3. atīsāranidānam

Adhikarana atisAranidAnam (1-3) · Śloka 3

অথাতীসারনিদানম্ | গুর্বতিস্নিগ্ধরূক্ষোষ্ণদ্রবস্থূলাতিশীতলৈঃ | বিরুদ্ধাধ্যশনাজীর্ণৈর্বিষমৈশ্চাপি ভোজনৈঃ ||১|| স্নেহাদ্যৈরতিযুক্তৈশ্চ মিথ্যাযুক্তৈর্বিষৈর্ভযৈঃ | শোকাদ্দুষ্টাম্বুমদ্যাতিপানৈঃ সাত্ম্যর্তুপর্যযৈঃ ||২|| জলাভিরমণৈর্বেগবিঘাতৈঃ ক্রিমিদোষতঃ | নৃণাং ভবত্যতীসারো লক্ষ্ণং তস্য বক্ষ্যতে ||৩|| (সু. উ. তং. অ. ৪০) |

পিত্তজ্বরেঽতীসারপাঠাজ্জ্বরাতীসারযোরন্যোন্যোপদ্রবত্বাচ্চ জ্বরানন্তরমতীসারমাহ গুর্বতিস্নিগ্ধেত্যাদি| গুরুশব্দেন মাত্রাগুরুর্গৃহ্যতে, যথাঽতিমাত্রোপযুক্তো রক্তশাল্যাদিঃ; তথা স্বভাবগুরু চ মাষাদি; অথবা গুণতঃ পাকতশ্চ| অতিশব্দঃ স্থূলান্তৈঃ সহ সম্বধ্যতে| স্থূলং সংহতাবযবং, যথা– লড্ডুকপিষ্টকাদি| শীতলং স্পর্শাদ্বীর্যাচ্চ| বিরুদ্ধমিতি সংযোগদেশকালমাত্রাদিভির্বিরুদ্ধং, যথা– ক্ষীরমত্স্যাদি; তচ্চ বহুপ্রকারং সুশ্রুতে হিতাহিতীযেঽধ্যাযে (সু. সূ. অ. ২০), চরকে চাত্রেযভদ্রকাপ্যীযাধ্যাযে (চ. সূ. অ. ২৬) দ্রষ্টব্যম্| অধ্যশনং পূর্বদিনাহারাজীর্ণে ভোজনম্| উক্তং হি চরকে– “ভুক্তং পূর্বান্নশেষে তু পুনরধ্যশনং মতম্|” (চ. চি. অ. ১৫) ইতি; এবং সর্বত্র| অজীর্ণম্ অপক্বমন্নম্| বিষমম্ অকালাদিভোজনাদি| উক্তং হি সুশ্রুতে– “বহুস্তোকমকালে বা তজ্জ্ঞেযং বিষমাশনম্|” (সু. সূ. অ. ৪৬) ইতি| এবং সর্বত্র| ‘বিষমৈঃ’ ইত্যত্র স্থানে ‘অসাত্ম্যৈঃ’ ইতি পাঠান্তরম্| ভোজনৈরিতি বিরুদ্ধাদিভিঃ সর্বৈঃ সম্বধ্যতে| স্নেহাদ্যৈরিতি স্নেহঃ স্নেহপানং, স্নেহ আদ্যো যেষাং তে স্নেহাদ্যাঃ স্বেদবমনবিরেচনানুবাসননিরূহাঃ, তৈরতিযুক্তৈরিতি অতিযোগযুক্তৈঃ| এতচ্চ যথাযোগ্যং বোধ্যং, বমনাতিযোগস্যাতিসারকারণত্বাযোগাত্| মিথ্যাযুক্তৈরিতি হীনযোগযুক্তৈঃ, বমনাদিকর্মণাং মিথ্যাযোগাভাবাত্, হীনযোগাত্তু তে দোষানুত্ক্লেশ্যাতীসারায স্যুঃ| ননু, কদাচিদ্বমনং প্রযুক্তং বিরেকং করোতি, বিরেকশ্চ বমনমিতি দর্শনাত্তেষাং মিথ্যাযোগঃ সম্ভবত্যেব| ন, সোঽপ্যযোগ এবেতি সিদ্ধান্তঃ| যদুক্তং চরকে– “যোগঃ সম্যক্ প্রবৃত্তিঃ স্যাদতিযোগোঽতিবর্তনম্| অযোগঃ প্রাতিলোম্যেন ন চাল্পং বা প্রবর্তনম্||” (চ. সি. অ. ৬) ইতি| বিষমত্র স্থাবরমুচ্যতে, অধোগত্বাত্; কার্তিকস্ত্বাহ– বিষং দূষীবিষং, তল্লক্ষণেষ্বতীসারপাঠাত্| দুষ্টাম্বুমদ্যাতিপানৈরিতি দুষ্টং ব্যাপন্নং, দুষ্টযোরম্বুমদ্যযোঃ পানাত্, অদুষ্টযোরপ্যতিপানাত্| যথা চরকঃ– “দুষ্টমদ্যপানীযাতিপানাত্” (চ. চি. অ. ১৯) ইতি| সাত্ম্যর্তুপর্যযৈরিতি সাত্ম্যবিপর্যযৈরৃতুবিপর্যযৈশ্চ, সাত্ম্যবিপর্যযোঽসাত্ম্যম্| নচ পূর্বোক্তেন ‘অসাত্ম্যৈঃ’ ইত্যনেন পৌনরুক্ত্যম্; উক্তং হি চরকে আত্রেযভদ্রকাপ্যীযে– “ দ্বিবিধং হি সাত্ম্যং প্রকৃতিসাত্ম্যমভ্যাসসাত্ম্যং চ|” (চ. সূ. অ. ২৬) ইতি; আহারাচারভেদাদন্নপানভেদাদ্বা ন পৌনরুক্ত্যমিত্যন্যে| জলাভিরমরণৈরিতি জলক্রীডাদিভিঃ| বেগবিঘাতৈরিতি মূত্রপুরীষাদীনাম্ ক্রিমিদোষত ইতি ক্রিমিভিঃ পক্বামাশযদূষণাত্, ক্রিমিজনিতবাতাদিকোপাদ্বা| এতানি চ নিদানানি যথাসম্ভবং বাতাদীনাং বোদ্ধব্যানি, দোষব্যাধিহেতুত্বখ্যাপনার্থং পঠিতানি এবমন্যত্রাপি নিদানবিশেষপাঠে প্রাযো দ্রষ্টব্যমিতি||১-৩||

Adhikarana atisArasamprAptiH bhedAshca (4) · Śloka 4

সংশম্যাপান্ধাতুরগ্নিং প্রবৃদ্ধঃ শকৃন্মিশ্রো বাযুনাঽধঃ প্রণুন্নঃ | সরত্যতীবাতিসারং তমাহুর্ব্যাধিং ঘোরং ষড্বিধং তং বদন্তি | একৈকশঃ সর্বশশ্চাপি দোষৈঃ শোকেনান্যঃ ষষ্ঠ আমেন চোক্তঃ ||৪|| (সু. উ. তং. অ. ৪০) |

সর্বাতীসারসাধারণীং সম্প্রাপ্তিমাহ– সংশম্যেত্যাদি| সংশম্য শমযিত্বা; অত্র অন্তর্ভাবিতো ণ্যর্থং ইতি গদাধরঃ, অগ্নিং মন্দীকৃত্যেত্যর্থঃ| প্রবৃদ্ধঃ প্রদুষ্টঃ| অপাং ধাতুরিত্যনেনাসমাসকরণেন রসজলমূত্রস্বেদমেদঃ কফ পিত্তরক্তাদযো গ্রাহ্যাঃ| চরকেঽপ্যুক্তম্– “শোণিতাদীন্ ধাতূন্ দূষযন্তি” (চ. চি. অ. ১৯) ইতি| অধঃ প্রণুন্নঃ প্রেরিতঃ, সরতি গচ্ছত্যতীবেত্যনেন নিরুক্তিমুক্তবান্; গুদেন বহুদ্রবসরণমতিসার ইত্যর্থঃ| নিরুক্তিরপি লক্ষণং ভবতি; এতেনাধোদ্রবসরণত্বাবিশেষেঽপি গ্রহণ্যাদীনাং ব্যবচ্ছেদঃ; বাতাতীসারে ত্বল্পত্বং কফপিত্তাতীসারাপেক্ষযা, নতু গ্রহণ্যপেক্ষযা ইতি| উক্তষড্বিধত্বং বিভজতে– একৈকশ ইত্যাদি| ননু চরকদৌ দোষৈরেকৈকশস্ত্রযঃ, সন্নিপাতেনৈকঃ, ভযশোকজৌ দ্বৌ, এবং ষড্বিধঃ, অত্র ত্বন্যথেতি কোঽভিপ্রাযঃ? উচ্যতে– চরকে ভযশোকজৌ লক্ষণসঞ্জ্ঞাকার্যভেদাদ্ভিন্নাবুক্তৌ, আমজস্ত্বন্নাজীর্ণকুপিতত্রিদোষজত্বেন সন্নিপাতেনাবরুদ্ধ ইতি ন সঙ্খ্যাতিরেকঃ, সুশ্রুতে তু হেতুপ্রত্যনীকচিকিত্সার্থং শোকজামজৌ পঠিতৌ বাতজত্বসন্নিপাতজত্বাভেদেঽপি, যথা বাতাদিজত্বাভেদেঽপি মৃত্তিকাজঃ পাণ্ডুরোগ ইতি; এবং ভযশোকজাবপি চরকে হেতুপ্রত্যনীকচিকিত্সার্থং পঠিতৌ, সুশ্রুতে ভযজঃ কেবলবাতিকেঽবরুদ্ধঃ মানসত্বাবিশেষাদ্বা শোকজেঽবরুদ্ধ ইতি জেজ্জটঃ| ননু, ষষ্ঠ আমেন চোক্ত ইতি পৃথক্করণমসঙ্গতং; যতঃ সর্বেষামেবাতীসারাণাং প্রাগবস্থা আমশব্দবাচ্যা, জীর্ণাবস্থা পক্বশব্দবাচ্যা; অত এব সর্বাতীসারগোচরমুদাহরন্তি– “আমপক্বক্রমং হিত্বা নাতিসারে ক্রিযা হিতা| অতঃ সর্বাতিসারেষু জ্ঞেযং পক্বামলক্ষণম্||” (সু. উ. তং. অ. ৪০) ইতি| নৈবম্, আমেনৈবারভ্যত ইতি আমজঃ, দোষাস্তু সংসর্গিণঃ প্রেরযিতারশ্চ, ন ত্বারম্ভকাঃ| আমশ্চ দুষ্টান্নকার্যো দোষধাতুমলব্যতিরিক্তো বাতাদিসংসৃষ্টো বাতাদিপ্রেরিতো বা রক্তাদিবদ্ব্যাধ্যারম্ভক ইতি| দ্বন্দ্বজাস্ত্বতীসারাঃ প্রকৃতিসমসমবাযারব্ধত্বাত্ পৃথগ্গণিতা; বিকৃতিবিষমসমবাযারব্ধাস্তু ন ভবন্ত্যেব, ব্যাধিস্বভাবাত্| শৈলী চেযমাচার্যাণাং প্রাযঃ প্রকৃতিসমসমবাযারব্ধান্ দ্বন্দ্বান্ সন্নিপাতাংশ্চ ন গণযন্তি, বিকৃতিবিষমসমবাযারব্ধং চাবশ্যং লিখন্তি| যথা চরকে– “পঞ্চ গুল্মা” (চ. সূ. অ. ১৯) ইত্যভিধায, “সংসৃষ্টরূপানপরাংস্তু গুল্মাংস্ত্রীনাদিশেদৌষধকল্পনার্থম্|” (চ. চি. অ. ৫) ইত্যুক্তং, তথা সুশ্রুতে– ‘ষডর্শাংসি’ ইত্যভিধায, “অর্শঃসু দৃশ্যতে রূপং যদা বৈ দোষযোর্দ্বযোঃ| সংসর্গং তং বিজানীযাত্ সংসর্গঃ ষড্বিধশ্চ সঃ||” (সু. নি. অ. ২) ইত্যুক্তম্||৪||

Adhikarana atisArapUrvarUpam (5) · Śloka 5

হৃন্নাভিপাযূদরকুক্ষিতোদগাত্রাবসাদানিলসন্নিরোধাঃ | বিট্সঙ্গ আধ্মানমথাবিপাকা ভবিষ্যতস্তস্য পুরঃসরাণি ||৫|| (সু. উ. তং. অ. ৪০) |

সর্বাতীসারপূর্বরূপমাহ– হৃন্নাভীত্যাদি| তোদঃ সর্বৈর্হৃদাদিভিঃ সম্বধ্যতে| অত্র কুক্ষিশব্দ উদরৈকদেশবাচী, তেন ন পৌনরুক্ত্যম্| অনিলসন্নিরোধ ইতি বাযোরপ্রবৃত্তিঃ| বিট্সঙ্গঃ পুরীষাপ্রবৃত্তিঃ; এতচ্চ দোষদূষ্যসম্মূর্ছনাবস্থাপ্রতিনিযতং পূর্বরূপং, তেন রূপাবস্থাযাং নানুবর্ততে, ( যদ্যনুবর্তেত তদা তত্র ব্যাধিরেব নোত্পদ্যেত,)| বিট্সঙ্গাতিপ্রতিষেধাত্ অবিপাকোঽন্নস্য| পুরঃসরাণি পূর্বরূপাণীতি||৫||

Adhikarana vAtAtisAralakShaNam (6) · Śloka 6

অরুণং ফেনিলং রূক্ষমল্পমল্পং মুহুর্মুহুঃ | শকৃদামং সরুক্শব্দং মারুতেনাতিসার্যতে ||৬||

বাতিকমাহ– অরুণমিত্যাদি| অরুণমিতি বাযোররূপস্যাপি দোষদূষ্যসম্মূর্ছনাদ্ভবতি, এবমন্যত্রাপি| ফেনিলং সফেনং; ফেনাদিলচ্| শকৃত্ পুরীষম্| সরুক্শব্দমিতি সশূলং, সশব্দং চেতি||৬||

Adhikarana pittAtisAralakShaNam (7) · Śloka 7

পিত্তাত্ পীতং নীলমালোহিতং বা তৃষ্ণামূর্ছাদাহপাকোপপন্নম্ |৭| (সু. উ. তং. অ. ৪০) |

পৈত্তিকমাহ– পিত্তাদিত্যাদি| দাহপাকোপপন্নমিতি দাহঃ সর্বাঙ্গে , পাকো গুদ এব| উক্তং হি তন্ত্রান্তরে– “তৃষ্ণাদাহস্বেদমূর্ছাব্রধ্নসন্তাপপাকপরীতঃ||” ইতি; বুধ্নো গুদঃ| অত্রাপ্যতিসার্যতে শকৃদিত্যনুবর্ততে; এবং শ্লৈষ্মিকেঽপি|৭|–

Adhikarana shleShmAtisAralakShaNam (7) · Śloka 7

শুক্লং সান্দ্রং শ্লেষ্মণা শ্লেষ্মযুক্তং বিস্রং শীতং হৃষ্টরোমা মনুষ্যঃ ||৭|| (সু. উ. তং. অ. ৪০) |

শ্লৈষ্মিকমাহ– শুক্লমিত্যাদি| শুক্লমিত্যাদিনা হৃষ্টরোমা ইত্যন্তেন শ্লৈষ্মিকঃ| বিস্রমামগন্ধি||৭||

Adhikarana tridoShajAtisAralakShaNam (8) · Śloka 8

বরাহস্নেহমাংসাম্বুসদৃশং সর্বরূপিণম্ | কৃচ্ছ্রসাধ্যমতীসারং বিদ্যাদ্দোষত্রযোদ্ভবম্ ||৮||

সান্নিপাতিকমাহ– বরাহেত্যাদি| বরাহস্নেহঃ শূকরস্য মেদো মজ্জা বা, মাংসাম্বু মাংসপ্রক্ষালনোদকং, তৈঃ সদৃশম্| সর্বরূপিণমিতি উক্তবাতাদ্যতীসারত্রযলক্ষণযুক্তম্| এবংবিধমতীসারং দোষত্রযোদ্ভবং বিদ্যাত্; তং চ কৃচ্ছ্রসাধ্যং, ত্রিদোষজত্বাদেব||৮||

Adhikarana shokAtisAralakShaNam (9-10) · Śloka 10

তৈস্তৈর্ভাবৈঃ শোচতোঽল্পাশনস্য বাষ্পোষ্মা বৈ বহ্নিমাবিশ্য জন্তোঃ | কোষ্ঠং গত্বা ক্ষোভযেত্তস্য রক্তং তচ্চাধস্তাত্ কাকণন্তীপ্রকাশম্ ||৯|| নির্গচ্ছেদ্বৈ বিড্বিমিশ্রং হ্যবিড্বা নির্গন্ধং বা গন্ধবদ্বাঽতিসারঃ | শোকোত্পন্নো দুশ্চিকিত্স্যোঽতিমাত্রং রোগো বৈদ্যৈঃ কষ্ট এষ প্রদিষ্টঃ ||১০|| (সু. উ. তং. অ. ৪০) |

শোকজমাহ– তৈস্তৈরিত্যাদি| তৈস্তৈর্ভাবৈর্ধনবন্ধুনাশাদিভিঃ| শোচতঃ শোকং কুর্বতঃ| অল্পাশনস্য শোকাদেবাল্পং ভুঞ্জানস্য; এতেন ধাতুক্ষযোঽপ্যস্য স্যাদিত্যুক্তম্| বাষ্পোঽত্যুদ্গতনেত্রনাসাগলাদিগতং জলং, তত্সহিত ঊষ্মা শোকজং দেহতেজো বাষ্পোষ্মা; স কোষ্ঠং গত্বা, বহ্নিমাবিশ্য ব্যাকুলীকৃত্য, ক্ষোভযেত্তস্য রক্তম্ ঊষ্মত্বদ্রবত্বাভ্যাং সমানগুণত্বাত্; তচ্চ রক্তং কাকণন্তীপ্রকাশং গুঞ্জাফলসঙ্কাশম্, অধস্তান্নির্গচ্ছেত্| ‘পক্তিমাবিশ্য’ ইতি পাঠান্তরে স এবার্থঃ| গদাধরস্তু বহ্নিশব্দেন পিত্তমাহ| তচ্চ রক্তং বিড্বিমিশ্রং নির্গচ্ছেত্; অবিড্বা অল্পবিট্, অল্পাশনত্বাত্| নির্গন্ধং গন্ধবদ্বেতি বিকপঃ অবিট্সবিড্ভ্যামিতি কার্তিকঃ; অন্যে তু পিত্তস্য পূতিত্বাত্ প্রবলগন্ধবত্, তস্য নাতিদুষ্ট্যা নির্গন্ধত্বমিতি; গন্ধশ্চ বিস্রমিত্যাহুঃ| ক্ষোভযেত্তস্য রক্তমিত্যত্র ‘শোষযেত্তস্য ভুক্তম্’ ইতি পাঠান্তরমযুক্তং, কাকণন্তীপ্রকাশস্য হেত্বন্তরাভাবাত্; তস্মাদাদ্য এব পাঠো জ্যাযান্, ব্যাখ্যাতশ্চ জেজ্জটাদিভিঃ সর্বৈরেবাযং বাতপিত্তজ উক্তঃ| দুশ্চিকিত্স্যোঽতিমাত্রমিতি শোকাপনোদং বিনা কেবলেন ভেষজেনানুপশমাত্| অত এবাহ– কষ্ট এষ প্রদিষ্ট ইতি| বৈদ্যৈর্ব্রহ্মাদিভিঃ| গদাধরস্ত্বাহ– ‘এষ’ ইত্যনেনৈবংসম্প্রাপ্তিক এব কষ্টো ন ত্বন্যঃ শোকজ ইতি||৯-১০||

Adhikarana AmAtisAralakShaNam (11) · Śloka 11

অন্নাজীর্ণাত্ প্রদ্রুতাঃ ক্ষোভযন্তঃ কোষ্ঠং দোষা ধাতুসঙ্ঘান্মলাংশ্চ | নানাবর্ণং নৈকশঃ সারযন্তি শূলোপেতং ষষ্ঠমেনং বদন্তি ||১১|| (সু. উ. তং. অ. ৪০) |

আমাতীসারমাহ– অন্নাজীর্ণাদিত্যাদি| অন্নং চ তদজীর্ণং চেতি অন্নাজীর্ণম্| অত এবাহ ক্ষারপাণিঃ– ‘যথাভুক্তমশনমুপবিশন্তি’ ইতি| প্রদ্রুতা বিমার্গগাঃ| ক্ষোভযন্তো দূষযন্তঃ| ধাতুসঙ্ঘান্ রক্তাদীন্| মলান্ পুরীষাদীন্| নৈকশো বহুশঃ||১১||

Adhikarana malasyAmalakShaNaM pakvalakShaNaM ca (12-13) · Śloka 13

সংসৃষ্টমেভির্দোষৈস্তু ন্যস্তমপ্স্ববসীদতি | পুরীষং ভৃশদুর্গন্ধি পিচ্ছিলং চামসঞ্জ্ঞিতম্ ||১২|| এতান্যেব তু লিঙ্গানি বিপরীতানি যস্য বৈ | লাঘবং চ বিশেষেণ তস্য পক্বং বিনির্দিশেত্ ||১৩|| (সু. উ. তং. অ. ৪০) |

সর্বাতীসারাণাং চিকিত্সোপযোগিত্বেনামলক্ষণং পক্বলক্ষণং চাহ– সংসৃষ্টমিত্যাদি| সংসৃষ্টং সম্বদ্ধম্, এভির্দোষৈর্দুষ্টিভিরুক্তবাতাদ্যতীসারলিঙ্গৈঃ| দুষ্টযশ্চাত্র যথাসম্ভবং ব্যস্তাঃ সমস্তাশ্চ বোদ্ধব্যাঃ; তেন সর্বাতিসারাণাং ন সান্নিপাতিকত্বপ্রসঙ্গঃ| ন্যস্তমপ্সু জলে ক্ষিপ্তম্; অবসীদতি নিমজ্জতি, আমস্য গৌরবাত্| ভৃশশব্দঃ পিচ্ছিলেনাপি সম্বধ্যতে| দুর্গন্ধি বিস্রম্| পিচ্ছিলমামসম্বন্ধাত্| এতানীতি জলনিমজ্জনাদীনি| লাঘবং কোষ্ঠস্য শরীরস্য চ, চকারেণ কফশৈত্যদুষ্ট্যাদিকং বিনাঽপ্যম্বুনিমজ্জনং লক্ষণমিতি সমুচ্চীযতে| যদুক্তম্– “মজ্জত্যামা গুরুবাদ্বিট্ পক্বা তূত্প্লবতে জলে| বিনাঽতিদ্রবসঙ্ঘাতশ্লেষ্মশৈত্যপ্রদূষণাত্||” ইতি| অথবা আমলিঙ্গবৈপরীত্যেনৈব লাঘবে সিদ্ধে পুনর্লাঘবকরণং তত্ কফদুষ্ট্যাদিব্যতিরেকং বোধযতীতি||১২-১৩||

Adhikarana atisArasyAsAdhyalakShaNAni (14-19) · Śloka 19

পক্বজাম্ববসঙ্কাশং যকৃত্খণ্ডনিভং তনু | ঘৃততৈলবসামজ্জবেশবারপযোদধি ||১৪|| মাংসধাবনতোযাভং কৃষ্ণং নীলারুণপ্রভম্ | মেচকং স্নিগ্ধকর্বূরং চন্দ্রকোপগতং ঘনম্ ||১৫|| কুণপং মস্তুলুঙ্গাভং সুগন্ধি কুথিতং বহু | তৃষ্ণাদাহতমঃশ্বাসহিক্কাপার্শ্বাস্থিশূলিনম্ ||১৬|| সম্মূর্ছারতিসম্মোহযুক্তং পক্ববলীগুদম্ | প্রলাপযুক্তং চ ভিষগ্বর্জযেদতিসারিণম্ ||১৭|| অসংবৃতগুদং ক্ষীণং দূরাধ্মাতমুপদ্রুতম্ | গুদে পক্বে গতোষ্মাণমতিসারকিণং ত্যজেত্ ||১৮|| (সু. উ. তং. অ. ৪০) | শ্বাসশূলপিপাসার্তং ক্ষীণং জ্বরনিপীডিতম্ | বিশেষেণ নরং বৃদ্ধমতীসারো বিনাশযেত্ ||১৯|| (সু. সূ. অ. ৩৩) | ( শোথং শূলং জ্বরং তৃষ্ণাং কাসং শ্বাসমরোচকম্ | ছর্দিং মূর্ছাং চ হিক্কাং চ দৃষ্টাবাতীসারিণং ত্যজেত্) |

অসাধ্যলক্ষণান্যাহ– পক্বেত্যাদি| পক্বজাম্ববসঙ্কাশং পক্বজম্বূফলসদৃশবর্ণং স্নিগ্ধকৃষ্ণমিত্যর্থঃ| যকৃত্খণ্ডনিভং কৃষ্ণলোহিতম্| তনু স্বচ্ছম্| ঘৃতাদীনাং মাংসধাবনতোযান্তানামিবাভাঃ প্রতিভাসো যস্য তত্তথা| বেশবারো “নিরস্থিপিশিতং পিষ্টং দধিক্ষারসমন্বিতম্|| এলামরিচসংযুক্তং বেশবার ইতি স্মৃতম্||” ইত্যাদিপরিভাষিতমাংসপ্রকারঃ| কৃষ্ণমঞ্জনপ্রখ্যম্| এতচ্চ কৃষ্ণত্বাদিকং পিত্তাতিসারবর্জ্যং বোদ্ধব্যং, তত্র রূপত্বেন পঠিতত্বাত্| নীলারুণং চাষপক্ষবর্ণম্| মেচকং মর্দনাঞ্জনপিণ্ডবদীষত্কৃষ্ণরূক্ষম্| কর্বূরং নানাবর্ণং, তচ্চ স্নিগ্ধং স্নেহদ্রবধাতুযোগাত্| চন্দ্রকোপগতং মযূরপিচ্ছচন্দ্রকৈরিব ধাতুস্নেহৈরুপগতম্| উক্তং হি করবীরাচার্যেণ– “চন্দ্রকৈঃ শিখিপিচ্ছাভৈর্নীলপীতাদিরাজিভিঃ| আবৃতং বেশবারাম্বুমজ্জক্ষীরোপমং ত্যজেত্||” ইতি| তদেব ঘনং ধাত্বন্তরব্যামিশ্রত্বাত্| কুণপং শবদুর্গন্ধি| মস্তুলুঙ্গাভং মস্তুলুঙ্গং মস্তকাভ্যন্তরস্নেহঃ ঘৃতকেতি খ্যাতং, তত্সদৃশম্| কুথিতং পূতি| তৃষ্ণেত্যাদি|– তৃষ্ণাদীনাং পার্শ্বাস্থিশূলান্তানাং দ্বন্দ্বং কৃত্বা মত্বর্থীয ইনিঃ, তৃষ্ণাদিযুক্তমিত্যর্থঃ| অত্র সম্মূর্ছা মনোমোহঃ, সম্মোহ ইন্দ্রিযমোহঃ, ইত্যপৌনরুক্ত্যম্| চকারাচ্চরকোক্তঃ (চ. চি. অ. ১৯) সহসোপরতাতীসারশ্চাসাধ্যো বোদ্ধব্যঃ| পক্ববলীগুদং পক্বা বলযো গুদে যস্য তং পক্ববলীগুদম্| অসংবৃতগুদং গুদসংবরণাক্ষমম্| তমেব ক্ষীণং বলোপচযরহিতম্| দূরাধ্মাতং ভৃশমাধ্মানযুক্তং, তস্য বিরেকসাধ্যত্বেনাতিসারবিরুদ্ধোপক্রমত্বাত্; দুরাত্মানমিতি পাঠান্তরে দুষ্টান্তঃকরণম্, অজিতেন্দ্রিযমিতি জেজ্জটঃ| উপদ্রুতমতিসারোপদ্রবৈঃ শোথাদিভির্যুক্তম্| যদুক্তম্– “শোথং শূলং জ্বরং তৃষ্ণাং শ্বাসং কাসমরোচকম্| ছর্দিং মূর্ছাং চ হিক্কাং চ দৃষ্ট্বাঽতীসারিণং ত্যজেত্||” ইতি গুদে পক্বে গতোষ্মাণমিতি গুদপাকারম্ভকপিত্তে বর্তমানেঽপি গতোষ্মাণং শীতগাত্রং নষ্টাগ্নিং বা| অতিসারকিণম্ অতীসারযুক্তম্| “বাতাতীসারাভ্যাং কুক্ চ||” (পা. অ. অ. ৫ পা. সূ. ১২৯) ইতি কুক্, চাদিনিঃ| বিশেষেণেতি বচনাদ্বালস্যাপ্যতিসারোঽসাধ্য ইতি বোধযতি| যদাহ সুশ্রুতশ্চিকিত্সাযাম্– “কৃচ্ছ্রশ্চাযং বালবৃদ্ধেষ্বসাধ্যঃ||” (সু. উ. তং. অ. ৪০) ইতি| এতচ্চাবলত্বে সতি বোদ্ধব্যম্||১৪-১৯||

Adhikarana raktAtisAralakShaNam (20) · Śloka 20

পিত্তকৃন্তি যদাঽত্যর্থং দ্রব্যাণ্যশ্নাতি পৈত্তিকে | তদোপজাযতেঽভীক্ষ্ণং রক্তাতীসার উল্বণঃ ||২০||

ননু, রক্তজোঽপ্যতিসারোঽস্তি তস্য সপ্তমত্বাপত্তেরুক্তং ষট্কং বিরুধ্যতে, ইত্যাশঙ্ক্য পৈত্তিকস্যৈবাযমবস্থাবিশেষ ইত্যাহ– পিত্তেত্যাদি| পৈত্তিকেঽতীসারে বিদ্যমানে ভবিষ্যতি বা পিত্তকৃন্তি পিত্তকারকাণি দ্রব্যাণ্যত্যর্থং প্রভূতমভীক্ষ্ণং নিরন্তরমশ্নাতি তদা রক্তাতীসার উল্বণো মহানুপজাযত ইতি সম্বন্ধঃ| অত্র চারুণকৃষ্ণপাণ্ডুত্বাদিনা বাতাদযো দূষকা বোদ্ধব্যাঃ| যদুক্তম্– “দোষলিঙ্গেন মতিমান্ সংসর্গং তত্র লক্ষযেত্||” ইতি| এবং স্নেহাজীর্ণবিসূচিকাবিষার্শঃক্রিমিপ্রভৃতিজন্যেষ্বতীসারেষু ষট্কাতিরিক্তত্বং প্রতিক্ষিপ্তং বোদ্ধব্যম্, অব্যভিচরিতদোষলিঙ্গত্বাদিতি জেজ্জটঃ||২০||

Adhikarana pravAhikAsamprAptiH (21) · Śloka 21

বাযুঃ প্রবৃদ্ধো নিচিতং বলাসং নুদত্যধস্তাদহিতাশনস্য | প্রবাহতোঽল্পং বহুশো মলাক্তং প্রবাহিকাং তাং প্রবদন্তি তজ্জ্ঞাঃ ||২১|| (সু. উ. তং. অ. ৪০) |

অথ দ্রবসরণাদামপক্বলক্ষণযোগাত্ প্রবাহিকাতীসারযোঃ সাধর্ম্যম্, অতোঽতীসারাধিকারে প্রবাহিকাসম্প্রাপ্তিমাহ– বাযুরিত্যাদি| অতীসারে নানাবিধদ্রবধাতুসরণং, প্রবাহিকাযাং তু কফমাত্রসরণমিতি ভেদঃ| নিচিতং বলাসমহিতাশনস্য সঞ্চিতং কফং, মলাক্তং পুরীষসহিতং, বাযুর্বাতঃ, অধস্তান্নুদতি গুদেন পাতযতি| প্রবাহতঃ প্রবাহণং কুর্বতঃ| ভোজাদৌ ত্বিযং বিস্রংসীতি নাম্না পঠ্যতে, পরাশর ত্বন্তর্গ্রন্থিরিতি, হারীতস্তু নিশ্চারকাখ্যামেতাং পঠতি| যদাহ– “প্রবাহিকেতি সা জ্ঞেযা কৈশ্চিন্নিশ্চারকস্তু সঃ|” ইতি||২১||

Adhikarana vAtajAdibhedena pravAhikAlakShaNAni (22) · Śloka 22

প্রবাহিকা বাতকৃতা সশূলা পিত্তাত্ সদাহা সকফা কফাচ্চ | সশোণিতা শোণিতসম্ভবা চ তাঃ স্নেহরূক্ষপ্রভবা মতাস্তু | তাসামতীসারবদাদিশেচ্চ লিঙ্গং ক্রমং চামবিপক্বতাং চ ||২২|| (সু. উ. তং. অ. ৪০) |

তস্যা বাতাদিভেদেন রূপমাহ– প্রবাহিকেত্যাদি| ননু, বাযুঃ প্রবৃদ্ধো নিচিতং বলাসমিত্যুক্তং তত্ কথং বাতকৃতেতি? উচ্যতে, আধিক্যেন ব্যপদেশাত্| ননু, তথাঽপি পিত্তরক্তসম্ভবা কুতঃ? উচ্যতে– অহিতাশনস্যেত্যুক্তম্, আহারো হি বিরুদ্ধস্তস্যামবস্থাযাং পিত্তং রক্তং চ কোপযতি, তে চ পশ্চাদ্বাতস্যানুবলে স্বলিঙ্গং যদা দর্শযতস্তদা তাভ্যাং ব্যপদেশঃ| স্নেহরূক্ষপ্রভবা ইতি স্নেহপ্রভবা কফজা, রূক্ষপ্রভবা বাতজা; তুশব্দাচ্চ তীক্ষ্ণোষ্ণপ্রভবা পিত্তজা রক্তজা চ| লিঙ্গং বাতাদিভেদেন লক্ষণম্| ক্রমমামপক্বভেদেন চিকিত্সাক্রমমিতি||২২||

Adhikarana nivRuttAtisAralakShaNam (23) · Śloka 1

যস্যোচ্চারং বিনা মূত্রং সম্যগ্বাযুশ্চ গচ্ছতি | দীপ্তাগ্নের্লঘুকোষ্ঠস্য স্থিতস্তস্যোদরামযঃ ||২৩|| (সু. উ. তং. অ. ৪০) | (জ্বরাতীসারযোরুক্তং নিদানং যত্ পৃথক্ পৃথক্ | তত্স্যাজ্জ্বরাতিসারস্য তেন নাত্রোদিতং পুনঃ) ||১||

বাতবিষ্টম্ভাদুদাবর্তাদ্বা মলাপ্রবৃত্তাবতীসারনিবৃত্তিরিতি শঙ্কানিরাসার্থমতীসারনিবৃত্তিলক্ষণমাহ– যস্যেত্যাদি| উচ্চারং বিনা যস্য মূত্রং প্রবর্ততে, সম্যগিতি সম্যক্প্রবৃত্যা ন হীনযোগেনেত্যর্থঃ| বাযুশ্চ গচ্ছতি, ‘গুদেন’ ইতি শেষঃ| স্থিতো নিবৃত্তিং গতঃ| উদরামযোঽতীসারঃ, প্রকরণাত্| এতেন সম্প্রাপ্তিভঙ্গ উক্তঃ| অতীসারে হি সম্প্রাপ্তিরিযম্– যন্মূত্রোচিতোঽপি দ্রবধাতুর্গুদেনৈব প্রবর্ততে, সর্বস্যৈবাব্ধাতোর্গুদপ্রবৃত্তত্বাত্; যদা তু মূত্রমার্গেণ প্রবর্ততে, তদাঽপি পুরীষপ্রবৃত্তিসমকালমিতি||২৩||

Adhikarana puShpikA · Śloka 3

ইতি শ্রীমাধবকরবিরচিতে মাধবনিদানেঽতীসারনিদানং সমাপ্তম্ ||৩||

ইতি শ্রীবিজযরক্ষিতকৃতাযাং মধুকোশব্যাখ্যাযামতীসারনিদানং সমাপ্তম্||৩||