভিধানং প্রাধান্যাদুচ্যতে, স্তুত্যর্থং বা; তেন যদুচ্যতে- এত এব চেদগ্র্যাধিকারে বিহিতা বিকারাঞ্ছমযন্তি, তত্ কিমপরচিকিত্সাভিধানেনেতি; তন্নিরস্তং ভবতি| বিকারবিঘাতশ্চেহোত্পন্নানামৌষধোপযোগেন, তথাঽনুত্পন্নানাং স্বাস্থ্যপরিপালনেন জ্ঞেযঃ||৪১||

Adhikarana 22 (42-44) · Śloka 44

সমানকারিণো যেঽর্থাস্তেষাং শ্রেষ্ঠস্য লক্ষণম্| জ্যাযস্ত্বং কার্যকর্তৃত্বে বরত্বং চাপ্যুদাহৃতম্||৪২|| বাতপিত্তকফানাং চ যদ্যত্ প্রশমনে হিতম্| প্রাধান্যতশ্চ নির্দিষ্টং যদ্ব্যাধিহরমুত্তমম্||৪৩|| এতন্নিশম্য নিপুণং চিকিত্সাং সম্প্রযোজযেত্| এবং কুর্বন্ সদা বৈদ্যো ধর্মকামৌ সমশ্নুতে||৪৪||

অগ্র্যাধিকারোক্তং সঙ্গ্রহেণ কথযতি- সমানেত্যাদি| সমানকারিণঃ তুল্যকর্মাণঃ| শ্রেষ্ঠস্য লক্ষণমিতি প্রশস্তস্য লক্ষণং; লক্ষণং ত্বিহ পাঠ এব, পাঠেন হি শ্রৈষ্ঠ্যং লক্ষ্যতে জ্ঞাযত ইত্যর্থঃ| জ্যাযস্ত্বং বৃহত্ত্বং , তদপ্রশস্তগুণবৃহত্ত্বং জ্ঞেযম্; অত এবাহিতাধিকারকথনে শ্রেষ্ঠতমশব্দং ত্যক্ত্বা ‘অপথ্যতমত্বে প্রকৃষ্টতমা ভবন্তি’ ইত্যুক্তং, তেন শ্রেষ্ঠস্য লক্ষণমিতি রক্তশাল্যাদীনাং হিতাহারাণাং জ্ঞেযং, জ্যাযস্ত্বং চাহিতাহারাণাং যবকাদীনামপথ্যতমত্বে প্রকর্ষশালিত্বম্| কার্যকর্তৃত্বে বরত্বং চেতি কর্মণি চোত্কৃষ্টত্বং, তচ্চ ‘অন্নং বৃত্তিকরাণাম্’ ইত্যাদিনোক্তং জ্ঞেযম্| বাতপিত্তকফানাং চেত্যাদৌ ‘বস্তির্বাতহরাণাং’, ‘বিরেচনং পিত্তহরাণাং’, ‘বমনং শ্লেষ্মহরাণাম্’, ‘আস্থাপনং বাতহরণাম্’ ইত্যাদি জ্ঞেযম্| যদ্ব্যাধিহরমিতি ‘খদিরঃ কুষ্ঠহরাণাং’, ‘পুষ্করমূলং হিক্কাশ্বাসকাসপার্শ্বশূলানাহহরাণাম্’ ইত্যাদি জ্ঞেযম্| কিংবা ‘অবরত্বম্’ ইতি পাঠঃ; তদা অবরত্বম্ অন্যথা অনভিপ্রেতকর্তৃত্বং, তচ্চ ‘রজস্বলাগমনমলক্ষ্মীমুখানাম্’ ইত্যাদি জ্ঞেযম্| শ্রেষ্ঠত্বজ্যাযস্ত্বাভ্যাং প্রশস্তাপ্রশস্তকর্মণামপি গ্রহণং ব্যাখ্যেযম্||৪২-৪৪||

Adhikarana 23 (45-47) · Śloka 47

পথ্যং পথোঽনপেতং যদ্যচ্চোক্তং মনসঃ প্রিযম্| যচ্চাপ্রিযমপথ্যং চ নিযতং তন্ন লক্ষযেত্||৪৫|| মাত্রাকালক্রিযাভূমিদেহদোষগুণান্তরম্ | প্রাপ্য তত্তদ্ধি দৃশ্যন্তে তে তে ভাবাস্তথা তথা||৪৬|| তস্মাত্ স্বভাবো নির্দিষ্টস্তথা মাত্রাদিরাশ্রযঃ| তদপেক্ষ্যোভযং কর্ম প্রযোজ্যং সিদ্ধিমিচ্ছতা||৪৭||

সম্প্রত্যুক্তস্য পথ্যস্য হিতাপরনাম্নো লক্ষণমাহ- পথ্যমিত্যাদি| পথঃ শরীরমার্গাত্ স্রোতোরূপাদনপেতম্; অপেতম্ অপকারকম্, অনপেতম্ অনপকারকমিত্যর্থঃ| পথোগ্রহণেন পথোবাহ্যা দোষা ধাতবশ্চ, তথা পথোনির্বর্তকা ধাতবো গৃহ্যন্তে; তেন কৃত্স্নমেব শরীরং গৃহীতং ভবতি, ততশ্চ শরীরানুপঘাতি পথ্যমিতি ভবতি| কিংবা, স্বস্থস্বাস্থ্যরক্ষণমাতুরব্যাধিপরিমোক্ষশ্চেতি পন্থাঃ, তস্মাদনপেতং পথ্যম্| এবমপি মনোঽনুপঘাতিত্বং ন লভ্যত ইত্যাহ- যচ্চোক্তং মনসঃ প্রিযমিতি| মনসোঽতিপ্রীত্যাঽভিলষিতং, তেন মনসো হিতমিতি প্রিযার্থঃ; তেন প্রশমজ্ঞানাতীক্ষ্ণত্বাদযো গৃহ্যন্তে| এতেন, ‘মনঃশরীরানুপঘাতি পথ্যং’ ইতি পথ্যলক্ষণমনপবাদমুক্তং ভবতি| অন্যে তু পথ্যলক্ষণদ্বযমেতত্ পঠন্তি, বদন্তি চ- “যদ্যেকং লক্ষণং স্যাত্তদা জ্বরাদিষু তিক্তং ভেষজং মনসোঽপ্রিযত্বেন ন পথ্যং স্যাত্; এতচ্চানুমতমেব , যদ্ জ্বরে তিক্তপ্রযোগস্য তদাত্বে ন মনসোঽনুকূলত্বং, ন চৈতাবতা শরীরং প্রত্যপথ্যত্বং ভবতি”, অতো যন্মাত্রং মনোঽনুকূলত্বং মানসবিকারাকর্তৃত্বাত্ তদ্ব্যপদেশ্যমেব; কিংবা তাবন্মাত্রমনোঽননুকূলত্বং মানসবিকারাকর্তৃত্বাদব্যপদেশ্যমেব| তদেতদপথ্যত্বং কিমাহারাচারাণাং নিযতমস্তি নেত্যাহ- যচ্চেত্যাদি| নিযতং নিশ্চিতমিদমপ্রিযমেব সর্বদেদমপথ্যমেব সর্বদেত্যেবংরূপং কিঞ্চিন্নাস্তীত্যর্থঃ| কুতো নাস্তীত্যাহ- মাত্রেত্যাদি| গুণান্তরশব্দো মাত্রাদিভিঃ সম্বধ্যতে| তত্তদিতি মাত্রাদিগুণান্তরম্| তে তে ইতি হিতাহিতাহারাচারাঃ| তথা তথেতি হিতোক্তা অপি হিতাশ্চাহিতাশ্চ, তথা অহিতোক্তাশ্চাহিতা হিতাশ্চ| এবং প্রিযমপি মধুরাদ্যপ্রিযং, তিক্তাদ্যপ্রিযমপি প্রিযম্| অত্রোদাহরণং যথা- পথ্যং তাবদ্ঘৃতং; তদতিমাত্রমপথ্যং ভবতি, কালে চ বসন্তেঽপথ্যং, সংস্কারেণ চ বিরুদ্ধদ্রব্যসংস্কৃতমপথ্যং, ভূমৌ চানূপাযামপথ্যম্, এবং দেহেঽতিস্থূলে দোষে চ কফেঽপথ্যম্| অপথ্যমপি বিষং মাত্রাদিনা হিতং ভবতি, যথা রসাযনে- “বিষস্য তিলং দদ্যাত্” (চি.অ.১) ইত্যাদি| এবমন্যদপ্যূহ্যম্| যস্মাদেবমেকান্তমপথ্যত্বমনিশ্চিতং, প্রাযোবাদপথ্যতা তু নিশ্চিতা; তস্মাত্ স্বভাবো নির্দিষ্ট ইতি পথ্যানাং রক্তশাল্যাদীনামপথ্যানাং চ যবকাদীনামিত্যর্থঃ; স্বভাবঃ প্রকৃত্যা পথ্যতা অপথ্যতা চ| তথা মাত্রাদিরাশ্রয ইতি নির্দিষ্ট ইতি সম্বন্ধঃ| মাত্রাদিঃ মাত্রাকালক্রিযাদিঃ| আশ্রয ইতি পথ্যত্বাপথ্যত্বযোঃ| মাত্রাদীন্যাশ্রিত্য ভাবানাং পথ্যত্বাপথ্যত্বং চ পারমার্থিকং ভবতীত্যর্থঃ| উভযমিতি স্বভাবং মাত্রাদিং চ||৪৫-৪৭||

Adhikarana 24 (49) · Śloka 49

তদাত্রেযস্য ভগবতো বচনমনুনিশম্য পুনরপি ভগবন্তমাত্রেযমগ্নিবেশ উবাচ- যথোদ্দেশমভিনির্দিষ্টঃ কেবলোঽযমর্থো ভগবতা শ্রুতশ্চাস্মাভিঃ| আসবদ্রব্যাণামিদানীমনপবাদং লক্ষণমনতিসঙ্ক্ষেপেণোপদিশ্যমানং শুশ্রূষামহ ইতি||৪৮|| তমুবাচ ভগবানাত্রেযঃ- ধান্যফলমূলসারপুষ্পকাণ্ডপত্রত্বচো ভবন্ত্যাসবযোনযোঽগ্নিবেশ! সঙ্গ্রহেণাষ্টৌ শর্করানবমীকাঃ| তাস্বেব দ্রব্যসংযোগকরণতোঽপরিসঙ্খ্যেযাসু যথাপথ্যতমানামাসবানাং চতুরশীতিং নিবোধ| তদ্যথা- সুরাসৌবীরতুষোদকমৈরেযমেদকধান্যাম্লাঃ ষড্ ধান্যাসবা ভবন্তি, মৃদ্বীকাখর্জূরকাশ্মর্যধন্বনরাজাদনতৃণশূন্যপরূষকাভযামলকমৃগলিণ্ডিকাজাম্ববকপিত্থ- কুবলবদরকর্কন্ধুপীলুপ্রিযালপনসন্যগ্রোধাশ্বত্থপ্লক্ষকপীতনোদুম্বরাজমোদশৃঙ্গাটকশাঙ্খিনীফলাসবাঃ ষড্বিংশতির্ভবন্তি, বিদারিগন্ধাশ্বগন্ধাকৃষ্ণগন্ধাশতাবরীশ্যামাত্রিবৃদ্দন্তীদ্রবন্তীবিল্বোরুবূকচিত্রকমূলৈরেকাদশ মূলাসবা ভবন্তি, শালপ্রিযকাশ্বকর্ণচন্দনস্যন্দনখদিরকদরসপ্তপর্ণার্জুনাসনারিমেদতিন্দুককিণিহীশমী- শুক্তিশিংশপাশিরীষবঞ্জলধন্বনমধূকৈঃ সারাসবা বিংশতির্ভবন্তি, পদ্মোত্পলনলিকুমুদসৌগন্ধিকপুণ্ডরীকশতপত্রমধূকপ্রিযঙ্গুধাতকীপুষ্পৈর্দশ পুষ্পাসবা ভবন্তি, ইক্ষুকাণ্ডেক্ষ্বিক্ষুবালিকাপুণ্ড্রকচতুর্থাঃ কাণ্ডাসবা ভবন্তি, পটোলতাডকপত্রাসবৌ দ্বৌ ভবতঃ, তিল্বকলোধ্রৈলবালুকক্রমুকচতুর্থাস্ত্বগাসবা ভবন্তি, শর্করাসব এক এবেতি| এবমেষামাসবানাং চতুরশীতিঃ পরস্পরেণাসংসৃষ্টানামাসবদ্রব্যাণামুপনির্দিষ্টা ভবতি| এষামাসবানামাসুতত্বাদাসবসঞ্জ্ঞা| দ্রব্যসংযোগবিভাগবিস্তারস্ত্বেষাং বহুবিধকল্পঃ সংস্কারশ্চ| যথাস্বং সংযোগসংস্কারসংস্কৃতা হ্যাসবাঃ স্বং কর্ম কুর্বন্তি| সংযোগসংস্কারদেশকালমাত্রাদযশ্চ ভাবাস্তেষাং তেষামাসবানাং তে তে সমুপদিশ্যন্তে তত্তত্কার্যমভিসমীক্ষ্যেতি||৪৯||

ইদানীমগ্র্যাধিকারাদাসবেষ্বনন্তেষু য আসবা অগ্র্যাস্ত উচ্যন্তে| ধান্যাদীন্যেকত্বেন পঠিত্বা পৃথক্ শর্করাং পঠতি, ধান্যাদীনামবান্তরজাতিমত্বাত্; শর্করাযাস্ত্ববান্তরজাতির্নাস্তি, যা তু যাসশর্করা সা নাসবকারণতযা শ্রূযতে, মধুশর্করা তু মধ্বন্তর্নিবিষ্টৈব| মধু তু নাসবযোনিতযা পৃথক্পঠিতং, যেন তত্কৃতস্যাসবস্য ধান্যসম্বন্ধাদ্ধান্যাসবেনৈব গ্রহণম্ | এবং গৌডাসবাদিষ্বপি বোদ্ধব্যম্| দ্রব্যং চ সংযোগশ্চ করণং চ দ্রব্যসংযোগকরণং, ততোঽপরিসঙ্খ্যেযাঃ স্যুঃ| সৌবীরং নিস্তুষযবকৃতং, মৈরেযং সুরাকৃতা সুরা, মেদকঃ শ্বেতসুরা জগলাখ্যা, ধান্যাম্বু কাঞ্জিকম্| তৃণশূন্যং কেতকী, মৃগলিণ্ডিকা বিভীতকং, কুবলমিতি স্থূলবদরী, কর্কন্ধুঃ শৃগালবদরী| কদরঃ শ্বেতখদিরঃ, অশ্বকর্ণঃ শালভেদঃ, অরিমেদো বিট্খদিরঃ, কিণিহী অপামার্গঃ, শুক্তিঃ বদরী| পদ্মং সরক্তমষ্টদলপদ্মং, নলিনং শ্বেতমষ্টদলপদ্মং, পুণ্ডরীকং শ্বেতশতপত্রপদ্মং, শতপত্রং ত্বরুণম্| ইক্ষুশব্দপ্রাপ্তস্যাপি পুণ্ড্রকস্য পুনরভিধানমাসবং প্রতি তস্য প্রাধান্যখ্যাপনার্থম্| ক্রমুকং গুবাকম্| তিল্বকঃ শাবরলোধ্রঃ| আসুতত্বাদিতি সন্ধানরূপত্বাত্| দ্রব্যসংযোগবিভাগ ইত্যাদৌ ‘এষাম্’ ইতি পদেন প্রত্যেকং ধান্যাদিদ্রব্যকৃতা আসবা উক্তাঃ| তেষাং চ বিভাগোঽনুপপন্ন একরূপত্বাদিতি চেত্? তন্ন, তেষামপি সজাতীযদ্রব্যবিভাগস্য বিদ্যমানত্বাত্| কিঞ্চ সংস্কারকদ্রব্যবিভাগস্যাপি তত্র শক্যত্বাত্; নহ্যেকেনৈব দ্রব্যেণ সুরাদযঃ ক্রিযন্তে, প্রাধান্যাত্তু ধান্যাদযোঽভিধীযন্তে| সংস্কারশ্চ বহুবিধবিকল্প ইতি যোজনা| সংযোগসংস্কারকরণপ্রযোজনমাহ- যথাস্বমিত্যাদি| যথাস্বমিতি যদ্যুজ্যতে; দেশো ভস্মরাশিধান্যরাশ্যাদিঃ সন্ধানেষু বক্ষ্যমাণঃ, কালস্তু পক্ষমাসাদিস্থাপনং, মাত্রা সন্ধানদ্রব্যমাত্রা| আদিগ্রহণাদ্দ্রব্যস্বভাবেতিকর্তব্যতাসঙ্গ্রহণম্| তত্তত্কার্যমিতি দেশকালশরীরদোষাদিভিন্নং হিতত্বম্||৪৯||

Adhikarana 25 (50) · Śloka 50

ভবতি চাত্র- মনঃশরীরাগ্নিবলপ্রদানামস্বপ্নশোকারুচিনাশনানাম্| সংহর্ষণানাং প্রবরাসবানামশীতিরুক্তা চতুরুত্তরৈষা||৫০||

মনঃশরীরেত্যাদিনা গুণকথনং যুক্ত্যা পীতস্যাসবস্য জ্ঞেযম্||৫০||

Adhikarana 26 (51) · Śloka 51

তত্র শ্লোকঃ- শরীররোগপ্রকৃতৌ মতানি তত্ত্বেন চাহারবিনিশ্চযং চ| উবাচ যজ্জঃপুরুষাদিকেঽস্মিন্ মুনিস্তথাঽগ্র্যাণি বরাসবাংশ্চ||৫১||

Adhikarana puShpikA · Śloka 25

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে যজ্জঃপুরুষীযো নাম পঞ্চবিংশোঽধ্যাযঃ||২৫||

ইতি শ্রীচক্রপাণিদত্তবিরচিতাযাং চরকতাত্পর্যব্যাখ্যাযামাযুর্বেদদীপিকাখ্যাযাং সূত্রস্থানেঽন্নপানচতুষ্কে যজ্জঃপুরীষীযো নাম পঞ্চবিংশোঽধ্যাযঃ||২৫||