12. hikkāśvāsanidānam

Adhikarana hikkAnidAnam (1-2) · Śloka 2

অথ হিক্কা-শ্বাসনিদানম্ | বিদাহিগুরুবিষ্টম্ভিরূক্ষাভিষ্যন্দিভোজনৈঃ | শীতপানাশনস্থানরজোধূমাতপানিলৈঃ ||১|| ব্যাযামকর্মভারাধ্ববেগাঘাতাপতর্পণৈঃ | হিক্কা শ্বাসশ্চ কাসশ্চ নৃণাং সমুপজাযতে ||২|| (সু. উ. তং. অ. ৫০) |

সমাননিদানত্বাত্ কাসানন্তরং হিক্কাশ্বাসৌ| ননু, এতেষাং প্রাযস্তুল্যনিদানচিকিত্সিতত্বেনৈকাধিকারে কথমনভিধানম্? উচ্যতে– যদ্যপি কাসশ্বাসহিক্কানাং নিদানং সমানং, তথাপি কাসস্য দোষভেদাদ্ভেদঃ; যথা– বাতিকঃ, পৈত্তিকঃ, শ্লৈষ্মিক ইত্যাদি; হিক্কাশ্বাসৌ তু কফবাতাত্মকাবেব; যদাহ দৃঢবলঃ– “কফবাতাত্মকাবেতৌ পিত্তস্থানসমুদ্ভবৌ|” (চ. চি. অ. ১৭) ইতি| সুশ্রুতোঽপ্যাহ– “বাযুঃ কফেনানুগতঃ পঞ্চ হিক্কাঃ করোতি হি|” (সু. উ. তং. অ. ৫১) ইতি| ভেদস্ত্বনযোঃ সম্প্রাপ্তিভেদাদ্বেগক্রিযাদিনা চ, নতু কাসবদ্দোষভেদেন; শ্বাসকাসাভ্যাং হিক্কাযাঃ স্বনতোঽপি ভেদঃ| পিত্তস্থানসমুদ্ভবাবিতি বিশেষণং সুশ্রুতমতে ক্ষুদ্রাং ন প্রাপ্নোতি, সা হি ‘জত্রুমূলাত্ প্রধাবিতা’ ইতি পঠ্যতে; চরকমতে তু ব্যপেতাং ন প্রাপ্নোতি, সাঽপি ‘জত্রুমূলাদসন্ততা’ ইতি পঠ্যতে; তস্মাত্ পিত্তস্থানসমুদ্ভবাবিতি বিশেষণং ছত্রিণো গচ্ছন্তীতি ন্যাযেন বোধ্যম্| শীতশব্দঃ পানাদিভিস্ত্রিভিঃ সম্বধ্যতে| রজো ধূলিঃ, সা চ ধূমবন্নাসাদিপ্রবেশাত্ কারণম্| ব্যাযামকর্ম ধনুরাকর্ষণাদিব্যাপারঃ, বেগাঘাতো মলাদিবেগবিধারণম্, অপতর্পণমনশনাদি| কাসশ্চোক্তোঽপ্যেকনিদানত্বপ্রতিপাদনার্থং পুনরভিহিত ইতি||১-২||

Adhikarana hikkAnAM svarUpaM niruktishca (3) · Śloka 3

মুহুর্মুহুর্বাযুরুদেতি সস্বনো যকৃত্প্লীহান্ত্রাণি মুখাদিবাক্ষিপন্ | স ঘোষবানাশু হিনস্ত্যসূন্ যতস্ততস্তু হিক্কেত্যভিধীযতে বুধৈঃ ||৩|| (সু. উ. তং. অ. ৫০) |

হিক্কানাং স্বরূপং নিরুক্তিং চাহ– মুহুর্মুহুরিত্যাদি| বাযুরত্র সোদানঃ প্রাণ ইত্যাহুঃ| উদেতি ঊর্ধ্বং গচ্ছতি| সস্বন ইতি ‘হিক্’ ইতি শব্দবান্| ঊর্ধ্বগমনমেব বিশিনষ্টি– যকৃদিত্যাদি| অত্র প্লিহেতি হ্রস্বেকারশ্ছন্দোনুরোধাত্| মুখাদিতি ল্যব্লোপে কর্মণি পঞ্চমী, তেন যকৃত্প্লীহান্ত্রাণি মুখমানীয, আক্ষিপন্ নিঃসারযন্নিবেত্যর্থঃ| স ইতি বাযুঃ| ‘হিনস্ত্যসূন্’ ইতি হিক্কেতি নিরুক্তিঃ পৃষোদরাদিনা রূপসিদ্ধিঃ| ‘হিগিতি কৃত্বা কাযতি শব্দাযতে ইতি হিক্কা’ শাব্দিকাঃ||৩||

Adhikarana hikkAsamprAptiH bhedAshca (4) · Śloka 4

অন্নজাং যমলাং ক্ষুদ্রাং গম্ভীরাং মহতীং তথা | বাযুঃ কফেনানুগতঃ পঞ্চ হিক্কাঃ করোতি হি ||৪|| (সু. উ. তং. অ. ৫০) |

তাসাং ভেদং সম্প্রাপ্তিং চাহ– অন্নজামিত্যাদি| যমলৈব চরকে ব্যপেতেতি নাম্না পঠিতা, অন্নপানে ব্যপেতে পরিণতে জাযতে ইত্যতো হেতোঃ; অস্যাং চানুক্তমপি যমলবেগত্বং সুশ্রুতদর্শনাদ্বিজ্ঞেযম্| অন্নজাযাঃ সাধ্যত্বেন প্রাশস্ত্যাত্ পূর্বমভিধানম্||৪||

Adhikarana hikkApUrvarUpam (5) · Śloka 5

কণ্ঠোরসোর্গুরুত্বং চ বদনস্য কষাযতা | হিক্কানাং পূর্বরূপাণি কুক্ষেরাটোপ এব চ ||৫|| (চ. চি. অ. ২১) |

পূর্বরূপমাহ– কণ্ঠোরসোরিত্যাদি| বদনস্য কষাযতা বাতাত্, নতু কফান্মাধুর্যং, ব্যাধিপ্রভাবাত্||৫||

Adhikarana annajAhikkAlakShaNam (6) · Śloka 6

পানান্নৈরতিসংযুক্তৈঃ সহসা পীডিতোঽনিলঃ | হিক্কযত্যূর্ধ্বগো ভূত্বা তাং বিদ্যাদন্নজাং ভিষক্ ||৬|| (সু. উ. তং. অ. ৫০) |

অন্নজাযা লক্ষণমাহ– পানান্নৈরিত্যাদি| হিক্কযতি হিক্কাং করোতি||৬||

Adhikarana yamalAhikkAlakShaNam (7) · Śloka 7

চিরেণ যমলৈর্বেগৈর্যা হিক্কা সম্প্রবর্ততে | কম্পযন্তী শিরোগ্রীবং যমলাং তাং বিনির্দিশেত্ ||৭|| (সু. উ. তং. অ. ৫০) |

যমলামাহ– চিরেণেত্যাদি| কম্পযন্তী শিরোগ্রীবমিত্যুপলক্ষণং, তেন চরকক্তপ্রলাপমূর্ছাবমিতৃষ্ণাবৈচিত্ত্যজৃম্ভাবিপ্লুতাক্ষত্বমুখশোষা বোধ্যা ইতি গযদাসঃ||৭||

Adhikarana kShudrAhikkAlakShaNam (8) · Śloka 8

প্রকৃষ্টকালৈর্যা বেগৈর্মন্দৈঃ সমভিবর্ততে | ক্ষুদ্রিকা নাম সা হিক্কা জত্রুমূলাত্ প্রধাবিতা ||৮|| (সু. উ. তং. অ. ৫০) |

ক্ষুদ্রামাহ– প্রকৃষ্টেত্যাদি| প্রকৃষ্টকালৈশ্চিরেণ| জত্রু কণ্ঠোরসোঃ সন্ধিরিতি জেজ্জটঃ; জত্রু গ্রীবামূলং, তদ্গ্রহণেনৈব হৃদযক্লোমকণ্ঠগ্রহণমিতি গযদাসঃ||৮||

Adhikarana gambhIrAhikkAlakShaNam (9) · Śloka 9

নাভিপ্রবৃত্তা যা হিক্কা ঘোরা গম্ভীরনাদিনী | অনেকোপদ্রববতী গম্ভীরা নাম সা স্মৃতা ||৯|| (সু. উ. তং. অ. ৫০) |

গম্ভীরামাহ– নাভীত্যাদি| নাভিপ্রবৃত্তেতি নাভিতঃ প্রভৃতি সঞ্জাতা, অত এবাস্যা গম্ভীরত্বম্| অনেকোপদ্রববতী তৃষ্ণাজ্বরাদিযুক্তা||৯||

Adhikarana mahatIhikkAlakShaNam (10) · Śloka 10

মর্মাণ্যুত্পীডযন্তীব সততং যা প্রবর্ততে | মহাহিক্কেতি সা জ্ঞেযা সর্বগাত্রবিকম্পিনী ||১০|| (সু. উ. তং. অ. ৫০) |

মহতীমাহ– মর্মাণীত্যাদি| মর্মাণীতি প্রধানানি বস্তিহৃদযশিরাংসি, ইযং নামতো মহাহিক্কা||১০||

Adhikarana hikkAyA asAdhyalakShaNam (11-14) · Śloka 14

আযম্যতে হিক্কতো যস্য দেহো দৃষ্টিশ্চোর্ধ্বং নাম্যতে যস্য নিত্যম্ | ক্ষীণোঽন্নদ্বিট্ ক্ষৌতি যশ্চাতিমাত্রং তৌ দ্বৌ চান্ত্যৌ বর্জযেদ্ধিক্কমানৌ ||১১|| অতিসঞ্চিতদোষস্য ভক্তচ্ছেদকৃশস্য চ | ব্যাধিভিঃ ক্ষীণদেহস্য বৃদ্ধস্যাতিব্যবাযিনঃ ||১২|| আসাং যা সা সমুত্পন্না হিক্কা হন্ত্যাশু জীবিতম্ | যমিকা চ প্রলাপার্তিমোহতৃষ্ণাসমন্বিতা ||১৩|| অক্ষীণশ্চাপ্যদীনশ্চ স্থিরধাত্বিন্দ্রিযশ্চ যঃ | তস্য সাধযিতুং শক্যা যমিকা হন্ত্যতোঽন্যথা ||১৪|| (চ. চি. অ. ২১) |

অবস্থাযামসাধ্যত্বমাহ– আযম্যত ইত্যাদি| আযম্যতে বিস্তার্যত ইব| দৃষ্টিশ্চোর্ধ্বং ‘ভবতি’ ইতি শেষঃ| নাম্যতে আকুঞ্চ্যতে দেহ ইতি সম্বন্ধ ইতি জেজ্জটগযদাসৌ| ‘তাম্যতি’ ইতি পাঠান্তরে মুহ্যতি হিক্কী| ক্ষৌতি ছিক্কতি| তৌ দ্বাবিতি আযম্যত ইত্যাদিনা নিত্যমিত্যন্তেনৈকাবস্থো হিক্কী, ক্ষীণেত্যাদিনাঽতিমাত্রান্তেনাপরঃ; সাধ্যানামপি মধ্যে এবংবিধৌ বর্জযেদিত্যর্থঃ| গম্ভীরামহত্যোঃ স্বভাবাদেবাসাধ্যত্বমিতি তদ্যুক্তৌ হিক্কমানাবন্ত্যৌ শেষপঠিতাবসাধ্যৌ; পাঠান্তরাণি ব্যাখ্যাবিশেষাশ্চ বিস্তরভযান্ন লিখিতাঃ| আসাং যা সেতি আসাং সাধ্যহিক্কানাং মধ্যে যাঽতিসঞ্চিতদোষাদের্ভবতি সা হন্তীতি যোজ্যম্; অথবা আসামিতি পঞ্চবিধানামেব| তেন মহতীপ্রভৃতীনাং স্বরূপেণ যদসাধ্যত্বমুক্তং তত্ প্রাযিকম্| যদাহ জতূকর্ণঃ– “ আদ্যা দুঃসাধ্যা যমিকা মোহতৃষ্ণাবতঃ সদ্যঃপ্রাণহৃত্|” ইতি| যমিকেত্যাদি| যমিকা চেত্যনেন চকারাত্ ক্ষুদ্রা অন্নজা বা যা সাধ্যত্বেনোক্তা সা যমলৈর্বেগৈর্জাযমানা হন্তীতি যোজ্যম্| সৈবাক্ষীণাদেঃ সাধ্যা ভবতীত্যাহ– অক্ষীণ ইত্যাদি| অক্ষীণো বলবান্| অদীনঃ প্রসন্নমনাঃ| অন্যে তু অন্নজাং যমলামিত্যাদিসুশ্রুতগ্রন্থপঠিতাং যমলাং যমিকাশব্দেন ব্যাচক্ষতে| তন্ন, যমিকা চ প্রলাপার্তীত্যাদিশ্লোকশ্চরকে পঠিতঃ, অত্র যমলা যমিকানাম্না ন পঠিতৈব হিক্কেতি| যমিকাশব্দেনৈবার্থগত্যা ব্যপেতোচ্যতেতি চেত্, ন, তর্হি ব্যপেতা চ প্রলাপার্তীত্যেবমভিদধ্যাত্||১১-১৪||

Adhikarana shvAsabhedAH (15) · Śloka 15

মহোর্ধ্বচ্ছিন্নতমকক্ষুদ্রভেদৈস্তু পঞ্চধা | ভিদ্যতে স মহাব্যাধিঃ শ্বাস একো বিশেষতঃ ||১৫|| (সু. উ. তং. অ. ৫১) | (বাতাধিকো ভবেত্ ক্ষুদ্রস্তমকস্তু কফোদ্ভবঃ | কফবাতাধিকশ্চৈব সংসৃষ্টশ্ছিন্নসঞ্জ্ঞকঃ | শ্বাসো মারুতসংসৃষ্টো মহানূর্ধ্বস্তথা(তো) মতঃ) | (সু. উ. তং. অ. ৫১) |

শ্বাসানাহ– মহোর্ধ্বেত্যাদি| একো বিশেষত ইতি শ্বাসত্বেনৈক এব সন্ বিশেষং হেতুলিঙ্গভেদং প্রাপ্য পঞ্চধা ভিদ্যতে, পঞ্চসু শ্বাসত্বং বেগবদূর্ধ্ববাতত্বং; যদুক্তমন্যৈঃ– “শ্বাসস্তু ভস্ত্রিকাধ্মানসমবাতোর্ধ্বগামিতা|” ইতি| সঙ্খ্যেযনির্দেশাদেব পঞ্চপ্রকারত্বে সিদ্ধে পঞ্চবচনং তমকভেদস্য প্রতমকস্য পৃথক্ত্বসঙ্খ্যানিরাসার্থম্||১৫||

Adhikarana shvAsapUrvarUpaM, shvAsasamprAptishca (16-17) · Śloka 17

প্রাগ্রূপং তস্য হৃত্পীডা শূলমাধ্মানমেব চ | আনাহো বক্ত্রবৈরস্যং শঙ্খনিস্তোদ এব চ ||১৬|| যদা স্রোতাংসি সংরুধ্য মারুতঃ কফপূর্বকঃ | বিষ্বগ্ব্রজতি সংরুদ্ধস্তদা শ্বাসান্ করোতি সঃ ||১৭|| (সু. উ. তং. অ. ৫১) |

সম্প্রাপ্তিমাহ– যদেত্যাদি| স্রোতাংসীতি হিক্কানির্দিষ্টপ্রাণোদানবহানি | কফঃ পূর্বং প্রধানং যস্য স তথা| তেনৈব কফেন রুদ্ধঃ বিমার্গগতির্বিমার্গগত্বেন বিষ্বগ্ব্রজতি বিষ্বগঞ্চতীতি বিষ্বক্ সর্বত ইত্যর্থঃ||১৬-১৭||

Adhikarana mahAshvAsalakShaNam (18-20) · Śloka 20

উদ্ধূযমানবতো যঃ শব্দবদ্দুঃখিতো নরঃ | উচ্চৈঃ শ্বসিতি সংরুদ্বো মত্তর্ষভ ইবানিশম্ ||১৮|| প্রনষ্টজ্ঞানবিজ্ঞানস্তথা বিভ্রান্তলোচনঃ | বিবৃতাক্ষ্যাননো বদ্ধমূত্রবর্চা বিশীর্ণবাক্ ||১৯|| দীনঃ প্রশ্বসিতং চাস্য দূরাদ্বিজ্ঞাযতে ভৃশম্ | মহাশ্বাসোপসৃষ্টস্তু ক্ষিপ্রমেব বিপদ্যতে ||২০|| (চ. চি. অ. ২১) |

মহাশ্বাসলক্ষণমাহ– উদ্ধূযমানেত্যাদি| উদ্ধূযমানবাত ইতি উত্ ঊর্ধ্বং ধূযমানো নীযমানো বাতো যস্য স তথা| শব্দবত্ সশব্দং যথা ভবতি| উচ্চৈর্দীর্ঘম্| সংরুদ্ধো মত্তর্ষভ ইবেতি স্বরবিশেষজ্ঞাপনার্থমযং দৃষ্টান্তঃ| জ্ঞানং শাস্ত্রং, বিজ্ঞানং তদর্থনিশ্চযঃ| বিভ্রান্তলোচনঃ চঞ্চলনেত্রঃ| বিবৃতে স্তব্ধে অক্ষ্যাননে যস্য স তথা; নেত্রস্য বিভ্রান্তস্তব্ধত্বে কালভেদাদিতি জেজ্জটঃ| বিশীর্ণবাক্ বক্তুমক্ষমঃ, মন্দবচনো বা| দীনঃ ক্লান্তমনাঃ; হীনমিতি পাঠান্তরমযুক্তং, দূরাদ্বিজ্ঞাযতে ভৃশমিত্যনুপপত্তেরিত্যাহুঃ||১৮-২০||

Adhikarana UrdhvashvAsalakShaNam (21-23) · Śloka 23

ঊর্ধ্বং শ্বসিতি যো দীর্ঘং ন চ প্রত্যাহরত্যধঃ | শ্লেষ্মাবৃতমুখস্রোতাঃ ক্রুদ্ধগন্ধবহার্দিতঃ ||২১|| ঊর্ধ্বদৃষ্টির্বিপশ্যংস্তু বিভ্রান্তাক্ষ ইতস্ততঃ | প্রমুহ্যন্ বেদনার্তশ্চ শুক্লাস্যোঽরতিপীডিতঃ ||২২|| ঊর্ধ্বশ্বাসে প্রকুপিতে হ্যধঃশ্বাসো নিরুধ্যতে | মুহ্যতস্তাম্যতশ্চোর্ধ্বং শ্বাসস্তস্যৈব হন্ত্যসূন্ ||২৩|| (চ. চি. অ. ২১) |

ঊর্ধ্বশ্বাসলক্ষণমাহ– ঊর্ধ্বমিত্যাদিনা| ঊর্ধ্বমিতি বিশেষপরং, সর্বশ্বাসানাং তথাবিধত্বাত্| দীর্ঘমিতি দীর্ঘকালম্| নচ প্রত্যাহরত্যধ ইতি ন শ্বাসমধঃ করোতি দীর্ঘকালমিত্যর্থঃ| শ্লেষ্মাবৃতমুখস্রোতা ইতি শ্লেষ্মণা আবৃতানি মুখং স্রোতাংসি চ যস্য স তথা| ক্রুদ্ধগন্ধবহার্দিতঃ কুপিতবাতপীডিতঃ; সমস্তপাঠে তু শ্লেষ্মাবৃতমুখস্রোতস্ত্বেন ক্রুদ্ধো যো গন্ধবহস্তেনার্দিতঃ| বিপশ্যংস্তু ইতস্তত ইতি ইতস্ততো বিকৃতিং পশ্যন্| ‘ঊর্ধ্বং শ্বসিতি যো দীর্ঘং ন চ প্রত্যাহরত্যধঃ’ ইতি যদুক্তং তত্র হেতুমাহ– ঊর্ধ্বশ্বাস ইত্যাদি| নিরুধ্যত ইতি হৃদয এবাতিস্তম্ভিতঃ| অথবা শ্বাসো বাতঃ সোঽধো ন বর্ততে| ঊর্ধ্বং শ্বাস ঊর্ধ্বশ্বাসঃ| তাম্যতো গ্লাযতো মুহ্যতশ্চাসূন্ প্রাণান্ হন্তি, নান্যথেতি||২১-২৩||

Adhikarana chinnashvAsalakShaNam (24-26) · Śloka 26

যস্তু শ্বসিতি বিচ্ছিন্নং সর্বপ্রাণেন পীডিতঃ | ন বা শ্বসিতি দুঃখার্তো মর্মচ্ছেদরুগর্দিতঃ ||২৪|| আনাহস্বেদমূর্ছার্তো দহ্যমানেন বস্তিনা | বিপ্লুতাক্ষঃ পরিক্ষীণঃ শ্বসন্ রক্তৈকলোচনঃ ||২৫|| বিচেতাঃ পরিশুষ্কাস্যো বিবর্ণঃ প্রলপন্নরঃ | ছিন্নশ্বাসেন বিচ্ছিন্নঃ স শীঘ্রং বিজহাত্যসূন্ ||২৬|| (চ. চি. অ. ২৯) |

ছিন্নশ্বাসলক্ষণমাহ– যস্ত্বিত্যাদি| বিচ্ছিন্নং সবিচ্ছেদম্| সর্বপ্রাণেন ন বা শ্বসিতি শ্বাসং ন লভতে| মর্মচ্ছেদরুগর্দিত ইতি হৃদযচ্ছেদবেদনযা পীডিতঃ| দহ্যমানেন বস্তিনোপলক্ষিতঃ, এতেন বাতস্য পিত্তানুবন্ধো দর্শিতঃ| বিপ্লুতাক্ষঃ চঞ্চলনেত্রোঽশ্রুপূর্ণচক্ষুর্বা| রক্তৈকলোচনত্বং ব্যাধিপ্রভাবাত্, দোষাত্তু দ্বযোরপি স্যাত্| বিচেতা উদ্বিগ্নচিত্তঃ| বিচ্ছিন্নো বিমোক্ষিতসন্ধিঃ, ‘পীডিত’ ইত্যন্যে; ‘বিহতঃ’ ইতি পাঠান্তরম্||২৪-২৬||

Adhikarana tamakashvAsalakShaNam (27-34) · Śloka 34

প্রতিলোমং যদা বাযুঃ স্রোতাংসি প্রতিপদ্যতে | গ্রীবাং শিরশ্চ সঙ্গৃহ্য শ্লেষ্মাণং সমুদীর্য চ ||২৭|| করোতি পীনসং তেন রুদ্ধো ঘুর্ঘুরকং তথা | অতীব তীব্রবেগং চ শ্বাসং প্রাণপ্রপীডকম্ ||২৮|| প্রতাম্যতি স বেগেন তৃষ্যতে সন্নিরুধ্যতে | প্রমোহং কাসমানশ্চ স গচ্ছতি মুহুর্মুহুঃ ||২৯|| শ্লেষ্মণ্যমুচ্যমানে তু ভৃশং ভবতি দুঃখিতঃ | তস্যৈব চ বিমোক্ষান্তে মুহূর্তং লভতে সুখম্ ||৩০|| তথাঽস্যোদ্ধ্বংসতে কণ্ঠঃ কৃচ্ছ্রাচ্ছক্নোতি ভাষিতুম্ | ন চাপি লভতে নিদ্রাং শযানঃ শ্বাসপীডিতঃ ||৩১|| পার্শ্বে তস্যাবগৃহ্ণাতি শযানস্য সমীরণঃ | আসীনো লভতে সৌখ্যমুষ্ণং চৈবাভিনন্দতি ||৩২|| উচ্ছ্রিতাক্ষো ললাটেন স্বিদ্যতা ভৃশমার্তিমান্ | বিশুষ্কাস্যো মুহুঃ শ্বাসো মুহুশ্চৈবাবধম্যতে ||৩৩|| মেঘাম্বুশীতপ্রাগ্বাতৈঃ শ্লেষ্মলৈশ্চ বিবর্ধতে | স যাপ্যস্তমকঃ শ্বাসঃ সাধ্যো বা স্যান্নবোত্থিতঃ ||৩৪|| (চ. চি. অ. ২১) |

তমকশ্বাসলক্ষণমাহ– প্রতিলোমমিত্যাদি| শ্লেষ্মাণং সমুদীর্য চেত্যনেন সামান্যসম্প্রাপ্তিলব্ধস্যাপি শ্লেষ্মণঃ পুনরভিধানাদিহ বিশেষেণ কারণত্বং বোধযতি| তেন রুদ্ধঃ কফেনাবৃতঃ| ঘুর্ঘুরকং কণ্ঠে ঘুর্ঘুরশব্দম্| প্রাণপ্রপীডকং প্রাণাধিষ্ঠানহৃদযস্য পীডকম্| প্রতাম্যতি তমসি প্রবিশতীব| সন্নিরুধ্যতে ‘নিশ্চেষ্টো ভবতি’ ইতি চক্রঃ, জেজ্জটস্তু সন্নিরুধ্যতে ‘শ্বাসঃ’ ইতি | তস্যৈবেতি শ্লেষ্মণঃ| সুখং সুখমিব| উদ্ধ্বংসতে কণ্ডূযতে| পার্শ্বে ইতি কর্মপদম্, অবগৃহ্ণাতি পীডযতি| উষ্ণমভিনন্দতি বাতকফারব্ধত্বাত্| উচ্ছ্রিতাক্ষ উচ্ছূননেত্রঃ| ললাটেনেত্যুপলক্ষণে তৃতীযা| অবধম্যতে গজারূঢস্যেব সর্বগাত্রং চাল্যতে||২৭– ৩৪||

Adhikarana pratamakashvAsalakShaNaM, tasyaivAparakAraNaM lakShaNaM ca (35-36) · Śloka 36

জ্বরমূর্ছাপরীতস্য বিদ্যাত্ প্রতমকং তু তম্ | উদাবর্তরজোঽজীর্ণক্লিন্নকাযনিরোধজঃ ||৩৫|| তমসা বর্ধতেঽত্যর্থং শীতৈশ্চাশু প্রশাম্যতি | মজ্জতস্তমসীবাস্য বিদ্যাত্ সন্তমকং তু তম্ ||৩৬|| (চ. চি. অ. ২১) |

তমকস্যৈব পিত্তানুবন্ধত্বাজ্জ্বরাদিযোগেন প্রতমকসঞ্জ্ঞামাহ– জ্বরেত্যাদি| জ্বরমূর্ছাভ্যাং পরীতো জ্বরমূর্ছাপরীতঃ; জ্বরেণ মূর্ছা জ্বরমূর্ছেতি জেজ্জটঃ| এতস্যৈবাপরকারণং লক্ষণং চাহ– উদাবর্তেত্যাদি| উদাবর্তো রোগঃ, রজো ধূলিঃ, অজীর্ণমামাদি, ক্লিন্নং বিদগ্ধং, কাযে বেগানাং নিরোধঃ কাযনিরোধঃ; অথবা ক্লিন্নকাযো বৃদ্ধনর ইত্যাহুঃ, নিরোধঃ বেগনিরোধঃ, অথবা কুযোগিনাং কুম্ভকাদিরূপবাতনিরোধ ইতি জেজ্জটঃ| তমসা অন্ধকারেণ, মানসদোষেণ বা; অত্যর্থমিতি ইতরকারণাপেক্ষযা বিশেষেণ; বাতকফারব্ধোঽপি পিত্তসম্বন্ধাত্ শীতৈরুপশাম্যতীত্যাহুঃ| সন্তমকঃ প্রতমক এবেতি| অন্যে তু উদাবর্তেত্যাদিনা প্রতমকস্যোপসর্গমাহুরিতি জেজ্জটঃ||৩৫-৩৬||

Adhikarana kShudrashvAsalakShaNaM, shvAsAnAM sAdhyAsAdhyavicArashca (37-40) · Śloka 40

রূক্ষাযাসোদ্ভবঃ কোষ্ঠে ক্ষুদ্রো বাত উদীরযন্ | ক্ষুদ্রশ্বাসো ন সোঽত্যর্থং দুঃখেনাঙ্গপ্রবাধকঃ ||৩৭|| হিনস্তি ন স গাত্রাণি ন চ দুঃখো যথেতরে | ন চ ভোজনপানানাং নিরুণদ্ধ্যুচিতাং গতিম্ ||৩৮|| নেন্দ্রিযাণাং ব্যথাং নাপি কাঞ্চিদাপাদযেদ্রুজম্ | স সাধ্য উক্তো, বলিনঃ সর্বে চাব্যক্তলক্ষণাঃ ||৩৯|| (চ. চি. অ. ২১) | ক্ষুদ্রঃ সাধ্যো মতস্তেষাং তমকঃ কৃচ্ছ্র উচ্যতে | ত্রযঃ শ্বাসা ন সিধ্যন্তি তমকো দুর্বলস্য চ ||৪০|| (সু. উ. তং. অ. ৫১) |

ক্ষুদ্রশ্বাসমাহ– রূক্ষেত্যাদি| রূক্ষমন্নপানম্| ক্ষুদ্রোঽল্পনিদানলিঙ্গঃ| উদীরযন্ ঊর্ধ্বং গচ্ছন্| ইতরে উর্ধ্বশ্বাসাদযঃ| স সাধ্য উক্ত ইতি ছেদঃ| সর্বে মহাশ্বাসাদযোঽব্যক্তলক্ষণাঃ সন্তঃ সাধ্যা ইতি যোজ্যম্| ত্রযঃ শ্বাসা ন সিধ্যন্তি মহোর্ধ্বচ্ছিন্নাঃ সম্পূর্ণলক্ষণাঃ ||৩৭-৪০||

Adhikarana upekShaNAsamyagupakramAbhyAM hikkAshvAsayoH shIghrAvashyamArakatvam (41) · Śloka 41

কামং প্রাণহরা রোগা বহবো ন তু তে তথা | যথা শ্বাসশ্চ হিক্কা চ হরতঃ প্রাণমাশু চ ||৪১|| (চ. চি. অ. ২১) |

উপেক্ষণাসম্যগুপক্রমাভ্যাং হিক্কাশ্বাসযোঃ শীঘ্রাবশ্যমারকত্বমাহ– কামমিত্যাদি| কামমনুমতৌ, প্রাণহরাঃ সন্নিপাতজ্বরাদযঃ| শেষং সুবোধমিতি||৪১||

Adhikarana puShpikA · Śloka 12

ইতি শ্রীমাধবকরবিরচিতে মাধবনিদানে হিক্কাশ্বাসনিদানং সমাপ্তম্ ||১২||

ইতি শ্রীবিজযরক্ষিতকৃতাযাং মধুকোশব্যাখ্যাযাং হিক্কাশ্বাসনিদানং সমাপ্তম্||১২||