38. galagaṇḍagaṇḍamālāpacīgranthyarbudanidānam

Adhikarana galagaNDasya sAmAnyalakShaNam (1) · Śloka 1

অথ গলগণ্ড-গণ্ডমালাপচী-গ্রন্থ্যর্বুদনিদানম্ | নিবদ্ধঃ শ্বযথুর্যস্য মুষ্কবল্লম্বতে গলে | মহান্ বা যদি বা হ্রস্বো গলগণ্ডং তমাদিশেত্ ||১|| (সু. নি. অ. ১১) |

বৃদ্ধিযুক্তমুষ্কসমানলিঙ্গত্বাত্তদনন্তরং গলগণ্ডনিদানম্| তস্য সামান্যলিঙ্গমাহ– নিবদ্ধঃ শ্বযথুরিত্যাদি| নিবদ্ধোঽনুবন্ধবান্| মুষ্কবদণ্ডবত্| ভোজেঽপ্যুক্তম্– “মহান্তং শোথমল্পং বা হনুমন্যাগলাশ্রযম্| লম্বন্তং মুষ্কবদ্দৃষ্ট্বা গলগণ্ডং বিনির্দিশেত্||” ইতি||১||

Adhikarana galagaNDasamprAptiH (2) · Śloka 2

বাতঃ কফশ্চাপি গলে প্রদুষ্টো মন্যে চ সংশ্রিত্য তথৈব মেদঃ | কুর্বন্তি গণ্ডং ক্রমশঃ স্বলিঙ্গৈঃ সমন্বিতং তং গলগণ্ডমাহুঃ ||২|| (সু. নি. অ. ১১) |

তস্য সম্প্রাপ্তিমাহ– বাত ইত্যাদি| বাতকফমেদাংসি পৃথক্ গলগণ্ডকারণানি, তেন ত্রয এব গলগণ্ডাঃ; পৈত্তিকস্তু ন ভবত্যেব, ব্যাধিস্বভাবাত্; চাতুর্থকজ্বরবত্| চাতুর্থকে হি বচনম্– “চাতুর্থকো দর্শযতি প্রভাবং দ্বিবিধং জ্বরঃ| জঙ্ঘাভ্যাং শ্লৈষ্মিকঃ পূর্বং শিরস্তোঽনিলসম্ভবঃ||” (চ. চি. অ. ৩) ইতি| ক্রমশ ইত্যনেন শনৈরেব বর্ধনং দর্শযতি| স্বলিঙ্গৈঃ সমন্বিতমিতি “নিবদ্ধঃ শ্বযথুঃ” ইত্যাদিনা উক্তগলগণ্ডলিঙ্গৈরন্বিতম্||২||

Adhikarana vAtajagalagaNDalakShaNam (3) · Śloka 4

তোদান্বিতঃ কৃষ্ণসিরাবনদ্ধঃ শ্যাবোঽরুণো বা পবনাত্মকস্তু | পারুষ্যযুক্তশ্চিরবৃদ্ধ্যপাকো যদৃচ্ছযা পাকমিযাত্কদাচিত্ ||৩|| বৈরস্যমাস্যস্য চ তস্য জন্তোর্ভবেত্তথা তালুগলপ্রশোষঃ |৪| (সু. নি. অ. ১১) |

বাতজমাহ– তোদান্বিতে ইত্যাদি| চিরবৃদ্ধিরিতি বিকারপ্রভাবাত্ বাতজোঽপি চিরেণ বর্ধতে| যদৃচ্ছযা পাকমিযাদিতি কারণাপ্রতিনিযমেন কদাচিত্ পাকং যাতি, কারণাপ্রতিনিযমশ্চ বাহ্যোঽভিপ্রেতঃ, আভ্যন্তরস্তু পাককারণং পিত্তং রক্তং চ নিযতমেব| কদাচিদিতি ন সর্বকালম্| “যদৃচ্ছযা চৈব ভবেত্ কদাচিত্” ইতি পাঠান্তরে ‘পাক’ ইতি শেষঃ||৩||–

Adhikarana shleShmajagalagaNDalakShaNam (4-5) · Śloka 5

স্থিরঃ সবর্ণো গুরুরুগ্রকণ্ডূঃ শীতো মহাংশ্চাপি কফাত্মকস্তু ||৪|| চিরাভিবৃদ্ধিং ভজতে চিরাদ্বা প্রপচ্যতে মন্দরুজঃ কদাচিত্ | মাধুর্যমাস্যস্য চ তস্য জন্তোর্ভবেত্তথা তালুগলপ্রলেপঃ ||৫|| (সু. নি. অ. ১১) |

শ্লেষ্মজমাহ– স্থির ইত্যাদি| সবর্ণ ইতি প্রকৃতিসমবর্ণঃ||৪-৫||

Adhikarana medojagalagaNDalakShaNam (6) · Śloka 7

স্নিগ্ধো গুরুঃ পাণ্ডুরনিষ্টগন্ধো মেদোভবঃ কণ্ডুযুতোঽল্পরুক্ চ | প্রলম্বতেঽলাবুবদল্পমূলো দেহানুরূপক্ষযবৃদ্ধিযুক্তঃ ||৬|| স্নিগ্ধাস্যতা তস্য ভবেচ্চ জন্তোর্গলেঽনুশব্দং কুরুতে চ নিত্যম্ |৭| (সু. নি. অ. ১১) |

মেদোজমাহ– স্নিগ্ধ ইত্যাদি| দেহানুরূপক্ষযবৃদ্ধিযুক্ত ইতি দেহক্ষযে ক্ষযং, দেহবৃদ্ধৌ চ বৃদ্ধিং যাতীত্যর্থঃ| গলেঽনুশব্দমিতি অনুনাদং করোতি| ‘গলে তু শব্দম্’ ইতি পাঠান্তরং সুগমম্||৬||–

Adhikarana galagaNDasyAsAdhyalakShaNam (7) · Śloka 8

কৃচ্ছ্রাচ্ছ্বসন্তং মৃদুসর্বগাত্রং সংবত্সরাতীতমরোচকার্তম্ ||৭|| ক্ষীণং চ বৈদ্যো গলগণ্ডযুক্তং ভিন্নস্বরং চাপি বিবর্জযেচ্চ |৮| (সু. নি. অ. ১১) |

অসাধ্যতামাহ– কৃচ্ছ্রাচ্ছ্বসন্তমিত্যাদি| কৃচ্ছ্রাচ্ছ্বসন্তং দুঃখেন শ্বাসবিমোক্ষকারিণম্| ভিন্নস্বরং স্বরভেদবন্তম্||৭||–

Adhikarana gaNDamAlAlakShaNam (8) · Śloka 9

কর্কন্ধুকোলামলকপ্রমাণৈঃ কক্ষাংসমন্যাগলবঙ্ক্ষণেষু ||৮|| মেদঃকফাভ্যাং চিরমন্দপাকৈঃ স্যাদ্গণ্ডমালা বহুভিশ্চ গণ্ডৈঃ |৯| (সু. নি. অ. ১১) |

স্থানতুল্যতযা গণ্ডমালামিহৈবাহ– কর্কন্ধুকোলামলকপ্রমাণৈরিত্যাদি| কর্কন্ধুঃ শৃগালকোলিঃ, কোলং বৃহদ্বদরম্| মেদঃকফাভ্যামিতি মেদো দূষ্যং, কফো দোষোঽত্রারম্ভকঃ, মেদঃকফৌ প্রাধান্যেনোক্তৌ; তেন বাতপিত্তসম্বন্ধোঽপ্যত্র দ্রষ্টব্যঃ| যদাহ ভোজঃ– “বাতপিত্তকফা বৃদ্ধা মেদশ্চাপি সমাচিতম্| জঙ্ঘযোঃ কণ্ডরাঃ প্রাপ্য মত্স্যাণ্ডসদৃশান্ বহূন্|| কুর্বন্তি গ্রন্থিতাংস্তেভ্যঃ পুনঃ প্রকুপিতোঽনিলঃ| তান্ দোষানূর্ধ্বগো বক্ষঃকক্ষমন্যাগলাশ্রিতঃ|| নানাপ্রকারান্ কুরুতে গ্রন্থীন্ সা ত্বপচী মতা| তাং তু মালাকৃতিং বিদ্যাত্ কণ্ঠহৃদ্ধনুসন্ধিষু|| গণ্ডমালাং বিজানীযাদপচীতুল্যলক্ষণাম্|” ইতি| স্যাদ্গণ্ডমালেতি মালাতুল্যগণ্ডযোগাত্ গণ্ডমালা| গলমাত্র এব গণ্ডমালা চরকে পঠিতা| যথা– “মেদঃকফাচ্ছোণিতসঞ্চযোত্থো গলস্য মধ্যে গলগণ্ড একঃ স্যাদ্গণ্ডমালা বহুভিশ্চ গণ্ডৈঃ” (চ. চি. অ. ১২) ইতি||৮||–

Adhikarana apacIlakShaNam (9-10) · Śloka 10

তে গ্রন্থযঃ কেচিদবাপ্তপাকাঃ স্রবন্তি নশ্যন্তি ভবন্তি চান্যে ||৯|| কালানুবন্ধং চিরমাদধাতি সৈবাপচীতি প্রবদন্তি তজ্জ্ঞাঃ | সাধ্যাঃ স্মৃতাঃ পীনসপার্শ্বশূলকাসজ্বরচ্ছর্দিযুতাস্ত্বসাধ্যাঃ ||১০||

গণ্ডমালাতুল্যতযা অপচীমাহ– তে গ্রন্থয ইত্যাদি| তে ইতি গণ্ডমালারম্ভকদোষদূষ্যকৃতা যে গ্রন্থযস্ত এবেত্যর্থঃ| কালানুবন্ধং চিরমিতি চরকলানুবন্ধম্| সৈবাপচীতি তাদৃশী অমালারূপা অপচী ভণ্যতে| সৈবাপচীতি ইতিশব্দেনাভিহিতত্বাত্ প্রবদন্তীতি ক্রিযাযোগেঽপি ন দ্বিতীযা| অপচীনিরুক্তিশ্চাপরাপরোপচীযমানতযা| অত এব “চযপ্রকর্ষাদপচীং বদন্তি|” (সু. নি. অ. ১১) ইতি সুশ্রুতঃ| চযপ্রকর্ষশ্চাপরাপরভবনেনৈব, সাধুত্বং চ নৈরুক্ত্যেন বিধিনা| যদুক্তম্– “বর্ণাগমো বর্ণবিপর্যযশ্চ দ্বৌ চাপরৌ বর্ণবিকারনাশৌ| ধাতোস্তদর্থাতিশযেন যোগস্তদুচ্যতে পঞ্চবিধং নিরুক্তম্||” ইতি| অত এবোক্তম্– নশ্যন্তি ভবন্তি চান্য ইতি| সাধ্যাঃ স্মৃতা ইতি ছেদঃ| পীনসাদিভিরুপদ্রবৈরসাধ্যাঃ| অযং তু গ্রন্থিঃ চরকে গণ্ডমালাযামস্তি; সঙ্গ্রহকারেণ তু গণ্ডমালযা সহ তুল্যত্বাদপচ্যা অপচ্যামেব গ্রন্থিঃ পঠিতঃ||৯-১০||

Adhikarana grantherlakShaNam (11) · Śloka 11

বাতাদযো মাংসমসৃক্ প্রদুষ্টাঃ সন্দূষ্য মেদশ্চ তথা সিরাশ্চ | বৃত্তোন্নতং বিগ্রথিতং চ শোথং কুর্বন্ত্যতো গ্রন্থিরিতি প্রদিষ্টঃ ||১১|| (সু. নি. অ. ১১) |

অনন্তরমপচীগুডকতুল্যতযা গ্রন্থিমাহ– বাতাদয ইত্যাদি| বাতপিত্তকফাঃ প্রত্যেকং দুষ্টাঃ; দুষ্টিশ্চাত্র বৃদ্ধিরেব ন ক্ষযঃ, ক্ষীণানাং বিকারকরণাক্ষমত্বাত্| যদ্যেবং তর্হি কথং বাতাদিক্ষযে মন্দচেষ্টাদযঃ? উচ্যতে– তত্ক্ষযে বিরোধিদোষকোপাত্; যথা– মধুরস্নিগ্ধাদিভির্বাতে ক্ষীণে তত্সমানত্বাত্ শ্লেষ্মা প্রকুপ্যতি| বচনং হি– “বৃদ্ধিশ্চাপি বিরোধিনাম্|” ইতি| সন্দূষ্য মেদশ্চ মাংসমসৃক্ সিরাশ্চেত্যনেন মেদোজঃ কফসম্বন্ধাদ্যো ভবতি তথা সিরাজোঽপি বাযুনা সিরাদুষ্ট্যা যো জন্যতে স উচ্যতে| এবং পঞ্চ গ্রন্থযঃ| তথেতি সন্দূষ্য| মাংসমসৃগিতি অত্রাসৃজঃ ক্রমোল্লঙ্ঘনেন পাঠোঽপ্রাধান্যপ্রতিপাদনার্থঃ, বিসর্পে তু শোণিতমেব প্রধানম্| অত এব ক্বচিত্ চকারমপ্রাধান্যসূচকং নিবেশ্য ‘অসৃক্ চ’ ইতি পাঠঃ| চরকে তু গ্রন্থিঃ বাতকফজ এব গ্রন্থিবিসর্পশব্দেনোক্তঃ| বৃত্তোন্নতমিতি বৃত্তং বর্তুলম্, উন্নতম্ উচ্ছূনম্| বিগ্রথিতং কঠিনং, ককখটং বা; বিগ্রথিতত্বাদেব গ্রন্থিরিতি সঞ্জ্ঞা||১১||

Adhikarana vAtajagranthilakShaNam (12) · Śloka 12

আযম্যতে বৃশ্চ্যতি তুদ্যতে চ প্রত্যস্যতে মথ্যতি ভিদ্যতে চ | কৃষ্ণো মৃদুর্বস্তিরিবাততশ্চ ভিন্নঃ স্রবেচ্চানিলজোঽস্রমচ্ছম্ ||১২|| (সু. নি. অ. ১১) |

অনিলগ্রন্থিমাহ– আযম্যত ইত্যাদি| আযম্যতে আকৃষ্য দীর্ঘীক্রিযতে| বৃশ্চ্যতীতি ছিনত্তীব, অত্র দিবাদেরাকৃতিগণত্বাত্ ‘শ্যন্’ প্রত্যযঃ| প্রত্যস্যতে ক্ষিপ্যতে| মথ্যতি আলোডযতীব, অত্রাপি পূর্ববত্ সমাধানম্| ভিদ্যতে বিদীর্যত ইব| অস্রং স্রাবম্||১২||

Adhikarana pittajagranthilakShaNam (13) · Śloka 13

দন্দহ্যতে ধূপ্যতি বৃশ্চ্যতে চ পাপচ্যতে প্রজ্বলতীব চাপি | রক্তঃ সপীতোঽপ্যথবাঽপি পিত্তাদ্ভিন্নঃ স্রবেদুষ্ণমতীব চাস্রম্ ||১৩|| (সু. নি. অ. ১১) |

পিত্তগ্রন্থিমাহ– দন্দহ্যত ইত্যাদি| দন্দহ্যতে অত্যর্থং দহ্যতে অগ্নিনেব| পাপচ্যতে ভৃশং পচ্যত ইব ক্ষারেণ, কিংবা উত্ক্বথ্যত ইব| প্রজ্বলতীব জ্বলন্ ভস্মীভবতীব||১৩||

Adhikarana kaphajagranthilakShaNam (14) · Śloka 14

শীতোঽবিবর্ণোঽল্পরুজোঽতিকণ্ডুঃ পাষাণবত্ সংহননোপপন্নঃ | চিরাভিবৃদ্ধশ্চ কফপ্রকোপাদ্ভিন্নঃ স্রবেচ্ছুক্লঘনং চ পূযম্ ||১৪|| (সু. নি. অ. ১১) |

কফগ্রন্থিমাহ– শীত ইত্যাদি| অবিবর্ণঃ প্রকৃতিবর্ণঃ, ঈষদ্বিবর্ণ ইতি কশ্চিত্| পাষাণবত্ সংহননোপপন্ন ইতি পাষাণবত্ কঠিন ইত্যর্থঃ; কিংবা পাষাণবত্ ভবতি, সংহননোপপন্ন ইতি সংহতান্বিতো মহানিত্যর্থঃ||১৪||

Adhikarana medojagranthilakShaNam (15) · Śloka 15

শরীরবৃদ্ধিক্ষযবৃদ্ধিহানিঃ স্নিগ্ধো মহান্ কণ্ডুযুতোঽরুজশ্চ | মেদঃকৃতো গচ্ছতি চাত্র ভিন্নে পিণ্যাকসর্পিঃপ্রতিমং তু মেদঃ ||১৫|| (সু. নি. অ. ১১) |

মেদোজগ্রন্থিমাহ– শরীরেত্যাদি| শরীরবৃদ্ধিক্ষযবৃদ্ধিহানিরিতি শরীরবৃদ্ধিক্ষযাভ্যাং যথাক্রমং বৃদ্ধিহানী যস্য স তথা| মেদোজেষ্বেবং যুক্তিঃ ধাতুস্বভাবাত্ চিরস্থাযিত্বাদ্বা| গচ্ছতি চাত্র ভিন্নে পিণ্যাকসর্পিঃপ্রতিমং তু মেদ ইতি ভিন্নে সতি পিণ্যাকস্তিলকল্কঃ, সর্পিরত্র স্ত্যানং, তত্সদৃশং মেদঃ স্রবতি| ভোজেন তু মেদোগ্রন্থেঃ সম্প্রাপ্তিঃ পঠ্যতে| যথা– “মেদো বাযুর্যদা মাংসে নিক্ষিপেদথবা ত্বচি| তত্র মেদোভবগ্রন্থিঃ শ্যাবো ভবতি পাণ্ডুরঃ|| কৃশঃ কৃশে, মহান্ স্থূলে, গ্রন্থির্ভিন্নশ্চ পীডিতঃ| তিলকল্কনিভঃ স্রাবো ঘৃতবচ্চাস্য জাযতে||” ইতি||১৫||

Adhikarana sirAjagrantheH samprAptiH lakShaNaM ca (16-17) · Śloka 17

ব্যাযামজাতৈরবলস্য তৈস্তৈরাক্ষিপ্য বাযুস্তু সিরাপ্রতানম্ | সঙ্কুচ্য সম্পিণ্ড্য বিশোষ্য চাপি গ্রন্থিং করোত্যুন্নতমাশু বৃত্তম্ ||১৬|| গ্রন্থিঃ সিরাজঃ স তু কৃচ্ছ্রসাধ্যো ভবেদ্যদি স্যাত্ সরুজশ্চলশ্চ | স চারুজ শ্চাপ্যচলো মহাংশ্চ মর্মোত্থিতশ্চাপি বিবর্জনীযঃ ||১৭|| (সু. নি. অ. ১১) |

সিরাজগ্রন্থেঃ সম্প্রাপ্তিমাহ– ব্যাযামজাতৈরিত্যাদি| সঙ্কুচ্যেতি অন্তর্ভাবিতোঽত্র ণ্যর্থঃ, তেন সঙ্কোচ্যেত্যর্থঃ| সম্পিণ্ড্যেতি সংহতীকৃত্য| উন্নতমাশু বৃত্তমিতি অস্য সামান্যলক্ষণেনৈব সিদ্ধে পুনস্তদুক্তিরতিশযার্থম্| স চ সিরাজো গ্রন্থির্যদি সরুজশ্চলশ্চ স্যাত্তদা কৃচ্ছ্রসাধ্যঃ| স চারুজশ্চাপীত্যাদিনা ন সাধ্যঃ| স চেতি চকারেণারুজত্বাদিধর্মযোগাদপরেঽপি গ্রন্থযোঽসাধ্যা ইতি সূচযতি| যদুক্তং ভোজে– “পঞ্চৈতানরুজো গ্রন্থীন্ মর্মজানচলাংস্ত্যজেত্| কপোলগলমন্যাসু দুশ্চিকিত্স্যাশ্চ সন্ধিষু||” ইতি| অন্যে তু মাংসাসৃগ্ভ্যাং ষষ্ঠং গ্রন্থিং বদন্ত এবং পঠন্তি– “ মাংসাসৃজং চার্বুদলক্ষণেন তুল্যং হি দৃষ্টং ত্বথ লক্ষণজ্ঞৈঃ|” ইতি কিন্ত্বনার্ষোঽযং পাঠঃ, ভোজাদিসমানতন্ত্রেষ্বদৃষ্টত্বাত্||১৬-১৭||

Adhikarana arbudasamprAptiH (18-19) · Śloka 20

গাত্রপ্রদেশে ক্বচিদেব দোষাঃ সম্মূর্ছিতা মাংসমসৃক্ প্রদূষ্য | বৃত্তং স্থিরং মন্দরুজং মহান্তমনল্পমূলং চিরবৃদ্ধ্যপাকম্ ||১৮|| কুর্বন্তি মাংসোচ্ছ্রযমত্যগাধং তদর্বুদং শাস্ত্রবিদো বদন্তি | বাতেন পিত্তেন কফেন চাপি রক্তেন মাংসেন চ মেদসা বা ||১৯|| তজ্জাযতে তস্য চ লক্ষণানি গ্রন্থেঃ সমানানি তদা ভবন্তি |২০| (সু. নি. অ. ১১) |

মাংসশোণিতদূষ্যসাম্যাদর্বুদাভিধানম্| তস্য সম্প্রাপ্তিমাহ– গাত্রপ্রদেশে ক্বচিদিত্যাদি| ক্বচিদেবেত্যনেনানিযতদেশে, ন পুনরপচীবন্নিযতদেশে| “সম্মূর্ছিতা” ইতি পাঠান্তরে সম্মূর্ছিতা বৃদ্ধাঃ, দূষ্যসংসৃষ্টা ইতি কার্তিকঃ| মাংসমসৃক্ প্রদূষ্যেতি সর্বার্বুদসাধারণং দূষ্যং, মাংসার্বুদমেদোঽর্বুদযোস্তু বিশেষেণ মাংসদুষ্টিঃ; মাংসার্বুদমেদোঽর্বুদযোরপি তদ্দূষকো দোষোঽস্তি, তেন তত্রাপি দোষকর্তৃতযা সম্প্রাপ্তিরিযং ভবতি| মাংসোচ্ছ্রযমিতি মাংসোচ্ছ্রযতযা প্রতীযমানম্| মেদোজেঽপি মাংসমুদ্গতং ভবতি| অত্যগাধমিতি দূরানুপ্রবিষ্টম্; অত এবানল্পমূলমিত্যুক্তম্| বাতাদিভিস্তদর্বুদং জাযতে ভবতি, তেন ষডর্বুদানি ভবন্তি| গ্রন্থেঃ সমানানীতি বাতপিত্তকফমেদোগ্রন্থিভির্বাতপিত্তকফমেদোঽর্বুদানাং লক্ষণানি সমানানি, শোণিতজমাংসজযোস্তু লক্ষণং পৃথক্ বক্ষ্যতি||১৮-১৯||–

Adhikarana raktArbudalakShaNam (20-21) · Śloka 21

দোষঃ প্রদুষ্টো রুধিরং সিরাশ্চ সঙ্কুচ্য সম্পিণ্ড্য ততস্ত্বপাকম্ ||২০|| সাস্রাবমুন্নহ্যতি মাংসপিণ্ডং মাংসাঙ্কুরৈরাচিতমাশুবৃদ্ধম্ | করোত্যজস্রং রুধিরপ্রবৃত্তিমসাধ্যমেতদ্রুধিরাত্মকং তু ||২১|| রক্তক্ষযোপদ্রবপীডিতত্বাত্ পাণ্ডুর্ভবেদর্বুদপীডিতস্তু | (সু. নি. অ. ১১) |

রক্তার্বুদমাহ– দোষঃ প্রদুষ্ট ইত্যাদি| সঙ্কুচ্যেতি অন্তর্ভাবিতোঽত্র ণ্যর্থঃ| অপাকমীষত্পাকং, তেন সাস্রাবমিত্যুপপন্নং ভবতি| দোষ উন্নহ্যতি উচ্ছ্রিতো ভবতি| সাস্রাবমীষত্স্রাবম্| মাংসপিণ্ডমাশুবৃদ্ধং শীঘ্রবর্ধনং, মাংসাঙ্কুরৈরাচিতং করোতি, তথা অজস্রং রুধিরপ্রবৃত্তিমপি করোতি; রুধিরং চাত্রাধিষ্ঠানভূতং সিরাগতং প্রবর্ততে ন তু পাকাত্, ঈষদেব স্রাবস্য ক্লেদরূপস্যোক্তত্বাত্| কিংবা উন্নহ্যতীত্যন্তর্ভাবিতণ্যর্থঃ, তেন মাংসপিণ্ডমুন্নাহযতি উদ্গতং করোতি| “দোষাঃ প্রদুষ্টা” ইতি পাঠপক্ষে “ সাস্রাবমুন্নহ্য হি” ইতি পাঠঃ| উন্নহ্য উন্নাহ্য, অন্তর্ভাবিতণ্যর্থত্বাত্| হি পাদপূরণে||২০-২১||–

Adhikarana mAMsArbudasya samprAptipUrvakaM lakShaNam (22-23) · Śloka 23

মুষ্টিপ্রহারাদিভিরর্দিতেঽঙ্গে মাংসং প্রদুষ্টং জনযেদ্ধি শোথম্ ||২২|| অবেদনং স্নিগ্ধমনন্যবর্ণমপাকমশ্মোপমমপ্রচাল্যম্ | প্রদুষ্টমাংসস্য নরস্য গাঢমেতদ্ভবেন্মাংসপরাযণস্য ||২৩|| মাংসার্বুদং ত্বেতদসাধ্যমুক্তং... | (সু. নি. অ. ১১) |

মাংসজন্যসম্প্রাপ্তিমাহ– মুষ্টিপ্রহারাদিভিরিত্যাদি| অশ্মোপমং পাষাণবত্ কঠিনম্| অপ্রচাল্যং স্থিরম্| যদ্যপি রক্তমাংসার্বুদযো রক্তমাংসযোর্হেতুত্বেনোক্তিস্তথাঽপি রক্তজে পিত্তং, মাংসজে বাযুরারম্ভকঃ, এবমপি তাভ্যাং ঘৃতদুগ্ধন্যানেন ব্যপদেশঃ| মাংসপরাযণস্য মাংসাশনশীলস্য| তস্য চাতিমাত্রং মাংসবৃদ্ধিঃ, “মাংসং মাংসেন বর্ধতে” ইত্যভিধানাত্||২২-২৩||–

Adhikarana asAdhyArbudam (24) · Śloka 24

...সাধ্যেষ্বপীমানি তু বর্জযেচ্চ | সম্প্রস্রুতং মর্মণি যচ্চ জাতং স্রোতঃসু বা যচ্চ ভবেদচাল্যম্ ||২৪|| (সু. নি. অ. ১১) |

সাধ্যেষ্বপ্যসাধ্যপ্রকারানাহ– সাধ্যেষ্বপীত্যাদি| সম্প্রস্রুতং স্রাবযুক্তং, স্রাবশ্চাত্রাপাকিত্বেঽপি ত্বগবদরণাত্ মনাগবগন্তব্যঃ| স্রোতঃসু নাসাদিষু| অচাল্যং স্থিরম্||২৪||

Adhikarana adhyarbudalakShaNam (25) · Śloka 25

যজ্জাযতেঽন্যত্ খলু পূর্বজাতে জ্ঞেযং তদদ্ধ্যর্বুদমর্বুদজ্ঞৈঃ | যদ্দ্বন্দ্বজাতং যুগপত্ ক্রমাদ্বা দ্বিরর্বুদং তচ্চ ভবেদসাধ্যম্ ||২৫|| (সু. নি. অ. ১১) |

অধ্যর্বুদমাহ– যজ্জাযত ইত্যাদিনা| অধিকমর্বুদম্ অধ্যর্বুদম্, এতদ্দ্বিরর্বুদমেব| যদ্দ্বন্দ্বজাতং যুগপত্ ক্রমাদ্বেতি দ্বন্দ্বজাতং যুগ্মেন জাতং, যুগপদেকদা ক্রমেণ বা, তদ্দ্বিরর্বুদং ন সাধ্যম্| তথাচ ভোজঃ– “অর্বুদে ত্বর্বুদং জাতং দ্বন্দ্বজং চানুজং চ যত্| দ্বিরর্বুদমিতি জ্ঞেযং তচ্চাসাধ্যং বিনির্দিশেত্||” ইতি||২৫||

Adhikarana arbudAnAM pAkAbhAve hetuH (26) · Śloka 26

ন পাকমাযান্তি কফাধিকত্বান্মেদোবহুত্বাচ্চ বিশেষতস্তু | দোষস্থিরত্বাদ্গ্রথনাচ্চ তেষাং সর্বার্বুদান্যেব নিসর্গতস্তু ||২৬|| (সু. নি. অ. ১১) |

অর্বুদানাং পাকাভাবে হেতুমাহ– ন পাকমাযান্তীত্যাদি| সর্বার্বুদানি পিত্তরক্তজান্যপি ন পাকমাযান্তি, কুতঃ ইত্যত আহ– কফাধিকত্বান্মেদোবহুত্বাচ্চ| ননু, অপচ্যামপি বিশেষতঃ কফমেদসী অধিকে, অথ চ তস্যাঃ পাকোঽস্ত্যেব, ইত্যত আহ– দোষস্থিরত্বাদিতি| অপচ্যাং কালান্তরেণ হি রক্তপিত্তমধিকং পাকমারভতে, তচ্চেহ দোষস্থিরত্বাত্ সদা সদৃশদোষত্বাত্ গ্রথিতত্বাচ্চ ন পাকারম্ভকম্| অন্যে তু দোষস্থিরত্বাদিতি দোষোচ্ছ্রাযরূপশোথকাঠিন্যাদিত্যাহুঃ; তদপ্রযোজনকম্, অন্যত্র দোষোচ্ছ্রাযশোথকাঠিন্যেঽপি পাকদর্শনাত্| অথ কুতো যথোক্তহেতুসম্পদিত্যাহ– নিসর্গতস্ত্বিতি| নিসর্গতো ব্যাধিস্বভাবাত্| ভোজেঽপ্যুক্তম্– “ন পচ্যতে স্থিরত্বাচ্চ গ্রথিতত্বাত্ স্বভাবতঃ|” ইতি||২৬||

Adhikarana puShpikA · Śloka 38

ইতি শ্রীমাধবকরবিরচিতে মাধবনিদানে গলগণ্ডগণ্ডমালাপচীগ্রন্থ্যর্বুদনিদানং সমাপ্তম্ ||৩৮||

ইতি শ্রীকণ্ঠদত্তবিরচিতাযাং মধুকোশব্যাখ্যাযাং গলগণ্ডগণ্ডমালাপচীগ্রন্থ্যর্বুদনিদানং সমাপ্তম্||৩৮||