68. bālarōganidānam

Adhikarana vAtadUShita-pittadUShita-kaphadUShita-dvandvaduShTa-tridoShaduShTastanyapAnajanyabAlarogalakShaNam (1-3) · Śloka 4

অথ বালরোগনিদানম্ | বাতদুষ্টং শিশুঃ স্তন্যং পিবন্ বাতগদাতুরঃ | ক্ষামস্বরঃ কৃশাঙ্গঃ স্যাদ্বদ্ধবিণ্মূত্রমারুতঃ ||১|| স্বিন্নো ভিন্নমলো বালঃ কামলাপিত্তরোগবান্ | তৃষ্ণালুরুষ্ণসর্বাঙ্গঃ পিত্তদুষ্টং পযঃ পিবন্ ||২|| কফদুষ্টং পিবন্ ক্ষীরং লালালুঃ শ্লেষ্মরোগবান্ | নিদ্রান্বিতো জডঃ শূনবক্ত্রাক্ষশ্ছর্দনঃ শিশুঃ ||৩|| দ্বন্দ্বজে দ্বন্দ্বজং রূপং সর্বজে সর্বলক্ষণম্ |৪|

বালরোগাণাং দুষ্টস্তন্যেন সম্ভবাত্তদনন্তরং তানাহ– বাতদুষ্টমিত্যাদি| বাতগদাতুর ইতি বক্ষ্যমাণক্ষামস্বরাদিযুক্তঃ| তৃষ্ণালুরিতি তৃষ্ণাবান্| লালালুরিতি লালাস্রাবযুক্তঃ| ছর্দন ইতি স্তন্যবান্তিকরঃ||১-৩||–

Adhikarana shishorvaktumakShamasyAntargatavedanAj~jAnopAyAH (4-7) · Śloka 7

শিশোস্তীব্রামতীব্রাং চ রোদনাল্লক্ষযেদ্রুজম্ ||৪|| স যং স্পৃশেদ্ভৃশং দেশং যত্র চ স্পর্শনাক্ষমঃ | তত্র বিদ্যাদ্রুজং মূর্ধ্নি রুজং চাক্ষিনিমীলনাত্ ||৫|| হৃদি জিহ্বৌষ্ঠদশনশ্বাসমুষ্টিনিপীডনৈঃ | কোষ্ঠে বিবন্ধবমথুস্তনদংশান্ত্রকূজনৈঃ | আধ্মানপৃষ্ঠনমনজঠরোন্নমনৈরপি ||৬|| বস্তৌ গুহ্যে চ বিণ্মূত্রসঙ্গত্রাসদিগীক্ষণৈঃ | স্রোতাংস্যঙ্গানি সন্ধীংশ্চ পশ্যেদ্যত্নান্মুহুর্মুহুঃ ||৭||

শিশোর্বক্তুমক্ষমস্যান্তর্গতবেদনাজ্ঞানোপাযমাহ– শিশোরিত্যাদি| তীব্রাং রুজং বহুরোদনাত্, অতীব্রামল্পরোদনাত্ লক্ষযেত্||৪-৭||

Adhikarana kukUNakalakShaNam (8-9) · Śloka 9

কুকূণকঃ ক্ষীরদোষাচ্ছিশূনামেব বর্ত্মনি | জাযতে তেন তন্নেত্রং কণ্ডূরং চ স্রবেন্মুহুঃ ||৮|| শিশুঃ কুর্যাল্ললাটাক্ষিকূটনাসাবঘর্ষণম্ | শক্তো নার্কপ্রভাং দ্রষ্টুং ন বর্ত্মোন্মীলনক্ষমঃ ||৯||

বালানামেব দুষ্টস্তন্যপানাদ্বর্ত্মরোগমাহ– কুকূণক ইত্যাদি| কুকূণকঃ ‘কোথ’ ইতি খ্যাতঃ| স্রবেন্মুহুরিতি পিচ্চিটস্রুতিযুক্তং ভবতীত্যর্থঃ| ন বর্ত্মোন্মীলনক্ষম ইতি ন বর্ত্মচালনপটুঃ||৮-৯||

Adhikarana pArigarbhikalakShaNam (10-11) · Śloka 11

মাতুঃ কুমারো গর্ভিণ্যাঃ স্তন্যং প্রাযঃ পিবন্নপি | কাসাগ্নিসাদবমথুতন্দ্রাকার্শ্যারুচিভ্রমৈঃ ||১০|| যুজ্যতে কোষ্ঠবৃদ্ধ্যা চ তমাহুঃ পারিগর্ভিকম্ | রোগং পরিভবাখ্যং চ যুঞ্জ্যাত্তত্রাগ্নিদীপনম্ ||১১||

পারিগর্ভিকমাহ– মাতুরিত্যাদি| পিবন্নপীতি অপিশব্দাদপিবন্নপি| তমাহুঃ পারিগর্ভিকমিতি পারিগর্ভিকোঽহিণ্ডীতি খ্যাতঃ; তস্যৈব পরিভবাখ্য ইতি নামান্তরং, বালং পরিভবতীতি পরিভবঃ, স এব আখ্যা যস্য তম্| উপশযেনাপি তজ্জ্ঞানমাহ– যুঞ্জ্যাদিত্যাদি||১০-১১||

Adhikarana tAlukaNTakalakShaNam (12-13) · Śloka 13

তালুমাংসে কফঃ ক্রুদ্ধঃ কুরুতে তালুকণ্টকম্ | তেন তালুপ্রদেশস্য নিম্নতা মূর্ধ্নি জাযতে ||১২|| তালুপাতঃ স্তনদ্বেষঃ কৃচ্ছ্রাত্ পানং শকৃদ্দ্রবম্ | তৃডক্ষিকণ্ঠাস্যরুজা গ্রীবাদুর্ধরতা বমিঃ ||১৩||

তালুকণ্টকমাহ– তালুমাংস ইত্যাদি| অস্যৈব লক্ষণং তালুপাত ইত্যাদি| তালুপাত ইত্যভ্যন্তরে তালুনোঽধঃপাতঃ| কৃচ্ছ্রাত্ পানমিত্যত্র ‘স্তন্যস্য’ ইতি শেষঃ| শকৃদ্দ্রবং ভিন্নপুরীষতা| গ্রীবাদুর্ধরতা গ্রীবাযা দুঃখেন ধারণম্| বমিঃ স্তন্যস্য বান্তিঃ||১২-১৩||

Adhikarana mahApadmanAmno visarpasya lakShaNam (14) · Śloka 15

বিসর্পস্তু শিশোঃ প্রাণনাশনো বস্তিশীর্ষজঃ | পদ্মবর্ণো মহাপদ্মনামা দোষত্রযোদ্ভবঃ ||১৪|| শঙ্খাভ্যাং হৃদযং যাতি হৃদযাদ্বা গুদং ব্রজেত্ |১৫|

মহাপদ্মনামানং বিসর্পমাহ– বিসর্পস্ত্বিত্যাদি| বস্তিশীর্ষজ ইতি বস্তিজঃ শীর্ষজশ্চ, শীর্ষং শিরঃ| পদ্মবর্ণ ইতি লোহিতপদ্মবর্ণঃ| শঙ্খাভ্যাং হৃদযং যাতীতি শীর্ষজঃ| পদ্মপত্রতুল্যবর্ণতাং মুখতালুনি বহির্দেশে বেতি বদন্তি| হৃদযাদ্গুদং যাতীতি বস্তিজঃ; ঊর্ধ্বং হৃদযং গত্বা গুদং যাতীত্যর্থঃ| অত্র পদ্মসবর্ণতা বস্তিদেশে গুদে চ| বাশব্দশ্চাত্র ব্যবস্থিতবিকল্পবচনঃ||১৪||–

Adhikarana bAlaroge katicit kShudrarogANAM kathanam (15) · Śloka 15

ক্ষুদ্ররোগে চ কথিতে ত্বজগল্ল্যহিপূতনে ||১৫||

অন্যৌ দ্বৌ বিকারৌ বালানাং ভবতস্তাবাহ– ক্ষুদ্রেত্যাদি| ‘স্নিগ্ধাঃ সবর্ণাঃ’ ইত্যাদিনাঽজগল্লিকা, ‘কণ্ডূযনাত্’ ইত্যাদিনাঽহিপূতনা||১৫||

Adhikarana bAlaroge kAyacikitsoktajvarAdirogANAM nirdeshaH (16) · Śloka 16

জ্বরাদ্যা ব্যাধযঃ সর্বে মহতাং যে পুরেরিতাঃ | বালদেহেঽপি তে তদ্বদ্বিজ্ঞেযাঃ কুশলৈঃ সদা ||১৬||

অন্যেঽপি বিকারা বালানাং সম্ভবন্তীত্যতিদেশেন তানাহ– জ্বরাদ্যা ইত্যাদি| পুরেরিতা ইতি পূর্বোক্তাঃ| তে তদ্বদিতি তে জ্বরাদযস্তাদৃশা জ্ঞেযাঃ| কুশলৈরিতি বিজ্ঞৈঃ||১৬||

Adhikarana grahajuShTAnAM sAmAnyalakShaNam (17-19) · Śloka 20

ক্ষণাদুদ্বিজতে বালঃ ক্ষণাত্ত্রস্যতি রোদিতি | নখৈর্দন্তৈর্দারযতি ধাত্রীমাত্মানমেব বা ||১৭|| ঊর্ধ্বং নিরীক্ষতে দন্তান্ খাদেত্ কূজতি জৃম্ভতে | ভ্রুবৌ ক্ষিপতি দন্তৌষ্ঠং ফেনং বমতি চাসকৃত্ ||১৮|| ক্ষামোঽতি নিশি জাগর্তি শূনাক্ষো ভিন্নবিট্স্বরঃ | মাংসশোণিতগন্ধিশ্চ ন চাশ্নাতি যথা পুরা ||১৯|| সামান্যং গ্রহজুষ্টানাং লক্ষণং সমুদাহৃতম্ |২০|

প্রাযেণ শৌচভ্রংশাদিনা স্কন্দগ্রহাদযো নব বালেষ্বাবেশং কুর্বন্ত্যতস্তত্পরিজ্ঞানায সামান্যলক্ষণমাহ– ক্ষণাদুদ্বিজতে বাল ইত্যাদি| এতে গ্রহাঃ পূজার্থং বালান্ হিংসন্তি| যদুক্তং সুশ্রুতে– “ধাত্রীমাত্রোঃ প্রাক্ প্রদিষ্টাপচারাচ্ছৌচভ্রষ্টান্ মঙ্গলাচারহীনান্| ত্রস্তান্ হৃষ্টাংস্তর্জিতান্ ক্রন্দিতান্ বা পূজাহেতোর্হিংস্যুরেতে কুমারান্||” (সু. উ. তং. অ. ২৭) ইতি| উদ্বিজত ইত্যুদ্বিগ্নো ভবতি; উদ্বিগ্নো বিহ্বলঃ, ন তু বিভেতীত্যর্থঃ, ত্রস্যতীত্যনেন পৌনরুক্ত্যপ্রসঙ্গাত্| কূজত্যার্তনাদং করোতি| ভ্রুবৌ ক্ষিপতীতি ভ্রূভঙ্গং রচযতি| দন্তৌষ্ঠমিত্যত্র ক্ষিপতীতি সম্বধ্যতে| ক্ষিপতি খাদতি, ধাতূনামনেকার্থত্বাত্| ভিন্নবিট্স্বর ইতি ভিন্নবিট্ ভিন্নশকৃত্, ভিন্নস্বরঃ স্বরভেদবান্| মাংসশোণিতগন্ধিরিতি বিস্রগন্ধিঃ| ন চাশ্নাতি যথা পুরেতি পূর্ববন্ন ভক্ষযতীত্যর্থঃ||১৭-১৯||–

Adhikarana skandagrahagRuhItalakShaNam (20-21) · Śloka 22

একনেত্রস্য গাত্রস্য স্রাবঃ স্পন্দনকম্পনম্ ||২০|| ঊর্ধ্বং দৃষ্ট্যা নিরীক্ষেত বক্রাস্যো রক্তগন্ধিকঃ | দন্তান্ খাদতি বিত্রস্তঃ স্তন্যং নৈবাভিনন্দতি ||২১|| স্কন্দগ্রহগৃহীতানাং রোদনং চাল্পমেব চ |২২|

সামান্যলিঙ্গমভিধায বিশেষগ্রহলিঙ্গমাহ– একনেত্রস্যেত্যাদি| একনেত্রস্য বামস্য দক্ষিণস্য বা স্রাবোঽশ্রুস্রুতিঃ প্রভাবাত্; গাত্রস্য স্রাবো ঘর্মযুক্তগাত্রতেত্যর্থঃ| স্পন্দনকম্পনমিতি স্পন্দনং মনাক্ চলনং, কম্পনং মহতা বেগেন বেপনং; স্পন্দনং কম্পনং বা ভবতীত্যর্থঃ| বক্রাস্যো বক্রমুখঃ| রক্তগন্ধিক ইত্যেতত্ সামান্যলক্ষণলব্ধমপ্যতিশযার্থমুক্তম্; এবমন্যত্রাপি সামান্যলক্ষণে পুনরুক্তে ব্যাখ্যেযম্||২০-২১||–

Adhikarana skandApasmAralakShaNam (22) · Śloka 22

নষ্টসঞ্জ্ঞো বমেত্ ফেনং সঞ্জ্ঞাবানতিরোদিতি | পূযশোণিতগন্ধিত্বং স্কন্দাপস্মারলক্ষণম্ ||২২||

স্কন্দাপস্মারলক্ষণমাহ– নষ্টেত্যাদি| নষ্টসঞ্জ্ঞো মূর্ছিতঃ সন্ ফেনং বমতি, তথা সঞ্জ্ঞাবান্ সন্নতিরোদিতি||২২||

Adhikarana shakunigrahagRuhItalakShaNam (23) · Śloka 23

স্রস্তাঙ্গো ভযচকিতো বিহঙ্গগন্ধিঃ সাস্রাবব্রণপরিপীডিতঃ সমন্তাত্ | স্ফোটৈশ্চ প্রচিততনুঃ সদাহপাকৈর্বিজ্ঞেযো ভবতি শিশুঃ ক্ষতঃ শকুন্যা ||২৩|| (সু. উ. তং. অ. ২৭) |

শকুনীলক্ষণমাহ– স্রস্তাঙ্গ ইত্যাদি| স্রস্তাঙ্গ ইতি অঙ্গস্রংসবদ্ব্যথাবান্| ভযচকিত ইতি ভযহেতুর্ভযং ভযানকমুচ্যতে, ততশ্চকিতঃ; অসতি ভযহেতৌ ত্রস্যতীত্যর্থঃ| বিহঙ্গগন্ধিরিতি বিহঙ্গস্যেব গন্ধো যস্য স তথা, ‘উপমানাচ্চ’ ইতি সমাসান্ত ‘ই’ প্রত্যযঃ| বিহঙ্গশব্দেন জলচরা মাংসাদাশ্চ পক্ষিণো গৃহ্যন্তে, বিস্রগন্ধিত্বাত্| হিরণ্যাক্ষেঽপ্যুক্তম্– “সংস্রাবদাহপাকাদ্যৈশ্চিতঃ স্ফোটৈর্ভযান্বিতঃ| স্রস্তাঙ্গো বিস্রগন্ধিঃ স্যাচ্ছকুন্যা পীডিতঃ শিশুঃ||” ইতি| সাস্রাবব্রণপরিপীডিত ইতি স্ফোটৈরেব বিদীর্ণৈর্ব্রণরূপমাপন্নৈঃ পরিপীডিতঃ| স্ফোটৈশ্চ প্রচিততনুরিতি নবনবৈঃ স্ফোটৈর্ব্যাপ্ততনুঃ| ক্ষত ইত্যভিভূতঃ||২৩||

Adhikarana revatI-pUtanA-andhapUtanA-shItapUtanA-mukhamaNDikA-naigameyagrahagRuhItalakShaNam (24-30) · Śloka 30

ব্রণৈঃ স্ফোটৈশ্চিতং গাত্রং পঙ্কগন্ধং স্রবেদসৃক্ | ভিন্নবর্চা জ্বরী দাহী রেবতীগ্রহলক্ষণম্ ||২৪|| অতীসারো জ্বরস্তৃষ্ণা তির্যক্প্রেক্ষণরোদনম্ | নষ্টনিদ্রস্তথোদ্বিগ্নো গ্রস্তঃ পূতনযা শিশুঃ ||২৫|| ছর্দিঃ কাসো জ্বরস্তৃষ্ণা বসাগন্ধোঽতিরোদনম্ | স্তন্যদ্বেষোঽতিসারশ্চ অন্ধপূতনযা ভবেত্ ||২৬|| বেপতে কাসতে ক্ষীণো নেত্ররোগো বিগন্ধিতা | ছর্দ্যতীসারযুক্তশ্চ শীতপূতনযা শিশুঃ ||২৭|| প্রসন্নবর্ণবদনঃ সিরাভিরভিসংবৃতঃ | মূত্রগন্ধী চ বহ্বাশী মুখমণ্ডিকযা ভবেত্ ||২৮|| ছর্দিস্প(স্য)ন্দনকণ্ঠাস্যশোষমূর্ছাবিগন্ধিতাঃ | ঊর্ধ্বং পশ্যেদ্দশেদ্দন্তান্ নৈগমেযগ্রহং বদেত্ ||২৯|| প্রস্তব্ধাক্ষঃ স্তনদ্বেষী মুহ্যতে চানিশং মুহুঃ | তং বালমচিরাদ্ধন্তি গ্রহঃ সম্পূর্ণলক্ষণঃ | বিপরীততমং সাধ্যং চিকিত্সেদচিরার্দিতম্ ||৩০||

রেবতীগ্রহলক্ষণমাহ– ব্রণৈরিত্যাদি| ব্রণৈঃ পুরাণৈঃ, স্ফোটৈরবিদীর্ণৈর্নূতনৈঃ, চিতং ব্যাপ্তম্| গাত্রমিতি কর্তৃপদং, পঙ্কগন্ধং শটিতকর্দমগন্ধং, সমাসবিধেরনিত্যত্বাদিপ্রত্যযো ন ভবতি| পূতনালক্ষণমাহ– অতীসার ইত্যাদি| গ্রস্ত ইতি গৃহীত ইত্যর্থঃ||২৪-৩০||

Adhikarana puShpikA · Śloka 68

ইতি শ্রীমাধবকরবিরচিতে মাধবনিদানে বালরোগনিদানং সমাপ্তম্ ||৬৮||

ইতি শ্রীকণ্ঠদত্তকৃতাযাং মধুকোশব্যাখ্যাযাং বালরোগনিদানং সমাপ্তম্||৬৮||