20. unmādanidānam

Adhikarana unmAdaniruktiH (1) · Śloka 1

অথোন্মাদনিদানম্ | মদযন্ত্যুদ্গতা দোষা যস্মাদুন্মার্গমাগতাঃ | মানসোঽযমতো ব্যাধিরুন্মাদ ইতি কীর্তিতঃ ||১|| (সু. উ. তং. অ. ৬২) |

মদাত্যযে ‘উন্মাদমিব চাপরম্’ ইত্যনেন উন্মাদসঙ্কীর্তনমুন্মাদসাদৃশ্যং চোক্তং, তথা মদাত্যযেঽপি দাহো ভবতীতি স্বল্পবক্তব্যতযা দাহমভিধাযোন্মাদারম্ভঃ, তস্য নিরুক্তিমাহ– মদযন্তীত্যাদি| মদযন্তি মনোবিভ্রমং কুর্বন্তি, উন্মার্গমাগতা বিমার্গমাগতা মনোবহাধমনীরনুপ্রাপ্তাঃ| উদ্গতা বৃদ্ধাঃ, অথবা ঊর্ধ্বং হৃদযং গতাঃ, এতেনোত্পূর্বেণৈব দোষাণাং বৃদ্ধত্বং বিমার্গগত্বং চ দর্শিতম্||১||

Adhikarana unmAdabhedAH (2-3) · Śloka 3

একৈকশঃ সর্বশশ্চ দোষৈরত্যর্থমূর্ছিতৈঃ | মানসেন চ দুঃখেন স চ পঞ্চবিধো মতঃ ||২|| বিষাদ্ভবতি ষষ্ঠশ্চ যথাস্বং তত্র ভেষজম্ | স চাপ্রবৃদ্ধস্তরুণো মদসঞ্জ্ঞাং বিভর্তি চ ||৩|| (সু. উ. তং. অ. ৬২) |

প্রকারভেদমাহ– একৈকশ ইত্যাদি| মানসেন চ দুঃখেনেতি শোকাদিনা| স চেতি ষড্বিধোঽপি| অত্রাপ্রবৃদ্ধপদমুপাদাযাপি তরুণপদপ্রযোগং কুর্বতা সুশ্রুতেন স্বতন্ত্রোঽপি দোষজনিতো মদো ভবতীতি দর্শিতম্| অত এব চরকে বিধিশোণিতীযাধ্যাযে (চ. সূ. অ. ২৪) উন্মাদাত্ পৃথগেব পঠিতঃ সনিদানচিকিত্সিত ইতি||২-৩||

Adhikarana unmAdasAmAnyanidAnam (4) · Śloka 4

বিরুদ্ধদুষ্টাশুচিভোজননি প্রধর্ষণং দেবগুরুদ্বিজানাম্ | উন্মাদহেতুর্ভযহর্ষপূর্বো মনোঽভিঘাতো বিষমাশ্চ চেষ্টাঃ ||৪|| (চ. চি. অ. ৯) |

সামান্যহেতুমাহ– বিরুদ্ধেত্যাদি| দুষ্টং গরসহিতমন্নাদি| প্রধর্ষণং ‘ধৃষ’ প্রধর্ষণে, ইত্যস্মাত্ প্রধর্ষণমভিভবঃ| ভযহর্ষপূর্বো মনোঽভিঘাত ইতি ভযহর্ষাভ্যাং মনসোঽভিভবঃ; ভযহর্ষপূর্ব ইতি ভযং হর্ষো দ্বৌ বা পূর্বং যস্য স তথা; পূর্বশব্দোঽত্র কারণবাচী, চকারোঽত্র লুপ্তনির্দিষ্টো দ্রষ্টব্যঃ, তেন কামক্রোধলোভাদযোঽপি কারণমিতি জেজ্জটঃ; অন্যে ত্বাহুঃ– ক্রোধাদিভিরপি ভযহর্ষপূর্বক এব ভবতীতি তেন তৌ নির্দিষ্টৌ| বিষমাশ্চ চেষ্টা ইতি বিষমাঙ্গন্যাসবলবদ্বিগ্রহাদয উন্মাদহেতব ইতি যোজ্যম্||৪||

Adhikarana unmAdasamprAptiH (5) · Śloka 5

তৈরল্পসত্ত্বস্য মলাঃ প্রদুষ্টা বুদ্ধের্নিবাসং হৃদযং প্রদূষ্য | স্রোতাংস্যধিষ্ঠায মনোবহানি প্রমোহযন্ত্যাশু নরস্য চেতঃ ||৫|| (চ. চি. অ. ১) |

সম্প্রাপ্তিমাহ– তৈরিত্যাদি| তৈরুক্তহেতুভিঃ| অল্পসত্ত্বস্য অল্পসত্ত্বগুণস্যেতি চক্রঃ; জেজ্জটস্ত্বাহ– সত্ত্বং মনঃ, তস্য চাল্পত্বং রজস্তমোভ্যামাবৃতত্বেনাল্পজ্ঞানজনকত্বাত্| মলা বাতাদযঃ| বুদ্ধের্নিবাসং হৃদযমিত্যনেন হৃদযস্যাশ্রযস্য দুষ্ট্যা তদাশ্রিতজ্ঞানস্যাপি দুষ্টির্ভবতীতি দর্শযতি| স্রোতাংসি মনোবহানীতি হৃদযাশ্রিতা দশ ধমন্যঃ; এতচ্চ বিশেষেণ বোধ্যং, নিখিলদেহস্রোতসামেব মনোঽধিষ্ঠানত্বেন চরকে দর্শিতত্বাত্| অধিষ্ঠায ব্যাপ্যেত্যর্থঃ||৫||

Adhikarana unmAdasAmAnyalakShaNam (6) · Śloka 6

ধীবিভ্রমঃ সত্ত্বপরিপ্লবশ্চ পর্যাকুলা দৃষ্টিরধীরতা চ | অবদ্ধবাক্ত্বং হৃদযং চ শূন্যং সামান্যমুন্মাদগদস্য লিঙ্গম্ ||৬|| (চ. চি. অ. ৯) |

সামান্যরূপমাহ– ধীবিভ্রম ইত্যাদি| এতত্ সামান্যং পূর্বরূপমিতি জেজ্জটঃ, সামান্যরূপমিতি চক্রঃ| ধীবিভ্রমো ভ্রান্তজ্ঞানত্বম্| সত্ত্বপরিপ্লবো মনসশ্চঞ্চলত্বম্| অধীরতা কাতরত্বম্| অবদ্ধবাক্ত্বমসম্বদ্ধবচনত্বম্| লিঙ্গ্যতেঽনেনেতি লিঙ্গ, তেন পূর্বরূপং রূপং চেতি ব্যাখ্যাতম্||৬||

Adhikarana vAtikonmAdasya nidAnasamprAptipUrvakaM lakShaNam (7-8) · Śloka 8

রূক্ষাল্পশীতান্নবিরেকধাতুক্ষযোপবাসৈরনিলোঽতিবৃদ্ধঃ | চিন্তাদিদুষ্টং হৃদযং প্রদূষ্য বুদ্ধিং স্মৃতিং চাপ্যুপহন্তি শীঘ্রম্ ||৭|| অস্থানহাসস্মিতনৃত্যগীতবাগঙ্গবিক্ষেপণরোদনানি | পারুষ্যকার্শ্যারুণবর্ণতাশ্চ জীর্ণে বলং চানিলজস্য রূপম্ ||৮|| (চ. চি. অ. ৯) |

বাতজমাহ– রূক্ষেত্যাদি| বিরেকশব্দেনাত্র বান্তিরপ্যভিধীযতে, বিরেচযতি দেহান্মলং পৃথক্করোতীতি ব্যুত্পত্ত্যা| অস্থানহাসেত্যাদি অস্থানেঽবিষযে হাসোঽস্থানহাসঃ; এবমস্থানশব্দঃ স্মিতাদিষু প্রযোজ্যঃ| স্মিতমীষদ্ধাসঃ| অঙ্গবিক্ষেপো বিরুদ্ধচেষ্টা| জীর্ণে বলমিতি জীর্ণে আহারে ব্যাধের্বলং ভবতি||৭-৮||

Adhikarana paittikonmAdasya nidAnAdipUrvakaM lakShaNam (9-10) · Śloka 10

অজীর্ণকট্বম্লবিদাহ্যশীতৈর্ভোজ্যৈশ্চিতং পিত্তমুদীর্ণবেগম্ | উন্মাদমত্যুগ্রমনাত্মকস্য হৃদি স্থিতং পূর্ববদাশু কুর্যাত্ ||৯|| অমর্ষসংরম্ভবিনগ্নভাবাঃ সন্তর্জনাতিদ্রবণৌষ্ণ্যরোষাঃ | প্রচ্ছাযশীতান্নজলাভিলাষঃ পীতা চ ভাঃ পিত্তকৃতস্য লিঙ্গম্ ||১০|| (চ. চি. অ. ৯) |

পিত্তজমাহ– অজীর্ণেত্যাদি| অশীতৈরিতি উষ্ণৈঃ| উন্মাদমত্যুগ্রমিতি অত্যুগ্রং তীব্রবেগম্, ‘উন্মাদযত্যুগ্রম্’ ইতি পাঠান্তরে উগ্রং যথা ভবতি তথা উন্মাদং জনযতি| অনাত্মকস্য অনাত্মবতঃ| পূর্ববদিতি চিন্তাদিদুষ্টহৃদযস্য বুদ্ধ্যাদিকমুপহত্যেত্যাদিসম্প্রাপ্ত্যা| কুর্যাদিতি বক্ষ্যমাণং লিঙ্গমিতি শেষঃ| অত্র পক্ষে কিং তল্লিঙ্গমিত্যাহ– অমর্ষেত্যাদি– অমর্ষোঽসহিষ্ণুত্বং, ন তু রোষঃ; তস্য বক্ষ্যমাণত্বাত্| সংরম্ভ আরভটী; বিনগ্নভাবো নগ্নত্বম্| সন্তর্জনং পরিত্রাসনম্, অতিদ্রবণং পলাযনম্, ঔষ্ণ্যং গাত্রস্য; ‘ঔষ্ঠ্যম্ ইতি পাঠান্তরে বিকৃতৌষ্ঠত্বম্| প্রচ্ছাযশীতান্নজলাভিলাষ ইতি ছাযাযাং শীতযোরন্নজলযোরভিলাষঃ||৯-১০||

Adhikarana shlaiShmikonmAdasya nidAnAdipUrvakaM lakShaNam (11-12) · Śloka 12

সম্পূরণৈর্মন্দবিচেষ্টিতস্য সোষ্মা কফো মর্মণি সম্প্রদুষ্টঃ | বুদ্ধিং স্মৃতিং চাপ্যুপহত্য চিত্তং প্রমোহযন্ সঞ্জনযেদ্বিকারম্ ||১১|| বাক্চেষ্টিতং মন্দমরোচকশ্চ নারীবিবিক্তপ্রিযতাঽতিনিদ্রা | ছর্দিশ্চ লালা চ বলং চ ভুক্তে নখাদিশৌক্ল্যং চ কফাত্মকে স্যাত্ | (চ. চি. অ. ৯) ||১২||

কফজমাহ– সম্পূরণৈরিত্যাদি| মন্দবিচেষ্টিতস্য আযাসশূন্যস্য| সম্পূরণৈর্ভোজনাদিভিঃ, কফো দুষ্ট ইতি সম্বন্ধঃ| সোষ্মা সপিত্তঃ| কফেনাপি ক্রিযমাণ উন্মাদোঽবশ্যং সপিত্তেন ক্রিযতে ব্যাধিমহিম্না, যথা মূর্ছা| অন্যে ত্বাহুঃ– কেবলকফেনাপি ক্রিযতে, সোষ্মপদেন তু দ্বন্দ্বজোঽপি ভবতীতি সূচ্যতে| অন্যে ত্বাহুঃ– ঊষ্মশব্দেন শক্তিরুচ্যতে, তেনোত্কৃষ্টশক্তিকঃ কফ ইত্যর্থঃ| মর্মণীতি হৃদযে| বিকারমুন্মাদম্| বাগিত্যাদি নারীবিবিক্তপ্রিযতেতি নারীপ্রিযতা বিজনপ্রিযতা চ| বলং চ ভুক্তে ইতি ‘ব্যাধেঃ’ ইতি শেষঃ| নখাদীত্যাদিশব্দেন ত্বঙ্মূত্রনেত্রাদীনাং গ্রহণম্||১১-১২||

Adhikarana sAnnipAtikonmAdasya nidAnAdipUrvakaM lakShaNam (13) · Śloka 13

যঃ সন্নিপাতপ্রভবোঽতিঘোরঃ সর্বৈঃ সমস্তৈঃ স চ হেতুভিঃ স্যাত্ | সর্বাণি রূপাণি বিভর্তি তাদৃগ্বিরুদ্ধভৈষজ্যবিধির্বিবর্জ্যঃ ||১৩|| (চ. চি. অ. ৯) |

সান্নিপাতিকমাহ– য ইত্যাদি| সর্বৈঃ সমস্তৈরিতি সর্বৈরিতি কৃত্বাঽপি যত্ সমস্তৈরিতি করোতি তেনৈবং বোধযতি– বাতাদযোঽনেকৈঃ স্বনিদানৈঃ কুপিতা উন্মাদং জনযন্তি, নতু প্রত্যেকমেকনিদানকুপিতাঃ| বিরুদ্ধভৈষজ্যবিধির্বিবর্জ্য ইতি অযমভিসন্ধিঃ– ত্রিদোষজে প্রত্যেকং বাতাদিপ্রত্যনীকা ক্রিযা কার্যা, সা চ পরস্পরবিরোধিনী, ত্রিদোষহরং চ কিঞ্চিদেব দ্রব্যমামলক্যাদি, তত্তু নাত্র যৌগিকং “ন হি সর্বাণি সর্বত্র যৌগিকানি ভবন্তি” ইতি বচনাত্| ননু, যদ্যেবং তদা সর্ব এব হি ত্রিদোষজবিকারা অসাধ্যাঃ ভবেযুরিত্যত উক্তম্– তাদৃগিতি| কোঽপ্যযং সম্প্রাপ্তিবিশেষো রোগবিশেষো বা, যেনাযং বিরুদ্ধভৈষজ্যবিধির্ন তু সর্ব ইত্যর্থঃ| অন্যে ত্বাহুঃ– সর্বৈঃ সমস্তৈর্হেতুভির্যৈঃ কৃতঃ স এবাসাধ্যঃ, ন ত্বল্পহেতুকৃত ইতি||১৩||

Adhikarana shokAdijonmAdasya nidAnasamprAptipUrvakaM lakShaNam (14) · Śloka 14

চোরৈর্নরেন্দ্রপুরুষৈররিভিস্তথাঽন্যৈর্বিত্রাসিতস্য ধনবান্ধবসঙ্ক্ষযাদ্বা | গাঢং ক্ষতে মনসি চ প্রিযযা রিরংসোর্জাযেত চোত্কটতমো মনসো বিকারঃ ||১৪|| চিত্রং ব্রবীতি চ মনোঽনুগতং বিসঞ্জ্ঞো গাযত্যথো হসতি রোদিতি চাপি মূঢঃ | (সু. উ. তং. অ. ৬২) |

শোকাদিজমাহ– চোরৈরিত্যাদি| ক্ষতে উপহতে, প্রিযযা রিরংসোঃ কামুকস্য অপ্রাপ্তযা প্রিযযা ক্ষতে মনসীতি সম্বন্ধঃ| তস্য লক্ষণমাহ– চিত্রমিত্যাদি| চিত্রং বিবিধম্| মনোঽনুগতং গোপ্যমপি| বিসঞ্জ্ঞো বিপরীতজ্ঞানঃ, অত এব মূঢঃ||১৪||–

Adhikarana viShajonmAdalakShaNam (15) · Śloka 15

রক্তেক্ষণো হতবলেন্দ্রিযভাঃ সুদীনঃ শ্যাবাননো বিষকৃতেঽথ ভবেদ্বিসঞ্জ্ঞঃ ||১৫|| (সু. উ. তং. অ. ৬২) |

বিষজমাহ– রক্তেক্ষণ ইত্যাদি| হতবলেন্দ্রিযভা ইতি হতং বলমিন্দ্রিযাণি ভাশ্চ যস্য স তথা| ভা দীপ্তিঃ||১৫||

Adhikarana unmAdasyAsAdhyalakShaNam (16) · Śloka 16

অবাঞ্চী বাঽপ্যুদঞ্চী বা ক্ষীণমাংসবলো নরঃ | জাগরূকো হ্যসন্দেহমুন্মাদেন বিনশ্যতি ||১৬|| (সু. উ. তং. অ. ৬২) |

অসাধ্যলক্ষণমাহ– অবাঞ্চীত্যাদি| অবাঞ্চী অধোমুখঃ, উদঞ্চী ঊর্ধ্বমুখঃ, অত এবান্যে ‘অবাঙ্মুখস্তূন্মুখো বা’ ইতি পঠন্তি| জাগরূকোঽনিদ্রঃ||১৬||

Adhikarana bhUtonmAdasAmAnyalakShaNam (17) · Śloka 17

অমর্ত্যবাগ্বিক্রমবীর্যচেষ্টো জ্ঞানাদিবিজ্ঞানবলাদিভির্যঃ | উন্মাদকালোঽনিযতশ্চ তস্য ভূতোত্থমুন্মাদমুদাহরেত্তম্ ||১৭|| (চ. চি. অ. ৯) |

ভৌতিকোন্মাদস্য সামান্যলক্ষণমাহ– অমর্ত্যবাগিত্যাদি| অমর্ত্যা অমনুষ্যা অনুচিতা বা বাগাদযো যস্য স তথা| বিক্রমঃ পরাক্রমঃ, বীর্যং শক্তিঃ, চেষ্টা শারীরিকী ক্রিযা| জ্ঞানাদিবিজ্ঞানবলাদিভিরিতি উপলক্ষণে তৃতীযা| জ্ঞানং তত্ত্বজ্ঞানং, বিজ্ঞানং শিল্পাদিজ্ঞানং; কিংবা জ্ঞানং শাস্ত্রজ্ঞানং, বিজ্ঞানং তদর্থনিশ্চযঃ; আদিশব্দেন স্মৃত্যাদীনাং গ্রহণং, তেষাং বলম্| অনিযত ইতি ন বাতজাদিবদাহারজীর্ণাদিকালবত্ কালনিযমঃ| নিযত ইতি পাঠে তু বক্ষ্যমাণনিযততিথ্যাদীনাং গ্রহণং “দেবগ্রহাঃ পৌর্ণমাস্যাং” ইত্যাদি| ভূতশব্দেনাত্র সর্ব এব বক্ষ্যমাণা দেবদযোঽভিধীযন্তে||১৭||

Adhikarana devajuShTalakShaNam (18) · Śloka 18

সন্তুষ্টঃ শুচিরতিদিব্যমাল্যগন্ধো নিস্তন্দ্রীরবিতথসংস্কৃতপ্রভাষী | তেজস্বী স্থিরনযনো বরপ্রদাতা ব্রহ্মণ্যো ভবতি নরঃ স দেবজুষ্টঃ ||১৮|| (সু. উ. তং. অ. ৬০) |

দেবজুষ্টমাহ– সন্তুষ্ট ইত্যাদি| অতিদিব্যমাল্যগন্ধ ইতি অতিমাত্রো দিব্যমাল্যস্যেব গন্ধো যস্য স তথা| নিস্তন্দ্রীঃ অনিদ্রঃ| অবিতথং সত্যম্| বিদেহেঽপি “নিঃস্বপ্নং সত্যসংস্কৃতভাষিণম্” ইতি পঠিতম্| ব্রহ্মণ্যো ব্রাহ্মণানুরক্তঃ| দেবজুষ্টো দেবগ্রহপীডিতঃ| দেবগ্রহণেন গণমাতৃকাদযোঽপি গ্রাহ্যাঃ| বিদেহেঽপি পঠ্যতে “ক্রোধনঃ স্রস্তসর্বাঙ্গো লালাফেনাবিলাননঃ| নিদ্রালুঃ কম্পনো মূকো গণমাতৃভিরর্দিতঃ||” ইতি||১৮||

Adhikarana asurajuShTalakShaNam (19) · Śloka 19

সংস্বেদী দ্বিজগুরুদেবদোষবক্তা জিহ্মাক্ষো বিগতভযো বিমার্গদৃষ্টিঃ | সন্তুষ্টো ন ভবতি চান্নপানজাতৈর্দুষ্টাত্মা ভবতি স দেবশত্রুজুষ্টঃ ||১৯|| (সু. উ. তং. অ. ৬০) |

দেবশত্রুজুষ্টমাহ– সংস্বেদীত্যাদি||১৯||

Adhikarana gandharvAviShTalakShaNam (20) · Śloka 20

হৃষ্টাত্মা পুলিনবনান্তরোপসেবী স্বাচারঃ প্রিযপরিগীতগন্ধমাল্যঃ | নৃত্যন্ বৈ প্রহসতি চারু চাল্পশব্দং গন্ধর্বগ্রহপরিপীডিতো মনুষ্যঃ ||২০|| (সু. উ. তং. অ. ৬০) |

গন্ধর্বাবিষ্টমাহ– হৃষ্টেত্যাদি| পুলিনং তোযোজ্ঝিতং তটম্, অন্তরং মধ্যং বিশেষো বা| স্বাচারোঽনিন্দিতাচারঃ| প্রিযেত্যাদি প্রিযাণি পরি সর্বতো গীতগন্ধমাল্যানি যস্য স তথা| নৃত্যন্নিত্যাদি চারু (যথা ভবতি তথা) নৃত্যন্নল্পশব্দং যথা ভবতি তথা প্রহসতীতি যোজ্যম্||২০||

Adhikarana yakShAviShTalakShaNam (21) · Śloka 21

তাম্রাক্ষঃ প্রিযতনুরক্তবস্ত্রধারী গম্ভীরো দ্রুতগতিরল্পবাক্সহিষ্ণুঃ | তেজস্বী বদতি চ কিং দদামি কস্মৈ যো যক্ষগ্রহপরিপীডিতো মনুষ্যঃ ||২১|| (সু. উ. তং. অ. ৬০) |

যক্ষাবিষ্টমাহ– তাম্রাক্ষ ইত্যাদি| প্রিযেত্যাদি প্রিযং শোভনং, তনু সূক্ষ্মং রক্তং চ বস্ত্রং ধর্তুং শীলং যস্য স তথা||২১||

Adhikarana pitRujuShTalakShaNam (22) · Śloka 22

প্রেতানাং স দিশতি সংস্তরেষু পিণ্ডান্ শান্তাত্মা জলমপি চাপসব্যবস্ত্রঃ | মাংসেপ্সুস্তিলগুডপাযসাভিকামস্তদ্ভক্তো ভবতি পিতৃগ্রহাভিজুষ্টঃ ||২২|| (সু. উ. তং. অ. ৬০) |

পিতৃজুষ্টমাহ– প্রেতানামিত্যাদি| প্রেতানাং মৃতপিতৄণাং, সম্বন্ধমাত্রবিবক্ষযা ন চতুর্থী| দিশতি দদাতি| সংস্তরেষু কুশপত্রাদিরচিতাস্তরণেষু| অপসব্যবস্ত্রো বামোত্তরীযঃ| মাংসেপ্সুরিত্যাদি| এতদভিধানপ্রযোজনং যস্মিন্ যস্যেচ্ছা ভবতি তস্য তেনৈব বলির্দাতব্যঃ; এবমন্যত্রাপি দ্রষ্টব্যম্| তদ্ভক্তঃ পিতৃভক্তঃ||২২||

Adhikarana nAgAviShTalakShaNam (23) · Śloka 23

যস্তূর্ব্যাং প্রসরতি সর্পবত্ কদাচিত্ সৃক্কণ্যৌ বিলিহতি জিহ্বযা তথৈব | ক্রোধালুর্গুডমধুদুগ্ধপাযসেপ্সুর্জ্ঞাতব্যো ভবতি ভুজঙ্গমেন জুষ্টঃ ||২৩|| (সু. উ. তং. অ. ৬০) |

নাগাবিষ্টমাহ– যস্ত্বিত্যাদি| প্রসরতি সর্পবদিতি উরসা গচ্ছতি| সৃক্কণ্যৌ ওষ্ঠপ্রান্তৌ| সৃক্কণীশব্দ ঈকারান্তোঽপ্যস্তীত্যুন্নেযম্||২৩||

Adhikarana rAkShasAviShTalakShaNam (24) · Śloka 24

মাংসাসৃগ্বিবিধসুরাবিকারলিপ্সুর্নির্লজ্জো ভৃশমতিনিষ্ঠুরোঽতিশূরঃ | ক্রোধালুর্বিপুলবলো নিশাবিহারী শৌচদ্বিড্ ভবতি স রাক্ষসৈর্গৃহীতঃ ||২৪|| (সু. উ. তং. অ. ৬০) |

রাক্ষসাবিষ্টমাহ– মাংসেত্যাদি| নিশাবিহারী নিশাযামেব ভ্রমণশীলঃ| রাক্ষসশব্দেন ব্রহ্মরাক্ষসাদযোঽপি গ্রাহ্যাঃ| তথা রাক্ষসানন্তরং বিদেহোঽপি পঠতি– “দেববিপ্রগুরুদ্বেষী বেদবেদাঙ্গনিন্দকঃ| আত্মপীডাকরো হাসী ব্রহ্মরাক্ষসসেবিতঃ||” ইতি||২৪||

Adhikarana pishAcAviShTalakShaNam (25) · Śloka 25

উদ্ধস্তঃ কৃশপরুষো অচিরপ্রলাপী দুর্গন্ধো ভৃশমশুচিস্তথাঽতিলোলঃ | বহ্বাশী বিজনবনান্তরোপসেবী ব্যাচেষ্টন্ ভ্রমতি রুদন্ পিশাচজুষ্টঃ ||২৫|| (সু. উ. তং. অ. ৬০) |

পিশাচাবিষ্টমাহ– উদ্ধস্ত ইত্যাদি| উদ্ধস্ত ঊর্ধ্ববাহুঃ; ‘উদ্বস্ত্র’ ইতি পাঠান্তরং ন্যায্যং, বিদেহেঽপি দিগম্বরপাঠাত্; উদ্বস্ত্রো নগ্নঃ| পরুষো রূক্ষঃ| লোলঃ সর্বস্মিন্নন্নে পানে চ সতৃষ্ণঃ| ‘লোলুঃ’ ইতি পাঠান্তরে স এবার্থঃ| ব্যাচেষ্টন্নিতি বিরুদ্ধমাচেষ্টন্||২৫||

Adhikarana bhUtonmAdasyAsAdhyalakShaNam (26) · Śloka 26

স্থূলাক্ষো দ্রুতমটনঃ স ফেনলেহী নিদ্রালুঃ পততি চ কম্পতে চ যো হি | যশ্চাদ্রিদ্বিরদনগাদিবিচ্যুতঃ স্যাত্ সোঽসাধ্যো ভবতি তথা ত্রযোদশাব্দে ||২৬|| (সু. উ. তং. অ. ৬০) |

ত্রিবিধং হি হিংসাক্রীডাপূজার্থং গ্রহা গৃহ্ণন্তি| যদুক্তম্– “অশুচিং ভিন্নমর্যাদং ক্ষতং বা যদি বাঽক্ষতম্| হিংস্যুর্হিংসাবিহারার্থং সত্কারার্থমথাপি চ||” (সু. উ. তং. অ. ৬০) ইতি| তত্র হিংসার্থং গৃহীতোঽসাধ্যো ভবতি, তস্য শ্লোকার্ধদ্বযেন লক্ষণমাহ– স্থূলাক্ষ ইত্যাদি| স্থূলাক্ষো বিকৃতনেত্র ইতি জেজ্জটঃ| দ্রুতমটনো দ্রুতগতিঃ, অত এব ‘ত্বরিতগতিঃ’ ইতি জেজ্জটেন পঠিতম্| যশ্চেত্যাদি| পর্বতাদিপতিতঃ সন্ যো গৃহ্যতে সোঽপ্যসাধ্যঃ, নগো বৃক্ষঃ| সর্ব এবোন্মাদী ত্রযোদশেঽব্দে দেবতাদিগৃহীতোঽপ্যসাধ্যঃ| বিদেহেঽধিকমপ্যসাধ্যলক্ষণং পঠ্যতে– “মেঢ্রপ্রবৃত্তঃ ক্ষতজঃ সাস্রাক্ষঃ স্রুতনাসিকঃ| রূক্ষজিহ্বঃ পূতিগর্ভো হতবাগতিদুর্বলঃ||” ইত্যাদি||২৬||

Adhikarana devAdInAM grahaNakAlaH (27-28) · Śloka 28

দেবগ্রহাঃ পৌর্ণমাস্যামসুরাঃ সন্ধ্যযোরপি | গন্ধর্বাঃ প্রাযশোঽষ্টম্যাং, যক্ষাশ্চ প্রতিপদ্যথ ||২৭|| পিত্র্যাঃ কৃষ্ণক্ষযে হিংস্যুঃ, পঞ্চম্যামপি চোরগাঃ | রক্ষাংসি রাত্রৌ, পৈশাচাশ্চতুর্দশ্যাং বিশন্তি হি ||২৮|| (সু. উ. তং. অ. ৬০) |

দেবাদীনাং গ্রহণকালমাহ– দেবগ্রহাঃ ইত্যাদি| পৌর্ণমাস্যাং পূর্ণিমাযাম্| কৃষ্ণক্ষযেঽমাবাস্যাযাম্| প্রাযোগ্রহণাদন্যত্রাপি| তিথ্যভিধানপ্রযোজনং লক্ষণার্থং, তত্তিথৌ বলিদানার্থং চ||২৭-২৮||

Adhikarana AvishatAM devAdInAmanupalabdhau dRuShTAntaH (29-30) · Śloka 30

দর্পণাদীন্ যথা ছাযা শীতোষ্ণং প্রাণিনো যথা | স্বমণিং ভাস্করার্চিশ্চ যথা দেহং চ দেহধৃক্ | বিশন্তি চ ন দৃশ্যন্তে গ্রহাস্তদ্বচ্ছরীরিণঃ ||২৯|| (সু. উ. তং. অ. ৬০) | প্রবিশ্যাশু শরীরং হি পীডাং কুর্বন্তি দুঃসহাম্ ||৩০||

ননু, যদি গ্রহাবিষ্টানাং পুংসামুন্মাদঃ স্যাত্, তদা বিশন্তো গ্রহাঃ কুতো ন লক্ষ্যন্তে? ইত্যত আহ– দর্পণাদীনিত্যাদি| অস্মদাদিদর্শনাযোগ্যত্বান্ন দৃশ্যন্ত ইত্যর্থঃ| আদিশব্দেন প্রকারবাচিনাং জলতৈলাদীনাং গ্রহণম্| ছাযা প্রতিকৃতিঃ| শীতোষ্ণমিতি কর্তৃপদং, প্রাণিন ইতি কর্মপদম্| স্বমণিমিতি সূর্যকান্তম্| দেহধৃক্ আত্মা, মন ইতি জেজ্জটঃ| অনেকদৃষ্টান্তপ্রযোজনং জেজ্জটলিখিতং তচ্চাত্রানুপযুক্তত্বেন বিস্তরভযান্ন লিখিতম্| দেবশব্দেন চাত্র দেবস্যানুচরা দেবসধর্মাণো গৃহ্যন্তে, দেবানাং মনুষ্যশরীরেণাশুচিনা সম্বন্ধাভাবাত্| যদাহ সুশ্রুতঃ– “ন তে মনুষ্যৈঃ সহ সংবিশন্তি ন তে মনুষ্যান্ ক্বচিদাবিশন্তি| যে ত্বাবিশন্তীতি বদন্তি মোহাত্তে ভূতবিদ্যাবিষযাদপেতাঃ||” (সু. উ. তং. অ. ৬০) ইতি||২৯-৩০||

Adhikarana grahANAM tIvratapAdiprabhAvavattAkathanam (31-33) · Śloka 33

তপাংসি তীব্রাণি তথৈব দানং ব্রতানি ধর্মো নিযমশ্চ সত্যম্ | গুণাস্তথাঽষ্টাবপি তেষু নিত্যা ব্যস্তাঃ সমস্তাশ্চ যথাপ্রভাবম্ ||৩১|| ন তে মনুষ্যৈঃ সহ সংবিশন্তি ন বা মনুষ্যান্ ক্বচিদাবিশন্তি | যে ত্বাবিশন্তীতি বদন্তি মোহাত্তে ভূতবিদ্যাবিষযাদপোহ্যাঃ ||৩২|| তেষাং গ্রহাণাং পরিচারকা যে কোটীসহস্রাযুতপদ্মসঙ্খ্যাঃ | অসৃগ্বসামাংসভুজঃ সুভীমা নিশাবিহারাশ্চ তথাঽঽবিশন্তি ||৩৩||

ইদানীং গ্রহাণাং তীব্রতপাদি যমাদিযুক্তাং প্রভাববত্তাং সুশ্রুতোক্তেন শ্লোকত্রযেণ দর্শযিতুমাহ– তপাংসীত্যাদি| তপস্তাপনলক্ষণমুপবাসাদি, ব্রতানি শাস্ত্রোদিতবিধিনা ভোজনাদিনিযমনানি, কর্ম কাযবাঙ্মনসাং সুচরিতম্| গুণাস্তথাষ্টাবিতি অণিমা ১, মহিমা ২, লঘিমা ৩, প্রাকাম্যং ৪, প্রাকাশ্যম্ ৫, ঈশিত্বং ৬, বশিত্বং ৭, যত্র কামাবসাযিত্বং ৮, চেতি| অন্যে তু– “আবেশশ্চেতসো জ্ঞানমর্থানাং শব্দনক্রিযা| দৃষ্টিঃ শ্রোত্রং স্মৃতিঃ কান্তিরিষ্টতশ্চাপ্যদর্শনম্||” ইত্যষ্টবিধমৈশ্বর্যমাহুঃ| তেষু গ্রহেষু এতে গুণা নিত্যাঃ, ন কাদাচিত্কাঃ, ব্যস্তা দ্বিত্রিচত্বার ইত্যাদি; সমস্তাঃ সর্বে; যো যস্য প্রভাব ইতি যথাপ্রভাবং; তত্র ব্যস্তা গুণা অসুরাদিগ্রহাণাং, সমস্তা দেবগ্রহাণাম্| অথ তে নিযমাদিযুক্তাশ্চেত্ কথমশুচিং দেহমাবিশন্তি, ন কথঞ্চন, অত এবাহ– নেত্যাদি| তে দেবাদযো মনুষ্যৈঃ সহ ন বিশন্তি ন একীভবন্তীত্যর্থঃ| ন বা মনুষ্যান্ মানুষদেহান্, ক্বচিদপ্যনুপ্রবিশন্তীত্যর্থঃ| যে পুনর্বৈদ্যা ‘আবিশন্তি’ ইতি মোহাদজ্ঞানাত্ প্রবদন্তি, তে বৈদ্যা ভূতবিদ্যাবিষযাত্তজ্জ্ঞানাদপোহ্যা অপসারণীযাস্ত্যাজ্যা ইত্যর্থঃ| কে তর্হি গৃহ্ণন্তীত্যাহ– তেষামিতি তেষাং দেবাদীনাং পরিচারকাঃ প্রেষ্যাঃ, কর্মকরা ইত্যর্থঃ| কোট্যঃ শতলক্ষপ্রমাণাঃ, অযুতং দশসহস্রম্, এতেন কোটিঘ্নং শতলক্ষপ্রমাণগুণিতং যত্ সহস্রং তাদৃশৈঃ দশভিঃ সহস্রৈরত্রাযুতং বোদ্ধব্যং; তেষাং পদ্মং, পদ্মং চতুর্দশবিন্দুকং, তদেব সঙ্খ্যা যেষাং তে তথা| সুভীমা অত্যর্থং ভযানকাঃ| নিশাবিহারা রাত্রৌ ভ্রমণশীলাঃ||৩১-৩৩||

Adhikarana puShpikA · Śloka 20

ইতি শ্রীমাধবকরবিরচিতে মাধবনিদান উন্মাদনিদানং সমাপ্তম্||২০|| ||২০||

ইতি শ্রীবিজযরক্ষিতকৃতাযাং মধুকোশব্যাখ্যাযামুন্মাদনিদানং সমাপ্তম্||২০||