22. vātavyādhinidānam

Adhikarana vAtarogasya nidAnaM samprAptishca (1-4) · Śloka 4

অথ বাতব্যাধিনিদানম্| রূক্ষশীতাল্পলঘ্বন্নব্যবাযাতিপ্রজাগরৈঃ | বিষমাদুপচারাচ্চ দোষাসৃক্স্রবণাদপি ||১|| লঙ্ঘনপ্লবনাত্যধ্বব্যাযামাদিবিচেষ্টিতৈঃ | ধাতূনাং সঙ্ক্ষযাচ্চিন্তাশোকরোগাতিকর্ষণাত্ ||২|| বেগসন্ধারণাদামাদভিঘাতাদভোজনত্ | মর্মাবাধাদ্গজোষ্ট্রাশ্বশীঘ্রযানাপতংসনাত্ ||৩|| দেহে স্রোতাংসি রিক্তানি পূরযিত্বাঽনিলো বলী | করোতি বিবিধান্ ব্যাধীন্ সর্বাঙ্গৈকাঙ্গসংশ্রযান্ ||৪|| (চ. চি. অ. ২৮) |

অপস্মারবদ্বাতবিকারাণামপ্যাক্ষেপকাদীনাং বেগকর্তৃত্বাদপস্মারানন্তরং বাতব্যাধ্যারম্ভঃ| ননু, বাতব্যাধিরিতি কোঽর্থঃ? কিং বাত এব ব্যাধির্বাতব্যাধিঃ, উত বাতেন জনিতো ব্যাধির্বাতব্যাধিঃ? আদ্যে স্বস্থেষ্বপি প্রসঙ্গঃ, দ্বিতীযে জ্বরাদিষু| উচ্যতে– ব্যাধিপদসামানাধিকরণ্যাদ্বিকৃতো দুঃখকারী বাতো বাতব্যাধিঃ| উক্তং হি সুশ্রুতে– ‘‘পক্বাশযস্থোঽন্ত্রকূজং শূলাটোপৌ করোতি চ|’’ (সু. নি. অ. ১) ইতি| বাতজনিতোঽসাধারণব্যাধির্বাতব্যাধিরিতি বিশেষণীযং, তেনোভযত্রাপ্রসঙ্গঃ| যচ্চোক্তম্– ‘‘কফপিত্তান্বিতো বাযুর্বাযুরেব চ কেবলঃ| কুর্যাদাক্ষেপকম্’’ ইত্যাদি; তত্রারম্ভকো বাযুরেব, পিত্তকফৌ ত্বনুবন্ধাবিতি ন বিরোধঃ স্যাত্| চরকে হি দ্বিবিধা ব্যাধয উক্তাঃ সামান্যজা, নানাত্মজাশ্চেতি; তত্র সামান্যজা যে বাতাদিভিঃ সমস্তৈর্ব্যস্তৈর্বা জন্যন্তে, যথা– জ্বরাদযঃ; নানাত্মজা যে নিযতৈকদোষজন্যাঃ, যথা– আক্ষেপকাদযো যে বাতেনৈব জন্যন্তে, ন স্বতন্ত্রেণ পিত্তেন কফেন বা; তথা ওষচোষাদযঃ পিত্তেনৈব, ন বাতেন কফেন চ তথা তৃপ্ত্যাদযঃ কফেনৈব, ন বাতেন, ন পিত্তেন,; এবং ব্যবস্থিতে বাতব্যাধিবত্ পিত্তকফব্যাধী কস্মান্নোক্তৌ? উচ্যতে– বাযোরতিবলত্বেন আশুকারিত্বেন চ গরীযস্ত্বাত্তদ্বিকারাণাং দুঃসাধ্যত্বাদাশ্বেবাত্যযকরত্বাদ্বিশিষ্টচিকিত্স্যত্বাদ্বাতব্যাধ্যভিধানং, নতু কফপিত্তব্যাধ্যভিধানম্| অত এব চরকসুশ্রুতাদিষ্বপি বাতরোগাধ্যায এব নির্দিষ্টো, নতু পিত্তকফরোগাধ্যাযঃ| চন্দ্রিকাকারস্ত্বাহ– পিত্তকফযো রূপরসাদিযোগাদ্দূষ্যবিশেষযোগাদ্বা হরিদ্রাচূর্ণসংযোগবদত্যন্তবিসদৃশা রসাদিমন্তো বিকারাঃ পৃথঙ্নামানো জাযন্তে, বাযোস্তু রূপরসাদ্যভাবাত্ দূষ্যনিরপেক্ষা আক্ষেপকাদযো বাতাদনতিভিন্নরূপা নানাত্মজাঃ; তেন বাতবিকারাঃ পৃথগুচ্যন্তে, নতু পিত্তকফবিকারা ইতি| এতত্তু বকুলকরপ্রভৃতযা নানুমন্যন্তে, চরকবিরোধাত্| চরকে হি পিত্তকফযোরপি নানাত্মজা উক্তাঃ, যথা– ‘অশীতির্বাতবিকারাঃ, চত্বারিংশত্ পিত্তবিকারাঃ, বিংশতিঃ শ্লেষ্মবিকারাঃ|’ (চ. সূ. অ. ২০) ইতি| সুশ্রুতেন তু শল্যাধ্যাযিনা পিত্তকফনানাত্মজা ন দর্শিতাঃ, পরাধিকারেষু ন বিস্তারোক্তিরিত্যভিপ্রাযেণেতি| লঙ্ঘনমুত্পতনম্, উপবাসস্যানশনশব্দেন বমনাদেশ্চ দোষস্রবণশব্দেন বক্ষ্যমাণত্বাত্| প্লবনং বাহুভ্যাং জলপ্রতরণম্| আমাদিতি আমরসাত্, তস্য কারণত্বং মার্গাবরণদ্বারেণ নতু স্বরূপেণ; আযাসাদিতি পাঠান্তরমযুক্তং, তস্য ব্যাযামশব্দেনোক্তত্বাত্| মর্মাবাধাত্ মর্মাভিঘাতাত্| অপতংসনং গজাদিভ্যঃ শীঘ্রযানেন পতনম্, উচ্ছ্বাসাবরোধো বা; ধাতুকর্ষণমিতি খরনাদঃ||১-৪||

Adhikarana vAtavyAdheH pUrvarUpAdayaH (5) · Śloka 5

অব্যক্তং লক্ষণং তেষাং পূর্বরূপমিতি স্মৃতম্ | আত্মরূপং তু যদ্ব্যক্তমপাযো লঘুতা পুনঃ ||৫|| (চ. চি. অ. ২৮) |

পূর্বরূপাদিকমাহ– অব্যক্তমিত্যাদি| অব্যক্তমিতি বক্ষ্যমাণানাং বাতবিকারাণাং রূপমেবাব্যক্তং পূর্বরূপং, নতু জ্বরাদিবদ্বিশিষ্টমন্যত্| আত্মরূপমিত্যাদি তদেব ব্যক্তমাত্মরূপং দোষাদিভেদেন সম্যক্ প্রকাশিতং স্বলক্ষণমিত্যর্থঃ| অপায ইতি বাযোশ্চলত্বেন স্তম্ভসঙ্কোচকম্পাদীনাং কদাচিদভাবাত্; যদুক্তম্– “গতে বেগে ভবেত্ স্বাস্থ্যং সর্বেষ্বাক্ষেপকাদিষু|” ইতি লঘুতেতি শরীরস্য, বাযুনা সর্বধাতুশোষণাত্| অথবা অপাযো লঘুতা ইতি সর্ববাতবিকারাণামপাযোঽভাবঃ, কিং তদিত্যাহ– লঘুতেতি; বাতলিঙ্গানাং লঘুতাঽত্যল্পত্বেনাবস্থানং নতু নিঃশেষনিবৃত্তিঃ; যথা– বহিরাযামনিবৃত্তাবপি ন রূক্ষত্বাদিনিবৃত্তিরিত্যাহুঃ||৫||

Adhikarana vAtavyAdheH sAmAnyali~ggaM, vAyorhetvAdivisheShAdrogavisheShakartRutvaM ca (6-8) · Śloka 8

সঙ্কোচঃ পর্বণাং স্তম্ভো ভঙ্গোঽস্থ্নাং পর্বণামপি | রোমহর্ষঃ প্রলাপশ্চ পাণিপৃষ্ঠশিরোগ্রহঃ ||৬|| খাঞ্জ্যপাঙ্গুল্যকুব্জত্বং শোথোঽঙ্গানামনিদ্রতা | গর্ভশুক্ররজোনাশঃ স্পন্দনং গাত্রসুপ্ততা ||৭|| শিরোনাসাক্ষিজত্রূণাং গ্রীবাযাশ্চাপি হুণ্ডনম্ | ভেদস্তোদোঽর্তিরাক্ষেপো মুহুশ্চাযাস এব চ ||৮||

করোতি বিবিধান্ ব্যাধীনিতি যদুক্তং তদ্ব্যাকরোতি– সঙ্কোচ ইত্যাদি| স্তম্ভঃ পর্বণামেব| পাঙ্গুল্যং পঙ্গুতা| শোথোঽঙ্গানামিতি বাহুমুখাদীনাম্| অনিদ্রতেত্যনেন অল্পনিদ্রতেত্যাহুঃ| গর্ভশুক্ররজোনাশ ইতি গর্ভশয্যাযা বাতাধিষ্ঠিতত্বেন গর্ভাগ্রহণমিতি জেজ্জটঃ| গর্ভাদিবিকৃতিরপ্যত্র দ্রষ্টব্যা| স্পন্দনং কম্পনম্| হুণ্ডনং শিরঃপ্রভৃতীনামন্তঃপ্রবেশো বক্রত্বং বা, ধাতূনামনেকার্থন্ত্বাত্| অন্যে ত্বাহুঃ– শিরোহুণ্ডনং কেশভূমিস্ফুটনং শঙ্খললাটভেদশ্চ, নাসাহুণ্ডনং ঘ্রাণনাশঃ, অক্ষিহুণ্ডনমক্ষিব্যুদাসঃ, জত্রুহুণ্ডনং বক্ষোপরোধঃ, গ্রীবাহুণ্ডনং গ্রীবাস্তম্ভঃ| ভেদ ইতি ওষ্ঠদন্তশ্রোণ্যাদীনাম্| তোদঃ শূলম্| অর্তিঃ পীডা, সা চ পাদপার্শ্বশ্রোত্রাক্ষিবক্ষসামিতি জেজ্জটঃ| আক্ষেপশ্চ আক্ষেপকাদিষু বক্ষ্যমাণঃ| আযাসঃ শ্রমঃ||৬-৮||

Adhikarana kupitavAyoH hetusthAnavisheShAt rogavisheShakartRutvam (9) · Śloka 9

এবংবিধানি রূপাণি করোতি কুপিতোঽনিলঃ | হেতুস্থানবিশেষাচ্চ ভবেদ্রোগবিশেষকৃত্ ||৯|| (চ. চি. অ. ২৮) |

হেত্বিত্যাদি| হেতুবিশেষঃ আবরণাদিঃ যথা– শ্লেষ্মাবৃতো মন্যাস্তম্ভকারী; স্থানবিশেষঃ কোষ্ঠাদিঃ; যথা– পক্বাশযস্থোঽন্ত্রকূজনমিত্যাদি||৯||

Adhikarana koShThAshritavAtalakShaNaM, sarvA~ggakupitavAtalakShaNaM ca (10-11) · Śloka 11

তত্র কোষ্ঠাশ্রিতে দুষ্টে নিগ্রহো মূত্রবর্চসোঃ | ব্রধ্নহৃদ্রোগগুল্মার্শঃপার্শ্বশূলং চ মারুতে ||১০|| সর্বাঙ্গকুপিতে বাতে গাত্রস্ফুরণভঞ্জনম্ | বেদনাভিঃ পরীতাশ্চ স্ফুটন্তীবাস্য সন্ধযঃ ||১১|| (চ. চি. অ. ২৮) |

এতদেব বিবৃণোতি (কোষ্ঠাশ্রিতবাতলক্ষণমাহ)– তত্রেত্যাদি| কোষ্ঠশব্দেনাবিশেষাত্ সর্বে আমাশযাদযো গৃহ্যন্তে, আমাশযাদিগং তু পৃথগপি বক্ষ্যতি| নিগ্রহোঽপ্রবৃত্তিঃ| ব্রধ্নঃ কোশবঙ্ক্ষণসন্ধিঃ||১০-১১||

Adhikarana gudasthitavAtalakShaNam AmAshayasthavAtalakShaNaM ca (12-13) · Śloka 13

গ্রহো বিণ্মূত্রবাতানাং শূলাধ্মানাশ্মশর্করাঃ | জঙ্ঘোরুত্রিকপাত্পৃষ্ঠরোগশোষৌ গুদে স্থিতে ||১২|| রুক্ পার্শ্বোদরহৃন্নাভেস্তৃষ্ণোদ্গারবিসূচিকাঃ | কাসঃ কণ্ঠাস্যশোষশ্চ শ্বাসশ্চামাশযস্থিতে ||১৩|| (চ. চি. অ. ২৮) |

গুদস্থিতবাতলক্ষণমাহ– গ্রহ ইত্যাদি| অশ্মা অশ্মরী| রোগো রুজা| গুদ ইত্যুত্তরগুদে পক্বাশয ইত্যর্থঃ, নতু গুদমাত্রে; তথা সতি অশ্মরীকর্তৃত্বানুপপত্তেঃ||১২-১৩||

Adhikarana pakvAshayasthavAtalakShaNaM shrotrAdigatavAtalakShaNaM ca (14) · Śloka 14

পক্বাশযস্থোঽন্ত্রকূজং শূলাটোপৌ করোতি চ | কৃচ্ছ্রমূত্রপুরীষত্বমানাহং ত্রিকবেদনাম্ ||১৪|| শ্রোত্রাদিষ্বিন্দ্রিযবধং কুর্যাদ্দুষ্টসমীরণঃ | (সু. নি. অ. ১) |

পক্বাশযস্থবাতলক্ষণমাহ– পক্বাশযস্থ ইত্যাদি| ননু, পক্বাশযস্থ ইতি পুনরুক্তিঃ, গুদে স্থিত ইত্যনেনৈবোক্তত্বাত্| উচ্যতে– গুদে স্থিত ইতি দৃঢবলস্য লক্ষণং, পক্বাশযস্থ ইতি সুশ্রুতস্য; উভযলিঙ্গোপন্যাসস্তু সকললিঙ্গপ্রদর্শনার্থমিত্যবিরোধঃ||১৪||

Adhikarana tvaggatavAtalakShaNam (15) · Śloka 15

ত্বগ্রূক্ষা স্ফুটিতা সুপ্তা কৃশা কৃষ্ণা চ তুদ্যতে | আতন্যতে সরাগা চ পর্বরুক্ ত্বগ্গতেঽনিলে ||১৫|| (চ. চি. অ. ২৮) |

ত্বগ্গতবাতলক্ষণমাহ– ত্বগিত্যাদি| আতন্যতে বিস্তার্যত এব| ত্বগ্গতে ইতি উপধাতুরূপাং ত্বচং প্রাপ্তে; চন্দ্রিকাকারস্তু ত্বক্শব্দেন রসমাহ, তেন রসগত ইত্যর্থঃ| হৃদযস্থস্য চ রসস্যামাশযসামীপ্যাদামাশযগতবাতলক্ষণেনৈব তদধিগতেঃ রসগতস্যানভিধানমিতি কার্তিকঃ||১৫||

Adhikarana asRuggatavAtalakShaNam (16) · Śloka 16

রুজস্তীব্রাঃ সসন্তাপা বৈবর্ণ্যং কৃশতাঽরুচিঃ | গাত্রে চারূংষি ভুক্তস্য স্তম্ভশ্চাসৃগ্গতেঽনিলে ||১৬|| (চ. চি. অ. ২৮) |

অসৃগ্গতবাতলক্ষণমাহ– রুজা ইত্যাদি| অরূংষি ব্রণাঃ| ভুক্তস্য স্তম্ভঃ ভুক্তবতো গাত্রস্তম্ভঃ, সন্তর্পণেন রক্তস্য বৃদ্ধেঃ| অন্যে ত্বসৃগ্গতবাতলক্ষণং ন পঠন্তি, বাতরক্তেন সহাভেদাত্; তন্ন, অত্র দুষ্টো বাযুঃ রক্তেনাবৃতঃ কুপ্যতি, বাতরক্তে তু স্বকারণাদুভাবপি হস্ত্যাদিগমনকুপিতৌ বিশিষ্টসম্প্রাপ্ত্যা হস্তপাদগতাবেব বাতরক্তাখ্যং বিকারং জনযত ইতি||১৬||

Adhikarana mAMsamedogatavAtalakShaNaM majjAsthigatavAtalakShaNaM ca (17-18) · Śloka 18

গুর্বঙ্গং তুদ্যতেঽত্যর্থং দণ্ডমুষ্টিহতং যথা | সরুক্ শ্রমিতমত্যর্থং মাংসমেদোগতেঽনিলে ||১৭|| ভেদোঽস্থিপর্বণাং সন্ধিশূলং মাংসবলক্ষযঃ | অস্বপ্নঃ সন্ততা রুক্ চ মজ্জাস্থিকুপিতেঽনিলে ||১৮|| (চ. চি. অ. ২৮) |

মাংসমেদোগতবাতলক্ষণমাহ– গুর্বিত্যাদি| শ্রমিতং শ্রান্তং নিঃসহমিত্যর্থঃ| মাংসমেদোগতবাযোরেকলিঙ্গত্বম্ অদূরান্তরেণ প্রত্যাসত্তেরাশ্রযাভেদাত্, এবং মজ্জাস্থিকুপিতেঽপি বাচ্যম্||১৭-১৮||

Adhikarana shukrasthavAtalakShaNam (19) · Śloka 19

ক্ষিপ্রং মুঞ্চতি বধ্নাতি শুক্রং গর্ভমথাপি বা | বিকৃতিং জনযেচ্চাপি শুক্রস্থঃ কুপিতোঽনিলঃ ||১৯|| (চ. চি. অ. ২৮) |

শুক্রস্থবাতলক্ষণমাহ– ক্ষিপ্রমিত্যাদি| গর্ভমিতি দুষ্টশুক্রারব্ধত্বাদ্গর্ভস্য| বিকৃতিমিতি গর্ভস্য, শুক্রস্য চ||১৯||

Adhikarana sirAgatavAtalakShaNaM snAyugatavAtalakShaNaM ca (20) · Śloka 20

কুর্যাত্ সিরাগতঃ শূলং সিরাকুঞ্চনপূরণম্ | (সু. নি. অ. ১) | স বাহ্যাভ্যন্তরাযামং খল্লীং কৌব্জ্যমথাপি বা ||২০|| সর্বাঙ্গৈকাঙ্গরোগাংশ্চ কুর্যাত্ স্নাযুগতোঽনিলঃ | (চ. চি. অ. ২৮) |

সিরাগতবাতলক্ষণমাহ– কুর্যাদিত্যাদি| আকুঞ্চনং সঙ্কোচঃ| পূরণং স্থূলত্বং, যদুক্তমন্যত্র– ‘সুপ্তাস্তন্ব্যো বৃহত্যো বা সিরা বাতে সিরাগতে|’ ইতি| খল্লীং বক্ষ্যমাণাম্||২০||

Adhikarana sandhigatavAtalakShaNam (21) · Śloka 21

হন্তি সন্ধিগতঃ সন্ধীন্ শূলাটোপৌ করোতি চ ||২১|| (সু. নি. অ. ১৭) |

সন্ধিগতবাতলক্ষণমাহ– হন্তীত্যাদি| হন্তি সন্ধিগতঃ সন্ধীনিতি সন্ধিবিশ্লেষং স্তম্ভাদিকং বা করোতি||২১||

Adhikarana pittakaphAvRutAnAM prANAdInAM lakShaNAni (22-26) · Śloka 27

(প্রাণোদানৌ সমানশ্চ ব্যানশ্চাপান এব চ | স্থানস্থা মারুতাঃ পঞ্চ যাপযন্তি শরীরিণম্) | (সু. নি. অ. ১) | প্রাণে পিত্তাবৃতে ছর্দির্দাহশ্চৈবোপজাযতে | দৌর্বল্যং সদনং তন্দ্রা বৈরস্যং চ কফাবৃতে ||২২|| (সু. নি. অ. ১) | উদানে পিত্তযুক্তে তু দাহো মূর্ছা ভ্রমঃ ক্লমঃ | অস্বেদহর্ষৌ মন্দোঽগ্নিঃ শীততা চ কফাবৃতে ||২৩|| স্বেদদাহৌষ্ণ্যমূর্ছাঃ স্যুঃ সমানে পিত্তসংবৃতে | কফেন সক্তে বিণ্মূত্রে গাত্রহর্ষশ্চ জাযতে ||২৪|| অপানে পিত্তযুক্তে তু দাহৌষ্ণ্যং রক্তমূত্রতা | অধঃকাযে গুরুত্বং চ শীততা চ কফাবৃতে ||২৫|| ব্যানে পিত্তাবৃতে দাহো গাত্রবিক্ষেপণং ক্লমঃ | স্তম্ভনো দণ্ডকশ্চাপি শূলশোথৌ কফাবৃতে ||২৬|| (সু. নি. অ. ১) |২৭|

পিত্তকফাবৃতানাং প্রাণাদীনামর্ধার্ধশ্লোকেন লিঙ্গান্যাহ– প্রাণ ইত্যাদি| গাত্রহর্ষো রোমাঞ্চঃ| দণ্ডকো দণ্ডবত্ স্তম্ভঃ| পরস্পরং চ প্রাণাদীনামাবরণানি বিংশতির্ভবন্তি| যদুক্তং চরকে– ‘‘মারুতানাং হি পঞ্চানামন্যোন্যাবরণং শৃণু|’’ (চ. চি. অ. ২৮) ইত্যাদি| এষাং চ লক্ষণং চরক এব দ্রষ্টব্যম্ বিদেহে চৈক এব বাযুঃ স্থানকর্মভেদাত্ পঞ্চেত্যাহুঃ, সংসর্গিদ্রব্যত্বেনৈকাশ্রযে জলবত্পৃথগবস্থানানুপপত্তেঃ| ঈশানাঽপ্যাহ– ‘‘যথৈকো দেবদত্তঃ স্থানভেদাদ্ গৃহস্থো বানপ্রস্থঃ, কর্মভেদাত্ কুম্ভকারো মালাকার ইত্যুচ্যতে তথা বাযুরপি’’ ইতি||২২-২৬||

Adhikarana AkShepakasya sAmAnyalakShaNAni (27) · Śloka 27

যদা তু ধমনীঃ সর্বাঃ কুপিতোঽভ্যেতি মারুতঃ | তদাঽঽক্ষিপত্যাশু মুহুর্মুহুর্দেহং মুহুশ্চরঃ ||২৭|| মুহুর্মুহুশ্চাক্ষেপণাদাক্ষেপক ইতি স্মৃতঃ | (সু. নি. অ. ১) |

আক্ষেপকস্য সামান্যলক্ষণমাহ– যদা ত্বিত্যাদি| সর্বা ইতি ঊর্ধ্বাধস্তির্যগ্গাঃ| আক্ষিপতি দেহং হস্ত্যারূঢপুরুষস্যেব গাত্রং চালযতি| মুহুশ্চর ইতি হেতুগর্ভবিশেষণম্| ‘বহিশ্চর’ ইতি পাঠান্তরে কোষ্ঠাদ্বহিঃ শাখাগতশ্চরন্নাক্ষেপকং করোতীত্যর্থঃ| চন্দ্রিকাকারস্তু এতন্নানুমন্যতে, স্থানগাম্ভীর্যাদাক্ষেপকস্য তদারম্ভকবাযোর্বহিশ্চরত্বাযুক্তত্বাত্||২৭||

Adhikarana apatantrakalakShaNam apatAnakalakShaNaM ca (28-31) · Śloka 31

ক্রুদ্ধঃ স্বৈঃ কোপনৈর্বাযুঃ স্থানাদূর্ধ্বং প্রবর্ততে ||২৮|| পীডযন্ হৃদযং গত্বা শিরঃশঙ্খৌ চ পীডযন্ | ধনুর্বন্নমযেদ্গাত্রাণ্যাক্ষিপেন্মোহযেত্তদা ||২৯|| স কৃচ্ছ্রাদুচ্ছ্বসেচ্চাপি স্তব্ধাক্ষোঽথ নিমীলকঃ | কপোত ইব কূজেচ্চ নিঃসঞ্জ্ঞঃ সোঽপতন্ত্রকঃ ||৩০|| দৃষ্টিং সংস্তভ্য সঞ্জ্ঞাং চ হত্বা কণ্ঠেন কূজতি | হৃদি মুক্তে নরঃ স্বাস্থ্যং যাতি মোহং বৃতে পুনঃ ||৩১|| বাযুনা দারুণং প্রাহুরেকে তদপতানকম্ | (চ. সি. অ. ১) |

অস্যৈবাবস্থাবিশেষাবপতন্ত্রকাপতানকাবাহ– ক্রুদ্ধ ইত্যারভ্য একে তদপতানকমিত্যন্তেন| স্বৈঃ কোপনৈরিত্যনেন রূক্ষাদিকুপিতঃ স্বতন্ত্রো ন ত্বাবরণকুপিত ইতীশানঃ| নিমীলিতাক্ষঃ স্তব্ধাক্ষো বা ভবতীত্যর্থঃ| আক্ষেপকশ্চতুর্বিধো ভবতি– দণ্ডাপতানকোঽভ্যন্তরাযামো বহিরাযামোঽভিঘাতজশ্চেতি| দৃঢবলেন যদ্যপি আক্ষেপকাত্ পূর্বমন্তরাযামবহিরাযামৌ পঠিতৌ, তথাঽপ্যাক্ষেপকবিশেষাবেতৌ মন্তব্যৌ, সুশ্রুতদর্শনাত্||২৮-৩১||

Adhikarana daNDApatAnakalakShaNam (32) · Śloka 32

কফান্বিতো ভৃশং বাযুস্তাস্বেব যদি তিষ্ঠতি ||৩২|| দণ্ডবত্ স্তম্ভযেদ্দেহং স তু দণ্ডাপতানকঃ | (সু. নি. অ. ১) |

এষাং লক্ষণমাহ– কফান্বিত ইত্যাদি| ভৃশং কফান্বিত ইত্যনেন পিত্তমপি ন বার্যত ইত্যাহুঃ| চরকে ত্বস্যাসাধ্যত্বং কেবলবাতজত্বেন দ্র্ষ্টব্যম্| যদাহ– “পাণিপাদশিরঃপৃষ্ঠশ্রোণীঃ স্তভ্নাতি মারুতঃ| দণ্ডবত্ স্তব্ধগাত্রস্য দণ্ডকঃ সোঽনুপক্রমঃ||” (চ. চি. অ. ২৮) ইতি| তাস্বিতি সর্বধমনীষু||৩২||

Adhikarana dhanuHstambhalakShaNam (33) · Śloka 33

ধনুস্তুল্যং নমেদ্যস্তু স ধনুঃস্তম্ভসঞ্জ্ঞকঃ ||৩৩|| (সু. নি. অ. ১) |

অন্তরাযামবহিরাযামযোঃ সাধারণং রূপমাহ– ‘ধনুস্তুল্যং নমেদ্যস্তু স ধনুস্তম্ভসঞ্জ্ঞকঃ’ ইতি||৩৩||

Adhikarana abhyantarAyAmalakShaNaM bAhyAyAmalakShaNaM ca (34-36) · Śloka 36

অঙ্গুলীগুল্ফজঠরহৃদ্বক্ষোগলসংশ্রিতঃ | স্নাযুপ্রতানমনিলো যদাঽঽক্ষিপতি বেগবান্ ||৩৪|| বিষ্টব্ধাক্ষঃ স্তব্ধহনুর্ভগ্নপার্শ্বঃ কফং বমন্ | অভ্যন্তরং ধনুরিব যদা নমতি মানবম্ ||৩৫|| তদাঽস্যাভ্যন্তরাযামং কুরুতে মারুতো বলী | বাহ্যস্নাযুপ্রতানস্থো বাহ্যাযামং করোতি চ ||৩৬|| তমসাধ্যং বুধাঃ প্রাহুর্বক্ষঃকট্যূরুভঞ্জনম্ | (সু. নি. অ. ১) |

বিশেষলক্ষণমাহ– অঙ্গুলীত্যাদি| বক্ষো বাহুদ্বযান্তরম্| হৃদযং তদভ্যন্তরং দ্ব্যঙ্গুলম্| স্নাযুপ্রতানং লতাবদনেকপ্ররোহং স্নাযুজালম্; স্নাযুরিত্যুপলক্ষণং, তেন সিরাকণ্ডরযোরপি গ্রহণম্| যদুক্তং তন্ত্রান্তরে– “মহাহেতুর্বলী বাযুঃ সিরাঃ সস্নাযুকণ্ডরাঃ| মন্যাপৃষ্ঠাশ্রিতা বাহ্যাঃ সংশোষ্যাযামযেদ্বহিঃ||” ইত্যাদি| অভ্যন্তরাযামং ক্রোডে নতং, বাহ্যাযামং পৃষ্ঠে নতম্| অন্তরাযামবহিরাযামাভ্যাং তন্ত্রান্তরোক্তকুব্জস্যাবরোধঃ| যদুক্তম্– “হৃদযং যদি বা পৃষ্ঠমুন্নতং ক্রমশঃ সরুক্| ক্রুদ্ধো বাযুর্যদা কুর্যাত্তদা তং কুব্জমাদিশেত্||” ইতি||৩৪-৩৬||

Adhikarana abhighAtajAkShepakalakShaNam (37) · Śloka 37

( হৃদযং যদি বা পৃষ্ঠমুন্নতং ক্রমশঃ সরুক্ | ক্রুদ্ধো বাযুর্যদা কুর্যাত্ তদা তং কুব্জমাদিশেত্) | কফপিত্তান্বিতো বাযুর্বাযুরেব চ কেবলঃ ||৩৭|| কুর্যাদাক্ষেপকং ত্বন্যং চতুর্থমভিঘাতজম্ | (সু. নি. অ. ১) |

উক্তানামাক্ষেপকপ্রকারাণাং কফপিত্তানুবন্ধমাহ– কফপিত্তান্বিত ইত্যাদি| এতচ্চ দণ্ডাপতানকলক্ষণমেব জেজ্জটেন ব্যাখ্যাতম্| পিত্তকফানুবন্ধশ্চাত্র শৈত্যশোথগুরুত্বানীত্যাদিনোক্তলক্ষণ এব বোধ্যঃ| চতুর্থমভিঘাতজমিতি দণ্ডাপতানকাদিত্রিতযাপেক্ষ্য চতুর্থত্বম্, অভিঘাতজং দণ্ডাদ্যভিঘাতকুপিতবাতজম্; অস্য চ লক্ষণম্– ‘‘যদা তু ধমনীঃ সর্বাঃ’’ ইত্যাদিনোক্তসামান্যলক্ষণং দ্রষ্টব্যম্||৩৭||

Adhikarana apatAnakasyAsAdhyalakShaNam (38) · Śloka 38

গর্ভপাতনিমিত্তশ্চ শোণিতাতিস্রবাচ্চ যঃ ||৩৮|| অভিঘাতনিমিত্তশ্চ ন সিধ্যত্যপতানকঃ | (সু. নি. অ. ১) |

অসাধ্যত্বমাহ– গর্ভপাতেত্যাদি| গদাধরস্ত্বাহ– কফপিত্তান্বিত ইত্যাদিনা নিমিত্তভেদেনাক্ষেপকশ্চতুর্ধা ইতি; তদ্যথা– একঃ কফান্বিতেন বাতেন, দ্বিতীযঃ পিত্তান্বিতেন, তৃতীযঃ কেবলেন, চতুর্থোঽভিঘাতেনেতি| অত্র পক্ষে গর্ভপাতশোণিতাতিস্রাবজৌ কেবলবাতেন গ্রাহ্যৌ| এতেষাং চ মুহুর্মুহুরাক্ষেপণং বোধ্যম্ আক্ষেপকবিশেষত্বাত্||৩৮||

Adhikarana pakShavadhasya samprAptipUrvakaM lakShaNam (39-41) · Śloka 41

গৃহীত্বাঽর্ধং তনোর্বাযুঃ সিরাঃ স্নাযূর্বিশোষ্য চ ||৩৯|| পক্ষমন্যতরং হন্তি সন্ধিবন্ধান্ বিমোক্ষযন্ | কৃত্স্নোঽর্ধকাযস্তস্য স্যাদকর্মণ্যো বিচেতনঃ ||৪০|| একাঙ্গরোগং তং কেচিদন্যে পক্ষবধং বিদুঃ | সর্বাঙ্গরোগস্তদ্বচ্চ সর্বকাযাশ্রিতেঽনিলে ||৪১|| (বা. নি. অ. ১৫) |

পক্ষবধমাহ– গৃহীত্বেত্যাদি| অর্ধমিতি অর্ধমর্যাদযা অর্ধনারীশ্বরবত্| পক্ষং বাহুকক্ষপার্শ্বাদিভাগম্, অন্যতরমিতি বামং দক্ষিণং বা| সন্ধিবন্ধান্ কফসহিতস্নাযুভির্বৃতান্ মোক্ষযন্নিতি গদাধরঃ; অত এব “সিরাঃ স্নাযূর্বিশোষ্য” ইত্যুক্তম্| অর্ধকায ইত্যুক্তেঽপি কৃত্স্নগ্রহণং যুগপত্ সর্বার্ধাঙ্গব্যাপ্ত্যর্থম্| অকর্মণ্য ঈষচ্চেষ্টাক্ষমঃ| বিচেতনোঽল্পচেতনঃ, ঈষত্স্পর্শাদিজ্ঞানবানিত্যর্থঃ| তদ্বচ্চেত্যনেন সিরাঃ স্নাযূর্বিশোষ্য চেত্যাদিসম্প্রাপ্তিং লক্ষণং চাতিদিশতি||৩৯-৪১||

Adhikarana pakShavadhasya sAdhyAsAdhyavicAraH (42-43) · Śloka 43

দাহসন্তাপমূর্ছাঃ স্যুর্বাযৌ পিত্তসমন্বিতে | শৈত্যশোথগুরুত্বানি তস্মিন্নেব কফান্বিতে ||৪২|| শুদ্ধবাতহতং পক্ষং কৃচ্ছ্রসাধ্যতমং বিদুঃ | সাধ্যমন্যেন সংযুক্তমসাধ্যং ক্ষযহেতুকম্ ||৪৩|| (সু. নি. অ. ১) | (গর্ভিণীসূতিকাবালবৃদ্ধক্ষীণেষ্বসৃক্স্রুতে | পক্ষাঘাতং পরিহরেত্ বেদনারহিতো যদি) |

তস্যৈব সাধ্যাসাধ্যজ্ঞানার্থমাহ– দাহেত্যাদি| এতচ্চ লক্ষণমন্যত্রাপি বাতরোগে দ্রষ্টব্যম্, অত এব সামান্যেন বাযাবিতি কৃতবান্| শুদ্ধঃ কেবলঃ| অন্যেনেতি কফেন, পিত্তেন বা| ক্ষযহেতুকমিতি ধাতুক্ষযকুপিতশুদ্ধবাতজমিতি||৪২-৪৩||

Adhikarana arditasya nidAnasamprAptipUrvakaM lakShaNam (44-46) · Śloka 46

উচ্চৈর্ব্যাহরতোঽত্যর্থং খাদতঃ কঠিনানি বা | হসতো জৃম্ভতো বাঽপি ভারাদ্বিষমশাযিনঃ ||৪৪|| শিরোনাসৌষ্ঠচিবুকললাটেক্ষণসন্ধিগঃ | অর্দযত্যনিলো বক্ত্রমর্দিতং জনযত্যতঃ | বক্রীভবতি বক্ত্রার্ধং গ্রীবা চাপ্যপবর্ততে ||৪৫|| শিরশ্চলতি বাক্সঙ্গো নেত্রাদীনাং চ বৈকৃতম্ | গ্রীবাচিবুকদন্তানাং তস্মিন্ পার্শ্বে চ বেদনা ||৪৬|| (যস্যাগ্রজো রোমহর্ষো বেপথুর্নেত্রমাবিলম্ | বাযুরূর্ধ্বং ত্বচি স্বাপস্তোদো মন্যাহনুগ্রহঃ) | তমর্দিতমিতি প্রাহুর্ব্যাধিং ব্যাধিবিচক্ষণাঃ | (সু. নি. অ. ১) |

অর্দিতমাহ– উচ্চৈরিত্যাদি| অর্দযতি পীডযতি| অপবর্ততে বক্রীভবতি| চলতি কম্পতে| বাক্সঙ্গোঽনির্গমো বচনস্য| আদিশব্দেন ভ্রূগণ্ডাদীনাং গ্রহণম্| বৈকৃতং বেদনাস্ফুরণবক্রত্বাদিকম্| গ্রীবেত্যাদি যস্মিন্ পার্শ্বেঽর্দিতং তস্মিন্ গ্রীবাদীনাং বেদনেতি যোজ্যম্| তন্ত্রান্তরে তু মুখার্ধবচ্ছরীরার্ধব্যাপকোঽপ্যর্দিতঃ পঠিতঃ| যদাহ দৃঢবলঃ– ‘অর্ধে তস্মিন্ মুখার্ধে বা কেবলে স্যাত্তদর্দিতম্|’ (চ. চি. অ. ২৮) ইতি| ননু, যদ্যেবং তদা অর্দিতার্ধাঙ্গবাতযোঃ কো ভেদঃ? উচ্যতে– বেগিত্বেনার্দিতে কদাচিদ্বেদনা ভবতি, অর্ধাঙ্গবাতে তু সর্বদৈবেতি ভেদঃ; অথবা যথোক্তঃ সর্বাঙ্গোঽর্দিতঃ তদ্বিপরীতস্ত্বর্ধাঙ্গবাত ইত্যাহুঃ| সুশ্রুতেন তু মুখমাত্র এবার্দিতঃ পঠিতঃ, অর্ধশরীরস্যার্ধাঙ্গবাতেন লব্ধত্বাত্| স এবাত্র মাধবেন লিখিতঃ||৪৪-৪৬||

Adhikarana arditasyAsAdhyalakShaNam (47) · Śloka 47

ক্ষীণস্যানিমিষক্ষস্য প্রসক্তাব্যক্তভাষিণঃ ||৪৭|| ন সিধ্যত্যর্দিতং গাঢং ত্রিবর্ষং বেপনস্য চ | (সু. নি. অ. ১) |

তস্যাসাধ্যলক্ষণমাহ– ক্ষীণস্যেত্যাদি| অনিমিষাক্ষস্য নিমেষাসমর্থচক্ষুষঃ| প্রসক্তাব্যক্তভাষিণ ইতি প্রসক্তং প্রকর্ষেণ সক্তমপ্রবৃত্তম্, অব্যক্তং প্রপীডিতবর্ণপদং, ভাষিতুং শীলং যস্য স তথা| অন্যে তু প্রসক্তং নিরন্তরমাহুঃ; তন্ন, চরকে ‘‘দীনা জিহ্বা সমুত্ক্ষিপ্তা কালে সজ্জতি চাস্য বাক্|’’ (চ. চি. অ. ২৮) ইতি বচনাত্| ত্রিবর্ষমিতি অতীতবর্ষত্রযম্; অথবা ত্রযাণাং মুখনাসাচক্ষুষাং বর্ষঃ স্রবণং যত্র তত্তথেত্যাহুঃ||৪৭||

Adhikarana AkShepakAdInAM vegashAntau svasthatvam (48) · Śloka 48

গতে বেগে ভবেত্ স্বাস্থ্যং সর্বেষ্বাক্ষেপকাদিষু ||৪৮|| (বা. নি. অ. ১৫) |

আক্ষেপকাদীনামর্দিতান্তানাং বেগিত্বমাহ– গত ইত্যাদি| স্বাস্থ্যং পীডালাঘবং, ভারাপগমে সুখিত্বব্যপদেশবত্||৪৮||

Adhikarana hanugrahalakShaNam (49-50) · Śloka 50

জিহ্বানির্লেখনাচ্ছুষ্কভক্ষণাদভিঘাততঃ | কুপিতো হনুমূলস্থঃ স্রংসযিত্বাঽনিলো হনুম্ ||৪৯|| করোতি বিবৃতাস্যত্বমথবা সংবৃতাস্যতাম্ | হনুগ্রহঃ স তেন স্যাত্ কৃচ্ছ্রাচ্চর্বণভাষণম্ ||৫০|| (বা. নি. অ. ১৫) |

হনুগ্রহমাহ– জিহ্বেত্যাদি| হনুমূলস্থঃ কপোলমূলস্থঃ| হনুং স্রংসযিত্বাঽধঃ কৃত্বা| বিবৃতাস্যত্বম্ আস্যবিবৃতিং, সংবৃতাস্যতাম্ আস্যসংবৃতিং; সা চ বাযোরনিযতকারিত্বাত্||৪৯-৫০||

Adhikarana manyAstambhalakShaNam (51) · Śloka 51

দিবাস্বপ্নাসনস্থানবিবৃতোর্ধ্বনিরীক্ষণৈঃ | মন্যাস্তম্ভং প্রকুরুতে স এব শ্লেষ্মাণঽঽবৃতঃ ||৫১|| (সু. নি. অ. ১) |

মন্যাস্তম্ভমাহ– দিবাস্বপ্নেত্যাদি| স এবেতি বাতঃ||৫১||

Adhikarana jihvAstambhalakShaNam (52) · Śloka 52

বাগ্বাহিনীসিরাসংস্থো জিহ্বাং স্তম্ভযতেঽনিলঃ | জিহ্বাস্তম্ভঃ স তেনান্নপানবাক্যেষ্বনীশতা ||৫২|| (বা. নি. অ. ১৫) |

জিহ্বাস্তম্ভমাহ– বাগিত্যাদি| বাগ্বাহিনীসিরাসংস্থ ইতি বাগ্বাহিনী যা সিরা তত্র সংস্থ ইতি যোজ্যং, সমস্তপক্ষে “পুংবত্ কর্মধারযজাতীযদেশীযেষু” ইত্যনেন পুংবদ্ভাবপ্রাপ্তেঃ| অন্নপানবাক্যেষ্বনীশতেতি অন্নপানাভ্যবহারবচনেষু অসামর্থ্যম্||৫২||

Adhikarana sirAgrahasya samprAptipUrvakaM lakShaNam (53) · Śloka 53

রক্তমাশ্রিত্য পবনঃ কুর্যান্মূর্ধধরাঃ সিরাঃ | রূক্ষাঃ সবেদনাঃ কৃষ্ণাঃ সোঽসাধ্যঃ স্যাত্ সিরাগ্রহঃ ||৫৩|| (বা. নি. অ. ১৫) |

সিরাগ্রহমাহ– রক্তমিত্যাদি| মূর্ধধরা ইতি গ্রীবাগতাঃ, তাসাং রূক্ষত্বং বেদনাবত্ত্বং কৃষ্ণত্বং চ কুর্যাত্| সোঽসাধ্য ইতি স্বরূপেণৈব, কাকণকুষ্ঠবত্| শিরোগ্রহ ইতি পাঠান্তরেঽপি শিরোধারকসিরাদুষ্ট্যা শিরোবেদনাকারিত্বাত্ ‘শিরোগ্রহ’ ইতি ব্যপদেশঃ, লক্ষণং তু তদেব||৫৩||

Adhikarana gRudhrasIlakShaNam (54) · Śloka 54

স্ফিক্পূর্বা কটিপৃষ্ঠোরুজানুজঙ্ঘাপদং ক্রমাত্ | গৃধ্রসী স্তম্ভরুক্তোদৈর্গৃহ্ণাতি স্পন্দতে মুহুঃ ||৫৪|| বাতাদ্বাতকফাত্তন্দ্রাগৌরবারোচকান্বিতা | (চ. চি. অ. ২৮) |

গৃধ্রসীমাহ– স্ফিক্পূর্বেত্যাদি| স্ফিক্ পূর্বা প্রথমতো গ্রাহ্যা স্তম্ভরুক্তোদৈর্যস্যাঃ সা স্ফিক্পূর্বা; ঈশানস্তু পূর্বা প্রথমা গৃধ্রসী বাতাদিতি যোজযতি, এষা চ ব্যাখ্যা স্ফিক্শব্দস্য নপুংসকত্বেন ‘পূর্বা স্ফিক্ কটীপৃষ্ঠ’ ইত্যাদিনা পাঠেন বোপপদ্যতে নান্যথা| ‘স্ফিক্পূর্বম্’ ইতি পাঠান্তরং জানুজঙ্ঘাপদমিত্যনেন যোজ্যম্| ক্রমাদিতি ন যুগপত্| বাতাদিতি ছেদঃ| বাতকফারব্ধা গৃধ্রসী, সা উক্তবাতলক্ষণযুক্তাঽপি তন্দ্রাগৌরবাদিযুক্তা ভবতীতি গৃধসীদ্বযমুক্তম্||৫৪||

Adhikarana gRudhrasyA visheShalakShaNam (55-56) · Śloka 56

বাতজাযাং ভবেত্তোদো দেহস্যাপি প্রবক্রতা | জানুকট্যূরুসন্ধীনাং স্ফুরণং স্তব্ধতা ভৃশম্ ||৫৫|| বাতশ্লেষ্মোদ্ভবাযাং তু নিমিত্তং বহ্নিমার্দবম্ | তন্দ্রা মুখপ্রসেকশ্চ ভক্তদ্বেষস্তথৈব চ ||৫৬||

গৃধ্রস্যাঃ পুনরপি বিশেষলক্ষণমাহ– বাতজাযামিত্যাদি| সুগমম্||৫৫-৫৬||

Adhikarana vishvAcIlakShaNam (57) · Śloka 57

তলং প্রত্যঙ্গুলীনাং যাঃ কণ্ডরা বাহুপৃষ্ঠতঃ ||৫৭|| বাহ্বোঃ কর্মক্ষযকরী বিশ্বাচী চেতি সোচ্যতে | (সু. নি. অ. ১) |

বিশ্বাচীমাহ– তলমিত্যাদি| তলং হস্তস্যোপরিভাগঃ, তলশব্দোঽত্র উপরিবচনঃ, যথা– ভূতলমিতি গযদাসঃ| তেনাযমর্থঃ– বাহ্বোঃ পৃষ্ঠং বাহুপৃষ্ঠং, তত আরভ্য হস্ততলং লক্ষীকৃত্যাঙ্গুলীনাং যাঃ কণ্ডরাস্তাঃ সন্দূষ্য বাহ্বোঃ কর্মক্ষযকরী যা সা বিশ্বাচী| বাহ্বোঃ কর্ম গ্রহণাকুঞ্চনাদি, দ্বিত্বং চাত্র সম্ভবপরং, তেনৈকবাহাবপি ভবতি বাতরক্তবত্| বিশ্বাচী চেতি চকারেণ গৃধ্রসীবিশ্বাচ্যোঃ খল্লীসঞ্জ্ঞাং দর্শযতি, তযোরপি করমূলাবমোটনকারিত্বাত্; যদুক্তং হারীতে– ‘‘বিশ্বাচী গৃধ্রসী চোক্তা খল্লী তীব্ররুজান্বিতা|’’ ইতি গযদাসঃ| চক্রস্ত্বাহ– চরকে “খল্লী তু পাদজঙ্ঘোরুকরমূলাবমোটনী|” (চ. চি. অ. ২৮) ইত্যনেন বিশ্বাচ্যাঃ পৃথগেব খল্লী পঠিতা, সুশ্রুতেন তু খল্লী ন পঠিতৈব; নহি তেন তন্ত্রান্তরোক্তসর্ববিকারাঃ পঠ্যন্তে, চরকক্তপরস্পরবাতাবরণলক্ষণমেব ন পঠিতং; হারীতেন তু তীব্ররুজাযোগাদ্ গৃধ্রসীবিশ্বাচ্যোঃ খল্লীত্বং পঠিত্বং, ভবতি হি ধর্মান্তরযোগাত্ কস্যচিদ্বিকারস্য রোগান্তরত্বং; যথা– অষ্ঠীলৈব প্রত্যষ্ঠীলা, অশ্মর্যেব শর্করা, পাণ্ডুরোগ এব কামলেত্যাদি||৫৭||

Adhikarana kroShTukashIrShalakShaNam (58) · Śloka 58

বাতশোণিতজঃ শোথো জানুমধ্যে মহারুজঃ ||৫৮|| জ্ঞেযঃ ক্রোষ্টুকশীর্ষস্তু স্থূলঃ ক্রোষ্টুকশীর্ষবত্ | (সু. নি. অ. ১) |

ক্রোষ্টুকশীর্ষমাহ– বাতেত্যাদি| বাতশোণিতজ ইতি বাতরক্তাখ্যবিকারজঃ, চিকিত্সাভেদার্থং পৃথক্ পঠিত ইতি গযদাসঃ| বাতশোণিতাভ্যাং জাত ইতি জেজ্জটঃ| দৃশ্যতে হ্যযং বাতরক্তব্যতিরেকেণাপি; জানুদেশনিযতত্বেন বিশিষ্টলক্ষণত্বেন চেতরবাতরক্তশোথাদ্ভেদ ইতি| ক্রোষ্টুকশীর্ষবত্ শৃগালমস্তকবত্ স্থূলঃ||৫৮||

Adhikarana kha~jjalakShaNam (59) · Śloka 59

বাযুঃ কট্যাশ্রিতঃ সক্থ্নঃ কণ্ডরামাক্ষিপেদ্যদা ||৫৯|| খঞ্জস্তদা ভবেজ্জন্তুঃ পঙ্গুঃ সক্থ্নোর্দ্বযোর্বধাত্ | (সু. নি. অ. ১) |

খঞ্জমাহ– বাযুরিত্যাদি| সক্থ্নঃ ঊর্ধ্বজঙ্ঘাযাঃ, কণ্ডরাং মহাস্নাযুম্, আক্ষিপেত্ ঈষত্ ক্ষিপেত্, কিঞ্চিদ্গতিমত্ত্বাদিতি গযদাসঃ| সক্থ্নোরিতি দ্বিবচনেনৈব দ্বিত্বে লব্ধে দ্বযোরিতি পদেন নিযমযতি– সক্থিদ্বযস্যৈব বধাত্ পঙ্গুঃ, একসক্থিবধাত্ খঞ্জ ইতি; বধশ্চাত্র গমনাদিক্রিযানাশঃ||৫৯||

Adhikarana kalAyakha~jjalakShaNam (60) · Śloka 60

প্রক্রামন্ বেপতে যস্তু খঞ্জন্নিব চ গচ্ছতি ||৬০|| কলাযখঞ্জং তং বিদ্যান্মুক্তসন্ধিপ্রবন্ধনম্ | (সু. নি. অ. ১) |

খঞ্জবিশেষমাহ– প্রক্রামন্নিত্যাদি প্রক্রামন্নিতি গমনমারভমাণো বেপতে| প্রশব্দোঽযমাদিকর্মণি| খঞ্জন্নিব গচ্ছতি বিকলযন্নিব গচ্ছতি, গমনারম্ভেন অন্যেন সংসৃষ্টং বেপতে তেন খঞ্জাদস্য ভেদঃ| মুক্তেত্যাদিমিত্যাহুঃ| মুক্তসন্ধিপ্রবন্ধনমিতি শিথিলীকৃতসন্ধিবন্ধনম্| কলাযখঞ্জ ইতি শাস্ত্রে রূঢা সঞ্জ্ঞা; অযমেবান্যত্র খঞ্জবাত ইত্যুক্তঃ||৬০||

Adhikarana vAtakaNTakalakShaNam (61) · Śloka 61

রুক্ পাদে বিষমেন্যস্তে শ্রমাদ্বা জাযতে যদা ||৬১|| বাতেন গুল্ফমাশ্রিত্য তমাহুর্বাতকণ্টকম্ | (বা. নি. অ. ১৫) |

বাতকণ্টকমাহ– রুগিত্যাদি| বিষমপাদন্যাসকুপিতঃ শ্রমকুপিতো বা বাযুর্গুল্ফে বেদনাং জনযন্, বাতকণ্টকমিত্যাহুঃ; অযমেবান্যত্র ‘খুডুকাবাত’ ইত্যুক্তঃ||৬১||

Adhikarana pAdadAhalakShaNam (62) · Śloka 62

পাদযোঃ কুরুতে দাহং পিত্তাসৃক্সহিতোঽনিলঃ ||৬২|| বিশেষতশ্চঙ্ক্রমতঃ পাদদাহং তমাদিশেত্ | (সু. নি. অ. ১) |

পাদদাহমাহ– পাদযোরিত্যাদি| বিশেষতশ্চঙ্ক্রমত ইত্যনেন স্থিতস্য মন্দো দাহ ইতি দর্শযতি| বৈবর্ণ্যাদেরভাবাদ্বাতরক্তাদস্য ভেদঃ||৬২||

Adhikarana pAdaharShalakShaNam (63) · Śloka 63

হৃষ্যেতে চরণৌ যস্য ভবেতাং চাপি সুপ্তকৌ ||৬৩|| পাদহর্ষঃ স বিজ্ঞেযঃ কফবাতপ্রকোপতঃ | (সু. নি. অ. ১) |

পাদহর্ষমাহ– হৃষ্যেতে ইত্যাদি| হৃষ্যেতে হর্ষযুক্তৌ ভবতঃ, হর্ষশ্চ রোমাঞ্চপ্রাযঃ অন্তঃশীতো ঝিণিঝিণিবত্ বেদনাবিশেষ ইত্যাহুঃ; ঝিণিঝিণি তু ন চিরানুবন্ধিনী কেবলবাতজেতি ভেদঃ||৬৩||

Adhikarana aMsashoShalakShaNam (64) · Śloka 64

অংসদেশস্থিতো বাযুঃ শোষযেদংসবন্ধনম্ ||৬৪|| (সু. নি. অ. ১) |

অংসেত্যাদি| অংসেত্যাদিনা শ্লোকার্ধেনাংসশোষঃ কেবলবাতজ উচ্যতে| অংসবন্ধনকারকঃ শ্লেষ্মা অংসবন্ধনঃ; এতদনন্তরং ‘অংসশোষং জনযেত্’ ইতি শেষ ইতি কার্তিকঃ||৬৪||

Adhikarana avabAhukalakShaNam (65) · Śloka 65

সিরাশ্চাকুঞ্চ্য তত্রস্থো জনযেদববাহুকম্ |৬৫| (সু. নি. অ. ১) |

অববাহুকমাহ– সিরাশ্চেত্যাদিনা| তত্রস্থোংঽসদেশস্থঃ| অযং চ বাতকফজঃ| অন্যে তু মিলিত্বা অববাহুকলক্ষণমাহুঃ; তন্ন, যতঃ সুশ্রুতেনোক্তম্– ‘অংসশোষাববাহুকযোর্বাহুমধ্যে সিরাব্যধঃ’ (সু. শা. অ. ৮) ইতি| এতদনন্তরং সুশ্রুতেন বাধির্যং পঠিতম্– “যদা শব্দবহং বাযুঃ” (সু. নি. অ. ১) ইত্যাদিনা, মাধবেন তু প্রকরণানুরোধং মন্যমানেন কর্ণরোগ এব তত্ পঠিতং, কিন্তু সুশ্রুতেন বাতব্যাধৌ বাধির্যং পঠিত্বাঽপি বাধির্যকর্ণশূলৌ শালাক্যঽপি পঠিতৌ; পুনরুক্তমিতি চেত্; নৈব, সম্প্রাপ্তিভেদভিন্নত্বাত্; বাতব্যাধৌ শব্দবহমিত্যনেন কর্ণশষ্কুল্যবচ্ছিন্ননভোদেশ উক্তঃ, শালাক্যে চ শব্দবহাঃ সিরা ইত্যুক্তম্| মাধবেন তু কর্ণরোগে শব্দাশ্রবণত্বাবিশেষাদেতদেব তত্র পঠিতমিত্যবিরোধঃ|৬৫|–

Adhikarana mUkAdInAM lakShaNam (65) · Śloka 65

আবৃত্য বাযুঃ সকফো ধমনীঃ শব্দবাহিনীঃ ||৬৫|| নরান্ করোত্যক্রিযকান্মূকমিন্মিনগদ্গদান্ | (সু. নি. অ. ১) |

মূকাদীংস্ত্রীনাহ– আবৃত্যেত্যাদি| অক্রিযকান্ অবচনক্রিযকানিতি; নঞযমভাবে, ঈষদর্থে চ| আদ্যো মূকোঽবচনঃ, দ্বিতীযো মিন্মিনঃ সানুনাসিকসর্ববচনঃ, তৃতীযো গদ্গদো লুপ্তপদব্যঞ্জনাভিধাযী| এষাং চ সমানকারণাভিধানেঽপি দুষ্টেরুত্কর্ষাদিভিরদৃষ্টবশাদ্বা ভেদ ইত্যুন্নেযম্||৬৫||

Adhikarana tUnIlakShaNam (66) · Śloka 66

অধো যা বেদনা যাতি বর্চোমূত্রাশযোত্থিতা ||৬৬|| ভিন্দতীব গুদোপস্থং সা তূনী নাম নামতঃ | (সু. নি. অ. ১) |

তূনীমাহ– অধ ইত্যাদি| অধ ইতি গুদোপস্থম্| বেদনা শূলম্| বর্চোমূত্রাশযোত্থিতা পক্বাশযমূত্রাশযোত্থিতা, পক্বাশযমূত্রপুটযোর্ব্যস্তসমস্তযোর্জাতা| উপস্থং স্ত্রীপুংসযোর্গুহ্যম্| নামতঃ প্রসিদ্ধিতঃ||৬৬||

Adhikarana pratitUnIlakShaNam (67) · Śloka 67

গুদোপস্থোত্থিতা যা তু প্রতিলোমং প্রধাবিতা ||৬৭|| বেগৈঃ পক্বাশযং যাতি প্রতিতূনীতি সোচ্যতে | (সু. নি. অ. ১) |

প্রতিতূনীমাহ– গুদেত্যাদি| প্রতিলোমমিত্যূর্ধ্বম্| বেগৈর্বাতকৃতোদ্গমৈঃ| সেত্যনেন ‘ভিন্দতীব’ ইত্যতিদিশ্যতে||৬৭||

Adhikarana AdhmAnalakShaNaM, pratyAdhmAnalakShaNaM ca (68-69) · Śloka 69

সাটোপমত্যুগ্ররুজমাধ্মাতমুদরং ভৃশম্ ||৬৮|| আধ্মানমিতি তং বিদ্যাদ্ ঘোরং বাতনিরোধজম্ | বিমুক্তপার্শ্বহৃদযং তদেবামাশযোত্থিতম্ ||৬৯|| প্রত্যাধ্মানং বিজানীযাত্ কফব্যাকুলিতানিলম্ | (সু. নি. অ. ১) |

আধ্মানমাহ– সাটোপমিত্যাদি| সাটোপমিতি আটোপশ্চলচলনমিতি গযদাসঃ, গুডগুডাশব্দ ইতি কার্তিকঃ| আধ্মাতং বাতপূর্ণচর্মপুটকস্থানীযম্| উদরমিতি পক্বাশযঃ, প্রত্যাধ্মানস্য আমাশযসম্ভবত্বাত্| ঘোরমিতি কষ্টপ্রদম্| আমাশযসমুত্থত্বেন প্রত্যাসত্ত্যা পার্শ্বহৃদযযোরপি বেদানাশঙ্কানিরাসার্থমাহ– বিমুক্তেত্যাদি| তদেবেত্যনেন সাটোপাদিত্বমতিদিশতি| কফব্যাকুলিতানিলং কফাবৃতবাতম্||৬৮-৬৯||

Adhikarana aShThIlAlakShaNaM, pratyaShThIlAlakShaNaM ca (70-72) · Śloka 72

নাভেরধস্তাত্ সঞ্জাতঃ সঞ্চারী যদি বাঽচলঃ ||৭০|| অষ্ঠীলাবদ্ঘনো গ্রন্থিরূর্ধ্বমাযত উন্নতঃ | বাতাষ্ঠীলাং বিজানীযাদ্বহির্মার্গাবরোধিনীম্ ||৭১|| এতামেব রুজোপেতাং বাতবিণ্মূত্ররোধিনীম্ | প্রত্যষ্ঠীলামিতি বদেজ্জঠরে তির্যগুত্থিতাম্ ||৭২|| (সু. নি. অ. ১) |

অষ্ঠীলামাহ– নাভেরিত্যাদি| অষ্ঠীলা উত্তরাপথে বর্তুলঃ পাষাণবিশেষ ইতি জেজ্জটমতানুবাদী কার্তিকঃ, কর্মকারাণাং বর্তুলা দীর্ঘা লৌহভাণ্ডীতি গযদাসঃ| ঊর্ধ্বমাযত উপরিদীর্ঘঃ| উন্নতঃ তির্যগুন্নতঃ| বাতকৃতা অষ্ঠীলা বাতাষ্ঠীলেতি স্বরূপপরং, ব্যাবৃত্ত্যভাবাত্| বহির্মার্গাবরোধিনীং বাতমূত্রপুরীষাবরোধিনীম্| এতামিত্যাদি সৈব জঠরে তির্যগুত্থিতা তির্যগাযতা প্রত্যষ্ঠীলেতি ভেদঃ| বাতবিণ্মূত্ররোধিনীমিতি বিশেষপরম্||৭০-৭২||

Adhikarana bastau pratilome vAyau vividhamUtrarodhakavikArasambhavaH (73) · Śloka 73

মারুতেঽনুগুণে বস্তৌ মূত্রং সম্যক্ প্রবর্ততে | বিকারা বিবিধাশ্চাত্র প্রতিলোমে ভবন্তি চ ||৭৩|| (সু. নি. অ. ৩) |

অষ্ঠীলাব্যতিরিক্তামপি বাতবিকৃতিং মূত্ররোধিনীমাহ– মারুত ইত্যাদি| অনুগুণেঽনুলোমে| প্রতিলোমে প্রতিলোমগে মারুত ইতি সম্বন্ধঃ| বিকারা অশ্মরীমূত্রকৃচ্ছ্রাদযঃ||৭৩||

Adhikarana vepathulakShaNam (74) · Śloka 74

সর্বাঙ্গকম্পঃ শিরসো বাযুর্বেপথুসঞ্জ্ঞকঃ |৭৪|

বেপথুবাতবিকারমাহ– সর্বেত্যাদি| শিরসঃ কম্প ইতি সম্বন্ধঃ; শির ইত্যবযবোপলক্ষণং, তেন হস্তাদেরপি কম্পো বেপথুরিত্যর্থঃ|৭৪|–

Adhikarana khallIlakShaNam, UrdhvavAtalakShaNaM ca (74) · Śloka 74

খল্লী তু পাদজঙ্ঘোরুকরমূলাবমোটনী ||৭৪|| (চ. চি. অ. ২৮) |

খল্লীত্যাদি| খল্লী ‘সিরাবমোটন’ ইতি লোকে||৭৪||

Adhikarana UrdhvavAtalakShaNam (75) · Śloka 75

অধঃ প্রতিহতো বাযুঃ শ্লেষ্মণা মারুতেন বা | করোত্যুদ্গারবাহুল্যমূর্ধ্ববাতঃ স উচ্যতে ||৭৫||

অধঃ প্রতিহতো বাযুঃ শ্লেষ্মণা মারুতেন চ| করোত্যুদ্গারবাহুল্যমূর্ধ্ববাতং প্রচক্ষতে||৭৫||

Adhikarana anuktavAtarogasa~ggrahaH (76-77) · Śloka 77

স্থাননামানুরূপৈশ্চ লিঙ্গৈঃ শেষান্ বিনির্দিশেত্ | সর্বেষ্বেতেষু সংসর্গং পিত্তাদ্যৈরুপলক্ষযেত্ ||৭৬|| (চ. চি. অ. ২৮) | হনুস্তম্ভার্দিতাক্ষেপপক্ষাঘাতাপতানকাঃ | কালেন মহতা বাতা যত্নাত্ সিধ্যন্তি বা ন বা ||৭৭|| নরান্ বলবতস্ত্বেতান্ সাধযেন্নিরুপদ্রবান্ | (চ. চি. অ. ২৮) |

অনুক্তবাতরোগসঙ্গ্রহণার্থমাহ– স্থানেত্যাদি| স্থানানুরূপৈর্লিঙ্গৈর্যথা– কুক্ষিশূলং, পৃষ্ঠশূলং, নখভেদ ইত্যাদি| নামানুরূপৈর্লিঙ্গৈর্যথা– শূলমিত্যুক্তে কীলনিখাতবদ্বেদনাবিশেষ এব উচ্যতে, তথা ভেদতোদাদিভিরপি পীডাবিশেষ এব গম্যতে| বাতা ইতি বাতবিকারাঃ, কার্যকারণযোরভেদোপচারাত্| বাতাদিতি পাঠে তু বাতাদ্যে পক্ষবধাদয ইতি যোজ্যম্||৭৬-৭৭||

Adhikarana pUrvoktavAtarogANAM sAdhyAsAdhyavicAraH, upadravAshca (78-79) · Śloka 79

বিসর্পদাহরুক্সঙ্গমূর্ছারুচ্যগ্নিমার্দবৈঃ ||৭৮|| ক্ষীণমাংসবলং বাতা ঘ্নন্তি পক্ষবধাদযঃ | শূনং সুপ্তত্বচং ভগ্নং কম্পাধ্মাননিপীডিতম্ | রুজার্তিমন্তং চ নরং বাতব্যাধির্বিনাশযেত্ ||৭৯|| (সু. সূ. অ. ৩৩) |

বাতোপদ্রবানাহ– বিসর্পেত্যাদি| বাতা ইতি বাতবিকারাঃ, কার্যকারণযোরভেদোপচারাত্| বাতাদিতি পাঠে তু বাতাত্ পক্ষবধাদয ইতি যোজ্যম্| শূনমিত্যাদি শূনং সশোথম্| সুপ্তত্বচং স্পর্শানভিজ্ঞত্বগিন্দ্রিযম্||৭৮-৭৯||

Adhikarana prakRutisthasya vAyorli~ggaM kAryaM ca (80) · Śloka 80

অব্যাহতগতির্যস্য স্থানস্থঃ প্রকৃতিস্থিতঃ | বাযুঃ স্যাত্ সোঽধিকং জীবেদ্বীতরোগঃ সমাঃ শতম্ ||৮০|| (চ. চি. অ. ২৮) |

ইদানীং পঞ্চবিধস্যাপি প্রকৃতিস্থস্য বাযোর্লিঙ্গং কার্যং চাহ– অব্যাহতেত্যাদি| যস্যেতি পুরুষস্য, অব্যাহতগতিঃ অনবরুদ্ধমার্গঃ, স্থানস্থঃ স্বাশ্রযব্যবস্থিতঃ, প্রকৃতিস্থিতোঽক্ষীণশ্চাপ্রবৃদ্ধঃ, এতদ্বিশেষণত্রযং হেতুহেতুমদ্ভাবেন যোজ্যম্| বীতরোগো নীরোগঃ, কফপিত্তদুষ্টেরপি প্রেরকবাতেনান্তরীযকত্বাত্| অধিকং সমাঃ শতমিতি পঞ্চ দিনাধিকং সবিংশং বর্ষশতম্| যদাহ বরাহঃ আযুর্নিরূপণে– ‘সমাঃ ষষ্টির্দ্বিঘ্না মনুজকরিণাং পঞ্চ চ নিশাঃ|’ ইত্যাদি||৮০||

Adhikarana puShpikA · Śloka 22

ইতি শ্রীমাধবকরবিরচিতে মাধবনিদানে বাতব্যাধিনিদানং সমাপ্তম্ ||২২||

ইতি শ্রীবিজযরক্ষিতকৃতাযাং মধুকোশব্যাখ্যাযাং বাতব্যাধিনিদানং সমাপ্তম্||২২||