1. pañcanidānalakṣaṇam

Adhikarana ma~ggalAcaraNam (1) · Śloka 1

পঞ্চনিদানলক্ষণম্ | প্রণম্য জগদুত্পত্তিস্থিতিসংহারকারণম্ | স্বর্গাপবর্গযোর্দ্বারং ত্রৈলোক্যশরণং শিবম্ ||১||

শ্রীগণেশায নমঃ| শশিরুচিরহরার্ধব্যক্তসক্তার্ধদেহো দিশতু ঘনঘনাভঃ পদ্মনাভঃ শ্রিযং বঃ| ত্রিদশসরিদশীতদ্যোতজাবারিমধ্যভ্রমিভবমিব নাভৌ বারিজং যস্য রেজে||১|| ভট্টারজেজ্জটগদাধর বাপ্যচন্দ্রশ্রীচক্রপাণিবকুলেশ্বরসেনভোজৈঃ| ঈশানকার্তিকসুকীর সুধীরবৈদ্যৈর্মৈত্রেযমাধবমুখৈর্লিখিতং বিচিন্ত্য||২|| তন্ত্রান্তরাণ্যপি বিলোক্য মমৈষ যত্নঃ সদ্ভির্বিধেয ইহ দোষবিধৌ সমাধিঃ| মর্ত্যৈরসর্ববিদুরৈর্বিহিতে ক্ব নাম গ্রন্থেঽস্তি দোষবিরহঃ সুচিরন্তনেঽপি||৩|| তত্তদ্গ্রন্থতরুভ্যো ব্যাখ্যাকুসুমরসলেশমাহৃত্য| ভ্রমরেণেব মযাঽযং ব্যাখ্যামধুকোশ আরব্ধঃ||৪|| উপযুক্তমিহানুক্তং নিদানং মাধবেন যত্| গ্রন্থব্যাখ্যাপ্রসঙ্গেন মযা তদপি লিখ্যতে||৫|| অথ প্রথিতসর্বাযুর্বেদবোধবিশুদ্ধবুদ্ধিঃ শ্রীমাধবকরো বিকারনিকরহেত্বাদিতত্ত্ববুভুত্সোত্সুকচিকিত্সকজনানুজিঘৃক্ষযা বিধিত্সিতগ্রন্থসন্দর্ভারম্ভে তত্প্রত্যূহব্যূহব্যপোহহেতুং পরমাপ্তাচারপরম্পরাপরিপ্রাপ্তং স্বেষ্টদেবতাপ্রণামং প্রাক্ প্রাণৈষীত্; গ্রন্থশ্রোতৄণামপি বিশ্বেশ্বরমহেশ্বরস্য প্রণামানুবাদমাত্রাদপি বিঘ্নোপশমো ভবতীত্যভিপ্রাযেণ তং গ্রন্থাদৌ নিবদ্ধবান্– প্রণম্যেত্যাদি| অত্র প্রশব্দো ভক্ত্যতিশযখ্যাপকঃ| নিবন্ধনক্রিযাপেক্ষযা প্রণামস্য পূর্বকালভাবিত্বাত্ প্রণমেঃ ক্ত্বাপ্রত্যযঃ| জগচ্ছব্দেনোত্পত্তিমন্তঃ ক্ষিত্যাদযোঽভিধীযন্তে; তেষামুত্পত্তৌ স্বকারণসমবাযে, স্থিতৌ কতিচিত্কালাবস্থানে, সংহারে প্রধ্বংসে, কারণং কর্তারম্| স্বর্গঃ সুখম্, অপবর্গো মোক্ষঃ আত্যন্তিকদুঃখনিবৃত্তিলক্ষণঃ, তযোর্দ্বারমুপাযং প্রধানকারণম্| এতেন সকলপুরুষার্থহেতুত্বমুক্তং, সুখাবাপ্তিদুঃখহানিব্যতিরিক্তস্য পুরুষার্থস্যাভাবাত্| অত এব ত্রৈলোক্যশরণং ত্রৈলোক্যরক্ষিতারম্| ন চোক্তজগত্স্থিতিকারণত্বেন পৌনরুক্ত্যং, জগচ্ছব্দেনোত্পত্তিমতামেবাভিধানাত্| অত্র তু ত্রৈলোক্যশব্দো ভুবনত্রযবর্তিচেতনাচেতনসমূহবাচী, লোকশব্দস্য ভুবনজনযোরভিধাযকত্বাত্| তথা চামরঃ– “লোকস্তু ভুবনে জনে” (অ. কো. কা. ৩ ব. ৩) ইতি| ত্রৈলোক্যমিতি স্বার্থে ষ্যঞ্; চাতুর্বর্ণ্যবত্| হরাদিপর্যাযান্ পরিত্যজ্য শিবপদনির্দেশেন গ্রন্থস্য তদধ্যেতৄণাং চ সকলকল্যাণমভিলষন্ শিবপদং নিবদ্ধবান্; শিবকারিত্বেনৈব মহেশ্বরস্য শিবপদাভিধানমিতি||১||

Adhikarana granthasyAbhidheyAdayaH (2-3) · Śloka 3

নানামুনীনাং বচনৈরিদানীং সমাসতঃ সদ্ভিষজাং নিযোগাত্ | সোপদ্রবারিষ্টনিদানলিঙ্গো নিবধ্যতে রোগবিনিশ্চযোঽযম্ ||২|| নানাতন্ত্রবিহীনানাং ভিষজামল্পমেধসাম্ | সুখং বিজ্ঞাতুমাতঙ্কমযমেব ভবিষ্যতি ||৩||

অভিধেযসম্বন্ধপ্রযোজনোপদেশমন্তরেণ প্রেক্ষাবতাং ন প্রবৃত্তিঃ স্যাত্ ইতি, অতস্তদভিধানার্থং শ্লোকদ্বযমাহ– নানেত্যাদি| রোগাণাং বিশেষেণ বাতজত্বাদিসাধ্যাসাধ্যত্বাদিরূপেণ নিশ্চযো জ্ঞানং যেন স রোগবিনিশ্চযো গ্রন্থো নিবধ্যতেঽভিধীযতে, ‘অস্মাভিঃ’ ইতি শেষঃ| তস্য বিশেষণম্– সোপদ্রবেত্যাদি| সহ উপদ্রবাদিভির্বর্ততে যঃ স তথা; এতেন বিশেষণদ্বারেণ উপদ্রবারিষ্টনিদানলিঙ্গস্বরূপমভিধেযমুক্তং ভবতি, এতদ্ব্যতিরিক্তস্যাভিধেযস্যাভাবাত্; তথা সতি উপদ্রবাদিভিরভিধেযৈঃ সহ গ্রন্থস্য বাচ্যবাচকলক্ষণঃ সম্বন্ধোঽযভিহিতঃ| তত্র, উপদ্রবো রোগারম্ভকদোষপ্রকোপজন্যোঽন্যবিকারঃ, উক্তং চ চরকে– “ব্যাধেরুপরি যো ব্যাধির্ভবত্যুত্তরকালজঃ| উপক্রমাবিরোধী চ স উপদ্রব উচ্যতে||” ইতি; নিযতমরণখ্যাপকং লিঙ্গমরিষ্টং; নিদানং রোগোত্পাদকো হেতুঃ; লিঙ্গং রোগখ্যাপকো হেতুঃ| তেন ‘লিঙ্গ্যতে জ্ঞাযতে ব্যাধিরনেন’ ইতি পা.[ “লিঙ্গ্যন্তে জ্ঞাযন্তে ব্যাধযোঽনেন” ইতি ব্যুত্পত্ত্যা পূর্বরূপরূপোপশযসম্প্রাপ্তযোঽভিধীযন্তে| যদ্যপি নিদানমপি রোগবিশেষং বোধযতি, তথাঽপ্যুত্পত্তিজ্ঞপ্তিহেতুত্বেন কারণদ্বৈবিধ্যপ্রতিপাদনার্থং তস্য পৃথগভিধানম্| এষাং চোপদ্রবাদীনাং বিস্তরাভিধানং যথাবসরং করিষ্যতে| ননু, রোগনিদানাদিতত্ত্বমতিসূক্ষ্মত্বেনাসর্বজ্ঞস্য জ্ঞানবিষযঃ, তত্ কথং তদুপদেশে প্রেক্ষাবতাং প্রবৃত্তিরিত্যত আহ– নানামুনীনামিত্যাদি| এতেন গ্রন্থস্য প্রামাণ্যং প্রবৃত্ত্যঙ্গত্বমুক্তং ভবতি; মুনযো হি তপোযোগর্ধিবলাত্ত্রৈকালিকনিখিলজ্ঞানশালিনঃ পুরুষাতিশযা উচ্যন্তে| ননু, যদ্যেবম্ভূতঃ কস্যচিদ্গ্রন্থোঽন্যোঽপ্যাস্তে, তেনৈব ব্যবহারসিদ্ধেঃ কৃতকার্যত্বেনাস্য নিষ্প্রযোজনতা স্যাদিত্যত আহ– ইদানীমিত্যাদি| ইদানীমস্মাভিরেব প্রাথম্যেন নানামুনীনাং বচনৈরেবংবিধো নিবন্ধঃ ক্রিযতে| সমাসত ইতি সঙ্ক্ষেপতঃ| এতেনাল্পবুদ্ধীনামতিবিস্তরত্বেনাপ্রবৃত্ত্যঙ্গতাদোষঃ পরিহৃতো ভবতি| ননু, কৃতেঽপি গ্রন্থেঽনুপাদেযপুরুষপ্রণীতত্বেন ন কশ্চিদ্ভিষক্ প্রবর্তিষ্যত ইতি গ্রন্থস্য বৈযর্থ্যং স্যাদিত্যত আহ– সদ্ভিষজাং নিযোগাদিতি| নিযোগো নিযোজনম্ “অস্মদুপকারায গ্রন্থঃ ক্রিযতাম্” ইত্যেবং প্রার্থনেত্যর্থঃ; অথবা নিযোগ আজ্ঞা, এতেনাত্মনঃ সবিনযত্বমুক্তং ভবতীত্যর্থঃ| নানাতন্ত্রেত্যাদি| সুখং যথা ভবতি তথা আতঙ্কং রোগং বিজ্ঞাতুমযমেব গ্রন্থো ভবিষ্যতি, ‘কারণম্’ ইতি শেষঃ| এতেন রোগজ্ঞানং প্রযোজনমিত্যুক্তং, ফলং চাস্য চিকিত্সিতমিতি মন্তব্যম্ যদুক্তং চরকে– “রোগমাদৌ পরীক্ষেত ততোঽনন্তরমৌষধম্| ততঃ কর্ম ভিষক্ পশ্চাজ্জ্ঞানপূর্বং সমাচরেত্||” ইতি (চ. সূ. অ. ২০)| ননু, নানামুনীনাং বচনৈরেব রোগজ্ঞানং ভবিষ্যতি, কিমনেন তদুপজীবিনা গ্রন্থেনেত্যত আহ– অল্পমেধসামিতি অল্পমেধসাম্ অল্পবুদ্ধীনাম্; মহাবুদ্ধযো হি অতিবিস্তরদুরধিগমনাতন্ত্রাধ্যযনক্ষমা ভবন্তি, ন ত্বল্পবুদ্ধয ইতি| মহাধিযামপি আলস্যানাসাদিতদুরুপপাদাশেষসংহিতানামযমেব রোগজ্ঞানায ভবিষ্যতীত্যাহ– নানাতন্ত্রেত্যাদি||২-৩||

Adhikarana vyAdherj~jAnopAyAH (4) · Śloka 4

নিদানং পূর্বরূপাণি রূপাণ্যুপশযস্তথা | সম্প্রাপ্তিশ্চেতি বিজ্ঞানং রোগাণাং পঞ্চধা স্মৃতম্ ||৪|| (বা. নি. অ. ১) |

ব্যাধের্জ্ঞাতব্যস্য পঞ্চ জ্ঞানোপাযা ভবন্তীতি তানাহ– নিদানমিত্যাদি| এতে পঞ্চ ব্যস্তাঃ সমস্তাশ্চ ব্যাধিবোধকাঃ| ন চ সমস্তপক্ষে কৃতকরণত্বং বাচ্যং, প্রমাণসম্প্লবস্যাপি দৃষ্টত্বাত্| ( অনুমিতবহ্নৌ প্রত্যক্ষোপমানশব্দানামপি স্থিতিসত্ত্বাত্) ন যো হ্যনুমানেন প্রতীতো বহ্নিঃ স এব প্রত্যক্ষাগমাভ্যাং নোপলভ্যতে [ ন বা নিদানাদীনি প্রেক্ষাবন্তো যে নৈবমালোচযেযুঃ; ( কিন্তু যে প্রেক্ষাবন্তে নিদানাদীনি স্যুরিত্যেব বেত্স্যন্তি) একেনৈব প্রতিপাদিতো ব্যাধিরিতি বযমিহোদাস্মহে ( ন মন্যামহে)| কিঞ্চ, একেন প্রতিপাদিতেঽপি ব্যাধাবপরেঽবশ্যমভিধাতব্যাঃ, ভিন্নপ্রযোজনত্বাত্| তথাহি– যদি নিদানং নোচ্যতে তদা তত্পরিবর্জনং কথং লভ্যতে? উক্তং হি সুশ্রুতে– “ বাতাদীনাং প্রতীকারঃ প্রোক্তো বিস্তরতঃ পুনঃ| সঙ্ক্ষেপতঃ ক্রিযাযোগো নিদানপরিবর্জনম্||” ইতি (সু. উ. তং. অ. ১)| কিঞ্চ, যথা– মৃদ্ভক্ষণাত্ পাণ্ডুরোগঃ, মক্ষিকাভক্ষণাচ্চ ছর্দিরবসীযতে; ন তু তথা নিদানেন সর্বত্র নিযতরোগাধ্যবসাযঃ, জ্বরগুল্মাদীনামেককারণত্বাত্| যদাহ চরকঃ– “একো হেতুরনেকস্য তথৈকস্যৈক এব হি| ব্যাধেরেকস্য বহবো বহূনাং বহবস্তথা||” ইতি (চ. নি. অ. ৮)| অপি চ কদাচিত্ প্রত্যাসন্নং নিদানং বাধিত্বা বিপ্রকৃষ্টনিদানকৃতো দোষসঞ্চযো ব্যাধিং কুর্যাত্, তস্মাত্ কেবলান্নিদানান্ন ব্যাধিজ্ঞানং ভবতীতি পূর্বরূপাদীনামুপাদানমিতি বাপ্যচন্দ্রঃ| অসতি পূর্বরূপাভিধানে তত্রোক্তঃ ক্রিযাবিশেষো ন সঙ্গচ্ছতে| উক্তং হি চরকে– “ জ্বরস্য পূর্বরূপে লঘ্বশনমপতর্পণং বা||” ইতি (চ. নি. অ. ১)| তথা চ সুশ্রুতে– বাতিকজ্বরপূর্বরূপে ঘৃতপানমিতি| তথাঽসাধ্যত্বং চ নোপলভ্যেত| উক্তং চ চরকে– “পূর্বরূপাণি সর্বাণি জ্বরোক্তান্যতিমাত্রযা| যং বিশন্তি বিশত্যেনং মৃত্যুর্জ্বরপুরঃসরঃ|| অন্যস্যাপি চ রোগস্য পূর্বরূপাণি যং নরম্| বিশন্ত্যনেন কল্পেন তস্যাপি মরণং ধ্রুবম্||” (চ. ই. অ. ৫) ইতি| তথা রক্তপিত্তপ্রমেহযোর্বিশেষজ্ঞানং চ ন জাযতে| উক্তং চ চরকে– “হারিদ্রবর্ণং রুধিরং চ মূত্রং বিনা প্রমেহস্য হি পূর্বরূপৈঃ| যো মূত্রযেত্তং ন বদেত্ প্রমেহং রক্তস্য পিত্তস্য হি স প্রকোপঃ||” ইতি (চ. চি. অ. ৬)| অসতি রূপাভিধানে ব্যাধেরশেষেণ স্বরূপমেব ন ব্যবচ্ছিদ্যতে; কিং চ সাধ্যাসাধ্যত্বং চ ন জ্ঞাযতে| তথা হি সুখসাধ্যলক্ষণে চরকঃ– “হেতবঃ পূর্বরূপাণি রূপাণ্যল্পানি যস্য বৈ| ন চ তুল্যগুণো দূষ্যো ন দোষঃ প্রকৃতির্ভবেত্||” ইতি (চ. সূ. অ. ১০); কষ্টসাধ্যলক্ষণে চরকঃ– “নিমিত্তপূর্বরূপাণাং রূপাণাং মধ্যমে বলে|” (চ. সূ. অ. ১০) ইতি; তথা– “সর্বসম্পূর্ণলক্ষণঃ| সন্নিপাতজ্বরোঽসাধ্যঃ” (চ. সূ. অ. ৩) ইতি| অসত্যুপশযাভিধানে সঙ্কীর্ণলক্ষণেঽনভিব্যক্তক্লষণে বা ব্যাধৌ বিশেষবোধো ন স্যাত্| তদুক্তং চরকে– “গূঢলিঙ্গং ব্যাধিমুপশযানুপশযাভ্যাং” (পরীক্ষেত) (চ. বি. অ. ৪) ইতি| অসত্যাং চ সম্প্রাপ্তৌ পূর্বরূপাদিপ্রতীতস্যাপি ব্যাধেশ্চিকিত্সোপযোগিনোংঽশাংশবিকল্পনাবলকালাদেরপ্রতীতেশ্চিকিত্সাবিশেষো ন স্যাত্| তস্মাত্ পঞ্চাপি নিদানাদযো বক্তব্যাঃ| পঞ্চবিধমপ্যেতদ্ব্যাধ্যুত্পত্তিজ্ঞপ্তিহেতুভূতং নিদানশব্দেনোচ্যতে| যদাহ সুশ্রুতঃ– “হেতুলক্ষণনির্দেশান্নিদানানি” (সু. সূ. অ. ৩) ইতি| তত্রৈবং নিদানশব্দনিরুক্তিঃ– “নির্দিশ্যতে ব্যাধিরনেনেতি নিদানং”; “দিশেঃ পৃষোদরাদিত্বাদ্রূপসিদ্ধিঃ|” ইতি গদাধরঃ; “নিশ্চিত্য দীযতে প্রতিপাদ্যতে ব্যাধিরনেনেতি নিদানম্||” ইতি জেজ্জটঃ| ভট্টারহরিচন্দ্রেণাপি তন্ত্রযুক্ত্যাদিবিবরণপ্রস্তাবে এষৈব নিরুক্তিরুক্তা| নিশব্দো নিশ্চযে| তথা চ বররুচেরুপসর্গসূত্রম্– “নি নিশ্চযনিষেধযোঃ” ইতি| লোকেঽপি ‘অদ্য তে নিদানং করিষ্যামি’ ইত্যুক্তে নিশ্চযং করিষ্যামীত্যবগম্যতে| নিদানমিতি করণে ল্যুট্; তেন ‘ব্যাধিনিশ্চযকরণং নিদানম্’ ইতি নিদানাদিপঞ্চকসামান্যলক্ষণম্| নিদানশব্দোঽযং নিদানবিশেষে জাতৌ চ বর্ততে; যথা– তৃণশব্দঃ তৃণবিশেষে তৃণজাতৌ চ বর্ততে| যত্তু, ভট্টারহরিচন্দ্রেণ নিদানস্থানে– “যা গৌঃ সুদোহা ভবতি ন তাং নিদদীত|” ইতি ব্যাসপ্রযোগমুপন্যস্য নিবন্ধার্থো নিদানশব্দো ব্যাখ্যাতঃ ‘নিদীযতে নিবধ্যতে হেত্বাদিসম্বদ্ধো ব্যাধিরনেন’ ইতি কৃত্বা; তত্তু নিদানস্থানরূপগ্রন্থাভিপ্রাযেণ, নহি হেত্বাদযো হেত্বাদিসম্বদ্ধং ব্যাধিং প্রতিপাদযন্তি ||৪||

Adhikarana nidAnalakShaNam (5) · Śloka 5

নিমিত্তহেত্বাযতনপ্রত্যযোত্থানকারণৈঃ | নিদানমাহুঃ পর্যাযৈঃ... |৫| (বা. নি. অ. ১) |

এষাং নিদানাদীনাং মধ্যে সমানাসমানজাতীযব্যাবর্তকং কারণরূপনিদানস্য লক্ষণমাহ– নিমিত্তেত্যাদিনা পর্যাযৈরিত্যন্তেন| এতৈঃ শব্দৈর্যোঽর্থোঽভিধীযতে তন্নিদানং; যথা– “বুদ্ধিরুপলব্ধির্জ্ঞানমিত্যনর্থান্তরম্|” (ন্যা. দ. প্র. আ. সূ. ১৫) ইতি| ননু, কিং মিলিতৈরেকৈকশো বা? নাদ্যঃ, একার্থাভিধাযিনাং শব্দানাং মিলিতানামপ্রযোগাত্; দ্বিতীযশ্চেত্তদা সব্যভিচারঃ; নিমিত্তস্য শকুনাদৌ, হেতোঃ প্রযোজকে কর্তরি, আযতনস্য স্থানে, প্রত্যযস্য লডাদৌ, উত্থানস্য উদ্গমনোত্সর্গযোশ্চ দর্শনাত্| নৈবং, শকুনাদীনাং নিমিত্তাদিভিঃ সর্বৈরনভিধানাত্| অত এবাহ– পর্যাযৈরিতি| নহি তেষাং তে পর্যাযাঃ, যতঃ ক্রমেণৈকার্থবাচকাঃ শব্দাঃ পরস্পরং পর্যাযা উচ্যন্তে| তস্মান্নিমিত্তাদিশব্দৈঃ পর্যাযৈরভিধীযমানত্বং নিদানত্বম্| এতচ্চ পর্যাযকথনং শাস্ত্রে ব্যবহারার্থম্| ইদং তু সঙ্ক্ষেপতো লক্ষণম্– “সেতিকর্তব্যতাকো রোগোত্পাদকহেতুর্নিদানম্|” ইতি| যন্মতে দোষেতিকর্তব্যতারূপা সম্প্রাপ্তিরিষ্যতে তন্মতে সম্প্রাপ্তিব্যুদাসার্থং ‘সেতিকর্তব্যতাক’ ইতি পদং, তস্যা দোষেতিকর্তব্যতারূপাযা ইতিকর্তব্যতান্তরাভাবাত্| যন্মতে ব্যাধিজন্ম সম্প্রাপ্তিঃ, তন্মতে ‘ব্যাধ্যুত্পত্তিহেতুর্নিদানম্’ ইতি লক্ষণম্| উভযত্রাপি ‘উত্পত্তি’ এতত্পদং জ্ঞপ্তিহেতুপূর্বরূপাদিব্যবচ্ছেদার্থম্| স চ হেতুরনেকধা; তত্র প্রথমশ্চতুর্বিধঃ, যদাহ উপকল্পনীযাধ্যাযে হরিচন্দ্রঃ– “সন্নিকৃষ্টবিপ্রকৃষ্টব্যভিচারিপ্রাধানিকভেদাচ্চতুর্ধা|” ইতি| সন্নিকৃষ্টো যথা– নক্তন্দিনর্তুভুক্তাংশা দোষপ্রকোপস্য হেতবঃ, ন তে চযাদিকমপেক্ষন্তে| বিপ্রকৃষ্টো যথা– “হেমন্তে নিচিতঃ শ্লেষ্মা বসন্তে কফরোগকৃত্|” (সু. উ. তং. অ. ৬৪); কিংবা সন্নিকৃষ্টো জ্বরস্য রূক্ষাদিসেবা, বিপ্রকৃষ্টো রুদ্রকোপঃ| ব্যভিচারী যথা– যো দুর্বলত্বাদ্ব্যাধ্যধিকরণাসমর্থঃ| যদাহ চরকঃ– “( নিদানাদিবিশেষা) অবলীযাংসোঽথবাঽনুবন্ধ্নন্তি, ন তদা বিকারাভিনির্বৃতিঃ|” ইতি (চ. নি. অ. ৪)| প্রাধানিকো যথা– বিষাদিঃ; ত্রিবিধো বা, অসাত্ম্যেন্দ্রিযার্থসংযোগপ্রজ্ঞাপরাধপরিণামভেদাত্| তত্র, অসাত্ম্যেন্দ্রিযার্থসংযোগোঽযোগাতিযোগমিথ্যাযোগযুক্তা রূপরসাদযঃ, প্রজ্ঞাপরাধো মিথ্যাজ্ঞানাদিঃ, পরিণামোঽযোগাদিযুক্তা ঋতুস্বভাবজাঃ শীতাদযঃ| “অধর্মস্য চ রোগহেতোরত্রৈবান্তর্ভাবঃ” ইতি ভট্টারহরিচন্দ্রঃ, তস্যাপি কালান্তরপরিণতস্য দুঃখকর্তৃত্বাত্| চক্রস্তু প্রজ্ঞাপরাধে তস্যান্তর্ভাবমাহ; মিথ্যাজ্ঞানকৃতব্রহ্মবধাদিজন্মনোঽধর্মস্য প্রজ্ঞাপরাধ এব মূলং; বলাবলং ত্বত্র ন নিরূপ্যতে, রোগকারণত্বেনাধর্মস্য সর্বথা সিদ্ধত্বাদিতি| দোষব্যাধ্যুভযহেতুভেদাচ্চ স ত্রিবিধঃ| দোষহেতবো যথা– চযপ্রকোপপ্রশমনিমিত্তা যথর্তূত্পন্না মধুরাদযঃ| ব্যাধিহেতবো যথা– মৃদ্ভক্ষণং পাণ্ডুরোগস্য কারণম্| যদ্যপি মৃদপি দোষং প্রকোপযত্যেব; যদুক্তং চরকে– “কষাযা মারুতং, পিত্তমূষরা, মধুরা কফম্|” ইতি (চ. চি. অ. ১৬) তথাঽপি তজ্জৈর্দোষৈঃ পাণ্ডুরোগ এবারভ্যতে ন ত্বন্যো বিকার ইতি ব্যাধিহেতুতা ভবতি| উভযহেতুর্যথা বাতরক্তে– “হস্ত্যশ্বোষ্ট্রৈর্গচ্ছতশ্চাশ্নতশ্চ” (সু. নি. অ. ১) ইত্যাদি| তত্র যদ্যপি দোষপ্রকোপপূর্বকমেব ব্যাধিজননং, তথাঽপি দোষবদ্ব্যাধাবপি তস্য কারণত্বমিতি বোধযতি| তেন তত্র ন ব্যাধিহরমাত্রং ভেষজং প্রযোজ্যং, কিন্তূভযপ্রত্যনীকম্| ন চ বাচ্যং কারণভূতদোষনিবৃত্ত্যৈব কার্যভূতস্য ব্যাধের্নিবৃত্তিরিতি; যতঃ প্রতিনিযতশক্তিকানি ভেষজদ্রব্যাণি ভবন্তি; কথমন্যথা শ্লৈষ্মিকতিমিরে শ্লেষ্মহরমেব বমনং ন প্রযুজ্যতে| যদুক্তং সুশ্রুতে– “ন বামযেত্তৈমিরিকং ন গুল্মিনং ন চাপি পাণ্ডূদররোগপীডিতম্|” (সু. চি. অ. ৩৩) ইতি| স এবোত্পাদকব্যঞ্জকভেদাচ্চ দ্বিধা| তত্রোত্পাদকো যথা– হেমন্তজো মধুররসঃ কফস্য| ব্যঞ্জকো যথা– তস্যৈব কফস্য ব্যঞ্জকো বসন্তে সূর্যসন্তাপঃ ইতি ভট্টারহরিচন্দ্রঃ| তত্র ব্যঞ্জকঃ প্রেরক ইত্যর্থঃ| বাহ্যাভ্যন্তরভেদাচ্চ দ্বিধা| তত্র বাহ্যা আহারাচারকালাদযঃ| এতদভিপ্রাযেণ তীসটাচার্যঃ– “ব্যাযামাদপতর্পণাত্ প্রপতনাদ্ভঙ্গাত্ ক্ষযাজ্জাগরাদ্বেগানাং চ বিধারণাদতিশুচঃ শৈত্যাদতিত্রাসতঃ| রূক্ষক্ষোভকষাযতিক্তকটুকৈরেভিঃ প্রকোপং ব্রজেদ্বাযুর্বারিধরাগমে পরিণতে চান্নেঽপরাহ্ণেঽপি চ|| কট্বম্লোষ্ণবিদাহিতীক্ষ্ণলবণক্রোধোপবাসাতপস্ত্রীসম্পর্কতিলাতসীদধি-সুরাশুক্তারনালাদিভিঃ| ভুক্তে জীর্যতি ভোজনে চ শরদি গ্রীষ্মে সতি প্রাণিনাং মধ্যাহ্নে চ তথাঽর্ধরাত্রিসমযে পিত্তং প্রকোপং ব্রজেত্|| গুরুমধুররসাতিস্নিগ্ধদুগ্ধেক্ষুভক্ষ্যদ্রবদধিদিননিদ্রাপূপসর্পিষ্প্রপূরৈঃ| তুহিনপতনকালে শ্লেষ্মণঃ সম্প্রকোপঃ প্রভবতি দিবসাদৌ ভুক্তমাত্রে বসন্তে||” (চ. ক. অ. ২৯-৩১) ইতি| আভ্যন্তরা যথা– দোষা দূষ্যাশ্চ| তত্র দোষোঽপি প্রকুপিতঃ প্রাকৃতাদিভেদাদনেকধা| প্রাকৃতো যথা– বসন্তে শ্লেষ্মা, শরদি পিত্তং, প্রাবৃষি বাযুঃ| বৈকৃতস্তু যথা– বসন্তে পিত্তং বাযুর্বা, বর্ষাসু কফঃ পিত্তং বা, শরদি কফো বাযুর্বা| অস্য প্রযোজনং সুখসাধ্যত্বাদি| যদুক্তং চরকে– “প্রাকৃতঃ সুখসাধ্যস্তু বসন্তশরদুদ্ভবঃ|” (চ. চি. অ. ৩) ইত্যাদি| অনুবন্ধ্যানুবন্ধভেদাচ্চ দ্বিধা| অনুবন্ধ্যঃ প্রধানম্, অনুবন্ধোঽপ্রধানম্| যদাহ চরকঃ– “স্বতন্ত্রো ব্যক্তলিঙ্গো যথোক্তসমুত্থানোপশমো ভবত্যনুবন্ধ্যঃ, তদ্বিপরীতলক্ষণস্ত্বনুবন্ধঃ|” (চ. বি. অ. ৬) ইতি| অস্য প্রযোজনং সংসর্গজে ব্যাধাবনুবন্ধ্যো বিশেষেণ চিকিত্স্যোঽনুবন্ধাবিরোধেন| তদুক্তং চরকে– “তত্রোপদ্রবস্য প্রাযঃ প্রধানপ্রশমাত্ প্রশমঃ|” (চ. চি. অ. ২১) ইতি| উপদ্রবোঽনুবন্ধঃ| প্রকৃতিবিকৃতিতো যথা– বাতপ্রকৃতের্বাতরোগঃ কষ্টসাধ্যো ভবতি, কফপিত্তপ্রকৃতেস্তু সুখসাধ্যঃ| যদাহ সুখসাধ্যলক্ষণে চরকঃ– “ন চ তুল্যগুণো দূষ্যো ন দোষঃ প্রকৃতির্ভবেত্” (চ. সূ. অ. ১০) ইতি| আশযাপকর্ষতো যথা– যদা স্বমানস্থিতমেব দোষং স্বাশযাদাকৃষ্য বাযুঃ স্থানান্তরং গমযতি তদা স্বমানস্থোঽপি স বিকারং জনযতি| যদাহ চরকঃ– “প্রকৃতিস্থং যদা পিত্তং মারুতঃ শ্লেষ্মণঃ ক্ষযে| স্থানাদাদায গাত্রেষু যত্র যত্র বিসর্পতি|| তদা ভেদশ্চ দাহশ্চ তত্র তত্রানবস্থিতঃ| গাত্রদেশে ভবত্যস্য শ্রমো দৌর্বল্যমেব চ||” ইতি (চ. সূ. অ. ১৭)| অস্য প্রযোজনং বাতস্যৈব তত্র বিগুণস্য স্বস্থানানযনং কার্যং, নতু পিত্তস্য হ্রাসনং; “যে ত্বেনাং পিত্তস্য স্থানাকৃষ্টিং ন বিদন্তি, তে দাহোপলম্ভেন পিত্তবৃদ্ধিং মন্যমানাঃ পিত্তং হ্রাসযন্তঃ পিত্তক্ষযলক্ষণং রোগান্তরমেবোত্পাদযন্ত আতুরমতিপাতযন্তি|” ইতি ভট্টারহরিচন্দ্রঃ| অন্যে ত্বাহুঃ– ভ্রাজকাদিভেদেন সর্বদেহস্থিতে পিত্তে যদা স্বাশযাকৃষ্টং পিত্তমবযবান্তরমনিলেন প্রাপিতং তদা তদবযবান্তরস্থং পিত্তমাগন্তুপিত্তসম্বন্ধেনাধিকমেব জাতং, ততশ্চ পিত্তবৃদ্ধিলক্ষণৈবেযং দুষ্টির্ন দুষ্ট্যন্তরম্, অন্যথা দাহ এব ন স্যাত্ নহি স্বমানস্থো দোষো বিকারং জনযতীতি| ভট্টারহরিচন্দ্রস্য ত্বযমভিপ্রাযঃ– যদ্যপ্যেবং তথাঽপি চিকিত্সাভেদার্থং বৃদ্ধিক্ষযব্যতিরিক্তস্থানান্তরগতিরূপো দুষ্টিবিশেষোঽবশ্যমেবেষ্টব্যঃ, অন্যথা বৃদ্ধং পিত্তমিতি মত্বা বিরেচনং পিত্তহ্রাসনং বা কার্যং, নচ তত্তত্র যোগ্যং, কিং তু স্বস্থানানযনম্| যচ্চোক্তং চরকেণ– “ক্ষযঃ স্থানং চ বৃদ্ধিশ্চ বিজ্ঞেযা ত্রিবিধা গতিঃ|” (চ. সূ. অ. ১৭) ইত্যাদি, তত্ প্রাযিকমিতি| গতিতো যথা– গতির্দোষাণাং ক্ষীণবৃদ্ধত্বাদযঃ| যদুক্তং চরকে “ক্ষযঃ স্থানং চ বৃদ্ধিশ্চ দোষাণাং ত্রিবিধা গতিঃ| ঊর্ধ্বং চাধশ্চ তির্যক্চ বিজ্ঞেযা ত্রিবিধা পরা|| ত্রিবিধা চাপরা কোষ্ঠশাখামর্মাস্থিসন্ধিষু|” (চ. সূ. অ. ১৭) ইতি|| অত্র স্থানমিতি সমত্বম্| তত্র ক্ষযাদিলক্ষণং যথা– “দোষাঃ প্রবৃদ্ধাঃ স্বং লিঙ্গং দর্শযন্তি যথাবলম্| ক্ষীণা জহতি স্বং লিঙ্গং, সমাঃ স্বং কর্ম কুর্বতে||” (চ. সূ. অ. ১৭)– ইতি| স্বং লিঙ্গমিতি কুপিতস্য বাযো রৌক্ষ্যাদযো ধর্মাঃ, কর্মাণি চ স্রংসশূলাদীনি| যদাহ চরকপাঠসংবাদী সুদান্তসেনঃ– “আধ্মানস্তম্ভরৌক্ষ্যস্ফুটনবিমথনক্ষোভকম্পপ্রতোদাঃ, কণ্ঠধ্বংসাবসাদৌ শ্রমকবিলপনং স্রংসশূলপ্রভেদাঃ| পারুষ্যং কর্ণনাদো বিষমপরিণতিভ্রংশদৃষ্টিপ্রমোহা, বিস্পন্দোদ্ঘট্টনানি গ্লপনমশযনং তাডনং পীডনং চ|| নামোন্নামৌ বিষাদো ভ্রমপরিপতনং জৃম্ভণং রোমহর্ষো, বিক্ষেপাক্ষেপশোষগ্রহণশুষিরতাচ্ছেদনং বেষ্টনং চ| বর্ণঃ শ্যাবোঽরুণো বা তৃডপি চ মহতী স্বাপবিশ্লেষসঙ্গা, বিদ্যাত্ কর্মাণ্যমূনি প্রকুপিতমরুতঃ স্যাত্ কষাযো রসশ্চ|| বিস্ফোটাম্লকধূমকাঃ প্রলপনং স্বেদস্রুতির্মূর্ছনং, দৌর্গন্ধ্যং দরণং মদো বিসরণং পাকোঽরতিস্তৃড্ভ্রমৌ| ঊষ্মাঽতৃপ্তিতমঃ প্রবেশদহনং কট্বম্লতিক্তা রসা, বর্ণঃ পাণ্ডুবিবর্জিতঃ ক্বথিততা কর্মাণি পিত্তস্য বৈ|| তৃপ্তিস্তন্দ্রা গুরুতা স্তৈমিত্যং কঠিনতা মলাধিক্যম্| স্নেহাপক্ত্যুপলেপাঃ শৈত্যং কণ্ডূঃ প্রসেকশ্চ|| চরকর্তৃত্বং শোথো নিদ্রাধিক্যং রসৌ পটুস্বাদূ| বর্ণঃ শ্বেতোঽলসতা কর্মাণি কফস্য জানীযাত্|| দ্বিদোষলিঙ্গঃ সংসর্গঃ সন্নিপাতস্ত্রিলিঙ্গকঃ|” ইতি| লিঙ্গজ্ঞানপ্রযোজনং চ চিকিত্সাভেদার্থম্| যদাহ সুশ্রুতঃ– “ক্ষীণা বর্ধযিতব্যাঃ, বৃদ্ধা হ্রাসযিতব্যাঃ, সমাঃ পালযিতব্যাঃ” (সু. চি. অ. ৩৩)– ইতি| ঊর্ধ্বাদিগতির্যথা– ঊর্ধ্বগং রক্তপিত্তমিত্যাদি| অস্য প্রযোজনং রক্তপিত্তস্যোর্ধ্বগস্য বিরেচনম্, অধোগস্য বমনম্| যথোক্তং চরকে– “ প্রতিমার্গং চ হরণং রক্তপিত্তে বিধীযতে|” (চ. নি. অ. ২) ইতি| যস্তু গতিভেদানভিজ্ঞঃ সঃ “বিরেকঃ পিত্তহরাণাং” (চ. সূ. অ. ২৫) ইতি বচনাদধোগে রক্তপিত্তে বিরেকং প্রযুঞ্জান আতুরস্যানর্থমেবোত্পাদযতি; জ্বরাদিষু তির্যগ্দোষগতিষু যথোক্তং চিকিত্সিতমিতি| বৃদ্ধা দোষাঃ কদাচিত্ কোষ্ঠং, কদাচিচ্ছাখাঃ, কদাচিন্মর্মাস্থিসন্ধীনাশ্রিত্য রুজন্তি; মর্মাস্থিসন্ধিষু গতিঃ কৃচ্ছ্রসাধ্যত্বোপাদকত্বাদেকত্বেন নির্দিষ্টা| কোষ্ঠ আমাশযাদিঃ, শাখা রক্তাদযো ধাতবস্ত্বক্চেতি, চরককৃতৈবেযং সঞ্জ্ঞা| কোষ্ঠাদ্যভিধানপ্রযোজনং চিকিত্সাভেদার্থম্| যথোক্তং চরকে– “আমাশযগতে বাতে কফে পক্বাশযাশ্রিতে| রূক্ষপূর্বো হিতঃ স্বেদঃ স্নেহপূর্বস্তথৈব চ||” (চ. সূ. অ. ১৪); তথা– “সন্ততং রসরক্তস্থঃ সোঽন্যেদ্যুঃ পিশিতাশ্রিতঃ|” (সু. উ. তং. অ. ৩৯) ইত্যাদি; তথা– “নাগ্নিকর্মোপদেষ্টব্যং স্নাযুমর্মব্রণেষু চ|” (চ. চি. অ. ২৫) ইতি| এতে চ দোষাঃ সামত্বনিরামত্বাভ্যামপি জ্ঞাতব্যাঃ| যদুক্তম্– “ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে|| আমেন তেন সংযুক্তা দোষা দূষ্যাশ্চ দূষিতাঃ| সামা ইত্যুপদিশ্যন্তে যে চ রোগাস্তদুদ্ভবাঃ|| স্রোতোরোধবলভ্রংশগৌরবানিলমূঢতাঃ| আলস্যাপক্তিনিষ্ঠীবমলভেদারুচিক্লমাঃ|| লিঙ্গং মলানাং সামানাং নিরামাণাং বিপর্যযঃ|” (বা. সূ. অ. ১৩)| “বাযুঃ সামো বিবন্ধাগ্নিসাদতন্দ্রান্ত্রকূজনৈঃ|| বেদনাশোথনিস্তোদৈঃ ক্রমশোঽঙ্গানি পীডযেত্| বিচরেদ্যুগপচ্চাপি গৃহ্ণাতি কুপিতো ভৃশম্| স্নেহাদ্যৈর্বৃদ্ধিমাপ্নোতি সূর্যমেঘোদযে নিশি| নিরামো বিশদো রূক্ষো নির্বিবন্ধোঽল্পবেদনঃ|| বিপরীতগুণৈঃ শান্তিং স্নিগ্ধৈর্যাতি বিশেষতঃ| দুর্গন্ধং হরিতং শ্যাবং পিত্তমম্লং স্থিরং গুরু|| অম্লিকাকণ্ঠহৃদ্দাহকরং সামং বিনির্দিশেত্| আতাম্রং পিত্তমত্যুষ্ণং রসে কটুকমস্থিরম্|| পক্বং বিগন্ধং বিজ্ঞেযং রুচিপক্তৃবলপ্রদম্| আবিলস্তন্তুলঃ স্ত্যানঃ কণ্ঠদেশেঽবতিষ্ঠতে| সামো বলাসো দুর্গন্ধঃ ক্ষুদুদ্গারবিঘাতকৃত্|| ফেনবান্ পিণ্ডিতঃ পাণ্ডুর্নিঃসারোঽগন্ধ এব চ| পক্বঃ স এব বিজ্ঞেযশ্ছেদবান্ বক্ত্রশুদ্ধিকৃত্||” ইতি| অস্য প্রযোজনং সামে পাচনং, নিরামে শমনমিতি| এতে চ দোষাঃ পরস্পরসম্বদ্ধাস্তরতমাদিভেদেন দ্বিষষ্টিধা ভবন্তি| তদুদাহরণানি বিস্তরত্বাপত্তেরত্র ন লিখ্যন্তে, সৌশ্রুতদোষভেদবিকল্পাধ্যাযে (সু. উ. তং. অ. ৬৬) দ্রষ্টব্যানি| উক্তহেতুদোষভেদযোঃ সঙ্গ্রহশ্লোকৌ– “চত্বারো ব্যভিচারিদূরনিকটপ্রাধানিকত্বাত্, পুনস্তেঽসাত্ম্যেন্দ্রিযকার্থযুক্পরিণতিপ্রজ্ঞাপরাধাত্ত্রিধা| রুগ্দোষোভযকারণাদপি তথা, দ্বৌ ব্যঞ্জকোত্পাদকৌ, বাহ্যাভ্যন্তরভেদতোঽপি কথিতা হেতোঃ প্রভেদা অমী|| দোষস্য চ প্রাকৃতবৈকৃতাভ্যাং, ভেদোঽনুবন্ধ্যাদপি চানুবন্ধাত্| তথা প্রকৃত্যপ্রকৃতিত্বযোগাত্তথাঽঽশযাকর্ষবশাদ্গতেশ্চ||” ইতি নিদানম্|৫|–

Adhikarana pUrvarUpalakShaNam (5-6) · Śloka 6

...প্রাগ্রূপং যেন লক্ষ্যতে ||৫|| উত্পিত্সুরামযো দোষবিশেষেণানধিষ্ঠিতঃ | লিঙ্গমব্যক্তমল্পত্বাদ্ব্যাধীনাং তদ্যথাযথম্ ||৬|| (বা. নি. অ. ১) |

নিদানানন্তরীযকত্বাত্ পূর্বরূপাদীনাং তদনন্তরং প্রাগ্রূপমাহ– প্রাগ্রূপমিত্যাদি| দ্বিবিধং হি পূর্বরূপং ভবতি, সামান্যং বিশিষ্টং চ| তত্র সামান্যং যেন দোষদূষ্যসম্মূর্ছনাবস্থাজনিতেন ভাবিজ্বরাদিব্যাধিমাত্রং প্রতীযতে, ন তু বাতাদিজনিতত্বাদিবিশেষঃ| যথা– ‘শ্রমোঽরতির্বিবর্ণত্বং’ (সু. উ. তং. অ. ৩৯); ইত্যাদি, তথা দেবগুরুবিপ্রদ্বেষাদি; সামান্যাভিপ্রাযেণৈবত তন্ত্রান্তরম্– “ব্যাধের্জাতির্বুভূষা চ পূর্বরূপেণ লক্ষ্যতে| ভাবঃ কিমাত্মকত্বং চ লক্ষ্যতে লক্ষণেন হি||” ইতি| তথাঽঽহ পরাশরঃ– “পূর্বরূপং নাম যেন ভাবিব্যাধিবিশেষো লক্ষ্যতে ন তু দোষবিশেষঃ|” ইতি| বিশিষ্টং যথা– উরঃক্ষতাদৌ লিঙ্গান্যেব বাতাদিজান্যব্যক্তানি| যদুক্তং তত্রৈব– “অব্যক্তং লক্ষণং তস্য পূর্বরূপমিতি স্মৃতম্|” (চ. চি. অ. ১১) ইতি তথা সুশ্রুতঃ– “সামান্যতো বিশেষাত্তু জৃম্ভাঽত্যর্থং সমীরণাত্| পিত্তান্নযনযোর্দাহঃ কফাদন্নারুচিস্তথা||” ইতি (সু. উ. তং. অ. ৩৯) হারীতেঽপ্যুক্তম্– “ইতি পূর্বরূপমষ্টানাং জ্বরাণাং সামান্যতঃ, বিশেষতস্তু জৃম্ভাঙ্গমর্দভূযিষ্ঠং হৃদযোদ্বেগি বাতজম্|” ইত্যাদি| ননু, চাত্যর্থং ব্যক্তত্বং ততশ্চ জৃম্ভাদেরপি রূপত্বং প্রসজ্যেত; যদ্বক্ষ্যতি– “তদেব ব্যক্ততাং যাতং রূপমিত্যভিধীযতে|” (বা. নি. অ. ১) ইতি| উচ্যতে– যথা শ্রমাদয ইতররোগব্যতিরিক্তং ভাবিজ্বরমাত্রং বোধযন্তি ন তু বাতজত্বাদিবিশেষমিত্যতস্তেষামব্যক্তত্বং, তথা পিত্তাদিজ্বরব্যতিরিক্তং ভবিষ্যদ্বাতজ্বরমাত্রং বোধযন্তি জৃম্ভাদযঃ, ন তু বাতস্য রূক্ষশীতধাতুক্ষযাবরণাদিজন্যত্বরূপবিশেষং বোধযন্তি; ইত্যতোঽব্যক্তবাতজ্বরবোধকত্বাদব্যক্তত্বমেব জৃম্ভাদীনামিতি জেজ্জটবাপ্যচন্দ্রমাধবকরকার্তিককুণ্ডাদযো ব্যাচক্ষতে| অন্যে ত্বাহুঃ– প্রভূতাব্যক্তপূর্বরূপসহচরিতস্য ব্যক্তস্যাপি জৃম্ভাদেঃ পূর্বরূপব্যপদেশঃ; যথা– মাষরাশিঃ; ছত্রিণো গচ্ছন্ত্যেবমাদি| ন চ ব্যক্তত্বেন রূপাদভেদঃ; নিযমেন পূর্বরূপরূপযোর্ভাবিবর্তমানব্যাধিবোধকত্বাদিতি| তত্র বিশিষ্টং প্রাগ্রূপং রূপাবস্থাযামনুবর্ততে এব, তস্যৈবাভিব্যক্তস্য রূপত্বাত্; ন তু দোষদূষ্যসম্মূর্ছনাবস্থাজনিতং রোমহর্ষবালপ্রদ্বেষাদিকং নিযমেনানুর্বতে, যদ্যনুবর্তেত তদা সর্বজ্বরাণামসাধ্যত্বং প্রসজ্যেত| এতদভিপ্রাযেণ, “পূর্বরূপাণি সর্বাণি জ্বরোক্তান্যতিমাত্রযা| যং বিশন্তি বিশত্যেনং মৃত্যুর্জ্বরপুরঃসরঃ||” (চ. ই. অ. ৫)– ইতি চরকবচনমিত্যাহুঃ| তদেবং দ্বিবিধে পূর্বরূপে ব্যবস্থিতে সামান্যপূর্বরূপমাহ– প্রাগ্রূপমিত্যাদি| যেন শ্রমাদিনা, উত্পিত্সুঃ সামগ্রীসাকল্যাদুত্পাদেচ্ছুঃ, আমযো রোগঃ, দোষবিশেষেণ বাতাদিজন্যাসাধারণবেপথ্বাদিনা, অনধিষ্ঠিতোঽসম্বদ্ধো, লক্ষ্যতে জ্ঞাযতে, তত্ প্রাগ্রূপমিতি| বিশিষ্টপ্রাগ্রূপমাহ– লিঙ্গমব্যক্তমল্পত্বাদ্ব্যাধীনাং তদ্যথাযথমিতি| প্রাগ্রূপমিত্যনেন পূর্বোক্তেন সম্বন্ধঃ| লিঙ্গং লক্ষণম্; অব্যক্তং নাত্যভিব্যক্তম্, অত্র হেতুরল্পত্বাদণুত্বাত্, নত্বাবরণাদিযোগাদব্যক্তমিত্যর্থঃ; যথাযথং যস্য ব্যাধের্যদ্রূপং তদেবাব্যক্তং তস্য পূর্বরূপমিত্যর্থঃ| অন্যে তু পূর্বরূপলক্ষণমাহুঃ– “স্থানসংশ্রযিণঃ ক্রুদ্ধা ভাবিব্যাধিপ্রবোধকম্| দোষাঃ কুর্বন্তি যল্লিঙ্গং পূর্বরূপং তদুচ্যতে||” ইতি| তন্নাতিযুক্তং, রাজযক্ষ্মণঃ পূর্বরূপস্য তৃণকেশনিপাতাদেরদৃষ্টজন্যস্যাব্যাপকত্বাত্| যদাহ চরকঃ– “যক্ষ্মিণাং ঘূণকেশানাং তৃণানাং পতনানি চ| প্রাযোঽন্নপানে, কেশানাং নখানাং চাভিবর্ধনম্||” (চ. চি. অ. ৮) ইতি| ন চ তদপি দোষজং, দোষাণাং তৃণাদিভিরসম্বন্ধাত্, অসম্বদ্ধস্য চ ভাবস্য কারণত্বেনাদৃষ্টত্বাত্; পরম্পরযা তু সম্বন্ধকল্পনযাঽতিপ্রসঙ্গাত্, সর্বং সর্বস্য কারণং স্যাত্| এতদ্দোষপরিজিহীর্ষযৈব পরমকুশলেন বাগ্ভটেনাদৃষ্টদোষজসর্বপূর্বরূপোপসঙ্গ্রাহকং যেনেতিপদং নিবদ্ধমিতি চরকেনোক্তং মত্বা তদীযপূর্বরূপলক্ষণমেব মাধবকরো লিখিতবান্| সঙ্ক্ষেপতস্তু লক্ষণম্– “ভাবিব্যাধিবোধকমেব লিঙ্গং পূর্বরূপম্|” ইতি| এবকারেণ নিদানোপশযযোঃ সম্প্রাপ্তেশ্চ দোষেতিকর্তব্যতারূপাযা ব্যবচ্ছেদঃ, তেষাং তজ্জাতীযানামুত্পন্নানুত্পন্নব্যাধিবোধকত্বাত্| তথা হি– নিদানং মৃদ্ভক্ষণরূপং ভাবিপাণ্ডুরোগমনুপশযরূপং চ বর্তমানবিশিষ্টব্যাধিং বোধযতি; উপশযোঽপি পূর্বরূপাবস্থাপ্রযুক্তো ভাবিবিশিষ্টব্যাধিং জ্ঞাপযতি, রূপাবস্থাপ্রযুক্তশ্চ বর্তমানবিশিষ্টব্যাধিং জ্ঞাপযতি; সম্প্রাপ্তিশ্চ পূর্বরূপস্য মধ্যাহ্নাদাবুত্পত্তিপ্রকোপাভ্যাং ভবিষ্যদ্বিশিষ্টব্যাধিং, রূপস্য চ মধ্যাহ্নপ্রকোপাদিনা বর্তমানবিশিষ্টব্যাধিং জ্ঞাপযতি; ইত্যেষামুত্পন্নানুত্পন্নব্যাধিবোধকত্বম্| ননু, যদা পূর্বরূপবিশেষং স্মৃত্বোত্পন্নব্যাধের্বিশেষাবধারণং তদা পূর্বরূপমপি বর্তমানব্যাধিবোধকং, যথোক্তং রক্তপিত্তপ্রমেহরূপসন্দেহে চরকেণ– “হারিদ্রবর্ণং রুধিরং চ মূত্রং বিনা প্রমেহস্য হি পূর্বরূপৈঃ|” (চ. চি. অ. ৬) ইত্যাদি| অত্রোচ্যতে– কিং ব্যাধিজন্মনঃ পূর্বং পূর্বরূপং গৃহীতং ন বা? আদ্যে ভাবিব্যাধিবোধকত্বমেব; দ্বিতীযে স্মরণোত্পত্তিরেব ন স্যাত্, অনুভবাভাবাত্| অথোচ্যতে– পূর্বরূপং দন্তাদীনাং মলাঢ্যত্বাদিরূপং স্বরূপেণানুভূতমেব, কিন্তু প্রমেহপূর্বরূপতযা ন প্রতিভাতম্; উত্পন্নে তু ব্যাধৌ তত্ স্মৃতং প্রমেহবিশেষমবধারযতি| এবং তর্হি পূর্বরূপস্মরণং কারণং ন তু পূর্বরূপং, রূপাবস্থাযাং তস্য ব্যপগতত্বাত্| স্মরণং ন প্রমাণমিতি চেত্, সত্যং; কিন্তু (পূর্বানুভবজনিতসংস্কারোপস্থিত)স্মরণসহকৃতং পূর্বরূপং ব্যাধিবিশেষবোধকং, ন তু কেবলং স্মরণং; যথা– সংস্কারোপস্থাপিতস্মরণসহকৃতং চক্ষুঃ প্রত্যভিজ্ঞাযাং প্রাগবস্থাবিশিষ্টঘটাববোধকম্– সোঽযং ঘট ইতি| এবং স্মরণবদাপ্তোপদেশেঽপি বাচ্যং, তস্য চ লিঙ্গপদেন ব্যুদাসঃ; ভাবিপদেন রূপস্য; লিঙ্গপদেন চক্ষুরাদেঃ, তস্য ঘটজ্ঞানাদিসাধারণত্বেনালিঙ্গত্বাত্; অসাধারণং হি লিঙ্গং ভবতি| এতচ্চ পূর্বরূপমবিদ্যমানস্যাপি ব্যাধের্লিঙ্গং ভবত্যেব; যথা– বিশিষ্টমেঘোদযো বৃষ্টেঃ| ইতি পূর্বরূপম্||৫-৬||

Adhikarana rUpalakShaNam (7) · Śloka 7

তদেব ব্যক্ততাং যাতং রূপমিত্যভিধীযতে | সংস্থানং ব্যঞ্জনং লিড্গং লক্ষণং চিহ্নমাকৃতিঃ ||৭|| (বা. নি. অ. ১) |

যদ্যপি পূর্বরূপানন্তরং সম্প্রাপ্তির্ভবতি, তথাঽপি ব্যাধিস্বরূপজ্ঞানার্থং রূপমাহ– তদেবেত্যাদি| তদেব পূর্বরূপমেব| ব্যক্ততামুদ্ভূততামিতি| ননু ব্যক্তত্বং পূর্বরূপস্য কিং কার্ত্স্যেন, একদেশেন বা? আদ্যে সর্বজ্বরাণামসাধ্যত্বং স্যাত্; যদুক্তং চরকে– “পূর্বরূপাণি সর্বাণি” (চ. ই. অ. ৫) ইত্যাদি; দ্বিতীযে হি “জৃম্ভাঽত্যর্থং সমীরণাত্| পিত্তান্নযনযোর্দাহঃ” (সু. উ. তং. অ. ৩৯) ইত্যাদেরপি পূর্বরূপস্য রূপত্বপ্রসঙ্গঃ? নৈবম্, অনভ্যুপগমান্ন কৃত্স্নস্য নাপ্যেকদেশস্য, কিন্ত্বনির্ধারিতৈকত্বানেকত্ববিশেষস্য পূর্বরূপমাত্রস্য ব্যক্তস্য ব্যাধের্লিঙ্গত্বং; যথা– তার্ণপার্ণাদিবিশেষবিরহেণ ধূমমাত্রস্য বহ্নিবোধকত্বম্| এবং ব্যবস্থিতে যদা সর্বস্যাভিব্যক্তিস্তদা ন সাধ্যত্বম্, অন্যথা তু সাধ্যত্বম্| ন চ জৃম্ভাদে রূপত্বপ্রসঙ্গঃ, তস্য প্রাগেব ব্যক্তত্বাত্; অব্যক্তং সদ্ব্যক্ততাং যাতং তস্য রূপত্বেনাভিধানাত্; অপরপ্রভূতাব্যক্তলিঙ্গসহচরিতত্বেন পূর্বরূপরূপযোরসমানকালত্বেন চ রূপত্বাযোগাদিতি ঈশ্বরসেনস্ত্বাহ– “ ব্যাধেঃ স্বরূপং যদ্ব্যক্তং তদ্রূপম্” ইতি| তন্ন, বিকল্পাসহত্বাত্| তথা হি– স্বরূপমিতি কিং স্বং রূপং স্বরূপম্? আহোস্বিত্ স্বীযং রূপং স্বরূপং? স্বীযমপি ধর্মঃ, কার্যং বা? ন তাবত্ স্বরূপং, স্বাত্মনি ক্রিযাবিরোধাত্; রূপং হি ব্যাধিপ্রতিপত্তিনিমিত্তমুক্তং, তচ্চেদ্ ব্যাধিস্বভাব এব তর্হি ব্যাধিস্বভাবাদেব ব্যাধিস্বভাবঃ প্রতীযত ইতি ব্যক্তঃ স্বাত্মনি ক্রিযাবিরোধঃ| নাপি ধর্মঃ, চরকোক্তকৃষ্ণত্বঙ্নখবিণ্মূত্রত্বাদেরর্শোরূপত্বানুপপত্তেঃ| নহি কৃষ্ণত্বঙ্নখাদিকমর্শোধর্মঃ, অতন্নিষ্ঠত্বাত্; ধর্মাণাং চ ধর্মিনিষ্ঠত্বাত্, অন্যথাঽতিপ্রসঙ্গাত্| নাপি কার্যম্, উপদ্রবাদেরপি রূপত্বপ্রসঙ্গাত্| তদপি কৃচ্ছ্রসাধ্যাসাধ্যব্যাধের্লিঙ্গমিতি চেত্, নৈবম্; অসাধ্যত্বাদেরেব তল্লিঙ্গং, ন তু ব্যাধেঃ; তস্য পূর্বমেব জ্ঞাতত্বাদ্, ভেদেনোপাদানাচ্চ; তদুক্তম্– “সোপদ্রবারিষ্টনিদানলিঙ্গো নিবধ্যতে রোগবিনিশ্চযোঽযম্|” ইতি, ননু, উপদ্রবো ন ব্যাধেঃ কার্যং, কিন্তু ব্যাধ্যারম্ভকদোষস্য; যদুক্তং সুশ্রুতে– “স তন্মূলমূল এবোপদ্রবসঞ্জ্ঞকঃ|” ইতি (সু. সূ. অ. ৩৫); ব্যাচক্ষতে চ টীকাকৃতঃ– “ তন্মূলং তস্য ব্যাধের্মূলং দোষরূপং মূলং যস্য স তন্মূলঃ|” ইতি| নৈবম্, অপচারেণ মূলভূতদোষোপবৃংহণলব্ধবলশ্চেদ্ব্যাধিরুপদ্রবং করোতি তেন ‘ তন্মূলমূল’ ইত্যুক্তবান্| অত এবাহ চরকঃ– “কশ্চিদ্ধি রোগো রোগস্য হেতুর্ভূত্বা প্রশাম্যতি|” (চ. নি. অ. ৮) ইত্যাদি| সর্বমেবৈতত্স্বরূপশব্দবাচ্যং ক্বচিত্কিঞ্চিদিতি; তথা চ সতি ন ব্যভিচার ইতি কেচিত্| তথাঽপি ব্যবস্থামাত্রং স্যান্ন তু লক্ষণম্, একস্য সকলরূপসঙ্গ্রাহকস্য ধর্মস্যাভাবাত্, উপদ্রবস্যাপি ব্যাধিস্বরূপত্বাপত্তেশ্চেতি| তস্মাত্ “উত্পন্নব্যাধিবোধকমেব লিঙ্গং রূপম্” ইতি লক্ষণম্| ‘উত্পন্ন’ ইতি পদং পূর্বরূপব্যবচ্ছেদার্থম্; এবকারেণ নিদানসম্প্রাপ্ত্যুপশযা ব্যবচ্ছিদ্যন্তে, তেষামুত্পন্নানুত্পন্নব্যাধিবোধকত্বাত্; তচ্চ দর্শিতমেব; লিঙ্গপদেন চক্ষুরাদের্ব্যুদাসঃ; যন্মতে ব্যাধিজন্মরূপা সম্প্রাপ্তিস্তন্মতে তস্যা লিঙ্গপদেন ব্যবচ্ছেদঃ, ন হি সা ব্যাধিজ্ঞানে লিঙ্গং, কিন্তু কারণমাত্রম্| শাস্ত্রে ব্যবহারার্থং নিদানবল্লক্ষণার্থং চ রূপপর্যাযানাহ– সংস্থানমিত্যাদি| ননু, রূপেণ ব্যাধির্জ্ঞাযতে, ন চ রূপব্যতিরেকেণ ব্যাধিরুপলভ্যতে; যতো মিলিতা অরুচ্যাদয এব জ্বরঃ, কাসাদ্যেকাদশরূপাণ্যেব রাজযক্ষ্মা| উচ্যতে– নৈবং, তথাবিধদোষদূষ্যসম্মূর্ছনাবিশেষো জ্বরাদিরূপো ব্যাধিঃ, তত্কার্যাশ্চারুচ্যাদযঃ ; কিঞ্চ অরুচ্যাদয এব প্রত্যেকশো রূপাণি, তত্সমুদাযো ব্যাধিঃ, যতঃ সমুদাযিভ্যোঽন্য এব সমুদাযঃ, যথা– খদিরতরূণাং বনমিতি; অন্যে তু রাহোঃ শিরঃ, শিলাপুত্রস্য শরীরমিতিবদসত্যপি ভেদে ভেদবিবক্ষযা সমর্থযন্তি; নৈযাযিকাস্তু তত্রাপি ভেদমাপাদযন্তি| ননু, “বিকারো দুঃখমেব চ|” ইতি (চ. সূ. অ. ৯) চরকবচনাদ্দুঃখস্যাত্মগুণস্য কথমরুচ্যাদিসমুদাযত্বং? নৈবং, দুঃখযতীতি দুঃখমিতি ব্যুত্পত্ত্যা দুঃখহেতোর্ধাতুবৈষম্যাদের্ব্যাধিত্বস্বীকারাত্| অরুচ্যাদযস্তু স্বরূপেণ বিকারা এব, যদা ত্বন্যপ্রতিপাদকাস্তদা লিঙ্গান্যেবোচ্যন্তে| যদাহ চরকঃ– “জ্ঞানার্থং যানি চোক্তানি ব্যাধিলিঙ্গানি সঙ্গ্রহে| ব্যাধযস্তে তদাত্বে তু লিঙ্গানীষ্টানি নামযাঃ||” ইতি (চ. নি. অ. ৮)| ইতি রূপলক্ষণম্||৭||

Adhikarana upashayalakShaNam (8-9) · Śloka 9

হেতুব্যাধিবিপর্যস্তবিপর্যস্তার্থকারিণাম্ | ঔষধান্নবিহারাণামুপযোগং সুখাবহম্ ||৮|| বিদ্যাদুপশযং ব্যাধেঃ স হি সাত্ম্যমিতি স্মৃতঃ | বিপরীতোঽনুপশযো ব্যাধ্যসাত্ম্যাভিসঞ্জ্ঞিতঃ ||৯|| (বা. নি. অ. ১) |

উপশযমাহ– হেতুব্যাধীত্যাদি| হেতুর্বাহ্য আভ্যন্তরশ্চ, ব্যাধির্জ্বরাদিঃ, এতযোর্হেতুব্যাধ্যোর্ব্যস্তসমস্তযোর্বিপর্যস্তা বিপরীতাঃ, এতযোরেব ব্যস্তসমস্তযোর্বিপর্যস্তার্থকারিণো নিদানসমানধর্মিণোঽপি প্রভাবাদ্রোগপ্রশমকারিণঃ; এবংবিধা যে ঔষধান্নবিহারা ভেষজাহারাচারাস্তেষামুপযোগমাচরণং সুখাবহং সুখকরমুপশযং বিদ্যাদুপশযাখ্যং জানীযাদ্ব্যাধেঃ| তস্য পর্যাযমাহ– স হি সাত্ম্যমিতি স্মৃত ইতি| চরকেঽপ্যুক্তম্– “সাত্ম্যার্থো হ্যুপশযার্থঃ” ইতি (চ. নি. অ. ১)| হিশব্দঃ পাদপূরণে| সুখাবহমিতি সুখং রোগনিবৃত্তিলক্ষণং; যথা ব্যপদিশন্তি লোকে– ‘ভারাপগমে সুখিনঃ সংবৃত্তাঃ স্ম’ ইতি, তত্ সুখমাবহতি সম্যগাযত্ত্যাঽনুবন্ধেন চ করোতীতি সুখাবহম্| এতেন সদাহতৃষ্ণানবজ্বরিণঃ শীতলজলপানং তত্কালসুখকরমপি নোপশয ইতি তাত্পর্যার্থঃ| অত্র, ঔষধান্নবিহারাণামিত্যুপলক্ষণং; তেন দেশকালাবপি বোদ্ধব্যৌ| অত এব বৃদ্ধবাগ্ভটেন ব্যাধ্যাদিবিপরীতমভিধায “এতেন দেশকালাবপি ব্যাখ্যাতৌ” (বৃ. বা. নি. অ. ১) ইত্যাখ্যাতম্| সুদান্তসেনোঽপ্যাহ– “সুখানুবন্ধো যো হেতুর্ব্যাধ্যাদিবিপরীতকঃ| দেশাদিকশ্চোপশযো জ্ঞেযোঽনুপশযোঽন্যথা||” ইতি| সঙ্ক্ষেপতস্তু লক্ষণম্– “ঔষধাদিজনিতঃ সুখানুবন্ধ উপশযঃ” ইতি| স্রক্চন্দনবনিতাদ্যুপভোগজনিতসুখনিবৃত্ত্যর্থমৌষধাদিপদম্, অনুবন্ধশব্দশ্চ অপথ্যজনিততদাত্বসুখব্যবচ্ছেদার্থঃ| এতদপ্যুদাহরণদর্শনপরং, ন তু লক্ষণম্; ঔষধাদীনাং হেতুবিপরীতাদীনাং চ পরস্পরব্যভিচারেণ লক্ষণত্বাযোগাত্| তস্মাত্ ‘সম্যগ্ব্যাধিজদুঃখোপশমহেতুরুপশযঃ’, ‘সাত্ম্যমুপশযঃ’ ইতি বা লক্ষণম্; ‘ঔষধজনিতঃ সুখানুবন্ধ উপশযঃ’ ইতি বা লক্ষণম্| চরকে; আহারাচারদেশকাললঙ্ঘনাদীনাং দ্রব্যাদ্রব্যভূতানামৌষধত্বেনাভিধানাত্| অথৈষামুদাহরণানি; তত্র হেতুবিপরীতানি; ঔষধং যথা– শীতকফজ্বরে শুণ্ঠ্যাদ্যুষ্ণং ভেষজম্| যদুক্তম্– “শীতেনোষ্ণকৃতান্রোগান্ শমযন্তি ভিষগ্বিদঃ| যে তু শীতকৃতা রোগাস্তেষামুষ্ণং ভিষগ্জিতম্||” ইতি (চ. বি. অ. ৩)| অন্নং যথা– শ্রমানিলজে জ্বরে রসৌদনম্| বিহারো যথা– দিবাস্বপ্নোত্থে কফে রাত্রৌ জাগরণমিতি| অথ ব্যাধিবিপরীতানি| ঔষধং যথা– অতিসারে স্তম্ভনং পাঠাদি, তথা শিরীষো বিষং হন্তি, খদিরঃ কুষ্ঠং, হরিদ্রা প্রমেহমিতি; নৈতে দোষমপেক্ষন্তে প্রভাবাদ্রোগপ্রশমকারিণ ইতি| বাপ্যচন্দ্রস্ত্বাহ– “জ্বরাদিব্যাধিহরং যদ্দ্রব্যং তদপি দোষপ্রত্যনীকং”, কিন্তু দোষপ্রত্যনীকাদস্যাযং ভেদঃ– যদ্দোষপ্রত্যনীকং তন্নাবশ্যং ব্যাধিহরং; যথা– বমনলঙ্ঘনে কফহরে ন কফগুল্মং হরতঃ; উক্তং হি চরকে– “কফে লঙ্ঘনসাধ্যে তু কর্তরি জ্বরগুল্মযোঃ| তুল্যেঽপি দেশকালাদৌ লঙ্ঘনং ন চ সম্মতম্||” ইতি; তথা– “ন বামযেত্তৈমিরিকং ন গুল্মিনং ন চাপি পাণ্ডূদররোগপীডিতম্|” ইতি; (সু. চি. অ. ৩৩); “যত্তু ব্যাধিহরং তদবশ্যং দোষহরং, তদ্ব্যাধিং শমযত্তদারম্ভকদোষমপি শমযতি; অন্যথা স রোগো জিত এব ন স্যাত্, কারণতাদবস্থ্যাত্” ইতি| তন্নাতিসঙ্গতমিত্যন্যে; যতো দোষস্তত্র সমবাযী নিমিত্তং বা; ন চ সমবাযিনিমিত্তাভাবপ্রযুক্তো নিযমেন কার্যাভাবঃ, কিন্ত্বসমবাযিনিমিত্তাভাবপ্রযুক্তোঽপি; যথা– কপালমালাসংযোগস্যাসমবাযিকারণস্য বিনাশাদপি ঘটাভাবঃ; তথা– রোগেঽপি সম্প্রাপ্তিলক্ষণস্য সংযোগস্য বিনাশাদ্রোগস্যাপি বিনাশঃ, দোষস্তু স্বতঃ ক্রিযান্তরেণ বা নিবর্ততে; কিঞ্চ যদি ব্যাধিপ্রত্যনীকমবশ্যং দোষং নিবর্তযেদিতি স্বীক্রিযতে, তদোভযপ্রত্যনীকাদ্ভেদো দুরুপপাদঃ স্যাদিতি| ননু, যদি নিমিত্তকারণং দোষস্তত্কথং তদারব্ধবিকারে বমনাদিনা দোষহরণং বিধীযতে? নহি দণ্ডকুলালাদ্যুচ্ছেদে ঘটোচ্ছেদ ইতি| উচ্যতে, যত্র যাবন্নিমিত্তকারণস্থাযিকার্যং তত্র নিমিত্তকারণোচ্ছেদাদপি কার্যনাশঃ; যথা– বর্তিতৈলনাশাদপি প্রদীপনাশঃ; তথাভূতাশ্চ দোষাঃ প্রাযশ ইতি| অন্নং যথা– অতিসারে স্তম্ভনং মসূরাদি| বিহারো যথা– উদাবর্তে প্রবাহণং; মন্ত্রৌষধিধারণবল্যুপহারনিযমপ্রাযশ্চিত্তহোমগুরুদেবশুশ্রূষাদযোঽপি ব্যাধিবিপরীতা বিহারা ইতি বাপ্যচন্দ্রঃ| অথ হেতুব্যাধিবিপরীতানি– ঔষধং যথা– বাতশোথে দশমূলং বাতহরং শোথহরং চ| যদুক্তং চরকে ষড্বিরেচনশতাশ্রিতীযেঽধ্যাযে ‘পাটলা’ ইত্যাদি যাবত্– “দশেমানি শোথহরাণি” ইতি (চ. সূ. অ. ৪) অন্নং যথা– বাতকফগ্রহণ্যাং তক্রং, শীতবাতোত্থে জ্বরে পেযা; সা হ্যুষ্ণবীর্যত্বাদ্বাতং হন্তি প্রভাবাজ্জ্বরং চ| যদুক্তং চরকে– “ জ্বরঘ্ন্যো জ্বরসাত্ম্যত্বাত্” ইতি (চ. চি. অ. ৩); সুশ্রুতেঽপি– “জ্বরে চৈবাতিসারে চ যবাগূঃ সর্বদা হিতা|” ইতি (সু. উ. তং. অ. ৪০)| বিহারো যথা– স্নিগ্ধদিবাস্বপ্নপ্রজাতাযাং তন্দ্রাযাং রূক্ষং তন্দ্রাবিপরীতং রাত্রিজাগরণমিতি| অথ হেতুবিপরীতার্থকারীণি; ঔষধং যথা– পিত্তপ্রধানে পচ্যমানে ব্রণশোথে পিত্তকর উষ্ণ উপনাহঃ| অন্নং যথা– পচ্যমানে ব্রণশোথেঽন্নং বিদাহি| বিহারো যথা– বাতোন্মাদে ত্রাসনমিতি| অথ ব্যাধিবিপরীতার্থকারীণি; ঔষধং যথা– ছর্দ্যাং বমনকারকং মদনফলাদি| অন্নং যথা– অতিসারে বিরেচনার্থং বিরেচনং ক্ষীরম্ | বিহারো যথা– ছর্দ্যাং বমনার্থং প্রবাহণমিতি| অথ হেতুব্যাধিবিপরীতার্থকারীণি; ঔষধং যথা– অগ্নিপ্লুষ্টে উষ্ণোঽগুর্বাদিলেপঃ, বিষে বা বিষম্| অন্নং যথা– মদ্যপানোত্থে মদাত্যযে মদকারকং মদ্যম্| বিহারো যথা– ব্যাযামজনিতসম্মূঢবাতে জলপ্রতরণরূপো ব্যাযাম ইতি| ননু ছর্দ্যাং বহুশ্লেষ্মজাযাং বমনযোগ্যাযাং যদি বমনং ন ক্রিযতে তদা চিরানুবর্তী রোগোঽনুচ্ছেদ্যো বা স্যাত্, ততশ্চ বমনং প্রযুক্তং দোষপ্রত্যনীকমেব ভবতি; যদুক্তং সুশ্রুতে– “ছর্দিষু বহুদোষাসু বমনং হিতমুচ্যতে|” (সু. উ. তং. অ. ৪৯) ইতি, তথা আমাতিসারে ক্ষীরস্য বিরেকিত্বেনামনিঃ সরণাদ্ধেতুপ্রত্যনীকমেব ভবতি| এবমগ্নিপ্লুষ্টেঽপ্যুষ্ণক্রিযযা রক্তস্য বিলযনেন স্থানান্তরগমনাত্ হেতুপ্রত্যনীকমেব; অন্যথা দাহপ্রকুপিতং রক্তং তত্রস্থং পাকমারভেত্; যদুক্তং সুশ্রুতে– “অগ্নিনা কোপিতং রক্তং ভৃশং জন্তোঃ প্রকুপ্যতি| ততস্তেনৈব বেগেন পিত্তমস্যাপ্যুদীর্যতে||” ইতি (সু. সূ. অ. ১২); শীতক্রিযা চ তত্র নিষিদ্ধা, রক্তস্য স্ত্যানত্বহেতুত্বাত্; যদাহ সুশ্রুতঃ– “প্রকৃত্যা হ্যুদকং শীতং স্কন্দযত্যতিশোণিতম্| তস্মাত্ সুখযতি হ্যুষ্ণং নতু শীতং কথঞ্চন||” ইতি (সু. সূ. অ. ১২)| স্কন্দযতি স্ত্যানীকরোতি; তথা জঙ্গমবিষে ঊর্ধ্বগস্বরূপে মৌলবিষমধোগস্বরূপং হেতুবিপরীতমেব| যদুক্তং চরকে– “বিষং বিষঘ্নমুক্তং যত্ প্রভাবস্তত্র কারণম্| ঊর্ধ্বানুলোমিকং যচ্চ তত্ প্রভাবপ্রভাবিতম্||” ইতি (চ. সূ. অ. ২৬)| অস্যাযমর্থঃ– বিষত্বাবিশেষেঽপি কুতো গতিভেদ ইত্যত উক্তম্– তত্ প্রভাবপ্রভাবিতমিতি; তথা মদ্যকৃতে মদাত্যযে যন্মদ্যং তদপি মাতুলুঙ্গচুক্রাদিযুতং সুশ্রুতাদিভির্বিহিতং কেবলাচ্চ দ্রব্যান্তরসংযুক্তমন্যদেব, অথবা বাতমদাত্যযে রূক্ষমাধ্বীকাদিনা জনিতে স্নিগ্ধপৈষ্টিকাদিমদ্যং প্রযুজ্যমানং হেতুবিপরীতমেব; যচ্চোক্তং সুশ্রুতে– “যথা নরেন্দ্রোপহতস্য কস্যচিদ্ভবেত্ প্রসাদস্তত এব নান্যতঃ| ধ্রুবং তথা মদ্যহতস্য দেহিনো ভবেত্ প্রসাদস্তত এব নান্যতঃ||” ইতি (সু. উ. তং. অ. ৪৭), তন্মদ্যজাতীযাভিপ্রাযেণৈব; যচ্চোরুস্তম্ভে জলপ্রতরণং, তত্রাপি জলস্য শৈত্যেন বহিরগচ্ছন্ দেহোষ্মা কুম্ভকারপবনন্যাযেনান্তঃপিণ্ডিতৌ মেদঃশ্লেষ্মাণৌ বিলাযযতি, ব্যাযামশ্চ তৌ শোষযতি, ততস্তু নিরাবরণো বাযুঃ স্বমার্গপ্রতিপন্নো ভবতীতি হেতুপ্রত্যনীকতৈব; অনেন ন্যাযেন সর্বমেব তদর্থকারি যথাসম্ভবং হেতুপ্রত্যনীকাদাবেবান্তর্ভবতীতি| উচ্যতে– যদ্যপ্যেবং তথাঽপ্যবান্তরবৈধর্ম্যপ্রতিপাদনার্থমাচার্যৈঃ পৃথগ্দর্শিতম্ | তথা চরকেঽপ্যুক্তম্– “উপশযঃ পুনর্হেতুব্যাধিবিপরীতানাং বিপরীতার্থকারিণাং চৌষধাহারবিহারাণামুপযোগঃ সুখানুবন্ধঃ|” ইতি (চ. নি. অ. ১)| বৈধর্ম্যং চ হেতুসমানধর্মকত্বেঽপি রোগপ্রশমকত্বমিতি| বিপরীতোঽনুপশয ইতি ঔষধাদীনাং দুঃখকর উপযোগোঽনুপশয ইত্যর্থঃ| তত্পর্যাযমাহ– ব্যাধ্যসাত্ম্য ইতি| ব্যাধিগ্রহণেন দোষোঽপি বোধ্যঃ| ননু, অনুপশযঃ কিং ব্যাধিবিশেষং বোধযতি নো বা? নেতি চেত্, নিদানে তদুপন্যাসো ব্যর্থঃ; প্রতিপাদযতীতি চেত্, ‘বিজ্ঞানং রোগাণাং পঞ্চধা স্মৃতম্’ ইতি ব্যাহন্যতে, তস্য ষষ্ঠত্বাপত্তেঃ| নৈবং, প্রতিপাদযত্যেব; যদাহ চরকঃ– “গূঢলিঙ্গং ব্যাধিমুপশযানুপশযাভ্যাং পরীক্ষেত|” ইতি (চ. বি. অ. ৪)| কিন্তু নিদানে তস্যান্তর্ভাবঃ, দোষস্য রোগস্য বা বর্ধকত্বাত্ ( ইত্যনুপশযস্য নিদানেঽন্তর্ভাবান্ন ষষ্ঠত্বাপত্তিঃ, বক্ষ্যতি চ– ‘নিদানোক্তানুপশযঃ’ ইতি|)| ইত্যুপশযলক্ষণম্||৮-৯||

Adhikarana samprAptilakShaNam (10) · Śloka 10

যথাদুষ্টেন দোষেণ যথা চানুবির্সপতা | নির্বৃত্তিরামযস্যাসৌ সম্প্রাপ্তির্জাতিরাগতিঃ ||১০|| (বা. নি. অ. ১) |

সম্প্রাপ্তিমাহ– যথেত্যাদি| নানাবিধা হি দোষাণাং দুষ্টিঃ প্রাকৃতী বৈকৃতী বা, অনুবন্ধ্যরূপা অনুবন্ধরূপা বা, একশো দ্বিশো বা সমস্তা বা, রৌক্ষ্যাদিভিঃ সর্বৈর্ভাবৈরল্পৈর্বা, এবমাদিদুষ্টিদুষ্টেন দোষেণ যা আমযস্য রোগস্য নির্বৃত্তিরুত্পত্তিঃ সা সম্প্রাপ্তিরুচ্যতে| যথা চানুবিসর্পতেতি অনেকধা দোষাণাং বিসর্পণং গতিরূর্ধ্বাধস্তির্যগাদিভেদেন, তথা বিসর্পতা সংসর্পতা| সম্প্রাপ্তিপর্যাযাবাহ শাস্ত্রে ব্যবহারার্থং লক্ষণার্থং চ– জাতিরাগতিরিতি| জাত্যাদিভিঃ শব্দৈর্যাঽভিধীযতে সা সম্প্রাপ্তিরিতি| “ জাতিরাগতিরিত্যর্থঃ জন্মাঽপি জ্ঞানকারণম্, অজাতস্য জ্ঞানাভাবাত্” ইত্যাহ ভট্টারহরিচন্দ্রঃ| এতেনৈতদুক্তং ভবতি– নহি নিদানাদিবদ্বোধকত্বেন জ্ঞানকারণত্বং, কিন্তু বোধবিষযত্বেন| তন্ন ইত্যন্যে, আলোকচক্ষুরাদেরিব এবংবিধসম্প্রাপ্তেশ্চিকিত্সাযামনুপযোগাত্| ন চাস্তি নিযমঃ জাতমেব বিজ্ঞাযতে ইতি, অজাতস্য ব্যাধের্নিদানপূর্বরূপাভ্যাং বৃষ্ট্যাদেরিব মেঘাদিনা জ্ঞাযমানত্বাত্| অথ জাতমিতি জন্মাবচ্ছিন্নমুচ্যতে, বৃষ্ট্যাদিকং চ ভবিষ্যজ্জন্মাবচ্ছিন্নমেব, যস্য তু কালত্রযেঽপি জন্ম নাস্তি তন্ন জ্ঞাযত এব; তথাঽপি ন ব্যাধিজন্ম সম্প্রাপ্তিঃ; জন্মবদালোকচক্ষুরাদেরপি বাচ্যত্বাপত্তেঃ, তৈরপি বিনা জ্ঞানাভাবাত্| তস্মাত্ ‘দোষেতিকর্তব্যতোপলক্ষিতং ব্যাধিজন্মেহ সম্প্রাপ্তিঃ নতু কেবলং জন্ম’ ইতি ভট্টারহরিচন্দ্রাভিপ্রাযঃ| বাগ্ভটেনাপি ‘যথাদুষ্টেন’ (বা. নি. অ. ১) ইত্যাদি বদতা বিশিষ্টমেব ব্যাধিজন্ম সম্প্রাপ্তিরুক্তা; তথা সতি ক্রিযাবিশেষোঽপি লভ্যতে; যথা– জ্বরে আমাশযদূষণাগ্নিহননাদিবোধে লঙ্ঘনপাচনস্বেদাদিকরণমিতি| সম্প্রাপ্তিশ্চৈবংবিধা যদ্যপি দোষাণামবান্তরব্যাপারত্বেন দোষগ্রহণেনৈব প্রাপ্যতে, তথাঽপি চিকিত্সাবিশেষার্থমেব পৃথক্ ক্রিযতে; যথা– ব্যাধের্জ্ঞাপকত্বাবিশেষেঽপি পূর্বরূপমেব রূপাত্ পৃথগিতি| তস্মাত্ “দোষেতিকর্তব্যতোপলক্ষিতং ব্যাধিজন্ম সম্প্রাপ্তিঃ”, ইত্যেব লক্ষণম্||১০||

Adhikarana samprApteH aupAdhikabhedAH (11-13) · Śloka 13

সঙ্খ্যাবিকল্পপ্রাধান্যবলকালবিশেষতঃ | সা ভিদ্যতে যথাঽত্রৈব বক্ষ্যন্তেঽষ্টৌ জ্বরা ইতি ||১১|| দোষাণাং সমবেতানাং বিকল্পোংঽশাংশকল্পনা | স্বাতন্ত্র্যপারতন্ত্র্যাভ্যাং ব্যাধেঃ প্রাধান্যমাদিশেত্ ||১২|| হেত্বাদিকার্ত্স্ন্যাবযবৈর্বলাবলবিশেষণম্ | নক্তন্দিনর্তুভুক্তাংশৈর্ব্যাধিকালো যথামলম্ ||১৩|| (বা. নি. অ. ১) |

তস্যা ঔপাধিকভেদমাহ– সঙ্খ্যেত্যাদিনা, সা ভিদ্যত ইত্যন্তেন| অত্র চ প্রাধান্যোপাদানাদপ্রাধান্যং চ তত্প্রতিযোগিতযা বোদ্ধব্যম্| অত এব চ বিবরণে স্বাতন্ত্র্যপারতন্ত্র্যাভ্যামিতি বক্ষ্যতি| এবং বলেঽপি ব্যাখ্যেযম্| সঙ্খ্যাদিকমেব বিবৃণোতি– যথেত্যাদি| অষ্টৌ জ্বরা ইতি সঙ্খ্যাবিবরণম্| অষ্টত্বং চ বাতাদিকারণভেদাত্; একজাস্ত্রযো, দ্বন্দ্বজাস্ত্রযঃ, সন্নিপাতজ এক, আগন্তুজশ্চৈক ইতি| যদ্যপি বৃদ্ধৈর্দোষৈঃ সন্নিপাতাস্ত্রযোদশ, যদুক্তং চরকে– “দ্ব্যুল্বণৈকোল্বণৈঃ ষট্ স্যুর্হীনমধ্যাধিকৈশ্চ ষট্| সমৈশ্চৈকো বিকারাস্তে সন্নিপাতাস্ত্রযোদশ||” (চ. সূ. অ. ১৭) ইতি; তথাঽপ্যত্র ত্রিদোষজত্বসামান্যাত্ সান্নিপাতিক একত্বেন গণিতঃ| এবং কামশোকভযাদ্যনেককারণজোঽপ্যাগন্তুজ আগন্তুজত্বসামান্যাদেকত্বেন নির্দিষ্ট ইত্যষ্টৌ জ্বরা ইতি| বিকল্পং বিবৃণোতি– দোষাণামিত্যাদি| দোষাণাং সমবেতানাং পরস্পরসম্বদ্ধানাং; তেন দ্বন্দ্বসন্নিপাতযোর্গ্রহণম্| অংশাংশকল্পনেতি অংশা বাতাদিগতরৌক্ষ্যাদযঃ, তৈরেকদ্বিত্র্যাদিভিঃ সমস্তৈর্বা বাতাদিকোপাবধারণং বিকল্পনা| যদুক্তং সুশ্রুতে– “সর্বৈর্ভাবৈস্ত্রিভির্বাঽপি দ্বাভ্যামেকেন বা পুনঃ| সংসর্গে কুপিতঃ ক্রুদ্ধং দোষং দোষোঽনুধাবতি||” ইতি (সু. সূ. অ. ২১)| এবংবিধশ্চ দোষকোপো নিদানবৈচিত্র্যাদ্ভবতি| তদ্যথা– বাতস্য রৌক্ষ্যশৈত্যলাঘববৈশদ্যাদিগুণস্য এবঙ্গুণঃ কষাযরসঃ কলাযশ্চ সর্বৈর্ভাবৈর্বর্ধকঃ, রৌক্ষ্যশৈত্যলাঘবৈস্তণ্ডুলীযকঃ, রৌক্ষ্যশৈত্যাভ্যাং কাণ্ডেক্ষুঃ, রৌক্ষ্যেণ সীধুঃ; তথা পিত্তস্য সর্বৈর্ভাবৈর্বর্ধকঃ কটুকো রসো মদ্যং চ, হিঙ্গু কটূষ্ণতীক্ষ্ণত্বৈঃ, দীপ্যকস্তৈক্ষ্ণ্যৌষ্ণ্যাভ্যাম্, ঔষ্ণ্যেন তিলাঃ; তথা শ্লেষ্মণঃ সর্বৈর্ভাবৈর্বর্ধকো মধুরো রসো মাহিষং চ পযঃ, স্নেহগৌরবমাধুর্যৈ রাজাদনফলং, কশেরুঃ শৈত্যগৌরবাভ্যাং, শৈত্যেন ক্ষীরিণাং ফলানীতি| অপরগুণোদাহরণপ্রকারা জেজ্জটগদাধরবাপ্যচন্দ্রব্যাখ্যাবিশেষাশ্চ বিস্তরত্বাপত্তেরত্র ন লিখিতাঃ| প্রাধান্যং বিবৃণোতি– স্বাতন্ত্র্যপারতন্ত্র্যাভ্যামিতি| অনুবন্ধ্যানুবন্ধভাবেনেত্যর্থঃ| অত্রাপি ‘দোষাণাং সমবেতানাম্’ ইত্যনুবর্তনীযম্| ‘অপ্রাধান্যং চ’ ইতি শেষঃ, গম্যমানত্বান্নোপদর্শিতম্| তেন স্বাতন্ত্র্যাত্ প্রাধান্যং, পারতন্ত্র্যাদপ্রাধান্যমিতি সিধ্যতি| বলং বিবৃণোতি– হেত্বাদীত্যাদি| হেতুপূর্বরূপরূপাণাং সাকল্যাদ্ব্যাধের্বলবত্ত্বং, তেষামবযবেনৈকদেশেনাবলবত্ত্বম্| কালং বিবৃণোতি– নক্তমিত্যাদি| নক্তং রাত্রিঃ, দিনমহঃ, ঋতবো বসন্তাদযঃ, ভুক্তমাহারঃ, এষামংশৈরেকদেশৈঃ; ব্যাধিকালো ব্যাধিবৃদ্ধিহানিহেতুকালঃ| অত্র, ঋতোরংশাঃ কতিপযান্যহোরাত্রাণি, যদাহ বাগ্ভটঃ– “ঋত্বোরন্ত্যাদিসপ্তাহাবৃতুসন্ধিরিতি স্মৃতঃ|” ইতি (বা. সূ. অ. ৩); অথ বা সংবত্সররূপস্য কালস্য ঋতুরূপোংঽশ ঋত্বংশ ইত্যেবমপি যোজ্যং; নত্বেকস্য ঋতোর্দিনাদিবদাদিমধ্যান্তা ঋত্বংশাঃ, ঋতোঃ সমুদিতস্য তত্র কারণত্বেনোক্তত্বাত্| যথামলং যথাদোষং; তদ্যথা– রাত্রেরাদৌ শ্লেষ্মা, মধ্যে পিত্তং, শেষে বাযুঃ; এবং দিনস্য; বসন্তে কফস্য, শরদি পিত্তস্য, বর্ষাসু বাযোঃ কোপঃ; এবং ভুক্তাদৌ ভুক্তমাত্রে কফস্য, মধ্যে পচ্যমানাবস্থাযাং পিত্তস্য, অন্তে সম্যক্পরিণতে ভুক্তে বাযোঃ প্রকোপ ইতি| তদুক্তং বাগ্ভটেনৈব– “তে ব্যাপিনোঽপি হৃন্নাভ্যোরধোমধ্যোর্ধ্বসংশ্রযাঃ| বযোঽহোরাত্রিভুক্তানাং তেঽন্তমধ্যাদিগাঃ ক্রমাত্||” ইতি (বা. সূ. অ. ১)| অত্র তে ইতি ক্রমেণ বাতপিত্তশ্লেষ্মাণঃ| ননু, সম্প্রাপ্তিভেদে চরকেণ সঙ্খ্যাদিবদ্বিধিরপ্যুক্তঃ; যথা– “দ্বিবিধা ব্যাধযো নিজাগন্তুভেদেন” (চ. নি. অ. ১), “ত্রিবিধং রক্তপিত্তম্” (চ. সূ. অ. ১১) ইত্যাদি; তত্ কুতোঽত্র বিধির্নোক্তঃ? উচ্যতে, সঙ্খ্যাগ্রহণেন বিধেরবরোধঃ, তস্যাব্যভিচরিতসঙ্খ্যাযোগিত্বাত্| বিধিসঙ্খ্যযোশ্চাযং ভেদঃ– বিধির্হি প্রকারঃ, স চাভিন্নজাতীযানামেব কস্যচিদ্ধর্মান্তরস্যান্বযাদ্ভবতি, যথা– রক্তপিত্তত্বাবিশেষেঽপি ঊর্ধ্বগাদিপ্রকারো ভবতি; সঙ্খ্যা তু ভিন্নত্বমাত্রেঽপি; যথা– চত্বারো ঘটাঃ, অষ্টৌ জ্বরা ইতি| অত্রৈব বিধির্হি প্রকারঃ, স চ ভিন্নেষু ন যুক্তঃ, অতঃ সঙ্খ্যাদিভিন্নেষু ব্যাধিষু কারণধর্মানুগতঃ প্রকারো যুজ্যতে| তথা চ ন্যাযবিদো ব্রুবতে– “সমানেন ধর্মেণ পরিগ্রহো ভেদানাং যত্র ক্রিযতে স বিধিঃ, সঙ্খ্যা তু ভেদমাত্রম্|” ইতি; বৈযাকরণা অপি ব্যাচক্ষতে– “অন্বযবান্ প্রকারো, নিরন্বযো ভেদঃ” ইতি বাপ্যচন্দ্রো লিখিতবান্| ননু যথাংঽশাংশবিকল্পনাদিনা জ্বরো জ্ঞাযতে ন তথা সঙ্খ্যযা| উচ্যতে– সঙ্খ্যাভেদেন ব্যাধের্দোষভেদো জ্ঞাযতে, যতো জ্বরাদিকং স্বরূপতো জ্ঞাত্বা চিকিত্সার্থং বিশেষো জিজ্ঞাস্যঃ, কতমোঽযং জ্বরঃ? ইতি; তস্মিন্ জ্ঞাতে বিশেষো ভবতীতি পরম্পরযা কারণত্বং সঙ্খ্যাযাঃ| অত্র যদুত্পন্ন এবাসৌ দোষভেদাদ্ভিন্নো জা(জ্ঞা)তস্ততো যুক্তমস্য পর্যেষণং কতমোঽযমিতি| কুতঃ? চিকিত্সাবিশেষার্থম্| ইতি সম্প্রাপ্তিলক্ষণম্||১১-১৩||

Adhikarana nidAnapa~jcakopasaMhAraH (14) · Śloka 14

ইতি প্রোক্তো নিদানার্থঃ স ব্যাসেনোপদেক্ষ্যতে |১৪| (বা. নি. অ. ১) |

উক্তং নিদানপঞ্চকমুপসংহরতি– ইতীত্যাদি| ইতিশব্দঃ সমাপ্তৌ| নিদানশব্দোঽত্র সামান্যবচনঃ, অর্থোঽভিধেযঃ| তন্নিদানং সঙ্ক্ষেপেণ স্বরূপলক্ষণমাত্রেণোক্তম্, অধুনা ব্যাসেন বিস্তরেণোপদেক্ষ্যতে কথযিষ্যতে; সকলেন গ্রন্থেন প্রতিরোগং নিদানপূর্বরূপাদয এব তত্তদ্বিশেষৈর্বক্তব্যা ইত্যর্থঃ|১৪|–

Adhikarana vAtAdeH sarvarogeShvavyabhicaritakAraNatvam (14) · Śloka 15

সর্বেষামেব রোগাণাং নিদানং কুপিতা মলাঃ ||১৪|| তত্প্রকোপস্য তু প্রোক্তং বিবিধাহিতসেবনম্ |১৫| (বা. নি. অ. ১) |

দ্বিবিধং হি রোগস্য কারণং বিপ্রকৃষ্টং সন্নিকৃষ্টং চ; তত্র বিপ্রকৃষ্টং বিরুদ্ধাহারাদি, সন্নিকৃষ্টং বাতাদি, তস্য বাতাদেঃ সর্বরোগেষ্বব্যভিচরিতকারণত্বমাহ– সর্বেষামিত্যাদি| যদাহ সুশ্রুতঃ– “নাস্তি রোগো বিনা দোষৈর্যস্মাত্তস্মাদ্বিচক্ষণঃ অনুক্তমপি দোষাণাং লিঙ্গৈর্ব্যাধিমুপাচরেত্|” (সু. সূ. অ. ৩৫/১৯) ইতি (সু. সূ. অ. ৩৫)| আগন্তুব্যাধিষু যদ্যপ্যুত্পত্তৌ দোষকোপো নাস্তি, তথাঽপ্যুত্পত্ত্যনন্তরমবশ্যম্ভাবী; উত্পন্নদ্রব্যে গুণযোগবত্| যদুক্তং চরকে– “আগন্তুর্হি ব্যথাপূর্বসমুত্পন্নো জঘন্যং বাতপিত্তশ্লেষ্মণাং বৈষম্যমাপাদযতি|” ইতি (চ. সূ. অ. ২০)| নিদানং কারণম্| মলা দোষাঃ, মলিনীকরণাত্| ননু, বাতাদীনাং কিমিদং দোষত্বম্?; অত্রাহুরেকে– স্বাতন্ত্র্যেণ দূষকত্বং দোষত্বম্ ইতি; রসাদিদূষ্যব্যবচ্ছেদার্থং ‘স্বাতন্ত্র্যেণ’ ইতি পদং, তে হি বাতাদিদুষ্টাঃ সন্তো দূষ্যান্তরদূষকাঃ| অত্রাহুরন্যে– কিমিদং স্বাতন্ত্র্যং? কিং দোষান্তরনিরপেক্ষত্বং? হেত্বন্তরনিরপেক্ষত্বং বা? আদ্যে বাতস্যৈব দোষত্বং স্যাত্, নতু বাতসাপেক্ষযোঃ কফপিত্তযোঃ; যদুক্তম্– “পিত্তং পঙ্গু কফঃ পঙ্গুঃ পঙ্গবো মলধাতবঃ| বাযুনা যত্র নীযন্তে তত্র গচ্ছন্তি মেঘবত্||” ইতি; দ্বিতীযে বাতস্যাপি ন দোষত্বং, কফপিত্তযোরিব নিদানসাপেক্ষস্যৈব তস্য দূষকত্বাত্; তস্মাত্ “প্রকৃত্যারম্ভকত্বে সতি দুষ্টিকর্তৃত্বং দোষত্বম্” ইতি লক্ষণম্| রসরক্তাদিনিবৃত্ত্যর্থং ‘প্রকৃত্যারম্ভকত্বম্’ ইতি বিশেষণম্| নহি বাতাদিপ্রকৃতিবচ্ছাস্ত্রে রসরক্তাদিপ্রকৃতিরুক্তা; বাতাদিপ্রকৃতিত্বং চ শরীরস্য বাতাদিদূষিতশুক্রশোণিতারব্ধত্বম্ | যদাহ চরকঃ– “দোষানুশযিতা হ্যেষাং দেহপ্রকৃতিরুচ্যতে|”; তথা– “বাতলাদ্যাঃ সদাঽঽতুরাঃ|” ইতি (চ. সূ. অ. ৭)| সুশ্রুতেনাপি প্রকৃতিলক্ষণে “বাতপ্রকৃতিঃ স্ফুটিতকরচরণো জাগরুকোঽনবস্থিতচিত্তঃ” (সু. শা. অ. ৪) ইত্যাদ্যুক্তম্| প্রকৃতিরোগযোশ্চাযং ভেদঃ– প্রকৃতিরপথ্যসেবযা নাত্যন্তং বাধতে, যদুক্তম্– “বিষজাতো যথা কীটো বিষেণ ন বিপদ্যতে| তদ্বত্ প্রকৃতিভির্দেহস্তজ্জাতত্বান্ন বাধ্যতে||” (সু. শা. অ. ৪) ইতি সঙ্ক্ষেপঃ| বিস্তরস্তু সুশ্রুতশ্লোকবার্তিকে প্রশ্নবিধানাখ্যে টীকাসু চ দ্রষ্টব্যঃ| ননু, ‘প্রকৃত্যারম্ভকত্বং দোষত্বম্’ ইত্যেবাস্তু| সত্যং, বিপক্ষাদ্ব্যাবৃত্তির্ভবত্যেব, কিন্তু দোষস্বরূপং নোক্তং স্যাদিতি| সুশ্রুতাদিভির্বাতাদেরিব প্রকোপকালপ্রকোপণনির্হরণস্থানবিশেষরোগবিশেষলিঙ্গবিশেষ-চিকিত্সাবিশেষাণামভিধানাদ্রক্তস্যাপি দোষত্বং পূর্বটীকাকারৈরাষাঢধর্মস্বামিদাসাদিভিঃ স্বীকৃতং তদপ্যেতেন ব্যবচ্ছিন্নম্, অধুনাতনৈরস্বীক্রিযমাণত্বাত্| ননু, দোষাশ্চেত্ কারণং তর্হি তেষাং সর্বদা দেহে সদ্ভাবাত্ সর্বদা রোগোত্পাদকত্বপ্রসঙ্গ ইত্যত আহ– কুপিতা ইতি, বিকৃতিমাপন্নাঃ| ননু, তত্প্রকোপঃ স্বভাবাত্, কারণান্তরাদ্বা? নাদ্যঃ, পূর্ববত্প্রসঙ্গাত্; অথ কারণান্তরাদিতি কিং তদিত্যাহ– বিবিধাহিতসেবনমিতি| বিবিধস্য নানাবিধস্য, অহিতস্য অসাত্ম্যেন্দ্রিযার্থসংযোগপ্রজ্ঞাপরাধপরিণামলক্ষণস্য সেবনমিতি||১৪||-

Adhikarana rogANAM nidAnArthakartRutvam (15) · Śloka 15

নিদানার্থকরো রোগো রোগস্যাপ্যুপজাযতে ||১৫||

ননু, কিমেতদেব নিদানম্, উতান্যদপ্যস্তীত্যতশ্চরকবচনমুপন্যস্যতি– নিদানার্থকর ইত্যাদি| অপিশব্দোঽত্র ভিন্নক্রমে| রোগোঽপি নিদানার্থকরো রোগস্য| অস্যাযমর্থঃ– নিদানেন যোঽর্থঃ ক্রিযতে ব্যাধ্যাখ্যঃ, স রোগেণাপীতি| রোগোঽপি রোগকর ইতি বাচ্যে যন্নিদানার্থকর ইত্যকরোত্, তেনৈবং গমযতি– রোগোঽপি রোগান্তরং কুর্বাণো নিদানান্তরোপবৃংহিতবল এব করোতি; এবং রোগো রোগস্য নিদানমুপজাযতে ইত্যেব যোজনা||১৫||

Adhikarana nidAnArthakararogAH (16-18) · Śloka 18

তদ্যথা জ্বরসন্তাপাদ্রক্তপিত্তমুদীর্যতে | রক্তপিত্তাজ্জ্বরস্তাভ্যাং শোষস্যাপ্যুপজাযতে ||১৬|| প্লীহাভিবৃদ্ধ্যা জঠরং জঠরাচ্ছোথ এব চ | অর্শোভ্যো জাঠরং দুঃখং গুল্মশ্চাপ্যুপজাযতে ||১৭|| (দিবাস্বাপাদিদোষৈশ্চ প্রতিশ্যাযশ্চ জাযতে) | প্রতিশ্যাযাদথো কাসঃ কাসাত্ সঞ্জাযতে ক্ষযঃ | ক্ষযো রোগস্য হেতুত্বে শোষস্যাপ্যুপজাযতে ||১৮|| (চি. নি. অ. ৮) |

অত্রৈব দৃষ্টান্তমাহ– তদ্যথেত্যাদি| তাভ্যামিতি রক্তপিত্তাত্ জ্বরাচ্চ| দুঃখমিতি দুঃখযতীতি দুঃখং পীডাকরম্| অযং চ দুঃখশব্দো লিঙ্গবিপরিণামেন সর্বেষ্বেব জ্বরাদিষু যোজ্য ইতি বাপ্যচন্দ্রঃ| গুল্মশ্চাপ্যুপজাযত ইতি অর্শোভ্য এব| কাসাত্ সঞ্জাযতে ক্ষয ইতি ‘ওজঃ প্রভৃতীনাম্’ ইতি শেষঃ| স চ ক্ষযো রোগস্য হেতুত্বে উপজাযতে| কস্য রোগস্যেত্যাহ– শোষস্যেতি, রাজযক্ষ্মণঃ| অত্র কেচিত্ হরিচন্দ্রাদিভির্ব্যাখ্যাতং পাঠান্তরং পঠন্তি– “ক্ষযো রোগস্য হেতুত্বে শোষশ্চাপ্যুপজাযতে|” ইতি অস্যার্থঃ– ক্ষযো রাজযক্ষ্মা, উরোগ উরঃক্ষতঃ, সমাহারদ্বন্দ্বেনৈকবচনং, তস্য হেতুত্বে শোষো ধাতুক্ষয উপজাযত ইতি| ননু, চরকে সর্বং নিদানং ত্রৈবিধ্যেন সঙ্গৃহীতং ‘অসাত্ম্যেন্দ্রিযার্থসংযোগ’ (চ. সূ. অ. ১১) ইত্যাদিনা, ততশ্চ রোগস্যাপি নিদানত্বমাচক্ষাণঃ স্বোক্তং নিদানত্রৈবিধ্যসঙ্গ্রহং কথং ন বিরুণদ্ধি?; অত্রৈকে সমাধিমভিদধতি– ত্রিবিধং যন্নিদানমুক্তং তত্ সর্বব্যাধিবিষযম্, ইদং তু প্রতিনিযতবিষযং, যতো ন সর্বে রোগা রোগাজ্জাযন্তে, কিং তর্হি কশ্চিদেব ব্যাধিঃ কুতশ্চিদ্রোগাদিতি চতুর্থমেবৈতন্নিদানং রোগাখ্যমিতি| অন্যে ত্বাহুঃ– রোগস্য রোগোঽপি নিদানং ভবন্ ত্রিবিধনিদানব্যতিরেকেণ ন ভবত্যেব; যতো যাবদযং জ্বরোঽসাত্ম্যেন্দ্রিযার্থসংযোগাদিভিরুপবৃংহিতবলো ন ভবতি ন তাবদ্রক্তপিত্তমারভতে, তস্মাদ্ ব্যাধ্যুত্পাদে ত্রিবিধ এব হেতুঃ সাক্ষাত্ পারম্পর্যেণ বেতি||১৬-১৮||

Adhikarana rogANAM kadA nidAnArthakartRutvaM? (19) · Śloka 19

তে পূর্বং কেবলা রোগাঃ পশ্চাদ্ধেত্বর্থকারিণঃ |১৯| (চ. নি. অ. ৮) |

ননু, য ইমে রোগা রোগান্তরস্য নিদানত্বেনোক্তাস্তে কিমুত্পন্নমাত্রা এব রোগং জনযন্তি উতানন্তরকালমিত্যত আহ– তে পূর্বমিত্যাদি| তে ব্যাধয উপবৃংহকহেত্বলাভাত্ প্রাক্ কেবলাঃ স্বতন্ত্রাঃ সন্তো রোগা এব রুজাকর্তৃত্বাত্; পশ্চাদুপবৃংহকহেতুলাভাত্, হেতোর্নিদানস্য যোঽর্থো যত্প্রযোজনং ব্যাধিজননাখ্যং তত্ কুর্বন্তি| যথা– জ্বরো রক্তপিত্তমিতি|১৯|–

Adhikarana rogajanakasya vyAdhervaicitryam (19-20) · Śloka 20

কশ্চিদ্ধি রোগো রোগস্য হেতুর্ভূত্বা প্রশাম্যতি ||১৯|| ন প্রশাম্যতি চাপ্যন্যো হেতুত্বং কুরুতেঽপি চ | এবং কৃচ্ছ্রতমা নৄণাং দৃশ্যন্তে ব্যাধিসঙ্করাঃ ||২০|| (চ. নি. অ. ৮) |

তস্যৈব রোগজনকস্য ব্যাধের্বৈচিত্র্যমাহ– কশ্চিদিত্যাদি| এবমুক্তপ্রকারেণ; ব্যাধিসঙ্করা ব্যাধিমেলকাঃ দৃশ্যন্তে| যথা– প্রতিশ্যাযো ন নিবর্ততে কাসশ্চ জাযতে, অর্শো ন নিবর্ততে জঠরগুল্মৌ স্যাতামিতি| কৃচ্ছ্রতমত্বং চৈষাং বহুবিধদুঃখজনকত্বাত্, প্রাযো বিরুদ্ধোপক্রমাচ্চেতি||১৯-২০||

Adhikarana nidAnapa~jcakasyAvashyaj~jAtavyatA (21) · Śloka 21

তস্মাদ্যত্নেন সদ্বৈদ্যৈরিচ্ছদ্ভিঃ সিদ্ধিমুদ্ধতাম্ | জ্ঞাতব্যো বক্ষ্যতে যোঽযং জ্বরাদীনাং বিনিশ্চযঃ ||২১||

উক্তনিদানপঞ্চকস্য রোগনিবৃত্তিলক্ষণসিদ্ধিহেতুত্বেনাবশ্যং জ্ঞাতব্যতামাহ– তস্মাদিত্যাদি| উদ্ধতাং বহুবিষযত্বেন মহতীম্| বিনিশ্চযো নিদানমিতি| অথ বক্ষ্যমাণবিকারেষু প্রকৃতিসমসমবাযবিকৃতিবিষমসমবাযাদিজ্ঞানার্থং চরকোক্তা বাতাদিগুণাঃ লিখ্যন্তে– “রূক্ষঃ শীতো লঘুঃ সূক্ষ্মশ্চলোঽথ বিশদঃ খরঃ| বিপরীতগুণৈর্দ্রব্যৈর্মারুতঃ সম্প্রশাম্যতি|| সস্নেহমুষ্ণং তীক্ষ্ণং চ দ্রবমম্লং সরং কটু| বিপরীতগুণৈঃ পিত্তং দ্রব্যৈরাশু প্রশাম্যতি|| গুরুশীতমৃদুস্নিগ্ধমধুরস্থিরপিচ্ছিলাঃ| শ্লেষ্মণঃ প্রশমং যান্তি বিপরীতগুণৈর্গুণাঃ||” ইতি (চ. সূ. অ. ১)||২১||

Adhikarana puShpikA · Śloka 1

ইতি শ্রীমাধবকরবিরচিতে মাধবনিদানে পঞ্চনিদানলক্ষণং সমাপ্তম্ ||১||

ইতি শ্রীবিজযরক্ষিতকৃতাযাং মধুকোশব্যাখ্যাযাং পঞ্চনিদানলক্ষণং সমাপ্তম্||১||