Adhikarana 1 (1-2) · Śloka 2
অথাতোঽনাগতাবাধাপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातोऽनागताबाधाप्रतिषेधं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
অনাগত ঈষদাগতঃ, নঞ্ অত্র ঈষদর্থে; আবাধা দুঃখং ব্যাধিরিত্যর্থঃ; তস্য প্রতিষেধশ্চিকিত্সিতম্| তচ্চিকিত্সিতং স্বস্থবৃত্তমহোরাত্রিকাচারক্রম ইত্যর্থঃ, যতোঽহোরাত্রেঽপি ষণ্ণামৃতূনামন্তর্ভাবঃ||১-২||
Adhikarana 2 (3) · Śloka 3
উত্থাযোত্থায সততং স্বস্থেনারোগ্যমিচ্ছতা | ধীমতা যদনুষ্ঠেযং তত্ সর্বং সম্প্রবক্ষ্যতে ||৩||
उत्थायोत्थाय सततं स्वस्थेनारोग्यमिच्छता | धीमता यदनुष्ठेयं तत् सर्वं सम्प्रवक्ष्यते ||३||
🔊 Audio coming soon
উত্থাযোত্থাযেতি বীপ্সাযাং, প্রত্যহমিতিকর্তব্যতাখ্যাপনাযেত্যেকে; অন্যে তু উত্থাযেতি অভিযোজ্যেত্যর্থঃ, অভিতো যোগমভিসংযোগং কৃত্বা; অভিযোগ উদ্যমঃ, উত্পূর্বস্য স্থাধাতোরভিযোগার্থত্বাত্| সততম্ অহরহরিত্যর্থঃ; যদা তু উত্থাযোত্থাযেত্যস্যাহরহ ইতি ব্যাখ্যানং তদা সততমিতি ব্যর্থং স্যাত্| ‘যদনুষ্ঠেযমস্কন্নং’ ইতি কেচিত্ পঠন্তি, অস্কন্নম্ অবশ্যমিত্যর্থঃ||৩||
Adhikarana 3 (4-12) · Śloka 12
তত্রাদৌ দন্তপবনং দ্বাদশাঙ্গুলমাযতম্ | কনিষ্ঠিকাপরীণাহমৃজ্বগ্রন্থিতমব্রণম্ ||৪|| অযুগ্মগ্রন্থি যচ্চাপি প্রত্যগ্রং শস্তভূমিজম্ | অবেক্ষ্যর্তুং চ দোষং চ রসং বীর্যং চ যোজযেত্ ||৫|| কষাযং মধুরং তিক্তং কটুকং প্রাতরুত্থিতঃ | নিম্বশ্চ তিক্তকে শ্রেষ্ঠঃ কষাযে খদিরস্তথা ||৬|| মধূকো মধুরে শ্রেষ্ঠঃ করঞ্জঃ কটুকে তথা | ক্ষৌদ্রব্যোষত্রিবর্গাক্তং সতৈলং সৈন্ধবেন চ ||৭|| চূর্ণেন তেজোবত্যাশ্চ দন্তান্নিত্যং বিশোধযেত্ | একৈকং ঘর্ষযেদ্দন্তং মৃদুনা কূর্চকেন চ ||৮|| দন্তশোধনচূর্ণেন দন্তমাংসান্যবাধযন্ | তদ্দৌর্গন্ধ্যোপদেহৌ তু শ্লেষ্মাণং চাপকর্ষতি ||৯|| বৈশদ্যমন্নাভিরুচিং সৌমনস্যং করোতি চ | ন খাদেদ্গলতাল্বোষ্ঠজিহ্বারোগসমুদ্ভবে ||১০|| অথাস্যপাকে শ্বাসে চ কাসহিক্কাবমীষু চ | দুর্বলোঽজীর্ণভক্তশ্চ মূর্চ্ছার্তো মদপীডিতঃ ||১১|| শিরোরুজার্তস্তৃষিতঃ শ্রান্তঃ পানক্লমান্বিতঃ | অর্দিতী কর্ণশূলী চ দন্তরোগী চ মানবঃ ||১২||
तत्रादौ दन्तपवनं द्वादशाङ्गुलमायतम् | कनिष्ठिकापरीणाहमृज्वग्रन्थितमव्रणम् ||४|| अयुग्मग्रन्थि यच्चापि प्रत्यग्रं शस्तभूमिजम् | अवेक्ष्यर्तुं च दोषं च रसं वीर्यं च योजयेत् ||५|| कषायं मधुरं तिक्तं कटुकं प्रातरुत्थितः | निम्बश्च तिक्तके श्रेष्ठः कषाये खदिरस्तथा ||६|| मधूको मधुरे श्रेष्ठः करञ्जः कटुके तथा | क्षौद्रव्योषत्रिवर्गाक्तं सतैलं सैन्धवेन च ||७|| चूर्णेन तेजोवत्याश्च दन्तान्नित्यं विशोधयेत् | एकैकं घर्षयेद्दन्तं मृदुना कूर्चकेन च ||८|| दन्तशोधनचूर्णेन दन्तमांसान्यबाधयन् | तद्दौर्गन्ध्योपदेहौ तु श्लेष्माणं चापकर्षति ||९|| वैशद्यमन्नाभिरुचिं सौमनस्यं करोति च | न खादेद्गलताल्वोष्ठजिह्वारोगसमुद्भवे ||१०|| अथास्यपाके श्वासे च कासहिक्कावमीषु च | दुर्बलोऽजीर्णभक्तश्च मूर्च्छार्तो मदपीडितः ||११|| शिरोरुजार्तस्तृषितः श्रान्तः पानक्लमान्वितः | अर्दिती कर्णशूली च दन्तरोगी च मानवः ||१२||
🔊 Audio coming soon
শিরস উত্তমাঙ্গত্বাত্তত্পূর্বমেব বিবৃণ্বন্নাহ- তত্রেত্যাদি| অব্রণং কোটরাদিরহিতম্| প্রত্থগ্রং নবম্| ত্রিবর্গাক্তং ত্রিসুগন্ধিনাঽঽক্তং লিপ্তং দন্তকাষ্ঠং কৃত্বা, তেনেত্যধ্যাহারঃ| দৌর্গন্ধ্যাদ্যপকর্ষণং তত্ফলম্; উপদেহঃ উপলেপঃ| বৈশদ্যং নির্মলতা| মদঃ পূগফলেনেব||৪-১২||
Adhikarana 4 (13-14) · Śloka 14
জিহ্বানির্লেখনং রৌপ্যং সৌবর্ণং বার্ক্ষমেব চ | তন্মলাপহরং শস্তং মৃদু শ্লক্ষ্ণং দশাঙ্গুলম্ ||১৩|| মুখবৈরস্যদৌর্গন্ধ্যশোফজাড্যহরং সুখম্ | দন্তদার্ঢ্যকরং রুচ্যং স্নেহগণ্ডূষধারণম্ ||১৪||
जिह्वानिर्लेखनं रौप्यं सौवर्णं वार्क्षमेव च | तन्मलापहरं शस्तं मृदु श्लक्ष्णं दशाङ्गुलम् ||१३|| मुखवैरस्यदौर्गन्ध्यशोफजाड्यहरं सुखम् | दन्तदार्ढ्यकरं रुच्यं स्नेहगण्डूषधारणम् ||१४||
🔊 Audio coming soon
জিহ্বেত্যাদি| মৃদু কোমলম্| শ্লক্ষ্ণং মসৃণম্| জাড্যং জডতা স্তব্ধতেত্যর্থঃ||১৩-১৪||
Adhikarana 5 (15-16) · Śloka 17
ক্ষীরবৃক্ষকষাযৈর্বা ক্ষীরেণ চ বিমিশ্রিতৈঃ | ভিল্লোটককষাযেণ তথৈবামলকস্য বা ||১৫|| প্রক্ষালযেন্মুখং নেত্রে স্বস্থঃ শীতোদকেন বা | নীলিকাং মুখশোষং চ পিডকাং ব্যঙ্গমেব চ ||১৬|| রক্তপিত্তকৃতান্ রোগান্ সদ্য এব বিনাশযেত্ |১৭|
क्षीरवृक्षकषायैर्वा क्षीरेण च विमिश्रितैः | भिल्लोटककषायेण तथैवामलकस्य वा ||१५|| प्रक्षालयेन्मुखं नेत्रे स्वस्थः शीतोदकेन वा | नीलिकां मुखशोषं च पिडकां व्यङ्गमेव च ||१६|| रक्तपित्तकृतान् रोगान् सद्य एव विनाशयेत् |१७|
🔊 Audio coming soon
ক্ষীরবৃক্ষা ন্যগ্রোধাদযঃ| ক্ষীরবৃক্ষকষাযগণ্ডূষেণ রক্তদুষ্টিরপি নিবর্ততে| বহির্মুখপ্রক্ষালনমাহ- ভিল্লেত্যাদি| ভিল্লোটকো হি পর্বতে কেদারভূমৌ প্রসিদ্ধঃ| গযী তু ভিল্লোটককষাযমন্তর্মুখপ্রক্ষালনমাহ| আমলকস্য কষাযেণ নেত্রে প্রক্ষালযেত্, উভযং শীতোদকেন বা||১৫-১৬||-
Adhikarana 6 (17-20) · Śloka 20
সুখং লঘু নিরীক্ষেত দৃঢং পশ্যতি চক্ষুষা ||১৭|| মতং স্রোতোঞ্জনং শ্রেষ্ঠং বিশুদ্ধং সিন্ধুসম্ভবম্ | দাহকণ্ডূমলঘ্নং চ দৃষ্টিক্লেদরুজাপহম্ ||১৮|| তেজোরূপাবহং চৈব সহতে মারুতাতপৌ | ন নেত্ররোগা জাযন্তে তস্মাদঞ্জনমাচরেত্ ||১৯|| ভুক্তবাঞ্ছিরসা স্নাতঃ শ্রান্তশ্ছর্দনবাহনৈঃ | রাত্রৌ জাগরিতশ্চাপি নাঞ্জ্যাজ্বরিত এব চ ||২০||
सुखं लघु निरीक्षेत दृढं पश्यति चक्षुषा ||१७|| मतं स्रोतोञ्जनं श्रेष्ठं विशुद्धं सिन्धुसम्भवम् | दाहकण्डूमलघ्नं च दृष्टिक्लेदरुजापहम् ||१८|| तेजोरूपावहं चैव सहते मारुतातपौ | न नेत्ररोगा जायन्ते तस्मादञ्जनमाचरेत् ||१९|| भुक्तवाञ्छिरसा स्नातः श्रान्तश्छर्दनवाहनैः | रात्रौ जागरितश्चापि नाञ्ज्याज्वरित एव च ||२०||
🔊 Audio coming soon
ততোঽঞ্জনাবসরঃ| সিন্ধুরত্র নদোঽভিপ্রেতঃ, তত্সম্ভবং স্রোতোঞ্জনম্| বিশুদ্ধং মলরহিতং শ্রেষ্ঠং মতং; কুতঃ? যস্মাদ্দৃষ্টের্দাহাদিহরং ক্লেদাদ্যপহরং তথা তেজোরূপকরং; তস্মাদঞ্জনেন দৃঢং চক্ষুষা পশ্যতি, মারুতাতপৌ সহতে, নেত্ররোগাশ্চ ন জাযন্ত ইতি যোগতন্ত্রযুক্ত্যা যোজনীযম্| ছর্দনবাহনৈরিতি বহুবচনেন পরিশ্রান্তিহেতবো গৃহ্যন্তে||১৭-২০||
Adhikarana 7 (21-24) · Śloka 24
কর্পূরজাতীকঙ্কোললবঙ্গকটুকাহ্বযৈঃ | সচূর্ণপূগৈঃ সহিতং পত্রং তাম্বূলজং শুভম্ ||২১|| মুখবৈশদ্যসৌগন্ধ্যকান্তিসৌষ্ঠবকারকম্ | হনুদন্তস্বরমলজিহ্বেন্দ্রিযবিশোধনম্ ||২২|| প্রসেকশমনং হৃদ্যং গলামযবিনাশনম্ | পথ্যং সুপ্তোত্থিতে ভুক্তে স্নাতে বান্তে চ মানবে ||২৩|| রক্তপিত্তক্ষতক্ষীণতৃষ্ণামূর্চ্ছাপরীতিনাম্ | রূক্ষদুর্বলমর্ত্যানাং ন হিতং চাস্যশোষিণাম্ ||২৪||
कर्पूरजातीकङ्कोललवङ्गकटुकाह्वयैः | सचूर्णपूगैः सहितं पत्रं ताम्बूलजं शुभम् ||२१|| मुखवैशद्यसौगन्ध्यकान्तिसौष्ठवकारकम् | हनुदन्तस्वरमलजिह्वेन्द्रियविशोधनम् ||२२|| प्रसेकशमनं हृद्यं गलामयविनाशनम् | पथ्यं सुप्तोत्थिते भुक्ते स्नाते वान्ते च मानवे ||२३|| रक्तपित्तक्षतक्षीणतृष्णामूर्च्छापरीतिनाम् | रूक्षदुर्बलमर्त्यानां न हितं चास्यशोषिणाम् ||२४||
🔊 Audio coming soon
কর্পূরেত্যাদি| জাতীশব্দেন জাতীফলং কথ্যতে||২১-২৪||
Adhikarana 8 (25-26) · Śloka 26
শিরোগতাংস্তথা রোগাঞ্ছিরোভঙ্গোঽপকর্ষতি | কেশানাং মার্দবং দৈর্ধ্যং বহুত্বং স্নিগ্ধকৃষ্ণতাম্ ||২৫|| করোতি শিরসস্তৃপ্তিং সুত্বক্কমপি চাননম্ | সন্তর্পণং চেন্দ্রিযাণাং শিরসঃ প্রতিপূরণম্ ||২৬||
शिरोगतांस्तथा रोगाञ्छिरोभङ्गोऽपकर्षति | केशानां मार्दवं दैर्ध्यं बहुत्वं स्निग्धकृष्णताम् ||२५|| करोति शिरसस्तृप्तिं सुत्वक्कमपि चाननम् | सन्तर्पणं चेन्द्रियाणां शिरसः प्रतिपूरणम् ||२६||
🔊 Audio coming soon
শিরসঃ প্রতিপূরণমিতি শূন্যভূতস্য শিরসঃ পুনঃ পূরণমিত্যর্থঃ| ‘শিরোগতাংস্তথা রোগান্’ ইত্যত্র ‘কেশভূমিগতান্ রোগান্’ ইত্যেকে পঠন্তি; ‘শিরসঃ প্রতিপূরণং’ ইত্যত্র ‘দত্তং মস্তকতৈলকম্’ ইত্যপরে পঠন্তি||২৫-২৬||
Adhikarana 9 (27-28) · Śloka 28
মধুকং ক্ষীরশুক্লা চ সরলং দেবদারু চ | ক্ষুদ্রকং পঞ্চনামানং সমভাগানি সংহরেত্ ||২৭|| তেষাং কল্ককষাযাভ্যাং চক্রতৈলং বিপাচযেত্ | সদৈব শীতলং জন্তোর্মূর্ধ্নি তৈলং প্রদাপযেত্ ||২৮||
मधुकं क्षीरशुक्ला च सरलं देवदारु च | क्षुद्रकं पञ्चनामानं समभागानि संहरेत् ||२७|| तेषां कल्ककषायाभ्यां चक्रतैलं विपाचयेत् | सदैव शीतलं जन्तोर्मूर्ध्नि तैलं प्रदापयेत् ||२८||
🔊 Audio coming soon
শিরোভ্যঙ্গর্থং তৈলমাহ- মধুকমিত্যাদি| ক্ষীরশুক্লা ক্ষীরবিদারিকা| ক্ষুদ্রকং পঞ্চনামানমিতি অল্পা পঞ্চমূলী| চক্রতৈলং যন্ত্রপীডিততৈলম্| মধুকাদিদ্রব্যাণাং ক্বাথার্থং পলশতম্, উদকস্য দ্বাদশাধিকপঞ্চশতপলানি, তাবত্ বিপচেদ্যাবদ্বিংশত্যধিকং শতং ভবতি, ততো বস্ত্রপূতং গ্রাহ্যং, তেন ক্বাথেন তথা তদ্দ্রব্যাণামেব কল্কৈরষ্টভিঃ পলৈশ্চক্রতৈলস্য দ্বাত্রিংশত্পলানি বিপচেত্, যাবত্তৈলপাকলক্ষণানি ভবন্তি, এবমানুমানিকং কল্পনীযম্ ||২৭-২৮||
Adhikarana 10 (29) · Śloka 29
কেশপ্রসাধনী কেশ্যা রজোজন্তুমলাপহা |২৯|
केशप्रसाधनी केश्या रजोजन्तुमलापहा |२९|
🔊 Audio coming soon
কেশপ্রসাধনী কঙ্কতিকা ‘কাকুংই’ ইতি লোকে| রজো ধূলিঃ| জন্তুঃ যূকা|২৯|-
Adhikarana 11 (29) · Śloka 29
হনুমন্যাশিরঃকর্ণশূলঘ্নং কর্ণপূরণম্ ||২৯||
हनुमन्याशिरःकर्णशूलघ्नं कर्णपूरणम् ||२९||
🔊 Audio coming soon
হন্বিত্যাদি| কর্ণপূরণকালস্য সঙ্খ্যাং শ্রীবাগ্ভটঃ প্রাহ- “ধারযেত্ পূরণং কর্ণে কর্ণমূলং বিমর্দযন্| রুজঃ স্যান্মার্দবং যাবন্মাত্রাশতমবেদনে” (বা.সূ.অ.২২)- ইতি||২৯||
Adhikarana 12 (30) · Śloka 30
অভ্যঙ্গো মার্দবকরঃ কফবাতনিরোধনঃ | ধাতূনাং পুষ্টিজননো মৃজাবর্ণবলপ্রদঃ ||৩০||
अभ्यङ्गो मार्दवकरः कफवातनिरोधनः | धातूनां पुष्टिजननो मृजावर्णबलप्रदः ||३०||
🔊 Audio coming soon
অভ্যঙ্গ ইত্যাদি| অভ্যঙ্গোঽত্র সকলদেহস্য স্নেহাভ্যঙ্গঃ| মৃজা শুদ্ধপ্রভা, বর্ণো গৌরাদিঃ| স্নেহস্য সিরামুখাদিভিঃ শরীরসন্তর্পণকালং কেচিদত্র পঠন্তি- “রোমান্তেষ্বনু দেহস্য স্থিত্বা মাত্রাশতত্রযম্| ততঃ প্রবিশতি স্নেহশ্চতুর্ভির্গচ্ছতি ত্বচম্||রক্তং গচ্ছতি মাত্রাণাং শতৈঃ পঞ্চভিরেব তু| ষড্ভির্মাংসং প্রপদ্যেত মেদঃ সপ্তভিরেব চ||শতৈরষ্টাভিরস্থীনি মজ্জানং নবভির্ব্রজেত্| তত্রস্থাঞ্ছমযেদ্রোগান্ বাতপিত্তকফাত্মকান্” ইতি||৩০||
Adhikarana 13 (31-32) · Śloka 32
সেকঃ শ্রমঘ্নোঽনিলহৃদ্ভগ্নসন্ধিপ্রসাধকঃ | ক্ষতাগ্নিদগ্ধাভিহতবিঘৃষ্টানাং রুজাপহঃ ||৩১|| জলসিক্তস্য বর্ধন্তে যথা মূলেঽঙ্কুরাস্তরোঃ | তথা ধাতুবিবৃদ্ধির্হি স্নেহসিক্তস্য জাযতে ||৩২||
सेकः श्रमघ्नोऽनिलहृद्भग्नसन्धिप्रसाधकः | क्षताग्निदग्धाभिहतविघृष्टानां रुजापहः ||३१|| जलसिक्तस्य वर्धन्ते यथा मूलेऽङ्कुरास्तरोः | तथा धातुविवृद्धिर्हि स्नेहसिक्तस्य जायते ||३२||
🔊 Audio coming soon
সেকঃ সর্বাঙ্গপরিষেকঃ||৩১-৩২||
Adhikarana 14 (33) · Śloka 33
সিরামুখৈ রোমকূপৈর্ধমনীভিশ্চ তর্পযন্ | শরীরবলমাধত্তে যুক্তঃ স্নেহোঽবগাহনে ||৩৩||
सिरामुखै रोमकूपैर्धमनीभिश्च तर्पयन् | शरीरबलमाधत्ते युक्तः स्नेहोऽवगाहने ||३३||
🔊 Audio coming soon
যুক্তঃ প্রযুক্তঃ| অবগাহনং মজ্জনম্||৩৩||
Adhikarana 15 (34) · Śloka 34
তত্র প্রকৃতিসাত্ম্যর্তুদেশদোষবিকারবিত্ | তৈলং ঘৃতং বা মতিমান্ যুঞ্জ্যাদভ্যঙ্গসেকযোঃ ||৩৪||
तत्र प्रकृतिसात्म्यर्तुदेशदोषविकारवित् | तैलं घृतं वा मतिमान् युञ्ज्यादभ्यङ्गसेकयोः ||३४||
🔊 Audio coming soon
তেষাং যোগ্যতামাহ- তত্রেত্যাদি||৩৪||
Adhikarana 16 (35-37) · Śloka 37
কেবলং সামদোষেষু ন কথঞ্চন যোজযেত্ | তরুণজ্বর্যজীর্ণী চ নাভ্যক্তব্যৌ কথঞ্চন ||৩৫|| তথা বিরিক্তো বান্তশ্চ নিরূঢো যশ্চ মানবঃ | পূর্বযোঃ কৃচ্ছ্রতা ব্যাধেরসাধ্যত্বমথাপি বা ||৩৬|| শেষাণাং তদহঃ প্রোক্তা অগ্নিমান্দ্যাদযো গদাঃ | সন্তর্পণসমুত্থানাং রোগাণাং নৈব কারযেত্ ||৩৭||
केवलं सामदोषेषु न कथञ्चन योजयेत् | तरुणज्वर्यजीर्णी च नाभ्यक्तव्यौ कथञ्चन ||३५|| तथा विरिक्तो वान्तश्च निरूढो यश्च मानवः | पूर्वयोः कृच्छ्रता व्याधेरसाध्यत्वमथापि वा ||३६|| शेषाणां तदहः प्रोक्ता अग्निमान्द्यादयो गदाः | सन्तर्पणसमुत्थानां रोगाणां नैव कारयेत् ||३७||
🔊 Audio coming soon
অভ্যঙ্গস্য নিষেধমাহ- কেবলমিত্যাদি| আমজ্বরে তত্কৃতকম্পাদীনামপি সম্ভব ইত্যর্থঃ| পূর্বযোস্তরুণজ্বর্যজীর্ণিনোঃ; শেষাণাং বিরিক্তানাং তদহঃক্রিযমাণেঽভ্যঙ্গেঽগ্নিমান্দ্যাদযো ভবন্তি||৩৫-৩৭||
Adhikarana 17 (38-50) · Śloka 51
শরীরাযাসজননং কর্ম ব্যাযামসঞ্জ্ঞিতম্ | তত্ কৃত্বা তু সুখং দেহং বিমৃদ্গীযাত্ সমন্ততঃ ||৩৮|| শরীরোপচযঃ কান্তির্গাত্রাণাং সুবিভক্ততা | দীপ্তাগ্নিত্বমনালস্যং স্থিরত্বং লাঘবং মৃজা ||৩৯|| শ্রমক্লমপিপাসোষ্ণশীতাদীনাং সহিষ্ণুতা | আরোগ্যং চাপি পরমং ব্যাযামাদুপজাযতে ||৪০|| ন চাস্তি সদৃশং তেন কিঞ্চিত্ স্থৌল্যাপকর্ষণম্ | ন চ ব্যাযামিনং মর্ত্যমর্দযন্ত্যরযো বলাত্ ||৪১|| ন চৈনং সহসাঽঽক্রম্য জরা সমধিরোহতি | স্থিরীভবতি মাংসং চ ব্যাযামাভিরতস্য চ ||৪২|| ব্যাযামস্বিন্নগাত্রস্য পদ্ভ্যামুদ্বর্তিতস্য চ | ব্যাধযো নোপসর্পন্তি সিংহং ক্ষুদ্রমৃগা ইব ||৪৩|| বযোরূপগুণৈর্হীনমপি কুর্যাত্ সুদর্শনম্ | ব্যাযামং কুর্বতো নিত্যং বিরুদ্ধমপি ভোজনম্ ||৪৪|| বিদগ্ধমবিদগ্ধং বা নির্দোষং পরিপচ্যতে | ব্যাযামো হি সদা পথ্যো বলিনাং স্নিগ্ধভোজিনাম্ ||৪৫|| স চ শীতে বসন্তে চ তেষাং পথ্যতমঃ স্মৃতঃ | সর্বেষ্বৃতুষ্বহরহঃ পুম্ভিরাত্মহিতৈষিভিঃ ||৪৬|| বলস্যার্ধেন কর্তব্যো ব্যাযামো হন্ত্যতোঽন্যথা | হৃদি স্থানস্থিতো বাযুর্যদা বক্ত্রং প্রপদ্যতে ||৪৭|| ব্যাযামং কুর্বতো জন্তোস্তদ্বলার্ধস্য লক্ষণম্ | বযোবলশরীরাণি দেশকালাশনানি চ ||৪৮|| সমীক্ষ্য কুর্যাদ্ব্যাযামমন্যথা রোগমাপ্নুযাত্ | ক্ষযতৃষ্ণারুচিচ্ছর্দিরক্তপিত্তভ্রমক্লমাঃ ||৪৯|| কাসশোষজ্বরশ্বাসা অতিব্যাযামসম্ভবাঃ | রক্তপিত্তী কৃশঃ শোষী শ্বাসকাসক্ষতাতুরঃ ||৫০|| ভুক্তবান্ স্ত্রীষু চ ক্ষীণস্তৃড্ভ্রমার্তশ্চ বর্জযেত্ |৫১|
शरीरायासजननं कर्म व्यायामसञ्ज्ञितम् | तत् कृत्वा तु सुखं देहं विमृद्गीयात् समन्ततः ||३८|| शरीरोपचयः कान्तिर्गात्राणां सुविभक्तता | दीप्ताग्नित्वमनालस्यं स्थिरत्वं लाघवं मृजा ||३९|| श्रमक्लमपिपासोष्णशीतादीनां सहिष्णुता | आरोग्यं चापि परमं व्यायामादुपजायते ||४०|| न चास्ति सदृशं तेन किञ्चित् स्थौल्यापकर्षणम् | न च व्यायामिनं मर्त्यमर्दयन्त्यरयो बलात् ||४१|| न चैनं सहसाऽऽक्रम्य जरा समधिरोहति | स्थिरीभवति मांसं च व्यायामाभिरतस्य च ||४२|| व्यायामस्विन्नगात्रस्य पद्भ्यामुद्वर्तितस्य च | व्याधयो नोपसर्पन्ति सिंहं क्षुद्रमृगा इव ||४३|| वयोरूपगुणैर्हीनमपि कुर्यात् सुदर्शनम् | व्यायामं कुर्वतो नित्यं विरुद्धमपि भोजनम् ||४४|| विदग्धमविदग्धं वा निर्दोषं परिपच्यते | व्यायामो हि सदा पथ्यो बलिनां स्निग्धभोजिनाम् ||४५|| स च शीते वसन्ते च तेषां पथ्यतमः स्मृतः | सर्वेष्वृतुष्वहरहः पुम्भिरात्महितैषिभिः ||४६|| बलस्यार्धेन कर्तव्यो व्यायामो हन्त्यतोऽन्यथा | हृदि स्थानस्थितो वायुर्यदा वक्त्रं प्रपद्यते ||४७|| व्यायामं कुर्वतो जन्तोस्तद्बलार्धस्य लक्षणम् | वयोबलशरीराणि देशकालाशनानि च ||४८|| समीक्ष्य कुर्याद्व्यायाममन्यथा रोगमाप्नुयात् | क्षयतृष्णारुचिच्छर्दिरक्तपित्तभ्रमक्लमाः ||४९|| कासशोषज्वरश्वासा अतिव्यायामसम्भवाः | रक्तपित्ती कृशः शोषी श्वासकासक्षतातुरः ||५०|| भुक्तवान् स्त्रीषु च क्षीणस्तृड्भ्रमार्तश्च वर्जयेत् |५१|
🔊 Audio coming soon
শরীরেত্যাদি| শরীরস্যোপচযঃ সম্যক্পুষ্টিঃ| গাত্রাণাং সুবিভক্ততা গাত্রাণামিতি সর্বেষামঙ্গানাং, সুবিভক্ততা সুসন্নিবিষ্টতা সুঘটিতশরীরতেত্যর্থঃ| মৃজা শুদ্ধিঃ | শত্রবো যথা চ ব্যাযামিনং বলাদ্ধেতোর্ন মর্দযন্তি উদ্বর্তনকারিণং জনং তথা ব্যাধযো নোপসর্পন্তি নাভিভবন্তীত্যর্থঃ| স্থিরীভবতি মাংসং চেতি উপচযলক্ষণস্যাপি বলস্য হেতুরিত্যর্থঃ| ব্যাযামস্বিন্নগাত্রস্যেতি গাত্রে স্বেদাগমে সতি ব্যাযামাদুপরমঃ কার্য ইত্যর্থঃ, অন্যে তু ‘ব্যাযামস্বিন্নগাত্রস্য’ ইত্যত্র ‘ব্যাযামক্ষুণ্ণগাত্রস্য’ ইতি পঠন্তি| পদ্ভ্যামুদ্বর্তিতস্য পাদাভ্যাং বহুকৃতমর্দনস্যেত্যর্থঃ| বিরুদ্ধং হিতাহিতীযাধ্যাযোক্তম্| বিদগ্ধম্ অম্লপাকম্, অবিদগ্ধং বিদগ্ধাদন্যত্, তেনামং বিদগ্ধং চ গৃহ্যতে| পরিঃ সর্বতোঽর্থে| বসন্তে চেতি চকারঃ পথ্যতমত্বে হেমন্তাদ্বসন্তস্যাপকর্ষং সূচযতি| বলার্ধলক্ষণং কেচিদন্যথা পঠন্তি,- “কক্ষাললাটনাসাসু হস্তপাদাদিসন্ধিষু| প্রস্বেদান্মুখশোষাচ্চ বলার্ধং তদ্ধি নির্দিশেত্”- ইতি| বযোবলেত্যাদি বযো যৌবনং, বলং শক্ত্যুপচযলক্ষণং, শরীরং মধ্যং স্থূলং চ, দেশমানূপং সাধারণং চ; কালং নিত্যগমাবস্থিকং চ দ্বিবিধমপি, তত্র নিত্যগে শীতে বসন্তে চ, আবস্থিকে যৌবনে বলে সতি; অশনানি স্নিগ্ধভোজনানি; সমীক্ষ্য দৃষ্ট্বা উপচযপ্রভৃতৌ ব্যাযামং কুর্যাত্| ব্যাযামাদগ্নিপ্রদীপ্তৌ সত্যাং সর্বরোগোপশম ইতি||৩৮-৫০||-
Adhikarana 18 (51) · Śloka 52
উদ্বর্তনং বাতহরং কফমেদোবিলাপনম্ ||৫১|| স্থিরীকরণমঙ্গানাং ত্বক্প্রসাদকরং পরম্ |৫২|
उद्वर्तनं वातहरं कफमेदोविलापनम् ||५१|| स्थिरीकरणमङ्गानां त्वक्प्रसादकरं परम् |५२|
🔊 Audio coming soon
ব্যাযামে পদ্ভ্যামুদ্বর্তিতস্যেত্যুক্তস্যোদ্বর্তনস্য গুণং নির্দিশন্নাহ- উদ্বর্তনমিত্যাদি| উদ্বর্তনং গাত্রমর্দনম্| বিলাপনং দ্রবীকরণম্||৫১||
Adhikarana 19 (52-56) · Śloka 56
সিরামুখবিবিক্তত্বং ত্বক্স্থস্যাগ্নেশ্চ তেজনম্ ||৫২|| উদ্ধর্ষণোত্সাদনাভ্যাং জাযেযাতামসংশযম্ | উত্সাদনাদ্ভবেত্ স্ত্রীণাং বিশেষাত্ কান্তিমদ্বপুঃ ||৫৩|| প্রহর্ষসৌভাগ্যমৃজালাঘবাদিগুণান্বিতম্ | উদ্ধর্ষণং তু বিজ্ঞেযং কণ্ডূকোঠানিলাপহম্ ||৫৪|| ঊর্বোঃ সঞ্জনযত্যাশু ফেনকঃ স্থৈর্যলাঘবে | কণ্ডূকোঠানিলস্তম্ভমলরোগাপহশ্চ সঃ ||৫৫|| তেজনং ত্বগ্গতস্যাগ্নেঃ সিরামুখবিবেচনম্ | উদ্ধর্ষণং ত্বিষ্টিকযা কণ্ডূকোঠবিনাশনম্ ||৫৬||
सिरामुखविविक्तत्वं त्वक्स्थस्याग्नेश्च तेजनम् ||५२|| उद्धर्षणोत्सादनाभ्यां जायेयातामसंशयम् | उत्सादनाद्भवेत् स्त्रीणां विशेषात् कान्तिमद्वपुः ||५३|| प्रहर्षसौभाग्यमृजालाघवादिगुणान्वितम् | उद्धर्षणं तु विज्ञेयं कण्डूकोठानिलापहम् ||५४|| ऊर्वोः सञ्जनयत्याशु फेनकः स्थैर्यलाघवे | कण्डूकोठानिलस्तम्भमलरोगापहश्च सः ||५५|| तेजनं त्वग्गतस्याग्नेः सिरामुखविवेचनम् | उद्धर्षणं त्विष्टिकया कण्डूकोठविनाशनम् ||५६||
🔊 Audio coming soon
সিরেত্যাদি| তেজনং ত্বগ্গতস্যাগ্নেঃ, সিরামুখবিবর্ধনম্| উদ্ধর্ষণম্ অস্নেহৌষধচূর্ণাদিভির্ঘর্ষণম্, অন্যে তু ফেনকেষ্টকাদিঘর্ষণম্| উদ্ধর্ষণোত্সাদনাভ্যাং জাযেযাতামিতি সিরামুখবিবিক্তত্বাগ্নিদীপনে উদ্ধর্ষণোত্সাদনাভ্যামুত্পদ্যেযাতাং;| কেচিদত্র যথাসঙ্খ্যমাহুঃ- সিরামুখবিবিক্তত্বমুদ্ধর্ষণেন, ত্বক্স্থস্যাগ্নেস্তেজনমুত্সাদনেন; সস্নেহকল্কেনোদ্ধর্ষণমুত্সাদনম্| মৃজা শুদ্ধপ্রভা| ঊর্বোরূর্ধ্বমধশ্চ ফেনকঃ, ঊরুঃ ‘জাঙ্ঘ’ ইতি লোকে| কণ্ডূকোঠবিনাশনমিতি ইযমিষ্টিকোদ্ধর্ষণগুণোক্তিঃ||৫২-৫৬||
Adhikarana 20 (57-63) · Śloka 64
নিদ্রাদাহশ্রমহরং স্বেদকণ্ডূতৃষাপহম্ | হৃদ্যং মলহরং শ্রেষ্ঠং সর্বেন্দ্রিযবিবোধনম্ ||৫৭|| তন্দ্রাপাপ্মোপশমনং তুষ্টিদং পুংস্ত্ববর্ধনম্ | রক্তপ্রসাদনং চাপি স্নানমগ্নেশ্চ দীপনম্ ||৫৮|| উষ্ণেন শিরসঃ স্নানমহিতং চক্ষুষঃ সদা | শীতেন শিরসঃ স্নানং চক্ষুষ্যমিতি নির্দিশেত্ ||৫৯|| শ্লেষ্মমারুতকোপে তু জ্ঞাত্বা ব্যাধিবলাবলম্ | কামমুষ্ণং শিরঃস্নানং ভৈষজ্যার্থং সমাচরেত্ ||৬০|| অতিশীতাম্বু শীতে চ শ্লেষ্মমারুতকোপনম্ | অত্যুষ্ণমুষ্ণকালে চ পিত্তশোণিতকোপনম্ ||৬১|| তচ্চাতিসারজ্বরিতকর্ণশূলানিলার্তিষু | আধ্মানারোচকাজীর্ণভুক্তবত্সু চ গর্হিতম্ ||৬২|| সৌভাগ্যদং বর্ণকরং প্রীত্যোজোবলবর্ধনম্ | স্বেদদৌর্গন্ধ্যবৈবর্ণ্যশ্রমঘ্নমনুলেপনম্ ||৬৩|| স্নানং যেষাং নিষিদ্ধং তু তেষামপ্যনুলেপনম্ |৬৪|
निद्रादाहश्रमहरं स्वेदकण्डूतृषापहम् | हृद्यं मलहरं श्रेष्ठं सर्वेन्द्रियविबोधनम् ||५७|| तन्द्रापाप्मोपशमनं तुष्टिदं पुंस्त्ववर्धनम् | रक्तप्रसादनं चापि स्नानमग्नेश्च दीपनम् ||५८|| उष्णेन शिरसः स्नानमहितं चक्षुषः सदा | शीतेन शिरसः स्नानं चक्षुष्यमिति निर्दिशेत् ||५९|| श्लेष्ममारुतकोपे तु ज्ञात्वा व्याधिबलाबलम् | काममुष्णं शिरःस्नानं भैषज्यार्थं समाचरेत् ||६०|| अतिशीताम्बु शीते च श्लेष्ममारुतकोपनम् | अत्युष्णमुष्णकाले च पित्तशोणितकोपनम् ||६१|| तच्चातिसारज्वरितकर्णशूलानिलार्तिषु | आध्मानारोचकाजीर्णभुक्तवत्सु च गर्हितम् ||६२|| सौभाग्यदं वर्णकरं प्रीत्योजोबलवर्धनम् | स्वेददौर्गन्ध्यवैवर्ण्यश्रमघ्नमनुलेपनम् ||६३|| स्नानं येषां निषिद्धं तु तेषामप्यनुलेपनम् |६४|
🔊 Audio coming soon
নিদ্রেত্যাদি| কামং যথেষ্টম্| স্নানস্য নিষেধমাহ- তদিত্যাদি| যেষাং স্নানং নেষ্যতে তেষামনুলেপনমপি নিষিধ্যতে||৫৭-৬৩||-
Adhikarana 21 (64) · Śloka 65
রক্ষোঘ্নমথ চৌজস্যং সৌভাগ্যকরমুত্তমম্ ||৬৪|| সুমনোম্বররত্নানাং ধারণং প্রীতিবর্ধনম্ |৬৫|
रक्षोघ्नमथ चौजस्यं सौभाग्यकरमुत्तमम् ||६४|| सुमनोम्बररत्नानां धारणं प्रीतिवर्धनम् |६५|
🔊 Audio coming soon
রক্ষোঘ্নমিত্যাদি| রত্নানি মাণিক্যমরকতাদীনি| অস্যাগ্রে আদর্শগুণং গোরোচনাধারণগুণং চ কেচিদধীযতে; স চাভাবান্ন লিখিতঃ||৬৪||-
Adhikarana 22 (65) · Śloka 66
মুখালেপাদ্দৃঢং চক্ষুঃ পীনগণ্ডং তথাঽঽননম্ ||৬৫|| অব্যঙ্গপিডকং কান্তং ভবত্যম্বুজসন্নিভম্ |৬৬|
मुखालेपाद्दृढं चक्षुः पीनगण्डं तथाऽऽननम् ||६५|| अव्यङ्गपिडकं कान्तं भवत्यम्बुजसन्निभम् |६६|
🔊 Audio coming soon
মুখেত্যাদি| কান্তং কমনীযং মনোহরমিত্যর্থঃ||৬৫||-
Adhikarana 23 (66-67) · Śloka 68
পক্ষ্মলং বিশদং কান্তমমলোজ্জ্বলমণ্ডলম্ ||৬৬|| নেত্রমঞ্জনসংযোগাদ্ভবেচ্চামলতারকম্ | যশস্যং স্বর্গ্যমাযুষ্যং ধনধান্যবিবর্ধনম্ ||৬৭|| দেবতাতিথিবিপ্রাণাং পূজনং গোত্রবর্ধনম্ |৬৮|
पक्ष्मलं विशदं कान्तममलोज्ज्वलमण्डलम् ||६६|| नेत्रमञ्जनसंयोगाद्भवेच्चामलतारकम् | यशस्यं स्वर्ग्यमायुष्यं धनधान्यविवर्धनम् ||६७|| देवतातिथिविप्राणां पूजनं गोत्रवर्धनम् |६८|
🔊 Audio coming soon
সামান্যমঞ্জনগুণমাহ- পক্ষ্মলমিত্যাদি| পক্ষ্মলং ঘনরোমান্বিতম্ বিশদং চিপ্পৌরহিতম্| অমলোজ্জ্বলমণ্ডলমিতি নির্মলোজ্জ্বলচক্ষুর্বহির্ভাগম্ ||৬৬-৬৭||-
Adhikarana 24 (68) · Śloka 69
আহারঃ প্রীণনঃ সদ্যো বলকৃদ্দেহধারকঃ ||৬৮|| আযুস্তেজঃসমুত্সাহস্মৃত্যোজোগ্নিবিবর্ধনঃ |৬৯|
आहारः प्रीणनः सद्यो बलकृद्देहधारकः ||६८|| आयुस्तेजःसमुत्साहस्मृत्योजोग्निविवर्धनः |६९|
🔊 Audio coming soon
আহার ইত্যাদি| তেজো ভ্রাজিষ্ণুতা, সমুত্সাহঃ সম্যক্চিত্তব্যবসাযঃ, ওজো হৃদিস্থং প্রাণাযতনম্||৬৮||-
Adhikarana 25 (69) · Śloka 70
পাদপ্রক্ষালনং পাদমলরোগশ্রমাপহম্ ||৬৯|| চক্ষুঃপ্রসাদনং বৃষ্যং রক্ষোঘ্নং প্রীতিবর্ধনম্ |৭০|
पादप्रक्षालनं पादमलरोगश्रमापहम् ||६९|| चक्षुःप्रसादनं वृष्यं रक्षोघ्नं प्रीतिवर्धनम् |७०|
🔊 Audio coming soon
চক্ষুঃপ্রসাদনং দৃষ্টিপ্রসাদনং, দৃষ্টিসংযুক্তপাদনিবন্ধননাডীপ্রসাদনত্বাত্ ; প্রভাবাদিত্যপরে| বৃষ্যং শুক্রবৃদ্ধিকরং, প্রভাবাত্||৬৯||-
Adhikarana 26 (70) · Śloka 71
নিদ্রাকরো দেহসুখশ্চক্ষুষ্যঃ শ্রমসুপ্তিনুত্ ||৭০|| পাদত্বঙ্মৃদুকারী চ পাদাভ্যঙ্গঃ সদা হিতঃ |৭১|
निद्राकरो देहसुखश्चक्षुष्यः श्रमसुप्तिनुत् ||७०|| पादत्वङ्मृदुकारी च पादाभ्यङ्गः सदा हितः |७१|
🔊 Audio coming soon
নিদ্রেত্যাদি| পাদাভ্যঙ্গোঽত্রাপি দৃষ্টিপ্রদঃ পূর্ববত্||৭০||-
Adhikarana 27 (71-74) · Śloka 74
পাদরোগহরং বৃষ্যং রক্ষোঘ্নং প্রীতিবর্ধনম্ ||৭১|| সুখপ্রচারমোজস্যং সদা পাদত্রধারণম্ | অনারোগ্যমনাযুষ্যং চক্ষুষোরুপঘাতকৃত্ ||৭২|| পাদাভ্যামনুপানদ্ভ্যাং সদা চঙ্ক্রমণং নৃণাম্ | পাপ্মোপশমনং কেশনখরোমাপমার্জনম্ ||৭৩|| হর্ষলাঘবসৌভাগ্যকরমুত্সাহবর্ধনম্ | বাণবারং মৃজাবর্ণতেজোবলবিবর্ধনম্ ||৭৪||
पादरोगहरं वृष्यं रक्षोघ्नं प्रीतिवर्धनम् ||७१|| सुखप्रचारमोजस्यं सदा पादत्रधारणम् | अनारोग्यमनायुष्यं चक्षुषोरुपघातकृत् ||७२|| पादाभ्यामनुपानद्भ्यां सदा चङ्क्रमणं नृणाम् | पाप्मोपशमनं केशनखरोमापमार्जनम् ||७३|| हर्षलाघवसौभाग्यकरमुत्साहवर्धनम् | बाणवारं मृजावर्णतेजोबलविवर्धनम् ||७४||
🔊 Audio coming soon
পাদেত্যাদি| পাদত্রং পাদহিতং পাদুকাদি| অনুপানদ্ভ্যাং পাদত্রাণরহিতাভ্যাম্| বাণবারং বর্ম||৭১-৭৪||
Adhikarana 28 (75) · Śloka 75
পবিত্রং কেশ্যমুষ্ণীষং বাতাতপরজোপহম্ |৭৫|
पवित्रं केश्यमुष्णीषं वातातपरजोपहम् |७५|
🔊 Audio coming soon
পবিত্রমিত্যাদি| উষ্ণীষং শিরোবেষ্টনম্|৭৫|-
Adhikarana 29 (75) · Śloka 76
বর্ষানিলরজোঘর্মহিমাদীনাং নিবারণম্ ||৭৫|| বর্ণ্যং চক্ষুষ্যমৌজস্যং শঙ্করং ছত্রধারণম্ |৭৬|
वर्षानिलरजोघर्महिमादीनां निवारणम् ||७५|| वर्ण्यं चक्षुष्यमौजस्यं शङ्करं छत्रधारणम् |७६|
🔊 Audio coming soon
বর্ষেত্যাদি| শঙ্করং সুখকরম্||৭৫||-
Adhikarana 30 (76-77) · Śloka 78
শুনঃ সরীসৃপব্যালবিষাণিভ্যো ভযাপহম্ ||৭৬|| শ্রমস্খলনদোষঘ্নং স্থবিরে চ প্রশস্যতে | সত্ত্বোত্সাহবলস্থৈর্যধৈর্যবীর্যবিবর্ধনম্ ||৭৭|| অবষ্টম্ভকরং চাপি ভযঘ্নং দণ্ডধারণম্ |৭৮|
शुनः सरीसृपव्यालविषाणिभ्यो भयापहम् ||७६|| श्रमस्खलनदोषघ्नं स्थविरे च प्रशस्यते | सत्त्वोत्साहबलस्थैर्यधैर्यवीर्यविवर्धनम् ||७७|| अवष्टम्भकरं चापि भयघ्नं दण्डधारणम् |७८|
🔊 Audio coming soon
শুন ইত্যাদি| সরীসৃপাঃ কৃষ্ণসর্পাদযঃ| ব্যালা ব্যাঘ্রাদযঃ| বিষাণিভ্যঃ শৃঙ্গিভ্যঃ| সত্ত্বং সত্ত্বগুণঃ, উত্সাহো বলং, বলম্ ওজঃ, স্থৈর্যং অচলত্বং, ধৈর্যং ধীরত্বং, বীর্যং শক্তিঃ| অবষ্টম্ভঃ অবলম্বনম্| ভযঘ্নং ভযনাশকম্||৭৬-৭৭||-
Adhikarana 31 (78) · Śloka 78
আস্যা বর্ণকফস্থৌল্যসৌকুমার্যকরী সুখা ||৭৮||
आस्या वर्णकफस्थौल्यसौकुमार्यकरी सुखा ||७८||
🔊 Audio coming soon
আস্যেত্যাদি| আস্যা স্থিতিঃ||৭৮||
Adhikarana 32 (79-80) · Śloka 80
অধ্বা বর্ণকফস্থৌল্যসৌকুমার্যবিনাশনঃ | অত্যধ্বা বিপরীতোঽস্মাজ্জরাদৌর্বল্যকৃচ্চ সঃ ||৭৯|| যত্তু চঙ্ক্রমণং নাতিদেহপীডাকরং ভবেত্ | তদাযুর্বলমেধাগ্নিপ্রদমিন্দ্রিযবোধনম্ ||৮০||
अध्वा वर्णकफस्थौल्यसौकुमार्यविनाशनः | अत्यध्वा विपरीतोऽस्माज्जरादौर्बल्यकृच्च सः ||७९|| यत्तु चङ्क्रमणं नातिदेहपीडाकरं भवेत् | तदायुर्बलमेधाग्निप्रदमिन्द्रियबोधनम् ||८०||
🔊 Audio coming soon
অধ্বেত্যাদি| অত্যধ্বা অতিশযেন মার্গগমনম্| চঙ্ক্রমণং কুটিলগত্যা পরিভ্রমণম্||৭৯-৮০||
Adhikarana 33 (81-82) · Śloka 82
শ্রমানিলহরং বৃষ্যং পুষ্টিনিদ্রাধৃতিপ্রদম্ | সুখং শয্যাসনং, দুঃখং বিপরীতগুণং মতম্ ||৮১|| বালব্যজনমৌজস্যং মক্ষিকাদীনপোহতি | শোষদাহশ্রমস্বেদমূর্চ্ছাঘ্নো ব্যজনানিলঃ ||৮২||
श्रमानिलहरं वृष्यं पुष्टिनिद्राधृतिप्रदम् | सुखं शय्यासनं, दुःखं विपरीतगुणं मतम् ||८१|| बालव्यजनमौजस्यं मक्षिकादीनपोहति | शोषदाहश्रमस्वेदमूर्च्छाघ्नो व्यजनानिलः ||८२||
🔊 Audio coming soon
শ্রমেত্যাদি| সুখং শয্যাসনং বিস্তৃতমাস্তীর্ণং মৃদুগণ্ডোপধানাদিযুক্তম্| দুঃখং সঙ্কোচ্যাসনং , দুঃখং বিপরীতগুণম্| বালব্যজনং চামরাখ্যব্যজনম্| ব্যজনানিলঃ তালবৃন্তবাযুঃ||৮১-৮২||
Adhikarana 34 (83) · Śloka 83
প্রীতিনিদ্রাকরং বৃষ্যং কফবাতশ্রমাপহম্ | সংবাহনং মাংসরক্তত্বক্প্রসাদকরং সুখম্ ||৮৩||
प्रीतिनिद्राकरं वृष्यं कफवातश्रमापहम् | संवाहनं मांसरक्तत्वक्प्रसादकरं सुखम् ||८३||
🔊 Audio coming soon
প্রীতীত্যাদি| সংবাহনং সুখকরস্পর্শঃ, মর্দনং তু গাঢং পাদাভ্যামারভ্য কটিপর্যন্তং, অমিতপ্রভটীকাকারস্তু হস্তাভ্যাং শনৈঃ শনৈরাহননমিতি বদতি||৮৩||
Adhikarana 35 (84-88) · Śloka 88
প্রবাতং রৌক্ষ্যবৈবর্ণ্যস্তম্ভকৃদ্দাহপক্তিনুত্ | স্বেদমূর্চ্ছাপিপাসাঘ্নমপ্রবাতমতোঽন্যথা ||৮৪|| সুখং বাতং প্রসেবেত গ্রীষ্মে শরদি মানবঃ | নিবাতং হ্যাযুষে সেব্যমারোগ্যায চ সর্বদা ||৮৫|| আতপঃ পিত্ততৃষ্ণাগ্নিস্বেদমূর্চ্ছাভ্রমাস্রকৃত্ | দাহবৈবর্ণ্যকারী চ ছাযা চৈতানপোহতি ||৮৬|| অগ্নির্বাতকফস্তম্ভশীতবেপথুনাশনঃ | আমাভিষ্যন্দজরণো রক্তপিত্তপ্রদূষণঃ ||৮৭|| পুষ্টিবর্ণবলোত্সাহমগ্নিদীপ্তিমতন্দ্রিতাম্ | করোতি ধাতুসাম্যং চ নিদ্রা কালে নিষেবিতা ||৮৮||
प्रवातं रौक्ष्यवैवर्ण्यस्तम्भकृद्दाहपक्तिनुत् | स्वेदमूर्च्छापिपासाघ्नमप्रवातमतोऽन्यथा ||८४|| सुखं वातं प्रसेवेत ग्रीष्मे शरदि मानवः | निवातं ह्यायुषे सेव्यमारोग्याय च सर्वदा ||८५|| आतपः पित्ततृष्णाग्निस्वेदमूर्च्छाभ्रमास्रकृत् | दाहवैवर्ण्यकारी च छाया चैतानपोहति ||८६|| अग्निर्वातकफस्तम्भशीतवेपथुनाशनः | आमाभिष्यन्दजरणो रक्तपित्तप्रदूषणः ||८७|| पुष्टिवर्णबलोत्साहमग्निदीप्तिमतन्द्रिताम् | करोति धातुसाम्यं च निद्रा काले निषेविता ||८८||
🔊 Audio coming soon
সুখমিত্যাদি| “সুখং প্রবাতং সেবেত গ্রীষ্মে শরদি বাঽন্তরা” ইত্যন্যে পঠন্তি, ব্যাখ্যানযন্তি চ- গ্রীষ্মশরদৌ প্রবাতসেবনকালঃ, পরং তযোরপি প্রবাতসেবনং সান্তরম্| জ্যোত্স্নাতমসোর্গুণাঃ পুনশ্ছাযানিবাতগুণৈঃ সদৃশা জ্ঞেযা ইতীহ নোক্তাঃ| অদ্রব্যত্বেঽপি আতপাদীনাং প্রভাবজং কর্ম; অন্যে পুনরাতপং তেজঃপরমাণুপুঞ্জং, ছাযামপি তমঃপরমাণুজামাহুঃ||৮৪-৮৮||
Adhikarana 36 (89) · Śloka 89
তত্রাদিত এব নীচনখরোম্ণা শুচিনা শুক্লবাসসা লঘূষ্ণীষচ্ছত্রোপানত্কেন দণ্ডপাণিনা কালে হিতমিতমধুরপূর্বাভিভাষিণা বন্ধুভূতেন ভূতানাং গুরুবৃদ্ধানুমতেন সুসহাযেনানন্যমনসা খলূপচরিতব্যং, তদপি ন রাত্রৌ, ন কেশাস্থিকণ্টকাশ্মতুষভস্মোত্করকপালাঙ্গারামেধ্যস্নানবলিভূমিষু, ন বিষমেন্দ্রকীলচতুষ্পথশ্বভ্রাণামুপরিষ্টাত্ ||৮৯||
तत्रादित एव नीचनखरोम्णा शुचिना शुक्लवाससा लघूष्णीषच्छत्रोपानत्केन दण्डपाणिना काले हितमितमधुरपूर्वाभिभाषिणा बन्धुभूतेन भूतानां गुरुवृद्धानुमतेन सुसहायेनानन्यमनसा खलूपचरितव्यं, तदपि न रात्रौ, न केशास्थिकण्टकाश्मतुषभस्मोत्करकपालाङ्गारामेध्यस्नानबलिभूमिषु, न विषमेन्द्रकीलचतुष्पथश्वभ्राणामुपरिष्टात् ||८९||
🔊 Audio coming soon
প্রাতরুত্থিতস্য দন্তকাষ্ঠখাদনাদীন্দ্রিযশরীরমনসামুপকারকমন্তরঙ্গমভিধায বহিরঙ্গোপচরণে সদ্ধৃত্তমুদ্দিশন্নাহ- তত্রেত্যাদি| লঘূষ্ণীষম্ অল্পতনুকৃতং শিরোবেষ্টনং; কেচিল্লঘুপদং ছত্রেণোপানদাঽপি সম্বন্ধযন্তি| উপচরিতব্যম্ উপগমনং কর্তব্যম্| উত্করঃ তৃণাদিসমূহঃ; আচ্ছাদিতখনিতমৃত্তিকাদিরিত্যপরে| যাগার্থং নিখাতো যূপোপলক্ষিতঃ প্রদেশ ইন্দ্রকীলঃ, ইন্দ্রার্থং কীলা ন্যস্যন্তে যস্মিন্ দেশে স প্রদেশ ইন্দ্রকীলঃ| চতুষ্পথো মার্গচতুষ্টযসঙ্গমঃ| শ্বভ্রং গর্তঃ||৮৯||
Adhikarana 37 (90) · Śloka 90
ন রাজদ্বিষ্টপরুষপৈশুন্যানৃতানি বদেত্, ন দেবব্রাহ্মণপিতৃপরিবাদাংশ্চ; ন নরেন্দ্রদ্বিষ্টোন্মত্তপতিতক্ষুদ্রনীচানুপাসীত ||৯০||
न राजद्विष्टपरुषपैशुन्यानृतानि वदेत्, न देवब्राह्मणपितृपरिवादांश्च; न नरेन्द्रद्विष्टोन्मत्तपतितक्षुद्रनीचानुपासीत ||९०||
🔊 Audio coming soon
পৈশুন্যং সূচকতা, দৌর্জন্যমিতি যাবত্| পরিবাদো দোষকথনম্| উন্মত্তো বাতূলঃ, পতিতঃ স্বকীযধর্মাদ্ভ্রষ্টঃ , ক্ষুদ্রো লঘুঃ, নীচা ম্লেচ্ছাদযঃ| নোপাসীত নোপসেবেত||৯০||
Adhikarana 38 (91) · Śloka 91
বৃক্ষপর্বতপ্রপাতবিষমবল্মীকদুষ্টবাজিকুঞ্জরাদ্যধিরোহণানি পরিহরেত্, পূর্ণনদীসমুদ্রাবিদিতপল্বলশ্বভ্রকূপাবতরণানি, ভিন্নশূন্যাগারশ্মশানবিজনারণ্যবাসাগ্নিসম্ভ্রমব্যালভুজঙ্গকীটসেবাশ্চ, গ্রামাঘাতকলহশস্ত্রসন্নিপাতব্যালসরীসৃপশৃঙ্গিসন্নিকর্ষাংশ্চ ||৯১||
वृक्षपर्वतप्रपातविषमवल्मीकदुष्टवाजिकुञ्जराद्यधिरोहणानि परिहरेत्, पूर्णनदीसमुद्राविदितपल्वलश्वभ्रकूपावतरणानि, भिन्नशून्यागारश्मशानविजनारण्यवासाग्निसम्भ्रमव्यालभुजङ्गकीटसेवाश्च, ग्रामाघातकलहशस्त्रसन्निपातव्यालसरीसृपशृङ्गिसन्निकर्षांश्च ||९१||
🔊 Audio coming soon
প্রপাতো নির্ঝরপতনম্| কূপান্তাবতরণানি পরিহরেদিতি সম্বন্ধঃ; অবিদিতোঽজ্ঞাতস্বরূপঃ; পল্বলং খাতগর্তঃ, অবতরণং প্রবেশঃ; অত্রাপি পরিহরেদিতি সম্বন্ধঃ| ভিন্নশূন্যাগারং পতিতগৃহং জনরহিতগৃহং চ, বিজনং নির্জনম্, অরণ্যং অটবী, অগ্নিসম্ভ্রম উত্পাতপ্রদীপ্তঃ, ব্যালা ব্যাঘ্রাদযঃ, কীটা বৃশ্চিকাদযঃ, গ্রামাঘাতো মারীভযজন্যগ্রামহননং, সরীসৃপঃ কৃষ্ণসর্পঃ, সন্নিকর্ষং নৈকট্যং পরিহরেদিতি সম্বন্ধঃ| পূর্বমগ্নের্হেমন্তাদাবতিশৈত্যাদভিপ্রেতস্যাপি সেবা অত্যন্তোপাসনং নিষিদ্ধম্, অত্র তু গ্রীষ্মাদৌ তস্য সান্নিধ্যমপি নিষিদ্ধমিতি বুধ্যতে| তথা পূর্বং ব্যালভুজঙ্গযোরপি সেবা পুনঃ পুনর্নিকটোপাসনং নিষিদ্ধম্, অত্র তু বিশ্বস্তযোঃ সান্নিধ্যমপি নিষিধ্যত ইতি ন পৌনরুক্ত্যম্||৯১||
Adhikarana 39 (92) · Śloka 92
নাগ্নিগোগুরুব্রাহ্মণপ্রেঙ্খাদম্পত্যন্তরেণ যাযাত্ | ন শবমনুযাযাত্ | দেবগোব্রাহ্মণচৈত্যধ্বজরোগিপতিতপাপকারিণাং চ ছাযাং নাক্রমেত | নাস্তং গচ্ছন্তমুদ্যন্তং বাঽঽদিত্যং বীক্ষেত | গাং ধাপযন্তীং ধযন্তীং পরশস্যং বা চরন্তীং ন কস্মৈচিদাচক্ষীত, ন চোল্কাপাতোত্পাতেন্দ্রধনূংষি | নাগ্নিং মুখেনোপধমেত্ | নাপো ভূমিং বা পাণিপাদেনাভিহন্যাত্ ||৯২||
नाग्निगोगुरुब्राह्मणप्रेङ्खादम्पत्यन्तरेण यायात् | न शवमनुयायात् | देवगोब्राह्मणचैत्यध्वजरोगिपतितपापकारिणां च छायां नाक्रमेत | नास्तं गच्छन्तमुद्यन्तं वाऽऽदित्यं वीक्षेत | गां धापयन्तीं धयन्तीं परशस्यं वा चरन्तीं न कस्मैचिदाचक्षीत, न चोल्कापातोत्पातेन्द्रधनूंषि | नाग्निं मुखेनोपधमेत् | नापो भूमिं वा पाणिपादेनाभिहन्यात् ||९२||
🔊 Audio coming soon
অগ্ন্যোর্গুর্বোর্ব্রাহ্মণযোঃ প্রেঙ্খযোর্দম্পত্যোশ্চান্তরেণ ন গচ্ছেত্; প্রেঙ্খা দোলা, দম্পতী জাযাপতী| শবং মৃতপ্রাণিশরীরম্| অনুগমনং পশ্চাদ্গমনম্; স্কন্ধদানাদ্যধিকারং বিনেতি শেষঃ| চৈত্যঃ শ্মশানবৃক্ষঃ| নাক্রমেত ন লঙ্ঘযেত্| গাং সুরভীম্| ধাপযন্তীং পাযযন্তীং, বত্সমিতি গম্যতে, ধেট্ পানে| ধযন্তীং স্বযং পিবন্তীং কুণ্ডাদিনিক্ষিপ্তপানীযপ্রভৃতীনীতি গম্যতে| পরশস্যং পরক্ষেত্রম্| নাচক্ষীত ন কথযেত্| উল্কাপাত আকাশাজ্জ্বলদগ্নিপাতঃ; উত্পাতা দিব্যভৌমান্তরীক্ষাস্ত্রযঃ; তত্র দিব্যাঃ প্রতিমারোদনগন্ধর্বনগরদর্শনাদিকাঃ, ভৌমা ভূকম্পপ্রভৃতযঃ, আন্তরিক্ষাস্তারাপতনরবিপরিবেষাদযঃ; এতানি কস্মৈচিন্নাচক্ষীতেত্যর্থঃ| উপধমেত্ নাগ্নিং মুখেন জ্বালযেদিত্যর্থঃ| অভিহন্যাদিতি কারণং বিনেতি শেষঃ||৯২||
Adhikarana 40 (93) · Śloka 93
ন বেগান্ ধারযেদ্ বাতমূত্রপুরীষাদীনাম্ | ন বহির্বেগান্ গ্রামনগরদেবতাযতনশ্মশানচতুষ্পথসলিলাশযপথি সন্নিকৃষ্টানুত্সৃজেন্ন প্রকাশং ন বায্বগ্নিসলিলসোমার্কগোগুরুপ্রতিমুখম্ ||৯৩||
न वेगान् धारयेद् वातमूत्रपुरीषादीनाम् | न बहिर्वेगान् ग्रामनगरदेवतायतनश्मशानचतुष्पथसलिलाशयपथि सन्निकृष्टानुत्सृजेन्न प्रकाशं न वाय्वग्निसलिलसोमार्कगोगुरुप्रतिमुखम् ||९३||
🔊 Audio coming soon
বহির্বেগা বাতমূত্রপুরীষাদীনাম্| ন প্রকাশমিতি প্রকাশো যথা ভবত্যেবং নোত্সৃজেত্||৯৩||
Adhikarana 41 (94) · Śloka 94
ন ভূমিং বিলিখেত্, নাসংবৃতমুখঃ সদসি জৃম্ভোদ্গারকাসশ্বাসক্ষবথূনুত্সৃজেত্, ন পর্যঙ্কিকাবষ্টম্ভপাদপ্রসারণানি গুরুসন্নিধৌ কুর্যাত্ ||৯৪||
न भूमिं विलिखेत्, नासंवृतमुखः सदसि जृम्भोद्गारकासश्वासक्षवथूनुत्सृजेत्, न पर्यङ्किकावष्टम्भपादप्रसारणानि गुरुसन्निधौ कुर्यात् ||९४||
🔊 Audio coming soon
বিলিখেত্ নখাদিভিঃ| ন সভাযামসংবৃতমুখো জৃম্ভাদীন্ বিসৃজেত্| ক্ষবথুঃ ছিক্কা| পর্যঙ্কিকা পর্যস্তিকা| অবষ্টম্ভোঽগ্রপৃষ্ঠপার্শ্বস্থিতস্তম্ভাদিষ্ববলম্বনং; পরমার্থতস্তু অবষ্টম্ভোঽবলম্বো ন পর্যাযশব্দঃ||৯৪||
Adhikarana 42 (95) · Śloka 95
ন বালকর্ণনাসাস্রোতোদশনাক্ষিবিবরাণ্যভিকুষ্ণীযাত্ , ন বীজযেত্ কেশমুখনখবস্ত্রগাত্রাণি, ন গাত্রনখবক্ত্রবাদিত্রং কুর্যাত্, ন কাষ্ঠলোষ্টতৃণাদীনভিহন্যাচ্ছিন্দ্যাদ্ভিন্দ্যাদ্বা ||৯৫||
न बालकर्णनासास्रोतोदशनाक्षिविवराण्यभिकुष्णीयात् , न वीजयेत् केशमुखनखवस्त्रगात्राणि, न गात्रनखवक्त्रवादित्रं कुर्यात्, न काष्ठलोष्टतृणादीनभिहन्याच्छिन्द्याद्भिन्द्याद्वा ||९५||
🔊 Audio coming soon
স্রোতাংসি পাযূপস্থাদীনি, এতেষাং বিবরাণি ছিদ্রাণি; নাভিকুষ্ণীযাত্ নাভিকর্ষেত্, ন মলং স্পৃশেদিত্যর্থঃ| ন বীজযেত্ ন কম্পযেত্| ন গাত্রবাদিত্রং ন গাত্রং বাদ্যভাণ্ডং কুর্যাত্||৯৫||
Adhikarana 43 (96) · Śloka 96
ন প্রতিবাতাতপং সেবেত, ন ভুক্তমাত্রোঽগ্নিমুপাসীত, নোত্কটকাল্পকাষ্ঠাসনমধ্যাসীত, ন গ্রীবাং বিষমং ধারযেত্, ন বিষমকাযঃ ক্রিযাং ভজেত ভুঞ্জীত বা, ন প্রততমীক্ষেত বিশেষাজ্জ্যোতির্ভাস্করসূক্ষ্মচলভ্রান্তানি, ন ভারং শিরসা বহেত্, ন স্বপ্নজাগরণশযনাসনস্থানচঙ্ক্রমণযানবাহনপ্রধাবনলঙ্ঘনপ্লবনপ্রতরণহাস্যভাষ্যব্যবাযব্যাযামাদীনুচিতানপ্যতিসেবেত ||৯৬||
न प्रतिवातातपं सेवेत, न भुक्तमात्रोऽग्निमुपासीत, नोत्कटकाल्पकाष्ठासनमध्यासीत, न ग्रीवां विषमं धारयेत्, न विषमकायः क्रियां भजेत भुञ्जीत वा, न प्रततमीक्षेत विशेषाज्ज्योतिर्भास्करसूक्ष्मचलभ्रान्तानि, न भारं शिरसा वहेत्, न स्वप्नजागरणशयनासनस्थानचङ्क्रमणयानवाहनप्रधावनलङ्घनप्लवनप्रतरणहास्यभाष्यव्यवायव्यायामादीनुचितानप्यतिसेवेत ||९६||
🔊 Audio coming soon
ন প্রতিবাতাতপমিতি অভিমুখং বাতমাতপং বা ন সেবেত| নাধ্যাসীত নোপবিশেদিত্যর্থঃ| আসনশব্দ উত্কটকাদিভিস্ত্রিভিঃ সহ প্রত্যেকমভিসম্বধ্যতে| প্রততং বিস্ফারিতাক্ষং নেক্ষেত; জ্যোতিরগ্নিশিখা, তারকেত্যন্যে| দিবা স্বপ্নজাগরণাদীনি স্বভ্যস্তান্যপ্যেতানি হিতাহিতানি নাতিক্রান্তপ্রমাণং ভজেত্| স্থানম্ ঊর্ধ্বস্থিতিং, চঙ্ক্রমণং গতাগতং, যানং রথাদি, বাহনং হস্ত্যশ্বাদি, লঙ্ঘনং খেযগর্তাদ্যুত্ক্রমণং, প্লবনম্ উত্প্লুত্যোত্প্লুত্য গমনং, প্রতরণং নদ্যাদীনাং বাহুভ্যাং তরণম্||৯৬||
Adhikarana 44 (97) · Śloka 97
উচিতাদপ্যহিতাত্ ক্রমশো বিরমেত্, হিতমনুচিতমপ্যাসেবেত ক্রমশঃ, ন চৈকান্ততঃ পাদহীনাত্ ||৯৭||
उचितादप्यहितात् क्रमशो विरमेत्, हितमनुचितमप्यासेवेत क्रमशः, न चैकान्ततः पादहीनात् ||९७||
🔊 Audio coming soon
স্বভ্যস্তাদপি যবকাদেঃ ক্রমেণৈব নিবর্তযেদিত্যর্থঃ; সহসা পরিবর্তনে রোগো মরণং বা| ক্রমশো হিতং রক্তশাল্যাদি| অনুচিতম্ অনভ্যস্তং, ক্রমশ ইতি তত্রাভ্যস্তাদহিতাদ্বিরামে যথাক্রমং পাদস্যাপচযঃ, তথা তস্যাভ্যসনীযস্য যথাক্রমমভ্যাসে পাদস্যৈব প্রক্ষেপঃ; এবং হিতাহিতযোশ্চতুর্থাংশস্য ষোডশাংশস্য বাঽঽবাপোদ্ধারাভ্যাং ষোডশাহোভিরহিতস্য সর্বস্য ত্যাগো হিতস্য সর্বস্য প্রাপ্তিরিতি||৯৭||
Adhikarana 45 (98) · Śloka 98
নাবাক্শিরাঃ শযীত, ন ভিন্নপাত্রে ভুঞ্জীত, ন বিনা পাত্রেণ, নাঞ্জলিপুটেনাপঃ পিবেত্, কালে হিতমিতস্নিগ্ধমধুরপ্রাযমাহারং বৈদ্যপ্রত্যবেক্ষিতমশ্নীযাত্, গ্রামগণগণিকাপণিকশত্রুসত্রশঠপতিতভোজনানি পরিহরেত্, শেষাণ্যপি চানিষ্টরূপরসগন্ধস্পর্শশব্দমানসানি, অন্যান্যেবঙ্গুণান্যপি সম্ভ্রমদত্তানি, (তান্যপি) মক্ষিকাবালোপহতানি , নাপ্রক্ষালিতপাদো ভুঞ্জীত ন মূত্রোচ্চারপীডিতো ন সন্ধ্যযোর্নানুপাশ্রিতো নাতীতকালং হীনমতিমাত্রং (নোদ্ধৃতস্নেহং) চেতি ||৯৮||
नावाक्शिराः शयीत, न भिन्नपात्रे भुञ्जीत, न विना पात्रेण, नाञ्जलिपुटेनापः पिबेत्, काले हितमितस्निग्धमधुरप्रायमाहारं वैद्यप्रत्यवेक्षितमश्नीयात्, ग्रामगणगणिकापणिकशत्रुसत्रशठपतितभोजनानि परिहरेत्, शेषाण्यपि चानिष्टरूपरसगन्धस्पर्शशब्दमानसानि, अन्यान्येवङ्गुणान्यपि सम्भ्रमदत्तानि, (तान्यपि) मक्षिकाबालोपहतानि , नाप्रक्षालितपादो भुञ्जीत न मूत्रोच्चारपीडितो न सन्ध्ययोर्नानुपाश्रितो नातीतकालं हीनमतिमात्रं (नोद्धृतस्नेहं) चेति ||९८||
🔊 Audio coming soon
অবাক্শিরা অধঃশিরা ইত্যর্থঃ| ভিন্নপাত্রে বিদীর্ণপাত্রে| প্রত্যবেক্ষিতং বিলোকিতম্| গ্রামস্থাঃ সর্বে মিলিত্বা ক্বচিত্ কিঞ্চিদ্ যদ্ভোজনং সম্পাদযন্তি তদ্গ্রামভোজনম্| গণা কথকচারণাদযঃ, গণিকা বেশ্যা, পণিক ইতরবণিক্, শত্রুঃ বিপক্ষঃ, সত্রং যজ্ঞঃ, পতিতঃ স্বকীযাচারভ্রষ্টঃ| অনিষ্টশব্দো রূপাদিভিঃ সহ প্রত্যেকং সম্বধ্যতে| অনিষ্টশব্দঃ কুত্সিতধ্বনিঃ; অনিষ্টমানসং চিত্তানভিপ্রেতম্| অন্যানীতি অনিষ্টরূপাদিভ্যোঽন্যানি ইষ্টরূপরসাদীনি বা, এবঙ্গুণান্যপীতি গ্রামাদিভ্যঃ শেষাণ্যপীত্যর্থঃ| সম্ভ্রমদত্তানীতি মিলিত্বা দত্তানি, ভোজনানি পরিহরেদিতি শেষঃ| (সর্বাণ্যেব কিং ত্বরযা দত্তানি পরিহরেদিত্যাহ- তান্যপীত্যাদি|) উচ্চারো বিষ্ঠা| নানুপাশ্রিত আশ্রিতান্বিতো ন ভুঞ্জীত| নাতীতকালং নাতিক্রান্তকালমিত্যর্থঃ, (সস্নেহবস্তুনি পীডনেন স্নেহাদ্ভিন্নং যত্তদুদ্ধৃতস্নেহম্|)||৯৮||
Adhikarana 46 (99-100) · Śloka 100
ন ভুঞ্জীতোদ্ধৃতস্নেহং নষ্টং পর্যুষিতং পযঃ | ন নক্তং দধি ভুঞ্জীত ন চাপ্যঘৃতশর্করম্ ||৯৯|| নামুদ্গযূষং নাক্ষৌদ্রং নোষ্ণং নামলকৈর্বিনা | অন্যথা জনযেত্ কুষ্ঠবিসর্পাদীন্ গদান্ বহূন্ | নাত্মানমুদকে পশ্যেন্ন নগ্নঃ প্রবিশেজ্জলম্ ||১০০||
न भुञ्जीतोद्धृतस्नेहं नष्टं पर्युषितं पयः | न नक्तं दधि भुञ्जीत न चाप्यघृतशर्करम् ||९९|| नामुद्गयूषं नाक्षौद्रं नोष्णं नामलकैर्विना | अन्यथा जनयेत् कुष्ठविसर्पादीन् गदान् बहून् | नात्मानमुदके पश्येन्न नग्नः प्रविशेज्जलम् ||१००||
🔊 Audio coming soon
উদ্ধৃতস্নেহং চ সুমন্থনেনৈব স্নেহাদ্ভিন্নম্, অত্র স্নেহো ঘৃতম্| ন নক্তং দধীত্যাদি| ন চাপ্যলবণং ন বাঽপ্যুদকবর্জিতং দধি ভুঞ্জীত||৯৯-১০০||
Adhikarana 47 (101) · Śloka 101
দ্যূতমদ্যাতিসেবাপ্রতিভূত্বসাক্ষিত্বসমাহ্বানগোষ্ঠীবাদিত্রাণি ন সেবেত, স্রজং ছত্রোপানহৌ কনকমতীতবাসাংসি ন চান্যৈর্ধৃতানি ধারযেত্, ব্রাহ্মণমগ্নিং গাং চ নোচ্ছিষ্টঃ স্পৃশেত্ ||১০১||
द्यूतमद्यातिसेवाप्रतिभूत्वसाक्षित्वसमाह्वानगोष्ठीवादित्राणि न सेवेत, स्रजं छत्रोपानहौ कनकमतीतवासांसि न चान्यैर्धृतानि धारयेत्, ब्राह्मणमग्निं गां च नोच्छिष्टः स्पृशेत् ||१०१||
🔊 Audio coming soon
প্রতিভূঃ লগ্নকঃ, নিষ্কারণমাহূয স্বেচ্ছালাপকথনং সমাহ্বানম্| বাদিত্রাণি মৃদঙ্গাদীনি| অতীতবাসাংসি জীর্ণবস্ত্রাণি, অন্যৈর্বিধৃতানি ন প্রক্ষাল্য ধারযেত্||১০১||
Adhikarana 48 (102-106) · Śloka 107
ভবন্তি চাত্র- যস্মিন্ যস্মিন্নৃতৌ যে যে দোষাঃ কুপ্যন্তি দেহিনাম্ | তেষু তেষু প্রদাতব্যা রসাস্তে তে বিজানতা ||১০২|| বর্ষাসু ন পিবেত্তোযং পিবেচ্ছরদি মাত্রযা | বর্ষাসু চতুরো মাসান্ মাত্রাবদুদকং পিবেত্ ||১০৩|| উষ্ণং হৈমে বসন্তে চ কামং গ্রীষ্মে তু শীতলম্ | হেমন্তে চ বসন্তে চ সীধ্বরিষ্টৌ পিবেন্নরঃ ||১০৪|| শৃতশীতং পযো গ্রীষ্মে প্রাবৃট্কালে রসং পিবেত্ | যূষং বর্ষতি, তস্যান্তে প্রপিবেচ্ছীতলং জলম্ ||১০৫|| স্বস্থ এবমতোঽন্যস্তু দোষাহারগতানুগঃ | স্নেহং সৈন্ধবচূর্ণেন পিপ্পলীভিশ্চ সংযুতম্ ||১০৬|| পিবেদগ্নিবিবৃদ্ধ্যর্থং ন চ বেগান্ বিধারযেত্ |১০৭|
भवन्ति चात्र- यस्मिन् यस्मिन्नृतौ ये ये दोषाः कुप्यन्ति देहिनाम् | तेषु तेषु प्रदातव्या रसास्ते ते विजानता ||१०२|| वर्षासु न पिबेत्तोयं पिबेच्छरदि मात्रया | वर्षासु चतुरो मासान् मात्रावदुदकं पिबेत् ||१०३|| उष्णं हैमे वसन्ते च कामं ग्रीष्मे तु शीतलम् | हेमन्ते च वसन्ते च सीध्वरिष्टौ पिबेन्नरः ||१०४|| शृतशीतं पयो ग्रीष्मे प्रावृट्काले रसं पिबेत् | यूषं वर्षति, तस्यान्ते प्रपिबेच्छीतलं जलम् ||१०५|| स्वस्थ एवमतोऽन्यस्तु दोषाहारगतानुगः | स्नेहं सैन्धवचूर्णेन पिप्पलीभिश्च संयुतम् ||१०६|| पिबेदग्निविवृद्ध्यर्थं न च वेगान् विधारयेत् |१०७|
🔊 Audio coming soon
অন্নং নিযম্য কালেন বর্ষাদিঋতুলক্ষণেনাপি পানং নিযমযন্নাহ- বর্ষাস্বিত্যাদি| ন পিবেত্ ঈষত্ পিবেদিত্যর্থঃ| পিবেচ্ছরদি মাত্রযেতি মাত্রাশব্দোঽল্পবচনঃ| এতেনৈতদুক্তং ভবতি- কামমভিলাষপূর্ণং, ন ত্বতিশযেন| সীধ্বরিষ্টৌ মদ্যারিষ্টযোরুদকং পিবেদিত্যর্থঃ| সীধুঃ সস্যকঃ, অরিষ্টঃ অভযারিষ্টাদিকঃ, পযোঽত্র ক্ষীরম্| তস্যান্তে বর্ষান্তে| অতোঽন্য ইতি অস্বস্থঃ| দোষাহারগতানুগো ভবেত্ দোষা বাতাদযঃ; তত্র বাতে স্নিগ্ধমুষ্ণং, পিত্তে শীতং, কফে রূক্ষোষ্ণম্; আহারগতানুগ ইতি ‘উষ্ণোদকানুপানং তু স্নেহানামথ শস্যতে’ ইত্যাদি| বেগবিধারণং হি অগ্নিনাশনম্||১০২-১০৬||-
Adhikarana 49 (107-109) · Śloka 109
অগ্নিদীপ্তিকরং নৄণাং রোগাণাং শমনং প্রতি ||১০৭|| প্রাবৃট্শরদ্বসন্তেষু সম্যক্ স্নেহাদিমাচরেত্ | কফে প্রচ্ছর্দনং পিত্তে বিরেকো বস্তিরীরণে ||১০৮|| শস্যতে ত্রিষ্বপি সদা ব্যাযামো দোষনাশনঃ | ভুক্তং বিরুদ্ধমপ্যন্নং ব্যাযামান্ন প্রদুষ্যতি ||১০৯||
अग्निदीप्तिकरं नॄणां रोगाणां शमनं प्रति ||१०७|| प्रावृट्शरद्वसन्तेषु सम्यक् स्नेहादिमाचरेत् | कफे प्रच्छर्दनं पित्ते विरेको बस्तिरीरणे ||१०८|| शस्यते त्रिष्वपि सदा व्यायामो दोषनाशनः | भुक्तं विरुद्धमप्यन्नं व्यायामान्न प्रदुष्यति ||१०९||
🔊 Audio coming soon
স্বস্থাতুরযোরুভযোরপি বক্ষ্যমাণং শোধনং নির্দিশন্নাহ- কফ ইত্যাদি| ঈরণে বাতে| অপিশব্দো ব্যাযামক্রিযাফলানাং প্রাগুক্তানামপীহানুবর্তনং সমুচ্চিনোতি| ন প্রদুষ্যতি ন দোষকরং ভবতি||১০৭-১০৯||
Adhikarana 50 (110-129) · Śloka 130
উত্সর্গমৈথুনাহারশোধনে স্যাত্তু তন্মনাঃ | নেচ্ছেদ্দোষচযাত্ প্রাজ্ঞঃ পীডাং বা কাযমানসীম্ ||১১০|| অতিস্ত্রীসম্প্রযোগাচ্চ রক্ষেদাত্মানমাত্মবান্ | শূলকাসজ্বরশ্বাসকার্শ্যপাণ্ড্বামযক্ষযাঃ ||১১১|| অতিব্যবাযাজ্জাযন্তে রোগাশ্চাক্ষেপকাদযঃ | আযুষ্মন্তো মন্দজরা বপুর্বর্ণবলান্বিতাঃ ||১১২|| স্থিরোপচিতমাংসাশ্চ ভবন্তি স্ত্রীষু সংযতাঃ | ত্রিভিস্ত্রিভিরহোভির্বা সমীযাত্ প্রমদাং নরঃ ||১১৩|| সর্বেষ্বৃতুষু, ঘর্মেষু পক্ষাত্ পক্ষাদ্ব্রজেদ্বুধঃ | রজস্বলামকামাং চ মলিনামপ্রিযাং তথা ||১১৪|| বর্ণবৃদ্ধাং বযোবৃদ্ধাং তথা ব্যাধিপ্রপীডিতাম্ | হীনাঙ্গীং গর্ভিণীং দ্বেষ্যাং যোনিদোষসমন্বিতাম্ ||১১৫|| সগোত্রাং গুরুপত্নীং চ তথা প্রব্রজিতামপি | সন্ধ্যাপর্বস্বগম্যাং চ নোপেযাত্ প্রমদাং নরঃ ||১১৬|| গোসর্গে চার্ধরাত্রে চ তথা মধ্যন্দিনেষু চ | লজ্জাসমাবহে দেশে বিবৃতেঽশুদ্ধ এব চ ||১১৭|| ক্ষুধিতো ব্যাধিতশ্চৈব ক্ষুব্ধচিত্তশ্চ মানবঃ | বাতবিণ্মূত্রবেগী চ পিপাসুরতিদুর্বলঃ ||১১৮|| তির্যগ্যোনাবযোনৌ চ প্রাপ্তশুক্রবিধারণম্ | দুষ্টযোনৌ বিসর্গং তু বলবানপি বর্জযেত্ ||১১৯|| রেতসশ্চাতিমাত্রং তু মূর্ধাবরণমেব চ | স্থিতাবুত্তানশযনে বিশেষেণৈব গর্হিতম্ ||১২০|| ক্রীডাযামপি মেধাবী হিতার্থী পরিবর্জযেত্ | রজস্বলাং প্রাপ্তবতো নরস্যানিযতাত্মনঃ ||১২১|| দৃষ্ট্যাযুস্তেজসাং হানিরধর্মশ্চ ততো ভবেত্ | লিঙ্গিনীং গুরুপত্নীং চ সগোত্রামথ পর্বসু ||১২২|| বৃদ্ধাং চ সন্ধ্যযোশ্চাপি গচ্ছতো জীবিতক্ষযঃ | গর্ভিণ্যা গর্ভপীডা স্যাদ্ ব্যাধিতাযাং বলক্ষযঃ ||১২৩|| হীনাঙ্গীং মলিনাং দ্বেষ্যাং কামং বন্ধ্যামসংবৃতে | দেশেঽশুদ্ধে চ শুক্রস্য মনসশ্চ ক্ষযো ভবেত্ ||১২৪|| ক্ষুধিতঃ ক্ষুব্ধচিত্তশ্চ মধ্যাহ্নে তৃষিতোঽবলঃ | স্থিতশ্চ হানিং শুক্রস্য বাযোঃ কোপং চ বিন্দতি ||১২৫|| অতিপ্রসঙ্গাদ্ভবতি শোষঃ শুক্রক্ষযাবহঃ | ব্যাধিতস্য রুজা প্লীহ্নি মৃত্যুর্মূর্চ্ছা চ জাযতে ||১২৬|| প্রত্যূষস্যর্ধরাত্রে চ বাতপিত্ত প্রকুপ্যতঃ | তির্যগ্যোনাবযোনৌ চ দুষ্টযোনৌ তথৈব চ ||১২৭|| উপদংশস্তথা বাযোঃ কোপঃ শুক্রস্য চ ক্ষযঃ | উচ্চারিতে মূত্রিতে চ রেতসশ্চ বিধারণে ||১২৮|| উত্তানে চ ভবেচ্ছীধ্রং শুক্রাশ্মর্যাস্তু সম্ভবঃ | সর্বং পরিহরেত্তস্মাদেতল্লোকদ্বযেঽহিতম্ ||১২৯|| শুক্রং চোপস্থিতং মোহান্ন সন্ধার্যং কথঞ্চন |১৩০|
उत्सर्गमैथुनाहारशोधने स्यात्तु तन्मनाः | नेच्छेद्दोषचयात् प्राज्ञः पीडां वा कायमानसीम् ||११०|| अतिस्त्रीसम्प्रयोगाच्च रक्षेदात्मानमात्मवान् | शूलकासज्वरश्वासकार्श्यपाण्ड्वामयक्षयाः ||१११|| अतिव्यवायाज्जायन्ते रोगाश्चाक्षेपकादयः | आयुष्मन्तो मन्दजरा वपुर्वर्णबलान्विताः ||११२|| स्थिरोपचितमांसाश्च भवन्ति स्त्रीषु संयताः | त्रिभिस्त्रिभिरहोभिर्वा समीयात् प्रमदां नरः ||११३|| सर्वेष्वृतुषु, घर्मेषु पक्षात् पक्षाद्व्रजेद्बुधः | रजस्वलामकामां च मलिनामप्रियां तथा ||११४|| वर्णवृद्धां वयोवृद्धां तथा व्याधिप्रपीडिताम् | हीनाङ्गीं गर्भिणीं द्वेष्यां योनिदोषसमन्विताम् ||११५|| सगोत्रां गुरुपत्नीं च तथा प्रव्रजितामपि | सन्ध्यापर्वस्वगम्यां च नोपेयात् प्रमदां नरः ||११६|| गोसर्गे चार्धरात्रे च तथा मध्यन्दिनेषु च | लज्जासमावहे देशे विवृतेऽशुद्ध एव च ||११७|| क्षुधितो व्याधितश्चैव क्षुब्धचित्तश्च मानवः | वातविण्मूत्रवेगी च पिपासुरतिदुर्बलः ||११८|| तिर्यग्योनावयोनौ च प्राप्तशुक्रविधारणम् | दुष्टयोनौ विसर्गं तु बलवानपि वर्जयेत् ||११९|| रेतसश्चातिमात्रं तु मूर्धावरणमेव च | स्थितावुत्तानशयने विशेषेणैव गर्हितम् ||१२०|| क्रीडायामपि मेधावी हितार्थी परिवर्जयेत् | रजस्वलां प्राप्तवतो नरस्यानियतात्मनः ||१२१|| दृष्ट्यायुस्तेजसां हानिरधर्मश्च ततो भवेत् | लिङ्गिनीं गुरुपत्नीं च सगोत्रामथ पर्वसु ||१२२|| वृद्धां च सन्ध्ययोश्चापि गच्छतो जीवितक्षयः | गर्भिण्या गर्भपीडा स्याद् व्याधितायां बलक्षयः ||१२३|| हीनाङ्गीं मलिनां द्वेष्यां कामं वन्ध्यामसंवृते | देशेऽशुद्धे च शुक्रस्य मनसश्च क्षयो भवेत् ||१२४|| क्षुधितः क्षुब्धचित्तश्च मध्याह्ने तृषितोऽबलः | स्थितश्च हानिं शुक्रस्य वायोः कोपं च विन्दति ||१२५|| अतिप्रसङ्गाद्भवति शोषः शुक्रक्षयावहः | व्याधितस्य रुजा प्लीह्नि मृत्युर्मूर्च्छा च जायते ||१२६|| प्रत्यूषस्यर्धरात्रे च वातपित्त प्रकुप्यतः | तिर्यग्योनावयोनौ च दुष्टयोनौ तथैव च ||१२७|| उपदंशस्तथा वायोः कोपः शुक्रस्य च क्षयः | उच्चारिते मूत्रिते च रेतसश्च विधारणे ||१२८|| उत्ताने च भवेच्छीध्रं शुक्राश्मर्यास्तु सम्भवः | सर्वं परिहरेत्तस्मादेतल्लोकद्वयेऽहितम् ||१२९|| शुक्रं चोपस्थितं मोहान्न सन्धार्यं कथञ्चन |१३०|
🔊 Audio coming soon
শোধনে বমনবিরেচনে| তন্মনা উত্সর্গাদিমনা নান্যচিত্ত ইত্যর্থঃ| দোষচযাদিশঙ্কামপ্রাপ্তঃ প্রাজ্ঞঃ শোধনাদিনা কাযমানসীং পীডাং নেচ্ছেদিত্যর্থঃ| অত্র আত্মা শরীরম্| আত্মবান্ বুদ্ধিবান্| স্থিরোপচিতমাংসা ইতি কঠিনস্থিরমাংসা ইত্যর্থঃ| সমীযাত্ গচ্ছেত্| অকামাং মৈথুনানভিলাষিণীম্| বর্ণবৃদ্ধাং বর্ণশ্রেষ্ঠামিত্যর্থঃ, যথা শূদ্রো ন বৈশ্যাং, বৈশ্যো ন ক্ষত্রিযাং, ক্ষত্রিযো ন ব্রাহ্মণীমিতি| দ্বেষ্যাং শত্রুভূতাম্| প্রব্রজিতাং গৃহীতব্রতাম্| সন্ধ্যাপর্বসু পক্ষান্তরে নান্বষ্টকাদিষু| অগম্যা স্বসৃদুহিতৃপ্রভৃতযঃ| নোপেযাত্ ন গচ্ছেত্| গোসর্গে প্রভাতে| বিবৃতে অনাচ্ছাদিতে দেশে ইত্যর্থঃ| অশুদ্ধে মনসোঽপ্রিযে কলুষিতদেশে ইত্যর্থঃ| ক্ষুব্ধচিত্তঃ ভীতচিত্তঃ | তির্যগ্যোনিঃ অজাদিঃ| অযোনি মুখাদিমৈথুনং, যথা দাক্ষিণাত্যাঃ স্ত্রিযো মুখে মৈথুনং কারযন্তি| প্রাপ্তশুক্রবিধারণমিতি এষু শুক্রপাতো ন কার্য ইত্যর্থঃ, চলিতশুক্রবিধারণং ন কার্যমিতি বাঽর্থঃ| দুষ্টযোনৌ স্বভাবদুষ্টযোনৌ| রেতসশ্চাতিমাত্রং তু বিসর্গং বিবর্জযেদিতি সম্বন্ধঃ| মূর্ধাবরণং লিঙ্গমণেরাবরণং, যথা দাক্ষিণাত্যাঃ কৃত্ত্রিমমণিং কারযন্তীতি জেজ্জটঃ; ক্বচিত্ পুস্তকে ‘মূর্ধাহননমেব চ’ ইতি পাঠঃ, তত্র রহসি হর্ষেণ শিরস্তাডনং পরিত্যজেত্| যথাঽঽহ বৃদ্ধবাগ্ভটঃ “মূর্ধাভিঘাতং পরিহরেত্”, (অ.সং.সূ.অ.৯) লঘুবাগ্ভটোঽপি,- “পর্বাণ্যনঙ্গং দিবসং শিরোহৃদযতাডনম্” (বা.সূ.অ.৭) ইতি | স্থিতাবিতি স্থানং স্থিতিরূর্ধ্বীভাবঃ, তত্র রেতসো বিসর্গং বর্জযেত্| উত্তানশযনেঽপি রেতসো বিসর্গং পরিবর্জযেত্| এতযোঃ ক্রীডাযামপি রেতোবিসর্গং পরিবর্জযেত্| অনিযতাত্মনঃ অজিতেন্দ্রিযস্য| বৃদ্ধাং বর্ণবযোভ্যাং বৃদ্ধাম্| অসংবৃতে দেশে অনাচ্ছাদিতদেশে ইত্যর্থঃ| অশুদ্ধে কলুষে ইত্যর্থঃ| মনসঃ ক্ষযোঽপ্রকর্ষতা, বন্ধ্যামিতি যদ্যপি উদ্দেশশাস্ত্রে বন্ধ্যাপদং নাস্তি তথাঽপি যোনিদোষসমন্বিতামিত্যনেন পদেনোপগৃহীতম্ | উচ্চারিতে পুরীষবেগবতি| মূত্রিতে মূত্রবেগযুক্তে| অধঃস্থিতঃ পুমানুত্তানঃ, তদুপরিস্থা নারী, যদ্যপি অপ্রিযাঽগম্যামূর্ধাভিঘাতানাং সেবনে দূষণং নাভিহিতং, তথাঽপ্যপ্রিযাযাং দ্বেষ্যামিব শুক্রস্য মনসশ্চ ক্ষযো ভবতি, অগম্যাসু চ বর্ণবৃদ্ধাযামিব জীবিতক্ষযঃ, মূর্ধাভিঘাতে চ তন্ত্রান্তরাদ্দূষণং জ্ঞেযং, তথা চ বৃদ্ধবাগ্ভটঃ,- “তিমিরাদিগদোত্পত্তির্মূর্ধাভিহননাদ্ ধ্রুবম্” (অ.সং.সূ.অ.৯)- ইতি||১১০-১২৯||-
Adhikarana 51 (130-132) · Śloka 132
বযোরূপগুণোপেতাং তুল্যশীলাং কুলান্বিতাম্ ||১৩০|| অভিকামোঽভিকামাং তু হৃষ্টো হৃষ্টামলঙ্কৃতাম্ | সেবেত প্রমদাং যুক্ত্যা বাজীকরণবৃংহিতঃ ||১৩১|| ভক্ষ্যাঃ সশর্করাঃ ক্ষীরং সসিতং রস এব চ | স্নানং সব্যজনং স্বপ্নো ব্যবাযান্তে হিতানি তু ||১৩২||
वयोरूपगुणोपेतां तुल्यशीलां कुलान्विताम् ||१३०|| अभिकामोऽभिकामां तु हृष्टो हृष्टामलङ्कृताम् | सेवेत प्रमदां युक्त्या वाजीकरणबृंहितः ||१३१|| भक्ष्याः सशर्कराः क्षीरं ससितं रस एव च | स्नानं सव्यजनं स्वप्नो व्यवायान्ते हितानि तु ||१३२||
🔊 Audio coming soon
গুণো দাক্ষিণ্যাদিঃ| তুল্যশীলাং সমানস্বভাবাম্| অভিকামঃ সাভিলাষঃ| অভিকামাং বৃষস্যন্তীং সকামামিত্যর্থঃ| রসো মাংসরসঃ| ব্যজনং ব্যজনানিলঃ| ননু চাস্য বিধেরসম্ভব এব, তথাহি- রাত্রাবেবাভিগমনমুক্তং, রাত্রৌ চ স্নানভোজনাদিভিরজীর্ণাদিদোষঃ স্যাত্, তত্ কথং মৈথুনান্তে স্নানাদিবিধিঃ? সত্যম্, অধিকশুক্রাণাং নরাণাং দিবা মৈথুনগামিনামযং স্নানবিধির্ব্যবস্থাপিত ইতি ভাবঃ; অথবা গ্রীষ্মে সাযং স্নানং ভোজনং চ সম্ভাব্যতে এবেতি ন দোষঃ||১৩০-১৩২||
Adhikarana 52 (133) · Śloka 133
মুখমাত্রং সমাসেন সদ্বৃত্তস্যৈতদীরিতম্ | আরোগ্যমাযুরর্থো বা নাসদ্ভিঃ প্রাপ্যতে নৃভিঃ ||১৩৩||
मुखमात्रं समासेन सद्वृत्तस्यैतदीरितम् | आरोग्यमायुरर्थो वा नासद्भिः प्राप्यते नृभिः ||१३३||
🔊 Audio coming soon
ইদানীমতিবিস্তৃতত্বাত্ প্রধানমাত্রমেবৈতদীরিতং ন পুনরত্রাপ্রধানমপীত্যাহ- মুখমাত্রমিত্যাদি| মুখমাত্রং প্রধানমাত্রং, সমাসেন সঙ্ক্ষেপেণ| নাসদ্ভিঃ অনাচারৈঃ| নৃভিঃ পুরুষৈঃ| (কেচিদস্মিন্নধ্যাযে ‘যস্মিন্ যস্মিন্নৃতৌ’ ইত্যাদিকং তথা স্ত্রীপ্রযোগক্রমং চাধীযন্তে; তদসম্যক্, পঞ্জিকাযাং দূষিতত্বাত্)||১৩৩||
Adhikarana puShpikA · Śloka 24
ইতি সুশ্রুতসংহিতাযাং চিকিত্সাস্থানেঽনাগতাবাধচিকিত্সিতং নাম চতুর্বিংশোঽধ্যাযঃ ||২৪||
इति सुश्रुतसंहितायां चिकित्सास्थानेऽनागताबाधचिकित्सितं नाम चतुर्विंशोऽध्यायः ||२४||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে চতুর্বিংশতিতমোঽধ্যাযঃ||২৪||