9. raktapittanidānam

Adhikarana raktapittasya nidAnapUrvikA samprAptiH (1-3) · Śloka 3

অথ রক্তপিত্তনিদানম্ | ঘর্মব্যাযামশোকাধ্বব্যবাযৈরতিসেবিতৈঃ | তীক্ষ্ণোষ্ণক্ষারলবণৈরম্লৈঃ কটুভিরেব চ ||১|| পিত্তং বিদগ্ধং স্বগুণৈর্বিদহত্যাশু শোণিতম্ | ততঃ প্রবর্ততে রক্তমূর্ধ্বং চাধো দ্বিধাঽপি বা ||২|| (সু. উ. তং. অ. ৪৫) | ঊর্ধ্বং নাসাক্ষিকর্ণাস্যৈর্মেঢ্রযোনিগুদৈরধঃ | কুপিতং রোমকূপৈশ্চ সমস্তৈস্তত্প্রবর্ততে ||৩|| (আমাশযাদ্ব্রজেদূর্ধ্বমধঃ পক্বাশযাদ্ব্রজেত্ | বিদগ্ধযোর্দ্বযোশ্চাপি দ্বিধা মার্গং প্রবর্ততে) |

পাণ্ডুরোগবদ্রক্তপিত্তস্যাপি পিত্তজন্যত্বাত্তদনন্তরং রক্তপিত্তনিদানমাহ– ঘর্মেত্যাদি| ঘর্ম আতপঃ| তীক্ষ্ণং তীক্ষ্ণবীর্যং মরিচাদি, উষ্ণোঽগ্নিতাপঃ, ক্ষারো যবক্ষারাদিঃ, ঘণ্টাপাটল্যাদিকৃতশ্চ; বিদগ্ধং কুপিতম্| স্বগুণৈরিতি ‘পিত্তং তীক্ষ্ণং দ্রবং পূতি’ ইত্যাদিভিঃ, বিদহতি কোপযতি স্বগুণৈরেব, “বিদাহশ্চাস্য রক্তস্য পিত্তবত্” (সু. সূ. অ. ২১) ইত্যুক্তেঃ| ততঃ প্রবর্ততে নিঃসরতি, পিত্তং রক্তং চ ধাতুরূপং; নতু কেবলং রক্তং, রক্তপিত্তমিতি ব্যপদেশানুপপত্তেঃ| অথ পিত্তেন দুষ্টং রক্তং রক্তপিত্তমিত্যুচ্যতে, তদা পিত্তরক্তমিতি ব্যপদেশঃ প্রসজ্যেত, এতেন রক্তং চ পিত্তং চেতি দ্বন্দ্বসমাসান্নিরুক্তিরুক্তা সুশ্রুতেন| ননু, চরকে ‘রাগপরিপ্রাপ্তং পিত্তং রক্তপিত্তম্’ ইত্যুক্তং, তেন রক্তং চ তত্ পিত্তং চেতি কর্মধারযসমাসেন নিরুক্তিরুক্তা| অত্র চ কারণত্রযমুক্তম্| যদাহ– “সংযোগাদ্দূষণাত্তত্তু সামান্যাদ্গন্ধবর্ণযোঃ| রক্তস্য পিত্তমাখ্যাতং রক্তপিত্তং মনীষিভিঃ||” (চ. চি. অ. ৪) ইতি, তত্কথং ন বিরোধঃ? নৈবম্, অত্রাপি রক্তপ্রবৃত্তেঃ, দুষ্টং হি রক্তং পিত্তে রাগমাদধত্তত্সংসর্গি রক্তং স্বযমপি প্রবর্ততে ইতি পূর্ব এবার্থঃ| তেন রক্তং চ পিত্তং চেতি রক্তপিত্তং, রক্ত চ তত্ পিত্তং চেত্যুভযথাঽপি নিরুক্তাবদোষঃ||১-৩||

Adhikarana raktapittapUrvarUpam (4) · Śloka 4

সদনং শীতকামিত্বং কণ্ঠধূমাযনং বমিঃ | লোহগন্ধিশ্চ নিঃশ্বাসো ভবত্যস্মিন্ ভবিষ্যতি ||৪|| (সু. উ. তং. অ. ৪৫) |

পূর্বরূপমাহ– সদনমিত্যাদি| কণ্ঠধূমাযনং কণ্ঠাদ্ধূমনির্গম ইব প্রতীতিঃ||৪||

Adhikarana shlaiShmikaraktapittalakShaNam (5) · Śloka 5

সান্দ্রং সপাণ্ডু সস্নেহং পিচ্ছিলং চ কফান্বিতম্ |৫| (চ. চি. অ. ৪) |

শ্লৈষ্মিকমাহ– সান্দ্রমিত্যাদি| সান্দ্রং ঘনং, সপাণ্ডু সস্নেহমিতি ঈষত্পাণ্ডুস্নেহম্|৫|

Adhikarana vAtikaraktapittalakShaNam (5) · Śloka 5

শ্যাবারুণং সফেনং চ তনু রূক্ষং চ বাতিকম্ ||৫|| (চ. চি. অ. ৪) |

বাতিকমাহ– শ্যাবেত্যাদি| তনু অঘনম্||৫||

Adhikarana paittikaraktapittalakShaNam (6) · Śloka 6

রক্তপিত্তং কষাযাভং কৃষ্ণং গোমূত্রসন্নিভম্ | মেচকাগারধূমাভমঞ্জনাভং চ পৈত্তিকম্ ||৬|| (চ. চি. অ. ৪) | সংসৃষ্টলিঙ্গং সংসর্গাত্ত্রিলিঙ্গং সান্নিপাতিকম্ | (চ. চি. অ. ৪) |

পৈত্তিকমাহ– রক্তেত্যাদি| কষাযাভং বটাদিক্বাথবর্ণম্| মেচকাগারধূমাভমিতি মেচকাগারধূমযোরিবাভা যস্য তত্তথা; মেচকাভম্, আগারধূমাভং চ; মসৃণীকৃতকৃষ্ণমণিবর্ণস্যেববর্ণো মেচক ইতি জেজ্জটাদযঃ প্রাহুঃ, চিক্কণকৃষ্ণ ইত্যর্থঃ| অঞ্জনাভং সৌবীরাঞ্জনবর্ণাভম্| ননু, সর্বমেব রক্তপিত্তং দুষ্টেন পিত্তেনারভ্যতে তত্ কথং পৈত্তিকং রক্তপিত্তমিতি? উচ্যতে– সত্যং, কিন্তু যদা স্বস্থানস্থং পিত্তং রক্তপিত্তারম্ভকং স্থানান্তরাবস্থিতেন পিত্তেন সঙ্গৃহ্যতে, কিংবা দোষান্তরাসংশ্লিষ্টং কেবলং পিত্তমারম্ভকং, তদা পৈত্তিকমিতি ব্যপদেশ ইতি| ননু, কেবলং পৈত্তিকং ন সম্ভবত্যেব, যদ্বক্ষ্যতি– “ঊর্ধ্বগং কফসংসৃষ্টমধোগং পবনানুগম্|” ইতি; ন চ তস্য নির্দিষ্টো মার্গঃ| উচ্যতে– যদা স্বকারণোদ্ভূতেন কফেন বাতেন বা স্বলক্ষণকারিণা সংসৃষ্টং ভবতি, তদা শ্লৈষ্মিকাদিব্যপদেশঃ, ন তু মার্গসম্বন্ধানুগতেন কফবাতসম্বন্ধেন| ঊর্ধ্বগং হি মার্গসম্বন্ধমহিম্নাঽবশ্যং কফেন, অধোগং চাবশ্যং বাতেন, অনুবধ্যতে| নচ তত্র কফবাতৌ স্বলক্ষণং কুরুতঃ, যথা শরদি জ্বরকরং পিত্তং কালমহিম্নাঽনুগতেন কফেনানুবধ্যতে তথাঽপি পৈত্তিক এবাসৌ প্রাকৃতো জ্বরঃ| যদুক্তম্– “কুর্যাত্ পিত্তং চ শরদি তস্য চানুবলঃ কফঃ|” (চ. চি. অ. ৩) ইতি| তেন যদা একদোষলিঙ্গযুক্তং ভবতি তদা একদোষানুগম্, এবং দ্বিদোষলিঙ্গং ত্রিদোষলিঙ্গং চ বোধ্যম্| তেনোর্ধ্বগমধোগং চৈকদ্বিত্রিলিঙ্গং ভবতি| এতেন পৈত্তিকস্য মার্গো ন দর্শিত ইতি যদুক্তং তন্নিরস্তমিতি||৬||

Adhikarana dvandvajasya tridoShajasya ca raktapittasya lakShaNam (7) · Śloka 7

ঊর্ধ্বগং কফসংসৃষ্টমধোগং পবনানুগম্ | দ্বিমার্গং কফবাতাভ্যামুভাভ্যামনুবর্ততে ||৭|| (চ. চি. অ. ৪) |

সংসর্গবিশেষেণ মার্গভেদমাহ– ঊর্ধ্বগমিত্যাদি||৭||

Adhikarana saMsargavisheSheNa mArgabhedAH (8) · Śloka 8

ঊর্ধ্বং সাধ্যমধো যাপ্যমসাধ্যং যুগপদ্গতম্ |৮| (সু. উ. তং. অ. ৪৫) |

মার্গভেদেন সাধ্যত্বাদিকমাহ– ঊর্ধ্বমিত্যাদি| ঊর্ধ্বং সাধ্যমিতি ঊর্ধ্বগস্য কফপিত্তসংশ্লিষ্টত্বেন কষাযতিক্তৌ রসৌ কফপিত্তহরৌ যোগ্যৌ, পিত্তহরণে প্রধানং বিরেচনং চ যোগ্যম্| অধোগে তু এক এব মধুরো বাতপিত্তপ্রশমনঃ, বমনং চ প্রতিমার্গত্বেন বেগমাত্রবিরোধি, ন তু পিত্তহরণম্| উভযমার্গং চ বিরুদ্ধোপক্রমত্বাদেবাসাধ্যম্| যদুক্তং চরকে– “সাধ্যং লোহিতপিত্তং তদ্যদূর্ধ্বং প্রতিপদ্যতে| বিরেচনস্য যোগ্যত্বাদ্বহুত্বাদ্ভেষজস্য চ|| বিরেচনং হি পিত্তস্য জযায পরমৌষধম্|” (চ. চি. অ. ২) ইত্যাদি|৮|–

Adhikarana mArgabhedena sAdhyatvAdikam (8-9) · Śloka 8

একমার্গং বলবতো নাতিবেগং নবোত্থিতম্ ||৮|| রক্তপিত্তং সুখে কালে সাধ্যং স্যান্নিরুপদ্রবম্ | (চ. চি. অ. ৪) |

সাধ্যত্বে হেতুমাহ– একমার্গমিত্যাদি| একমার্গমত্রোর্ধ্বগমভিপ্রেতম্, অধোগস্য যাপ্যত্বাত্| নবোত্থিতম্ অচিরজম্| সুখে কালে হেমন্তশিশিরযোঃ| নিরুপদ্রবং বক্ষ্যমাণদৌর্বল্যাদ্যুপদ্রবরহিতম্||৮-৯||–

Adhikarana raktapittasya sAdhyAsAdhyalakShaNam (9-10) · Śloka 10

একদোষানুগং সাধ্যং দ্বিদোষং যাপ্যমুচ্যতে ||৯|| যত্ত্রিদোষমসাধ্যং স্যান্মন্দাগ্নেরতিবেগবত্ | ব্যাধিভিঃ ক্ষীণদেহস্য বৃদ্ধস্যানশ্নতশ্চ যত্ ||১০|| (চ. চি. অ. ৪) |

দোষভেদেন সাধ্যত্বাদিকমাহ– একদোষানুগমিত্যাদি| মার্গভেদদোষভেদাভ্যাং সাধ্যত্বাসাধ্যত্ববিরোধে অর্শঃস্বভিহিতদোষভেদবলিভেদাভ্যাং সাধ্যত্বাসাধ্যত্ববদ্ব্যাখ্যেযম্| মন্দাগ্নেস্তথা ব্যাধিভিঃ ক্ষীণদেহস্য যদতিবেগবত্তদসাধ্যম্| অনশ্নতঃ অরুচ্যাদিনা, অন্নাভাবাদ্বা||৯-১০||

Adhikarana raktapittasyopadravAH (11) · Śloka 11

দৌর্বল্যশ্বাসকাসজ্বরবমথুমদাঃ পাণ্ডুতাদাহমূর্ছা, ভুক্তে ঘোরো বিদাহস্ত্বধৃতিরপি সদা হৃদ্যতুল্যা চ পীডা | তৃষ্ণা কোষ্ঠস্য ভেদঃ শিরসি চ তপনং পূতিনিষ্ঠীবনত্বং, ভক্তদ্বেষাবিপাকৌ বিকৃতিরপি ভবেদ্রক্তপিত্তোপসর্গাঃ ||১১|| (সু. উ. তং. অ. ৪৫) |

উপদ্রবানাহ– দৌর্বল্যেত্যাদি| দৌর্বল্যং ‘শক্ত্যুপচযযোরভাব’ ইতি গযদাসঃ| ভক্তে ঘোরো বিদাহ ইতি ‘ষষ্ঠ্যর্থে সপ্তমী’ ইতি কার্তিকঃ| হৃদ্যতুল্যেতি হৃদি অতুল্যা অসদৃশী পীডা| কোষ্ঠস্য ভেদঃ কোষ্ঠমলস্যভেদঃ| তপনং তাপঃ| ‘প্রবিততশিরস’ ইতি পাঠান্তরে প্রবিততং বিস্তীর্যমাণমিব; ‘প্রবিততা বিস্তীর্ণা বেদনা শিরসি যস্য স তথা’ ইতি কার্তিকঃ| ‘ প্রবিততসিরতা’ ইতি পাঠান্তরে সিরাব্যাপ্তগাত্রতা| অবিপাক আহারস্য| বিকৃতিরপি ভবেদ্রক্তপিত্তোপসর্গা ইতি এতে রক্তপিত্তস্য উপসর্গা উপদ্রবাঃ; তথা তস্য বিকৃতিরপি ভবেদিতি যোজ্যম্| সা চ বক্ষ্যমাণামাংসপ্রক্ষালনাভমিত্যাদিরূপা| ‘রক্তপিত্তোপসর্গাত্’ ইতি পাঠান্তরং সুগমম্||১১||

Adhikarana raktapittasyAsAdhyalakShaNam (12-14) · Śloka 14

মাংসপ্রক্ষালনাভং কুথিতমিব চ যত্ কর্দমাম্ভোনিভং বা, মেদঃপূযাস্রকল্পং যকৃদিব যদি বা পক্বজম্বূফলাভম্ | যত্ কৃষ্ণং যচ্চ নীলং ভৃশমতিকুণপং যত্র চোক্তা বিকারা স্তদ্বর্জ্যং রক্তপিত্তং সুরপতিধনুষা যচ্চ তুল্যং বিভাতি ||১২|| (সু. উ. তং. অ. ৪৫) | যেন চোপহতো রক্তং রক্তপিত্তেন মানবঃ | পশ্যেদ্দৃশ্যং বিযচ্চাপি তচ্চাসাধ্যমসংশযম্ ||১৩|| (চ. নি. অ. ২) | লোহিতং ছর্দযেদ্যস্তু বহুশো লোহিতেক্ষণঃ | লোহিতোদ্গারদর্শী চ ম্রিযতে রক্তপৈত্তিকঃ ||১৪|| (সু. সূ. অ. ৩৩) |

অসাধ্যলক্ষণমাহ– মাংসেত্যাদি| কুথিতমিব পূতিতাং গতমিব| কর্দমম্ আবিলমিবাম্ভঃ কর্দমাম্ভঃ, অথবা কর্দমনিভমম্ভোনিভং চ| তথা মেদঃপূযাস্রকল্পমিতি কল্পশব্দো মেদঃপ্রভৃতিভিস্ত্রিভিঃ সম্বধ্যতে ইতি গযদাসঃ| যকৃদিব যকৃত্খণ্ডমিব| পক্বজম্বূফলাভং স্নিগ্ধকৃষ্ণম্| কৃষ্ণম্ অঞ্জনাভম্| নীলং চাষপক্ষপ্রতিমম্| ননু, পৈত্তিকে কৃষ্ণত্বং পঠিতং ন চ তদসাধ্যং? নৈবম্, অতিশব্দেনাত্র বিশেষিতত্বাত্, তেন তত্র মনাক্কৃষ্ণত্বং বোধ্যম্ ইতি জেজ্জটঃ; অথবা জম্বূফলাভং যত্ কৃষ্ণং তদিতি যোজ্যম্| উক্তা বিকারাঃ শ্বাসকাসাদযঃ| সুরপতিধনুষা তুল্যং নানাবর্ণম্| যেনেত্যাদি| যেন রক্তপিত্তেনেতি যোজ্যম্| পশ্যেদ্দৃশ্যং বিযচ্চাপি অদৃশ্যমপি বিযদ্দৃশ্যমিতি পশ্যতীতি যোজ্যং, রক্তপিত্তোপহতনেত্রত্বাদিতি; অথবা দৃশ্যং ঘটপটাদি, বিযচ্চ রক্তং পশ্যতীতি| অপরমসাধ্যলক্ষণমাহ– লোহিতমিত্যাদি| যো বহুশশ্ছর্দযেদিতি সম্বন্ধঃ| লোহিতোদ্গারদর্শীতি লোহিতোদ্গারো লোহিতদর্শীং চ, উদ্গারোঽপি লোহিতঃ প্রবর্ততে ইত্যর্থঃ; অথবা লোহিতমুদ্গারং পশ্যতীতি লোহিতোদ্গারদর্শীতি||১২-১৪||

Adhikarana puShpikA · Śloka 9

ইতি শ্রীমাধবকরবিরচিতে মাধবনিদানে রক্তপিত্তনিদানং সমাপ্তম্ ||৯||

ইতি শ্রীবিজযরক্ষিতকৃতাযাং মধুকোশব্যাখ্যাযাং রক্তপিত্তনিদানং সমাপ্তম্||৯||