Adhikarana grahaNIsamprAptiH (1) · Śloka 1
অথ গ্রহণীরোগনিদানম্ |
অতীসারে নিবৃত্তেঽপি মন্দাগ্নেরহিতাশিনঃ |
ভূযঃ সন্দূষিতো বহ্নির্গ্রহণীমভিদূষযেত্ ||১||
(সু. উ. তং. অ. ৪০) |
View original
अथ ग्रहणीरोगनिदानम् |
अतीसारे निवृत्तेऽपि मन्दाग्नेरहिताशिनः |
भूयः सन्दूषितो वह्निर्ग्रहणीमभिदूषयेत् ||१||
(सु. उ. तं. अ. ४०) |
দ্রবসরণসাধর্ম্যাত্ পরস্পরানুবন্ধিত্বাচ্চাতীসারানন্তরং গ্রহণী, তস্যাঃ সম্প্রাপ্তিমাহ– অতীসার ইত্যাদি| অপিশব্দাদজাতাতিসারস্যাপি স্বহেতোর্গ্রহণীরোগঃ স্যাদিতি বোধযতি| অন্যে অপিশব্দাদনিবৃত্তেঽপ্যতীসার ইতি ব্যাচক্ষতে| মন্দাগ্নেরিত্যনেন দীপ্তাগ্নেরহিতাশনমপি ন বিকারকারীতি বোধযতি| উক্তং হি সুশ্রুতে– “দীপ্তাগ্নের্বিরুদ্ধং বিতথং ভবেত্|” (সু. সূ. অ. ২০) ইতি| ভূয ইতি পুনরত্যর্থং বা, সন্দূষিতঃ পূর্বমতীসারেঽপি দূষিতত্বাত্, অভিদূষযেত্ সমন্তাদ্দূষযেত্| এতেন নিবৃত্তাতীসারেণাহিতাহারপরিহারঃ করণীযঃ, আবহ্নিবললাভাদিত্যুক্তং ভবতি| অত এবাহ সুশ্রুতঃ– “তস্মাত্ কার্যঃ পরীহারস্ত্বতীসারে বিরিক্তবত্| যাবন্ন প্রকৃতিস্থঃ স্যাদ্দোষতঃ প্রাণতস্তথা||” (সু. উ. তং. অ. ৪০) ইতি||১||
Adhikarana grahaNIsAmAnyalakShaNam (2-3) · Śloka 3
একৈকশঃ সর্বশশ্চ দোষৈরত্যর্থমূর্ছিতৈঃ |
সা দুষ্টা বহুশো ভুক্তমামমেব বিমুঞ্চতি ||২||
পক্বং বা সরুজং পূতি মুহুর্বদ্ধং মুহুর্দ্রবম্ |
গ্রহণীরোগমাহুস্তমাযুর্বেদবিদো জনাঃ ||৩||
(সু. উ. তং. অ. ৪০) |
View original
एकैकशः सर्वशश्च दोषैरत्यर्थमूर्छितैः |
सा दुष्टा बहुशो भुक्तमाममेव विमुञ्चति ||२||
पक्वं वा सरुजं पूति मुहुर्बद्धं मुहुर्द्रवम् |
ग्रहणीरोगमाहुस्तमायुर्वेदविदो जनाः ||३||
(सु. उ. तं. अ. ४०) |
তস্যাঃ সম্প্রাপ্তিপূর্বকং সামান্যলক্ষণমাহ– একৈকশ ইত্যাদি| মূর্ছিতৈরতিবৃদ্ধৈঃ, ‘মূর্ছা মোহসমুচ্ছ্রাযযোঃ’ ইতি ধাত্বর্থাত্| ‘উচ্ছ্রিতৈঃ’ ইতি পাঠান্তরে স এবার্থঃ| সা গ্রহণী দোষৈর্দুষ্টা সতী ভুক্তমাহারমামমপক্বমেব পক্বং বা বিমুঞ্চতি| বাশব্দশ্চার্থে, এবকারঃ সমুচ্চীযমানাবধারণে, যথা– “নরং চ নারাযণমেব চোভৌ স্বতঃ সুতৌ সঞ্জনযাম্বভূবতুঃ|” ইতি| অথবা এবকারো এব বিকল্পার্থঃ, নিপাতানামনেকার্থত্বাদিতি| সরুজং সশূলং, পূতি দুর্গন্ধি| বাতেন মুহুর্বদ্ধং, পিত্তেন মুহুর্দ্রবম্| গ্রহণীরোগমিতি গ্রহণ্যা রোগো গ্রহণীরোগঃ| গ্রহণী চাগ্ন্যধিষ্ঠানং নাডী| যদাহ চরকঃ– “অগ্ন্যধিষ্ঠানমন্নস্য গ্রহণাত্ গ্রহণী মতা| নাভেরুপরি সা হ্যগ্নিবলোপস্তম্ভবৃংহিতা|| অপক্বং ধারযত্যন্নং পক্বং সৃজতি চাপ্যধঃ|” (চ. চি. অ. ১৫) ইতি| সুশ্রুতেঽপ্যেতদুক্তম্– “ষষ্ঠী পিত্তধরা নাম যা কলা পরিকীর্তিতা| পক্বামাশযমধ্যস্থা গ্রহণী সা প্রকীর্তিতা||” (সু. উ. তং. অ. ৪০) ইতি| কলা ধাত্বাশযান্তরমর্যাদা, পক্বামাশযমধ্যস্থা পচ্যমানাশযরূপেত্যর্থঃ||২-৩||
Adhikarana grahaNIpUrvarUpam (4) · Śloka 4
পূর্বরূপং তু তস্যেদং তৃষ্ণাঽঽলস্যং বলক্ষযঃ |
বিদাহোঽন্নস্য পাকশ্চ চিরাত্ কাযস্য গৌরবম্ ||৪||
(চ. চি. অ. ১৫) |
View original
पूर्वरूपं तु तस्येदं तृष्णाऽऽलस्यं बलक्षयः |
विदाहोऽन्नस्य पाकश्च चिरात् कायस्य गौरवम् ||४||
(च. चि. अ. १५) |
পূর্বরূপমাহ– পূর্বরূপমিত্যাদি| তৃষ্ণা পিপাসা| বিদাহোঽন্নস্য অগ্নিমান্দ্যেনাহারস্য বিদগ্ধত্বম্, অত এব চিরাত্ পাকশ্চান্নস্যৈব| কাযস্য গৌরবং সামত্বাদিতি||৪||
Adhikarana vAtikagrahaNyA nidAnAdipUrvakaM lakShaNam (5-10) · Śloka 10
কটুতিক্তকষাযাতিরূক্ষসন্দুষ্টভোজনঃ |
প্রমিতানশনাত্যধ্ববেগনিগ্রহমৈথুনৈঃ ||৫||
মারুতঃ কুপিতো বহ্নিং সঞ্ছাদ্য কুরুতে গদান্ |
তস্যান্নং পচ্যতে দুঃখং শুক্তপাকং খরাঙ্গতা ||৬||
কণ্ঠাস্যশোষোঽক্ষুত্তৃষ্ণা তিমিরং কর্ণযোঃ স্বনঃ |
পার্শ্বোরুবঙ্ক্ষণগ্রীবারুগভীক্ষ্ণং বিসূচিকা ||৭||
হৃত্পীডাকার্শ্যদৌর্বল্যং বৈরস্যং পরিকর্তিকা |
গৃদ্ধিঃ সর্বরসানাং চ মনসঃ সদনং তথা ||৮||
জীর্ণে জীর্যতি চাধ্মানং ভুক্তে স্বাস্থ্যমুপৈতি চ |
স বাতগুল্মহৃদ্রোগপ্লীহাশঙ্কী চ মানবঃ ||৯||
চিরাদ্দুঃখং দ্রবং শুষ্কং তন্বামং শব্দফেনবত্ |
পুনঃ পুনঃ সৃজেদ্বর্চঃ কাসশ্বাসার্দিতোঽনিলাত্ ||১০||
(চ. চি. অ. ১৫) |
View original
कटुतिक्तकषायातिरूक्षसन्दुष्टभोजनः |
प्रमितानशनात्यध्ववेगनिग्रहमैथुनैः ||५||
मारुतः कुपितो वह्निं सञ्छाद्य कुरुते गदान् |
तस्यान्नं पच्यते दुःखं शुक्तपाकं खराङ्गता ||६||
कण्ठास्यशोषोऽक्षुत्तृष्णा तिमिरं कर्णयोः स्वनः |
पार्श्वोरुवङ्क्षणग्रीवारुगभीक्ष्णं विसूचिका ||७||
हृत्पीडाकार्श्यदौर्बल्यं वैरस्यं परिकर्तिका |
गृद्धिः सर्वरसानां च मनसः सदनं तथा ||८||
जीर्णे जीर्यति चाध्मानं भुक्ते स्वास्थ्यमुपैति च |
स वातगुल्महृद्रोगप्लीहाशङ्की च मानवः ||९||
चिराद्दुःखं द्रवं शुष्कं तन्वामं शब्दफेनवत् |
पुनः पुनः सृजेद्वर्चः कासश्वासार्दितोऽनिलात् ||१०||
(च. चि. अ. १५) |
বাতিকগ্রহণ্যা নিদানসম্প্রাপ্তিপূর্বকং রূপমাহ– কটুতিক্তেত্যাদি| সন্দুষ্টভোজনং সংযোগাদিবিরুদ্ধভোজনম্| ‘সন্দুষ্টভোজনৈঃ’ ইত্যত্র ‘শীতাদিভোজনৈঃ’ ইতি পাঠান্তরম্| প্রমিতমল্পভোজনং; প্রভৃতেতি পাঠান্তরে অতীতকালভোজনং বোদ্ধব্যম্| অনশনমুপবাসঃ| এতৈঃ কারণৈঃ কুপিতো মারুতঃ, বহ্নিং সঞ্ছাদ্য সন্দূষ্য, গদান্ রোগান্ করোতি| কান্ গদান্ করোতীত্যাহ– তস্যান্নমিত্যাদি| শুক্তপাকম্ অম্লপাকম্, এতচ্চাগ্নিমান্দ্যজনিতান্নবিদাহাদ্ভবতি| খরাঙ্গতা কর্কশশরীরত্বং, বাতেন ত্বগ্গতস্নেহশোষাত্| তিমিরং মন্দদৃষ্টিতা| রুক্ পীডা, সা চ পার্শ্বাদিভিঃ সম্বধ্যতে| বিসূচিকা ঊর্ধ্বমধশ্চামান্নপ্রবৃত্তিঃ| বৈরস্যং বিরুদ্ধরসাস্যতা| পরিকর্তিকা গুদে কর্তনবত্পীডা| গৃদ্ধিঃ কাঙ্ক্ষা, সর্বরসানাং মধুরাদীনাং, কর্মণি ষষ্ঠী; এতচ্চ বাতদূষিতান্তঃকরণত্বেন, ব্যাধিমহিম্না বা| মনসঃ সদনমবসাদঃ| আধ্মানং জীর্ণে জীর্যতি চ ‘অন্নে’ ইতি শেষঃ| স বাতগুল্মহৃদ্রোগপ্লীহাশঙ্কীতি বাতগুল্মাদিবত্পীডাযুক্তত্বাত্তচ্ছঙ্কী| দ্রবং শুষ্কং কদাচিত্ দ্রবং, কদাচিত্ শুষ্কম্| তনু অল্পমিতি||৫-১০||
Adhikarana paittikagrahaNyA nidAnAdipUrvakaM lakShaNam (11-12) · Śloka 12
কট্বজীর্ণবিদাহ্যম্লক্ষারাদ্যৈঃ পিত্তমুল্বণম্ |
আপ্লাবযদ্ধন্ত্যনলং জলং তপ্তমিবানলম্ ||১১||
সোঽজীর্ণং নীলপীতাভং পীতাভঃ সার্যতে দ্রবম্ |
পূত্যম্লোদ্গারহৃত্কণ্ঠদাহারুচিতৃডর্দিতঃ ||১২||
(চ. চি. অ. ১৫) |
View original
कट्वजीर्णविदाह्यम्लक्षाराद्यैः पित्तमुल्बणम् |
आप्लावयद्धन्त्यनलं जलं तप्तमिवानलम् ||११||
सोऽजीर्णं नीलपीताभं पीताभः सार्यते द्रवम् |
पूत्यम्लोद्गारहृत्कण्ठदाहारुचितृडर्दितः ||१२||
(च. चि. अ. १५) |
পৈত্তিকগ্রহণ্যা নিদানসম্প্রাপ্তিপূর্বকং রূপমাহ– কট্বিত্যাদি| বিদাহি বিদাহজনকং বংশকরীরাদি| ক্ষারোঽপামার্গাদিকৃতঃ, তথা ক্ষারো যবক্ষারাদিঃ, তথা সক্ষারং চ দ্রব্যং; ক্ষারোদকসাধিতং হি ব্যঞ্জনমশ্নন্তি কামরূপাদৌ| আদ্যগ্রহণাল্লবণতীক্ষ্ণোষ্ণানাং গ্রহণং, তৈর্বৃদ্ধং পিত্তমনলম্ আপ্লাবযত্ অভিভবত্ তং হন্তি| ননু, পিত্তমাগ্নেযমগ্নিরেব বা, ততশ্চ বৃদ্ধিমেবাপ্নোতি, কথং হন্ত্যত আহ– জলং তপ্তমিবানলমিতি| যথা উষ্ণগুণযুক্তমপি জলমনলং হন্তি, তথা দ্রবাংশেন পরিবৃদ্ধং পিত্তমূষ্মরূপমগ্নিং হন্ত্যেবেতি| স পীতাভঃ পুরুষঃ সার্যতে, ‘বর্চঃ’ ইত্যনুবর্ততে||১১-১২||
Adhikarana shlaiShmikagrahaNyA nidAnAdipUrvakaM lakShaNam (13-16) · Śloka 16
গুর্বতিস্নিগ্ধশীতাদিভোজনদতিভোজনত্ |
ভুক্তমাত্রস্য চ স্বপ্নাদ্ধন্ত্যগ্নিং কুপিতঃ কফঃ ||১৩||
তস্যান্নং পচ্যতে দুঃখং হৃল্লাসচ্ছর্দ্যরোচকাঃ |
আস্যোপদেহমাধুর্যং কাসষ্ঠীবনপীনসাঃ ||১৪||
হৃদযং মন্যতে স্ত্যানমুদরং স্তিমিতং গুরুঃ |
দুষ্টো মধুর উদ্গারঃ সদনং স্ত্রীষ্বহর্ষণম্ ||১৫||
ভিন্নামশ্লেষ্মসংসৃষ্টগুরুবর্চঃপ্রবর্তনম্ |
অকৃশস্যাপি দৌর্বল্যমালস্যং চ কফাত্মকে ||১৬||
(চ. চি. অ. ১৫) |
View original
गुर्वतिस्निग्धशीतादिभोजनदतिभोजनत् |
भुक्तमात्रस्य च स्वप्नाद्धन्त्यग्निं कुपितः कफः ||१३||
तस्यान्नं पच्यते दुःखं हृल्लासच्छर्द्यरोचकाः |
आस्योपदेहमाधुर्यं कासष्ठीवनपीनसाः ||१४||
हृदयं मन्यते स्त्यानमुदरं स्तिमितं गुरुः |
दुष्टो मधुर उद्गारः सदनं स्त्रीष्वहर्षणम् ||१५||
भिन्नामश्लेष्मसंसृष्टगुरुवर्चःप्रवर्तनम् |
अकृशस्यापि दौर्बल्यमालस्यं च कफात्मके ||१६||
(च. चि. अ. १५) |
শ্লৈষ্মিকগ্রহণ্যা নিদানাদিপূর্বকং রূপমাহ– গুর্বিত্যাদি| আদিশব্দাত্ পিচ্ছিলমধুরাদীনাং চ গ্রহণম্| অতিভোজনাদতিমাত্রভোজনাত্| ননু, ভুক্তমাত্রস্য চ স্বপ্নাদ্ধন্ত্যগ্নিমিতি বিরুদ্ধং? স্বপ্নোঽত্র দিবাস্বপ্নো গ্রাহ্যঃ, রাত্রিস্বাপস্য স্বাস্থ্যহেতুত্বাত্; দিবাস্বাপশ্চ স্রোতঃসম্মীলনেন জঠরানলং সন্ধুক্ষযতি, অত এবাহ– “অতীসারিণামজীর্ণিনাং চ দিবাস্বাপো বিহিতঃ|” ইতি| উচ্যতে– ভুক্তবতাং দিবাস্বাপোঽত্যন্তকফবৃদ্ধ্যাঽগ্নিং হন্তি, অভুক্তবতাং তু সন্ধুক্ষযতি| যদুক্তম্– “নরান্নিরশনান্ কামং দিবা স্বাপযেত্” ইতি| আস্যোপদেহমাধুর্যমিতি মুখস্য লিপ্তত্বং মধুরত্বং চ শ্লেষ্মণৈব| স্ত্যানং ঘনদ্রবাপূরিতমিব| স্তিমিতং বিবদ্ধং উদরমিতি, নিশ্চলমিত্যর্থঃ; স্তিমিতং, স্তব্ধং বা| গুরু জডম্| দুষ্টো বিকৃতঃ| মধুরঃ মধুরত্বেনোপলক্ষিত উদ্গারঃ| সদনমগ্নিসাদঃ| স্ত্রীষ্বহর্ষণং স্ত্রীরিরংসাযা অভাবঃ| ভিন্নং চ তদামশ্লেষ্মভ্যাং সংসৃষ্টং চেতি সমাসার্থঃ| দৌর্বল্যম্ অসামর্থ্যমিতি||১৩-১৬||
Adhikarana tridoShaja-sa~ggraha-ghaTIyantrAkhyagrahaNIlakShaNam (17) · Śloka 4
পৃথগ্বাতাদিনির্দিষ্টহেতুলিঙ্গসমাগমে |
ত্রিদোষং নির্দিশেদেবং, তেষাং বক্ষ্যামি ভেষজম্ ||১৭||
(চ. চি. অ. ১৫) |
(অন্ত্রকূজনমালস্যং দৌর্বল্যং সদনং তথা |
দ্রবং শীতং ঘনং স্নিগ্ধং সকটীবেদনং শকৃত্ |১|
আমং বহু সপৈচ্ছিল্যং সশব্দং মন্দবেদনম্ |
পক্ষান্মাসাদ্দশাহাদ্বা নিত্যং বাঽপ্যথ মুঞ্চতি ||২||
দিবা প্রকোপো ভবতি রাত্রৌ শান্তিং ব্রজেচ্চ সা |
দুর্বিজ্ঞেযা দুশ্চিকিত্স্যা চিরকালানুবন্ধিনী ||৩||
সা ভবেদামবাতেন সঙ্গ্রহগ্রহণী মতা |
স্বপতঃ পার্শ্বযোঃ শূলং গলজ্জলঘটীধ্বনিঃ |
তং বদন্তি ঘটীযন্ত্রমসাধ্যং গ্রহণীগদম্) ||৪||
View original
पृथग्वातादिनिर्दिष्टहेतुलिङ्गसमागमे |
त्रिदोषं निर्दिशेदेवं, तेषां वक्ष्यामि भेषजम् ||१७||
(च. चि. अ. १५) |
(अन्त्रकूजनमालस्यं दौर्बल्यं सदनं तथा |
द्रवं शीतं घनं स्निग्धं सकटीवेदनं शकृत् |१|
आमं बहु सपैच्छिल्यं सशब्दं मन्दवेदनम् |
पक्षान्मासाद्दशाहाद्वा नित्यं वाऽप्यथ मुञ्चति ||२||
दिवा प्रकोपो भवति रात्रौ शान्तिं व्रजेच्च सा |
दुर्विज्ञेया दुश्चिकित्स्या चिरकालानुबन्धिनी ||३||
सा भवेदामवातेन सङ्ग्रहग्रहणी मता |
स्वपतः पार्श्वयोः शूलं गलज्जलघटीध्वनिः |
तं वदन्ति घटीयन्त्रमसाध्यं ग्रहणीगदम्) ||४||
শিষ্যহিতৈষিতযা প্রকৃতিসমসমবেতত্বেন সুগমাযা অপি ত্রিদোষজগ্রহণ্যা অতিদেশেন লক্ষণমাহ– পৃথগিত্যাদি| সম্পূর্ণশ্লোকানুরোধাত্ ‘তেষাং বক্ষ্যামি ভেষজম্| ইতি লিখিতম্| গ্রহণীদুষ্ট্যা গ্রহণ্যাশ্রিতবহ্নেরপি দুষ্টেরগ্নিমান্দ্যাদযোঽপি গ্রহণীবিকারা উচ্যন্তে| যদুক্তং চরকে– “যশ্চাগ্নিঃ পূর্বমুদ্দিষ্টো রোগানীকে চতুর্বিধঃ| তং চাপি গ্রহণীদোষং সমবর্জং প্রচক্ষ্মহে||” (চ. চি. অ. ১৫) ইতি| অন্যত্রাপি “বিভাগেঽঙ্গস্য চোক্তা যে বিষমাদ্যাস্ত্রযোঽগ্নযঃ| তেঽপি র্স্যুগ্রহণীদোষাঃ সমস্তু স্বাস্থ্যকারণম্||” ইতি||১৭||
Adhikarana grahaNyAH sAma-nirAma-asAdhyalakShaNaM, vayo~anurUpaM sAdhyAsAdhyatvaM ca (18-19) · Śloka 1
দোষং সামং নিরামং চ বিদ্যাদত্রাতিসারবত্ ||১৮||
লিঙ্গৈরসাধ্যো গ্রহণীবিকারো যৈস্তৈরতীসারগদো ন সিধ্যেত্ |
বৃদ্ধস্য নূনং গ্রহণীবিকারো হত্বা তনূং নৈব নিবর্ততে চ ||১৯||
(বালকে গ্রহণী সাধ্যা যূনি কৃচ্ছ্রা সমীরিতা |
বৃদ্ধে ত্বসাধ্যা বিজ্ঞেযা মতং ধন্বন্তরেরিদম্) ||১||
View original
दोषं सामं निरामं च विद्यादत्रातिसारवत् ||१८||
लिङ्गैरसाध्यो ग्रहणीविकारो यैस्तैरतीसारगदो न सिध्येत् |
वृद्धस्य नूनं ग्रहणीविकारो हत्वा तनूं नैव निवर्तते च ||१९||
(बालके ग्रहणी साध्या यूनि कृच्छ्रा समीरिता |
वृद्धे त्वसाध्या विज्ञेया मतं धन्वन्तरेरिदम्) ||१||
যথাঽতীসারে জলনিমজ্জনাদিনা আমং, তদ্বিপরীতেন নিরামং জ্ঞাযতে, তথাঽত্রাপি জ্ঞেযম্| যৈর্লিঙ্গৈরতীসারগদো ন সিধ্যেত্তৈর্লিঙ্গৈর্গ্রহণীবিকারোঽসাধ্যঃ, অতীসারস্য যান্যসাধ্যলিঙ্গানি গ্রহণ্যা অপি তানি||১৮-১৯||
Adhikarana puShpikA · Śloka 4
ইতি শ্রীমাধবকরবিরচিতে মাধবনিদানে গ্রহণীরোগনিদানং সমাপ্তম্ ||৪||
View original
इति श्रीमाधवकरविरचिते माधवनिदाने ग्रहणीरोगनिदानं समाप्तम् ||४||
ইতি শ্রীবিজযরক্ষিতকৃতাযাং মধুকোশব্যাখ্যাযাং গ্রহণীরোগনিদানং সমাপ্তম্||৪||