31. mūtrāghātanidānam

Adhikarana mUtrAghAtanidAnam (1) · Śloka 1

অথ মূত্রাঘাতনিদানম্ | জাযন্তে কুপিতৈর্দোষৈর্মূত্রাঘাতাস্ত্রযোদশ | প্রাযো মূত্রবিঘাতাদ্যৈর্বাতকুণ্ডলিকাদযঃ ||১||

মূত্রবিকারসাধর্ম্যাত্ মূত্রাঘাতানাহ– জাযন্ত ইত্যাদি| মূত্রকৃচ্ছ্রমূত্রাঘাতযোশ্চাযং বিশেষঃ– মূত্রকৃচ্ছ্রে কৃচ্ছ্রত্বমতিশযিতম্, ঈষদ্বিবন্ধঃ; মূত্রাঘাতে তু বিবন্ধো বলবান্, কৃচ্ছ্রত্বমল্পমিতি| মূত্রবিঘাতাদ্যৈর্মূত্রবেগবিধারণাদিভিঃ; আদ্যশব্দেন পুরীষশুক্রবেগবিঘাতাদীনাং রূক্ষাশনাদীনাং চ গ্রহণম্| বাতকুণ্ডলিকাদযস্ত্রযোদশেতি সম্বন্ধঃ||১||

Adhikarana vAtakuNDalikAlakShaNam (2-3) · Śloka 3

রৌক্ষ্যাদ্বেগবিঘাতাদ্বা বাযুর্বস্তৌ সবেদনঃ | মূত্রমাবিশ্য চরতি বিগুণঃ কুণ্ডলীকৃতঃ ||২|| মূত্রমল্পাল্পমথবা সরুজং সম্প্রবর্ততে | বাতকুণ্ডলিকাং তাং তু ব্যাধিং বিদ্যাত্ সুদারুণম্ ||৩|| (সু. উ. তং. অ. ৫৮) |

বাতকুণ্ডলিকামাহ– রৌক্ষ্যাদিত্যাদি| আবিশ্যেত্যাবৃত্য; ‘আবিধ্য’ ইতি পাঠান্তরে স এবার্থঃ| চরতি গচ্ছতি| বিগুণঃ কুপিতঃ| কুণ্ডলীকৃত ইতি বাত্যাবদ্বস্তাবেব ভ্রমংস্তিষ্ঠতীতি||২-৩||

Adhikarana aShThIlAlakShaNam (4) · Śloka 4

আধ্মাপযন্ বস্তিগুদং রুদ্ধ্বা বাযুশ্চলোন্নতাম্ | কুর্যাত্তীব্রার্তিমষ্ঠীলাং মূত্রবিণ্মার্গরোধিনীম্ ||৪||

অষ্ঠীলামাহ– আধ্মাপযন্নিত্যাদি| রুদ্ধ্বেতি বস্তিগুদমেব| অষ্ঠীলাতুল্যত্বাদষ্ঠীলা, সা চ বাতব্যাধাবুক্তা||৪||

Adhikarana vAtabastilakShaNam (5-6) · Śloka 6

বেগং বিধারযেদ্যস্তু মূত্রস্যাকুশলো নরঃ | নিরুণদ্ধি মুখং তস্য বস্তের্বস্তিগতোঽনিলঃ ||৫|| মূত্রসঙ্গো ভবেত্তেন বস্তিকুক্ষিনিপীডিতঃ | বাতবস্তিঃ স বিজ্ঞেযো ব্যাধিঃ কৃচ্ছ্রপ্রসাধনঃ ||৬|| (সু. উ. তং. অ. ৫৮) |

বাতবস্তিমাহ– বেগমিত্যাদি| বস্তিকুক্ষিনিপীডিত ইতি বস্তৌ কুক্ষৌ চ নিপীডিতঃ সম্পিণ্ডিতো বাযুরিতি সম্বন্ধঃ; ‘বস্তিকুক্ষী নিপীডযন্’ ইতি পাঠান্তরে বস্তিকুক্ষ্যো রুজাকর ইতি||৫-৬||

Adhikarana mUtrAtItalakShaNam (7) · Śloka 7

চিরং ধারযতো মূত্রং ত্বরযা ন প্রবর্ততে | মেহমানস্য মন্দং বা মূত্রাতীতঃ স উচ্যতে ||৭||

মূত্রাতীতমাহ– চিরমিত্যাদি| ত্বরযা ন প্রবর্ততে ইতি মূত্রমিত্যর্থঃ| মেহমানস্য মূত্রং ত্যজতঃ| ‘বহমানস্য’ ইতি পাঠান্তরং সুগমম্||৭||

Adhikarana mUtrajaTharalakShaNam (8-9) · Śloka 9

মূত্রস্য বেগেঽভিহতে তদুদাবর্তহেতুকঃ | অপানঃ কুপিতো বাযুরুদরং পূরযেদ্ভৃশম্ ||৮|| নাভেরধস্তাদাধ্মানং জনযেত্তীব্রবেদনম্ | তন্মূত্রজঠরং বিদ্যাদধোবস্তিনিরোধনম্ ||৯|| (সু. উ. তং. অ. ৫৮) |

মূত্রজঠরমাহ– মূত্রস্য বেগ ইত্যাদি| তদুদাবর্তহেতুক ইতি মূত্রবেগধারণজনিতোদাবর্তনিমিত্তঃ| অধোবস্তিনিরোধনমিতি বস্তেরধোভাগে বিবন্ধকারকম্||৮-৯||

Adhikarana mUtrotsa~ggalakShaNam (10-11) · Śloka 11

বস্তৌ বাঽপ্যথবা নালে মণৌ বা যস্য দেহিনঃ | মূত্রং প্রবৃত্তং সজ্জেত সরক্তং বা প্রবাহতঃ ||১০|| স্রবেচ্ছনৈরল্পমল্পং সরুজং বাঽথ নীরুজম্ | বিগুণানিলজো ব্যাধিঃ স মূত্রোত্সঙ্গসঞ্জ্ঞিতঃ ||১১|| (সু. উ. তং. অ. ৫৮) |

মূত্রোত্সঙ্গমাহ– বস্তাবিত্যাদি| নালে মেঢ্রে, মণৌ মেঢ্রাগ্রে| প্রবৃত্তং সজ্জেতেতি সংসক্তং সন্ন প্রবর্ততে| সরক্তং বা প্রবাহত ইতি প্রবাহণকুপিতবাযুনা বস্ত্যাদিভেদজনিতরক্তযুক্তং মূত্রং প্রবর্ততে||১০-১১||

Adhikarana mUtrakShayalakShaNam (12) · Śloka 12

রূক্ষস্য ক্লান্তদেহস্য বস্তিস্থৌ পিত্তমারুতৌ | মূত্রক্ষযং সরুগ্দাহং জনযেতাং তদাহ্বযম্ ||১২|| (সু. উ. তং. অ. ৫৮) |

মূত্রক্ষযমাহ– রূক্ষস্যেত্যাদি| তদাহ্বযমিতি মূত্রক্ষযাখ্যং, কারণে কার্যোপচারাত্||১২||

Adhikarana mUtragranthilakShaNam (13) · Śloka 13

অন্তর্বস্তিমুখে বৃত্তঃ স্থিরোঽল্পঃ সহসা ভবেত্ | অশ্মরীতুল্যরুগ্গ্রন্থির্মূত্রগ্রন্থিঃ স উচ্যতে ||১৩|| (বা. নি. অ. ৯) |

মূত্রগ্রন্থিমাহ– অন্তরিত্যাদি| অন্তর্বস্তিমুখে বস্তিমুখস্যাভ্যন্তরে| গ্রন্থির্গুডকাকারঃ| ননু, স্থানবেদনাকারণানামভিন্নত্বাদশ্মর্যা সহ কো ভেদঃ? উচ্যতে– অশ্মর্যাং পিত্তাদিকং সংহন্যতে, অত্র তু রক্তমেব| উক্তং হি তন্ত্রান্তরে– “রক্তং বাতকফাদ্দুষ্টং বস্তিদ্বারে সুদারুণম্| গ্রন্থিং কুর্যাত্ স কৃচ্ছ্রেণ সৃজেন্মূত্রং তদাবৃতম্|| অশ্মরীসমশূলং তং রক্তগ্রন্থিং প্রচক্ষতে||” ইতি| বিশেষজ্ঞানং তু কুত ইতি চেত্? অশ্মরীপূর্বরূপোক্তস্য মূত্রে বস্তসগন্ধত্বাদের্ভাবাভাবাভ্যাম্||১৩||

Adhikarana mUtrashukralakShaNam (14) · Śloka 14

মূত্রিতস্য স্ত্রিযং যাতো বাযুনা শুক্রমুদ্ধতম্ | স্থানাচ্চ্যুতং মূত্রযতঃ প্রাক্ পশ্চাদ্বা প্রবর্ততে ||১৪|| ভস্মোদকপ্রতীকাশং মূত্রশুক্রং তদুচ্যতে | (বা. নি. অ. ৯) |

মূত্রশুক্রমাহ– মূত্রিতস্যেত্যাদি| মূত্রিতস্য মূত্রবেগিতস্য| স্থানাচ্চ্যুতং স্বস্থানাদ্ভ্রষ্টং শুক্রম্||১৪||–

Adhikarana uShNavAtalakShaNam (15-16) · Śloka 16

ব্যাযামাধ্বাতপৈঃ পিত্তং বস্তিং প্রাপ্যানিলান্বিতম্ ||১৫|| বস্তিং মেঢ্রং গুদং চৈব প্রদহেত্ স্রাবযেদধঃ | মূত্রং হারিদ্রমথবা সরক্তং রক্তমেব বা ||১৬|| কৃচ্ছ্রাত্ পুনঃ পুনর্জন্তোরুষ্ণবাতং ব্রুবন্তি তম্ | (সু. উ. তং. অ. ৫৮) |

উষ্ণবাতমাহ– ব্যাযামেত্যাদি| ব্যাযামাত্ বিরোধিসৌম্যধাতুক্ষযাত্তেজোবৃদ্ধ্যা পিত্তবৃদ্ধিঃ| অনিলান্বিতমনিলসংযুতম্| ‘অনিলাবৃতম্’ ইতি পাঠান্তরং সুগমম্| সরক্তমীষল্লোহিতম্||১৫-১৬||–

Adhikarana mUtrasAdalakShaNam (17-18) · Śloka 18

পিত্তং কফো দ্বাবপি বা সংহন্যেতেঽনিলেন চেত্ ||১৭|| কৃচ্ছ্রান্মূত্রং তদা পীতং শ্বেতং রক্তং ঘনং সৃজেত্ | সদাহং রোচনাশঙ্খচূর্ণবর্ণং ভবেত্তু তত্ ||১৮|| শুষ্কং সমস্তবর্ণং বা মূত্রসাদং বদন্তি তম্ | (বা. নি. অ. ৯) |

মূত্রসাদমাহ– পিত্তমিত্যাদি| সংহন্যেতে স্ত্যানীক্রিযেতে| শুষ্কমল্পং, তন্মূত্রং পিত্তেন রোচনাভং, কফেন শঙ্খচূর্ণাভং, সমস্তবর্ণমুক্তসকলবর্ণং সন্নিপাতাত্||১৭-১৮||–

Adhikarana viDvighAtalakShaNam (19-20) · Śloka 20

রূক্ষদুর্বলযোর্বাতেনোদাবৃত্তং শকৃদ্যদা ||১৯|| মূত্রস্রোতোঽনুপদ্যেত বিট্সংসৃষ্টং তদা নরঃ | বিড্গন্ধং মূত্রযেত্ কৃচ্ছ্রাদ্বিড্বিঘাতং বিনির্দিশেত্ ||২০|| (বা. নি. অ. ৯) |

বিড্বিঘাতমাহ– রূক্ষেত্যাদি| অনুপদ্যেত প্রাপ্নুযাত্| বিড্গন্ধমিত্যত্র বাশব্দো দ্রষ্টব্যঃ||১৯-২০||

Adhikarana bastikuNDalalakShaNam (21-22) · Śloka 24

দ্রুতাধ্বলঙ্ঘনাযাসৈরভিঘাতাত্ প্রপীডনাত্ | স্বস্থানাদ্বস্তিরুদ্বৃত্তঃ স্থূলস্তিষ্ঠতি গর্ভবত্ ||২১|| শূলস্পন্দনদাহার্তো বিন্দুং বিন্দুং স্রবত্যপি | পীডিতস্তু সৃজেদ্ধারাং সংস্তম্ভোদ্বেষ্টনার্তিমান্ ||২২|| বস্তিকুণ্ডলমাহুস্তং ঘোরং শস্ত্রবিষোপমম্ | পবনপ্রবলং প্রাযো দুর্নিবারমবুদ্ধিভিঃ |২৪|

বস্তিকুণ্ডলমাহ– দ্রুতেত্যাদি| লঙ্ঘনমুত্পতনম্| উদ্বৃত্তঃ স্বস্থানাদূর্ধ্বং গতঃ, গর্ভবদিতি গর্ভিণ্যা উদরান্তর্গতাপত্যবত্, এতেন বস্তিপুটস্য পার্শ্বগমনং দর্শিতম্| পীডিত ইতি নাভেরধঃ| উদ্বেষ্টনার্তিঃ উদ্বেষ্টনরূপাঽঽর্তিঃ| শস্ত্রবিষোপমং শস্ত্রবিষসদৃশমিতি বিভিন্নার্থসূচনার্থং প্রসিদ্ধানুভবোপদর্শনার্থম্||২১-২২||

Adhikarana bastikuNDalasya doShAntarasaMsRuShTasya lakShaNam (23) · Śloka 24

তস্মিন্ পিত্তান্বিতে দাহঃ শূলং মূত্রবিবর্ণতা ||২৩|| শ্লেষ্মণা গৌরবং শোথঃ স্নিগ্ধং মূত্রং ঘনং সিতম্ |২৪|

বাতস্যৈব দোষান্তরানুবন্ধিনো লক্ষণমাহ– তস্মিন্নিত্যাদি| শ্লেষ্মণা অন্বিতে তস্মিন্নিতি বোদ্ধব্যম্||২৩||–

Adhikarana bastikuNDalasya sAdhyAsAdhyavicAraH (24) · Śloka 25

শ্লেষ্মরুদ্ধবিলো বস্তিঃ পিত্তোদীর্ণো ন সিধ্যতি ||২৪|| অবিভ্রান্তবিলঃ সাধ্যো, ন তু যঃ কুণ্ডলীকৃতঃ |২৫|

তস্যৈব সাধ্যত্বাসাধ্যত্বমাহ– শ্লেষ্মরুদ্ধবিল ইত্যাদি| বিলং বস্তিমুখশুষিরম্| পিত্তোদীর্ণঃ উপচিতপিত্তঃ, স এব অবিভ্রান্তবিলোঽনাবৃতবিলঃ| কফেন কুণ্ডলীকৃতোঽসাধ্য ইতি বোধ্যম্| অকুণ্ডলীকৃতস্তু সাধ্যত্বেনোক্তঃ||২৪||–

Adhikarana kuNDalIbhUtabasterlakShaNam (25) · Śloka 25

স্যাদ্বস্তৌ কুণ্ডলীভূতে তৃণ্মোহঃ শ্বাস এব চ ||২৫||

কুণ্ডলীভূতস্যৈব লিঙ্গমাহ– স্যাদিত্যাদি| এতৌ বিড্বিঘাতবস্তিকুণ্ডলৌ সুশ্রুতেন ন পঠিতৌ, তেন হি মূত্রোদকসাদমেব দ্বিধা পঠিত্বা ‘দ্বাদশ মূত্রাঘাতা’ ইত্যুক্তং, সর্বানভিধানং তু পরাধিকারত্বেনেতি মন্তব্যম্||২৫||

Adhikarana puShpikA · Śloka 31

ইতি শ্রীমাধবকরবিরচিতে মাধবনিদানে মূত্রাঘাতনিদানং সমাপ্তম্ ||৩১||

ইতি শ্রীবিজযরক্ষিতকৃতাযাং মধুকোশব্যাখ্যাযাং মূত্রাঘাতনিদানং সমাপ্তম্||৩১||