1. rasavimānam

Adhikarana 1 (1-2) · Śloka 2

অথাতো রসবিমানং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

নিদানে জ্ঞাতহেত্বাদিপঞ্চকস্য চিকিত্সোপযোগিতযা দোষভেষজাদিবিশেষজ্ঞানমপেক্ষিতং ভবতি, অতো বক্ষ্যমাণদোষভেষজাদিবিশেষজ্ঞাপকং বিমানস্থানং ব্রূতে| তত্রাপি চ দোষভেষজযোঃ প্রাধান্যাত্তদ্বিশেষজ্ঞাপকং রসবিমানং প্রথমং ব্রূতে| ইমং চ স্থানসম্বন্ধং স্বযমেব দর্শযিষ্যতি| বিশেষেণ মীযতে জ্ঞাযতে দোষভেষজাদ্যনেনেতি বিমানং, দোষভেষজাদীনাং প্রভাবাদিবিশেষ ইত্যর্থঃ; এবম্ভূতং বিমানমভিধেযতযা যত্র তিষ্ঠতি তদ্বিমানস্থানম্| রসবিমানমধিকৃত্য কৃতোঽধ্যাযো রসবিমানম্||১-২||

Adhikarana 2 (3) · Śloka 3

ইহ খলু ব্যাধীনাং নিমিত্তপূর্বরূপরূপোপশযসঙ্খ্যাপ্রাধান্যবিধিবিকল্প বলকালবিশেষাননুপ্রবিশ্যানন্তরং দোষভেষজদেশকালবলশরীরসারাহারসাত্ম্যসত্ত্বপ্রকৃতিবযসাং মানমবহিতমনসা যথাবজ্জ্ঞেযং ভবতি ভিষজা, দোষাদিমানজ্ঞানাযত্তত্বাত্ ক্রিযাযাঃ| ন হ্যমানজ্ঞো দোষাদীনাং ভিষগ্ ব্যাধিনিগ্রহসমর্থো ভবতি| তস্মাদ্দোষাদিমানজ্ঞানার্থং বিমানস্থানমুপদেক্ষ্যামোঽগ্নিবেশ!||৩||

ইহ খল্বিত্যাদিনা স্থানসম্বন্ধমাহ| ইহ সম্প্রাপ্তিভেদসঙ্খ্যাপ্রাধান্যাদিগ্রহণেনৈব সম্প্রাপ্তিমুপদিশন্ সঙ্খ্যাদিভেদেন সর্বৈব সম্প্রাপ্তিঃ কথিতা ভবতীতি দর্শযতি| নিমিত্তাদীনাং তু ন তাদৃশো ভেদোঽল্পগ্রন্থবক্তব্যোঽস্তি, যেন ভেদেন তেঽপীহ কথ্যেরন্, অতস্তে সামান্যেনৈবোক্তাঃ| অনুপ্রবিশ্যেতি বুদ্ধ্বা | দোষাদযঃ সূত্রস্থান এব প্রপঞ্চিতাঃ| মানমিতি প্রভাবাদিবিশেষঃ| এতজ্জ্ঞানে হেতুমাহ- দোষাদীত্যাদি| ক্রিযাযা ইতি চিকিত্সাযাঃ||৩||

Adhikarana 3 (4) · Śloka 4

তত্রাদৌ রসদ্রব্যদোষবিকারপ্রভাবান্ বক্ষ্যামঃ| রসাস্তাবত্ ষট্- মধুরাম্ললবণকটুতিক্তকষাযাঃ| তে সম্যগুপযুজ্যমানাঃ শরীরং যাপযন্তি, মিথ্যোপযুজ্যমানাস্তু খলু দোষপ্রকোপাযোপকল্পন্তে||৪||

অধ্যাযার্থং বক্তুং প্রতিজানীতে- তত্রাদাবিত্যাদি| যদ্যপি চ দোষভেষজেত্যাদৌ দোষাপেক্ষত্বাদ্ভেষজস্য দোষ আদৌ কৃতঃ, তথাঽপীহ রসদ্রব্যরূপভেষজস্যাপেক্ষিতরোগপ্রশমকর্তৃত্বেন তথা দোষস্যাপি চ রসদ্রব্যযোরেব কারণত্বেন ভেষজশব্দসূচিতে রসদ্রব্যে এবাগ্রে কৃতে, পশ্চাত্তু দোষগ্রহণগৃহীতৌ দোষবিকারৌ| প্রকৃষ্টো ভাবঃ প্রভাবঃ শক্তিরিত্যর্থঃ; স চেহাচিন্ত্যশ্চিন্ত্যশ্চ গ্রাহ্যঃ| যেন, ‘তত্র খল্বনেকরসেষু’ ইত্যাদিনা দ্রব্যবিকারযোঃ প্রভাবং রসদ্বারা দোষদ্বারা চ চিন্ত্যমপি বক্ষ্যতি| যাপযন্তীতি সাম্যেনাবস্থাপযন্তি| মিথ্যাশব্দ ইহাযোগাতিযোগমিথ্যাযোগেষু বর্ততে||৪||

Adhikarana 4 (5) · Śloka 5

দোষাঃ পুনস্ত্রযো বাতপিত্তশ্লেষ্মাণঃ| তে প্রকৃতিভূতাঃ শরীরোপকারকা ভবন্তি, বিকৃতিমাপন্নাস্তু খলু নানাবিধৈর্বিকারৈঃ শরীরমুপতাপযন্তি||৫||

দোষা ইতি শারীরদোষাঃ| পুনঃশব্দো মানসদোষং ব্যাবর্তযতি||৫||

Adhikarana 5 (6) · Śloka 6

তত্র দোষমেকৈকং ত্রযস্ত্রযো রসা জনযন্তি, ত্রযস্ত্রযশ্চোপশমযন্তি| তদ্যথা- কটুতিক্তকষাযা বাতং জনযন্তি, মধুরাম্ললবণাস্ত্বেনং শমযন্তি; কট্বম্ললবণাঃ পিত্তং জনযন্তি, মধুরতিক্তকষাযাস্ত্বেনচ্ছ্মযন্তি; মধুরাম্ললবণাঃ শ্লেষ্মাণং জনযন্তি, কটুতিক্তকষাযাস্ত্বেনং শমযন্তি||৬||

রসানামসংসৃষ্টানাং কর্মাহ- তত্রেত্যাদি| অনেন চ রসকর্মোপদেশেন দোষাণামপি তত্তদ্রসোত্পাদ্যত্বং তথা তত্তদ্রসোপশমনীযত্বমুক্তং ভবতি| কটুতিক্তকষাযা বাতং জনযন্তীতি অসতি পরিপন্থিনীতি জ্ঞেযং, তেনার্কাগুরুগুডূচ্যাদীনাং তিক্তানামপি বাতাজনকত্বে ন দোষঃ| তত্র হ্যুষ্ণবীর্যতা পরিপন্থিনী বিদ্যতে, তেন ন তে বাতং জনযন্তীত্যাদ্যনুসরণীযম্| এনমিতি পদেন যশ্চ কট্বাদিজো বাযুস্তমেব মধুরাদযঃ সর্বাত্মবৈপরীত্যাদ্বিশেষেণ শমযন্তীতি দর্শযতি; জাগরণাদিজে হি বাযৌ জাগরণাদিবিপরীতাঃ স্বপ্নাদয এব বিশেষেণ পথ্যাঃ| এবং পিত্তশ্লেষ্মণোরপি এনদেনংশব্দযোস্তাত্পর্যং দর্শযতি||৬||

Adhikarana 6 (7) · Śloka 7

রসদোষসন্নিপাতে তু যে রসা যৈর্দোষৈঃ সমানগুণাঃ সমানগুণভূযিষ্ঠা বা ভবন্তি তে তানভিবর্ধযন্তি, বিপরীতগুণা বিপরীতগুণভূযিষ্ঠা বা শমযন্ত্যভ্যস্যমানা ইতি| এতদ্ব্যবস্থাহেতোঃ ষট্ত্বমুপদিশ্যতে রসানাং পরস্পরেণাসংসৃষ্টানাং, ত্রিত্বং চ দোষাণাম্||৭||

অথ কযা যুক্ত্যা রসা দোষাঞ্জনযন্তি শমযন্তি চেত্যাহ রসদোষেত্যাদি| সন্নিপাতে ইতি অন্তঃশরীরমেলকে| তুশব্দো বিশেষে, তেন বিপরীতগুণা এব বিশেষেণ বিপরীতগুণভূযিষ্ঠাপেক্ষযা শমযন্তীতি দর্শযতি| রসানাং তু যথা উপচারাদ্গুণা ভবন্তি তদভিহিতং “গুণাগুণাশ্রযা নোক্তাঃ” (সূ.অ.২৬) ইত্যাদিনা সূত্রে| অভ্যস্যমানা ইতি ন সকৃদুপযুজ্যমানাঃ| অথ কস্মাদ্রসদোষসংসর্গভূযস্ত্বং পরিত্যজ্য রসষট্ত্বং দোষত্রিত্বং চোচ্যতে? ইত্যাহ- ইত্যেতদিত্যাদি| ব্যবস্থেতি রসদোষসংসর্গপ্রপঞ্চসঙ্ক্ষেপঃ | পরস্পরেণাসংসৃষ্টানামিতি পদং দোষাণামিত্যনেনাপি যোজ্যম্||৭||

Adhikarana 7 (8) · Śloka 8

সংসর্গবিকল্পবিস্তরো হ্যেষামপরিসঙ্খ্যেযো ভবতি, বিকল্পভেদাপরিসঙ্খ্যেযত্বাত্||৮||

রসদোষসংসর্গপ্রপঞ্চানভিধানে হেতুমাহ- সংসর্গেত্যাদি| যস্মাত্ সংসর্গভেদবিস্তরোঽপরিসঙ্খ্যেযস্তস্মাত্ ষট্ত্বং ত্রিত্বং চোচ্যতে| বিকল্পভেদাপরিসঙ্খ্যেযত্বাদিতি সংসর্গবিকল্পস্য ভেদো বিজাতীযপ্রকারঃ, তস্যাপরিসঙ্খ্যেযত্বাত্| এতেন, যথা রসানামবান্তরব্যক্তিভেদেঽপি মধুরত্বাদিসামান্যযোগান্মধুরাদিব্যপদেশেন ষট্ত্বমুচ্যতে; তথা মধুরাম্লমধুরলবণাদিসংসর্গাণামপি সত্যপ্যবান্তরভেদে সামান্যেনোপসঙ্গ্রহং কৃত্বা ত্রিষষ্টিত্বসঙ্খ্যানিযমো ভবিষ্যতীতি নিরস্যতে, যতো মধুরাম্লাদিসংসর্গেঽপি বিজাতীযো মধুরতরমধুরতমাদিভেদকৃতো ভেদোঽপরিসঙ্খ্যেযো ভবতি| বচনং হি- “রসাস্তরতমাভ্যাং তাং সঙ্খ্যামতিপতন্তি হি” (সূ.অ.২৬) ইতি||৮||

Adhikarana 8 (9) · Śloka 9

তত্র খল্বনেকরসেষু দ্রব্যেষ্বনেকদোষাত্মকেষু চ বিকারেষু রসদোষপ্রভাবমেকৈকশ্যেনাভিসমীক্ষ্য ততো দ্রব্যবিকারযোঃ প্রভাবতত্ত্বং ব্যবস্যেত্||৯||

অথ কথং তর্হি সংসৃষ্টানাং রসানাং দোষাণাং চ প্রভাবো জ্ঞেয ইত্যাহ- তত্র খল্বিত্যাদি| তত্র চানেকরসদ্রব্যস্যানেকদোষবিকারস্য চ প্রত্যেকরসদোষপ্রভাবমেলকেন প্রভাবং কথযন্ রসসংসর্গদোষসংসর্গযোরপি তাদৃশমেব প্রভাবং কথযতি, যতো রসদোষসংসর্গপ্রভাবাবত্র দ্রব্যবিকারাশ্রযিত্বাদ্রসদোষযোর্দ্রব্যবিকারপ্রভাবত্বেনোচ্যেতে | অনেন ন্যাযেন সাক্ষাদনুক্তোঽপি একরসদ্রব্যৈকদোষবিকারযোরপি প্রভাবোঽসংসৃষ্টরসদোষপ্রভাবকথনাদুক্ত এব জ্ঞেযঃ| একৈকশ্যেনাভিসমীক্ষ্যেতি প্রত্যেকমুক্তরসাদিপ্রভাবেণানেকরসং দ্রব্যমনেকদোষং চ বিকারং সমুদিতপ্রভাবমভিসমীক্ষ্য||৯||

Adhikarana 9 (10) · Śloka 10

ন ত্বেবং খলু সর্বত্র| ন হি বিকৃতিবিষমসমবেতানাং নানাত্মকানাং পরস্পরেণ চোপহতানামন্যৈশ্চ বিকল্পনৈর্বিকল্পিতানামবযবপ্রভাবানুমানেনৈব সমুদাযপ্রভাবতত্ত্বমধ্যবসাতুং শক্যম্||১০||

অযং চ রসদোষপ্রভাবদ্বারা দ্রব্যবিকারপ্রভাবনিশ্চযো ন সর্বত্র দ্রব্যে বিকারে চেত্যাহ- ন ত্বেবং খলু সর্বত্রেতি| অত্রৈব হেতুমাহ- নহীত্যাদিনাঽধ্যবসাতুং শক্যমিত্যন্তেন| বিকৃতিবিষমসমবেতানামিতি বিকৃতিসমবেতানাং তথা বিষমসমবেতানাং চেতি বিকৃতিবিষমসমবেতানাম্| সমবেতানামিতি মিলিতানাং রসানাং দোষাণাং চ| তত্র রসস্য বিকৃতিসমবাযো যথা- মধুরে তণ্ডুলীযকে; মধুরো হি প্রকৃত্যা স্নেহবৃষ্যত্বাদিকরঃ, তণ্ডুলীযকে তু বিকৃতিসমবেতত্বেন তন্ন করোতি| বিষমসমবেতাস্তু তিলে কষাযকটুতিক্তমধুরাঃ; যদি হীমে রসাঃ সমযা মাত্রযা সমবেতাঃ স্যুস্ততস্তিলোঽপি পিত্তশ্লেষ্মহরস্ত্রিদোষহরো বা স্যাত্, পিত্তকফকরস্ত্বযং; তেনাত্র রসানাং ক্বচিত্ কর্তৃত্বমকর্তৃত্বং চ ক্বচিদিতি বৈষম্যমুন্নীযতে| নানাত্মকানামিত্যাদিহেতুত্রযং তু বিকৃতিসমবাযবিষমসমবাযযোরেবোপলম্ভকম্ | তেন, নানাত্মকত্বাদিভির্বিকৃতিসমবাযবিষমসমবাযৌ ভবতঃ| নানাত্মকানামিতি নানারূপহেতুজনিতানাং ; তেন হেতুভেদবলাদেব রসদোষযোর্বিকৃতো বিষমো বা মেলকো ভবতীত্যর্থঃ| কিংবা, নানাত্মকানামিতি নানাপ্রমাণানাম্| এবং চ নানাপ্রমাণত্বং বিষমসমবাযে হেতুঃ| পরস্পরেণ চোপহতানামিতি অন্যোন্যমুপঘাতিতগুণানাম্| পরস্পরগুণোপঘাতস্তু যদ্যপি দোষাণাং প্রাযো নাস্ত্যেব, তথাঽপ্যদৃষ্টবশাত্ ক্বচিদ্ভবতীতি জ্ঞেযং; রসানাং তু প্রবলেনান্যোপঘাতো ভবত্যেব| অন্যৈশ্চ বিকল্পনৈরিতি অন্যৈশ্চ ভেদকৈঃ, তত্র রসস্য ভেদকাঃ স্বরসকল্কাদযঃ; একস্যৈব হি দ্রব্যস্য কল্পনাবিশেষেণ গুণান্তরাণি ভবন্তি| দোষস্য তু দূষ্যান্তরাণ্যেব গুণান্তরযোগাদ্ভেদকানি ভবন্তি| যদুক্তং- “স এব কুপিতো দোষঃ সমুত্থানবিশেষতঃ| স্থানান্তরগতশ্চৈব বিকারান্ কুরুতে বহূন্” (সূ.অ.১৮) ইতি| অস্মিন্ ব্যাখ্যানে রসানাং দোষাণাং চ য উত্কর্ষাপকর্ষকৃতো বিষমসমবাযঃ পৃথগুচ্যতে, স ন যুজ্যতে; যতো বিষমসমবাযেঽপ্যুত্কৃষ্টস্য রসস্য তথা দোষস্য চোত্কৃষ্টা গুণা অপকৃষ্টস্য চাপকৃষ্টা গুণা ভবন্তীতি কৃত্বাঽবযবপ্রভাবাননুমানেনৈব সমুদাযপ্রভাবানুমানং শক্যম্| অথোচ্যেত- বিষমমেলকে রসস্য দোষস্য চ ন ত এব গুণা উত্কৃষ্টা অপকৃষ্টা বা ভবন্তি কিন্তু গুণান্তরমেব ভবতি, হন্ত তর্হি বিকৃত এবাযং সমবাযো বিসদৃশকার্যকারণত্বাত্| তদেবং দূষণদর্শনাদন্যথা ব্যাখ্যাযতে- যত্- দ্বিবিধো মেলকো ভবতি রসানাং দোষাণাং চ প্রকৃত্যনুগুণঃ, প্রকৃত্যননুগুণশ্চ; তত্র যো মিলিতানাং প্রাকৃতগুণানুপমর্দেন মেলকো ভবতি, স প্রকৃতিসমসমবাযশব্দেনোচ্যতে; যস্তু প্রাকৃতগুণোপমর্দেন ভবতি, স বিকৃতিবিষমসমবাযোঽভিধীযতে; বিকৃত্যা হেতুভূতযা বিষমঃ প্রকৃত্যননুগুণঃ সমবাযো বিকৃতিবিষমসমবায ইত্যর্থঃ| অত্রৈব বিকৃতিবিষমসমবাযে নানাত্মকত্বাদিহেতুত্রযং যথাবিবৃতমেব যোজনীযম্| যে তু বিকৃতিবিষমসমবাযৌ পৃথগেব কুর্বন্তি, বিষমসমবাযস্য বৈষম্যতারতম্যেনাতিবহুপ্রপঞ্চিতত্বাদ্ বিষমাবযবগুণানুমানং দুঃশকমিতি কৃত্বা, তদপি দ্রব্যবিকারপ্রভাবেণৈব ব্যপদিশন্তি||১০||

Adhikarana 10 (11) · Śloka 11

তথাযুক্তে হি সমুদযে সমুদাযপ্রভাবতত্ত্বমেবমেবোপলভ্য ততো দ্রব্যবিকারপ্রভাবতত্ত্বং ব্যবস্যেত্||১১||

অথ কথং তর্হি বিকৃতিবিষমসমবাযপ্রভাবজ্ঞানমিত্যাহ- তথাযুক্তে হীত্যাদি| তথাযুক্তে সমুদয ইতি বিকৃতিবিষমসমবাযে| সমুদযপ্রভাবতত্ত্বমিতি মেলকপ্রভাবতত্ত্বম্| সমধৃতে হি মধুসর্পিষি সূর্যাবর্তাখ্যে বা দোষসমুদযে ন সংযুজ্যমানমধুঘৃতগুণক্রমাগতং মারকত্বং, ন চ বাতাদিদোষপ্রভাবগতং সূর্যবৃদ্ধ্যা বর্ধিষ্ণুত্বং সূর্যাবর্তস্য, কিং তু সংযোগমহিমকৃতমেবেত্যর্থঃ| যচ্চ গতিদ্বযং দোষরসমেলকস্য, তেন প্রকৃতিসমসমবাযরূপং সন্নিপাতং জ্বরনিদানে দোষলিঙ্গমেলকেনৈবোক্তবান্| যদুক্তং- “পৃথগুক্তলক্ষণসংসর্গাদ্দ্বান্দ্বিকমন্যতমং সান্নিপাতিকং বা জ্বরং বিদ্যাত্” (নি.অ.১) ইতি| যস্তু বিকৃতিবিষমসমবেতস্ত্রিদোষকৃতো জ্বরস্তস্য চিকিত্সিতে- “ক্ষণে দাহঃ ক্ষণে শীতং” (চি.অ.৩) ইত্যাদিনা লক্ষণমুক্তম্| ন হি শ্যাবরক্তকোঠোত্পত্ত্যাদি তত্রোক্তং বাতাদিজ্বরে ক্বচিদস্তি| এবং রসেঽপি যত্রাম্রাতে মধুরত্বং প্রকৃতিসমসমবেতং, তত্রাম্রাতং মধুরমেতন্মাত্রমেবোক্তং; তেন, মধুরসামান্যগুণাগতং তস্য বাতপিত্তহরত্বমপি লভ্যত এব| যত্র বার্তাকে কটুতিক্তত্বেন বাতকরত্বং প্রাপ্তমপি চ বিকৃতিবিষমসমবাযাত্তন্ন ভবতি, তত্রাচার্যেণ “বার্তাকং বাতঘ্নং” (সূ.অ.২৭) ইত্যুক্তমেব| এবমিত্যাদি তত্তদুদাহরণং শাস্ত্রপ্রসৃতমনুসরণীযম্| যত্তু প্রকৃতিসমসমবাযকৃতরসদোষগুণদ্বারা প্রাপ্তমপি দ্রব্যগুণং বিকারলক্ষণং চ ব্রূতে, তত্ প্রকর্ষার্থং স্পষ্টার্থং চেতি জ্ঞেযম্||১১||

Adhikarana 11 (12) · Śloka 12

তস্মাদ্রসপ্রভাবতশ্চ দ্রব্যপ্রভাবতশ্চ দোষপ্রভাবতশ্চ বিকারপ্রভাবতশ্চ তত্ত্বমুপদেক্ষ্যামঃ||১২||

উপসংহরতি- তস্মাদিত্যাদি| তত্ত্বমিতি রসাদিপ্রভাবতত্ত্বম্| যত্তু পূর্বং “তত্রাদৌ রসদ্রব্যদোষবিকারপ্রভাবানুপদেক্ষ্যামঃ” ইত্যনেন রসাদিপ্রভাবব্যাখ্যানপ্রতিজ্ঞানং কৃতং, তত্তু রসপ্রভাবানুমানেনৈব দ্রব্যপ্রভাবকথনাত্, তথা দোষপ্রভাবেণ চ বিকারপ্রভাবকথনাচ্চরিতার্থং স্যাত্| ইহ তু বিকৃতিবিষমসমবাযাত্মকে দ্রব্যে বিকারে বা রসদোষপ্রভাবানুমানেন ন দ্রব্যবিকারপ্রভাবানুমানমস্তীতি কৃত্বা পৃথক্ পৃথগ্রসাদিপ্রভাবতত্ত্বাভিধানপ্রতিজ্ঞানমিতি ন পৌনরুক্ত্যম্| ইহ দ্রব্যাণাং বীর্যপ্রভাব-বিপাকপ্রভাবৌ চ দ্রব্যপ্রভাবে রসপ্রভাবে বাঽন্তর্ভাবনীযৌ| তত্র যৌ রসানুগুণৌ বীর্যবিপাকপ্রভাবৌ, তৌ রসে; যৌ তু রসক্রমোক্তবীর্যবিপাকবিপরীতৌ বীর্যবিপাকৌ, তৌ দ্রব্যপ্রভাবে বোদ্ধব্যৌ| উপদেক্ষ্যাম ইতি নিখিলেন তন্ত্রেণ রসাদিপ্রভাবতত্ত্বং পৃথগুপদেক্ষ্যাম ইত্যর্থঃ; রসাদিপ্রভাবঃ প্রপঞ্চেন নিখিলে তন্ত্র এব বক্তব্যঃ||১২||

Adhikarana 12 (13) · Śloka 13

তত্রৈষ রসপ্রভাব উপদিষ্টো ভবতি| দ্রব্যপ্রভাবং পুনরুপদেক্ষ্যামঃ| তৈলসর্পির্মধূনি বাতপিত্তশ্লেষ্মপ্রশমনার্থানি দ্রব্যাণি ভবন্তি||১৩||

সঙ্ক্ষেপাভিধানমেতদেবেতি দর্শযন্নাহ- তত্রৈষ ইত্যাদি| এষ ইতি ‘রসাঃ ষড্’ ইত্যাদিনা ‘তত্ত্বমুপদেক্ষ্যামঃ’ ইত্যন্তেন গ্রন্থেনোক্ত ইত্যর্থঃ| উপদিষ্টো ভবতীতি সঙ্ক্ষেপেণ কথিতো ভবতি| অন্যে তু ‘তত্রৈষ রসপ্রভাব উদ্দিষ্টো ভবতি’ ইতি পঠন্তি| অস্মিন্ পক্ষে দ্রব্যদোষবিকারপ্রভাবোঽপি যোঽত্র উদ্দিষ্টঃ সোঽপি রসদ্বারা, তেন রসস্যৈব প্রপঞ্চাভিহিতত্বাত্তস্যৈবাভিধানমুপসংহরতি ন দ্রব্যাদীনামিতি জ্ঞেযম্| দ্রব্যপ্রভাবমিত্যাদৌ পুনরিতি সামান্যেন দ্রব্যপ্রভাবকথনাত্ পুনঃ শৃঙ্গগ্রাহিকযা তৈলাদিদ্রব্যপ্রভাবং কথযিষ্যাম ইত্যর্থঃ| প্রশমনার্থানীতি প্রশমনপ্রযোজনানি||১৩||

Adhikarana 13 (14) · Śloka 14

তত্র তৈলং স্নেহৌষ্ণ্যগৌরবোপপন্নত্বাদ্বাতং জযতি সততমভ্যস্যমানং; বাতো হি রৌক্ষ্যশৈত্যলাঘবোপপন্নো বিরুদ্ধগুণো ভবতি, বিরুদ্ধগুণসন্নিপাতে হি ভূযসাঽল্পমবজীযতে, তস্মাত্তৈলং বাতং জযতি সততমভ্যস্যমানম্| সর্পিঃ খল্বেবমেব পিত্তং জযতি, মাধুর্যাচ্ছৈত্যান্মন্দত্বাচ্চ ; পিত্তং হ্যমধুরমুষ্ণং তীক্ষ্ণং চ| মধু চ শ্লেষ্মাণং জযতি, রৌক্ষ্যাত্তৈক্ষ্ণ্যাত্ কষাযত্বাচ্চ; শ্লেষ্মা হি স্নিগ্ধো মন্দো মধুরশ্চ | যচ্চান্যদপি কিঞ্চিদ্দ্রব্যমেবং বাতপিত্তকফেভ্যো গুণতো বিপরীতং স্যাত্তচ্চৈতাঞ্জযত্যভ্যস্যমানম্||১৪||

সততমভ্যস্যমানমিতি অবিচ্ছেদেনোপযুজ্যমানম্| বিরুদ্ধগুণ ইতি তৈলগুণেভ্যো বিপরীতগুণঃ| বিরুদ্ধগুণসন্নিপাতে ইতি বিরুদ্ধগুণযোর্মেলকে| ননু বিরুদ্ধগুণযোর্মধ্যে ভূযসাঽল্পং জীযতে, তত্ কথং তৈলং বাতং জযতি? ন হ্যস্য বাতং প্রতি ভূযস্ত্বং যুক্তমিত্যাহ- সততমভ্যস্যমানমিতি| সততোপযোগেন হি তৈলং বাতাদধিকং ভবতি, তেন বাতং জযতীত্যর্থঃ| সর্পিঃ খল্বেবমেবেতি সর্পিরপি সততমভ্যস্যমানমিত্যর্থঃ| অমধুরমিতি রৌক্ষ্যলাঘবাবৃষ্যত্বাদিনা মধুরবিপরীতং কটুরসমিত্যর্থঃ| ইহ চ প্রভাবশব্দেন সামান্যেন দ্রব্যশক্তিরুচ্যতে, নাচিন্ত্যশক্তিঃ; তেন তৈলাদীনাং স্নেহৌষ্ণ্যাদিগুণাদপি বাতাদিশমনং দ্রব্যপ্রভাবাদেব ভবতি| সর্পিষি চ যদ্যপি মধুরো রসঃ পিত্তপ্রশমে ব্যাপ্রিযতে, তথাঽপি মাধুর্যশৈত্যমন্দত্বৈঃ পিত্তশমনং সর্পিঃকার্যমেব, তেন দ্রব্যপ্রভাব এব বাচ্যঃ | যদা তু রসদ্বারা কার্যং দ্রব্যস্য চিন্ত্যতে, তদা রসপ্রভাব ইতি ব্যপদেশো ভবতি| এবং কষাযানুরসে মধুনি চ সমাধানং বাচ্যম্| অন্যে তু ব্রুবতে- যত্- তৈলাদীনাং বাতাদিশমনত্বং প্রত্যচিন্ত্য এব প্রভাবোঽযমুচ্যতে; তত্র চ তৈলবাতশমনত্বং প্রত্যচিন্ত্য এব প্রভাবোঽযমুচ্যতে; তত্র চ তৈলবাতযোর্বিরুদ্ধগুণযোর্মেলকে তৈলমেব বাতং জযতি, ন তু বাতস্তৈলমিতি তৈলস্যাচিন্ত্যপ্রভাবঃ; এবং সর্পির্মধুনোরপি পিত্তশ্লেষ্মহরণে প্রভাবাজ্জ্ঞেযে| এতচ্চান্যে নেচ্ছন্তি, যতস্তৈলাদীনাং সততমভ্যস্যমানমিতি পদেনাধিক্যমেব বাতাদিজযকারণমুক্তং; তথা যচ্চান্যদপি কিঞ্চিদ্দ্রব্যমিত্যাদিগ্রন্থেন দ্রব্যাচিন্ত্যপ্রভাবং পরিত্যজ্য সামান্যেন গুণবৈপরীত্যমেবাভ্যাসাদ্বাতাদিজযহেতুরুচ্যতে||১৪||

Adhikarana 14 (15) · Śloka 15

অথ খলু ত্রীণি দ্রব্যাণি নাত্যুপযুঞ্জীতাধিকমন্যেভ্যো দ্রব্যেভ্যঃ; তদ্যথা- পিপ্পলী, ক্ষারঃ, লবণমিতি||১৫||

অভ্যস্যদ্রব্যং প্রভাবোদাহরণার্থমভিধাযানভ্যস্যানাহ- অথেত্যাদি| অধিকমন্যেভ্য ইতি বচনাদন্যদপি চিত্রকভল্লাতকাদ্যেবঞ্জাতীযং নাত্যুপযোক্তব্যং, পিপ্পল্যাদিদ্রব্যং ত্বন্যেভ্যোঽপ্যধিকমত্যুপযোগে বর্জনীযমিতি দর্শযতি||১৫||

Adhikarana 15 (16) · Śloka 16

পিপ্পল্যো হি কটুকাঃ সত্যো মধুরবিপাকা গুর্ব্যোনাত্যর্থং স্নিগ্ধোষ্ণাঃ প্রক্লেদিন্যো ভেষজাভিমতাশ্চতাঃ সদ্যঃ; শুভাশুভকারিণ্যো ভবন্তি; আপাতভদ্রাঃ, প্রযোগসমসাদ্গুণ্যাত্; দোষসঞ্চযানুবন্ধাঃ;- সততমুপযুজ্যমানা হি গুরুপ্রক্লেদিত্বাচ্ছ্লেষ্মাণমুত্ক্লেশযন্তি, ঔষ্ণ্যাত্ পিত্তং, ন চ বাতপ্রশমনাযোপকল্পন্তেঽল্পস্নেহোষ্ণভাবাত্; যোগবাহিন্যস্তু খলু ভবন্তি; তস্মাত্ পিপ্পলীর্নাত্যুপযুঞ্জীত||১৬||

‘কটুকাঃ সত্যো মধুরবিপাকাঃ’ ইত্যাদি পিপ্পলীগুণকথনমনভ্যাসপ্রযোগে দোষবৈপরীত্যেন দোষপ্রশমনোপদর্শনার্থং; তথা, অত্যভ্যাসে ‘গুরুপ্রক্লেদিত্বাচ্ছ্লেষ্মাণমুত্ক্লেশযন্তি’ ইত্যাদিগ্রন্থবক্তব্যদোষকরণযোগ্যতোপদর্শনার্থং চ| ভেষজাভিমতাশ্চ সদ্য ইতি চ্ছেদঃ| সদ্য ইতি অনভ্যাসে| শুভাশুভকারিণ্যো ভবন্তীতি সদ্যঃ শুভকারিণ্যঃ, অত্যভ্যাসপ্রযোগে ত্বশুভকারিণ্যঃ| এতদেব শুভাশুভকারিত্বং দর্শযতি- আপাতভদ্রা ইত্যাদিনা| প্রযোগসমসাদ্গুণ্যাদিতি সমস্য প্রযোগস্য সদ্গুণত্বাত্, সমেঽল্পকালে অল্পমাত্রে চ পিপ্পল্যাদিপ্রযোগে সদ্গুণা ভবন্তীত্যর্থঃ| দোষসঞ্চযানুবন্ধোঽত্যুপযোগো যাসাং তা দোষসঞ্চযানুবন্ধাঃ| এতদেব দোষসঞ্চযানুবন্ধত্বং বিবৃণোতি- সততমিত্যাদি| পিপ্পলীধর্মকথনপ্রস্তাবাদ্গুণান্তরমাহ- যোগবাহিন্যস্ত্বিত্যাদি| যোগবাহিত্বেন কটুকানামপি পিপ্পলীনাং বৃষ্যপ্রযোগেষু যোগঃ, তথা জ্বরগুল্মকুষ্ঠহরাদিপ্রযোগেষু জ্বরাদীন্ হন্তি পিপ্পলী| অযং চ পিপ্পল্যতিযোগনিষেধোঽপবাদং পরিত্যজ্য জ্ঞেযঃ| তেন, পিপ্পলীরসাযনপ্রযোগস্তথা গুল্মাদিষু চ পিপ্পলীবর্ধমানকপ্রযোগো ন বিরোধমাবহতি| উক্তে হি বিষযে যথোক্তবিধানেন নির্দোষা এব পিপ্পল্য ইতি ঋষিবচনাদুন্নীযতে| অন্যে তু, অন্নসংস্করণে পিপ্পল্যাদীনামতিপ্রযোগো নিষিধ্যতে, ন তু স্বাতন্ত্রযেণেতি ব্রুবতে| সততমুপযুজ্যমানা ইতি অতিমাত্রত্বেন তথা সততপ্রযোগেণ চেতি জ্ঞেযম্||১৬||

Adhikarana 16 (17) · Śloka 17

ক্ষারঃ পুনরৌষ্ণ্যতৈক্ষ্ণযলাঘবোপপন্নঃ ক্লেদযত্যাদৌ পশ্চাদ্বিশোষযতি , স পচনদহনভেদনার্থমুপযুজ্যতে; সোঽতিপ্রযুজ্যমানঃ কেশাক্ষিহৃদযপুংস্ত্বোপঘাতকরঃ সম্পদ্যতে| যে হ্যেনং গ্রামনগরনিগমজনপদাঃ সততমুপযুঞ্জতে ত আন্ধ্যষাণ্ঢ্যখালিত্যপালিত্যভাজো হৃদযাপকর্তিনশ্চ ভবন্তি, তদ্যথা- প্রাচ্যাশ্চীনাশ্চ; তস্মাত্ ক্ষারং নাত্যুপযুঞ্জীত||১৭||

হৃদযাপকর্তিন ইতি হৃদযপরিকর্তনরূপবেদনাযুক্তাঃ||১৭||

Adhikarana 17 (18) · Śloka 18

লবণং পুনরৌষ্ণ্যতৈক্ষ্ণ্যোপপন্নম্, অনতিগুরু, অনতিস্নিগ্ধম্, উপক্লেদি, বিস্রংসনসমর্থম্, অন্নদ্রব্যরুচিকরম্, আপাতভদ্রং প্রযোগসমসাদ্গুণ্যাত্, দোষসঞ্চযানুবন্ধং, তদ্রোচনপাচনোপক্লেদনবিস্রংসনার্থমুপযুজ্যতে| তদত্যর্থমুপযুজ্যমানং গ্লানিশৈথিল্যদৌর্বল্যাভিনির্বৃত্তিকরং শরীরস্য ভবতি| যে হ্যেনদ্গ্রামনগরনিগমজনপদাঃ সততমুপযুঞ্জতে, তে ভূযিষ্ঠং গ্লাস্নবঃ শিথিলমাংসশোণিতা অপরিক্লেশসহাশ্চ ভবন্তি| তদ্যথা- বাহ্লীকসৌরাষ্ট্রিকসৈন্ধবসৌবীরকাঃ; তে হি পযসাঽপি সহ লবণমশ্নন্তি| যেঽপীহ ভূমেরত্যূষরা দেশাস্তেষ্বোষধিবীরুদ্বনস্পতিবানস্পত্যা ন জাযন্তেঽল্পতেজসো বা ভবন্তি, লবণোপহতত্বাত্| তস্মাল্লবণং নাত্যুপযুঞ্জীত| যে হ্যতিলবণসাত্ম্যাঃ পুরুষাস্তেষামপি খালিত্যপালিত্যানি বলযশ্চাকালে ভবন্তি||১৮||

গ্লানিঃ মাংসাপচযো হর্ষক্ষযো বা| ন কেবলং লবণাতিযোগশরীরোপঘাতকরঃ; কিন্তু ভূমেরপ্যুপঘাতকর ইত্যাহ- যেঽপীহেত্যাদি| ঊষরা ইতি লবণপ্রধানাঃ| লবণং নাত্যুপযুঞ্জীতেতি নাতিমাত্রং লবণং সততমুপযুঞ্জীত, অন্নদ্রব্যসংস্কারকং তু স্তোকমাত্রমভ্যাসেনাপ্যুপযোজনীযমেব| বাহ্লীকাদিব্যতিরিক্তেঽপি দেশে যেঽতিলবণমশ্নন্তি তেষামপি দোষানাহ- যে হীত্যাদি| এতেন চান্যত্রাপি দেশেঽতিমাত্রলবণসাত্ম্যানাং লবণাত্যুপযোগকৃত এব শৈথিল্যাদিদোষ উন্নীযতে, ন দেশস্বভাবকৃতঃ||১৮||

Adhikarana 18 (19) · Śloka 19

তস্মাত্তেষাং তত্সাত্ম্যতঃ ক্রমেণাপগমনং শ্রেযঃ| সাত্ম্যমপি হি ক্রমেণোপনিবর্ত্যমানমদোষমল্পদোষং বা ভবতি||১৯||

তেষামিতি অতিক্ষারলবণসাত্ম্যানাম্| তত্সাত্ম্যত ইতি অতিমাত্রক্ষারাদতিমাত্রলবণাচ্চ সাত্ম্যাত্| ক্রমেণেতি নবেগান্ধারণীযোক্তসাত্ম্যপরিত্যাগক্রমেণ| ইহ চ সাত্ম্যশব্দেনৌকসাত্ম্যমভিপ্রেতম্| অল্পদোষমদোষং বেতি পক্ষদ্বযেঽত্যর্থসাত্ম্যমল্পদোষং ভবতি, অন্যত্ত্বদোষমিতি ব্যবস্থা||১৯||

Adhikarana 19 (20) · Śloka 20

সাত্ম্যং নাম তদ্ যদাত্মন্যুপশেতে; সাত্ম্যার্থো হ্যুপশযার্থঃ| তত্ত্রিবিধং প্রবরাবরমধ্যবিভাগেন; সপ্তবিধং তু রসৈকৈকত্বেন সর্বরসোপযোগাচ্চ| তত্র সর্বরসং প্রবরম্, অবরমেকরসং, মধ্যং তু প্রবরাবরমধ্যস্থম্| তত্রাবরমধ্যাভ্যাং সাত্ম্যাভ্যাং ক্রমেণৈব প্রবরমুপপাদযেত্ সাত্ম্যম্| সর্বরসমপি চ সাত্ম্যমুপপন্নঃ প্রকৃত্যাদ্যুপযোক্ত্রষ্টমানি সর্বাণ্যাহারবিধিবিশেষাযতনান্যভিসমীক্ষ্য হিতমেবানুরুধ্যেত||২০||

সাত্ম্যং নামেতি ওকসাত্ম্যং নামেত্যর্থঃ| (ওকাদিতি অভ্যাসাত্ |) উপশযার্থ ইতি উপশযশব্দাভিধেয ইত্যর্থঃ| তদিতি ওকসাত্ম্যম্| ত্রিবিধমিতি প্রবরাবরমধ্যভেদেন| সপ্তবিধন্তু একৈকরসেন ষট্, সংসৃষ্টরসোপযোগাচ্চৈকম্, এবং সপ্তবিধম্| সংসৃষ্টশব্দেন দ্বিরসাদযঃ ষড্রসপর্যন্তা গৃহ্যন্তে| প্রবরাবরমধ্যস্থমিতি দ্বিরসাদিপঞ্চরসপর্যন্তম্| অবরমধ্যমাভ্যাং লক্ষিতঃ পুরুষঃ| প্রবরমিতি সর্বরসম্| সাত্ম্যমুপপাদযেত্ অভ্যসেদিত্যর্থঃ| ক্রমেণেতি যথোক্তাভ্যাসক্রমেণ| উপপাদিতসর্বরসসাত্ম্যেনাপি চাহারঃ প্রশস্তপ্রকৃত্যাদিসম্পন্ন এব কর্তব্য ইত্যাহ- সর্বরসমিত্যাদি| অভিসমীক্ষ্যেতি হিতাহিতত্বেন বিচার্য| হিতমেবেতি পদেন যদেব প্রকৃত্যাদিনা হিতং তদেবানুরুধ্যেত সেবেতেত্যর্থঃ||২০||

Adhikarana 20 (21) · Śloka 21

তত্র খল্বিমান্যষ্টাবাহারবিধিবিশেষাযতনানি ভবন্তি; তদ্যথা- প্রকৃতিকরণসংযোগরাশিদেশকালোপযোগসংস্থোপযোক্ত্রষ্টমানি (ভবন্তি)||২১||

আহারস্য বিধিঃ প্রকারো বিধানং বা ইত্যাহারবিধিঃ, তস্য বিশেষো হিতত্বমহিতত্বং চ, তস্যাযতনানি হেতূনীত্যাহারবিধিবিশেষাযতনানি| আহারপ্রকারস্য হিতত্বমহিতত্বং চ প্রকৃত্যাদিহেতুকমিত্যর্থঃ| উপযোক্তা অষ্টমো যেষাং তান্যুপযোক্ত্রষ্টমানি||২১||

Adhikarana 21 (22(1)) · Śloka 22

তত্র প্রকৃতিরুচ্যতে স্বভাবো যঃ, স পুনরাহারৌষধদ্রব্যাণাং স্বাভাবিকো গুর্বাদিগুণযোগঃ; তদ্যথা মাষমুদ্গযোঃ, শূকরৈণযোশ্চ (১)|২২|

উক্তানি প্রকৃত্যাদীনা বিভজতে- তত্রেত্যাদিনা| স্বাভাবিক ইতি সংস্কারাদ্যকৃতঃ| মাষমুদ্গযোরিতি প্রকৃত্যা মাষে গুরুত্বং, মুদ্গে চ লঘুত্বং; শূকরে গুরুত্বং, এণে চ লঘুত্বম্||২২(১)||

Adhikarana 22 (22(2)) · Śloka 22

করণং পুনঃ স্বাভাবিকানাং দ্রব্যাণামভিসংস্কারঃ| সংস্কারো হি গুণান্তরাধানমুচ্যতে| তে গুণাস্তোযাগ্নিসন্নিকর্ষশৌচমন্থনদেশকালবাসনভাবনাদিভিঃ কালপ্রকর্ষভাজনাদিভিশ্চাধীযন্তে (২)|২২|

দ্রব্যাণামিতি বক্তব্যে স্বাভাবিকানামিতি যত্ করোতি, তেনোত্পত্তিকালে জনকভূতৈঃ স্বগুণারোপণং, সংস্কারস্তূত্পন্নস্যৈব তোযাদিনা গুণান্তরাধানমিতি দর্শযতি| তচ্চ প্রাকৃতগুণোপমর্দেনৈব ক্রিযতে, যথা- তোযাগ্নিসন্নিকর্ষশৌচৈস্তণ্ডুলস্থং গৌরবমুপহত্য লাঘবমন্নে ক্রিযতে| যদুক্তং- “সুধৌতঃ প্রস্রুতঃ স্বিন্নঃ সন্তপ্তশ্চৌদনো লঘুঃ” (সূ.অ.২৭)| তথা রক্তশাল্যাদের্লঘোরপ্যগ্নিসংযোগাদিনা লাঘবং বর্ধতে| মন্থনাদ্গুণাধানং যথা “শোথকৃদ্দধি শোথঘ্নং সস্নেহমপি মন্থনাত্” ইতি| দেশেন যথা “ভস্মরাশেরধঃ স্থাপযেত্” (চি.অ.১পা.১) ইত্যাদৌ| বাসনেন গুণাধানং যথা- অপামুত্পলাদিবাসনেন সুগন্ধানুকরণম্| ভাবনযা চ স্বরসাদিকৃতযা স্থিতস্যৈবামলকাদের্গুণস্যোত্কর্ষো ভবতি| কালপ্রকর্ষদ্যথা- “পক্ষাজ্জাতরসং পিবেত্” (চি.অ.১৫) ইত্যাদি| ভাজনেন যথা- “ত্রৈফলেনাযসীং পাত্রীং কল্কেনালেপযেত্” (চি.অ.১,পা.৩) ইত্যাদৌ| আদিগ্রহণাত্ পেষণাভিমন্ত্রণাদি গৃহ্যতে| ননু, সংস্কারাধেযেন গুণেন কথং স্বাভাবিকগুণনাশঃ ক্রিযতে, যতঃ “স্বভাবো নিষ্প্রতিক্রিযঃ” ইত্যুক্তং; যদি হি সংস্কারেণ স্বাভাবিকগুরুত্বং প্রতিক্রিযতে, তদা “স্বভাবো নিষ্প্রতিক্রিযঃ” ইতি কথং? ব্রূমঃ- “স্বভাবো নিষ্প্রতিক্রিযঃ” ইতি স্বভাবো ভাবানামুত্পত্তৌ নান্যথা ক্রিযতে| তেন, জাতিপ্রতিবদ্ধং মাষাদীনাং গুরুত্বং ন তজ্জাতৌ স্ফোটযিতুং পার্যতে, সংস্কারেণ তু তদন্যথাকরণমনুমতমেব দৃষ্টত্বাত্| কশ্চিত্তু গুণো দ্রব্যাণাং সংস্কারাদিনাঽপি নান্যথা ক্রিযতে, যথা- বহ্নেরৌষ্ণ্যং, বাযোশ্চলত্বং, তৈলস্য স্নেহ ইত্যাদি| এতে হি যাবদ্দ্রব্যভাবিন এব গুণাঃ| গৌরবাদযস্তু পুরাণধান্যাদিষ্বপ্যপগমদর্শনান্ন যাবদ্দ্রব্যভাবিনঃ| উক্তং হি- “গুণো দ্রব্যবিনাশাদ্বা বিনাশমুপগচ্ছতি| গুণান্তরোপধানাদ্বা” ইতি| যত্র তু সংস্কারেণ ব্রীহের্লাজলক্ষণং দ্রব্যান্তরমেব জন্যতে, তত্র গুণান্তরোত্পাদঃ সুষ্ঠ্বেব ||২২(২)||

Adhikarana 23 (22(3)) · Śloka 22

সংযোগঃ পুনর্দ্বযোর্বহূনাং বা দ্রব্যাণাং সংহতীভাবঃ, স বিশেষমারভতে, যং পুনর্নৈকৈকশো দ্রব্যাণ্যারভন্তে; তদ্যথা- মধুসর্পিষোঃ, মধুমত্স্যপযসাং চ সংযোগঃ (৩)|২২|

সংযোগমাহ- সংযোগস্ত্বিত্যাদি| স বিশেষমারভত ইতি সংযুজ্যমানদ্রব্যৈকদেশেঽদৃষ্টং কার্যমারভত ইত্যর্থঃ| যং নৈকৈকশ ইতি যং বিশেষং প্রত্যেকমসংযুজ্যমানানি দ্রব্যাণি নারভন্ত ইত্যর্থঃ| মধুসর্পিষী হি প্রত্যেকমমারকে মিলিতে তু মারকে ভবতঃ, ক্ষীরমত্স্যাদিসংযোগশ্চ কুষ্ঠাদিকরো ভবতি| সংযোগস্ত্বিহ প্রধান্যেনৈবোপলভ্যমানদ্রব্যমেলকো বিবক্ষিতঃ , তেন ভাবনাদিষ্বপি যদ্যপি সংযোগোঽস্তি, তথাঽপি তত্র ভাবনাদ্রব্যাণাং প্রাধান্যেনানুপলব্ধের্ন সংযোগেন গ্রহণম্||২২(৩)||

Adhikarana 24 (22(4)) · Śloka 22

রাশিস্তু সর্বগ্রহপরিগ্রহৌ মাত্রামাত্রফলবিনিশ্চযার্থঃ| তত্র সর্বস্যাহারস্য প্রমাণগ্রহণমেকপিণ্ডেন সর্বগ্রহঃ, পরিগ্রহঃ পুনঃ প্রমাণগ্রহণমেকৈকশ্যেনাহারদ্রব্যাণাম্| সর্বস্য হি গ্রহঃ সর্বগ্রহঃ, সর্বতশ্চ গ্রহঃ পরিগ্রহ উচ্যতে (৪)|২২|

রাশিঃ প্রমাণম্| মাত্রামাত্রফলবিনিশ্চযার্থং ইতি মাত্রাবদাহারস্যৌষধস্য চ যত্ ফলং শুভম্, অমাত্রস্য হীনস্যাতিরিক্তস্য বা যত্ ফলমশুভম্| যদুক্তং- “তস্য জ্ঞানার্থমুচিতপ্রমাণমনুচিতপ্রমাণং চ রাশিসঞ্জ্ঞং ভবতি”| সর্বগ্রহং বিবৃণোতি- তত্রেত্যাদি| সর্বস্যেতি মিশ্রীকৃতস্যান্নমাংসসূপাদেরেকপিণ্ডেন মানম্| পরিগ্রহং বিবৃণোতি- পরিগ্রহঃ পুনরিত্যাদি| একৈকশ্যেনেতি অন্নস্য কুডবঃ, সূপস্য পলং, মাংসস্য দ্বিপলমিত্যাদ্যবযবমানপূর্বকং সমুদাযমানম্| সর্বগ্রহে প্রত্যবযবমাননিযমো নাস্তি; তেন যেন কেনচিদাহারেণ প্রত্যেকমনিযতমানেন সম্পূর্ণাহারমাত্রানিযমনং সর্বগ্রহঃ| এতদেব শব্দব্যুত্পত্ত্যা দর্শযতি- সর্বস্য হীত্যাদি| সর্বত ইতি প্রত্যেকাবযবত ইত্যর্থঃ||২২(৪)||

Adhikarana 25 (22(5)) · Śloka 22

দেশঃ পুনঃ স্থানং; স দ্রব্যাণামুত্পত্তিপ্রচারৌ দেশসাত্ম্যং চাচষ্টে (৫)|২২|

দেশং বিভজতে- দেশ ইত্যাদি| স্থানগ্রহণেনাহারদ্রব্যস্য তথা ভোক্তুশ্চ স্থানং দর্শযতি| আচষ্ট ইতি দ্রব্যস্যোত্পত্তিপ্রচারাদিকৃতগুণজ্ঞানহেতুর্ভবতি| তত্রোত্পত্ত্যা- হিমবতি জাতং গুণবদ্ভবতি , মরৌ জাতং লঘু ভবতি, ইত্যাদি| প্রচারেণ লঘুভক্ষ্যাণাং প্রাণিনাং তথা ধন্বপ্রচারিণাং বহুক্রিযাণাং চ লাঘবং, বিপর্যযে চ গৌরবং গৃহ্যতে| দেশসাত্ম্যেন চ দেশবিপরীতগুণং সাত্ম্যং গৃহ্যতে; যথা- আনূপে উষ্ণরূক্ষাদি, ধন্বনি চ শীতস্নিগ্ধাদি, ওকসাত্ম্যং তু উপযোক্তৃগ্রহণেন গৃহীতম্||২২(৫)||

Adhikarana 26 (22(6)) · Śloka 22

কালো হি নিত্যগশ্চাবস্থিকশ্চ; তত্রাবস্থিকো বিকারমপেক্ষতে, নিত্যগস্তু ঋতুসাত্ম্যাপেক্ষঃ (৬)|২২|

নিত্যগ ইতি অহোরাত্রাদিরূপঃ| আবস্থিক ইতি রোগিত্ববাল্যাদ্যবস্থাবিশেষিত ইত্যর্থঃ| বিকারমপেক্ষত ইতি বাল্যাদিকৃতং তু শ্লেষ্মবিকারং জ্বরাদিকং চাহারনিযমার্থমপেক্ষত ইত্যর্থঃ| ঋতুসাত্ম্যং হি ঋতুমপেক্ষত ইতি ঋতুসাত্ম্যাপেক্ষঃ||২২(৬)||

Adhikarana 27 (22(7)) · Śloka 22

উপযোগসংস্থা তূপযোগনিযমঃ; স জীর্ণলক্ষণাপেক্ষঃ (৭)|২২|

এবমাহারোপযোগঃ কর্তব্য এবং ন কর্তব্য ইত্যুপযোগনিযমঃ, স জীর্ণলক্ষণাপেক্ষ ইতি প্রাধান্যেনোক্তঃ| তেনেহ ‘অজল্পন্নহসন্নাতিদ্রুতং নাতিবিলম্বিতম্’ ইত্যাদ্যুপযোগনিযমমপ্যপেক্ষত এব; অজীর্ণভোজনে তু মহাংস্ত্রিদোষকোপলক্ষণো দোষো ভবতীত্যযমেবোদাহৃতঃ||২২(৭)||

Adhikarana 28 (22) · Śloka 22

উপযোক্তা পুনর্যস্তমাহারমুপযুঙ্ক্তে, যদাযত্তমোকসাত্ম্যম্| ইত্যষ্টাবাহারবিধিবিশেষাযতনানি ব্যাখ্যাতানি ভবন্তি||২২||

যদাযত্তমোকসাত্ম্যমিতি ভোক্তৃপুরুষাপেক্ষং হ্যভ্যাসসাত্ম্যং ভবতি; কস্যচিদ্ধি কিঞ্চিদেবাভ্যাসাত্ পথ্যমপথ্যং বা সাত্ম্যং ভবতি||২২||

Adhikarana 29 (23) · Śloka 23

এষাং বিশেষাঃ শুভাশুভফলাঃ পরস্পরোপকারকা ভবন্তি; তান্ বুভুত্সেত, বুদ্ধ্বা চ হিতেপ্সুরেব স্যাত্; নচ মোহাত্ প্রমাদাদ্বা প্রিযমহিতমসুখোদর্কমুপসেব্যমাহারজাতমন্যদ্বা কিঞ্চিত্||২৩||

এষামিত্যাদৌ শুভফলা বিশেষা অশুভফলাশ্চ পরস্পরোপকারকা ভবন্তীতি জ্ঞেযম্| তত্র প্রকৃত্যা লাঘবাদিঃ শুভফলঃ, গুর্বাদিশ্চাশুভফলঃ| করণাদ্যাধেযোঽপি বিশেষঃ শাস্ত্রোক্তঃ শুভঃ, নিষিদ্ধস্ত্বশুভঃ| দেশাসাত্ম্যং নিন্দিতদেশভবত্বাদি চ দ্রব্যস্যাশুভফলম্| এবং কালাসাত্ম্যমশুভফলং চাজীর্ণভোজনাদি, তথা ওকাসাত্ম্যং চাশুভমশুভফলমিতি জ্ঞেযং; বিপরীতং তু শুভফলম্| মোহাদিতি অজ্ঞানাত্, প্রমাদাদিতি জ্ঞাত্বাঽপি রাগাদিত্যর্থঃ| প্রিযমিতি তদাত্বমাত্রপ্রিযম্| অহিতমিত্যস্য বিবরণম্- অসুখোদর্কমিতি|- অসুখং দুঃখরূপম্, উদর্ক উত্তরকালীনং ফলং, যস্য স তথা| অন্যদ্বেতি ভেষজবিহারাদি||২৩||

Adhikarana 30 (24) · Śloka 24

তত্রেদমাহারবিধিবিধানমরোগাণামাতুরাণাং চাপি কেষাঞ্চিত্ কালে প্রকৃত্যৈব হিততমং ভুঞ্জানানাং ভবতি- উষ্ণং, স্নিগ্ধং, মাত্রাবত্, জীর্ণে বীর্যাবিরুদ্ধম্, ইষ্টে দেশে, ইষ্টসর্বোপকরণং, নাতিদ্রুতং, নাতিবিলম্বিতম্, অজল্পন্, অহসন্, তন্মনা ভুঞ্জীত, আত্মানমভিসমীক্ষ্য সম্যক্||২৪||

তত্রেত্যাদৌ ইদমিতি বক্ষ্যমাণম্| আহারবিধির্বিধীযতে যেনোষ্ণস্নিগ্ধাদিনা বক্ষ্যমাণেন তদাহারবিধিবিধানম্| আতুরাণাং চ কেষাঞ্চিদিতি পদেন রক্তপিত্তিনাং শীতমেব, কফরোগিণাং রূক্ষমেব হিতমিত্যাদিবিপর্যযং দর্শযতি| কেষাঞ্চিদ্ভুঞ্জানানামিদমাহারবিধিবিধানং হিততমং ভবতীতি যোজনা| প্রকৃত্যৈবেতি স্বভাবেনৈব হিততমং হিততমমিত্যুক্তং; তেন যত্ প্রকৃত্যা হিতং তত্ কদাচিদেব কঞ্চিদেব পুরুষমাসাদ্যাহিতং ভবতি, তচ্চ কাদাচিত্কত্বাদনাদৃতং; তেন প্রাযিকত্বাদেনং হিততমং বক্ষ্যাম ইতি ভাবঃ| উষ্ণমিত্যাদৌ সম্যগিতি ছেদঃ|| ২৪||

Adhikarana 31 (25(1-2)) · Śloka 25

তস্য সাদ্গুণ্যমুপদেক্ষ্যামঃ- উষ্ণমশ্নীযাত্; উষ্ণং হি ভুজ্যমানং স্বদতে, ভুক্তং চাগ্নিমৌদর্যমুদীরযতি, ক্ষিপ্রং জরাং গচ্ছতি, বাতমনুলোমযতি, শ্লেষ্মাণং চ পরিহ্রাসসযতি ; তস্মাদুষ্ণমশ্নীযাত্ (১)|২৫| স্নিগ্ধমশ্নীযাত্; স্নিগ্ধং হি ভুজ্যমানং স্বদতে, ভুক্তং চানুদীর্ণমগ্নিমুদীরযতি , ক্ষিপ্রং জরাং গচ্ছতি, বাতমনুলোমযতি, শরীরমুপচিনোতি, দৃঢীকরোতীন্দ্রিযাণি, বলাভিবৃদ্ধিমুপজনযতি, বর্ণপ্রসাদং চাভিনির্বর্তযতি; তস্মাত্ স্নিগ্ধমশ্নীযাত্ (২)|২৫|

তস্যেতি উষ্ণাদিগুণযুক্তস্যান্নস্য| সাদ্গুণ্যমিতি প্রশস্তগুণযোগিতাম্| পরিহ্রাসযতীতি ভিন্নসঙ্ঘাতং করোতি||২৫(১-২)||

Adhikarana 32 (25(3)) · Śloka 25

মাত্রাবদশ্নীযাত্; মাত্রাবদ্ধি ভুক্তং বাতপিত্তকফানপীডযদাযুরেব বিবর্ধযতি কেবলং, সুখং গুদমনুপর্যেতি, ন চোষ্মাণমুপহন্তি, অব্যথং চ পরিপাকমেতি; তস্মান্মাত্রাবদশ্নীযাত্ (৩)|২৫|

মাত্রাবদিতি প্রশংসাযাং মতুপ্; তেন প্রশস্তমাত্রমিত্যর্থঃ| অপীডযদিতি অনতিমাত্রত্বেন স্বস্থানস্থিতং সদ্বাতাদীন্ স্থানাপীডনাদপ্রকোপযত্| গুদমনুপর্যেতীতি পরিণতং সদনুরূপতযা নিঃসরতীত্যর্থঃ| ঊষ্মাণং বহ্নিম্||২৫(৩)||

Adhikarana 33 (25(4)) · Śloka 25

জীর্ণেঽশ্নীযাত্; অজীর্ণে হি ভুঞ্জানস্যাভ্যবহৃতমাহারজাতং পূর্বস্যাহারস্য রসমপরিণতমুত্তরেণাহাররসেনোপসৃজত্ সর্বান্ দোষান্ প্রকোপযত্যাশু, জীর্ণে তু ভুঞ্জানস্য স্বস্থানস্থেষু দোষেষ্বগ্নৌ চোদীর্ণে জাতাযাং চ বুভুক্ষাযাং বিবৃতেষু চ স্রোতসাং মুখেষু বিশুদ্ধে চোদ্গারে হৃদযে বিশুদ্ধে বাতানুলোম্যে বিসৃষ্টেষু চ বাতমূত্রপুরীষবেগেষ্বভ্যবহৃতমাহারজাতং সর্বশরীরধাতূনপ্রদূষযদাযুরেবাভিবর্ধযতি কেবলং; তস্মাজ্জীর্ণেঽশ্নীযাত্ (৪)|২৫|

পূর্বস্যেতি দিনান্তরকৃতস্য| অপরিণতমিতি অসম্যগ্জাতম্| আহাররসেনেতি আহারপরিণামগতেন মধুরাদিনা; কিংবা আহারজেন রসেন| স্বস্থানস্থেষু দোষেষ্বিত্যাদি জীর্ণাহারস্য লক্ষণম্||২৫(৪)||

Adhikarana 34 (25(5)) · Śloka 25

বীর্যাবিরুদ্ধমশ্নীযাত্; অবিরুদ্ধবীর্যমশ্নন্ হি বিরুদ্ধবীর্যাহারজৈর্বিকারৈর্নোপসৃজ্যতে; তস্মাদ্বীর্যাবিরুদ্ধমশ্নীযাত্ (৫)|২৫|

বিরুদ্ধবীর্যাহারজৈরিতি কুষ্ঠান্ধ্যবিসর্পাদ্যৈরাত্রেযভদ্রকাপ্যীযোক্তৈঃ||২৫(৫)||

Adhikarana 35 (25(6)) · Śloka 25

ইষ্টে দেশে ইষ্টসর্বোপকরণং চাশ্নীযাত্; ইষ্টে হি দেশে ভুঞ্জানো নানিষ্টদেশজৈর্মনোবিঘাতকরৈর্ভাবৈর্মনোবিঘাতং প্রাপ্নোতি, তথৈবেষ্টৈঃ সর্বোপকরণৈঃ; তস্মাদিষ্টে দেশে তথেষ্টসর্বোপকরণং চাশ্নীযাত্ (৬)|২৫|

মনোবিঘাতকরৈর্ভাবৈরিতি ত্রিবিধকুক্ষীযে (বি.অ.২) বক্ষ্যমাণৈঃ কামাদিভিশ্চিত্তোপতাপকরৈশ্চিত্তবিকারৈরিত্যর্থঃ| তথেষ্টৈশ্চ সর্বোপকরণৈর্ভুঞ্জানো মনোবিঘাতং ন প্রাপ্নোতীতি যোজনা; অনিষ্টভোজনাদের্মনোবিঘাতো ভবতি||২৫(৬)||

Adhikarana 36 (25(7)) · Śloka 25

নাতিদ্রুতমশ্নীযাত্; অতিদ্রুতং হি ভুঞ্জানস্যোত্স্নেহনমবসাদনং ভোজনস্যাপ্রতিষ্ঠানং চ, ভোজ্যদোষসাদ্গণ্যোপলব্ধিশ্চ ন নিযতা; তস্মান্নাতিদ্রুতমশ্নীযাত্ (৭)|২৫|

উত্স্নেহনম্ উন্মার্গগমনম্| অবসদনম্ অবসাদঃ| অপ্রতিষ্ঠানং হৃদযস্থত্বেন কোষ্ঠাপ্রবেশঃ| ভোজ্যগতানাং দোষাণাং কেশাদীনাং, সাদ্গুণ্যস্য চ স্বাদুত্বাদেঃ, উপলব্ধির্ন নিযতা ভবতি কদাচিদুপলভ্যতে কদাচিন্নেতি| তত্র দোষানুপলব্ধ্যা সদোষস্যৈব ভক্ষণং, সাদ্গুণ্যানুপলব্ধ্যা চ প্রীত্যভাবঃ||২৫(৭)||

Adhikarana 37 (25(8)) · Śloka 25

নাতিবিলম্বিতমশ্নীযাত্; অতিবিলম্বিতং হি ভুঞ্জানো ন তৃপ্তিমধিগচ্ছতি, বহু ভুঙ্ক্তে, শীতীভবত্যাহারজাতং, বিষমং চ পচ্যতে; তস্মান্নাতিবিলম্বিতমশ্নীযাত্ (৮)|২৫|

বিষমং চ পচ্যত ইতি চিরকালভোজনেনাগ্নিসম্বন্ধস্য বৈষম্যাদিতি ভাবঃ||২৫(৮)||

Adhikarana 38 (25(9)) · Śloka 25

অজল্পন্নহসন্ তন্মনা ভুঞ্জীত; জল্পতো হসতোঽন্যমনসো বা ভুঞ্জানস্য ত এব হি দোষা ভবন্তি, য এবাতিদ্রুতমশ্নতঃ; তস্মাদজল্পন্নহসংস্তন্মনা ভুঞ্জীত (৯)|২৫|

য এবাতিদ্রুতমশ্নতো দোষা ইতি উত্স্নেহনাদযঃ||২৫(৯)||

Adhikarana 39 (25) · Śloka 25

আত্মানমভিসমীক্ষ্য ভুঞ্জীত সম্যক্; ইদং মমোপশেতে ইদং নোপশেত ইত্যেবং বিদিতং হ্যস্যাত্মন আত্মসাত্ম্যং ভবতি; তস্মাদাত্মানমভিসমীক্ষ্য ভুঞ্জীত সম্যগিতি||২৫||

নোপশেত ইতীত্যত্র ইতিশব্দেন সাত্ম্যাসাত্ম্যবিধানোপদর্শকেন বিচারফলমোকসাত্ম্যসেবনং দর্শযতি| আত্মন ইতি পদেনাত্মনৈবাত্মসাত্ম্যং প্রতিপুরুষং জ্ঞাযতে, ন শাস্ত্রোপদেশেনেতি দর্শযতি||২৫||

Adhikarana 40 (26) · Śloka 26

ভবতি চাত্র- রসান্ দ্রব্যাণি দোষাংশ্চ বিকারাংশ্চ প্রভাবতঃ| বেদ যো দেশকালৌ চ শরীরং চ স নো ভিষক্||২৬||

অধ্যাযোক্তরসপ্রভাবাদিজ্ঞানং স্তৌতি- রসানিত্যাদি| স নো ভিষগিতি নোঽস্মাকং সম্মত ইত্যর্থঃ||২৬||

Adhikarana 41 (27-28) · Śloka 28

তত্র শ্লোকৌ- বিমানার্থো রসদ্রব্যদোষরোগাঃ প্রভাবতঃ| দ্রব্যাণি নাতিসেব্যানি ত্রিবিধং সাত্ম্যমেব চ||২৭|| আহারাযতনান্যষ্টৌ ভোজ্যসাদ্গুণ্যমেব চ| বিমানে রসসঙ্খ্যাতে সর্বমেতত্ প্রকাশিতম্||২৮||

দোষবিকারৌ চ যদ্যপি ত্রিবিধকুক্ষীযে (বি.অ.২) প্রভাববিস্তারেণ বক্তব্যৌ, তথাঽপীহ সঙ্ক্ষেপেণোক্তাবেব; তেন দোষবিকারপ্রভাবাবপ্যুক্তাবিতি যদুচ্যতে সঙ্গ্রহে তত্ সাধু| তৈলাদিদ্রব্যত্রযকথনং চ দ্রব্যপ্রভাবগৃহীতমিতি কৃত্বা ন পৃথক্ সঙ্গ্রহে পঠিতম্||২৭-২৮||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে বিমানস্থানে রসবিমানং নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং বিমানস্থানে রসবিমানং নাম প্রথমোঽধ্যাযঃ||১||