5. arśōnidānam

Adhikarana arshasAM ShaDbhedAH (1) · Śloka 1

অথার্শোনিদানম্ | পৃথগ্দোষৈঃ সমস্তৈশ্চ শোণিতাত্ সহজানি চ | অর্শাংসি ষট্প্রকারাণি বিদ্যাদ্গুদবলিত্রযে ||১||

অতীসারগ্রহণ্যর্শসাং পরস্পরানুবন্ধিত্বাদতীসারগ্রহণ্যনন্তরমর্শ উচ্যতে– পৃথগিত্যাদি| ‘অরিবত্ প্রাণান্ শৃণাতি হিনস্তীত্যর্শঃ’ ইতি পৃষোদরাদিপাঠান্নিরুক্তিমাহুঃ| সহজানীতি সহ শরীরেণ জাতানি, গুদবল্যারম্ভকবীজভাগস্য দোষদূষিতত্বাত্| অত্র দ্বন্দ্বজানি প্রকৃতিসমসমবাযারব্ধত্বান্ন পৃথগ্গণিতানি| উক্তং হি সুশ্রুতে– “অর্শঃসু দৃশ্যতে রূপং যদা বৈ দোষযোর্দ্বযোঃ| সংসর্গং তং বিজানীযাত্ সংসর্গঃ ষড্বিধশ্চ সঃ||” (সু. নি. অ. ২) ইতি| ষড্বিধত্বং চাত্র সংসর্গস্য বাতাদিভির্যুগ্মৈস্ত্রযঃ সংসর্গাঃ, তৈরেব রক্তযোগাদপরে ত্রয ইতি| সন্নিপাতজং ত্বেকৈকদোষজেষ্বদৃষ্টস্যাসাধ্যত্বস্য যোগাদ্বিকৃতিবিষমসমবাযারব্ধমিতি সঙ্খ্যযা পৃথগ্গণিতম্| গুদবলিত্রয ইতি অর্ধপঞ্চাঙ্গুলমানং গুদং, তস্যাবযবভূতাস্তিস্রো বলয উপর্যুপরি ব্যবস্থিতাঃ শঙ্খাবর্তনিভাঃ প্রবাহণীবিসর্জনীসংবরণীনামিকাঃ; তত্র গুদৌষ্ঠমর্ধাঙ্গুলং, তদূর্ধ্বমঙ্গুলমানা প্রথমাবলী সুশ্রুতেন (সু. নি. অ. ২) নির্দিষ্টা; ভোজেঽপ্যুক্তম্– “রোমান্তেভ্যো যবাধ্যর্ধং গুদৌষ্ঠং পরিচক্ষতে| গুদৌষ্ঠাদঙ্গুলং চৈকং প্রথমাং তাং বলীং বিদুঃ|| সার্ধৈকাঙ্গুলমানেন তদন্যেঽপি প্রকীর্তিতে||” ইতি সার্ধাঙ্গুলমানা দ্বিতীযা তৃতীযা চেতি||১||

Adhikarana samprAptipUrvakamarshaHsvarUpam (2) · Śloka 2

দোষাস্ত্বঙ্মাংসমেদাংসি সন্দূষ্য বিবিধাকৃতীন্ | মাংসাঙ্কুরানপানাদৌ কুর্বন্ত্যর্শাংসি তান্ জগুঃ ||২|| (বা. নি. অ. ৭) |

সম্প্রাপ্তিপূর্বকমর্শঃস্বরূপমাহ– দোষা ইত্যাদি| ত্বঙ্মাংসগ্রহণেন ত্বঙ্মাংসাশ্রিতং রক্তমপি গৃহ্যতে, চিকিত্সাযাং রক্তস্রাবণোপদেশাত্| অপানং গুদম্, আদিশব্দেন নাসিকাদীনাং গ্রহণম্| কাযচিকিত্সকাস্তু গুদজস্যৈবার্শস্ত্বমিচ্ছন্তি, নাসাদিজানাং ত্বধিমাংসত্বং, তেষু “পঞ্চাত্মা মারুতঃ” ইত্যাদিসম্প্রাপ্তেরভাবাত্, বিষ্টম্ভ ইত্যাদিপূর্বরূপস্য চাসম্ভবাত্; যদাহ চরকঃ– ‘শিশ্ন’ ইত্যারভ্য যাবত্ “অধিমাংসব্যপদেশ এব” (চ. চি. অ. ১৪) ইতি| সুশ্রুতেন তু মাংসাঙ্কুরত্বসাধর্ম্যাত্ শস্ত্রক্ষারাগ্নিসাধ্যত্বাচ্চ তেষ্বর্শঃশব্দপ্রযোগঃ কৃতঃ, সার্ষপাদিস্নেহে তৈলব্যপদেশবত্; সুশ্রুতার্থবাদিনো বাগ্ভটস্যাপ্যযমেবাভিপ্রায ইতি||২||

Adhikarana vAtArshonidAnam (3-4) · Śloka 4

কষাযকটুতিক্তানি রূক্ষশীতলঘূনি চ | প্রমিতাল্পাশনং তীক্ষ্ণং মদ্যং মৈথুনসেবনম্ ||৩|| লঙ্ঘনং দেশকালৌ চ শীতৌ ব্যাযামকর্ম চ | শোকো বাতাতপস্পর্শো হেতুর্বাতার্শসাং মতঃ ||৪|| (চ. চি. অ. ১৪) |

বাতার্শসো নিদানমাহ– কষাযেত্যাদি| প্রমিতম্ অল্পতমম্, অল্পং মাত্রাহীনমশনং, জেজ্জটস্ত্বাহ– ‘প্রমিতমতীতকালভোজনম্’| ‘প্রমৃত’ ইতি পাঠে তু নষ্টশক্তিকং ধান্যাদিকমাহুঃ| ‘প্রমিতাশনমেকরসাভ্যাসঃ’ ইত্যন্যে| তন্নাতিযুক্তম্; একরসাভ্যাসঃ কিং বাতপ্রকোপকস্য কট্বাদেঃ, কফপ্রকোপকস্য মধুরাদের্বা? নাদ্যঃ, কট্বাদেরত্রৈবোপাত্তত্বাত্; দ্বিতীযে মধুরাদীনাং ত্বভ্যাসো বাতশামক এব, একরসাভ্যাসাচ্চ দৌর্বল্যমুক্তং নতু বাতবৃদ্ধিরিতি চিন্ত্যমেতত্| তীক্ষ্ণমিতি মদ্যবিশেষণং, পৈষ্টিকাদিমৃদুমদ্যস্য বাতপ্রশমকত্বাত্| শীতো দেশ আনূপঃ, কালো হেমন্তাদিঃ| আতপস্য উষ্ণম্, আতপস্যোষ্ণগুণস্যাপ্যুদ্ভূতরৌক্ষ্যাদ্বাতপ্রকোপকত্বমিতি||৩-৪||

Adhikarana pittArshonidAnam (5-6) · Śloka 6

কট্বম্ললবণোষ্ণানি ব্যাযামাগ্ন্যাতপপ্রভাঃ | দেশকালাবশিশিরৌ ক্রোধো মদ্যমসূযনম্ ||৫|| বিদাহি তীক্ষ্ণমুষ্ণং চ সর্বং পানান্নভেষজম্ | পিত্তোল্বণানাং বিজ্ঞেযঃ প্রকোপে হেতুরর্শসাম্ ||৬|| (চ. চি. অ. ১৪) |

পিত্তার্শোনিদানমাহ– কট্বম্লেত্যাদি| দেশকালাবশিশিরাবিতি উষ্ণো দেশো মরুঃ, উষ্ণঃ কালঃ শরদ্ গ্রীষ্মশ্চ| অসূযনং পরসম্পত্তৌ দ্বেষঃ, স ক্রোধবিশেষ এব| পিত্তোল্বণানামিত্যনেন সর্বেষামর্শসাং ত্রিদোষজত্বম্, অধিকেন তু ব্যপদেশ ইতি দর্শিতং চরকেণ| যদাহ স এব– “অর্শাংসি নাম জাযন্তে নাঽসন্নিপতিতৈস্ত্রিভিঃ| দোষৈর্দোষবিশেষাত্তু বিশেষঃ কথ্যতেঽর্শসাম্||” (চ. চি. অ. ১৪) ইতি||৫-৬||

Adhikarana shleShmArshonidAnam (7-8) · Śloka 8

মধুরস্নিগ্ধশীতানি লবণাম্লগুরূণি চ | অব্যাযামো দিবাস্বপ্নঃ শয্যাসনসুখে রতিঃ ||৭|| প্রাগ্বাতসেবা শীতৌ চ দেশকালাবচিন্তনম্ | শ্লৈষ্মিকাণাং সমুদ্দিষ্টমেতত্ কারণমর্শসাম্ ||৮|| (চ. চি. অ. ১৪) |

শ্লেষ্মার্শোনিদানমাহ– মধুরেত্যাদি| শয্যাসনসুখে রতিরিতি সুখশয্যাসনে রতিরাসক্তিঃ| প্রাগ্বাতসেবা পুরোবাতসেবনম্| অচিন্তনং নিশ্চিন্ততা||৭-৮||

Adhikarana dvandvajArshonidAnam (9) · Śloka 9

হেতুলক্ষণসংসর্গাদ্বিদ্যাদ্দ্বন্দ্বোল্বণানি চ |৯|

দ্বন্দ্বজার্শোনিদানাদিকমাহ– হেত্বিত্যাদি| হেতুলক্ষণসংসর্গাদিতি দোষদ্বযস্য নিদানমেলকেন লক্ষণমেলকেন চ দ্বন্দ্বোল্বণানি দ্বন্দ্বজানি বিদ্যাত্|৯|–

Adhikarana tridoShajArshonidAnam (9) · Śloka 9

সর্বো হেতুস্ত্রিদোষাণাং সহজৈর্লক্ষণং সমম্ ||৯|| (চ. চি. অ. ১৪) |

ত্রিদোষজার্শোনিদানমাহ– সর্ব ইত্যাদি| সর্বো হেতুরিতি একৈকশো বাতাদ্যর্শসাং যো হেতুরুক্তঃ স ত্রিদোষজানাং ভবতি, ত্রযো দোষা জনকত্বেনৈষাং সন্তীতি ত্রিদোষজানি| সহজৈর্লক্ষণং সমমিতি তেষাং লক্ষণং সহজৈরর্শোভিঃ সহ সমং সদৃশং, সহজানাং যল্লক্ষণং তত্ত্রিদোষজানামিত্যর্থঃ| ‘সহজৈর্লক্ষণৈঃ সমম্’ ইতি পাঠান্তরে তু সহজৈঃ সহজার্শোভবৈর্লক্ষণৈঃ সমং সহ সর্বো হেতুস্ত্রিদোষাণামিতি যোজ্যম্| সহজার্শোলক্ষণং চাত্র সঙ্গ্রহেণোক্তং তন্ত্রান্তরাদনুস্মর্তব্যং; যদাহ সুশ্রুতঃ– “দুর্দর্শনানি পরুষারুণপাণ্ডূনি দারুণান্তর্মুখানি, তৈরুপদ্রুতঃ কৃশোঽল্পভুক্ সিরাসন্ততগাত্রোঽল্পপ্রজঃ ক্ষীণরেতাঃ ক্ষামস্বরঃ ক্রোধনোঽল্পাগ্নির্ঘ্রাণশিরোঽক্ষিশ্রবণরোগবান্, সততমন্ত্রকূজনাটোপহৃদযোপলেপারোচকপ্রভৃতিভিঃ পীড্যতে||” (সু. নি. অ. ২) ইতি; চরকে চ– ‘কানিচিদণূনি’ (চ. চি. অ. ১৪) ইত্যাদিনা প্রভূততরং লক্ষণমুক্তম্| ননু, ত্রিদোষজানীতি বিশেষাভিধানমনুপপন্নং, সর্বেষামেব রোগাণাং ত্রিদোষজত্বাত্| যদুক্তম্– “দ্রব্যমেকরসং নাস্তি ন রোগোঽপ্যেকদোষজঃ| যোঽধিকস্তেন নির্দেশঃ ক্রিযতে রসদোষযোঃ||” ইতি| নৈবং; “সর্বদেহচরাস্তু বাতপিত্তশ্লেষ্মাণঃ” ইতি বচনাদেকস্মিন্ ধাত্বাদৌ দোষেণ দূষিতে সতি তদ্গতেতরদোষেঽপ্যবশ্যম্ভাবিনী কাচিদ্দুষ্টিঃ, দুষ্টদোষসম্বন্ধাত্| কিঞ্চ স্বকারণাত্ বৃদ্ধো বাযুঃ শৈত্যাচ্ছীতস্য শ্লেষ্মণো বলমাদধাতি, লাঘবাত্তেজোরূপস্য পিত্তস্য; পিত্তং চ কটুত্বাদ্বাতস্য, দ্রবত্বাত্ শ্লেষ্মণঃ; কফশ্চ শৈত্যাদ্বাযোঃ, দ্রবত্বাত্ পিত্তস্যেতি| অত এবোক্তম্– “ন রোগোঽপ্যেকদোষজঃ” ইতি| অনেনৈবাভিপ্রাযেণোক্তম্– “একঃ প্রকুপিতো দোষঃ সর্বানেব প্রকোপযেত্|” ইতি| যত্র তু স্বকারণাত্ত্রযোঽপি কুপিতাস্তত্র ত্রিদোষব্যপদেশ ইতি সিদ্ধান্তঃ; এবং সর্বত্র||৯||

Adhikarana vAtArsholakShaNam (10-15) · Śloka 15

গুদাঙ্কুরা বহ্বনিলাঃ শুষ্কাশ্চিমচিমান্বিতাঃ | ম্লানাঃ শ্যাবারুণাঃ স্তব্ধা বিশদাঃ পরুষাঃ খরাঃ ||১০|| মিথো বিসদৃশা বক্রাস্তীক্ষ্ণা বিস্ফুটিতাননাঃ | বিম্বীখর্জূরকর্কন্ধূকার্পাসীফলসন্নিভাঃ ||১১|| কেচিত্ কদম্বপুষ্পাভাঃ কেচিত্ সিদ্ধার্থকোপমাঃ | শিরঃপার্শ্বাংসকট্যূরুবঙ্ক্ষণাদ্যধিকব্যথাঃ ||১২|| ক্ষবথূদ্গারবিষ্টম্ভহৃদ্গ্রহারোচকপ্রদাঃ | কাসশ্বাসাগ্নিবৈষম্যকর্ণনাদভ্রমাবহাঃ ||১৩|| তৈরার্তো গ্রথিতং স্তোকং সশব্দং সপ্রবাহিকম্ | রুক্ফেনপিচ্ছানুগতং বিবদ্ধমুপবেশ্যতে ||১৪|| কৃষ্ণত্বঙ্নখবিণ্মূত্রনেত্রবক্ত্রশ্চ জাযতে | গুল্মপ্লীহোদরাষ্ঠীলাসম্ভবস্তত এব চ ||১৫|| (বা. নি. অ. ৭) |

পূর্বং নিদানমুক্তং, সম্প্রতি বাতাদিভেদেনার্শসাং লক্ষণান্যুচ্যন্তে, তত্র প্রথমং বাতার্শোলক্ষণমাহ– গুদেত্যাদি| গুদাঙ্কুরা গুদে অঙ্কুরাকারাঃ মাংসপ্ররোহাঃ, ত এব অর্শাংসি| বহ্বনিলা বাতোল্বণাঃ| শুষ্কাঃ স্রাবরহিতাঃ| চিমচিমা বেদনাবিশেষঃ| ম্লানা অনুপচিতাঃ| স্তব্ধাঃ কাঠিন্যাত্| বিশদা অপিচ্ছিলাঃ, ধূলিস্পর্শবত্| পরুষাঃ কর্কশাঃ, গোজিহ্বাস্পর্শবত্| খরাঃ কর্কোটফলবত্ সূক্ষ্মানেককণ্টকাচিতাঃ| এষু বিকল্পেষু বক্ষ্যমাণং কেচিদিতি পদং সম্বন্ধনীযম্| মিথোবিসদৃশাঃ পরস্পরভিন্নরূপাঃ| বক্রা ধনুঃকাষ্ঠাদিবত্| তীক্ষ্ণাঃ সূক্ষ্মাগ্রাঃ| ফলসন্নিভা ইতি বিম্ব্যাদিভিঃ সম্বধ্যতে, বিম্ব্যাদিসন্নিভত্বং চাকৃত্যা জ্ঞেযম্| বিম্বী ওষ্ঠোপমফলা ‘তেলাকুচা’ ইতি লোকে খ্যাতা, কার্পাসী বনকার্পাসী, কদম্বপুষ্পাভাঃ স্থূলা অনেকসূক্ষ্মশিখরাঃ| সিদ্ধার্থকোপমাঃ সূক্ষ্মপিডকারূপাঃ| হৃদযং গৃহীতমিবেতি বেদনা হৃদ্গ্রহঃ| গ্রথিতং গ্রন্থিলং পাষাণবত্| রুক্ শূলম্| পিচ্ছা পিচ্ছিলো দ্রবভাগঃ| উপবেশ্যতে বর্চস্ত্যাজ্যতে| কৃষ্ণশব্দস্ত্বগাদিভিঃ বক্ত্রান্তৈঃ প্রত্যেকং সম্বধ্যতে| অস্যোপদ্রবমাহ– গুল্মেত্যাদি| অষ্ঠীলা বাতরোগবিশেষঃ||১০-১৫||

Adhikarana pittArsholakShaNam (16-18) · Śloka 18

পিত্তোত্তরা নীলমুখা রক্তপীতাসিতপ্রভাঃ | তন্বস্রস্রাবিণো বিস্রাস্তনবো মৃদবঃ শ্লথাঃ ||১৬|| শুকজিহ্বাযকৃত্খণ্ডজলৌকোবক্ত্রসন্নিভাঃ | দাহপাকজ্বরস্বেদতৃণ্মূর্ছারুচিমোহদাঃ ||১৭|| সোষ্মাণো দ্রবনীলোষ্ণপীতরক্তামবর্চসঃ | যবমধ্যা হরিত্পীতহারিদ্রত্বঙ্নখাদযঃ ||১৮|| (বা. নি. অ. ৭) |

পিত্তার্শোলক্ষণমাহ– পিত্তোত্তরা ইত্যাদি| নীলমুখা নীলাগ্রাঃ| তন্বস্রং তন্বস্রং তনু অঘনম্, অস্রং রক্তং স্রবন্তীতি তন্বস্রস্রাবিণঃ| বিস্রাঃ আমগন্ধিনঃ| তনবঃ স্বল্পাঃ| মৃদবঃ কোমলাঃ| শ্লথাঃ লম্বনশীলাঃ| যবমধ্যাঃ যববন্মধ্যে স্থূলাঃ| হরিত্ হরিত্পত্রবর্ণং, পীতং হরিতালাভং, হারিদ্রং হরিদ্রাবর্ণম্; আদিশব্দাদ্বিণ্মূত্রনেত্রবক্ত্রাণাং গ্রহণম্||১৬-১৮||

Adhikarana shleShmArsholakShaNam (19-23) · Śloka 23

শ্লেষ্মোল্বণা মহামূলা ঘনা মন্দরুজঃ সিতাঃ | উত্সন্নোপচিতস্নিগ্ধস্তব্ধবৃত্তগুরুস্থিরাঃ ||১৯|| পিচ্ছিলাঃ স্তিমিতাঃ শ্লক্ষ্ণাঃ কণ্ড্বাঢ্যাঃ স্পর্শনপ্রিযাঃ | করীরপনসাস্থ্যাভাস্তথা গোস্তনসন্নিভাঃ ||২০|| বঙ্ক্ষণানাহিনঃ পাযুবস্তিনাভিবিকর্ষিণঃ | সশ্বাসকাসহৃল্লাসপ্রসেকারুচিপীনসাঃ ||২১|| মেহকৃচ্ছ্রশিরোজাড্যশিশিরজ্বরকারিণঃ | ক্লৈব্যাগ্নিমার্দবচ্ছর্দিরামপ্রাযবিকারদাঃ ||২২|| বসাভসকফপ্রাযপুরীষাঃ সপ্রবাহিকাঃ | ন স্রবন্তি ন ভিদ্যন্তে পাণ্ডুস্নিগ্ধত্বগাদযঃ ||২৩|| (বা. নি. অ. ৭) |

শ্লেষ্মার্শোলক্ষণমাহ– শ্লেষ্মোল্বণে ইত্যাদি| অত্র ‘গুদাঙ্কুরা’ ইত্যনুবর্ততে| মহামূলা দূরবাস্ত্ববগাহিনঃ| ঘনা নিবিডাবযবাঃ| উত্সন্না দৈর্ঘ্যেণোদ্গতাঃ, উপচিতাঃ পরিণাহেন স্থূলাঃ, স্তব্ধা অনম্রাঃ, বৃত্তাঃ পরিণাহেন বর্তুলাঃ, গুরবো গুরুদ্রব্যাক্রান্তমিব গুদং কুর্বতে, স্থিরা অচঞ্চলাঃ| শ্লক্ষ্ণা মণিবন্মসৃণাঃ| কণ্ড্বাঢ্যাঃ কণ্ডূবহুলাঃ; কণ্ডূব্যপগমার্থং স্পৃশ্যমানাঃ প্রীণযন্ত্যর্শসমিতি স্পর্শনপ্রিযাঃ| করীরো মরুজদ্রুমঃ, পনসঃ কণ্টকিফলং, তযোরস্থ্যাভাঃ, অথবা করীরো বংশাঙ্কুরঃ; তেন করীরাভাঃ, পনসাস্থ্যাভাশ্চেত্যর্থঃ| তথা গোস্তনসন্নিভাঃ গোস্তনসদৃশা ইত্যর্থঃ| বঙ্ক্ষণৌ আনাহিতুমাবদ্ধুমিব শীলং যেষাং তে তথা; গুদপ্রত্যাসত্ত্যা বঙ্ক্ষণযোঃ প্রেরণাদ্যসামর্থ্যকারিণ ইত্যর্থঃ| পাযুবস্তিনাভিবিকর্ষিণ ইতি পায্বাদিষ্বাকর্ষবত্পীডাকারিণঃ| প্রসেকো মুখস্য গুদস্য বা; কৃচ্ছ্রং মূত্রকৃচ্ছ্রং, শিরোজাড্যং শিরঃস্তিমিততা, শিশিরজ্বরকারিণঃ শীতজ্বরকারিণঃ| ক্লৈব্যং স্ত্রীষ্বনুত্সাহঃ, অগ্নিমার্দবং বহ্নিমান্দ্যং, ছর্দির্বমিঃ| আমপ্রাযবিকারদাঃ আমবহুলা যে রোগাঃ অতীসারগ্রহণ্যাদযস্তত্প্রদাঃ| প্রাযস্থানে ‘প্রাজ্য’ ইতি পাঠান্তরে স এবার্থঃ; প্রাযপ্রাজ্যশব্দযোঃ প্রচুরার্থত্বাত্| বসাভং চ সকফং চ প্রাজ্যং চ পুরীষং যেষাং তে তথা| ন স্রবন্তি ‘ক্লেদরক্তাদিকম্’ ইতি শেষঃ| ন ভিদ্যন্তে গাঢবিট্কপ্রপীডিতা অপি ন বিদীর্যন্ত ইতি||১৯-২৩||

Adhikarana sannipAtArshasaH sahajArshasashca lakShaNam (24) · Śloka 24

সর্বৈঃ সর্বাত্মকান্যাহুর্লক্ষণৈঃ সহজানি চ |২৪|

সন্নিপাতার্শসঃ সহজার্শসশ্চ লক্ষণমাহ– সর্বৈরিত্যাদি| সর্বৈর্বাতজাদ্যর্শোভবৈর্লক্ষণৈঃ, সর্বাত্মকানি ত্রিদোষজানি; তথা তৈরেব লক্ষণৈঃ সহজান্যপ্যাহুঃ, তেষামপি ত্রিদোষজত্বাত্||–

Adhikarana raktArsholakShaNam (24-27) · Śloka 27

রক্তোল্বণা গুদেকীলাঃ পিত্তাকৃতিসমন্বিতাঃ ||২৪|| বটপ্ররোহসদৃশা গুঞ্জাবিদ্রুমসন্নিভাঃ | তেঽত্যর্থং দুষ্টমুষ্ণং চ গাঢবিট্কপ্রপীডিতাঃ ||২৫|| স্রবন্তি সহসা রক্তং তস্য চাতিপ্রবৃত্তিতঃ | ভেকাভঃ পীড্যতে দুঃখৈঃ শোণিতক্ষযসম্ভবৈঃ ||২৬|| হীনবর্ণবলোত্সাহো হতৌজাঃ কলুষেন্দ্রিযঃ | (বা. নি. অ. ৭) | বিট্ শ্যাবং কঠিনং রূক্ষমধোবাযুর্ন বর্ততে ||২৭||

রক্তার্শোলক্ষণমাহ– রক্তোল্বণা ইত্যাদি| গুদেকীলাঃ কীলবত্ কীলাঃ অর্শাংসি, “হলদন্তাত্ সপ্তম্যাঃ সঞ্জ্ঞাযাম্” (পা. অ. ৬ পা. ৩ সূ. ১) ইত্যলুক্সমাসঃ| পিত্তাকৃতিসমন্বিতাঃ পৈত্তিকার্শোলক্ষণযুক্তাঃ| বিদ্রুমসন্নিভাঃ প্রবালমণিবল্লোহিতা ইত্যর্থঃ| তে গাঢবিট্কপ্রপীডিতাঃ কঠিনপুরীষযন্ত্রিতাঃ, দুষ্টম্ আবিলম্, উষ্ণং চ রক্তং স্রবন্তি| তস্যেতি রক্তস্য, অতিপ্রবৃত্তিতঃ অতিক্ষযাত্, ভেকাভঃ প্রাবৃষেণ্যবর্ষাভ্বাভঃ পীতচ্ছবিঃ, ‘পুরুষঃ’ ইতি শেষঃ| দুঃখৈঃ রোগৈঃ| শোণিতক্ষযসম্ভবৈরিতি ত্বক্পারুষ্যাম্লশীতপ্রার্থনাসিরাশৈথিল্যৈঃ (সু. সূ. অ. ১৫) সুশ্রুতোক্তৈঃ| বলং স্থৌল্যম্, উত্সাহো হর্ষঃ| হতৌজা হতশক্তিঃ| কলুষেন্দ্রিয আবিলচক্ষুঃ, ব্যাকুলসর্বেন্দ্রিযো বা| বিট্ শ্যাবমিতি বিট্শব্দো নপুংসকোঽপ্যস্তি, এতন্নির্দেশাদেব| কাশ্মীরাস্তু চরকে– “বিট্ শ্যাবা কঠিনা রূক্ষা” ইত্যেব পঠন্তি| অধোবাযুর্ন বর্ততে গুদেন, প্রতিলোমগত্বাত্||২৪-২৭||

Adhikarana raktArshaso vAtajAdibhedena lakShaNAni (28-30) · Śloka 30

তনু চারুণবর্ণং চ ফেনিলং চাসৃগর্শসাম্ | কট্যূরুগুদশূলং চ দৌর্বল্যং যদি চাধিকম্ ||২৮|| তত্রানুবন্ধো বাতস্য হেতুর্যদি চ রূক্ষণম্ | শিথিলং শ্বেতপীতং চ বিট্ স্নিগ্ধং গুরু শীতলম্ ||২৯|| যদ্যর্শসাং ঘনং চাসৃক্ তন্তুমত্ পাণ্ডু পিচ্ছিলম্ | গুদং সপিচ্ছং স্তিমিতং গুরু স্নিগ্ধং চ কারণম্ | শ্লেষ্মানুবন্ধো বিজ্ঞেযস্তত্র রক্তার্শসাং বুধৈঃ ||৩০|| (চ. চি. অ. ১৪) |

ইদানীং তস্যৈব রক্তার্শসো নিদানস্য রক্তস্য বাতাদিভেদেন লক্ষণমাহ– তন্বিত্যাদি| তত্রানুবন্ধো বাতস্যেতি বাতাদিদুষ্টস্যৈব রক্তস্যারম্ভকত্বান্নতু কেবলস্য, দোষত্বাভাবাত্| শিথিলমিত্যাদিনা কফানুবন্ধস্য| ননু, পিত্তানুবন্ধঃ কুতো নোক্ত ইতি? উচ্যতে, রক্তপিত্তযোঃ প্রাযঃ সমানলিঙ্গত্বাত্| উক্তং চ পূর্বং “রক্তোল্বণা গুদেকীলাঃ পিত্তাকৃতিসমন্বিতাঃ|” ইতি||২৮-৩০||

Adhikarana arshasAM pUrvarUpam (31-32) · Śloka 32

বিষ্টম্ভোঽন্নস্য দৌর্বল্যং কুক্ষেরাটোপ এব চ | কার্শ্যমুদ্গারবাহুল্যং সক্থিসাদোঽল্পবিট্কতা ||৩১|| গ্রহণীদোষপাণ্ড্বর্তেরাশঙ্কা চোদরস্য চ | পূর্বরূপাণি নির্দিষ্টান্যর্শসামভিবৃদ্ধযে ||৩২|| (চ. চি. অ. ১৪) |

পূর্বরূপমাহ– বিষ্টম্ভ ইত্যাদি| বিষ্টম্ভোঽন্নস্যেতি বিষ্টভ্যান্নস্যাজীর্ণতাগমনম্ আহারো বা বা বিষ্টব্ধঃ আমাশয এবাবতিষ্ঠতে, বাতবৈগুণ্যাত্| দৌর্বল্যং হীনশক্তিতা| ‘বিষ্টম্ভোঽঙ্গস্য’ ইতি পাঠান্তরে বিষ্টম্ভো মলস্য, অঙ্গস্য দৌর্বল্যম্| যদ্যপি নিদানানন্তরং পূর্বরূপং বক্তব্যং ভবতি, তথাঽপি নিদানলক্ষণানন্তরমত্র পূর্বরূপং; নিদানলিঙ্গযোশ্চিকিত্সাঙ্গতমত্বপ্রতিপাদনার্থং তযোঃ পূর্বমভিধানম্; অথবাঽবশ্যবক্তব্যানাং কামচারাদভিধানমিতি| এবমন্যত্রাপি ব্যতিক্রমে দ্রষ্টব্যম্| কুক্ষেরাটোপো ‘গুডগুডাশব্দঃ’ ইতি চক্রঃ, ‘তনতনী’ ইতি গুণাকরঃ; ‘রুজাপূর্বকঃ ক্ষোভঃ’ ইতি গদাধরঃ, পুরীষবৃদ্ধিলক্ষণে চ ‘আটোপম্ আধ্মানম্’ ইতি বিবৃতবান্; এতচ্চ ন সর্বত্র, গুল্মপূর্বরূপে আটোপাধ্মানযোরুভযোরপি পাঠাত্| উদ্গারবাহুল্যমধোনিরুদ্ধস্য বাযোরূর্ধ্বগমনাত্| সক্থিসাদো জঙ্ঘাবসাদঃ| গ্রহণীদোষপাণ্ড্বর্তেঃ গ্রহণীদোষযুক্তপাণ্ডুরোগস্য উদরস্য চাশঙ্কা, তেষাং লক্ষণদর্শনাত্| ‘গ্রহণীদোষপাণ্ড্বর্তিঃ’ ইতি পাঠান্তরে গ্রহণীদোষস্য পাণ্ডোঃ পাণ্ডুরোগস্য চার্তিঃ পীডা স্যাত্| অভিবৃদ্ধযে উত্পত্ত্যর্থমিতি||৩১-৩২||

Adhikarana arshasAM samutpattau vAtAdInAM sarveShAmeva prakopaH (33-34) · Śloka 34

পঞ্চাত্মা মারুতঃ পিত্তং কফো গুদবলিত্রযম্ | সর্ব এব প্রকুপ্যন্তি গুদজানাং সমুদ্ভবে ||৩৩|| তস্মাদর্শাংসি দুঃখানি বহুব্যাধিকরাণি চ | সর্বদেহোপতাপীনি প্রাযঃ কৃচ্ছ্রতমানি চ ||৩৪|| (চ. চি. অ. ১৪) |

ননু, গুদদেশদুষ্ট্যা গুদজস্যোত্পাদাত্ কথং সর্বদেহে কৃশত্বকৃষ্ণত্বাদিরূপা দুষ্টিরিত্যত আহ– পঞ্চাত্মেত্যাদি| পঞ্চাত্মা পঞ্চস্বরূপঃ, প্রাণাপানসমানোদানব্যানভেদাত্; ইতি তেষাং স্থানানি| এবং লিঙ্গবিপরিণামাত্ পঞ্চাত্মকত্বং পিত্তেঽপি যোজ্যং, পিত্তং হ্যালোচকরঞ্জকসাধকপাচকভ্রাজকভেদাদ্ভিন্নম্| এবং কফোঽপি পঞ্চাত্মা, হৃদযামাশযজিহ্বাশিরঃসন্ধিষু ক্রমেণাবলম্বকক্লেদকবোধকতর্পকশ্লেষ্মকভেদাত্| যদাহ গৌতমঃ– “শ্লেষ্মা তু পঞ্চবিধোরঃস্থঃ ক্লেদকাদিস্বকর্মণা| কফধাম্নাং চ সর্বেষাং যত্ করোত্যবলম্বনম্|| অতোঽবলম্বকঃ, শ্লেষ্মা যস্ত্বামাশযসংশ্রিতঃ| ক্লেদকঃ সোঽন্নসঙ্ঘাতক্লেদনাদ্, রসবোধনাত্|| বোধকো রসনাস্থস্তু, শিরঃসংস্থোঽক্ষিতর্পণাত্| তর্পকঃ, শ্লেষ্মকঃ সম্যক্ শ্লেষণাত্ সন্ধিষু স্থিতঃ||” ইতি| গুদবলীত্রযস্য চ প্রকোপো বিকৃতত্বং, সন্নিধানস্যাপ্যভাবাত্, বলীদুষ্টেরপ্রাপ্তেশ্চ| সর্ব এবেতি উক্তমারুতাদয এবেতি| তস্মাদিত্যাদি| বহুব্যাধিকরাণীতি জঠরাগ্নিমান্দ্যাদ্যুপদ্রবকরাণি| প্রাযঃ কৃচ্ছ্রতমানীতি প্রাযোগ্রহণাদসাধ্যানি সুখসাধ্যান্যপি||৩৩-৩৪||

Adhikarana arshasAM sAdhyAsAdhyatvAdivicAraH (35-37) · Śloka 37

বাহ্যাযাং তু বলৌ জাতান্যেকদোষোল্বণানি চ | অর্শাংসি সুখসাধ্যানি ন চিরোত্পতিতানি চ ||৩৫|| দ্বন্দ্বজানি দ্বিতীযাযাং বলৌ যান্যাশ্রিতানি চ | কৃচ্ছ্রসাধ্যানি তান্যাহুঃ পরিসংবত্সরাণি চ ||৩৬|| সহজানি ত্রিদোষাণি যানি চাভ্যন্তরাং বলিম্ | জাযন্তেঽর্শাংসি সংশ্রিত্য তান্যসাধ্যানি নির্দিশেত্ ||৩৭|| (চ. চি. অ. ১৪) |

উক্তবাতাদ্যর্শসাং সাধ্যত্বাদিকমাহ– বাহ্যাযামিত্যাদি| ন চিরোত্পতিতানীতি অনতিক্রান্তসংবত্সরাণি| পরিসংবত্সরাণীতি পরিগতোঽতিক্রান্তঃ সংবত্সরো যৈস্তানি তথা| যানি তু বাহ্যবলিজাতানি দ্বিদোষোল্বণানি তানি কৃচ্ছ্রাণি, ত্রিদোষজানি যাপ্যানীত্যুক্তম্; এবং দ্বিতীযাযামেকদোষোল্বণানি কৃচ্ছ্রাণি, দ্বিদোষোল্বণানি যাপ্যানি, ত্রিদোষোল্বণান্যসাধ্যানি; এবং তৃতীযাযামেকদোষোল্বণানি যাপ্যানি, শেষাণ্যসাধ্যানি| যদ্যাপ্যং প্রত্যাখ্যেযং বা তদ্দোষবলিভেদেঽপ্যসাধ্যমেব; যদুক্তং চরকেণ– “নাসাধ্যঃ সাধ্যতাং যাতি সাধ্যো যাতি ত্বসাধ্যতাম্|” (চ. নি. অ. ৮) ইতি||৩৫-৩৭||

Adhikarana yApyArsholakShaNam (38) · Śloka 38

শেষত্বাদাযুষস্তানি চতুষ্পাদসমন্বিতে | যাপ্যন্তে দীপ্তকাযাগ্নেঃ প্রত্যাখ্যেযান্যতোঽন্যথা ||৩৮|| (চ. চি. অ. ১৪) |

অসাধ্যো হি দ্বিবিধো যাপ্যপ্রত্যাখ্যেযভেদাত্, তত্র যদ্যাযুঃশেষোঽস্তি চতুষ্পাদসম্পত্তিশ্চ তদা যাপ্যত্বমন্যথা প্রত্যাখ্যেযত্বমিত্যাহ– শেষত্বাদিত্যাদি| চতুষ্পাদসমন্বিতে ‘অর্শোরোগিণি’ ইতি শেষঃ| সমন্বিত ইতি ভাবে ক্তঃ, তেন ‘চতুষ্পাদসমন্বযে সতি’ ইতি চক্রঃ||৩৮||

Adhikarana arshasAmupadravAdasAdhyatvam (39-41) · Śloka 41

হস্তে পাদে মুখে নাভ্যাং গুদে বৃষণযোস্তথা | শোথো হৃত্পার্শ্বশূলং চ যস্যাসাধ্যোঽর্শসো হি সঃ ||৩৯|| হৃত্পার্শ্বশূলং সম্মোহশ্ছর্দিরঙ্গস্য রুগ্জ্বরঃ | তৃষ্ণা গুদস্য পাকশ্চ নিহন্যুর্গুদজাতুরম্ ||৪০|| (চ. চি. অ. ১৪) | তৃষ্ণা অরোচকশূলার্তমতিপ্রস্রুতশোণিতম্ | শোথাতিসারসংযুক্তমর্শাংসি ক্ষপযন্তি হি ||৪১|| (সু. সূ. অ. ৩৩) |

উপদ্রবাদসাধ্যত্বমাহ– হস্তে ইত্যাদি| হস্তপাদাদিশোথো মিলিতোঽসাধ্যলক্ষণম্| অত্র হৃত্পার্শ্বশূলসম্মোহাদি ব্যস্তং সমস্তং বা||৩৯-৪১||

Adhikarana meDhrajAdInAmarshasAM lakShaNam (42) · Śloka 42

মেঢ্রাদিষ্বপি বক্ষ্যন্তে যথাস্বং, নাভিজানি চ | গণ্ডূপদাস্যরূপাণি পিচ্ছিলানি মৃদূনি চ ||৪২|| (বা. নি. অ. ৭) |

অথ মেঢ্রজাদীনাং স্বরূপমাহ– মেঢ্রাদিষ্বিত্যাদি| মেঢ্রাদিষ্বপি বক্ষ্যন্তে যথাস্বমিত্যন্তেন ছেদঃ| তেন ‘নাসার্শ’ ইত্যাদিব্যপদেশঃ| গণ্ডূপদাস্যরূপাণি কিঞ্চুলকমুখসদৃশানি||৪২||

Adhikarana carmakIlasamprAptiH (43) · Śloka 43

ব্যানো গৃহীত্বা শ্লেষ্মাণং করোত্যর্শস্ত্বচো বহিঃ | কীলোপমং স্থিরখরং চর্মকীলং তু তদ্বিদুঃ ||৪৩|| (বা. নি. অ. ৭) |

চর্মকীলসম্প্রাপ্তিমাহ– ব্যান ইত্যাদি| ব্যানো বাযুঃ, “এতচ্চ গুদৌষ্ঠদেশ এব নান্যত্র ইতি কার্তিককুণ্ডাদযঃ”||৪৩||

Adhikarana carmakIlasya vAtajAdibhedena lakShaNAni (44) · Śloka 44

বাতেন তোদপারুষ্যং পিত্তাদসিতবক্ত্রতা | শ্লেষ্মণা স্নিগ্ধতা চাস্য গ্রথিতত্বং সবর্ণতা ||৪৪|| (বা. নি. অ. ৭) |

তস্যৈব বাতাদিভেদেন লক্ষণমাহ– বাতেনেত্যাদি| সবর্ণতা গাত্রসবর্ণতা|৪৪||

Adhikarana puShpikA · Śloka 5

ইতি শ্রীমাধবকরবিরচিতে মাধবনিদানেঽর্শোনিদানং সমাপ্তম্ ||৫||

ইতি শ্রীবিজরক্ষিতকৃতাযাং মধুকোশব্যাখ্যাযামর্শোনিদানং সমাপ্তম্||৫||