10. rājayakṣmakṣatakṣīṇanidānam

Adhikarana rAjayakShmanidAnam (1) · Śloka 1

অথ রাজযক্ষ্মক্ষতক্ষীণনিদানম্ | বেগরোধাত্ ক্ষযাচ্চৈব সাহসাদ্বিষমাশনাত্ | ত্রিদোষো জাযতে যক্ষ্মা গদো হেতুচতুষ্টযাত্ ||১||

রাজযক্ষ্মরূপেষু পিত্তাদ্রক্তস্য চাগম ইতি বচনাদ্রক্তপিত্তানন্তরং যক্ষ্মনিদানম্| চিকিত্সোপযোগিবিপ্রকৃষ্টং কারণং চতুর্বিধমাহ– বেগরোধাদিত্যাদি| বেগোঽত্র বাতমূত্রপুরীষাণাং, ন তু ন বেগান্ধারণীযোক্তানাং জৃম্ভাদীনাং সর্বেষাম্| যদুক্তং চরকে– “হ্রীমত্ত্বাদ্বা ঘৃণিত্বাদ্বা ভযাদ্বা বেগমাগতম্| বাতমূত্রপুরীষাণাং নিগৃহ্ণাতি যদা নরঃ||” (চ. চি. অ. ৮) ইত্যাদি| ক্ষযাদিতি ক্ষীযতে অনেনেতি ক্ষযঃ, তেনাতিব্যবাযানশনের্ষ্যাবিষাদাদযো ধাতুক্ষযহেতবো গৃহ্যন্তে| সাহসাদিতি সাহসং বলবদ্বিগ্রহাদিরুরঃক্ষতহেতুত্বেন কারণম্| বিষমাশনাদি সুশ্রুতোক্তদ্বাদশাশনপ্রবিচারব্যতিরেকেণোপযোগঃ, তস্য শীঘ্রং স্রোতোরোধকত্বাত্| উক্তং হি চরকে– “বিবিধান্যন্নপানানি বৈষম্যেণ সমশ্নতাম্| জনযন্ত্যামযান্ ঘোরান্ বিষমা মারুতাদযঃ|| রুদ্ধ্বা স্রোতাংসি ধাতূনাং বৈষম্যাদ্বিষমং গতাঃ| দোষা রোগায কল্পন্তে পুষ্যন্তি নচ ধাতবঃ||” (চ. চি. অ. ৮) ইতি| ত্রিদোষ ইতি মিলিতত্রিদোষজ এক এব, নতু কারণভেদাদনেকঃ| যদাহ সুশ্রুতঃ– “এক এব মতঃ শোষঃ সন্নিপাতাত্মকো যতঃ| উদ্রেকাত্তত্র লিঙ্গানি দোষাণাং নিপতন্তি হি||” (সু. উ. তং. অ. ৪১) ইতি| ননু, বেগরোধাদযো বাতং প্রকোপযন্তি, তজ্জনিতো যক্ষ্মা কথং ত্রিদোষজ ইতি চেত্? উচ্যতে– বাতপ্রকোপাদেবাগ্নিদুষ্ট্যা কফপিত্তযোরপি প্রকোপ ইত্যাহুঃ| হেতুচতুষ্টযাদিত্যনেনাসঙ্খ্যেযা অপি হেতব উক্তচতুষ্টযেঽন্তর্ভবন্তীতি দর্শযতি| শোষাদিনানাশব্দবাচ্যত্বেন চাস্য সুশ্রুতেঽন্বযমকার্ষীত্| যথা– “সংশোষণাদ্রসাদীনাং শোষ ইত্যভিধীযতে| ক্রিযাক্ষযকরত্বাচ্চ ক্ষয ইত্যুচ্যতে বুধৈঃ|| রাজ্ঞশ্চন্দ্রমসো যস্মাদভূদেষ কিলামযঃ| তস্মাত্তং রাজযক্ষ্মেতি কেচিদাহুর্মনীষিণঃ||” (সু. উ. তং. অ. ৪১) ইতি| বাগ্ভটে তু– “যক্ষ্মণাং রাজা রাজযক্ষ্মা” ইত্যুক্তম্ | “রাজদন্তাদিষু পরম্” ইতি উপসর্জনস্য যক্ষ্মশব্দস্য পরনিপাতঃ||১||

Adhikarana rAjayakShmasamprAptiH (2) · Śloka 2

কফপ্রধানৈর্দোষৈস্তু রুদ্ধেষু রসবর্ত্মসু | অতিব্যবাযিনো বাঽপি ক্ষীণে রেতস্যনন্তরাঃ | ক্ষীযন্তে ধাতবঃ সর্বে ততঃ শুষ্যতি মানবঃ ||২||

ন কেবলং ধাতুক্ষযমাত্রাদেব যক্ষ্মা ভবতি, অপি তু , রসাদিবহস্রোতোনিরোধাদিভিরপীতি দর্শযিতুং বিশিষ্টাং সম্প্রাপ্তিমাহ– কফেত্যাদি| যদা ত্বেবং ন স্যাত্, তদা ধাতুক্ষয এব রোগো ন তু যক্ষ্মা| কফঃ প্রধানং যেষামনিলাদীনাং দোষাণাং তে তথা| ননু, দোষৈরিত্যনেন দোষত্রযমুচ্যতে, কফস্য বিশেষণত্বেনোপাত্তত্বাত্, কথং তস্যৈবান্যপদার্থবাচ্যতা? উচ্যতে– স্বাবযবেন বিগ্রহঃ, সমুদাযঃ সমাসার্থঃ; যথা– বহুবৃক্ষং বনমিতি; সমাধানবিস্তরস্তু সুশ্রুতে জেজ্জটে দ্রষ্টব্যঃ| কফপ্রধানতা চ বেগরোধাদিকুপিতবাতবিপ্লুতাগ্নিমান্দ্যাদিনা বোদ্ধব্যা| রসবর্ত্মসু রসবহধমনীষু, অত্রাদিশব্দো লুপ্তনির্দিষ্টো দ্রষ্টব্যঃ| তেন রক্তাদিবহস্রোতোরোধোঽপি বোধ্যঃ| অথবা রসকারণতযা রক্তাদীনাং রসদুষ্ট্যৈব রক্তাদিদুষ্টিরিতি কার্তিকঃ| ইদমত্র সূচিতম্– যন্মার্গরোধাত্ হৃদযস্থো রসস্তত্রৈবাবস্থিতো বিকৃতো মুখেন নিঃসরতি| যদাহ চরকঃ– “রসঃ স্রোতঃসু রুদ্ধেষু স্বস্থানস্থো বিদহ্যতে| স ঊর্ধ্বং কাসবেগেন বহুরূপঃ প্রবর্ততে||” (চ. চি. অ. ৮) ইতি| এতেনানুলোমক্ষযো দর্শিতঃ, কারণভূতরসধাতুক্ষযে সতি রক্তাদীনাং রসকার্যাণাং পোষকাভাবেন ক্ষীযমাণত্বাত্| প্রতিলোমক্ষযং দর্শযিতুমাহ– অতিব্যবাযিনো বেত্যাদি| রেতসি ক্ষীণে সত্যনন্তরাঃ সমীপগা ধাতবঃ ক্ষীযন্তে, তদ্যথা– শুক্রে ক্ষীণে মজ্জা ক্ষীযতে, মজ্জনি ক্ষীণেঽস্থি, এবং পূর্বঃ পূর্বঃ ধাতুঃ| ননু, কার্যভূতস্য শুক্রস্য ক্ষযাত্ কথং কারণভূতানাং ধাতূনাং ক্ষয ইতি চেত্? উচ্যতে– শুক্রক্ষযাদ্বাযুঃ প্রকুপ্যতি| যদুক্তম্– “বাযোর্ধাতুক্ষযাত্ কোপো মার্গস্যাবরণেন চ|” (চ. চি. অ. ২৮) ইতি| স বাযুঃ সান্নিধ্যান্মজ্জানং শোষযতি, এবং পূর্বপূর্বধাতূন্| দৃষ্টং চ প্রত্যাসত্ত্যাঽপি কার্যজননং; যথা– অগ্নিসন্তপ্তাযোগোলকসন্নিধানাদার্দ্রভূভাগস্যাপি শোষঃ| তথাচ রসসঞ্চারপক্ষে সুশ্রুতবচনম্– “পূর্বঃ পূর্বোঽতিবৃদ্ধত্বাদ্বর্ধযেদ্ধি পরম্পরম্| তস্মাদতিপ্রবৃদ্ধানাং ধাতূনাং হ্রাসনং হিতম্||” (সু. সূ. অ. ১৫) ইতি||২||

Adhikarana rAjayakShmapUrvarUpam (3-4) · Śloka 4

শ্বাসাঙ্গমর্দকফসংস্রবতালুশোষবম্যগ্নিসাদমদপীনসকাসনিদ্রাঃ | শোষে ভবিষ্যতি ভবন্তি স চাপি জন্তুঃ শুক্লেক্ষণো ভবতি মাংসপরো রিরংসুঃ ||৩|| (সু. উ. তং. অ. ৪১) | স্বপ্নেষু কাকশুকশল্লকিনীলকণ্ঠা গৃধ্রাস্তথৈব কপযঃ কৃকলাসকাশ্চ | তং বাহযন্তি স নদীর্বিজলাশ্চ পশ্যেচ্ছুষ্কাংস্তরূন্ পবনধূমদবার্দিতাংশ্চ ||৪|| (সু. উ. তং. অ. ৪১) |

পূর্বরূপমাহ– শ্বাসেত্যাদি| সংস্রবঃ ষ্ঠীবনম্| পীনসঃ প্রতিশ্যাযঃ| মাংসপরো মাংসভোজনেচ্ছুঃ| রিরংসুঃ স্ত্রিযং রন্তুমিচ্ছুঃ; এতচ্চ ব্যাধিমহিম্না মনোদোষাত্| তথা স্বপ্নেষু কাকাদিবাহনং চ পূর্বরূপমেব| শল্লকী ‘ শরারু’ ইতি খ্যাতা, নীলকণ্ঠো মযূরঃ| বিজলা নির্জলাঃ| দবো বনাগ্নিঃ| অর্দিতান্ অভিভূতান্| চকারাত্তৃণকেশনিপাতাদযো দ্রষ্টব্যাঃ| যদুক্তং চরকে– “পূর্বরূপং প্রতিশ্যাযো দৌর্বল্যং দোষদর্শনম্| অদোষেষ্বপি ভাবেষু কাযে বীভত্সদর্শনম্|| ঘৃণিত্বমশ্নতশ্চাপি বলমাংসপরিক্ষযঃ| স্ত্রীমদ্যমাংসপ্রিযতা প্রিযতা চাবগুণ্ঠনে|| মক্ষিকাঘুণকেশানাং তৃণানাং পতনানি চ| প্রাযোঽন্নপানে, কেশানাং নখানাং চাতিবর্ধনম্|| পতত্ত্রিভিঃ পতঙ্গৈশ্চ শ্বাপদৈশ্চাভিধর্ষণম্|| ” (চ. চি. অ. ৮) ইতি| তত্র শ্বাপদা ব্যাঘ্রাদযঃ||৩-৪||

Adhikarana trirUparAjayakShmaNo lakShaNam (5) · Śloka 5

অংসপার্শ্বাভিতাপশ্চ সন্তাপঃ করপাদযোঃ | জ্বরঃ সর্বাঙ্গগশ্চেতি লক্ষণং রাজযক্ষ্মণঃ ||৫|| (চ. চি. অ. ৮) |

ত্রিরূপসম্পন্নমাহ– অংসেত্যাদি| অংসপার্শ্বযোরভিতাপঃ পীডা, অংসো ভুজস্যোপরিভাগঃ, অভিতাপত্বেনৈকং রূপম্, এবং সন্তাপেঽপি বাচ্যম্| করপাদযোরিত্যত্র প্রাণ্যঙ্গত্বাদেকবদ্ভাবং মন্যমানাঃ কাশ্মীরাঃ– ‘তাপঃ পাদকরস্য চ’ ইতি পঠন্তি, ‘করপাদিকঃ’ ইতি চ পাঠান্তরম্| এতত্ত্রযং প্রাযোভাবিত্বেন চরকেণোক্তং, তেনৈকাদশরূপেষু মধ্যেঽন্যদপি ত্রযং বোধ্যম্| তথাচ ভোজঃ– “কাসো জ্বরো রক্তপিত্তং ত্রিরূপে রাজযক্ষ্মণি|” ইতি| অন্যে ত্বাহুঃ– রাজযক্ষ্মণি যো জ্বরস্তস্যৈতল্লক্ষণমিতি; জেজ্জটস্তু ত্রিরূপসম্পত্তিমেব ব্যাখ্যাতবান্||৫||

Adhikarana rAjayakShmaNaH ShaDrUpANi (6) · Śloka 6

( ভক্তদ্বেষো জ্বরঃ শ্বাসঃ কাসঃ শোণিতদর্শনম্ | স্বরভেদশ্চ জাযেত ষড্রূপং রাজযক্ষ্মণি) |৬|

ইদানীং তস্যৈব ষড্রূপাণি দর্শযিতুমাহ– ভক্তেত্যাদি|৬|

Adhikarana ulbaNadoShabhedena yakShmaNa ekAdasha rUpANi (6-7) · Śloka 7

স্বরভেদোঽনিলাচ্ছূলং সঙ্কোচশ্চাংসপার্শ্বযোঃ | জ্বরো দাহোঽতিসারশ্চ পিত্তাদ্রক্তস্য চাগমঃ ||৬|| (সু. উ. তং. অ. ৪১) | শিরসঃ পরিপূর্ণত্বমভক্তচ্ছন্দ এব চ | কাসঃ কণ্ঠস্য চোদ্ধ্বংসো বিজ্ঞেযঃ কফকোপতঃ ||৭|| (সু. উ. তং. অ. ৪১) |

রাজযক্ষ্মণস্ত্রৈদোষিকস্যৈকাদশরূপাণি বিভজ্য ব্যাধিপ্রভাবাজ্জাযন্তে, নতু সন্নিপাতজ্বরলিঙ্গবত্ সর্বদোষৈঃ সর্বাণীত্যাহ– স্বরভেদোঽনিলাদিত্যাদি| শূলমংসপার্শ্বযোরেব, অংসপার্শ্বযোঃ সঙ্কোচ এক এব গণনীযঃ| অভক্তচ্ছন্দো ভক্তারুচিঃ| কণ্ঠস্যোদ্ধ্বংসঃ কণ্ঠভেদঃ; ‘উত্কাসিকা’ ইতি কার্তিকঃ||৬-৭||

Adhikarana yakShmiNo~asAdhyalakShaNam (8-12) · Śloka 12

একাদশভিরেভির্বা ষড্ভির্বাঽপি সমন্বিতম্ | কাসাতীসারপার্শ্বার্তিস্বরভেদারুচিজ্বরৈঃ ||৮|| ত্রিভির্বা পীডিতং লিঙ্গৈঃ কাসশ্বাসাসৃগামযৈঃ | জহ্যাচ্ছোষার্দিতং জন্তুমিচ্ছন্ সুবিমলং যশঃ ||৯|| (সু. উ. তং. অ. ৪১) | সর্বৈরর্ধৈস্ত্রিভির্বাঽপি লিঙ্গৈর্মাংসবলক্ষযে | যুক্তো বর্জ্যশ্চিকিত্স্যস্তু সর্বরূপোঽপ্যতোঽন্যথা ||১০|| মহাশনং ক্ষীযমাণমতীসারনিপীডিতম্ | শূনমুষ্কোদরং চৈব যক্ষ্মিণং পরিবর্জযেত্ ||১১|| শুক্লাক্ষমন্নদ্বেষ্টারমূর্ধ্বশ্বাসনিপীডিতম্ | কৃচ্ছ্রেণ বহুমেহন্তং যক্ষ্মা হন্তীহ মানবম্ ||১২||

অসাধ্যলক্ষণমাহ– একাদশভিরিত্যাদি| একাদশভিরেভিরিতি স্বরভেদাদিভিঃ কণ্ঠোদ্ধ্বংসান্তৈঃ| ষড্ভিরিতি সুশ্রুতেন ষড্রূপাণি পঠিতানি “ভক্তদ্বেষো জ্বরঃ শ্বাসঃ কাসঃ শোণিতদর্শনম্| স্বরভেদশ্চ জাযেত ষড্রূপং রাজযক্ষ্মণি||” (সু. উ. তং. অ. ৪১) ইতি| “কাসাতিসারপার্শ্বার্তিস্বরভেদারুচিজ্বরৈঃ” ইতি তু কস্যচিত্তন্ত্রস্য ষড্রূপাণি মাধবকরেণ লিখিতানীতি| এতানি চৈকাদশ রূপাণি প্রাযোভাবিত্বাদুক্তানি, অন্যতমরূপপরিহারাত্; রূপান্তরযোগেঽপ্যেকাদশত্বং ষট্ত্বং চ স্যাদেব, তথাহি চরকো নিদানে একাদশরূপাণি পঠিত্বা চিকিত্সিতেঽপি বেগরোধাদিকারণচতুষ্টযজে প্রতিকারণং চতুর্ধা একাদশরূপাণি পঠিতবান্| যথা– “কাসোংঽসতাপো বৈস্বর্যং জ্বরঃ পার্শ্বশিরোরুজা| ছর্দনং রক্তকফযোঃ শ্বাসো বর্চোগ্রহোঽরুচিঃ|| রূপাণ্যেকাদশৈতানি, যক্ষ্মণি ষডিমানি চ| কাসো জ্বরঃ পার্শ্বশূলং স্বরবর্চোগ্রহোঽরুচিঃ||” (চ. চি. অ. ৮) ইতি| একাদশবচনেনৈবং বোধযতি– সম্পূর্ণে যক্ষ্মণ্যেকাদশৈব রূপাণি ভবন্তীতি| জহ্যাদিতি ‘ বলমাংসক্ষতে সতি’ ইতি শেষঃ| তথাচ চরকঃ– “বাতব্যাধিরপস্মারী কুষ্ঠী ব্রধ্নী চিরজ্বরী| গুল্মী চ মধুমেহী চ রাজযক্ষ্মী চ যো নরঃ|| অচিকিত্স্যা ভবন্ত্যেতে বলমাংসপরিক্ষযাত্| স্বল্পেষ্বপি বিকারেষু ভিষগেতান্ বিবর্জযেত্||” (চ. ই. অ. ৯) ইতি| সর্বৈরিত্যাদি| ননু, সর্বরূপাণ্যেকাদশ, একাদশানামর্ধং সার্ধপঞ্চ ভবন্তি, তত্র কতমস্য রূপস্যার্ধত্বং কিম্ভূতং বা ভবতি? উচ্যতে– একস্য রুপস্যার্ধত্বাসম্ভবে ষট্পঞ্চরূপযোরুত্কৃষ্টত্বাত্ ষড্রূপ এবার্ধো গ্রাহ্যাঃ| লিঙ্গৈর্যুক্ত ইতি সম্বন্ধঃ| অতোঽন্যথেতি বলমাংসক্ষযাভাবে সতি| মহাশনং ক্ষীযমাণমিত্যেকমসাধ্যলক্ষণম্, অরিষ্টরূপত্বাত্; অতীসারপীডিতমিতি দ্বিতীযং, যক্ষ্মিণো মলাযত্তজীবিতস্যোক্তত্বাত্; শূনমুষ্কোদরমিতি তৃতীযং, মুষ্কশোথস্য বিরেকসাধ্যত্বেন বিরুদ্ধোপক্রমত্বাত্| শুক্লেত্যাদি| শুক্লাক্ষত্বাদযঃ একৈকশোঽসাধ্যলক্ষণানি||৮-১২||

Adhikarana yakShmiNaH sAdhyalakShaNam (13) · Śloka 13

জ্বরানুবন্ধরহিতং বলবন্তং ক্রিযাসহম্ | উপক্রমেদাত্মবন্তং দীপ্তাগ্নিমকৃশং নরম্ ||১৩|| (সু. উ. তং. অ. ৪১) |

চিকিত্স্যত্বমাহ– জ্বরেত্যাদি| উপক্রমেত্ চিকিত্সেত্| অকৃশমিত্যনেন বযঃস্থোঽপি প্রত্যাখ্যাযোপক্রম্যত ইতি সূচ্যতে| যদুক্তমন্যত্র– “পরং দিনসহস্রং তু যদি জীবতি মানবঃ| সুভিষগ্ভিরুপক্রান্তস্তরুণঃ শোষপীডিতঃ||” ইতি||১৩||

Adhikarana shoShabhedAH (14) · Śloka 14

ব্যবাযশোকবার্ধক্যব্যাযামাধ্বপ্রশোষিতান্ | ব্রণোরঃক্ষতসঞ্জ্ঞৌ চ শোষিণৌ লক্ষণৈঃ শৃণু ||১৪|| (সু. উ. তং. অ. ৪১) |

ব্যবাযাদিজনিতধাতুশোষণমাত্রেণ রাজযক্ষ্মত্বং নিরস্যন্নাহ– ব্যবাযেত্যাদি| যদুক্তং সুশ্রুতে– “কেষাঞ্চিদেবং শোষো হি কারণৈর্ভেদমাগতঃ| ন তত্র দোষলিঙ্গানাং সমস্তানাং নিপাতনম্|| ক্ষযা এব হি তে জ্ঞেযাঃ প্রত্যেকং ধাতুসঙ্ক্ষযাত্|” (সু. উ. তং. অ. ৪১) ইতি| বৃদ্ধস্য ভাবো বার্ধক্যমিতি স্বার্থে ক্য(ষ্য)ঞ্” ইতি কার্তিকঃ||১৪||

Adhikarana vyavAyashoShiNo lakShaNam (15) · Śloka 15

ব্যবাযশোষী শুক্রস্য ক্ষযলিঙ্গৈরুপদ্রুতঃ | পাণ্ডুদেহো যথাপূর্বং ক্ষীযন্তে চাস্য ধাতবঃ ||১৫|| (সু. উ. তং. অ. ৪১) |

ব্যবাযশোষিণো লক্ষণমাহ– ব্যবাযেত্যাদি| শুক্রস্য ক্ষযলিঙ্গৈরিতি সুশ্রুতোক্তৈঃ| তদ্যথা– “শুক্রক্ষযে মেঢ্রবৃষণবেদনা, অশক্তির্মৈথুনে, চিরাদ্বা প্রসেকঃ, প্রসেকে চাল্পরক্তশুক্রদর্শনম্|” (সু. সূ. অ. ১৫) ইতি||১৫||

Adhikarana shokashoShiNo lakShaNam (16) · Śloka 16

প্রধ্যানশীলঃ স্রস্তাঙ্গঃ শোকশোষ্যপি তাদৃশঃ |১৬| (সু. উ. তং. অ. ৪১) |

শোকশোষিণো লক্ষণমাহ– প্রধ্যানেত্যাদিনা| শোকশোষ্যপি তাদৃশ ইতি শুক্রস্য ক্ষযলক্ষণব্যতিরিক্তেন শুক্রশোষলিঙ্গেন যুক্তঃ; যদুক্তং সুশ্রুতে– “বিনা শুক্রক্ষযকৃতৈর্বিকারৈরুপলক্ষিতঃ|” (সু. উ. তং. অ. ৪১) ইতি|১৬|–

Adhikarana vArdhakyashoShiNo lakShaNam (16-17) · Śloka 17

জরাশোষী কৃশো মন্দবীর্যবুদ্ধিবলেন্দ্রিযঃ ||১৬|| কম্পনোঽরুচিমান্ ভিন্নকাংস্যপাত্রহতস্বরঃ | ষ্ঠীবতি শ্লেষ্মণা হীনং গৌরবারতিপীডিতঃ ||১৭|| সম্প্রস্রুতাস্যনাসাক্ষিঃ শুষ্করূক্ষমলচ্ছবিঃ | (সু. উ. তং. অ. ৪১) |

বার্ধক্যশোষিণো লক্ষণমাহ– জরেত্যাদি| কম্পনঃ কম্পযুক্তঃ| ভিন্নস্য স্ফুটিতস্য কাংস্যপাত্রস্য হতস্য দণ্ডাদিনেব স্বরো যস্য স তথা| ষ্ঠীবতি শ্লেষ্মণা হীনমিতি শ্লেষ্মহরণায যত্নে কৃতেঽপি ন শ্লেষ্মনিঃসরণম্ | শুষ্করূক্ষমলচ্ছবিরিতি শুষ্করূক্ষে যথাক্রমং মলচ্ছবী যস্য স তথা||১৬-১৭||–

Adhikarana adhvashoShiNo lakShaNam (18) · Śloka 18

অধ্বশোষী চ স্রস্তাঙ্গঃ সম্ভৃষ্টপরুষচ্ছবিঃ ||১৮|| প্রসুপ্তগাত্রাবযবঃ শুষ্কক্লোমগলাননঃ | (সু. উ. তং. অ. ৪১) |

অধ্বশোষিণো লক্ষণমাহ– অধ্বেত্যাদি| সম্ভৃষ্টস্যেব ভর্জিতস্যেব পরুষা ছবিঃ বর্ণো যস্য স তথা| প্রসুপ্তঃ স্পর্শানভিজ্ঞঃ| ক্লোম পিপাসাস্থানং হৃদযে, ক্লোমস্থানে তাল্বিতি পাঠান্তরম্||১৮||–

Adhikarana vyAyAmashoShiNo lakShaNam (19) · Śloka 19

ব্যাযামশোষী ভূযিষ্ঠমেভিরেব সমন্বিতঃ | লিঙ্গৈরুরঃক্ষতকৃতৈঃ সংযুক্তশ্চ ক্ষতং বিনা ||১৯|| (সু. উ. তং. অ. ৪১) |

ব্যাযামশোষিণো লক্ষণমাহ– ব্যাযামেত্যাদি| এভিরিতি স্রস্তাঙ্গত্বাদিভিরধ্বশোষলক্ষণৈঃ, অধ্বনো ব্যাযামমাত্রসামান্যাত্| ভূযিষ্ঠম্ অত্যর্থম্, অধ্বশোষেঽল্পানি লক্ষণানি, ব্যাযামজে তু মহান্তীত্যর্থঃ| তথা ‘উরঃক্ষতকৃতৈর্লিঙ্গৈঃ সংযুক্তঃ ক্ষতবর্জিতৈঃ’ ইতি সুগমঃ পাঠঃ| গদাধরস্তু– “লিঙ্গৈরুরঃক্ষতকৃতঃ সংযুক্তশ্চ ক্ষতং বিনা|” ইতি পঠতি, ব্যাচষ্টে চ– উরঃক্ষতেন ব্যাযামভারাধ্যযনদ্রুতযানাদিহেতুনা যঃ কৃতঃ শোষঃ সোঽপ্যেভিরেবাধ্বশোষলিঙ্গৈর্ভূযিষ্ঠং সংযুক্তঃ, ক্ষতং ক্ষতকার্যং বিনা| ক্ষতকার্যং তু সুশ্রুতে যথা– “তস্যোরসি ক্ষতে রক্তং পূযঃ শ্লেষ্মা চ গচ্ছতি|” ইত্যারভ্য “ভিন্নবর্ণস্বরো নরঃ|” (সু. উ. তং. অ. ৪১) ইত্যন্তমেতান্যেব লক্ষণানি ক্ষতেঽধিকানি, উরঃক্ষতকারণব্যাযামভারাদিকৃতশোষস্য লক্ষণমেব ভূযিষ্ঠং যত্তদেবোরঃক্ষতকারণমাত্রত্বাদধ্বনোঽপীত্যর্থঃ| অথবা ক্ষতং বিনা ব্রণং বিনা, উরঃক্ষতনিমিত্তভারাধ্যযনাদিনাঽমাত্রেণ যঃ কৃতঃ শোষঃ সোঽপ্যেভিরেবাত্যর্থাধ্বশোষলিঙ্গৈঃ সমন্বিত ইতি প্রকৃতেন সম্বন্ধঃ; সব্রণস্য তু বক্ষ্যমাণমেব লক্ষণমিতি||১৯||

Adhikarana vraNashoShiNo lakShaNam (20) · Śloka 20

রক্তক্ষযাদ্বেদনাভিস্তথৈবাহারযন্ত্রণাত্ | ব্রণিতস্য ভবেচ্ছোষঃ স চাসাধ্যতমো মতঃ ||২০|| (সু. উ. তং. অ. ৪১) |

কারণত্রযেণ ব্রণশোষিণমাহ– রক্তক্ষযাদিত্যাদি| বেদনা ব্রণবেদনাঃ, তাভির্ভযশোকবন্মনঃক্ষোভাদ্বাতপ্রকোপাদেব শোষঃ| স চাসাধ্যতম ইতি স্বার্থিকস্তমপ্, যথা “যুধিষ্ঠিরঃ শ্রেষ্ঠতমঃ কুরূণাম্|” ইতি| অত্রেষ্ঠনৈবাতিশাযিকপ্রত্যযেন প্রশস্ততমত্বস্য প্রতিপাদিতত্বাত্; অথবা যাপ্যাপেক্ষযাঽসাধ্যতমশব্দেন প্রত্যাখ্যেয উচ্যতে, যাপ্যস্যাপ্যসাধ্যরূপত্বাত্| ননু, এবং সতি “কৃশানাং ব্রণশোষিণাম্| বৃংহণীযো বিধিঃ কার্যঃ” (সু. চি. অ. ১) ইতি সুশ্রুতেনৈবোক্তং চিকিত্সিতস্থানে বিরুধ্যতে? উচ্যতে– প্রবলশোষে প্রত্যাখ্যেযত্বং, নাতিপ্রবলে তু চিকিত্সাবিধানমিতি সমর্থনীযম্| চন্দ্রিকাকারস্তু ‘স চাসাধ্যতমঃ স্মৃতঃ’ ইত্যস্য স্থানে “যাপ্যাসাধ্যতমস্তু সঃ” ইতি পঠতি, চিকিত্সাযাং বৃংহণবিধেরভিধানাদিতি||২০||

Adhikarana sanidAnamuraHkShatalakShaNam (21-28) · Śloka 28

ধনুষাঽঽযস্যতোঽত্যর্থং ভারমুদ্বহতো গুরুম্ | যুধ্যমানস্য বলিভিঃ পততো বিষমোচ্চতঃ ||২১|| বৃষং হযং বা ধাবন্তং দম্যং বাঽন্যং নিগৃহ্ণতঃ | শিলাকাষ্ঠাশ্মনির্ঘাতান্ ক্ষিপতো নিঘ্নতঃ পরান্ ||২২|| অধীযানস্য বাঽত্যুচ্চৈর্দূরং বা ব্রজতো দ্রুতম্ | মহানদীর্বা তরতো হযৈর্বা সহ ধাবতঃ ||২৩|| সহসোত্পততো দূরং তূর্ণং বাঽপি প্রনৃত্যতঃ | তথাঽন্যৈঃ কর্মভিঃ ক্রূরৈর্ভৃশমভ্যাহতস্য বা ||২৪|| বিক্ষতে বক্ষসি ব্যাধির্বলবান্ সমুদীর্যতে | স্ত্রীষু চাতিপ্রসক্তস্য রূক্ষাল্পপ্রমিতাশিনঃ ||২৫|| উরো বিভজ্যতেঽত্যর্থং ভিদ্যতেঽথ বিরুজ্যতে | প্রপীড্যতে ততঃ পার্শ্বে শুষ্যত্যঙ্গং প্রবেপতে ||২৬|| ক্রমাদ্বীর্যং বলং বর্ণো রুচিরগ্নিশ্চ হীযতে | জ্বরো ব্যথা মনোদৈন্যং বিড্ভেদাগ্নিবধাবপি ||২৭|| দুষ্টঃ শ্যাবঃ সুদুর্গন্ধঃ পীতো বিগ্রথিতো বহুঃ | কাসমানস্য চাভীক্ষ্ণং কফঃ সাসৃক্ প্রবর্ততে ||২৮|| স ক্ষতী ক্ষীযতেঽত্যর্থং তথা শুক্রৌজসোঃ ক্ষযাত্ | (চ. চি. অ. ১৬) |

শোষনিদানেনৈব সাহসাদিনা উরঃক্ষতস্য সম্ভবাত্, উরঃক্ষতেনাপি শোষসম্ভবাত্, শোষাধিকারে সনিদানমুরঃক্ষতমাহ– ধনুষেত্যাদি| আযস্যত ইতি আযাসং কুর্বতো ‘নরস্য’ ইতি শেষঃ, ‘আযম্যতঃ’ ইতি পাঠান্তরে বিস্তীর্যমাণহৃদযস্য| দম্যং দমনার্হং বৃষাদিকমেব বলবন্তমিত্যর্থঃ| অন্যং বা গজোষ্ট্রাদিকং, নিগৃহ্ণতঃ বিধারযতঃ| শিলা দীর্ঘশিলা, অশ্মা তদিতরপ্রস্তরখণ্ডঃ, নির্ঘাতোঽস্ত্রবিশেষঃ, কিংবা নির্ঘাতঃ শিলাদীনাং প্রেরণবিশেষোঽতিবলসম্পাদিতঃ| নিঘ্নতঃ পরান্ শত্রূন্ তাডযতঃ| অধীযানস্য পঠতঃ| মহানদীস্তরত ইতি ‘বাহুভ্যাম্’ ইতি শেষঃ| তূর্ণং শীঘ্রম্| তথাঽন্যৈঃ কর্মভিঃ ক্রূরৈর্মল্লযুদ্ধাদিভিরভ্যাহতস্য, ক্রূরৈরিত্যত্র শূরৈরিতি শত্রুভিরিত্যন্যে| এষাং কারণানাং মধ্যে কিঞ্চিন্নিখিলদেহস্যাযাসকরং, কিঞ্চিদুরস এবেতি বোদ্ধব্যম্| ব্যাধিরিতি উরঃক্ষতলক্ষণঃ; অথবা ব্যাধির্বাযুঃ, ‘দোষা অপি ব্যাধিশব্দং লভন্ত’ ইত্যাগমাদিতি জেজ্জটঃ| উরো বিভজ্যতে ভজ্যত ইব, ভিদ্যতে বিদার্যতে বিভজ্যতে দ্বিধা ক্রিযত ইব; ‘বিদহ্যতে’ ইতি পাঠান্তরমসঙ্গতং, কারণাভাবাত্ টীকাকারৈরব্যাখ্যাতত্বাচ্চ| বীর্যং শক্তিঃ| বলং মাংসোপচযঃ| ‘বিড্ভেদোঽগ্নিবধাদপি’ ইতি পাঠান্তরে অগ্নিবধাদ্ধেতোর্বিড্ভেদো ভবতীত্যর্থঃ; অপিশব্দাত্ ব্যাধিমহিম্না বিনাঽপ্যগ্নিবধাদ্বিড্ভেদো ভবতীত্যাহুঃ| দুষ্টো ব্যাপন্নঃ; তদেব বিবৃণোতি– শ্যাব ইত্যাদি| বিগ্রথিতো বিশেষেণ গ্রন্থিলঃ, ‘বিবদ্ধ’ ইতি জেজ্জটঃ| স পুরুষঃ, ক্ষতী উরঃক্ষতবান্, ক্ষীযতে ধাতুশোষমাপ্নোতি| ন কেবলং ক্ষতাদেব ক্ষীযতে, কিং তর্হি স্ত্রীসেবাদিনা শুক্রৌজসোঃ ক্ষযাদপীত্যাহ– তথেত্যাদি||২১-২৮||

Adhikarana uraHkShatapUrvarUpam (29) · Śloka 29

অব্যক্তং লক্ষণং তস্য পূর্বরূপমিতি স্মৃতম্ ||২৯||

পূর্বরূপমাহ– অব্যক্তমিত্যাদি| তস্য ক্ষতস্য লক্ষণমব্যক্তমপ্রকটম্||২৯||

Adhikarana kShatakShINayorasAdhyalakShaNam (30) · Śloka 30

উরোরুক্ শোণিতচ্ছর্দিঃ কাসো বৈশেষিকঃ ক্ষতে | ক্ষীণে সরক্তমূত্রত্বং পার্শ্বপৃষ্ঠকটীগ্রহঃ ||৩০|| (চ. চি. অ. ১৬) |

ক্ষতক্ষীণযোরসাধারণলক্ষণমাহ– উরোরুগিত্যাদি| বৈশেষিকো বিশিষ্টঃ কাসঃ; স চ বিশেষ উক্তো দুষ্টশ্যাবাদিকফসংযুক্তত্বং; কিংবা বৈশেষিক উদ্ভূতঃ| ক্ষত ইতি ছেদঃ| ক্ষীণে ইতি ক্ষযে ইত্যর্থঃ| সরক্তমূত্রত্বম্ আলোহিতমূত্রতা||৩০||

Adhikarana kShatakShINayoH sAdhyAsAdhyavicAraH (31) · Śloka 31

অল্পলিঙ্গস্য দীপ্তাগ্নেঃ সাধ্যো বলবতো নবঃ | পরিসংবত্সরো যাপ্যঃ সর্বলিঙ্গং তু বর্জযেত্ ||৩১|| (চ. চি. অ. ১৬) |

তযোঃ সাধ্যলক্ষণমাহ– অল্পেত্যাদি||৩১||

Adhikarana puShpikA · Śloka 10

ইতি শ্রীমাধবকরবিরচিতে মাধবনিদানে রাজযক্ষ্মক্ষতক্ষীণনিদানং সমাপ্তম্ ||১০||

ইতি শ্রীবিজরক্ষিতকৃতাযাং মধুকোশব্যাখ্যাযাং রাজযক্ষ্মক্ষতক্ষীণনিদানং সমাপ্তম্||১০||