৬৪. মূঢগর্ভনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

যোনিস্থানবিকারানুবৃত্তেঃ স্ত্রীরোগনিদানারম্ভঃ| তত্র গর্ভপাতনিদানমাহ– ভযাভিঘাতাদিত্যাদি| এতচ্চোপলক্ষণং, তেনান্যেঽপি সুশ্রুতোক্তা গ্রাম্যধর্মযানবাহনপতনস্খলনাদযো বোদ্ধব্যাঃ| পততীতি স্রংসমানে, তেন স্রাবপাতযোরপি সশূলং রক্তদর্শনং ভবতি, এতত্তু পূর্বরূপমিতি দর্শযতি||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ স্ত্রীবিকারাধিকারাত্স্ত্রীরোগনিদানম্| তত্র গর্ভপাতহেতুমাহ– ভযেত্যাদি| এতচ্চোপলক্ষণম্| তেনান্যেঽপি সুশ্রুতোক্তা গ্রাম্যধর্মযানবাহনপতনস্খলনাদযো গ্রাহ্যাঃ| পততীতি স্রংসমানে, সশূলং রক্তদর্শনং ভবতীতি পূর্বরূপকথনম্||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

এতযোঃ কালভেদমাহ– আচতুর্থাদিত্যাদি| গর্ভবিদ্রব ইতি অনতিঘনাবযবত্বেন বিশেষেণ দ্রবরূপতযা গর্ভবিদ্রবো ভণ্যতে; স্রাবো নাতিঘনত্বাত্, পাতস্তু ঘনত্বাত্| যত্তু ভোজেঽভিহিতম্– “আতৃতীযাত্ততো মাসাদ্গর্ভঃ স্রবতি শোণিতম্| ঊর্ধ্বং সঙ্ঘাতভূতস্তু গর্ভঃ পততি যোষিতাম্||” ইতি| সঙ্ঘাতভূতঃ কোমলাঙ্গঃ, পিণ্ডিতাবস্থ ইত্যর্থঃ| অত এব সুশ্রুতে চতুর্থমাসেঽপ্যদৃঢত্বাত্ স্রাবঃ কথিতঃ| স্থিরশরীরস্যেতি কঠিনশরীরাবযবস্য| পঞ্চমষষ্ঠযোরিতি সপ্তমে অনুগুণজননে জীবদর্শনাযোক্তং, বিগুণজননে তু সপ্তমাদিমাসেষ্বপি গর্ভপাতঃ| অন্যে তু পঞ্চমষষ্ঠযোরেব পাতঃ, সপ্তমাদিষু দোষবৈগুণ্যাদ্ধি প্রসব ইতি আচার্যপ্রামাণ্যাদ্ব্যবহারাচ্চ মন্যন্তে||২||

আতঙ্কদর্পণ ব্যাখ্যা (বাচস্পতি বৈদ্য কৃত)

স্রাবপাতযোরিদানীং কালনিযমমাহ– আচতুর্থাদিত্যাদি| অনতিঘনাবযবত্বেন বিশেষেণ দ্রবরূপতযা গর্ভবিদ্রবো ভণ্যতে| যদুক্তং ভোজে– “আতৃতীযাত্ততো মাসাদ্গর্ভঃ স্রবতি শোণিতম্| ঊর্ধ্বং সঙ্ঘাতভূতস্তু গর্ভঃ পততি যোষিতাম্||” ইতি| তচ্চতুর্থে মাসি সংযাবরূপতযা অনভিব্যক্তদৃষ্টাঙ্গতযা সুশ্রুতেন স্রাবপক্ষে নিক্ষিপ্তম্| স্থিরশরীরস্যেতি কঠিনশরীরাবযবস্য| পঞ্চমষষ্ঠযোরিতি সপ্তমে অনুগুণজননে জীবনদর্শনাযোক্তিঃ| বিগুণজননে তু সপ্তমাদিমাসেষ্বপি পাতঃ| সপ্তমাদিষু তু দোষবৈগুণ্যাদ্ধি প্রসব ইতি আচার্যপ্রামাণ্যাদ্ব্যবহারাচ্চ মন্যন্তে||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

গর্ভস্যাকালপাতে নিদানপূর্বকং দৃষ্টান্তমাহ– গর্ভোঽভিঘাতেত্যাদি| পক্বং দ্রুমাদিবেতি দৃষ্টান্তেনৈব দর্শযতি– যথা বৃন্তলগ্নং পক্বফলমভিঘাতেনাকাল এব পততি, তথোক্তহেতুভিরকালে গর্ভপাতঃ|৩|–

আতঙ্কদর্পণ ব্যাখ্যা (বাচস্পতি বৈদ্য কৃত)

গর্ভস্যাচিরপাতং সদৃষ্টান্তমাহ– গর্ভ ইত্যাদি| পূর্ণসর্বাবযবস্তু প্রসবঃ সমুচিতে কালে|৩|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

উচিতপ্রসবকালে যথা মূঢো গর্ভঃ স্যাত্তদাহ– মূঢঃ করোতীত্যাদি| মূঢো ব্যাসক্তগতিঃ, শূলং চ যোনিজঠরাদিষু ‘করোতি’ ইতি শেষঃ; মূত্রসঙ্গমিত্যত্র করোতীতি সম্বধ্যতে||৩||

আতঙ্কদর্পণ ব্যাখ্যা (বাচস্পতি বৈদ্য কৃত)

যথা মূঢো গর্ভো ভবতি তদাহ– মূঢ ইত্যাদি| মূঢো ব্যাসক্তগতিঃ, মূঢগর্ভং করোতি, যোনিজঠরাদিষু শূলং চ করোতি, মূত্রসঙ্গং চ করোতীতি সম্বধ্যতে||৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিগুণানিলত্বাদসঙ্খ্যেযত্বেঽপি বিশিষ্টা অষ্টৌ গতীরাহ– ভুগ্নোঽনিলেনেত্যাদি| ভুগ্নো বিগুণীকৃতঃ| বহুধেতি কথিতপ্রকারাদপ্যধিকং দর্শযতি| দ্বারং নিরুধ্য শিরসেত্যেকঃ প্রকারঃ, শিরসা বিপুলেন দ্বারং যোনিমুখং পিধায লগ্নো ভবতীত্যর্থঃ| জঠরেণ কশ্চিদিত্যপরঃ, জঠরেণোদরেণ যোনিদ্বারং পিধায সক্তো ভবতীত্যর্থঃ| কশ্চিত্ শরীরপরিবর্তিতকুব্জদেহ ইতি শরীরপরিবর্তনেন কুব্জদেহঃ কশ্চিত্ সক্তো ভবতি, অনেনান্তঃকুব্জপৃষ্ঠকুব্জযোঃ পরিগ্রহঃ| একেনেতি বাহুনা, অযং চতুর্থঃ| তির্যগ্গত ইতি অর্গলাযমানঃ| কশ্চিদবাঙ্মুখোঽন্য ইতি গ্রীবাভঙ্গাদধঃ সংলগ্নঃ| পার্শ্বাপবৃত্তগতিরিতি পার্শ্বভঙ্গেন বিগুণীকৃতঃ; পার্শ্বনত ইতি যাবত্| এতীতি স্বস্থানাদপৈতি, তথৈবেতি অবাঙ্মুখঃ সন্| সুশ্রুতেঽপ্যষ্টধা গতিরেব পঠ্যতে| যথা– “কশ্চিদ্দ্বাভ্যাং সক্থিভ্যাং যোনিমুখং প্রপদ্যতে, কশ্চিদাভুগ্নৈকসক্থিরেকেন সক্থ্না, কশ্চিদাভুগ্নসক্থিশরীরঃ স্ফিগ্দেশেন তির্যগাগতঃ, কশ্চিদুদরপৃষ্ঠপার্শ্বানামন্যতমেন যোনিদ্বারং পিধাযাবতিষ্ঠতে, অন্তঃপার্শ্বাপবৃত্তশিরাঃ কশ্চিদেকেন বাহুনা, কশ্চিদাভুগ্নশিরা বাহুদ্বযেন, কশ্চিদাভুগ্নমধ্যো হস্তপাদশিরোভিঃ, কশ্চিদেকেন সক্থ্না যোনিমুখমভিপ্রপদ্যতে অপরেণ পাযুম্|” (সু. নি. অ. ৮) ইতি||৪-৫||

আতঙ্কদর্পণ ব্যাখ্যা (বাচস্পতি বৈদ্য কৃত)

বিগুণানিলযোগাদসঙ্খ্যেযাং গতিমাহ– ভুগ্ন ইত্যাদি| ভুগ্নো বিপরীতীকৃতঃ, বহুধেতি উক্তপ্রকারাদধিকম্| তত্র ব্যবহারযোগ্যানষ্টৌ প্রকারানাহ– দ্বারমিতি| বিপুলেন শিরসা যোনিমুখং পিধায লগ্নো ভবতি, ইত্যেকঃ প্রকারঃ| অপরো ধ্মাতেন জঠরেণোদরেণ যোনিকুব্জমুখং পিধায সক্তো ভবতীতি দ্বিতীযঃ প্রকারঃ| কশ্চিত্ শরীরপরিবর্তনেন বিপরীতবর্তনেন দেহঃ সক্তো ভবতি, অনেন চান্তঃকুব্জপৃষ্ঠকুব্জযোঃ পরিগ্রহঃ, অযং তৃতীযঃ প্রকারঃ| কশ্চিদেকেন বাহুনা ইতি চতুর্থঃ প্রকারঃ| অপরো বাহুদ্বযেনেতি পঞ্চমঃ প্রকারঃ| পার্শ্বাপবৃত্তগতিরিতি পার্শ্বভঙ্গেন বিগুণীকৃতঃ পার্শ্বনত ইতি যাবত্| এতীতি স্বস্থানাদপৈতি| তথৈবেত্যবাঙ্মুখঃ সন্, এবমষ্টধা গতির্ভবতি| গর্ভস্য চতুরঃ প্রকারান্ পুনরাহ– অপ্যপরাশ্চতুর্ধা ইত্যাদি| সঙ্কীলকাদিভেদেন অপরা বক্ষ্যমাণাশ্চতুঃপ্রকারাঃ||৪-৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইত্যষ্টবিধা গতীঃ প্রদর্শ্য চতুঃপ্রকারেণ যে গতিবিশেষাঃ কথিতাস্তানাহ– সঙ্কীলক ইত্যাদি| সম্যক্ কীলবত্ সঙ্কীলকঃ, স্বার্থে কন্| তেনোর্ধ্ববাহুচরণশিরোভিঃ কীলকবল্লগ্নো যোন্যাং সঙ্কীলকঃ| পৃষ্ঠেন যোন্যাং তথৈতদ্বিপরীতেন দৃশ্যৈঃ হস্তপাদশিরোভিঃ প্রতিখুরঃ খুরসাধর্ম্যাত্; খুরশব্দেন হস্তপাদাবুচ্যেতে| গচ্ছেদ্ভুজদ্বযশিরা ইতি ভুজদ্বযোপহিতং শিরো যস্য স তথাভূতঃ সন্ যো গচ্ছেত্ স বীজকঃ কাযসঙ্গী| ভোজেঽপ্যেতা গতযঃ পঠ্যন্তে| তথাহি– “ঊর্ধ্ববাহুশিরঃপাদো রুন্ধ্যাদ্যোনিমুখং তু যঃ| প্রতিকীলোপমস্থিত্যা স চ কীলকসঞ্জ্ঞিতঃ|| অধস্তাত্ পার্শ্বতো বাঽপি তথৈবাকুঞ্চিতোঽপি বা| যো নিঃসৃত্য মুখং যোনের্জ্ঞেযঃ প্রতিখুরস্তু সঃ|| যোনিদ্বারাত্তু নির্গচ্ছেদ্যশ্চৈকঃ সশিরোভুজঃ| তমাহুর্বীজকং নাম মূঢগর্ভচিকিত্সকাঃ|| যোনিমাবৃত্য যস্তিষ্ঠেত্ পরিঘো গোপুরং যথা| তথাঽন্তর্গর্ভমাযান্তং বিদ্যাত্ পরিঘসঞ্জ্ঞিতম্||” ইতি||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

তানাহ– সঙ্কীলক ইত্যাদি| ঊর্ধ্ববাহুচরণশিরোভিঃ কীলিতৈঃ যোন্যাং কাযলগ্নঃ সঙ্কীলকঃ| যোনিমিতি যোনিং প্রতিখুরৈরিতি খুরসাধর্ম্যাত্খুরশব্দেন হস্তপাদা উচ্যন্তে, তেন হস্তপাদৈঃ বহির্গতৈঃ প্রতিখুর উচ্যতে, স প্রতিখুরঃ কাযসঙ্গী নিরুদ্ধকাযো ভবতি| বীজকমাহ– গচ্ছেদিত্যাদি| ভুজদ্বযোপহিতং শিরো যস্য স তথাভূতঃ সন্ যো গচ্ছেত্ স বীজকঃ| পরিঘমাহ– যো যোনিমাবৃত্য তিষ্ঠেত্স পরিঘঃ| পরিঘেণ তুল্য ইতি| পরিঘোঽর্গলাদণ্ডঃ| ভোজেঽপ্যেতা গতযঃ পঠ্যন্তে– “ঊর্ধ্ববাহুশিরঃপাদো রুজন্যোনিমুখং তু যঃ| প্রতিকীলোপমঃ স্থিত্বা সঙ্কীল ইতি সঞ্জ্ঞিতঃ|| অধঃপার্শ্বগতো বাপি তথৈবাকুঞ্চিতোঽপি বা| যো নিঃসৃত্য মুখং যোনের্জ্ঞেযঃ প্রতিখুরস্তু সঃ|| যোনিদ্বারাত্তু নির্গচ্ছেদ্যশ্চৈকাংসশিরোভুজঃ| তমাহুর্বীজকং নাম মূঢগর্ভচিকিত্সকাঃ| যোনিমাবৃত্য যস্তিষ্ঠেত্পরিঘো গোপুরং যথা| তথাঽন্তর্গর্ভমাযান্তং বিদ্যাত্পরিঘসঞ্জ্ঞিতম্||” ইতি||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অসাধ্যমূঢগর্ভগর্ভিণ্যোর্লক্ষণমাহ– অপবিদ্ধশিরা যা ত্বিত্যাদি| অপবিদ্ধশিরা শিরো ধারযিতুমশক্তেত্যর্থঃ, অবনতশিরা ইতি গদাধরঃ| নিরপত্রপা লজ্জাশূন্যা| নীলোদ্গতসিরা ইতি নীলবর্ণা উদ্গতাঃ সিরাঃ কুক্ষৌ যস্যাঃ সা তথা| স চেতি গর্ভঃ||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

অসাধ্যমূঢগর্ভগর্ভিণ্যোর্লক্ষণমাহ– অপবিদ্ধেত্যাদি| অপবিদ্ধশিরাঃ শিরো ধারযিতুমশক্তা| অবনতশিরা ইতি গদাধরঃ| নিরপত্রপা লজ্জারহিতা| নীলোদ্গতসিরেতি নীলা উদ্গগতাঃ সিরাঃ কুক্ষৌ যস্যাঃ সা তথা, সা গর্ভং হন্তি স চেতি গর্ভস্তামিত্যর্থঃ||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

মৃতগর্ভলক্ষণমাহ গর্ভাস্পন্দনমিত্যাদি| অস্পন্দনং নিশ্চলত্বং, জীবতো গর্ভস্যাবযবচলনং ভবতি| আবীনাং প্রণাশঃ প্রসববেদনানামভাবঃ; অথবা আবীশব্দেন প্রসবলিঙ্গান্যুচ্যন্তে, তানি চ মূত্রকফপ্রসেকাদীনি, তেষাং নাশঃ| শূনতেতি উচ্ছূনতা, অন্তর্গতস্য মূঢগর্ভস্যাধ্মাপনেন||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ গর্ভিণীরক্ষার্থং মৃতস্য মূঢগর্ভস্য পরিপীড্যাকর্ষণার্থং লক্ষণমাহ– গর্ভেত্যাদি| গর্ভাস্পন্দনং গর্ভস্যাঽচলত্বম্| আবীনাং প্রণাশ ইতি প্রসববেদনানামভাবঃ, অথবা আবীশব্দেন প্রসবলিঙ্গানি ভণ্যন্তে, তানি চ মূত্রকফপ্রসেকাদীনি, তেষাং নাশঃ| শূনতেতি উদ্ধততা, মৃতস্য গর্ভস্যাধ্মাপনেন||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্যান্তর্গতস্য মানসাগন্তুদুঃখব্যাধিভেদেন দ্বিবিধং মরণহেতুমাহ– মানসাগন্তুভিরিত্যাদি| উপতাপৈঃ দুঃখৈঃ||৯||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্যান্তর্মৃতস্য মানসাগন্তুদুষ্টব্যাধিভেদেন দ্বিবিধং হেতুমাহ– মানসেত্যাদি| উপতাপৈরিতি দুঃখৈঃ, তথাগন্তুভিরপি পীডিতঃ||৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অপরমসাধ্যগর্ভিণীলক্ষণমাহ– যোনিসংবরণমিত্যাদি| যোনিসংবরণং তন্ত্রান্তরপঠিতো রোগঃ| তথাহি– “বাতলান্যন্নপানানি গ্রাম্যধর্মং প্রজাগরম্| অত্যর্থং সেবমানাযা গর্ভিণ্যা যোনিমার্গগঃ|| মাতরিশ্বা প্রকুপিতো যোনিদ্বারস্য সংবৃতিম্| কুরুতে রুদ্ধমার্গত্বাত্ পুনরন্তর্গতোঽনিলঃ|| নিরুণদ্ধ্যাশযদ্বারং পীডযন্ গর্ভসংস্থিতিম্| নিরুদ্ধবদনোচ্ছ্বাসো গর্ভশ্চাশু বিপদ্যতে|| বদ্ধাং সংরুদ্ধহৃদযাং নাশযত্যাশু গর্ভিণীম্| যোনিসংবরণং বিদ্যাদ্ব্যাধিমেনং সুদারুণম্|| অন্তকপ্রতিমং ঘোরং নারভেত চিকিত্সিতম্|” ইতি| সঙ্গঃ কুক্ষাবিতি যোনিসংবরণে প্রতিনিবৃত্তো বাযুর্গর্ভাশযং যদা নিরুণদ্ধি তদা গর্ভঃ কুক্ষৌ সক্তো ভবতি| স উচ্যতে– সঙ্গঃ কুক্ষাবিতি| মক্কল্লো রক্তমারুতজঃ শূলবিশেষঃ| যদ্যপি প্রসূতাযাঃ শূলং মক্কল্লমুক্তং সুশ্রুতে– “ প্রজাতাযাশ্চোত্তরকালং তীক্ষ্ণৈরবিশোধিতং রক্তং মক্কল্লং করোতি|” (সু. শা. অ. ১০) ইতি, তথাঽপি প্রজাতাযাশ্চেতি চকারেণাপ্রজাতাযা অপি শূলং মক্কল্লমিতি| যথোক্তাশ্চাপ্যুপদ্রবা ইতি যথোক্তা যে যে উক্তাস্তে পুনরাক্ষেপকশ্বাসাদযঃ||১০-১১||

আতঙ্কদর্পণ ব্যাখ্যা (বাচস্পতি বৈদ্য কৃত)

অপরমসাধ্যগর্ভিণীলক্ষণমাহ– যোনীত্যাদি| যোনিসংবরণে সতি প্রতিনিবৃত্তো বাযুর্গর্ভাশযদ্বারং যদা রুণদ্ধি, তদা গর্ভঃ কুক্ষৌ সক্তো ভবতি স উচ্যতে– সঙ্গঃ কুক্ষাবিতি| মক্কল্লো রক্তমারুতজঃ শূলবিশেষঃ| যোনিসংবরণং তন্ত্রান্তরে রোগবিশেষঃ| যথা “বাতলান্যন্নপানানি গ্রাম্যধর্মং প্রজাগরম্| অত্যর্থং সেবমানাযাং গর্ভিণ্যা যোনিমার্গগঃ|| মাতরিশ্বা প্রকুপিতো যোনিদ্বারস্য সংবৃতিম্| কুরুতে রুদ্ধমার্গত্বাত্পুনরন্তর্গতোঽনিলঃ| নিরুণদ্ধ্যাশযদ্বারং পীডযন্ গর্ভসংস্থিতম্| নিরুদ্ধবদনোচ্ছ্বাসো গর্ভশ্চাশু বিপদ্যতে|| বিপন্নঃ শূনসর্বাঙ্গঃ সর্বাণ্যেবাযনানি চ| বদ্ধাং সংরুদ্ধহৃদযাং নাশযত্যাশু গর্ভিণীম্|| যোনিসংবরণং নাম ব্যাধিমেনং সুদারুণম্| অন্তকপ্রতিমং ঘোরং নারভেত চিকিত্সিতম্||” ইতি| যথোক্তাশ্চাপ্যুপদ্রবাস্তে চ পুনরাক্ষেপককাসশ্বাসাদযঃ| “পূতিগন্ধি তথা স্বেদো জিহ্বা তালু চ শুষ্যতি| বেপতে ভ্রাম্যতি তথা জীবিতং চোপরুধ্যতে|| এতৈর্লিঙ্গৈর্বিজানীযান্মূঢগর্ভং চিকিত্সকঃ||” মক্কল্লমাহ– বাযুঃ প্রকুপিত ইত্যাদি| যদ্যপি প্রসূতাযাঃ শূলং মক্কল্লমুক্তম্| যদুক্তং সুশ্রুতে– “প্রজাতাযাশ্চোত্তরকালং তীক্ষ্ণৈরবশোষিতং রক্তং মক্কলং করোতি” ইতি, তথাপি প্রজাতাযাশ্চেতি চকারেণাপ্রজাতাযা অপি শূলং মক্কল্লমিতি||১০-১১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং মূঢগর্ভনিদানং সমাপ্তম্||৬৪||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং মূঢগর্ভনিদানম্||৬৪||