Adhikarana gulmasya nidAnabhedasthAnAni (1) · Śloka 1
অথ গুল্মনিদানম্ |
দুষ্টা বাতাদযোঽত্যর্থং মিথ্যাহারবিহারতঃ |
কুর্বন্তি পঞ্চধা গুল্মং কোষ্ঠান্তর্গ্রন্থিরূপিণম্ |
তস্য পঞ্চবিধং স্থানং পার্শ্বহৃন্নাভিবস্তযঃ ||১||
View original
अथ गुल्मनिदानम् |
दुष्टा वातादयोऽत्यर्थं मिथ्याहारविहारतः |
कुर्वन्ति पञ्चधा गुल्मं कोष्ठान्तर्ग्रन्थिरूपिणम् |
तस्य पञ्चविधं स्थानं पार्श्वहृन्नाभिबस्तयः ||१||
গুল্মেঽপ্যানাহো ভবতীত্যানাহানন্তরং গুল্মমাহ– দুষ্টা ইত্যাদি| পঞ্চধেতি বাতপিত্তকফসন্নিপাতরক্তজাঃ| দ্বন্দ্বজাস্তু প্রকৃতিসমসমবেতত্বান্ন পৃথগ্গণ্যন্তে, অর্শোরোগবত্| কোষ্ঠান্তরামাশযাদিমধ্যে, গ্রন্থিরূপিণং গুডকাকারম্| তস্যেত্যাদি| এতদেব বিবৃণোতি– পার্শ্বেত্যাদি| পার্শ্বে দ্বে গণনীযে, অন্যথা পঞ্চত্বানুপপত্তিঃ, অত এব ‘পার্শ্বে’ ইতি দ্বিবচনান্তমেব ক্বচিত্ পঠ্যতে||১||
Adhikarana sAmAnyagulmarUpam (2) · Śloka 2
হৃন্নাভ্যোরন্তরে গ্রন্থিঃ সঞ্চারী যদি বাঽচলঃ |
বৃত্তশ্চযাপচযবান্ স ‘গুল্ম’ ইতি কীর্তিতঃ ||২||
(সু. উ. তং. অ. ৪২) |
View original
हृन्नाभ्योरन्तरे ग्रन्थिः सञ्चारी यदि वाऽचलः |
वृत्तश्चयापचयवान् स ‘गुल्म’ इति कीर्तितः ||२||
(सु. उ. तं. अ. ४२) |
সামান্যগুল্মরূপমাহ– হৃদিত্যাদি| নাভিশব্দেন বস্তির্বোধ্যঃ, সামীপ্যাত্; যথা গঙ্গাযাং ঘোষ ইত্যাহুঃ; বস্তেরপি গুল্মাশ্রযত্বেনোক্তত্বাত্| অত এব ‘হৃদ্বস্ত্যোরন্তরে’ ইতি পাঠান্তরম্| অন্যে ত্বাহুঃ– বস্তৌ বিদ্রধিরেব স্যান্নতু গুল্ম ইতি| তন্ন, গুল্মলক্ষণপ্রতীতেঃ| এতত্ পঞ্চস্থানকথনং দোষজাভিপ্রাযেণ, রক্তজস্য তু গর্ভাশযঃ স্থানম্; অথবা পার্শ্বস্থিতত্বাত্ গর্ভাশযস্য পার্শ্বগ্রহণেনৈব গ্রহণম্| বৃত্তো বর্তুলঃ| চযাপচযবানিতি কদাচিদুপচীযতে, কদাচিদপচীযতে; এতচ্চ সামান্যোক্তমপি বাতিকে ব্যবতিষ্ঠতে, তল্লক্ষণে তদভিধানাদিতি জেজ্জটঃ; গদাধরস্তু সামান্যলক্ষণমাহ, সর্বগুল্মানাং বাতমূলত্বাত্| ‘চযোপচযবান্’ ইতি পাঠান্তরে দোষস্য চযেনোপচযবানিতি| গুল্ম ইতি লতাদিপিহিতসংস্থানবিশেষাদৌ গুল্মব্যপদেশো লোকে, তত্সাদৃশ্যাত্ সঞ্চিতপরিপিণ্ডিতদোষেঽপি গুল্মসঞ্জ্ঞেত্যাহুঃ; বাপ্যচন্দ্রস্ত্বাহ– সম্পিণ্ডিতদোষো গুডকেন মীযত ইতি নিরুক্তিঃ||২||
Adhikarana pa~jcavidhagulmavivaraNam (3) · Śloka 3
স ব্যস্তৈর্জাযতে দোষৈঃ সমস্তৈরপি চোচ্ছ্রিতৈঃ |
পুরুষাণাং তথা স্ত্রীণাং জ্ঞেযো রক্তেন চাপরঃ ||৩||
(সু. উ. তং. অ. ৪২) |
View original
स व्यस्तैर्जायते दोषैः समस्तैरपि चोच्छ्रितैः |
पुरुषाणां तथा स्त्रीणां ज्ञेयो रक्तेन चापरः ||३||
(सु. उ. तं. अ. ४२) |
পূর্বোক্তং পঞ্চবিধত্বং বিবৃণোতি– স ইত্যাদি| ব্যস্তৈরিত্যনেনৈকজো দ্বন্দ্বজোঽপি গ্রাহ্যঃ| পঞ্চধা গুল্ম ইত্যনেন বিরোধ ইতি চেত্| ন, নহি তত্রাবধারণং কৃতং, পঞ্চধৈবেতি| অত এব সূত্রস্থানে চরকেণ “পঞ্চ গুল্মা” (চ. সূ. অ. ১৯) ইত্যভিধাযাপি “সংসৃষ্টলিঙ্গানপরাংশ্চ গুল্মাংস্ত্রীনাদিশেদৌষধকল্পনার্থম্|” (চ. চি. অ. ৫) ইত্যুক্তং, সমানচিকিত্স্যত্বেন তত্রান্তর্ভাবাত্| রক্তেন চাপর ইতি স্ত্রীণামেব| বক্ষ্যতি হি– “স রৌধিরঃ স্ত্রীভব এব গুল্মঃ|” (চ. চি. অ. ৫) ইতি| রক্তং চাত্রার্তবং ন ধাতুরূপং, ধাতুরূপরক্তজস্তু গুল্মো যদ্যপ্যন্যোঽস্তি তথাঽপি নৈতত্সম্প্রাপ্তিকো ভবতীতি পৃথগুপদিশ্যতে| পৃথগ্জ্ঞানানভিধানং তু পিত্তগুল্মসমাননিদানচিকিত্স্যতত্বেন তত্রান্তর্ভাবাত্, সুশ্রুতে রক্তাতীসারবত্| বিশেষলক্ষণং চ যদাহ চরকঃ– “তৃষ্ণাজ্বরপরীদাহশূলস্বেদাগ্নিমার্দবৈঃ| গুল্মিনামরুচৌ চাপি রক্তমেবাবসেচযেত্||” (চ. চি. অ. ৫) ইতি| ধাতুরূপরক্তজঃ স্ত্রীণাং পুংসাং চ ভবতীতি ভট্টারহরিচন্দ্রঃ| তথাচ ক্ষারপাণিঃ– “স্ত্রীণামার্তবজো গুল্মো ন পুংসামুপজাযতে| অন্যস্ত্বসৃগ্ভবো গুল্মঃ স্ত্রীণাং পুংসাং চ জাযতে||” ইতি| বাপ্যচন্দ্রস্ত্বাহ– বাতাদিদোষজস্যৈবাপচারাদ্রক্তে দুষ্টে রক্তজব্যপদেশঃ, যথা চরকে– কফপিত্তমেহানামতিকর্ষণাদুত্তরকালং বাতসংসর্গে সতি বাতমেহত্বমুক্তম্| যদুক্তম্– “যা বাতমেহান্ প্রতি পূর্বমুক্তা বাতোল্বণানাং বিহিতা ক্রিযা সা| বাযুর্হি মেহেষ্বতিকর্ষিতেষু কুপ্যত্যসাধ্যান্ প্রতি নাস্তি চিন্তা||” (চ. চি. অ. ৬) ইতি| ক্ষারপাণেরপ্যেবমেবাভিপ্রাযঃ| যদি তু পৃথক্ স্যাত্তদা তমপি নবমং লিঙ্গস্থানাদিভিরভিধাস্যত্, ন চোক্তম্| জেজ্জটগযদাসাভ্যাং তু হরিচন্দ্রমতমেবানুমতমিতি| সর্বগুল্মেষু বাতকারণত্বং জ্ঞেযম্| যদুক্তং চরকে– “গুল্মিনামনিলশান্তিরুপাযৈঃ সর্বশো বিধিবদাচরিতব্যা| মারুতে হ্যবজিতেঽন্যমুদীর্ণং দোষমল্পমপি কর্ম নিহন্যাত্||” (চ. চি. অ. ৫) ইতি; সুশ্রুতেঽপ্যুক্তম্– “কুপিতানিলমূলত্বাত্ সঞ্চিতত্বান্মলস্য চ| তুল্যত্বাদ্বা বিশালত্বাদ্গুল্ম ইত্যভিধীযতে||” (সু. উ. তং. অ. ৪২) ইতি| ন চৈতাবতা নানাত্মজত্বপ্রসঙ্গঃ, বাতস্যানুবন্ধরূপত্বাত্ জ্বরে পিত্তবত্| ননু বাতাব্যভিচারাত্ দ্বিদোষজস্ত্রিদোষজো বা গুল্মঃ স্যান্ন কেবলং কফজঃ পিত্তজো বেতি, ততশ্চ পঞ্চধেতি বিরোধঃ| নৈতত্, অনুবন্ধরূপেণ বাতজব্যপদেশো, ন ত্বনুবন্ধ্যরূপেণেতি||৩||
Adhikarana gulmapUrvarUpam (4) · Śloka 4
উদ্গারবাহুল্যপুরীষবন্ধতৃপ্ত্যক্ষমত্বান্ত্রবিকূজনানি |
আটোপ আধ্মানমপক্তিশক্তিরাসন্নগুল্মস্য বদন্তি চিহ্নম্ ||৪||
(বা. নি. অ. ১১) |
View original
उद्गारबाहुल्यपुरीषबन्धतृप्त्यक्षमत्वान्त्रविकूजनानि |
आटोप आध्मानमपक्तिशक्तिरासन्नगुल्मस्य वदन्ति चिह्नम् ||४||
(वा. नि. अ. ११) |
পূর্বরূপমাহ– উদ্গারেত্যাদি| পুরীষবন্ধো বিড্বন্ধঃ| তৃপ্তিরনন্নাভিলাষঃ| সুশ্রুতেঽপি হি ‘দ্বেষোঽন্নে’ (সু. উ. তং. অ. ৪২) ইতি পঠিতম্| অক্ষমত্বমসামর্থ্যম্| আটোপোঽত্র রুজাপূর্বকঃ ক্ষোভঃ, তলতলং বা; নতু গুডগুডাশব্দঃ, তস্যান্ত্রকূজনেনৈব গৃহীতত্বাত্; নাপ্যাধ্মানং, তস্যোপাত্তত্বাত্| অপক্তিশক্তিঃ মন্দাগ্নিতা; ‘অপক্তৃশক্তিঃ’ ইতি পাঠে স এবার্থঃ||৪||
Adhikarana sarvagulmasAdhAraNaM rUpam (5) · Śloka 5
অরুচিঃ কৃচ্ছ্রবিণ্মূত্রবাততাঽন্ত্রবিকূজনম্ |
আনাহশ্চোর্ধ্ববাতত্বং সর্বগুল্মেষু লক্ষযেত্ ||৫||
View original
अरुचिः कृच्छ्रविण्मूत्रवातताऽन्त्रविकूजनम् |
आनाहश्चोर्ध्ववातत्वं सर्वगुल्मेषु लक्षयेत् ||५||
গুল্মসাধারণরূপমাহ– অরুচিরিত্যাদি||৫||
Adhikarana vAtikagulmasya nidAnapUrvakaM lakShaNam (6-8) · Śloka 8
রূক্ষান্নপানং বিষমাতিমাত্রং বিচেষ্টনং বেগবিনিগ্রহশ্চ |
শোকোঽভিঘাতোঽতিমলক্ষযশ্চ নিরন্নতা চানিলগুল্মহেতুঃ ||৬||
যঃ স্থানসংস্থানরুজাং বিকল্পং বিড্বাতসঙ্গং গলবক্ত্রশোষম্ |
শ্যাবারুণত্বং শিশিরজ্বরং চ হৃত্কুক্ষিপার্শ্বাংসশিরোরুজং চ ||৭||
করোতি জীর্ণে ত্বধিকং প্রকোপং ভুক্তে মৃদুত্বং সমুপৈতি যশ্চ |
বাতাত্ স গুল্মো নচ তত্র রূক্ষং কষাযতিক্তং কটু চোপশেতে ||৮||
(চ. চি. অ. ৫) |
View original
रूक्षान्नपानं विषमातिमात्रं विचेष्टनं वेगविनिग्रहश्च |
शोकोऽभिघातोऽतिमलक्षयश्च निरन्नता चानिलगुल्महेतुः ||६||
यः स्थानसंस्थानरुजां विकल्पं विड्वातसङ्गं गलवक्त्रशोषम् |
श्यावारुणत्वं शिशिरज्वरं च हृत्कुक्षिपार्श्वांसशिरोरुजं च ||७||
करोति जीर्णे त्वधिकं प्रकोपं भुक्ते मृदुत्वं समुपैति यश्च |
वातात् स गुल्मो नच तत्र रूक्षं कषायतिक्तं कटु चोपशेते ||८||
(च. चि. अ. ५) |
বাতিকমাহ– রূক্ষেত্যাদি| বিষমাতিমাত্রমিতি অন্নপানবিশেষণম্| বিচেষ্টনং বিরুদ্ধচেষ্টাঃ বলবদ্বিগ্রহাদি| অতিমলক্ষযো বিরেকাদিনা| নিরন্নতা নিরাহারতা| বিকল্পশব্দঃ স্থানাদিভিঃ প্রত্যেকং যোজ্যঃ| স্থানবিকল্পো যথা– কদাচিন্নাভৌ, কদাচিত্পার্শ্বযোঃ, কদাচিদ্বস্তাবিত্যাদিস্থানান্তরগমনম্| সংস্থানবিকল্পো যথা– কদাচিদল্পঃ, কদাচিন্মহান্, বৃত্তো, দীর্ঘো বেতি| রুজাবিকল্পো যথা– কদাচিদল্পা, কদাচিন্মহতী, তোদরূপা, ভেদরূপা, অনেকরূপা বেতি| ন চ তত্রোপশেতে ন সুখযতি||৬-৮||
Adhikarana paittikagulmasya nidAnapUrvakaM lakShaNam (9-10) · Śloka 10
কট্বম্লতীক্ষ্ণোষ্ণবিদাহিরূক্ষক্রোধাতিমদ্যার্কহুতাশসেবা |
আমাভিঘাতো রুধিরং চ দুষ্টং পৈত্তস্য গুল্মস্য নিমিত্তমুক্তম্ ||৯||
জ্বরঃ পিপাসা বদনাঙ্গরাগঃ শূলং মহজ্জীর্যতি ভোজন চ |
স্বেদো বিদাহো ব্রণবচ্চ গুল্মঃ স্পর্শাসহঃ পৈত্তিকগুল্মরূপম্ ||১০||
(চ. চি. অ. ৫) |
View original
कट्वम्लतीक्ष्णोष्णविदाहिरूक्षक्रोधातिमद्यार्कहुताशसेवा |
आमाभिघातो रुधिरं च दुष्टं पैत्तस्य गुल्मस्य निमित्तमुक्तम् ||९||
ज्वरः पिपासा वदनाङ्गरागः शूलं महज्जीर्यति भोजन च |
स्वेदो विदाहो व्रणवच्च गुल्मः स्पर्शासहः पैत्तिकगुल्मरूपम् ||१०||
(च. चि. अ. ५) |
পৈত্তিকমাহ– কট্বিত্যাদি| আমাভিঘাত ইতি বিদগ্ধাজীর্ণজনিতদুষ্টরসেনাভিভবঃ; অন্যে তু ‘আমাভিঘাতৌ’ ইতি পঠন্তি, তত্রাম উক্তরূপঃ, অভিঘাতো লগুডাদেঃ রক্তদূষকো জ্ঞেযঃ| জীর্যতীতি সপ্তম্যন্তম্| ব্রণবত্ স্পর্শাসহ ইতি যোজ্যম্||৯-১০||
Adhikarana shlaiShmikagulmasya nidAnapUrvakaM lakShaNam (11-12) · Śloka 12
শীতং গুরু স্নিগ্ধমচেষ্টনং চ সম্পূরণং প্রস্বপনং দিবা চ |
গুল্মস্য হেতুঃ কফসম্ভবস্য সর্বস্তু দুষ্টো নিচযাত্মকস্য ||১১||
স্তৈমিত্যশীতজ্বরগাত্রসাদহৃল্লাসকাসারুচিগৌরবাণি |
শৈত্যং রুগল্পা কঠিনোন্নতত্বং গুল্মস্য রূপাণি কফাত্মকস্য ||১২||
(চ. চি. অ. ৫) |
View original
शीतं गुरु स्निग्धमचेष्टनं च सम्पूरणं प्रस्वपनं दिवा च |
गुल्मस्य हेतुः कफसम्भवस्य सर्वस्तु दुष्टो निचयात्मकस्य ||११||
स्तैमित्यशीतज्वरगात्रसादहृल्लासकासारुचिगौरवाणि |
शैत्यं रुगल्पा कठिनोन्नतत्वं गुल्मस्य रूपाणि कफात्मकस्य ||१२||
(च. चि. अ. ५) |
শ্লৈষ্মিকমাহ– শীতমিত্যাদি| সম্পূরণং তৃপ্তিভোজনম্| সর্ব ইতি বাতজাদ্যুক্তঃ| নিচযাত্মকস্য সন্নিপাতজস্য| কঠিনোন্নতত্বং গুল্মস্য||১১-১২||
Adhikarana dvyAtmakeShu triShvekajahetulakShaNAtideshaH (13) · Śloka 13
নিমিত্তরূপাণ্যুপলভ্য গুল্মে দ্বিদোষজে দোষবলাবলং চ |
ব্যামিশ্রলিঙ্গানপরাংশ্চ গুল্মাংস্ত্রীনাদিশেদৌষধকল্পনার্থম্ ||১৩||
(চ. চি. অ. ৫) |
View original
निमित्तरूपाण्युपलभ्य गुल्मे द्विदोषजे दोषबलाबलं च |
व्यामिश्रलिङ्गानपरांश्च गुल्मांस्त्रीनादिशेदौषधकल्पनार्थम् ||१३||
(च. चि. अ. ५) |
দ্ব্যাত্মকেষু ত্রিষ্বেকজহেতুলক্ষণাতিদেশার্থমাহ– নিমিত্তেত্যাদি| নিমিত্তানি চ রূপাণি চেতি দ্বন্দ্বঃ| দোষবলাবলং চেত্যনেন সমদ্বিদোষদ্বন্দ্বজত্রযেণ একোল্বণাদিদ্বিদোষজোঽপি গ্রাহ্য ইতি দর্শযতি, অন্যথা বহুত্বাপত্তেঃ| ঔষধকল্পনার্থমিতি একদোষজাভিহিতচিকিত্সামেলকেন তান্ চিকিত্সেদিত্যর্থঃ||১৩||
Adhikarana sAnnipAtikagulmalakShaNam (14) · Śloka 14
মহারুজং দাহপরীতমশ্মবদ্ঘনোন্নতং শীঘ্রবিদাহি দারুণম্ |
মনঃশরীরাগ্নিবলাপহারিণং ত্রিদোষজং গুল্মমসাধ্যমাদিশেত্ ||১৪||
(চ. চি. অ. ৫) |
View original
महारुजं दाहपरीतमश्मवद्घनोन्नतं शीघ्रविदाहि दारुणम् |
मनःशरीराग्निबलापहारिणं त्रिदोषजं गुल्ममसाध्यमादिशेत् ||१४||
(च. चि. अ. ५) |
সান্নিপাতিকমাহ– মহারুজমিত্যাদি| অশ্মবত্ ঘনোন্নতং পাষাণবত্ কঠিনমুন্নতং চ| মন ইত্যাদি মনোঽপহারিণং মনোবৈকল্যকারিণং, শরীরাপহারিণং কৃশত্ববৈবর্ণ্যকরম্, অগ্ন্যপহারিণমগ্নিবৈষম্যকরং, বলাপহারিণমসামর্থ্যকরম্| ননু, অসাধ্যমিতি বিরুদ্ধং, “সন্নিপাতোত্থিতে গুল্মে ত্রিদোষঘ্নো বিধির্হিতঃ|” (সু. উ. তং. অ. ৪২) ইতি সুশ্রুতবচনাত্| নৈবম্, অযং চ বিকৃতিবিষমসমবেতোঽসাধ্যঃ, প্রকৃতিসমসমবেতস্তু সাধ্য ইত্যাহুঃ| ননু, সোঽপ্যসাধ্যঃ, যদাহ সুশ্রুতঃ– “সর্বাত্মকে সর্বরুজোপপত্তিস্তং চাপ্যসাধ্যং প্রবদন্তি তজ্জ্ঞাঃ|” (সু. উ. তং. অ. ৪২) ইতি| উচ্যতে– তং চাপীতি অপিশব্দাদচিরোত্থিতঃ সাধ্যো বিশ্বামিত্রসংবাদাদিতি গযদাসঃ||১৪||
Adhikarana raktagulmasya nidAnapUrvakaM lakShaNam (15-16) · Śloka 16
নবপ্রসূতাঽহিতভোজন যা যা চামগর্ভং বিসৃজেদৃতৌ বা |
বাযুর্হি তস্যাঃ পরিগৃহ্য রক্তং করোতি গুল্মং সরুজং সদাহম্ |
পৈত্তস্য লিঙ্গেন সমানলিঙ্গং বিশেষণং চাপ্যপরং নিবোধ ||১৫||
(সু. উ. তং. অ. ৪২) |
যঃ স্পন্দতে পিণ্ডিত এব নাঙ্গৈশ্চিরাত্ সশূলঃ সমগর্ভলিঙ্গঃ |
স রৌধিরঃ স্ত্রীভব এব গুল্মো মাসে ব্যতীতে দশমে চিকিত্স্যঃ ||১৬||
(চ. চি. অ. ৫) |
View original
नवप्रसूताऽहितभोजन या या चामगर्भं विसृजेदृतौ वा |
वायुर्हि तस्याः परिगृह्य रक्तं करोति गुल्मं सरुजं सदाहम् |
पैत्तस्य लिङ्गेन समानलिङ्गं विशेषणं चाप्यपरं निबोध ||१५||
(सु. उ. तं. अ. ४२) |
यः स्पन्दते पिण्डित एव नाङ्गैश्चिरात् सशूलः समगर्भलिङ्गः |
स रौधिरः स्त्रीभव एव गुल्मो मासे व्यतीते दशमे चिकित्स्यः ||१६||
(च. चि. अ. ५) |
রক্তগুল্মমাহ– নবেত্যাদি| আমগর্ভং বিসৃজেদিতি নবমমাসাদর্বাক্ প্রসূতে| ঋতৌ আর্তবপ্রবৃত্তিকালে, অহিতভোজনেতি সম্বন্ধঃ| এতচ্চোপলক্ষণার্থং, তেনাহারাচারাদিকং জ্ঞেযম্| যদাহ চরকঃ– “ঋতাবনাহারতযা ভযেন বিরূক্ষণৈর্বেগবিধারণৈশ্চ| সংস্তম্ভনোল্লেখনযোনিদোষৈর্গুল্মঃ স্ত্রিযং রক্তভবোঽভ্যুপৈতি||” (চ. চি. অ. ৫) ইতি| পৈত্তস্য পৈত্তিকগুল্মস্য| বিশেষণং পৈত্তিকগুল্মাদ্বিশেষলক্ষণম্| পিণ্ডিতঃ সমুদিতঃ| এবকারোঽত্র অবধারণে| এতদেব স্ফুটযতি– নাঙ্গৈর্নাবযবৈশ্চিরাত্ স্পন্দত ইতি সম্বন্ধঃ| সমগর্ভলিঙ্গ ইতি আর্তবাদর্শনমুখস্রবণস্তনমুখকৃষ্ণত্বদোহদাদিগর্ভলক্ষণযুক্তঃ, এতচ্চ ব্যাধিপ্রভাবাত্; যথা– ক্ষযার্শসোঃ স্ত্রীরিরংসাকৃষ্ণত্বঙ্নখাদযঃ| অন্যে তু সমগর্ভলিঙ্গোঽবিকৃতগর্ভলিঙ্গ ইত্যাহুঃ| উক্তবিশেষণৈরেব স্ত্রীভবত্বে লব্ধে স্ত্রীগ্রহণেন কুমারীমতিবৃদ্ধাং চ নিষেধযতি, অনুদ্ভূতক্ষীণরজস্কত্বাত্তযোঃ| ব্যতীতেঽতিক্রান্তে| গর্ভসমানলিঙ্গত্বেন সংশযঃ– গর্ভো বা, রক্তগুল্মো বা, ইতি; তচ্ছঙ্কানিরাসার্থং দশমে মাসে ব্যতীতে ইত্যুক্তং; নবমদশমযোঃ প্রসবকালত্বাদিত্যেকে| তন্ন, ‘যঃ স্পন্দতে পিণ্ডিত এব নাঙ্গৈঃ’ ইত্যাদিনৈব বিশেষদর্শনেন সংশযস্য নিবর্তিতত্বাত্| গর্ভো হি নিরন্তরং প্রত্যঙ্গৈর্নিঃশূলং স্পন্দতে, গুল্মস্তু এতদ্বিপরীতেন| কিঞ্চ নবমে দশমে প্রসূত ইত্যুত্সর্গঃ, নতু নিযমঃ, তদধিককালেঽপি প্রসবদর্শনাত্, আগমাচ্চ| উক্তং হি চরকে– “তং স্ত্রী প্রসূতে সুচিরেণ গর্ভং পুষ্টো যদা বর্ষগণৈরপি স্যাত্|” (চ. শা. অ. ২) ইতি| তস্মান্নেদং দশমমাসব্যতিক্রমে চিকিত্সাবিধানস্য প্রযোজনং, কিন্তু ব্যাধিমহিম্না তাবতৈব কালেন তস্য চিকিত্সযা সুখোচ্ছেদনমিতি| যথা জ্বরে পুরাণে এব ক্ষীরপানবিরেচনে| উক্তং হি তন্ত্রান্তরে– “রক্তগুল্মে পুরাণত্বং সুখসাধ্যস্য লক্ষণম্|” ইতি| পুরাণতা চাস্য দশমমাসব্যতিক্রমেণৈব ভবতি| জেজ্জটেনাপ্যুক্তম্– যদ্যর্বাক্ রক্তভেদনং ক্রিযতে তদা গর্ভশয্যাং ক্ষিণাতি, তল্লীনত্বাদ্রক্তস্য; একাদশমাসে তু পরিপিণ্ডিতগুল্মে স্নেহাদিনোপস্কৃতদেহাযা ন গর্ভশয্যাযা বিকৃতিমাদধাতি রক্তভেদনমিতি||১৫-১৬||
Adhikarana gulmino~asAdhyalakShaNAni (17-20) · Śloka 20
সঞ্চিতঃ ক্রমশো গুল্মো মহাবাস্তুপরিগ্রহঃ |
কৃতমূলঃ সিরানদ্ধো যদা কূর্ম ইবোত্থিতঃ ||১৭||
দৌর্বল্যারুচিহৃল্লাসকাসচ্ছর্দ্যরতিজ্বরৈঃ |
তৃষ্ণাতন্দ্রাপ্রতিশ্যাযৈর্যুজ্যতে স ন সিধ্যতি ||১৮||
গৃহীত্বা সজ্বরং শ্বাসচ্ছর্দ্যতীসারপীডিতম্ |
হৃন্নাভিহস্তপাদেষু শোথঃ কর্ষতি গুল্মিনম্ ||১৯||
(চ. চি. অ. ৫) |
শ্বাসঃ শূলং পিপাসাঽন্নবিদ্বেষো গ্রন্থিমূঢতা |
জাযতে দুর্বলত্বং চ গুল্মিনো মরণায বৈ ||২০||
(সু. সূ. অ. ৩৩) |
View original
सञ्चितः क्रमशो गुल्मो महावास्तुपरिग्रहः |
कृतमूलः सिरानद्धो यदा कूर्म इवोत्थितः ||१७||
दौर्बल्यारुचिहृल्लासकासच्छर्द्यरतिज्वरैः |
तृष्णातन्द्राप्रतिश्यायैर्युज्यते स न सिध्यति ||१८||
गृहीत्वा सज्वरं श्वासच्छर्द्यतीसारपीडितम् |
हृन्नाभिहस्तपादेषु शोथः कर्षति गुल्मिनम् ||१९||
(च. चि. अ. ५) |
श्वासः शूलं पिपासाऽन्नविद्वेषो ग्रन्थिमूढता |
जायते दुर्बलत्वं च गुल्मिनो मरणाय वै ||२०||
(सु. सू. अ. ३३) |
চিরজস্যাবস্থাযামসাধ্যত্বমাহ– সঞ্চিত ইত্যাদি| মহাবাস্তুপরিগ্রহঃ সকলোদরব্যাপী| কৃতমূলো ধাত্বন্তরাবগাহী| সিরানদ্ধঃ সিরাজালবান্| গৃহীত্বেত্যাদি| হৃদযাদৌ গৃহীত্বা শোথো গুল্মিনং কর্ষতি, ‘মরণায’ ইতি শেষঃ| শ্বাসেত্যাদি| গ্রন্থিমূঢতা গ্রন্থিরূপস্য গুল্মস্যাকস্মাদ্বিলযনমিতি| ননু চ, অন্তর্বিদ্রধিগুল্মযোঃ কো ভেদঃ? সমানস্থানসম্ভবত্বাত্| উচ্যতে– বিদ্রধিঃ পচ্যতে, গুল্মো ন পচ্যতে নিরাশ্রযত্বাত্| যদাহ সুশ্রুতঃ– “ন নিবন্ধোঽস্তি গুল্মস্য বিদ্রধিঃ সনিবন্ধনঃ| গুল্মস্তিষ্ঠতি দোষেষু বিদ্রধির্মাংসশোণিতে|| বিদ্রধিঃ পচ্যতে তস্মাদ্গুল্মঃ ক্বাপি ন পচ্যতে|” (সু. নি. অ. ৯) ইতি| ননু, গুল্মোঽপি পচ্যত এব| যদাহ চরকঃ– “বিদাহশূলসঙ্ক্ষোভস্বপ্ননাশারতিজ্বরৈঃ| বিদহ্যমানং জানীযাদ্গুল্মং তমুপনাহযেত্||” (চ. চি. অ. ৫) ইতি| উচ্যতে– গুল্মো ন পচ্যতে নিরাশ্রযত্বাত্; যদা তু কারণবশাদাশ্রযং মাংসাদিকমাসাদযতি, বাতোপশমনার্থং কৃতস্বেদাদিভির্বা রক্তদুষ্টির্ভবতি, তদা পচ্যমানো বিদাহনিমিত্তকং বিদ্রধিত্বমাপ্নোতি| উক্তং হি– “ স বৈ শীঘ্রবিদাহিত্বাদ্বিদ্রধীত্যভিধীযতে|” (চ. সূ. অ. ১৭) ইতি| ন হি যস্মাত্ বিকারাত্ যদুত্পদ্যতে বিকারান্তরং তত্ স এব ভবতীতি; মাভূত্ প্লীহৈব উদরম্, অশ্মর্যেব শর্করা, ইত্যাদিশাস্ত্রোক্তবিরোধবিস্তরঃ| তস্মাদ্বিদ্রধিঃ পচ্যতে, গুল্মো ন পচ্যতে ইতি সিদ্ধান্তো নিরপবাদঃ| যে তু অন্তর্বিদ্রধিং ন পঠন্তি তেষামযমভিপ্রাযঃ– গুল্মে পক্বে বিদ্রধৌ চ পাটনশোধনরোপণাদেঃ, অপক্বে চ বিরেকলেপবিম্লাপনাদেশ্চিকিত্সিতস্য প্রাযো বিশেষাভাবাদলং পৃথগ্বিকারস্বীকারেণেতি||১৭-২০||
Adhikarana puShpikA · Śloka 28
ইতি শ্রীমাধবকরবিরচিতে মাধবনিদানে গুল্মনিদানং সমাপ্তম্ ||২৮||
View original
इति श्रीमाधवकरविरचिते माधवनिदाने गुल्मनिदानं समाप्तम् ||२८||
ইতি শ্রীবিজযরক্ষিতকৃতাযাং মধুকোশব্যাখ্যাযাং গুল্মনিদানং সমাপ্তম্||২৮||