6. agnimāndyājīrṇavisūcikālasakavilambikānidānam

Adhikarana vAtAdyAdhikyAjjaTharAnalasya caturvidhatvam (1) · Śloka 1

অথাগ্নিমান্দ্যাজীর্ণ-বিসূচিকালসক-বিলম্বিকানিদানম্ | মন্দস্তীক্ষ্ণোঽথ বিষমঃ সমশ্চেতি চতুর্বিধঃ | কফপিত্তানিলাধিক্যাত্তত্সাম্যাজ্জাঠরোঽনলঃ ||১||

অর্শঃকার্যত্বাদগ্নিমান্দ্যাদীনাং তান্যাহ– মন্দ ইত্যাদি| মন্দস্য দুর্জযত্বাত্ প্রাগভিধানম্| কফপিত্তানিলাধিক্যাদিতি যথাক্রমং মন্দাদিষু যোজ্যম্| তত্সাম্যাদিতি তেষাং কফাদীনাং সাম্যাত্| সমোঽবিকৃতঃ, ধাতুসাম্যহেতুরিত্যর্থঃ| এতস্যাবিকারস্যাপি বিকারপ্রস্তাবেঽভিধানং প্রকৃতিজ্ঞানানন্তরীযকং বিকৃতিজ্ঞানমিতি বোধনার্থম্| জাঠর ইতি ধাত্বগ্নিভূতাগ্নিব্যবচ্ছেদার্থম্||১||

Adhikarana viShamAdyagnibhedAnAM kAryaM, samAgni-mandAgni-viShamAgni-tIkShNAgnilakShaNAni ca (2-4) · Śloka 4

বিষমো বাতজান্ রোগান্ তীক্ষ্ণঃ পিত্তনিমিত্তজান্ | করোত্যগ্নিস্তথা মন্দো বিকারান্ কফসম্ভবান্ ||২|| সমা সমাগ্নেরশিতা মাত্রা সম্যগ্বিপচ্যতে | স্বল্পাঽপি নৈব মন্দাগ্নের্বিষমাগ্নেস্তু দেহিনঃ ||৩|| কদাচিত্ পচ্যতে সম্যক্কদাচিন্ন বিপচ্যতে | মাত্রাঽতিমাত্রাঽপ্যশিতা সুখং যস্য বিপচ্যতে | তীক্ষ্ণাগ্নিরিতি তং বিদ্যাত্ সমাগ্নিঃ শ্রেষ্ঠ উচ্যতে ||৪||

প্রতিলোমতন্ত্রযুক্ত্যা তেষাং রূপমাহ– বিষম ইত্যাদি| বাতজান্ রোগানিতি বাতনানাত্মজানামশীতেরন্যতমান্ সামান্যজাংশ্চ জ্বরাতীসারাদীন্, এবং পিত্তনানাত্মজানামোষচোষাদীনাং চত্বারিংশতোঽন্যতমান্, এবং কফনানাত্মজানাং বিংশতেরালস্যাদীনামন্যতমান্| এতে চ বিকারাশ্চরকে মহারোগাধ্যাযে (চ. সূ. অ. ২০) এব দ্রষ্টব্যাঃ| সমেত্যাদি| সমা উচিতা, মাত্রা আহারস্য, সম্যগ্যস্য বিপচ্যতে স সমাগ্নিঃ| তীক্ষ্ণাগ্নিরিতি তং বিদ্যাদিতি ছেদঃ| মাত্রাঽতিমাত্রেত্যুপলক্ষণং, তেনাজীর্ণগুরুভোজনাদিকমপি লক্ষণীযম্| যদুক্তমন্যত্র– “অতিমাত্রমজীর্ণেঽপি গুরু চান্নমথাশ্নতঃ| দিবাঽপি স্বপতো যস্য পচ্যতে সোঽগ্নিরুত্তমঃ||” ইতি| তীক্ষ্ণগ্রহণেন ভস্মকস্যাবরোধঃ, অত্যন্ততীক্ষ্ণাগ্নিরেব হি ‘ভস্মক’ ইত্যুচ্যতে| যদুক্তং চরকে– “নরে ক্ষীণকফে পিত্তং কুপিতং মারুতানুগম্| স্বোষ্মণা পাবকস্থানে বলমগ্নেঃ প্রযচ্ছতি|| তদা লব্ধবলো দেহং বিরুজেত্ সানিলোঽনলঃ| অভিভূয পচত্যন্নং তৈক্ষ্ণ্যাদাশু মুহুর্মুহুঃ|| পক্ত্বাঽন্নং ততো ধাতূন্ শোণিতাদীন্ পচত্যপি| ততো দৌর্বল্যমাতঙ্কান্ মৃত্যুং চোপনযেন্নরম্|| ভুক্তেঽন্নে লভতে শান্তিং জীর্ণমাত্রে প্রতাম্যতি| তৃট্কাসদাহমূর্ছাঃ স্যুর্ব্যাধযোঽত্যগ্নিসম্ভবাঃ||” (চ. চি. অ. ১৫) ইতি||২-৪||

Adhikarana ajIrNabhedAH (5-6) · Śloka 6

আমং বিদগ্ধং বিষ্টব্ধং কফপিত্তানিলৈস্ত্রিভিঃ | অজীর্ণং কেচিদিচ্ছন্তি চতুর্থং রসশেষতঃ ||৫|| (সু. সূ. অ. ৪৬) | অজীর্ণং পঞ্চমং কেচিন্নির্দোষং দিনপাকি চ | বদন্তি ষষ্ঠং চাজীর্ণং প্রাকৃতং প্রতিবাসরম্ ||৬||

অগ্নিমান্দ্যাজীর্ণযোঃ পরস্পরকারণত্বাদজীর্ণান্যাহ– আমমিত্যাদি| ত্রিভিরিতি কফাদিভিরেকৈকশো যথাসঙ্খ্যেন| রসশেষত ইতি রসায শেষো রসশেষঃ, প্রকৃতিবিকৃতিভাবে চতুর্থী; যথা– যূপায দারু যূপদারু; অথবা “রসশব্দেন রসবানাহারোঽভিপ্রেতো লক্ষণযা, তেন রসশব্দেন রসবানাহারোঽভিধীযতে, তস্য শেষোঽপরিণতিলক্ষণো রসশেষ” ইতি জেজ্জটঃ| ননু, যদ্যেবং তদা আমবিদগ্ধবিষ্টব্ধানামন্যতমরূপস্যাবশ্যম্ভাবিত্বান্ন তেভ্যো ভেদঃ; কিঞ্চ তল্লিঙ্গৈরম্লোদ্গারাদিভির্ভবিতব্যং, তথাচ সত্যুদ্গারশুদ্ধৌ রসশেষাজীর্ণলক্ষণস্যানুদযপ্রসঙ্গঃ? উক্তং হি সুশ্রুতে– “উদ্গারশুদ্ধাবপি ভক্তকাঙ্ক্ষা ন জাযতে হৃদ্গুরুতা চ যস্য| রসাবশেষেণ তু সপ্রসেকং চতুর্থমেতত্ প্রবদন্ত্যজীর্ণম্||” ইতি (সু. সূ. অ. ৪৬)| আরোগ্যমঞ্জর্যাং নাগার্জুনোঽপ্যাহ– “উদ্গারেঽপি বিশুদ্ধতামুপগতে কাঙ্ক্ষা ন ভক্তাদিষু স্নিগ্ধত্বং বদনস্য সন্ধিষু রুজা কৃত্বা শিরোগৌরবম্| মন্দাজীর্ণরসে তু লক্ষণমিদং, তত্রাতিবৃদ্ধে পুনর্হৃল্লাসজ্বরমূর্ছনাদি চ ভবেত্ সর্বামযক্ষোভণম্||” ইতি| নৈবম্, অবশ্যম্ভাবিবিদগ্ধাদিরূপস্যাপ্যাহারশেষস্যাত্যল্পত্বেন ন তদনুরঞ্জিতোদ্গারোদযপ্রসঙ্গঃ, অকালবুভুক্ষাযামিব| যদাহ সুশ্রুতঃ– “স্বল্পং যদা দোষবিবদ্ধমামং লীনং ন তেজঃপথমাবৃণোতি| ভবত্যজীর্ণেঽপি তদা বুভুক্ষা সা মন্দবুদ্ধিং বিষবন্নিহন্তি||” (সু. সূ. অ. ৪৬) ইতি| তন্ত্রান্তরেঽপ্যাহারাপাকজং রসশেষলক্ষণমুক্তম্– “আমং বিদগ্ধং বিষ্টব্ধং রসশেষমথাপি চ| চতুর্বিধমজীর্ণং স্যাদাহারাপরিপাকতঃ||” ইতি| গদাধরস্ত্বাহ– “রসে শেষো রসশেষঃ, আহারজনিতে রসে শেষ আহারাবযবোঽনুপ্রবিষ্টোঽলক্ষ্যমাণঃ ক্ষীরে নীরমিব রসশেষঃ|” ইতি| ননু, আমাজীর্ণাদিভ্যো রসশেষস্য কো ভেদঃ? উচ্যতে– আমাদিত্রযমন্নজং, রসশেষস্ত্বাহাররসজঃ; বাতিকাদিব্যপদেশশ্চাত্র ন কৃতঃ, অল্পত্বাদ্বাতাদিলিঙ্গানাং; হেতুলক্ষণচিকিত্সাভেদাচ্চাস্য ভেদ ইতি| অজীর্ণমিতি তদ্বিরোধে নঞ্, জীর্ণং পক্বং, তদ্বিরুদ্ধমজীর্ণম্; যথা– অসিতম্| সর্বমজীর্ণং ত্রিদোষজম্, একদোষব্যপদেশস্তূত্কটৈকদোষলিঙ্গত্বেনোক্ত ইতি ব্যাখ্যানযন্তি; যতস্ত্রৈদোষিকমেবাজীর্ণকারণমুক্তম্– “অত্যম্বুপানাত্” ইত্যাদি| অজীর্ণাদপি দোষত্রযকোপো ভবতি| যদুক্তং সুশ্রুতে– “অজীর্ণাত্ পবনাদীনাং বিভ্রমো বলবান্ ভবেত্|” (সু. সূ. অ. ৪৬) ইতি| অজীর্ণং পঞ্চমং কেচিদিত্যাদি| নির্দোষম্ আধ্মানাদিদুষ্টেরকারকম্| দিনপাকি চেত্যহোরাত্রেণাহারঃ পচ্যতে ইত্যুত্সর্গঃ, যত্র তু মাত্রাকালাসাত্ম্যাদিদোষাদপরদিনে পচ্যতে তদ্দিনপাকি| কালব্যতিক্রমেণ পচ্যমানমপ্যাধ্মানাদিকং ন করোতীতি পূর্বেভ্যো ভেদঃ| এতদভিধানস্য তু প্রযোজনং পাককালপ্রতীক্ষণং, নৈশাজীর্ণে ভোজননিষেধাত্| প্রাকৃতং প্রতিবাসরমিতি প্রাকৃতমবৈকারিকং, প্রতিবাসরং প্রতিদিনং ক্রিযমাণম্| অযমভিসন্ধিঃ– অদ্যৈব ভুক্তমন্নং কিং জীর্ণমজীর্ণং বা? ন তাবজ্জীর্ণং, ক্ষুত্পিপাসামলোত্সর্গাদের্জীর্ণলক্ষণস্যানুদযাত্; তস্মাদজীর্ণং, তচ্চাধ্মানাদিকং ন করোতীতি পূর্বেভ্যো ভিন্নম্| তস্য চাভিধানপ্রযোজনম্– পাকার্থং বামপার্শ্বশযনাদ্যাচারসেবা| উক্তং হি সুশ্রুতে– “ভুক্ত্বা পাদশতং গত্বা বামপার্শ্বেন সংবিশেত্| শব্দরূপরসস্পর্শগন্ধাংশ্চ মনসঃ প্রিযান্|| ভুক্তবানুপসেবেত তেনান্নং সাধু তিষ্ঠতি||” (সু. সূ. অ. ৪৬) ইতি| ন চাত্রাহারস্য নিষেধঃ, তস্য শাস্ত্রেণ বিহিতত্বাত্| চরকে তু– “তস্য লিঙ্গমজীর্ণস্য” ইত্যাদিনা “ঘোরমলবিষং চ ” ইত্যন্তেনান্নবিষাখ্যমজীর্ণং” পঠিতং, তচ্চ পিত্তাদিসংসৃষ্টরসশেষাজীর্ণমেবেতি ব্যাচক্ষতে; তেন রসশেষ এব তস্যান্তর্ভাব ইতি পৃথক্ পঠিতম্||৫-৬||

Adhikarana ajIrNanidAnam (7-9) · Śloka 9

অত্যম্বুপানাদ্বিষমাশনাচ্চ সন্ধারণাত্ স্বপ্নবিপর্যযাচ্চ | কালেঽপি সাত্ম্যং লঘু চাপি ভুক্তমন্নং ন পাকং ভজতে নরস্য ||৭|| ঈর্ষ্যাভযক্রোধপরিপ্লুতেন লুব্ধেন রুগ্দৈন্যনিপীডিতেন | প্রদ্বেষযুক্তেন চ সেব্যমানমন্নং ন সম্যক্পরিপাকমেতি ||৮|| (সু. সূ. অ. ৪৬) | মাত্রযাঽপ্যভ্যবহৃতং পথ্যং চান্নং ন জীর্যতি | চিন্তাশোকভযক্রোধদুঃখশয্যাপ্রজাগরৈঃ ||৯|| (চ. বি. অ. ২) |

অজীর্ণকারণমাহ– অত্যম্বুপানাদিত্যাদি| সন্ধারণাদিতি বেগানাম্ স্বপ্নবিপর্যযাত্ দিবাস্বপ্নাদেঃ| লঘু চাপীতি ‘অপি’ শব্দেন স্নিগ্ধোষ্ণাদিগুণযুক্তমপি বোধ্যম্| কেচিত্ ‘ঈর্ষ্যাভযক্রোধপরিপ্লুতেন’ ইত্যাদিশ্লোকং পঠন্তি; স চ মানসদোষাজীর্ণবিষযো বোদ্ধব্য ইতি||৭-৯||

Adhikarana AmAjIrNa-vidagdhAjIrNa-viShTabdhAjIrNa-rasasheShAjIrNalakShaNAni (10-12) · Śloka 13

তত্রামে গুরুতোত্ক্লেদঃ শোথো গণ্ডাক্ষিকূটগঃ | উদ্গারশ্চ যথাভুক্তমবিদগ্ধঃ প্রবর্ততে ||১০|| বিদগ্ধে ভ্রমতৃণ্মূর্ছাঃ পিত্তাচ্চ বিবিধা রুজঃ | উদ্গারশ্চ সধূমাম্লঃ স্বেদো দাহশ্চ জাযতে ||১১|| বিষ্টব্ধে শূলমাধ্মানং বিবিধা বাতবেদনাঃ | মলবাতাপ্রবৃত্তিশ্চ স্তম্ভো মোহাঽঙ্গপীডনম্ ||১২|| রসশেষেঽন্নবিদ্বেষো হৃদযাশুদ্ধিগৌরবে |১৩|

উদ্দিষ্টানামামাজীর্ণাদীনাং লক্ষণমাহ– তত্রেত্যাদি| তত্রেতি তেষু মধ্যে| গণ্ডঃ কপোলঃ অক্ষিকূটঃ চক্ষুর্গোলকঃ, তদ্গতঃ শোথো ভবতি প্রভাবাত্| উদ্গারশ্চ যথাভুক্তমিতি মধুরাদিরূপঃ| অবিদগ্ধোঽনম্লঃ, দ্বিতীযপাকে হ্যাহারস্যাম্লতা দর্শিতা| বিদগ্ধ ইত্যাদি| বিবিধা বাতবেদনা তোদভেদাদিরূপা| অঙ্গপীডনং সামবাতবেদনাদি| পিত্তাচ্চ বিবিধা রুজ ইতি ওষচোষাদযঃ| সধূমাম্ল ইতি ধূমোদ্গারোঽম্লোদ্গারশ্চ||১০-১২||

Adhikarana ajIrNopadravAH (13) · Śloka 13

মূর্ছা প্রলাপো বমথুঃ প্রসেকঃ সদনং ভ্রমঃ | উপদ্রবা ভবন্ত্যেতে মরণং চাপ্যজীর্ণতঃ ||১৩|| (সু. সূ. অ. ৪৬) |

উপদ্রবানাহ– মূর্ছেত্যাদি| অতিপ্রবৃদ্ধাজীর্ণে তু মরণমপি||১৩||

Adhikarana ajIrNakAraNeShvatimAtrabhojanasya visheShakAraNatvam (14) · Śloka 14

অনাত্মবন্তঃ পশুবদ্ভুঞ্জতে যেঽপ্রমাণতঃ | রোগানীকস্য তে মূলমজীর্ণং প্রাপ্নুবন্তি হি ||১৪||

উক্তাজীর্ণকারণেভ্যোঽতিমাত্রভোজনস্য বিশেষকারণত্বমাহ– অনাত্মবন্ত ইত্যাদি| অনাত্মবন্তো দুষ্টমনোযুক্তাঃ, লোলুপত্বেন তদাত্বসুখাকাঙ্ক্ষিণ ইতি| অত এবোক্তম্– পশুবদিতি| রোগানীকস্য রোগসমূহস্য বিসূচ্যাদেঃ, মূলং কারণম্||১৪||

Adhikarana ajIrNebhyo visUcyAdisambhavaH (15) · Śloka 15

অজীর্ণমামং বিষ্টব্ধং বিদগ্ধং চ যদীরিতম্ | বিসূচ্যলসকৌ তস্মাদ্ভবেচ্চাপি বিলম্বিকা ||১৫|| (সু. উ. তং. অ. ৫৬) |

অজীর্ণসম্ভবত্বাদ্বিসূচ্যাদীনামজীর্ণানন্তরং বিসূচ্যাদীনাহ– অজীর্ণমিত্যাদি| “আমবিষ্টব্ধবিদগ্ধেষু ত্রিষু বিসূচ্যলসকবিলম্বিকা যথাসঙ্খ্যং ভবন্তি” ইতি কার্তিককুণ্ডঃ| ‘তন্ন’ ইতি বকুলকরঃ| যথাসঙ্খ্যে হি বিলম্বিকা বিদগ্ধাত্ প্রাপ্নোতি, তাং চ কফবাতাভ্যাং পঠিষ্যতি, তস্মাত্ত্রিবিধাজীর্ণাদ্যথাসম্ভবং বিসূচ্যাদীনামুত্পাদ ইতি যুক্তম্| উক্তংহি– “অজীর্ণাত্ পবনাদীনাং বিভ্রমো বলবান্ ভবেত্” ইতি||১৫||

Adhikarana visUcikAnirukti (16-17) · Śloka 17

সূচীভিরিব গাত্রাণি তুদন্ সন্তিষ্ঠতেঽনিলঃ | যস্যাজীর্ণেন সা বৈদ্যৈর্বিসূচীতি নিগদ্যতে ||১৬|| ন তাং পরিমিতাহারা লভন্তে বিদিতাগমাঃ | মূঢাস্তামজিতাত্মানো লভন্তেঽশনলোলুপাঃ ||১৭|| (সু. উ. তং. অ. ৫৬) |

বিসূচ্যা নিরুক্তিমাহ– সূচীভিরিত্যাদি| ‘বাহুল্যাদ্বাযুঃ সূচীভিরিব তুদন্’ ইতি বিসূচীনিরুক্তিঃ| পাণ্ডুরোগবত্ সূচীভিরিব তোদনং বিহাযান্যেঽপি বেদনাভেদা বিবিধা ভবন্ত্যেব| যদুক্তং তন্ত্রান্তরে– “বিবিধৈর্বেদনাভেদৈর্বায্বাদের্ভৃশকোপতঃ| সূচীভিরিব গাত্রাণি ভিনত্তীতি বিসূচিকা||” ইতি বিদিতাগমা বিদিতাযুর্বেদাঃ| মূঢাস্তজ্জ্ঞানানভিজ্ঞাঃ| অজিতাত্মানঃ অজিতেন্দ্রিযাঃ অশনলোলুপাঃ পশুবদপ্রমাণভোজিনঃ||১৬-১৭||

Adhikarana visUcikAlakShaNam (18) · Śloka 18

মূর্ছাঽতিসারো বমথুঃ পিপাসা শূলং ভ্রমোদ্বেষ্টনজৃম্ভদাহাঃ | বৈবর্ণ্যকম্পৌ হৃদযে রুজশ্চ ভবন্তি তস্যাং শিরসশ্চ ভেদঃ ||১৮|| (সু. উ. তং. অ. ৫৬) |

বিসূচী লক্ষণমাহ– মূর্ছেত্যাদি| বমথুঃ বান্তিঃ| শিরসশ্চ ভেদঃ শিরঃশূলম্| অত্র চ বমনাতীসারৌ মিলিতৌ লক্ষণমিতি সৌশ্রুতাঃ সুশ্রুতে– ত্বধোগাযা আমাতীসারেণ গ্রহণম্, ঊর্ধ্বগাযাশ্ছর্দ্যা চ| (চরকে তু পঠ্যতে– “ঊর্ধ্বং চাধশ্চ প্রবৃত্তামদোষাং যথোক্তরূপাং বিসূচীং বিদ্যাত্||” (চ. বি. অ. ২) ইতি| অত ঊর্ধ্বগা বিসূচী ভবতি, তথাঽধোগাঽপি, চরকে আমাতীসারস্যাপঠিতত্বাত্; চকারাদুভযমার্গগাঽপীতি চেতি ব্যাচক্ষতে, ঊর্ধ্বগাযাশ্চ অপক্বাহারবমনেন ত্রিদোষচ্ছর্দিভ্যো ভেদ ইতি মন্তব্যম্||১৮||

Adhikarana alasakalakShaNam (19-20) · Śloka 20

কুক্ষিরানহ্যতেঽত্যর্থং প্রতাম্যেত্ পরিকূজতি | নিরুদ্ধো মারুতশ্চৈব কুক্ষাবুপরি ধাবতি ||১৯|| বাতবর্চোনিরোধশ্চ যস্যাত্যর্থং ভবেদপি | তস্যালসকমাচষ্টে তৃষ্ণোদ্গারৌ চ যস্য তু ||২০|| (সু. উ. তং. অ. ৫৬) |

অলসকমাহ– কুক্ষিরিত্যাদি| আনহ্যতে আধ্মাযতে, মলবিষ্টম্ভস্য বক্ষ্যমাণত্বাত্| প্রতাম্যেত্ মুহ্যতি পুরুষঃ পরিকূজতি আর্তনাদং করোতি| নিরুদ্ধ ইত্যজীর্ণেনাধঃ প্রতিরুদ্ধগতিঃ কুক্ষৌ বা, তেনোপরি ধাবতি ঊর্ধ্বং হৃদযকণ্ঠাদিকং গচ্ছতি| ‘অলসক’ ইতি দোষস্থিরত্বনিমিত্তা সঞ্জ্ঞা| যদুক্তং তন্ত্রান্তরে– “প্রযাতি নোর্ধ্বং নাধস্তাদাহারো ন বিপচ্যতে| আমাশযেঽলসীভূতস্তেন সোঽলসকঃ স্মৃতঃ||” ইতি||১৯-২০||

Adhikarana vilambikAlakShaNam (21) · Śloka 21

দুষ্টং তু ভুক্তং কফমারুতাভ্যাং প্রবর্ততে নোর্ধ্বমধশ্চ যস্য | বিলম্বিকাং তাং ভৃশদুশ্চিকিত্স্যামাচক্ষতে শাস্ত্রবিদঃ পুরাণাঃ ||২১|| (সু. উ. তং. অ. ৫৬) |

বিলম্বিকামাহ– দুষ্টমিত্যাদি| ভুক্তমন্নং কফমারুতাভ্যাং দুষ্টমিতি সম্বন্ধঃ| ভৃশং দুশ্চিকিত্স্যাম্ অত্যর্থং দুশ্চিকিত্স্যাং, প্রত্যাখ্যেযাং বর্জনীযামিত্যর্থঃ| ননু, অলসকবিলম্বিকযোরুভযোরপি বাতকফপ্রবলযোরূর্ধ্বাধোঽপ্রবর্তনশীলযোস্তুল্যত্বাত্ কো ভেদঃ? উচ্যতে অলসকে তীব্রাঃ শূলাদযো ভবন্তি, যদুক্তম্– “পীডিতং মারুতেনান্নং শ্লেষ্মণা রুদ্ধমন্তরা| অলসং ক্ষোভিতং দোষৈঃ শল্যত্বেনৈব সংস্থিতম্|| শূলাদীন্ কুরুতে তীব্রাংশ্ছর্দ্যতীসারবর্জিতান্||” ইতি||২১||

Adhikarana ajIrNajanyasyAmasya kAryAntaram (22) · Śloka 22

যত্রস্থমামং বিরুজেত্তমেব দেশং বিশেষেণ বিকারজাতৈঃ | দোষেণ যেনাবততং শরীরং তল্লক্ষণৈরামসমুদ্ভবৈশ্চ ||২২|| (সু. উ. তং. অ. ৫৬) |

অজীর্ণজাতান্ বিসূচ্যাদীনভিধাযাজীর্ণজন্যস্যামস্য কার্যান্তরমাহ– যত্রস্থমিত্যাদি| আমং কর্তৃ, যত্রস্থং তমেব দেশং বিশেষেণ রুজেত্; এতেনান্যদেশেঽপি কিঞ্চিদ্রুজং করোতীতি বোধযতি| যত্রেতিসর্বনামশব্দেন কুপিতবাতাদীনামিবানিযতমেব স্থানমামস্যেতি দর্শিতম্| কৈ রুজেদিত্যাহ– বিকারজাতৈর্বিকারসমূহৈঃ| কিম্ভূতৈরিত্যাহ– দোষেণ যেন স্বকারণকুপিতেন বাতাদিনাঽবততং ব্যাপ্তং শরীরং, তল্লক্ষণৈঃ তল্লিঙ্গৈস্তোদদাহগৌরবাদিভিঃ, ন কেবলং তৈরামসমুদ্ভবৈশ্চ বিকারজাতৈরপাকালসকাদিভিরপি| অনেনৈব শ্লোকেন তন্ত্রান্তরোক্তমামবাতাখ্যং রোগং গৃহীতবান্ সুশ্রুতঃ, তস্য লক্ষণস্য সমানত্বাদিত্যাহুঃ||২২||

Adhikarana visUcyalasakayorasAdhyalakShaNam (23) · Śloka 23

যঃ শ্যাবদন্তৌষ্ঠনখোঽল্পসঞ্জ্ঞো বম্যর্দিতোঽভ্যন্তরযাতনেত্রঃ | ক্ষামস্বরঃ সর্ববিমুক্তসন্ধির্যাযান্নরঃ সোঽপুনরাগমায ||২৩|| (সু. উ. তং. অ. ৫৬) |

বিসূচ্যলসকযোরসাধ্যত্বলক্ষণমাহ– য ইত্যাদি| “বিলম্বিকাযাস্তু স্বরূপেণৈবাসাধ্যত্বম্” ইতি জেজ্জটঃ| অল্পসঞ্জ্ঞো মোহযুক্তঃ| অভ্যন্তরযাতনেত্রঃ কোটরান্তঃপ্রবিষ্টাক্ষিগোলকঃ| সর্ববিমুক্তসন্ধিঃ শ্লথীভূতসর্বপর্বাস্থিসন্ধিঃ| অপুনরাগমায মরণায||২৩||

Adhikarana jIrNAhAralakShaNaM, visUcikAyA upadravAH, sAmAnyAjIrNalakShaNaM ca (24-27) · Śloka 27

উদ্গারশুদ্ধিরুত্সাহো বেগোত্সর্গো যথোচিতঃ | লঘুতা ক্ষুত্পিপাসা চ জীর্ণাহারস্য লক্ষণম্ ||২৪|| নিদ্রানাশোঽরতিঃ কম্পো মূত্রাঘাতো বিসঞ্জ্ঞতা | অমী হ্যুপদ্রবা ঘোরা বিসূচ্যাং পঞ্চ দারুণাঃ ||২৫|| প্রাযেণাহারবৈষম্যাদজীর্ণং জাযতে নৃণাম্ | তন্মূলো রোগসঙ্ঘাতস্তদ্বিনাশাদ্বিনশ্যতি ||২৬|| গ্লানিগৌরববিষ্টম্ভভ্রমমারুতমূঢতাঃ | বিবন্ধো বা প্রবৃত্তির্বা সামান্যাজীর্ণলক্ষণম্ ||২৭||

অজীর্ণপ্রতিযোগিতযা জীর্ণাহারলক্ষণমাহ– উদ্গারেত্যাদি| উদ্গারশুদ্ধির্ধূমাম্লাদিরহিতত্বম্| উত্সাহঃ শরীরমনসোর্বলম্| উত্সর্গো মলমূত্রপ্রবৃত্তিঃ, বেগসহিত উত্সর্গো বেগোত্সর্গঃ| যথোচিত উপযুক্তাহারানুরূপঃ| লঘুতা দেহস্য, বিশেষেণ কোষ্ঠস্যেতি||২৪-২৭||

Adhikarana puShpikA · Śloka 6

ইতি শ্রীমাধবকরবিরচিতে মাধবনিদানেঽগ্নিমান্দ্যাজীর্ণবিসূচিকালসকবিলম্বিকানিদানং সমাপ্তম্ ||৬||

ইতি শ্রীবিজযরক্ষিতকৃতাযাং মধুকোশব্যাখ্যাযামগ্নিমান্দ্যাজীর্ণবিসূচিকালসকবিলম্বিকানিদানং সমাপ্তম্||৬||