69. viṣarōganidānam

Adhikarana viShasya sthAvaraja~ggamabhedena dvaividhyam (1) · Śloka 1

অথ বিষরোগনিদানম্ | স্থাবরং জঙ্গমং চৈব দ্বিবিধং বিষমুচ্যতে | মূলাদ্যাত্মকমাদ্যং স্যাত্ পরং সর্পাদিসম্ভবম্ ||১||

পারিশেষ্যাদ্বিষরোগনিদানমুচ্যতে– স্থাবরমিত্যাদি| বিষাদজনকত্বাদ্বিষং; তচ্চ দ্বিবিধম্– স্থাবরং, জঙ্গমং চ| মূলাদ্যাত্মকমিতি আদ্যং স্থাবরং মূলাদিরূপং দশবিধং; যদুক্তং সুশ্রুতে “মূলং পত্রং ফলং পুষ্পং ত্বক্ ক্ষীরং সার এব চ| নির্যাসো ধাতবশ্চৈব কন্দশ্চ দশমঃ স্মৃতঃ||” (সু. ক. অ. ২) ইতি| তত্র ক্লীতকাশ্বমারকগুঞ্জাসুগন্ধগর্গরকরঘাটবিদ্যুচ্ছিখাঽনন্তা-বিজযানীত্যষ্টৌ মূলবিষাণি, বিষপত্রিকালম্বাসুরদারুকরম্ভমহাকরম্ভাণি পঞ্চ পত্রবিষাণি, কুমুদ্বতীবেণুকাকরম্ভমহাকরম্ভকর্কোটকরেণুকখদ্যোতক-চর্মরীভগন্ধাসর্পঘাতিনন্দনসারপাকানি দ্বাদশ ফলবিষাণি, বেত্রকাদম্ববল্লীজকরম্ভমহাকরম্ভাণি পঞ্চ পুষ্পবিষাণি, অন্ত্রপাচককর্তরীযশৈলেযকরম্ভনন্দনকরঘাটবরাটকানি সপ্ত ত্বঙ্নির্যাসসারবিষাণি, কুমুদঘ্নীস্নুহীজালক্ষীরীণি ত্রীণি ক্ষীরবিষাণি, ফেনাশ্মভস্ম হরিতালং চ দ্বে ধাতুবিষে, কালকূটবত্সনাভসর্ষপকপালকর্দমকবৈরাটকমুস্তকমহাবিষ-প্রপৌণ্ডরীকমূলকহলাহলশৃঙ্গিমর্কটকানি ত্রযোদশ কন্দবিষাণি, এতানি প্রাণহরাণি; এবং পঞ্চপঞ্চাশত্ স্থাবরাণি বিষাণি ভবন্তি| এষাং চ ব্যাধপুলিন্দাদিভ্যো ব্যক্তিজ্ঞানং কর্তব্যম্| পরং সর্পাদিসম্ভবমিতি পরং জঙ্গমং, তচ্চ ষোডশাভিধানম্– দৃষ্টিনিঃশ্বাসদংষ্ট্রানখমূত্রপুরীষশুক্রলালার্তবমুখসন্দংশপর্দিতগুদাস্থি-পিত্তশূকশবভেদাত্| পর্দিতং পাযুকৃতঃ কুত্সিতশব্দঃ; ‘পর্দ’ কুত্সিতে শব্দে, ইত্যস্য প্রযোগাত্| তত্র দৃষ্টিনিঃশ্বাসবিষা দিব্যাঃ সর্পাঃ, ভৌমাঃ সর্পা দংষ্ট্রাবিষাঃ, মার্জারমকরব্যাঘ্রাদযো দংষ্ট্রানখবিষাঃ, পিচ্চিটকৌণ্ডিন্যাদযো মূত্রপুরীষবিষাঃ, মূষিকাঃ শুক্রবিষাঃ, বৃশ্চিকবরট্যুচ্চিটিঙ্গাদয আরাবিষাঃ, লূতা লালার্তববিণ্মূত্রশুক্রমুখসন্দংশবিষাঃ, চিত্রশীর্ষকশতদারুকশারিকাদযো মুখসন্দংশদংষ্ট্রাপর্দিতগুদপুরীষবিষাঃ, বিষহতাস্থিমত্স্যাস্থিপ্রভৃতযোঽস্থিবিষাঃ, শকুলীমত্স্যাদযঃ পিত্তবিষাঃ, সূক্ষ্মতুণ্ডভ্রমরাদযঃ শূকবিষাঃ, কীটসর্পদেহা গতাসবঃ শববিষাঃ| এষাং চ সুশ্রুতস্য কল্পস্থানে বিস্তরো দ্রষ্টব্যঃ||১||

Adhikarana ja~ggamaviShasya sAmAnyali~ggam (2) · Śloka 3

নিদ্রাং তন্দ্রাং ক্লমং দাহমপাকং লোমহর্ষণম্ | শোথং চৈবাতিসারং চ জঙ্গমং কুরুতে বিষম্ ||২|| (চ. চি. অ. ২৩) |৩|

তত্র জঙ্গমবিষস্য বহ্বধিষ্ঠানত্বেন প্রাধান্যাত্ সর্ববেগানুগতং সামান্যলিঙ্গমাহ– নিদ্রামিত্যাদি| এতত্ সুবোধ্যম্||২||

Adhikarana sthAvaraviShasya sAmAnyali~ggam (3) · Śloka 4

স্থাবরং চ জ্বরং হিক্কাং দন্তহর্ষং গলগ্রহম্ | ফেনচ্ছর্দ্যরুচিশ্বাসং মূর্ছাং চ কুরুতে ভৃশম্ ||৩|| (চ. চি. অ. ২৩) |৪|

স্থাবরস্য সামান্যলিঙ্গমাহ– স্থাবরং চেত্যাদি| ফেনচ্ছর্দিরিতি ফেনস্য ছর্দিঃ||৩||

Adhikarana viShadAtRulakShaNam (4-7) · Śloka 7

ইঙ্গিতজ্ঞো মনুষ্যাণাং বাক্চেষ্টামুখবৈকৃতৈঃ | জানীযাদ্বিষদাতারমেভির্লিঙ্গৈশ্চ বুদ্ধিমান্ ||৪|| ন দদাত্যুত্তরং পৃষ্টো বিবক্ষুর্মোহমেতি চ | অপার্থং বহু সঙ্কীর্ণং ভাষতে চাপি মূঢবত্ ||৫|| হসত্যকস্মাত্ স্ফোটযত্যঙ্গুলীর্বিলিখেন্মহীম্ | বেপথুশ্চাস্য ভবতি ত্রস্তশ্চান্যোন্যমীক্ষতে ||৬|| বিবর্ণবক্ত্রো ধ্যামশ্চ নখৈঃ কিঞ্চিচ্ছিনত্ত্যপি | আলভেতাসনং দীনং করেণ ব শিরোরুহম্ ||৭|| বর্ততে বিপরীতং চ বিষদাতা বিচেতনঃ | (সু. ক. অ. ১) |

বিষদাতৃলক্ষণমাহ– ইঙ্গিতজ্ঞ ইত্যাদি| অভিপ্রাযসূচকম্ ঈহিতমিঙ্গিতং, তজ্জ্ঞো বৈদ্যো বাচা ক্রিযযা মুখবৈকৃত্যাদিনা চ বিষদাতারং জানীযাত্| এভির্বক্ষ্যমাণলক্ষণৈঃ| ন দদাত্যুত্তরং পৃষ্ট ইতি স্বীযাসত্কর্মজনিতব্যামোহাত্| অপার্থমিত্যনর্থকম্| সঙ্কীর্ণমিত্যস্ফুটম্| হসত্যকস্মাদিতি অহেতোরপি হসতি| ভযজবাযুজনিতপর্বব্যথাপনোদনাযাঙ্গুলীঃ স্ফোটযতি| ক্রিযান্তরকরণসূচনায মহীং বিলিখতি| ভীতঃ সন্ প্রত্যেকং বীক্ষতে| ধ্যাম ইতি দগ্ধসমবর্ণঃ| কিঞ্চিত্তৃণাদিকম্| বর্ততে বিপরীত ইতি বারং বারং পরিবর্ত্য তিষ্ঠতি||৪-৭||–

Adhikarana mUlaviSha-patraviSha-phalaviSha-puShpaviSha-tvaksAraniryAsaviSha-kShIraviSha-dhAtuviShalakShaNam (8-12) · Śloka 12

উদ্বেষ্টনং মূলবিষৈঃ প্রলাপো মোহ এব চ ||৮|| জৃম্ভণং বেপনং শ্বাসো মোহঃ পত্রবিষেণ তু | মুষ্কশোথঃ ফলবিষৈর্দাহোঽন্নদ্বেষ এব চ ||৯|| ভবেত্ পুষ্পবিষৈশ্ছর্দিরাধ্মানং শ্বাস এব চ | ত্বক্সারনির্যাসবিষৈরুপযুক্তৈর্ভবন্তি হি ||১০|| আস্যদৌর্গন্ধ্যপারুষ্যশিরোরুক্কফসংস্রবাঃ | ফেনাগমঃ ক্ষীরবিষৈর্বিড্ভেদো গুরুগাত্রতা ||১১|| হৃত্পীডনং ধাতুবিষৈর্মূর্ছা দাহশ্চ তালুনি | প্রাযেণ কালঘাতীনি বিষাণ্যেতানি নির্দিশেত্ ||১২|| (সু. ক. অ. ২) |

মূলাদিবিষাণাং প্রমাদাদুপযুক্তানাং প্রত্যেকং লক্ষণমাহ– উদ্বেষ্টনমিত্যাদি| উদ্বেষ্টনং দণ্ডবিমর্দনবদ্ব্যথা| মূলবিষৈরিত্যষ্টবিধৈরপি, এবং পত্রাদীনামুক্তানাং যাবত্সঙ্খ্যাকানামেকং সামান্যলক্ষণমবগন্তব্যম্| প্রাযেণ কালঘাতীনীতি এতানি নব মূলাদিবিষাণি কালান্তরেণ মারকাণি ভবন্তীত্যর্থঃ| কন্দবিষং তু ত্রযোদশবিধমতিতীক্ষ্ণত্বাদ্ব্যবাযিবিকাশ্যাদিগুণযোগাত্তদাত্বেন মারকম্||৮-১২||

Adhikarana viShaliptashastrahatali~ggam (13-15) · Śloka 15

সদ্যঃক্ষতং পচ্যতে যস্য জন্তোঃ স্রবেদ্রক্তং পচ্যতে চাপ্যভীক্ষ্ণম্ | কৃষ্ণীভূতং ক্লিন্নমত্যর্থপূতি ক্ষতান্মাংসং শীর্যতে চাপি যস্য ||১৩|| তৃষ্ণা মূর্ছা জ্বরদাহৌ চ যস্য দিগ্ধাহতং তং পুরুষং ব্যবস্যেত্ | লিঙ্গান্যেতান্যেব কুর্যাদমিত্রৈর্ব্রণে বিষং যস্য দত্তং প্রমাদাত্ ||১৪|| সপীতং গৃহধূমাভং পুরীষং যোঽতিসার্যতে | ফেনমুদ্বমতে চাপি বিষপীতং তমাদিশেত্ ||১৫|| (সু. ক. অ. ৩) |

বিষলিপ্তশস্ত্রহতস্য লিঙ্গমাহ– সদ্য ইত্যাদি| পচ্যতে চাপ্যভীক্ষ্ণমিতি সদ্যস্তাবত্ পচ্যতে, পশ্চাদপি পুনঃ পুনঃ পাকমেতি||১৩-১৫||

Adhikarana bhogimaNDalirAjilAnAM vAtapittakaphAtmakatvam (16) · Śloka 16

বাতপিত্তকফাত্মানো ভোগিমণ্ডলিরাজিলাঃ | যথাক্রমং সমাখ্যাতা দ্ব্যন্তরা দ্বন্দ্বরূপিণঃ ||১৬||

স্থাবরমভিধায জঙ্গমেষ্বতিতীক্ষ্ণত্বেন সর্পবিষে বাচ্যে তদাশ্রযান্ সর্পানাহ– বাতপিত্তকফাত্মান ইত্যাদি| ভোগী ফণী, মণ্ডলী মণ্ডলবদ্রথাঙ্গলাঙ্গলাদিরূপমণ্ডলযুক্তঃ| রাজিলশ্চিত্রদীর্ঘরেখাবান্; এতে যথাক্রমং বাতাদ্যাত্মানো বাতাদিপ্রকৃতযঃ| ব্যতিকরজান্ সর্পান্ দর্শযতি– দ্ব্যন্তরা দ্বন্দ্বরূপিণ ইতি| দ্বযোরন্তরং বিশেষো যেষু তে তথা| যথা– ফণিনা মণ্ডলিন্যাং গোনসা জাতাঃ, মণ্ডলিনা গোনসেন চ ফণিন্যাং কৃষ্ণসর্পাঃ, এবমন্যেঽপি জাতিসঙ্করা ঊহ্যাঃ| ‘ব্যন্তরা’ ইতি পাঠে স এবার্থঃ, বিশব্দস্য দ্ব্যর্থত্বাত্; তথা ‘বিভবান্মহানাকাশঃ’ ইত্যত্র ব্যাখ্যাতং, বিভবাদিতি দ্বিভাবাত্; দ্বিভাবশ্চ সর্বমূর্তদ্রব্যৈঃ সংযোগঃ সর্বত্র উপলম্ভশ্চেতি| দ্বন্দ্বরূপিণ ইতি দ্বযোঃ ফণিমণ্ডলিনোর্বাতপিত্তপ্রকৃতযোর্যত্ প্রকৃতিত্বং তন্মিলিতপ্রকৃতিত্বমেষামিত্যর্থঃ, বাতপিত্তপ্রকৃতযোরথবা দ্বযোর্যদ্দোষযো রূপং তদ্রূপমিত্যর্থঃ||১৬||

Adhikarana bhogiprabhRutibhiH kRutadaMsheShu vAtAdInAM li~ggam (17-18) · Śloka 18

দংশো ভোগিকৃতঃ কৃষ্ণঃ সর্ববাতবিকারকৃত্ | পীতো মণ্ডলিজঃ শোথো মৃদুঃ পিত্তবিকারবান্ ||১৭|| রাজিলোত্থো ভবেদ্দংশঃ স্থিরশোথশ্চ পিচ্ছিলঃ | পাণ্ডুঃ স্নিগ্ধোঽতিসান্দ্রসৃক্ সর্বশ্লেষ্মবিকারকৃত্ ||১৮||

ভোগিপ্রভৃতিকৃতদংশেষু বাতাদীনাং লিঙ্গমাহ– দংশো ভোগিকৃত ইত্যাদি| সর্ববাতবিকারকৃদিত্যনেনৈব কৃষ্ণত্বে সিদ্ধে তদুক্তিরবশ্যম্ভাবিত্বখ্যাপনার্থম্, এবমুত্তরত্রাপি পীতাদ্যভিধানম্||১৭-১৮||

Adhikarana vishiShTadeshAdidaShTasyAsAdhyatvam (19) · Śloka 19

অশ্বত্থদেবাযতনশ্মশানবল্মীকসন্ধ্যাসু চতুষ্পথেষু | যাম্যে চ দষ্টাঃ পরিবর্জনীযা ঋক্ষে সিরামর্মসু যে চ দষ্টাঃ ||১৯|| (সু. ক. অ. ৩) |

বিশিষ্টদেশাদিদষ্টস্যাসাধ্যত্বমাহ– অশ্বত্থেত্যাদি| যাম্যে চেতি ভরণ্যাম্| ঋক্ষে নক্ষত্রে| মর্মস্বিতি আশুঘাতিষু| যাম্যে চেতি চকারেণার্দ্রাশ্লেষামঘামূলকৃত্তিকানাং গ্রহণম্| যদুক্তমন্যত্র– “চৈত্যাযতনবল্মীকশ্মশানেষু চতুষ্পথে| আর্দ্রাশ্লেষামঘামূলকৃত্তিকাভরণীষু চ|| পঞ্চম্যাং সন্ধ্যযোর্দংশে মর্মস্বাশুহরেষু চ| দষ্টাঃ কষ্টেন জীবন্তি যদি দূতাদিসম্পদঃ||” ইতি||১৯||

Adhikarana darvIkaraviShasyAshughAtitvam, uShNe viShasya dviguNaprabhAvaM ca (20) · Śloka 20

দর্বীকরাণাং বিষমাশুঘাতি সর্বাণি চোষ্ণে দ্বিগুণীভবন্তি |২০| (সু. ক. অ. ৩) |

দর্বীত্যাদি| দর্বীকরাণাং বিষমাশু হন্তি অশ্বত্থাদৌ বিশেষেণ দর্বীকরাণামাশুমারকং; দর্বীকরাঃ ফণিনঃ| সর্বাণি চোষ্ণে দ্বিগুণীভবন্তীতি উষ্ণসংযোগে সতি সর্বাণি বিষাণি স্বরূপতো দ্বৈগুণ্যং ভজন্তে; “সর্বাণি চোক্তানি যথাক্রমেণ” ইতি পাঠান্তরে অযমর্থঃ– সর্বাণি ভোগিমণ্ডলিরাজিলবিষাণি যথাক্রমেণ যথোদ্দিষ্টক্রমেণ উক্তান্যশ্বত্থাদিষ্বাশুঘাতীনি| দর্বীকরবিষস্য পৃথগুপাদানং বিশেষার্থম্|২০|–

Adhikarana anyAvasthAsvapi viShasyAshughAtitvam (20) · Śloka 20

অজীর্ণপিত্তাতপপীডিতেষু বালেষু বৃদ্ধেষু বুভুক্ষিতেষু ||২০|| ক্ষীণক্ষতে মেহিনি কুষ্ঠযুক্তে রূক্ষেঽবলে গর্ভবতীষু চাপি | (সু. ক. অ. ৩) |

এবমপরেষ্বপি আশুঘাতিত্বং সম্ভবতি, তানাহ– অজীর্ণেত্যাদি| অজীর্ণপিত্তাতপপীডিতেষ্বিতি অজীর্ণিনি দোষত্রযপ্রকোপাত্, পিত্তাতপপীডিতযো রৌক্ষ্যাত্, বালবৃদ্ধযোরসম্পূর্ণক্ষীণধাতুত্বেন বিষবেগাসহত্বাত্, বুভুক্ষিতেষ্বিতি পিত্তবৃদ্ধ্যা উষ্ণদেহত্বাত্, ক্ষীণক্ষত ইতি ক্ষতক্ষীণে বহুলবাতদুষ্টেঃ, মেহিনি দোষত্রযপ্রকোপাত্, কুষ্ঠযুক্তে রক্তাদিদোষাত্, রূক্ষে বাতকোপাত্, অবলে ক্লেশাসহত্বাত্, গর্ভবতীষু গর্ভেণোত্ক্ষিপ্তদোষত্বাত্; এষু বিষমাশুঘাতীতি||২০||–

Adhikarana anyAvasthAsu viShasyAsAdhyatvam (21-24) · Śloka 24

শস্ত্রক্ষতে যস্য ন রক্তমেতি রাজ্যো লতাভিশ্চ ন সম্ভবন্তি ||২১|| শীতাভিরদ্ভিশ্চ ন রোমহর্ষো বিষাভিভূতং পরিবর্জযেত্তম্ | জিহ্মং মুখং যস্য চ কেশশাতো নাসাবসাদশ্চ সকণ্ঠভঙ্গঃ ||২২|| কৃষ্ণঃ সরক্তঃ শ্বযথুশ্চ দংশে হন্বোঃ স্থিরত্বং চ বিবর্জনীযঃ | বর্তির্ঘনা যস্য নিরেতি বক্ত্রাদ্রক্তং স্রবেদূর্ধ্বমধশ্চ যস্য ||২৩|| দংষ্ট্রানিপাতাশ্চতুরশ্চ যস্য তং চাপি বৈদ্যঃ পরিবর্জযেচ্চ | উন্মত্তমত্যর্থমুপদ্রুতং বা হীনস্বরং বাঽপ্যথ বা বিবর্ণম্ ||২৪|| সারিষ্টমত্যর্থমবেগিনং চ জ্ঞাত্বা নরং কর্ম ন তত্র কুর্যাত্ | (সু. ক. অ. ৩) |

ইদানীং সর্বথা বর্জনীযমাহ– শস্ত্রক্ষত ইত্যাদি| রাজ্যো লতাভিশ্চেতি রাজ্যো লেখাঃ লতাভিস্তাডনান্ন ভবন্তি| তদুক্তমালম্বাযনে– “নৈতি রক্তং ক্ষতাদ্যস্য লতাঘাতৈর্ন রাজিকাঃ| ন লোমহর্ষঃ শীতাদ্ভির্বর্জযেত্তং বিষার্দিতম্||” ইতি| জিহ্মং বক্রং, স্তব্ধমিতি কার্তিকঃ| কেশশাত ইতি কর্ষণাত্ কেশোত্পাটঃ| কণ্ঠভঙ্গো গ্রীবাযা অবিধারণম্| হন্বোঃ স্থিরত্বং হনুদ্বযস্য লগ্নত্বম্| বর্তির্ঘনেতি লালারূপা বর্তিঃ| রক্তং স্রবেদূর্ধ্বমধশ্চ যস্যেতি মুখনাসাগুদাদিভ্যঃ শোণিতস্রাবঃ| দংষ্ট্রানিপাতাশ্চতুরশ্চেতি চত্বার ইতি প্রাপ্তে চতুর ইতি নির্দেশঃ আগমবিধেরনিত্যত্বাত্, যথা– “অগ্রতশ্চতুরো বেদা” ইত্যাদি| উন্মত্তমত্যর্থমুপদ্রুতমিতি উন্মত্তমত্যর্থমুন্মাদবন্তম্, উপদ্রুতং জ্বরাতিসারাদিভিরত্যর্থমুপদ্রুতম্| হীনস্বরং বক্তুমসমর্থম্| বিবর্ণং কৃষ্ণবর্ণম্| সারিষ্টং নাসাভঙ্গাদিযুক্তম্| অবেগিনং গমনাদিবেগরহিতং, বিণ্মূত্রাদিবেগরহিতমিতি কার্তিকঃ||২১-২৪||–

Adhikarana sthAvaraja~ggamaviShANAM jIrNatvAdibhirvisheShairdUShIviShatvam (25) · Śloka 25

জীর্ণং বিষঘ্নৌষধিভির্হতং বা দাবাগ্নিবাতাতপশোষিতং বা ||২৫|| স্বভাবতো বা গুণবিপ্রহীনং বিষং হি দূষীবিষতামুপৈতি | (সু. ক. অ. ২) |

স্থাবরজঙ্গমবিষমেব জীর্ণত্বাদিভির্বিশেষৈর্দূষীবিষসঞ্জ্ঞাং লভতে; তদাহ– জীর্ণমিত্যাদি| বিষঘ্নৌষধিভিরিতি অগদাদিভিঃ| দাবাগ্নিবাতাতপশোষিতং বেতি দাবাগ্নির্বনাগ্নিঃ| স্বভাবতো বা গুণবিপ্রহীনমিতি স্বভাবাদেব কিমপি বিষং ব্যবাযিবিকাশিপ্রভৃতিষু দশসু গুণেষু মধ্যে একদ্বিত্র্যাদিগুণহীনং যদি ভবতি তদা দূষীবিষতামুপৈতি||২৫||–

Adhikarana guNahInatAyAH kAryeNa darshanam (26-27) · Śloka 27

বীর্যাল্পভাবান্ন নিপাতযেত্তত্ কফান্বিতং বর্ষগণানুবন্ধি ||২৬|| তেনার্দিতো ভিন্নপুরীষবর্ণো বৈগন্ধ্যবৈরস্যযুতঃ পিপাসী | মূর্ছাং ভ্রমং গদ্গদবাগ্বমিং চ বিচেষ্টমানোঽরতিমাপ্নুযাদ্বা ||২৭|| (সু. ক. অ. ২) |

গুণহীনতামেব কার্যেণ দর্শযতি– বীর্যাল্পভাবাদিত্যাদি| ন নিপাতযেদিতি ন মারযতি সদ্যশ্চিরেণ বা| কফান্বিতমিতি কফান্বিতং সত্ মন্দীভূতৌষ্ণ্যাদিগুণং ন মারযতি| বর্ষগণানুবন্ধীতি অপাকাচ্চিরস্থাযি| তেনার্দিতো ভিন্নপুরীষবর্ণ ইতি তেন দূষীবিষেণার্দিতঃ; ভিন্নশব্দোঽত্র পুরীষবর্ণাভ্যাং প্রত্যেকমভিসম্বধ্যতে, ভিন্নবর্ণো বিবর্ণঃ| বৈগন্ধ্যবৈরস্যযুত ইতি বিরুদ্ধগন্ধমুখবৈরস্যযুক্তঃ| বিচেষ্টমানো বিরুদ্ধাং চেষ্টাং কুর্বন্, অরতিমসুখং লভতে||২৬-২৭||

Adhikarana dUShIviShasya sthAnavisheSheNa vishiShTali~ggam (28) · Śloka 28

আমাশযস্থে কফবাতরোগী পক্বাশযস্থেঽনিলপিত্তরোগী | ভবেত্ সমুদ্ধ্বস্তশিরোরুহাঙ্গো বিলূনপক্ষস্তু যথা বিহঙ্গঃ ||২৮|| (সু. ক. অ. ২) |

স্থানবিশেষেণ বিশিষ্টলিঙ্গমাহ– আমাশযস্থ ইত্যাদি| কফাবৃতত্বেন বাতকোপ আমাশযে, তেন কফবাতরোগীত্যুক্তম্| অনিলপিত্তরোগীতি পক্বাশযে দুষ্টবাতসম্বন্ধেন প্রত্যাসন্নস্যাশযস্থস্য পিত্তস্য কোপঃ| ভবেত্ সমুদ্ধস্তশিরোরুহাঙ্গ ইতি অত্রাঙ্গশব্দাত্ পরং রুহশব্দো দ্রষ্টব্যঃ; তেনাযমর্থঃ– সমুদ্ধস্তশিরোরুহাঙ্গরুহঃ, শিরোরুহাঃ কেশাঃ, অঙ্গরুহং লোম; তদুক্তমালম্বাযনে– “সীদন্তি কেশলোমানি তস্মিন্ পক্বাশযং গতে|” ইত্যাদি| বিলূনপক্ষস্তু যথা বিহঙ্গ ইতি মুণ্ডিতপক্ষশকুনিসদৃশঃ, এতত্ পক্বাশযগতস্যৈব লিঙ্গম্||২৮||

Adhikarana rasAdidhAtugatadUShIviShalakShaNam (29) · Śloka 29

স্থিতং রসাদিষ্বথবা যথোক্তান্ করোতি ধাতুপ্রভবান্ বিকারান্ | কোপং চ শীতানিলদুর্দিনেষু যাত্যাশু পূর্বং শৃণু তস্য রূপম্ ||২৯|| (সু. ক. অ. ২) |

তস্য রসাদিধাতুগতস্য লিঙ্গমাহ– স্থিতং রসাদিষ্বিত্যাদি| যথোক্তান্ করোতি ধাতুপ্রভবান্ বিকারানিতি সুশ্রুতে ব্যাধিসমুদ্দেশীযাধ্যাযোক্তানন্নাঽশ্রদ্ধাদীন্ করোতি; কোপং চ শীতানিলদুর্দিনেষু যাতীতি কফসম্বন্ধাত্ শীতাদৌ কালে কোপং যাতি| পূর্বং শৃণু তস্য রূপমিতি পূর্বরূপং শৃণ্বিত্যর্থঃ||২৯||

Adhikarana dUShIviShakopapUrvarUpaM, rUpaM ca (30-31) · Śloka 31

নিদ্রাগুরুত্বং চ বিজৃম্ভণং চ বিশ্লেষহর্ষাবথবাঽঙ্গমর্দম্ | ততঃ করোত্যন্নমদাবিপাকাবরোচকং মণ্ডলকোঠজন্ম ||৩০|| মাংসক্ষযং পাদকরপ্রশোথং মূর্ছাং তথা ছর্দিমথাতিসারম্ | দূষীবিষং শ্বাসতৃষাজ্বরাংশ্চ কুর্যাত্ প্রবৃদ্ধিং জঠরস্য চাপি ||৩১|| (সু. ক. অ. ২) |

তদেবাহ– নিদ্রেত্যাদি| বিশ্লেষহর্ষাবিতি বিশ্লেষো গাত্রস্য শৈথিল্যং, হর্ষো রোমহর্ষঃ| এতানি বাতকফজানি লিঙ্গানি| তত ইতি পূর্বরূপাদনন্তরম্| অন্নমদাবিপাকাবিতি অন্নমদঃ অন্নে ভুক্তে মদো হর্ষঃ অন্নমদঃ; কার্তিকস্তু অন্নবিক্ষেপণমন্নমদমাহ– অন্নমদো রসাজীর্ণমিতি গদাধরঃ; অবিপাকোঽন্নস্যাপাকঃ| পাদকরপ্রশোথমিতি পাদে করে চ প্রকৃষ্টং শোথং করোতি| “মূর্ছাং তথা ছর্দিমথাতিসারম্” ইত্যস্য স্থানে “প্রলেপকং ছর্দিম্” ইত্যাদি পাঠান্তরে প্রলেপকং স্বেদপ্রবৃত্ত্যা পিচ্ছিলং গাত্রং, জ্বরবিশেষং বা||৩০-৩১||

Adhikarana dUShIviShasya nAnAvikArakAritvam (32) · Śloka 32

উন্মাদমন্যজ্জনযেত্তথাঽন্যদানাহমন্যত্ ক্ষপযেচ্চ শুক্রম্ | গাদ্গদ্যমন্যজ্জনযেচ্চ কুষ্ঠং তাংস্তান্ বিকারাংশ্চ বহুপ্রকারান্ ||৩২|| (সু. ক. অ. ২) |

তদেব নানাপ্রকারং যদ্যত্ করোতি তত্তদাহ– উন্মাদমন্যদিত্যাদি| ক্ষপযেচ্চ শুক্রমিতি ষাণ্ঢ্যং করোতীত্যর্থঃ| তাংস্তানিতি বিসর্পবিস্ফোটকাদীন্||৩২||

Adhikarana pUrvarUpalakShaNe dUShIviShaniruktiH, dUShIviShasya sAdhyAsAdhyavicArashca (33-34) · Śloka 34

দূষিতং দেশকালান্নদিবাস্বপ্নৈরভীক্ষ্ণশঃ | যস্মাত্ সন্দূষযেদ্ধাতূন্ তস্মাদ্দূষীবিষং স্মৃতম্ ||৩৩|| সাধ্যমাত্মবতঃ সদ্যো যাপ্যং সংবত্সরোত্থিতম্ | দূষীবিষমসাধ্যং স্যাত্ ক্ষীণস্যাহিতসেবিনঃ ||৩৪|| (সু. ক. অ. ২) |

দূষীবিষস্য নিরুক্তিমাহ– দূষিতমিত্যাদি| দেশকালান্নদিবাস্বপ্নৈরিতি দেশঃ প্রচুরানিলশীতবৃষ্টিরনূপাদিঃ, কালঃ শীতানিলদুর্দিনাদিঃ, অন্নং যবতিলকুলত্থাদি, তৈর্দূষিতং কোপিতম্| অভীক্ষ্ণশঃ পুনঃ পুনঃ| ধাতুদূষকত্বেন দূষীবিষম্| সংযোগজং বিষং দ্বিবিধম্– একং সবিষাবিষসংযোগকৃতং কৃত্রিমসঞ্জ্ঞম্, অপরং নির্বিষদ্রব্যকৃতং গরসঞ্জ্ঞম্| যদাহ বৃদ্ধকাশ্যপঃ– “ সংযোগজং চ দ্বিবিধং তৃতীযং বিষমুচ্যতে| গরঃ স্যাদবিষং তত্র, সবিষং কৃত্রিমং মতম্||” ইতি| অত এব রসাযনে চরকঃ– “দংষ্ট্রাবিষে মূলবিষে সগরে কৃত্রিমে বিষে|” ইতি||৩৩-৩৪||

Adhikarana garalakShaNam (35-37) · Śloka 37

সৌভাগ্যার্থং স্ত্রিযঃ স্বেদং রজো নানাঙ্গজান্ মলান্ | শত্রুপ্রযুক্তাংশ্চ গরান্ প্রযচ্ছন্ত্যন্নমিশ্রিতান্ ||৩৫|| তৈঃ স্যাত্ পাণ্ডুঃ কৃশোঽল্পাগ্নির্গরশ্চাস্যোপজাযতে | মর্মপ্রধমনাধ্মানং হস্তযোঃ শোথলক্ষণম্ ||৩৬|| জঠরং গ্রহণীদোষো যক্ষ্মা গুল্মঃ ক্ষযো জ্বরঃ | এবংবিধস্য চান্যস্য ব্যাধের্লিঙ্গানি দর্শযেত্ ||৩৭||

এতদ্দ্বযমপি দর্শযিতুমাহ– সৌভাগ্যার্থমিত্যাদি| স্ত্রিযঃ সৌভাগ্যার্থং শত্রুপ্রযুক্তা বা সবিষজন্তূনাং স্বেদং, রজশ্চূর্ণং, নানাঙ্গজান্ নানাগরকরান্ মলান্ অন্নাদৌ দদতি| তৈরিতি স্বেদরজঃপ্রভৃতিভিঃ| গরশ্চাস্যেতি অপাকাজ্জঠরাবস্থিতস্বেদাদিরেব গরঃ, অত এব তস্যোদরামযঃ; কিংবা বক্ষ্যমাণমর্মপ্রধমনাদিলক্ষণো ব্যাধির্গরঃ| মর্মপ্রধমনং মর্মব্যথা| শোথলক্ষণমিতি শোথ এব লক্ষণম্| জঠরমুদরম্| অন্যস্য ব্যাধের্লিঙ্গানি দর্শযেদিতি অন্যস্য বিস্ফোটাদের্লিঙ্গং দর্শযতি||৩৫-৩৭||

Adhikarana lUtAyA utpattirniruktishca (38) · Śloka 38

যস্মাল্লূনং তৃণং প্রাপ্তা মুনেঃ প্রস্বেদবিন্দবঃ | তস্মাল্লূতাস্তু ভাষ্যন্তে সঙ্খ্যযা তাশ্চ ষোডশ ||৩৮|| (সু. ক. অ. ৮) |

সম্প্রতি লূতানাং ঘোরবিষত্বপ্রতিপাদনার্থমৈতিহ্যমাহ– যস্মাল্লূনং তৃণমিত্যাদি| ইতি কিল শ্রুতিঃ– “বিশ্বামিত্রো নরপতিঃ কামধেনোর্বলাত্কারপরিগ্রহেণ মুনিসত্তমং বশিষ্ঠং কোপযাঞ্চকার, কুপিতেন তেনান্তর্জ্বলদবিরলকোপানলজ্বলিতং কুকুলযুগলমিব বহলপাটলং লোচনদ্বযং বহতা ভগবান্ রবিরবলোকিতঃ| ততস্তস্য ভ্রূকুটিভযঙ্করললাটতটপ্রস্যন্দী স্বেদবিন্দূত্করঃ প্রচণ্ডতরঃ প্রত্যাসন্নলূনতৃণে ধেন্বর্থং সম্ভৃতে নিপতিতো লূতাঽভূত্|” ইতি| তাস্তু ষোডশ| যদাহ সুশ্রুতঃ– “ত্রিমণ্ডলা তথা শ্বেতা কপিলা পীতকা তথা| লালামূত্রবিষা রক্তা কঠিনা চাষ্টমী স্মৃতা| সৌবর্ণিকা লাজবর্ণা জালিন্যেকপদী তথা| কৃষ্ণাঽগ্নিবক্ত্রা কাণ্ডা চ মালাগুণ্যষ্টমী মতা||” (সু. ক. অ. ৮) ইতি||৩৮||

Adhikarana lUtAnAM sAmAnyalakShaNam (39-40) · Śloka 42

তাভির্দষ্টে দংশকোথঃ প্রবৃত্তিঃ ক্ষতজস্য চ | জ্বরো দাহোঽতিসারশ্চ গদাঃ স্যুশ্চ ত্রিদোষজাঃ ||৩৯|| পিডকা বিবিধাকারা মণ্ডলানি মহান্তি চ | শোথা মহান্তো মৃদবো রক্তাঃ শ্যাবাশ্চলাস্তথা ||৪০|| সামান্যং সর্বলূতানামেতদ্দংশস্য লক্ষণম্ | (সু. ক. অ. ৮) |৪২|

তাসাং সামান্যদংশলক্ষণমাহ– তাভির্দষ্ট ইত্যাদি| দংশকোথ ইতি দংশদেশে পূতিভাব ইত্যর্থঃ| প্রবৃত্তিঃ ক্ষতজস্যেতি রক্তস্য প্রবর্তনম্| সর্বলূতানামিতি অসাধ্যাষ্টবিধসৌবর্ণিকাদিলূতানামেব সামান্যলক্ষণং জ্ঞেযম্| যতস্ত্রিমণ্ডলাদীনামষ্টানাং কৃচ্ছ্রসাধ্যত্বং, তাভির্দষ্টে শিরোদুঃখমিত্যাদিনা সামান্যলক্ষণমভিধায সৌবর্ণিকাদ্যনন্তরমেতত্ পঠিতবান্ সুশ্রুতঃ| মাধবকরেণ তু ষোডশানাং লূতানাং সামান্যলক্ষণমেতদিত্যভিপ্রাযেণ পঠিতমিতি||৩৯-৪০||–

Adhikarana dUShIviShANAM lUtAnAM lakShaNam (41-42) · Śloka 42

দংশমধ্যে তু যত্ কৃষ্ণং শ্যাবং বা জালকাচিতম্ ||৪১|| ঊর্ধ্বাকৃতি ভৃশং পাকং ক্লেদশোথজ্বরান্বিতম্ | দূষীবিষাভির্লূতাভিস্তদ্দষ্টমিতি নির্দিশেত্ ||৪২|| (চ. চি. অ. ২৩) |

ত্রিমণ্ডলাদযোঽষ্টৌ দূষীবিষাস্তাসাং লক্ষণমাহ– দংশমধ্যে ত্বিত্যাদি| ঊর্ধ্বাকৃতীতি ঊর্ধ্বগস্বরূপম্; অন্যে ‘দগ্ধাকৃতি’ ইতি পঠন্তি, তদ্ব্যক্তার্থম্| দূষীবিষাভিরিতি কালান্তরপ্রকোপিবিষাভিঃ| দষ্টমিতি দংশম্||৪১-৪২||

Adhikarana asAdhyalUtAnAM lakShaNam (43) · Śloka 43

, শোথাঃ শ্বেতাঃ সিতা রক্তাঃ পীতা বা পিডকা জ্বরঃ | প্রাণান্তিকাশ্চ জাযন্তে শ্বাসহিক্কাশিরোগ্রহাঃ ||৪৩|| (চ. চি. অ. ২৩) |

সৌবর্ণিকাদীনামষ্টানামসাধ্যানাং প্রাণহরাণাং সামান্যলক্ষণমাহ– শোথ ইত্যাদি| প্রাণান্তিকা ইতি প্রাণহরাঃ||৪৩||

Adhikarana AkhudUShIviShalakShaNam (44) · Śloka 44

আদংশাচ্ছোণিতং পাণ্ডুমণ্ডলানি জ্বরোঽরুচিঃ | লোমহর্ষশ্চ দাহশ্চাপ্যাখুদূষীবিষার্দিতে ||৪৪|| (চ. চি. অ. ২৩) |

আখুদূষীবিষলক্ষণমাহ– আদংশাদিত্যাদি| আদংশাত্ শোণিতমিত্যত্র ‘গলতি’ ইতি শেষঃ| আখবঃ শুক্রবিষাঃ| যদুক্তম্– “শুক্রং পততি যত্রৈষাং শুক্রস্পৃষ্টৈঃ স্পৃশন্তি যত্|” (সু. ক. অ. ৭) ইতি||৪৪||

Adhikarana prANaharamUShikalakShaNam (45) · Śloka 45

মূর্ছাঙ্গশোথবৈবর্ণ্যক্লেদশব্দাশ্রুতিজ্বরাঃ | শিরোগুরুত্বং লালাসৃক্ছর্দিশ্চাসাধ্যমূষিকৈঃ ||৪৫|| (চ. চি. অ. ২৩) |

প্রাণহরমূষিকলক্ষণমাহ– মূর্ছেত্যাদি| অঙ্গশোথেতি মূষিকাকার এবাঙ্গশোথো জ্ঞেযঃ| যদুক্তমন্যত্র– “চীযতে গ্রন্থিভিশ্চাঙ্গমাখুশাবকসন্নিভৈঃ|” (সু. ক. অ. ৭) ইতি| শব্দাশ্রুতিঃ বাধির্যম্; অন্যে ‘মন্দা রুচিঃ’ ইতি পঠন্তি অসাধ্যমূষিকৈঃ মারণাত্মকৈঃ||৪৫||

Adhikarana kRukalAsadaShTali~ggam (46) · Śloka 46

কার্ষ্ণ্যং শ্যাবত্বমথবা নানাবর্ণত্বমেব বা | মোহোঽথ বর্চসো ভেদো দষ্টে স্যাত্ কৃকলাসকৈঃ ||৪৬|| (চ. চি. অ. ২৩) |

কৃকলাসদষ্টলিঙ্গমাহ– কার্ষ্ণ্যমিত্যাদি| বর্চসো ভেদোঽতিসারঃ||৪৬||

Adhikarana vRushcikadaShTali~ggamasAdhyalakShaNaM ca (47-48) · Śloka 48

দহত্যগ্নিরিবাদৌ চ ভিনত্তীবোর্ধ্বমাশু চ | বৃশ্চিকস্য বিষং যাতি দংশে পশ্চাত্তু তিষ্ঠতি ||৪৭|| দষ্টোঽসাধ্যশ্চ হৃদ্ঘ্রাণরসনোপহতো নরঃ | মাংসৈঃ পতদ্ভিরত্যর্থং বেদনার্তো জহাত্যসূন্ ||৪৮|| (চ. চি. অ. ২৩) |

বৃশ্চিকবিষলিঙ্গমাহ– দহত্যগ্নিরিবেত্যাদি| বৃশ্চিকঃ স্বনামখ্যাতঃ, স চ আরাবিষঃ| দষ্টোঽসাধ্যশ্চ হৃদ্ঘ্রাণরসনোপহতো নর ইতি যদা হৃদযনাসাজিহ্বোপঘাতো ভবতি তদা তদ্দষ্টো ন সাধ্যঃ| মাংসৈঃ পতদ্ভিরত্যর্থং বেদনার্তো জহাত্যসূনিত্যাদিনাঽযমপরোঽসাধ্যপ্রকারঃ| ‘দষ্টোঽসাধ্যৈস্তু’ ইতি পাঠপক্ষেঽসাধ্যৈঃ সদ্যঃপ্রাণহরৈর্বৃশ্চিকৈর্দষ্টো যথোক্তলিঙ্গো ভবতি| চরকেঽপ্যযমেব পাঠঃ||৪৭-৪৮||

Adhikarana kaNabhadaShTali~ggam (49) · Śloka 49

বিসর্পঃ শ্বযথুঃ শূলং জ্বরশ্ছর্দিরথাপি চ | লক্ষণং কণভৈর্দষ্টে দংশশ্চৈবাবসীদতি ||৪৯|| (চ. চি. অ. ২৩) |

কণভদষ্টলিঙ্গমাহ– বিসর্প ইত্যাদি| কণভঃ কীটবিশেষঃ||৪৯||

Adhikarana ucciTi~ggadaShTalakShaNam (50) · Śloka 50

হৃষ্টলোমোচ্চিটিঙ্গেন স্তব্ধলিঙ্গো ভৃশার্তিমান্ | দষ্টঃ শীতোদকেনেব সিক্তান্যঙ্গানি মন্যতে ||৫০|| (চ. চি. অ. ২৩) |

উচ্চিটিঙ্গদষ্টলিঙ্গমাহ– হৃষ্টরোমেত্যাদি||৫০||

Adhikarana maNDUkadaShTalakShaNaM, saviShamatsyadaShTalakShaNaM, saviShajalaukAdaShTali~ggaM ca (51-52) · Śloka 52

একদংষ্ট্রার্দিতঃ শূনঃ সরুজঃ পীতকঃ সতৃট্ | ছর্দির্নিদ্রা চ সবিষৈর্মণ্ডূকৈর্দষ্টলক্ষণম্ ||৫১|| মত্স্যাস্তু সবিষাঃ কুর্যুর্দাহং শোথং রুজং তথা | কণ্ডূং শোথং জ্বরং মূর্ছাং সবিষাস্তু জলৌকসঃ ||৫২|| (চ. চি. অ. ২৩) |

সবিষমণ্ডূকাদিদষ্টলিঙ্গমাহ– একদংষ্ট্রার্দিত ইত্যাদি| স্বভাবাদেকযা দংষ্ট্রযা কৃতো দংশো ভবতি||৫১-৫২||

Adhikarana gRuhagodhikAdaShTali~ggam (53) · Śloka 53

বিদাহং শ্বযথুং তোদং স্বেদং চ গৃহগোধিকা |৫৩| (চ. চি. অ. ২৩) |

গৃহগোধিকাদষ্টলিঙ্গমাহ– বিদাহমিত্যাদি| গৃহগোধিকা জ্যেষ্ঠী, অন্যে তু ভ্রামরকমাহুঃ| অত্র বক্ষ্যমাণং কুর্যাদিতি সম্বন্ধনীযং, তেন বিদাহাদীনাং কর্মত্বম্|৫৩|–

Adhikarana shatapadIdaShTali~ggam (53) · Śloka 53

দংশে স্বেদং রুজং দাহং কুর্যাচ্ছতপদীবিষম্ ||৫৩|| (চ. চি. অ. ২৩) |

শতপদীদষ্টলক্ষণমাহ– দংশে ইত্যাদি| কুর্যাচ্ছতপদীবিষমিতি শতপদী কারুণ্ডিকা||৫৩||

Adhikarana mashakadaShTalakShaNam (54) · Śloka 54

কণ্ডূমান্ মশকৈরীষচ্ছোথঃ স্মান্মন্দবেদনঃ | অসাধ্যকীটসদৃশমসাধ্যং মশকক্ষতম্ ||৫৪|| (চ. চি. অ. ২৩) |

মশকদষ্টলিঙ্গমাহ– কণ্ডূমানিত্যাদি| অসাধ্যকীটসদৃশমিতি অসাধ্যকীটৈর্লূতাদিভিঃ সমলক্ষণমিতি| অসাধ্যং মশকক্ষতমিতি পঞ্চসু মশকেষু মধ্যে পার্বতীযমশকক্ষতমসাধ্যম্| যদাহ সুশ্রুতঃ– “ পার্বতীযৈস্তু কীটৈশ্চ প্রাণহরৈস্তুল্যলক্ষণম্|” ইতি||৫৪||

Adhikarana makShikAdaShTali~ggam (55) · Śloka 55

সদ্যঃপ্রস্রাবিণী শ্যাবা দাহমূর্ছাজ্বরান্বিতা | পিডকা মক্ষিকাদংশে তাসাং তু স্থগিকাঽসুহৃত্ ||৫৫|| (চ. চি. অ. ২৩) |

মক্ষিকাদষ্টলিঙ্গমাহ– সদ্য ইত্যাদি| তাসাং চ স্থগিকাঽসুহৃদিতি তাসাং সুশ্রুতোক্তষণ্মক্ষিকাণাং মধ্যে স্থগিকা প্রাণহরেত্যর্থঃ||৫৫||

Adhikarana catuShpadbhirdvipadbhishca kRutanakhadantaviShalakShaNam (56) · Śloka 56

চতুষ্পদ্ভির্দ্বিপদ্ভিশ্চ নখদন্তবিষং চ যত্ | শূযতে পচ্যতে বাঽপি স্রবতি জ্বরযত্যপি ||৫৬||

চতুষ্পদ্ভিরিতি চতুষ্পাদা ব্যাঘ্রাদযঃ| দ্বিপাদা বনমানুষবানরাদযঃ||৫৬||

Adhikarana viShojjhitalakShaNam (57-60) · Śloka 60

শ্বশৃগালতরক্ষ্বর্ক্ষব্যাঘ্রাদীনাং যদাঽনিলঃ | শ্লেষ্মপ্রদুষ্টো মুষ্ণাতি সঞ্জ্ঞাং সঞ্জ্ঞাবহাশ্রিতঃ ||৫৭|| তদা প্রস্রস্তলাঙ্গূলহনুস্কন্ধোঽতিলালবান্ | অব্যক্তবধিরান্ধশ্চ সোঽন্যোন্যমভিধাবতি ||৫৮|| প্রমূঢোঽন্যতমস্ত্বেষাং খাদন্ বিপরিধাবতি | তেনোন্মত্তেন দষ্টস্য দংষ্ট্রিণা সবিষেণ তু ||৫৯|| সুপ্ততা জাযতে দংশে কৃষ্ণং চাতিস্রবত্যসৃক্ | দিগ্ধবিদ্ধস্য লিঙ্গেন প্রাযশশ্চোপলক্ষিতঃ ||৬০||

অত্র কেচিত্ বিষাধিকারসামান্যাত্ শ্বাদীনামপি ব্যাঘ্রাদীনাং ভল্লকানাং বিষলক্ষণং ভণন্তি| তদাহ– শ্বেতেত্যাদি| শ্বা কুক্কুরঃ, শৃগালঃ প্রসিদ্ধঃ, তরক্ষুর্মৃগশত্রুর্ব্যাঘ্রবিশেষঃ, চরষ ইতি লোকে, ঋক্ষো ভল্লূকঃ অতিলোমশঃ, ঋচ্ছ ইতি লোকে প্রসিদ্ধঃ| আদিশব্দাদ্ বৃকচিত্রাদযো হিংস্রাঃ পশবো গ্রাহ্যাঃ| শ্বাদীনাং যদা অনিলো বাযুঃ শ্লেষ্মপ্রদুষ্টঃ সন্ সঞ্জ্ঞাবহাশ্রিতঃ সঞ্জ্ঞাবহস্রোতোগতঃ সঞ্জ্ঞাং সম্যগ্জ্ঞানং মুষ্ণাতি হরতি| সম্যগ্জ্ঞানহরণাচ্চ হীদৃশো ভবতীত্যাহ– তদেত্যাদি| প্রস্রস্তং স্থানচ্যুতং, লাঙ্গূলং বালধিঃ, মেহনং চ| প্রস্রস্তশব্দো লাঙ্গূলাদিভিঃ প্রত্যেকং সম্বন্ধনীযঃ| অতিলালাবান্ অতিশযেন লালাস্রাবযুক্তঃ| অব্যক্তবধিরোঽন্ধশ্চ ন ব্যক্তো বধিরোঽন্ধো বেত্যর্থঃ| অন্যোন্যমভিধাবতি পরস্পরং দষ্টুমভিধাবতি| হনুস্কন্ধস্থানে ‘শূনস্কন্ধঃ’ ইতি কেচিত্পঠন্তি| ‘প্রমূঢোঽন্যতমস্তেষাং খাদন্বিপরিধাবতি|’ ইত্যত্রোত্তরার্ধং কেচিত্পঠন্তি| এষাং মধ্যেঽন্যতম একতমঃ প্রমূঢঃ সন্ খাদন্ বিশেষেণ পরিধাবতি| তেনেতি দংষ্ট্রিণা| সুপ্ততা বাধির্যম্| উপলক্ষিতো যুক্ত ইত্যর্থঃ||৫৭-৬০||

Adhikarana jalatrAsalakShaNaM, sAdhyAsAdhyalakShaNaM ca (61-64) · Śloka 64

যেন চাপি ভবেদ্দষ্টস্তস্য চেষ্টাং রুতং নরঃ | বহুশঃ প্রতিকুর্বাণঃ ক্রিযাহীনো বিপশ্যতি ||৬১|| দংষ্ট্রিণা যেন দষ্টশ্চ তদ্রূপং যস্তু পশ্যতি | অপ্সু চাদর্শবিম্বে বা তস্য তদ্রিষ্টমাদিশেত্ ||৬২|| ত্রস্যত্যকস্মাদ্যোঽভীক্ষ্ণং দৃষ্ট্বা স্পৃষ্ট্বাঽপি বা জলম্ | জলত্রাসং তু তং বিদ্যাদ্রিষ্টং তদপি কীর্তিতম্ ||৬৩|| অদষ্টো বা জলত্রাসী ন কথঞ্চন সিদ্ধ্যতি | প্রসুপ্তো বোত্থিতো বাঽপি স্বস্থস্ত্রস্তো ন সিদ্ধ্যতি ||৬৪|| (সু. ক. অ. ৭) |

ইদানীং শ্বাদিদষ্টস্য রিষ্টমাহ– যেনেত্যাদি| চেষ্টাং ক্রিযাং, রুতং শব্দং, বহুশঃ অনেকবারং, প্রতিকুর্বাণঃ অনুকুর্বন্, ক্রিযাহীনঃ স্বকীযকাযাদিব্যাপাররহিতঃ| ইদানীমপরমপ্যরিষ্টং নির্দিশন্নাহ– দংষ্ট্রিণেত্যাদি| তদ্দংষ্ট্রিরূপদর্শনমরিষ্টং মরণলক্ষণম্| পুনরপরমরিষ্টং নির্দিশন্নাহ– ত্রস্যতীত্যাদি| অকস্মাজ্জলত্রাসহেতুং বিনা, অপিশব্দাত্ শ্রুত্বাঽপি জলত্রাসরোগং জানীযাত্তস্যেতি সম্বন্ধঃ| রিষ্টমিত্যাদি| তদপি জলত্রসনমরিষ্টং মরণং কীর্তিতম্| এতচ্চারিষ্টং দষ্টস্য| অত্রার্থে তন্ত্রান্তরে– “ব্যাধিতেন শ্বাদিনা দষ্টস্য শ্লেষ্মা কুপিতঃ স্রোতোবাহিনীর্ধমনীরনুপ্রবিশ্য সঞ্জ্ঞানাশমাপাদযতি| ততো নরঃ স্পৃষ্ট্বা দৃষ্ট্বা শ্রুত্বা চ জলং ত্রস্যতি, তস্যাপি তদ্রিষ্টং জানীযাত্|” ইতি| এবমদষ্টস্যাপি জলত্রাসো রিষ্টমেবেতি দর্শযন্নাহ– অদষ্ট ইত্যাদি| অস্মিন্নর্থে তন্ত্রান্তরে– “ অদষ্টস্যাপি জন্তোর্হি জলত্রাসো ভবেদ্যদি| তস্যারিষ্টং হি ভিষজো ব্রুবতে বিষচিন্তকাঃ|| জলং বিনা জলত্রাসো জাযতে শ্লেষ্মসঞ্চযাত্|” ইতি| অথ চোক্তম্– “বুদ্ধিস্থানং যদা শ্লেষ্মা কেবলঃ প্রতিপদ্যতে| তদা বুদ্ধৌ নিরুদ্ধাযাং শ্লেষ্মণাঽধিষ্ঠিতো নরঃ|| জাগ্রত্সুপ্তোঽথবাঽঽত্মানং মজ্জন্তমিব মন্যতে| সলিলাত্ত্রস্যতি তদা জলত্রাসং তু তং বিদুঃ|| শ্লেষ্মঘ্নং তত্র কর্তব্যং শোধনং শমনানি চ| আহারস্য বিধানেন যাবত্স প্রকৃতিং ব্রজেত্||” ইতি| অযং জলত্রাসঃ কুপিতকফস্য ভবতীতি রিষ্টং ন ভবতি| অত এবাঽত্র চিকিত্সোপদেশঃ| দষ্টস্য তু রিষ্টমেব, তথা স্বস্থস্য জাগ্রতো বা জলমন্তরেণ ত্রাসো রিষ্টমেবেতি দর্শযন্নাহ– প্রসুপ্ত ইতি| সুগমম্||৬১-৬৪||

Adhikarana aviShakShaNam (65) · Śloka 65

প্রশান্তদোষং প্রকৃতিস্থধাতুমন্নাভিকামং সমমূত্রবিট্কম্ | প্রসন্নবর্ণেন্দ্রিযচিত্তচেষ্টং বৈদ্যোঽবগচ্ছেদবিষং মনুষ্যম্ ||৬৫|| (সু. ক. অ. ৬) |

বিষাতুরঃ কীদৃশো নির্বিষো ভবতীতি দর্শযিতুমাহ– প্রশান্তদোষমিত্যাদি| অন্নাভিকামমিত্যনেন প্রকৃতিস্থাগ্নিতোক্তা| যদাহ চরকঃ– “প্রাযেণোপহতাগ্নিত্বাত্ সপিচ্ছমতিসার্যতে| প্রাপ্নোতি চাস্যবৈরস্যং ন চান্নমভিনন্দতি||” ইতি| সমমূত্রবিট্কমিতি অক্ষীণানতিরিক্তমূত্রপুরীষম্| অন্যে ‘ সমসূত্রজিহ্বম্’ ইতি পঠন্তি, তদাঽযমর্থঃ– সমমবিকৃতং সূত্রং জিহ্বা চ যস্য স তথা; এতেন বিষজুষ্টা জিহ্বা ন রসবোধিনী ভবতি, সূত্রমপি জিহ্বাযাং বিষপ্রভাবেণ বৈকৃতং ভবতীতি প্রতিপাদযতি| জিহ্বাগ্রহণেনৈব সূত্রগ্রহণে সিদ্ধে তস্য চ রসগ্রহণে অনুগুণত্বপ্রতিপাদনার্থং পৃথগুপাদানম্| অনেন শ্লোকেন “সমদোষঃ সমাগ্নিশ্চ” (সু. সূ. অ. ১৫) ইত্যাদিশ্লোকস্য সকল এবার্থ উপবদ্ধঃ||৬৫||

Adhikarana puShpikA · Śloka 69

ইতি শ্রীমাধবকরবিরচিতে মাধবনিদানে বিষনিদানং সমাপ্তম্ ||৬৯||

ইতি শ্রীকণ্ঠদত্তকৃতাযাং মধুকোশব্যাখ্যাযাং বিষনিদানং সমাপ্তম্||৬৯|| সূক্তিমুক্তাবলীগ্রন্থে গুরুণা যন্ন গুম্ফিতম্|| মযা সমস্তমগ্রন্থি তদ্গিরা শুদ্ধিযুক্তযা||১|| গুণনিধিগুরুবদ্ধে দাম্নি বাঙ্মালতীনাং পরমপরিমলশ্রীধাম্নি লব্ধাবলম্বম্|| স্ফুরতি বচনকুন্দং মন্দসৌরভ্যলেশাদ্বচনমপি মদীযং কিঞ্চিদেতত্ কদাচিত্||২|| ইতি শ্রীবিজযরক্ষিতশ্রীকণ্ঠদত্তাভ্যাং বিরচিতা মধুকোশব্যাখ্যা সমাপ্তা||৬৯||