৩. অতীসারনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পিত্তজ্বরেঽতীসারপাঠাজ্জ্বরাতীসারযোরন্যোন্যোপদ্রবত্বাচ্চ জ্বরানন্তরমতীসারমাহ গুর্বতিস্নিগ্ধেত্যাদি| গুরুশব্দেন মাত্রাগুরুর্গৃহ্যতে, যথাঽতিমাত্রোপযুক্তো রক্তশাল্যাদিঃ; তথা স্বভাবগুরু চ মাষাদি; অথবা গুণতঃ পাকতশ্চ| অতিশব্দঃ স্থূলান্তৈঃ সহ সম্বধ্যতে| স্থূলং সংহতাবযবং, যথা– লড্ডুকপিষ্টকাদি| শীতলং স্পর্শাদ্বীর্যাচ্চ| বিরুদ্ধমিতি সংযোগদেশকালমাত্রাদিভির্বিরুদ্ধং, যথা– ক্ষীরমত্স্যাদি; তচ্চ বহুপ্রকারং সুশ্রুতে হিতাহিতীযেঽধ্যাযে (সু. সূ. অ. ২০), চরকে চাত্রেযভদ্রকাপ্যীযাধ্যাযে (চ. সূ. অ. ২৬) দ্রষ্টব্যম্| অধ্যশনং পূর্বদিনাহারাজীর্ণে ভোজনম্| উক্তং হি চরকে– “ভুক্তং পূর্বান্নশেষে তু পুনরধ্যশনং মতম্|” (চ. চি. অ. ১৫) ইতি; এবং সর্বত্র| অজীর্ণম্ অপক্বমন্নম্| বিষমম্ অকালাদিভোজনাদি| উক্তং হি সুশ্রুতে– “বহুস্তোকমকালে বা তজ্জ্ঞেযং বিষমাশনম্|” (সু. সূ. অ. ৪৬) ইতি| এবং সর্বত্র| ‘বিষমৈঃ’ ইত্যত্র স্থানে ‘অসাত্ম্যৈঃ’ ইতি পাঠান্তরম্| ভোজনৈরিতি বিরুদ্ধাদিভিঃ সর্বৈঃ সম্বধ্যতে| স্নেহাদ্যৈরিতি স্নেহঃ স্নেহপানং, স্নেহ আদ্যো যেষাং তে স্নেহাদ্যাঃ স্বেদবমনবিরেচনানুবাসননিরূহাঃ, তৈরতিযুক্তৈরিতি অতিযোগযুক্তৈঃ| এতচ্চ যথাযোগ্যং বোধ্যং, বমনাতিযোগস্যাতিসারকারণত্বাযোগাত্| মিথ্যাযুক্তৈরিতি হীনযোগযুক্তৈঃ, বমনাদিকর্মণাং মিথ্যাযোগাভাবাত্, হীনযোগাত্তু তে দোষানুত্ক্লেশ্যাতীসারায স্যুঃ| ননু, কদাচিদ্বমনং প্রযুক্তং বিরেকং করোতি, বিরেকশ্চ বমনমিতি দর্শনাত্তেষাং মিথ্যাযোগঃ সম্ভবত্যেব| ন, সোঽপ্যযোগ এবেতি সিদ্ধান্তঃ| যদুক্তং চরকে– “যোগঃ সম্যক্ প্রবৃত্তিঃ স্যাদতিযোগোঽতিবর্তনম্| অযোগঃ প্রাতিলোম্যেন ন চাল্পং বা প্রবর্তনম্||” (চ. সি. অ. ৬) ইতি| বিষমত্র স্থাবরমুচ্যতে, অধোগত্বাত্; কার্তিকস্ত্বাহ– বিষং দূষীবিষং, তল্লক্ষণেষ্বতীসারপাঠাত্| দুষ্টাম্বুমদ্যাতিপানৈরিতি দুষ্টং ব্যাপন্নং, দুষ্টযোরম্বুমদ্যযোঃ পানাত্, অদুষ্টযোরপ্যতিপানাত্| যথা চরকঃ– “দুষ্টমদ্যপানীযাতিপানাত্” (চ. চি. অ. ১৯) ইতি| সাত্ম্যর্তুপর্যযৈরিতি সাত্ম্যবিপর্যযৈরৃতুবিপর্যযৈশ্চ, সাত্ম্যবিপর্যযোঽসাত্ম্যম্| নচ পূর্বোক্তেন ‘অসাত্ম্যৈঃ’ ইত্যনেন পৌনরুক্ত্যম্; উক্তং হি চরকে আত্রেযভদ্রকাপ্যীযে– “ দ্বিবিধং হি সাত্ম্যং প্রকৃতিসাত্ম্যমভ্যাসসাত্ম্যং চ|” (চ. সূ. অ. ২৬) ইতি; আহারাচারভেদাদন্নপানভেদাদ্বা ন পৌনরুক্ত্যমিত্যন্যে| জলাভিরমরণৈরিতি জলক্রীডাদিভিঃ| বেগবিঘাতৈরিতি মূত্রপুরীষাদীনাম্ ক্রিমিদোষত ইতি ক্রিমিভিঃ পক্বামাশযদূষণাত্, ক্রিমিজনিতবাতাদিকোপাদ্বা| এতানি চ নিদানানি যথাসম্ভবং বাতাদীনাং বোদ্ধব্যানি, দোষব্যাধিহেতুত্বখ্যাপনার্থং পঠিতানি এবমন্যত্রাপি নিদানবিশেষপাঠে প্রাযো দ্রষ্টব্যমিতি||১-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তজ্বরেঽতীসারপাঠাজ্জ্বরাতীসারযোরন্যোপদ্রবত্বাচ্চ জ্বরানন্তরমতীসারমাহ– গুর্বিত্যাদি| গুরুশব্দেন মাত্রাগুরুর্গৃহ্যতে তথা স্বভাবগুরু মাষাদি; অথবা গুণতঃ পাকতশ্চ| অতিশব্দঃ স্থূলান্তৈঃ সহ সম্বধ্যতে| স্থূলং সংহতাবযবং যথা লড্ডুকপিষ্টকাদি| শীতলং বীর্যতঃ স্পর্শাচ্চ| বিরুদ্ধমিতি সংযোগদেশকালমাত্রাদিভির্বিরুদ্ধং ক্ষীরমত্স্যাদি| তচ্চ বহুপ্রকারং সৌশ্রুতে হিতাহিতীযাধ্যাযে চরকে চাত্রেযভদ্রকাপ্যীযাধ্যাযে দ্রষ্টব্যম্| অধ্যশনং পূর্বদিনাহারেঽজীর্ণে ভোজনম্| উক্তং হি চরকে– “ভুক্তং পূর্বাহ্নশেষে তু পুনরধ্যশনং মতম্” ইতি| অজীর্ণমপক্বান্নং চর্বণাদি, অন্যেঽজীর্ণমামবিদগ্ধাদি| বিষমাশনলক্ষণমুক্তং সুশ্রুতে– “বহু স্তোকমকালে চ তজ্জ্ঞেযং বিষমাশনম্” ইতি| বিষমৈরিত্যত্র স্থানে অসাত্ম্যৈরিতি পাঠান্তরম্| ভোজনৈরিতি বিরুদ্ধাদিভিঃ সর্বৈরেব সম্বধ্যতে| স্নেহাদ্যৈরিতি স্নেহস্বেদবমনবিরেচনানুবাসননিরূহাস্তৈরতিযুক্তৈঃ অতিযোগযুক্তৈঃ| এতচ্চ যথাযোগং জ্ঞেযং, বমনাতিযোগস্যাতিসারকারকত্বাযোগাত্| মিথ্যাযুক্তৈরিতি হীনং চ যোগযুক্তৈঃ, বমনাদিকর্মণাং মিথ্যাযোগাভাবাত্| হীনযোগাস্তু তে দোষানুত্ক্লেশ্যাঽতিসারায স্যুঃ| ননু বমনং প্রযুক্তং কদাচিদ্বিরেকং করোতি, বিরেকশ্চ বমনমিতি দর্শনাত্ তেষাং মিথ্যাযোগঃ সম্ভবত্যেব; ন সোঽপ্যযোগ এবেতি সিদ্ধান্তঃ| যদুক্তং চরকে– “যোগঃ সম্যক্প্রবৃত্তিঃ স্যাদতিযোগোঽতিবর্তনম্| অযোগঃ প্রাতিলোম্যেন ন চাল্পং বা প্রবর্তনম্” ইতি| বিষং স্থাবরমধোগত্বাত্, দূষীবিষং বা| শোকো বন্ধুবিযোগাদিনাম্| দুষ্টাম্বু ব্যাপন্নজলং, মদ্যং প্রসিদ্ধং, তযোরতিপানম্| সাত্ম্যবিপর্যযাত্ ঋতুবিপর্যযাচ্চ| জলাতিরমণৈঃ পানীযাতিক্রীডনৈঃ| বেগবিঘাতৈরিতি মূত্রপুরীষাদীনাং বেগনিরোধনৈঃ| কৃমিদোষতঃ কৃমিভিঃ পক্বাশযদূষণাত্ কৃমিজনিতবাতাদিকোপাদ্বা| এতানি চ নিদানানি যথাসম্ভবং বাতাদীনাং বোদ্ধব্যানি দোষহেতুব্যাধিহেতুত্বখ্যাপনার্থম্| এবমন্যত্রাপি নিদানবিশেষপাঠে প্রাযো দ্রষ্টব্যং ইতি||১-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বাতীসারসাধারণীং সম্প্রাপ্তিমাহ– সংশম্যেত্যাদি| সংশম্য শমযিত্বা; অত্র অন্তর্ভাবিতো ণ্যর্থং ইতি গদাধরঃ, অগ্নিং মন্দীকৃত্যেত্যর্থঃ| প্রবৃদ্ধঃ প্রদুষ্টঃ| অপাং ধাতুরিত্যনেনাসমাসকরণেন রসজলমূত্রস্বেদমেদঃ কফ পিত্তরক্তাদযো গ্রাহ্যাঃ| চরকেঽপ্যুক্তম্– “শোণিতাদীন্ ধাতূন্ দূষযন্তি” (চ. চি. অ. ১৯) ইতি| অধঃ প্রণুন্নঃ প্রেরিতঃ, সরতি গচ্ছত্যতীবেত্যনেন নিরুক্তিমুক্তবান্; গুদেন বহুদ্রবসরণমতিসার ইত্যর্থঃ| নিরুক্তিরপি লক্ষণং ভবতি; এতেনাধোদ্রবসরণত্বাবিশেষেঽপি গ্রহণ্যাদীনাং ব্যবচ্ছেদঃ; বাতাতীসারে ত্বল্পত্বং কফপিত্তাতীসারাপেক্ষযা, নতু গ্রহণ্যপেক্ষযা ইতি| উক্তষড্বিধত্বং বিভজতে– একৈকশ ইত্যাদি| ননু চরকদৌ দোষৈরেকৈকশস্ত্রযঃ, সন্নিপাতেনৈকঃ, ভযশোকজৌ দ্বৌ, এবং ষড্বিধঃ, অত্র ত্বন্যথেতি কোঽভিপ্রাযঃ? উচ্যতে– চরকে ভযশোকজৌ লক্ষণসঞ্জ্ঞাকার্যভেদাদ্ভিন্নাবুক্তৌ, আমজস্ত্বন্নাজীর্ণকুপিতত্রিদোষজত্বেন সন্নিপাতেনাবরুদ্ধ ইতি ন সঙ্খ্যাতিরেকঃ, সুশ্রুতে তু হেতুপ্রত্যনীকচিকিত্সার্থং শোকজামজৌ পঠিতৌ বাতজত্বসন্নিপাতজত্বাভেদেঽপি, যথা বাতাদিজত্বাভেদেঽপি মৃত্তিকাজঃ পাণ্ডুরোগ ইতি; এবং ভযশোকজাবপি চরকে হেতুপ্রত্যনীকচিকিত্সার্থং পঠিতৌ, সুশ্রুতে ভযজঃ কেবলবাতিকেঽবরুদ্ধঃ মানসত্বাবিশেষাদ্বা শোকজেঽবরুদ্ধ ইতি জেজ্জটঃ| ননু, ষষ্ঠ আমেন চোক্ত ইতি পৃথক্করণমসঙ্গতং; যতঃ সর্বেষামেবাতীসারাণাং প্রাগবস্থা আমশব্দবাচ্যা, জীর্ণাবস্থা পক্বশব্দবাচ্যা; অত এব সর্বাতীসারগোচরমুদাহরন্তি– “আমপক্বক্রমং হিত্বা নাতিসারে ক্রিযা হিতা| অতঃ সর্বাতিসারেষু জ্ঞেযং পক্বামলক্ষণম্||” (সু. উ. তং. অ. ৪০) ইতি| নৈবম্, আমেনৈবারভ্যত ইতি আমজঃ, দোষাস্তু সংসর্গিণঃ প্রেরযিতারশ্চ, ন ত্বারম্ভকাঃ| আমশ্চ দুষ্টান্নকার্যো দোষধাতুমলব্যতিরিক্তো বাতাদিসংসৃষ্টো বাতাদিপ্রেরিতো বা রক্তাদিবদ্ব্যাধ্যারম্ভক ইতি| দ্বন্দ্বজাস্ত্বতীসারাঃ প্রকৃতিসমসমবাযারব্ধত্বাত্ পৃথগ্গণিতা; বিকৃতিবিষমসমবাযারব্ধাস্তু ন ভবন্ত্যেব, ব্যাধিস্বভাবাত্| শৈলী চেযমাচার্যাণাং প্রাযঃ প্রকৃতিসমসমবাযারব্ধান্ দ্বন্দ্বান্ সন্নিপাতাংশ্চ ন গণযন্তি, বিকৃতিবিষমসমবাযারব্ধং চাবশ্যং লিখন্তি| যথা চরকে– “পঞ্চ গুল্মা” (চ. সূ. অ. ১৯) ইত্যভিধায, “সংসৃষ্টরূপানপরাংস্তু গুল্মাংস্ত্রীনাদিশেদৌষধকল্পনার্থম্|” (চ. চি. অ. ৫) ইত্যুক্তং, তথা সুশ্রুতে– ‘ষডর্শাংসি’ ইত্যভিধায, “অর্শঃসু দৃশ্যতে রূপং যদা বৈ দোষযোর্দ্বযোঃ| সংসর্গং তং বিজানীযাত্ সংসর্গঃ ষড্বিধশ্চ সঃ||” (সু. নি. অ. ২) ইত্যুক্তম্||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বাতিসারসাধারণীং সম্প্রাপ্তিমাহ– সংশম্যেত্যাদি| যস্মাদ্বাযুনাঽধঃ প্রণুন্নঃ প্রেরিতঃ; অপান্ধাতুঃ কফরসমূত্রস্বেদভেদঃপিত্তরক্তাদিকঃ, প্রবৃদ্ধো দুষ্টঃ, অন্তরাগ্নিং সংশম্য মন্দীকৃত্য, বর্চোমিশ্রঃ পুরীষযুক্তঃ, অতীবাধঃ সার্যেত, আচার্যা ঘোরং তং ব্যাধিমতীসারমাহুঃ, গুদেন বহুদ্রবসরণাদতীসার ইত্যর্থঃ| তং পুনঃ ষট্প্রকারং বদতি| উক্তষড্বিধত্বং বিভজন্নাহ– বাতেন পিত্তেন শ্লেষ্মণা ত্রযঃ, সন্নিপাতেন চতুর্থঃ, শোকেন পঞ্চমঃ, আমেন ষষ্ঠঃ, এবং ষডতীসারাঃ| সঙ্খ্যেযনির্দেশাদেব সঙ্খ্যাযাং লব্ধাযাং ষডিতি সঙ্খ্যাকরণং নিযমার্থ; তেন দ্বন্দ্বজা অতীসারা ন ভবন্তি ব্যাধিস্বভাবাদিতি সূচিতম্| অত্র ভযশোকাভ্যাং বাযুঃ প্রকুপ্যতি তর্হি দ্বযোর্বাতজে নিরোধঃ, পৃথগ্গ্রহণং কিমর্থং কৃতং? সুশ্রুতেন হেতুপ্রত্যনীকচিকিত্সার্থং পৃথক্ পঠিতম্||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বাতীসারপূর্বরূপমাহ– হৃন্নাভীত্যাদি| তোদঃ সর্বৈর্হৃদাদিভিঃ সম্বধ্যতে| অত্র কুক্ষিশব্দ উদরৈকদেশবাচী, তেন ন পৌনরুক্ত্যম্| অনিলসন্নিরোধ ইতি বাযোরপ্রবৃত্তিঃ| বিট্সঙ্গঃ পুরীষাপ্রবৃত্তিঃ; এতচ্চ দোষদূষ্যসম্মূর্ছনাবস্থাপ্রতিনিযতং পূর্বরূপং, তেন রূপাবস্থাযাং নানুবর্ততে, ( যদ্যনুবর্তেত তদা তত্র ব্যাধিরেব নোত্পদ্যেত,)| বিট্সঙ্গাতিপ্রতিষেধাত্ অবিপাকোঽন্নস্য| পুরঃসরাণি পূর্বরূপাণীতি||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

সর্বাতীসারপূর্বরূপমাহ– হৃন্নাভীত্যাদি| ভবিষ্যতো ভাবিনোঽতীসারস্য হৃত্তোদাদীনি পুরঃসরাণি পূর্বরূপাণি ভবন্তি| পাযুর্গুদম্| তোদঃ সর্বৈর্হৃদাদিভিঃ প্রত্যেকং সম্বধ্যতে| অত্র কুক্ষিশব্দ উদরৈকদেশবাচী, তেন ন পৌনরুক্ত্যম্| অনিলসন্নিরোধ ইতি বাযোরপ্রবৃত্তিঃ, গাত্রাবসাদো দেহে গ্লানিঃ, বিট্সঙ্গঃ পুরীষাপ্রবৃত্তিঃ আধ্মানং চ, অবিপাকোঽন্নস্য ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকমাহ– অরুণমিত্যাদি| অরুণমিতি বাযোররূপস্যাপি দোষদূষ্যসম্মূর্ছনাদ্ভবতি, এবমন্যত্রাপি| ফেনিলং সফেনং; ফেনাদিলচ্| শকৃত্ পুরীষম্| সরুক্শব্দমিতি সশূলং, সশব্দং চেতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতাতীসারলক্ষণমাহ– অরুণমিত্যাদি| মারুতেন বাযুনা অরুণাদিযুক্তং শকৃত্ পুরীষমতিসার্যতে| অরুণমিতি বাযোররূপস্যাপি বর্ণো দোষদূষ্যসম্মূর্ছনাদ্ভবতি, এবমন্যত্রাপি| ফেনিলং ফেনযুক্তং, রূক্ষং নিঃস্নেহম্, অল্পমল্পং স্তোকং, মুহুর্মুহুর্বারংবারম্, আমমপরিপক্বং, সরুক্শব্দমিতি সশূলং সশব্দং চেতি ||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– পিত্তাদিত্যাদি| দাহপাকোপপন্নমিতি দাহঃ সর্বাঙ্গে , পাকো গুদ এব| উক্তং হি তন্ত্রান্তরে– “তৃষ্ণাদাহস্বেদমূর্ছাব্রধ্নসন্তাপপাকপরীতঃ||” ইতি; বুধ্নো গুদঃ| অত্রাপ্যতিসার্যতে শকৃদিত্যনুবর্ততে; এবং শ্লৈষ্মিকেঽপি|৭|–

আতঙ্কদর্পণ ব্যাখ্যা (বাচস্পতি বৈদ্য কৃত)

পিত্তাতিসারলক্ষণমাহ– পিত্তাদিত্যাদি| পীতং পীতবর্ণং, নীলং নীলবর্ণং, আলোহিতং ঈষল্লোহিতম্| তৃষ্ণেত্যাদি মূর্ছা প্রসিদ্ধা, দাহপাকোপপন্নমিতি দাহঃ সর্বাঙ্গে, পাকো গুদস্যৈব|৭|

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকমাহ– শুক্লমিত্যাদি| শুক্লমিত্যাদিনা হৃষ্টরোমা ইত্যন্তেন শ্লৈষ্মিকঃ| বিস্রমামগন্ধি||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মাতিসারমাহ– শুক্লমিত্যাদি| হৃষ্টরোমা মনুষ্যঃ কণ্টকিতদেহঃ পুমান্, শুক্লাদিগুণযুক্তং পুরীষমতিসার্যতে| শুক্লং শ্বেতবর্ণং, সান্দ্রং ঘনং শ্লেষ্মসহিতং বিস্রম্ আমগন্ধি, শীতং শীতলমিতি||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সান্নিপাতিকমাহ– বরাহেত্যাদি| বরাহস্নেহঃ শূকরস্য মেদো মজ্জা বা, মাংসাম্বু মাংসপ্রক্ষালনোদকং, তৈঃ সদৃশম্| সর্বরূপিণমিতি উক্তবাতাদ্যতীসারত্রযলক্ষণযুক্তম্| এবংবিধমতীসারং দোষত্রযোদ্ভবং বিদ্যাত্; তং চ কৃচ্ছ্রসাধ্যং, ত্রিদোষজত্বাদেব||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

সান্নিপাতিকাতিসারলক্ষণমাহ– বরাহেত্যাদি| এবংবিধমতীসারং দোষত্রযোদ্ভবং কৃচ্ছ্রসাধ্যং জানীযাত্| বরাহস্নেহঃ সূকরস্য মেদো মজ্জা বা, মাংসাম্বু মাংসপ্রক্ষালনোদকং, তৈঃ সদৃশম্| সর্বরূপিণমিতি উক্তবাতাদ্যতীসারত্রযলক্ষণযুক্তম্||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোকজমাহ– তৈস্তৈরিত্যাদি| তৈস্তৈর্ভাবৈর্ধনবন্ধুনাশাদিভিঃ| শোচতঃ শোকং কুর্বতঃ| অল্পাশনস্য শোকাদেবাল্পং ভুঞ্জানস্য; এতেন ধাতুক্ষযোঽপ্যস্য স্যাদিত্যুক্তম্| বাষ্পোঽত্যুদ্গতনেত্রনাসাগলাদিগতং জলং, তত্সহিত ঊষ্মা শোকজং দেহতেজো বাষ্পোষ্মা; স কোষ্ঠং গত্বা, বহ্নিমাবিশ্য ব্যাকুলীকৃত্য, ক্ষোভযেত্তস্য রক্তম্ ঊষ্মত্বদ্রবত্বাভ্যাং সমানগুণত্বাত্; তচ্চ রক্তং কাকণন্তীপ্রকাশং গুঞ্জাফলসঙ্কাশম্, অধস্তান্নির্গচ্ছেত্| ‘পক্তিমাবিশ্য’ ইতি পাঠান্তরে স এবার্থঃ| গদাধরস্তু বহ্নিশব্দেন পিত্তমাহ| তচ্চ রক্তং বিড্বিমিশ্রং নির্গচ্ছেত্; অবিড্বা অল্পবিট্, অল্পাশনত্বাত্| নির্গন্ধং গন্ধবদ্বেতি বিকপঃ অবিট্সবিড্ভ্যামিতি কার্তিকঃ; অন্যে তু পিত্তস্য পূতিত্বাত্ প্রবলগন্ধবত্, তস্য নাতিদুষ্ট্যা নির্গন্ধত্বমিতি; গন্ধশ্চ বিস্রমিত্যাহুঃ| ক্ষোভযেত্তস্য রক্তমিত্যত্র ‘শোষযেত্তস্য ভুক্তম্’ ইতি পাঠান্তরমযুক্তং, কাকণন্তীপ্রকাশস্য হেত্বন্তরাভাবাত্; তস্মাদাদ্য এব পাঠো জ্যাযান্, ব্যাখ্যাতশ্চ জেজ্জটাদিভিঃ সর্বৈরেবাযং বাতপিত্তজ উক্তঃ| দুশ্চিকিত্স্যোঽতিমাত্রমিতি শোকাপনোদং বিনা কেবলেন ভেষজেনানুপশমাত্| অত এবাহ– কষ্ট এষ প্রদিষ্ট ইতি| বৈদ্যৈর্ব্রহ্মাদিভিঃ| গদাধরস্ত্বাহ– ‘এষ’ ইত্যনেনৈবংসম্প্রাপ্তিক এব কষ্টো ন ত্বন্যঃ শোকজ ইতি||৯-১০||

আতঙ্কদর্পণ ব্যাখ্যা (বাচস্পতি বৈদ্য কৃত)

শোকজমাহ– তৈস্তৈর্ভাবৈরিত্যাদি| ধনবন্ধুনাশাদিভিঃ, শোচতঃ শোকং কুর্বতঃ, অল্পাশনস্য শোকাদেবাল্পং ভুঞ্জানস্য, এতেন ধাতুক্ষযোঽস্য কারণং স্যাদিত্যুক্তম্, এবংবিধস্য জন্তোর্বাষ্পোদ্গতনেত্রনাসাগলাদিগতজলং তত্সহিতশোকজ ঊষ্মা দেহতেজো বাষ্পোষ্মা, স কোষ্ঠং গত্বা বহ্নিমাবিশ্য ব্যাকুলীকৃত্য, অস্য রক্তং ক্ষোভযতি চালযত্যত্যুষ্ণদ্রবত্বাভ্যাং সমানগুণত্বাত্, তচ্চ রক্তং কাকণন্তীপ্রকাশং গুঞ্জাফলসঙ্কাশমধস্তান্নির্গচ্ছেত্| পক্তিমাবিশ্যেতি পাঠান্তরে স এবার্থঃ| গদাধরস্তু বহ্নিশব্দেন পিত্তমাহ| তচ্চ রক্তং বিড্বিমিশ্রং নির্গচ্ছেত্, অবিট্ অল্পবিট্ বা| নির্গন্ধং গন্ধবদ্বেতি বিকল্পঃ; পিত্তস্য দূষিতত্বাদতিগন্ধতা, তস্য নাতিদুষ্ট্যা নির্গন্ধত্বমিতি| গন্ধশ্চ বিস্র ইত্যাহুঃ| দুশ্চিকিত্স্যাতিমাত্রমিতি শোকাপনোদনং বিনা কেবলেন ভেষজেন ন শাম্যতি, অত এব শোকোত্পন্নোঽতিসারো বিকারো বৈদ্যৈরেষ কষ্টো দারুণঃ প্রবিষ্টঃ||৯-১০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আমাতীসারমাহ– অন্নাজীর্ণাদিত্যাদি| অন্নং চ তদজীর্ণং চেতি অন্নাজীর্ণম্| অত এবাহ ক্ষারপাণিঃ– ‘যথাভুক্তমশনমুপবিশন্তি’ ইতি| প্রদ্রুতা বিমার্গগাঃ| ক্ষোভযন্তো দূষযন্তঃ| ধাতুসঙ্ঘান্ রক্তাদীন্| মলান্ পুরীষাদীন্| নৈকশো বহুশঃ||১১||

আতঙ্কদর্পণ ব্যাখ্যা (বাচস্পতি বৈদ্য কৃত)

আমাতীসারমাহ– অন্নেত্যাদি| অন্নং চ তদজীর্ণং চেতি অন্নাজীর্ণং, তস্মাত্ প্রদ্রুতাঃ উদীরিতাঃ দোষাঃ কোষ্ঠং ক্ষোভযন্তো দূষযন্তঃ, কোষ্ঠশব্দেন সমস্তমুদরমধ্যমুচ্যতে তত্র গতা ইত্যর্থঃ| ধাতুসঙ্ঘান্ রক্তাদীন্, মলান্পুরীষাদীন্, নৈকশো বহুশঃ, তে নানাবর্ণং সারযন্তি| ভূযসেতি পাঠান্তরে বহুবেগত্বং সূচিতম্| শূলোপেতং শূলযুক্তম্| অত্র পুনঃ ষষ্ঠ ইতি সঙ্খ্যাবচনং নিযমার্থং, তেন ভযস্নেহাজীর্ণবিসূচিকার্শোজীর্ণাদিনিমিত্তা অতীসারা ন পৃথগ্গণনীযাঃ, যতস্তে দোষজেষ্বেবান্তর্ভূতাঃ| প্রসঙ্গাদামলক্ষণং লিখ্যতে– “আহারস্য রসঃ শেষো যো ন পক্বোঽগ্নিলাঘবাত্| স হেতুঃ সর্বরোগাণামামভিত্যভিধীযতে” ইতি||১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সর্বাতীসারাণাং চিকিত্সোপযোগিত্বেনামলক্ষণং পক্বলক্ষণং চাহ– সংসৃষ্টমিত্যাদি| সংসৃষ্টং সম্বদ্ধম্, এভির্দোষৈর্দুষ্টিভিরুক্তবাতাদ্যতীসারলিঙ্গৈঃ| দুষ্টযশ্চাত্র যথাসম্ভবং ব্যস্তাঃ সমস্তাশ্চ বোদ্ধব্যাঃ; তেন সর্বাতিসারাণাং ন সান্নিপাতিকত্বপ্রসঙ্গঃ| ন্যস্তমপ্সু জলে ক্ষিপ্তম্; অবসীদতি নিমজ্জতি, আমস্য গৌরবাত্| ভৃশশব্দঃ পিচ্ছিলেনাপি সম্বধ্যতে| দুর্গন্ধি বিস্রম্| পিচ্ছিলমামসম্বন্ধাত্| এতানীতি জলনিমজ্জনাদীনি| লাঘবং কোষ্ঠস্য শরীরস্য চ, চকারেণ কফশৈত্যদুষ্ট্যাদিকং বিনাঽপ্যম্বুনিমজ্জনং লক্ষণমিতি সমুচ্চীযতে| যদুক্তম্– “মজ্জত্যামা গুরুবাদ্বিট্ পক্বা তূত্প্লবতে জলে| বিনাঽতিদ্রবসঙ্ঘাতশ্লেষ্মশৈত্যপ্রদূষণাত্||” ইতি| অথবা আমলিঙ্গবৈপরীত্যেনৈব লাঘবে সিদ্ধে পুনর্লাঘবকরণং তত্ কফদুষ্ট্যাদিব্যতিরেকং বোধযতীতি||১২-১৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অথামলক্ষণমাহ– সংসৃষ্টমিত্যাদি| সংসৃষ্টং সম্বদ্ধম্| এভিঃ পূর্বনির্দিষ্টৈর্দোষৈর্দুষ্টিভিরুক্তবাতাদ্যতীসারলিঙ্গৈর্গুরুতরৈর্ব্যাপ্তমিত্যর্থঃ| দুষ্টযশ্চাত্র যথাসম্ভবং ব্যস্তাঃ সমস্তাশ্চ বোদ্ধব্যাঃ| তেন সর্বাতিসারাণাং ন সান্নিপাতিকত্বপ্রসঙ্গঃ| ন্যস্তমপ্সু জলে ক্ষিপ্তমবসীদতি মজ্জতি আমস্য গৌরবাত্| ভৃশশব্দঃ পিচ্ছিলেন সম্বধ্যতে| দুর্গন্ধি বিস্রং, পিচ্ছিলম্ আমসম্বন্ধাত্| পক্বলক্ষণমাহ– এতানি জলনিমজ্জনাদীনি যস্য পুরীষস্য বিপরীতানি– জলে প্লবনং, গন্ধরহিতত্বম্, অপিচ্ছিলত্বমিত্যর্থঃ| যস্যেতি মনুষ্যস্যেতি কেচিদ্ ব্যাখ্যানযন্তি| লাঘবং কোষ্ঠস্য শরীরস্য চ| চকারাত্কফদুষ্টং পুরীষং সমুচ্চীযতে| যদুক্তম্– “মজ্জত্যামা গুরুত্বাদ্বিট্ পক্বত্বাত্প্লবতে জলে| বিনাঽতিদ্রবসঙ্ঘাতাচ্ছ্লেষ্মশৈত্যপ্রদূষণাত্” ইতি| ননু কফসংসৃষ্টং পক্বমপি মলং নিমজ্জতি তত্কথং পক্বকফাতীসারজ্ঞানং? উচ্যতে, তদিতরলক্ষণৈরেব||১২-১৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যলক্ষণান্যাহ– পক্বেত্যাদি| পক্বজাম্ববসঙ্কাশং পক্বজম্বূফলসদৃশবর্ণং স্নিগ্ধকৃষ্ণমিত্যর্থঃ| যকৃত্খণ্ডনিভং কৃষ্ণলোহিতম্| তনু স্বচ্ছম্| ঘৃতাদীনাং মাংসধাবনতোযান্তানামিবাভাঃ প্রতিভাসো যস্য তত্তথা| বেশবারো “নিরস্থিপিশিতং পিষ্টং দধিক্ষারসমন্বিতম্|| এলামরিচসংযুক্তং বেশবার ইতি স্মৃতম্||” ইত্যাদিপরিভাষিতমাংসপ্রকারঃ| কৃষ্ণমঞ্জনপ্রখ্যম্| এতচ্চ কৃষ্ণত্বাদিকং পিত্তাতিসারবর্জ্যং বোদ্ধব্যং, তত্র রূপত্বেন পঠিতত্বাত্| নীলারুণং চাষপক্ষবর্ণম্| মেচকং মর্দনাঞ্জনপিণ্ডবদীষত্কৃষ্ণরূক্ষম্| কর্বূরং নানাবর্ণং, তচ্চ স্নিগ্ধং স্নেহদ্রবধাতুযোগাত্| চন্দ্রকোপগতং মযূরপিচ্ছচন্দ্রকৈরিব ধাতুস্নেহৈরুপগতম্| উক্তং হি করবীরাচার্যেণ– “চন্দ্রকৈঃ শিখিপিচ্ছাভৈর্নীলপীতাদিরাজিভিঃ| আবৃতং বেশবারাম্বুমজ্জক্ষীরোপমং ত্যজেত্||” ইতি| তদেব ঘনং ধাত্বন্তরব্যামিশ্রত্বাত্| কুণপং শবদুর্গন্ধি| মস্তুলুঙ্গাভং মস্তুলুঙ্গং মস্তকাভ্যন্তরস্নেহঃ ঘৃতকেতি খ্যাতং, তত্সদৃশম্| কুথিতং পূতি| তৃষ্ণেত্যাদি|– তৃষ্ণাদীনাং পার্শ্বাস্থিশূলান্তানাং দ্বন্দ্বং কৃত্বা মত্বর্থীয ইনিঃ, তৃষ্ণাদিযুক্তমিত্যর্থঃ| অত্র সম্মূর্ছা মনোমোহঃ, সম্মোহ ইন্দ্রিযমোহঃ, ইত্যপৌনরুক্ত্যম্| চকারাচ্চরকোক্তঃ (চ. চি. অ. ১৯) সহসোপরতাতীসারশ্চাসাধ্যো বোদ্ধব্যঃ| পক্ববলীগুদং পক্বা বলযো গুদে যস্য তং পক্ববলীগুদম্| অসংবৃতগুদং গুদসংবরণাক্ষমম্| তমেব ক্ষীণং বলোপচযরহিতম্| দূরাধ্মাতং ভৃশমাধ্মানযুক্তং, তস্য বিরেকসাধ্যত্বেনাতিসারবিরুদ্ধোপক্রমত্বাত্; দুরাত্মানমিতি পাঠান্তরে দুষ্টান্তঃকরণম্, অজিতেন্দ্রিযমিতি জেজ্জটঃ| উপদ্রুতমতিসারোপদ্রবৈঃ শোথাদিভির্যুক্তম্| যদুক্তম্– “শোথং শূলং জ্বরং তৃষ্ণাং শ্বাসং কাসমরোচকম্| ছর্দিং মূর্ছাং চ হিক্কাং চ দৃষ্ট্বাঽতীসারিণং ত্যজেত্||” ইতি গুদে পক্বে গতোষ্মাণমিতি গুদপাকারম্ভকপিত্তে বর্তমানেঽপি গতোষ্মাণং শীতগাত্রং নষ্টাগ্নিং বা| অতিসারকিণম্ অতীসারযুক্তম্| “বাতাতীসারাভ্যাং কুক্ চ||” (পা. অ. অ. ৫ পা. সূ. ১২৯) ইতি কুক্, চাদিনিঃ| বিশেষেণেতি বচনাদ্বালস্যাপ্যতিসারোঽসাধ্য ইতি বোধযতি| যদাহ সুশ্রুতশ্চিকিত্সাযাম্– “কৃচ্ছ্রশ্চাযং বালবৃদ্ধেষ্বসাধ্যঃ||” (সু. উ. তং. অ. ৪০) ইতি| এতচ্চাবলত্বে সতি বোদ্ধব্যম্||১৪-১৯||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যলক্ষণমাহ– পক্বেত্যাদি| ভিষক্ পক্বজাম্ববসঙ্কাশাদিপুরীষং তথা তৃষ্ণাদিযুক্তমতিসারিণং পুরুষং চ বর্জযেদিতি সম্বন্ধঃ| পক্বজাম্ববসঙ্কাশং পক্বজম্বূফলসদৃশবর্ণং স্নিগ্ধকৃষ্ণবর্ণমিত্যর্থঃ| যকৃত্পিণ্ডনিভং কালখণ্ডসদৃশং কৃষ্ণলোহিতমিত্যর্থঃ| তনু স্বচ্ছম্| ঘৃতাদীনাং মাংসধাবনতোযান্তানামিবাভা প্রতিভাসো যস্য স তথা| বেসবারো– “নিরস্থি পিশিতং পিষ্টম্” ইত্যাদিপরিভাষিতমাংসপ্রকারস্তেন মিশ্রমম্বু তত্সদৃশম্| কৃষ্ণমঞ্জনপ্রখ্যম্| এতচ্চ কৃষ্ণাদিকং পিত্তাতিসারবর্জ্য বোধ্যং, তত্র রূপত্বেন পঠিতত্বাত্| নীলারুণপ্রভং চাষপক্ষপ্রতিভাসম্| মেচকং খঞ্জনবর্ণবদীষত্কৃষ্ণরূক্ষম্| কর্বুরং নানাবিধবর্ণম্| স্নিগ্ধং চিক্কণং, ধাতুস্নেহযোগাত্| চন্দ্রকোপগতং মযূরপিচ্ছচন্দ্রকৈরিব ধাতুস্নেহৈরুপগতম্| উক্তং চ করবীরাচার্যেণ– “চন্দ্রকৈঃ শিখিপিচ্ছাভৈর্নীলপীতাদিরাজিভিঃ| আবৃতং বেসবারাম্বুমজ্জক্ষীরোপমং ত্যজেত্” ইতি| তত্ ঘনং ধাত্ববযবমিশ্রিতত্বাত্| কুণপং শবগন্ধতুল্যগন্ধমিত্যর্থঃ| মস্তুলুঙ্গাভং মস্তুলুঙ্গো মস্তকাভ্যন্তরগতঃ স্নেহঃ| সুগন্ধং গন্ধযুক্তম্| কুথিতং পূতি বহুমাত্রাধিকত্বাত্| যাদৃশমতিসারিণং ত্যজেত্তাদৃশমাহ– তৃষ্ণাদীনাং পার্শ্বাস্থিশূলান্তানাং দ্বন্দ্বং কৃত্বা মত্বর্থীয ইনিঃ, তৃষ্ণাদিভির্যুক্তমিত্যর্থঃ| অত্র সম্মূর্ছা ইন্দ্রিয মনোমোহঃ, পুনঃ সম্মোহ ইন্দ্রিযমোহঃ, অতো ন পৌনরুক্ত্যম্| অরতিঃ প্রসিদ্ধা| পক্ববলীগুদং পক্বা বল্যো গুদে যস্য স তং তথা| প্রলাপোঽসম্বদ্ধভাষণং; তাদৃশং ত্যজেদিত্যর্থঃ| পুনঃ কীদৃশং ত্যজেদিত্যাহ– অসংবৃতগুদং গুদসংবরণাক্ষম্| ক্ষীণং বলোপচযরহিতম্| দুরাত্মানমিত্যন্যে, দুষ্টান্তঃকরণাদজিতেন্দ্রিযমিত্যর্থঃ| উপদ্রুতং অতীসারোপদ্রবৈঃ শোথাদিভির্যুক্তম্| যদাহুঃ– “তৃষ্ণা দাহোঽরুচিঃ শোথঃ পার্শ্বশূলোঽরতির্বমিঃ| গুদপাকঃ প্রলাপশ্চ হ্যাধ্মানং শ্বাসকাসকৌ|| মূর্ছা হিক্কা মদঃ শূলং বহুবেগো জ্বরস্তথা|” এতৈরুপদ্রবৈর্জুষ্টমতিসারিণমুত্সৃজেত্ ইতি| অন্যচ্চ– “হস্তপাদাঙ্গুলেঃ সন্ধিপ্রপাকো মূত্রনিগ্রহঃ| পুরীষস্যোষ্ণতা চৈব মরণাযাতিসারিণাম্”ইতি| গুদে পক্বে গতোষ্মাণমিতি গুদপাকারম্ভকপিত্তে বিদ্যমানেঽপি গতোষ্মাণং শীতগাত্রং নষ্টাগ্নিং চাতিসারিণং ত্যজেত্| অত্র শ্লোকদ্বযং কেচন পঠন্তি– “শ্বাসশূলপিপাসার্তং ক্ষীণং জ্বরনিপীডিতম্| বিশেষেণ নরং বৃদ্ধমতীসারো বিনাশযেত্|| বালে বৃদ্ধে ত্বসাধ্যোঽযং লিঙ্গৈরেতৈরুপদ্রুতঃ| অপি যূনামসাধ্যঃ স্যাদতিদুষ্টেষু ধাতুষু”ইতি| এতত্তু মাধবাসঙ্গ্রহীতত্বাত্ মধুকোষকৃতা চ স্বীকৃতম্| অতীসারোপদ্রবানাহ– শোথমিত্যাদি| সুকরব্যাখ্যানম্||১৪-১৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ননু, রক্তজোঽপ্যতিসারোঽস্তি তস্য সপ্তমত্বাপত্তেরুক্তং ষট্কং বিরুধ্যতে, ইত্যাশঙ্ক্য পৈত্তিকস্যৈবাযমবস্থাবিশেষ ইত্যাহ– পিত্তেত্যাদি| পৈত্তিকেঽতীসারে বিদ্যমানে ভবিষ্যতি বা পিত্তকৃন্তি পিত্তকারকাণি দ্রব্যাণ্যত্যর্থং প্রভূতমভীক্ষ্ণং নিরন্তরমশ্নাতি তদা রক্তাতীসার উল্বণো মহানুপজাযত ইতি সম্বন্ধঃ| অত্র চারুণকৃষ্ণপাণ্ডুত্বাদিনা বাতাদযো দূষকা বোদ্ধব্যাঃ| যদুক্তম্– “দোষলিঙ্গেন মতিমান্ সংসর্গং তত্র লক্ষযেত্||” ইতি| এবং স্নেহাজীর্ণবিসূচিকাবিষার্শঃক্রিমিপ্রভৃতিজন্যেষ্বতীসারেষু ষট্কাতিরিক্তত্বং প্রতিক্ষিপ্তং বোদ্ধব্যম্, অব্যভিচরিতদোষলিঙ্গত্বাদিতি জেজ্জটঃ||২০||

আতঙ্কদর্পণ ব্যাখ্যা (বাচস্পতি বৈদ্য কৃত)

ননু রক্তজোঽপ্যতীসারোঽস্তি তস্য সপ্তমত্বপ্রসঙ্গাদুক্তষট্কত্বং বিরুধ্যত ইত্যাশঙ্ক্য পৈত্তিকস্যাযমবস্থাবিশেষ ইত্যাহ– পৈত্তিকেঽতীসারে বিদ্যমানে ভবিষ্যতি বা পিত্তকৃন্তি পিত্তকারীণি দ্রব্যাণি অত্যর্থং প্রভূতমভীক্ষ্ণং নিরন্তরমশ্নাতি তদা রক্তাতীসার উল্বণো মহানুপজাযতে ইতি সম্বন্ধঃ| অত্র চারুণকৃষ্ণপাণ্ডুত্বাদিনা বাতাদযো দোষা দুষ্টা বোদ্ধব্যাঃ| যদুক্তম্– “দোষলিঙ্গেন মতিমান্সংসর্গং তত্র লক্ষযেত্” ইতি| এবং স্নেহাজীর্ণবিসূচিকাবির্ষাশঃ কৃমিপ্রভৃতিজন্যেষ্বপ্যতীসারেষু ষট্কাতিরিক্তত্বং প্রতিক্ষিপ্তং বোধ্যম্, অব্যভিচারিতদোষলিঙ্গত্বাদিতি জেজ্জটঃ||২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অথ দ্রবসরণাদামপক্বলক্ষণযোগাত্ প্রবাহিকাতীসারযোঃ সাধর্ম্যম্, অতোঽতীসারাধিকারে প্রবাহিকাসম্প্রাপ্তিমাহ– বাযুরিত্যাদি| অতীসারে নানাবিধদ্রবধাতুসরণং, প্রবাহিকাযাং তু কফমাত্রসরণমিতি ভেদঃ| নিচিতং বলাসমহিতাশনস্য সঞ্চিতং কফং, মলাক্তং পুরীষসহিতং, বাযুর্বাতঃ, অধস্তান্নুদতি গুদেন পাতযতি| প্রবাহতঃ প্রবাহণং কুর্বতঃ| ভোজাদৌ ত্বিযং বিস্রংসীতি নাম্না পঠ্যতে, পরাশর ত্বন্তর্গ্রন্থিরিতি, হারীতস্তু নিশ্চারকাখ্যামেতাং পঠতি| যদাহ– “প্রবাহিকেতি সা জ্ঞেযা কৈশ্চিন্নিশ্চারকস্তু সঃ|” ইতি||২১||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ দ্রবসরণাদামপক্বলক্ষণযোগাচ্চ প্রবাহিকাতিসারযোঃ সাধর্ম্যমতোঽতীসারাধিকারে প্রবাহিকাসম্প্রাপ্তিমাহ– বাযুরিত্যাদি| অতীসারে নানাদ্রবধাতুসরণং প্রবাহিকাযাং তু কফমাত্রসরণমিতি ভেদঃ| দুষ্টো বাযুরহিতাশনস্য সঞ্চিতং বলাসং শ্লেষ্মাণং মলাক্তং পুরীষসহিতমধস্তান্নুদতি গুদেন পাতযতি| প্রবাহমাণস্য প্রবাহণং কুর্বতঃ, বলাসমুপলক্ষণং, তেন পিত্তং রক্তং বা নিচিতং জ্ঞেযম্| ভোজদৌ ত্বিযং বিস্রংসীতি নাম্না পঠ্যতে, পরাশরে তু অন্তর্গ্রন্থিরিতি, শ্রীহারীতস্তু নিশ্চারকাখ্যাং পঠতি, নির্বাহিকেত্যেকে||২১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যা বাতাদিভেদেন রূপমাহ– প্রবাহিকেত্যাদি| ননু, বাযুঃ প্রবৃদ্ধো নিচিতং বলাসমিত্যুক্তং তত্ কথং বাতকৃতেতি? উচ্যতে, আধিক্যেন ব্যপদেশাত্| ননু, তথাঽপি পিত্তরক্তসম্ভবা কুতঃ? উচ্যতে– অহিতাশনস্যেত্যুক্তম্, আহারো হি বিরুদ্ধস্তস্যামবস্থাযাং পিত্তং রক্তং চ কোপযতি, তে চ পশ্চাদ্বাতস্যানুবলে স্বলিঙ্গং যদা দর্শযতস্তদা তাভ্যাং ব্যপদেশঃ| স্নেহরূক্ষপ্রভবা ইতি স্নেহপ্রভবা কফজা, রূক্ষপ্রভবা বাতজা; তুশব্দাচ্চ তীক্ষ্ণোষ্ণপ্রভবা পিত্তজা রক্তজা চ| লিঙ্গং বাতাদিভেদেন লক্ষণম্| ক্রমমামপক্বভেদেন চিকিত্সাক্রমমিতি||২২||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য বাতাদিভেদেন রূপমাহ– প্রবাহিকেত্যাদি| বাতকৃতা সশূলা ভবতি, পিত্তজা দাহযুক্তা, কফজা কফযুক্তা, সশোণিতা সরুধিরা তজ্জাতত্বাত্| তাসাং হেতুমাহ– স্নেহেত্যাদি| স্নেহপ্রভবা কফজা, রূক্ষপ্রভবা বাতজা| তুশব্দোঽবধারণে| তেন তীক্ষ্ণোষ্ণপ্রভবা পিত্তজা রক্তজা চেতি| তাসাং চতসৄণাং অতীসারবদাদিশেত্; বাতাদিভেদেন লিঙ্গং লক্ষণম্, আমপক্বভেদেন পাচনং, ক্রমং চিকিত্সাক্রমমিত্যর্থঃ||২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতবিষ্টম্ভাদুদাবর্তাদ্বা মলাপ্রবৃত্তাবতীসারনিবৃত্তিরিতি শঙ্কানিরাসার্থমতীসারনিবৃত্তিলক্ষণমাহ– যস্যেত্যাদি| উচ্চারং বিনা যস্য মূত্রং প্রবর্ততে, সম্যগিতি সম্যক্প্রবৃত্যা ন হীনযোগেনেত্যর্থঃ| বাযুশ্চ গচ্ছতি, ‘গুদেন’ ইতি শেষঃ| স্থিতো নিবৃত্তিং গতঃ| উদরামযোঽতীসারঃ, প্রকরণাত্| এতেন সম্প্রাপ্তিভঙ্গ উক্তঃ| অতীসারে হি সম্প্রাপ্তিরিযম্– যন্মূত্রোচিতোঽপি দ্রবধাতুর্গুদেনৈব প্রবর্ততে, সর্বস্যৈবাব্ধাতোর্গুদপ্রবৃত্তত্বাত্; যদা তু মূত্রমার্গেণ প্রবর্ততে, তদাঽপি পুরীষপ্রবৃত্তিসমকালমিতি||২৩||

আতঙ্কদর্পণ ব্যাখ্যা (বাচস্পতি বৈদ্য কৃত)

অতীসারনিবৃত্তিলক্ষণমাহ– যস্যেত্যাদি| যস্যাতীসারিণ উচ্চারং পুরীষং বিনা মূত্রং প্রবর্ততে বাযুশ্চ গচ্ছতীতি ‘গুদেন’ ইতি শেষঃ| দীপ্তাগ্নেঃ প্রবৃদ্ধজঠরানলস্য, অতঃ সম্যক্পাকাত্ লঘুকোষ্ঠস্য| তস্যাতীসারপ্রকরণত্বাত্ উদরামযোঽতীসারঃ| স্থিতো গতঃ, নিবৃত্ত ইত্যর্থঃ||২৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীবিজযরক্ষিতকৃতাযাং মধুকোশব্যাখ্যাযামতীসারনিদানং সমাপ্তম্||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানটীকাযামাতঙ্কদর্পণাভিধাযামতীসারনিদানং সমাপ্তম্||৩||