Adhikarana 1 (1-2) · Śloka 2
অথাতো জনপদোদ্ধ্বংসনীযং বিমানং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो जनपदोद्ध्वंसनीयं विमानं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
দ্বিবিধো হেতুর্ব্যাধিজনকঃ প্রাণিনাং ভবতি- সাধারণঃ, অসাধারণশ্চ; তত্রাসাধারণং প্রতিপুরুষনিযতং বাতাদিজনকমাহারাদ্যভিধায বহুজনসাধারণং বাতজলদেশকালরূপং সাধারণরোগকারণমভিধাতুং জনপদোদ্ধ্বংসনীযোঽভিধীযতে||১-২||
Adhikarana 2 (3) · Śloka 3
জনপদমণ্ডলে পঞ্চালক্ষেত্রে দ্বিজাতিবরাধ্যুষিতে কাম্পিল্যরাজধান্যাং ভগবান্ পুনর্বসুরাত্রেযোঽন্তেবাসিগণপরিবৃতঃ পশ্চিমে ঘর্মমাসে গঙ্গাতীরে বনবিচারমনুবিচরঞ্ছিষ্যমগ্নিবেশমব্রবীত্||৩||
जनपदमण्डले पञ्चालक्षेत्रे द्विजातिवराध्युषिते काम्पिल्यराजधान्यां भगवान् पुनर्वसुरात्रेयोऽन्तेवासिगणपरिवृतः पश्चिमे घर्ममासे गङ्गातीरे वनविचारमनुविचरञ्छिष्यमग्निवेशमब्रवीत्||३||
🔊 Audio coming soon
জনপদবসত্যুপলক্ষিতং মণ্ডলং জনপদমণ্ডলং, ‘পঞ্চালক্ষেত্রে’ ইতি তস্য বিশেষণম্| দ্বিজাতিবরাধ্যুষিত ইতি বচনেন মহাজনসেবিতেঽপি দেশেঽধর্মবশাজ্জনপদোদ্ধ্বংসো বক্ষ্যমাণো ভবতীতি দর্শযতি| পশ্চিমে ঘর্মমাস ইতি জ্যেষ্ঠে| বনবিচারমনুবিচরন্নিতি বনং বিচর্য বিচর্যানুবিচরন্নিত্যর্থঃ||৩||
Adhikarana 3 (4) · Śloka 4
দৃশ্যন্তে হি খলু সৌম্য! নক্ষত্রগ্রহগণচন্দ্রসূর্যানিলানলানাং দিশাং চাপ্রকৃতিভূতানামৃতুবৈকারিকা ভাবাঃ, অচিরাদিতো ভূরপি চ ন যথাবদ্রসবীর্যবিপাকপ্রভাবমোষধীনাং প্রতিবিধাস্যতি, তদ্বিযোগাচ্চাতঙ্কপ্রাযতা নিযতা| তস্মাত্ প্রাগুদ্ধ্বংসাত্ প্রাক্ চ ভূমের্বিরসীভাবাদুদ্ধরধ্বং সৌম্য! ভৈষজ্যানি যাবন্নোপহতরসবীর্যবিপাকপ্রভাবাণি ভবন্তি| বযং চৈষাং রসবীর্যবিপাকপ্রভাবানুপযোক্ষ্যামহে যে চাস্মাননুকাঙ্ক্ষন্তি, যাংশ্চ বযমনুকাঙ্ক্ষামঃ| ন হি সম্যগুদ্ধৃতেষু সৌম্য! ভৈষজ্যেষু সম্যগ্বিহিতেষু সম্যক্ চাবচারিতেষু জনপদোদ্ধ্বংসকরাণাং বিকারাণাং কিঞ্চিত্ প্রতীকারগৌরবং ভবতি||৪||
दृश्यन्ते हि खलु सौम्य! नक्षत्रग्रहगणचन्द्रसूर्यानिलानलानां दिशां चाप्रकृतिभूतानामृतुवैकारिका भावाः, अचिरादितो भूरपि च न यथावद्रसवीर्यविपाकप्रभावमोषधीनां प्रतिविधास्यति, तद्वियोगाच्चातङ्कप्रायता नियता| तस्मात् प्रागुद्ध्वंसात् प्राक् च भूमेर्विरसीभावादुद्धरध्वं सौम्य! भैषज्यानि यावन्नोपहतरसवीर्यविपाकप्रभावाणि भवन्ति| वयं चैषां रसवीर्यविपाकप्रभावानुपयोक्ष्यामहे ये चास्माननुकाङ्क्षन्ति, यांश्च वयमनुकाङ्क्षामः| न हि सम्यगुद्धृतेषु सौम्य! भैषज्येषु सम्यग्विहितेषु सम्यक् चावचारितेषु जनपदोद्ध्वंसकराणां विकाराणां किञ्चित् प्रतीकारगौरवं भवति||४||
🔊 Audio coming soon
ঋতুবিকারায ভূতা ঋতুবৈকারিকাঃ; ঋতুবিকারশ্চোপলক্ষণং, তেন জলদেশবাতবিকারায ভূতা ইতি মন্তব্যং; যতো ভূম্যাদীনামপি বিকৃতিং বক্ষ্যতি| কিংবা ঋত্বননুরূপা ঋতুবৈকারিকাঃ; তেন, ঋত্বননুরূপলক্ষণমেব নক্ষত্রাদীনাং বিকৃতিরিত্যুক্তং ভবতি; গ্রীষ্মে হি নক্ষত্রাণি নির্মলানি ভবন্তি, তানি যদি তুষারচ্ছন্নানি গ্রীষ্মে ভবন্তি, তদা বিকৃতানি ভবন্তীতি বোদ্ধব্যম্| ভূরপি চেত্যপিবচনাজ্জলানিলৌ চ গ্রাহযতি; তেন, ভূস্তাবদোষধীনাং প্রধানং কারণং, সা রসাদীন্ন প্রতিবিধাস্যতি; জলবাতাবপি চৌষধীনাং রসাদীন্ন প্রতিবিধাস্যত ইত্যুক্তং ভবতি| প্রতিবিধাস্যতীতি জনযিষ্যতি| উদ্ধরধ্বমিতি বহুবচনং বহ্বন্তেবাসিযুক্তাগ্নিবেশাভিপ্রাযেণ; অগ্নিবেশস্তু প্রধানত্বেনৈক এবেতি ‘অগ্নিবেশ’ ইতিপদেন তথা ‘সৌম্য’ ইতিপদেন সম্বোধ্যতে; ভেষজোদ্ধরণং তু বহুভিরেব কর্তব্যমিত্যভিপ্রাযেণ বহুবচনম্| ভবতি হি প্রধানং সম্বোধ্য গণসম্পাদ্যক্রিযাযাং বহুবচনং; যথা- সেনাপতে যুধ্যধ্বমিতি| অন্যে তু সৌম্যপদং ভেষজবিশেষণং কুর্বন্তি| যে চাস্মাননুকাঙ্ক্ষন্তি যে চাস্মান্ ভিষজোঽনুকাঙ্ক্ষন্তীত্যর্থঃ, যাংশ্চ বযমনুকাঙ্ক্ষামশ্চিকিত্স্যত্বেন| এতেন, যে বৈদ্যমনুকাঙ্ক্ষন্তি তে বৈদ্যপ্রিযত্বেন সাধ্যাঃ, অসাধ্যা হি বৈদ্যদ্বিষ উক্তাঃ; বৈদ্যাশ্চ যানিচ্ছন্তি তে সাধ্যরোগা এব, অসাধ্যান্ হি বৈদ্যা নেচ্ছন্তি| এতেনান্যেষামপি যেষাং ভেষজসাধ্যা রোগাস্তে আসামোষধীনাং রসাদীনুপযোক্ষ্যন্তীত্যর্থঃ| যদি চ যে অস্মদ্গতাঃ, যাংশ্চ বযং প্রযোজনবশাদনুগতাঃ, তে উপযোক্ষ্যন্তীতি ব্যাখ্যাযতে, তদা আত্রেযস্য পক্ষরাগিত্বেনাপ্তত্বং ন সম্ভবতি, “সর্বপ্রজানাং পিতৃবচ্ছরণ্যঃ” (চি.অ.৫) ইতি বচনাচ্চাস্য নীরাগত্বমুক্তম্||৪||
Adhikarana 4 (5) · Śloka 5
এবংবাদিনং ভগবন্তমাত্রেযমগ্নিবেশ উবাচ- উদ্ধৃতানি খলু ভগবন্! ভৈষজ্যানি, সম্যগ্বিহিতানি, সম্যগবচারিতানি চ; অপি তু খলু জনপদোদ্ধ্বংসনমেকেনৈব ব্যাধিনা যুগপদসমানপ্রকৃত্যাহারদেহবলসাত্ম্যসত্ত্ববযসাং মনুষ্যাণাং কস্মাদ্ভবতীতি||৫||
एवंवादिनं भगवन्तमात्रेयमग्निवेश उवाच- उद्धृतानि खलु भगवन्! भैषज्यानि, सम्यग्विहितानि, सम्यगवचारितानि च; अपि तु खलु जनपदोद्ध्वंसनमेकेनैव व्याधिना युगपदसमानप्रकृत्याहारदेहबलसात्म्यसत्त्ववयसां मनुष्याणां कस्माद्भवतीति||५||
🔊 Audio coming soon
উদ্দ্ধৃতানীতি বচনমভূতে ভূতবচ্চেতি প্রযোগাদ্বোদ্ধব্যং, যথা- অচিরকর্তব্যে কৃতমিতি বদন্তি; ন হি বচনকাল এব ওষধীনামুদ্ধরণং সম্ভবতীতি| একেনেতি একজাতীযেন| অসমানপ্রকৃত্যাদীনাং সমানকারণাভাবান্ন তুল্যরূপো ব্যাধির্ভবিতুমর্হতীতি প্রশ্নার্থঃ||৫||
Adhikarana 5 (6) · Śloka 6
তমুবাচ ভগবানাত্রেযঃ- এবমসামান্যাবতামপ্যেভিরগ্নিবেশ! প্রকৃত্যাদিভির্ভাবৈর্মনুষ্যাণাং যেঽন্যে ভাবাঃ সামান্যাস্তদ্বৈগুণ্যাত্ সমানকালাঃ সমানলিঙ্গাশ্চ ব্যাধযোঽভিনির্বর্তমানা জনপদমুদ্ধ্বংসযন্তি| তে তু খল্বিমে ভাবাঃ সামান্যা জনপদেষু ভবন্তি; তদ্যথা- বাযুঃ, উদকং, দেশঃ, কাল ইতি||৬||
तमुवाच भगवानात्रेयः- एवमसामान्यावतामप्येभिरग्निवेश! प्रकृत्यादिभिर्भावैर्मनुष्याणां येऽन्ये भावाः सामान्यास्तद्वैगुण्यात् समानकालाः समानलिङ्गाश्च व्याधयोऽभिनिर्वर्तमाना जनपदमुद्ध्वंसयन्ति| ते तु खल्विमे भावाः सामान्या जनपदेषु भवन्ति; तद्यथा- वायुः, उदकं, देशः, काल इति||६||
🔊 Audio coming soon
সমানলিঙ্গা ইতি তুল্যলিঙ্গাঃ||৬||
Adhikarana 6 (7-8) · Śloka 8
তত্র বাতমেবংবিধমনারোগ্যকরং বিদ্যাত্; তদ্যথা-যথর্তুবিষমমতিস্তিমিতমতিচলমতিপরুষমতিশীতমত্যুষ্ণমতিরূক্ষমত্যভিষ্যন্দিনমতিভৈরবারাবমতিপ্রতিহত- পরস্পরগতিমতিকুণ্ডলিনমসাত্ম্যগন্ধবাষ্পসিকতাপাংশুধূমোপহতমিতি (১); উদকং তু খল্বত্যর্থবিকৃতগন্ধবর্ণরসস্পর্শং ক্লেদবহুলমপক্রান্তজলচরবিহঙ্গমুপক্ষীণজলেশযমপ্রীতিকরমপগতগুণং বিদ্যাত্ (২); দেশং পুনঃ প্রকৃতিবিকৃতবর্ণগন্ধরসস্পর্শং ক্লেদবহুলমুপসৃষ্টং সরীসৃপব্যালমশকশলভমক্ষিকামূষকোলূকশ্মাশানিকশকুনিজম্বূকাদিভিস্তৃণোলূপোপবনবন্তং প্রতানাদিবহুলমপূর্ববদবপতিতশুষ্কনষ্টশস্যং ধূম্রপবনং প্রধ্মাতপতত্রিগণমুত্ক্রুষ্টশ্বগণমুদ্ভ্রান্তব্যথিতবিবিধমৃগপক্ষিসঙ্ঘমুত্সৃষ্টনষ্টধর্মসত্যলজ্জাচারশীলগুণজনপদং শশ্বত্ক্ষুভিতোদীর্ণসলিলাশযং প্রততোল্কাপাতনির্ঘাতভূমিকম্পমতিভযারাবরূপং রূক্ষতাম্রারুণসিতাভ্রজালসংবৃতার্কচন্দ্রতারকমভীক্ষ্ণং সসম্ভ্রমোদ্বেগমিব সত্রাসরুদিতমিব সতমস্কমিব গুহ্যকাচরিতমিবাক্রন্দিতশব্দবহুলং চাহিতং বিদ্যাত্ (৩); কালং তু খলু যথর্তুলিঙ্গাদ্বিপরীতলিঙ্গমতিলিঙ্গং হীনলিঙ্গং চাহিতং ব্যবস্যেত্ (৪); ইমানেবন্দোষযুক্তাংশ্চতুরো ভাবাঞ্জনপদোদ্ধ্বংসকরান্ বদন্তি কুশলাঃ; অতোঽন্যথাভূতাংস্তু হিতানাচক্ষতে||৭|| বিগুণেষ্বপি খল্বেতেষু জনপদোদ্ধ্বংসকরেষু ভাবেষু ভেষজেনোপপাদ্যমানানামভযং ভবতি রোগেভ্য ইতি||৮||
तत्र वातमेवंविधमनारोग्यकरं विद्यात्; तद्यथा-यथर्तुविषममतिस्तिमितमतिचलमतिपरुषमतिशीतमत्युष्णमतिरूक्षमत्यभिष्यन्दिनमतिभैरवारावमतिप्रतिहत- परस्परगतिमतिकुण्डलिनमसात्म्यगन्धबाष्पसिकतापांशुधूमोपहतमिति (१); उदकं तु खल्वत्यर्थविकृतगन्धवर्णरसस्पर्शं क्लेदबहुलमपक्रान्तजलचरविहङ्गमुपक्षीणजलेशयमप्रीतिकरमपगतगुणं विद्यात् (२); देशं पुनः प्रकृतिविकृतवर्णगन्धरसस्पर्शं क्लेदबहुलमुपसृष्टं सरीसृपव्यालमशकशलभमक्षिकामूषकोलूकश्माशानिकशकुनिजम्बूकादिभिस्तृणोलूपोपवनवन्तं प्रतानादिबहुलमपूर्ववदवपतितशुष्कनष्टशस्यं धूम्रपवनं प्रध्मातपतत्रिगणमुत्क्रुष्टश्वगणमुद्भ्रान्तव्यथितविविधमृगपक्षिसङ्घमुत्सृष्टनष्टधर्मसत्यलज्जाचारशीलगुणजनपदं शश्वत्क्षुभितोदीर्णसलिलाशयं प्रततोल्कापातनिर्घातभूमिकम्पमतिभयारावरूपं रूक्षताम्रारुणसिताभ्रजालसंवृतार्कचन्द्रतारकमभीक्ष्णं ससम्भ्रमोद्वेगमिव सत्रासरुदितमिव सतमस्कमिव गुह्यकाचरितमिवाक्रन्दितशब्दबहुलं चाहितं विद्यात् (३); कालं तु खलु यथर्तुलिङ्गाद्विपरीतलिङ्गमतिलिङ्गं हीनलिङ्गं चाहितं व्यवस्येत् (४); इमानेवन्दोषयुक्तांश्चतुरो भावाञ्जनपदोद्ध्वंसकरान् वदन्ति कुशलाः; अतोऽन्यथाभूतांस्तु हितानाचक्षते||७|| विगुणेष्वपि खल्वेतेषु जनपदोद्ध्वंसकरेषु भावेषु भेषजेनोपपाद्यमानानामभयं भवति रोगेभ्य इति||८||
🔊 Audio coming soon
যথর্তুবিষমমিতি ঋত্বননুরূপম্| অপগতগুণমিতি জীবনপিপাসাহরত্বাদ্যুক্তজলগুণরহিতম্| প্রকৃতিবর্ণাদের্বিকৃতা বর্ণাদযো যস্য দেশস্য তং প্রকৃতিবিকৃতবর্ণগন্ধরসস্পর্শম্| শ্মাশানিকশকুনিঃ গৃধ্রঃ| অপূর্ববদিতি পরিচিতমপ্যুপহতত্বেনাপূর্বমিব দৃশ্যতে| উত্সৃষ্টাশ্চ নষ্টাশ্চ ধর্মসত্যলজ্জাগুণা জনৈর্যত্র স তথা; তত্র যে ধর্মাদিযুক্তাস্তে উত্সৃজন্তি ধর্মাদীনি, যে তু ধর্মাদীনি সর্বথা অজ্ঞানান্নাচরন্তি তান্ প্রতি নষ্টান্যেব ধর্মাদীনি| গুহ্যকাক্রান্তো হি দেশো যথা আক্রন্দনশব্দবহুলো ভবতি তাদৃশম্||৭-৮||
Adhikarana 7 (9-11) · Śloka 11
ভবন্তি চাত্র- বৈগুণ্যমুপপন্নানাং দেশকালানিলাম্ভসাম্| গরীযস্ত্বং বিশেষেণ হেতুমত্ সম্প্রবক্ষ্যতে||৯|| বাতাজ্জলং জলাদ্দেশং দেশাত্ কালং স্বভাবতঃ| বিদ্যাদ্দুষ্পরিহার্যত্বাদ্গরীযস্তরমর্থবিত্ ||১০|| বায্বাদিষু যথোক্তানাং দোষাণাং তু বিশেষবিত্| প্রতীকারস্য সৌকর্যে বিদ্যাল্লাঘবলক্ষণম্||১১||
भवन्ति चात्र- वैगुण्यमुपपन्नानां देशकालानिलाम्भसाम्| गरीयस्त्वं विशेषेण हेतुमत् सम्प्रवक्ष्यते||९|| वाताज्जलं जलाद्देशं देशात् कालं स्वभावतः| विद्याद्दुष्परिहार्यत्वाद्गरीयस्तरमर्थवित् ||१०|| वाय्वादिषु यथोक्तानां दोषाणां तु विशेषवित्| प्रतीकारस्य सौकर्ये विद्याल्लाघवलक्षणम्||११||
🔊 Audio coming soon
বৈগুণ্যমিত্যাদিনা দুষ্টানাং বাতাদীনাং যস্য য উত্কর্ষো যেন চ হেতুনা তদাহ| স্বভাবতো দুষ্পরিহার্যত্বাদিতি স্বভাবাদেব বাতাপেক্ষযা জলং দুষ্পরিহরং ভবতি, জলাচ্চ দেশঃ, দেশাচ্চ কালঃ| বাতো হি নিবাতদেশসেবযা দুষ্টঃ পরিহ্রিযতে, ন তথা জলং, তদ্ধি দেহবৃত্ত্যর্থমবশ্যং সেব্যং; জলমপি চ যদি মহতা প্রযত্নেন ত্যজ্যতে, দেশস্তু জলাপেক্ষযা দুষ্পরিহরো ভবতি, তদ্ব্যতিরেকেণাবস্থাতুমশক্যত্বাত্; দেশোঽপি যদি দেশান্তরগমনেন ত্যজ্যতে, কালস্তু সর্বথা ত্যক্তুমশক্য ইতি সর্বেষ্বেব গরীযান্| ‘গরীযঃ পরম্’ ইতি পাঠে যদ্যতঃ পরং, তত্ততো গরীযো বিদ্যাদিতি যোজনা| এতদ্বিপর্যযেণ লাঘবমাহ- বায্বাদিষ্বিত্যাদি| প্রতীকারস্য সৌকর্য ইতি যথোক্তবিধযা বাতাদিপরিত্যাগস্য সুকরত্বেনেত্যর্থঃ||৯-১১||
Adhikarana 8 (12-18) · Śloka 18
চতুর্ষ্বপি তু দুষ্টেষু কালান্তেষু যদা নরাঃ| ভেষজেনোপপাদ্যন্তে ন ভবন্ত্যাতুরাস্তদা||১২|| যেষাং ন মৃত্যুসামান্যং সামান্যং ন চ কর্মণাম্| কর্ম পঞ্চবিধং তেষাং ভেষজং পরমুচ্যতে||১৩|| রসাযনানাং বিধিবচ্চোপযোগঃ প্রশস্যতে| শস্যতে দেহবৃত্তিশ্চ ভেষজৈঃ পূর্বমুদ্ধৃতৈঃ||১৪|| সত্যং ভূতে দযা দানং বলযো দেবতার্চনম্| সদ্ধৃত্তস্যানুবৃত্তিশ্চ প্রশমো গুপ্তিরাত্মনঃ||১৫|| হিতং জনপদানাং চ শিবানামুপসেবনম্| সেবনং ব্রহ্মচর্যস্য তথৈব ব্রহ্মচারিণাম্||১৬|| সঙ্কথা ধর্মশাস্ত্রাণাং মহর্ষীণাং জিতাত্মনাম্| ধার্মিকৈঃ সাত্ত্বিকৈর্নিত্যং সহাস্যা বৃদ্ধসম্মতৈঃ||১৭|| ইত্যেতদ্ভেষজং প্রোক্তমাযুষঃ পরিপালনম্| যেষামনিযতো মৃত্যুস্তস্মিন্ কালে সুদারুণে||১৮||
चतुर्ष्वपि तु दुष्टेषु कालान्तेषु यदा नराः| भेषजेनोपपाद्यन्ते न भवन्त्यातुरास्तदा||१२|| येषां न मृत्युसामान्यं सामान्यं न च कर्मणाम्| कर्म पञ्चविधं तेषां भेषजं परमुच्यते||१३|| रसायनानां विधिवच्चोपयोगः प्रशस्यते| शस्यते देहवृत्तिश्च भेषजैः पूर्वमुद्धृतैः||१४|| सत्यं भूते दया दानं बलयो देवतार्चनम्| सद्धृत्तस्यानुवृत्तिश्च प्रशमो गुप्तिरात्मनः||१५|| हितं जनपदानां च शिवानामुपसेवनम्| सेवनं ब्रह्मचर्यस्य तथैव ब्रह्मचारिणाम्||१६|| सङ्कथा धर्मशास्त्राणां महर्षीणां जितात्मनाम्| धार्मिकैः सात्त्विकैर्नित्यं सहास्या वृद्धसम्मतैः||१७|| इत्येतद्भेषजं प्रोक्तमायुषः परिपालनम्| येषामनियतो मृत्युस्तस्मिन् काले सुदारुणे||१८||
🔊 Audio coming soon
যেষাং ন মৃত্যুসামান্যমিতি ন মৃত্যুজনকদৈবসাম্যং যেষামস্তীত্যর্থঃ| সামান্যং ন চ কর্মণামিতি নচ মারককর্মসামান্যং যেষামস্তীত্যর্থঃ| কেচিদ্ধি সম্ভূযৈব জন্মান্তরে গ্রামদাহাদিকর্ম কুর্বতে স্ম, তত্কর্মবলাত্ সংহতমৃত্যব এব ভবন্তি; কিংবা পৃথগপি মারকং কর্ম কৃতং কেষাঞ্চিদেককালং বিপচ্যমানং ভবতি, তেঽপি সমকালভৃত্যবো ভবন্তি| তত্র, ন মৃত্যুসামান্যমিত্যনেনোত্পন্নরিষ্টত্বাদেব কেচিদসাধ্যা ইতি দর্শযতি, ন কর্মসামান্যমিত্যনেন কেচিচ্চাজাতরিষ্টা অপি নিযতমারককর্মবশাদসাধ্যা ভবন্তীতি দর্শযতি; কিংবা ন মৃত্যুসামান্যমিত্যনেন চ মারকো ব্যাধিঃ সাধারণ উচ্যতে, ন কর্মসামান্যমিত্যনেন চ মারকব্যাধিজনকং কর্মোচ্যতে| পূর্বমুদ্ধৃতৈরিতি ব্যাপত্তেঃ পূর্বং গৃহীতৈঃ| গুপ্তিঃ মন্ত্রাদিনা রক্ষা| অনিযত ইতি বচনেন দুর্বলকর্মারব্ধো হি মৃত্যুঃ পার্যত এবৈবং প্রতিকর্তুমিতি দর্শযতি||১২-১৮||
Adhikarana 9 (19-20) · Śloka 20
ইতি শ্রুত্বা জনপদোদ্ধ্বংসনে কারণানি পুনরপি ভগবন্তমাত্রেযমগ্নিবেশ উবাচ- অথ খলু ভগবন্! কুতোমূলমেষাং বায্বাদীনাং বৈগুণ্যমুত্পদ্যতে? যেনোপপন্না জনপদমুদ্ধ্বংসযন্তীতি||১৯|| তমুবাচ ভগবানাত্রেযঃ- সর্বেষামপ্যগ্নিবেশ! বায্বাদীনাং যদ্বৈগুণ্যমুত্পদ্যতে তস্য মূলমধর্মঃ, তন্মূলং বাঽসত্কর্ম পূর্বকৃতং; তযোর্যোনিঃ প্রজ্ঞাপরাধ এব| তদ্যথা- যদা বৈ দেশনগরনিগমজনপদপ্রধানা ধর্মমুত্ক্রম্যাধর্মেণ প্রজাং বর্তযন্তি, তদাশ্রিতোপাশ্রিতাঃ পৌরজনপদা ব্যবহারোপজীবিনশ্চ তমধর্মমভিবর্ধযন্তি, ততঃ সোঽধর্মঃ প্রসভং ধর্মমন্তর্ধত্তে, ততস্তেঽন্তর্হিতধর্মাণো দেবতাভিরপি ত্যজ্যন্তে; তেষাং তথাঽন্তর্হিতধর্মণামধর্মপ্রধানানামপক্রান্তদেবতানামৃতবো ব্যাপদ্যন্তে; তেন নাপো যথাকালং দেবো বর্ষতি ন বা বর্ষতি বিকৃতং বা বর্ষতি, বাতা ন সম্যগভিবান্তি, ক্ষিতির্ব্যাপদ্যতে, সলিলান্যুপশুষ্যন্তি, ওষধযঃ স্বভাবং পরিহাযাপদ্যন্তে বিকৃতিং; তত উদ্ধ্বংসন্তে জনপদাঃ স্পৃশ্যাভ্যবহার্যদোষাত্ ||২০||
इति श्रुत्वा जनपदोद्ध्वंसने कारणानि पुनरपि भगवन्तमात्रेयमग्निवेश उवाच- अथ खलु भगवन्! कुतोमूलमेषां वाय्वादीनां वैगुण्यमुत्पद्यते? येनोपपन्ना जनपदमुद्ध्वंसयन्तीति||१९|| तमुवाच भगवानात्रेयः- सर्वेषामप्यग्निवेश! वाय्वादीनां यद्वैगुण्यमुत्पद्यते तस्य मूलमधर्मः, तन्मूलं वाऽसत्कर्म पूर्वकृतं; तयोर्योनिः प्रज्ञापराध एव| तद्यथा- यदा वै देशनगरनिगमजनपदप्रधाना धर्ममुत्क्रम्याधर्मेण प्रजां वर्तयन्ति, तदाश्रितोपाश्रिताः पौरजनपदा व्यवहारोपजीविनश्च तमधर्ममभिवर्धयन्ति, ततः सोऽधर्मः प्रसभं धर्ममन्तर्धत्ते, ततस्तेऽन्तर्हितधर्माणो देवताभिरपि त्यज्यन्ते; तेषां तथाऽन्तर्हितधर्मणामधर्मप्रधानानामपक्रान्तदेवतानामृतवो व्यापद्यन्ते; तेन नापो यथाकालं देवो वर्षति न वा वर्षति विकृतं वा वर्षति, वाता न सम्यगभिवान्ति, क्षितिर्व्यापद्यते, सलिलान्युपशुष्यन्ति, ओषधयः स्वभावं परिहायापद्यन्ते विकृतिं; तत उद्ध्वंसन्ते जनपदाः स्पृश्याभ्यवहार्यदोषात् ||२०||
🔊 Audio coming soon
কুতোমূলং কিম্মূলমিত্যর্থঃ| তস্য মূলমধর্ম ইতি ঐহিকমধর্মং দর্শযতি| তন্মূলং বেতি তস্য বাতাদিবৈগুণ্যস্য মূলং পূর্বকৃতং বা কর্ম| তেনৈহিকো বাঽধর্মো জন্মান্তরকৃতো বাঽধর্মো বাতাদিবৈগুণ্যস্য কারণমিতি ব্রূতে| তদ্যদা দেশেত্যাদিনা ত্বৈহিকমেবাধর্মং যদ্বক্ষ্যতি হেতুতযা তত্ প্রত্যক্ষত্বেন স্ফুটসিদ্ধান্তার্থং, নতু জন্মান্তরকৃতাধর্মস্যাকারণত্বেনেতি জ্ঞেযম্| তযোরিতি ঐহিকজন্মান্তরীযযোরধর্মযোঃ| যোনিরিতি কারণম্| স্পৃশ্যাভ্যবহার্যদোষাদিতি স্পৃশ্যস্য বা জলাদেরভ্যবহার্যস্য চ কৃত্স্নস্য দুষ্টত্বাত্| এতচ্চ প্রাধান্যেন জ্ঞেযং; তেন দুষ্টপবনগন্ধদোষোঽপি জ্ঞেযঃ, অসাত্ম্যগন্ধোঽপি দুষ্টবাতে উক্তঃ||১৯-২০||
Adhikarana 10 (21) · Śloka 21
তথা শস্ত্রপ্রভবস্যাপি জনপদোদ্ধ্বংসস্যাধর্ম এব হেতুর্ভবতি| যেঽতিপ্রবৃদ্ধলোভক্রোধমোহমানাস্তে দুর্বলানবমত্যাত্মস্বজনপরোপঘাতায শস্ত্রেণ পরস্পরমভিক্রামন্তি, পরান্ বাঽভিক্রামন্তি, পরৈর্বাঽভিক্রাম্যন্তে||২১||
तथा शस्त्रप्रभवस्यापि जनपदोद्ध्वंसस्याधर्म एव हेतुर्भवति| येऽतिप्रवृद्धलोभक्रोधमोहमानास्ते दुर्बलानवमत्यात्मस्वजनपरोपघाताय शस्त्रेण परस्परमभिक्रामन्ति, परान् वाऽभिक्रामन्ति, परैर्वाऽभिक्राम्यन्ते||२१||
🔊 Audio coming soon
শস্ত্রপ্রভবস্যাপীতি বহুজনমারকস্য শস্ত্রপ্রভবস্যেত্যর্থঃ| আত্মস্বজনপরোপঘাতাযেতি অত্র আত্মনঃ স্বজনস্য পরস্য চোপঘাতো ভবতি প্রায ইত্যর্থঃ||২১||
Adhikarana 11 (22) · Śloka 22
রক্ষোগণাদিভির্বা বিবিধৈর্ভূতসঙ্ঘৈস্তমধর্মমন্যদ্বাঽপ্যপচারান্তরমুপলভ্যাভিহন্যন্তে||২২||
रक्षोगणादिभिर्वा विविधैर्भूतसङ्घैस्तमधर्ममन्यद्वाऽप्यपचारान्तरमुपलभ्याभिहन्यन्ते||२२||
🔊 Audio coming soon
রাক্ষসাদ্যুত্সাদোঽপি জনানামধর্মকৃত এব ভবতীত্যাহ- রক্ষোগণেত্যাদি| অন্যদ্বা অপচারান্তরমিতি যথোক্তাধর্মকারণাদন্যদধর্মকারণমশৌচাদীত্যর্থঃ||২২||
Adhikarana 12 (23) · Śloka 23
তথাঽভিশাপপ্রভবস্যাপ্যধর্ম এব হেতুর্ভবতি| যে লুপ্তধর্মাণো ধর্মাদপেতাস্তে গুরুবৃদ্ধসিদ্ধর্ষিপূজ্যানবমত্যাহিতান্যাচরন্তি; ততস্তাঃ প্রজা গুর্বাদিভিরভিশপ্তা ভস্মতামুপযান্তি প্রাগেবানেকপুরুষকুলবিনাশায, নিযতপ্রত্যযোপলম্ভাদনিযতাশ্চাপরে ||২৩||
तथाऽभिशापप्रभवस्याप्यधर्म एव हेतुर्भवति| ये लुप्तधर्माणो धर्मादपेतास्ते गुरुवृद्धसिद्धर्षिपूज्यानवमत्याहितान्याचरन्ति; ततस्ताः प्रजा गुर्वादिभिरभिशप्ता भस्मतामुपयान्ति प्रागेवानेकपुरुषकुलविनाशाय, नियतप्रत्ययोपलम्भादनियताश्चापरे ||२३||
🔊 Audio coming soon
প্রাগেবেতি ঝটিতি, অনেকপুরুষকুলবিনাশাযাভিশপ্তা ভস্মতাং যান্তীত্যর্থঃ| নিযতপ্রত্যযোপলম্ভাদনিযতাশ্চাপরে ভস্মতাং যান্তীতি যোজনা| অনিযতা অমিলিতা ইত্যর্থঃ| প্রতিনিযতপুরুষাভিশাপাত্ প্রতিনিযতা এব ভস্মতাং যান্তি, ন সর্বে জনা ইত্যর্থঃ||২৩||
Adhikarana 13 (24) · Śloka 24
প্রাগপি চাধর্মাদৃতে নাশুভোত্পত্তিরন্যতোঽভূত্| আদিকালে হ্যদিতিসুতসমৌজসোঽতিবিমলবিপুলপ্রভাবাঃ প্রত্যক্ষদেবদেবর্ষিধর্মযজ্ঞবিধিবিধানাঃ শৈলসারসংহতস্থিরশরীরাঃ প্রসন্নবর্ণেন্দ্রিযাঃ পবনসমবলজবপরাক্রমাশ্চারুস্ফিচোঽভিরূপপ্রমাণাকৃতিপ্রসাদোপচযবন্তঃ সত্যার্জবানৃশংস্যদানদমনিযমতপোপবাসব্রহ্মচর্যব্রতপরা ব্যপগতভযরাগদ্বেষমোহলোভক্রোধশোকমানরোগনিদ্রাতন্দ্রাশ্রমক্লমালস্যপরিগ্রহাশ্চ পুরুষা বভূবুরমিতাযুষঃ| তেষামুদারসত্ত্বগুণকর্মণামচিন্ত্যরসবীর্যবিপাকপ্রভাবগুণসমুদিতানি প্রাদুর্বভূবুঃ শস্যানি সর্বগুণসমুদিতত্বাত্ পৃথিব্যাদীনাং কৃতযুগস্যাদৌ| ভ্রশ্যতি তু কৃতযুগে কেষাঞ্চিদত্যাদানাত্ সাম্পন্নিকানাং সত্ত্বানাং শরীরগৌরবমাসীত্, শরীরগৌরবাচ্ছ্রমঃ, শ্রমাদালস্যম্, আলস্যাত্ সঞ্চযঃ, সঞ্চযাত্ পরিগ্রহঃ, পরিগ্রহাল্লোভঃ প্রাদুরাসীত্ কৃতে| ততস্ত্রেতাযাং লোভাদভিদ্রোহঃ, অভিদ্রোহানৃতবচনম্, অনৃতবচনাত্ কামক্রোধমানদ্বেষপারুষ্যাভিঘাতভযতাপশোকচিন্তোদ্বেগাদযঃ প্রবৃত্তাঃ| ততস্ত্রেতাযাং ধর্মপাদোঽন্তর্ধানমগমত্| তস্যান্তর্ধানাত্ যুগবর্ষপ্রমাণস্য পাদহ্রাসঃ, পৃথিব্যাদেশ্চ গুণপাদপ্রণাশোঽভূত্| তত্প্রণাশকৃতশ্চ শস্যানাং স্নেহবৈমল্যরসবীর্যবিপাকপ্রভাবগুণপাদভ্রাংশঃ| ততস্তানি প্রজাশরীরাণি হীযমানগুণপাদৈরাহারবিহারৈরযথাপূর্বমুপষ্টভ্যমানান্যগ্নিমারুতপরীতানি প্রাগ্ব্যাধিভির্জ্বরাদিভিরাক্রান্তানি| অতঃ প্রাণিনো হ্রাসমবাপুরাযুষঃ ক্রমশ ইতি||২৪||
प्रागपि चाधर्मादृते नाशुभोत्पत्तिरन्यतोऽभूत्| आदिकाले ह्यदितिसुतसमौजसोऽतिविमलविपुलप्रभावाः प्रत्यक्षदेवदेवर्षिधर्मयज्ञविधिविधानाः शैलसारसंहतस्थिरशरीराः प्रसन्नवर्णेन्द्रियाः पवनसमबलजवपराक्रमाश्चारुस्फिचोऽभिरूपप्रमाणाकृतिप्रसादोपचयवन्तः सत्यार्जवानृशंस्यदानदमनियमतपोपवासब्रह्मचर्यव्रतपरा व्यपगतभयरागद्वेषमोहलोभक्रोधशोकमानरोगनिद्रातन्द्राश्रमक्लमालस्यपरिग्रहाश्च पुरुषा बभूवुरमितायुषः| तेषामुदारसत्त्वगुणकर्मणामचिन्त्यरसवीर्यविपाकप्रभावगुणसमुदितानि प्रादुर्बभूवुः शस्यानि सर्वगुणसमुदितत्वात् पृथिव्यादीनां कृतयुगस्यादौ| भ्रश्यति तु कृतयुगे केषाञ्चिदत्यादानात् साम्पन्निकानां सत्त्वानां शरीरगौरवमासीत्, शरीरगौरवाच्छ्रमः, श्रमादालस्यम्, आलस्यात् सञ्चयः, सञ्चयात् परिग्रहः, परिग्रहाल्लोभः प्रादुरासीत् कृते| ततस्त्रेतायां लोभादभिद्रोहः, अभिद्रोहानृतवचनम्, अनृतवचनात् कामक्रोधमानद्वेषपारुष्याभिघातभयतापशोकचिन्तोद्वेगादयः प्रवृत्ताः| ततस्त्रेतायां धर्मपादोऽन्तर्धानमगमत्| तस्यान्तर्धानात् युगवर्षप्रमाणस्य पादह्रासः, पृथिव्यादेश्च गुणपादप्रणाशोऽभूत्| तत्प्रणाशकृतश्च शस्यानां स्नेहवैमल्यरसवीर्यविपाकप्रभावगुणपादभ्रांशः| ततस्तानि प्रजाशरीराणि हीयमानगुणपादैराहारविहारैरयथापूर्वमुपष्टभ्यमानान्यग्निमारुतपरीतानि प्राग्व्याधिभिर्ज्वरादिभिराक्रान्तानि| अतः प्राणिनो ह्रासमवापुरायुषः क्रमश इति||२४||
🔊 Audio coming soon
আদ্যাবির্ভাবে চ রোগাণামধর্ম এব কারণমিত্যাহ- প্রাগপি চেত্যাদি| যজ্ঞঃ যজ্ঞদেবতা, বিধিঃ যজ্ঞবিধাযকো বেদঃ, বিধানং যজ্ঞকর্ম| জবঃ বেগঃ| পরিগ্রহঃ মমতা| অমিতমিবাতিবহুত্বেনাযুর্যেষাং তে অমিতাযুষঃ| সত্যে হি চতুর্বর্ষশতমাযুঃ; যদুক্তং ভগবতা ব্যাসেন- “পুরুষাঃ সর্বসিদ্ধার্থাশ্চতুর্বর্ষশতাযুষঃ| কৃতে” ইতি| সাম্পন্নিকানাম্ ঈশ্বরাণাম্| কৃতে ইতি কৃতযুগস্য শেষে| হীযমানগুণপাদৈরিতি যথা যথা ত্রেতাযাঃ ক্ষযো ভবতি, তথা তথা আহারবিহারগুণপাদহ্রাসো ভবন্নাস্ত ইতি দর্শযতি| বিহারোঽপি চাধর্মবতাং হীনগুণো ভবতি, তেন ন যথাবচ্ছরীরোপষ্টম্ভনং করোতি| উপষ্টভ্যমানানীতি ধাতুসাম্যেন পাল্যমানানি||২৪||
Adhikarana 14 (25-27) · Śloka 27
ভবতশ্চাত্র- যুগে যুগে ধর্মপাদঃ ক্রমেণানেন হীযতে| গুণপাদশ্চ ভূতানামেবং লোকঃ প্রলীযতে||২৫|| সংবত্সরশতে পূর্ণে যাতি সংবত্সরঃ ক্ষযম্| দেহিনামাযুষঃ কালে যত্র যন্মানমিষ্যতে||২৬|| ইতি বিকারাণাং প্রাগুত্পত্তিহেতুরুক্তো ভবতি||২৭||
भवतश्चात्र- युगे युगे धर्मपादः क्रमेणानेन हीयते| गुणपादश्च भूतानामेवं लोकः प्रलीयते||२५|| संवत्सरशते पूर्णे याति संवत्सरः क्षयम्| देहिनामायुषः काले यत्र यन्मानमिष्यते||२६|| इति विकाराणां प्रागुत्पत्तिहेतुरुक्तो भवति||२७||
🔊 Audio coming soon
সংবত্সরশতে পূর্ণ ইতি সংবত্সরেণ শততমেংঽশে পূর্ণে| যত্র যন্মানমিষ্যত ইতি যত্র যুগে যন্মানমিষ্যতে, তস্য শততমেংঽশে পূর্ণে বর্ষ একঃ ক্ষযং যাতি| তেন, কলৌ শতবর্ষাযুষি যদা শততমোংঽশো যাতি ক্ষযং তদা নবনবতিঃ পরমাযুর্ভবতীত্যাদ্যনুসরণীযম্||২৫-২৭||
Adhikarana 15 (28-32) · Śloka 33
এবংবাদিনং ভগবন্তমগ্নিবেশ উবাচ- কিন্নু খলু ভগবন্! নিযতকালপ্রমাণমাযুঃ সর্বং ন বেতি||২৮|| তং ভগবানুবাচ- ইহাগ্নিবেশ! ভূতানামাযুর্যুক্তিমপেক্ষতে| দৈবে পুরুষকারে চ স্থিতং হ্যস্য বলাবলম্||২৯|| দৈবমাত্মকৃতং বিদ্যাত্ কর্ম যত্ পৌর্বদৈহিকম্| স্মৃতঃ পুরুষকারস্তু ক্রিযতে যদিহাপরম্||৩০|| বলাবলবিশেষোঽস্তি তযোরপি চ কর্মণোঃ| দৃষ্টং হি ত্রিবিধং কর্ম হীনং মধ্যমমুত্তমম্||৩১|| তযোরুদারযোর্যুক্তির্দীর্ঘস্য চ সুখস্য চ| নিযতস্যাযুষো হেতুর্বিপরীতস্য চেতরা||৩২|| মধ্যমা মধ্যমস্যেষ্টা কারণং শৃণু চাপরম্|৩৩|
एवंवादिनं भगवन्तमग्निवेश उवाच- किन्नु खलु भगवन्! नियतकालप्रमाणमायुः सर्वं न वेति||२८|| तं भगवानुवाच- इहाग्निवेश! भूतानामायुर्युक्तिमपेक्षते| दैवे पुरुषकारे च स्थितं ह्यस्य बलाबलम्||२९|| दैवमात्मकृतं विद्यात् कर्म यत् पौर्वदैहिकम्| स्मृतः पुरुषकारस्तु क्रियते यदिहापरम्||३०|| बलाबलविशेषोऽस्ति तयोरपि च कर्मणोः| दृष्टं हि त्रिविधं कर्म हीनं मध्यममुत्तमम्||३१|| तयोरुदारयोर्युक्तिर्दीर्घस्य च सुखस्य च| नियतस्यायुषो हेतुर्विपरीतस्य चेतरा||३२|| मध्यमा मध्यमस्येष्टा कारणं शृणु चापरम्|३३|
🔊 Audio coming soon
যুক্তিমপেক্ষত ইতি দৈবপুরুষকারযোর্যোগমপেক্ষতে নিযতত্বেঽনিযতত্বে চেত্যর্থঃ| বলং চাবলং চ বলাবলং; তত্রাযুষো নিযতত্বেন বলম্, অনিযতত্বেনাবলং জ্ঞেযম্| যদ্যপি পৌর্বদৈহিকং কর্মাস্থিরত্বেন গতং, তথাঽপি তজ্জনিতাদৃষ্টস্য বিদ্যমানত্বাত্ তদ্দ্বারা তত্কর্ম কারণং ভবত্যেবেহ জন্মন্যপি| পুরুষকারস্ত্বিহ জন্মনি কৃতং কর্ম সামান্যেনোচ্যতে| তত্র বলিমঙ্গলাদি অদৃষ্টজননত্বাদ্ ব্যাপ্রিযতে, তথা ভেষজাদি রসরুধিরাদিদ্বারা ||২৮-৩২||-
Adhikarana 16 (33-35) · Śloka 35
দৈবং পুরুষকারেণ দুর্বলং হ্যুপহন্যতে||৩৩|| দৈবেন চেতরত্ কর্ম বিশিষ্টেনোপহন্যতে| দৃষ্ট্বা যদেকে মন্যন্তে নিযতং মানমাযুষঃ||৩৪|| কর্ম কিঞ্চিত্ ক্বচিত্ কালে বিপাকে নিযতং মহত্| কিঞ্চিত্ত্বকালনিযতং প্রত্যযৈঃ প্রতিবোধ্যতে||৩৫||
दैवं पुरुषकारेण दुर्बलं ह्युपहन्यते||३३|| दैवेन चेतरत् कर्म विशिष्टेनोपहन्यते| दृष्ट्वा यदेके मन्यन्ते नियतं मानमायुषः||३४|| कर्म किञ्चित् क्वचित् काले विपाके नियतं महत्| किञ्चित्त्वकालनियतं प्रत्ययैः प्रतिबोध्यते||३५||
🔊 Audio coming soon
উদারযোরিতি প্রশস্তত্বেনোত্তমযোঃ| দীর্ঘস্যেতি রসাযনাদিনা শতাদপি দীর্ঘস্য; সুখস্যেতি নীরোগত্বেন; নিযতস্যেতি যুগনিযতস্য, কলৌ বর্ষশতপ্রমাণস্যেত্যর্থঃ; শতাদর্বাঙনিনিযতমপীহ নিযতশব্দেনোচ্যতে; তেন ন তত্র তস্য দৈবপুরুষকারজন্যত্বং ঘটতে, তথাঽপি তস্যাপ্রশস্তদৈবপুরুষকারজন্যত্বাত্ দৈবপুরুষকারজন্যত্বং ভবতীতি যুক্তং; কিঞ্চানিযতাযুষ এব পুরুষা রসাযনাধিকারিণো ভবন্তি, নিযতাযুষং প্রতি রসাযনস্যাকিঞ্চিত্করত্বাত্; রসাযনাদিকৃতং চাযুরনিযতং প্রশস্তত্বেন প্রশস্তদৈবপুরুষকারজন্যং ভবতীতি যুক্তম্| কিংবা, দীর্ঘত্বে সতি নিযতস্যাযুষো হেতুরিতি যোজনা; তেন যুগনিযতং চ শতবর্ষং, তথা তদধিকং চানিযতং মহতা কর্মণৈব ক্রিযতে; পুরুষকারেণ তু মহতাঽস্য সুখিত্বং রোগানুপঘাতাত্ ক্রিযতে; রসাযনেন চ জরাদিব্যাধিপ্রতিঘাতঃ ক্রিযতে; রসাযনলভ্যমপ্যাযুর্বলবত্কর্মনিযতমেবেতি ভাবঃ| বিপরীতস্য দীর্ঘত্বেনানিযতস্য তথা রোগযুক্তত্বেনাসুখস্য| ইতরেতি হীনযোর্দ্দৈবপুরুষকারযোর্যুক্তিরিত্যর্থঃ| মধ্যমামধ্যমস্য দীর্ঘত্বেনাদীর্ঘত্বেনানিযতস্য, তথা সুখাসুখত্বেনানিযতস্যাযুষো মধ্যমযোঃ কর্মণোর্যুক্তিরিত্যর্থঃ| কারণমিতি দৈবপুরুষকারযোঃ পরস্পরবাধনে উপপত্তিমিত্যর্থঃ| দৈবমিত্যাদি| দুর্বলমাযুর্জননং দৈবং বলবতা মারকেণ দৃষ্টাপথ্যভোজনাদিনা বিপরীতমরণকার্যজননাদুপহন্যতে; বিশিষ্টেন বলবতা, ইতরত্ কর্ম দৃষ্টং পুরুষকারাখ্যম্, উপহন্যতে পরাভূযতে| এতদ্দৈবকর্তৃকদৃষ্টপরাভবদর্শনাদ্দৈবনিযতমেব সর্বমাযুরিতি কেচিন্মন্যন্ত ইত্যাহ - দৃষ্ট্বেত্যাদি| যদি দৃষ্টমাযুঃ কারণং স্যাত্, ন তদা ভেষজৈঃ সম্যগুপপাদিতানাং মৃত্যুঃ স্যাত্; যতশ্চ সত্যপি চিকিত্সিতে কর্মবশাত্তু মৃত্যুর্ভবতি; তেন, যত্রাপি চিকিত্সা জীবযতীতি মন্যন্তে, তত্রাপি কর্মৈবাস্তি জীবনকারণমিতি দৃষ্টশক্তিত্বাদবধারযাম ইতি ভাবঃ| দৈবপুরুষকারযোরুভযোরপি বাধ্যত্বং দর্শযন্নেকান্তেন নিযতাযুঃপক্ষং ব্যুদস্যতি- কর্মেত্যাদি| ন ক্বচিত্ কর্ম ন ভবতি; যদুচ্যতে- “নাভুক্তং ক্ষীযতে কর্ম কল্পকোটিশতৈরপি| অবশ্যমেব ভোক্তব্যং কৃতং কর্ম শুভাশুভম্” ইতি| কিঞ্চিত্ত্বকালনিযতমিতি, যথা- ইদং মারকং কর্ম ন তু ক্বচিত্কালে পঞ্চবিংশবর্ষাদৌ নিযতং, তেন যস্মিন্ কালে পুরুষকারাখ্যং দৃষ্টকর্মানুগুণং প্রাপ্নোতি তস্মিন্ কালে সহকারিসান্নিধ্যোপবৃংহিতবলং মারযতি, যদা তু দৃষ্টমপথ্যসেবাদি ন প্রাপ্নোতি ন তদা মারযতি, প্রত্যযৈঃ প্রতিবোধ্যত ইতি দৃষ্টকারণৈরুদ্রিক্তং ক্রিযতে| যে তু ব্রুবতে- কিঞ্চিত্ কর্ম কালনিযতং যদা পচ্যতে, তস্মিন্ কালে পচ্যত এবেতি কালনিযমঃ; বিপাকনিযতং তু- ইদং কর্ম বিপচ্যত এব, ন তু বিপচ্যত ইতি ন; কালবিপাকনিযতং তু যথা- ইদং কর্ম অস্মিন্নেব কালে বিপচ্যত এবেতি; এতচ্চ কালবিপাকনিযতত্বাদ্বলবদুচ্যতে; এতদেব দৃষ্টাবাধনীযমিতি; তেষাং মতে, অভুক্তমপি ক্ষীযতে দুর্বলকর্ম প্রাযশ্চিত্তাদিনেতি বোদ্ধব্যং, পরং বিপর্যযেঽপি তদা কিঞ্চিত্ত্ববিপাককালনিযতমিতি বক্তব্যং স্যাত্; কিঞ্চিত্ত্বকালনিযতমিতি বচনাত্তু কালনিযতমপি||৩৩-৩৫||
Adhikarana 17 (36) · Śloka 36
তস্মাদুভযদৃষ্টত্বাদেকান্তগ্রহণমসাধু| নিদর্শনমপি চাত্রোদাহরিষ্যমঃ- যদি হি নিযতকালপ্রমাণমাযুঃ সর্বং স্যাত্, তদাঽঽযুষ্কামাণাং ন মন্ত্রৌষধিমণিমঙ্গলবল্যুপহারহোমনিযমপ্রাযশ্চিত্তোপবাসস্বস্ত্যযনপ্রণিপাতগমনাদ্যাঃ ক্রিযা ইষ্টযশ্চ প্রযোজ্যেরন্; নোদ্ভ্রান্তচণ্ডচপলগোজোষ্ট্রখরতুরগমহিষাদযঃ পবনাদযশ্চ দুষ্টাঃ পরিহার্যাঃ স্যুঃ, ন প্রপাতগিরিবিষমদুর্গাম্বুবেগাঃ, তথা ন প্রমত্তোন্মত্তোদ্ভান্তচণ্ডচপলমোহলোভাকুলমতযঃ, নারযঃ, ন প্রবৃদ্ধোঽগ্নিঃ, চ বিবিধবিষাশ্রযাঃ সরীসৃপোরগাদযঃ, ন সাহসং, নাদেশকালচর্যা, ন নরেন্দ্রপ্রকোপ ইতি; এবমাদযো হি ভাবা নাভাবকরাঃ স্যুঃ, আযুষঃ সর্বস্য নিযতকালপ্রমাণত্বাত্| ন চানভ্যস্তাকালমরণভযনিবারকাণামকালমরণভযমাগচ্ছেত্ প্রণিনাং, ব্যর্থাশ্চারম্ভকথাপ্রযোগবুদ্ধযঃ স্যুর্মহর্ষীণাং রসাযনাধিকারে, নাপীন্দ্রো নিযতাযুষং শত্রুং বজ্রেণাভিহন্যাত্, নাশ্বিনাবার্তং ভেষজেনোপপাদযেতাং , ন মহর্ষযো যথেষ্টমাযুস্তপসা প্রাপ্নুযুঃ, ন চ বিদিতবেদিতব্যা মহর্ষযঃ সসুরেশাঃ সম্যক্ পশ্যেযুরুপদিশেযুরাচরেযুর্বা| অপি চ সর্বচক্ষুষামেতত্ পরং যদৈন্দ্রং চক্ষুঃ , ইদং চাপ্যস্মাকং তেন প্রত্যক্ষং; যথা- পুরুষসহস্রাণামুত্থাযোত্থাযাহবং কুর্বতামকুর্বতাং চাতুল্যাযুষ্ট্বং, তথা জাতমাত্রাণামপ্রতীকারাত্ প্রতীকারাচ্চ, অবিষবিষপ্রাশিনাং চাপ্যতুল্যাযুষ্ট্বমেব, ন চ তুল্যো যোগক্ষেম উদপানঘটানাং চিত্রঘটানাং চোত্সীদতাং; তস্মাদ্ধিতোপচারমূলং জীবিতম্, অতো বিপর্যযান্মৃত্যুঃ| অপি চ দেশকালাত্মগুণবিপরীতানাং কর্মণামাহারবিকারাণাং চ ক্রমোপযোগঃ সম্যক্, ত্যাগঃ সর্বস্য চাতিযোগাযোগমিথ্যাযোগানাং, সর্বাতিযোগসন্ধারণম্ , অসন্ধারণমুদীর্ণানাং চ গতিমতাং, সাহসানাং চ বর্জনম্, আরোগ্যানুবৃত্তৌ হেতুমুপলভামহে সম্যগুপদিশামঃ সম্যক্ পশ্যামশ্চেতি||৩৬||
तस्मादुभयदृष्टत्वादेकान्तग्रहणमसाधु| निदर्शनमपि चात्रोदाहरिष्यमः- यदि हि नियतकालप्रमाणमायुः सर्वं स्यात्, तदाऽऽयुष्कामाणां न मन्त्रौषधिमणिमङ्गलबल्युपहारहोमनियमप्रायश्चित्तोपवासस्वस्त्ययनप्रणिपातगमनाद्याः क्रिया इष्टयश्च प्रयोज्येरन्; नोद्भ्रान्तचण्डचपलगोजोष्ट्रखरतुरगमहिषादयः पवनादयश्च दुष्टाः परिहार्याः स्युः, न प्रपातगिरिविषमदुर्गाम्बुवेगाः, तथा न प्रमत्तोन्मत्तोद्भान्तचण्डचपलमोहलोभाकुलमतयः, नारयः, न प्रवृद्धोऽग्निः, च विविधविषाश्रयाः सरीसृपोरगादयः, न साहसं, नादेशकालचर्या, न नरेन्द्रप्रकोप इति; एवमादयो हि भावा नाभावकराः स्युः, आयुषः सर्वस्य नियतकालप्रमाणत्वात्| न चानभ्यस्ताकालमरणभयनिवारकाणामकालमरणभयमागच्छेत् प्रणिनां, व्यर्थाश्चारम्भकथाप्रयोगबुद्धयः स्युर्महर्षीणां रसायनाधिकारे, नापीन्द्रो नियतायुषं शत्रुं वज्रेणाभिहन्यात्, नाश्विनावार्तं भेषजेनोपपादयेतां , न महर्षयो यथेष्टमायुस्तपसा प्राप्नुयुः, न च विदितवेदितव्या महर्षयः ससुरेशाः सम्यक् पश्येयुरुपदिशेयुराचरेयुर्वा| अपि च सर्वचक्षुषामेतत् परं यदैन्द्रं चक्षुः , इदं चाप्यस्माकं तेन प्रत्यक्षं; यथा- पुरुषसहस्राणामुत्थायोत्थायाहवं कुर्वतामकुर्वतां चातुल्यायुष्ट्वं, तथा जातमात्राणामप्रतीकारात् प्रतीकाराच्च, अविषविषप्राशिनां चाप्यतुल्यायुष्ट्वमेव, न च तुल्यो योगक्षेम उदपानघटानां चित्रघटानां चोत्सीदतां; तस्माद्धितोपचारमूलं जीवितम्, अतो विपर्ययान्मृत्युः| अपि च देशकालात्मगुणविपरीतानां कर्मणामाहारविकाराणां च क्रमोपयोगः सम्यक्, त्यागः सर्वस्य चातियोगायोगमिथ्यायोगानां, सर्वातियोगसन्धारणम् , असन्धारणमुदीर्णानां च गतिमतां, साहसानां च वर्जनम्, आरोग्यानुवृत्तौ हेतुमुपलभामहे सम्यगुपदिशामः सम्यक् पश्यामश्चेति||३६||
🔊 Audio coming soon
অতঃ পরমুত্তরমুপসংহরতি - তস্মাদিত্যাদি| উভযদৃষ্টত্বাদিতি দৈবস্য পুরুষকারেণ, তথা পুরুষকারস্য দৈবেন বাধদর্শনাত্| একান্তগ্রহণমিতি নিযতমেবাযুরিতি তথা অনিযতমেবাযুঃ সর্বমিতি চেত্যর্থঃ| নিদৃশ্যতেঽভিমতঃ পক্ষঃ সাধ্যতেঽনেনেতি নিদর্শনং যুক্তরিত্যর্থঃ| অত্রেতি অনৈকান্তিকপক্ষে| যদীত্যাদিনা প্রকরণেনাযুর্জনকস্য দৃষ্টস্য হেতোঃ সেবা তথা আযুর্বিঘাতকস্য হেতোরসেবা সর্বপ্রামাণিকজনাবিবাদসিদ্ধা দর্শ্যতে| সা চ সর্বা যদি নিযতমাযুঃ স্যাত্তদা অকিঞ্চিত্করী স্যাত্, অনিযতে চাযুষি কিঞ্চিত্করী স্যাত্; তস্মাদনিযতমপ্যাযুর্ভবতীতি ভাবঃ| ন চ সর্বত্রৈবাদৃষ্টমেব কারণং দৃষ্টমকিঞ্চিত্করমেবেতি বদতো দৃষ্টস্যাপি ত্রিবৃতাদের্বিরেকাদিকর্তৃত্বং ব্যক্তমেব; অদৃষ্টস্যৈব তু কারণত্বং দৃষ্টেকার্যানুপপত্তেঃ কল্পনীযং; তেনাদৃষ্টস্য কারণত্বং দৃষ্টকারণমূলমিত্যর্থঃ; ন চ দৃষ্টকারণোচ্ছেদঃ কল্পযিতুমপি পার্যতে| ইষ্টযঃ যজ্ঞাঃ| অত্যর্থসর্পণশীলা উরগাঃ সরীসৃপোরগাঃ| আচরেযুর্বা ‘ভেষজম্ ’ ইতি শেষঃ| চক্ষুষাং পরমিতি অত্যর্থাভ্রান্তত্বেন| অতুল্যাযুষ্ট্বমিতি যে আহবং কুর্বতে তে শস্ত্রেণ ম্রিযন্তে, যে তু ন কুর্বতে তে শস্ত্রেণ ন প্রাযো ম্রিযন্তে| প্রতীকারাদপ্রতীকারাচ্চাতুল্যাযুষ্ট্বমিতি যোজনা| ন চ তুল্য ইত্যাদৌ চিত্রঘটো যশ্চিত্রিত ইব স্থাপ্যতে, স হি পানীযবহনাদিপ্রত্যবাযহেত্বভাবাচ্চিরং তিষ্ঠতি; উদপানঘটস্তু জলসম্বন্ধাত্ তথা বহনসমযে পতনাদিনা চ শীঘ্রমুত্সীদতি| হিতোপচারমূলমিতি হিতোপচারমূলমপি| ক্রমোপযোগঃ সম্যগিতি যোজনা| সর্বাতিযোগসন্ধারণং সর্বাতিযোগানাং বর্জনম্||৩৬||
Adhikarana 18 (37) · Śloka 37
অতঃ পরমগ্নিবেশ উবাচ- এবং সত্যনিযতকালপ্রমাণাযুষাং ভগবন্! কথং কালমৃত্যুরকালমৃত্যুর্বাভবতীতি||৩৭||
अतः परमग्निवेश उवाच- एवं सत्यनियतकालप्रमाणायुषां भगवन्! कथं कालमृत्युरकालमृत्युर्वाभवतीति||३७||
🔊 Audio coming soon
এবং সতীত্যাদি| যত্তাবত্ কালনিযতং তস্যাকালে মরণাভাবাদেব নাকালমৃত্যুরস্তি, যত্ত্বকালনিযতং তস্যাপ্যনিযতত্বাত্ কথং কালমৃত্যুরকালমৃত্যুর্বা ভবতি? অনিযতে হ্যাযুষি কালনিযমো নাস্তি, নিযতকালাচ্চার্বাগকালমৃত্যুরুচ্যত ইতি পৃচ্ছার্থঃ||৩৭||
Adhikarana 19 (38) · Śloka 38
তমুবাচ ভগবানাত্রেযঃ- শ্রূযতামগ্নিবেশ! যথা যানসমাযুক্তোঽক্ষঃ প্রকৃত্যৈবাক্ষগুণৈরুপেতঃ স চ সর্বগুণোপপন্নো বাহ্যমানো যথাকালং স্বপ্রমাণক্ষযাদেবাবসানং গচ্ছেত্, তথাঽঽযুঃ শরীরোপগতং বলবত্প্রকৃত্যা যথাবদুপচর্যমাণং স্বপ্রমাণক্ষযাদেবাবসানং গচ্ছতি; স মৃত্যুঃ কালে| যথা চ স এবাক্ষোঽতিভারাধিষ্ঠিতত্বাদ্বিষমপথাদপথাদক্ষচক্রভঙ্গাদ্বাহ্যবাহকদোষাদণিমোক্ষাদনুপাঙ্গাত্ পর্যসনাচ্চান্তরাঽবসানমাপদ্যতে, তথাঽঽযুরপ্যযথাবলমারম্ভাদযথাগ্ন্যভ্যবহরণাদ্বিষমাভ্যাবহরণাদ্বিষমশরীরন্যাসাদতিমৈথুনাদসত্সংশ্রযাদুদীর্ণ- বেগবিনিগ্রহাদ্বিধার্যবেগাবিধারণাদ্ভূতবিষবায্বগ্ন্যুপতাপাদভিঘাতাদাহারপ্রতীকারবিবর্জনাচ্চান্তরাঽবসানমাপদ্যতে, স মৃত্যুরকালে; তথা জ্বরাদীনপ্যাতঙ্কান্মিথ্যোপচরিতানকালমৃত্যূন্ পশ্যাম ইতি||৩৮||
तमुवाच भगवानात्रेयः- श्रूयतामग्निवेश! यथा यानसमायुक्तोऽक्षः प्रकृत्यैवाक्षगुणैरुपेतः स च सर्वगुणोपपन्नो वाह्यमानो यथाकालं स्वप्रमाणक्षयादेवावसानं गच्छेत्, तथाऽऽयुः शरीरोपगतं बलवत्प्रकृत्या यथावदुपचर्यमाणं स्वप्रमाणक्षयादेवावसानं गच्छति; स मृत्युः काले| यथा च स एवाक्षोऽतिभाराधिष्ठितत्वाद्विषमपथादपथादक्षचक्रभङ्गाद्वाह्यवाहकदोषादणिमोक्षादनुपाङ्गात् पर्यसनाच्चान्तराऽवसानमापद्यते, तथाऽऽयुरप्ययथाबलमारम्भादयथाग्न्यभ्यवहरणाद्विषमाभ्यावहरणाद्विषमशरीरन्यासादतिमैथुनादसत्संश्रयादुदीर्ण- वेगविनिग्रहाद्विधार्यवेगाविधारणाद्भूतविषवाय्वग्न्युपतापादभिघातादाहारप्रतीकारविवर्जनाच्चान्तराऽवसानमापद्यते, स मृत्युरकाले; तथा ज्वरादीनप्यातङ्कान्मिथ्योपचरितानकालमृत्यून् पश्याम इति||३८||
🔊 Audio coming soon
যথাকালমিতি যাবতা কালেন প্রত্যবাযশূন্যস্যাক্ষস্য ক্ষযো ভবতি তস্মিন্নেবেত্যর্থঃ| স্বপ্রমাণক্ষযাদেবেতি যুগানুরূপবর্ষশতাদিপ্রমাণক্ষযাদিত্যর্থঃ| অপথাদিতি সর্বথা অমার্গগমনাত্| অণিমোক্ষাদিতি কীলমোক্ষাত্| অনুপাঙ্গাদিতি স্নেহাদানাত্| পর্যসনাত্ পরিক্ষেপাত্| মিথ্যোপচরিতানিতি অসম্যক্চিকিত্সতান্| অকালমৃত্যূনিতি অকালমৃত্যুকরান্||৩৮||
Adhikarana 20 (39) · Śloka 39
অথাগ্নিবেশঃ পপ্রচ্ছ- কিন্নু খলু ভগবন্! জ্বরিতেভ্যঃ পানীযমুষ্ণং প্রযচ্ছন্তি ভিষজো ভূযিষ্ঠং ন তথা শীতম্, অস্তি চ শীতসাধ্যোঽপি ধাতুর্জ্বরকর ইতি||৩৯||
अथाग्निवेशः पप्रच्छ- किन्नु खलु भगवन्! ज्वरितेभ्यः पानीयमुष्णं प्रयच्छन्ति भिषजो भूयिष्ठं न तथा शीतम्, अस्ति च शीतसाध्योऽपि धातुर्ज्वरकर इति||३९||
🔊 Audio coming soon
সম্প্রতি মিথ্যোপচারশ্রুত্যা উষ্ণতোযং জ্বরেঽপ্যাগ্নেযে মিথ্যোপচারঃ স্যাদিত্যাশঙ্ক্যাহ- কিন্ন্বিত্যাদি| শীতসাধ্যোঽপিধাতুঃ পিত্তমুষ্ণরূপমিত্যর্থঃ| পানীযং যস্মাত্ সর্বজ্বরিতেভ্যো দীযতে, তস্মাত্ পানীযমেবাত্র পৃচ্ছতি||৩৯||
Adhikarana 21 (40) · Śloka 40
তমুবাচ ভগবানাত্রেযঃ- জ্বরিতস্য কাযসমুত্থানদেশকালানভিসমীক্ষ্য পাচনার্থং পানীযমুষ্ণং প্রযচ্ছন্তি ভিষজঃ| জ্বরো হ্যামাশযসমুত্থঃ, প্রাযো ভেষজানি চামাশযসমুত্থানাং বিকারাণাং পাচনবমনাপতর্পণসমর্থানি ভবন্তি; পাচনার্থং চ পানীযমুষ্ণং, তস্মাদেতজ্জ্বরিতেভ্যঃ প্রযচ্ছন্তি ভিষজো ভূযিষ্ঠম্| তদ্ধি তেষাং পীতং বাতমনুলোমযতি, অগ্নিং চোদর্যমুদীরযতি, ক্ষিপ্রং জরাং গচ্ছতি, শ্লেষ্মাণং পরিশোষযতি, স্বল্পমপি চ পীতং তৃষ্ণাপ্রশমনাযোপকল্পতে; তথাযুক্তমপি চৈতন্নাত্যর্থোত্সন্নপিত্তে জ্বরে সদাহভ্রমপ্রলাপাতিসারে বা প্রদেযম্, উষ্ণেন হি দাহভ্রমপ্রলাপাতিসারা ভূযোঽভিবর্ধন্তে, শীতেন চোপশাম্যন্তীতি||৪০||
तमुवाच भगवानात्रेयः- ज्वरितस्य कायसमुत्थानदेशकालानभिसमीक्ष्य पाचनार्थं पानीयमुष्णं प्रयच्छन्ति भिषजः| ज्वरो ह्यामाशयसमुत्थः, प्रायो भेषजानि चामाशयसमुत्थानां विकाराणां पाचनवमनापतर्पणसमर्थानि भवन्ति; पाचनार्थं च पानीयमुष्णं, तस्मादेतज्ज्वरितेभ्यः प्रयच्छन्ति भिषजो भूयिष्ठम्| तद्धि तेषां पीतं वातमनुलोमयति, अग्निं चोदर्यमुदीरयति, क्षिप्रं जरां गच्छति, श्लेष्माणं परिशोषयति, स्वल्पमपि च पीतं तृष्णाप्रशमनायोपकल्पते; तथायुक्तमपि चैतन्नात्यर्थोत्सन्नपित्ते ज्वरे सदाहभ्रमप्रलापातिसारे वा प्रदेयम्, उष्णेन हि दाहभ्रमप्रलापातिसारा भूयोऽभिवर्धन्ते, शीतेन चोपशाम्यन्तीति||४०||
🔊 Audio coming soon
উত্সন্নপিত্তে প্রবৃদ্ধপিত্তে||৪০||
Adhikarana 22 (41) · Śloka 41
ভবতি চাত্র- শীতেনোষ্ণকৃতান্ রোগাঞ্ছমযন্তি ভিষগ্বিদঃ| যে তু শীতকৃতা রোগাস্তেষামুষ্ণং ভিষগ্জিতম্||৪১||
भवति चात्र- शीतेनोष्णकृतान् रोगाञ्छमयन्ति भिषग्विदः| ये तु शीतकृता रोगास्तेषामुष्णं भिषग्जितम्||४१||
🔊 Audio coming soon
ন কেবলং জ্বরে এব শীতোষ্ণসমুত্থত্বভেদেন উষ্ণশীতোপচারঃ, কিন্তু সর্বত্রৈব ব্যাধাবেবমিত্যাহ- শীতেনেত্যাদি| ভিষজশ্চ তে জ্ঞানবন্তশ্চেতি ভিষগ্বিদঃ||৪১||
Adhikarana 23 (42-44) · Śloka 44
এবমিতরেষামপি ব্যাধীনাং নিদানবিপরীতং ভেষজং ভবতি; যথা- অপতর্পণনিমিত্তানাং ব্যাধীনাং নান্তরেণ পূরণমস্তি শান্তিঃ, তথা পূরণনিমিত্তানাং ব্যাধীনাং নান্তরেণাপতর্পণম্||৪২|| অপতর্পণমপি চ ত্রিবিধং- লঙ্ঘনং, লঙ্ঘনপাচনং, দোষাবসেচনং চেতি||৪৩|| তত্র লঙ্ঘনমল্পবলদোষাণাং , লঙ্ঘনেন হ্যগ্নিমারুতবৃদ্ধ্যা বাতাতপপরীতমিবাল্পমুদকমল্পো দোষঃ প্রশোষমাপদ্যতে; লঙ্ঘনপাচনে তু মধ্যবলদোষাণাং, লঙ্ঘনপাচনাভ্যাং হি সূর্যসন্তাপমারুতাভ্যাং পাংশুভস্মাবকিরণৈরিব চানতিবহূদকং মধ্যবলো দোষঃ প্রশোষমাপদ্যতে; বহুদোষাণাং পুনর্দোষাবসেচনমেব কার্যং, ন হ্যভিন্নে কেদারসেতৌ পল্বলাপ্রসেকোঽস্তি, তদ্বদ্দোষাবসেচনম্||৪৪||
एवमितरेषामपि व्याधीनां निदानविपरीतं भेषजं भवति; यथा- अपतर्पणनिमित्तानां व्याधीनां नान्तरेण पूरणमस्ति शान्तिः, तथा पूरणनिमित्तानां व्याधीनां नान्तरेणापतर्पणम्||४२|| अपतर्पणमपि च त्रिविधं- लङ्घनं, लङ्घनपाचनं, दोषावसेचनं चेति||४३|| तत्र लङ्घनमल्पबलदोषाणां , लङ्घनेन ह्यग्निमारुतवृद्ध्या वातातपपरीतमिवाल्पमुदकमल्पो दोषः प्रशोषमापद्यते; लङ्घनपाचने तु मध्यबलदोषाणां, लङ्घनपाचनाभ्यां हि सूर्यसन्तापमारुताभ्यां पांशुभस्मावकिरणैरिव चानतिबहूदकं मध्यबलो दोषः प्रशोषमापद्यते; बहुदोषाणां पुनर्दोषावसेचनमेव कार्यं, न ह्यभिन्ने केदारसेतौ पल्वलाप्रसेकोऽस्ति, तद्वद्दोषावसेचनम्||४४||
🔊 Audio coming soon
ন কেবলং শীতোষ্ণসমুত্থযোরেব পরং হেতুবিপর্যযেণ চিকিত্সা, কিন্ত্বপতর্পণাদিজেঽপি হেতুবিপরীতেনেত্যাহ- এবমিত্যাদি| অপতর্পণসন্তর্পণাভ্যাং চ সর্বং চিকিত্সিতং গৃহীতং, ন হ্যপতর্পণসন্তর্পণাভ্যাং বিনাঽন্যদ্বিধানান্তরমস্তি চিকিত্সাযাঃ; যেন সর্ব এবোপক্রমাঃ সন্তর্পণাপতর্পণভেদা এব| অত এব বিশেষজ্ঞানার্থমপতর্পণভেদানাহ- অপতর্পণমিত্যাদি| লঙ্ঘনপাচনমিতিবচনেন যত্র পাচনং ক্রিযতে তত্রাবশ্যং স্তোকমাত্রযা লঙ্ঘনমপিক্রিযত ইতি দর্শযতি, পাচনকালে হি যদি বৃংহণং ক্রিযতে তদা বৃংহণেনাগ্নেঃ প্রতিকূলেন পাচনং ন স্যাদিত্যর্থঃ| অবকিরণৈরিবেত্যত্র ইবশব্দোঽনতিবহূদকমিবেত্যেবংরূপো জ্ঞেযঃ| অন্যদ্বেতি লঙ্ঘনাদি বৃংহণাদি চ||৪২-৪৪||
Adhikarana 24 (45) · Śloka 45
দোষাবসেচনমন্যদ্বা ভেষজং প্রাপ্তকালমপ্যাতুরস্য নৈবংবিধস্য কুর্যাত্| তদ্যথা- অনপবাদপ্রতীকারস্যাধনস্যাপরিচারকস্য বৈদ্যমানিনশ্চণ্ডস্যাসূযকস্য তীব্রাধর্মারুচেরতিক্ষীণবলমাংসশোণিতস্যাসাধ্যরোগোপহতস্য মুমূর্ষুলিঙ্গান্বিতস্য চেতি| এবংবিধং হ্যাতুরমুপচরন্ ভিষক্ পাপীযসাঽযশসা যোগমৃচ্ছতীতি||৪৫||
दोषावसेचनमन्यद्वा भेषजं प्राप्तकालमप्यातुरस्य नैवंविधस्य कुर्यात्| तद्यथा- अनपवादप्रतीकारस्याधनस्यापरिचारकस्य वैद्यमानिनश्चण्डस्यासूयकस्य तीव्राधर्मारुचेरतिक्षीणबलमांसशोणितस्यासाध्यरोगोपहतस्य मुमूर्षुलिङ्गान्वितस्य चेति| एवंविधं ह्यातुरमुपचरन् भिषक् पापीयसाऽयशसा योगमृच्छतीति||४५||
🔊 Audio coming soon
অনপবাদপ্রতীকারো বাচ্যপ্রতীকারঃ| অধনস্যানুপকরণত্বেন ন চিকিত্সা পার্যতে কর্তুমিত্যর্থঃ| বৈদ্যমানী দুরভিমানাদ্বৈদ্যোপদেশং ন করোতি| তীব্রাধর্মরুচেঃ প্রতিক্রিযাযামধর্মো ভবতি, ন চ চিকিত্সা সিধ্যত্যধর্মপ্রতিবন্ধাত্| মুমূর্ষুলিঙ্গান্বিতস্যেতি রিষ্টযুক্তস্য| পাপীযসেতি পাপহেতুনা পাপজনকেনাযশসা||৪৫||
Adhikarana 25 (46-48) · Śloka 48
ভবতি চাত্র- তদাত্বে চানুবন্ধে বা যস্য স্যাদশুভং ফলম্| কর্মণস্তন্ন কর্তব্যমেতদ্বুদ্ধিমতাং মতম্||৪৬|| (অল্পোদকদ্রুমো যস্তু প্রবাতঃ প্রচুরাতপঃ| জ্ঞেযঃ স জাঙ্গলো দেশঃ স্বল্পরোগতমোঽপি চ||৪৭|| প্রচুরোদকবৃক্ষো যো নিবাতো দুর্লভাতপঃ| অনূপো বহুদোষশ্চ, সমঃ সাধারণো মতঃ)||৪৮||
भवति चात्र- तदात्वे चानुबन्धे वा यस्य स्यादशुभं फलम्| कर्मणस्तन्न कर्तव्यमेतद्बुद्धिमतां मतम्||४६|| (अल्पोदकद्रुमो यस्तु प्रवातः प्रचुरातपः| ज्ञेयः स जाङ्गलो देशः स्वल्परोगतमोऽपि च||४७|| प्रचुरोदकवृक्षो यो निवातो दुर्लभातपः| अनूपो बहुदोषश्च, समः साधारणो मतः)||४८||
🔊 Audio coming soon
অনুবন্ধে বেতি উত্তরকালম্| কেচিদল্পোদকদ্রুমো যস্ত্বিত্যাদিগ্রন্থং জাঙ্গলাদিদেশলক্ষণমত্র পঠন্তি||৪৬-৪৮||
Adhikarana 26 (49-52) · Śloka 52
তত্র শ্লোকাঃ- পূর্বরূপাণি সামান্যা হেতবঃ সস্বলক্ষণাঃ| দেশোদ্ধ্বংসস্য ভৈষজ্যং হেতূনাং মূলমেব চ||৪৯|| প্রাগ্বিকারসমুত্পত্তিরাযুষশ্চ ক্ষযক্রমঃ| মরণং প্রতি ভূতানাং কালাকালবিনিশ্চযঃ||৫০|| যথা চাকালমরণং যথাযুক্তং চ ভেষজম্| সিদ্ধিং যাত্যৌষধং যেষাং ন কুর্যাদ্যেন হেতুনা||৫১|| তদাত্রেযোঽগ্নিবেশায নিখিলং সর্বমুক্তবান্| দেশোদ্ধ্বংসনিমিত্তীযে বিমানে মুনিসত্তমঃ||৫২||
तत्र श्लोकाः- पूर्वरूपाणि सामान्या हेतवः सस्वलक्षणाः| देशोद्ध्वंसस्य भैषज्यं हेतूनां मूलमेव च||४९|| प्राग्विकारसमुत्पत्तिरायुषश्च क्षयक्रमः| मरणं प्रति भूतानां कालाकालविनिश्चयः||५०|| यथा चाकालमरणं यथायुक्तं च भेषजम्| सिद्धिं यात्यौषधं येषां न कुर्याद्येन हेतुना||५१|| तदात्रेयोऽग्निवेशाय निखिलं सर्वमुक्तवान्| देशोद्ध्वंसनिमित्तीये विमाने मुनिसत्तमः||५२||
🔊 Audio coming soon
সঙ্গ্রহে পূর্বরূপাণীতি নক্ষত্রাদিবিকারাঃ| সস্বলক্ষণাঃ সস্ববিকৃতিলক্ষণাঃ, তচ্চ লক্ষণং তত্র বাতমেবংবিধমিত্যাদিনা প্রোক্তম্| যথাযুক্তং চ ভেষজং সিদ্ধিং যাতীতি অনেনোষ্ণপানীযদানোপপত্ত্যা সর্বং সঙ্গৃহীতম্||৪৯-৫২||
Adhikarana puShpikA · Śloka 3
ইত্যগ্নিবেশকৃতে তন্ত্রে চরকপ্রতিসংস্কৃতে বিমানস্থানে জনপদোদ্ধ্বংসনীযবিমানং নাম তৃতীযোঽধ্যাযঃ||৩||
इत्यग्निवेशकृते तन्त्रे चरकप्रतिसंस्कृते विमानस्थाने जनपदोद्ध्वंसनीयविमानं नाम तृतीयोऽध्यायः||३||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং বিমানস্থানে জনপদোদ্ধ্বংসনীযবিমানং নাম তৃতীযোঽধ্যাযঃ||৩||